post

Интересна дефиниција за Маркетинг Успех

Можете да забележите дека на претприемач преовладуваат темите за маркетинг. Ова е заради фактот што навистина маркетингот е она што додава вредност во секој бизнис.

Би сакал овој напис да дадам еден коментар на една навистина интересна дефиниција до која што дојдов преку третата панел дискусија на The League of Extraordinary Minds. Дефиницијата е од страна на Sergio Zyman, основач на Zyman Group и поранешен шеф на маркетинг одделот на Coca Cola. Кога станува збор за маркетинг Coca Cola ни е навистина познат случај. Тој како единствена дефиниција за маркетинг успех ја издвојува следнава:

Маркетинг успех претставува да продавате повеќе на повеќе луѓе, почесто, за повеќе пари и поефикасно.

Во една кратка реченица кажано се за тоа кога Вашите маркетинг активности можете да класифицирате како успешни. Да ги разгледаме одвоено.

1. Зголемување на продажба

Нормално, дека првата цел на спроведување на маркетинг активности е да ја зголемите продажбата на Вашиот бизнис. Инаку зошто би спроведувале едни такви активности.

На пример, имате продажба од 1000 парчиња месечно кои ги продавате по 500,00 денари и тоа е приход од 500.000,00 денари месечно. Доколку започнете некоја маркетинг активност би требало да дојдете до 10% зголемување за да продавате 1100 парчиња кои по 500,00 денари ќе ви донесат приход од 550.000,00 денари. Тоа се 50.000 денари поголем приход.

2. Зголемување на бројот на купувачи

Всушност Вие со маркетингот привлекувате внимание на потенцијални купувачи од кои дел ќе станат вистински купувачи. Маркетингот како што е прикажано во горниот пример довел нови купувачи кои купуваат дополнителни 100 парчиња производи од Вашиот бизнис.

3. Зголемување на фреквенција на купување

Освен на претходните зголемувања целта на маркетингот е да ја зголемите зачестеноста на купување од страна на купувачите. Ова значи купувачите да се враќаат, и не само тоа, туку да се враќаат почесто да купуваат. Со исполнување на оваа цел ќе успеете само да ја зголемите продажбата. Да кажеме од горниот пример дека продажбата се зголемува за уште 10% (1210 парчиња), при што ќе имаме приход од 605.000,00 денари. Тоа се 105.000 денари повеќе од пред маркетинг активноста.

4. Зголемување на цена

Една многу важна цел на маркетингот е да успеете да изградите бренд кој продава висококвалитетни производи и услуги па Вашите производи и услуги да бидат поскапи од нормалните.

Да го земеме претходниот пример и да успееме да продаваме исто со повисока цена од да речеме 550 денари за парче. Така ќе имаме приход од 665.000,00 денари што е за 165.000,00 денари повеќе од пред маркетинг активноста.

5. Зголемување на ефикасност

Овде се мисли на зголемување на ефикасноста и ефективноста на маркетинг активностите. Во превод тоа е да се спроведат вистински маркетинг активности, на вистински начин со што ќе се постигнат најдобри резултати. Вообичаено еден просечен мал бизнис спроведува неколку маркетинг активности одеднаш. На пример, има радио реклама, дели брошури и има сопствена веб страна. Тука прашањето е дали овие маркетинг активности се оние вистинските и дали, доколку се вистинските се спроведуваат на вистински начин.

  • Дали радио рекламата е соодветна за нашиот бизнис?
  • Дали брошурата е соодветна на нашиот бизнис?
  • Дали веб страната е соодветна за нашиот бизнис?
  • Доколку радиото е соодветно за нашиот бизнис дали сме ја избрале вистинската радио станица?
  • Доколку брошурата е соодветна за нашиот бизнис дали ја делиме на вистинските луѓе – таргетирани потенцијални клиенти?
  • Доколку веб страната е соодветна за нашиот бизнис дали правиме доволно за да имаме повеќе таргетирани посетители?

Одговорите на овие прашања ќе дадат одредени насоки за да увидиме дали нашите маркетинг активности се ефективни и ефикасни. Се она што ќе содржи одговор во вид на НЕ или пак МОЖЕБИ ќе треба да се поправи или замени со друга маркетинг активност.

Зошто ова последното. Секоја маркетинг активност има своја цена на чинење. Така да ако продолжиме со нашиот пример каде остваривме повеќе приход од 165.000,00 денари и доколку имаме профитна маржа од 20% тоа значи дека имаме добивка од 33.000,00 денари.

Дали маркетинга ктивностите од овој пример доколку чинат 35.000,00 денари ќе бидат ефикасни? Секако дека одговорот ќе биде не во целост. Целосна филозофија во маркетингот е да со најмалку вложени пари ги максимизирате резултатите на претходните 4 цели на една маркетинг активност.

Затоа разгледајте ја секоја ваша маркетинг активност преку еден ваков аспект со поставување на следниве прашања:

  • Дали таа и таа маркетинг активност ми ја зголеми продажбата во одреден временски период?
  • Дали таа и таа маркетинг активност го зголеми бројот на купувачите во одреден временски период?
  • Дали таа и таа маркетинг активност ми ја зголеми фреквенцијата на купување во одреден временски период?
  • Дали таа и таа маркетинг активност ќе ми дозволи да ја зголемам цената?
  • Дали таа и таа маркетинга ктивност е ефикасна?
post

Гравитација како основа за бизнис успешност

Често пати сакам да ги применувам законите на физиката во претприемништвото како една посебна дисциплина или пак слободно можам да кажам наука.

Што е гравитација?

Не би одел со некои навистина сложени дефиниции и фактори и бројки во опишување на гравитација туку едноставно би ја изразил како:

Сила на привлекување помеѓу два објекти.

На пример кога ќе пуштите камен од рака тој паѓа на земја заради гравитација (земјата го привлекува каменот). Дали тука нема некоја аналогија која можеме да ја примениме и кај бизнисите.

Што му е потребно на секој бизнис? На секој бизнис и на секој претприемач му е потребна еден вид на гравитациона сила која ќе ги привлекува купувачите и потенцијалните потрошувачи.

Гравитација и бизнис

Концептот на гравитација, бизнис и претприемач е прикажан на сликата. Го имаме бизнисот кој претставува систем кој црпи живот преку продажба на сопствените производи и услуги. Во центарот на тој бизнис сте Вие како претприемач. Надвор од Вашиот бизнис се оние кои одлучуваат дали ќе ви дадат живот или не, а тоа се:

  • Потрошувачи, оние кои ги користат Вашите производи или услуги. Потрошувач и купувач не мора да биде иста личност или пак ист бизнис кога станува збор за B2B. Доколку тие сакаат да ги користат Вашите производи, односно Вашите производи ги привлекле да ги користат гравитационата сила ќе постои.
  • Купувачи, оние кои го плаќаат производот или услугата кои ги продавате. Тие биле привлечени со некоја гравитациона сила да го купат тој производ или пак услуга откај вас.
  • Потенцијални потрошувачи, оние кои може да бидат корисници на Вашите производи или услуги. Тука гравитационата сила е сеуште слаба, но треба да се воспостави и да се зајакне како би се трансформирала оваа група во потрошувачи.
  • Потенцијални купувачи, оние кои може да почнат да ги купуваат Вашите производи или услуги. И тука гравитационата сила е сеуште слаба или пак воопшто не постои.

Меѓу нив и Вашиот бизнис мора да постои гравитациона сила која ќе ги привлече кон Вашиот бизнис, односно ќе ги привлече потенцијалните потрошувачи и купувачи да влезат во Вашата продажна инка, додека тековните потрошувачи и купувачи да се вратат повторно во Вашиот бизнис и да купат од Вашите производи или услуги.

Гравитационата сила ќе биде поголема доколку желбата кај таа група на луѓе или пак бизниси за влез во Вашиот бизнис биде поголема.

Задача на еден претприемач

Која ќе биде Вашата задача како претприемач во однос на гравитационата сила? Првин ќе биде потребно да ја изградите, воспоставите и постојано да ја зајакнувате таа гравитациона сила. Потоа постојано да ја проширувате кон нови групи на луѓе кои се надвор од Вашиот бизнис а од кои зависите и Вие како претприемач и Вашиот бизнис.

Што влијае на бизнис гравитационата сила?

  • Вашиот производ или услуга. Тука спаѓаат карактеристиките и полезностите од истите. Колку ќе бидат покорисни производите и услугите за претходно наведените ентитети толку ќе биде и поголема гравитационата сила.
  • Цена. Некои ги привлекува ниска цена, додека другите ги привлекува висока цена. Во зависност од целниот пазар, и цената ќе влијае различно на Вашата бизнис гравитациона сила.
  • Промоција. Многу ентитети ќе бидат привлечени од Вашиот промотивен материјал како реклами, брошури, флаери, веб страна итн.
  • Дистрибуција. Во одредени случаи пресудно за донесување на одлуката е дистрибуцијата на производите или услугите.
  • Вие како претприемач. Вашиот углед, однесување, начин на работа постојано е следен од погоре наведените ентитети, па понекогаш и Вие можете да бидете пресуден за таа бизнис гравитациона сила.
  • Вработени. Вашите вработени се огледало на Вашиот бизнис. Не е доволно Вие да бидете ОК, доколку Вие не се занимавате со продажба, туку Вашиот продажен тим. Затоа и Вашиот продажен тим треба да биде ОК и да привлекува.
  • Комбинација на сите горенаведени елементи. Понекогаш не е доволен само еден од овие елементи за силна бизнис гравитациона сила. Затоа сите елементи мора да бидат доволно силни за да биде силна и гравитационата сила.

Можете да забележите дека ова погоре наведено претставува маркетинг микс на еден бизнис. Значи маркетингот,Вие како претприемач и Вашите вработени се елементите кои ја зголемуваат бизнис гравитациона сила.

Затоа, подобрете ги сите овие елементи и зголемете ја бизнис гравитационата сила, за да нема зима за Вашиот бизнис.

post

Интернет маркетинг – Неколку Дефиниции

Во последно време се појавуваат многу дефиниции од научници кои го дефинирале поимот интернет маркетинг.  Некои од различните дефиниции помагаат да се објасни обемот на новата форма на маркетинг.

Интернет маркетинг - неколку дефиниции

Што е интернет маркетинг?

Апликација на интернет поврзана со дигиталната технологија во традиционалната комуникација за да се постигнат целите на маркетингот.

Интернет маркетингот може да биде едноставно дефиниран како: остварување на маркетинг целите преку примена на дигиталните технологии. Оваа дефиниција ни помага да сфатиме дека треба да се утврдат инвестициите во интернет маркетингот, а не да се усвои технологијата. Овие апликации вклучуваат дигитална технологија, интернет медиуми, како што се веб-сајтови и е-маил, и други дигитални медиуми како што се безжични и мобилни телефони, телевизијата, како кабелската така и дигиталната. Апликацијата на интернет е поврзана со дигиталната технологија во традиционалната комуникација за да се постигнат целите на маркетингот.

Терминот “Интернет маркетинг„ се однесува на тоа како интернетот може да се користи во комбинација со традиционалните медиуми за да се стекне давање услуги на клиентите.  Електронскиот маркетинг има широк опсег на давање услуги, бидејќи се однесува на давање дигитални услуги преку дигитални медиуми како што се е-маил, и електронските Customer Relationship Management системи (д-CRM системи), бежичните медиуми, во кои се вклучени и управувањето на дигиталните податоци.

Маркетингот е модел од менаџирањето, одговорен за идентификување, антиципарање и задоволување на клиентите и нивната побарувачка.

Оваа дефиниција фокусот го става на купувачот, додека пак во исто време имплицира потреба да се поврзе и со другите делови на менаџментот како би се постигнал поголем профит.

Интернет маркетингот може да се користи:

  • да се истражува и да се дознае мислењето на клиентите
  • за да служи како дополнителен канал на информации за купувачите со кои можат да пристапат во било кој дел што нив ги интересира.

Успехот на интернет маркетингот се огледа во задоволството на купувачите, кое може да се следи преку електронски канали, со поставување на прашања преку сајтовите, кои се многу едноставни за употреба.  Исто така сајтовите претставуваат врска помеѓу луѓето и физичката испорака на производот, со што купувачот го гледа и порачува преку интернет, а подоцна и наплаќа преку електронско плаќање.

Поширока дефиниција на маркетингот е равиена од трана на DIBB, Simkin, Pride, Ferrell:

Маркетингот се состои од индивидуални и организациски активности, со цел да го олесни и забрза размената на задоволувачки односи во динамичното окружување преку остварувањето на дистрибуцијата, промоција на стока, услуга и идејa.

Оваа дефиниција е корисна затоа што привлекува различни маркетиншки активности, неопходно е да се постигне “размена на односи„, односно развој на производот, одредување на цената, промоцијата и дистрибуцијата.  Во однос на оваа дефиниција важен е начинот на кој интернетот влијае на овие елементи – интернет маркетинг микс.

*****************************************************************

Овој напис е напишан од Кристина Алексоска – Постдипломец на Економски Институт- Скопје, отсек претприемнишво, при Универзитетот “Св. Кирил и Методиј„-Скопје

*****************************************************************

Забелешка ДШ: Ова е почеток од еден серијал на гостински написи за интернет маркетинг од страна на Кристина Алексоска.

post

Билтени – Маркетинг средство 37

Билтените претставуваат навистина интересно и моќно маркетинг средство за секој бизнис, па и за малите бизниси. Оваа е особено точно доколку тие билтени содржат квалитетни информации за примателите. Голема примена има кај малите бизниси кои работат со други бизниси (B2B) но не е исклучена и примената од страна на бизниси кои работат со потрошувачи (B2C).

Билтени како маркетинг средства

Во оваа 37-мо маркетинг средство билтените не ги гледаме како електронски туку како пишани билтени на хартија кои се испраќаат по пошта или пак на рака на примателот на билтенот. За електронски билтени ќе имаме посебно маркетинг средство кое ќе го опфатиме во делот на интернет (онлајн) маркетинг средства.

Што претставуваат билтени?

Билтени едноставно претставуваа збир на информации од одредено подрачје или пак за одредена индустрија во која се наоѓа Вашиот бизнис. Во Wikipedia билтените се дефинираат како:

Редовно дистрибуирани публикации за тема која е од интерес на примателите на билтените.

Можеме да забележиме две карактеристики од оваа дефиниција:

  • Билтените редовно се дистрибуираат. Може да бидат на неделно, месечно или пак годишно ниво.
  • Опфаќаат тема која е од интерес за примателите. Приматели се Ваши потенцијални или пак сегашни потрошувачи.
  • Претставуваат публикации.

Што да содржат билтените?

Како што извлековме од дефиницијата, билтените треба да содржат информации кои ќе бидат од интерес на Вашите потенцијални потрошувачи или пак сегашни купувачи. Што е тоа што ќе ги интересира Вашите потенцијални и сегашни потрошувачи?

Предмет на интерес може да биде:

  • Придобивките од некој Ваш производ или пак услуга.
  • Изјава или пак препорака од некој Ваш задоволен купувач?
  • Како да ги користат производите или пак услугите?
  • Што ќе се случува во иднина во индустријата?
  • Како да ги продаваат производите или услугите доколку се работи за бизнис кој продава на бизнис кој повторно продава понатаму на потрошувачот?
  • Кои се плановите за иднина?
  • Како можат да Ве контактираат?
  • Вести од подрачје на индустријата?
  • Случки кои ќе се случат или пак веќе се случиле.
  • Информации за покрупни договори со поголеми клиенти.
  • Можни попусти за нарачки до некој датум или пак попусти за сите приматели на билтенот.
  • …

Ова се само неколку идеи кои можете да ги вклучите во содржината на Вашиот билтен. Сепак, во најголем дел содржината ќе зависи од индустријата во која се наоѓа Вашиот бизнис како и од типот на бизнисот. Останатото е на Вашата креативност како еден претприемач.

Како да се користат билтени како маркетинг средство?

Не можам да претставам еден образец или пак универзален модел на користење на билтенот. Можам само да дадам една моја идеја како јас би го користел оваа маркетинг средство.

1. Сегментација

Првин би направил сегментација на потенцијалните приматели на билтенот. На пример, би ги сегментирал на:

  • Потенцијални потрошувачи, оние кои сакам да ги привлечам за мојот бизнис.
  • Редовни купувачи, оние кои веќе купуваат, но сакам да се вратат повторно.

2. Дефинирање на содржина

Врз основа на претходната сегментација би дефинирал што ќе содржи билтенот за потенцијалните потрошувачи, а што за редовните купувачи. Мора да внимавате дека Вашата цел е потенцијалните потрошувачи да ги трансформирате во редовни купувачи, додека редовните купувачи да ги натерате да се вратат и да го повторат бизнисот со Вас. Што е тоа што ќе ги исполни овие Ваши цели?

3. Дефинирање на начин на испраќање

Оваа е посебен дел кој сепак зависи од креативноста на претприемачот. Можете да ги испраќате преку пошта на сегментираните приматели. Можете да ги давате кога ќе го постетат Вашиот бизнис. Можете при телефонскиот контакт на потенцијалните потрошувачи да ги прашате за нивната адреса како би им испраќале бесплатен билтен по пошта. Било каков начин на испорака кој ќе служи за исполнување на Вашите маркетинг цели е дозволен.

4. Изработка

Изработката можете да ја оставите на некој професионалец кој и ќе ги печати Вашите билтени или пак самите да ги изработувате и печатите на Вашиот печатар. Имате можност и да отпечатите еден примерок, па потоа останатите да ги фотокопирате. Сето ова ќе зависи од Вашиот маркетинг буџет.

post

Бесплатна проба – Маркетинг средство 36

Ќе продолжиме со серијалот за маркетинг средства на претприемач. Како 36-то маркетинг средство кое ќе го презентирам тука е бесплатна проба. Ова е едно маркетинг средство кое има големо влијание врз конечната одлука за купување. Се користи вообичаено откако потенцијалниот купувач е веќе влезен во Вашата продажна инка.

Секој претприемач би требало да размисли дали оваа опција би можела да се имплементира во неговиот бизнис како посебно маркетинг средство.

Што претставува бесплатна проба?

Сигурно сте забележале дека многу производи се продаваат преку бесплатна проба (Free Trial). Оваа е особено распространето на интернетот како продажно место. Но, кај некои типови на бизниси може да функционира и офлајн.

Бесплатна проба како маркетинг средство едноставно претставува овозможување н потенцијалниот купувач да го проба производот преку што ќе може да ги види сите функционалности и карактеристики, како и да ги почувствува поволностите од истиот пред да донесе одлука за конечно купување на тој производ.

На пример, голема е примената на оваа маркетинг средство на интернетот при продажба на некој софтвер. Продавачот ви овозможува да го симнете или пак да се регистрирате доколку се работи за онлајн апликација и да го користите со сите функционалности софтверот во одреден временски период (вообичаено 14 или пак 30 дена).

Втор пример за офлајн бизниси можеме да го земеме продавница за облека (бутик). Вие влегувате во продавницата, разгледувате и нешто ви се допаѓа. Се доближувате до тоа нешто го пипате и сакате да го пробате за да видите како ќе ви стои. Го пробувате, се гледате во огледалото и доколку ви стои убаво, и се чувствувате удобно носите одлука за купување. Доколку не ви стои убаво или пак не се чувствувате пријатно едноставно, го оставате и барате нешто друго.

Трет пример за офлајн бизнис кој нуди бесплатна проба е парфимерија. Во парфимеријата влегувате и гледате разни парфеми, но без да пробате од тестерот нема да знаете дали е добар или не. Можете да се намирисате со тестерот и да оставите до утре да видите каква му е трајноста за да одлучите дали ќе го купите или не.

Како функционира бесплатна проба како маркетинг средство?

Забележавте во претходниот наслов опфативме три примери на три различни бизниси кои нудат бесплатна проба како дел од нивната маркетинг кампања. Можеме да извлечеме неколку карактеристики од тие примери:

  • Пробата ја врши потенцијалниот купувач.
  • Целта на пробата е потенцијалниот купувач да ги провери карактеристиките и полезностите од користењ ена производот.
  • Пробата е ограничена во одреден временски период.
  • Врз основа на пробата потенцијалниот купува носи одлука за купување.

Значи купувачот треба веќе да е заинтересиран за Вашиот производ или пак услуга за која сакате да го примените ова маркетинг средство. Кога веќе е пробуден интересот потенцијалниот купувач го пробува, ужива одреден временски период во полезностите од производот или услугата и на крај одлучува дали вреди за парите за кои се продава.

Забележувате дека за да се стигне до оваа маркетинг средство морате да имате и некое друго маркетинг средство со кое ќе пробудите интерес кај потенцијалниот купувач. Затоа и сите овие маркетинг средства епотребно да ги сфатите како комбинација и надополнување на едно со друго бидејќи едно е јасно: не постои едно и единствено перфектно маркетинг средство, постои само перфектна комбинација на различни маркетинг средства.

Каде се може да се примени ова маркетинг средство?

Примената е навистина неограничена, но повтроно зависи од Вас како претпримач и Вашата креативност. Не можам да креирам една универзална листа на активности за да се примени оваа маркетинг средство, но можам да поставам некои прашања кои Вие како претприемач би се запрашале за да ја увидите можноста од користење на бесплатна проба како Ваше маркетинг средство.

  • Дали дизајнот на Вашиот бизнис овозможува користење на бесплатна проба?
  • Дали производот или пак услугата може да се испорачаат како бесплатна проба?
  • Како ќе се ограничи користењето на бесплатната проба во една временска рамка?
  • Колкав ериод на бесплатно користењ би бил оптимален?

Веќе опфативме неколку примери, во кои едниот е интернет базиран бизнис, а вториот и третиот пример се однесува на малопродажба. Ќе опфатам уште неколку примери за други типови на бизниси:

  • Производствен бизнис. Еден ваков бизнис има повеќе опции за интеграција на бесплатна проба. На пример, може да изработи ограничена количина на модели за проба преку кои потенцијалните купувачи (големопродавачи или пак други производствени бизниси) ќе го пробаат производот. Една честа практика е доколку постои можност секогаш да се оди на редовните клиенти да им се овозможи да го пробаат новиот производ како би се добиле повратни информации за можните недостатоци пред официјалното лансирање на производот.
  • Услужен бизнис. Можен начин на проба на Вашите услуги е да им дадете на потенцијалните клиенти еден извештај од некој Ваш претходен клиент со некое измислено име. На ваков начин потенциланиот клиент ќе може да види што би добил за Вашата услуга.

Примената на оваа маркетинг средство едноставно бара претходна анализа и дизајнирање за неговата примена. Обидете се да бидете креативни и да најдете начини за можна примена на оваа маркетинг средство бидејќи може да биде навистина ефикасно за Ваиот бизнис.

post

Маркетинг: Најдоброто на претприемач во 2009

Четвртата тема од серијалот Најдоброто на претприемач во 2009 е за маркетингот. Како што Peter Drucker бизнис гуру на XX век има кажано:

Маркетинг и иновацијата се единствените бизнис функции кои генерираат приход и креираат бизнис. Се останато е трошок.

Затоа маркетингот е навистина важна бизнис функција која може да се претстави како еден крвоток во бизнисот, бидејќи одлуките во маркетингот се пренесуваат во сите останати бизнис функции.

Во 2009 година статистички најопфатена тема на претприемач беше маркетингот. Ова е особено заради серијалот за маркетинг средства во кој веќе опфативме 35 од 100 различни маркетинг средства за Вашиот бизнис.

Ќе се обидам оваа листа на најдоброто на претприемач за маркетингот да ја претставам во вид на еден комплетен прирачник за сегашни и идни претприемачи.

  1. Како Вашата Продажна Инка Да Ја Одржувате Секогаш Полна? Ова е еден од најголемите цели на сите Ваши маркетинг активности. Доколку продажната инка е секогаш полна нема опасности за Вашиот бизнис.
  2. Влезен Маркетинг – Inbound Marketing. Ова е маркетинг за иднината, едноставно подгответе се и започнете да го применувате.
  3. Маркетинг План во 7 Едноставни Реченици. Подгответе едноставен маркетинг план кој едноставно ќе ве води низ целиот процес на маркетинг во Вашиот бизнис.
  4. Претприемач – Дополнувања за Маркетинг План. Џабе ви е маркетинг планот доколку не се обврзете на истиот и едноставно да го спроведете она што е испланирано, и секако да ги мерите резултатите.
  5. Истражување покажува поголема успешност на веб презентација на мали бизниси со блог. Погледнете го истражувањето и применете ги наодите во Вашата веб прзентација.
  6. Дали Вашата Бизнис Веб Страна е Обична Брошура? Доколку едно од маркетинг средствата ви е веб страна обидете се да не биде обична брошура.
  7. Дали Вашата Бизнис Веб Страна е „Обична“ Брошура – Заборавено Поглавје. Продолжение на бизнис веб страна како обична брошура.
  8. Маркетинг средства. Изберете неколку кои ќе ги користите за Вашиот бизнис.
post

15 Маркетинг Совети за 2010 година

Полека но сигурно поминува и оваа 2009 година. Претприемач постои веќе една година, а како вчера да започнав да пишувам блог написи за трендови кои ќе не очекуваат во 2009 година. Претходниот напис опфаќаше совети во однос на некои активности кои би требало да ги започнете во 2010 година.

маркетинг средства за 2010 година на претприемач

Овој напис едноставно ќе претставува едно сублимирање на се она што на некој начин го опфативме во делот на маркетинг на претприемач во 2009 година.

1. Гради листа

Листа со тековни купувачи и потенцијални потрошувачи претставува една моќна алатка на секој претприемач во поглед на маркетинг активностите за сопствениот бизнис. Како едно од маркетинг средства градење на листата ја опфативме во Маркетинг средства 12 – Гради листа. Еден од 10-те бизнис темплејти од претприемач претставува токму една форма која можете да ја искористите за градење на сопствена листа.

2. Сегментирај ја листата

За подобро спроведување на маркетинг активностите пожелно е да ја сегментирате листата. Сегментацијата можете да ја извршите врз основа на некои карактеристики на членовите во листата како на пример, пол, значајност, потенцијални потрошувачи и купувачи…

3. Биди еден чекор поблиску до твоите потрошувачи и еден чекор пред конкуренцијата

Едно правило за секој претприемач е основната цел да му биде да биде еден чекор поблиску до потенцијалните и тековните купувачи, а секогаш да биде еден чекор пред конкуренцијата. Се она што го правите погледнете го низ призмата колку тоа нешто ќе ве доближи до потенцијалните и сегашните купувачи.

Од друга страна постојано анализирајте ја конкуренцијата и најдете ги нивните слабости, однос што е тоа што тие го прават на полето на маркетингот, а што е тоа што не го прават. Сето она што го прават тие, направете го и вие само подобро, а сето тоа што тие не го прават едноставно Вие направете го.

4. Направи едноставен маркетинг план

Една од најголемите грешки што еден претприемач ги прави во поглед на маркетингот согласно Jay Conrad Levinson (таткото на герила маркетингот) е шт немаат маркетинг план, а се обидуваат да спроведуваат маркетинг активности за нивниот бизнис. За изработка на едноставен маркетинг план можете да прочитате во Маркетинг план во 7 едноставни реченици.

Доколку пак сакате да изготвите маркетинг план согласно „правила и прописи“ или како уште го нарекувам маркетинг план од учебници, прочитајте во Маркетинг план како дел од бизнис планот.

5. Обврзи се на тој маркетинг план

Необврзувањето кон тој маркетинг план кој ќе го изработите е уште една грешка која ја потенцира Jay Conrad Levinson. Кога нешто ќе испланирате едноставно мора и да го спроведете. Можете да прочитате некои идеи како Вие како претприемач и Вашите вработени да се обврзете на тој маркетинг план во Дополнувања за маркетинг планот.

6. Ажурирај ја твојата веб страна

Доколку имате веб страна на која го презентирате Вашиот бизниси отворете ја и погледнете од кога не сте ја ажурирале. Дококу одговорот е една, две или три години и повеќе, веднаш ажурирајте ја. Додадете кои се новите производи или пак услуги што ги нудите. Сменете го делот Copyright 2005, на пример. Ажурирајте ги контакт деталите, ставете Skype контакт детали, e-mail, GoogleWave детали за сорабтка со Вас, Facebook корисничко име, Twitter и се што имате, користите а не е наведено на Вашата веб страна за да Ве најдат.

7. Направи блог за твојот бизнис

Оваа е една стратегија која ја започнаа малите бизниси, а големите веднаш ја прифатија откако сфатија дека е добра и дава резултати. Но, најчест проблем што се јавува кај претприемачите е за што да пишуваат. Можете да прочитате за 10 теми за кои можете да пишувате на Вашиот бизнис блог. Запомнете дека со блогот не е целта да направите моментална продажба туку едноставно градите содржина која има за цел да ја поддржи денешната и утрешната продажба.

8. Направи стратегија за присуство на социјални медиуми

Ова едноставно значи да одговорите на следниве прашања:

  • Кои социјални медиуми?
  • Како да бидам присутен?
  • Со што да бидам присутен?
  • Кој јазик да користам во комуникација?

9. Започни со имплементација на стратегија за присуство на социјални медиуми

Имате премногу отворени можности за користење на социјалните медиуми, само треба да направите добра стратегија и да започнете со имплементацијата на се она што е опфатено во стратегијата. Ништо нема да изгубите, само можете да добиете поен плус во очите на потенцијалните потрошувачи.

10. Биди присутен секаде каде што се присутни твоите потенцијални потрошувачи

Секој би се занимавал со маркетинг доколку знае точно каде се наоѓаат неговите потенцијални потрошувачи. Но, проблемот не е толку едноставен. Потребна е анализа и познавање на потенцијалните потрошувачи како би знаеле каде тие се присутни. На таков начин и Вие како претприемач и Вашиот бизнис ќе можете да бидете присутни таму, било лично или пак преку некое маркетинг средство.

11. Мери ги резултатите од секоја маркетинг активност

Кога станува збор за маркетинг, ова е неминовна активност за еден претприемач. Прашањето е како да се мери успешноста на една маркетинг активност. Постојат неколку работи кои и досега ги потенциравме на претприемач. Првин, потребно е уште при дизајнот на маркетинг активноста да размислите за тоа како ќе ја мерите успешноста на таа маркетинг активност. На пример, доколку користите весник да ставите попустен купон за секој кој ќе дојде да купи или пак нарача од Вас. Потоа секоја таква продажба да ја претворите во приход во пари. За на крај тој приход да го поделите со по трошокот за таа маркетинг активност. Искористи го маркетинг календарот како еден од 10-те бизнис темплејти на претприемач.

12. Користи ги резултатите од мерењето и подобри ја секоја маркетинг активност

Кога веќе ќе имаш одреден фактор на успешност за секоја маркетинг активност лесно ќе можеш да ги подредиш врз основа на успешноста. За сите оние маркетинг активности кои даваат добри резултати обиди се да ги подобриш и да дадат уште подобри резултати. Размисли за менување на боја на огласот која ќе привлече поголемо внимание, доколку користиш огласи во весници.

13. Елиминирај се од маркетинг календарот што во 2009 година има слаби резултати

Сите оние кои се најслаби исфрли ги од маркетинг календарот, а сите оние кои даваат добри резултати продолжи ги. За секоја маркетинг активност која ќе ја исфрлиш избери нова согласно маркетинг буџетот. Па, повторно продолжи со мерењето. Така постојано ќе го подобруваш маркетингот на твојот бизнис.

За користење на маркетинг календарот од 10-те бизнис темплејти можете да го погледнете видеото за маркетинг календар.

14. Комуницирај со потенцијалните потрошувачи и купувачи

Доколку комуникацијата се употреби како посебно маркетинг средство моќта на маркетингот за Вашиот бизнис навистина ќе биде на едно завидно ниво. Можете да користите различни „далечински“ маркетинг средства, но доколку не воспоставите ситем на вистинска комуникација во вистинско време, ефиксноста и ефективноста на Вашите напори ќе биде мала.

Комуникацијата може да бидне вербална и невербална комуникација, директна и индиректна, официјална и неофицијална, озбилна и смешна, онлајн и офлајн…

Се е тоа еден вид на комуникација која ја остварувате со надворешниот свет – Вашите потенцијални купувачи.

15. Анализирај преку интервјуа и прашалници

Анализирај преку интервјуа у прашалници – Но што да анализираме? Едноставно што е она што го сакаат Вашите тековни купувачи и потенцијални порошувачи, но и што е она што не го сакаат. На ваков начин ќе успеете да искористите неколку работи:

  • Ќе стекнете знаење што е тоа што го правите добро и заради што купувачите ве избираат Вас. Сето тоа може да биде елемент на идно подобрување како би ја задржале конкурентската предност во тие елементи.
  • Ќе стекнете знаење за она што не им се допаѓа на Вашите купувачи. Ова е простор на големи промени и подобрувања.
  • И едноставно интервјуто или пак прашалникот претставува еден вид на маркетинг средство кој во очите на купувачот ве претставува како некој кој се грижи за нивното мислење.
post

10 Клучни Работи Кои Треба да Ги Започнете во 2010

Како навршува оваа 2009-та година и се побликсу е 2010-тата се прават различни анализи и проценки за тоа каква ќе биде 2010 година. На претприемач подготвуваме посебен напис за некои наши предвидувања во однос на бизнисите за 2010.

Препораки за претприемач за 2010

Во овој напис би сакал да издвојам 10 клучни работи за кои би требало да размислите и да ги спроведете во новата 2010 година, доколку не сте ги спровеле досега. Па да тргнеме:

1. Доколку сеуште не сте започнале сопствен бизнис размислете за оваа опција

Секогаш постои една ваква опција доколку сакате да постигнете нешто повеќе, односно доколку сакате да излезете од динамичката рамнотежа на удобноста што status quo ситуацијата Ви ја пружа. Можете новогодишните празници да ги искористите и да размислите дали можете да постигнете нешто повеќе во животот и дали опцијата да бидете претприемач е соодветна за Вас.

2. Внесете го вашиот бизнис во светот на интернетот

Една активност што според мене влегува во категорија МОРА. Маркетингот и начинот на комуникација помеѓу бизниси и бизниси како и бизниси и крајни потрошувачи во светот е целосно променет. Започнува да се менува и кај нас. Бидете подготвени и на оваа поле. Но, моја препорака е воопшто да не се нфаќате со оваа активност доколку сметате дека Вашата веб страна треба да биде една обична брошура. Само ќе потрошите пари, а ништо нема да добиете.

3. Започнете со SEO доколку сеуште не сте започнале

Една од основните активности кога станува збор за Вашата достапност на интернетот е SEO (Search Engine Optimization – Оптимизација на пребарувачи). Ова е една од најважните активности за да бидете достапни и најдени од потенцијалните потрошувачи во интернет светот. Дали Ви е потребна веб страна ако никој не може да Ве најде кога ќе има потреба од Вашите производи и/или услуги.

4. Искористете ги социјалните мрежи во полза на Вашиот бизнис

Секојдневно никнуваат нови социјални медиуми кои на некој начин ги поврзуваат луѓето меѓу себе. Социјалните медиуми се еден од елементите кои го изменија начинот на практицирање на маркетингот. Помеѓу 300 до 400 илјади македонци се на Facebook. Пред едно 3 до 4 месеци на Twitter имаше неколку илјади македонци, а верувам дека денес се уште повеќе и тој број ќе се зголемува уште.

Така да не смее да се испушти оваа можност кога еден просечен Facebook корисник е минимално еден час на неговата омилена мрежа. Затоа бидете и Вие како претприемач и Вашиот бизнис таму.

5. Интегрирајте систем на постојано учење

Во Знаење и креативност – втор слој за успех на еден претприемач веќе ги поставив основите за знаењето и неговата претходица наречена учење. Постојано учете за сите Ваши бизнис активности, учете за маркетинг, финансии, планирање, менаџмент, преговарање и договарање, продажба… Листата навистина е предолга. Кога станува збор за интегрирање на систем ова е навистина процес кој можеда се каже дека е и сложен и едноставен. Сложен бидејќи ќе бара еден вид на познавање од информатичка технологија за да се подеси пристигнување на информации и едноставно бидејќи по подесување учењето е навистина лесно.

6. Воведете систем за квалитетно следење на конкуренција

Втор систем кој би требало да го воведете е систем за следење на конкуренцијата. Конкуренцијата претставува важен фактор за Вашиот бизнис. Следејќи ја соодветно конкуренцијата и предвидувајќи ги нивните чекори ќе бидете секогаш еден чекор пред нив.

Кога зборувам за систем мислам на еден поавтоматизиран систем кој нема да бара премногу време од Ваша страна, а ќе Ве снабдува со квалитетни информации за Вашиот бизнис.

7. Воведете систем за квалитетна комуникација со Вашите купувачи

Она како се вели: Бидете еден чекор пред конкуренцијата и еден чекор поблизу до купувачите. Квалитетна комуникација со купувачите ќе Ви обезбеди да бидете еден чекор поблизу до нив. Кога сте поблиски со Вашите купувачи ќе добиете информации кои можат Вашиот бизнис да го подобрат во сите поглед на бизнис работење.

Освен традиционалата комуникација очи во очи, воведете можност за комуникација преку е-mail, социјални медиуми, телефон… Но, запомнете дека доколку ја овозможите оваа комуникација комуницирајте, одговарајте на меилови, одговарајте на прашањата преку социјалните медиуми и одговарајте на телефонските повици.

8. Воведете систем за квалитетна комуникација со Вашите потенцијални купувачи

Четвртиот важен систем е систем за квалитетна комуникација со Вашите потенцијални купувачи. Освен купувачите кои веќе Ви имаат дадено доверба потребно е да комуницирате и со потенцијалните купувачи кои сакате да Ви ја дадат нивната доверба и да постанат купувачи. Системот може да биде ист или пак сличен со системот за комуникација со купувачите.

9. Направете реинженеринг на комплетната маркетинг стратегија

Реинженеринг едноставно претставува повторно градење од почеток. Размислете ја целокупната Вашата маркетинг стратегија во поглед на се она што дава резултати и она што не дава резултати. Доколку не сте ги мереле сопствените маркетинг активности, сега е вистинско време да започнете. Исфрлете го сето она што не дава резултат и подобрете го она што дава резултат. Вообичаено компаниите кои ги спроведуваат Вашите маркетинг активности ќе се обидат да го продолжат договорто со Вас и за 2010. Пред да одлучите да го продолжите договорот запрашајте се за следново:

  • Дали имам резултати од таа маркетинг активност?
  • Какви се резултатите (денари/купувач од таа маркетинг активност или пак денари/продажба од таа активност)

10. Бидете фокусирани на она што го работите

И како последна препорака го избрав фокусот. Доколку не сте фокусирани на Вашиот бизнис и на Вашите претприемнички активности животот како претприемач навистина ќе Ви биде потежок.

2010 година не очекувам дека ќе биде розева во поглед на бизнисите и особено на малите бизниси. Ќе имате премногу активности кои ќе треба да ги спроведете. Затоа бидете фокусирани во она што го работите. Следете го она наједноставното правило: Првин најважните и најприоритетните работи.

Ова се едни од препораки кои сметам дека навистина имаат потенцијал да го подобрат Вашиот бизнис. Ако започнете и со други активности само ќе се подобрите уште повеќе. Па, се надевам дека ќе ја истуркаме и 2010-тата и ќе започнеме да бележиме вистински резултати.

post

Цена – Маркетинг Средство 35

Често пати се прашувам дали цената треба да влезе како еден вид на маркетинг средство или треба да се гледа само како карактеристика или полезност што еден бизнис нуди преку своите производи или услуги. Сепак во наши услови каде зборовите технолошки вишок, стечај, отпуштање и затворање се најпопуларни последниве 15 до 20 години, не можам а да не ја издвојам цената како посебно маркетинг средство.

Цена како маркетинг средство

Ова е еден сосема друг поглед на цената – цената како маркетинг средство. Досега на претприемач цената повеќе ја гледавме како еден финанси аспект на бизнисот. Па тие артикли и написи кои ги опфативме досега за цената можете да ги прочитате во:

Како дел од маркетинг миксот цените ги опфативме во Маркетинг микс – Цена. Во тој дел наведовме дека следниве цени може да ги примениме:

– Цени за продирање на пазар – пенетрација

– Конкурентни цени.

– Стратегија на снижување на цени.

– Цени на групни производи.

– Цени на линија на производи.

– Психолошки цени.

– Опционални цени.

– Премиум цени или цени на престиж.

Значи имаме различни видови на опции во однос на цените. Која опција ќе избереме ќе зависи од неколку фактори како што се:

  • Понуда и побарувачка за производите и/или услугите
  • Трошоците
  • Конкуренцијата и
  • Државата со различни регулации во однос на цената.

Тука би додал уште еден елемент, а тоа е што Вие како претприемач и Вашиот бизнис продавате: само производ, само услуга или пак и производ и услуга. Еве еден пример од малопродажба:

Големите маркети продаваат само производ и затоа имаат пониски цени во однос на малите продавници кои нудат и еден вид на услуга како помош при избор на производот.

Што е цена како маркетинг средство?

Првин, цената едноставно претставува износ на пари кои се даваат од страна на купувачот на продавачот за да се добие производот или услугата кои се продаваат од страна на продавачот.

Како може цената да се разгледува како маркетинг средство?

Едноставно така што цената претставува слика, односно визуелизација која ја давате Вие како претприемач за вредноста на Вас, Вашиот бизнис и Вашиот производ и/или услуга. Едно основно правило е доколку платите повеќе ќе добиете поголема вредност. Но, од друга страна нема секој можност да плати повеќе, па на таков начин ќе се обиде да компензира на вредноста.

Висината на цената може да се гледа како маркетинг средство на следниов начин:

  • Висока цена – Висока вредност и квалитет. Висока експертиза, висок авторитет.
  • Ниска цена – Ниска вредност. немање на експертиза и авторитет.

Дали цената има клучно влијае?

Во зависност од видот на потрошувачи кои ги таргетирате ќе зависи и влијанието на цената како маркетинг средство. Доколку таргетирате потенцијални потрошувачи за кои големата цена не претставува проблем слободно ќе можете да одите по повисоки цени. Но, доколку таргетирате потенцијални потрошувачи кои се социјално загрозени, секако дека нема да можете да одите со високи цени.

Затоа е важно, првин да ги проучите потенцијалните потрошувачи од Вашиот целен пазар. Потоа да изберете со која ценовна стратегија ќе одите.

Како цената да се користи како маркетинг средство?

Како и повеќето од маркетинг средства кои ги разработуваме на претприемач, така и цената се користи во комбинација со други маркетинг средства и особено со потрошувачи и квалитет како маркетинг средства.

Првин добро познавајте ги Вашите потрошувачи, потенцијални потрошувачи и купувачите, а потоа презентирајте и докажете им го Вашиот квалитет (решавање на нивниот проблем), за на крај да можете да наплатите поголема цена за тој квалитет.

Еве еден пример каде јас лично како потрошувач се најдов во една таква ситуација:

Дојдов до најава за еден софтвер кој треба да се пушти во официјална продажба по неколку месеци. Ме заинтересира софтверот бидејќи решаваше неколку мои проблеми во тој момент. До денот на официјалното пуштање во продажба ми ги презентираа можностите на тој софтвер (вредност, квалитет, заштеди итн.). Барав да видам која е цената и не можев никаде да ја најдам. Мислев дека ќе биде прескап илјадници долари врз основа на тоа што го има како можност. Но, на денот на официјалното пуштање во продажба видов дека тој софтвер чини 200$ што за мојата претходна перцепција од илјадници долари беше премногу ефтино. А, знам дека не е ефтино, сепак 200$ не се малку пари за еден софтвер. Но, маркетингот што го примени компанијата која го продава софтверот беше одлична, а имаат и одличен производ од кој сум навистина задоволен.

post

Што Еден Претприемач Може да Научи за Маркетинг од Владата?

Навистина сум изненаден од маркетинг советниците на нашата Влада. Одлични маркетинг стратегии и тактики.

Маркетинг лекции од Владата

Бизнисите, и особено малите бизниси навистина можат да научат многу работи. Како еден меѓу првите написи на претприемач пишував за маркетинг стратегијата на Барак Обама која му овозможи успех на последните претседателските избори во САД. Сега сакам да ги извлечам поспецифичните маркетинг активности кои нашата Влада ги применува, а кои се применливи и за Вас како претприемачи и за Вашите мали бизниси.

Онака како што се наведени подолу каде што спомнувам бизниси или пак претприемачи може да се употреби и политчки партии и Влада.

1. Маркетинг, маркетинг и само маркетинг.

Успехот се состои во квалитетен маркетинг на бизнисот. Не е важно да правите нешто добро што само Вие и Вашите најблиски ќе го знаете. Или пак не ви е потребен бизнис кој никој нема да го знае. Видливоста на Вашиот бизнис, препознатливоста на Вашиот бизнис и ставовите на луѓето за Вашиот бизнис ги градите со помош на маркетингот.

2. Бидете добри кон медиумите, за тие со добро да ви вратат.

Медиумите имаат голема моќ за влијание врз целата заедница, која всушност претставува Ваш потенцијален пазар. Доколку сте добри кон нив, односно најдете заеднички интерес ќе имате одличен потенцијал за бесплатна промоција на Вашиот бизнис и бесплатно распространување на информација за Вашиот бренд, бизнис или пак производ и услуга.

3. Бидете присутни секаде каде што се Вашите потенцијални потрошувачи.

Отсекогаш оваа правило било важно како за бизнисите така и за политичките партии. Каде се потенцијалните потрошувачи (гласачи)? Вложете напори Вашиот бизнис да биде присутен секаде каде што се потенцијалните потрошувачи.

4. Секогаш возвраќајте го ударот на негативните напади од конкуренцијата.

Очекувајте дека е нормално да бидете нападнати од Вашата конкуренција, без разлика дали станува збор за Вашиот бренд, производ или пак услуга. Не останувајте неми на овие напади, бранете се и возвратете го ударот. Но, умно и интелигентно, не простачки.

5. Ако почувствувате опасност, напаѓајте.

Нападот е најдобра одбрана. Оваа стратегија не е нова, туку постоела отсекогаш. Доколку навистина почувствувате некаква опасност за Вас како претприемач или пак за Вашиот бизнис, не се мислете, напаѓајте веднаш.

Една квалитетна тема за овие стратегии ќе ја опфатиме набргу на претприемач во темата за теорија на игри.

6. Секогаш имајте дополнителен АС во ракавот за било што.

Не е лошо да бидете однапред спремни за секоја можна ситуација за Вас како претприемач и за Вашиот бизнис. Едноставно за да го спроведете ова ќе Ви биде потребно наједноставното правило од информатиката – IF – THEN правило (Ако – Тогаш правило). Ако некој направи тогаш јас ќе го направам ова.

7. Користење на социјални медиуми.

Моќта на социјалните медиуми не треба да се испушти од страна на претприемачите како една маркетинг стратегија. На Facebook е присутна секоја политичка партија па и функционерите на истата. Да, не зборуваме за најгледаните видео материјали на YouTube (нормално повторно политички).

Вие како претприемач морате да се вклучите во социјалните медиуми, нормално со вистинската стратегија за Вас и за Вашиот бизнис.

8. Распространување на порака која што што потенцијалните потрошувачи сакаат да ја слушнат.

Секогаш вашата маркетинг порака треба да биде она што потенцијалниот потрошувач сака да го слушне. Веќе пишував за прикажување на корисноста наместо карактеристиките, корисноста е нешто што потенцијалниот потрошувач сака да го слушне.

Но, има уште нешто, размислете да користите емоционални реченици како на пример, нашиот производ ќе ви помогне да не изгубите 1000 денари наместо ќе заштедите 1000 денари.

Сето ова е дел од еден сосема нов пристап во маркетингот кој сеуште се крчка низ научните лаборатории низ светот и кој се повеќе се обидува да го разбере мозокот на потенцијалниот потрошувач. Кој дел од мозокот како функционира?

***

Ова се осум лекции кои што сметам дека се најважни, иако можеби постојат уште многу и доколку сметате дека нешто изоставив слободно споделете го преку коментар подолу.