post

CPC – Cost Per Click – Маркетинг средство 71

CPC

CPC

Ова е 71-вото маркетинг средство на претприемач. Во следните неколку маркетинг средства ќе ги објасниме најважните мерки кога станува збор за користење на маркетинг кампањи на интернетот. Еден пример на користење е Google Adwords (кое ќе биде опфатено и како посебно маркетинг средство), бидејќи Google го користи моделот на cost per click (трошоци по клик) за да им наплќа на бизнисите за услуга на рекламирање која претставува PPC – Pay Per Click.

Што претставува CPC

CPC претставува трошок кој еден бизнис го има за привлекување на еден клик кон неговиот веб сајт кога користи плаќање по клик (PPC) маркетинг кампањи.

Многу се збунувачки термините PPC и CPC. Се користат за иста намена и имаат слично значење, едниот плаќање (процес, акција), а вториот трошок (износ, мерка). Едниот се користи од страна на понудувачите на рекламен простор (PPC), додека другиот повеќе се користи од страна на оние кои изнајмуваат рекламен простор на одереден веб сајт. Наједноставно е да се каже следново:

  • PPC е вид на маркетинг кампања
  • CPC е мерка користена во PPC кампањи.

На пример, сакате да имате свој рекламен простор на одреден веб сајт и наместо да плаќате констанна сума на пари по временски период успевате да се договорите со вебмастерот да плаќате 50 денари по еден клик. Во овој случај CPC ќе изнесува 50 денари и доколку имате 100 клика месечно ќе треб да платите 100 х 50 = 5.000,00 денари.

Ова е едноставен случај кога имате една реклама на еден веб сајт. Но, кога станува збор за Google Adwords оваа математика е малку посложена, бидејќи ќе зависи од она што другите го нудат, од различните зборови кои ќе ги опфаќа кампањата и од квалитетот на кампањата (повеќе за ова кога ќе го обработиме оваа маркетинг средство посебно).

Зошто е важно CPC

CPC е основата на она што ќе треба да го платите за една маркетинг кампања од стилот на PPC на интернетот. Преку неа ќе влијаете на вкупните трошоци на оваа маркетинг кампања.

Треба да се напомене дека како мерка не е доволна за една посеопфатна анализа и донесување на вистински одлуки. Сепак во многу случаи ќе треба да се знае точниот модел на работа на изјамувачот на рекламен простор при што влијание ќе имаат и другите мерки како CTR и конверзија на Вашиот веб сајт.

Како посебна важност на ваквите кампањи е тоа што резултатите може да бидат веднаш видливи во однос на привлекување на посетители кон Вашиот веб сајт, а доколку овие кампањи се соодветно дизајнирани ќе се забележи крајниот резултат (она што сакате посетителот да го направи на Вашиот веб сајт).

Подетално за овој вид на маркетинг средства ќе стане збор кога практично ќе го обработиме Google Adwords кампањите (кои најверојатно ќе одат во еден серијал од неколку поста бидејќи нема да може со еден да се опфати целиот систем).

post

Аутореспондер – Маркетинг средство 69

Аутореспондер

Аутореспондер

Аутореспондер претставува 69-то маркетинг средство на претприемач. Оваа маркетинг средство е пожелно за секој бизнис кој има сопствена онлајн презентација преку веб сајт или пак блог. Аутореспондерот е тој кој ќе се грижи за e-mail маркетингот и за комуникација и испраќање на навремена информација на потенцијалните купувачи. Досега на неколку места (низ неколку постови) беше споменат аутореспондерот и секако неговото значење.

Би сакал да напоменам дека е од особена значајност да се пристапи доста внимателно при ибор на провајдерот и користењето на оваа маркетинг средство.

Што претставува аутореспондер?

Аутореспондер или во буквален превод автоматски одговарач претставува компјутерски програм кој се користи автоматски да одговара на e-mail-ови пратени на него. Големо користење наоѓа во интернет маркетингот или поточно е-маил маркетингот за праќање на меилови до потенцијални потрошувачи. Всушност функционирањето е на тој начин што еден посетител пополнува форма на Вашиот веб сајт или пак блог и влегува во системот на автоматски генерирани е-мелови по претходно определена секвенца од Ваша страна.

Во суштина аутореспондер е првата порака во таа низа на пораки, но и некои и останатите пораки ги нарекуваат исто иако повеќе се нарекуваат како follow ups – оние кои следуваат и кои се подесени во определена временска рамка.

Повеќе дефиниции за атуреспондер можете да прочитате тука.

Која е целта на аутореспондер како маркетинг срество?

Од креативноста на претприемачот и видот на бизнисот со кој оперира ќе зависи и целта на еден аутореспондер. Постојат различни начини на користење на истиот. На пример еден салон за убавина може да праќа секвенцијално информации за попусти до своите тековни потрошувачи. Може да испраќа едукативен материјал за одржување на убавината. Може да испраќа информации за нови производи и/или услуги кои ги нуди. Нема ограничувања, се е до креативноста.

Но, кога би требало да ги издвојам главните цели на еден аутореспондер како маркетинг средство би ги издвоил следниве 5:

  1. Креирање на лојалност
  2. Градење на доверба
  3. Комуникација
  4. Информирање
  5. Промовирање

Како може да се дизајнира аутореспондер?

Како што веќе потенцирав самиот дизајн на аутореспондерот ќе зависи од Вашата креативност, она што го сакаат Вашите потенцијални купувачи и секако бизнисот во кој што се наоѓате. Со одредени провајдери на вакви услуги како Aweber и Getresponse (овие два ги спомнувам бидејќи сум ги користел или уште ги користам нивните професионални услуги) имате визард кој ве води низ процесот на креирање на еден аутореспондер за Вашиот бизнис. Но сепак вие самите треба да го дизајнирате во поглед на минимум следниве елементи:

  • Што да содржи првата (аутореспондер) порака?
  • На колкав временски период да одат следните пораки?
  • Која да биде содржината на следните пораки?
  • Каква понуда ќе биде во истите?
  • …

Во моментов подготвувам редизајн на билтените на претприемач па затоа можам да го презентирам делот од првиот mind map на овој редизајн.

Дизајн на атутореспондер v.2.0 на претприемач

На оваа слика недостатсува уште еден елемент кој е наречен како разно. Ајде да ги дообјаснам овие елементи:

  • Добредојде e-mail. Ова е првиот e-mail откако некој ќе се регистрира за билтени. Во него ќе има кратко објаснување за тоа што ги очекува луѓето како и линкови за симнување на бизнис темплејти.
  • 10 видео материјали. Ова е посебна тема која ќе содржи 10 видео материјали за тоа како до веб презентација за Вашиот бизнис. Овој е-mail ќе следува еден ден по првиот е-mail.
  • 2-неделни ажурирања. Секои две недели ќе оди еден е-мail за последните 12 написи на претприемач. Целта е секој оној кој нема можност секојдневно да не следи да има можност да ги види насловите и ако нешто смета дека треба да прочита да прочита.
  • Едукативни теми. Ова е сосема нов концепт на претприемач. Наместо досегашните pdf материјали ќе има 8 едукативни теми од областа на претприемништвото и за секој месец по една. Што значи дека од овој елемент на аутореспондер во наредните 8 месеци ќе се испраќа по еден е-mail со едукативни теми преку линкови до најдобрите постови до претприемач и совети за водење на Вашиот бизнис.
  • Разно. Овој елемент нема подесена секвенца туку ќе се користи за испраќање на информации или линк до одредени анкети кои ќе ги спроведуваме. Секако и попусти на сите наши идни услуги (до крајот на годината ќе стартуваме со минимум две).

Значи ова ќе биде еден аутореспондер подесен за претприемач, Вие ќе треба да направите mind map за Вашиот.

Зошто професионален аутореспондер?

Користете професионален аутореспондер со кој ќе го подесите Вашиот е-mail маркетинг да функционира беспрекорно. Не користете бесплатни или пак скрипти кои се генерираат преку Ваш сервер за бизнис цели. Како водечки компании кои ја нудат оваа услуга а кои сум ги користел или сеуште ги користам се Aweber и Getresponse. Getresponse веќе не го користам, но не заради нивната услуга туку едноставно не успеавме да се договориме со нивниот супорт тим за да го сменат името на нашата земја.

Аутореспондерот може да биде суштинскиот елемент на Вашиот бизнис. Затоа не е потребно играње со суштинските бизнис елементи.

Еве само неколку причини зошто за бизнис цели да користите професионален аутореспондер:

  • Сигурност. Професионалните аутореспондери гарантираат сигурност дека Вашата порака ќе биде испратена онаму каде што треба да биде испратена. Тие имаат долгогодишно искуство со сите најголеми ISP за да обезбедат дека Вашата е-мail порака не е нешто што другата страна не го побарала.
  • Аналитика. Професионалните аутореспондери овозможуваат квалитетна аналитика на Вашите mail-ови во поглед на отварање, кликови, симнување… Со помош на квалитетна аналитика ќе можете да ја прилагодувате Вашата кампања.
  • Подршка. Кога станува збор за професионално не може да се заборави иподршката која се добива. Со гореспоменатите компании комуницирав неколку пати и истиот ден добивав одговор и решение на било кој мој проблем.
  • Алатки. Голем број на алатки кои овозможуват едноставна креација и на техничкиот дел од користење на аутореспондер како маркетинг средство.
  • Автоматизација. Во многу делови еден аутореспондер е автоматизиран. На пример, многу луѓе од незнаење (заборавиле дека два пати потврдиле дека сакаат да бидат дел од Вашиот аутореспондер) ја окарактеризираат Вашата е-mail порака како spam аутореспондерот автоматски ќе ги исклучи од Вашата листа така да нема да морате Вие самите да го правите тоа. Иако секој може во секој момент да направи unsubscribe сепак незнаењето е најголемата болест, затоа Вашиот провајдер ќе го реши тоа место Вас.

И за крај само уште една препорака:

Секогаш користете Double Opt-in (двојна потврда) за регистрација. Можеби е потешко, но сепак посигурно.

post

Веб Банери – Маркетинг средство 64

Веб банери како маркетинг средства

Веб банери како маркетинг средства

Досега поминавме 63 маркетинг средства на претприемач. За оваа недела како 64-то маркетинг средство во распоредот од 100 маркетинг средства е веб банер. Ова маркетинг средство е доста популарно како во светот така и кај нас. Бидејќи не сум некој преголем љубител на банери, размислував да не биде дел од овој серијал на претприемач, но популарноста и користењето сепак ме натера да биде составен дел од овој серијал.

Што претставува веб банер?

Првин би почнал со она што претставува банер. Ќе се послужам со дефинирање на зборот „банер“ во популарната Wikipedia:

Банер претставува знаме или друго парче платно на кое е поставен симбол, лого, слоган или друга порака.

Значи во офлајн светот банер претставува знаме со лого или некоја маркетинг порака кое е поставено на одредена локација за да го претставува бизнисот или некоја друга организација.

Она што ние скратено го викаме банер, всушност претставува веб банер кој што не е изработен на платно туку во електронска форма и не е закачено на физичка локација туку на www (World Wide Web) локација. Да видиме што во Wikipedia e наведено за веб банери:

Веб банер претставува адвертајзинг форма на World Wide Web. Оваа форма на онлајн адвертајзинг претставува закачување на огласот-рекламата на една веб страница. Целта е да привлече сообраќај за веб сајтот преку линкување кон веб сајтот на оној кој се рекламира.

Значи еден бизнис веб сајт поставува веб банер на друг веб сајт со цел да привлече посетители кон неговиот веб сајт, а за возврат плаќа одредена сума на пари на сопственикот на веб сајтот на кој ќе биде закачен банерот.

Како да се користи?

Доста внимателно! Ова е мојот единствен совет. Краткорочно гледано оваа маркетинг средство има навистина голема моќ, доколку се искористи на вистинскиот веб сајт и на вистинскиот начин. Но, долгорочно гледано може да има корист само доколку се продолжува со успешната кампања.

Пред една година разговарав со еден претприемач кој започнуваше со нивниот веб сајт. Ми вели дека ние ќа направиме огромна кампања, ќе ја уништиме конкуренцијата на веб просторот за неколку месеци, на сите позначајни веб сајтови во Македонија ќе имаме банери… Мојот одоговор беше дека постои огромна разлика помеѓу онлајн и офлајн адвертајзинг и дека на интернетот тоа не функционира на таков начин.

И навистина фрлија огромни пари за веб банери, за сите поголеми весници да го претстават раѓањето на тој веб сајт. Но, резултатите не беа такви како што тие ги замислуваат. Единствено добија за кратко време повисок Google Page Rank кој потоа кога прекинаа да плаќаат за банери повторно се намали. Посетеноста не беше спектакуларна за дадените пари. А да не зборуваме за вистинската цел – продажба.

Затоа при користење на оваа маркетинг средство следете ги следниве чекори:

  • Размисли добро за целите кои сакаш да ги постигнеш
  • Анализирај и избери потенцијални веб сајтови на кои сакаш да поставиш банер.
  • Рангирај ги тие веб сајтови согласно број на посетители, карактеристики на посетители и цената.
  • Контактирај ги администраторите на избраните веб сајтови.
  • Ангажирај професионалец за изработка на банер кој ќе привлекува внимание.
  • Поставете го банерот на избраните веб сајтови.
  • Анализирај, мери, споредувај и подобрувај.

Критични чекори од овој процес

Како најкритични чекори од овој процес би ги издвоил следниве:

  • Избор на вистински веб сајт каде ќе биде поставен банерот
  • Дизајн на банерот
  • Анализирање, мерење, споредување и подобрување

1. Избор на вистински веб сајт и локација

Знам дека премногу се залетуваме да веб сајтото на кој ќе поставиме банер има огромен број на посетители. Што и треба да биде. Но, не реба да застанеме тука. Мора да дојдеме до карактеристиките на тие посетители. На пример, на локален бизнис од Битола кој целосно е насочен на пазарот во Битола не му треба банер на веб сајт на кој 95% од посетители се од другите градови додека 5% се од Битола. Ова е поради фактот што ќе плати и за останатите 95% иако не му се потребни. Ова е само еден пример, што не мора да значи дека нема да вреди за тие 5% потенцијални купувачи до кои што ќе дојде, но затоа се важни целите кои се поставени во првиот чекор.

Како поважни елементи-карактеристики во кои би требало дапогледнете би ги издвоил следниве:

  • Локација
  • Возраст
  • Образование
  • Приходи

Кои карактеристики ќе бидат важни ќе зависи од типот на Вашиот бизнис.

Кога станува збор за локацијата морате да ги анализирате понудите и достапноста на локацијата каде ќе биде сместен банерот. Не значи дека тој ќе биде виден од сите постеители. Подобро место ќе обезбеди повеќе кликови кон Вашиот веб сајт.

2. Дизајн и на банерот

Освен локацијата на банерот и дизајнот игра Важна улога во привлекување на внимание и кликнување на истиот од страна на потенцијалните посетители. Дизајнот ќе треба да:

  • Привлече внимание
  • Да прати кратка и јасна порака
  • Да пренесе корисност за потенцијалниот посетител
  • Да го гради Вашиот бренд.

3. Анализа, мерење, споредување и подобрување

Најважниот чекор во кампањите со банери. Постојано ќе мора да ги анализирате, мерите и споредувате добиените резултати од секој банер поединечно поставен на секој веб сајт. Потоа ќе следува подобрување во однос на тоа дали ќе откажете на некој веб сајт, дали ќе ја подобрите позицијата или пак дизајнот.

Потребно е да ги анализирате минимум следниве елементи:

  • Број на посети од секој веб сајт,
  • Број на акции преземени од страна на тие посетители. Акции во смисол на купување или пак регистрација.
  • Просечно времетраење на задржување на посетители од секој веб сајт.

Врз основа на овие фактори ќе можете лесно да воочите дали вреди или пак не вреди банер од секој од веб сајтовите на кои е поставен.

post

Вебинар – Маркетинг средство 63

Вебинар - Маркетинг средство

Вебинар - Маркетинг средство

Вебинар претставува 63-тото маркетинг средство на претприемач кое ќе го претставиме оваа недела. И оваа маркетинг средство претставува релативно ново, но сепак моќно средство кое обезбедува висок квалитет на комуникација и едукација помеѓу еден бизнис и потенцијалните или тековните купувачи.

Што претставува вебинар?

Вебинар е исто што и семинар само што разликата е во тоа што посетителите на семинарот не се во семинарска сала туку пред своите монитори и ја консумираат содржината преку интернет. Во исто време може да постават прашања, да добијат одговори, и да се вклучат интерактивно во комуникација со предавачот и останатите слушатели.

Вебинарот уште се нарекува и веб конференција, пред се затоа што се користи истата технологија за спроведување.

Значи вебинорот служи за спроведување на онлајн, во живо тренинзи, презентации и состаноци со аудиенцијата. Може да има еднонасочна комуникација што претставува презентација од страна на организаторот на вебинарот додека посетителите немаат можност да се вклучат во конверзацијата. Но, може и да се користи повеќенасочна комуникација при што презентерот презентира, а на крајот или во определени временски интервали овозможува поставување на прашања, споделување на идеи или сопствени искуства од страна на посетителите.

Она што е интересно е што одредени сервиси за веб конференциски врски, кои се користат за спроведување на вебинарот овозможуваат снимање на вебинарот при што ќе можете да го објавите на Вашиот блог и едноставно вебинарот да стане една вирозна содржина.

Идеи за користење на вебинарот

Креативноста на претприемачот е основата за идеи за користење на вебинар како маркетинг средство за бизнис цели. Сепак за искористување на целосниот потенцијал на вебинарот мора да се спроведе систематичен пристап со јасна цел за тоа што еден претприемач сака да постигне. Јасно дефинираната цел ќе доведе до јасни идеи и план за спроведување на оваа маркетинг средство во пракса.

  • Обука на потенцијални купувачи
  • Обука за тековните купувачи
  • Продажба преку вебинар
  • Претставување на производот и/или услуга
  • Споделување на знаење и искуство
  • Дознавање на желбите на потенцијални купувачи
  • Одржување на редовен контакт со купувачите
  • …

Чекори за спроведување

Она што е најважно при спроведување на вебинари е можноста луѓето навремено да бидат известени за да се пријават како посетители. Постои можност и за ограничување н број на посетители или ограничувањето да биде како дел од сервисот кој го овозможува вебинарот. Повеќето сервиси имаат ценовен план за користење на сервисот. Тој ценовен план најчесто зависи од бројот на посетители, можност за интерактивност и можност за снимање на целиот вебинар.

  • Избор на теми за вебинар
  • Изработка на план. Препорачливо е годишен план со специфични теми во определен период од годината.
  • Подготовка на вебинарот. Може да се користи Power Point презентација.
  • Избор на платформа за вебинарот.
  • Најавување на вебинарот со темата, точно време и датумот.
  • Потсетување најдоцна еден час пред започнување.
  • Имплементација на вебинарот.

Сервиси за спроведување на вебинари

Постојат повеќе сервиси кои нудат ваков вид на услуга. Тука само би ги набројал некои до кои дојдов при пребарување нa интернетот. Искрено, сум го користел само сервисот на GoToMeeting и како слушател и како тест во бесплатна проба. И доколку се одлучам да изработувам вебинари би го избрал овој сервис иако е нешто поскап од останатите. Па еве некои можни сервиси кои можете да ги разгледате споредите и изберете она што на Вас најмногу би ви одговарало врз основа на Вашите потреби и секако буџетот.

  • GoToMeeting.com. Во моментов цените се движат од 50$ до 150$ на месец врз основа на број на посетители и можностите на сервисот.
  • Webex.com. И ова е еден од премиум сервиси за вебинари чија почетна цена е 50$ на месец.
  • Zoho Meeting. Провајдерот на многу онлајн апликации има и сервис за веб конференции и вебинари. Цената за 5 партиципанти е 12$ месечно додека за 100 партиципанти е 49$ месечно.
  • Dim Dim. Овој сервис има бесплатна верзија до 20 партиципанти додека за повеќе ќе ве чини 25$ на месец.
  • Vyew. Бесплатната верзија на овој сервис е со 10 партиципанти и со реклами, додека имаат платежни опции од 7$ и 14$ месечно.
post

SEO – Оптимизација за пребарувачи – анализа

SEO - Оптимизација за пребарувачи - Анализа

SEO - Оптимизација за пребарувачи - Анализа

Има многу пишувано, нагаѓано и образложувано за SEO – оптимизација за пребарувачи во однос на тоа кои се поважни фактори, кои се помалку важни и што има поголемо или помало влијание. Доколку сте го прочитале серијалот за SEO на претприемач, сигурно сте забележале дека веќе извесен период вршам анализи и истражувања во однос на оваа проблематика. Досега вообичаено анализите се однесуваа преку реална веб страна и аналитиката која покажува различни однесувања и резултати при мои различни активности на таа веб страна.

Но, пред една недела започнав со проширување на мојата SEO лабораторија со анализа на податоци од други веб страни. Започнав со собирање на дополнителни податоци и дополнителни анализи од досегашните при што мерам, анализирам и споредувам различни влијанија на позицијата на пребарувачите. Така, ова ќе претставува прв пост во кој ќе ги споделам првичните сознанија од едната од 10-те дополнителни анализи.

Опис на SEO анализата

Анализата се состои од избор на 20 збора и резултатите за првите 10 веб страни на Google. Што значи дека се анализирани 200 веб страни, со сите нивни SEO фактори и влијание на тие фактори на позиција на пребарувачите.

Во моментов постојано ја проширувам базата на податоци со цел да се добијат поквалитетни резултати.

Факторите кои ги анализирам во однос на позицијата на пребарувачите се следниве:

  1. Google Page Rank – Рангирањето од страна на Google во однос на авторитетот на веб страната
  2. Дојдовни линкови – Колку дојдовни линкови има соодветната веб страна
  3. Зборови – Колку зборови има соодветната веб страна која излегува на резултатите по пребарување.
  4. Повторувања – Колку пати тој збор се повторува во текстот на страната.
  5. Густина – Колкав е процентот на појавување на тој збор.
  6. Наслов – Колку пати е содржан зборот во насловот.
  7. Линк – Колку хиперлинкови има на тој збор во текстот.
  8. Alt – Колку пати во Alt делот се користи зборот (Alt служи за давање на опис на сликата).
  9. Клучни зборови – Колку пати е содржан зборот во клучните зборови.
  10. Опис – Колку пати е содржн зборот во описот.
  11. Болд – Колку пати е болдиран зборот низ текстот.
  12. H1 – Колку пати е содржан зборот во H1 tags.

Врз основа на сите овие податоци анализата се состои од спроведување на корелациона анализа со Пирсонов коефициент на корелација со што го споредувам различното влијание на секој од факторите со позицијата на страната на резултатите на Google.

Резултати од оваа SEO анализа

Глобално од резултатите се забележува релативна слаба корелација на факторите со самата позиција на пребарувачите. Но, сепак резултатите претставуваат една основа и приказ за тоа што пребарувачите го ценат при прикажување на резултати по барање на одреден збор. На сликата е прикажан само дел од анализата кој се однесува на овој пост иако анализата е спроведена и на меѓусебното влијание на еден фактор со друг.

SEO - Оптимизација за пребарувачи - Фактори

SEO - Оптимизација за пребарувачи - Фактори

Од овие резултати прикажани на сликата може да се заклучи следново:

  • Најголемо влијание врз позицијата на страната на резултатите на пребарувачите имаат насловот на веб страната и описот на веб страната.
  • Најмало влијание врз позицијата на страната на резултатите на пребарувачите има делот клучни зборови. Затоа можете да бидете добро рангиран за некој збор иако не сте го поставиле тој збор во клучни зборови.
  • Карактеристично е што PR на веб страната исто така не е премногу импресивно за резултатите. Затоа можете да забележите веб страни со послаб PR да излегуваат на повисока позиција на страната на резултатите.

Овие сознанија би ги издвоил како покарактеристични, иако анализата и истражувањата продолжуваат со зголемување на базата на податоци.

post

Домен име за Ваш бизнис – Совети за избор

Серијал на претприемач и МКХост

Серијал на претприемач и МКХост

Ќе продолжиме со серијалот на постови кои МКХост и Претприемач ги подготвуваат со цел еден претприемач да го зголеми своето знаење и да не биде затечен во користење на различна техничка терминологија за оваа намена во деловниот свет. Денес ќе продолжиме со домен име, елемент кој навистина претставува еден од најзначајните пред започнување со интернет презентација на Вашиот бизнис и можеби најконтроверзно во поглед на она што е исправно или подобро.

Домен името најчесто е изговарано кај нас како domain name, домен, домејн. Името на веб страната е пратставено како домен име. Секоја веб страна има свој назив/име. Нашата веб страна е препознатлива со името: mkhost.com.mk. Така да секој што сака да не најде на интернет ќе ја внесете адресата во пребарувачот и ќе се прикаже веб страната. Многумина незнаат што всушност е домен име, а што веб хостинг, па за тие кои сеуште имаат дилеми може да проверат на следниот линк: разлика помеѓу веб хостинг и домен.

Вие како претприемач треба да го претставите вашиот бизнис и на интернет. Така да, доколку сеуште немате отворено интернет презентација сега е време за тоа. Со овој напис ќе ви помогнеме да се одлучите за домен името – како правилно да го изберете, да проверите дали е слободно и да започнете со презентацијата.

Регистрација на домен име е првиот чекор при стартување на вашата интернет презентација. Тоа го претставува идентитетот на вашиот бизнис на веб просторот, преку кој корисниците и веб пребарувачите ве препознаваат.

Избор на наставка (tld)

Доменот се состои од два дела, едниот е името, а вториот одделен со точка (.) е наставката позната како tld (top-level domain). Најдобро да дадеме пример: google.com , името е: google, а tld наставката е: com.

Постојат повеќе наставки распределени по одредена логика, а највеќе според географската локација (веб страна наменета на одреден регион, држава…) и врз основа на тоа за каква организација се работи (пр. училиште, владина институција, непрофитна организација, компанија, … ).

Генерални наставки

  • com – комерцијални организации, но не е стриктно
  • net – за мрежни инфраструктури, но не е стриктно
  • org – организации, но не е стриктгно
  • info – информативни сајтови, исто така не е стриктно
  • biz – за бизнис сајтови
  • name – за персонална употреба на едно лице или фамилијарно
  • gov – за државни институции
  • mobi – за мобилни уреди
  • travel – за туризам, туристички агенции, хотели и сл.

Како што може да забележите до краткото објаснување на наставките за кои потреби највеќе се користат, стои и дека денес тоа не е стриктно. Може да регистрирате и .org домен иако сте профитна компанија, така да не постојат рестрикции за повеќето од домените, но како што велат самите наставки, пожелно е да ја одберете соодветната наставка.

Географски наставки

Овие наставки се одредени според имињата на државите во Светот. Еве неколку:

  • mk – Македонија
  • rs – Србија
  • de – Германија
  • bg – Бугарија
  • gr – Грција
  • al – Албанија
  • si – Словенија
  • uk – Велика Британија

Според некое правило кое што не е стриктно, една компанија од некоја држава треба да се претстави на интернет со нејзината наставка. Така на пример ако вашата компанија е регистрирана во Македонија, наставката за вашето домен име треба да биде со .mk . Сепак ова не е стриктно. Доколку некогаш би го ширеле бизнисот во друга држава, и сакате вашето бренд име да биде познатливо и таму, како и на интернет просторот тогаш пожелно е да го регистрирате вашето име и со наставката која одговара на државата каде го ширите бизнисот или едноставно отварате филијала.

Македонскиот регистрар на .mk наставката овозможува и регистрација на поддомени со оваа наставка како: com.mk , net.mk , org.mk , edu.mk , gov.mk , name.mk и покрај главната .mk наставка која е карактеристична за нашиот регион.

Ние се имаме одлучено за mkhost.com.mk. Доколку ги следиме правилата, гледаме дека МКхост компанијата е од Македонија поради .mk наставката, а com наставката ни укажува дека е комерцијална организација. Сепак како што претходно нагласивме, ова немора да биде точно и така да ги класифицирате имињата на домените.

Должина на доменот и дозволени карактери

Должината варира, кај одредени наставки е лимитирана на минимум 2 карактера, додека кај други е возможно да се регистрира домен име и со еден карактер. Кај нас во Македонија може да се регистрираат домени со една буква/бројка, како на пример: 0.mk (веб сајтот постои и служи за кратење на линкови). Максималниот број на карактери за името без наставката може да биде до 63 карактера. Додека пак целосното име неможе да пречекори над 253 карактера (заедно со името, наставките, точките како сепаратор). Но во пракса одредени регистри имаат лимити кои не секогаш се исти.

Домените со кратки имиња од една, две, три карактера се речиси 100% веќе зафатени и регистрирани од некого, но доколку имате среќа може да најдете некој истечен домен, овозможен повторно за регистрација.

Во името дозволено е да се користат само латиничните букви, бројките од 0-9, како и карактерот „-“. Може да користите мали, големи букви или комбинации од мали и големи букви, во секој случај ќе го добиете истиот домен. Не е дозволено користење на празни места.

  • Помала должина на името – подобро памтење. Обидете се да најдете име која што ќе има прикладна должина. Не претерувајте во должината. Секако дека со сегашните социјални мрежи и веб пребарувачите, должината не би била толку битна, но што кога ќе бидете во друштво и сакате да му го пренсете усно името на веб сајтот на вашиот другар? Дали е полесно да се запамти името: pretpriemac.com или stanete-uspesen-pretpriemac-besplatni-soveti.com ? Во првиот пример, името се состои само од еден збор, додека во вториот има повеќе зборови, па вие можеби ќе ги запаметите зборчињата, но дали ќе го погодите нивниот распоред?
  • Дали брендот да биде основа? Сега следуваат малку контрадикторности. Ако вашата компанија е позната според одредено бренд име, тогаш не се двоумете, изберете го бренд името како име на доменот. Доколку луѓето ве бараат на интернет а не го знаат вашиот сајт, прво што ќе го напишат е вашето бренд име. Што би се случило ако барате компанија пишувајќи го нејзиниот бренд, а интернет пребарувачот ви излиста име на домен кој не го содржи името на самиот бренд, а всушност тоа е сајтот што клиентот го бара. Дали тој едноставно ќе го игнорира мислеќи дека тоа не сте вие и ќе се откаже од пребарувањето? Но, доколку сте локален бизнис, кој локално има добро препознатлив бренд, но глобално нормално никој не го препознава ќе треба да користите поинаква стратегија. На пример, кога се спремав за службен пат во Брисел, требаше да резервирам хотел. Хотелот требаше да биде блиску до институцијата каде имав состаноци. Тогаш јас тргнав со пребарување на хотели во Брисел. Не знаев кои брендови постојат (иако веројатно сите поголеми се присутни), но со помош на Google, зборот „хотели во Брисел“ и локација (улица на институцијата каде имав состаноци) избрав еден хотел кој беше на 5 минути од моите службени активности.
  • Што е со клучен збор од вашата индустрија? Ќе продолжиме со уште контрадикторности. Земете ја за пример најголемата интернет продавница – Amazon.com . Дали во името гледате дека се содржи зборчето продавница? -Не, но името е интересно и веќе познато помеѓу луѓето и секој кој што ја посетил знае дека е интернет продавница. Ќе дадеме и пример со хотел, вие сте претриемач на одреден хотел, зошто би морало во името да се состои и зборчето хотел? Дали е подобро да го наведете само името на хотелот, а потоа самиот посетител да открие дека се работи за хотел? Со ова се намалува должината на доменот, посетителите полесно ќе го памтат истиот и ќе го стекнувате брендот на интернет. Но, ова е одлична стратегија за бренд како Hilton, но што со некое помало хотелче од Водно кое нуди дури и поперсонализирани услуги за деловни луѓе? Што ако не сакам да паметам? Се одвикнав од чување на информации во мозокот, бидејќи технологијата ми го овозможи сето тоа. Сетете се на неколку интернет страни кои имаат оригинални имиња, кои ви оставиле впечаток и кои немаат никаква конекција со нивната индустрија и област. Еве ви потсетник: google.com – знам дека е мој секојдневен пребарувач, немора да биде search-engine-google.com . Уште еден пример: yahoo.com – нема никаква конекција со емаил сервис или веб портал/емаил портал, но знам дека таму си ја проверувам мојата пошта. Но, едно нешто треба да се знае, Google, Yahoo и Amazon почнаа со работа уште минатиот век кога и не никнуваа милиони нови веб страни на дневна основа. Тие беа во бизнисот кога во Македонија сеуште почнувавме со dial-up конекција. Тие го изградија сопствениот бренд и сопствената бизнис империја. Правилата од пред 10 години се изменија. Затоа добро размислете во однос на брендот и клучниот збор во домен името. Сепак и двете стратегии се добри, но подобра е онаа што ќе биде усогласена со Вашата бизнис стратегија, односно што сакате да постигнете и кого да допрете со Вашата интернет презентација.
  • Купете повеќе наставки, но одлучете се една да биде главна. Доколку имате можност, земете повеќе наставки за истото име. Зошто? Одговорот е едноставен, што ако некој во иднина ви ја закупи другата наставка и ви врши конкуренција или антиреклама или едноставно ги буни вашите посетители? Пример се одлучивте за домен името: primer.com . Ја започнавте вашата интернет презентација и после неколку години приметувате дека некој отворил нова веб страна со истото име но друга наставка: primer.net . Новата веб страна што ја стартувале немора да биде од истата индустрција или да содржи слична содржина, но зошто вашите посетители да се бунат, дали беше .com или .net ? Купете ги и двете наставки и може да ги избегнете овие непријатни ситуации како и за вас, така и за вашите посетители. Поради ова, нашиот регистрар во Македонија воведе едно правило кое ви помага да немора да го правите ова. Имено, ако регистрирате домен име: primer.mk , неможе друг да го регистрира истото име но со друга наставка: primer.com.mk без ваше одобрение. Сепак ова правило не важи за интернационалните наставки и затоа доколку сте во можност закупете повеќе наставки со истото име. Со Македонските наставки немора да го правите ова се додека важи правилото на нашиот регистрар.
  • Направете истражување пред да ја извршите одлуката. Дали можеби под истото име, има веќе регистрирано други наставки кои се познати веб страни или други веб страни кои се во истата индустрија? Извршете пребарување и најдете соодветно име за кое нема многу регистрирано наставки. Ако вашето име е: novbiznis, тогаш направете едно претражување дали постојат наставките: novbiznis.com , novbiznis.net , novbiznis.org , novbiznis.mk , novbiznis.com.mk и слично. Доколку сите или повеќето се слободни, тогаш тоа е добар знак да продолжите со регистрацијата и да ја одберете главната наставка. За да претражите дали одредени наставки за одредено име се слободни или веќе регистрирани следете го линкот на МКхост пребарувачот на домени.
  • Изберете компанија која е позната и има репутација во регистрација на домени. МКхост веќе петта година е во хостинг бизнисот и има извршено регистрација на домени за илјадници клиенти. Ние го цениме бизнисот и работата на нашите клиенти и нема да дозволиме никогаш да бидат разочарани и да го изгубат своето домен име регистрирано преку нас. Прочитајте како до регистрација на mk домен преку МКхост. Внимавајте постојат повеќе Македонски „компании“ кои може да ви го регистрираат доменот, но потоа едноставно да исчезнат, да не ви дозволат да го трансферирате до друг регистрар, да неможете да промените контакт информации, или да промените ДНС сервери, како и префрлање на сопственост на име на друга компанија доколку се работи за mk домени. МКхост може да ви додели правен документ откако ќе го регистрирате доменот преку нас со што ќе бидете 100% сигурни дека тоа е ваше име и неможе никој друг да ви го земе, секако доколку го обновувате навреме и не дозволувате да истече. Ние исто така имаме свој веб интерфејс каде може да вршите контрола на вашиот домен.
  • Проверете дали вашето избрано име за доменот, не е некој познат бренд или трговска марка. Проверката може да ја извршите едноставно со неколку пребарувања на интернет. Добар резултат би бил доколку вашето име е уникатно и не постои друг бренд со истото име затоа што може да имате проблеми во иднина, како и забуна кај вашите посетители.
  • Обновувајте го доменот на време или закупете го за повеќе години. Од искуство и работа со клиенти кои регистрираат домени преку МКхост имаме забележано дека забораваат да направат обнова на доменот или да извршат промена во информациите за контакт доколку истите ги промениле. Секако дека постојат потсетници кои ве известуваат дека вашиот домен ќе истече за одреден период, но тие потсетници се испраќаат на емаилот кој сте го доставиле како контакт емаил при регистрација на доменот. Ако вие го имате променетео вашиот емаил или веќе не го користите истиот, што ќе се случи ако сте заборавиле кога ви истекува доменот што сте го регистрирале, а потсетниците испраќаат известување на емаилот што не го користите веќе? Затоа контакт информациите за вашиот домен секогаш ажурирајте ги доколку има промени за да не дојде до несакана последица – истек на доменот и неможност на враќање назад за подолг период. Како една предност за пребарувачите претставува и домен регистриран на подолг рок. На пример, доменот закупен на 5 години има поголем авторитет отколку оној закупен на една година.
  • Кога ќе се одлучите за еден домен не го менувајте. Повторно совет кој доаѓа од пребарувачите. Ова е уште еден фактор кој се следи од страна на пребарувачите и влијае на авторитетот на Вашата веб страна. Колку е постар доменот толку поголем авторитет ќе имате.

Ова се само неколку совети од нас, кои немора да ги прифатите, но секако добро е да ги прочитате и да размислите. Можеби некои од нив ќе ви бидат добредојдени и ќе ви послужат при изборот.

Секако, последен, но не и нај не битен совет од нас е да направите и интерна консултација и/или анкета со членовите на вашата организација, па заедно да одлучите.

post

Терминологија во хостинг индустријата

Серијал за технологија на претприемач и МКХост

Серијал за технологија на претприемач и МКХост

Ќе продолжиме со серијалот на постови кои МКХост и Претприемач ги подготвуваат со цел еден претприемач да го зголеми своето претприемничко знаење и да не биде затечен во користење на различна техничка терминологија за оваа намена. Претходниот пост беше за 5 елементи кои Вие како еден претприемач треба да ги разгледате пред да одлучите за избор на хостинг компанија која ќе го хостира Вашиот бизнис веб сајт. Потоа имавте можност да прочитате за Веб хостинг и видови на хостинг услуги. Сега ќе продолжиме со различната терминологија која се корсти во светот на интернетот и оваа индустрија.

Многу често се среќаваме со одредени термини во хостинг индустријата. За некого тие веќе се познати и јасно знаат што значат, но за некого тоа е нов јазик и затоа ќе дадеме кратки и едноставни објаснувања за неколку жаргони кои најчесто се користат. Секако при објаснување на одреден термин ќе наидете и на други под-термини кои можеби не ви се јасни, но слободно може да пребарувате и за нив на интернет или пак да оставите коментар и ќе се обиедеме да ви ги дообјасниме.

Еве ги термините кои што ќе ги објасниме во постот:

Терминологија - хостинг индустрија

Терминологија - хостинг индустрија

Apache

Еден од најпопуларните Web server (HTTP) програми. Тој игра значајна улога во развивањето на глобалната интернет мрежа www. Веб серверот е бесплатен и има добри перформанси, како и јаки сигурносни карактеристики. Највеќе е користен кај UNIX оперативните системи. Apache веб серверот се користи за опслужување на статични како и динамични веб страни. Според некои статистики Apache веб серверот завзема речиси 50% од опслужување на веб страните. Така да половина од веб страните што ги посетувате на интернет се застапени со овој бесплатен веб сервер.
Почеток…

IIS

Веб сервер на Microsfot за Windows/NT OS. IIS е скратенка од Internet Information Server. Овој веб сервер е втор најупотребуван после Apache со околу 30%.
Почеток…

HTML

Овој збор е кратенка од HyperText Markup Language и претставува програмски јазик за веб страните. Со помош на HTML вашиот веб пребарувач комуницира со веб серверот и на тој начин се прикажува самиот веб сајт. Постојат многу други програмски јазици, но кога веб серверот го процесира сајтот, истиот го враќа до вас преку веб пребарувачот во HTML формат.
Почеток…

HTTP

Овој збор е кратенка од  HyperText Transfer Protocol и претставува протокол во апликациското ниво во системот на интернет. Тој е стандард за клиент-сервер комуникација. Како клиент може да го земеме веб пребарувачот, а како сервер, апликацијата на серверот која што е стартувана за да го хостира веб сајтот. Овие две апликации комуницираат помеѓу себе преку однапред одреден порт (стандарден http порт е 80). Клиентот испраќа одредени информации до серверот побарувајќи ја содржината од веб сајтот, додека веб сервер апликацијата која ги чува овие податоци ги испраќа до веб пребарувачот и така вие ги прегледувате интерактивните информации од сајтот (текстови, слики..).
Почеток…

FTP

Kратенка од: File Transfer Protocol кој овозможува размена на датотеки помеѓу клиентот и серверот или помеѓу два сервера. Во хостинг индустријата FTP е многу користен за прикачување на датотеки кон веб серверот. Преку FTP клиентот ги прикачува фајловите и притоа посетителите на веб сајтот имаат пристап да ги прегледуваат, превземат и слично.
Почеток…

SSH

Кратенка од: Secure Shell е мрежен протокол кој овозможува безбедна комуникација помеѓу два хост-а. Под хост подразбираме компјутер кој што е поврзан на интернет и може да комуницира со други компјутери. SSH бил дизајниран како замена за telnet, се со цел да се овозможи безбедносна комуникација помеѓу мрежите. Комуникацијата е енкриптирана и тоа е добра карактеристика и предност за голема употреба на овој протокол. Највеќе е употребуван кај Unix/Linux базираните оперативни системи.
Почеток…

IP

Кратенка од: Internet Protocol е протокол користен за комуникација и пренос на податочни пакети преку мрежа која го користи Internet Protocol системот познат како TCP/IP. Ова е главен протокол на мрежната инфраструктура на интернет-от. Со помош на протоколот се разменуваат податоци низ интернет.
Почеток…

DNS

Кратенка од: Domain Name System. Секоја веб страна на интернет е хостирана на одреден сервер. Секој сервер активен на интернет има своја адреса, т.н. IP адреса. Секој од нас има своја адреса на живеење, така за да се знае кој сервер и веб страна каде точно е лоцирана и за да не настане хаос, е воведен овој IP ( интернет протокол). DNS – от ни помага во памтење на овие адреси на серверите и веб страните на поедноставен начин – односно со преведување на IP адресата на серверот во одредено име кое е прифатливо за нас. Многу потешко е да ја запамтиме IP адресата: 74.54.191.4 во однос на http://www.vasastrana.com.mk/. Сепак зад DNS, IP и другите протоколи и системи постои цела инфраструктура и многу објаснувања.
Почеток…

Packet-Switching

Е метод кој овозможува префрлање на пакети низ интернет мрежата. Доколку треба да се испратат одредени информации од една локација до друга локација низ интернет мрежата се користи овој метод преку IP протоколот. При префрлувањето на податокот, истиот се „цепи“ на повеќе делчиња познати како пакети со иста големина и истите се испраќаат независно низ интернет мрежата. Тие патуваат низ мрежата и на крајот пристигнуваат до дестинационата локација каде се соединуваат и податокот успешно се пренесува до машината каде што требал да пристигне. Пакетите немора да патуваат по иста патека и немора да доаѓаат редоследно.
Почеток…

SQL

Кратенка од: Structured Query Language е компјутерски јазик за менаџирање на базите на податоци. SQL протоколот се користи за ажурирање на податоци на SQL серверот. Сервери кои имаат поддршка за SQL се познати како SQL сервери. Кога ни е потребна една база со податоци, тогаш ја сместуваме и ја организираме по наши потреби. Со помош на SQL може да вршиме одредени функции кон базата. Функциите се засновани на релационата алгебра. Базите на податоци се широко употребувани низ секојдневието.
Почеток…

MYSQL

Е релационен податочен систем за менаџирање на базите. MYSQL го користат софтверски проекти на кои им е потребна целосна поддршка и организација на податоците во база на податоци. Поддржува multi-user автентификација до повеќе бази, може да се инсталира на повеќе оперативни системи. Највеќе го користат софтверски апликации кои се бесплатни и им е потребна ваков тип на база која е исто бесплатна (под GNU лиценца) како на пример: WordPress, Joomla, phpBB. Исто така се користи и во организација на големи проекти како Wikipedia и Facebook. Така да ако сакате да работите и започнете со одредена база на податоци, тогаш може да го искористите овој бесплатен податочен систем за менаџирање на базите.
Почеток…

PHP

Е скриптирачки јазик кој е дизајниран како примарна цел за креирање на динамични веб страни. PHP кодот е вменат во HTML документот и интерпретиран од веб серверот, ја генерира и прикажува веб страната. PHP генерално работи на веб сервер и е скриптирачки јазик кој е прилагодлив за веб девелопмент на страна на серверот.
Почеток…

Web Hosting

За оние кои сеуште не им е јасен овој основен термин во хостинг индустријата може слободно да прочитаат повеќе на следниот линк: Веб хостинг и видови на хостинг услуги.
Почеток…

Domain Name

Или често кај нас ќе го прочитате и слушнете како домен, домејн, домаин, претставува името на вашата веб страна која се внесува во пребарувачот. Најдобро ќе наведеме со пример. Нашата компанија e МКхост, со што ние се имаме одлучено за доменот: Што e веб хостинг, а што домен?
Почеток…

LAMP

Кратенка од имиња на бесплатни програми кои најчесто се користат заедно за да се овозможи хостирање на динамични веб страни:

  • Linux – оперативниот систем
  • Apache, – веб сервер
  • MySQL, систем за менаџмент на базите на податоци или сервер за базите на податоци
  • Perl, PHP, и/или Python, скриптирачки програми.

Почеток…

RAID

Кратенка од: redundant array of inexpensive disks е технологија која овозможува поврзување на повеќе дискови така да тие функционираат заедно и овозможуваат побрза и посигурна работа и чување на податоците. Постојат повеќе видови на RAID конфигурации. Највеќе се користи за да обезбеди backup решение во случај еден од дисковите да откаже, а исто така и во брзина на пристап на податоците помеѓу поврзаните дискови, но доколку еден откаже се губат сите податоци. Сепак се користат и комбинирани видови на RAID се со цел да се добие најдобра безбедност и брзина за податоците кои се наоѓаат на дисковите. Хостинг компаниите ја користат оваа технологија кај серверите.
Почеток…

SSL

Кратенка од: Secure Sockets Layer е протокол креиран за да се справува и за да врши обезбедување на сензибилни и битни податоци како на пример број на кредитни картички, лични податоци на клиентите и сл. Највеќе се користи кај e-commerce веб страните. SSL веб адресата почнува со https. S означува secure однозно безбеден веб сајт каде комуникацијата е енкриптирана.
Почеток…

Firewall

Може да биде на ниво на софтвер или хардвер. Систем кој овозможува заштита на веб серверите. Овие заштитни ѕидови познати како firewalls штитат од хакерски напади како и недозволени пристапи кон серверите.
Почеток…

DDoS

Кратенка од: Distributed Denial of Service Attack е најчест тип на напади на мрежните сервиси. Овој вид на напад предизвикува најголеми проблеми кај хостинг индустријата и хостинг провајдерите. Нападот користи техника на искористување на легалниот трафик, односно сообраќај што провајдерот го користи за да овозможи услуга на клиентите, при што го исполнува со нелегален трафик и на тој начин врши оневозможување на нормална функција на сервисите кај хостинг серверот.
Почеток…

Cgi-bin

Ова е директориум на хостинг серверот каде се сместуваат cgi скрипти за вршење на одредена функција, како на пример праќање на емаил пораки.
Почеток…

Bandwidth

Користен термин во хостинг индустријата кој го обележува протокот на податоците, односно лимитот за проток на податоци како и трафикот кој што е пренесуван. Доколку вие закупите одреден хостинг пакет, хостинг компанијата ви го лимитира трансферот на податоци познат како bandwidth на месечно ниво и ви дава одредена цифра на пример, 20GB. Колку повеќе посетители имате на вашиот веб сајт, толку повеќе ќе биде трошен трафикот и bandwidth-от ќе биде поголем. Ова е битен фактор при избор на еден хостинг пакет. Ако вашиот веб сајт содржи една слика со големина од 1mb и доколку во текот на еден месец имате 10000 посетители, тогаш вашиот потрошен трафик за месецот ќе биде: 10000mb. Ако вие имавте хостинг пакет со месечен bandwidth од 5000mb, тогаш ќе имавте проблем затоа што посетителите ќе потрошат повеќе трафик од дозволениот лимит.
Почеток…

Webmail

Е програма која што се користи кај хостинг серверите и главна функција е прегледување на емаил пораките преку вашиот пребарувач, како и испраќање на нови емаил пораки кога ќе посакате. Предноста е во тоа што може да испраќате и примате пораки и истите да ги прегледувате преку било кој веб пребарувач на било кој компјутер поврзан на интернет.
Почеток…

POP

Кратенка од: Post Office Protocol е протокол кој се користи при комуникација на емаил серверите и негова главна цел е примање на пораките. Овој протокол го користи 110 портот.
Почеток…

SMTP

Кратенка од: Simple Mail Transfer Protocol. За разлика од POP протоколот, SMTP се користи за испраќање на емаил пораки. Овој протокол го користи 25 портот.
Почеток…

Cron Jobs

Се користат доколку треба да се повторува одредена работа повеќе пати. Тоа може да биде некоја скрипта што треба да се извршува секој ден точно во 12 часот. Со помош на cron jobs може да се задава кога сакаме да се изврши одредена работа, дали таа да се повторува и точно во кои периоди да се извршува/да се повторува.
Почеток…

cPanel

Е најупотребуван контрол панел во хостинг индустријата. Овој контрол панел овозможува подобра контрола над хостингот, подобро менаџирање, лесни функции како креирање на емаил адреси, автоматски препраќачи, автоматски одговарачи на емаил пораки, креирање на бази на податоци, сетирање на cron jobs, интегриран file manager кој овозможува работење со податоците на хостингот и многу други корисни работи. МКхост го користи овој контрол панел и клиентите се задоволни со него. Има можност и за менување на темите и изгледот на панелот.
Почеток…

Email forwarders

Или на Македонски: препраќачи на емаил пораки е доста корисна работа кога сакате еден емаил да биде препратен на повеќе други. Дали имате еден куп на емаил адреси и неможете да ги контролирате? Изберете еден главен и насочете ги сите други да ви ги препраќаат емаил пораките со помош на оваа опција која што би требало секој емаил сервис провајдер да ви ја овозможи. Така на еден емаил ќе ви бидат препраќани пораките од другите емаил сандачиња и доволно ќе е да го проверувате само главното емаил сандаче.
Почеток…

post

Веб хостинг и видови на хостинг услуги

Веб хостинг и видови на хостинг услуги

Веб хостинг и видови на хостинг услуги

Ќе продолжиме со серијалот на постови кои заеднички со МКХост ги подготвуваме со цел еден претприемач да го зголеми своето претприемничко знаење и да не биде затечен во користење на различна техничка терминологија за оваа намена. Претходниот пост беше за 5 елементи кои Вие како еден претприемач треба да ги разгледате пред да одлучите за избор на хостинг компанија која ќе го хостира Вашиот бизнис веб сајт.

Ќе продолжиме со подетално објаснување на тоа што претставува веб хостинг и видови на хостинг услуги како би можеле да ја изберете онаа која на Вас како претприемач најмногу би ви одговарала.

Што претставува веб хостинг?

Веб хостинг односно web hosting (на англиски) едноставно може да се дефинира како хостирање на вашата веб страна на Интернет. Може да го дефинираме и како процес на физички поставување на веб сајт на физички сервер, на безбедна локација, кај одреден хостинг провајдер. Под сервер се подразбира физичка машина (компјутер) кој е наменет за опслужување на одредена задача, во овој случај оддржување на веб сајтот кој што е поставен на серверот. Под оддржување мислиме на стабилноста на веб сајтот, сигурноста, брзината на прикажување до крајните посетители, можност за ажурирање на податоците на сајтот…

Многу често терминот веб хостинг се користи и се искажува само: хостинг. Повеќето не го разбираат овој термин и бараат објаснување за неговото значење. Можеби некогаш сте се запрашале како вие да си отворите сопствена веб страна и да ја презентирате на интернет? Доколку да, сигурно сте побарале помош од некого кој веќе е упатен во таа област и првото што би ви го кажал е дека треба да си обезбедите веб хостинг или само хостинг. Зборот хостинг означува дејствие кое е во тек, често се употребува и надвор од интернет сферата кај Англискиот јазик како на пример: Chris will be hosting the 100 Most Shocking Music Moments countdown show on VH1 tonight (Крис ќе ќе ги хостира 100-те најшокантни музички моменти на VH1 вечерното шоу). Веб страната вие ја креирате на вашиот компјутер и потоа ја хостирате со услуга наречена веб хостинг која досега ја дефиниравме.

Доколку сте го слушнале и зборот домен (domain на англиски), често употребуван и како domain name, а во исто време и за веб хостинг и не сте можеле да направите разлика тогаш на овој линк може да прочитате повеќе за разлика помеѓу веб хостинг и домен.

Секоја веб страна што ја посетувате и отварате преку вашите веб пребарувачи е хостирана и достапна на Интернет преку веб хостинг услугите. Веќе знаеме дека интернетот е мноштво од милиони веб страни, каде секојдневно се стартуваат нови и нови, индустријата и хостинг бизнисот се потребни за да ја оддржуваат инфраструктурата на интернетот и да обезбедат поголема достапност на веб сајтовите. Поради овие факти постојат многу компании кои ги нудат овие веб хостинг услуги за одредена цена во зависност од типот на хостинг услугата.

Видови на веб хостинг услуги

Постојат повеќе видови на хостинг услуги. Тие се категоризирани во неколку наслови поделени според нивните карактеристики, па еве едни од најкористените веб хостинг услуги:

Shared Web Hosting

Хостинг сервер

Хостинг сервер

Shared хостинг пакетите се највеќе користени во хостинг индустријата од страна на клиентите како и нудени од хостинг компаниите. Shared (деллив или подделен хостинг) се нарекува поради тоа што целиот простор од еден сервер е поделен на повеќе клиенти и нивните веб страни. Пример хостинг компанијата има стартувано и подесено хостинг сервер со 500gb хард диск. Доколку земеме дека 100gb се користат за оперативниот систем и потребите на администраторите на серверот, теоретски може да кажеме дека остануваат 400gb хостинг простор кој што може да биде поделен(shared) со повеќе клиенти, односно да бидат хостирани повеќе веб страни на серверот и да го делат овој простор. Може да се постават 100 веб страни и секоја да има лимит од 4gb простор. Клиентот добива одреден лимит, а негово е дали ќе го исполни до крај или ќе искористи само неколку проценти од хостинг просторот. Така да теоретски на овој пример може да се стартуваат највеќе 100 веб страни со лимит од 4gb со што би се исполнил целиот хард диск од серверот.

Сепак многу хостинг компании вршат т.н. overselling на хостинг просторот знаејќи дека не сите ќе го користат понудениот хостинг лимит до крај и на тој начин нудат многу поголеми лимити. Доколку 1 од 100 го исполни хостинг просторот до крај тогаш другите 99 имаат само одреден процент исполнето и на тој начин тоа се компензира со поголеми понуди и привлекување на клиентите.

Сепак моја препорака е да се избегнуваат овие overselling хостинг компании, поради една добра причина: што ако сите 100 клиенти го исполнат хостинг просторот до крај? – Ова нема да биде возможно затоа што физички хард дискот нема да дозволи и ќе настане конфликт, поспори перформанси и слично. Ова е прост пример за хостинг сервер и shared хостинг пакетите, но во денешно време хостинг серверите се многу пософистицирани и имаат големи перформанси како и се поврзуваат заедно за опслужување на сајтовите на клиентите.

Кај shared хостинг пакетите процесорот, рам меморијата се делат помеѓу корисниците на истиот сервер. Доколку не постојат лимитирање на ресурсите може во одреден момент еден веб сајт односно клиент да го искористува максимално процесорот, а другите сајтови да бидат спори во дадениот момент.

Предности на Shared Хостинг

  • Цената е прикладна и прифатлива
  • Можност за лесна надградба на поголем пакет
  • Можност за повеќе технологии на истиот хостинг пакет.

Недостатоци на Shared Хостинг

  • Намалување на перформанси на сајтот
  • Неможност за инсталирање на апликации по потреба
  • Безбедноста на сајтот е загрозена доколку некој друг сајт од истиот сервер е мета на напади\

Заклучок

Shared хостинг пакетите се најефтината опција за хостирање на веб сајт. Се препорачува за мали и средни веб страни. Со него може да се користи и емаил сервис, како и други сервери кои спаѓаат за иста цена. Стандардните хостинг пакети на МКхост може да ги проверите на следниот линк: http://www.mkhost.com.mk/linux/

Виртуелен приватен сервер (ВПС)

Виртуелен сервер се нарекува виртуелен затоа што тој практично е дел од физичкиот дедициран сервер. На еден дедициран сервер се стартуваат повеќе виртуелни сервери кои секој си има посебна работна виртуелна околина. Хард дискот, рам меморијата, процесорот, сите се лимитираат и на одреден виртуелен хостинг сервер му се доделуваат лимитирани ресурси. Пример виртуелен приватен сервер со 60gb хард диск, односно хостинг простор,1024mb рам меморија и QUAD CORE процесор. Доколку сакате да имате контрола врз хостинг платформата, но не ви се потребни ресурсите за дедициран сервер тогаш ВПС опцијата е погодна за вас. Се користи виртуелизација на целиот сервер и секој ВПС сервер посебно си работи независно од другите ВПС сервери на главниот дедициран сервер. Можете во секое време да го рестартирате, да инсталирате дополнителен софтвер по ваши потреби и често имате root/administrator пристап.

Дедициран веб хостинг (Dedicated web hosting)

Веб страни на кои им се потребни целосни ресурси на еден сервер се хостираат на цел дедициран сервер. Големи веб страни со многу посети или хардверски побарувања се хостираат на ваков вид на хостинг – дедициран веб хостинг.

Корисникот има цел пристап до физичкиот сервер, додека веб сајтот што се хостира слободно без лимитирања може да ги користи сите ресурси и да опслужи што е можно повеќе посетители.

Сепак ваквиот тип на веб хостинг е поскап за разлика од другите хостинг решенија но затоа нуди големи перформанси.

Реселер веб хостинг (Reseller web hosting)

Доколку имате повеќе веб страни, или сте веб дизајнер кој што сака да ги хостира сите веб страни на неговите клиенти тогаш ова е погодна веб хостинг солуција за вас. Реселер веб хостинг услугата ви овозможува продавање на свои хостинг услуги до вашите клиенти или како хостинг само за вашите веб страни. Закупувате пакет по ваша желба пример 10gb хостинг простор со 100gb месечен сообраќај и со овие ресурси креирате ваши хостинг пакети и ги креирате за вашите сајтови/клиенти. Хостинг компанијата се грижи за серверот, за неговите надградби, безбедност, вие само креирате пакети.

Ко-локација на сервер

Доколку имате свој хардвер, односно ваша серверска машина која сте ја инсталирале и подесиле, може да ја ко-лоцирате во одреден дата центар кој ќе се грижи за него и ќе го обезбедува со нон-стоп интернет пристап, како и струјно напојување и ќе се грижи за неговата безбедност.

Бесплатен веб хостинг

Како што вели поговорката: „Нема бесплатен ручек“, истото може да го кажеме и за бесплатна хостинг услуга. Можеби сте сретнале на Интернет компании или организации кои нудат бесплатен хостинг, но тие на некој начин ви го наплаќаат со поставување на нивна реклама на вашиот сајт, банери, popup прозорчиња, одредени лимитирање на самиот хостинг, не ви нудат безбедност, backup решенија и можеби кога сакаат може да ви го исклучат, не се грижат многу за стабилноста на серверот…

post

SEO – Оптимизација за пребарувачи

SEO - Оптимизација за пребарувачи Во претходните 10-тина дена имаше еден серијал на написи за оптимизација за пребарувачи (SEO) на претприемач. Бидејќи останаа некако расфрлани се одлучив да ги групирам во овој еден со линкови до секој дел.

Овој серијал всушност претставува еден почетнички водич за спроведување на една ваква оптимизација на Вашиот веб сајт. Па така она што беше опфатено е следново:

  1. SEO – Оптимизација за пребарувачи – Маркетинг средство 60. Овој напис беше најава на серијалот за оптимизација за пребарувачи како еден вид на маркетинг средство на претприемач. Тука навлегов во некои основи на SEO и некои претходни постови во кои ја чепнав оваа проблематика.
  2. Што претставува SEO? SEO не значи измама за да пребарувачот смета дека токму твојата веб страна треба да се појави меѓу првите кога некој пребарува за нешто на интернет. SEO едноставно значи да се прилагоди веб страната за да се обезбеди полесна достапност од страна на пребарувачите…
  3. SEO – Основни столбови – Столб 1 – Клучни зборови. Во овој пост се наведените трите основни столбови на еден SEO процес и целосно се навлезе во првиот од трите столба – истражување и анализа на клучни зборови. Овој столб е еден од најважните столбови за еден SEO процес. Велам најважен бидејќи и останатите два столба ќе ги користат информациите од овој столб.
  4. SEO Основни столбови On-Page оптимизација. Овој наслов се однесува на вториот столб на овој процес. Во овој столб спаѓаат фактори и елементи на кои што вие имате влијание и се наоѓаат на Вашиот сајт и слободно можете да ги менувате, едитирате или организирате, а во исто време имаат влијание на појава на вашата веб страна на резултатите на пребарувачите…
  5. SEO Основни столбови – Off-Page Фактори. Овој наслов се однесува на третиот столб на овој процес. Основата на овој столб е да имате повеќе влезни линкови со подобар квалитет за да имате подобро рангирање на страната со резултати на пребарувачите.
  6. Блогирање како дел од SEO стратегија. Блогирање е една од најдобрите алатки кога станува збор за SEO, особено што претставува и како посебно маркетинг средстви и како алатка за подобрување на Вашите напори во однос на SEO процес…
  7. SEO – Дали размена на линкови вреди? Овој наслов се однесува на размената на линкови што всушност третиот столб ве тера да го правите. Се обидов да презентирам неколку информации и сознанија за ова преку тестирањата и анализите кои ги имам спроведено.
  8. SEO – Алатки кои може да се користат. Во овој последен пост од овој серијал дадовме кратка презентација на најважните алатки (бесплатни) кои можете да ги користите и комбинирате за целиот овој SEO процес кој го опфативме досега.
post

5 Елементи при избор на хостинг компанија

Претприемач и МКХост серијал

Претприемач и МКХост серијал

Во светот е веќе незамисливо малите бизниси да немаат сопствена веб презентација и продажба преку интернет. За оваа намена Ви е потребно место каде сите тие елементи ќе бидат сместени и достапни за глобалната интернет популација. Тоа место го обезбедувате преку хостинг компанија.

Овој пазар во Република Македонија некако во последниве години бележи голем раст. Голем раст, но во исто време проследен со премногу неправилности, „измами“, и секако несоодветен квалитет во однос на она што еден мал бизнис или претприемач ќе треба да го добие.

Развојот на ова индустрија во светски рамки и секако овозможеноста преку глобалниот интернет секој поединец да купи некаков простор од странските компании и тука да го препродава овозможи една целосна збрка и нерегулиран простор во кој најмногу страдаат претприемачите. Во секојдневен контакт со претприемачите слушам различни изјави дека се чувствуват измамени.

Затоа МКХост и Претприемач започнуваат еден серијал на написи кои едноставно ќе се однесуваат на едукација на сегашните или потенцијалните претприемачи во однос на оваа подрачје.

1. Стабилност

Стабилност на системот е една од најважните карактеристики што еден претприемач или еден мал бизнис има потреба од една хостинг компанија.

Примери во однос на стабилноста:

  • Во моментот на одлука за купување Вашиот потенцијален купувач не може да пристапи до Вашата веб страна бидејќи серверот е паднат.
  • Во процесот на донесување на одлука за купување при анализа на бизнисите, потенцијалниот купувач не може да пристапи до производите и/или услугите кои Вие ги нудите бидејќи серверот е паднат.
  • Сакате да испратите/примите битна е-mail порака до/од вашиот бизнис партнер или да ги известите своите потрошувачи за ваш нов производ – но проблем со серверот / e-mail серверот.

2. Бризна

Што се подразбира под брзина за еден мал бизнис кога станува збор за хостинг услуга?

Во денешно време со модерната технологија кај компјутерите и нивниот брз раст, човекот се навикнува на брзо извршување на работите на компјутерот. Нашето време станува драгоцено и потребна ни е секоја секунда од времето.

Брзината на серверот, односно брзината на отварање на вашата интернет презентација е многу важен фактор. Врз брзината влијаат повеќе работи, нормално прво ја земаме интернет конекцијата на посетителот на сајтот, каква конекција има, дали во моментот неговата конекција е зафатена со други интернет апликации и слично.

Важен фактор во брзината на сајтот е и локацијата на хостинг серверот како и неговите софтверски и хардверски перформанси.

Хостинг Сервер

Хостинг Сервер

Локација на серверот, мислиме на физичка локација каде точно е лоциран. Под сервер зборуваме за компјутер, специфично наречен сервер затоа што се користи да опслужува корисници и не спаѓа во групата на персонални компјутери кои се користат само за лична употреба. Хостинг компанијата е таа каде што ги лоцира серверите физички. Серверот е нон стоп под интернет конекција како и струјно напојување со цел да има максимален uptime. Доколку серверот е физички и инфраструктурно поблиску до вас (до вашиот компјутер – вашата интернет конекција), тогаш побрзо ќе комуницира со вас и побрзо ќе ве опслужува. Доколку вие сте во Македонија и серверот е во Македонија, тогаш веројатноста да имате побрз пристап до него во споредба со некој посетител од Америка е многу поголема, затоа што Интернет конекцијата на посетителот од Америка е поврзана помеѓу повеќе провајдери и потребно е поголемо време за комуникација со серверот.

Одредени хостинг компании нудат сервери лоцирани само на една географска локација, додека други на повеќе, сепак клиентот треба да го има ова во предвид кога врши нарачка на одреден хостинг простор и да претпостави од каде ќе му се целните посетители (потенцијалните купувачи) на сајтот за да тие добијат побрз пристап до неговиот сајт и да ги претвори во идни купувачи. На пример, доколку Вашиот бизнис е насочен кон потрошувачи во Македонија најдобро е да изберете вашиот веб сајт да биде хостиран на сервери во Македонија.

Под софтверски перформанси на серверот се подразбира оперативниот систем, системските апликации, преоптеретеноста со податоци …

Под хардверски перформанси подразбираме брзина на процесорот, колку јадрен е процесорот, физички рам и хард диск простор на серверот …

Пример за брзина:

  • Потенцијалниот купувач ја наоѓа Вашата веб страна бидејќи имате вложено огромен труд во SEO или пaк имате активна Google Adwords кампања преку која доаѓа до вашиот веб сајт, но при отворање или разгледување на истата чека премногу време. Се нервира и едноставно го кликнува Х знакчето. Запрашајте се самите колку пати ви се случило да исклучите одреден веб сајт поради тоа што споро се отвара. Спороста ги нервира посетителите и тие налутени го исклчуваат сајтот. Ако му понудите на посетителот брз сајт кој што ќе се отвори веднаш кога ќе ја внесе URL адресата во пребарувачот тогаш тој го направил првиот чекор и дошол на вашиот сајт каде ќе може веднаш да почне да го бара тоа што му треба. Брзина на сајтот е основен предуслов за да го привлечете посетителот и да го претворите во ваш клиент како и да ужива при кликање на линковите во вашиот сајт и брзо скокање од еден на друг линк без чекања.

3. Доверливост

Една хостинг компанија каде што ја хостирате Вашата бизнис веб страна може да има пристап до премногу податоци за Вашиот бизнис кои едноставно претставуваат индустриска тајна. Затоа доверливоста е уште една карактеристика која вие како претприемач ќе мора да ја побарате во една хостинг компанија.

Неколку препораки:

  • Проверете колкав број на клиенти имаат?
  • Кои се клиентите на разгледуваната хостинг компанијата?
  • Колку време постои разгледуваната хостинг компанијата?
  • Дали има инвестирано во опрема во Македонија или едноставно само е реселер на странските компании?
  • Доколку е реселер на кои странски компании е реселер и каква е нивната репутација?

Пример со доверливост:

  • Доаѓа конкурентска компанија и му нуди на хостинг провајдерот тајно пари за да му ги даде информациите за бројот на посетители, географска локација на истите, најпосетувани страни со производи… Дали сакате овие информации да бидат во рацете на Вашите конкуренти? Ние не би сакале!

4. Техничка подршка

Кога станува збор за технологијата често пати може да се случат различни непредвидени грешки кои можат да бидат катастрофални по Вашиот бизнис доколку не се реагира брзо. Затоа при изборот на хостинг компанија каде ќе биде хостирана Вашата веб страна внимавајте да има репутација на квалитетна техничка подршка.

Видови на техничка поддршка:

  • Најосновна поддршка преку емаил систем (испраќате емаил пример до: support@imenakompanijata.com)
  • Пософистицирана поддршка преку таканаречен тикет (ticket) систем (отворате ticket и целата комуникација се одвива преку овој ticket, предноста е тоа што имате преглед на сите ваши одговори, како и одговорите на членовите од техничката поддршка како и можноста да реплицирате преку веб – немора секогаш да праќате емаил порака. Исто така предност е и за членовите на техничкиот тим, може повеќе да ви помагаат и одговараат на ticket-от како и да го препратат до одреден одел, ако сте го испратиле на погрешен).
  • Телефонски контакт – ова е најкористен денешен начин на комуникација каде јасно и брзо може да се утврди тоа што се бара. Внимавајте многу хостинг компании не нудат телефонска поддршка, или пак некои нудат но не се секогаш достапни
  • Поддршка преку социјални мрежи како и IM клиенти: SKYPE, MSN … многу клиенти бараат ваков тип на поддршка, затоа што кога сакат може да прашаат за нешто и да добијат веднаш одговор без да чекаат емаил – сепак кај поголеми хостинг компании ваквата поддршка се избегнува
  • Техничка поддршка преку Live Chat – ова е диреткна комуникација на клиентот со некој оператор на сајтот на компанијата при што брзо и директно може да се поставуваат и одговараат прашања без комуникација преку емаил. Се заштедува на време и можност за поставување на повеќе прашања – хостинг компанијата треба да обезбеди вработени кои нон стоп ќе бидат на четот затоа што не се знае кога точно одреден посетител ќе дојде на сајтот на хостинг компанијата да побара помош

Пример со техничка подршка:

  • Се случува технички проблем кој доведува до пад на серверот каде е хостирана Вашата веб страна. Се јавувате на компанијата кај која имате закупено една ваква услуга, но едноставно не можете да ги добиете. Вашите потенцијални купувачи не можат да пристапат до Вашата веб страна иако донеле одлука да купат нешто.

5. Да не е фиктивна компанија?

И секако иако последно, не и најмалку важно. Дали е тоа компанија која поминала низ правниот филтер во Македонија? Дали правниот систем на Македонија е валиден врз компанијата која Ви ги нуди хостинг услугите?

Постојат многу причини зошто го вклучивме и овој елемент кој Вие како претприемач би требало да го разгледате пред да донесете конечна одлука. Тука ќе наведеме неколку прашања:

  • Доколку се случат непредвидени работи кого ќе тужите?
  • Вие сте бизнис – даночен обврзник, како ќе го вратите ДДВ-то?
  • Дали не го прекршувате законот?
  • Денес го има утре го нема – Дали ќе имате штета доколку сите податоци на серверот исчезнат?