post

Како да се однесувате кога сте стартап

Навистина, како да се однесувате кога сте стартап? Сметам дека прашањето е на место и доколку навистина сакате да запливате во немирните води на стартапи, овие совети ќе ви бидат од корист.

стартап

Во изминатите пет години работев со многу стартапи, идеи, потенцијални претприемачи и потоа некои од нив вистински претприемачи. Советите кои ги давам се многу напредни, едноставно нешто што подготвува не само за денес, не само за утре, туку за следните пет до десет години. Но сепак, секоја нова работа особено со стартапи води до нови сознанија кои воопшто не сум ги ни замислил, ниту сум можел да ги замислам како такви.

Во една таква ситуација, едноставно неминовно беше да се навратам на многу суштински теории во последните стотина години развиени за производство, бидејќи некако работата на еден стартап во голем дел е иста, односно слична или поточно постои голема аналогија со работата на едно производствено претпријатие.

Разликата е само во излезот, односно производот кај производствениот процес и купувачот кај стартап процес.

Тргнувајќи од основните принципи на Фредрик Тејлор, лин размислување, теорија на препреки, KAIZEN и многу други секаде основниот принцип е фокус, фокус на ефикасно и ефективно производство на онаа што се произведува, а во случај на еден стартап тоа е купувачот.

Многу грешки се забележителни токму во овој фокус кај повеќето стартапи, а најголемата е фокусот на развој на производот. Можеби и логично бидејќи и развојот на производот претставува производство на нешто што во иднина ќе се произведува и продава доколку стартапот стане компанија, сепак таа логика води до катастрофални последици.

Фокусот мора и треба да биде на купувачот. Тоа е факт кој мора да го знаете.

Затоа, сметам дека следниве совети барем малку ќе ви помогнат во тоа како правилно да се однесувате како стартап, особено кога веќе сте свесни каде треба да биде фокусот.

  1. Барајте искреност од секого, дури и да е болна искреноста. Самозалажување дека се е во ред и игнорирање на негативните информации за вашиот стартап и вашиот производ или услуга за кој сакате да креирате купувачи во оваа фаза претставува единствениот пат кој ве води во катастрофа. Прифатете ја искреноста, дури и ако е болна, затоа што само така ќе знаете но и ќе ги преземате вистинските чекори.
  2. Не сфаќајте ништо лично, добивате критики за идеја, за производ, за стартап а не за вас како личност. Знам дека е реалноста може да боли, но сепак тука не е ништо лично. Влегувате во светот на стартапи и така треба да се однесувате, да бидете спремни на критика но и да дејствувате врз основа на сознанијата од таа критика. Никој нема ништо против вас, туку може да има против вашата идеја, вашиот производ или пак вашиот стартап воопшто.
  3. Подобро е пречките уште сега да ги надминете наместо по неколку месеци или години. Пречки секогаш ќе постојат и тие не се карактеристични само за оваа фаза од развојот на вашата компанија. Но, игнорирање на истите без соодветно надминување ќе претставува пат кој со 100% сигурност ќе ве води кон катастрофа.
  4. Вие истражувате и сеуште не сте бизнис туку само „стартап”. Стартап процес значи едноставно експериментирање, истражување на тоа што сакате да го правите, на менување на основните премиси врз основа на резултатите од истражувањето и експериментирањето… Затоа не се врзувајте цврсто на онаа што мислите дека е правилно или вистинско, резултатите се тие кои треба да ви го дадат вистинскиот одговор.
  5. Претприемачко знаење е повеќе од техничко знаење за решавање на проблемот. И повторно знам дека техничкото знаење ви е најголемото знаење и нормално е да го користите како суштинска компетенција. Но, запомнете дека тоа не е доволно за да успешно ја поминете стартап фазата. Вам ви треба и претприемачко знаење.
About Д-р Драган Шутевски

Д-р Драган Шутевски е основач и CEO на Шутевски Консалтинг и им помага на бизнисите да го проектираат патот кон успешноста. Поврзи се со Драган на Google+

Speak Your Mind

*