post

Анализа на влијание на политиката врз бизнисите

Бизнис и политика

Бизнис и политика

Во изминатиот период размислував за тема за истражување на претприемач. Дојдов до повеќе интересни идеи, но сепак ја избрав темта за политиката и бизнисот, особено заради актуелноста на политичката тема и има нема избори како и заради тоа што изминативе 20 години политиката стана неизбежен дел од бизнис животот на еден претприемач, сакал тој или не. Затоа и едно вакво истражување кое барем малку ќе ги расветли постоењето ан влијание како и формата на тоа влијание врз бизнисот.

Прашалникот е составен од два дела:

  • Општ дел на прашалникот
  • Политика и бизнисот.

Прашалникот е затворен, следува анализа на одговорите кои ќе бидат објавени на сајтот.

post

4 Лекции за претприемништво од кум

Лекции за претприемништво од Кум

Лекции за претприемништво од Кум

Еден од најдобрите филмови од минатиот век беше Кум во кој главниот карактер е Дон Корлеоне, шефот на криминално семејство. Филмот го имам гледано неколку пати но пред повеќе години. Пред неколку месеци, ги гледав сите три дела повторно со поголемо внимание.

Оваа трилогија ни дава неколку лекции од претприемништвото. Филмот илустрира повеќе вредни лекции за претприемачите, но тука ќе презентирам некои од нив, оние кои ми оставија најголем впечаток.

1. Понуда која не може да се одбие

Еден од најважните елементи на секој бизнис претставува понуда. Доколку понудата е нешто што не може да се одбие, бизнисот нема да страда од недостаток на потрошувачи, бидејќи секогаш ќе има доволно потрошувачи кои ќе сакаат повеќе од бизнисот.

Во книгата The Irresistible Offer – How to Sell Your Products or Services in Тhree Seconds and Less, Mark Joyner вели:

Има 86400 секунди во еден ден.Вие имате точно 3 секунди од нив да го фатите умот на твојот потенцијален потрошувач.

2. Сакај ги пријателите, но повеќе сакај ги твоите непријатели

Ова е едно важно правило кое треба да биде применето во бизнис светот. Мора да ги сакате вашите непријатели (конкуренти), бидејќи сакате да соберете повеќе знаење за нив. Мора да ги сакате вашите непријатели бидејќи сакате да ги направите попредвидливи за целите на процесот за донесување на одлуки. Мора да ги сакате вашите непријатели доколку сакате да бидете еден чекор пред нив.

3. Се е бизнис, ништо лично

Во бизнисот ништо не е лично. Претприемачите првично го започнуваат бизнисот заради задоволување на личен интерес, но потоа ништо веќе не е лично.

Не најмувате вработени заради личен интерес. Ги најмувате бидејќи сакате да го развиете вашиот бизнис да биде успешен бизнис.

4. Секогаш внимавај на грбот

Во бизнис, вашите непријатели секогаш ќе бидат зад вас. Тие се на бојно поле со вас за истото нешто – поголемо учество на пазарот.

Подготви се со одбрамбени стратегии како одговор на твојот бизнис доколку некој те нападне.

 

post

Бизнис и политика – одат ли едно со друго?

Бизнис и политика

Бизнис и политика

Не е сигурно, но се поочигледно е дека оваа година ќе биде изборна година. Медиумите пишуваат, партиите прават калкулации, бизнисите плаќаат даноци. Каде е тука претприемачот? Тука е преку неговиот бизнис како даночен обврзник, можеби е тука преку некоја политчка партија заради претстојните избори и можеби е тука за да биде посетен од една (можеби и повеќе) политички партии за да плати уште еден данок (оној неформалниот).

Кога пред едно 7-8 години гледав едно интервју на ТВ спроведено во САД каде ги прашуваат случајните минувачи за претседателот на САД и повеќе одговорија дека воопшто не знаат кој е претседател ми беше многу чудно. Во тоа време (а и сега нешто многу не е изменето) кај нас сите зборувавме за политика и како треба да се оправи државава. Уште на 14 години знаев кој е премиер, гледав избор на претседател (првиот во собрание – неуспешен), знаев кој беше министер за финансии, кој за правда…

Од оваа дистанца се прашувам дали сето тоа ми било потребно? Дали мораше некои вечери да ги поминувам во караница со некој кој мислеше спротивно од мене? Дали уште тогаш мораше да се делиме на сини и црвени? Тоа беа почетоците на 1990-тите. Тогаш политиката беше популарна, но и сега е.

И денес забележувам тинејџери кои знаат многу за политика и политчки партии. Дали е ова нормално? Можеби е нормално бидејќи децата уште сега знаат дека:

  • За да се вработат ќе им биде потребна книшка.
  • За да успеат ќе им биде потребна книшка.
  • За да можат “нормално” да започнат и управуваат бизнис ќе им биде потребна книшка.

Книшката треба да биде од страната на победниците.

Се прашував и уште се прашувам зошто некои “успешни претприемачи” сакаат и влегуваат во политика иако имаме мислење дека тие прават милиони, имаат огромни куќи и добар живот. Можеби е заради:

  • лична сатисфакција преку докажување и на тоа поле или пак заради
  • тоа што политиката е попрофитабилна дејниост.

Едно од овие две е точно. Кое, не можам да кажам можам само да претпоставувам.

Во изминативе 15-20 години исто така забележав некои бизниси од работ на пропаста се враќаат во светот на успешните, не заради тоа што тие претприемачи спаѓаат во категорија на “успешни претприемачи” туку заради тоа што се приклонуваат некаде и едноставно таа приклонетост го бутнува со една инекција во било каква форма или некоја позиција преку која ќе се обезбедат финансиски средства за “враќањето од мртвите”.

Имам искуство во администрација и тоа со две влади и сите имаат свои “миленичиња”. И така додека едните се “миленичиња” другите се “потенцијални миленичиња” кои си ја чекаат својата шанса по изборите, но во исто време можат да го преживеат притисокот особено од претходниот соберен потенцијал кога биле “миленичиња”. Но, што е со оние третите кои не сакаат да се приклонуваат? Тие се оставени на милост и немилост на времето комбинирано со некој притисок за да се приклонат некаде. Сепак, се е бизнис, нели.

Администрацијата треба да биде во функција на граѓаните и бизнисите во една држава. Велиме неспособна, трома администрација. Зошто? Се додека еден добар вработен биде тргнат од работното место кое најдобро знае да го работи само затоа што не сака да биде приклонет кон страната на менаџментот, а не заради неисполнување на работни обврски (иако има махери ова да биде официјалната причина) ќе велиме дека имаме неспособна и тромава администрација.

Па дали одаат заедно политиката и бизнисот? Што мислите?

Наскоро ќе подготвиме една анкета со цел да го анализираме оваа прашање и да го коментираме уште подлабоко.

post

Претприемач – Центарот на секој бизнис

Овој пост претставува еден мал дел од еден прирачник кој го подготвив пред една година, но го користам како продолжување на постот насловен како одговорност на еден претприемач. Таму можевте да прочитате дека причините за неуспех често се лоцираат кај надворешните фактори кои не може да се управуваат од страна на претприемачот толку лесно.

Во една таква ситуација кога се што е надвор од претприемачот и бизнисот кој го води е епицентарот на проблемот за тој претприемач, проблемот е нерешлив, притисокот е голем, а одлуките на претприемачот погрешни.

Погрешни одлуки претставуваат вовед во една многу лоша фаза од бизнисот која што доведува да се појави таа претприемничка ноќна мора. Мислам дека никој не го сака тоа.

Па како да не се навлезе во една ваква стапица? Одговорот на оваа прашање е едноставен, дизајнирајте го Вашиот бизнис. На претприемач опфатив еден напис за дизајнирање на бизнисот. Како дополнителен материјал поврзан со дизајнирање на бизнисот го препорачувам и постот за Дизајн на профитен модел на вашиот бизнис.

Погледнете го графикот подолу на кој се претставени некои од основните функции кои ќе треба во денешно време да ги изведува еден претприемач.

Претприемач центар на се околу бизнисот - нерасчленет

Претприемач центар на се околу бизнисот - нерасчленет

На прв поглед овој график изгледа доста едноставно. Ова значи дека претприемачот ќе треба:

  • Да има бизнис идеи.
  • Да изработи профитен модел
  • Да има бизнис план
  • Да има системи
  • Да се занимава со маркетинг
  • Да размислува постојано за супериорна вредност на бизнисот
  • Да навлезе и во онлајн маркетингот
  • Да ги користи социјалните мрежи за бизнис цели
  • Да се занимава со менаџмент
  • Да се занимава со продажба и продажни стратегии.

Ова се основните работи (не и единствени) за кои еден претприемач треба постојано да се грижи во еден модерен бизнис. Тука не станува збор за еден бирократски бизнис, туку бизнис кој треба и ќе опстои во подалечна иднина. Напоменав дека не се единствени затоа што секој бизнис ќе има различни дополнителни функции.

Дали на следната слика оваа изгледа премногу едноставно како на претходната.

Претприемач центар на се околу бизнисот - расчленет

Претприемач центар на се околу бизнисот - расчленет

Тоа е истиот тој график само расчленет со некои подфункции на секоја од главните функции на претприемачот. Треба да напоменам дека во расчленувањето не одев до крај, и само заради потребите на овој пост во некои од функциите (на пример само една од повеќе) одев со подетално расчленување.

Не се грижете поради фактот што не можете да ги прочитате од горниот график сите елементи бидејќи во графикот од овој прирачник ќе можете да ги видите одблизу, функција по функција кога ќе го направем достапен истиот на претприемач.

Целта со прикажување на овие графици во овој дел ми е да покажам дека од претприемачот зависат многу работи во кои можеме да бараме проблеми, да ги решаваме и да го подобруваме севкупниот бизнис.

Повторно, кој е најодговорниот за успешноста на бизнисот? Конкуренцијата? Потрошувачи? Или едноставно претприемачот кој е центарот на секој бизнис.

post

Книга: Генерирање на бизнис модел

Книга: Генерирање на бизнис модел

Книга: Генерирање на бизнис модел

Бизнис модел е нешто што јасно и недвосмислено ги дава внатрешните и надворешните врски на еден бизнис. Бизнис модел ви помага јасно и недвосмислено да знаете што вашиот бизнис прави и како тоа го прави. Бизнис модел ги поврзува вашите снабдувачи преку вашиот бизнис со вашите купувачи. Бизнис модел е… најважното нешто за еден бизнис.

Доколку сте редовен читател на претприемач сигурно сте забележале дека сум голем подржувач на бизнис модел како еден елемент кој во многу „лични“ ситуации може да го замени и бизнис планот. Лични го ставив во наводници бидејќи сеуште кај нас преку бизнис модел не можете да комуницирате со инвеститори, банки и други институции кои обезбедуваат средства за малите бизниси.

Во овој пост сакам да претставам една книга насловена како Business Model Generation од Alexander Osterwalder и Yves Pigneur. Книга која можеби ќе го смени начинот на пишување на бизнис книги. Книга која можеби ќе го смени, ако веќе и не го менува начинот на моделирање на бизниси.

Од внатрешноста на книгата…

Книгата е навистина неконвенционална особенопоради тоа што не е напишана онака како што сме научиле да се пишуваат книгите кои обработуваат бизнис проблематика. Составена е од 5 дела:

  • Платна на бизнис моделот. Ова се алатки за дизајнирање, анализирање и опишување на еден бизнис модел. Овој начин на прикажување на бизнис моделот ги опаќа четирите главни подрачја на еден бизнис: потрошувачи, понуда, инфраструктура и финансиска одржливост на бизнисот.
  • „Модели“ на бизнис модели. Во овој дел од книгата авторите презентираат 5 модели од бизнис литературата. Сите модели се опишани преку јазикот на платната од првиот дел на книгата.
  • Дизајн. Овој дел од книгата опфаќа техники кои може да помогнат во дизајнирање на бизнис модели. Објаснети се 6 техники како увид во потрошувачи, идеи, визуелно размислување, прототип, приказни и сценарио.
  • Стратегија. Овој дел од книгата се однесува на реинтерпретација на стратегијата преку призмата на еден бизнис модел. Целта на овој дел е да обезбеди соодветни прашања за стратешка оценка на опкружувањето во кое егзистира постоечки бизнис модел.
  • Процес. Петиот дел од книгата дава еден процес во кој ќе се измиксаат сите претходни елементи за да се дизајнира еден сосема нов и иновативен бизнис модел.

За кого е оваа книга?

Првата корист од оваа книга ја забележувам за врвните менаџерите кои управуваат бизниси и кои се соочуваат секојдневно со ре-размислување за тековниот бизнис модел. Оваа книга ќе им помогне да го погледнат бизнис моделот на компанијата која ја управуваат со еден сосема поедноставен, но комплетен приказ. Оваа книга ќе им даде алатки, техники и процеси за редизајнирање на постоечкиот бизнис модел.

Освен менаџерите, тука се и претприемачите кои се карактеризираат со препознавање на пазарна можност и започнување на нов бизнис или пак развој на нивниот постоечки бизнис. Оваа книга ќе им даде алатки со кои ќе можат да си ги средат сопствените идеи и да ги проверат истите преку дизајн на еден бизнис модел.

И на крај како трета група на луѓе кои би можеле да „профитираат“ од оваа книга се сите бизнис консултанти, кои ќе можат целосно да го променат нивниот концепт на „помагање“ на бизнисите, тргнувајќи од центарот на проблемот па се до најситниот детал за подобрување на еден бизнис.

post

Писмо на CEO на Nokia Stephen Elop до вработените

Nokia - Connecting People

Nokia - Connecting People

Пред некој ден CEO на Nokia, Stephen Elop до вработените испрати писмо кое се толкува како искрена оценка за позициите во која се наоѓа компанијата. Ова писмо во целост го објави Engadget.

Како еден од корисници на производите на оваа компанија до пред една година (користев само Nokia повеќе од 10 години при што ги купував сите најнови телефони кои ќе ги лансираа) се најдов и самиот себеси во приказната. Она што ме заинтересира е не толку проблемите со кои се сочува Nokia туку повеќе еден глас на еден врвен менаџер со кој се обраќа до компанијата и секако причините зошто една толкава искреност од страна на еден врвен менаџер кон сопствените вработени.

Тука ќе презентирам само неколку извaдоци од писмото и ќе ги оставам на англиски јазик заради тоа да не се изгуби автентичноста со некој мој обид за превод. Да погледнеме во некои делови од писмото, кое инаку вреди да се прочита целото.

While competitors poured flames on our market share, what happened at Nokia? We fell behind, we missed big trends, and we lost time. At that time, we thought we were making the right decisions; but, with the benefit of hindsight, we now find ourselves years behind.

The first iPhone shipped in 2007, and we still don’t have a product that is close to their experience. Android came on the scene just over 2 years ago, and this week they took our leadership position in smartphone volumes. Unbelievable.

We have some brilliant sources of innovation inside Nokia, but we are not bringing it to market fast enough. We thought MeeGo would be a platform for winning high-end smartphones. However, at this rate, by the end of 2011, we might have only one MeeGo product in the market.

The battle of devices has now become a war of ecosystems, where ecosystems include not only the hardware and software of the device, but developers, applications, ecommerce, advertising, search, social applications, location-based services, unified communications and many other things. Our competitors aren’t taking our market share with devices; they are taking our market share with an entire ecosystem. This means we’re going to have to decide how we either build, catalyse or join an ecosystem.

This is one of the decisions we need to make. In the meantime, we’ve lost market share, we’ve lost mind share and we’ve lost time.

Nokia, our platform is burning.

Забележувате дека Stephen Elop се обидува да даде една јасна слика за тоа каде се наоѓа компанијата која тој ја води, како и за тоа каде се наоѓа клучната конкуренција. Во писмото се забележуваат и елементи на промена на вредноста која потрошувачите ја бараат од еден производител на мобилни телефони и дека тие се само еден дел од еден посеопфатен екосистем.

Но, она што може да се заклучи е следново:

  • Ќе има крупни промени кај Nokia. Веќе кружат гласини за партнерство помеѓу Microsoft и Nokia. Ова партнерство доколку би се остварило ќе бара крупни промени кај Nokia. Овие промени ќе го опфатат севкупниот бизнис модел на компанијата.
  • Без вработените сите промени кои врвниот менаџмент ќе ги зацрта нема да можат да се остварат за што е свесен и менаџментот на компанијата. Од друга страна свесни се и за тоа дека компанијата сеуште има одредени предности во други сегменти на пазарот што може да го зголеми нивото на отпорот кон промени од страна на вработените. Затоа е логична една ваква реакција.
  • Ова писмо најверојатно претставува одмрзнување на status quo ситуација, оној прв циклус од Levin-Schein-ов модел на организациски промени. Ова е и она што John P. Kotter во неговите книги за промени го нарекува подигање на чувство на ургентност што треба да ги поттикне сите вработени да разговараат дека нешто треба да превземат за проблемите со кои се соочува компанијата.

Ажурирање (11.02.2011)

Сите гласини за партнерство помеѓу Microsoft и Nokia се потврдија денес со објавување на блогот на Nokia.

    post

    Книга: Поумно, побрзо, поефтино – Не здодевни, бесплатни стратегии за маркетинг и промоција на твојот бизнис

    Книга: Smarter, Faster, Cheaper

    Книга: Smarter, Faster, Cheaper

    Маркетингот е променет и сеуште се менува во однос на начинот на пристап до потенцијалните потрошувачи.

    Поумни, побрзи, поефтини наспроти поглупави, поспори и поскапи стратегии за маркетинг и промоција на бизнисот навистина претставува предизвикувачки за читање.

    Како дојдов до оваа книга?

    На Twitter објавив дека започнувам да ја читам книгата Нови правила во маркетингот од David Meerman Scott. Набргу потоа добив директна порака на истата платформа (Twitter) од David Siteman Garland (@TheRiseToTheTop) во која ми вели дека книгата која ја читам е одлична, а можам и да го погледнам интервјуто на неговиот сајт со авторот на книгата која ја читав. Веднаш кликнав на линкот, го погледнав видеото во кое имаше доста корисни совети и му се заблагодарив на David. Додека бев на неговиот сајт забележав дека набргу ќе излезе неговата книга насловена како насловот на овој пост.

    По неколку недели додека преку мобилен телефон разгледував кои нови книги се излезени на Amazon налетав и на овој наслов. Не можев да одолеам бидејќи веќе на некој начин бев запознат со содржината и со авторот, па затоа со неколку кликови Kindle верзијата веќе беше во мојот телефон спремна за читање.

    Како некој од Македонија (Јас) станав купувач и посетител на сајтот The Rise to The Top на David Siteman Garland. Едноставно преку една Twitter директна порака која не продаваше ништо, туку само понудуваше една дополнителна вредност за мене.

    Што доколку пораката гласеше: Драган купи ја мојата книга и линк до Amazon.

    Сигурно дека не би ја купил ниту би ја погледнал, затоа што добивам стотици такви пораки дневно, што преку социјални медиуми, што преку email пораки…

    Ова е само една од стратегиите за кои се зборува во книгата. Стратегија, која очигледно преку мојот пример дава резултати.

    Што претставува книгата?

    Книгата веќе ја ствив во категорија во една од повредните книги во мојата лична колекција од 400 книги. Не затоа што е нешто спектакуларно прикажано, туку затоа што дава вредност, преку примери, лично искуство и искуство на огромен број на експерти и претприемачи кои David ги интервјуирал.

    Книгата обработува тема која е многу актуелна последниве години – градење на препознатлив бренд преку интернет. Од градење на основа на бизнисот на интернет, преку билдање на содржина, споделување на содржина, „промоција на производ“ (во наводници бидејќи не се однесува на онаа традиционалната промоција туку промоција на новото време), комбинација на онлајн со офлајн маркетинг активности… авторот преку практични примери и совети не води низ процесот на градење на присутноста на бизнисот на интернет.

    Неколку извадоци од книгата

    Имам подвлечено (мислам електронски Highlight) многу елементи тука ќе споделам неколку:

    • Денес се потребни многу помалку пари, но повеќе пасија, повеќе личност, повеќе креативност и можност да се постане доверлив извор и лице во од, спротивно од шематскиот буткач на производот.
    • Поглупаво, поспоро, поскапо  претставува начин кој секогаш не учеле: Вие го маркетирате производот.
    • Спротивно на буткање на производот, овој метод се базира на тоа да станете доверлив извор, авторитет, некој кој другите го сакаат и веруваат.
    • Интернетот ви овозможува да зборувате со повеќе луѓе одеднаш и сеуште да постои чувство на интимност.
    • Потребни се три карактеристики за поумен, побрз и поефтин маркетинг: пасија, личност и знаење.

    За кого е оваа книга?

    Секоја книга е за секого кој сака да научи нешто ново, кој сака да навлезе во светот кој го обмислува авторот, кој сака да напредува духовно…

    Но, не е секој за се. Сепак, првенствено оваа книга би ја препорачал на сите претприемачи на мали бизнис. Тоа се луѓето кои треба да започнат да ги применуваат новите стратегии и секако да престанат да ги трошат парите на активности кои се послабо даваат резултати.

    Бидејќи се однесува на маркетинг, оваа книга е одлична и за сите оние кои се занимаваат со маркетинг.

    И секако, книгата е добредојдена за сите менаџери кои на некаков начин се вклучени во донесување на одлуки за маркетингот.

    post

    4 Алатки за стратешка анализа

    Алатки за стратешки анализа

    Алатки за стратешки анализа

    Секој претприемач мора да размислува стратешки и постојано да спроведува стратешки анализи. Доколку сакате да преживеете и Вашиот бизнис да бележи постојан раст ќе мора да знаете каде се наоѓате, што се случува околу Вашиот бизнис и каков е потенцијалот на Вашите ресурси (финансии, знаење, вештини, информации…) во однос на иднината која следува за Вашиот бизнис.

    Постојат огромен број на алатки за стратешки анализи кои што можете да ги користите за да ја дознаете сегашната состојба во која се наоѓа Вашиот бизнис и да ја предвидите иднината како и Вашите перформанси за иднината. Со помош на тие алатки ќе можете да донесувате поквалитетни стратешки одлуки.

    Најкористените основни алатки за стратешка анализа се:

    1. Porter-ов модел на 5 сили
    2. PEST анализи
    3. SWOT анализа
    4. BCG матрица

    Porter-ов модел на 5 сили

    Овој модел е развиен од страна на Michael Porter на Harvard Busienss School во 1979 година. Michael Porter идентификува 5 сили кои влијаат на бизнисот во неговата конкурентна околина:

    Porter-ов модел на 5 сили

    Porter-ов модел на 5 сили

    1. Преговарачка моќ на снабдувачите. Вашите снабдувачи може да имаат голема моќ која може негативно да влијае на вашиот бизнис. Тие може да одбијат а работат со Вас, да ви наплаќаат поголеми цени, да не ви доставуваат редовно, да доцнат при испорака… Сето ова може негативно да влијае врз Вашиот бизнис. Мора да се обидете да ги намалите колку што можете повеќе тие влијанија.
    2. Преговарачка моќ на потрошувачите. Ова се однесува на способноста на потрошувачите да извршат притисок врз Вашиот бизнис за да ги промените цените на производите и/или услугите. Многу е значајно да ја најдете позицијата на Вашата моќ при преговарање со потрошувачите. Со поголема цена остварувате и поголем профит. Вашата задача како претприемач е да ја подобрувате оваа ваша позиција.
    3. Закана од нови фаци на пазарот. Секогаш влезот на нови конкуренти ќе влијае на одреден начин на профитабилноста. Мора да размислите какви се бариерите за влез на нови конкуренти на пазарот. Доколку нема бариери вашиот пазар е висококонкурентен и таа конкурентност се зголемува постојано, така да Вие морате постојано да сте внимателни на се што се случува на истиот.
    4. Закана од субститутни производи. Ова се производи кои служат како замена на Вашите производи. Овие производи може да влијаат потрошувачите да не ги користат вашите бидејќи постои алтернатива која е доста поефтина од вашите производи. И овие бизниси кои нудат субститутни производи мора да се разгледуваат како Ваши конкуренти.
    5. Конкурентен ривалитет во индустријата. Каков е конкурентскиот ривалитет во една индустрија е многу важно прашање. Некои индустрии конкурираат само на квалитетот, некои само на цената, некои само во иновацијата, маркетингот или пак некои комбинации… Во секој момент мора да знаете како се одвива конкурентноста во Вашата индустрија и Вашиот пазар.

    Откако ќе ги разгледате и наведете сите овие карактеристики по заглавија, секако дека ќе имате поголемо познавање за Вашата индустрија и Вашиот пазар во кој работите.

    PEST анализи

    PEST Анализи

    PEST Анализи

    PEST анализата претставува акроним од зборовите Political-Политички, Economical – Економски, Social – Социјални и Technological – Технолошки влијанија врз бизнисот. Ова се подрачјата на околината на Вашиот бизнис. Секое од овие подрачја има одредено влијание. Надворешните извори на организациски промени доаѓаат од оваа подрачје. Целта на оваа анализа е да се анализираат сите влијанија од овие подрачја за да можете до направите соодветна стратегија за вашиот одговор на тие влијаниа.

    Класичен начин на изведување на оваа анализа е да ги внесувате влијателните фактори во табела со заглавја на подрачјата од околината.

    SWOT анализа

    Акронимот SWOT е добиен врз основа на зборовите Strengths-Јачини, Weaknesses-Слабости, Opportunities-Можности и Threats-Закани. Со оваа анализа ги разгледувате вашите јачини и слабости кои можат да бидат финансии, вештини, моќта на брендот кој го поседувате, способност за брзи промени, ресурсите… Сето ова се внатрешни елементи на бизнисот. Секој од овие елементи се рангира согласно јачината или слабоста. Вашата задача е да ги зајакнете јаките страни на Вашиот бизнис и да ги елиминирате слабите.

    SWOT Анализа

    SWOT Анализа

    Преку идентификација на можностите и заканите ќе можете да ги видите насоките за бизнисот. Ова може да биде користење на нова технологија, движењата на пазарот, законски регулативи кои се подготвуваат, влез на нови конкуренти… Значи ова се надворешните елементи на Вашиот бизнис.

    Начин на претставување на SWOT анализата може да биде во вид на листа со посебни колони и посебни наслови за елементите од SWOT анализата или пак во вид на матрица.

    BCG матрица

    BCG Матрица

    BCG Матрица

    BCG матрица (BCG анализа, портфолио модел, Boston Consulting Group Analysis…) претставува дијаграм кој бил креиран од страна на Bruce Henderson за Boston Consulting Group во 1970 година за да им помогне на корпорациите да ги анализираат сопствените бизнис единици и линии на производи. Оваа матрица ги дели производите врз база на можностите за прибирање на парични средства, која се базира врз учество на производот на одреден пазар како и врз растот на пазарот.

    Секој сегмент има свое звучно име.

    • Сегмент 1 – крава за молзење (се наоѓаат на пазарот кој има низок раст, но учеството на производот на тој пазар е големо)
    • Сегмент 2 – кучиња (има мал дел од пазарот, а растот на пазарот е низок)
    • Сегмент 3 – звезда (има голем удел на пазарот и проследен со висок раст на пазар)
    • Сегмент 4 – прашалник (високо растечки пазар додека бизнисот поседува мало учество на пазарот)

    Ова се основните анализи кои можете да ги користите за да дознаете каде се наоѓате, кај сакате да одите и како да стигнете таму. Не мора да сте експерт – аналитичар, доволно е само да размислите и да ги забележите овие насоки кои се наведени во овие модели идеите сами ќе ви дојдат за тоа што понатаму. Размислувајте стратешки, само така ќе бидете успешен и секогаш пред вашите конкуренти.

    post

    Одговорност на еден претприемач

    Одговорност на претприемачот

    Одговорност на претприемачот

    Одговорност! Збор кој се одбегнува од многу луѓе. Многу значаен и тежок збор кој сепак се избегнува.

    Што се случува со претприемачот?

    Од лично искуство сметам дека 80% и повеќе од претприемачите сакаат да избегнат директна одговорност за сопствениот бизнис. Нели, полесно е друг да биде виновен за нашите сопствени неуспеси. Како и да таквите претприемачи имаат и водат само еден просечен бизнис.

    Остатокот, помеѓу 10% и 20% од претприемачите кои се навистина одговорни, во исто време имаат и менаџираат многу успешни бизниси.

    Нешто што ја прави разликата помеѓу просечен и успешен бизнис е одговорноста на еден претприемач.

    Што мислите за следниве изјави:

    • Потрошувачите не сакаат да ги купуваат моите производи и/или услуги.
    • Моите вработени не се толку добри за мојата компанија.
    • Конкуренцијата на пазарот е многу моќна.
    • Моите партнери не се толку добри за мојата компанија.

    Дали некогаш сте кажале нешто вакво?

    Доколку одговорот е да, тогаш вие сте еден од претприемачите кој сака да ја избегне личната одговорност бидејќи сакате да ја трансферирате истата на останатите стејкхолдери во твојата компанија.

    Доколку вашиот одговор е не, тогаш веројатно вие сте одговорен претприемач кој има доста успешен бизнис.

    Доколку сакате да изградите успешен бизнис, ќе мора да бидете целосно одговорни за тоа. Секој бизнис проблем е ваша одговорност.

    Не можете да кажете дека потрошувачите не сакаат да го купат вашиот производ и/или услуга бидејќи тие се „лоши“ момци. Што е со истражувањето на пазаро кое го направивте? Како тоа истражување ви кажа дека потрошувачите ќе ги купуваат вашите производи и/или услуги? Кој е виновен сега? Вие или вашите потрошувачи кои не сакаат да го купат вашиот производ и/или услуга?

    Не можете да кажете дека вработените не се добри и затоа страда и вашиот бизнис. Кој ги најмил тие вработени или кој одлучил за нивно вработување? Па бизнисот не е јавна институција па политичките партии да си ја префрлаат одговорноста заради сопствената неспособност. Вие како претприемач сте одговорен за наоѓање на најдобрите вработени за вашиот бизнис. Вие како претприемач сте одговорен за градење на вашиот бизнис тим.

    Не можете да кажете дека конкуренцијата е виновна за вашите неуспеси. Конкуренцијата едноставно го сака истото што и вие. Тоа е поголемо учество на пазарот и поголема продажба и профитабилност. Зошто тие успеваат а вие не? Вашиот бизнис успех не е нивна одговорност. Вашиот бизнис успех е само ваша одговорност.

    post

    Како да успеете со се што ќе започнете?

    Успех во се што ќе се започне

    Успех во се што ќе се започне

    Успехот во наједноставни зборови претставува остварување на целите поставени пред некоја акција која ја превземате. Секој сака да биде успешен. Како и да е, животот понекогаш е непредвидлив. Во она во што сакаме да успееме често не успеваме.

    Колку пати сте донеле некоја погрешна одлука? Колку пати сте превзеле погрешни чекори?

    Во овој пост ќе презентирам 6 едноставни чекори кои ќе ве водат да успеете во се што вие како претприемач ќе започнете.

    1. Јасно дефинирај го успехот за тебе

    Што значи успех за тебе? Што претставува успех за тебе? Доколку тоа е повеќе продажба, напиши колкава продажба сакаш да генерира твојот бизнис. Доколку е тоа повеќе лично време, напиши колкаво слободно време сакаш за себеси. Доколку е пак некоја комбинација од нешто, напиши што е тоа.

    Доколку точно знаеш што претставува успехот за тебе пред да ги започнеш активностите кои водат кон тој успех, ќе имаш многу појасен пат кој ќе те води тој успех.

    2. Дефинирај ги мерките на успехот

    Како знаете дека сте успеале во нешто доколку не ги знаете мерките кои ќе ви кажат за вашиот прогрес?

    Дефинирај јасни мерки кои ќе претставуваат успех за тебе.

    3. Дефинирај го патот кон успехот

    Како ќе стигнеш до успехот доколку не го знаеш патот кој води до тој успех?

    Мора да го напишете секој чекор кој води до изведување на постигнувањата. За секој чекор, мора да делегирате одговорност и воспоставите временска рамка за реализација. На таков начин ќе имате јасна мапа кој ќе го води вашиот бизнис кон успехот.

    4. Мери го прогресот

    Четвртиот чекор на патот кон успехот е мерење на прогресот. Имате мерки дефинирани во чекор 2, а сега ќе можете да направите споредба со вашите вистински постигнувања.

    5. Сврти се назад за можни подобрувања

    Постојано ќе морате да се сврите зад вас, за да видите што може да се подобри. Се што е перфектно, размисли како тоа нешто може да биде подобрено. Се што не е добро, размисли како да го промениш за да стане перфектно. Ова е процес на континуирано подобрување.

    6. Секогаш прославувај го успехот

    Најверојатно успехот нема да е резултат само заради вас. Сигурно имате и други членови на вашиот бизнис тим. За да ги направите помотивирани за испонување на нивните активности кои ќе водат до успехот на секој проект, секогаш прославете го тој успех.

    Ова е еден едноставен чекор во процесот, но често пати забораван.