post

Терминологија во хостинг индустријата

Серијал за технологија на претприемач и МКХост

Серијал за технологија на претприемач и МКХост

Ќе продолжиме со серијалот на постови кои МКХост и Претприемач ги подготвуваат со цел еден претприемач да го зголеми своето претприемничко знаење и да не биде затечен во користење на различна техничка терминологија за оваа намена. Претходниот пост беше за 5 елементи кои Вие како еден претприемач треба да ги разгледате пред да одлучите за избор на хостинг компанија која ќе го хостира Вашиот бизнис веб сајт. Потоа имавте можност да прочитате за Веб хостинг и видови на хостинг услуги. Сега ќе продолжиме со различната терминологија која се корсти во светот на интернетот и оваа индустрија.

Многу често се среќаваме со одредени термини во хостинг индустријата. За некого тие веќе се познати и јасно знаат што значат, но за некого тоа е нов јазик и затоа ќе дадеме кратки и едноставни објаснувања за неколку жаргони кои најчесто се користат. Секако при објаснување на одреден термин ќе наидете и на други под-термини кои можеби не ви се јасни, но слободно може да пребарувате и за нив на интернет или пак да оставите коментар и ќе се обиедеме да ви ги дообјасниме.

Еве ги термините кои што ќе ги објасниме во постот:

Терминологија - хостинг индустрија

Терминологија - хостинг индустрија

Apache

Еден од најпопуларните Web server (HTTP) програми. Тој игра значајна улога во развивањето на глобалната интернет мрежа www. Веб серверот е бесплатен и има добри перформанси, како и јаки сигурносни карактеристики. Највеќе е користен кај UNIX оперативните системи. Apache веб серверот се користи за опслужување на статични како и динамични веб страни. Според некои статистики Apache веб серверот завзема речиси 50% од опслужување на веб страните. Така да половина од веб страните што ги посетувате на интернет се застапени со овој бесплатен веб сервер.
Почеток…

IIS

Веб сервер на Microsfot за Windows/NT OS. IIS е скратенка од Internet Information Server. Овој веб сервер е втор најупотребуван после Apache со околу 30%.
Почеток…

HTML

Овој збор е кратенка од HyperText Markup Language и претставува програмски јазик за веб страните. Со помош на HTML вашиот веб пребарувач комуницира со веб серверот и на тој начин се прикажува самиот веб сајт. Постојат многу други програмски јазици, но кога веб серверот го процесира сајтот, истиот го враќа до вас преку веб пребарувачот во HTML формат.
Почеток…

HTTP

Овој збор е кратенка од  HyperText Transfer Protocol и претставува протокол во апликациското ниво во системот на интернет. Тој е стандард за клиент-сервер комуникација. Како клиент може да го земеме веб пребарувачот, а како сервер, апликацијата на серверот која што е стартувана за да го хостира веб сајтот. Овие две апликации комуницираат помеѓу себе преку однапред одреден порт (стандарден http порт е 80). Клиентот испраќа одредени информации до серверот побарувајќи ја содржината од веб сајтот, додека веб сервер апликацијата која ги чува овие податоци ги испраќа до веб пребарувачот и така вие ги прегледувате интерактивните информации од сајтот (текстови, слики..).
Почеток…

FTP

Kратенка од: File Transfer Protocol кој овозможува размена на датотеки помеѓу клиентот и серверот или помеѓу два сервера. Во хостинг индустријата FTP е многу користен за прикачување на датотеки кон веб серверот. Преку FTP клиентот ги прикачува фајловите и притоа посетителите на веб сајтот имаат пристап да ги прегледуваат, превземат и слично.
Почеток…

SSH

Кратенка од: Secure Shell е мрежен протокол кој овозможува безбедна комуникација помеѓу два хост-а. Под хост подразбираме компјутер кој што е поврзан на интернет и може да комуницира со други компјутери. SSH бил дизајниран како замена за telnet, се со цел да се овозможи безбедносна комуникација помеѓу мрежите. Комуникацијата е енкриптирана и тоа е добра карактеристика и предност за голема употреба на овој протокол. Највеќе е употребуван кај Unix/Linux базираните оперативни системи.
Почеток…

IP

Кратенка од: Internet Protocol е протокол користен за комуникација и пренос на податочни пакети преку мрежа која го користи Internet Protocol системот познат како TCP/IP. Ова е главен протокол на мрежната инфраструктура на интернет-от. Со помош на протоколот се разменуваат податоци низ интернет.
Почеток…

DNS

Кратенка од: Domain Name System. Секоја веб страна на интернет е хостирана на одреден сервер. Секој сервер активен на интернет има своја адреса, т.н. IP адреса. Секој од нас има своја адреса на живеење, така за да се знае кој сервер и веб страна каде точно е лоцирана и за да не настане хаос, е воведен овој IP ( интернет протокол). DNS – от ни помага во памтење на овие адреси на серверите и веб страните на поедноставен начин – односно со преведување на IP адресата на серверот во одредено име кое е прифатливо за нас. Многу потешко е да ја запамтиме IP адресата: 74.54.191.4 во однос на http://www.vasastrana.com.mk/. Сепак зад DNS, IP и другите протоколи и системи постои цела инфраструктура и многу објаснувања.
Почеток…

Packet-Switching

Е метод кој овозможува префрлање на пакети низ интернет мрежата. Доколку треба да се испратат одредени информации од една локација до друга локација низ интернет мрежата се користи овој метод преку IP протоколот. При префрлувањето на податокот, истиот се „цепи“ на повеќе делчиња познати како пакети со иста големина и истите се испраќаат независно низ интернет мрежата. Тие патуваат низ мрежата и на крајот пристигнуваат до дестинационата локација каде се соединуваат и податокот успешно се пренесува до машината каде што требал да пристигне. Пакетите немора да патуваат по иста патека и немора да доаѓаат редоследно.
Почеток…

SQL

Кратенка од: Structured Query Language е компјутерски јазик за менаџирање на базите на податоци. SQL протоколот се користи за ажурирање на податоци на SQL серверот. Сервери кои имаат поддршка за SQL се познати како SQL сервери. Кога ни е потребна една база со податоци, тогаш ја сместуваме и ја организираме по наши потреби. Со помош на SQL може да вршиме одредени функции кон базата. Функциите се засновани на релационата алгебра. Базите на податоци се широко употребувани низ секојдневието.
Почеток…

MYSQL

Е релационен податочен систем за менаџирање на базите. MYSQL го користат софтверски проекти на кои им е потребна целосна поддршка и организација на податоците во база на податоци. Поддржува multi-user автентификација до повеќе бази, може да се инсталира на повеќе оперативни системи. Највеќе го користат софтверски апликации кои се бесплатни и им е потребна ваков тип на база која е исто бесплатна (под GNU лиценца) како на пример: WordPress, Joomla, phpBB. Исто така се користи и во организација на големи проекти како Wikipedia и Facebook. Така да ако сакате да работите и започнете со одредена база на податоци, тогаш може да го искористите овој бесплатен податочен систем за менаџирање на базите.
Почеток…

PHP

Е скриптирачки јазик кој е дизајниран како примарна цел за креирање на динамични веб страни. PHP кодот е вменат во HTML документот и интерпретиран од веб серверот, ја генерира и прикажува веб страната. PHP генерално работи на веб сервер и е скриптирачки јазик кој е прилагодлив за веб девелопмент на страна на серверот.
Почеток…

Web Hosting

За оние кои сеуште не им е јасен овој основен термин во хостинг индустријата може слободно да прочитаат повеќе на следниот линк: Веб хостинг и видови на хостинг услуги.
Почеток…

Domain Name

Или често кај нас ќе го прочитате и слушнете како домен, домејн, домаин, претставува името на вашата веб страна која се внесува во пребарувачот. Најдобро ќе наведеме со пример. Нашата компанија e МКхост, со што ние се имаме одлучено за доменот: Што e веб хостинг, а што домен?
Почеток…

LAMP

Кратенка од имиња на бесплатни програми кои најчесто се користат заедно за да се овозможи хостирање на динамични веб страни:

  • Linux – оперативниот систем
  • Apache, – веб сервер
  • MySQL, систем за менаџмент на базите на податоци или сервер за базите на податоци
  • Perl, PHP, и/или Python, скриптирачки програми.

Почеток…

RAID

Кратенка од: redundant array of inexpensive disks е технологија која овозможува поврзување на повеќе дискови така да тие функционираат заедно и овозможуваат побрза и посигурна работа и чување на податоците. Постојат повеќе видови на RAID конфигурации. Највеќе се користи за да обезбеди backup решение во случај еден од дисковите да откаже, а исто така и во брзина на пристап на податоците помеѓу поврзаните дискови, но доколку еден откаже се губат сите податоци. Сепак се користат и комбинирани видови на RAID се со цел да се добие најдобра безбедност и брзина за податоците кои се наоѓаат на дисковите. Хостинг компаниите ја користат оваа технологија кај серверите.
Почеток…

SSL

Кратенка од: Secure Sockets Layer е протокол креиран за да се справува и за да врши обезбедување на сензибилни и битни податоци како на пример број на кредитни картички, лични податоци на клиентите и сл. Највеќе се користи кај e-commerce веб страните. SSL веб адресата почнува со https. S означува secure однозно безбеден веб сајт каде комуникацијата е енкриптирана.
Почеток…

Firewall

Може да биде на ниво на софтвер или хардвер. Систем кој овозможува заштита на веб серверите. Овие заштитни ѕидови познати како firewalls штитат од хакерски напади како и недозволени пристапи кон серверите.
Почеток…

DDoS

Кратенка од: Distributed Denial of Service Attack е најчест тип на напади на мрежните сервиси. Овој вид на напад предизвикува најголеми проблеми кај хостинг индустријата и хостинг провајдерите. Нападот користи техника на искористување на легалниот трафик, односно сообраќај што провајдерот го користи за да овозможи услуга на клиентите, при што го исполнува со нелегален трафик и на тој начин врши оневозможување на нормална функција на сервисите кај хостинг серверот.
Почеток…

Cgi-bin

Ова е директориум на хостинг серверот каде се сместуваат cgi скрипти за вршење на одредена функција, како на пример праќање на емаил пораки.
Почеток…

Bandwidth

Користен термин во хостинг индустријата кој го обележува протокот на податоците, односно лимитот за проток на податоци како и трафикот кој што е пренесуван. Доколку вие закупите одреден хостинг пакет, хостинг компанијата ви го лимитира трансферот на податоци познат како bandwidth на месечно ниво и ви дава одредена цифра на пример, 20GB. Колку повеќе посетители имате на вашиот веб сајт, толку повеќе ќе биде трошен трафикот и bandwidth-от ќе биде поголем. Ова е битен фактор при избор на еден хостинг пакет. Ако вашиот веб сајт содржи една слика со големина од 1mb и доколку во текот на еден месец имате 10000 посетители, тогаш вашиот потрошен трафик за месецот ќе биде: 10000mb. Ако вие имавте хостинг пакет со месечен bandwidth од 5000mb, тогаш ќе имавте проблем затоа што посетителите ќе потрошат повеќе трафик од дозволениот лимит.
Почеток…

Webmail

Е програма која што се користи кај хостинг серверите и главна функција е прегледување на емаил пораките преку вашиот пребарувач, како и испраќање на нови емаил пораки кога ќе посакате. Предноста е во тоа што може да испраќате и примате пораки и истите да ги прегледувате преку било кој веб пребарувач на било кој компјутер поврзан на интернет.
Почеток…

POP

Кратенка од: Post Office Protocol е протокол кој се користи при комуникација на емаил серверите и негова главна цел е примање на пораките. Овој протокол го користи 110 портот.
Почеток…

SMTP

Кратенка од: Simple Mail Transfer Protocol. За разлика од POP протоколот, SMTP се користи за испраќање на емаил пораки. Овој протокол го користи 25 портот.
Почеток…

Cron Jobs

Се користат доколку треба да се повторува одредена работа повеќе пати. Тоа може да биде некоја скрипта што треба да се извршува секој ден точно во 12 часот. Со помош на cron jobs може да се задава кога сакаме да се изврши одредена работа, дали таа да се повторува и точно во кои периоди да се извршува/да се повторува.
Почеток…

cPanel

Е најупотребуван контрол панел во хостинг индустријата. Овој контрол панел овозможува подобра контрола над хостингот, подобро менаџирање, лесни функции како креирање на емаил адреси, автоматски препраќачи, автоматски одговарачи на емаил пораки, креирање на бази на податоци, сетирање на cron jobs, интегриран file manager кој овозможува работење со податоците на хостингот и многу други корисни работи. МКхост го користи овој контрол панел и клиентите се задоволни со него. Има можност и за менување на темите и изгледот на панелот.
Почеток…

Email forwarders

Или на Македонски: препраќачи на емаил пораки е доста корисна работа кога сакате еден емаил да биде препратен на повеќе други. Дали имате еден куп на емаил адреси и неможете да ги контролирате? Изберете еден главен и насочете ги сите други да ви ги препраќаат емаил пораките со помош на оваа опција која што би требало секој емаил сервис провајдер да ви ја овозможи. Така на еден емаил ќе ви бидат препраќани пораките од другите емаил сандачиња и доволно ќе е да го проверувате само главното емаил сандаче.
Почеток…

post

Преглед на книга: Crush It!

Преглед на книга: Crush It!

Преглед на книга: Crush It!

Пред неколку дена ја грабнав и ја прочитав оваа книга која е насловена како Crush It!: Why NOW Is the Time to Cash In on Your Passion. Ја купив затоа што претходно знаев за успехот на авторот Gary Vaynerchuk во огромното „раснење“ на неговиот семеен бизнис (продажба на вино) од неколку милиони долари годишно на неколку десетици милиони годишно.

Овој успех го постигнува навистина релативно млад со помош на Wine Library TV. Погледнете (иако можеби не сте заинтересирани за вино) само како успешно ги изведува тестирањата на различните вина. Но, она што мене ми се допадна, а најверојатно и на милионите луѓе низ светот е што она вино за кое смета дека не му се допаѓа го изразува навистина искрено и доста сликовито.

На што се однесува книгата?

Ако треба да дадам со една реченица одговор на тоа на што се однесува оваа книга би го кажал следново:

Користење на микс од самата претприемничка личност и новата технологија за градење на неверојатен бренд преку кој ќе се обезбеди раст и развој на бизнисот.

Книгата едноставно претставува краток преглед на успехот на авторот, односно како навлегол во бизнис светот, што правел, што користел и како сето тоа успеал да го имплементира во раст и развој на бизнисот.

Она што може да се извлече како препорака на авторот во книгата е следново:

  • Започни со она што навистина сакаш да го работиш.
  • Гради свој личен и уникатен бренд.
  • Креирај содржина.
  • Биди реален.
  • Избери платформа/платформи за испорака на таа содржина.
  • Направи светото едноставно да те слуша, чита или гледа.
  • Монетизирај.

Како што забележувате монетизацијата е на крај, додека самите Вие сте на почетокот. Во книгата сите овие елементи се разработени преку примери на користени технологии и процеси за еден ваков успех.

Карактеристики на Crush It!

Како основни карактеристики на оваа книга би ги идвоил следниве:

  • Кратка. Книгата има вкупно 142 страни кои едноставно за два дена ги поминав. Можеби нешто би можело во поголеми детали да се опише, но сепак како опис на еден процес или еден претприемнички пат за сегашноста и иднината е доволно за да се навлезе во суштината.
  • Лесна за читање. Авторот не користи стручна или неразбирлива терминологија со што оваа книга е разбирлива за секого. Мислам дека не постои претприемач кој не слушнал за Facebook, Twitter, Youtube, Blog…
  • Полна со практични примери. Без теорија, но со примери кои се применети од страна на авторот во реалниот живот и дале успех. Примерите од реалниот живот на авторот или пак замислените примери навистина ја прават привлечна содржината.
  • Поттикнува акција. Секој дел од книгата едноставено ќе ве поттикне уште веднаш да пробате нешто ново, да направите обид и да го имплементирате она што ќе го прочитате. Всушност и последниот додаток на книгата претставува еден план на активности за спроведување на наученото или прочитаното.

За кого е наменета оваа книга?

Прва и основна намена на оваа книга е за сегашни или идни претприемачи кои сакаат да се прилагодат кон новите бизнис текови кои едноставно стнуваат стандард. Во услови кога традиционалните маркетинг средства имаат се помалку влијание на потенцијалните купувачи секојдневно се појавуват нови технологии кои едноставно немаат примарна намена да служат како маркетинг средства, но всушност тоа се. За крајот би навел еден цитат од книгата:

Во декември 2008 година потрошив $7.500,00 за понуда на код за бесплтна испорака преку три маркетинг канали – одлична позиција на билборд во new Yersey Turnpike, директна пошта и радио. Билбордот донесе 170 нарачки. Радио кампањата донесе 240 кампањи. Директната пошта нешто повеќе од 300 нарачки. Го твитнав кодот (бесплатно) за бесплатна испорака преку Twitter и добив 1700 нарачки.

post

Веб хостинг и видови на хостинг услуги

Веб хостинг и видови на хостинг услуги

Веб хостинг и видови на хостинг услуги

Ќе продолжиме со серијалот на постови кои заеднички со МКХост ги подготвуваме со цел еден претприемач да го зголеми своето претприемничко знаење и да не биде затечен во користење на различна техничка терминологија за оваа намена. Претходниот пост беше за 5 елементи кои Вие како еден претприемач треба да ги разгледате пред да одлучите за избор на хостинг компанија која ќе го хостира Вашиот бизнис веб сајт.

Ќе продолжиме со подетално објаснување на тоа што претставува веб хостинг и видови на хостинг услуги како би можеле да ја изберете онаа која на Вас како претприемач најмногу би ви одговарала.

Што претставува веб хостинг?

Веб хостинг односно web hosting (на англиски) едноставно може да се дефинира како хостирање на вашата веб страна на Интернет. Може да го дефинираме и како процес на физички поставување на веб сајт на физички сервер, на безбедна локација, кај одреден хостинг провајдер. Под сервер се подразбира физичка машина (компјутер) кој е наменет за опслужување на одредена задача, во овој случај оддржување на веб сајтот кој што е поставен на серверот. Под оддржување мислиме на стабилноста на веб сајтот, сигурноста, брзината на прикажување до крајните посетители, можност за ажурирање на податоците на сајтот…

Многу често терминот веб хостинг се користи и се искажува само: хостинг. Повеќето не го разбираат овој термин и бараат објаснување за неговото значење. Можеби некогаш сте се запрашале како вие да си отворите сопствена веб страна и да ја презентирате на интернет? Доколку да, сигурно сте побарале помош од некого кој веќе е упатен во таа област и првото што би ви го кажал е дека треба да си обезбедите веб хостинг или само хостинг. Зборот хостинг означува дејствие кое е во тек, често се употребува и надвор од интернет сферата кај Англискиот јазик како на пример: Chris will be hosting the 100 Most Shocking Music Moments countdown show on VH1 tonight (Крис ќе ќе ги хостира 100-те најшокантни музички моменти на VH1 вечерното шоу). Веб страната вие ја креирате на вашиот компјутер и потоа ја хостирате со услуга наречена веб хостинг која досега ја дефиниравме.

Доколку сте го слушнале и зборот домен (domain на англиски), често употребуван и како domain name, а во исто време и за веб хостинг и не сте можеле да направите разлика тогаш на овој линк може да прочитате повеќе за разлика помеѓу веб хостинг и домен.

Секоја веб страна што ја посетувате и отварате преку вашите веб пребарувачи е хостирана и достапна на Интернет преку веб хостинг услугите. Веќе знаеме дека интернетот е мноштво од милиони веб страни, каде секојдневно се стартуваат нови и нови, индустријата и хостинг бизнисот се потребни за да ја оддржуваат инфраструктурата на интернетот и да обезбедат поголема достапност на веб сајтовите. Поради овие факти постојат многу компании кои ги нудат овие веб хостинг услуги за одредена цена во зависност од типот на хостинг услугата.

Видови на веб хостинг услуги

Постојат повеќе видови на хостинг услуги. Тие се категоризирани во неколку наслови поделени според нивните карактеристики, па еве едни од најкористените веб хостинг услуги:

Shared Web Hosting

Хостинг сервер

Хостинг сервер

Shared хостинг пакетите се највеќе користени во хостинг индустријата од страна на клиентите како и нудени од хостинг компаниите. Shared (деллив или подделен хостинг) се нарекува поради тоа што целиот простор од еден сервер е поделен на повеќе клиенти и нивните веб страни. Пример хостинг компанијата има стартувано и подесено хостинг сервер со 500gb хард диск. Доколку земеме дека 100gb се користат за оперативниот систем и потребите на администраторите на серверот, теоретски може да кажеме дека остануваат 400gb хостинг простор кој што може да биде поделен(shared) со повеќе клиенти, односно да бидат хостирани повеќе веб страни на серверот и да го делат овој простор. Може да се постават 100 веб страни и секоја да има лимит од 4gb простор. Клиентот добива одреден лимит, а негово е дали ќе го исполни до крај или ќе искористи само неколку проценти од хостинг просторот. Така да теоретски на овој пример може да се стартуваат највеќе 100 веб страни со лимит од 4gb со што би се исполнил целиот хард диск од серверот.

Сепак многу хостинг компании вршат т.н. overselling на хостинг просторот знаејќи дека не сите ќе го користат понудениот хостинг лимит до крај и на тој начин нудат многу поголеми лимити. Доколку 1 од 100 го исполни хостинг просторот до крај тогаш другите 99 имаат само одреден процент исполнето и на тој начин тоа се компензира со поголеми понуди и привлекување на клиентите.

Сепак моја препорака е да се избегнуваат овие overselling хостинг компании, поради една добра причина: што ако сите 100 клиенти го исполнат хостинг просторот до крај? – Ова нема да биде возможно затоа што физички хард дискот нема да дозволи и ќе настане конфликт, поспори перформанси и слично. Ова е прост пример за хостинг сервер и shared хостинг пакетите, но во денешно време хостинг серверите се многу пософистицирани и имаат големи перформанси како и се поврзуваат заедно за опслужување на сајтовите на клиентите.

Кај shared хостинг пакетите процесорот, рам меморијата се делат помеѓу корисниците на истиот сервер. Доколку не постојат лимитирање на ресурсите може во одреден момент еден веб сајт односно клиент да го искористува максимално процесорот, а другите сајтови да бидат спори во дадениот момент.

Предности на Shared Хостинг

  • Цената е прикладна и прифатлива
  • Можност за лесна надградба на поголем пакет
  • Можност за повеќе технологии на истиот хостинг пакет.

Недостатоци на Shared Хостинг

  • Намалување на перформанси на сајтот
  • Неможност за инсталирање на апликации по потреба
  • Безбедноста на сајтот е загрозена доколку некој друг сајт од истиот сервер е мета на напади\

Заклучок

Shared хостинг пакетите се најефтината опција за хостирање на веб сајт. Се препорачува за мали и средни веб страни. Со него може да се користи и емаил сервис, како и други сервери кои спаѓаат за иста цена. Стандардните хостинг пакети на МКхост може да ги проверите на следниот линк: http://www.mkhost.com.mk/linux/

Виртуелен приватен сервер (ВПС)

Виртуелен сервер се нарекува виртуелен затоа што тој практично е дел од физичкиот дедициран сервер. На еден дедициран сервер се стартуваат повеќе виртуелни сервери кои секој си има посебна работна виртуелна околина. Хард дискот, рам меморијата, процесорот, сите се лимитираат и на одреден виртуелен хостинг сервер му се доделуваат лимитирани ресурси. Пример виртуелен приватен сервер со 60gb хард диск, односно хостинг простор,1024mb рам меморија и QUAD CORE процесор. Доколку сакате да имате контрола врз хостинг платформата, но не ви се потребни ресурсите за дедициран сервер тогаш ВПС опцијата е погодна за вас. Се користи виртуелизација на целиот сервер и секој ВПС сервер посебно си работи независно од другите ВПС сервери на главниот дедициран сервер. Можете во секое време да го рестартирате, да инсталирате дополнителен софтвер по ваши потреби и често имате root/administrator пристап.

Дедициран веб хостинг (Dedicated web hosting)

Веб страни на кои им се потребни целосни ресурси на еден сервер се хостираат на цел дедициран сервер. Големи веб страни со многу посети или хардверски побарувања се хостираат на ваков вид на хостинг – дедициран веб хостинг.

Корисникот има цел пристап до физичкиот сервер, додека веб сајтот што се хостира слободно без лимитирања може да ги користи сите ресурси и да опслужи што е можно повеќе посетители.

Сепак ваквиот тип на веб хостинг е поскап за разлика од другите хостинг решенија но затоа нуди големи перформанси.

Реселер веб хостинг (Reseller web hosting)

Доколку имате повеќе веб страни, или сте веб дизајнер кој што сака да ги хостира сите веб страни на неговите клиенти тогаш ова е погодна веб хостинг солуција за вас. Реселер веб хостинг услугата ви овозможува продавање на свои хостинг услуги до вашите клиенти или како хостинг само за вашите веб страни. Закупувате пакет по ваша желба пример 10gb хостинг простор со 100gb месечен сообраќај и со овие ресурси креирате ваши хостинг пакети и ги креирате за вашите сајтови/клиенти. Хостинг компанијата се грижи за серверот, за неговите надградби, безбедност, вие само креирате пакети.

Ко-локација на сервер

Доколку имате свој хардвер, односно ваша серверска машина која сте ја инсталирале и подесиле, може да ја ко-лоцирате во одреден дата центар кој ќе се грижи за него и ќе го обезбедува со нон-стоп интернет пристап, како и струјно напојување и ќе се грижи за неговата безбедност.

Бесплатен веб хостинг

Како што вели поговорката: „Нема бесплатен ручек“, истото може да го кажеме и за бесплатна хостинг услуга. Можеби сте сретнале на Интернет компании или организации кои нудат бесплатен хостинг, но тие на некој начин ви го наплаќаат со поставување на нивна реклама на вашиот сајт, банери, popup прозорчиња, одредени лимитирање на самиот хостинг, не ви нудат безбедност, backup решенија и можеби кога сакаат може да ви го исклучат, не се грижат многу за стабилноста на серверот…

post

SEO – Оптимизација за пребарувачи

SEO - Оптимизација за пребарувачи Во претходните 10-тина дена имаше еден серијал на написи за оптимизација за пребарувачи (SEO) на претприемач. Бидејќи останаа некако расфрлани се одлучив да ги групирам во овој еден со линкови до секој дел.

Овој серијал всушност претставува еден почетнички водич за спроведување на една ваква оптимизација на Вашиот веб сајт. Па така она што беше опфатено е следново:

  1. SEO – Оптимизација за пребарувачи – Маркетинг средство 60. Овој напис беше најава на серијалот за оптимизација за пребарувачи како еден вид на маркетинг средство на претприемач. Тука навлегов во некои основи на SEO и некои претходни постови во кои ја чепнав оваа проблематика.
  2. Што претставува SEO? SEO не значи измама за да пребарувачот смета дека токму твојата веб страна треба да се појави меѓу првите кога некој пребарува за нешто на интернет. SEO едноставно значи да се прилагоди веб страната за да се обезбеди полесна достапност од страна на пребарувачите…
  3. SEO – Основни столбови – Столб 1 – Клучни зборови. Во овој пост се наведените трите основни столбови на еден SEO процес и целосно се навлезе во првиот од трите столба – истражување и анализа на клучни зборови. Овој столб е еден од најважните столбови за еден SEO процес. Велам најважен бидејќи и останатите два столба ќе ги користат информациите од овој столб.
  4. SEO Основни столбови On-Page оптимизација. Овој наслов се однесува на вториот столб на овој процес. Во овој столб спаѓаат фактори и елементи на кои што вие имате влијание и се наоѓаат на Вашиот сајт и слободно можете да ги менувате, едитирате или организирате, а во исто време имаат влијание на појава на вашата веб страна на резултатите на пребарувачите…
  5. SEO Основни столбови – Off-Page Фактори. Овој наслов се однесува на третиот столб на овој процес. Основата на овој столб е да имате повеќе влезни линкови со подобар квалитет за да имате подобро рангирање на страната со резултати на пребарувачите.
  6. Блогирање како дел од SEO стратегија. Блогирање е една од најдобрите алатки кога станува збор за SEO, особено што претставува и како посебно маркетинг средстви и како алатка за подобрување на Вашите напори во однос на SEO процес…
  7. SEO – Дали размена на линкови вреди? Овој наслов се однесува на размената на линкови што всушност третиот столб ве тера да го правите. Се обидов да презентирам неколку информации и сознанија за ова преку тестирањата и анализите кои ги имам спроведено.
  8. SEO – Алатки кои може да се користат. Во овој последен пост од овој серијал дадовме кратка презентација на најважните алатки (бесплатни) кои можете да ги користите и комбинирате за целиот овој SEO процес кој го опфативме досега.
post

5 Елементи при избор на хостинг компанија

Претприемач и МКХост серијал

Претприемач и МКХост серијал

Во светот е веќе незамисливо малите бизниси да немаат сопствена веб презентација и продажба преку интернет. За оваа намена Ви е потребно место каде сите тие елементи ќе бидат сместени и достапни за глобалната интернет популација. Тоа место го обезбедувате преку хостинг компанија.

Овој пазар во Република Македонија некако во последниве години бележи голем раст. Голем раст, но во исто време проследен со премногу неправилности, „измами“, и секако несоодветен квалитет во однос на она што еден мал бизнис или претприемач ќе треба да го добие.

Развојот на ова индустрија во светски рамки и секако овозможеноста преку глобалниот интернет секој поединец да купи некаков простор од странските компании и тука да го препродава овозможи една целосна збрка и нерегулиран простор во кој најмногу страдаат претприемачите. Во секојдневен контакт со претприемачите слушам различни изјави дека се чувствуват измамени.

Затоа МКХост и Претприемач започнуваат еден серијал на написи кои едноставно ќе се однесуваат на едукација на сегашните или потенцијалните претприемачи во однос на оваа подрачје.

1. Стабилност

Стабилност на системот е една од најважните карактеристики што еден претприемач или еден мал бизнис има потреба од една хостинг компанија.

Примери во однос на стабилноста:

  • Во моментот на одлука за купување Вашиот потенцијален купувач не може да пристапи до Вашата веб страна бидејќи серверот е паднат.
  • Во процесот на донесување на одлука за купување при анализа на бизнисите, потенцијалниот купувач не може да пристапи до производите и/или услугите кои Вие ги нудите бидејќи серверот е паднат.
  • Сакате да испратите/примите битна е-mail порака до/од вашиот бизнис партнер или да ги известите своите потрошувачи за ваш нов производ – но проблем со серверот / e-mail серверот.

2. Бризна

Што се подразбира под брзина за еден мал бизнис кога станува збор за хостинг услуга?

Во денешно време со модерната технологија кај компјутерите и нивниот брз раст, човекот се навикнува на брзо извршување на работите на компјутерот. Нашето време станува драгоцено и потребна ни е секоја секунда од времето.

Брзината на серверот, односно брзината на отварање на вашата интернет презентација е многу важен фактор. Врз брзината влијаат повеќе работи, нормално прво ја земаме интернет конекцијата на посетителот на сајтот, каква конекција има, дали во моментот неговата конекција е зафатена со други интернет апликации и слично.

Важен фактор во брзината на сајтот е и локацијата на хостинг серверот како и неговите софтверски и хардверски перформанси.

Хостинг Сервер

Хостинг Сервер

Локација на серверот, мислиме на физичка локација каде точно е лоциран. Под сервер зборуваме за компјутер, специфично наречен сервер затоа што се користи да опслужува корисници и не спаѓа во групата на персонални компјутери кои се користат само за лична употреба. Хостинг компанијата е таа каде што ги лоцира серверите физички. Серверот е нон стоп под интернет конекција како и струјно напојување со цел да има максимален uptime. Доколку серверот е физички и инфраструктурно поблиску до вас (до вашиот компјутер – вашата интернет конекција), тогаш побрзо ќе комуницира со вас и побрзо ќе ве опслужува. Доколку вие сте во Македонија и серверот е во Македонија, тогаш веројатноста да имате побрз пристап до него во споредба со некој посетител од Америка е многу поголема, затоа што Интернет конекцијата на посетителот од Америка е поврзана помеѓу повеќе провајдери и потребно е поголемо време за комуникација со серверот.

Одредени хостинг компании нудат сервери лоцирани само на една географска локација, додека други на повеќе, сепак клиентот треба да го има ова во предвид кога врши нарачка на одреден хостинг простор и да претпостави од каде ќе му се целните посетители (потенцијалните купувачи) на сајтот за да тие добијат побрз пристап до неговиот сајт и да ги претвори во идни купувачи. На пример, доколку Вашиот бизнис е насочен кон потрошувачи во Македонија најдобро е да изберете вашиот веб сајт да биде хостиран на сервери во Македонија.

Под софтверски перформанси на серверот се подразбира оперативниот систем, системските апликации, преоптеретеноста со податоци …

Под хардверски перформанси подразбираме брзина на процесорот, колку јадрен е процесорот, физички рам и хард диск простор на серверот …

Пример за брзина:

  • Потенцијалниот купувач ја наоѓа Вашата веб страна бидејќи имате вложено огромен труд во SEO или пaк имате активна Google Adwords кампања преку која доаѓа до вашиот веб сајт, но при отворање или разгледување на истата чека премногу време. Се нервира и едноставно го кликнува Х знакчето. Запрашајте се самите колку пати ви се случило да исклучите одреден веб сајт поради тоа што споро се отвара. Спороста ги нервира посетителите и тие налутени го исклчуваат сајтот. Ако му понудите на посетителот брз сајт кој што ќе се отвори веднаш кога ќе ја внесе URL адресата во пребарувачот тогаш тој го направил првиот чекор и дошол на вашиот сајт каде ќе може веднаш да почне да го бара тоа што му треба. Брзина на сајтот е основен предуслов за да го привлечете посетителот и да го претворите во ваш клиент како и да ужива при кликање на линковите во вашиот сајт и брзо скокање од еден на друг линк без чекања.

3. Доверливост

Една хостинг компанија каде што ја хостирате Вашата бизнис веб страна може да има пристап до премногу податоци за Вашиот бизнис кои едноставно претставуваат индустриска тајна. Затоа доверливоста е уште една карактеристика која вие како претприемач ќе мора да ја побарате во една хостинг компанија.

Неколку препораки:

  • Проверете колкав број на клиенти имаат?
  • Кои се клиентите на разгледуваната хостинг компанијата?
  • Колку време постои разгледуваната хостинг компанијата?
  • Дали има инвестирано во опрема во Македонија или едноставно само е реселер на странските компании?
  • Доколку е реселер на кои странски компании е реселер и каква е нивната репутација?

Пример со доверливост:

  • Доаѓа конкурентска компанија и му нуди на хостинг провајдерот тајно пари за да му ги даде информациите за бројот на посетители, географска локација на истите, најпосетувани страни со производи… Дали сакате овие информации да бидат во рацете на Вашите конкуренти? Ние не би сакале!

4. Техничка подршка

Кога станува збор за технологијата често пати може да се случат различни непредвидени грешки кои можат да бидат катастрофални по Вашиот бизнис доколку не се реагира брзо. Затоа при изборот на хостинг компанија каде ќе биде хостирана Вашата веб страна внимавајте да има репутација на квалитетна техничка подршка.

Видови на техничка поддршка:

  • Најосновна поддршка преку емаил систем (испраќате емаил пример до: support@imenakompanijata.com)
  • Пософистицирана поддршка преку таканаречен тикет (ticket) систем (отворате ticket и целата комуникација се одвива преку овој ticket, предноста е тоа што имате преглед на сите ваши одговори, како и одговорите на членовите од техничката поддршка како и можноста да реплицирате преку веб – немора секогаш да праќате емаил порака. Исто така предност е и за членовите на техничкиот тим, може повеќе да ви помагаат и одговараат на ticket-от како и да го препратат до одреден одел, ако сте го испратиле на погрешен).
  • Телефонски контакт – ова е најкористен денешен начин на комуникација каде јасно и брзо може да се утврди тоа што се бара. Внимавајте многу хостинг компании не нудат телефонска поддршка, или пак некои нудат но не се секогаш достапни
  • Поддршка преку социјални мрежи како и IM клиенти: SKYPE, MSN … многу клиенти бараат ваков тип на поддршка, затоа што кога сакат може да прашаат за нешто и да добијат веднаш одговор без да чекаат емаил – сепак кај поголеми хостинг компании ваквата поддршка се избегнува
  • Техничка поддршка преку Live Chat – ова е диреткна комуникација на клиентот со некој оператор на сајтот на компанијата при што брзо и директно може да се поставуваат и одговараат прашања без комуникација преку емаил. Се заштедува на време и можност за поставување на повеќе прашања – хостинг компанијата треба да обезбеди вработени кои нон стоп ќе бидат на четот затоа што не се знае кога точно одреден посетител ќе дојде на сајтот на хостинг компанијата да побара помош

Пример со техничка подршка:

  • Се случува технички проблем кој доведува до пад на серверот каде е хостирана Вашата веб страна. Се јавувате на компанијата кај која имате закупено една ваква услуга, но едноставно не можете да ги добиете. Вашите потенцијални купувачи не можат да пристапат до Вашата веб страна иако донеле одлука да купат нешто.

5. Да не е фиктивна компанија?

И секако иако последно, не и најмалку важно. Дали е тоа компанија која поминала низ правниот филтер во Македонија? Дали правниот систем на Македонија е валиден врз компанијата која Ви ги нуди хостинг услугите?

Постојат многу причини зошто го вклучивме и овој елемент кој Вие како претприемач би требало да го разгледате пред да донесете конечна одлука. Тука ќе наведеме неколку прашања:

  • Доколку се случат непредвидени работи кого ќе тужите?
  • Вие сте бизнис – даночен обврзник, како ќе го вратите ДДВ-то?
  • Дали не го прекршувате законот?
  • Денес го има утре го нема – Дали ќе имате штета доколку сите податоци на серверот исчезнат?
post

Портфолио приод за менаџирање на потрошувачи

Портфолио приод за менаџирање на потрошувачи претставува една навистина квалитетна алатка во процесот на менаџирање на Вашите потрошувачи и секако соодветна алокација на Вашите ресурси кон оние вистинските потрошувачи. Оваа тема е навистина доста широка и може да користи различни научни и практични аспекти за приодот кој еден бизнис или еден претприемач може да го изберете. Тука ќе презентираме еден портфолио модел кој сепак Вие самите ќе си одлучите како ќе го користите, но се надевам дека ќе ви даде идеја за примена во Вашиот сопствен бизнис.

Досега на претприемач опфативме неколку написи во однос на потрошувачите, нивната сегментација и користењето на бизнис ресурсите врз основа на тие информации од сегментацијата и вредноста на потрошувачите. Еден од тие постови беше и RFM формула за сегментација на потрошувачи.

Вредност на потрошувачите

Целта на овој приод како и на повеќето приоди кои се користат при сегментација на потрошувачите е да се определи вредноста на секој потрошувач и истите да се групираат соодветно на таа вредност.

Како и се друго останато во бизнисот така и потрошувачите имаат една една вредност. Еден финансер кога гледате во еден бизнис гледа низ актива и пасива. Тоа се елементи кои се изразуваат во парични единици. Но, во таа актива воопшто не се содржани потрошувачите кои сепак претставуваат еден имот за секој бизнис. Имот кој можеби претставува имот со најголема вредност за еден бизнис, бидејќи без потрошувачи нема ни бизнис, нема ни претприемач.

Секој имот во Вашиот бизнис има сегашна вредност, но има и некоја идна вредност (зголемена или намалена), па така и потрошувачите како еден имот може да имаат сегашна и идна (потенцијална) вредност. На пример, сегашна вредност може да биде:

  • Износ на месечен приход.
  • Износ на годишен приход.
  • Кумулативен приход до денес.
  • Месечен профит.
  • Кумулативен профит.
  • Годишен профит.
  • Кумулативен износ на продадени парчиња, килограми, тони…
  • …

Забележувате дека може да постојат различни начини преку кои еден бизнис може да ја пресмета сегашната вредност на еден купувач. За разлика од сегашната вредност, потенцијалната вредност може да бидат истите фактори само определени за еден иден период на време. На пример, сегашен кумулативен профит од овој потрошувач е збир на профит од сите продажби до денешен ден, додека потенцијалната вредност ќе биде збир на профит до денешен ден плус збир на профит во идната година.

Портфолио на вредноста на потрошувачите

Доколку овие вредности во вид на сегашна и идна (потенцијална) вредност на потрошувачите ги поставиме во еден квадрант ќе го добиеме портфолио на вредноста на потрошувачите како на сликата подолу.

Портфолио на вредноста на потрошувачите

Портфолио на вредноста на потрошувачите

Забележувате дека имаме 4 групи на потрошувачи:

  1. Потрошувачи кои имаaт слаба сегашна и слаба потенцијална вредност. Оваа група на потрошуваче се оние потрошувачи кои само еднаш купиле и веќе ги нема. Иако не можеме да кажеме дека еден бизнис нема корист од вакви потрошувачи сепак не треба да се трошат премногу ресурси заради раст на нивниот потенцијал. Најверојатно вие веќе сте потрошиле пари преку различни маркетинг кампањи за тие да дојдат да купат нешто или пак да нарачаат преку веб страната нешто, но тука завршува животниот циклус на еден потрошувач за Вашиот бизнис. Затоа едноставно заборавете ги.
  2. Потрошувачи кои имаaт слаба сегашна и висока потенцијална вредност. Ова се новостекнати потрошувачи. Бидејќи сеуште се нови имаат слаба сегашна вредност поради недостаток на историја со Вашиот бизнис. Но, затоа имаат висока потенцијална вредност и заради тоа Вашиот бизнис ќе мора да се насочи на зголемување на овие потрошувачи како и соодветно одржување во натамошниот процес од животниот циклус на еден потрошувач за Вашиот бизнис. Доколку на вистинскиот начин се менаџираат овие потрошувачи тие ќе станат дел од десниот горен квадрант.
  3. Потрошувачи кои имаaт висока сегашна и слаба потенцијална вредност. Ова се потрошувачи кои имаат одлична историја со Вашиот бизнис, но заради некоја причина потенцијалната вредност им е намалена. Затоа за ова група е потребно да се дизајнираат специјализирани програми за задржување на потрошувачите како би им ја зголемиле и потенцијалната вредност.
  4. Потрошувачи кои имаaт висока сегашна и висока потенцијална вредност. Ова се најважната движечка сила за секој бизнис. Овие потрошувачи го генерираат најголемиот приход за Вашиот бизнис и ќе продолжат да го генерираат. Потребно е да се задржат овие потрошувачи и да им се обрне соодветно внимание за да останат во оваа група.
post

RSS – Маркетинг Средство 61

RSS како маркетинг средство

RSS како маркетинг средство

RSS навистина може да претставува моќно маркетинг средство за еден бизнис и еден претприемач. Ова е 61-вото маркетинг средство на претприемач по еден турбо серијал за SEO. Досега бевме сконцентрирани околу креирање на содржина на интернетот преку Вашата бизнис веб страна и блог. Ова маркетинг средство е повеќе за распространување на таа содржина.

Постојат многу дилеми дали ова маркетинг средство треба да се применува. Па така има некои кои мислат дека доколку овозможите RSS потенцијалните купувачи нема да стигнат до Вашата веб страна каде може да ја забележат Вашата понуда туку само ќе ја прочитаат информацијата преку RSS читачот. Но, сепак сметам дека не треба да се размислува на ваков начин. Со овозможена RSS технологија Вие само ја правите широко подостапна Вашата содржина, а со тоа и маркетинг елементите во неа. Сепак за да го искористите максимумот ќе треба таа содржина да биде изработена доста професионално со што ќе се намали ефектот на стравот од губење на посетители кон веб страната.

Што е RSS?

Наједноставно кажано RSS претставува технологија со која се овозможува автоматско превземање на содржините од веб страните кои ве интересираат.

Читателот користи некој RSS читач преку кој секогаш кога веб страните чии RSS фидови ги има поставено во тој читач ќе добие информација дека има нешто ново објавено и ќе може едноставно да го прочита преку тој читач или пак ако е само делумен текст да кликне на прочитај повеќе и преку веб да ја дочита содржината.

Еден ваков читач претставува и Google Reader во кој едноставно ги поставувате RSS URL-ата до различните веб страни од Ваш интерес и следите и читате што излегува како новитет.

Google Reader како еден RSS читач

Google Reader како еден RSS читач

Една веб страна преку RSS URL изгледа на ваков начин:

RSS Feed

Како изгледа RSS Feed

RSS како маркетинг средство

Што Вие како претприемач и Вашиот бизнис добивате со воспоставување на RSS како маркетинг средство преку Вашата бизнис веб страна или блог? ќе се обидам да дадам една мала листа на бенефициите што еден бизнис може да ги добие со ова маркетинг средство:

  1. RSS маркетинг е едноставно и секако без трошоци при што можете да го воспоставите системот уште денес и да започне да функционира под услов да имате свежа содржина на Вашиот бизнис блог.
  2. Целата Ваша онлајн содржина и маркетинг пораки ќе биде лесно достапна за оној кој сака да биде достапна. Се сеќавате за влезен маркетинг и маркетинг базиран на одобрение.
  3. Намалена веројатност дека некоја од RSS пораките во вид на Ваша онлајн содржина нема да стигне онаму каде што треба заради spаm филтрите.
  4. Можност за споделување на квалитетната содржина помеѓу потенцијалните купувачи при што ќе се зголеми на Вашата веб страна а со тоа и видливоста на Вашиот бизнис.
  5. Можност Вашата содржина да биде објавена на некоја друга веб страна и доколку тие што реобјавуваат содржини постапат онака како што треба да достават линк до Вашата веб страна ќе ја зголемите Вашата видливост како и онлајн репутацијата во очите на пребарувачите за што зборувавме во Off Page фактори на еден SEO процес.
  6. RSS маркетинг ќе овозможи градење на долгорочни односи со потенцијалните купувачи притоа воопшто не изгледа како една нападна маркетинг стратегија со која се создава притисок.

Но, треба да бидеме реални, дека започнување со ова маркетинг средство бара неколку предуслови:

  • Да имате бизнис веб страна.
  • Да имате бизнис блог која всушност ќе ги генерира тие RSS содржини.
  • Да имате квалитетни содржини. Ова се однесува на тоа да не продавате, туку да давате информации, а продажбaта сама по себе после квалитетни информации ќе си дојде.
  • Да понудите различни поедноставувања за пристап до вашите RSS содржини. Постојат повеќе опции за користење. Едната беше преку посебен читач што ја споменав погоре, може директно преку интернет прелистувач, може да се обезбедува претплата и преку e-mail…

Доколку немате онлајн содржина која што редовно ќе ја ажурирате воопшто и не го разгледувајте како опција.

post

SEO – Алатки кои може да се користат

SEO Алатки

SEO Алатки

Ќе го завршам овој серијалот за SEO како дел од маркетинг средства на претприемач со овој пост. Тука ќе се обидам да презентирам неколку алатки кои ќе можат да ви помогнат во овој процес. Во овој серијал поминавме нешто општо за SEO, потоа навлеговме во тоа што претставува SEO, го претставивме првиот основен столб на еден ваков процес – истражување и анализа на клучни зборови, вториот столб – On-Page оптимизација или неколку најважни фактори за оптимизација кои се наоѓаат на самата страна, третиот SEO столб – Off-Page фактори за оптимизација, Блогирање како дел од SEO стратегија која само ќе го подбри севкупниот процес и неколку збора за тоа дали размената на линкови вреди.

Во овој последен пост од овој серијал ќе се обидам да дадам кратка презентација на најважните алатки (бесплатни) кои можете да ги користите и комбинирате за целиот овој SEO процес кој го опфативме досега. Сакам да напоменам дека ова не се единствените алатки кои што постојат, но за оваа цел јас ги избрав овие.

1. Алатки за аналитика

Прво нешто што ќе ви биде потребно пред се друго останато е да ја следите аналитиката на Вашата веб страна. Како што веќе напоменав од аналитиката ќе можете да дојдете до клучните зборови преку кои доаѓат посетителите од страната на пребарувачите. Ќе можете да видите од каде доаѓаат посетителите. Ќе можете да забележувате трендови. И уште многу други елементи кои ќе ви донесат квалитетни информации.

  • Google Analytics. Ова е една од најкористените алатки за веб аналитика на сопствената веб страна и алатка која мора да ја имате.

Google Аналитика

Google Аналитика

  • Google Website Optimizer. Оваа алатка овозможува да спроведете одредени тестирања на различни страни кои имаат иста намена и да проверите како различните кампањи влијаат на остварување на целта на страната и секако да ја иставите онаа страна која е подобра во исполнување на сопствената цел. Целта е да преку тестирање успеете да ја оптимизриате веб страната.

Google Website Optimizer

Google Website Optimizer

2. Алатки за анализа на клучни зборови

Во еден SEO процес клучните зборови претставуваат првиот столб н што се базира се она останато што ќе се изведува. Затоа како основа е да спроведете квалитетна анализа.

  • Google Adwords Keyword Suggestion Tool. Ова е одлична алатка каде што може да се започне процесот. Иако е наменета за анализа на зборови за Adwords кампањи сепак може да биде доста корисна и за овој процес на анализа на клучни зборови. Целта е да се генерираат идеи на клучни зборови преку анализа на она што луѓето внесуваат во пребарувачите кога пребаруваат.

Клучни зборови

Клучни зборови

  • Wordtracker Free Keyword Suggestion Tool. Ова е една одлична алатка која може да се искористи за идеи за клучни зборови. Имаат бесплатен и платежен сервис. Но, претставува една од најнадежните алатки кога станува збор за анализа на клучни зборови.

Wordtracker алатка за клучни зборови

Wordtracker алатка за клучни зборови

Резултати за клучни зборови - Wordtracker

Резултати за клучни зборови - Wordtracker

3. Алатки за анализа на конкуренцијата

Многу е важно да се проучи конкуренцијата за да се откријат нивните силни и слаби страни во рангирањето на пребарувачите. Силните страни ќе треба да се копираат додека слабите страни конкурентите да се направат силни за Вас. Ќе презентирам неколку алатки кои може да се користат во една ваква анализа:

  • Alexa. Иако не може да се каже дека оваа алатка е прецизна и точна сепак може да се искористи за да се види некоја слика за конкуренцијата, да се направи споредба и да видат некои елементи кои конкуренцијата ги користи.

Анализа на конкуренција преку Alexa

Анализа на конкуренција преку Alexa

  • Google Website Trends. Оваа алатка покажува проценка на сообраќај, топ 10 веб страни поврзани со оние анализираните, од кои земји доаѓаат посетителите и 10 поврзани клучни зборови со овие веб страни. Оваа алатка е добра доколку анализирате страни со голем сообраќај, бидејќи за помалку посетувани веб страни не дава податоци.

Google Website трендови

Google Website трендови

Доколку сакате да ги следите PR на Google или рангот на Alexa ќе треба да ги инсталирате нивните додатоци за интернет прелистувачот кој го користите па така ќе имате постојано увид во овие елементи во моментот кога разгледувате некоја веб страна преку Вашиот прелистувач.

За крај сакам повторно да потенцирам дека постојат безброј алатки кои во зависност од тоа што анализирате и кои Ви се потребите можете да ги користите. Ова се само еден мал дел кои како основа може да ви помогнат.

post

SEO – Дали размена на линкови вреди?

Дали вреди размена на линкови

Дали вреди размена на линкови

Продолжуваме со серијалот за SEO како дел од маркетинг средства на претприемач. Во овој пост ќе навлезам малку во една табу тема кога станува збор за SEO. Во овој серијал поминавме нешто општо за SEO, потоа навлеговме во тоа што претставува SEO, го претставивме првиот основен столб на еден ваков процес – истражување и анализа на клучни зборови, вториот столб – On-Page оптимизација или неколку најважни фактори за оптимизација кои се наоѓаат на самата страна, третиот SEO столб – Off-Page фактори за оптимизација и Блогирање како дел од SEO стратегија.

Досега веќе напоменав во овој серијал (па и во самото видео во делот за блогирање) дека не е важен број на дојдовни линкови. Многу е поважен квалитетот на тие дојдовни линкови.

Што претставува размена на линкови?

На светско ниво постојат огромен број на маркетинг агенции кои се занимаваат со SEO и чија основна задача е да бараат на интернет веб страни кои ќе бидат интересни за нивните клиенти за добивање на линк преку размена на линкови.

Размена на линкови претставува едноставно еден процес во кој администратор на една веб страна ве контактира Вие да поставите линк до нивната веб страна и за возврат тие ќе постават линк до Вашата веб страна.

Класичниот приод е веб страна А дава линк кон веб страна Б која возвраќа линк кон веб страна А.

Размена на линкови 1-1

Размена на линкови 1-1

Овој начин кој претставува размена на линкови 1 на 1 нема да донесе некои резултати. Затоа што корисноста што А ја дава на Б, Б ја губи со враќање на линк кон А. Набргу и сите оние кои се занимаваат со интернет маркетингот го сфаќаат сето ова и нормално бараат начини да може да се надмине преку внесување на трети страни во процесот на размена. Ова би изгледало нешто вака:

Размена на линкови 1-2-3

Размена на линкови 1-2-3

Затоа и се раѓаат огромен број на сервиси или интернет маркетинг агенции кои се вклучуваат во оваа математика со цел да бидат рангирани подобро од страна на пребарувачите. Потсетете се на видеото во Блогирање како дел од SEO оптимизација.

Но, можам да кажам уште нешто повеќето од „најдобрите“ или „најпрепорачуваните“ вакви сервиси денес не постојат. Значи дека се откриени и нормално нема глас плус во очите на пребарувачите.

Зошто мислам дека не треба да сте преокупирани со размената?

Кога започнав да се занимавам со оваа проблематика прочитав многу материјали од многу SEO експерти. Некои беа квази експерти но, некои се навистина докажани експерти. Кога зборувам за она што сум прочитал не станува збор за читање на блогови, туку различни купени книги, е-курсеви, прирачници, софтвери… Она што не смеам да го изоставам како важен елемент во градењето на знаењето е што успеав да споредам квази експерти со вистински експерти. Разликата е што едни учат за брзо – краткорочно остварување на резултати и едноставно потоа од високото краткорочно летање брзо спуштање на земјата – тоа се квази експертите. Вторите или оние вистинските експерти пропагираат стратешки долгорочен приод за градење на релевантноста и кредибилитетот во очите на пребарувачите што на некој начин и јас преку овој серијал се обидувам да го презентирам.

Купив и еден софтвер специјализиран за SEO кој едноставно служеше за автоматизација на овој процес на размена и анализа да најдеш кои веб страни се добри со кои можеш да се вклучиш во процес на реализација. Извршив тестирање и воспоставив контакти со неколку веб администратори на страни кои согласно анализата беа добри за да разменам линкови. И разменив линкови. Но, знаете што се случи? И по неколку месеци иако PR на мојата веб срана се искачи јас сепак немав ни 10% од вкупниот сообраќај од страна на Google. Значи нешто не беше ОК. Веднаш потоа го откажав софтверот бидејќи плаќав (мислам 47$ месечно за негово користење).

Во исто време како што ја зголемував содржината и секако на некои подолги зборови почнував да бидам рангиран повисоко почнат сами веб администратори или тие интернет маркетинг агенции да ме контактираат за да разменуваме линкови. Понудите навистина ми беа невообичаени. Тогаш јас имав PR 2, а тие ми нудеа линк од страна со PR 4. Еве еден пример како изгледа тоа едно барање:

Предлог за размена на линкови

Ги избришав личните податоци заради заштита на приватноста за имиња, веб страни и компании. Забележувате ми нуди два линка за замена на мојот еден со PR 2. Ова е изведено од една интернет маркетинг агенција за некој нивен клиент. Но, изгледа премногу добро за да биде вистинито.

Што се случува по извесен период откако направивме размена. Тие на понудените страни ставаат илјадници линкови кон други страни при што нормално биле забележани од Google и нивниот PR веќе е за никаде и секако биваат казнети. Мојата веб страна има линк од лоши дечки, па така дел од последиците ги сносам и јас и секако илјадниците веб страни кои учествуваат во оваа трансакција со линкови.

Затоа сметам дека еден ваков систем на размена на линкови не вреди за Вашето рангирање на резултатите на Google. Оваа размена на линкови може да ја направите само во еден ограничен круг на веб страни (на пријатели, блиски или оние на кои им верувате дека нема да претеруваат).

Неколку збора за линкови и нивното значење

На крајот од овој пост сакам да дадам коментар преку неколку зборови за линковите и нивното значење. Линковите се важни, и нивната важност можевте да ја видите во постот за Off-Page фактори за оптимизација. Но, она што е забележително е премногу насочување кон линкување и заборавање на содржината и самата оптимизација на веб страната. Две најважни работи кои се ценети од пребарувачите се следниве:

  • Релевантност. Релевантна содржина за клучниот збор (или зборови) за кои што сакате да бидете високо рангирани.
  • Кредибилитет. Каков кредибилитет има Вашата веб страна. Дали користите валкани техники, кој се се линкува до Вас, до кого се линкувате вие…

Но, она што е интересно тука е што релевантноста може да доведе до зголемент кредибилитет. Колку повеќе имате релевантна содржина и колку повеќе веб страни природно се повикуваат на Вашата содржина, толку подобро ќе бидете рангирани на пребарувачите.

И уште нешто би сакал да додадам како дел од мои анализи и истражувања. Веќе неколку пати напоменав дека различните податоци ги собирам во една база на податоци преку која можам едноставно да се играм и да спроведувам различни анализи. Иако сеуште податоците не се доволно многу (6 месеци) сепак добив интересни резултати по спроведување на корелациона анализа со Пирсонов коефициент на корелација. Имаше периоди кога оваа веб страна имаше PR 3. Сега е повторно на PR 0. Анализата на податоци се однесуваше на тоа движење на сообраќај од страна на Google при PR 3 накај сегашните PR 0. Од таа корелациона анализа се доби силна негативна корелација што значи следново:

  • Поголем PR помал сообраќај од страна на Google.
  • Помал PR зголемен сообраќај од страна на Google.

Овој резултат не мора да биде сосема точен бидејќи се случи тоа што се случи со размена на линкови, а во исто време обрнав поголемо внимание на релевантноста на содржината и соодветната оптимизација согласно клучни зборови. Но, мораме да бидеме реални, овие резултати укажуваат дека она што сите сакаме да го имаме како основа PR нема некое приоритетно или врвно влијание врз резултатите од пребарувањето доколку релевантноста не е на прво место.

Затоа, SEO претставува процес а не едноставна размена на линкови што повеќето интернет маркетинг агенции сметаат. И уште нешто, овој процес ни малку не спаѓа во група на лесни процеси. Ова е само еден дел од она што можам да го опишам во еден блог пост за оваа проблематика.

Прочитајте го последниот пост од овој серијал:

post

Блогирање како дел од SEO стратегија

Блог како дел од SEO стратегија

Блог како дел од SEO стратегија

Ќе продолжам со серијалот за SEO како дел од маркетинг средства на претприемач. Овој пост како дел од овој серијал е повеќе како средство кое може да ви помогне да го подобрите севкупниот процес за кој што досега стана збор. Досега во овој серијал поминавме нешто општо за SEO, потоа навлеговме во  тоа што претставува SEO, го претставивме првиот основен столб на еден ваков процес – истражување и анализа на клучни зборови, вториот столб – On-Page оптимизација или неколку најважни фактори за оптимизација кои се наоѓаат на самата страна и секако третиот SEO столб – Off-Page фактори за оптимизација.

Блогирање е еден од најдобрите алатки кога станува збор за SEO, особено што претставува и како посебно маркетинг средстви и како алатка за подобрување на Вашите напори во однос на SEO процес. Ова подобрување на еден SEO процес особено се однесува на фактот што блогот е одлично средство за градење на содржина на веб.

Корисност на блогот како дел од SEO стратегија

Постојат многу бенефиции за блогот да биде дел од Вашата онлајн стратегија, но тука во однос на еден SEO процес би претставил две најважни корисности.

1. Повеќе страни оптимизирани за повеќе зборови

Во претходниот пост каде што стана збор за Off-Page фактори за оптимизација наведов дека не може да се очекува тие неколку страни во вид на брошура дека ќе бидат оптимизирани за илјадници клучни зборови до кои што дојдовме при истражување и анализа на клучни зборови. Тие страни ќе бидат оптимизирани согласно нивната намена. На пример, Вашата страна со производи ќе биде оптимизирана за клучните зборови за тие производи кои се прикажани на таа страна. Вашата About страна ќе биде оптимизирана за Вашата компанија, на пример бизнис име, брендот, локација, експертиза…

Но, вие имате бреинстормирано илјадници зборови со кои различни категории на Ваши потенцијални купувачи ќе пребаруваат нешто на интернетот. Вашата цел како еден претприемач или маркетинг менаџер на една компанија е да успеете да бидете најдени (вашата веб страна да биде најдена) кога некој ќе пребарува некој од тие зборови. Затоа блогот е едно квалтетно средство преку кое ќе успеете со текот на времето да изградите илјадници страни со квалитетна содржина оптимизирани согласно различните клучни зборови. Ова е таа една предност на блог како дел од SEO стратегија.

2. Почесто нова содржина почесто индексирање

Пребарувачите користат специјални програмчиња наречени како Web Crawler или Web Spider. Овие програмчиња имаат за цел да го пребаруваат интернетот и да бараат нови веб страни на кои прават копија која влегува во базите на податоци на пребарувачите што претставува индексирање, за да се обезбеди побрзо пребарување. Ова значи дека Вие кога пребарувате нешто вие пребарувате низ таа база на податоци на пребарувачите. Затоа за да бидете прикажани на резултатите првин ќе мора тие веб страни да бидат индексирани од страна на пребарувачите.

За тоа какво значење има за еден бизнис кога повеќе веб страни се индексирани ќе можете да прочитате во Повеќе Индексирани Страни – Повеќе Потенцијални Купувачи.

Блогот едноставно претставува средство за постојано објавување на нова содржина на веб страната во вид на посебни артикли кои пак претставуваат посебни веб страни кои се индексираат од страна на пребарувачите. Затоа доколку пребарувачите увидат дека имате почесто додавање на нови веб страни тие почесто ќе доаѓаат да проверат дали има нешто ново заради индексирање. Тоа е нивната работа, тие сакаат содржина и тоа квалитетна содржина.

Неколку препораки за користење на блогот во SEO процес

Тука ќе се обидам накратко да наведам неколку препораки за тоа како да го искористите блогот во еден SEO процес.

1. Избери категории

Пред да започнеш со било што добро размисли за категории кои ќе бидат опфатени на блогот. Доколку веќе ги имаш резултатите од анализата и истражувањето на клучните зборови обиди се да најдеш од 6 до 10 клучни зборови кои ќе бидат категории на блогот. Во исто време, размислувај сите ие зборови да бидат важни и всушност да асоцираат на Вашиот бизнис или бизнис активности.

2. Користи ги препораките од SEO основни столбови

Се она што го наведов како важно во основните столбови на еден SEO процес искористете го и тука. Започнете од зборовите кои ги имате изберено, групирај ги во можни теми или наслови за постови и започни со пишување.

3. Обиди се да објавуваш нови написи барем 2 до 3 пати неделно

Блогот ќе Ви помогне во Вашите SEO напори само доколку останете конзистентни во намерата да успеете. Не можам да кажам дека ќе биде лесно. Ќе треба да дојдете до идеи за можни написи, да ги напишете да внимавате на столбовите, а во исто време да не забегате од содржината и квалитетот, односно од фокусот кон читателот или потенцијалниот клиент. Но, ова е единствениот начин блогот да ви помогне.

4. Ако се двоумиш за платформа, избери Word Press

Иако Word Press најмногу е познат како платформа за блогирање, се почесто гледам целосни веб решенија на оваа платформа. Минатата година е изберен како надобра Open Source CMS платформа за 2009 (платформа за менаџирање на содржина на интернетот). Повеќе детали за ова можете да прочитате на Open Source CMS Award.

Од друга страна кога станува збор за SEO ова е навистина едно квалитетно и солидно решение. Не сакам да навлегувам во детали, но затоа можете да го погледнете видеото од презентацијата на Matt Cutts од Web Spam тимот на Google (преку WorPress.tv) подолу во кое овој експерт дава некои мислења во однос на оваа прашање. Видеото е долго 46 минути, но вреди да се погледа презентацијата бидејќи само ќе го повтори и надополни сето она што можете да го прочитате во овој серијал.

https://videopress.com/v/wp-content/plugins/video/flvplayer.swf?ver=1.21

Продолжете со следниве написи: