Бидете секогаш најиновативни! Алатки, екниги и видео презентации само за најхрабрите!

post

Вирозен маркетинг – Маркетинг средство 65

Вирозен (Viral) маркетинг

Вирозен (Viral) маркетинг

Како 65-то маркетинг средство на претприемач ќе биде вирозен маркетинг. Досега повеќепати пишував за оваа маркетинг средство, целта на овој пост ќе биде да се групираат неколкуте подзаборавени постари постови за оваа маркетинг средство.

Сите сме слушнале за вируси. Вирусите се шират со огромна брзина, без разлика дали се работи за компјутерски вирус или пак за патолошки вирус. Секој бизнис сака неговиот производ и/или услугата да се дознае побргу од колку што може повеќе луѓе, како би се овозможила висока продажба и побарувачка за тие производи и/или услуги. Ова се овозможува со маркетингот. Но, замислете каков ефект би бил доколку маркетингот се распространи како вирус. Тоа го овозможува вирозен маркетинг.

Дефинирање на вирозен маркетинг (viral – вирален маркетинг)

Вирозен маркетинг како термин е добиен од вирозна појава. Вирозна појава претставува способност на еден објект да се размножува или да ги трансформира другите објекти да бидат исти како него кога ќе бидат изложени на тој вирозен објект.

Повеќе луѓе ми поставија прашање зошто го преведувам зборот viral. На wikipedia на македонски е преведено како вирален маркетинг. Иако не можев да најдам дека во македонскиот јазик постои термин вирален објект или било што. Се наметна и идејата дека тоа е мрежен маркетинг. Можеби, сепак се користат социјални мрежи за распространување на објектот.

Viral преведено на македонски значи вироза, или нешто што има вирус па една од причините зошто избрав да го користам терминот вирозен е таа. Втора причина е објектот. Сметам дека за успешен вирозен маркетинг најзначаен елемент претставува објектот кој и го содржи вирусот. Без разлика дали објектот ќе биде:

  • човек кој од уста на уста ќе ја пренесува порака
  • e-mail кој од примател на примател ќе ја пренесува пораката
  • производ кој како пробен ќе се препраќа од еден на друг
  • видео кое ќе се споделува преку YouTube.
  • итн.

Значи не е мрежата најважна. Може да имаме најдобра социјална мрежа која ќе ја користиме, но доколку објектот не е доволно вирозен нема да може да се прошири до таа мерка до која би требало. Но, доколку имаме силно вирозен објект кој има огромен потенцијал на ширење, мрежата сама ќе се појави. Силната вироза се добива со користа што треба да ја добијат пренесувачите.Ова значи дека интензитетот на вирозата зависи директно од користа што ќе ја добијат членовите на социјалната мрежа (поголема корист – поголем интензитет на вирозата). Затоа се одлучив дека е најдобро да го користам зборот вирозен бидејќи ќе биде преведено на македонски јазик и од друга страна ќе ја даде вистинската слика за она што всушност претставува вирозен маркетинг.

Вирозен маркетинг претставува маркетинг техника која ги користи социјалните мрежи за да доведе до зголемување на свеста кај луѓето за брендот за кој се користи вирозен маркетинг или да постигне други маркетинг цели преку самоумножувачки вирозни процеси, аналогно на ширење на патолошки или компјутерски вируси. Секој кој ќе дојде до контакт со вирозен објект го прифаќа вирусот и воедна станува потенцијален преносител на истиот.

Вирозен маркетинг може да биде еден збор за производот или услугата кој со помош на интернетот ќе биде пренесен и примен од многу луѓе. Може да биде видео кое преку YouTube ќе биде видено од милиони луѓе. Може да биде е-mail кој со праќање на еден примач може да биоде препратен до 10-тина други примачи и тие десетина други примачи секој да го препрати на по десет примачи. Сите имате искуство на препраќање по е-mail на пораки со некои интересни содржини. Ваквите пораки се распространуваат со светлосна брзина и имаат потенцијал да бидат видени од милиони луѓе за 10-тина минути.

Една од особините на човекот е да шират пораки или информации. Некој има особина да распространи порака на двајца до тројца луѓе, а некој има особина истата порака да ја распространи на десетици или стотици луѓе. Целта на оние кои работат во маркетингот е да ги идентификуваат клучните луѓе кои ќе овозможат најбрзо ширење на пораката до колку што може повеќе луѓе.

Видови на вирозен маркетинг

Постојат два вида на вирозен маркетинг:

  1. Кога маркетинг е производ
  2. Маркетинг кампања која не е производ.

Првиот вид е кога вирозен маркетинг претставува самиот производ или услуга при што придонесува да што повеќе луѓе го користат предметниот производ и/или услуга толку повеќе луѓето се навраќаат на негово користење и ги распространуваат информациите за истиот. Ваков е начинот на маркетинг на Hotmail и YouTube така да што повеќе луѓе ги користат толку повеќе луѓе ќе ги видат тие производи и обратно, колку повеќе ги видат толку повеќе ќе ги користат.

Кога сме кај Hotmail слободно може да се каже дека тој е првиот кој го употребува оваа маркетинг средство за да ја сподели информацијата за добивање на бесплатен e-mail акаунт преку нивниот сервис. Брзината со која што Hotmail се прошири беше огромна.

Вториот вид на вирозен маркетинг е кога самиот производ не е маркетинг туку тоа е порака, кампања, информација за производот.

Функционирање на вирозен (вирален) маркетинг

Вирозниот маркетинг мора да биде опфатен во вашиот маркетинг план како стратегија и како дел од маркетинг миксот. Но суштината на вирозен маркетинг (секако и најтешкиот дел) е да се направи вирозниот објект кој ќе се распространува. За да се распространува тој објект треба да се најде некоја корист за примател-потенцијален распространувач. Бидејќи доколку оние кои треба да го распространат вирозниот маркетинг немаат никаква корист зошто би го распространиле. Да видиме еден пример.

Една компанија за е-mail маркетинг софтвер користи вирозен маркетинг на следниов начин. За нивниот производ имаат бесплатна опција со ограничување на е-mail листата на 100 меила. Доколку испратиш меил на уште 5 луѓе кои би ја симнале бесплатната верзија на нивниот софтвер ќе добиете можност да ја зголемите вашата листа на 1000 меила. На ваков начин се распространува верзијата на нивниот производ – софтвер кој служи за пробување, и доколку ви се допадне да ја купите целосната верзијата. На ваков начин добиваат од еден потенцијален корисник уште 5 потенцијални корисници, од тие пет уште 25 потенцијални корисници. Во табелата подолу се прикажани бројки за потенцијалот на ширење на оваа пробна верзија на софтвер. Тоа е вирозен маркетинг.

1 Вие 1
2 Го испраќате на 5 пријатели 5
3 5-те пријатели испраќаат на уште по 5 нивни пријатели 25
4 25-те пријатели на вашите пријатели испраќаат на уште по 5 пријатели 125
5 125-те пријатели на пријатели на вашите пријатели испраќаат на уште по 5 пријатели 625
6 625-те  пријатели на пријатели на пријатели на вашите пријатели испраќаат на уште по 5 пријатели 3125
7 3125-те пријатели на пријатели на пријатели на пријатели на вашите пријатели испраќаат на уште по 5 пријатели 15625
8 15625-те пријатели на пријатели на пријатели на пријатели на пријатели на вашите пријатели испраќаат на уште по 5 пријатели 78125
9 78125-те пријатели на пријатели на пријатели на пријатели на пријатели на пријатели на вашите пријатели испраќаат на уште по 5 пријатели 390625
10 390625-те пријатели на пријатели на пријатели на пријатели на пријатели на пријатели на пријатели на вашите пријатели испраќаат на уште по 5 пријатели 1953125
ВКУПНО НА 10 НИВОА НА ПРЕПРАЌАЊЕ: 2441445

Од табелата забележуваме дека со ваква стратегија можеме за 10 нивоа да имаме скоро 2,5 милиони потенцијални потрошувачи. Но, она што е најзначајно е дека ваквиот маркетинг кој се шири како вирус не застанува на 10-то ниво туку ќе продолжи да се шири со уште поголем интензитет. На пример на 11-то ниво на ширење ќе имаме над 12 милиони потенцијални потрошувачи, додека на 12-то ниво на ширење ќе имаме над 60 милиони потенцијални потрошувачи. Бројките се навистина како вирус.

Оваа распространување на вирозен маркетинг математички би се претставило со следнава формула:

FormulaViral

Каде N претставува број на луѓе на кои сте ја испратиле првата порака. Сепак оваа е теоретска бројка. Во пракса нема со сигурност секој да ја пренесе пораката на онолку луѓе на колку вие сте ја испратиле. Но како приближна бројка може да се користи бидејќи ако вие сте ја испратиле на 5 луѓе некој од истите ќе ја испрати на 10 луѓе, некој на 2-јца, додека третиот на 4-ца итн. Значи од еден ваш примател можете да имате различни приноси на испратена пораки.

За ваква стратегија на вирозен маркетинг да успее најважно е да имате одличен вирозен објект кој може да биде во различен облик. На пример, вашиот веб сајт, електронска книга која ги опишува вашите производи, e-mail порака, блог, производ за проба пред одлука за купување … Овој вирозен објект треба да дава некоја полезност за препраќачот или примачот. полезноста може да биде во облик на лична корист како во примерот погоре или пак пријатно чувтсво.

Но, колкави трошоци ќе направи ваква стратегија на вирозен маркетинг. Стратегијата која ќе се користи може да варира од бесплатна до оние кои се плаќаат. Трошоците зависат од вирозниот објект кој ќе се користи. На пример, доколку вирозен објект претставува бесплатна електронска книга трошоците ќе ви бидат само за изработка на истата како и вложен труд за пишување на истата, но ефектите кои може да ги донесе ќе бидат многу поголеми. Сепак кој и да се избере вирозен објект односот помеѓу ефективноста и трошоците секогаш ќе биде поголем од било кој друг пропаганден медиум кој би се користел.

post

Интересни неделни информации – 02.08.2010 – 08.08.2010

Интересни нделени информации

Интересни нделени информации

Во редовните постови на интересни неделни информации за неделата што помина претприемач ги издвои следниве:

Новите возила ќе се регистрираат на 2 години

Возилата понови од 2 години ќе вршат проверка на техничката исправност еднаш на две години. Ова олеснување ќе важи само за граѓаните кои купуле возило од салон и немаат направено промена на сопственоста.

Законот се донесе пред две години а правилникот на сила стапил годинава на 17 јуни.

Но иако веќе скоро два месеци станиците работат според новите регулативи никој од таму не ги информира граѓаните.

Увоз на стари возила со ЕУР 1 до крајот на септември

Уште два месеца е продолжен рокот до кој може да се увезуваат стари возила со нискиот еколошки стандард, ЕУР 1. Вака реши владата, откако до денеска, кога беше последен ден за увоз на овие возила, многу од нив останаа непродадени по плацевите на препродавачите.

Новиот рок, до крајот на септември, важи и за регистрација на оние кои имаат возила со странски таблички.

Продавачите на половните возила, пак, не очекуваат зголемена продажба во овој пролонгиран рок.

Инаку, од почетокот на годинава во земјава се увезени 34.000 возила, од кои 30.000 се стари, а само 4000 нови. Од овој увоз, државата ќари 36 милиони евра во буџетот.

Бизнисот со половни возила е огромен во Бугарија, се случува на име на едно лице да има регистрирано и до 300 возила. Овие возила освен кај нас се увезуваат и во Романија. Таму е потполно законски да се возат со полномошно, а причина е регистрација на возило кое во Романија чини и до 1500 евра, додека во Бугарија е 250-300 евра во зависност од годината на производството на автомобилот.

Владата најавува конечно решение за зелениот картон

До крајот на месецов Владата ќе донесе одлука дали ќе се укине доплатата за зелен картон, најави премиерот Никола Груевски. Тоа во петокот минатата недела го побараа камионџиите.

  • Владин тим веќе има добиено задача да врши анализи и да бара опции што ќе бидат важни не само за камионџиите туку и за граѓаните. Владата до крајот на август, почетокот на септември, веројатно ќе одлучува за тоа и ќе се донесе некакви заклучоци и решенија.

Независниот синдикат на камионските транспортери „Макамтранс“ упати ултимативно барање до Владата конечно да ја укине доплатата за добивање зелен картон.

Во однос на пролонгирањето на рокот за законот за домување, Владата се’ уште нема дискутирано за ова. Владата се уште нема расправано за овој закон и не сакаат да прејудицираат никаков одговор.

Влез и со кеш до 10.000 евра

Подгорица – Централната банка на Црна Гора го подигна лимитот за внесување и изнесување готовина од земјата од 2.000 на 10.000 евра, соопшти Централната банка на Црна Гора.

Ниту резидентите ниту нерезидентите во иднина нема да мораат да им пријавуваат на царинските служби готовина во износ до 10.000 евра.

„Внесувањето и изнесувањето готовина се либерализира и се усогласува со директивите на Европската унија“, се додава во соопштението на Централната банка на Црна Гора

Невработеноста го топи доларот

Вредноста на доларот се намалува во споредба со јенот и еврото откако најголемата економија во светот соопшти дека во јули изгубила повеќе работни места од предвиденото.

Зелената банкнота падна наспроти јенот откако податоци од одделот за труд на САД покажаа дека бројот на Американци што поднеле барање за бенефиции за невработеност минатата недела неочекувано се зголеми. Овој неочекуван пад отвори шпекулации дека Федералните резерви на САД ќе мора да го спасуваат пазарот на труд. Економскиот гуру Џозеф Стиглиц рече дека економското закрепнување на САД е анемично и повика на втор круг на подобро дизајнирани стимуланси.

Турски ТАВ ќе го разбива монополот на Макпетрол

Турскиот концесионер ТАВ планира да го либерализира снабдувањето со говриво на авиокомпаниите што летаат од македонските аеродроми. Во изминатите 20 години овој монопол го држеше Макпетрол. ТАВ планира во конкуренција за снабдување да ги вклучи и ОКТА и Лук Оил. Керозинот за авионите не е сегмент за регулација на регулаторната комисија, поради што Макпетрол одржуваше висока цена за овој тип на гориво. Пракса на авиокомпаниите што оперираат од земјава е со керозин да се снабдуваат во други држави. Колку за споредба тон керозин во Македонија чини 800 евра, а во Германија околу 590 евра. Се очекува да следи и намалување на цените на авио билетите.

Проблемите во Западниот Балкан ги бркаат инвеститорите

Странските инвеститори се помалку инвестираат во земјите од Западен Балкан, а и тие што се веќе присутни почнуваат да се откажуваат.

Европските аналитичари оценуваат дека она што ги одвраќа инвеститорите од регионов се високиот степен на корупција, бавното судство и заштитата на домашните тајкуни. Аналитичарите препорачуваат владите на земјите од регионот да не се правдаат со светската економска криза за сопствениот неуспех во привлекување на странски инвестиции.

Македонија, во анализата на европскиот портал – ЕУ Обсервер се посочува како држава која иако направила забележителни напори во подобрување на деловната клима, сепак во 2009 година останала на дното меѓу земјите од регионот – со само 200 милиони евра странски инвестиции.

Компаниите се жалат дека владата не се држи до своите ветувања кон бизнисот, а се посочуваат и проблеми со сериозните инвеститори кои веќе се присутни во земјава, кои ја влошуваат и така лошата инвестициска клима. Освен економијата, и нестабилната политичка состојба се наведува како голем проблем за една мала држава, посебно во период кога напорите за членство во НАТО и Европската Унија,како што се вели,се ставени во мирување.

Од критики не се поштедени ни останатите земји од регионот. Во Хрватска се посочува проблемот со сопственоста, во Србија со долгите и бавни судски процеси, на Косово – крупни случаи на корупција. Аналитичарите оценуваат дека нема да има зголемување на инвестициите во регионот се додека не се решат овие проблеми и не подобри климата за инвестирање.

post

Разлика помеѓу бесплатен и платежен хостинг

Серијал - МКХост и Претприемач

Серијал - МКХост и Претприемач

Продолжуваме со серијалот на постови кои МКХост и Претприемач ги подготвуваат со цел еден претприемач да го зголеми своето знаење и да не биде затечен во користење на различна техничка терминологија за оваа намена во деловниот свет. Денес ќе продолжиме со разлика помеѓу бесплатен и платежен хостинг.

Бесплатен хостинг – секој од нас посакува да добие нешто бесплатно, па така низ интернет мрежата се нудат и услуги од хостинг бизнисот кои се бесплатни, а меѓу нив највеќе се присутни бесплатните хостинг услуги. Знате, постои поговорка која вели: бесплатен ручек нема, па ќе се обидеме да објасниме повеќе за овие бесплатни хостинг услуги.

За оние кои сакаат повеќе да дознаат за видови на хостинг услуги, може да прочитаат на еден од претходните информативни постови каде се објаснува веб хостингот и видовите на хостинг услугите.

Секако дека има многу веб хостинг провајдери кои нудат бесплатени услуги, но глобално искуството со нив е негативно. За да не се најдете во таква ситуација еве неколку објаснувања, негативности за имање на бесплатен хостинг простор. Не треба да ја направите и вие грешката што многумина ја имаат направено и го имаат изгубено својот веб сајт преку ноќ.

Се зависи каков веб сајт сакате да хостирате. Најосновно правило што треба да го знаете е дека хостинг провајдерот кој што ќе ви го понуди овој бесплатен хостинг не ви гарантира за неговиот uptime, неговата стабилност, сигурност, кражба од информации и може секој момент без никакво известување да ви го исклучи истиот без никакви обврски спрема вас. Доколку имате развиено бизнис и сакате да го претставите на интернет со поставување на веб страна, тогаш строго ви препорачувам да не користите бесплатен хостинг пакет.

Слабости на бесплатниот хостинг

Со бесплатен хостинг пакет обично не добивате алатки и поддршка што треба да ја има секој корисник на хостинг услуга. Еве неколку негативности за бесплатен веб хостинг:

  • мал простор
  • bandwidth месечен лимит за трансфер на податоци кој може да варира и некогаш да ви биде исклучен сајтот при поголема посетеност
  • слаба корисничка поддршка
  • поставување на банери и скриени скрипти во вашиот сајт од страна на хостинг провајдерот – ќе влијаат врз оптимизација на сајтот, ќе добиете
  • негативен ефект кај посетителите како и пребарувачите
  • спамерите секогаш бараат бесплатни хостинг провајдери, па дали со нив ќе го делите shared просторот од серверот и дали ip адресата на серверот ќе биде банирана од интернет пребарувачите?
  • некои провајдери дури не ви даваат ни можност за backup на податоците, како и дополнителни алатки кои треба да ги имате како контрол панел, ресторирање и зачувување на базата на податоци, емаил акаунти и додавање на дополнителни веб страни
  • може да очекувате и нестабилност на серверот, одредени корисници на истиот сервер може да го користат хостингот за нелегални цели па да дојде до прекин на услугата секој момент
  • ќе треба да вршите редовен backup вие лично, затоа што не се очекува од бесплатниот хостинг провајдер да го прави тоа за вас
  • веб пребарувачите не ги сакаат бесплатените хостинг сајтови и често ги игнорираат. – Како ќе биде пронајден вашиот бизнис ако пребарувачите го игнорираат сајтот?
  • URL адресата на бесплатниот хостинг сајт ќе биде долга и тешка за памтење

Предности од имање на свој домен како и платен професионален веб хостинг:

  • со закуп на сопствен домен, вие автоматски го креирате брендот на интернет и името лесно се памти: пр. pretpriemac.com.
  • поддршката секогаш е тука за вас, дали треба да креирате емаил адреса или ви треба помош при поставување на веб страната…
  • ќе имате брендирана емаил адреса и ќе може да креирате стотици e-mail адреси.
  • свој контрол панел каде лесно ќе се снаоѓате и каде ќе најдете многу алатки и опции кои ќе ви помогнат при раководење на вашата веб страна
  • многу полесно ќе бидете забележани од веб пребарувачите – ип адресата на хостинг провајдерот нема да биде блокирана од нив затоа што на истата постојат и други сериозни веб страни
  • изгледа многу попрофесионално и нема банери и дополнителни реклами од хостинг компанијата

Сепак доколку планирате да креирате мал веб сајт лично за вас, проект на факултет кој треба да се објави на интернет за да го проверат вашите професори, или пак да си креирате веб сајт за забава, за ваши фотографии и биографија за да го покажувате на блиските и на пријателите, тогаш бесплатниот хостинг може да ви послужи за краткотраен период. Доколку го заборавите и не го посетувате, може да ви го суспендираат или терминиираат после одреден период. За разлика од платениот веб хостинг каде кога ќе го платите, секогаш ви е достапен и неможе да го избришат без претходно известување.

Денес постојат платени и професионални веб хостинг услуги кој може секој да си ги дозволи. Може да ги разгледате хостинг пакетите на МКхост и кога ќе ви биде потребно хостирање на веб страната да нарачате и да ги оставите сите работи да ги вршиме ние.

post

Претприемач: Претходна недела од 2-ри август и идна од 9-ти август 2010

Претприемач - Претходна и идна недела

Претприемач - Претходна и идна недела

Неделата која што измина на претприемач повеќе беше насочена околу маркетингот. Пишувавме за две маркетинг средства – блог и веб банери. Презентиравме една алатка за откривање на потреби на потрошувачи и навлеговме во еден концепт наречен како животни циклуси на производите. Освен маркетингот опфативме и еден пост од човечки ресурси во однос на концептот на плаќање по постигнување.

Следува сублимирање на претходната недела и распоредот за идната недела.

Понеделник, 02.08.2010 – Претприемничко блогирање во период на годишен одмор

Блогот како маркетинг средство е се позначајно маркетинг средство за малите бизниси и претприемачите. Но, време е за годишни одмори. Малите бизниси најголем проблем кој го имаат во однос на ова маркетинг средство претставуваат ресурсите. Но, и со недостаток на човечки ресурси и со недостаток на време може ефикасно и ефективно да се заврши домашната задача за Вашиот бизнис блог.

Понеделник, 02.08.2010 – Неделни информации

Како поважни информации за малите бизниси од претходна недела ги издвоивме информациите за штрајкот на превозници на гориво во Грција, обединување на железници во регионов, достапност на лични податоци на македонските граѓани надвор од границите и еден полнач за сите мобилни телефони.

Вторник, 03.08.2010 – Веб Банери – Маркетинг средство 64

Веб банери претставуваат маркетинг средство кое е доста популарно како во светот така и кај нас. Бидејќи не сум некој преголем љубител на банери, размислував да не биде дел од овој серијал на претприемач, но популарноста и користењето сепак ме натера да биде составен дел од овој серијал. Во постот можете да прочитате за тоа што претставува веб банер, како да го користите и неколку критични чекори за имплементација.

Среда, 04.08.2010 – Потреби на потрошувачи преку WeShop

Многу вредна информација за еден претприемач е да го знае искуството на тие потрошувачи со неговиот бизнис. Тешко е да се очекува дека некој ќе дојде и ќе Ви каже не ми се допаѓа тоа, тоа и тоа, промени го за да продолжиме бизнис. Поверојатно е незадоволниот да се сврти кон други можности (конкуренцијата). Во постот е презентирана една интересна мрежа на потрошувачи.

Четврток, 05.08.2010 – Плаќање по постигнување

Во овој пост е претставен еден мој обид да најдам одредена корелација помеѓу успешноста на бизнисот и начинот на поттикнување на вработените! Три години поминаа откако воведов еден ваков систем каде основа на плаќање е постигнатото, а не часови или денови работа. Ќе прочитате за некои мои откритија во анализа на овој феномен кај малите бизниси.

Петок, 06.08.2010 – Животен циклус на производи

Животен циклус на производите претставува концепт кој особена популарност доживува во 1960-тите години. Немора да значи дека овој концепт се ограничува само на производи, туку сосема е применлив и за услугите и за оној најнов вид на производи електронски производи. Во постот ќе можете да прочитате за седумте фази во еден животен циклус на производите.

Идна недела на претприемач

  • Неделни информации
  • Разлика помеѓу бесплатни и платежни хостинг пакети
  • Вирозен маркетинг – Маркетинг средство 65
  • Работно време – 8, 10 или 12 часа
  • Развој на производ и/или услуга – Фаза 1 од Животниот циклус на производите
  • Организациски промени – Значајност и дефинирање
post

Животен циклус на производи

Животни циклуси на производи

Животни циклуси на производи

Животен циклус на производите претставува концепт кој особена популарност доживува во 1960-тите години. Немора да значи дека овој концепт се ограничува само на производи, туку сосема е применлив и за услугите и за оној најнов вид на производи електронски производи.

Она во што навлегува овој концепт е дека секогаш ќе постои раѓање и умирање на еден производ и/или услуга. Меѓу тие два процеса са наоѓаат останатите фази низ кои поминува тој еден производ. Едно нешто е јасно, денес и најиновативниот производ брзо добива своја конкуренција (дури може да се каже и подобрена конкуренција).

За разлика од минатото кога овој циклус можеше да биде подолготраен денеска се повеќе и повеќе се намалува, особено поради фактот на иновацијата која е се поприсутна и подоминантна во денешниот бизнис свет. Од друга страна тука се и купувачите чии навики се сосема променети и секогаш очекуваат нешто ново, нешто повеќе…

Дефинирање на животниот циклус на производите

Прв истражувач кој дава дефиниција на концептот на животниот циклус на производите е Robert D. Buzzell чија дефиниција и денеска е доста користена во научните кругови. Тој овој концепт го дефинира како:

генерализиран модел на продажен тренд за класи или категории на производи во определен временски период и на поврзаните промени во конкурентското однесување.

Очигледно е дека на животниот циклус на производите влијаат продажбата и конкуренцијата. Колку повеќе се намалува продажбата станува јасно дека е потребен нов производ. Колку побргу конкуренцијата воведе нов производ толку побргу ќе треба да се возврати ударот.

Фази во животниот циклус на производите

Најчесто и наједноставно претставување на животниот циклус на производите се претставува како состав од 4 фази:

  • Воведување на производот
  • Раст
  • Зрелост
  • Пропаѓање.

Но, тука може да се забележи дека недостасуваат неколку елементи. Првин, ниеден животен циклус не започнува со воведување. Ајде да го земеме човекот. Тој не го започнува процесот на својот живот со раѓањето. Пред да се роди има цела една фаза која допринесува раѓање на едно бебе. Кога станува збор за производи и/или услуги исто пред да се воведе тој производ и/или услуга се наоѓа фазата на развој.

Во претставените фзи недостасува и завршеток. Можеби вечно ќе се намалува инкрементално продажбата и ќе се наоѓаме во фазата на пропаѓање. Но, одлуката мора да се донесе, а тоа е да се прекине со тој производ и/или услуга.

По фазата на зрелост доаѓа еден подолг период во кој стагнација претставува основна карактеристика. Тоа е периодот кога тој производ и/или услуга се наоѓаат на врвот од својот животен циклус. Но, токму овој период во последно време е се помал и помал.

Па така, наместо 4 фази ќе имаме 7 фази:

Во наредните постови подетално ќе навлеземе во секој од овие фази.

post

Плаќање по постигнување

Плаќање по постигнување

Веќе подолго време се обидувам да најдам одредена корелација помеѓу успешноста на бизнисот и начинот на поттикнување на вработените! Три години поминаа откако воведов еден ваков систем каде основа на плаќање е постигнатото, а не часови или денови работа.

Сметам дека можам веќе да согледам некои елементи од овој начин на работа иако сеуште не сум наишол на вработен кој навистина ќе го сака овој начин на работа. Можеби затоа што не сум сеуште наишол на квалитет кој го барам!

Многу успешни компании користат ваков систем на работа и ја темелат сопствената успешноста на еден таков систем. На ваков начин ја поттикнуваат креативноста и секако се поголемо остварување од страна на поединците при што се трансформира поединечното во компаниското остварување!

Како основни елементи кои може да влијаат за една ваква стратегија би можел да ги издвојам следниве:

  • Правилен дизајн на имплементација на стратегијата.
  • Избор на вистински вработени во согласност со дизајнираната имплементација.
  • Имплементација во реалноста.

Дизајн на имплементација

Сметам дека е многу важен дизајнот на системот бидејќи преку него ќе поттикнуваме соодветна акција. Но, не смееме да заборавиме на можностите или бизнис капацитетот. Кога велам можностите и бизнис капацитетот мислам првенствено на финансии. Морате прецизно да ја пресметате математиката.

Од друга страна дизајнот треба да обезбеди и задоволство на втората страна, како со поголемо залагање би добиле повеќе.

Избор на вработени (Селекција)

Можеме да имаме одлично дизајниран систем, но доколку не избереме соодветни вработени нашиот перфектен систем нема да функционира. За да еден добар систем функционира мора неговиот состав да биде перфектно составен. На пример, капацитетот на вработениот е подпросечен од она што го нуди вашиот систем, па најнормално е нивниот морал да опаѓа и на таков начин се создава контраефект!

Имплементација на системот

Иако е се супер дизајнирано, иако ги имате најдобрите вработени често пати во пракса ќе се појават недоречености што предизвикуваат забуна кај двете страни. Дизајнираното мора да се примени во целост во пракса. Сите недоречености да се прецизираат и секоја промена да биде ставена на хартија.

post

Потреби на потрошувачи преку WeShop

Секој претприемач сонува полесно и поедноставно да ги знае потребите на неговите потрошувачи. Знаете дека доколку сте ги сегментирале потрошувачите согласно RFM формулата Вие ги анализирате врз основа на пари, време и нарачки. Некои ќе имаат само едно купување и ќе се изгубат. Некои ќе го повторат. Исто така особено е интересно да се има информации за потрошувачите кои согласно Портфолио приод за менаџирање на потрошувачи спаѓаат во квадрантот на потрошувачи со слаба сегашна и висока идна потенцијална вредност. Овие потрошувачи треба да ги задржиме, тие едноставно не тестираат на почетокот и одлучуваат дли ќе останат во бизнис со нас.

Затоа многу вредна информација за еден претприемач е да го знае искуството на тие потрошувачи со неговиот бизнис. Тешко е да се очекува дека некој ќе дојде и ќе Ви каже не ми се допаѓа тоа, тоа и тоа, промени го за да продолжиме бизнис. Поверојатно е незадоволниот да се сврти кон други можности (конкуренцијата).

WeShop Мрежа на потрошувачи

WeShop Мрежа на потрошувачи

Интересна мрежа на потрошувачи гради WeShop.

Што претставува WeShop?

Согласно нивната официјална страна овој сервис претставува:

Мрежа на потрошувачи. Потрошувачите ја користат WeShop платформата за да споделат информации за купување на бесплатна и анонимна основа, распространат потреби за продавачите, формираат мрежа базирана на различни интереси и да се приклучат на пазарот на еден на еден основа.

Едноставно кажано преку овој сервис ќе се обезбеди размена на информации помеѓу потрошувачи, но и достапност до квалитетни информации за бизнисите кои може да ги користат информациите за да не ги направат грешките на другите бизниси или пак доколку се најдат директно да го подобрат сопствениот бизнис.

Сервисот е сеуште во бета верзија.

Поволности за бизниси

Сервисот ги продава анонимните податоци купувачки навики на потрошувачите кои го користат сервисот на бизнисите што има потенцијал да претставува солиден извор на квалитетни информации. Овие информации се локализирани што значи дека еден бизнис ќе може да добие информации и на локално или регионално ниво, односно од онаму од каде што се неговите купувачи.

Од друга страна бизнисите може да им пристапат на потрошувачите кои се дел од WeShop сервисот со целосно персонализирани понуди согласно нивните потреби. Но, овој процес не значи дека бизнисите ќе ги добијат контакт информациите на потенцијалните купувачи, туку целиот процес едноставно се одвива преку оваа платформа.

Во секој случај интересна социјална мрежа, која има потенцијал да се рашири меѓу бизнисите и купувачите. А колку ќе успее зависи колку луѓето ќе ја прифатат (во моментов има над 15000 членови). Но, како идеја за она што бараат во светот е интересно.

post

Веб Банери – Маркетинг средство 64

Веб банери како маркетинг средства

Веб банери како маркетинг средства

Досега поминавме 63 маркетинг средства на претприемач. За оваа недела како 64-то маркетинг средство во распоредот од 100 маркетинг средства е веб банер. Ова маркетинг средство е доста популарно како во светот така и кај нас. Бидејќи не сум некој преголем љубител на банери, размислував да не биде дел од овој серијал на претприемач, но популарноста и користењето сепак ме натера да биде составен дел од овој серијал.

Што претставува веб банер?

Првин би почнал со она што претставува банер. Ќе се послужам со дефинирање на зборот „банер“ во популарната Wikipedia:

Банер претставува знаме или друго парче платно на кое е поставен симбол, лого, слоган или друга порака.

Значи во офлајн светот банер претставува знаме со лого или некоја маркетинг порака кое е поставено на одредена локација за да го претставува бизнисот или некоја друга организација.

Она што ние скратено го викаме банер, всушност претставува веб банер кој што не е изработен на платно туку во електронска форма и не е закачено на физичка локација туку на www (World Wide Web) локација. Да видиме што во Wikipedia e наведено за веб банери:

Веб банер претставува адвертајзинг форма на World Wide Web. Оваа форма на онлајн адвертајзинг претставува закачување на огласот-рекламата на една веб страница. Целта е да привлече сообраќај за веб сајтот преку линкување кон веб сајтот на оној кој се рекламира.

Значи еден бизнис веб сајт поставува веб банер на друг веб сајт со цел да привлече посетители кон неговиот веб сајт, а за возврат плаќа одредена сума на пари на сопственикот на веб сајтот на кој ќе биде закачен банерот.

Како да се користи?

Доста внимателно! Ова е мојот единствен совет. Краткорочно гледано оваа маркетинг средство има навистина голема моќ, доколку се искористи на вистинскиот веб сајт и на вистинскиот начин. Но, долгорочно гледано може да има корист само доколку се продолжува со успешната кампања.

Пред една година разговарав со еден претприемач кој започнуваше со нивниот веб сајт. Ми вели дека ние ќа направиме огромна кампања, ќе ја уништиме конкуренцијата на веб просторот за неколку месеци, на сите позначајни веб сајтови во Македонија ќе имаме банери… Мојот одоговор беше дека постои огромна разлика помеѓу онлајн и офлајн адвертајзинг и дека на интернетот тоа не функционира на таков начин.

И навистина фрлија огромни пари за веб банери, за сите поголеми весници да го претстават раѓањето на тој веб сајт. Но, резултатите не беа такви како што тие ги замислуваат. Единствено добија за кратко време повисок Google Page Rank кој потоа кога прекинаа да плаќаат за банери повторно се намали. Посетеноста не беше спектакуларна за дадените пари. А да не зборуваме за вистинската цел – продажба.

Затоа при користење на оваа маркетинг средство следете ги следниве чекори:

  • Размисли добро за целите кои сакаш да ги постигнеш
  • Анализирај и избери потенцијални веб сајтови на кои сакаш да поставиш банер.
  • Рангирај ги тие веб сајтови согласно број на посетители, карактеристики на посетители и цената.
  • Контактирај ги администраторите на избраните веб сајтови.
  • Ангажирај професионалец за изработка на банер кој ќе привлекува внимание.
  • Поставете го банерот на избраните веб сајтови.
  • Анализирај, мери, споредувај и подобрувај.

Критични чекори од овој процес

Како најкритични чекори од овој процес би ги издвоил следниве:

  • Избор на вистински веб сајт каде ќе биде поставен банерот
  • Дизајн на банерот
  • Анализирање, мерење, споредување и подобрување

1. Избор на вистински веб сајт и локација

Знам дека премногу се залетуваме да веб сајтото на кој ќе поставиме банер има огромен број на посетители. Што и треба да биде. Но, не реба да застанеме тука. Мора да дојдеме до карактеристиките на тие посетители. На пример, на локален бизнис од Битола кој целосно е насочен на пазарот во Битола не му треба банер на веб сајт на кој 95% од посетители се од другите градови додека 5% се од Битола. Ова е поради фактот што ќе плати и за останатите 95% иако не му се потребни. Ова е само еден пример, што не мора да значи дека нема да вреди за тие 5% потенцијални купувачи до кои што ќе дојде, но затоа се важни целите кои се поставени во првиот чекор.

Како поважни елементи-карактеристики во кои би требало дапогледнете би ги издвоил следниве:

  • Локација
  • Возраст
  • Образование
  • Приходи

Кои карактеристики ќе бидат важни ќе зависи од типот на Вашиот бизнис.

Кога станува збор за локацијата морате да ги анализирате понудите и достапноста на локацијата каде ќе биде сместен банерот. Не значи дека тој ќе биде виден од сите постеители. Подобро место ќе обезбеди повеќе кликови кон Вашиот веб сајт.

2. Дизајн и на банерот

Освен локацијата на банерот и дизајнот игра Важна улога во привлекување на внимание и кликнување на истиот од страна на потенцијалните посетители. Дизајнот ќе треба да:

  • Привлече внимание
  • Да прати кратка и јасна порака
  • Да пренесе корисност за потенцијалниот посетител
  • Да го гради Вашиот бренд.

3. Анализа, мерење, споредување и подобрување

Најважниот чекор во кампањите со банери. Постојано ќе мора да ги анализирате, мерите и споредувате добиените резултати од секој банер поединечно поставен на секој веб сајт. Потоа ќе следува подобрување во однос на тоа дали ќе откажете на некој веб сајт, дали ќе ја подобрите позицијата или пак дизајнот.

Потребно е да ги анализирате минимум следниве елементи:

  • Број на посети од секој веб сајт,
  • Број на акции преземени од страна на тие посетители. Акции во смисол на купување или пак регистрација.
  • Просечно времетраење на задржување на посетители од секој веб сајт.

Врз основа на овие фактори ќе можете лесно да воочите дали вреди или пак не вреди банер од секој од веб сајтовите на кои е поставен.

post

Интересни неделни информации 26.07.2010 – 01.08.2010

Неделни информации на претприемач

Тимот на Претприемач Ви го честита денешниот празник. Од денеска, па во наредните 10 дена, Крушево ќе биде домаќин на сите што сакаат да бидат дел од празничната атмосфера која ќе владее во Крушево по повод одбележувањето на 107 години од Илинденското востание. Градот е среден во духот на тој настан, обновени се фасадите на локалните куќи, локалното население е облечено во костуми карактеристични за тој период. Убава можност да се искористи овој ден да се посети градот и да се почуствува таа атмосфера. Честитки до инцијаторите и организаторите на овој настан и пожртвуваноста ова мало гратче да се издигне од заспиеноста и пак да се врати во живот. Убав пример за доследност и упорност во остварувањето на зацртаните цели, со што се исполнува лична желба на претприемачот кој ова го овозможил, но и пошироко на луѓето кои таму живеат и туристите кои доаѓаат. Да се надеваме дека Крушево ќе продолжи да живее со истиот жар и по изминувањето на овие 10 дена, а воедно претставува и убав пример за развој и афирмација на другите градови од нашата земја.

За тие пак што планираат да патуваат надвор од земјата, посебно кај јужниот сосед, од корист ќе биде следната информација:

Заврши штрајкот на превозниците на гориво во Грција

По седумдневен штрајк за возачите на цистерни во Грција, состојбата со снабдување на гориво се нормализира. Се укинува мерката  мобилизација на грчката армија превземена во последните 2 дена за пренос на горивото до бензиските пумпи како би се овозможил нормален тек на работите во екот на туристичката сезона. Синдикатот на превозници се договори со грчката влада. Многу туристи имаа проблеми со патувањето поради недостиг на гориво, па беа принудени да бараат помош од преку граница да им се достави 1-2 канти гориво, за да издржат да ја преминат границата и да ги наполнат резервоарите. Бензиските пумпи од Македонија близу грчката граница, работеа со полна пареа и верувам ги имаат надминато очекувањата за неделни приходи во текот на изминатата недела. Се ми се чини дека од ембаргото за Србија во ’90-тите години, се уште живееме по принципот „Додека на еден не му се стемни, на друг на може да му се раздени“

Железница на Србија, Хрватска и Словенија, без Македонија

Србија, Хрватска и Словенија договорија и најавија основање на заедничка компанија за железнички сообраќај во рамки на коридорот 10. Довчерашните лути непријатели, препознаа економски интерес и си подадоа рака за бизнис вреден 50-60 милиони евра годишно поединечно за секоја од земјите. Ако профункционира оваа линија реалниот пат за Истанбул би требало да се намали од 60 на 35 часа патување. Претпријатието би требало да профункционира од 1 септември. Учеството во овој проект било од отворен карактер, имало покана и за Македонија, но без реакција од наша страна.

Личните податоци на македонски граѓани се достапни и надвор од нашите граници

Од почетокот на оваа година врз на основ на законот против перење на пари, граѓаните при склучување на договор со некоја од деловните банки се должни да ги достават своите лични податоци кои дури опфаќаат и брачна, имотна состојба, политичка активност , позиција итн. Новина е што законот овозможува и доставување на тие податоци и надвор од границите, па дури 5 банки побарале согласност за пренос на податоците до своите матични куќи. Истите изјавуваат дека тие податоци се дел од нивните деловни банкарски тајни, но сепак, се отвора дилема дали постои опасност од злоупотреба.

Од 2011 еден полнач за сите мобилни телефони

Производителите на мобилни телефони што сакаат да ги продаваат своите производи во Европа мора да имаат унифициран полнач, кој ќе одоговара и на други брендови  на телефони. Ова е одговор на ултиматумот од 2008 год. што Европската Унија им го достави на произведувачите на мобилни телефони  да се договорат околу типот на полнач кои би го користеле за своите модели. Најголем дел од компаниите  го прифатија овој услов преку понуда на УСБ полнач кој почнаа да го применуваат на моделите кои излегоа на крајот на 2009 и почетокот на 2010 година. Се очекува сите производители да почнат да го применуваат ова од почетокот на 2011 година. Ова ќе биде многу поедноставно за потрошувачите, но ќе биде значајно и за заштита на околината, нема да се фрлаат непотребните полначи.

post

Претприемничко блогирање во период на годишен одмор

Бизнис блогирање во период на годишен одмор

Бизнис блогирање во период на годишен одмор

Блогот како маркетинг средство е се позначајно маркетинг средство за малите бизниси и претприемачите. Но, време е за годишни одмори. Малите бизниси најголем проблем кој го имаат во однос на ова маркетинг средство претставуваат ресурсите. Недостаток на човечки ресурси кои ќе придонесуваат да не замре Вашиот бизнис блог во летниот период претставува вистинска закана за оваа маркетинг средство. Во многу случаи претприемачот е тој кој во целост ги изведува активностите на оваа маркетинг средство.

Затоа во овој пост ќе се обидам да презентирам неколку идеи кои можете да ги искористите за соодветно организирање како на Вас како претприемачи така и на Вашиот тим доколку го имате.

Доколку имаш време…

Овој дел се однесува на идеи кои можете да ги спроведете доколку обезбедите повеќе време пред тргнување на годишен одмор, така да успеете да имате распоредено постови кои ќе се објавуваат и додека не сте тука. Во Word Press оваа е многу едноставно.

1. Распореди ги написите за период на одмор

Оваа опција навистина е доста полезна кога станува збор за блогот. Едноставно доколку ги подготвите постовите пред време ќе можете да ги распоредите за објавување во соодветниот временски интервал иако Вие нема да сте присутни пред Вашиот компјутер.

Распореди написи за иднина!

2. Подготви серија на постови

Доколку имаш време добро би било да избереш еден до два серијали на написи кои ќе ги подготвиш и ќе ги распоредиш за да се објавуваат во период кога се наоѓаш на годишниот одмор. Едноставно избери неколку теми, направи поднаслови, напиши ги и подеси ја блог платформата која ја користиш да се објават во иднина (период кога сте на годишен одмор).

3. Понеси лаптоп или блогирај преку мобилен

Како опција може да биде и Вашиот лап топ или мобилен телефон. Едноставно под претпоставка дека ќе имате интернет конекција онаму каде што ќе одите ќе можете да издвоите половина час од неколку дена за да напишете некои написи или пак некои случки кои може да бидат поврзани со Вашата индустрија. Но, не заборавајте Вие сте на заслужен годишен одмор!

4. Избери неколку твита за кои сметаш дека се добри и коментирај ги

И оваа алтернатива е добра доколку имате време. Едноставно избери неколку твита од индустријата во која се наоѓа твојот бизнис, коментирај ги и во вид на пост постави да се објават во период кога сте на заслужен годишен одмор.

Доколку немаш време…

Она што е поверојатно е дека претприемачите немаат доволно време во периодот од неколку дена пред тргнување на годишен одмор за да подготват постови за период на годишен одмор.

Тука се претставени некои идеи за брзо креирање на содржина за Вашиот блог која ќе биде објавувана во иднина.

5. Назначи некој од твојот тим да биде одговорен за ажурирање

Ова е најдоброто решение доколку постојат ресурси во бизнисот. Назначи еден колега кој ќе биде одговорен за пишување и објавување на Вашиот бизнис блог во периодот кога Вие ќе бидете отсутен.

6. Подготви реанимација на стари, но популарни постови

Сигурно веќе имате повеќе постови кои се заборавени таму некаде во базата на податоци на Вашата платформ за блогирање. Изберете неколку попопуларни постови извлечете неколку интересни цитати од истите и дообјаснете ги или коментирајте ги.

7. Искористи неколку YouTube видеа со краток коментар

На популарниот сервис за споделување на кртки видео материјали има безброј видео клипчиња кои на некаков начин може да бидат поврзани со Вашата индустрија. Пронајдете неколку популарни и дадете Ваше мислење, објаснување или коментар.

8. Едноставно не објавувај ништо, но барем…

Како последна идеја е едноставно да не објавувате ништо. Но, пред да отидете пишете еден напис дека заради годишни одмори Вашиот блог во тој период нема да има ништо ново.