post

Бизнис идеja и нулта хипотеза

Бизнис идеите се нешто што мора да биде тестирано пред да станат бизнис можности, и пред да бидат трансформирани во вистински бизнис.

За тебе, бизнис идејата е нешто во што лично ти веруваш ќе функционира како профитабилен бизнис. Кога ќе ги вклучите и потребите на потрошувачите во идејата таа ќе стане бизнис можност, спремна за претстоечки стартап.

На пример, имате бизнис идеја која може да биде претставена како изјава која статистичарите ја нарекуваат хипотеза. Хипотеза наједноставно кажано претставува идеја која може да биде тестирана.

Доколку сакаме да го користиме статистичкиот јазик во овој процес, ќе можеме да кажеме дека изјавата дека бизнис идејата ќе успее претставува нулта хипотеза, и сега сакаме да ја тестираме со друга хипотеза која е спротивна н нултата хипотеза. Спротивната хипотеза на нултата хипотеза ќе биде изјавата дека бизнис идејата нема да успее.

Важно е да размислиме за сите можности во процесот на иницијалниот развој или тестирање на бизнис идејата. И една од тие потенцијални можности е дека бизнис идејата нема да успее.

Погледнете во сликата подолу како еден пример на овој процес.

Бизнис идеја - Нулта хипотеза

Бизнис идеја - Нулта хипотеза

Што значи ова?

  • Ја имате вашата бизнис идеја со нулта хипотеза која ќе успее на пазарот како бизнис.
  • Алтернативната хипотеза е дека бизнис идејата нема да успее на пазарот како посебен бизнис.
  • Постојат повеќе рзлични причини за оваа алтернативна хипотеза. Вашата работа е да ги пронајдете сите можни причини кои може да доведат до неуспех на вашата бизнис идеја.
  • Секоја причина која води кон неуспех може да биде избегната доколку вие како претприемач подготвите конкретни акциони чекори за надминување на тие препреки.

Ова е процесот кој мора да се примени пред да го започнете бизнисот, доколку сте претприемач кој е во фаза на започнување на бизнис, или пак доколку започнувате со имплементација на нови бизнис идеи во вашиот тековен бизнис. Секогаш користи алтернативна хипотеза, нешто спротивно доколку сакаш да го тестираш идниот успех.

Последно, не е и најмалку важно е дека секогаш мораш да ги гледаш работите како што навистина се.

post

Бизнис идеи – Најдоброто на претприемач во 2010

Бизнис идеи - Најдоброто на претприемач

Бизнис идеи - Најдоброто на претприемач

Бизнис идеи се основата од која се започнува. За разлика од минатата година кога голем дел од концентрацијата на овој веб сајт беше ставен на бизнис идеите оваа година повеќе бевме концентрирани на други теми.

Ова е втората тема од серијалот Најдоброто на претприемач за 2010 година.

Како нешто што навистина вреди да се прочита и знае за оваа година во категорија бизнис идеи ги издвоивме следниве постови:

  1. 40 совети да бреинстормирате бизнис идеи – Дел 1. Бреинстормирање на бизнис идеи претставува навистина еден креативен процес во кој учествува еден претприемач. Во овој пост се дадени првите 20 совети за бреинстормирање на бизнис идеи.
  2. 40 совети да бреинстормирате бизнис идеи – Дел 2. Во овој пост се дадени вторите 20 совети за бреинстормирање на бизнис идеи.
  3. Имате бизнис идеја – Што понатаму? Што понатаму откако ќе дојдете до добра бизнис идеја? За одговорот на оваа прашање ќе можете да прочитате воовој пост.
  4. Препознавање на можности и создавање на идеи. Овој пост претставува краток преглед на академската литература од областа на претприемничко препознавање на нови можности и создавање на идеи.
  5. Преглед на книгата Making Ideas Happen. Оваа книга доста се разликува од досегашните кои сум ги прочитал за бизнис идеи. Додека повеќето книги се концентрираат на тоа како да се дојде до добра бизнис идеја Making Ideas Happen се концентрира како да добрите бизнис идеи постанат реалност (да се случат, да се трансформираат во еден успешен бизнис). Прочитајте го прегледот на книгата и ја препорачувам за читање на сите кои сакаат да станат претприемачи како и сите сегашни претприемачи.
  6. Бизнис идеја ≠ Бизнис можност. И двата термина се користат во процесот на започнување на бизнис од страна на претприемачот. Но, она што е забележително е дека често пати бизнисот се започнува само со бизнис идеа, која не е претворена или трансформирана во вистинска бизнис можност. Преку овој пост ќе ја увидите разликата на овие два термини.
post

Бизнис идеја ≠ Бизнис можност

Бизнис можности VS Бизнис идеи

Бизнис можности VS Бизнис идеи

Како една од причините за пропаѓање на бизниси често пати ја гледам конфузноста на претприемачот во однос на два термини многу важни за започнување на бизнис: бизнис идеја и бизнис можност.

И двата термина се користат во процесот на започнување на бизнис од страна на претприемачот. Но, она што е забележително е дека често пати бизнисот се започнува само со бизнис идеа, која не е претворена или трансформирана во вистинска бизнис можност. И токму заради тоа бизнисот веднаш по стартап фазата започнува да страда преку недостаток на купувачи, а поради тоа и недостаток на финансиски средства за финансирање на функционирањето на бизнисот.

Претприемач е човек кој онаму каде што сите (пазарот) гледаат проблем тој гледа бизнис можност. Токму тоа е и најголемата предност на еден претприемач.

Како функционира во пракса?

Многу бизниси (успешни бизниси) се резултат на некој проблем на пазарот кој е откриен од страна на претприемачот. Но, од друга страна многу бизниси се резултат и на индивидуален проблем кој претприемачот го има откриено за себе и во една таква фрустрирачка состојба доаѓа до бизнис идеја. Но, сепак таа фрустрирачка состојба е лична на претприемачот.

Дали освен претприемачот и некој друг се наоѓа во таква фрустрирачка состојба?

Доколку одговорот е не, иако бизнис идејата е добра таа сепак не претставува бизнис можност.

Доколку одговорот е да, потребно е да се провери бизнис идејата дали претставува бизнис можност.

Која е разлика помеѓу бизнис идеја и бизнис можност?

Како што можевте да забележите од претходниот поднаслов една бизнис идеја е:

  • позната лично на претприемачот,
  • базирана на сопствена фрустрација на претприемачот,
  • иновација од страна на претприемачот.

Но, дали бизнис идејата се однесува само за еден човек – претприемач.

Во бизнисот постои еден едноставен принцип кој вели:

Доколку еден претприемач лично познава минимум 10 лица (физички или правни) кои би го купиле неговиот производ и/или услуга од соодветната бизнис идеја по соодветната цена и други услови, веројатно постојат и се наоѓаат таму некаде на пазарот уште стотици, илјадници или пак милиони потенцијални купувачи, само потребно е да дознаат за тие производи и/или услуги.

Значи, за една бизнис идеја да се трансформира во бизнис можност потребно е да се внесе уште едно лице во процесот, а тоа е потрошувачот.

Бизнис можност = бизнис идеја + потрошувач

Карактеристики на бизнис идеја

За да една бизнис идеја биде истовремено и бизнис можност ќе треба да исполни одредени карактеристики:

  • да биде атрактивна за потрошувачот,
  • потрошувачот да може да си ја дозволи и
  • претприемачт да може да ја оствари.

Бизнис идеја која не е атрактивна за потенцијалниот купувач не е добра бизнис идеја, затоа мора да има потреба на пазарот од производи и/или услуги кои се производ на таа бизнис идеа. Од друга страна бизнис идеја која креира скап производ и/или услуга при што потенцијалните купувачи нема да можат да си го дозволат исто така претставува лоша бизнис идеја. И секако таа бизнис идеја мора да биде остварлива од страна на претприемачот, односно претприемачот да има знаење и можности да ја реализира истата.

post

Со научни методи до бизнис идеја

Овој пост е напишан од М-р Илија Чубровиќ, коавтор на книгата Менаџмент на Претприемничкиот Бизнис и еден од креаторите на идејата за овој веб сајт.

Бизнис идеи преку научни методи

Бизнис идеи преку научни методи

Не постои бизнис кој може да успее без луѓе. Претприемачот кој сака да започне со работа треба да има контакти со голем број на луѓе, да биде добро социјализиран и да слуша туѓи идеи. Најчесто луѓете со добри бизнис идеи не се и добри реализатори или им недостасува некоја од компонентите (искуство, знаење или финансии) па не можат да ја реализираат идеjата. Со слушање на изнесените идеи, решителен и дисциплиниран човек може за себе да обезбеди добар бизнис. За жал оној што имал добра идеја, а немал одлучност да ја реализира идеjата останува само нем посматрач на туѓиот успех (и никој не му кажува ни благодарам).

За отпочнување на секој бизнис потребно е да се има добра идеjа. Идеjата сама по себе не претставува решение на сите проблеми, ама претставува голем потикнувачки фактор за отпочнување на бизнис активности. Групирање на идеи може да се изврши и преку одредени научни методи. Во светот постојат неколку широко применети методи кои поттикнуваат интуитивно размислување. Тие методи најчесто настануваат преку потребата на воените служби или претставуваат успешни проекти на големите универзитети кои понатаму стануваат општо познати и применливи за широкото стопанство. Тука се опишани методи за добивање на идеи за големи системи, меѓутоа со одредена апроксимација (упростување) може да послужат и како начин за добивање идеи и во малите системи.

1. Brainstorming (мозочна бура или бура од идеи)

Оваа техника се состои во организирање креативен состанок на одредени стручни лица чиј број најчесто се движи помеѓу 5 и 15, на кој се врши собирање на мислења и ставови како и идеи за конктретно прашање, поради што се организира тој состанок. Се бара целосно слободно изјаснување. Критиката е исклучена. Не смее да се слушне збор тоа е глупаво, тоа е неможно и слично, со цел да се соберат што повеќе идеи без оглед на нивното значење и можно влијание на решавањето на конкретниот проблем. Потоа следува оценување на значењето на секоја идеја и нејзино рангирање. По рангирањето идеите влегуваат во понатамошен третман и високо рангираните идеи одат на понатамошно реализирање.

Оваа може да се примени и во малите фирми (бизниси) на тој начин што претприемачот би собрал луѓе (сега има се поголем број на високообразованите претприемачи кои исто така имаат високообразовани пријатели кои можат конструктивно да учествуваат во добивање на идеи, меѓутоа секој човек може да даде конструктивно решение) кои слободно и спонтано би изнеле идеи, а понатаму високорангираните идеи претприемачот би ги реализирал.

2. Delphi Метод

Оваа метода го добила името по грчкиот град каде во старите времиња се предвидувала иднината. Методот се состои од одделни испитувања, најчесто преку прашалници, се повикуваат експерти, носители на клучни работни задачи на повеќекратен разговор поради утврдување на нивниот став, идеја или предлог. Тие даваат одговори, наведуваат факти и предлози. Во вториот круг од разговорите учесниците се известуваат за дотогашните вкупни резултати, па од нив се бара да ги бранат своите ставови. Постапката по потреба се повторува. За тоа време доаѓа до расчистување на проблемот, до кристализација на конечните ставови, идеи и предлози. Доколку не се постигне резултат, испитувањето се прекинува, а може да се продолжи со другите учесници. Исто оваа може да го примени претприемачот за своите потреби во упростената форма каде би составил прашалник и би собрал одредена група на пријатели и би се обидел да собере одреден број на корисни идеи.

3. Синектички метод

Ова е специфичен облик на дискусиски метод за пронаоѓање идеи, решавање на одредени проблеми и др. Дискусиски тим се состои од 5 до 7 лица со различна стручност и образование, лица кои се специјално одбрани за таа пригода. Проблемот, целта и планот се разложуваат толку долго се додека сите членови на дискусискиот тим не ја сфатат нивна суштина, значењето и она што се сака да се постигне со работата на тимот. Потоа проблемот се отуѓува и се наоѓа сличност во природата (се земаат ликови во вид на животни: риби, жаби, желки… и други облици како идејни облици за одредените производи) и слично. Со помош на таквото апстрактно скршнување од почетниот проблем се бара и се наоѓа неговото решение. Решението може да претставува идеја која се граничи со фантазија што на организаторот на дискусијата му остава задача подоцна со обработката на резултатите, да извлече корисни и потребни сознанија и заклучоци.

4. Морфолошки метод

Овој метод е соодветен за идеите за високата технологија. Тој обезбедува да се избегнат важните грешки во пристапите од кои се тргнува во предвидувањето и овозможува примена на принципот на повеќе димензионална класификација, која се сведува на расчленување на одредена целина на составните делови. Се формира матрица во која во првата колона се основните обележја а во другите колони се варијацији на основните обележја. При примената на морфолошкиот метод во прв ред е потребно да се утврдат сите постојни обележја (се анализираат сите можни варијанти без оглед колку се чудни или тешко остварливи) и се внесуваатт во матрицата. На тој начин овој метод може да помогне да се изврши соодветна класификација на новите технолошки решенија. Покрај тоа се отвара можност за комбинирање на елементите во нов пристап, независно од тоа во која мерка таквите решенија се моментално можни, изводливи и ефикасни.

Морфолошка матрица

5. Креативен удар

Овој термин прв пат е употребен од Tom Peters со цел да се опише процесот на агресивно откривање на знаењата и интересите на конкурентите. Тој предлага сите вработени да се преобразат во т. н. Vacuum cleaners (правосмукалки) за да побараат и да го разберат најдоброто што го нудат другите. Токму тоа го правел Marriott при дизајнирање на својата мрежа хотели. Цели тимови од вработени во маркетингот, финансиите, човековите ресурси и оперативата биле испратени на близу 400 конкурентски хотели за да ги истражат нивните карактеристики (креветите, големина на собите, дебелина на зидовите, придружните ресторани итн.), нивните услуги ( резервации, внимание на персоналот и др.) и нивниот менаџмент (работење, морал …). Резултат на тоа била добро дизајнирана мрежа хотели со пристапни цени наменети за бизнисмени кои често патуваат.

Истото ова секој претприемач мора да го применува се додека работи. Бидејки внимание кое се обрнува на конкурентите мора да биде големо за да се знае однесувањето на секој конкурент (цени, односот кон клиенти, начин на плаќање…). Секаде во светот е голема чест да се има вработување и не е ни лесно ни едноставно да се бара ново вработување, поаѓајки од тоа секој вработен треба без никакво посебно насочување да го следи пазарот и конкурентите и за тоа да го известува претприемачот кој соодветно би реагирал на секој предизвик (види SWOT-анализа).

post

Преглед на книгата Making Ideas Happen

Making Ideas Happen

Уште од самиот почеток на овој блог бизнис идеите се тема која доста ја разработуваме. Тие се основата и почетокот на секој бизнис, тие се денот Д во раѓањето на еден нов бизнис. Пред извесен период ја купив Kindle верзијата на Making Ideas Happen од Scott Belsky и моето првично искуство од овој нов начин на читање е на многу високо ниво за што повеќе пишував Технологија – промена на навики.

Она што во прв план можам да го кажам во однос на оваа книга е дека доста се разликува од досегашните кои сум ги прочитал за бизнис идеи. Додека повеќето книги се концентрираат на тоа како да се дојде до добра бизнис идеја Making Ideas Happen се концентрира како да добрите бизнис идеи постанат реалност (да се случат, да се трансформираат во еден успешен бизнис).

Бизнис идејата е еден од факторите кои во себе содржат бизнис потенцијална енергија (концепт кој јас го дефинирав и користам воподобрувањето на бизнисите). Но, постои опасност таа бизнис потенцијална енергија да не се претвори (трансформира) во кинетичка енергија (вистински бизнис, акција). Токму тој процес на трансформација на идејата во акција е опфатен во оваа книга.

Што опфаќа Making Ideas Happen?

Книгата започнува со следнава реченица:

Идеите не се случуваат затоа што тие се одлични идеи или заради случајност.

Значи не постои случајност или пак гаранција бидејќи идејата е одлична дека ќе успее. За да успее или да се случи идеата согласно Scott Belsky потребни е следниов збир:

Случување на идејата = Идеја + Организација + Заедница + Лидерски способности

Оваа книга опфаќа се совен доаѓање до идеите, односно самата идеја.

  1. Организација. Без соодветна организација која ќе даде соодветни акциски чекори и идни насоки за завршување на проектот (идејата) идејата може да биде заборавена и оставена некаде на страна без потенцијал да стане реалност.
  2. Заедница. Секоја идеја не смее да биде во изолација. Вашиот бизнис нема да биде само за Вас. Затоа овој концепт содржи и заедница до која треба да се распространи идејата. Освен распространувањето на идејата во оваа фаза потребно е и слушање како идејата би се подобрила.
  3. Лидерски способности. Се што е ново или креативно предизвикува отпор. Затоа ефективно лидерство во процесот на имплементација на бизнис идеи е неминовно за соодветен успех.

За кого е оваа книга?

Првенствено оваа книга е за сите претприемачи, сегашни или пак идни. Не верувам дека не постои човек кој нема барем една идеја за започнување на бизнис. Сите сме креативни, тоа е вродено кај човекот. Целиот живот се сведува на решавање на проблеми, а проблемите бараат креативност.

Но, некој има неколку а некој повеќе бизнис идеи. Не мора да значи само бизнис идеи, може да постојат и идеи за проекти, за активности, за прилагодување на животниот стил… Особена помош од оваа книга може да добјат сите оние кои имаат многу идеи, а слаба реализација. Со помош на книгата ќе научат еден процес како да ги трансферираат идеите од нешто абстрактно, непостоечко во нешто реално, опипливо.

Неколку извадоци кои ми беа интересни

Со помош на Kindle имав можност да потцртувам и да следам што другите подвлекле како интересно или важно во книгата. Од едно 50-тина highlights во книгата ќе извлечам неколку тука:

  1. За секоја идеја мора да пронајдете и да ги потенцирате акциите кои треба да ги превземете во вид на чекори.
  2. Колку се појасни и поконкретни Вашите чекори помал напор ќе имате во обид да ги комплетирате. Доколку чекорите се нејасни или комплицирани, веројатно ќе ги скокнете  и ќе се насочите на другите од Вашата листа кои се поедноставни.
  3. Кога станува збор за организирање на чекорите на дневна основа и како да ја алоцирате вашата енергија во реализација креирајте две листи: една за ургентни чекори и една за важни чекори.
  4. Направете дневни подрачја за фокусирање.
  5. Без разлика дали работите сами или со тим, посветеноста на раните чекори (акции) ќе помогне идејата да се материјализира.
  6. Голем дел од извршувањето зависи од упорноста.
post

Зголемување на креативност преку 6 совети

Креативност 6 совети

Креативност 6 совети

Бизнис идеите доаѓаат од мозокот на еден претприемач. Добра бизнис идеја доаѓа кога вашата креативност е на високо ниво. Но, не сме секогаш креативни. Или пак, кога сме креативни може да се случи (што и почесто се случува) подоцна да ги заборавиме идеите затоа што не сме ги запишале. Во вакви случаи идејата се губи и веќе не е актуелна. Секој добар бизнис се базира на добра бизнис идеја која е резултат на креативноста на претприемачот.

Проблемот често пати е во временска разлика помеѓу доаѓање на една бизнис идеја и започнување со реализација на истата.

Како да ја поттикнеме креативноста во секој од нас за да дојдеме до добра бизнис идеја која ќе се трансформира во успешен бизнис? Креативноста е дел од вториот слој за успех на еден претприемач.

Постојат различни конкретни начини за максимизирање на креативноста заради изнаоѓање на одлични бизнис идеи. Следниве совети може да ви помогнат во самиот процес:

1. Имајте бележник секогаш кај себе.

Никогаш не знаете каде може да добиете добра бизнис идеја. Дали кога ручате, гледате телевизор, одмарате, слушате радио, возите автомобил или велосипед. Доколку не ги запишете нема да ги запомните. Бележникот или нотесот не мора да биде некој голем, доволно е да имате мал нотес кој можете да го носите во џеб, парче хартија и пенкало. Идеите можете да ги заведувате и на лап топ доколку го имате кај себе, можете да го користите вашиот мобилен телефон како бележник бидејќи скоро секогаш ви е при рака. Скоро и да нема мобилен телефон без некоја софтверска апликација за бележење (Notes). Можете да користите и Evernote.

2. Сменете ги рутините во вашиот живот.

Секогаш кога правиме нешто во секојдневието го правиме врз основа на некои рутини или по автоматизам. Она што го знаеме го правиме без размислување. Но, дали ќе биде исто ако не го правиме тоа на истиот начин? Доколку ги смениме рутинските работи во нашето секојдневие ќе ја поттикнеме нашата креативност. Веднаш ќе се соочиме со некој проблем кој ќе треба да го решиме што ќе бара креативност од наша страна. Се што ќе не оттргне од нашето нормално опкружување ќе на наведе да ги гледаме работите на нов многу поинаков начин.

3. Разгледувајте.

Кај и да одите или патувате, разгледувајте околу себе, следете ги работите како се одвиваат кога купувате нешто, кога читате нешто, кога јадете во ресторан, кога сте во кафеана или пак пиете пиво со пријателите. Започнете да се прашувате за тоа што го гледате и зошто го гледате тоа. Сето оваа ќе ја разбуди креативноста кај вас. Одговорот на прашањето Зошто секогаш доведува до зголемување на знаењето и секако до поттикнување на креативноста.

4. Вмрежувајте се.

Без сопствено вмрежување уште во оваа фаза од вашиот бизнис шансите за успех се мали. Сретнувајте различни луѓе, запознавајте се со нив, разменете искуства и сето тоа ќе доведе до нови идеи. Не заборавајте го интернетот преку кој можете да се допишувате и да разговарате со луѓе од различни краишта на светот. Отворете акаунт на Facebook и Twitter и полека но сигурно ширете ја сопствената мрежа на пријатели и разговарајте за темите кои ги размислувате. Искористете ги сите тие различни размислувања. Ова е уште подобро бидејќи ќе креира и потенцијални потрошувачи за вашиот иден или постоечки бизнис.

5. Реиновација.

Земете различни производи додавајте им некои својства, како на пример, додадете на фармерки некој каиш од стари алишта кој вие ќе го изработите. Дали ќе ви се допадне креацијата? Комбинирајте 2 или 3 производи во еден. Сигурно во вашата блиска околина постојат илјадници производи кои ги користите или не ги користите. Размислувајте за друго некое поинакво користење на тие производи. Сето тоа помага во креирање на конечната бизнис идеја.

6. Користете ги местата кои ја зголемуваат креативноста.

Различни места на кои се наоѓаме имаат различни влијанија на креативноста и начинот на функционирање на мозокот. Кога возите сами секогаш размислувате за нешто и во тој момент креативноста ви е на високо ниво. Обидете се да запомните нешто (бидејќи додека возите не можете и да запишувате) и потоа запишете ја идеата (Јас во случај на возење го користам мојот iPhone и една апликација која служи за снимање на гласовни белешки). Според повеќе истражувања најкреативното место за човекот претставува купатилото под туш или во бања или пак на WC школка.

Околу 90% од мажите потврдуваат дека на WC школката им е најголема креативноста, за разлика од жените кои имаат различно мислење за оваа место. Како места за извор на добри идеи се и здодевните состаноци. Секој состанок кој е долг, на кој се забегува од темите допринесува да вашиот мозок заскита на покреативни работи (Оваа е точно, сумприсуствувал на многу бесцелни и долги состаноци и во моментов кога таа здодевност ќе преовладее со мојот мозок тој веќе размислува за нешто друго).

Ова се само дел од местата за кои се смета дека ја зголемуваат креативноста, но секоја личност има различни места. Затоа пронајдете го вашето место и искористете го за креирање на бизнис идеи.

Запомнете дека добивањето на добра бизнис идеја доаѓа од различни извори. Обично бизнис идејата е резултат на мината или сегашна кариера, хобито, личниот интерес и активностите во слободно време. Понекогаш идеите се резултат од идентификација на идни трендови или пак од наоѓање на некој проблем и негово решение.

За да се добие добра бизнис идеја потребно е креативноста да е на високо ниво, односно да му допуштите на вашиот мозок да биде креативен. За да креативноста биде на високо ниво потребно е да се ставите надвор од позиција на нормалните рутини на вашиот живот.

post

Препознавање на можности и создавање на идеи

Ова е гостински пост на Александар Делев, Ba in Marketing, University of Sheffield, UK.

Бизнис можности и идеи

Бизнис можности и идеи

Извадок: Овој есеј овозможува краток преглед на академската литература од областа на претприемничко препознавање на нови можности и создавање на идеи. Прво, мислењата на угледни членови од академските кругови ќе бидат дискутирани и споредувани. Во продолжение, ќе се дискутираат проблемите поврзани со дизајнирање претприемнички модели каде што како пример ќе биде земена една неодамнешна академска студија. На крај, улогата и важноста на ваквите модели ке биде објаснета како и дел од потенцијалните несогласувањата помеѓу теориите и праксата во оваа област.

Вовед во препознавање на можности и создавање на идеи

Во денешно време претприемништвото претставува едно од најбрзо развивачките полиња во економијата. Присутно во секоја индустрија, на корпорациско како и на ниво на мали бизниси, претприемништвото е често признавано од страна на академците како главниот економски двигател кон подобрување и експанзија. Дури и со такви признавања, може да се тврди дека сеуште нема доволно потврдени врски помеѓу општоприфатени бизнис теории и местото на претприемништвото во економијата и организациските стратегии. И покрај тоа, како што истражувачите и менаџерите се повеќе ја признаваат важноста на ова поле и поврзаните истражувања, еден аспект кој добива зголемено внимание во последните неколку години се претприемничките процеси на препознавање бизнис можности и создавање на идеи. Преку академската литература од оваа област можеме да видиме дека истражувачите прават напори да ги идентификуваат клучните фактори кои влијаат врз овие процеси и се обидуваат да дизајнираат применливи процес модели. Целта на преостанатиот дел од есејот е да обезбеди краток преглед на литературата од областа на моделирање на процесите на препознавање на бизнис можности и создавање соодветни идеи.

Преглед на академската литература

Едно од најважните прашања со кое се соочуваат денешните истражувачи е идентификацијата на соодветниот сет на фактори и околности за деловен успех. Како резултат на обемната литература на распологање од областа на претприемништвото, има многу спротивставени теории и концепти од различни академици кои постојано се дискутираат во бизнис круговите. Различни академици ги дискутираат и бранат своите гледишта во поглед на сите претприемнички процеси и активности.

Де Конинг (1999) тврди дека терминот “препознавање можности”, како што се користи во академските кругови може да се однесува на откритие на јасна бизнис идеја или развивање на идеја во остварлив бизнис концепт со тек на време.

Конкретната област на препознавање на бизнис можности е особено збогатена преку новите академски истражувања во последните неколку години. Имено, преку истражувањата и придонесите на академици како Шејн, Лампкин и Гилад се идентификувани и соодветно моделирани неколку критични фактори во овие процеси. И покрај тоа што здружените напори на истражувачите и менаџерите сеуште не резултирале со дизајнирање на универзално применлив процес модел, постојат екстензивни дискусии за веќе утврдените фактори. На пример, Оконен и Сухонен (2010) ја дискутираат важноста на социјалните мрежи на претприемачот за процесот на идентификација на нови бизнис можности, каде што силен акцент е даден на претприемничката готовност, признаен предуслов во многу бизнис учебници во последните години. Дополнително на тоа, има истражувачи кои ја истакнуваат улогата на расположливите информации во овој процес и поконкретно објаснуваат дека подобро информиран претприемач има подобри шанси да идентификува нова бизнис можност.

Шејн (1998) и Ваутер (2010) ја потврдуваaт улогата на таканаречената информатичка асиметрија и важноста да се има претходно работно искуство во секторот како дел од процесот на препознавање на нови можности. Додатно на тоа, во нивните трудови тие дискутираат дека претприемачите ќе можат полесно да процесираат важни информации и да идентификуваат трендови ако имаат претходно искуство во секторот. Сепак, според истражувањата, факторот на претходно искуство и познавање на секторот може да се подели на три дела и тоа:

  • познавање на пазарите,
  • секторски маркетинг и
  • знаење поврзано со однесувањето на муштериите (Ардихвили и Кардозо, 2000).

Околностите во кои откритијата се направени се од голема важност за истражувачите во нивните напори да ги креираат процес моделите. Поконкретно, акцент се става на прашањето дали претприемачите започнуваат планирано истражување или едноставно наидуваат на информации и ги “поврзуваат точките”, како што е опишано од страна на академиците преку нивните когнитивни модели.

Има обемна литература и истражувања кои тврдат дека мнозинството претприемнички откритија биле остварени како резултат на планирани истражувања и скенирање на околината.

Од друга страна пак, има истражувачи кои тврдат дека овој процес зема по спонтана форма во мнозинството случаи и дека претприемачите ја откриле можноста откако случајно наишле на откривачки информации. Истражувањата од ова поле одат до таа мера што тврдат дека бизнисите кои биле стартувани откако можноста била откриена спонтано побрзо ја враќале почетната инвестиција од оние кои биле почнати како резултат на истражување и скенирање (Клеин, 2008).

Понатамошни примери можат да се најдат во еден од најактивните претприемнички сектори – информатичката технологија, каде што за 50% од компаниите се смета дека превзеле истражувачки активности и скенирање на околината пред да бидат стартувани. Во смисла на мрежи, академските истражувања потврдуваат позитивна корелација помеѓу големината на мрежата (број на пријателства и познанства) и веројатноста дека претприемачот ќе идентификува нови можности во својата средина и област на експертиза. Истражувачите тврдат дека до одредена мерка, сите мрежи овозможуваат ист квалитет и квантитет на информации. Дополнително на тоа, Арениус и Де Клерк (2005) дискутираат дека контактите во мрежите можат да бидат идентификувани и категоризирани како силни и слаби, со тоа што мнозинството претприемачи имаат повеќе слаби отколку силни контакти. Една од главните бенефиции од слабите контакти е тоа што тие овозможуваат поинтензивно работење и соработка во склопот на мрежата, со главен акцент ставен на меѓусебно информирање во области во кои прептриемачот не би можел да добие информации од своите силни контакти, како што се семејството и блиски пријатели.

Понатамошни истражувања тврдат дека типот и големината на мрежата се дел од факторите кои одредуваат какви информации ќе му бидат достапни на претприемачот и колкава претприемничка готовност ќе демонстрира таа индивидуа (Барон и Енсли, 2006). Истражувачите прават напори да ја претстават креативноста како дел од процесот на претприемничко препознавање на нови бизнис можности уште од 40 – тите години на минатиот век, опишувајќи ја како карактерна особина која мнозинството ја нема ( Шумпетер, 1934). Сметана за многу потребна особина, креативноста може да биде блиску споредена и објаснета преку индивидуалната претприемничка способност да се “поврзат точките” во смисла на нивната толеранција кон информатичка нејасност и способноста да се препознаат нови трендови.

И покрај тоа што претходно дискутираните фактори се едни од најчесто спомнуваните и признавани фактори од страна на истражувачите во нивните напори да создадат процес модел на претприемничко препознавање на нови бизнис можности, таквиот модел сеуште не е создаден. Главната пречка сеуште се појавува во форма на големата разноликост на околности со кои се соочуваа претприемачите, карактеристиките на индустријата како и личните карактерни особини на претприемачот. Поради ваквата комплексност на областа, заедничките напори на истражувачите и менаџерите сеуште не резултирале со универзално применлив процес модел. Во напорите да се смени тоа, Ардихвили и Кардозо (2000) анкетирале осум претприемачи со развиени сопствени бизниси и тестирале неколку фактори признаени од академијата како важни за овој процес. Заклучоците од ова истражување на можеле да потврдат позитивна врска само со факторот креативност, додека факторите како претприемничка готовност, претходно искуство, познавање на индустријата и мрежно работење биле потврдени како присутни во случаите на тие претприемачи. Пронајдоците од оваа анкета не можат да се генерализират, но укажуваат на тоа дека теоријата не се совпаѓа целосно со тоа што се случува во реалноста и дека приодите кон изнаоѓање на процес модели ќе треба да еволуираат паралелно со новите случувања во бизнис круговите.

Користена литература:

  • Ardichvili, A. & Cardozo, R.N. (2000) A model of the entrepreneurial opportunity recognition process. Journal of Enterprising Culture, 8(2), 103-119.
  • Arenius, P. & De Clercq, D. (2005) A Network – based Approach on Opportunity Recognition. Small Business Economics, 24(6), 249-265.
  • Baron, R.A. & Ensley, M.D. (2006) Opportunity Recognition as Detection of Meaningful: Evidence from Comparisons of Novice and Experienced Entrepreneurs. Management Science, 52(9), 1331-1344.
  • De Koning, A., and Muzyka, D. (1999) Conceptualizing Opportunity Recognition as a Socio – cognitive Process. Research paper. Centre for Advanced Studies in Leadership, Stockhold, Sweden.
  • Klein, P.G. (2008) Opportunity discovery, entrepreneurial action, and economic organization. Strategic Enrepreneurship Journal, 2(14), 175-190.
  • Okkonen, L., and Suhonen, N. (2010) Business models of hear entrepreneurship in Finland. Energy Policy, 38(7), p.3443-3452.
  • Shumpeter, J. (1934) Capitalism, Socialism and Democracy. New York: Harper and Row.
  • Wouter, S. (2010) Industry event participation and Network Brokerage. Journal of Management Studies. 47(4), p.635-653.
post

40 совети да бреинстормирате бизнис идеи – Дел 2

Бреинсторминг на бизнис идеи

Овој пост е продолжеток на вчерашниот пост за 40 совети да бреинстормирате бизнис идеи. Во тој пост опфатив 20 совети за бреинстормирање на бизнис идеи за Ваш нов бизнис или едноставно за развој на веќе постоечкиот бизнис. Тука ќе продолжам со останатите 20 совети.

21. Претвори се во едно големо уво.

Мора да го слушаш гласот на потенцијалниот потрошувач, гласот на потенцијалниот конкурент и гласот на потенцијалниот снабдувач. Тука лежат многу добри и корисни идеи.

22. Претвори се во едно големо око.

Мора да гледаш се што се случува околу тебе и твојот нов или сегашен бизнис. Какви се изразите на лицето на потенцијалните клиенти?

23. Читај книги.

Во книгите се кријат многу квалитетни информации и идеи. Од нив можеш да увидиш трендови, мислења, ставови… Тоа е солиден извор на квалитетни бизнис идеи.

24. Следи го вебот.

Следи што се случува на веб. Во моментов тој може да биде единствен валиден и брзо достапен извор на информации за различни бизнис идеи.

25. Мотивирај се.

Побарај и најди начини кои те мотивираат во животот. Така ќе дојдеш до добри идеи кои ќе можат да се искористат да те турнат нанапред.

26. Бреинстормирај ги можните грешки.

Можните грешки претставуваат квалитетен извор или основа на добри идеи. Секоја грешка може лесно да се претвори во нова бизнис идеја.

27. Заборави на минатото, гледај во иднината.

Не прави грешка кога си во фаза на бреинсторминг да размислуваш на минатото. Барем за момент гледај само во иднината, минатото ја намалува твојата креативност.

28. Следи трендови.

Сепак твојот бизнис ќе треба да се вклучи во трендовите кои постојат или пак кои ќе бидат. Затоа следи ги трендовите за да дојдеш до уникатна бизнис идеја.

29. Релаксирај се.

Релаксирано тело и релаксиран ум ја зголемува креативноста. Затоа запри со се и обиди се да се релаксираш. Ќе забележиш како идеите едноставно ќе започнат да струјат низ твојот мозок.

30. Инспирирај се.

Добра инспирација е добра основа за започнување на потрага по најдобрата бизнис идеја. Затоа пронајди што е она што те инспирира и започни ја потрагата.

31. Одмори се.

Заморот едноставно ја сведува нашата креативност да биде на самото дно или подобро речено 0. Затоа не се обидувај да бреинстормираш бизнис идеи кога не си одморен, тие нема да дојдат.

32. Следи реклами.

Рекламите од било кој вид претставуваат солиден извор на потенцијални бизнис идеи. Со следење на рекламите воедно ќе ги видите и потенцијалните конкуренти како и што е она што тие го потенцираат во нивните реклами.

33. Соработувај.

Соработувај во текот на бреинсторминг сесијата и по завршување со сите кои што се вклучени директно или индиректно во твојот бизнис. Оваа соработка може да доведе до нови идеи или пак подобрување на постоечките.

34. Кои се најлуди идеи.

Обиди се дојдеш до колку што можеш повеќе луди идеи. Луди идеи кои во овој момент навистина изгледаат дека немаат потенцијал, дека се смешни, неостварливи. Но, сепак се идеи кои може утре да се употребат или пак прилагодат. Повторно, ова е фаза каде што нема никакви ограничување, туку само нафрлување на идеи.

35. Избегнувај самотија.

Во некои случаи самотијата може да помогне за зголемување на креативност, но претерана самотија доведува до депресивна состојба каде креативноста е на најниско можно ниво.

36. Избегнувај негативци.

За ова веќе пишував и дури од неколку претприемачи ми беше напоменато дека сум сосема во право. Прочитајте повеќе во Избегнување на негативци.

37. Сподели ја твојата најубава слика во мозокот.

Секоја слика, па и секоја идеја може да биде подобрена, надградена и дополнета. Затоа сподели ги твоите слики во твојот мозок со твојата околина. Повеќе за ова можете да прочитате во Се зависи од тоа како ги гледате работите околу вас.

38. Гуглај.

Најголемата база на податоци со информации и бизнис идеи која некогаш постоела на светот. Едноставно искористи ја, многу идеи се таму, но идеи кои може да се подобрат, надградат и надополнат.

39. Не грижи се за граматика и правопис.

Кога ги запишуваш бизнис идеите во книгата со бизнис идеи, на последно место нека бидат граматичките правила.

40. Заборави се што си учел во образовниот систем.

Образовниот систем ве учи на правила, процедури, одговорности и постапки. Во бреинсторминг сесии сето тоа е непотребно, затоа заборави на нив.

post

40 совети да бреинстормирате бизнис идеи – Дел 1

Бреинсторминг на бизнис идеи

Бреинсторминг на бизнис идеи

Бизнис идејата е основа врз која се темели секој нов, но и секој постоечки бизнис. Идејата е основниот двигател на една претприемничка економија. Тоа е и разликата што малите бизниси ги прави уникатни, единствени, прилагодливи и секако успешни.

Затоа во овој дел сакам да споделам некои препораки доколку се наоѓате во фаза на браинстормирање на бизнис идеи.

1. Прашајте го потенцијалниот пазар.

Секако доколку го знаете потенцијалниот пазар слободно можете да започнете со бреинстормирање на бизнис идеи од него. Во секој случај тие ќе бидат со најголемиот потенцијал.

2. Изберете место кое ја зголемува креативноста.

Креативноста е основа за добар бреинсторминг. Можете да прочитате повеќе во 6 совети за зголемување на креативноста.

3. Во текот на бреинстормин сесијата бидете слободоумни.

Слободоумноста ќе ве ослободи од различни предрасуди кога станува збор за бизнис идеите и секако ќе ја подобри секоја бреинсторминг сесија.

4. Кревајте врева.

Ова е добра препорака. Многу бизниси се изградени и опстојуваат врз основа на вревата што се дига околу нив. Затоа запалете го огинот со врева околу некоја идеја и следете што ќе се случува.

5. Секогаш имајте бележник кај себе.

Без бележник постои опасност идеите да бидат заборавени. Дури и најлудите и најглупавите и најневредните идеи во моментов можат да бидат најдобри во иднина.

6. Соберете колку што можете повеќе луѓе во кои имате доверба.

Бреинсторминг зависи од луѓето кои учествуваат во една таква сесија. Соберете колку што можете повеќе луѓе, но луѓе во кои што навистина имате доверба и за кои што сметате дека имаат потенцијал за една ваква задача.

7. Посетувајте саеми и секако електронски саеми.

Многу идеи може да произлезат од посетата на саеми и електронски саеми.

8. Патувајте.

Патувањето ја зголемува креативноста и секако видикот на еден човек, па затоа користете ги идеите што ви доаѓаат на ум кога патувате или пак кога сте на одмор.

9. Погледнете во Бизнис моделот на Вашиот иден или пак Ваш сегашен бизнис.

Секој повторен поглед на бизнис моделот ќе ве доведе до некои можни недостатоци, слабости или пак нови идеи за подобрување.

10. Бреинстормирајте и лоши идеи.

Не исклучувајте ги лошите идеи, затоа што добрите идеи претставуваат контратс на тие лоши идеи.

11. Проширете го сопствениот поглед.

Колку пошироко гледате толку поквалитетни идеи ќе произлезат од една бреинсторминг сесија.

12. Избегнувај премногу размислување.

Премногу размислување ја спречува нашата креативност и секако фантазијата. А тие се суштествени за добри и уникатни бизнис идеи.

13. Како да се разликувате?

Секогаш поставете си го ова прашање: Како да се разликувате од другите?

14. Што е она што го сакате?

Сите натамошни идеи, активности и постапки зависат од тоа што всушност вие сакате да постигнете. Тргнете од таму и навраќајте се наназад.

15. Побарајте кај гигантите.

Понекогаш добри идеи може да произлезат од оние големите компании кои се во иста или слична бранша. Затоа не заборавајте да погледнете и кај нив.

16. Побарајте кај негигантите.

Креативноста на другите претприемачи на мали бизниси како Вас ќе може да ви покаже некои можни идни патишта за Вашиот бизнис.

17. Изберете добар тим.

Тим со кој ќе работите може многу да ви помогне околу идеите. Затоа изберете добар тим и искористете го.

18. Побарај помош или мислење.

Никогаш немој да мислиш дека си најумен и дека нема да имаш некаков проблем. Кога си во фаза на бреинстормирање на бизнис идеи подобро е да побараш помош и мислење од некој отколку да дојдеш до лоши идеи што ќе произведат лош бизнис.

19. Социјализирај се.

Социјализација, социјализација и само социјализација може да биде замена на онаа познатата Ленинова учи, учи и само учи. Колку повеќе бидеш социјализиран толку повеќе бизнис идеи ќе имаш.

20. Застани за еден момент и биди твој иден потрошувач.

Погледни во однос на се но од аспект на еден потрошувач на твојот бизнис. Ова е непроценлив извор на бизнис идеи.

Ова беа првите 20 совети, одете на вториот дел со останатите 20 совети од 40 совети да бреинстормирате добра бизнис идеја.

post

Имате бизнис идеја – Што понатаму?

Една бизнис идеја е стартна точка за секој сегашен или пак иден претприемач. Бизнис идејата е важна бидејќи претставува почеток на еден нов живот – живот на бизнисот и живот на претприемачот. Но, таа е важна само во таа прва иницијална стартап фаза од животниот циклус на бизнисот. Последиците од таа бизнис идеја ќе се чувствуваат и во сите останати фази, но сепак во голем дел ќе зависат и од други бизнис активности на еден претприемач.

Бизнис идеја - Што понатаму?

Бизнис идеја - Што понатаму?

Еден просечен човек постојано има бизнис идеи. Тоа е во самата природа на човекот, да сонува за еден подобар живот. Но, идеите како што доаѓаат така и си одат од мозокот на потенцијалниот или сегашен претприемач. Тоа можеме да го решиме со книгата со бизнис идеи како еден од 10 бизнис темплејти на претприемач.

Добро имаме бизнис идеи и сега прашањето е што понатаму? Нема во овој еден напис да можам да опфатам се што ќе треба да направите во Вашиот бизнис, туку едноставно откако ќе дојдете до бизнис идејата што ќе треба како основно да дефинирате.

1. Дефинирајте ги производите и/или услугите

Имате бизнис идеја која опфаќа некој вид на производ и/или услуга за Вашиот иден или пак сегашен бизнис. Следното е прецизно и јасно да ги дефинирате тие производи и/или услуги. Еве некои прашања на кои Вие како претприемач ќе треба да дадете одговор:

  • Каков производ или услуга ќе понудам?
  • Кои ќе бидат карактеристиките на тој производ или пак услуга?
  • Кои ќе бидат поволностите за потенцијалните корисници на тој производ или пак услуга?
  • Кои ќе бидат дополнителни услуги понудени со тој производ или услуга?

2. Дефинирајте го пазарот

Веќе имате бизнис идеја, го имате прецизно дефинирано производот или услугата кои ќе ги понудите на пазарот. Следното е јасно, прецизно и недвосмислено да го дефинирате пазарот на кој ќе ги понудите тие производи или услуги. Еве некои прашања на кои Вие како претприемач ќе треба да дадете одговор:

  • На кој пазар ќе ги понудите производите или услугите (град, регион, држава, континент…)?
  • Кои ќе бидат корисниците на тие производи или услуги?
  • Кои се карактеристиките на тие корисници на производи или услуги (пол, старост, приходи, националност…)?

3.  Дефинирајте ги конкурентите

Следен важен елемент за секој бизнис по производот или услугата и пазарот се конкурентите. Не ја правите грешката со потценување на истите, бидејќи успешноста на Вашиот бизнис во голем дел ќе зависи од нивната успешност. Потребно е прецизно да ги дефинирате сите конкуренти кои се наоѓаат на пазарот кој го дефиниравте претходно. Еве некои прашања на кои Вие како претприемач ќе треба да дадете одговор:

  • Кои се 5-те најголеми играчи на пазарот во индустријата во која се наоѓа Вашата бизнис идеја?
  • Што, кога и како нудат тие 5 најголеми играчи?
  • Кои се карактеристиките на нивните производи или услуги?
  • Кои поволности кои тие ги нудат на пазарот со нивните производи или услуги?
  • Колкава е отпорноста на пазарот од влез на нови конкуренти и колку е тешко тоа да се оствари?

4. Дефинирајте ги ресурсите

Имате бизнис идеја, имате дефинирано производи и услуги, имате дефинирано пазар на кој ќе ги понудите тие производи и услуги и имате дефинирано кои се главните конкуренти и што прават истите. Сега е потребно да ги дефинирате потребните ресурси за Вашиот бизнис за да таа бизнис идеја стане реалност. Ќе треба да ги дефинирате најмалку следниве потребни ресурси:

  1. Колкав број на човечки ресурси ќе бидат потребни?
  2. Каков интелектуален капитал ќе треба да имаат тие човечки ресурси?
  3. Колкави финансиски ресурси ќе бидат потребни?
  4. Од каде ќе ги најдете тие финансиски ресурси?
  5. Какви материјални ресурси ќе ви бидат потребни?
  6. Од каде ќе ги набавите тие материјални ресурси?
  7. Какви информациски ресурси ќе ви бидат потребни?
  8. Кои ќе бидат изворите на тие информациски ресурси?

По ова што понатаму?

Секогаш ќе има понатаму бидејќи вие сте претприемач и започнувате или го проширувате бизнисот. Откога ќе ги дефинирате овие бизнис елементи едноставно повторно почнете од почеток и прилагодете ги производот или услугата и пазарот. Ова е поради фактот што по дефинирање и осознавање на конкурентите и потребните ресурси ќе имате дополнителни факти кои ќе треба да ги вклучите во Вашите производи или услуги и пазарот.

На пример, со дефинирање на конкурентите ќе увидите што тие прават за да продаваат на тој пазар. Ова е проверена работа. Вие едноставно ќе можете да го копирате нивното искуство и да го подобрите за да стекнете конкурентска предност. Затоа ќе треба да ги редефинирате првите два елементи.

Запомнете дека простор за подобрување постои и секогаш ќе постои.