post

Креативна деструкција и креативна имитација

Овој пост е реобјавување на претходниот пост на артиклите на претприемач и претставува еден вовед во еден серијал на постови за меѓународно претприемништво на претприемач (резултат на повеќегодишна научно-истражувачка работа), кои ќе претставуваат еден сосема нов поглед на реалноста и светот во кој живееме денес.

Креативна деструкција и имитација

Креативна деструкција и имитација

Во претприемничката пракса се користат повеќе стратегии. Повеќето стратегии се водат од ситуацискиот пристап и од начинот на практицирање на претприемништвото на претприемачот. Да видиме две слични но во суштина различни стратегии кои може да се користат од претприемачите.

Зборот претприемач entrepreneur потекнува од францускиот збор entreprendre, што значи да се направи (преземе) нешто.

Во прво време овој збор асоцирал на негативни луѓе и на нивните матни активности.

Претприемништвото како поим е познат уште во XII век и до XVII век се однесува на државен службеник кој се ангажира за изградба на патишта, мостови, воени објекти и др.

Во науката зборот претприемништво се спомнува за прв пат во XVIII век, во делото на економистот Richard Cantillon “Природата на трговијата”. Тој смета дека претприемачот превзема ризик купувајки стока по позната цена, а продавaјки ја по непознатата.

Еден од позначајни автори на претприемаштвото е и Joseph Alois Schumpeter кој смета дека претприемачот е динамична сила која го нарушува економското “status quo” со своето иноваторско однесување. Тој сметал дека претприемачот не мора да биде независен бизнисмен. За ризикот вели дека го сноси сопственикот, а не претприемачот. Прави разлика помеѓу претприемачот и менаџерот и смета дека “креативната деструкција” е основна задача на претприемачот.

Тука во суштина имаме контрадикторен термин. Се работи за два спротивставени термини со кои се опишуваат задачите на претприемачот. Од една страна имеме креативност (создавање), а од друга страна имаме деструкција (разорување). Па тука се поставува прашањето како да се спојат овие термини, бидејки она што е креативно не би требало да бидне и деструктивно?

Кога ќе отпочне со формирање на фирма претприемач почнува да креира. Значи тој креира нова фирма, нови работни места, нов начин на работење, ствара нови вредности, услуги, профит… Меѓутоа во работењето можаат да настанат потешкотии од различни причини и бизнисот да не успее. Можеби е изберена лоша локација, лош производ, нема доволно финансиски средства, лош маркетинг, лош менаџмент…

Тогаш претприемачот мора да дејствува деструктивно. Да го затвори тој бизнис, да ги согледа слабостите и да превземе чекори за да отпочне друг бизнис. Во секое опкружување може да се види дека еден ист претприемач отворил едно по друго повеќе различни бизниси се додека не се стабилизира по прашање на финансиите и профитот, и се додека бизнисот не профункционира на пазарна основа.

Овој термин креативна деструкција не се врзува само за работењето на еден претприемач. Туку се надоврзува и за работење на сите претприемачи, бидејки претприемништвото овозможува создавање на поквалитетни услови на живеење во едно општеството, создава нови работни места, создава нови услуги, создава подобра конкурентност во светските рамки на едно стопанство.

Значи доколку еден претприемач отворил еден малопродажен објект, и поради личните недостатоци тој бизнис не успее, друг претприемач кој ги согледал слабостите на првиот претприемач, и може на истата локација да отвори ист или сличен бизнис при што би ги отстранил недостатоците кои ги имал во работењето првиот претприемач. И тој бизнис успешно би продолжил со работата. Така да на првата стратегија ,,креативна деструкција,, се надоврзува стратегијата ,,креативна имитација,, која е промовирана од страна Peter Drucker. Креативни имитатори создаваат нешто ново, имитирајќи ги другите претприемачи во исправни одлуки, а менувајки ги грешките кои ги направиле претходните претприемачи и така за себе создаваат профитабилен бизнис.

Претприемачот носи одлуки. Тоа е една од карактеристиките на претприемачите. И креативна деструкција и креативна имитација претставуваа одлуки или стратегии. Согледајте ги Вашите тековни состојби, на Вашите конкуренти и изберете вистинкса стратегија. Ова е циклус кој не престанува. Токму заради тоа претприемништвото е двигател на развојот.

post

iPad и неколку корисни канцелариски (Office) апликации

iPad Office Апликации

iPad Office Апликации

Ќе продолжиме со серијалт најавени постови за iPad и апликации кои можете да ги користите како еден претприемач во целите на твојот бизнис. Претходно стана збор за апликации за продуктивност и во овој пост ќе опфатам неколку апликации за канцелариска работа (Office апликации).

Повторно би најавил дека за сите овие апликации во фаза е изработка на видео презентација со што полесно би ги увиделе можностите на истите.

Па, да започнеме со овие апликации:

  • Pages е првата апликација која ќе ја споменам во оваа категорија на апликации. Тоа е апликација на Apple која го менува MS Word, што значи дека претставува комплетно решение на апликација за обработка на текстуални документи во комбинација со слики, табели или се она што вообичаено го правите се MS Word. Функционалноста и дизајнот претставуваат вистинско волшебство што не изненадува кога станува збор за Apple. Изработените докуманти може да се експортираат во PDF, DOC и PAGES. Експортираните документи може да се пратат преку email, iWork, iTunes, iDisk и WebDAV. Апликацијата чини 9,99$.

Pages за iPad

Pages за iPad

  • Keynote е уште една апликација од семејството на Office апликација на Apple која претставува одговор на MS Power Point, што значи за изработка на презентации. Првично бев скептик за оваа апликација за тоа дали ќе ми вреди и дали ќе има примена во мојата секојдневна работа. Но, откако започнав да ја користам за некои презентации кои ги изработував во изминатиов период успеав овеќекратно да ја зголемам мојата продуктивност и секако креативност. Сепак изработка на презентација претставува и креативна работа. Се чувствувам како секогаш да имам покрај мене апликација за презентација и без разлика каде и да сум едноставно секоја идеја можам да ја претворам во интересна презентација. Изработените презентации може да се експортираат во PDF, PPT и KEYNOTE. Експортираните документи може да се пратат преку email, iWork, iTunes, iDisk и WebDAV. Апликацијата чини 9,99$.

Keynotes за iPad

Keynotes за iPad

  • Numbersе уште една апликација од семејството на Office апликација на Apple која претставува одговор на MS Excel, што значи за изработка и работа со табели. Оваа е последнта апликација за која се одлучив за да ја користам. Она што најмногу ми се допадна е лесна изработка на форми и користење на истите како една мини база на податоци во разни ситуации во кои можете да се најдете. Ги има поголемиот дел од функциите кои се во MS Excel и лесно се користат (она од што најмногу стравував).  Изработените табели може да се експортираат во PDF, XLS и NUMBERS. Експортираните документи може да се пратат преку email, iWork, iTunes, iDisk и WebDAV. Апликацијата чини 9,99$.

    Numbers за iPad

    Numbers за iPad

  • PDF Reader PRO е навистина корисна апликација кога станува збор за iPad и читање и обрботка на iPad документи. Мојот печатач веќе не мора да принта на хартија секакви PDF документи бидејќи лесно преку оваа апликација може да се прочитаат истите. По пробување на неколку бесплтни пликации се одлучив за оваа и не се разочарав. Секој PDF документ може да се чита како книга и што е најважно може да се додаваат забелешки, да се подвлекува и да се допишува. Апликацијата чини 9,99$.

PDF Reader PRO за iPad

PDF Reader PRO за iPad

Продолжува со:

  • апликации за блогирање,
  • апликации за социјални медиуми,
  • апликации за книги,
  • апликации за манипулација со податоци и
  • апликации за читање.

 

post

Дали структурата е во тек со времето?

Организациска структура

Организациска структура

Кога станува збор за малите бизниси често пати структурата (се мисли на организациската) се заборава едноставно со изговор дека бизнисот е мал и нема, ниту пак има потреба од структура. Дури и со 3 вработени малиот бизнис има потреба од структура, особено поради фактот што секој бизнис е составен од функции. Бизнис без функции нема и нема ниту да постои бидејќи секогаш ќе имате продажба, подршка на купувачи, сметководство, производство на производ/услуга, маркетинг…).

Во однос на овие прашања разликата помеѓу големите и малите бизниси е во тоа што големите располагаат со повеќе човечки ресурси додека кај малите заради помали ресурси се јавува до преклопување на функциите. Така, кај малиот бизнис можете да сретнете исто лице одговорно за финансии, продажба и набавка.

Организациската структура не служи само за определувањена позиции помеѓу луѓето опфатени со неа, таа многу повеќе ефекти има врз комуникацијата, функционирањето и ефективноста на различните бизнис функции во самиот бизнис. Затоа е корисно вие како претприемач да ја имате скицата на вашата структура. Со една таква скица многу полесно ќе можете да ги увидите „тесните грла“ кои можат да се јават како препрека за развојот на вашиот бизнис.

Со текот на времето се менуваат и околностите во кои една таква организациска структура на вашиот бизнис опстојува. Бизнисот е жив организациски систем, кој е подлежен на постојани реструктуирања, било да се тие во форма на кратење на трошоци, зголемување на продуктивност, зголемување на ефикасност и ефективност… Секоја промена влијае на промена на структурата. Можеби малите промени немаат некакво драстично влијание, но повеќе такви мали промени со мал интензитет во еден подолг временски интервал и тоа како можат да влијаат на функционалноста на структурата на вашиот бизнис.

Согласно горенаведеното структурата треба да биде прилагодена. Затоа на одреден временски период:

  1. Направете листа на сите промени во изминатиов период кои сте ги направиле во вашиот бизнис. Какво влијание тие промени имаат врз секоја функција во бизнисот?
  2. На скицата на организациската структура наведете ги сите промени и нивното влијание како и можните промени на релации помеѓу функциите.
  3. На истата скица додадете ги имињата на луѓето одговорни за секоја од функциите. Доколку има преклопувања (што за мал бизнис не е невообичаено) наведете го истото.
  4. Подгответе можни прашања за дискусија со секое лице од секоја функција кои треба да ги расветлат нивните проблеми. Дали некој е пооптеретен во однос на другиот? Дали постојат одредени нефункционалности во комуникацискиот систем?
  5. Организирајте состанок со сите тие лица на кој ќе присуствувате вие како претприемач и секое лице. За секое лице одвојте по 30 минути посебен состанок на кој ќе дискутурате за можните прашања од претходниот чекор. Инсистирајте на предлози за решенија на проблемите од нивна страна, не од ваша. Доколку не можат веднаш, бидете трпеливи, дајте им време, но сепак ограничете ги за да може процесот да заврши побргу. Идеално е да им дозволите 2-3 дена за размислување и давање на предлози.
  6. Сублимирајте ги предлозите и додадете ваши предлози кои ќе бидат во согласност со визијата на бизнисот и свикајте ги сите на еден заеднички состанок на кој ќе се дискутираат сите предлози. Дискутирајте за нови предлози и барајте начин целиот тим да најде заедничко решение за доброто на бизнисот.
  7. Откако ќе ги соберете сите идеи и дискусии направете скица на нова организациска структура со одговорностите на секое лице како и врските помеѓу истите. Повикајте ги повторно на состанок и презентирајте ја новата предлог структура. На истиот состанок определете одговорни лица за имплементација на оваа структура.
  8. Следи и подобрувај. На крајот следи ја имплементацијата и секаде каде што ќе се јави потреба од некои измени, менувај. Тоа е еден циклус на постојано подобрување.
post

Книга: Poke the Box од Seth Godin

Poke the Box

Poke the Box

Уште првиот ден кога излезе ја купив оваа книга насловена како Poke the Box. Пред една недела ја прочитав и последната страна и еве не тука денес со еден краток преглед на претприемач за оваа книга.

Во книгата во делот за насловна страна стои следново:

Човекот во брзање е еден архетип, првпат откриен во хиероглифите на античките египќани. Тоа си ти, возбуден, оптимистички експериментатор кој разбира дека ризикот е погрешно разбран и тоа движење нанапред е клучот за успехот. Сликата е трговска марка на The Domino Project, но ја имате нашата согласност да ја користите некомерцијално, за да ги поттикнете колегите да одат напред.

Оваа кратка (околу 80-тина страници) книга е последната книга на Seth Godin преку која тој не поттикнува да започнеме со нешто, да превземеме акција, да паднеме и повторно да станеме, да не се откажуваме, да го промениме светот иако тој и околината цврсто се противат на таквите промени…

Основната цел на книгата е да ве поттикне да започнете нешто. Не треба да чекате некој околу вас да каже ајде, едноствно вие бидете тој кој ќе поттикнува нови идеи, нови работи, нови начини, нови…

Seth вели дека скоро никој не вели „Јас започнав нешто.“ Точно, искуствено сметам дека никој не започнува нешто кога се му е дефинирано со опис и попис на работното место. Иновација = 0!

Кога работев во царина секогаш се обидував да ги подобрам тековните работни процеси преку различни мали но корисни иновации кои секогаш на крај остануваше само јас да ги користам. 🙂 Страв од ново? Страв од незнаење? Или пак страв да се променат нештата. Дури, и на еден состанок кај директорот бев нападнат дека некој си игра и прави различни бази на податоци надвор од она што се нарекува официјална IT структура во еден организациски систем. Но, тоа не беа играчки, денес тие бази станаа нераздвоен дел на работа на едно цело одделение. Јас ги викав калкулатори кои една работа наместо 10 дена да се завршува ја скратија на еден ден. И тие беа резултат на потребата на работниот процес, резултат на тоа што моите барања преку официјалната структура не беа исполнети (сигурно завршуваа во канта кај оние кои ме нападнаа) и секако резултат на потребата на зголемување на ефикасноста и ефективноста на одделението. Да не започнев сеуште ќе се работеше рачно.

Токму тоа преку оваа книга ни го кажува Seth Godin. Се зависи од нас.  Ова не значи дека треба да барате стратегија на син океан (книга за која ќе пишувам во друга прилика и во која пазарот авторите го делат на син и црвен океан – син океан без конкуренција и црвен океан со конкуренција). Една од најголемите пречки е што секогаш бараме перфектност, нешто што ќе го промени светот, нешто уникатно…

На едно место ја дефинирав веројатноста на успешност како број на успешни обиди во број на вкупни обиди. На пример ако имаме еден обид и тој е неуспешен, веројатноста е 0 (0/1). Ако имаме 2 обиди и двата се неуспешни, веројатноста повторно е 0 (0/2). Имаме 5 обиди и еден е успешен, веројатноста на успехот е 0,2 (1/5). Но, што доколку сме застанале на оној првиот обид? Вројатноста ќе останеше 0.

Во секој случај книгата е ОК, поттикнувачка и навлегува во некои основи на човековото размислување, страв, предрасуди… Секој претприемач ќе ја смета како нешто од корист, како еден манифест кој служи за поттикнување и превземање на судбината во сопствените раце.

post

Бизнис ефикасност и ефективност

Многу често во бизнис речникот се користат зборовите ефикасност и ефективност. Понекогаш кога се вели ефикасност се мисли и на ефективност, но заради скратено изразување се употребува само ефикасноста. Ефикасност и ефективност се взаемно поврзани. Не е доволно да сте ефективен, а неефикасен или пак обратно, ефикасен, а неефективен. Ефикасноста и ефективноста претставуваат елементи кои во голем дел можат да ја зголемат потенцијалната енергија на Вашиот бизнис. Ефикасноста и ефективноста треба да биде основа како на личен план (претприемачот), така и на бизнисот како целина (системска ефикасност и ефективност).

Но, што претставува ефективност, а што ефикасност? Ова е главно прашање и доколку биде сватено лесно ќе започнете да се насочувате да бидете поефикасен и поефективен.

  • Ефективноста наједноставно кажано претставува да се прават правите работи. Значи ефективноста се однесува на изборот на активностите на бизнисот, активностите на претприемачот.
  • Ефикасноста наједноставно кажано претставува правите работи да се прават на прав начин. Ефикасноста се однесува на начинот на изведување на тие бизнис активности.

На сликата подолу е дадена матрица за ефективност и ефикасност која може да се користи како за вашиот бизнис така и за вашиот личен живот.

Матрица за бизнис ефективност и ефикасност

Матрица за бизнис ефективност и ефикасност

Матрицата е составена од 4 квадранти и тоа:

  • Ниска ефективност и ниска ефикасност. Ова значи дека погрешните работи ги правите на погрешен начин. Каква катастрофа. Губите време за погрешни активности и покрај тоа ги правите на погрешен начин. За стие овие активности на бизнисот мора да ги стопирате (СТОП знакот). На пример, сте избрале погрешни производи за продажба и не знаете како да ги продавате.
  • Висока ефектвност и ниска ефикасност. Ова значи дека сте се насочиле кон вистинските работи за Вашиот бизнис, на работи кои ја зголемуваат потенцијалната енергија на бизнисот, но не ги изведувате на вистинскиот начин, што значи дека сте неефикасен. Ова значи дека сте го избрале вистинскиот пат, но наместо со авион да го поминете вие сте тргнале пешки и бара огромно време за да стигнете таму. Сите овие акивности мора да ги анализирате и да го најдете вистинскиот начин за нивна реализација бидејќи тие ќе го зголемат потенцијалот на Вашиот бизнис. На пример, сте ги избрале вистинските производи кои ќе ги продавате, но не знаете како да ги продавате или ги продавате на погрешен начин.
  • Ниска ефективност и висока ефикасност. Ова значи дека сте се насочиле кон погрешни работи за Вашиот бизнис, а ги изведувате на вистинскиот начин. Дали е ова добро? Дали е возможно ова? Ова и не е добро и не е возможно. Џабе што ги изведувате овие активности на вистинскиот начин кога тие не ја зголемуваат потенцијалната енергија на Вашиот бизнис. Ваквиот начин на работа само ви го губи времето. Анализирајте ги Вашите активности и сите што спаѓаат во овој квадрант стопирајте ги без размислување. Тие воопшто не ви се потребни. На пример, сте избрале лоши производи, кои ги продавате на вистински начин. Вие ќе направите некоја продажба но купувачот веќе нема да се врати.
  • Висока ефективност со висока ефикасност. Ова е вистинската пореба за секој бизнис. Работите она што најмногу ја зголемува потенцијалната енергија на бизнисот и тоа што го работите го работите на вистинскиот начин. Сите овие активности даваат резултати кои на крај ќе се одразат на профитабилноста на Вашиот бизнис. Насочете се секогаш да го работите она што спаѓа во овој квадрант. На пример, сте избрале вистински производи за Вашиот бизнис и ги продавате на вистински начин. На ваков начин обезбедувате долгорочна успешност за Вашиот бизнис и за Вас како претприемач.

Бидете ефективен и ефикасен во исто време бидејќи ефективноста без ефикасноста и обратно не одат. Така постојано размислувајте за вашите и бизнис активностите во поглед на ефективноста и ефикасноста. И работете го онаа што е и ефективно и ефикасно, успехот ќе ви биде загарантиран.

post

4 Знаци дека потрошувачите мислат вие сте број еден

JV Партнерство како маркетинг средство

4 знаци дека потрошувачите мислат вие сте број еден

Постојат многу знаци кои мора да бидат следени од страна на претприемачите. Едни од нив се знаци кои ќе ти кажат дека твоите тековни потрошувачи се лојални на твојот бизнис, вашата компанија или вашиот бренд.

Понекогаш претприемачите се премногу концентрирани во донесување на нови потрошувачи воо бизниснот (во продажната инка). Нови потрошувачи се нешто што секој сопствени на бизнис го сака. Како и да е, без задржување на постоечки потрошувачи не може да се очекува раст на бизнисот иако ќе се внесуваат нови. Вашиот бизнис на ваков начин ќе остане на исто ниво и веројатно по извесен период ќе почне да страда поради недостаток на потрошувачи.

Да зборуваме малку за 4 можни знаци кои ќе ви кажат нешто за постоечките потрошувачи.

1. Доаѓаат и го повторуваат купувањето

Запрашајте се себеси со следниве прашања:

  • Колку од тековните потрошувачи не се враќаат и не го повторуваат купувањето?
  • Зошто не се враќаат и него повторуваат купувањето?

Одговорот на овие прашања ќе тиги даде можните места каде ќе можете да направите значајни подобрувања во вашиот бизнис.

На пример, доколку не се враќаат бидејќи квалитетот на производот не е во ред, подобрете го квалитетот. Доколку не се враќаат поради продавачот, сменете го или едуцирајте го продавачот.

Од друга страна доколку се враќаат и го повторуваат купувањето ќе знаете дека вашиот бизнис е на вистинскиот пат.

2. Го споделуваат нивното неверојатно искуство со вашиот бизнис

Втор знак кој ќе ви каже дека вашите потрошувачи се приврзани за вашиот бизнис е доколку тие го споделуваат нивното искуство со нивните блиски.

Мора да го следите нивното однесување по завршување на купопродажбата. Доколку се на социјалните медиуми, следете ги, и откријте што тие зборуваат за вас, вашиот бизнис или пак вашиот бренд.

Доколку не кажат ништо, веројатно нешто не е во ред, или пак не се импресионирани. Велам веројатно бидејќи не значи дека мора да биде нешто лошо. Како и да е, можете да се осигурате едноставно доколку ги прашате за нивното искуство со вашиот бизнис. Прашајте ги што сакаат, а што не сакаат. Помогнете им и тие ќе ви помогнат да го подобрите вашиот бизнис.

3. Ги донесуваат нивните блиски во вашата продажна локација

Овој знак не функционира за бизниси кои не се базирани на локација. Како и да е, доколку вашиот бизнис е ресторан, продавница на мало, сендвичара или пак нешто слично базирано на локација каде се остварува купувањето, овој знак ќе ти каже значајни работи за твоите потрошувачи.

4. Се чувствуваат како дома

Не сакам да купувам од продавници каде продавачот ме прави нервозен. Веројатно, никој не сака да купува некаде каде што не се чувствува пријатно.

Прашајте ги вашите купувачи за тоа како се чувствуваат кога се наоѓаат во вашиот бизнис. Прашајте ги што сакаат да биде имплементирано што ќе го подобри нивното искуство и чувства кога се наоѓаат во процесот на купување.

Одговорите ќе ви ги дадат можните елементи кои бараат подобрување.

 

post

iPad и неколку корисни апликации за продуктивност

iPad

iPad

Пред скоро месец дена дојдов до еден iPad за кој се мислев подолго време дали вреди инвестицијата и одлучив дека ќе вреди. Помина извесен период и сакам преку овој пост да споделам неколку информации за апликации кои сметам дека ќе бидат корисни за претприемачите.

Ова е прв пост од серијалот на постови за iPad во кој ќе опфатам неколку апликации за продуктивност. Следуваат постови за канцелариски (Office) апликации, блогирање, социјални медиуми, книги, податоци и читање.

Пред да започнам со апликациите би најавил и дека ќе се обидам во наредниот период секоја од овие апликации ги презентирам преку едно видео за практично користење на истите.

  • iThoughtsHD е корисна аплиакција за креирање на mindmap која освен за iPhone ја купив и верзијата за iPad. Секојдневно секоја идеја ја претворам во една таква мапа која што ми овозможува поголема организираност и секако продуктивност за реализација. Апликацијата е 9,99$.

iThoughts за iPad

iThoughts за iPad

Evernote за iPad

Evernote за iPad

  • Things е последната и сега засега конечната апликација која се однесува на организирање на работни активности за секој ден во една To-Do листа. Она што најмногу ми се допадна е што се можам да организирам во вид на проекти и да доделам рок на завршување на активностите кои го сочинуваат секој проект. Интегриран е и со некои други апликации кои едноставно го олеснуваат животот. Апликацијата е поскапа од некој просек околу 20$ но вреди во секој случај. Единствено нешто што не ми се допаѓа е што не синхронизира помеѓу iPhone и iPad. Но на сајтот на дизајнерите стои дека во наредната верзија е планирано да се имплементира оваа интеграција.

Things за iPad

Things за iPad

  • TextExpander е апликација што од летото 2010 година ја користам на iPhone и е нешто што навистина го олеснува животот. За првпат започнав да ја користам вистински кога за еден состанок кога требаше д фаќам белешки заради подготовка на извештај внесов повеќе кратенки за зборови кои во работата ги користевме. Па така наместо да го впишувам целиотзбор или реченица со внесување на три букви зборот или реченицата се внесуваа автоматски. Подоцна забележав дека и други апликации имаат интеграција со оваа особено Twitter клиентите. Апликацијата е 4,99$, но со едно купување е функционална и за iPad и за iPhone.

TextExpander за iPad

TextExpander за iPad

  • OmniGraffle е најскапата апликација која сум ја купил, но се покажа како доста добра инвестиција. Барем за син ми кој сака да си игра со оваа апликација. Првенствено ја зедов заради изработка на докторска дисертација особено во делот на дијаграми. Освен за дијаграми најдов корисност и за скицирање на некои идеи од кои може нешто да произлезе во иднина. Како да имате парче хартија пред вас и слободно можете да си шарката и кога ќе дојде време скицата да ја направите во попрофи форма. Апликацијата е 49,99$.

OmniGraffle за iPad

OmniGraffle за iPad

Продолжува со:

  • канцелариски апликации
  • апликации за блогирање,
  • апликации за социјални медиуми,
  • апликации за книги,
  • апликации за манипулација со податоци и
  • апликации за читање.
post

Анализа на влијание на политиката врз бизнисите

Бизнис и политика

Бизнис и политика

Во изминатиот период размислував за тема за истражување на претприемач. Дојдов до повеќе интересни идеи, но сепак ја избрав темта за политиката и бизнисот, особено заради актуелноста на политичката тема и има нема избори како и заради тоа што изминативе 20 години политиката стана неизбежен дел од бизнис животот на еден претприемач, сакал тој или не. Затоа и едно вакво истражување кое барем малку ќе ги расветли постоењето ан влијание како и формата на тоа влијание врз бизнисот.

Прашалникот е составен од два дела:

  • Општ дел на прашалникот
  • Политика и бизнисот.

Прашалникот е затворен, следува анализа на одговорите кои ќе бидат објавени на сајтот.

post

4 Лекции за претприемништво од кум

Лекции за претприемништво од Кум

Лекции за претприемништво од Кум

Еден од најдобрите филмови од минатиот век беше Кум во кој главниот карактер е Дон Корлеоне, шефот на криминално семејство. Филмот го имам гледано неколку пати но пред повеќе години. Пред неколку месеци, ги гледав сите три дела повторно со поголемо внимание.

Оваа трилогија ни дава неколку лекции од претприемништвото. Филмот илустрира повеќе вредни лекции за претприемачите, но тука ќе презентирам некои од нив, оние кои ми оставија најголем впечаток.

1. Понуда која не може да се одбие

Еден од најважните елементи на секој бизнис претставува понуда. Доколку понудата е нешто што не може да се одбие, бизнисот нема да страда од недостаток на потрошувачи, бидејќи секогаш ќе има доволно потрошувачи кои ќе сакаат повеќе од бизнисот.

Во книгата The Irresistible Offer – How to Sell Your Products or Services in Тhree Seconds and Less, Mark Joyner вели:

Има 86400 секунди во еден ден.Вие имате точно 3 секунди од нив да го фатите умот на твојот потенцијален потрошувач.

2. Сакај ги пријателите, но повеќе сакај ги твоите непријатели

Ова е едно важно правило кое треба да биде применето во бизнис светот. Мора да ги сакате вашите непријатели (конкуренти), бидејќи сакате да соберете повеќе знаење за нив. Мора да ги сакате вашите непријатели бидејќи сакате да ги направите попредвидливи за целите на процесот за донесување на одлуки. Мора да ги сакате вашите непријатели доколку сакате да бидете еден чекор пред нив.

3. Се е бизнис, ништо лично

Во бизнисот ништо не е лично. Претприемачите првично го започнуваат бизнисот заради задоволување на личен интерес, но потоа ништо веќе не е лично.

Не најмувате вработени заради личен интерес. Ги најмувате бидејќи сакате да го развиете вашиот бизнис да биде успешен бизнис.

4. Секогаш внимавај на грбот

Во бизнис, вашите непријатели секогаш ќе бидат зад вас. Тие се на бојно поле со вас за истото нешто – поголемо учество на пазарот.

Подготви се со одбрамбени стратегии како одговор на твојот бизнис доколку некој те нападне.

 

post

Определување на цена – Уметност и наука

Определување на цени

Определување на цени

Ова е продолжување на вчерашниот пост кој се однесуваше на определување на цени. Определување на цената на производи и/или услуги со кои вашиот бизнис ќе ги продава на пазарот е многу важен процес за секој претприемач. Премногу ниски цени влијаат на профитабилноста, додека премногу високи цени може да доведат до зголемување на неможноста од продавање на тие производи.

Затоа определување на цени претставува истовремено уметност и наука. Бара креативност, бара аналитичност и бара снаодливост. Овој процес би бил најлесен доколку се одвива класично како во книгите (пресметување на сите трошоци и додавање на профитна маржа што беше опишано во претходниот пост). Тоа би била проста математика која освен собирање и додавање на проценти не би барала ништо друго. Но, сепак не е така.

За да навлеземе во сложеноста и важноста на процесот ќе започнам од елементите кои влијаат на цената на вашиот производ и/или услуга.

Што влијае на цената?

Цената е под многу влијателни фактори, но генерално истите би можеле да се групираат во следниве категории:

  • Трошочна структура. Колку ве чини производството на тие производи и/или услуги? Кои други трошоци ги прави вашиот бизнис, а не се директно поврзани со производство на производот и/или услугата?
  • Профитабилност. Колку сакате да заработите, односно да ви остане кога ќе ги покриете сите трошоци за производство и нормално функционирање на бизнисот?
  • Вредносна перцепција на потрошувачот. Каква е вредноста што потрошувачот смета дека ја добива со вашите производи и/или услуги? Дали тој може и сака да плати одредена сума и колкава е таа сума?
  • Конкуренција и нивните тактики. Каква е цената на конкуренцијата? Какви ценовни тактики тие користат? Каква е вредносната перцепција за нивните производи и/или услуги од страна на потрошувачите?

Шта би било кад би било? 😆

Пристапот на определување на цени би требало да започне со една ваква анализа која ќе даде одговор на прашањето: Што би се случило кога би се случило?

Да ги разгледаме опциите во една причинско последователна врска:

  • Tрошоци. Намалување на трошоци овозможува намалување на цената или зголемување на профитабилноста, а со тоа и поголем потенцијал за поголема продажба. Но, понекогаш слепото намалување на трошоци може да доведе до намалување на квалитетот на производот и/или услугата, а со тоа и до намалување на вредносната перцепција на потрошувачот. Од друга страна зголемување на трошоци влијаат на зголемување на цената или намалување на профитабилноста. Но тоа зголемување може да е резултат на подобрен квалитет на производот и/или услугата со што може да се зголеми вредносната перцепција на потрошувачите. Забележувате како различните комбинаторики постојат при едно вакво разгледување на трошочната структура на вашиот бизнис. Направете математика за сите комбинаторики и споредете ги една со друга.
  • Профитабилност. Тука станува збор за износот на профитот кој вие како претприемач го посакувате. Ако посакувате поголем профит во услови на иста трошочна структура ќе треба да ги зголемите цените со што ќе влијаете на и перцепцијата на потрошувачите. Доколку пак го намалите процентот на профитот со кој би се задоволиле ќе можете да ја намалите цената, што пак повторно ќе има влијание на перцепцијата можеби позитивно, но можеби и негативно.
  • Вредносна перцепција на потрошувачот. Зголемување на вредносна перцепција на потрошувачите во однос на вашите производи и/или услуги овозможува зголемување на цената на тие производи и/или услуги со што би се зголемила и профитабилноста, а тоа е и еден вид на конкурентска предност за вашиот бизнис. Од друга страна пак доколку се намали таа вредносна перцепција ќе мора да се намали и цената која ја наплаќате, што пак ја намалува и профитабилноста во услови на иста трошочна структура. Доколку сакате да остане истата профитабилност ќе мора да ги намалите трошоците.
  • Конкуренција. Конкуренцијата со своите тактики постојано ќе прави притисок врз сите претходни категории во вашиот бизнис. Доколку конкуренцијата воведе нов производ со висока вредносна перцепција кај потрошувачите ќе мора да одговорите или со подобар производ или со пониска цена што пак ќе бара намалување на трошоци или пак намалување на профитабилноста.

Забележувате дека сите категории се во една взаемна врска, и токму затоа определувањето на цената освен наука претставува и умешност на претприемачот и секако една уметност за која многу луѓе не можат да ја копираат. Некаде прочитав (не се сеќавам каде) дека Apple iPad има поставено висока профитна маржа (проценките се дека оди дури до 200$ од еден уред). Но високата вредносна перцепција која таа компанија успеа да ја наметне на пазарот им го овозможува тоа.

Затоа треба да запомните дека:

  • Цената не се определува само врз основа на трошоците и посакуваниот профит,
  • вредносната перцепција и конкуренцијата се подеднакво важни како и трошочната структура и посакуваниот профит.
  • Добра цена е комбинација на уметност, умешност и наука.