post

Како Вашата Продажна Инка Да Ја Одржувате Секогаш Полна?

Да се навратиме малку на најважната работа во еден бизнис и за еден претприемач – продажба.

Не постои претприемач кој не сака продажната инка на неговиот бизнис секогаш да биде полна. Продажна инка претставува процес на продажба и движење на потенцијалните потрошувачи низ патеката која завршува со купувачи.

Доколку Вие како претприемач успеете Вашата продажна инка да ја одржите во состојба секогаш да биде полна, тогаш за Вашиот бизнис не постои опасност од слаба продажба или недостаток на свежи финансии за бизнис цели.

Досега на претприемач неколку пати се занимававме со продажната инка, која ја опфативме во следниве наслови:

Дали продажната инка смее да мирува?

Продажната инка не се наоѓа во состојба на мирување или барем не треба да се најде во една таква состојба. Кога продажната инка ќе започне да мирува, тогаш доаѓа вистинската опасност за бизнисот.

Бизнис продажна инка е слична со вистинската инка која служи за пренос на течноста од еден поголем сад во шише кое има тенок отвор. Течноста се сипува во поширокиот крај на инката додека излегува од потесниот крај на инката. Она што е најважно не допушта течноста да се расипе од страна. Доколку прекинеме да сипуваме течност во поширокиот крај, инката „пресушува“, односно течноста прекинува да излегува од потенкиот крај.

Во бизнис продажната инка во поширокиот крај влегуваат потенцијални потрошувачи кои на некој начин се заинтересирани за Вашиот производ или пак услуга. Продажната инка треба да не дозволува да излезат од оквирот на продажна инка. Но, доколку на поширокиот крај прекине влезот на потенцијалните потрошувачи, продажната инка ќе пресуши, односно од потенкиот крај нема да излегуваат купувачи.

Затоа, продажната инка мора секогаш да биде полна, а тоа е работа на Вас како претприемач и на сите Ваши вработени.

Што е тоа што влијае на продажната инка?

1. Број на потенцијални потрошувачи на влез

Проста математика кажува колку повеќе потенцијални потрошувачи ќе имаме на влез, толку повеќе купувачи ќе имаме на излез. За ова најодговорен е маркетингот.

2. Губење на потенцијални потрошувачи од продажната инка

Од друга страна во секој момент од процесот секој потенцијален потрошувач може да одлучи да излезе од продажната инка. Ова значи намалување на полноста на Вашата продажна инка и губење на потенцијални потрошувачи. Овие довчерашни Ваши потенцијални потрошувачи кои биле блиску до одлуката да станат Ваши купувачи ќе одат кај Ваши конкуренти. Она што е најлошо, голема е веројатноста дека никогаш повеќе нема да имате можност да ги внесете во Вашата продажна инка.

3. Број на купувачи на излез

Колку повеќе купувачи излегуваат на потенкиот крај од инката, толку повеќе се ослободува простор за останатите кои се во самата продажна инка. Доколку нашиот продажен тим не може да процесира повеќе од одреден број на купувачи одеднаш, тогаш процесот на движење од еден потенцијален потрошувач кон купувач ќе биде успорен.

За излезот најодговорни се продажбата и маркетингот. Продажбата е одговорна во однос на тоа колку продажби може да процесира и како ќе ги задоволи купувачите за да одлучат да се вратат повторно да купуваат. Кога станува збор за маркетингот во овој дел најважен е маркетинг миксот (производ, дистрибуција, цена и промоција).

Како секогаш продажната инка да биде полна?

Следниве активности ќе можат да обезбедат Вашата продажна инка постојано да биде полна:

1. Зајакнување на маркетинг активности на влезот

Зајакнувањето не значи да се трошат повеќе пари на различни маркетинг средства. Едноставно ова значи умно користење и комбинација на вистински маркетинг средства кои носат добри резултати.

2. Постојано подобрување на маркетинг активности

Постојано подобрување е процес кој еден претприемач никогаш не треба да го заборави. Се може да се подобри, па и секоја маркетинг активност и кампања на Вашиот бизнис.

3. Постојано подобрување на процесот на продажбата

И повторно подобрување. Онаму каде што маркетингот завршува презема продажбата. Преку маркетинг вие како претприемач сте успеале да привлечете внимане врз Вашиот бизнис и Вашите производи и услуги, но пред вистинската одлука за купување главниот збор го има продажниот тим.

4) Задоволување на купувачите за да се вратат повторно на влезот

Ова е многу важен фактор за секој бизнис. Доколку имате нов производ или пак имате нова услуга полесно ќе ја продадете на некој кој веќе има добро искуство со Вашиот бизнис. Затоа, задоволен купувач постојано ќе биде дел од Вашата продажна инка.

Ова е еден циклус кој никогаш не треба да запре. Доколку запре циклсуот, запира и движењето низ продажната инка, а ќе запре и самиот бизнисот. Што секако не e Ваша цел.

post

Дали Вашата Бизнис Веб Страна е „Обична“ Брошура – Заборавено Поглавје

Вчера на претприемач го објавивме написот со наслов Дали Вашата Бизнис Веб Страна е Обична Брошура во кој ја претставивме сличноста помеѓу повеќе од 95% бизнис веб страни во Македонија со една „обична“ брошура.

Овој наслов го нареков „Заборавено поглавје“, не зошто нешто испуштив туку зошто некако ми помина лимитот од 1000 зборови по еден напис, а јас се заборавив со пишување. Но, една ваква тема и една таква реална анализа на една веб страна не може да се ограничи на 1000 зборови.

Во Дали Вашата Бизнис Веб Страна е Обична Брошура ги наведов некои од слабостите кои ги забележав во 5-минутната анализа, но не сублимирав што треба да направи еден претприемач за да една бизнис веб страна не изгледа како обична брошура.

Која е целта на Вашата бизнис веб страна?

Прво и основно што треба да се запрашате Вие како претприемач е за целта на Вашата бизнис веб страна или веб презентација на Вашиот бизнис.

Доколку немате одговор на оваа прашање или пак едноставно не сакате да имате соодветна бизнис веб страна или пак не сакате да ја искористите за зголемување на продажбата на Вашиот бизнис, тогаш едноставно оставете ја Вашата бизнис веб страна во вид на брошура.

Доколку целта на Вашата бизнис веб страна е една од овие:

  • Зголемена посетеност на веб страната.
  • Зголемена конверзија од обичен посетител во редовен посетител.
  • Зголемена конверзија од редовен посетител во потенцијален купувач.
  • Зголемена конверзија од потенцијален купувач во вистински купувач.
  • Зголемена конверзија од вистински купувач во редовен купувач.
  • Зголемена интеракција со потенцијалните потрошувачи.
  • Зајакнување на бизнис брендот.
  • Генерирање на поголема продажба.
  • Зголемување на можноста да Вие како претприемач и вашиот бизнис бидете поедноставно најдени (повеќе за оваа опфативме во влезен маркетинг).

тогаш морате да преминете во фазата кога Вашата веб страна не треба да биде како „обична“ брошура.

Тука се измешани примарни и секундарни цели на една бизнис веб страна. Но, за целта на овој напис мислам дека се ОК.

Како да ја замените брошурата?

Замената на Вашата веб брошура во високо ефективна и ефикасна веб страна се врши едноставно со замена на статичноста на Вашата веб страна во динамичност. Ова значи целосна промена на стратегијата на Вашата веб презентација. Ова значи постојана работа на Вашата веб страна бидејќи нормално, нема веќе да биде статична (сте ја поставиле на веб сервер и сте завршиле работа).

Презентацијата на производите останува, како и контакт деталите, но додавате еден нов елемент кој се нарекува блог кој ќе се ажурира на одреден временски еприод. За значајноста на блогот за бизнисите пишував тука на претприемач во презентација на резултати од истражување во однос на успешноста на бизнис веб страните кои имаат блог и оние кои немаат. Резултатите беа:

…бизнисите кои користат блог како едно од маркетинг средства наместо статична веб страна за презентација и промоција на бизнисот имаат 55% повеќе посетители, 97% повеќе влезни линкови (други веб страни имаат линк кон нив) и 434% повеќе индексирани страни на Google…

Мислам дека овие бројки се доволен показател да Вие како претприемач го промените Вашето досегашно размислување за Вашата бизнис веб страна.

Постојано подобрување на Вашата бизнис веб страна

Откако ќе ја замените брошурата можете да започнете со постојано подобрување на Вашата веб страна како би можеле потенцијалните клиенти полесно да ве најдат кога бараат решение за нивните проблеми кои Вие како претприемач можете да им ги решите.

За почеток не се замарајте со линкови кон Вашата веб страна, бидејќи гледам дека тоа станува една од основните преокупации. Тие се важни, во секој случај само доколку Вашата бизнис веб страна е соодветно оптимизирана. Што секако е во Ваши раце.

Следниве елементи треба постојано да ги подобрувате:

  • Квалитетна содржина – постојано објавувајте квалитетна содржина која ќе ги интересира Вашите потенцијални купувачи и ќе има вредност за истите.
  • Клучни зборови кои ќе бидат содржани во таа содржина. Се однесува и на примарни и на секундарни клучни зборови.
  • Внатрешни линкови. Интернет светот се гради на линкови, затоа е потребно соодветно да ги оптимизирате внатрешните линкови на Вашата бизнис веб страна.
  • Мета елементите на секоја страна. Ова се елементите кои не се видливи за посетителите, но видливи се за пребарувачите. Во страната која ја анализиравме во претходниот напис воопшто не се вклучени овие елементи.

За почеток ова се доволни елементи кои на Вас како претприемач ќе ви донесат зголемување на посетители, а со тоа и зголемување на потенцијални потрошувачи, и со тоа зголемување на вистински купувачи за Вашиот бизнис.

Ова беше еден мој мал прилог на она како да се искористи потенцијалот на интернетот за бизнис цели. За веб презентација имаме изготвено 10 видео материјали како до бесплатна веб презентација на вашиот бизнис.

post

Дали Вашата Бизнис Веб Страна е Обична Брошура?

Што е веб страна, а што брошура? Дали е исто?

Дали веб страната треба да биде еден вид на онлајн брошура? Во почетокот на интернетот како место каде можете да бидете најдени и Вие како претприемач и Вашиот бизнис сите бизнис веб страни биле брошури. Ова значело дека брошурата која бизнисот ја имал на хартија се преточува во еден електронски документ кој е достапен на интернет.

Но, денес сметам дека Вашата бизнис веб страна најмалку треба да биде во форма на една брошура. Бидејќи ако е во форма на брошура нема да ги искористите полезностите кои една веб страна може да ги донесе за Вашиот бизнис. Но да тргнам по ред.

Што е веб брошура?

За брошура на претприемач веќе пишувавме како едно од маркетинг средства. Во тој напис напишав дека една солидна брошура би требало да содржи:

  • Насловна страна. Насловната страна треба да го наведе читателот да ги читаат останатите страни од брошурата каде ќе биде претставена Вашата понуда…
  • Вашата понуда. Тука давате краток опис на Вашите производи и/или услуги…
  • Ургентност. Брошурата има за цел да предизвика ургентност за акција…
  • Задна страна со информации за контакт…

Да, тоа е една брошура во неколку странички.

Погледнете го сега ова:

  • Насловна страна на брошура – Почетна страна на Вашата бизнис веб страна
  • Ваша понуда на брошура – Производи на Вашата бизнис веб страна
  • Ургентност на брошурата – Промоција како посебна страна на Вашата бизнис веб страна или пак банерче кое ќе трепка за да се преземе некоја акција од страна на посетителот
  • Информации за контакти на брошура – За нас страната на на Вашата бизнис веб страна или пак контакт форма од страна.

Дали сега Ви е јасно зошто над 95% од бизнис веб страните во Македонија претставуваат обични веб брошури. Велам „обични“ затоа што воопшто не е искористен потенцијалот на онлајн присутноста на еден бизнис.

Една Вежба од Претприемач на реален пример

Случајно кога го пишувам овој напис ми дојде на ум да пребарам на Google за зборот „кабли“ како некој потенцијален потрошувач. Резултатите беа точни на прво место се најде Фабрика за Кабли Неготино. Направив една кратка анализа од 5 минути на веб страната при што ќе ви презентирам што најдов и какво е моето мислење.

Дали оваа веб страна е „обична“ веб брошура?

Во секој случај одговорот е ДА. Ги има следниве елементи (страни):

  • Профил
  • Производи
  • Контакт инфо

Се што содржи една брошура.

Фабрика за кабли - Неготино

Дали овој бизнис сака да биде поголем извозник?

Повторно одговорот е ДА бидејќи веб страната е на неколку јазици: англиски, германски и руски како надополнување на македонскиот.

Ова ме натера да ја погледнам англиската верзија, да изберам еден производ и да побарам на Google да видам дали ќе се најде меѓу првите резултати.

Го избрав производот “Connecting Cables” кој ќе го користам во оваа вежба. Инаку сакам да напоменам дека на претходниот збор „кабли“ извршив анализа и со одредена формула ја пресметав конкурентноста (дали е тешко да се биде прв на Google) и добив дека конкуренцијата е слаба и секој може за кратко време да ја престигне оваа фабрика.

Дали за зборот “Connecting Cables” излегува на Google оваа веб страна?

Одговорот е НЕ. Пробав до 5-тата страна за овој збор и нашата Фабрика за кабли од Неготино ја нема. Нормално се откажав од понатамошен преглед бидејќи ми е здодевно.

Значи доколку овој бизнис сака да го зголеми својот извоз мора да го искористи вистинскиот потенцијал на својата веб страна која во моментов е „обична“ брошура која служи само претприемачот да се пофали дека има веб страна.

Дали е тешко да се избие прв на Google за зборот “Connecting Cables”?

Повторно одговорот е НЕ. Зборот “Connecting Cables” е поконкурентен од зборот „кабли“ но, сепак не спаѓа во група на зборови за кои конкуренцијата не може лесно да се победи. Дури на првите две места се веб страни кои се казнети од страна на Google што значи дека со малку вложен труд оваа веб страна ќе може лесно да биде прва на Google за овој збор и секој кој ќе биде заинтересиран за овие кабли во светот веднаш да ја пронајде.

Ова е само еден збор кој го проверив, но од овој еден и останатите може да произлезат и други зборови кои би можеле да се искористат за полесно да биде најдена оваа веб страна.

Дали оваа веб страна изгледа добро?

Супер изгледа во секој случај. Но, сепак е „обична“ брошура, а вообичаено на „обичните“ брошури посетителите ја разгледуваат веб страната, прават неколку клика, си заминуваат и никогаш повеќе не се враќаат.

Кои се основните недостатоци?

  • Почетна страна има една слика и една флеш анимација. Ова изгледа супер, но сепак не е препознатливо во очите на Google и останатите пребарувачи. На истата почетна страна како единствен збор стои Copyright 2004. Се добива впечаток дека на оваа веб страна ништо не е ажурирано веќе 5 години (ова истото се однесува за сите страни на дното од страните).

Дали Вашата бизнис веб страна е обична брошура?

  • Малку текст. Нема доволно текст кој би бил препознаен од пребарувачите. На една од страните со повеќе текст има само 99 збора.
  • Нема елементи кои би го натерале посетителот (потенцијалниот купувач) да се врати на веб страната.
  • Слаба оптимизација на клучни зборови. Клучните зборови по кои треба да бидат најдени навистина се слабо оптимизирани.

За 5 минути толку можев да забележам, а сигурно постојат и други, како на пример немање на нова содржина на веб страната за да биде побргу препознаена од страна на Google итн.

Добро, овој напис не се однесува на SEO (Оптимизација за пребарувачи), туку за тоа дали Вашата веб страна изгледа како „обична“ брошура.

Она што сакам да го потенцирам е дека овој бизнис може многу подобро да биде рангиран на Google (и тоа како прв без да плаќа за реклама на Google Adwords). Тоа треба да се искористи бидејќи доколку успеете да имате повеќе посетители од надвор поголема е веројатноста за нови зделки за извоз. На пример, ако имате месечно 1000 посетители од надвор и успеете со Вашата веб страна да конвертирате само 0,5% во купувачи, тоа се 5 нови зделки или договори за извоз месечно. Ако имате 10.000 посетители со истатата стапка на конверзија ќе имате 50 нови зделки месечно. Што не е неостварливо.

НАПОМЕНА: Воопшто не е злонамерно искористена Фабрика за Кабли од Неготино, ниту пак е спонзориран овој напис на претприемач, едноставно една вежба за тоа како да се подобрат бизнисите во Македонија, а со тоа и целокупната економија. Од друга страна над 95% на веб страни на македонските бизниси се вакви, а оваа е една од подобрите.

post

Влезен Маркетинг – Inbound Marketing

Маркетингот е целосно променет во последниве години. Нешто што беше нормално за привлекување на купувачи пред 3 до 5 години сега веќе не е.

Влезен маркетинг - Inbound Marketing

Претприемачите мора да најде различни начини како да ги привлече потенцијалните потрошувачи за нивниот бизнис. Бизнисите кои нема да го променат начинот на кој го изведуваат маркетингот ќе продолжат да трошат пари на непродуктивни маркетинг кампањи и нормално ќе ја трошат сопствената бизнис потенцијална енергија.

Стилот на маркетингот кој на денешниот мал бизнис и денешниот претприемач му е потребен е влезниот маркетинг, нешто сосема спротивно на оној традиционалниот наречен уште како и излезен маркетинг.

Што претставува влезен маркетинг?

Првин би започнал со нешто за излезен маркетинг и потоа би го споредил со насловот на овој напис – излезен маркетинг.

Излезен маркетинг

Во излезниот маркетинг бизнисот и претприемачот се фокусирани во изнаоѓање на потрошувачи. Се користат техники кои слабо ги таргетираат потенцијалните потрошувачи и кои имаат еден приод кој изгледа како вознемирување на луѓето. Тие користат директна пошта, телемаркетинг, печатени реклами, радио реклами, весници, ТВ реклами, саеми, спамираат, испраќаат несакани mail-ови… Сите овие спаѓаат во еден приод кој Seth Godin го нарекува со кованица вознемирувачки маркетинг бидејќи овие тактики функционираат само во случај кога ќе го вознемират потенцијалниот потрошувач за да му го привлечат вниманието.

Овие приоди се базирани на претпоставка дека доколку ги бомбардираме нашите потенцијални потрошувачи со нашите пораки, тие ќе одвојат неколку секунди да ја примат нашата порака и така ќе го привлечеме нивното внимание врз нашиот бизнис. Но, денес ова вознемирување може да доведе до контраефект на нашата маркетинг кампања.

Не сакам да бидам вознемирен кога гледам интересен филм на ТВ. Не сакам да бидам вознемирен кога во поштенското сандаче ќе најдам еден куп на писма кои не сакам да ги читам. Не сакам да примам е-mail-ови од бизниси кои не ги познавам а не сум побарал да ми праќаат е-mail. Не сакам омилената песна која е хит на неделата да ми ја прекинат со некое ЕПП кога слушам радио.

Дали и вие се чувствувате вознемирено кога ќе ви се случат овие работи?

Од друга страна веќе постои технологија која може да ме спаси од сите овие несакани маркетинг кампањи и која ќе ги направи овие тактики помалку ефективни и поскапи за еден претприемач и неговиот бизнис. Филмот ќе го гледам на DVD, a не на ТВ. на телефон со идентификација на повик можам да ги блокирам сите непознати повици. Spam филтерот си ја врши работата за непосакуваните е-mail пораки. Новата алатка RSS ги прави весниците и магазините помалку ефективни (Иако кај нас некои воопшто не овозможуваат RSS опција, но сепак поголемиот дел овозможуваат).

Дали со ова еден претприемач ќе се запраша што е денес ефективно и ефикасно?

Влезен маркетинг

Влезен маркетинг е целосно спротивен на сето она што го кажавме за излезниот маркетинг:

  • Во излезен маркетинг бизнисите и претприемачите се фокусирани во наоѓање на потрошувачи. Во влезен маркетинг се фокусирани на работите што ќе им помогнат на потенцијалните потрошувачи полесно да го најдат нивниот бизнис.
  • Во излезен маркетинг претприемачот користи маркетинг техники кои слабо ги таргетираат потенцијалните потрошувачи. Влезен маркетинг користи техники кои имаат високо таргетирани потенцијални потрошувачи.
  • Во излезниот маркетинг приоди еден претприемач ги вознемирува луѓето за да го привлече нивното внимание, додека со влезен маркетинг потенцијалните потрошувачи Ве бараат Вас бидејќи сакаат да ве најдат.

Влезниот маркетинг едноставно значи користење на методи кои ќе овозможат Вашите потенцијални потрошувачи лесно да Ве пронајдат кога бараат решение кое Вашиот производ или услуга им го овозможува. Значи со влезен маркетинг ќе имате високо таргетирани потенцијални потрошувачи да дојдат до вашиот бизнис.

Денес потенцијалните потрошувачи имаат целосна контрола на маркетинг медиуми кои ќе ги консумираат. Тие го избираат времето кога и местото каде ќе го консумираат одреден медиум. Вие како претприемач се помалку имате влијание врз оваа.

Поради сето она горенаведено влезниот маркетинг е нешто што е се повеќе и повеќе потребно за еден претприемач и мал бизнис. Но, како да се имплементира?

Одговорете ги следниве прашања поврзани со имплементација на влезен маркетинг:

  • Каде се потенцијалните потрошувачи кои бараат производи и услуги кои што ги нуди и мојот бизнис?
  • Можам ли да бидам таму доколку го бараат она што јас како претприемач го нудам?
  • Како да бидам прв во нивните очи кога тие го бараат она што јас го нудам?

Да го разгледаме влезниот маркетинг со традиционален медиум како флаери. Можете да ги поставите Вашите флаери во поштенски сандучиња во една зграда. Оваа техника е техника на излезен маркетинг. Луѓето од таа зграда секојдневно примаат различни флаери и повеќето од нив завршуваат едноставно непрочитани во ѓубре. Но доколку, на приме Вашиот бизнис нуди услуги од типот на финансиски консалтинг и Вие како претприемач знаете дека локалните банки се одлично место каде се движат Вашите потенцијални клиенти, можете да направите договор со локалните банки за да оставите флаери и доколку некој клиент на банката сака да го прочита ќе го земе флаерот. На ваков начин помала е веројатноста дека флаерот за кој сте дале пари да заврши во ѓубре. Ова е влезен маркетинг.

Интернетот го прави влезниот маркетинг многу едноставен. Денес се повеќе и повеќе луѓе кога имаат некаков проблем одат на Google или различни социјални медиуми да најдат одговори за сопствените проблеми. И ова е одлично место за еден претприемач за да ги искористи техниките на влезен маркетинг. На ваков начин влезниот маркетинг се фокусира на креирање на одлична содржина на веб страната на бизнисот или социјалните медиуми која ќе овозможи потенцијални потрошувачи да разберат за Вашиот бизнис, бренд, производи и услуги.

Доколку Вашите потенцијални потрошувачи се на Facebook мора и вие како претприемач и Вашиот бизнис да бидете присутни таму. Доколку тие се на Twitter бидете таму, доколку се на LinkedIn бидете и Вие. Доколку бараат нешто на Google мора да бидете на првите неколку места на првата страна со резултати.

Зошто влезен маркетинг?

Затоа што работите околу маркетингот во последните години драстично се променети. Пред неколку години повеќето потенцијални потрошувачи единствената информација за некој производ или пак услуга ја добивале гледајќи ТВ, слушајќи радио, читајќи весници и магазини, примајќи директна пошта или пак од луѓето кои се занимаваат со продажба од врата на врата.

Како и да е, денес истите потенцијални потрошувачи имаат многу повеќе опции да бараат и да најдат решенија за сопствените проблеми. Одат на Google и бараат и она што е најважно не сакаат да бидат вознемирувани. Кога се вознемируваат маркетинг напорите предизвикуваат контра ефект кој може да му наштети на Вашиот бизнис.

Резултатите од влезниот маркетинг можат да бидат огромни, но за да се постигнат потребно е да се вожи труд и време. Можеби заради тоа повеќето претприемачи не сакаат да трошат време за градење на целиот процес. А, оваа е уште еден фактор кој треба да Ве мотивира да започнете уште денес.

post

Саем – Маркетинг Средство 32

Крајот на минатата и целата оваа недела ќе биде недела на маркетингот на претприемач.

Саем како маркетинг средство

Ова е веќе 32-рото маркетинг средство од овој серијал на маркетинг средства на претприемач. Саем, можеби едно од најконтроверзните маркетинг средства во последно време. Контроверзно затоа што за едни претприемачи е успешно, додека за други претставува едноставно трошење на пари. Но, сепак може да бидат навистина корисни, бидејќи ретко на кое друго место можете да најдете бизниси од иста или пак слична индустрија на исто место во исто време.

Што претставуваат саеми?

Саемите едноставно претставуваат изложбени простори на кои еден претприемач може да ги изложи и претстави своите производи и услуги пред потенцијалните потрошувачи.

Давателот на саемската услуга (изнајмувачот на просторот) се грижи за сите маркетинг активности за тој саем на кој ќе се изложува. Вообичаено на еден саем се изложуваат група на производи или услуги од една индустрија.

Предности на саемите?

Да разгледаме некои предности кои саемот ги нуди за еден претприемач:

  • Високо таргетирана група на посетители. Некој кој не е заинтересиран за технологијата и технолошките достигнувања нема да биде присутен на Технома. Додека оној кој е заинтересиран да го обнови својот интериер ќе го посети саемот за мебел. Ова значи дека на еден саем ќе бидат присутни луѓе кои на некој начин имаат интерес за одреден производ или пак услуга кои што ќе бидат изложени на тој саем.
  • Високо претставително маркетинг средство. Потенцијалните клиенти во бизнисот што ќе го видат на еден саме сметаат дека се професионалци бидејќи навистина понудувачот на самските услуги и самиот претприемач направат едно привлечно катче од штандот на кој се претставуваат производите.
  • Голема посетеност. Како и да е сепак саемите се доста посетени во тие неколку дена колку што трае. Вообичаено доаѓаат луѓе од сите градови кои се заинтересирани за некој производ или пак услуга бидејќи сметаат на некаков саемски попуст кој сакаат да го искористат.
  • Можност за комбинација на други маркетинг средства. На саемите освен прикажување на производот или услугата кои ги нудите како претприемач можете да делите и други маркетинг средства како бизнис картички, флаери, брошури…
  • Можност за демонстрација во живо. Оваа предност ниедно друго маркетинг средство не ја нуди. Во живо потенцијалниот купувач има можност да ги види сите карактеристики на производот што е изложен.

Недостатоци на саемите?

Како и секое друго маркетинг средство и саемите имаат свои недостатоци:

  • Висока цена. Како еден од најголемите недостатоци кои ги погодуваат малите бизниси и претприемачот е високата цена за изнајмување на еден штанд на саемот на кој ќе се изложуваат производите и услугите.
  • Кратко време на изложување. Саемите имаат краток животен век. Тие траат неколку дена и за тие неколку дена потребно е да направите доволно зделки за да успеете да ги извадите трошоците. Се смета дека почесто зделките доаѓаат по завршување на саемот, што може да значи и дека оваа не е недостаток. Во секој случај, имате многу кратко време за да се претставите Вие како претприемач и Вашиот бизнис во вистинското светло.
  • Голем процент посетители за да бидат видени. Се почесто саемите се користат од луѓето да си го поминат времето и за да бидат видени како би седнале на кафе со своите пријатели и би се пофалиле дека биле на тој и тој саем. Овој недостаток директно ја намалува предноста на големата посетеност на саемите.
  • Голем процент на посетители – конкуренти. Саемите се користат и од конкурентите кои не изложуваат одблиску да дојдат и да го видат производот за кој се заинтересирани и тие да го понудат. Така да, кога Вие како претприемач, го користите саемот како маркетинг средство знајте дека одреден процент на „потенцијални потрошувачи“ ќе бидат испратени од Вашите конкуренти.

Препораки за еден Претприемач

  1. Бидете внимателни при избор на оваа маркетинг средство. Разгледајте дали имате можности и дали ќе ви се исплати саемот како маркетинг средство. За секој бизнис оваа маркетинг средство не е соодветно.
  2. Доколку сакате да освоите други пазари, надвор од државните граници разгледајте ја можноста да учествувате на меѓународни саеми надвор од Македонија.
  3. Разгледајте ги како опција алтернативните штандови. Вообичаено саемите имаат мали простори кои не се скапи (на пример, простој преку кој се поминува од хала во хала). Доколку сте мал бизнис со ограничен буџет, а сакате да се претставите на некој начин на саемот ова е одлична варијанта за Вас како еден претприемач.
  4. Делете различни маркетинг средства како што се брошури, флаери, бизнис картички, каталози… Секој кој ќе се приближи до Вашиот изложбен простор дајте му рекламен материјал.
  5. Обидете се да остварите комуникација со секој заинтересиран за Вашите производи или услуги.
  6. Нека не ви биде тешка презентацијата на Вас и Вашите вработени за секој кој ќе биде заинтересиран.
  7. Направете го изложбеното катче колку што може да биде поинтересно за да привлече доволно внимание на потенцијалните потрошувачи.

Кога ќе започнеме со презентација на онлајн маркетинг средства ќе стане збор за еден друг вид на саем – електронски саем и за кој веќе пишувавме на претприемач во еСаем за Бизниси – MakExpo.

post

Дали Телемаркетингот е За Губитници?

Доколку ме прашувате мене, Да. На претприемач веќе неколку месеци секоја недела објавуваме маркетинг средства во еден турбо серијал од маркетинг средства. Меѓу тие е и телемаркетингот кој едноставно значи доаѓање до телефонски броеви и нормално вртење (додевање) на луѓето или бизнисите за да се обидете да им продадете нешто.

Првин погледнете го видеото кое навистина е добро и кратко а кое пред неколку денови го објавив на Facebook страната на Претприемач.

Што е Inbound (влезен), а што е Outbound (излезен) маркетинг?

Телемаркетингот е Outbound маркетинг средство. Пред некое време на поимникот на претприемач го опишав значењето на овие зборови:

Inbound маркетинг: термин кој се користи да го опише маркетингот кој денеска има најголемо влијание врз потенцијалните потрошувачи. Inbound маркетинг едноставно значи да бидете присутен таму каде што Вашите целни потенцијални потрошувачи ќе побараат решение за нивен проблем. За разлика од оној традиционалниот или пак како го нарекуваат Outbound Marketing овој тип на маркетинг не се занимава со притисок и додевање и пречење на потенцијалните потрошувачи туку ги остава самите тие на наједноставен начин да дојдат до Вашиот бизнис.

Outbound маркетинг: Ова е нов термин на изразување на традиционалниот маркетинг кој уште Seth Godin го нарекува и Interruption Marketing – Маркетинг со здодевање врз потенцијалните потрошувачи. Се она што го знаеме како маркетинг средства во вид на ТВ, радио, весници, магазини, директна пошта, брошури, флаери итн. спаѓа во овој вид на маркетинг. Спротивен на овој вид на маркетинг кој остава потенцијалните потрошувачи да го најдат Вашиот бизнис кога имаат потреба е Inbound маркетинг.

Може да се каже дека влезен маркетинг претставува inbound маркетинг бидејќи самите потенцијални потрошувачи влегуваат по сопствена волја во Вашиот маркетин систем, додека излезен маркетинг е outbound маркетинг каде Вашата маркетинг кампања излегува од Вашиот бизнис и влегува на местата на потенцијалните потрошувачи како непоканет гостин.

Можеме да ги преведеме и како поканет (inbound) и непоканет (outbound) маркетинг.

Повеќе за овие влезен и излезен маркетинг во следниот напис каде подетално ќе навлезам во сржта на истите.

Едно мое искуство!

Постојано ме бомбардираат со телемаркетингот како едно од најкористени маркетинг средства во Македонија. Зошто е најкористено, затоа што е наједноставно. Земеш златна книга и се јавуваш на телефонските броеви кои си ги избрал. Ако свртиш денес на 100 телефонски броеви кај еден да упали си велиш тоа е супер завршена работа.

Оваа маркетинг средство е ОК, но доколку се користи онака како што треба, но во никој случај неможе да биде поефективно од групата на влезни маркетинг средства.

Минатата недела со помош на телемаркетингот ми се јавија од една компанија за веб дизајн бидејќи го пронашле бројот од златна книга за еден од моите бизниси кој се однесува на локално ниво и кој има сопствена веб страна која служи за спроведување на некои inbound маркетинг активности на бизнисот. Еве неколку грешки кои се катастрофални за таа компаниаја (која на нивната веб страна има наведено дека се лидери, најдобри, не се како другите итн.):

  • Од златна книга имаат погрешна информација бидејќи веб страната која првично беше на google pages домеин сега е сменета.
  • Ми здодеваат. Едноставно ми се јавија кога не бев расположен да разговарам, бидејќи си имав други обврски.
  • Бизнис кој продава електронски производ базиран на интернетот користи излезни маркетинг техники. Смешно.
  • Ми предлагаат да ми ја пуштат понудата на факс. Господе, дали не слушнале за е-mail?
  • Ги побарав на Google не можев да ги најдам меѓу првите 5 страни на резултатите. Затоа тие користат телемаркетинг.

Мислам дека се доволни грешките за да ја разберете суштината на проблемот на бизнисите кај нас.

Следува подетален напис за влезен маркетинг (inbound маркетинг) кој ќе опфати некои размислувања зошто уште денес треба да започнете да размислувате поинаку за Вашите маркетинг напори. Инаку во однос на маркетинг средствата што ги разработуваме на претприемач едно 50-тина ќе се однесуваат на влезниот маркетинг.

post

Претприемач – Дополнувања за Маркетинг План

Вчера пишував за маркетинг планот кој го препорачува Jay Conrad Levinson во третата панел дискусија од The League of Extraordinary Minds каде 53 најголеми светски експерти од областа на бизнисот и маркетингот дискутираат секоја недела. Тоа е написот за Маркетинг план во 7 едноставни реченици. Доколку сте го пропуштиле би Ви препорачал да го прочитате бидејќи денешниов текст само ќе претставува едно мое дополнување на овој стил на разработка на маркетинг план во 5 минути.

Marкетинг план дополнување на 7 реченици

Да се потсетиме накратко кои беа тие 7 реченици кои го составуваат маркетинг планот:

1) Целта на маркетингот

2) Конкурентска предност

3) Целен аудиториум

4) Маркетинг средства во вид на листа

5) Што претставувате Вие за Вашата пазарна ниша?

6) Идентитет и

7) Буџет.

      Дали нешто фали во овој маркетинг план?

      Овој стил на маркетинг план ми се допадна веднаш, но бидејќи имам една мана секогаш да барам некој вид на подобрување во истиот забележав дека нешто ми фали. Во претходниот напис – Маркетинг план во 7 едноставни реченици забележав дека една од грешките што ги прават претприемачите е да не го исполни тој план што веќе го направил.

      Ако веќе имате маркетинг план и со тоа половина грешка веќе не е грешка поврзана со маркетингот, тогаш мора да се заколнете на тој документ дека ќе го искористите и спроведете онака како што сте испланирале во истиот.

      Но, како да се заколнете? Ова едноставно ќе се случи доколку тој маркетинг план содржи, кој, што, каде, како и кога.

      Во овие 7 реченици имаме веќе одговорено на што и како. Но, фали кој и кога.

      Дополнителни елементи на маркетинг план во 7 реченици

      Значи ги имаме елементите:

      • Што – Конкурентска предност, Идентитет и она што претставувате Вие за вашата пазарна ниша.
      • Каде – Целен аудиториум.
      • Како – Маркетинг средства во вид на листа.

      Ни фалат следниве прашања во однос на маркетинг планот:

      • Кој ќе биде задолжен за кое маркетинг средство и
      • Кога ќе биде спроведено секо маркетинг средство.

      Значи двата дополнителни елементи кои што фалат влегуваат во четвртата реченица од маркетинг планот – маркетинг средства. Па, оваа нема да биде реченица ниту листа туку едноставно една табела со 3 колони:

      • Маркетинг средство
      • Задолжена личност за спроведување на тоа маркетинг средство
      • Датум кога ќе започне спроведувањето на тоа маркетинг средство.

      На ваков начин маркетинг планот ќе биде обврзувачки за лицата кои ќе треба да го спроведуваат.

      Уште еден елемент кој фали

      За крај уште еден многу важен ако не и најважен елемент кој забележав дека фали во маркетинг планот во 7 едноставни реченици. Овој елемент е популарно наречен повратна врска – Feedback. Како ќе ја вршиме контролата во однос на тоа кое маркетинг средство е успешно а кое неуспешно?

      Овој елемент е значаен заради тоа што ќе ни овозможи да видиме кои маркетинг средства да ги исфрлиме, кои да ги подобриме и кои да ги замениме со нови. На ваков начин, реченицате 4 за маркетинг средства ќе има 4 колони во кои дополнителната од погоре колона ќе биде за успешноста на маркетинг средството.

      Со еден ваков маркетинг план ќе имаме можност постојано да ги подобруваме нашите маркетинг активности. Всушност, како еден приказ на таа табела може да биде и маркетинг календарот кој го имаме како еден од 10-те темплејти на претприемач.

      post

      Маркетинг План во 7 Едноставни Реченици

      Сржта на секоја маркетинг програма на секој бизнис па и на малиот бизнис е квалитетен маркетинг план. Мислам, дека како претприемачи често го избегнуваме и целокупно ги базираме нашите маркетинг активности на случајноста. На претприемач досега опфативме многу теми кои навлегуваат во проблематиката на маркетингот (дури 50 блог написи во кои 30-тина се за различни маркетинг средства, барем досега).

      Маркетинг план во 7 реченици

      Во однос на маркетинг планот досега на претприемач пишувавме во три наврати:

      Последното, се однесува на тоа што треба да содржи еден маркетинг план. Но, написот се однесува за маркетинг план онаков како што изгледа по книгите. Во тој маркетинг план опфативме 5 поднаслови:

        1. Резиме
        2. Анализа на пазарот
        3. Маркетинг стратегија
        4. Финансиски елемент на маркетингот и
        5. Контрола.

      Грешка која еден претприемач најчесто ја прави во маркетингот

      Пред една недела се одржа третата панел дискусија на The League of Extraordinary Minds еден од екпертите беше и Jay Conrad Levinson популарно познат и како „таткото на герила маркетингот“ и автор на бестселерот „Герила Маркетинг“. Едно од прашањата беше која е најголема грешка која претприемачите ја прават во маркетингот? Како најголема грешка тој ги издвои следниве две:

      • немање на маркетинг план и
      • доколку претприемачот има маркетинг план не се обврзува да го исполни.

      Доколку сте претприемач и имате мал бизнис одговорете си на прашањето дали имате некаков вид на маркетинг план за Вашиот бизнис и доколку го имате колку го исполнувате?

      Jay Conrad Levinson е и еден од креаторите на маркетинг кампањата на Marlboro во 1960-тите години кога Marlboro станува бренд број еден во светот од една просечна компанија (Таа кампања се однесува на каубојот со Marlboro). И ден денес Marlboro како бренд е препознатлив по тој каубој и цигара. Но, она што Jay го напоменува е дека тој маркетинг план не бил долг и компексен но целосно обврзувачки за менаџментот и компанијата воопшто.

      Она што можеме да го извлечеме од препораката на овој маркетинг експерт е тоа што не е важен изгледот или формата на Вашиот маркетинг план, туку важно е да имате едноставен кој секогаш ќе го исполните.

      Маркетинг план во 7 реченици

      Овој маркетинг експерт, кој слободно можеме да го ставиме во еден од најголемите екперти во светот за маркетингот вели дека кога како консултант за компаниите бил најмуван секогаш предлагал едноставен маркетинг план во 7 реченици и тоа за 5 минути. Следниве 7 реченици се однесуваат на еден таков маркетинг план:

      1) Целта на маркетингот

      Првата реченица се однесува на вистинската цел на Вашиот маркетинг. Одговорете на прашањето зошто ви е потребен маркетинг планот или која придобивка сакате да ја добиете од маркетингот.

      2) Конкурентска предност

      Втората реченица е конкурентската предност која сакате да ја истакнете за да потенцијалните потрошувачи преку Вашата маркетинг кампања направат нешто. Запрашајте се која е Вашата конкурентска предност во облик на бенефит на потенцијалните потрошувачи.

      3) Целен аудиториум

      Секој маркетинг има целен аудиториум кој треба да ја прими маркетинг пораката врз основа на која Вие како претприемач сакате да потенцијалниот потрошувач превземе некоја акција. Во една реченица претставете го тој целен аудиториум.

      4) Маркетинг средства

      Четвртата реченица е најдолга и всушност не претставува реченица туку листа и тоа листа на маркетинг средствата кои ќе ги користите за да ја исполните целта. На претприемач веќе неколку месеци обработуваме различни маркетинг средства (досега 31 од 100). Во книгата „Герила Маркетинг“ имате 200 маркетинг „оружја“ како ги нарекува Jay Conrad Levinson.

      5) Што претставувате Вие за Вашата пазарна ниша?

      Оваа реченица треба да го претстави она што Вие како бизнис или пак како претприемач претставуваат за Вашиот пазар односно Вашата пазарна ниша.

      6) Идентитет

      Шестата реченица која треба да ја содржи секој маркетинг план согласно Jay Conrad Levinson е за Вашиот идентитет како претприемач и идентитетот на Вашиот бизнис.

      7) Буџет

      Последната, односно седма реченица е буџетот односно колку пари планирате да потрошите во одреден временски период за кој се однесува маркетинг планот. Во овој дел Jay предлага маркетинг буџетот да го изразите како процент од бруто продажба. На пример доколку имате 300.000 денари продажба и изберете 5% маркетинг буџет, тогаш значи дека ќе потрошите 15.000 денари за маркетинг на месечно ниво.

      post

      Претприемач – Маркетинг Средство 31

      Оваа недела на ред е 31-то маркетинг средство од овој турбо серијал на маркетинг средства кој го започнавме пред неколку месеци. Досега како 18-то маркетинг средство го опфативме Вашиот продажен тим и како 21-во маркетинг средство го опфативме Вашиот бизнис преку ставови на Вашиот бизнис.

      Но, во овие две маркетинг средства фали централната фигура и тоа Вие како еден претприемач. Овие три маркетинг средства (бизнис, вработени и претприемачот) се севкупните внатрешни живи елементи на еден бизнис. Овој термин живи ми дојде на ум сега кога го пишувам овој напис бидејќи сите овие елементи дишат, а претприемачот и вработените се потсистеми на бизнисот. Дишат бидејќи претприемачот и вработените се биолошки системи, додека бизнисот како еден поголем систем ги содржи тие два биолошки подсистеми. Од друга страна оние неживи елементи се производот, услугата, технологијата итн.

      Втора работа што сакам да ја напоменам е што овие три елементи (претприемач, бизнис и вработени) го градат кредибилитетот и репутацијата на еден бизнис како посебни маркетинг средства.

      Како што постојано ќе бидат следени однесувањето и ставовите на Вашиот бизнис од Вашата околина така и Вие како претприемач ќе бидете постојано следени.

      Од кого Вие како претприемач ќе бидете следени?

      Како што веќе пишував во ставовите на Вашиот бизнис така и тука ќе бидат идентификувани истите следачи:

      • Потрошувачи. Во оваа група спаѓаат и сегашните и потенцијалните, односно идни потрошувачи. Оваа категорија е една од најважните Ваши аудиенции. Потребно е посебно внимание да се обрне кон истите.
      • Конкуренти. Во оваа категорија спаѓаат Вашите конкуренти кои имаат за цел или да ве стигнат или да се заштитат од Вас и Вашиот бизнис доколку им се приближувате премногу. Оваа категорија како маркетинг средство воопшто не е важна, но сепак има големо влијание врз Вашиот бизнис.
      • Медиуми. Оваа категорија на Ваши следачи може да одигра голема улога за Вашиот бизнис. Еден краток прилог во вестите на некој медиум може да ви донесе огромен публицитет. Но, вниманието на оваа категорија тешко се свртува особено на малите бизниси. Посебно е важно да забележиме дека оваа категорија може и непријателски да се однесува кон Вас па затоа е потребно особено внимание.
      • Вработени. Во категорија на следачи спаѓаат и вработените. Од една страна како потенцијални вработени за да привлечете квалитетна работна сила и од друга страна како веќе вработени кои можат директно да се вклучат во Вашите маркетинг активности и тоа неформални маркетинг активности. Ставовите навашата компанија можат бргу да бидат проширени преку Вашите вработени при нивни секојдневни контакти со надворешниот свет. Треба да се искористат на вистинскиот начин.
      • Добавувачи. Ова е уште една категорија на Ваша аудиенција која постојано ве следи, а може да има огромна улога во Вашите маркетинг кампањи.
      • Влада. Моќта на владата е толку голема што може да има огромни последици за секој бизнис, како позитивни така и негативни. Сведоци сме како со една одлука може да се унишатат империи од бизниси. Но, сведоци сме како со помош на Владата може да се изгради брзо бизнис империја. Потребно е особено внимание.

      На оваа група на ентитети кои ќе ве следат би додал уште две групи:

      • Вашето семејство. Каде се движите, како се однесувате, колку време поминувате на состноци и на работа. Оваа е нормална појава кога станува збор за Вас како една личност – претприемач.
      • Вашите роднини и пријатели. Колку можат да ви помогнат, толку можат да бидат и љубоморни на Вашиот успех како претприемач. Затоа сметам дека и оваа група на ентитети од Вашата непосредна близина треба да биде добро избалансирана во Ваша корист и во користа на Вашиот бизнис.

      Што е тоа што ќе го следат кај Вас како еден претприемач?

      Ќе бидете следени на различни начини и во однос на различни Ваши лични елементи. Како што во Бизнис копија – Моќта на имитација наведов еден начин или пак еден процес како да следите некој успешен идол кој ќе го копирате и вметнете во Ваш сопствен бизнис модел така и некој друг ќе се обиде да ве следи и копира нормално. Освен тоа доколку има можност ќе се обиде да му наштети на Вашиот бизнис и на Вас лично.

      • Ваши општи и бизнис ставови. Вашите општи и бизнис ставови во голем дел може да влијаат на градење на солиден кредибилитет и репутација.
      • Начин на однесување. Вашето лично однесување ќе дава одредена слика на вашиот бизнис воопшто и може да биде едно од клучните маркетинг средства за луѓето со кои доаѓате во контакт.
      • Начин на трошење. Имам еден пријател претприемач кој навистина започнува со сопствен бизнис веднаш по завршување на средното училиште. Бизнисот го води и развива и во текот на неговото високо образование. Може да се каже слободно дека за негови години има квалитетен успех како еден претприемач во однос на она што го има како материјални средства. Но, секогаш кога седиме и разговараме ми вели дека мора да внимава каква кола ќе вози и како ќе се облекува за да не се случи премногу да биде над другите – обичните луѓе бидејќи смета дека ќе му наштетат. И навистина има право. Љубомората е една лоша работа која може навистина да наштети на еден бизнис. Можеби во САД оваа не е проблем, но кај нас мислам дека сеуште постои.
      • Начин на менаџирање на бизнисот. Ако сте успешен претприемач кој успешно го менаџира сопствениот бизнис ќе имате добар кредибилитет и репутација. Вашите вработени ќе бидат задоволни и ќе се обидат на секој начин да го промовираат Вашиот бизнис.
      • Ваша појава воопшто како една фигура. Многу луѓе ќе ве гледаат како една фигура која се појавува и исчезнува. Сликата која ќе им остане во однос на Вас и вашиот бизнис ќе има големо влијание за понатамошната можна соработка со тие луѓе. Секогаш некаков детал кој човекот ќе го запази на Вас ќе остане по што ќе Ве памети. Така да внимавајте оваа Ваша фигура да биде усогласена со типот на бизнисот и кругот во кој се движите.
      post

      Телевизија – Маркетинг Средство 30

      Стигнавме и до 30-тото маркетинг средство од овој турбо серијал на маркетинг средства на претприемач. Телевизијата е уште едно традиционално маркетинг средство кое е можеби и едно од најкористени заедно со радиото и весниците. Многу често кога се мисли на маркетинг во главата на претприемачите им поминува телевизија, радио, магазини и весници.

      Телевизија како маркетинг средство

      Високата цена на националните телевизии ги одвраќа претприемачите на малите бизниси, но затоа локалните мали бизниси можат да ја искористат оваа предност. Во секој случај, слободно може да се каже дека овој маркетинг медиум кај нас сеуште има голема популарност иако во поразвиените земји се повеќе и повеќе го губи сопственото влијание врз пошироките маси.

      Предности на ТВ како Маркетинг Средство

      Ќе презентирам некои од предностите на телевизијата како маркетинг средство:

      • Присуство во скоро секој дом. Присуството на телевизијата во скоро секој дом претставува предност на истата како маркетинг средство. Слободно може да се каже дека телевизијата е присутна секаде. Телевизорите ги има во популарните кафулиња, во ресторани, во домовите на луѓето, па дури и на отворени места при некои собири.
      • Широка опфатност. Ова е една од најголемите предности на телевизијата. Навистина има широк спектар на опфатност на различни сегменти од пазарот. Бидејќи телевозорот како технологија е присутен насекаде околу нас, така и телевизијата како маркетинг средство може да допре до голем број на луѓе кои се Вашите потенцијални купувачи.
      • Визуелизација. За разлика од радиото каде пораката е во аудио форма која може само да се слушне, и за разлика од весниците каде пораката е само во пишана форма која може само да се прочита, телевизијата нуди визуелна форма која може и да се види и да се слушне и да се прочита во исто време.
      • Дизајн на пораката. Додека ова во минатото беше недостаток, денес слободно можеме да кажеме дека не е. Денес скоро секој може да дизајнира видео економско-пропагандна порака, додека во минатото требаше да се најмат техничари како професионалци за оваа намена. Дури и Вашето 7 -годишно дете денес знае да искористи различни апликации на персонален компјутер и да дизајнира интересна видео порака за Вашиот бизнис.

      Недостатоци на ТВ како Маркетинг Средство

      Да разгледаме и некои од недостатоците на телевизијата како маркетинг средство:

      • Должина на пораката. Должината на економско-пропагандната порака на телевизијата е навистина кратка и за да се постигне вистинскиот ефект ќе мора да се повторува повеќекратно. Овој недостаток претпоставува дека целната група на гледачи во моментот на прикажување на пораката ќе прават нешто друго. Затоа и целта на претприемачите е да дизајнираат порака која ќе го привлече вниманието.
      • Менување на каналите. Тоа сум јас и над 90% од луѓето што ги познавам. Кога гледам ТВ го држам даљинското во рака и кога ќе ме прекинат со пропагандна порака, нормално одам на следниот канал. Па можеби ќе се навратам подоцна на претходниот канал или пак ќе најдам нешто поинтересно. Значи пропагандната порака ми дава слобода до погледнам дали има нешто поинтересно на ТВ. Значи парите кои ги трошат претприемачите за мене и оние како мене се едноставно фрлени во вода.
      • Пренатрупаност. Во еден маркетиншки сегмент на телевизијата кога ќе се прикажува и Вашата пропагандна порака ќе одат уште неколку други со што секоја од пораките губат на сопствената ефикасност и ефективност.
      • Трошоци. Трошоците за овие пораки се навистина големи во споредба со останатите. Доколку најмите и професионален дизајнер уште пред да започне емитувањето на пораката ќе мора да издвоите значителна сума на пари. И самото изнајмување на просторот за емитување на една телевизија е навистина поскапо во однос на останатите медиуми.

      Неколку Препораки при Подготвување на „ТВ Реклама“

      • Пораката нека биде едноставна која нема да претставува збунувачка за гледачите.
      • Фокусирај се на ползите на потенцијалните потрошувачи бидејќи само ползата може да им го обрне вниманието.
      • Докажи ги полезностите за потенцијалните потрошувачи кои ги презентираш во пораката.
      • Направи ја пораката уникатна, односно нешто што не постои, а во исто време интересна и лесно запомлива.
      • Користи емоции во однос на презентирање на проблемот на потенцијалниот потрошувач кој сакаш да го опфатиш со пораката.
      • Внимателно избери ја телевизијата која ќе ја користиш за емитување на твојата порака. Различни телевизии се гледани од различна популација.