post

Google VS Facebook реклами

Google VS Facebook реклами

Google VS Facebook реклами

Многу бизниси го открија брзиот раст на Facebook и започнаа да ја градат својата присутност. Некои напрвија личен профил како бизнис профил, некои го избраа оној правиот пат преку изработка на Facebook страна како основа на присутност на нивниот бизнис на оваа платформа. А, пак некои направија комбинација со бесплатна презентација преку страна и PPC реклами кои водат или до таа страна на Facebook или пак до веб сајтот на бизнисот.

2010 година беше година кога Facebook се доближи и во одредени аспекти и го надмина Google.

Но, едно прашање кое се поствува од страна на сопствениците на малите бизниси (претприемачи) е дали ова се знаци за изумирање на една индустрија која се појави со појава на Google на пазарот како главен играч во PPC реклами? Сигурно се прашувате:

  • Дали овој брз развој и раст на Facebook и другите социјални медиуми има значење за нашиот бизнис?
  • Дали SEO сеуште треба да има голема улога во градење на интернет присутноста на мојот бизнис?
  • Дали треба целосно буџетот да го реалоцираме на Facebook реклами наместо на Google Adwords.
  • …

Дали социјалните медиуми имаат значење за нашиот бизнис?

Првото прашање е прашање на кое би одговорил со ДА. Бидејќи се појавува очигледна промена во досегашното однесување на луѓето на интернетот бизнисите ќе мора да се приспособат кон истата. Како еден претприемач Вие ќе мора да започнете да ги анализирате социјалните медиуми и однесувањето на различните индивидуалци и бизниси кои може да бидат ваши потрошувачи за да утврдите какво влијание тоа однесување може да има во однос на Вашата стратегија за привлекување на сообраќај кон Вашиот бизнис веб сајт.

Дали SEO уште е значајно за нашиот бизнис?

Кога станува збор за второто прашање повторно би го одговорил со ДА. SEO не треба да биде запоставено, барем не сеуште. Светот на бизнисот не е толку едноставен за да можете да кажете веднаш дека нема да има влијание врз Вашиот бизнис. Сепак, оптимизација за пребарувачи е една сосема друга работа и она што можете да го постигнете со Вашиот веб сајт или блог тешко дека ќе можете да го постигнете само со Facebook страна за Вашиот бизнис.

Каде да се потроши буџетот?

На третото прашање мојот одговор би бил НЕ. Дали секој вид на бизнис може да ре рекламира на секков медиум или пак секакво место. На пример, дали на факултетите ќе делите летоци за дом за стари лица?

Можеби ќе ни се чини логично оваа делење на летоци на факултетите бидејќи можеби во некоја блиска или подалечна иднина ќе имаме потреба за такво нешто.

Но, мозокот на еден студент кој е потенцијален примател на информацијата од тој леток воопшто не се наоѓа во состојба да размислува за такво нешто. Па затоа може да го погледне летокот 2 секунди и во наредните 2 секунди да го заборави како воопшто и да не го видел.

Зошто за време на фудбалските натпревари најмногу се рекламираат компании за производство и дистрибуција на пиво? Затоа што гледање на фудбалски натпревар и пиење на пиво со некакви грицки оди едно со друго.

Ваква е и ситуацијата со социјалните медиуми вклучувајќи го и Facebook. Луѓето на социјалните медиуми се присутни заради:

  • комуникација со пријатели
  • комуникација со роднини
  • играње на игри
  • споделување на слики
  • споделување на смешни видео материјалчиња
  • споделување на нешто за што споделувачот ќе смета дека ќе има вредност за своите „виртуелни пријателчиња“.

На пример, доколку со моите пријатели споделувам информации за ресторани во кои би сакале да се состанеме за вечера, а ми излезе реклама за мебел нема воопшто да ја забележам бидејќи мојот мозок е насочен на избор на вистинскиот ресторан за вечера.

Но, доколку во тој момент видам реклама за некој добар ресторан, ќе ја кликнам, ќе ја погледам, ќе ја прочитам нивната понуда и ќе ја вклучам како опција за мојата моменталната потреба.

Но, за жал со Facebook рекламите тоа сеуште не е можно. Можете да таргетирате по демографија и интерес кој всушност претставува она што вие лајкувате, но и не мора да значи дека сето тоа е вистина и дека токму во моментот на барање на решение на Вашиот проблем вие мислите за некој од тие лајкови.

Ајде да го продолжам примерот. Во таа комуникација со пријателите за вечерно излегување одам на Google и барам некој специфичен ресторан во градот во кој сакаме да одиме. Во моментов кога го пишувам моето прашање илегуваат неколку реклами за ресторани согласно моето барање и уште дузина веб сајтови поврзани со ресторни за тој град.

Ова значи дека сеуште Facebook во конеткстуалност на нивниот систем за рекламирање е далеку зад Google.

Ова не значи дека треба да се игнорира Facebook, туку значи дека сеуште не треба да се откажувате од пребарувачите, а во исто време добро да го проучувате однесувањето на потенцијалните купувачи на социјални медиуми како би можеле соодветно да ги таргетирате истите.

Од друга страна Facebook сеуште е нов играч на ова поле и се надевам дека брзо ќе додадат опции за контекстуалност во реклмирање преку нивниот систем.

Објавено на 13/01/2011 | Filed Under: Интернет маркетинг, Социјални медиуми Leave a Comment
post

SWOT анализа за социјални медиуми – Маркетинг средство 91

SWOT анализа за социјални медиуми

SWOT анализа за социјални медиуми

Концептот за примена на SWOT анализа за социјални медиуми претставува навистина корисен концепт кој може да ви помогне во успешно градење на присутноста на Вашиот бизнис на социјални медиуми. Како 91-во маркетинг средство го избрав токму овој концепт – спроведување на SWOT анализа за социјални медиуми.

Што престатвува SWOT анализа за социјални медиуми?

SWOT анализа е тема која повеќе пати беше обработувана на претприемач, како од научен така и од практичен аспект. Да се потсетиме првин за тоа што претставува SWOT анализа.

Во SWOT анализа во 4 чекори наведовме дека:

SWOT анализа е алатка за планирање, особено за стратешко планирање. Се користи за проценка на Јачините (Strengths) и Слабостите (Weakness) како внатрешни елементи на бизнисот, Можностите (Opportunities) и Заканите (Threats) како надворешни елементи на бизнисот.

Кога станува збор за социјалните медиуми оваа анализа ќе се однесува на проценка на јаките и слабите страни на вашиот бизнис на социјалните медиуми како внатрешни елементи и можностите и заканите како надворешни елементи.

Оваа анализа може да ви помогне при изготвување на стратегија за социјални медиуми која беше опфатена како 90-то маркетинг средство.

М-р Илија Чубровиќ (се надевам дека од утре ќе го именувам како Д-р) како дел од неговата магистерска работа дизајнираше прашалник за спроведување на SWOT анализа. Тој прашалник содржи прашања актуелни за тоа време, но како пример како да се спроведе една ваква анализа може да користи и денес, нормално со редизајн на некои прашања прилагодени кон вашиот бизнис.

И во овој дел ќе се обидам да дадам еден таков приод за спроведување на SWOT анализа за социјални медиуми преку одговор на минимум прашања.

Прашања кои ќе треба да ги одговорите?

И во овој дел ќе се обидам да дадам еден таков приод за спроведување на SWOT анализа за социјални медиуми преку одговор на минимум прашања. Прашањата треба да бидат групирани во два дела – внатрешни и надворешни елементи.

Прашања за внатрешни елементи

Внатрешните елементи треба да ви ги покажат јаките и слабите страни на вашиот бизнис на социјалните медиуми. Одговорете колку што можете повеќе прашања. Бидете реални и не ги одбегнувајте слабите страни. Со одбегнување нема да го подобрите вашиот бизнис.

  1. Колкаво е досегашното искуство на вашата команија на социјални медиуми?
  2. Што е она што го правите добро на социјални медиуми, а што е она што го правите лошо?
  3. Каква е опременоста со кадри за градење на присутноста на социјалните медиуми?
  4. Каква е мотивираноста на тие кадри за градење на присутност на социјалните медиуми?
  5. Дали мате соодветна технологија за градење на присутноста на социјални медиуми?
  6. Како ја користите таа технологија?
  7. Какво е знаењето и оспособеноста на вработените за користење на таа технологија?
  8. Дали вработените во вашиот бизнис користат различни социјални медиуми во нивниот приватен живот?
  9. Доколку користат како можете да го искористите тоа за целите на Вашиот бизнис?
  10. На какво ниво е соработката помеѓу вработените во вашиот бизнис?
  11. Дали менаџментот е подготвен за користење на социјални медиуми?
  12. Дали менаџментот знае како да ги обучи вработените за користење на социјални медиуми?
  13. Дали вашиот бизнис има барем малку забавна карактеристика во дневното функционирање?
  14. Дали можете тоа да го искористите за градење на присутност на социјалните медиуми?
  15. Колкаво е нивото на креативноста во вашиот бизнис?
  16. Дали веќе имате веб сајт или блог на кои креирате вредна содржина?
  17. Дали вие или вашиот бизнис користите социјални медиуми за лични или бизнис цели?
  18. Кои социјални медиуми ги користите и колкав е нивниот број?
  19. Каква е вашата експертиза за индустријата во која оперирате?
  20. Каква е глобалната експертиза на вашиот бизнис за индустријата во која оперира?

Ова се 20 прашања кои ве водат низ процесот. Не значи дека се комплетни или целосни. Слободно додавајте уште прашања за кои сметате дека се валидни како внатрешни елементи кои ќе ви покажат кои се вашите слаби или јаки страни за присутноста на социјалните медиуми.

Прашања за надворешни елементи

Надворешните елементи треба да ви ги покажат можностите и заканите кои вашиот бизнис треба да ги искористи или избегне на социјалните медиуми. Одговорете колку што можете повеќе прашања. Бидете реални и не ги одбегнувајте заканите. Тие имаат цел да ви покажат каде треба да внимавате.

  1. Развојот на технологијата во подрачјето на социјалните медиуми претставува можност или закана за вашиот бизнис?
  2. Како ве ценат вашите потрошувачи?
  3. Дали вашите потрошвачи користат технологија за присутноста на социјалните медиуми?
  4. Дали присутноста на социјалните медиуми на Вашите потрошувачи е компатибилна со вашата присутност?
  5. Дали присутноста на социјалните медиуми на Вашите потрошувачи е компатибилна со присутност на вашите вработени?
  6. Како сакаат вашите потрошувачи да комуницираат со вашиот бизнис?
  7. Како сакаат вашите потрошувачи да соработуваат со вашиот бизнис?
  8. Дали вашите потрошувачи имаат потреба од едукација за да ги користат вашите производи и/или услуги?
  9. Каква стратегија за социјални медиуми користат вашите конкуренти?
  10. Како вашите конкуренти комуницираат со нивните потрошувачи?
  11. Како вашите конкуренти ги едуцираат нивните потрошувачи?
  12. Каде се наоѓаат потрошувачите на вашите конкуренти?
  13. Каква е експертизата на вашите конкуренти?
  14. Каква технологија користат вашите конкуренти?
  15. Дали вашите снабдувачи се присутни на социјалните медиуми?
  16. Какво влијание може да имаат вашите снбдувачи врз вас и вашиот бизнис на социјалните медиуми?
  17. Постои или закана дека вашите снабдувачи можат да навлезат и на вашиот пазар?
  18. Многу нелегални бизниси се обидуваат да продаваат преку социјални медиуми. Какво влијание има ова врз вас?
  19. Дали во вашата околина има доволен број на луѓе обучени за да бидат дел од вашиот бизнис тим?
  20. Дали едукативниот систем во вашата околина опфаќа и обука за користење на технологија?

Ова се 20 прашања кои ве водат низ процесот на анализа на можностите и заканите за користење на социјални медиуми. Не значи дека се комплетни или целосни. Слободно додавајте уште прашања за кои сметате дека се валидни како надворешни елементи и кои ќе ви покажат кои се вашите можности и закани за присутноста на социјалните медиуми.

Што понатаму?

Понатаму продолжете со станардната оперативна процедура за спроведување на SWOT анализа која опфаќа:

  • Конструирање на SWOT матрица и
  • Дефинирање на стратегии.

Чија е одговорноста?

Доколку навистина сакате да успеете мора да постои одговорност. Но, прашањето кој ќе биде одговорен за спроведување на една ваква SWOT анализа за социјални медиуми?

Првин, најдоговорен сте вие како еден претприемач. Потоа тимот кој ќе го изберете да работи на анализата и подготовка на стратегијата и на крајот сите вработени во Вашиот бизнис ќе бидат одговорни за градење на присутноста на социјалните медиуми.

Објавено на 11/01/2011 | Filed Under: Интернет маркетинг, Социјални медиуми 3 Comments
post

Digg – Маркетинг средство 87

Digg - Маркетинг средство

Digg - Маркетинг средство

Ќе продолжиме со серијалот маркетинг средства на претприемач. Како 87-мо маркетинг ќе биде уште еден онлајн агрегатор на содржина со социјален карактер во себе – Digg.

Што претставува Digg?

Согласно сервисот во однос на тоа што тие претставуваат може да се прочита дека Digg e место каде луѓето може да откриваат и споделуваат содржина од било каде на интернетот.

Всушност, целта на Digg e неговите корисници да испраќаат веб сајтови и различни содржини кои ќе бидат од интерес на останатите корисници на сервисот.

Доколку доволен број на Digg корисници гласаат за веќе испратена веб содржина во системот таа содржина ќе котира повисоко и ќе се појави на насловната страна на Digg за да можат да ја забележат други корисници. На ваков начин се поттикнува поквалитетна содржина да биде забележана од повеќе корсници.

Од друга страна како и останатите социјални медиуми и Digg овозможува поблиско споделување на квалитетна содржина преку креирање и ширење на мрежа од пријатели – корисници на сервисот.

Освен споделување, следење или следење на веб содржина, креирање на нови мрежи на пријателства врз база на заеднички интерес преку споделената содржина, Digg обезбедува и алатки за конверзација помеѓу корисниците околу содржината споделена преку сервисот преку гласање, коментирање и споделување на други социјални мрежи како Facebook и Twitter.

Како да го користите?

Digg претставува корисен сервис за малите бизниси и особено претприемачите. Освен за да останете информирани за веб содржина од Ваш интерес ќе можете и:

  • Да споделите линк од ваш блог пост. Внимавајте на квалитетот доколку сакате резултати.
  • Можете да споделите линк од содржина која навистина ви оставила впечаток.
  • Да гласате и директно да учествувате во рангирање на квалитетна содржина.
  • Можете да изградите мрежа на истомисленици, односно луѓе кои имаат ист или сличен интерес со Вашиот.
  • Можете да коментирате разни линкови како еден експерт во Вашата индустрија и да бидете забележани.
  • Едноставно да се забавувате и бидете информирани.

Како и другите социјални медиуми и овој овозможува платени реклами, односно спонзорирани линкови. Овие реклами се појавуваат во листата со останатите содржини само е означена како спонзорирана. Секоја реклама се прикажува врз база на систем на аукција при што прикажувањето зависи од висината на CPC и секако број на гласови кои ќе ги добие таа содржина.

На овој сервис можете да забележите и лични и бизнис профили. Големите компании како Microsoft и Apple исто така се присутни и го користат сервисот.

Дали треба да го користите?

Секогаш интересно прашање кога станува збор за социјални медиуми и нивно користење во бизнис цели. Но, доколку сакате да останете во тек со најновите и најинтересните стории во светот и приота да градите мрежа од пријатели, да споделувате и учествувате во креирање на тие стории при што би имале и бизнис корист сепак ништо нема да загубите од користење.

Сепак Вие сте претприемач, експерт во својата индустрија и затоа е корисно да бидете присутни и пред една поширока аудиенција покажувајќи се дека знаете што се случува и следите трендови на глобално ниво.

Сепак при користење и потпирање на таа содржина поребна е внимателност. Прочитав за случаи кога невистинити приказни кои набрзина корисниците на Digg ги направиле популарни довеле и до зголемување на акции на компании.

Објавено на 22/12/2010 | Filed Under: Маркетинг, Социјални медиуми 1 Comment
post

StumbleUpon – Маркетинг средство 86

StumbleUpon како маркетинг средство

StumbleUpon како маркетинг средство

Продолжуваме со социјалните медиуми како маркетинг средство. Како 86-то маркетинг средство во овој серијал на претприемач го избрав StumbleUpon. Во оваа маркетинг средство гледам навистина голем потенцијал, и не само што гледам туку и при некои мои тестирања навистина се покажа како квалитетен извор на сообраќај за еден блог.

Она што сакам да го потенцирам е што овој медиум е доста лесен за користење, а од друга страна и забавен. Го користам коко извор на квалитетни информции кои го зголемуваат моето знаење во подрачјата за кои сум пројавил интерес. А како што го користам се повеќе и повеќе добивам подобар фидбек со поквалитетни извори на веб сајтови прилагодени согласно моето однесување во користење на оваа платформа.

Што претставува StumbleUpon?

Најкратко кажано StumbleUpon претставува социјална мрежа преку која корисниците откриваат и рангираат веб страници од нивен интерес преку посебен вид на технологија за препорака на тие страници.

Всушност, со самото креирање на ваш профил на платформата вие избирате соодветни подрачја на интерес за вашето присуство на оваа социјална мрежа, а потоа барате пријатели за креирање на мрежата. Откако креирате акаунт потребно е да инсталирате додаток на Вашиот интернет прелистувач со чија помош ја користите платформата. Останатото е да се забавувате со откривање на нови веб сајтови кои можеби никогаш порано не сте ги сретнале.

Можете да го погледнете видеото кое го направив пред повеќе од една година во кое ќе видите некои детали за тоа што претставува, како да го користите и како да поставувате нови страници.

Како да го користите StumbleUpon?

Основната цел на StumbleUpon е да ви обезбеди квалитетна содржина од интернетот и врз основа на тоа вие да ја рангирате како добра или лоша за Ваш вкус. Затоа и однесувајте се како такви корисници и не го користете само за себепромовирање. Оваа правило важи не само за ова маркетинг средство туку и за сите останати кога станува збор за социјални медиуми.

Основниот процес на користење би изгледал вака:

  • Изберете ги подрачјата на Вашиот интерес.
  • Користете го одреден период за да добиете поквалитетни сугестии. (Се користи преку кликнување на копчето Stumble при што добивате одредена препорака и доколку сте задоволни можете да кликнете на I Like It копчето)
  • Споделете нешто ваше.
  • Користете го често системот.

Можете да споделите и Ваша сопствена веб страна или пак некој квалитетен пост од Вашиот бизнис блог) или пак страната за продажба на некој Ваш производ или пак страната за градење на Вашата листа.

Можете и да го искористите рекламирањето преку оваа платформа. Системот функционира на таков начин што:

  • Вие избирате аудиенција на која би сакале да се покаже Вашиот веб сајт согласно категорија, демографија или географија.
  • Системот ви праќа посетители и ви наплаќа согласно прегледите на Вашиот веб сајт.
  • Колку повеќе Like-ови добивате толку повеќе ќе биде и прикажан Вашиот веб сајт и во бесплатната варијанта.
  • Имате целосна контрола на Вашиот буџет.

Дали треба да го користите?

Доколку имате веб сајт и блог и сакате да го зголемите потенцијалот на тој веб сајт или блог нема ништо да изгубите доколку го користите. Доколку го користите на вистинскиот начин и вашиот бизнис ќе има и корисност. Бидете корисни за системот и системот ќе ви возврати со љубов.

Објавено на 16/12/2010 | Filed Under: Маркетинг, Социјални медиуми Leave a Comment
post

Delicious – Маркетинг Средство 85

Delicious како маркетинг средство

Delicious како маркетинг средство

Сеуште се наоѓаме во делот на социјални медиуми како маркетинг средства од овој серијал за маркетинг средства на претприемач. Стигнавме до 85-тото маркетинг средство во кое ќе стане збор за еден претставник од посебен вид на социјални медиуми наречени како социјални обележувачи – Delicious.

На пример, дали сакате некој кога ќе прочита нешто вредно на Вашиот бизнис блог да го обележи и да биде видливо за неговата мрежа? Дали сакате да покажете дека сте во тек со информациите од Вашата индустрија и да ги споделите со секој од Вашата мрежа или некој друг? Дали сакате нешто вредно што ќе прочитате да го запомните и да се навратите повторно на таа информација кога ќе имате потреба? Дали сакате да знаете што ги интересира Вашите потенцијални купувачи кои се дел од Вашата мрежа на овој социјален медиум? И уште многу дали сакате прашања…

Сето ова се прашања на кои помош може да ви обезбеди Delicious.

Што претставува delicious?

Delicious е нешто за што и претходно имаме пишувано на претприемач. Во Delicious како средство за прибирање и складирање на информации напишавме дека:

Delicious претставува социјален bookmarking (обележувач) сајт за складирање, споделување и пронаоѓање на обележени веб страници. Целта на delicious е да ви овозможи складирање на страните за кои сметате дека се интересни за вас и подоцна лесно да ги најдете.

За разлика од Favorits или Bookmarks на вашиот интернет прегледувач со помош на Delicious вие ги споделувате тие страни со поголем број на луѓе кои се присутни на мрежата.

Други интересни карактеристики се што лесно можете да пронајдете други обележени веб сајтови врз основа на клучни зборови или ознаки или пак  врз основа на популарност.

Можете и да го погледнете видеото кое го направивме за овој сервис за социјален bookmarking:

Како може да се користи?

Вообичаено користење на оваа соцјална алатка е да креирате акаунт и да започнете да обележувате веб страни кои ви се допаѓаат. Внимавајте на соодветните клучни зборови, ознаки и опис кој ќе го додадете кон секоја страна бидејќи истите се користат за полесно пребарување во иднина како од Ваша страна така и од секој корисник на сервисот кој бара информација плус.

Можете и да креирате сопствена мрежа во која ќе додадете други корисници во истата и на таков начин да ги следите сите веб страници кои се обележени од тие корисници. Истото тоа може да биде направено и од некој друг во чија мрежа ќе се наоѓате вие.

Креирање на мрежа на Delicious

Креирање на мрежа на Delicious

Можете и да го интегрирате delicious со други социјални мрежи како Facebook и Twitter.

Од друга страна овозможете лесно секој да може да означи страна од Вашиот веб сајт или блог на delicious со што истиот веќе ќе биде достапен на голем број на корисници на мрежата.

Во секој случај ништо не се губи, а постои потенцијал од придобивка во градење на присутноста на Вашиот бизнис на интернетот и социјалните медиуми.

Дали треба да го користите?

Овој социјален медиум може да биде доста од корист за Вашиот бизнис, односно сметам дека има потенцијал да заврши огромна работа. Во секој случај сето ова ќе зависи од видот на Вашиот бизнис, индустријата и онлајн стратегијата која ќе ја користи Вашиот бизнис.

Без разлика дали сте претприемач кој сака да биде во тек и да знае што е популарно во индустријата или пак сакате да градите мрежа на потенцијални купувачи или пак сакате да ја зголемите достапноста на вашата веб содржина delicious e тука за да ви помогне.

Објавено на 14/12/2010 | Filed Under: Маркетинг, Социјални медиуми Leave a Comment
post

Социјални мрежи – Маркетинг Средство – 84

Социјални мрежи - Маркетинг средство

Социјални мрежи - Маркетинг средство

Во досегашниов тек на овој серијал за маркетинг средства на претприемач ги опфативме најважните социјални мрежи: Twitter, Facebook и LinkedIn за кои сметам дека во моментов се најважни и најкорисни за еден бизнис. Но, оваа 84-то маркетинг средство ќе се однесува на уште некои социјални мрежи на кои можете да градите ваше присуство.

Во секој случај, во едно од наредните маркетинг средства ќе имаме SWOT анализа за социјални медиуми и Scorecard за социјални медиуми кои ќе може да ви помогнат околу изборот на најважните. Како и секаде и тука може да се применува 80/20 правилото што значи дека 80% од Вашите потенцијални потрошувачи се наоѓаат на 20% од социјалните мрежи, па логично би било да ги насочиме нашите ресурси токму на тие 20% од социјални мрежи.

1. Bebo

Bebo претставува онлај н социјална мрежа која повеќе се насочува на споделување и консумпција на дигитална содржина. Корисниците на Bebo кревлегуваат во интеракција со другите корисници преку споделување на фотографии, видео, комуникација преку месенџер, вклучување во квизови и анкети.

Статистика за Bebo

  • 117 милиони регистрирани корисници
  • Околу 12 милиони активни корисници
  • Најголема популарност има во Англија каде припаѓаат 30-40% од корисниците.

Како може да се користи?

Корисниците можат да ја користат оваа социјална мрежа и како едно маркетинг средство. Така да музичарите можат да се поврзат со своите фанови и да ја рекламираат и продаваат својата музика онлајн, авторите на книги може да споделат цели поглавја за да добијат некаков фидбек или за да ја покажат сопствената работа на потенцијалните купувачи. Доколку сте корисник или производител на некаков производ од дигиталниот свет можеби Bebo е вистинската социјална мрежа за тебе.

2. MySpace

MySpace претставува уште една онлајн социјална мрежа која може да се стави во групата на најстари (започнува во 2003 година). Им овозможува на корисниците интеракција преку разни карактеристики како блогови, месенџер, групи, форуми…

Статистика за MySpace

  • Во најдобрите денови имале повеќе од 100 милиони корисници, при што стрмно опаѓање доживува со појава на Facebook.

Како може да се користи?

Може да се користи за градење на односи со постоечки пријатели и креирање на нови пријателста и конекции. Од друга страна оваа мрежа исто како и Facebook овозможува адвертајзинг при што секој може да дизајнира сопствена реклама, да избере кога каде и на кој да се прикаже истата и да се плати врз база на број на кликови на рекламата.

3.  Orkut

Orkut е онлајн социјална мрежа во сопственост на Google. Целта е како и на сте други социјални мрежи да се градат мрежи помеѓу корисниците и нови релации.

Статистика за Orkut

  • Над 50% корисници се лоцирани во Бразил
  • Над 13% од корисниците го користат за градење на бизнис релации

Како може да се користи?

Може да се користи за градење на односи со постоечки пријатели и креирање на нови пријателста и конекции. Оваа мрежа нуди неколку свои опции како градење на заедници (Communities) и комуникација преку Testimonials и Scrapbooks.

Постојат и други социјални мрежи кои не ги вклучив во овој серијал. Некои имаат најавено дека ќе прекинат со работа до крајот на годината, а некои немаат голем број на коринсици за да може да се препорача нивно користење за бизнис цели.

Објавено на 11/12/2010 | Filed Under: Маркетинг, Социјални медиуми Leave a Comment
post

LinkedIn – Маркетинг Средство 83

LinkedIn Маркетинг Средство

LinkedIn Маркетинг Средство

Сеуште сме на социјалните медиуми како маркетинг средства на претприемач. Како 83-то маркетинг средство го избрав LinkedIn, уште една социјална мрежа за градење на конекции, конверзации и потенцијален бизнис.

Сега сме во социјална мрежа која повеќе се однесува на професионалци, бизнис вмрежување, конекции, соработки, дискусии…

Што претставува Linkedin?

LinkedIn претставува социјална мрежа како и сите досега кои ги споменавме во овој серијал со таа разлика што се додава зборчето професионална пред мрежата. Значи LinkedIn претставува социјална мрежа на професионалци преку која може:

  • да се одржуваат професионални релации помеѓу корисниците,
  • да се пребаруват отворени работни места,
  • да се регрутираат кадри за бизнисот,
  • да се споделуваат различни проблеми и разменуваат различни можни решенија,
  • уште многу други креативни бизнис релации…

Основната филозофија на LinkedIn е “Relationship Matter”. Мисијата на оваа социјална мрежа е:

да ги поврзе професионалците од целиот свет за да станат попродуктивни и поуспешни.

Последните факти од страна на LinkedIn велат дека имаат над 85 милиони членови во повеќе од 200 земји, што секако кога станува збор за професионално вмрежување не е за потценување.

Можете да го погледнете официјалното видео за тоа што претставува LinkedIn:

Како може да се користи?

Вообичаено користење на оваа социјална мрежа е да се креира акаунт и да се поканат другите корисници на мрежата за да станат конекции.

Кога станува збор за конекции LinkedIn ги рангира во степени. На пример, директните конекции се првостепени конекции, конекциите преку директните конекции претставуваат второстепени конекции итн.

Можете да ја користите мрежата за да најдете значајни контакти првин преку луѓе кои што ги познавате, а потоа да барате преку различните можности кои LinkedIn ги нуди за пронаоѓање на професионалци од Ваше значење како што се пребарување по компанија, од други социјални мрежи или преку одговори (LinkedIn Answer).

Можете да креирате група во која ќе ги поканите Вашите конекции за да се вклучат во дискусија на истата од теми поврзани со Вашата индустрија.

LinkedIn е одлична можност за генерирање на потенцијални купувачи за Вашиот бизнис. Со помош на алатките кои досега ги споменавме и секако можноста за адвертајзинг на мрежата има потенцијал да генерира нови купувачи за Вашиот бизнис. Едноставно како и со останатите маркетинг средства Вие сте присутен на една мрежа каде во моментов има над 85 милиони професионалци.

Затоа следете го следниов иницијален процес за започнување на градење на присуство на ова социјална мрежа:

  • Направете план. Одговорете на прашањата во која индустрија се наоѓа Вашиот бизнис, кои се првичните конекции кои би сакале да ги имате, од кои индустрии се важни луѓето за Вашиот бизнис, што ќе сакате да постигнете…
  • Отворете сметка на LinkedIn. Отворете сметка и започнете да барате значајни лица.
  • Прашања. Започнете со одговарање на поставените прашања за кои имате одговор, а потоа започнете и со поставување на конкретни прашања поврзани со Вашата индустрија како би можеле да дојдете до нови конекции, да видите какво е мислењето за соодветниот проблем и да најдете различни решенија кои ве мачат.
  • Ажурирајте го Вашио статус. Статусот има потенцијал за брзо забележување преку Вашиот профил и e-mail-от кој LinkedIn го праќа на Вашата мрежа.
  • Група. Разгледајте ја можноста од креирање на посебна група на LinkedIn каде ќе поттикнете дискусија помеѓу членовите.
  • Маркетинг. Поставете линк од Вашиот веб сајт и блог до Вашaтa LinkedIn група. Поврзете го LinkedIn статусот со Вашиот Twitter профил. Разгледајте ја можноста во сите маркетинг средства да покажете дека сте присутен и на LinkedIn.

Дали треба да го користите?

Бидејќи професионалци од скоро секоја индустрија се присутни и ја користат оваа социјална мрежа логично е дека би требало и Вие да ја користите.

Без разлика дали Вие барате бизнис контакти како можни потенцијални клиенти, или пак барате кандидати за вработување, или пак барате решенија за проблемите во индустријата, или пак сакате да се изградите како експерт во Вашата индустрија, LinkedIn ви обезбедува можности во овие подрачја и би требало да ги искористите.

Објавено на 10/12/2010 | Filed Under: Маркетинг, Социјални медиуми Leave a Comment
post

Foursquare – Маркетинг средство 82

Од текстови, слики и видео материјали за онлајн споделување се селиме на локација како основа на некои социјалните медиуми во овој серијал за маркетинг средства на претприемач. Онлајн па уште и локација. Можеби ќе ви бидне чудно зошто онлајн присуство да се врзува со локација. Но, сепак голем дел од бизнисите функционираат на одредена локација, а луѓето од маркетингот се оние кои постојано се обидуваат да ја претстават таа локација во главата на потенцијалните купувачи.

Foursquare сеуште е во фазата на раѓање, и многу претприемачи дури не слушнале дека постои такво нешто, а камоли да го разгледуват како можна бизнис алатка. Сепак, ми се чини дека кога би требал на некој да го опишам значењето и можностите за користење на сервисот за бизнис цели во една реченица, таа би била многу долга и секако тешко разбирлива особено кај нас каде се отвараат повеќе прашања.

Од друга страна, мрежата навистина бргу се шири. Иако и Facebook воведе локациски сервис (кај нас сеуште не е достапен) и се зборуваше дека тоа е смрт за Foursquare, сервисот продолжи со огромен пораст на корисници. Согласно информациите од официјалниот блог се вели дека во последната година имаат раст од 100.000 на 4,5 милиони корисници. Сепак тоа е значајна бројка.

Што претставува Foursquare?

Foursquare e исто што и сите други вакви сервиси – социјална мрежа. Исто како и Twitter и Facebook има пријатели при што се бара пријателство и се прифаќа пријателство. Може да се споделуваат искуства. Но, она што го разликува од останатите е што како основа се зема локацијата при што искуствата се однесуваат за конкретна локација. Тоа значи дека еден корисник на сервисот кога ќе дојде на некоја локација (бутик, ресторан, кафуле, парфимерија, козметички салон…) се чекира преку својот мобилен телефон на истата дека е присутен таму (доколку локацијата ја нема корисникот ја додава во системот преку внесување на име, категорија, адреса, град и држава).

Forsquare места

Forsquare места

Освен внесување на локации, чекирање, препорачување и споделување на искуства можете и да прочитате разни искуства и препораки од другите кои пред Вас ја посетиле таа локација. За да биде поинтересно, foursquare доделува и беџови врз основа на онаа што сте го поминале.

Препораки и беџови на Forsquare

Препораки и беџови на Forsquare

Бизнис користење на Forsquare

Сето она погоре опишано е ОК, но каква врска има со бизнисите? Можеби токму ова ќе се запрашате. Но, дали би сакале да привлечете повеќе луѓе во Вашата локација доколку Вашиот бизнис зависи токму од таа локација? Дали би сакале да градите лојалност кон Вашиот бизнис? Дали би сакале да спроведете ефективни промотивни кампањи кои ќе дадат резултати? Дали би сакале Вашиот бизнис да биде излистан пред милионска аудиенција?

Доколку на овие прашања Вашиот одговор како еден претприемач е ДА, тогаш Foursquare може тука за да ви помогне.

Подолу се некои од идеите како можете да го користите Foursquare за бизнис цели:

Натпревар за градоначалник на локацијата на Foursquare

Натпревари за градоначалник на Foursquare

Натпревари за градоначалник на Foursquare

Секое лице со најмногу посети на една локација станува градоначалник (Mayor) на таа локација на Foursquare. Оваа претставува одлична можност да поттикнете натпревар за градоначалничко место.

Лицето кое во последните 60 дена има најмногу посети станува градоначалник и можете да му обезбедите специјален попуст за тоа лице.

Примерот на сликата го прикажува токму тоа. Ова значи едноставно дека Вие и Вашиот бизнис се заблагодарувате на тоа лице за неговата лојалност кон бизнисот.

За дознаете кој е градоначалник на Вашата локација едноставно треба да го отворите бизнис профилот на Foursquare и ќе видите кој во моментов се наоѓа на таа позиција.

Ваквата кампања претставува одличен начин за еден натпревар меѓу луѓето се за да станат градоначалник и да ја имаат привилегијата која ја носи тоа место.

Foursquare промоции

Foursquare промоции

Foursquare промоции

Освен за градоначалничките места можете да направите и специјални промоции кои ќе служат за наградување на купувачите. На сликата лево е даден еден пример за ваква промоција кој сеуште е во фаза на одобрување од Foursquare.

Како идеи за користење на ваквите промоции можете да понудите нешто при секое чекирање или пак при секое 3-то, 5-то итн.

Програми за лојалност

Бизнис корисниците на Foursquare (претходно потврдена локација која ја менаџирате вие) имаат можност за одлична статистика која можете да ја искористите во нудење на дополнителни програми за лојалност кон Вашиот бизнис. Преку таа статистика можете да видите кој бил чекиран во одреден период на време (денес, вчера, последна недела, последни 30 дена, последни 60 дена, последни 90 дена и севкупно).

Оваа статистика има и дополнителни можности во вид на тоа да видите колкав процент од чекирања биле испратени на Twitter и Facebook. Има и најави дека во оваа аналитика ќе се вклучи и временската прогноза така да може да се види како времето влијае на работењето на Вашиот бизнис (иако не сум сигурен дали кај нас ќе ја имаа оваа можност).

Зошто да не ја искористиме оваа аналитика и статистика и да не ги наградиме нашите најлојални купувачи. Како што знаеме 20% од нашите потрошувачи го одржуваат нашиот бизнис со 80% од остварена продажба. Подобро е да ги задржиме тие 20% со специјални програми за нивно нградување како наши лојални купувачи.

Процес на користење

За крај накратко би претставил еден процес кој би требало да го следите за користење на Foursquare како маркетинг средство.

  • Отворете Foursquare сметка.
  • Доколку имате мобилен телефон кој поддржува инсталација на Foursquare апликација инсталирајте ја.
  • Чекирајте се и притоа внесете ја локацијата на Вашиот бизнис.
  • Поврзете се со пријатели, пратете понуди за пријателство и проучувајте го функционирањето на системот. Едноставно чекирајте се каде ќе одите.
  • Отворете ја Вашата локација и кликнете во делот каде што ве прашува дали Вие сте менаџер на оваа локација и започнете ја постапката за потврда на Вашата локација. (Од моето искуство процесот може да трае и неколку месеци)
  • Направете план со цели кои сакате да ги постигнете, промоции и натпревари кои ќе ги понудите и секако промоција на овие програми на Foursquare.
  • Откако ќе ја потврдите локацијата ќе можете да ги користите бенефициите како бизнис корисник на Foursquare и да започнете да го применувате планот.
Објавено на 08/12/2010 | Filed Under: Маркетинг, Социјални медиуми Leave a Comment
post

YouTube – Маркетинг средство 81

YouTube - Маркетинг средство

YouTube - Маркетинг средство

YouTube претставува 81-то маркетинг средство на претприемач. Како надополнување на претходното за кое стана збор, Flickr во кое споделувате слики, оваа маркетинг средство се однесува на споделување на видео.

Доколку сликата вреди илјада зборови, колку ли ќе вреди едно видео. И надополнето на ова, доколку Вашето видео биде видено од милионска аудиенција, колкаво маркетиншко влијание ќе има Вашата активност од неколку часа за креација на истото?

Иако насловот на овој пост потенцира конкретен сајт за споделување на видео – YouTube, сепак постов се однесува повеќе на видео за споделување на интернет во бизнис цели кое секако може да се сподели и со други сервиси. Сепак го избрав YouTube како најголем од сите тие.

Споделување на видео

Споделување на видео можеби е наједноставен начин за започнување на градење на портфолиото на социјалните медиуми за Вашиот бизнис. Доколку веќе извесен период Вашиот бизнис постои сигурно имате направено некоја VHS снимка која привлекува прав во некоја полица. Можеби исто така имате некое видео од некоја реклама или снимка од производен процес, или пак снимка од прослава со задоволните купувачи која се наоѓа на Вашиот хард диск ви зафаќа простор и не знаете што да правите со тие снимки…

Од друга страна денес не е потребна скапа технологија за да се направи добра видео презентација. Со инвестиција од неколку стотини евра и неколку часа Вашата виде презентација ќе биде подготвена. Нормално, не како професионалците кои ќе Ви наплатат поголема сума, но за еден мал бизнис со ограничени финансиски ресурси ќе биде доволно да започне да ја гради сопствената присутност на интернет преку видео.

Blendteck како пример

Не постои книга која сум ја прочитал а да не го спомене Blendteck како пример кога станува збор за успех во користење на видео на интернетот како маркетинг средство кое дава одлични резултати.

Blendteck e компанија за блендери базирана во Utah која постигнала огромен успех преку инвестирање на неколку стотици долари во опрема, снимање на видео помало од 2 минути и аплоадирање на истото на YouTube.

Карактеристично е што на сите видео материјалчиња направени од Blendetck и аплоадирани на YouTubе:

  • Се снима демонстрацијата на производот (корисност и моќност на блендерот)
  • На видеото е претседателот на компанијата – Tom Dickson кој всушност ја прикажува корисноста од нивниот блендер (авторитет, репутација, доверба).
  • Постојано објавување на ново видео со нови тестови на нивниот блендер (конзистентност)
  • Интересно е бидејќи секој сака да види што ќе остане од еден iPhone кога се стави во блендер или од некој друг производ (интересност).

Овие карактеристики на овој Blendteck канал на YouTube овозможија оваа компанија во при првото објавување на видео во првите 24 часа да имаат повеќе од еден милион гледања на нивното видео и во истиот тој период да го распродадат нивниот производ за цена од $600.

Во моментов кога го пишувам овој пост нивниот канал на YouTube има скоро 6 милиони прегледи на каналот, над 144 милиони гледања на видео материјали и над 340 илјади регистрирани на каналот.

Секој би го сакал ваквиот успех. Но, никој не може да го гарантира. Но, од друга страна зошто да не се обидеме кога можеме и секако нема да потрошиме огромна сума на пари.

Што е YouTube?

YouTube претставува сервис за споделување на видео материјалчиња кој им овозможува на корисниците лесно и едноставно без никакво техничко знаење да постават видео на интернет и тоа преку различна технологија – веб сајт, мобилен телефон, е-mail…

Она што е карактеристично за YouTube e што гледачите на видео материјалчињата можат да оставаат коментари и секако да копираат линк за споделување на видео или код за поставување на друг веб сајт. Сето ова го поттикнува вирозниот елемент на овој сервис.

Како може да се користи?

Во овој дел ќе се обидам накратко да презентирам еден процес на користење на YouTube во маркетинг цели на Вашиот бизнис:

  • Направи план. Одговори на прашањата што ќе снимам, како ќе снимам и кога ќе снимам видео клип за бизнисот. Што ќе снимате зависи од Вашата креативност. Дали ќе изберете тестирање на Вашите производи, или пак некоја презентација, или пак рекламент клип, или пак How To прикажувања на користење на Вашите производи/услуги или пак било што друго што ќе биде од интерес на Вашите потенцијални купувачи ќе зависи од Вашата креативност. Како ќе снимате ќе зависи од буџетот што го имате за набавка на опрема – видео камера и/или микрофон. Кога ќе снимате ќе зависи од тоа колку видео материјалчиња сакате да правите во одреден временски период и колкаво време имате на располагање.
  • Опрема. Набавете ја опремата, тестирајте ја и спремете ја за Вашето прво видео. Ќе ви биде потребен и софтвер за едитирање за да можете да го подзасредите видеото кое ќе биде снимено со камера.
  • YouTube. Отворете сметка на YouTube и направете посебен канал за Вашиот бизнис. Откако Вашето видео ќе биде спремно поминете на постапката за аплоадирање.
  • Маркетинг на каналот. Нема корист од еден ваков канал доколку не ве дознаат луѓето. Првин, сите информативни рубрики на каналот пополнете ги колку што може поинформтивно. Второ, поставете линк на вашиот веб сајт до вашиот YouTube канал. Споделете го видеото на Facebook и Twitter. Напишете пост на Вашиот блог на кој ќе го ембедирате кодот од видеото. Ставете линк до вашиот YouTube канал на сите останати маркетинг средства…
Објавено на 06/12/2010 | Filed Under: Маркетинг, Социјални медиуми Leave a Comment
post

Flickr – Маркетинг средство 80

Flickr го избрав како 80-то маркетинг средство на претприемач, не заради тоа што е единствена ваква платформа туку заради тоа што е една од најкористените од социјалните мрежи за споделување на слики.

Доколку сликата е вредна илјада зборови, која е вредноста на тоа да можете да споделувате слики со пријатели, роднини и потрошувачи во Вашата мрежа?

Иако постојат многу претприемачи кои веруваат дека социјалните мрежи за споделување на слики претставуваат единствена поволност за споделување на слики од одмори и прослави со роднини сепак се повеќе се зголемува бројот и на оние кои сметаат дека сликите и социјалните мрежи претставуваат одлична бизнис можност.

Што претставува Flickr?

Flickr претставува сервис за споделување на слики со кој индивидуалците и бизнисите успеваат сопствената визуелна содржина да ја направат достапна за сите оние кои се заинтересирани преку различни средства во вид на веб, мобилни уреди, е-mail, RSS…

Веб сајтот на Flickr е достапен во 8 јазици што претставува солидна оснава за глобалните бизниси.

Како може да се користи во бизнис цели?

Сите ние сме во себе сликари. Денешата технологија ни овозможува постојано во нашиот џеб да имаме солиден фотоапарат, без разлика дали е тоа вистински фотоапарат или пак мобилен телефон. Секојдневно гледам луѓе кои едноставно си ги забележуваат моментите на слика преку мобилен телефон.

Дури стекнувам впечаток дека доколку порано се сликавме за оние „старомодни“ фото албуми кои во одредени прилики ќе ги гледавме заради обновување на спомените од тие моменти, денес едноставно сликите во голем дел се резултат на желба за споделување на Facebook.

Бесплатниот акаунт на Flickr е ограничен на 100 мегабајти месечен аплоад додека про акаунтот е неограничен и без реклами. Можете да имате јавни и приватни слики. Јавните може секој да ги види додека приватните само вие или одредена група на луѓе. Но, скоро 80% од сликите на Flickr се јавни.

Значи користењето се сведува на сликање и аплоадирање на сликите на Flickr. Со помош на бобилните уреди овој процес е премногу едноставен. Така да за бизнис цели можете да сликате одредени карактеристики на Ваши производи, одредени настани на кои присуствувате вие или Вашите вработени, одредени прослави во Вашата компанија, задоволни потрошувачи, моменти од состаноци, моменти од тестирање на производ и/или услуга… Листата е навистина неограничена и се базира најмногу на претприемничката креативност.

Тие слики можете да ги поставите како фото стрим на Вашиот веб сајт или блог.

Уште позначајно е што сите јавни фотографии за кои избирате лиценца за можност за користење од страна на други веб сајтови или блогови имаат потенцијал да бидат објавени на некој друг веб сајт но врз основа на таа лицена корисникот е должен да постави линк до Вашиот фото стрим на flickr. Кога тој посетител ќе кликне на тој линк ќе има можност да види и линк до Вашиот веб сајт или блог. Тој станува Ваш потенцијален купувач.

Flickr линк

Еве еден доказ на оваа предност на flickr:

Од 17000 посети од страна на reffering sites 160 доаѓаат од Flickr. Тоа нешто помалку од 1%. Но, сепак е на 6-то место за сајтот од кој е извлечена оваа аналитика што сепак може да се стави во категорија на корисно за нешто што е бесплатно.

Го потцртав и Google Images (пребарувачот на слики на Google) само заради илустрација дека сликите имаат влијание за обезбедување на посетители кон Вашиот бизнис веб сајт.

Дали да го користите Flickr?

Користење на Flickr за споделување на слики поврзани со Вашиот бизнис претставува одлична можност да стигнете до голема аудиенција.

Дали вашиот бизнис би имал корист доколку некој заинтересиран за Вашите производи и/или услуги врши истражување и сака да ги види тие Ваши производи и пребарува на flickr  по името на Вашиот бизнис и наоѓа одлични слики? Мислам дека ќе се сложите дека ќе имате корист.

Дали ќе имате корист доколку некој употреби некоја од Вашите слики во негова презентација пред менаџментот со тоа што ќе биде наведено од каде е сликата? Сметам дека и за ова ќе се сложите дека е корисно за Вашиот бизнис.

Со едноставна безплатна партиципација на пазарот за споделување на слики Вашиот бизнис едноставно е вклучен во процесот на интернет маркетингот и овозможува дополнителен стрим за лесно наоѓање на Вашиот бизнис на интернетот.

Техники на користење

Иако веќе напоменав неколку можности за користење на овој сервис би сакал да наведам и еден процес кој би ве водел низ сето ова:

  • Прво нешто е секогаш да имате можност да фатите некој момент на слика.
  • Обидете се да стекнете навика за сликање, односно користење на Вашиот мобилен телефон за таа намена.
  • Сликајте: ваши производи, техничка подршка, вработени, потрошувачи, производен процес, монтажа, залихи…
  • Споделувајте на flickr.
  • Изберете колку што можете повеќе ознаки за сликите. Користете име на производ, сериски број, година на производство, примена, намена, проблем кој го решава…
  • Инсталирјте и користете бесплатни додатоци со кои ќе се прикажуваат тие слики на Вашиот веб сајт, блог или други социјални мрежи кои ги користите.
Објавено на 30/11/2010 | Filed Under: Маркетинг, Социјални медиуми 2 Comments