Алатки за тимска работа

Пред некој ден на претприемач имавме гостински пост кој се однесуваше на тимска работа и тимска ефективност при што главен акцент беше ставен на улогата на менџерот во градење и управување на тимови. Во овој пост би сакал да наведам неколку алатки кои денес може да се користат со цел да ја поттикнат тимската комуникација помеѓу членовите на тимот без потреба од постојани очи во очи состаноци.

Некои сигурно досега сум ги споменал на претприемач, но би сакал повторно да ги наведам бидејќи навистина претставуват моќни алатки во рацете на еден претприемач во ова време каде комуникација и соработка во тимот како и со клиенти е важен фактор за успешноста.

1. Skype

Skype – Алатка за комуникација

Skype е алатка која навистина го измени телекомуникацискиот свет. Со гласовни и видео повици, како и чет системот, трансфер на фајлови и конференциски повици Skype стана алатка која мора да се поседува и користи од страна на претприемачите. Големиот број на бесплатни сервиси може да ги намалат бизнис трошоците. Едноставен е за користење.

2. Google Groups

Google Groups – Алатка за соработка

Веќе во некои од претходните постови пишував за Google Groups, кој сметам дека може доста креативно да се користи во бизнис цели. Може да се користи за работа на различни проекти од повеќе луѓе каде ќе се споделуваат идеи, коментари и предлози. Може да се користи за информирање на вработени или група на потрошувачи за разни бизнис новости.

3. Google Docs

Google Docs – Алатка за соработка

Google Docs во подобрена верзија се чини дека повеќе внимание дава на соработка помеѓу група на луѓе. Сега истовремено може повеќе соработници да работат на еден документ без разлика дали е табела, текст или некоја презентација. Доколку имате интернет, немате средства за лиценцирање на MS Office ќе претставува доследна бесплатна замена за Вашите бизнис решенија и во некои случаи дури и подобра.

4. Dropbox

Dropbox – Алатка за соработка

Dropbox се додека не почнав да го користам не ја гледав ползата од него. Но, како место за сигурно чување на различни документи претставува солидно средство за еден бизнис. Бесплатната верзија е ограничена до 2 GB простор. Она што најмногу ми се допадна е што успеав една апликација во MS Access да ја сместам онлајн така да секогаш имам пристап до базата на податоци од таа апликација.

5. Google Wave

Google Wave – Алатка за соработка

Иако последна за мене претставува најважна алатка во моментов без која не можам да го замислам работниот ден. Дури се прашувам како сум можел да функционирам без Wave. Интересно е што оваа алатка од поединци можеби е најнапаѓана како нешто безвредно. Но, сигурен сум дека не ги почувствувале придобивките и можностите од користење. На претприемач веќе пишував во постот Комуникација и продуктивност кога започнав да ја користам. Продолжив и на секој на кој што сум му објаснил како да ја користи веднш станува секојдневен корисник на оваа алатка. Најчесто ја користам за соработка на различните проекти во кои сум вклучен како и за комуникација и размена на идеи со клиентите.

Најголемиот проблем што веднаш не може да се забележи корисноста од Google Wave е што не се работи во група на луѓе. Сам човек, безвреден Wave.