post

Саем – Маркетинг Средство 32

Крајот на минатата и целата оваа недела ќе биде недела на маркетингот на претприемач.

Саем како маркетинг средство

Ова е веќе 32-рото маркетинг средство од овој серијал на маркетинг средства на претприемач. Саем, можеби едно од најконтроверзните маркетинг средства во последно време. Контроверзно затоа што за едни претприемачи е успешно, додека за други претставува едноставно трошење на пари. Но, сепак може да бидат навистина корисни, бидејќи ретко на кое друго место можете да најдете бизниси од иста или пак слична индустрија на исто место во исто време.

Што претставуваат саеми?

Саемите едноставно претставуваат изложбени простори на кои еден претприемач може да ги изложи и претстави своите производи и услуги пред потенцијалните потрошувачи.

Давателот на саемската услуга (изнајмувачот на просторот) се грижи за сите маркетинг активности за тој саем на кој ќе се изложува. Вообичаено на еден саем се изложуваат група на производи или услуги од една индустрија.

Предности на саемите?

Да разгледаме некои предности кои саемот ги нуди за еден претприемач:

  • Високо таргетирана група на посетители. Некој кој не е заинтересиран за технологијата и технолошките достигнувања нема да биде присутен на Технома. Додека оној кој е заинтересиран да го обнови својот интериер ќе го посети саемот за мебел. Ова значи дека на еден саем ќе бидат присутни луѓе кои на некој начин имаат интерес за одреден производ или пак услуга кои што ќе бидат изложени на тој саем.
  • Високо претставително маркетинг средство. Потенцијалните клиенти во бизнисот што ќе го видат на еден саме сметаат дека се професионалци бидејќи навистина понудувачот на самските услуги и самиот претприемач направат едно привлечно катче од штандот на кој се претставуваат производите.
  • Голема посетеност. Како и да е сепак саемите се доста посетени во тие неколку дена колку што трае. Вообичаено доаѓаат луѓе од сите градови кои се заинтересирани за некој производ или пак услуга бидејќи сметаат на некаков саемски попуст кој сакаат да го искористат.
  • Можност за комбинација на други маркетинг средства. На саемите освен прикажување на производот или услугата кои ги нудите како претприемач можете да делите и други маркетинг средства како бизнис картички, флаери, брошури…
  • Можност за демонстрација во живо. Оваа предност ниедно друго маркетинг средство не ја нуди. Во живо потенцијалниот купувач има можност да ги види сите карактеристики на производот што е изложен.

Недостатоци на саемите?

Како и секое друго маркетинг средство и саемите имаат свои недостатоци:

  • Висока цена. Како еден од најголемите недостатоци кои ги погодуваат малите бизниси и претприемачот е високата цена за изнајмување на еден штанд на саемот на кој ќе се изложуваат производите и услугите.
  • Кратко време на изложување. Саемите имаат краток животен век. Тие траат неколку дена и за тие неколку дена потребно е да направите доволно зделки за да успеете да ги извадите трошоците. Се смета дека почесто зделките доаѓаат по завршување на саемот, што може да значи и дека оваа не е недостаток. Во секој случај, имате многу кратко време за да се претставите Вие како претприемач и Вашиот бизнис во вистинското светло.
  • Голем процент посетители за да бидат видени. Се почесто саемите се користат од луѓето да си го поминат времето и за да бидат видени како би седнале на кафе со своите пријатели и би се пофалиле дека биле на тој и тој саем. Овој недостаток директно ја намалува предноста на големата посетеност на саемите.
  • Голем процент на посетители – конкуренти. Саемите се користат и од конкурентите кои не изложуваат одблиску да дојдат и да го видат производот за кој се заинтересирани и тие да го понудат. Така да, кога Вие како претприемач, го користите саемот како маркетинг средство знајте дека одреден процент на „потенцијални потрошувачи“ ќе бидат испратени од Вашите конкуренти.

Препораки за еден Претприемач

  1. Бидете внимателни при избор на оваа маркетинг средство. Разгледајте дали имате можности и дали ќе ви се исплати саемот како маркетинг средство. За секој бизнис оваа маркетинг средство не е соодветно.
  2. Доколку сакате да освоите други пазари, надвор од државните граници разгледајте ја можноста да учествувате на меѓународни саеми надвор од Македонија.
  3. Разгледајте ги како опција алтернативните штандови. Вообичаено саемите имаат мали простори кои не се скапи (на пример, простој преку кој се поминува од хала во хала). Доколку сте мал бизнис со ограничен буџет, а сакате да се претставите на некој начин на саемот ова е одлична варијанта за Вас како еден претприемач.
  4. Делете различни маркетинг средства како што се брошури, флаери, бизнис картички, каталози… Секој кој ќе се приближи до Вашиот изложбен простор дајте му рекламен материјал.
  5. Обидете се да остварите комуникација со секој заинтересиран за Вашите производи или услуги.
  6. Нека не ви биде тешка презентацијата на Вас и Вашите вработени за секој кој ќе биде заинтересиран.
  7. Направете го изложбеното катче колку што може да биде поинтересно за да привлече доволно внимание на потенцијалните потрошувачи.

Кога ќе започнеме со презентација на онлајн маркетинг средства ќе стане збор за еден друг вид на саем – електронски саем и за кој веќе пишувавме на претприемач во еСаем за Бизниси – MakExpo.

post

Дали Телемаркетингот е За Губитници?

Доколку ме прашувате мене, Да. На претприемач веќе неколку месеци секоја недела објавуваме маркетинг средства во еден турбо серијал од маркетинг средства. Меѓу тие е и телемаркетингот кој едноставно значи доаѓање до телефонски броеви и нормално вртење (додевање) на луѓето или бизнисите за да се обидете да им продадете нешто.

Првин погледнете го видеото кое навистина е добро и кратко а кое пред неколку денови го објавив на Facebook страната на Претприемач.

Што е Inbound (влезен), а што е Outbound (излезен) маркетинг?

Телемаркетингот е Outbound маркетинг средство. Пред некое време на поимникот на претприемач го опишав значењето на овие зборови:

Inbound маркетинг: термин кој се користи да го опише маркетингот кој денеска има најголемо влијание врз потенцијалните потрошувачи. Inbound маркетинг едноставно значи да бидете присутен таму каде што Вашите целни потенцијални потрошувачи ќе побараат решение за нивен проблем. За разлика од оној традиционалниот или пак како го нарекуваат Outbound Marketing овој тип на маркетинг не се занимава со притисок и додевање и пречење на потенцијалните потрошувачи туку ги остава самите тие на наједноставен начин да дојдат до Вашиот бизнис.

Outbound маркетинг: Ова е нов термин на изразување на традиционалниот маркетинг кој уште Seth Godin го нарекува и Interruption Marketing – Маркетинг со здодевање врз потенцијалните потрошувачи. Се она што го знаеме како маркетинг средства во вид на ТВ, радио, весници, магазини, директна пошта, брошури, флаери итн. спаѓа во овој вид на маркетинг. Спротивен на овој вид на маркетинг кој остава потенцијалните потрошувачи да го најдат Вашиот бизнис кога имаат потреба е Inbound маркетинг.

Може да се каже дека влезен маркетинг претставува inbound маркетинг бидејќи самите потенцијални потрошувачи влегуваат по сопствена волја во Вашиот маркетин систем, додека излезен маркетинг е outbound маркетинг каде Вашата маркетинг кампања излегува од Вашиот бизнис и влегува на местата на потенцијалните потрошувачи како непоканет гостин.

Можеме да ги преведеме и како поканет (inbound) и непоканет (outbound) маркетинг.

Повеќе за овие влезен и излезен маркетинг во следниот напис каде подетално ќе навлезам во сржта на истите.

Едно мое искуство!

Постојано ме бомбардираат со телемаркетингот како едно од најкористени маркетинг средства во Македонија. Зошто е најкористено, затоа што е наједноставно. Земеш златна книга и се јавуваш на телефонските броеви кои си ги избрал. Ако свртиш денес на 100 телефонски броеви кај еден да упали си велиш тоа е супер завршена работа.

Оваа маркетинг средство е ОК, но доколку се користи онака како што треба, но во никој случај неможе да биде поефективно од групата на влезни маркетинг средства.

Минатата недела со помош на телемаркетингот ми се јавија од една компанија за веб дизајн бидејќи го пронашле бројот од златна книга за еден од моите бизниси кој се однесува на локално ниво и кој има сопствена веб страна која служи за спроведување на некои inbound маркетинг активности на бизнисот. Еве неколку грешки кои се катастрофални за таа компаниаја (која на нивната веб страна има наведено дека се лидери, најдобри, не се како другите итн.):

  • Од златна книга имаат погрешна информација бидејќи веб страната која првично беше на google pages домеин сега е сменета.
  • Ми здодеваат. Едноставно ми се јавија кога не бев расположен да разговарам, бидејќи си имав други обврски.
  • Бизнис кој продава електронски производ базиран на интернетот користи излезни маркетинг техники. Смешно.
  • Ми предлагаат да ми ја пуштат понудата на факс. Господе, дали не слушнале за е-mail?
  • Ги побарав на Google не можев да ги најдам меѓу првите 5 страни на резултатите. Затоа тие користат телемаркетинг.

Мислам дека се доволни грешките за да ја разберете суштината на проблемот на бизнисите кај нас.

Следува подетален напис за влезен маркетинг (inbound маркетинг) кој ќе опфати некои размислувања зошто уште денес треба да започнете да размислувате поинаку за Вашите маркетинг напори. Инаку во однос на маркетинг средствата што ги разработуваме на претприемач едно 50-тина ќе се однесуваат на влезниот маркетинг.

post

Претприемач – Дополнувања за Маркетинг План

Вчера пишував за маркетинг планот кој го препорачува Jay Conrad Levinson во третата панел дискусија од The League of Extraordinary Minds каде 53 најголеми светски експерти од областа на бизнисот и маркетингот дискутираат секоја недела. Тоа е написот за Маркетинг план во 7 едноставни реченици. Доколку сте го пропуштиле би Ви препорачал да го прочитате бидејќи денешниов текст само ќе претставува едно мое дополнување на овој стил на разработка на маркетинг план во 5 минути.

Marкетинг план дополнување на 7 реченици

Да се потсетиме накратко кои беа тие 7 реченици кои го составуваат маркетинг планот:

1) Целта на маркетингот

2) Конкурентска предност

3) Целен аудиториум

4) Маркетинг средства во вид на листа

5) Што претставувате Вие за Вашата пазарна ниша?

6) Идентитет и

7) Буџет.

      Дали нешто фали во овој маркетинг план?

      Овој стил на маркетинг план ми се допадна веднаш, но бидејќи имам една мана секогаш да барам некој вид на подобрување во истиот забележав дека нешто ми фали. Во претходниот напис – Маркетинг план во 7 едноставни реченици забележав дека една од грешките што ги прават претприемачите е да не го исполни тој план што веќе го направил.

      Ако веќе имате маркетинг план и со тоа половина грешка веќе не е грешка поврзана со маркетингот, тогаш мора да се заколнете на тој документ дека ќе го искористите и спроведете онака како што сте испланирале во истиот.

      Но, како да се заколнете? Ова едноставно ќе се случи доколку тој маркетинг план содржи, кој, што, каде, како и кога.

      Во овие 7 реченици имаме веќе одговорено на што и како. Но, фали кој и кога.

      Дополнителни елементи на маркетинг план во 7 реченици

      Значи ги имаме елементите:

      • Што – Конкурентска предност, Идентитет и она што претставувате Вие за вашата пазарна ниша.
      • Каде – Целен аудиториум.
      • Како – Маркетинг средства во вид на листа.

      Ни фалат следниве прашања во однос на маркетинг планот:

      • Кој ќе биде задолжен за кое маркетинг средство и
      • Кога ќе биде спроведено секо маркетинг средство.

      Значи двата дополнителни елементи кои што фалат влегуваат во четвртата реченица од маркетинг планот – маркетинг средства. Па, оваа нема да биде реченица ниту листа туку едноставно една табела со 3 колони:

      • Маркетинг средство
      • Задолжена личност за спроведување на тоа маркетинг средство
      • Датум кога ќе започне спроведувањето на тоа маркетинг средство.

      На ваков начин маркетинг планот ќе биде обврзувачки за лицата кои ќе треба да го спроведуваат.

      Уште еден елемент кој фали

      За крај уште еден многу важен ако не и најважен елемент кој забележав дека фали во маркетинг планот во 7 едноставни реченици. Овој елемент е популарно наречен повратна врска – Feedback. Како ќе ја вршиме контролата во однос на тоа кое маркетинг средство е успешно а кое неуспешно?

      Овој елемент е значаен заради тоа што ќе ни овозможи да видиме кои маркетинг средства да ги исфрлиме, кои да ги подобриме и кои да ги замениме со нови. На ваков начин, реченицате 4 за маркетинг средства ќе има 4 колони во кои дополнителната од погоре колона ќе биде за успешноста на маркетинг средството.

      Со еден ваков маркетинг план ќе имаме можност постојано да ги подобруваме нашите маркетинг активности. Всушност, како еден приказ на таа табела може да биде и маркетинг календарот кој го имаме како еден од 10-те темплејти на претприемач.

      post

      Маркетинг План во 7 Едноставни Реченици

      Сржта на секоја маркетинг програма на секој бизнис па и на малиот бизнис е квалитетен маркетинг план. Мислам, дека како претприемачи често го избегнуваме и целокупно ги базираме нашите маркетинг активности на случајноста. На претприемач досега опфативме многу теми кои навлегуваат во проблематиката на маркетингот (дури 50 блог написи во кои 30-тина се за различни маркетинг средства, барем досега).

      Маркетинг план во 7 реченици

      Во однос на маркетинг планот досега на претприемач пишувавме во три наврати:

      Последното, се однесува на тоа што треба да содржи еден маркетинг план. Но, написот се однесува за маркетинг план онаков како што изгледа по книгите. Во тој маркетинг план опфативме 5 поднаслови:

        1. Резиме
        2. Анализа на пазарот
        3. Маркетинг стратегија
        4. Финансиски елемент на маркетингот и
        5. Контрола.

      Грешка која еден претприемач најчесто ја прави во маркетингот

      Пред една недела се одржа третата панел дискусија на The League of Extraordinary Minds еден од екпертите беше и Jay Conrad Levinson популарно познат и како „таткото на герила маркетингот“ и автор на бестселерот „Герила Маркетинг“. Едно од прашањата беше која е најголема грешка која претприемачите ја прават во маркетингот? Како најголема грешка тој ги издвои следниве две:

      • немање на маркетинг план и
      • доколку претприемачот има маркетинг план не се обврзува да го исполни.

      Доколку сте претприемач и имате мал бизнис одговорете си на прашањето дали имате некаков вид на маркетинг план за Вашиот бизнис и доколку го имате колку го исполнувате?

      Jay Conrad Levinson е и еден од креаторите на маркетинг кампањата на Marlboro во 1960-тите години кога Marlboro станува бренд број еден во светот од една просечна компанија (Таа кампања се однесува на каубојот со Marlboro). И ден денес Marlboro како бренд е препознатлив по тој каубој и цигара. Но, она што Jay го напоменува е дека тој маркетинг план не бил долг и компексен но целосно обврзувачки за менаџментот и компанијата воопшто.

      Она што можеме да го извлечеме од препораката на овој маркетинг експерт е тоа што не е важен изгледот или формата на Вашиот маркетинг план, туку важно е да имате едноставен кој секогаш ќе го исполните.

      Маркетинг план во 7 реченици

      Овој маркетинг експерт, кој слободно можеме да го ставиме во еден од најголемите екперти во светот за маркетингот вели дека кога како консултант за компаниите бил најмуван секогаш предлагал едноставен маркетинг план во 7 реченици и тоа за 5 минути. Следниве 7 реченици се однесуваат на еден таков маркетинг план:

      1) Целта на маркетингот

      Првата реченица се однесува на вистинската цел на Вашиот маркетинг. Одговорете на прашањето зошто ви е потребен маркетинг планот или која придобивка сакате да ја добиете од маркетингот.

      2) Конкурентска предност

      Втората реченица е конкурентската предност која сакате да ја истакнете за да потенцијалните потрошувачи преку Вашата маркетинг кампања направат нешто. Запрашајте се која е Вашата конкурентска предност во облик на бенефит на потенцијалните потрошувачи.

      3) Целен аудиториум

      Секој маркетинг има целен аудиториум кој треба да ја прими маркетинг пораката врз основа на која Вие како претприемач сакате да потенцијалниот потрошувач превземе некоја акција. Во една реченица претставете го тој целен аудиториум.

      4) Маркетинг средства

      Четвртата реченица е најдолга и всушност не претставува реченица туку листа и тоа листа на маркетинг средствата кои ќе ги користите за да ја исполните целта. На претприемач веќе неколку месеци обработуваме различни маркетинг средства (досега 31 од 100). Во книгата „Герила Маркетинг“ имате 200 маркетинг „оружја“ како ги нарекува Jay Conrad Levinson.

      5) Што претставувате Вие за Вашата пазарна ниша?

      Оваа реченица треба да го претстави она што Вие како бизнис или пак како претприемач претставуваат за Вашиот пазар односно Вашата пазарна ниша.

      6) Идентитет

      Шестата реченица која треба да ја содржи секој маркетинг план согласно Jay Conrad Levinson е за Вашиот идентитет како претприемач и идентитетот на Вашиот бизнис.

      7) Буџет

      Последната, односно седма реченица е буџетот односно колку пари планирате да потрошите во одреден временски период за кој се однесува маркетинг планот. Во овој дел Jay предлага маркетинг буџетот да го изразите како процент од бруто продажба. На пример доколку имате 300.000 денари продажба и изберете 5% маркетинг буџет, тогаш значи дека ќе потрошите 15.000 денари за маркетинг на месечно ниво.

      post

      Претприемач – Маркетинг Средство 31

      Оваа недела на ред е 31-то маркетинг средство од овој турбо серијал на маркетинг средства кој го започнавме пред неколку месеци. Досега како 18-то маркетинг средство го опфативме Вашиот продажен тим и како 21-во маркетинг средство го опфативме Вашиот бизнис преку ставови на Вашиот бизнис.

      Но, во овие две маркетинг средства фали централната фигура и тоа Вие како еден претприемач. Овие три маркетинг средства (бизнис, вработени и претприемачот) се севкупните внатрешни живи елементи на еден бизнис. Овој термин живи ми дојде на ум сега кога го пишувам овој напис бидејќи сите овие елементи дишат, а претприемачот и вработените се потсистеми на бизнисот. Дишат бидејќи претприемачот и вработените се биолошки системи, додека бизнисот како еден поголем систем ги содржи тие два биолошки подсистеми. Од друга страна оние неживи елементи се производот, услугата, технологијата итн.

      Втора работа што сакам да ја напоменам е што овие три елементи (претприемач, бизнис и вработени) го градат кредибилитетот и репутацијата на еден бизнис како посебни маркетинг средства.

      Како што постојано ќе бидат следени однесувањето и ставовите на Вашиот бизнис од Вашата околина така и Вие како претприемач ќе бидете постојано следени.

      Од кого Вие како претприемач ќе бидете следени?

      Како што веќе пишував во ставовите на Вашиот бизнис така и тука ќе бидат идентификувани истите следачи:

      • Потрошувачи. Во оваа група спаѓаат и сегашните и потенцијалните, односно идни потрошувачи. Оваа категорија е една од најважните Ваши аудиенции. Потребно е посебно внимание да се обрне кон истите.
      • Конкуренти. Во оваа категорија спаѓаат Вашите конкуренти кои имаат за цел или да ве стигнат или да се заштитат од Вас и Вашиот бизнис доколку им се приближувате премногу. Оваа категорија како маркетинг средство воопшто не е важна, но сепак има големо влијание врз Вашиот бизнис.
      • Медиуми. Оваа категорија на Ваши следачи може да одигра голема улога за Вашиот бизнис. Еден краток прилог во вестите на некој медиум може да ви донесе огромен публицитет. Но, вниманието на оваа категорија тешко се свртува особено на малите бизниси. Посебно е важно да забележиме дека оваа категорија може и непријателски да се однесува кон Вас па затоа е потребно особено внимание.
      • Вработени. Во категорија на следачи спаѓаат и вработените. Од една страна како потенцијални вработени за да привлечете квалитетна работна сила и од друга страна како веќе вработени кои можат директно да се вклучат во Вашите маркетинг активности и тоа неформални маркетинг активности. Ставовите навашата компанија можат бргу да бидат проширени преку Вашите вработени при нивни секојдневни контакти со надворешниот свет. Треба да се искористат на вистинскиот начин.
      • Добавувачи. Ова е уште една категорија на Ваша аудиенција која постојано ве следи, а може да има огромна улога во Вашите маркетинг кампањи.
      • Влада. Моќта на владата е толку голема што може да има огромни последици за секој бизнис, како позитивни така и негативни. Сведоци сме како со една одлука може да се унишатат империи од бизниси. Но, сведоци сме како со помош на Владата може да се изгради брзо бизнис империја. Потребно е особено внимание.

      На оваа група на ентитети кои ќе ве следат би додал уште две групи:

      • Вашето семејство. Каде се движите, како се однесувате, колку време поминувате на состноци и на работа. Оваа е нормална појава кога станува збор за Вас како една личност – претприемач.
      • Вашите роднини и пријатели. Колку можат да ви помогнат, толку можат да бидат и љубоморни на Вашиот успех како претприемач. Затоа сметам дека и оваа група на ентитети од Вашата непосредна близина треба да биде добро избалансирана во Ваша корист и во користа на Вашиот бизнис.

      Што е тоа што ќе го следат кај Вас како еден претприемач?

      Ќе бидете следени на различни начини и во однос на различни Ваши лични елементи. Како што во Бизнис копија – Моќта на имитација наведов еден начин или пак еден процес како да следите некој успешен идол кој ќе го копирате и вметнете во Ваш сопствен бизнис модел така и некој друг ќе се обиде да ве следи и копира нормално. Освен тоа доколку има можност ќе се обиде да му наштети на Вашиот бизнис и на Вас лично.

      • Ваши општи и бизнис ставови. Вашите општи и бизнис ставови во голем дел може да влијаат на градење на солиден кредибилитет и репутација.
      • Начин на однесување. Вашето лично однесување ќе дава одредена слика на вашиот бизнис воопшто и може да биде едно од клучните маркетинг средства за луѓето со кои доаѓате во контакт.
      • Начин на трошење. Имам еден пријател претприемач кој навистина започнува со сопствен бизнис веднаш по завршување на средното училиште. Бизнисот го води и развива и во текот на неговото високо образование. Може да се каже слободно дека за негови години има квалитетен успех како еден претприемач во однос на она што го има како материјални средства. Но, секогаш кога седиме и разговараме ми вели дека мора да внимава каква кола ќе вози и како ќе се облекува за да не се случи премногу да биде над другите – обичните луѓе бидејќи смета дека ќе му наштетат. И навистина има право. Љубомората е една лоша работа која може навистина да наштети на еден бизнис. Можеби во САД оваа не е проблем, но кај нас мислам дека сеуште постои.
      • Начин на менаџирање на бизнисот. Ако сте успешен претприемач кој успешно го менаџира сопствениот бизнис ќе имате добар кредибилитет и репутација. Вашите вработени ќе бидат задоволни и ќе се обидат на секој начин да го промовираат Вашиот бизнис.
      • Ваша појава воопшто како една фигура. Многу луѓе ќе ве гледаат како една фигура која се појавува и исчезнува. Сликата која ќе им остане во однос на Вас и вашиот бизнис ќе има големо влијание за понатамошната можна соработка со тие луѓе. Секогаш некаков детал кој човекот ќе го запази на Вас ќе остане по што ќе Ве памети. Така да внимавајте оваа Ваша фигура да биде усогласена со типот на бизнисот и кругот во кој се движите.
      post

      Телевизија – Маркетинг Средство 30

      Стигнавме и до 30-тото маркетинг средство од овој турбо серијал на маркетинг средства на претприемач. Телевизијата е уште едно традиционално маркетинг средство кое е можеби и едно од најкористени заедно со радиото и весниците. Многу често кога се мисли на маркетинг во главата на претприемачите им поминува телевизија, радио, магазини и весници.

      Телевизија како маркетинг средство

      Високата цена на националните телевизии ги одвраќа претприемачите на малите бизниси, но затоа локалните мали бизниси можат да ја искористат оваа предност. Во секој случај, слободно може да се каже дека овој маркетинг медиум кај нас сеуште има голема популарност иако во поразвиените земји се повеќе и повеќе го губи сопственото влијание врз пошироките маси.

      Предности на ТВ како Маркетинг Средство

      Ќе презентирам некои од предностите на телевизијата како маркетинг средство:

      • Присуство во скоро секој дом. Присуството на телевизијата во скоро секој дом претставува предност на истата како маркетинг средство. Слободно може да се каже дека телевизијата е присутна секаде. Телевизорите ги има во популарните кафулиња, во ресторани, во домовите на луѓето, па дури и на отворени места при некои собири.
      • Широка опфатност. Ова е една од најголемите предности на телевизијата. Навистина има широк спектар на опфатност на различни сегменти од пазарот. Бидејќи телевозорот како технологија е присутен насекаде околу нас, така и телевизијата како маркетинг средство може да допре до голем број на луѓе кои се Вашите потенцијални купувачи.
      • Визуелизација. За разлика од радиото каде пораката е во аудио форма која може само да се слушне, и за разлика од весниците каде пораката е само во пишана форма која може само да се прочита, телевизијата нуди визуелна форма која може и да се види и да се слушне и да се прочита во исто време.
      • Дизајн на пораката. Додека ова во минатото беше недостаток, денес слободно можеме да кажеме дека не е. Денес скоро секој може да дизајнира видео економско-пропагандна порака, додека во минатото требаше да се најмат техничари како професионалци за оваа намена. Дури и Вашето 7 -годишно дете денес знае да искористи различни апликации на персонален компјутер и да дизајнира интересна видео порака за Вашиот бизнис.

      Недостатоци на ТВ како Маркетинг Средство

      Да разгледаме и некои од недостатоците на телевизијата како маркетинг средство:

      • Должина на пораката. Должината на економско-пропагандната порака на телевизијата е навистина кратка и за да се постигне вистинскиот ефект ќе мора да се повторува повеќекратно. Овој недостаток претпоставува дека целната група на гледачи во моментот на прикажување на пораката ќе прават нешто друго. Затоа и целта на претприемачите е да дизајнираат порака која ќе го привлече вниманието.
      • Менување на каналите. Тоа сум јас и над 90% од луѓето што ги познавам. Кога гледам ТВ го држам даљинското во рака и кога ќе ме прекинат со пропагандна порака, нормално одам на следниот канал. Па можеби ќе се навратам подоцна на претходниот канал или пак ќе најдам нешто поинтересно. Значи пропагандната порака ми дава слобода до погледнам дали има нешто поинтересно на ТВ. Значи парите кои ги трошат претприемачите за мене и оние како мене се едноставно фрлени во вода.
      • Пренатрупаност. Во еден маркетиншки сегмент на телевизијата кога ќе се прикажува и Вашата пропагандна порака ќе одат уште неколку други со што секоја од пораките губат на сопствената ефикасност и ефективност.
      • Трошоци. Трошоците за овие пораки се навистина големи во споредба со останатите. Доколку најмите и професионален дизајнер уште пред да започне емитувањето на пораката ќе мора да издвоите значителна сума на пари. И самото изнајмување на просторот за емитување на една телевизија е навистина поскапо во однос на останатите медиуми.

      Неколку Препораки при Подготвување на „ТВ Реклама“

      • Пораката нека биде едноставна која нема да претставува збунувачка за гледачите.
      • Фокусирај се на ползите на потенцијалните потрошувачи бидејќи само ползата може да им го обрне вниманието.
      • Докажи ги полезностите за потенцијалните потрошувачи кои ги презентираш во пораката.
      • Направи ја пораката уникатна, односно нешто што не постои, а во исто време интересна и лесно запомлива.
      • Користи емоции во однос на презентирање на проблемот на потенцијалниот потрошувач кој сакаш да го опфатиш со пораката.
      • Внимателно избери ја телевизијата која ќе ја користиш за емитување на твојата порака. Различни телевизии се гледани од различна популација.
      post

      Кредибилитет – Маркетинг Средство – 29

      Кредибилитет како маркетинг средство е 29-тото маркетинг средство во овој турбо серијал на маркетинг средства на претприемач. Оваа маркетинг средство е уште едно кое не е традиционално и кое не бара големи пари за да се примени. Можеби не бара пара, но бара време и труд. Но, едно нешто е важно. Доколку се изгради навистина висок кредибилитет успешноста на Вашиот бизнис ќе биде огромна. Но, пак доколку го надградуваме и подобруваме тој кредибилитет успешноста ќе биде уште поголема.

      Значајноста на кредибилитетот како маркетинг средство е огромно, особено поради фактот што од него зависат сите други маркетинг средства кои ќе ги применуваме за нашиот бизнис, а за кои ќе издвојуваме огромни средства.

      Да земеме еден реален бизнис пример:

      Користиме радио и весник како наше маркетинг средство. Целта ни е да привлечеме поголем број на купувачи за нашиот бизнис. Пораката која ја пренесуваме преку тие маркетинг средства е: Нашиот бизнис ќе Ви го промени животот само за неколку дена решавајќи го Вашиот проблем. Но, ние сеуште немаме кредибилитет. Што значи дека веројатноста е дек малку луѓе ќе ни веруваат на таа наша одлична порака. Можеби навистина сме способни, имаме знаење и можности да им го смениме животот на луѓето решавајќи го нивниот проблем, но тоа не значи ништо бидејќи сеуште немаме изградено кредибилитет. И во ваков случај нашите пари околу 40.000 денари за реклама на радио и весник не дава резултати.

      Овој пример е нешто што постојано се случува кај нас. Затоа мој совет е: Првин започнете со градење на кредибилитет, па потоа трошете на други медиуми како маркетинг средства.

      Во некои случаи другите маркетинг средства можат и да помогнат во градење на кредибилитетот, но поверојатно е дека парите залудно ќе бидат потрошени. Доколку имаме комбинација на веќе изграден некаков кредибилитет и го доградуваме со помош на останатите маркетинг средство веќе може д ја имаме добитната комбинација.

      Што е Кредибилитет?

      Доколку имаме кредибилитет за некое лице, тоа значи дека тоа лице верува дека ние имаме експертиза и знаење како и тоа дека сме доверливи за да правиме бизнис со него. Значи, поголема е веројатноста дека едно лице ќе одлучи да купува од нас доколку имаме изградено висок кредибилитет. Во Wikipedia за кредибилитет се вели:

      Кредибилитет се однесува на објективни и субјективни компоненти на верување кон изворот или пак пораката. Традиционално кредибилитетот има две компоненти – доверба и експертиза при што и двете компоненти имаат објективни и субјективни компоненти…

      Можеме да забележиме дека кредибилитетот значи дека веќе имаме изградено доверба и експертиза во очите на другите лица за она што го работиме.

      Кон кого треба да изградиме Кредибилитет?

      Едно од позначајните прашања е кон кого нашиот кредибилитет треба да биде изграден. За почетните бизниси не би ги ширел премногу таргетните ентитети за нашиот кредибилитет. Основните ентитети кои треба да ги таргетираме за да изградиме висок кредибилитет се следниве:

      • Клиенти – Купувачи;
      • Потенцијални потрошувачи;
      • Вработени;
      • Снабдувачи и
      • Сите можни контакти

      Кредибилитет како Функција на 4 Елементи

      Ова е нешто што го најдов како дел од првата панел дискусија на The League of Extraordinary Minds во која членувам и каде 54 најголеми експерти од областа на бизнисот одговараат на прашања и дискусија за подобрување на бизнис процесите. Во оваа прва панел дискусија како еден од експерти беше и Stephen Covey, авторот на бестселерот 7 Навики на Високо Ефективни Луѓе.

      Според Stephen Covey кредибилитет е функција на 4 елементи:

      • Интегритет. Интегритет ќе изградите со помош на Вашата искреност и чесност.
      • Посветеност. За посветеноста морате да имате мотив, агенда и однесување кое ќе Ве претстави како навистина посветен претприемач на работата која ја работите.
      • Способност. Способноста пак е функција на Вашиот талент, вештини, експертиза и знаење. Способноста одговара на прашањето: Дали сте токму Вие релевантен?
      • Резултати. Резултатите се приказ на Вашите перформанси како сегашни така и минати. Прикажување на овие резултати го зголемуваат Вашиот кредибилитет.

      Една работа која што Stephen Covey ја напоменува е дека мора првин да го изградите личниот кредибилитет кој подоцна ќе се претвори во кредибилитет на бизнисот.

      Првите два елементи (интегритет и посветеност) го претставуваат Вашиот сопствен карактер, додека последните два (способност и релевантност) ја претставуваат Вашата компетентност да го решите проблемот на своите потрошувачи. Посветете внимание на овие елементи и Вашиот кредибилитет постојано ќе расте.

      Уште нешто би сакал да напоменам како за крај на овој напис. Кредибилитетот не се мери во тоа дали Вие самите сметате дека имате кредибилитет. Кредибилитетот се мери во однос на тоа што сметаат другите за Вас. Мора да бидете реален за да си го измерите сопствениот кредибилитет како и кредибилитетот на Вашиот бизнис. Доколку не е онака како што Вие самите сметате не сваќајте го тоа лично, сепак се работи за нешто во што навистина треба да се вложи труд за да се изгради. Но, искористете го тоа за да го подобрите како Вашиот личен така и кредибилитетот на Вашиот бизнис.

      post

      Радио – Маркетинг Средство – 28

      Продолжуваме со 28-то маркетинг средство – радио, од овој турбо серијал од маркетинг средства на претприемач. Радиото како маркетинг средство спаѓа во традиционалните маркетинг средства кои се често користени од страна на претприемачите за да ја распространат економско пропагандната порака на сопствениот бизнис.

      Во зависност од мрежата што ја покрива радиото има потенцијал да им овозможи на претприемачите обраќање до навистина широко географско подрачје. Но, таа можност е уште побогата бидејќи се пренесува преку еден звук кој може да се чуе. Со вистинскиот избор на соодветна радио станица, како и времето и програмата на која ќе оди пораката, радиото навистина овозможува пораките да допрат до посакуваната целна група на пазарот.

      Предности на Радиото како Маркетинг Средство

      Ќе презентирам некои од основните редности кои ги има радиото како маркетинг средство.

      • Присуство на радио во секој дом. Бидејќи како технолошко средство радиото е во позрели години нема дом во кој не може да има можност да се слуша радио. Дури и 30-годишен транзистор дава звук од некоја радио станица. Дури и некое планинско место може да има радио врска преку соодветен предавател. Секој дом и голем процент на автомобили се со можност за слушање на радио. Ова го прави навистина силно маркетинг средство.
      • Флексибилност. Пропагандните пораки на радиото се навистина флексибилни бидејќи можат да се менуваат од ден на ден, од месец на месец или како што ќе посакаме. Можеме да ја подготвиме нашата нова пропагандна порака, да се јавиме во радио станицата, да им ја испратиме и веќе од утре во етерот да оди новата порака.
      • Погаѓање на целна група. разични радио станици таргетираат различни целни групи. Со избор на вистинската станица ќе ја погодиме и вистинската целна група за нашиот бизнис. Различните програми на радиото се наменети за различни целни групи што ни овозможува како претприемачи да одиме преку вистинската програма и да го погодиме целниот пазар кој го посакуваме.
      • Попријателска порака заради звукот. Да, радиото пренесува звук кој можеме да го прилагодиме онака како што сакаме. Таа порака може да има пријателска звучност и дури да не се забележе дека сме досадни со промовирање на нашите производи и/или услуги.
      • Цената. За разлика од другите маркетинг средства радиото има навистина пониска цена на чинење. Доколку пак се работи за локално радио на месечно ниво навистина можете да поминете доста евтино во поглед на трошоците.

      Недостатоци на Радиото како Маркетинг Средство

      Да ги разгледаме и недостатоците на радиото како маркетинг средство:

      • Ефект на слушам ама не слушам. Називот на овој ефект е мој бидејќи навистина сметам дека постои кога станува збор за радиото. Вообичаено радиото се слуша кога работиме нешто друго и всушност пропагандните пораки ретко ги забележуваме. Радиото најчесто го слушаме заради музика која не опушта на некој начин и доколку во една таква психичка состојба не прекинат веднаш се чувствуваме неудобно.
      • Ограниченост на пораката. Пораката која што ја испраќаме е навистина ограничена и може да трае од 30 секунди до една минута. Потребно е во таа порака да бидеме јасни и прецизни за она што сакаме да го постигнеме.
      • Потреба од голема зачестеност. Пропагандната порака преку радио бара навистина голе зачестеност за да може да влезе во мозокот на слушателот. Оваа пак од друга страна ја крева цената и трошокот за радио како маркетинг средство.

      Едно Мое Лично Искуство со Радио

      Пред неколку години кога започнував еден бизнис го избрав радиото во мојот маркетинг план како едно од маркетинг средства кои ќе ги користам во првите 6 месеци. Избрав радио кое сметав дека е слушано повеќе особено што се слушаше по кафулињата токму тоа радио. Првин имав проблем со тоа што не ме разбираа што реба да се нагласи и како да се нагласи во самата порака. По еден месец ги сублимирав резултатите и се покажа 0. Бидејќи цената беше превисока за еден стартап бизнис се откажав од понатамошно користење на услугите на тоа радио.

      По неколку недели ме контактираа од друго радио кое ми даде доста поволни услови (некој вид на компензација и останато плаќање). Си реков ОК, оваа е продажба плус за мојот бизнис и нормално маркетинг средство како радио. Повторно имав проблем со разбирање околу нагласувањето и музиката во позадината на пораката но ги средивме некако тие работи. (Ова особено поради фактот што во локалните радио станици работат волонтери, луѓе кои немаат искуство а ниту познавање од маркетинг.) Но по еден месец повторно ги сублимирав резултатите и навистина беа изненадувачки. Оваа второто радио навистина влиаеше врз голем број на потенцијални потрошувачи за мојот бизнис.

      Препорака за претприемачи: Мери ги резултатите и тестирај ги различните радио станици за да видите кое дава најдобри резултати.

      Неколку Препораки при Подготовка на „Радио Реклама“

      • Нагласи ги ползите за потенцијалните потрошувачи, а не карактеристики на твојот производ или твојот бизнис.
      • Пораката нека биде едноставна, разбирлива и прецизна. Не претерувај со различни зборови кои не се разбирливи за потенцијалните потрошувачи.
      • Користи звучни ефекти за да го привлечеш вниманието. Радиото ја дава оваа можност и искористи ја.
      • Подготви порака која ќе бида звучна за увото.
      • Потцртај ги зборовите кои треба да бидат нагласени и наведи што треба да се нагласи. Вообичаено ползите нека бидат оние понагласените елементи во пораката.
      • Користи зборови кои ќе поттикнат акција од страна на потенцијалните потрошувачи. Сега, денес, до петок се зборови кои можат да поттикнат акција.
      • Напомени го името на бизнисот како и контакт детали (адреса, телефон, веб страна итн).
      • Мери ги резултатите на спотовите и менувај ги доколку нема резултати.
      post

      Магазини – Маркетинг Средство 27

      Магазините се маркетинг средство 27 во овој турбо серијал од маркетинг средства на претприемач. Овој напис нема да биде долг бидејќи голем дел на работите кои се однесуваа на весниците како маркетинг средство (26-то) се применуваат и за магазините. Оваа 27-мо маркетинг средство се однесува на магазини како офлајн маркетинг средство, што значи дека тука нема да стане збор за онлајн магазините.

      Што се тоа магазини?

      Магазините се еден вид на весници изработени поквалитетно во однос на хартијата и бојата и се објавуваат периодично во вид на неделни или пак месечни магазини, кои содржат повеќе артикли од одредена проблематика и се финансираат врз основа на продаден рекламен простор и самата продажба на истите.

      Се чини дека магазините сеуште држат до својата популарност во однос на весниците како маркетинг средства.

      Можат да се забележат следниве карактеристики на магазините:

      • Висок квалитет на изработка
      • Насочени кон одредена тематика
      • Повеќе артикли од иста тематика
      • Поголема долготрајност (недела или пак месец)

      Избор на магазин како маркетинг средство

      Кога станува збор за избор на одреден магазин кој претприемачот ќе го користи како маркетинг средство повторно ќе се навратиме на апсолутниот и релативниот трошок со истите елементи за пресметка. Еве го примерот од весниците:

      Да земеме два бренда на весници Х и У. Весникот Х има тираж од 25.000 примероци и наплаќа по 10.000 денари за одредена порака на одредена страна и позиција на страната. Весникот У има тираж од 20.000 примероци и наплаќа по 12.000 денари за одредена порака на одредена страна и позиција на страната. Профилот на читателите на овие весници е:

      • 20% од читателите на Х се потенцијални потрошувачи.
      • 35% од читателите на У се потенцијални потрошувачи.

      На прв поглед би го избрале весникот Х бидејќи има понизок апсолутен трошок и поголем тираж. Но да видиме како стоиме со релативниот трошок:

      Х У
      Тираж 25.000 20.000
      Процент потенцијални потрошувачи 20% 35%
      Број на потенцијални потрошувачи 5.000 7.000
      Апсолутен трошок 10.000 ден. 12.000 ден.
      Релативен трошок 2 ден. 1,71 ден.

      Забележувате дека е подобар весникот У бидејќи цената за просечен потенцијален потрошувач е помала во однос на весникот X. Секогаш правете ја оваа анализа при избор на медиум, не само весник туку било кое маркетинг средство. Повеќе за овие пресметки и избор на маркетинг средство во посебен наслов за маркетинг средства.

      Начинот на пресметка кај магазините е истиот.

      При изборот на соодветен магазин би додал уште еден елемент кој би требало да одигра голема улога уште пред да започнете со пресметката а тоа е пазарната ниша на која е насочен магазинот. Доколку Вашиот бизнис е насочен кон тинејџери ќе користите магазини кои ја обработуваат тематиката за тинејџерите. Доколку продавате козметички производи ќе користите магазини во стилот на „Убавина и здравје“.

      Предности и недостатоци

      Како предности на магазините би ги издвоил следниве:

      • Високо таргетирани читатели – Магазините се читани од одредена група на луѓе за кои се наменети согласно тематиката која ја опфаќаат.
      • Голема географска опфатност – локален, национален и глобален пазар.
      • Квалитет – Квалитетот е навистина одличен со различни слики и графици во боја како и одличен квалитет на хартија во споредба со весниците.
      • Подолг животен век – Во однос на весниците, магазините имаат подолг животен век што значи дека се купуваат еднаш а се читаат цела недела или пак месец. Со тоа и веројатноста дека Вашата маркетинг порака ќе биде забележана е поголема.

      Како недостатоци би ги издвоил следниве:

      • Високи трошоци – Заради квалитетот и високотаргетираните читатели трошоците се доста повисоки во однос на весниците.
      • Помала флексибилност – не може секојдневно да настапуваме со нова порака.
      • Премногу пораки – Се повеќе магазините се пренатрупани со пропагандни пораки. Ова е поради фактот што финансирањето на овие медиуми во голем дел се базира на изнајмување на рекламен простор.
      • Тренд на губење на читатели – На светско ниво трендот е намалување на продажба и тиражот на магазините, што секако дека ќе дојде и кај нас.
      Сликата од engineroomblog
      post

      Весници – Маркетинг Средство 26

      Стигнавме до 26-тото маркетинг средство во овој турбо серијал од 100 маркетинг средства на претприемач. Оваа е едно традиционално маркетинг средство кое се користи за економска пропаганда на бизнисите. Освен што е традиционално и е едно од постари средства бидејќи радиото и телевизијата се понови медиуми. Иако на светско ниво влијанието на весниците како маркетинг средство се намалува заради се поголемото влијание на интернетот и социјалните медиуми сепак сеуште се користи, а особено кај нас сеуште има големо влијание. Што не значи дека нема полека да се намалува на тоа влијание.

      Како нешто најважно во овој напис би опфатил една техника како да се избере весник кој ќе ни користи како маркетинг средство за нашиот бизнис. Првин би вовел два типа на трошоци кои треба да се анализираат.

      Апсолутен трошок – трошокот кој претприемачот ќе треба да го плати за одреден временски период да биде неговата порака на тој медиум.

      Релативен трошок е трошок по потенцијален потрошувач до кој ќе допре пропагандната порака.

      Да земеме два бренда на весници Х и У. Весникот Х има тираж од 25.000 примероци и наплаќа по 10.000 денари за одредена порака на одредена страна и позиција на страната. Весникот У има тираж од 20.000 примероци и наплаќа по 12.000 денари за одредена порака на одредена страна и позиција на страната. Профилот на читателите на овие весници е:

      • 20% од читателите на Х се потенцијални потрошувачи.
      • 35% од читателите на У се потенцијални потрошувачи.

      На прв поглед би го избрале весникот Х бидејќи има понизок апсолутен трошок и поголем тираж. Но да видиме како стоиме со релативниот трошок:

      Х У
      Тираж 25.000 20.000
      Процент потенцијални потрошувачи 20% 35%
      Број на потенцијални потрошувачи 5.000 7.000
      Апсолутен трошок 10.000 ден. 12.000 ден.
      Релативен трошок 2 ден. 1,71 ден.

      Забележувате дека е подобар весникот У бидејќи цената за просечен потенцијален потрошувач е помала во однос на весникот X. Секогаш правете ја оваа анализа при избор на медиум, не само весник туку било кое маркетинг средство. Повеќе за овие пресметки и избор на маркетинг средство во посебен наслов за маркетинг средства.

      Би опфатил некои предности и недостатоци на весниците како маркетинг средство. Како предности се:

      • Солидна географска опфатност. Весниците го диференцираат пазарот на локален, национален и глобален пазар.
      • Навременост. Времето кога се доставува економската пропагандна порака и затворање на весникот е навистина кратко особено за дневните весници. Ова значи дека секогаш маркетинг пораката ќе биде ажурирана.
      • Флексибилност. Флексибилноста е една голема карактеристика на ова маркетинг средство бидејќи секој ден може да се има различна порака.
      • Ниски трошоци. Весниците нормално нудат пропаганден простор со низок апсолутен трошок. Цената зависи од тиражот и географскиот регион кој го опфаќа. Па така со вистинскиот избор ќе има и релативен низок трошок.
      • Добра комуникација со потенцијалните потрошувачи. Весниците овозможуваат користење на добра графичка изработка на самата пропагандна порака при што ќе се пренесат доста информации и ќе се привлече вниманието на потенцијалните потрошувачи.

      Освен предности весниците имаат и соодветни недостатоци кога се користат како маркетинг средство:

      • Нетаргетирани читатели. Весникот е читан вообичаено од различни луѓе, па се смета дека ќе има голем број на нетаргетирани читатели за кои сепак ќе платиме.
      • Квалитетот. Дневните весници имаат многу послаб квалитет во однос на останатите медиуми како магазини.
      • Премногу пораки. Еден од најголемите недостатоци е што весниците имаат премногу пропагандни пораки па постои можност нашата да се изгуби во еден океан од такви пораки. Од друга страна и читателите се иритирани со премногу пропагандни пораки, па ги прескокнуваат тие страници.
      • Краток животен век. На една пропагандна порака во весник животниот век е 24 часа. Тоа е прекратко.
      • Намалување на читатели. Ова веќе го најавив на почетокот. Влијанието на интернетот се повеќе ги намалува класичните читатели на весници.
      Слика од DRB62