post

Интернет бизниси – Информациски производи 3

Како дел од серијалот за интернет бизниси на претприемач стигнавме до третиот дел од интернет бизнис за информациски производи. Претходно имавте можност да прочитате за основите на информациски производи во Интернет бизниси – информациски производи 1 и процесот на креација на информациски производ во Интернет бизниси – информациски производ 2.

Интернет бизниси - информациски производи

Во овој трет дел концентрацијата ќе бидне на технологијата која ќе ни е потребна за имплементација на овој тип на интернет бизнисот.

1. Аутореспондер

За аутореспондерот во неколку наврати на претприемач пишувавме. Во бизнис поимникот за аутореспондер напишав:

Аутореспондер или во буквален превод автоматски одговарач претставува компјутерски програм кој се користи автоматски да одговара на e-mail-ови пратени на него. Големо користење најдоа во интернет маркетингот или поточно е-маил маркетингот за праќање на меилови до потенцијални потрошувачи.

Едноставно кажано аутореспондерот може да се искористи на повеќе начини во бизнис со информациски производи. Еве неколку можности како пример:

  • Промоција на Вашиот информациски производ.
  • Испорака на Вашиот информациски производ.
  • Додавање на дополнителна вредност на основниот информациски производ.
  • Градење на листа за Вашиот следен производ.

Аутореспондерот е нешто што мора да го имате.

Постојат бесплатни начини за користење на аутореспондер во вид на скрипта која ја инсталирате на Вашиот веб сервер и го подесувате. Главниот недостаток на овој начин е што повеќето од Вашите mail-ови ќе бидат класифицирани како spam и голема е веројатноста дека нема да стигнат до посакуваната дестинација. Затоа постојат специјализирани компании кои ја нудат оваа услуга која во зависност од големината на листата цената е 20$ месечно. Како едни од најреномирани аутореспондери во светски рамки се Aweber и Getresponse кои сите професионалци од област на интернет бизниси ги препорачуваат.

2. Алатки за изработка на производот

Adobe Acrobat Professional е на прво место за изработка е-книга како информациски производ. Можностите се навистина огромни на оваа алатка, но од друга страна навистина е скап и изнесува околу 450$.

Како втора опција може да се користи MS Word за изработка на е-книгата и со разни додатоци во вид на export in pdf (побарајте на Google) и ќе дојдете до повеќе бесплатни алатки. Оваа опција има недостатоци што одредени елементи од MS Word нема да можат да се префрлат во pdf форма.

Една од најдобрите опции и нормално најевтина (бесплатна) е користење на Open Office за изработка на е-книгата. Во Open Office постои интегрирана опција за export in pdf при што ексортираниот документ ќебиде со сите нишани.

За изработка на видео, односно видео во вид на Screen Capture најоптимална алатка е CamStudio, кое има бесплатна верзија. Од друга страна професионалната верзија не е скапа (изнесува околу 30$).

Кога станува збор за аудио материјал стандард за испорака претставува mp3 формат. За манипулација со аудио материјалите како информациски производ можете да го користите софтверот наречен Audacity кој е бесплатен аудио едитор и рекордер.

3. Хардвер

Кога станува збор за хардверските алатки кои ќе ви бидат потребни би ги издвоил веб камера и микрофон. Во зависност колку пари сакате да потрошите таков ќе биде и квалитетот на информациските производи. Не трошете пари на оние евтини микрофони бидејќи јас купив 10-тина и квалитетот е за никаде. Имате опција и да набавите поквалитетна камера со ознака Pro во која ќе биде интегриран и поквалитетен микрофон.

4. Систем за наплата

Најдобриот систем за наплата при продажба на информациски производи е Click Bank кој е специјализиран само за овие производи. Потребно е да отворите акаунт со еднократно плаќање од 50-тина долари и потоа системот ви наплаќа процент од продажба. Недостаток е што производот мора да биде на еден од јазиците кои ги подржува ClickBank. Ова значи дека доколку сакате да продавате производ на македонски јазик нема да можете да го користите.

Добар систем за наплата е PayPal кој за жал ние од Македониај сеуште не можеме да го користиме.

Втората опција која Ви стои на располагање е Casys. Ова е македонски онлајн процесор на кредитни картички. Недостаток е што целиот процес на интеграција на Вашиот производ со нивниот систем останува на Вас. Па ќе имате потреба и од програмерски вештини.

Ова се основните алатки кои ќе ви бидат потребни. Во зависност од типот на информацискиот производ ќе зависат и алатките кои ќе ги користите.

post

Интернет бизниси – Информациски производи 2

Ќе продолжиме вториот напис од серијалот за интернет бизниси на претприемач за информациски производи. Претходниот дел можете го прочитате на Интернет бизниси – информациски производи 1.

Информациски производ креирање

Во претходниот дел опфативме некои елементи за тоа што претставува информациски производ и вредноста на истиот во очите на различни луѓе која зависи од проблемот кој го решава то производ.

Затоа и секој информациски производ тргнува од проблем кој постои на пазарот. Но, пред да го претставиме секвенцијалниот процес на креирање на интернет бизнис со информациски производ би сакал да претставам еден поглед кон содржината тие информациски производи.

Содржина на информациски производ

Секој информациски производ содржи информација. Должината на информацијата зависи од проблемот кој се решава со таа информација.

Не треба да бидете премногу засегнати со должината на информацијата, едноставно таа треба да биде доволно долга за да го реши проблемот. Сум видел информациски производ во pdf формат на 6 страни кој имал одлична продажба на интернетот, а продажната цена на тој производ била доста висока (мислам над 50$). Тоа за 6 странички навистина претставува огромна сума на пари. Но, сигурно информацијата која била содржана во таа е-книга била вредна за тие пари. Оваа книга давала информација како да дојдеш до кредитна картичка иако си на црна листа од банките. Многу луѓе доаѓале до таков проблем и не поради нивна вина. Претприемачот кој го доживеал истиот проблем и кој нашол решение на тој проблем направил информациски производ во вид на е-Книга која ја продавал за солидна сума на пари.

Целта со овој пример ми беше дека не мора да значи дека треба да напишете е-Книга од 200 страни за да можете да ја продавате. Едноставно доколку сакате да започнете со еден ваков бизнис треба да знаете дека не треба да пишувате книга – учебник, ѕуку едноставно пренесете ја информацијата која ја знаете и која решава проблем на потенцијалните купувачи.

Еве една структура која би можеле да ја следите при изработка на информациски производ (е-Книга, аудио или пак видео):

  1. Вовед во проблемот. Едноставно опишете гопроблемот кој овој производ го решава.
  2. Ваше лично искуство во врска со проблемот. Опишете го Вашето искуство со тој проблем и накратко како сте го решиле.
  3. Решение на проблемот. Чекор по чекор како сте го решиле проблемот и како Вашите купувачи би можеле да го решат тој проблем.

Процес на креирање на информациски производ

Како и секој бизнис и овој бизнис има сопствен процес на креирање на информациски производ. Не можам да навлезам во детали на сите овие процеси и подпроцеси бидејќи навистина има многу за пишување како и различни погледи. Затоа ќе презентирам еден концептуален приод од два чекори за креација на информациски производи како интернет бизнис.

1. Избор на проблем кој постои на пазарот

Овој чекор е најважниот чекор во креација на информациски производ. Доколку промашите во овој дел, целиот производ ќе биде промашен. Значи, потребно е да имате проблем за кој потенцијалните купувачи се гладни да најдат решение. На пример, доколку знаете како да ослабите 10 килограми за 15 дена и знаете дека се повеќе и повеќе луѓе се среќаваат со еден таков проблем тоа би било добра шанса за вас. Но, сепак првин анализирајте го пазарот, и тоа веб пазарот. Бидејќи Вие ќе продавате информациски производ преку интернет.

2. Концепирајте го производот

Постојат различни можности за концептот на информацискиот производ кој сакате да го продавате. Можете да направите е-Книга со структурата која ја наведовме претходно. Можете како дополнение да интервјурате некој експерт во подрачјето на проблемот кој ќе го решава таа информација. Можете да направите транскрип во вид на pdf е-Книга на аудио материјалот од интервјуто. Можете интервјуто да го направите во видео материјал или пак да го презентирате решението на проблемот преку Вашиот компјутер.

Слободно пријдете му на овој чекор со отворен ум бидејќи можностите и варијациите и комбинациите на концептот на производот се безбројни. Само внимавајте информацијата во која и да е форма да биде вредна, применлива и разбирлива за купувачот – оној кој сака да го реши проблемот.

3. Креирајте го производот

Во овој чекор едноставно она што го знаете го ставате на хартија. Можете директно да пишувате во MS Word и потоа напишаното да го екпортирате во pdf формат кој претставува стандард кога станува збор за е-Книга како информациски производ. За технологија и алатки за креирање ќе стане збор во следниот дел од овој серијал за интернет бизниси за информациски производи.

Доколку сакате Вашиот производ да биде аудио снимка едноставно направете го првин концептот на хартија, подоцна ставете го на компјутер во MS Word и за сите точки од концептот напишете што ќе зборувате. Откако ќе завршите со тоа едноставно вклучете го микрофонот на Вашиот компјутер и читајте го сето она што сте го напишале.

Доколку сакате Вашиот информациски производ да биде видео направете презентација во MS Power Point и искористете ги алатките кои ги наведовме во премиум видео материјали за изработка на веб презентација и за креирање на видео.

4. Одлучете за она што ќе го продавате

Не мора да се врзете само за е-Книга или пак само за аудио. Можете да направите 3 производи: е-Книга, аудио и видео и да ги продавате во состав на истата веб страна. На пример, е-Книгата да биде најевтина и да одите со upsale плус аудио за поскапа цена и како уште еден upsale за плус аудио + видео за најскапата опција.

На ваков начин веќе ќе имате креирано одреден производ следува разработка на маркетинг стратегијата и техничкото поставување на веб серверот на сето она што сте го направиле.

Tретиот дел од овој серијал за информациски производи како дел од серијалот за интернет бизнис на претприемач е насочен на техничката страна од овој тип на бизнис.

post

Интернет бизниси – Информациски производи 1

Сите редовни читатели на претприемач веројатно веќе имаат прочитано дека повеќепати информациите ги ставам како еден посебен ресурс за бизнисите. Како надополнување на човечките, материјалните и финансиските ресурси информациите стануваат значаен ресурс не само за бизнисот туку и за сите претприемачи, па и за оние кои не се претприемачи, кои се вклучени во некаков процес на бизнисите.

Со право се вели дека најпрофитабилен бизнис во светот е продажбата на информации.

Што се подразбира под информациски производ?

Наједноставно кажано информациски производ е одреден медиум на кој се наоѓа некаква информација.

Да видиме малку поопширна дефиниција на информациски производ:

Информациски производ претставува медиум во било кој облик кој содржи некаква информација која е вредна за оној кој ја прима и кој навистина има потреба од користење на таа информација.

Оваа е едноставно моја дефиниција која сметам дека е најприкладна за онаа што го зборуваме во моментов – интернет бизнис со информациски производ.

Но, постои потреба да се разграничи и медиумот за да се добие вистинскиот смисол на интернет бизнис со информациски производ. Медиумот на информациски производ може да биде:

  • Онлајн – е-книга, аудио курсеви и видео материјали кои се прикачени на интернетот и корисникот може да ги симне за да ги чита, слуша или пак слуша и гледа.
  • Офлајн – CD, DVD, печатена книга, печатен весник итн. кои корисникот мора да ги купи во продавница или преку нарачка на интернет за да ги добие по пошта.

Овој напис за интернет бизниси не се однесува на информациски производ кој ќе го купите во продавница туку само на информациски производи кои можете:

  • Да ги симнете преку интернетот и
  • Да ги нарачате и да ги добиете дома преку пошта.

Информациски производи кои може да се симнат од интернет наспроти оние кои се праќаат по пошта

Поголема предност им давам на информациските производи кои се симнуваат на интернетот бидејќи истите имаат повеќе предности во однос на оние производи кои се продаваат. Еве некои од тие предности:

  • Немате потреба да држите на залиха било каква информација. Оваа е една од најголемата предност бидејќи навистина единствениот магацин што ќе го имате е виртуелен магацин на Вашиот веб сервер каде што е сместена и целата Ваша веб страна.
  • Не мора да правите ништо по продажбата на производот. За разлика од продажба на физички информациски производ каде физичкиот носител на информацијата треба да се однесе до пошта и испрати кај инфо производите кои се симнуваат од интернетот нема никаква потреба од дополнителна работа.
  • Секоја продажба претставува целосен профит. Бидејќи немате никакви трошоци за испраќање или пак за изработка на медиумот едноставно цената по која ќе го продавате тој информациски производ претставува целосен профит.

Иако и инфо производите на физички медиум претставуваат информациски производ тука повеќе ќе се насочиме на оние производи кои можат едноставно да се симнат од интернетот по плаќањето – дигиталните производи.

Што претставува дигитален информациски производ?

Сите сме сретнале е-книга во pdf формат која ја читаме на нашиот компјутер или пак ја печатиме и потоа ја читаме. Сите имаме некоја музика во mp3 формат која ја слушаме или на компјутерот или пак на CD Player или пак на iPod. Сите сме дошле до некое видео на YouTube или пак имаме некои видео материјали на нашите компјутери кои слободно можеме да ги гледаме. Сето тоа се дигитални производи кои едноставно можеме да ги најдеме на интернетот и да ги симнеме да бидат достапни на нашиот компјутер.

Што претставува вредност на информацијата?

Сакам да разграничиме нешто околу вредноста на информацијата. Вредноста на информацијата е различна за различни луѓе. Информација за тоа како да се спречи опаѓање на косата нема вредност за некој кој нема косопадица, но има проблем со вишок килограми. За тој човек многу повредна ќе биде информацијата за како да намали 10 килограми за 15 дена.

За мене никаква вредност нема некој јунак од цртани филмови како Бен Тен, но за мојот син и тоа како е вредно што го гледа.

Значи вредноста на информацијата се мери во големината на проблемот што луѓето го решаваат со таа информација. За да имаме добар информациски производ треба да имаме од друга страна луѓе кои имаат проблем кој можат да го решат со тој наш информациски производ.

Во овој прв дел од интернет бизниси – информациски производи на претприемач дадов едно кратко објаснување за тоа што претставуваат информациски производи.

Можете да ги прочитате следните написи на претприемач: Интернет бизниси – информациски производи 2 каде ќе биде опфатен процесот на креација на информациски производ и Интернет бизниси – информациски производи 3 каде ќе биде опфатена потребната технологија.

post

Интернет бизниси – Серијал на претприемач

Во последниве месец дена навистина бев бомбардиран со прашања од читателите на претприемач дали ќе продолжам со серија на написи за интернет бизниси која ја започнав на артиклите на претприемач што веќе не ги ажурирам туку сите нови написи ги објавувам тука на претприемач.

Па затоа овој напис ќе биде најава на еден серијал на написи за интернет бизниси кој ќе продолжи и низ целата 2010 година.

Тука би искористил накратко да сублимирам за се она што досега го опфативме за интернет бизниси на претприемач и она како почетен парвец за она што следува

Како оваа слика подолу можете да видите милион слики на интернетот и на различните веб страни кои продаваат еден вид на информациски производ. Но, уште во стартот би напоменал дека не е толку едноставно за да можете од утре да заработувате пари на интернетот. Оваа ќе биде попрактично разработено во овој серијал.

Што беше опфатено за интернет бизниси на пертприемач?

Во изминатиот период започнав еден серијал за интернет бизниси кој е на артиклите на претприемач (веќе не ги ажурирам). Овие артикли можете да ги најдете на интернет бизниси на претприемач.

Како поважни би ги издвоил следниве:

1. Интернет бизниси основа

Во овој напис е даден одговор на некои прашања како што се:

  • Што е тоа интернет бизнис?
  • Зошто интернет бизнис како опција?
  • Потребно знаење за интернет бизниси?

2. Интернет бизниси – можност за заработка

Во овој напис се издвоени 10 можности за зарабтка или 10 вида на интернет бизниси:

  1. Информациски производи
  2. Физички производи
  3. Affiliate маркетинг
  4. Работа од дома
  5. AdSense
  6. Консалтинг
  7. Услуги
  8. Веб страници за кои се плаќа членарина
  9. Препродажба на хостинг услуги
  10. E-bay

3. Интернет бизниси – потребна технологија

Во овој напис е опфатена технологијата која е потребна за нормално функционирање на еден интернет бизнис:

  • Основна опрема
  • Технологија за поставување на веб страна
  • Технологија за функционирање на бизнисот.

4. Интернет бизниси – автоматизација

Во овој напис се дадени некои од можностите кои се достапни за автоматизација на интернет бизнисот:

  • Што е она што може да се автоматизира?
  • Што е она што ќе го добиете со автоматизацијата?

Овие би ги издвоил како најважните кои доколку не сте ги прочитале би било пожелно да ги прочитате пред да започнеме со овој нов серијал за интернет бизниси на претприемач.

Што е она на што ќе се концентрираме во овој серијал?

Првин овој серијал би го поделил на два дела:

  • Концепциски дел кој ќе се занимава со еден поширок и посеопфатен поглед кон еден интернет бизнис. Зошто еден ваков концепт? Првин, треба да се сфати дека не е толку едноставно да се води успешен интернет бизнис. Многу е лесно да се започне, но не е лесно да се биде успешен. Затоа и еден поглобален и поширок пристап кон интернет бизнисите ќе биде опфатен во овој серијал на претприемач.
  • Технички дел кој ќе се занимава со специфичните видови на интерент бизниси како што ги набројавме погоре во интернет бизниси – можност за заработка како и со некои посебни технологии кои се користат во интернет бизнисите.

Овој серијал на интернет бизниси на претприемач нема да биде како серијалот за маркетинг средства вокој секоја недела објавуваме по едно маркетинг средтсво, туку ќе одат нераспределено во однос на временски рок. На пример, една недела може да одат 5 написи, па некоја недела ниеден. Но, во секој случај ќе се обидам барем еднаш неделно да имаме нешто во однос на интернет бизниси.

Па да започнеме!

Информациски производи

Кога станува збор за информациски производи како еден вид на интернет бизнис можете да прочитате на:

Физички производи

Следува…

post

Достапна е нова верзија на Word Press 2.9 – Кармен

Пред неколку дена ја ажурирав платформата на која работи претприемач – WordPress на најновата верзија 2.9 наречена Кармен (Carmen). Бидејќи во 10-те видео материјали за изработка на веб презентација за Вашиот бизнис WordPress е главната опција, а и во написите и артиклите за интернет бизниси и интернет маркетинг, особено во написот за WordPress VS Joomla како победник го промовирав WordPress, би сакал накратко да ги искоментирам најновите опции кои што ги забележав во оваа најнова верзија.

Пред да преминам на тие карактеристики би напоменал дека пред некое време оваа моќна платформа е изберена за најдобра Open Source CMS платформа (платформа за менаџирање на содржина на интернетот). Повеќе детали за ова можете да прочитате на Open Source CMS Award. Инаку се до оваа година WordPress беше жртва на сопствениот успех како платформа за блогирање иако претставува комплетно CMS решение за комплексни веб страни. Но, оваа година грешката е исправена и конечно WordPress дојде на врвот каде што му е местото. Им честитам на сите дизајнери кои работат на усовршување на WordPress.

Па да преминам на главните карактеристики.

Едитирање на слики

Она што најмногу ми се допадна е што во оваа најнова верзија е додадена можност преку самата WordPress апликација да ги едитирате сликите кои што сакате да ги објавите на веб. Оваа нова функција овозможува 3 основни манипулации со сликите (Crop, Rotate и Flip).

WordPress Едитирање на слика

Корпа со отпадоци (Recycle Bin – Trash)

Она што ни е познато во Windows како корпа со отпадоци која служи да ги складира Вашите избришани податоци за уште една проверка за да не избришете нешто по грешка сега е додадено во WordPress како функција Trash. Оваа функција служи за бришење на одредени написи, но всушност не ги брише целосно туку се наоѓаат во Trash – Отпад од каде можете едноставно да ги избришете целосно или да ги вратите доколку сте избришале нешто по грешка.

Ажурирање на група на додатоци одеднаш

Досега доколку излезеше некоја нова верзија на некој додаток (Plugin) ќе моравте да одите еден по еден да го ажурирате. Во најновата верзија можете да ги ажурирате сите додатоци одеднаш при што WordPress ќе провери дали има нова верзија и дали е компатибилна со Вашата WordPress платформа. Нема веќе страв од тоа дека ќе инсталирате некомпатибилен додаток.

Едноставно внесување на видео од YouTube

Оваа опција не е само за YouTube туку и за Blip.tv, Flickr, Viddler и други познати видео сервиси на интернет. Наместо како досега да се копира и лепи кодот на видеото од сервисот каде е аплоадирано сега едноставно само со лепење на URL-то на видеото ќе можете да прикажете видео на Вашата веб страна.

Други подобрувања

Овие досегашни подобрувања се оние кои успеав да ги видам визуелно како нови опции. Но, прочитав дека во најновата верзија се опфатени уште еден куп на други подобрувања кои се однесуваат на безбедноста, на бубачки во кодот и функционалности во однос на коментарите и оптимизација на базата на податоци.

Во секој случај мислам дека оваа верзија 2.9 претставува претставува револуционерна верзија на овој систем за менаџирање на содржина на интернетот. Верувам дека согласно досегашната практика на дечките од WordPress набргу ќе излезе подверзија на оваа верзија, бидејќи за само една година започнав со верзијата 2.7 па следуваа подверзии, за потоа да се појави верзијата 2.8 која многу повеќе се однесуваше на безбедносните елементи и сега пристигна оваа верзија со повеќе функционални елементи.

post

Дали Вашата Бизнис Веб Страна е „Обична“ Брошура – Заборавено Поглавје

Вчера на претприемач го објавивме написот со наслов Дали Вашата Бизнис Веб Страна е Обична Брошура во кој ја претставивме сличноста помеѓу повеќе од 95% бизнис веб страни во Македонија со една „обична“ брошура.

Овој наслов го нареков „Заборавено поглавје“, не зошто нешто испуштив туку зошто некако ми помина лимитот од 1000 зборови по еден напис, а јас се заборавив со пишување. Но, една ваква тема и една таква реална анализа на една веб страна не може да се ограничи на 1000 зборови.

Во Дали Вашата Бизнис Веб Страна е Обична Брошура ги наведов некои од слабостите кои ги забележав во 5-минутната анализа, но не сублимирав што треба да направи еден претприемач за да една бизнис веб страна не изгледа како обична брошура.

Која е целта на Вашата бизнис веб страна?

Прво и основно што треба да се запрашате Вие како претприемач е за целта на Вашата бизнис веб страна или веб презентација на Вашиот бизнис.

Доколку немате одговор на оваа прашање или пак едноставно не сакате да имате соодветна бизнис веб страна или пак не сакате да ја искористите за зголемување на продажбата на Вашиот бизнис, тогаш едноставно оставете ја Вашата бизнис веб страна во вид на брошура.

Доколку целта на Вашата бизнис веб страна е една од овие:

  • Зголемена посетеност на веб страната.
  • Зголемена конверзија од обичен посетител во редовен посетител.
  • Зголемена конверзија од редовен посетител во потенцијален купувач.
  • Зголемена конверзија од потенцијален купувач во вистински купувач.
  • Зголемена конверзија од вистински купувач во редовен купувач.
  • Зголемена интеракција со потенцијалните потрошувачи.
  • Зајакнување на бизнис брендот.
  • Генерирање на поголема продажба.
  • Зголемување на можноста да Вие како претприемач и вашиот бизнис бидете поедноставно најдени (повеќе за оваа опфативме во влезен маркетинг).

тогаш морате да преминете во фазата кога Вашата веб страна не треба да биде како „обична“ брошура.

Тука се измешани примарни и секундарни цели на една бизнис веб страна. Но, за целта на овој напис мислам дека се ОК.

Како да ја замените брошурата?

Замената на Вашата веб брошура во високо ефективна и ефикасна веб страна се врши едноставно со замена на статичноста на Вашата веб страна во динамичност. Ова значи целосна промена на стратегијата на Вашата веб презентација. Ова значи постојана работа на Вашата веб страна бидејќи нормално, нема веќе да биде статична (сте ја поставиле на веб сервер и сте завршиле работа).

Презентацијата на производите останува, како и контакт деталите, но додавате еден нов елемент кој се нарекува блог кој ќе се ажурира на одреден временски еприод. За значајноста на блогот за бизнисите пишував тука на претприемач во презентација на резултати од истражување во однос на успешноста на бизнис веб страните кои имаат блог и оние кои немаат. Резултатите беа:

…бизнисите кои користат блог како едно од маркетинг средства наместо статична веб страна за презентација и промоција на бизнисот имаат 55% повеќе посетители, 97% повеќе влезни линкови (други веб страни имаат линк кон нив) и 434% повеќе индексирани страни на Google…

Мислам дека овие бројки се доволен показател да Вие како претприемач го промените Вашето досегашно размислување за Вашата бизнис веб страна.

Постојано подобрување на Вашата бизнис веб страна

Откако ќе ја замените брошурата можете да започнете со постојано подобрување на Вашата веб страна како би можеле потенцијалните клиенти полесно да ве најдат кога бараат решение за нивните проблеми кои Вие како претприемач можете да им ги решите.

За почеток не се замарајте со линкови кон Вашата веб страна, бидејќи гледам дека тоа станува една од основните преокупации. Тие се важни, во секој случај само доколку Вашата бизнис веб страна е соодветно оптимизирана. Што секако е во Ваши раце.

Следниве елементи треба постојано да ги подобрувате:

  • Квалитетна содржина – постојано објавувајте квалитетна содржина која ќе ги интересира Вашите потенцијални купувачи и ќе има вредност за истите.
  • Клучни зборови кои ќе бидат содржани во таа содржина. Се однесува и на примарни и на секундарни клучни зборови.
  • Внатрешни линкови. Интернет светот се гради на линкови, затоа е потребно соодветно да ги оптимизирате внатрешните линкови на Вашата бизнис веб страна.
  • Мета елементите на секоја страна. Ова се елементите кои не се видливи за посетителите, но видливи се за пребарувачите. Во страната која ја анализиравме во претходниот напис воопшто не се вклучени овие елементи.

За почеток ова се доволни елементи кои на Вас како претприемач ќе ви донесат зголемување на посетители, а со тоа и зголемување на потенцијални потрошувачи, и со тоа зголемување на вистински купувачи за Вашиот бизнис.

Ова беше еден мој мал прилог на она како да се искористи потенцијалот на интернетот за бизнис цели. За веб презентација имаме изготвено 10 видео материјали како до бесплатна веб презентација на вашиот бизнис.

post

Дали Вашата Бизнис Веб Страна е Обична Брошура?

Што е веб страна, а што брошура? Дали е исто?

Дали веб страната треба да биде еден вид на онлајн брошура? Во почетокот на интернетот како место каде можете да бидете најдени и Вие како претприемач и Вашиот бизнис сите бизнис веб страни биле брошури. Ова значело дека брошурата која бизнисот ја имал на хартија се преточува во еден електронски документ кој е достапен на интернет.

Но, денес сметам дека Вашата бизнис веб страна најмалку треба да биде во форма на една брошура. Бидејќи ако е во форма на брошура нема да ги искористите полезностите кои една веб страна може да ги донесе за Вашиот бизнис. Но да тргнам по ред.

Што е веб брошура?

За брошура на претприемач веќе пишувавме како едно од маркетинг средства. Во тој напис напишав дека една солидна брошура би требало да содржи:

  • Насловна страна. Насловната страна треба да го наведе читателот да ги читаат останатите страни од брошурата каде ќе биде претставена Вашата понуда…
  • Вашата понуда. Тука давате краток опис на Вашите производи и/или услуги…
  • Ургентност. Брошурата има за цел да предизвика ургентност за акција…
  • Задна страна со информации за контакт…

Да, тоа е една брошура во неколку странички.

Погледнете го сега ова:

  • Насловна страна на брошура – Почетна страна на Вашата бизнис веб страна
  • Ваша понуда на брошура – Производи на Вашата бизнис веб страна
  • Ургентност на брошурата – Промоција како посебна страна на Вашата бизнис веб страна или пак банерче кое ќе трепка за да се преземе некоја акција од страна на посетителот
  • Информации за контакти на брошура – За нас страната на на Вашата бизнис веб страна или пак контакт форма од страна.

Дали сега Ви е јасно зошто над 95% од бизнис веб страните во Македонија претставуваат обични веб брошури. Велам „обични“ затоа што воопшто не е искористен потенцијалот на онлајн присутноста на еден бизнис.

Една Вежба од Претприемач на реален пример

Случајно кога го пишувам овој напис ми дојде на ум да пребарам на Google за зборот „кабли“ како некој потенцијален потрошувач. Резултатите беа точни на прво место се најде Фабрика за Кабли Неготино. Направив една кратка анализа од 5 минути на веб страната при што ќе ви презентирам што најдов и какво е моето мислење.

Дали оваа веб страна е „обична“ веб брошура?

Во секој случај одговорот е ДА. Ги има следниве елементи (страни):

  • Профил
  • Производи
  • Контакт инфо

Се што содржи една брошура.

Фабрика за кабли - Неготино

Дали овој бизнис сака да биде поголем извозник?

Повторно одговорот е ДА бидејќи веб страната е на неколку јазици: англиски, германски и руски како надополнување на македонскиот.

Ова ме натера да ја погледнам англиската верзија, да изберам еден производ и да побарам на Google да видам дали ќе се најде меѓу првите резултати.

Го избрав производот “Connecting Cables” кој ќе го користам во оваа вежба. Инаку сакам да напоменам дека на претходниот збор „кабли“ извршив анализа и со одредена формула ја пресметав конкурентноста (дали е тешко да се биде прв на Google) и добив дека конкуренцијата е слаба и секој може за кратко време да ја престигне оваа фабрика.

Дали за зборот “Connecting Cables” излегува на Google оваа веб страна?

Одговорот е НЕ. Пробав до 5-тата страна за овој збор и нашата Фабрика за кабли од Неготино ја нема. Нормално се откажав од понатамошен преглед бидејќи ми е здодевно.

Значи доколку овој бизнис сака да го зголеми својот извоз мора да го искористи вистинскиот потенцијал на својата веб страна која во моментов е „обична“ брошура која служи само претприемачот да се пофали дека има веб страна.

Дали е тешко да се избие прв на Google за зборот “Connecting Cables”?

Повторно одговорот е НЕ. Зборот “Connecting Cables” е поконкурентен од зборот „кабли“ но, сепак не спаѓа во група на зборови за кои конкуренцијата не може лесно да се победи. Дури на првите две места се веб страни кои се казнети од страна на Google што значи дека со малку вложен труд оваа веб страна ќе може лесно да биде прва на Google за овој збор и секој кој ќе биде заинтересиран за овие кабли во светот веднаш да ја пронајде.

Ова е само еден збор кој го проверив, но од овој еден и останатите може да произлезат и други зборови кои би можеле да се искористат за полесно да биде најдена оваа веб страна.

Дали оваа веб страна изгледа добро?

Супер изгледа во секој случај. Но, сепак е „обична“ брошура, а вообичаено на „обичните“ брошури посетителите ја разгледуваат веб страната, прават неколку клика, си заминуваат и никогаш повеќе не се враќаат.

Кои се основните недостатоци?

  • Почетна страна има една слика и една флеш анимација. Ова изгледа супер, но сепак не е препознатливо во очите на Google и останатите пребарувачи. На истата почетна страна како единствен збор стои Copyright 2004. Се добива впечаток дека на оваа веб страна ништо не е ажурирано веќе 5 години (ова истото се однесува за сите страни на дното од страните).

Дали Вашата бизнис веб страна е обична брошура?

  • Малку текст. Нема доволно текст кој би бил препознаен од пребарувачите. На една од страните со повеќе текст има само 99 збора.
  • Нема елементи кои би го натерале посетителот (потенцијалниот купувач) да се врати на веб страната.
  • Слаба оптимизација на клучни зборови. Клучните зборови по кои треба да бидат најдени навистина се слабо оптимизирани.

За 5 минути толку можев да забележам, а сигурно постојат и други, како на пример немање на нова содржина на веб страната за да биде побргу препознаена од страна на Google итн.

Добро, овој напис не се однесува на SEO (Оптимизација за пребарувачи), туку за тоа дали Вашата веб страна изгледа како „обична“ брошура.

Она што сакам да го потенцирам е дека овој бизнис може многу подобро да биде рангиран на Google (и тоа како прв без да плаќа за реклама на Google Adwords). Тоа треба да се искористи бидејќи доколку успеете да имате повеќе посетители од надвор поголема е веројатноста за нови зделки за извоз. На пример, ако имате месечно 1000 посетители од надвор и успеете со Вашата веб страна да конвертирате само 0,5% во купувачи, тоа се 5 нови зделки или договори за извоз месечно. Ако имате 10.000 посетители со истатата стапка на конверзија ќе имате 50 нови зделки месечно. Што не е неостварливо.

НАПОМЕНА: Воопшто не е злонамерно искористена Фабрика за Кабли од Неготино, ниту пак е спонзориран овој напис на претприемач, едноставно една вежба за тоа како да се подобрат бизнисите во Македонија, а со тоа и целокупната економија. Од друга страна над 95% на веб страни на македонските бизниси се вакви, а оваа е една од подобрите.

post

E-Commerce – Неколку Забележителни Грешки

Се чини дека E-Commerce односно продажбата преку интернет на производи од широка потрошувачка пред едно 6-7 месеци започна со помош на Casys (Интернационален картичен систем) и неколку комерцијални банки. Ова е за поздравување за еден ваков чекор напред. Ова е почеток на една сосема нова страна за претприемачите во Македонија. Но, се чини дека очекувањата не ги исполнија резултатите. Пред некое време слушнав дека една компанија која меѓу првите започна да го користи овој систем забележала само неколку продажби во изминатиов период. Не знам колку е точно бидејќи информацијата не ми е проверена. Затоа преминав на една анализа на една од тие компании (веб страни) за да видам што се случува.

Недоволна оптимизација за пребарувачи

Да, ова е еден од недостатоците на овие веб страни. Тоа е поради фактот што сакаат fancy изглед на страната и веб дизајнерите им ја дизајнираат така со flash копчиња и сликички целосно заборавајќи на SEO (Search Engine Optimization). Не е доволно само поставување на веб одредена страна и продажбата да тече автоматски. Успешен E-commerce систем бара многу повеќе работа.

Што има тука за мене?

Еден елемент кој е најважен за одлука за купување. Секој купувач си го поставува тоа прашање. Јас во улога на купувач не можев да најдам нешто такво. Зошто? Вообичаено производи за широка потрошувачка се потребни во самиот момент на купување, така да купување преку интернет ќе доцни вообичаено до 24 часа. Истото тоа го имам во секоја продавница во моја близина за истите цени. А купувањето понекогаш значи и уживање на купувачот. Но, доколку добијам нешто повеќе со реализираното купување можеби и ќе се одлучам за таквото купување.

Повеќе офлајн маркетинг отколку онлајн маркетинг

Постои разлика помеѓу онлајн и офлајн маркетингот. Пристапот е многу поразличен. Се чини дека бизнисите се премногу насочени на офлајн маркетинг техники наместо онлајн (интернет) маркетингот кој може да даде вистински резултати. Но, интернет маркетингот бара многу труд и време за постигнување на резултати.

Нема вирозен карактер

Ова е уште една интернет стратегија која може да даде големи резултати. Но, веб страните кои ги разгледав немаат вклучено еден таков елемент кој би ја зголемил посетеноста и би довел до поголема продажба.

Нема нешто што ќе ја подигне свеста кај луѓето за купување преку интернет

Ова е можеби и еден од најважните елементи при развојот на интернет купување. Пионерите во оваа област мора да обрнат големо внимание за подигање на свеста кај луѓето. Стравот во моментов е голем кој во голем дел се должи на незнаење за безбедносните елементи при купување на интернет. Освен банките и другите финансиски институции на ова поле мора да работат и трговците бидејќи сепак тие ќе ја имаат најголемата корист.

Нема гаранција за враќање на пари

Не успеав да видам гаранција за враќање на пари што има голема улога во одлуката за купување и довербата на купувачот во продавачот. Доколку не бидам задоволен со производот кој ќе го купам дали може да го вратам, во кој рок и под кои услови.

Ова е она што го забележав на прв поглед во однос на овие веб продавници. Доколку навлегувам подлабоко во анализата сигурно ќе има уште недостатоци. Оваа анализа е еден мал мој придонес кон она на што треба да се обрне внимание како подобрување на веб продавниците.

Сликата од Fosforix
post

еСаем за Бизниси – MakExpo – Виртуелен Бизнис Саем

Некако во последните недели како да стана пракса по еден корисен портал неделно да презентираме на претприемач. Кога ставив насловот на овој напис излезе многу голем па се одлучив за ваков пократок. Но, насловот кој првпат го стави беше: „Бизнис портал кој има потенцијал да го смени начинот на презентирање на бизнисите и кој ќе ги направи рамноправни во светот“.

MakExpo е интернет портал кој претставува виртуелен бизнис саем за бизниси од сите големини. Порталот е изграден врз една основна намена – можност за виртуелно учество на саем на сите компании во Македонија! Од оваа појдовна точка, развена е платформа во која било која компанија од Македонија (или од странство!) ќе може да „закупи“ виртуелен простор на еСаемот и да се рекламираат себеси или своите производи! Секоја компанија може БЕСПЛАТНО да се регистрира на порталот и со тоа добива едногодишна (да, едногодишна!!!) бесплатна промоција, како и БЕСПЛАТНА промоција на еден свој производ! Со самото регистрирање – таа станува член на МакЕкспо саемот. За да се регистрирате кликнете на:


И бидејќи регистрацијата не чини ништо, достапна е за сите претпријатија, било да се тоа микро, мали, средни или големи! Дополнително на ова постојат и 3 „пакети“ на услуги коишто МакЕкспо ги наплатува и тоа:

  • Основен Пакет – вклучува до 10 дополнителни производи/услуги по компанија и чини 3.499 денари;
  • Стандард пакет – вклучува до 100 дополнителни производи/услуги по компанија, + 1 т.н. „спонзориран производ“ (се појавува прв при пребарување на истиот или при под-саемот на дејноста на компанијата), каталог на производи/услуги и чини 7.499 денари;
  • V.I.B. (Very Important Business) пакет – вклучува до 500 дополнителни производи/услуги по компанија, + 3 т.н. „спонзорирани производи“ (се појавуват први при пребарување на истите или при под-саемот на дејноста на компанијата), каталог на производи/услуги, гарантирани вкупни 500.000 прикажувања за сите спонзорирани производи на Интернет мрежата и чини 28.499 денари;

Дополнителна алатка е тоа што еСаемот можат да го посетуваат и индивидуи и разни бизниси! Па така, преку алатката за пребарување може да пребарувате по: компании (од регион, од Вашиот град, од целата држава), по производи/услуги, или пак по каталози од одредена индустрија! Индивидуите можат да пребаруваат производи или услуги од нивен моментален интерес, додека компаниите можат да пребаруваат други компании од било каде, и нивните продукти или продукти кои им се потребни. Пребарувањето вклучува: вид на продукт, цена, слика од продуктот, компанија-производител, начин на доставување, адреса, контакти…

Дополнително, секоја од вкупно 30-те индустрии е поделена во повеќе категории на под-индустрии, а истите се менуваат на секои 2 недели, со што практично се добива еСаем на секои 2 недели (на пр. Саем за мебел, Саем за градежништво), а алатките за пребарување можат да се користат 24/7, 365 дена во годината!

Целиот еСаем е замислен да функционира тотално електронски, со минимално можно учество на човечкиот фактор, така да одбирањето на пакети и плаќањата се вршат по пат на автоматски генерирана фактура која ја добивате по е-пошта веднаш по регистрирањето на Вашата компанија и одбирање на соодветниот пакет. Воедно, од моментот на плаќање на истата, добивате и Договор за соработка, по чиешто потпишување и се официјализираат правата и обврските на МекЕкспо и клиентот.
Овој портал има неколку поволности за претприемачите:

  • Прва е достапноста на сопствените производи на една глобална интернет мрежа.
  • Втората е можност за лесно пронаоѓање на идни бизнис партнери преку една голема база на податоци.
  • И за бизнис со бизнис бизнисите можност за лесно пронаоѓање на потенцијални клиенти.

Интензивната промоција на порталот е најавена за почетокот на 2010, но бета-верзијата е веќе пуштена и сите заинтересирани може слободно уште сега да ја посетат страната и да се вклучат во МакЕкспо – Саем за сите! Затоа регистрирајте се и презентирајте ја Вашата компанија ништо нема да загубите.

post

Претприемач – Нов дизајн и можности

Иако не помина многу време од последниот редизајн на претприемач кога помислив дека конечно сум задоволен повторно извршив големи промени. Овој напис е дел од написите за интернет маркетинг или интернет бизниси во кој сакам да кажам што направив за само неколку часа и кои алатки ги користев. Може да се забележи огромен редизајн на целата страна.

Претходно користев бесплатна тема за WordPres која навистина има убав дизајн во вид на магазини. Но, секоја промена или додавање на некој мој код во позадината на истата правеше толкава збрка што седев по цели ноќи за да ги поправам работите и повторно да ги вратам како што беа. Од друга страна, толку многу работи натрупани на една насловна страна правеа толкава збрка да понекогаш и јас не можев да се снаоѓам а да не зборуваме за посетителите. Уште една работа што не ми се допаѓаше е автоматското пребарување вградено во WordPress кое не даваше баш добри резултати. И пред неколку месеци купив професионална тема за WordPress лиценцирана за повеќе веб страни па си реков зошто да не ја искористам. А, од друга страна секоја промена ми е едноставно играње со нови можности и секако простор за проширување на знаењето.

Па да кренам со она што сега е карактеристично за претприемач:

Thesis WordPress тема

Ја искористив професионалната и уникатна Thesis тема за WordPress. Ова е тема која едноставно се персонализира, SEO оптимизирана, флексибилна  и која овозможува едноставно кажано да направите чуда со изгледот на Вашата веб страна и без знаење од програмирање. Од друга страна имаат одлична подршка и форум на кој ќе најдете кодови кои директно можете да ги искористите на Вашата страна.

FAQ – Постојано поставувани прашања

Имате една уникатна можност преку поставување на прашања да добиете одговор на истите било од претприемач или пак од голем број на луѓе од светот со кои сме поврзани можеме да добиеме одговор. Секое прашање ќе биде на страната. Така да ќе се формира една база на податоци со одговорени прашања кои секој посетител може да ги пребарува и чита.

Едноставно одете на страната FAQ:


Откако ќе влезете на страната ќе можете да поставите прашање како на сликата подолу. Инаку, можете и да не го внесувате mail-от, но во таков случај нема да го добиете одговорот по mail туку истиот ќе биде само објавен на страната. Значи мailo-от служи само за да бидете известени кога прашањето ќе биде одговорено. Ќе се обидеме одговорот да биде даден во тек на 24 часа по поставување на прашањето. Па повелете!

Google Custom Search

Како трета опција која со оваа нова верзија дојде на претприемач е што е подобрено пребарувањето низ истиот. Досега на претприемач го користевме дифолт системот на WordPress како можност за пребарување низ сајтот. Но, сега поставивме можност за пребарување базиран на Google, односно Google Custom Search кој навистина дава многу подобри резултати. Од друга страна пребарувањето се врши и на артиклите на претприемач кои веќе не ги ажурираме. Еве како изгледа новото пребарување:

Поврзување

Добро овој дел го имаше во една друга варијанта, но приметив дека отворањето на сраната ја успоруваа премногу. Да се тчита Twitter па Facebook бараше премногу време. Па, затоја ги дизајнирав разните копчиња за поврзување со претприемач во еден дел на самиот почеток на страната.

Преку првото копче можеме да се поврземе на Twitter. Второто е RSS Feed на претприемач да го поставите на вашиот RSS читач како што е Google Reader и да имате информација секогаш кога ќе излезе ново на претприемач. Третото копче е знакот на FeedBurner која исто така е поседувано од Google (го купија заради можноста рекламите да ги постават и преку mail). Оваа копче е исто како претходно што имаше форма со e-mail и кога ќе го кликнете ќе побара да го внесете Вашиот e-mail и да го потврдите за сите написи на претприемач да ги добивате во Вашиот inbox. И последното (4-то), добро познато на сите, е на Facebook за да биднете фанови на страната на претприемач на Facebook. На таа страна гледам да објавувам повеќе видео материјали од областа на претприемништвото како и секој напис кој се објавува на претприемач.

****

Иако само неколку часа ми требаа да го средам овој нов дизајн сепaк не беше лесно. Но, нема прашања на кои нема одговор на интернетот.