Минатата недела секојдневно работевме на финализацијата на драфт верзијата или поточно верзиите на нашиот бизнис модел како дел од теорија на бизнис идеи која цела година ќе ја развиваме тука на претприемач.
Со претходната вежба која ја правевме тука за оваа теорија ти веќе имаш драфт верзија на твојот бизнис модел пополнет од десната страна со поставување на првата хипотеза (постои проблем) интегрирана во самиот бизнис модел. Сега пред да продолжиме со излегување надвор од канцеларија, таа драфт верзија на бизнис модел треба да ја дополниме, да ја поделиме во повеќе бизнис модели и да избереме еден кој ќе започнеме да го тестираме со потенцијалните купувачи.
Тоа беше теоретското излагање од минатата недела, сега е време на вас да го примените во пракса преку оваа вежба.
Да се потсетиме на постовите кои беа дел од она што го работевме минатата недела:
- Теорија на бизнис идеи – Хипотеза 1: Подготовка за тестирање. Во овој наслов работевме на дополнување на самата драфт верзија на бизнис моделот со останатите 7 непополнети елементи на самиот бизнис модел, со што целосната слика на таа драфт верзија е подготвена.
- Теорија на бизнис идеи – финализација на бизнис модел 1. Ги дефиниравме сите можни карактеристики на нашето решение и ја вметнавме и третата хипотеза (постои доволно голема критична маса) преку проценка на големината на сегментите.
- Теорија на бизнис идеи – финализација на бизнис модел 2. Тука веќе ги внесуваме бројките во однос на приходот и трошоците како за првпат би виделе дали нашите претпоставки даваат надежен бизнис модел преку неговата профитабилност.
- Теорија на бизнис идеи – финализација на бизнис модел 3. Во овој наслов повеќето бизнис модели ги редефиниравме и редизајниравме врз основа на оние ненадежни бизнис модели и ја вметнавме втората хипотеза (се бара решението), односно нивото на болка која секој од сегментите ја има во однос на проблемот кој тој бизнис модел ќе го решава.
- Теорија на бизнис идеи – приоритизација на бизнис моделите. Повеќето бизнис модели до кои дојдовме со претходните активности треба да ги приоритизираме, односно рангираме по важност и победникот да биде основа на која ќе продолжиме да развиваме преку тестирање кое ќе следува од следната недела.
Чекори кои треба да ги спроведеш во вежбата:
- Дополни ја драфт верзијата на бизнис моделот во однос на односи со купувачи, канали, приходи, клучни активности, клучни ресурси, клучни партнери и трошоци.
- Дефинирај ги сите карактеристики кои ќе бидат или можат да бидат имплементирани во решението. Вметни се што мислиш дека треба да има како карактеристика, дури и најлудите или најнеизводливите идеи.
- Процени ја големината на сегментите и до секој сегмент впиши ја неговата бројка.
- Врз основа на карактеристиките како и сгементите од основниот еден бизнис модел направи повеќе. Главната поделба треба да ја изведеш врз база на карактеристиките на сегментите, како и карактеристиките на решението за соодветниот сегмент.
- Процени ги трошоците како и приходите во комбинација со големината на сегментите и претпоставката за можното учество на пазарот за тоа решение.
- Подели ги бизнис моделите на надежни и ненадежни врз основа на профитабилноста. Оној кој дава профит е надежен, додека оној кој не дава профит е ненадежен.
- Разгледај ги оние ненадежните и провери дали тие карактеристики се потребни за тој сегмент, а врз основа на исфрлања на некои карактеристики ќе ги промениш останатите елементи да тој бизнис модел.
- Провери ја профитабилноста на тие ненадежни редефинирани и редизајнирани бизнис модели. Доколку станува профитабилен нека остане како работен, а сите непрофитабилни заборави ги.
- Направи вредносна анализа како што е прикажана во постот од минатата недела и избери го најнадежниот бизнис модел на кој ќе продолжиш со работа.
На крајот од оваа недела ќе имаш еден бизнис модел кој следната недела ќе продолжиме да го развиваме и тестираме.
Speak Your Mind