post

6 Причини за следење на трендови околу Вашиот бизнис

Трендови - 6 причини за следење

Трендови - 6 причини за следење

Успешни претприемачи знаат како да ги следат трендовите во подрачјето на нивниот биснис. Постојат луѓе кои креираат трендови и секако луѓе кои ги разбираат трендовите. Остатокот се луѓе кои ниту креираат ниту следат трендови. Истото е и кај бизнисите, постојат:

  • бизниси кои креираат трендови
  • бизниси кои ги следат трендовите
  • бизниси кои ниту креираат ниту следат трендови.

Што сакате вашата компанија да биде? Следач или лидер?

Последните од 3-те бизниси набргу ќе бидат избришани од мапата на успешни бизниси.

Интересно е да се забележи дека бизнисите сами не можат да креираат жешки трендови. Тие мора да ги разберат потрошувачите и нивните потреби за да креираат тренд кој ќе ги направи лидери на пазарот. Од друга страна не можеме да бидеме само во една од првите две групи (креирање и следење). Успехот бара соодветен микс на креирање и следење на трендови. Ова е еден процес кој никогаш не завршува.

Во следните параграфи ќе прочитате за 6 причини зошто мора да ги следите трендовите околу вашата компанија.

1. Трендовите ќе ви помогнат за подобро предвидување.

Предвидувањето е секојдневна задача за секој претприемач. Доколку ги разберете рендовите, предвидувањето ќе биде изведено подобро и поедноставно од Ваша страна.

2. Трендовите ќе ви кажат што се случува сега и што ќе се случи утре

Врз основа на тековните трендови ќе можеме да откриеме нешто што ќе се случува во иднина.

3. Трендовите ќе ви помогнат да станете лидер, а не следач

Следење на трендови и нивната имплементација во Вашата компанија ќе ве направат лидер, не следач. Можеби во иднината Вие и Вашиот бизнис ќе станете и креатори на трендовите.

4. Трендовите ќе ви помогнат да дојдете до подобри бизнис идеи

Познавањето на рендовите ќе ви овозможи да дојдете до подобри и поквалитетни бизнис идеи.

5. Трендовите ќе ви ги покажат најважните рани предупредувања

Трендовите се екстремно сигурни извори на промени. Тие ќе ви дадат рани предупредувања за тоа што е добро а што лошо во Вашиот бизнис. Доколку ги забележите, ќе ви помогнат да креирате вреден систем за откривање на изворите на организациските промени.

6. Трендовите ќе ви кажат што мора да подобрите во бизнисот

Се што не е компатибилно со тековните и идните трендови во Вашата компанија мора да биде подобрено.

post

Foursquare – Маркетинг средство 82

Од текстови, слики и видео материјали за онлајн споделување се селиме на локација како основа на некои социјалните медиуми во овој серијал за маркетинг средства на претприемач. Онлајн па уште и локација. Можеби ќе ви бидне чудно зошто онлајн присуство да се врзува со локација. Но, сепак голем дел од бизнисите функционираат на одредена локација, а луѓето од маркетингот се оние кои постојано се обидуваат да ја претстават таа локација во главата на потенцијалните купувачи.

Foursquare сеуште е во фазата на раѓање, и многу претприемачи дури не слушнале дека постои такво нешто, а камоли да го разгледуват како можна бизнис алатка. Сепак, ми се чини дека кога би требал на некој да го опишам значењето и можностите за користење на сервисот за бизнис цели во една реченица, таа би била многу долга и секако тешко разбирлива особено кај нас каде се отвараат повеќе прашања.

Од друга страна, мрежата навистина бргу се шири. Иако и Facebook воведе локациски сервис (кај нас сеуште не е достапен) и се зборуваше дека тоа е смрт за Foursquare, сервисот продолжи со огромен пораст на корисници. Согласно информациите од официјалниот блог се вели дека во последната година имаат раст од 100.000 на 4,5 милиони корисници. Сепак тоа е значајна бројка.

Што претставува Foursquare?

Foursquare e исто што и сите други вакви сервиси – социјална мрежа. Исто како и Twitter и Facebook има пријатели при што се бара пријателство и се прифаќа пријателство. Може да се споделуваат искуства. Но, она што го разликува од останатите е што како основа се зема локацијата при што искуствата се однесуваат за конкретна локација. Тоа значи дека еден корисник на сервисот кога ќе дојде на некоја локација (бутик, ресторан, кафуле, парфимерија, козметички салон…) се чекира преку својот мобилен телефон на истата дека е присутен таму (доколку локацијата ја нема корисникот ја додава во системот преку внесување на име, категорија, адреса, град и држава).

Forsquare места

Forsquare места

Освен внесување на локации, чекирање, препорачување и споделување на искуства можете и да прочитате разни искуства и препораки од другите кои пред Вас ја посетиле таа локација. За да биде поинтересно, foursquare доделува и беџови врз основа на онаа што сте го поминале.

Препораки и беџови на Forsquare

Препораки и беџови на Forsquare

Бизнис користење на Forsquare

Сето она погоре опишано е ОК, но каква врска има со бизнисите? Можеби токму ова ќе се запрашате. Но, дали би сакале да привлечете повеќе луѓе во Вашата локација доколку Вашиот бизнис зависи токму од таа локација? Дали би сакале да градите лојалност кон Вашиот бизнис? Дали би сакале да спроведете ефективни промотивни кампањи кои ќе дадат резултати? Дали би сакале Вашиот бизнис да биде излистан пред милионска аудиенција?

Доколку на овие прашања Вашиот одговор како еден претприемач е ДА, тогаш Foursquare може тука за да ви помогне.

Подолу се некои од идеите како можете да го користите Foursquare за бизнис цели:

Натпревар за градоначалник на локацијата на Foursquare

Натпревари за градоначалник на Foursquare

Натпревари за градоначалник на Foursquare

Секое лице со најмногу посети на една локација станува градоначалник (Mayor) на таа локација на Foursquare. Оваа претставува одлична можност да поттикнете натпревар за градоначалничко место.

Лицето кое во последните 60 дена има најмногу посети станува градоначалник и можете да му обезбедите специјален попуст за тоа лице.

Примерот на сликата го прикажува токму тоа. Ова значи едноставно дека Вие и Вашиот бизнис се заблагодарувате на тоа лице за неговата лојалност кон бизнисот.

За дознаете кој е градоначалник на Вашата локација едноставно треба да го отворите бизнис профилот на Foursquare и ќе видите кој во моментов се наоѓа на таа позиција.

Ваквата кампања претставува одличен начин за еден натпревар меѓу луѓето се за да станат градоначалник и да ја имаат привилегијата која ја носи тоа место.

Foursquare промоции

Foursquare промоции

Foursquare промоции

Освен за градоначалничките места можете да направите и специјални промоции кои ќе служат за наградување на купувачите. На сликата лево е даден еден пример за ваква промоција кој сеуште е во фаза на одобрување од Foursquare.

Како идеи за користење на ваквите промоции можете да понудите нешто при секое чекирање или пак при секое 3-то, 5-то итн.

Програми за лојалност

Бизнис корисниците на Foursquare (претходно потврдена локација која ја менаџирате вие) имаат можност за одлична статистика која можете да ја искористите во нудење на дополнителни програми за лојалност кон Вашиот бизнис. Преку таа статистика можете да видите кој бил чекиран во одреден период на време (денес, вчера, последна недела, последни 30 дена, последни 60 дена, последни 90 дена и севкупно).

Оваа статистика има и дополнителни можности во вид на тоа да видите колкав процент од чекирања биле испратени на Twitter и Facebook. Има и најави дека во оваа аналитика ќе се вклучи и временската прогноза така да може да се види како времето влијае на работењето на Вашиот бизнис (иако не сум сигурен дали кај нас ќе ја имаа оваа можност).

Зошто да не ја искористиме оваа аналитика и статистика и да не ги наградиме нашите најлојални купувачи. Како што знаеме 20% од нашите потрошувачи го одржуваат нашиот бизнис со 80% од остварена продажба. Подобро е да ги задржиме тие 20% со специјални програми за нивно нградување како наши лојални купувачи.

Процес на користење

За крај накратко би претставил еден процес кој би требало да го следите за користење на Foursquare како маркетинг средство.

  • Отворете Foursquare сметка.
  • Доколку имате мобилен телефон кој поддржува инсталација на Foursquare апликација инсталирајте ја.
  • Чекирајте се и притоа внесете ја локацијата на Вашиот бизнис.
  • Поврзете се со пријатели, пратете понуди за пријателство и проучувајте го функционирањето на системот. Едноставно чекирајте се каде ќе одите.
  • Отворете ја Вашата локација и кликнете во делот каде што ве прашува дали Вие сте менаџер на оваа локација и започнете ја постапката за потврда на Вашата локација. (Од моето искуство процесот може да трае и неколку месеци)
  • Направете план со цели кои сакате да ги постигнете, промоции и натпревари кои ќе ги понудите и секако промоција на овие програми на Foursquare.
  • Откако ќе ја потврдите локацијата ќе можете да ги користите бенефициите како бизнис корисник на Foursquare и да започнете да го применувате планот.
post

ABC Анализа – 80/20 правило

80/20 правило - ABC анализа

ABC Анализа - 80/20 правило

ABC – анализа дава брз и едноставен преглед на асортиманот во еден малопродажен објект или големопродажен бизнис. Но, може да се користи и во сите подрачја на вашиот бизнис кога треба да донесете одлуки за залихите, асортиманот на производите, маркетинг техники, бизнис процеси, трошоци итн. ABC анализата обезбедува механизми за идентификување на предмети кои имаат значително влијание на севкупните трошоци на залихи и која ќе обезбеди идентификување на категории на залихи кои ќе бараат различен менаџмент и контрола. Слична анализа на ABC анализата е правилото 80/20 кое уште е наречено Парето принцип. Овој принцип се заснива на тоа дека 80% од ефектите доаѓаат од 20% на причини (активности). Ова правило вели дека 80% од вашата продажба доаѓа од 20% од вашите клиенти.

Во секој малопродажен објект, па и во големопродажен бизнис постојат артикли кои не се еднакви по својата вредност. Некои артикли се повеќе барани, на некои артикли повеќе се заработува, додека некои артикли морат да се држат заради комплетирањето на асортиманот. Значи сите артикли се разликуваат по однос на прометот, вредноста, значењето и слично. Бидејки залихите носат лоша конотација и секој настојува да ја намали количината на залихите односно да ги држи на оптимално ниво (негативности кои носат залихи може да се видат во нашиот текст за залихите), со оваа метода јасно и прегледно можат да се согледа вкупниот асортиман и неговото значење за вкупниот промет и вкупниот приход. Тука треба да разликуваме две работи, првата работа е колкав приход ни носи одредениот артикл, а друго колку е баран односно колкав обрт ни носи одредениот артикл. Бидејки некои артикли повеќе се продаваат но носат помал приход, но затоа обрт на обртните средства е поголем па и заработка е поголема, а можеби купувачите доаѓат најповеќе поради тој артикл (во колонијал тоа е леб, млеко…, во авто делови тоа се делови за ремонт, масло, свеќици, акумулатори, гуми… па ќе купат и уште нешто со тоа и приходот ќе биде поголем). Заради тоа може да се направат две табели во кои во едната ќе се анализира Асортиман (бројот на артикли) во однос на вкупниот приход и втора каде би се анализирало Асортиманот (бројот на артикли) наспроти вкупниот промет. Па да се искомбинират двете величини за да се согледа реална состојба и да се избере варијантата која ги максимизира резултатите и со која ќе се постигне поголем успех во работењето.

ABC - анализа на асортиманот во однос на вкупниот промет

ABC - анализа на асортиманот во однос на вкупниот промет

ABC - анализа на асортиманот во однос на вкупниот приход

ABC - анализа на асортиманот во однос на вкупниот приход

Класификација на производи со ABC методата се врши така што асортиманот (вкупно производи) се дели на три сегмента.

Во првиот сегмент А се производи кои се процентуално најмалку застапени да речеме околу 20 % во вкупниот промет, а носат најголем приход на продавницата, на пример 70%.

Во група B, е поголема количински на пример 30 % или вкупно 50%, но во прометот учествува со видливо помал процент на пример 20 % или вкупно 90 %.

Група C, може да биде и 50 % или вкупно 100 %, а вредносно само 10 %, да учествува во приходот или пак профитот.

Овие проценти се земени произволно и ориентационо, ништо не пречи доколку тој сооднос биде блиску до зададената вредност.

Врз база на добиените вредности од ова анализа се врши понатамошна набавка на асортиманот.

За ова може да се направи и компјутерски програм кој ќе работи врз зададените параметри и ќе црта табели и со кои ќе овозможи полесен и попрегледен увид. Можете и да користите MS Excel за спроведување на анализава:

Доколку дојде до промена на асортиманот, под истите услови се прават други табели и процедурата е сосема иста.

Оваа анализа некои ја викаат и како 80/20 правило. Правилото 80/20 или Парето принцип е сугерирано од експертот за бизнис менаџмент Joseph Juran и го крстил по италијанскиот економист Vilfredo Pareto кој вели дека 80% од приходот во Италија оди кај 20% на луѓе. Ова правило вели дека:

  • 20% од вашите активности носат 80% од вашиот приход. Дали треба да ги имате останатите 80% од активностите.
  • 20% од вашите купувачи ви носат 80% од вашиот приход. Насочете се кон задржување на тие 20%.
  • 20% од вашите производи ви носат 80% од вашиот приход. Елиминирајте ги производите кои не ви носат приход и вложете во оние кои носат.
  • 20% од вашите вработени обезбедуваат 80% од успех на вашиот бизнис. Дали треба да ги држите останатите 80% од вашите вработени.
  • 20% од вашите маркетинг активности ви носат 80% од потрошувачи. Елиминирајте ги активностите кои не ви носат потрошувачи, насочете се на продуктивните 20% од активности.
  • 20% од вашите потрошени пари носат 80% од приход. Остатокот од 80% од вашите потрошени пари можете да ги рагледате како можен трошок.
  • итн.

80/20 стапката е круцијална за развој и зголемување на перформансите на вашиот бизнис. Уверете се со тоа што ќе започнете да ги разгледувате работите со овој принцип. Ова не е единствена примена, можете да ја примените и во вашиот личен живот за да го направите поквалитетен вашиот живот.

post

YouTube – Маркетинг средство 81

YouTube - Маркетинг средство

YouTube - Маркетинг средство

YouTube претставува 81-то маркетинг средство на претприемач. Како надополнување на претходното за кое стана збор, Flickr во кое споделувате слики, оваа маркетинг средство се однесува на споделување на видео.

Доколку сликата вреди илјада зборови, колку ли ќе вреди едно видео. И надополнето на ова, доколку Вашето видео биде видено од милионска аудиенција, колкаво маркетиншко влијание ќе има Вашата активност од неколку часа за креација на истото?

Иако насловот на овој пост потенцира конкретен сајт за споделување на видео – YouTube, сепак постов се однесува повеќе на видео за споделување на интернет во бизнис цели кое секако може да се сподели и со други сервиси. Сепак го избрав YouTube како најголем од сите тие.

Споделување на видео

Споделување на видео можеби е наједноставен начин за започнување на градење на портфолиото на социјалните медиуми за Вашиот бизнис. Доколку веќе извесен период Вашиот бизнис постои сигурно имате направено некоја VHS снимка која привлекува прав во некоја полица. Можеби исто така имате некое видео од некоја реклама или снимка од производен процес, или пак снимка од прослава со задоволните купувачи која се наоѓа на Вашиот хард диск ви зафаќа простор и не знаете што да правите со тие снимки…

Од друга страна денес не е потребна скапа технологија за да се направи добра видео презентација. Со инвестиција од неколку стотини евра и неколку часа Вашата виде презентација ќе биде подготвена. Нормално, не како професионалците кои ќе Ви наплатат поголема сума, но за еден мал бизнис со ограничени финансиски ресурси ќе биде доволно да започне да ја гради сопствената присутност на интернет преку видео.

Blendteck како пример

Не постои книга која сум ја прочитал а да не го спомене Blendteck како пример кога станува збор за успех во користење на видео на интернетот како маркетинг средство кое дава одлични резултати.

Blendteck e компанија за блендери базирана во Utah која постигнала огромен успех преку инвестирање на неколку стотици долари во опрема, снимање на видео помало од 2 минути и аплоадирање на истото на YouTube.

Карактеристично е што на сите видео материјалчиња направени од Blendetck и аплоадирани на YouTubе:

  • Се снима демонстрацијата на производот (корисност и моќност на блендерот)
  • На видеото е претседателот на компанијата – Tom Dickson кој всушност ја прикажува корисноста од нивниот блендер (авторитет, репутација, доверба).
  • Постојано објавување на ново видео со нови тестови на нивниот блендер (конзистентност)
  • Интересно е бидејќи секој сака да види што ќе остане од еден iPhone кога се стави во блендер или од некој друг производ (интересност).

Овие карактеристики на овој Blendteck канал на YouTube овозможија оваа компанија во при првото објавување на видео во првите 24 часа да имаат повеќе од еден милион гледања на нивното видео и во истиот тој период да го распродадат нивниот производ за цена од $600.

Во моментов кога го пишувам овој пост нивниот канал на YouTube има скоро 6 милиони прегледи на каналот, над 144 милиони гледања на видео материјали и над 340 илјади регистрирани на каналот.

Секој би го сакал ваквиот успех. Но, никој не може да го гарантира. Но, од друга страна зошто да не се обидеме кога можеме и секако нема да потрошиме огромна сума на пари.

Што е YouTube?

YouTube претставува сервис за споделување на видео материјалчиња кој им овозможува на корисниците лесно и едноставно без никакво техничко знаење да постават видео на интернет и тоа преку различна технологија – веб сајт, мобилен телефон, е-mail…

Она што е карактеристично за YouTube e што гледачите на видео материјалчињата можат да оставаат коментари и секако да копираат линк за споделување на видео или код за поставување на друг веб сајт. Сето ова го поттикнува вирозниот елемент на овој сервис.

Како може да се користи?

Во овој дел ќе се обидам накратко да презентирам еден процес на користење на YouTube во маркетинг цели на Вашиот бизнис:

  • Направи план. Одговори на прашањата што ќе снимам, како ќе снимам и кога ќе снимам видео клип за бизнисот. Што ќе снимате зависи од Вашата креативност. Дали ќе изберете тестирање на Вашите производи, или пак некоја презентација, или пак рекламент клип, или пак How To прикажувања на користење на Вашите производи/услуги или пак било што друго што ќе биде од интерес на Вашите потенцијални купувачи ќе зависи од Вашата креативност. Како ќе снимате ќе зависи од буџетот што го имате за набавка на опрема – видео камера и/или микрофон. Кога ќе снимате ќе зависи од тоа колку видео материјалчиња сакате да правите во одреден временски период и колкаво време имате на располагање.
  • Опрема. Набавете ја опремата, тестирајте ја и спремете ја за Вашето прво видео. Ќе ви биде потребен и софтвер за едитирање за да можете да го подзасредите видеото кое ќе биде снимено со камера.
  • YouTube. Отворете сметка на YouTube и направете посебен канал за Вашиот бизнис. Откако Вашето видео ќе биде спремно поминете на постапката за аплоадирање.
  • Маркетинг на каналот. Нема корист од еден ваков канал доколку не ве дознаат луѓето. Првин, сите информативни рубрики на каналот пополнете ги колку што може поинформтивно. Второ, поставете линк на вашиот веб сајт до вашиот YouTube канал. Споделете го видеото на Facebook и Twitter. Напишете пост на Вашиот блог на кој ќе го ембедирате кодот од видеото. Ставете линк до вашиот YouTube канал на сите останати маркетинг средства…
post

Царинска вредност на стоката при увоз

Царинска вредност

Царинска вредност

Ќе продолжам со серијалот на постови за царински процедури. При увоз на стока за продажба или опрема за Вашиот бизнис, за да таа пратка пристигне до Вас и за да можете да ја пуштите во слободен промет или пак за да ја користите како Ваша ќе мора да платите царински давачки предвидени согласно Законот за царинска тарифа.

Износот на царинските давачки зависи од два елементи:

  • Тарифна ознака во која спаќа стоката која ја увезувате и
  • Царинската вредност на стоката

Врз основа на тарифната ознака кога станува збор за износот на давачките се определува:

  • колкав е износот на царинската стапка (На пример, дали е 0%, 5% или 10%)
  • дали стоката подлежи на други давачки (акциза, прелевман, еколошка такса…)
  • дали за стоката се плаќа целосна (18%) или повластена (5%) даночна стапка.

Од друга страна сето ова започнува да се применува на царинската основица која во голем дел зависи од царинската вредност на стоката.

Што претставува царинска вредност на стоката?

Наједноставно кажано царинската вредност на стоката претставува вредноста на стоката која Вашиот бизнис ја плаќа за да ја набави и да ја добие таа стока.

Согласно царинскиот закон во членост 28 дефинира царинската вредност на стоката:

Царинската вредност на увезената стока е трансакциска вредност, а тоа е вистински платена цена или цена која треба да се плати за стока која е продадена за извоз во царинско подрачје на Република Македонија, прилагодена таму каде што е тоа потребно, во согласност со членовите 35 и 36 од овој закон.

Ова во однос на членовите 35 и 36 и прилагодовуњето кое е потребно се однесува на сите останати трошоци кои се на товар на купувачот (Вашиот бизнис во постапка на увоз на стока) во вид на:

  • провизии и посреднички провизии
  • трошоци за амбалажа и пакување
  • дополнително вградени елементи
  • трошоци за транспорт и осигурување на увезената стока до место на внесување во царинско подраје,
  • трошоци за утовар, истовар и манипулација поврзани со транспортот на стоката и сл.

Еден пример

Да земеме еден пример. Имате фактура за стоката која ја увезувате во вредност од 20.000 евра. Во фактурата имате наведено услови за испорака CIP Скопје што значи дека трошоците за транспорт и осигурување до Скопје ги плаќа испраќачот (за ова во посебен пост). Не постојат други трошоци на Ваш товар. Во таков случај царинската вредност на стоката ќе биде 20.000 евра изразена во денари.

За да биде поилустративно и за да се види дека процесот на утврдување на царинската вредност може да биде сложен ќе го надополнам горниот пример. Да претпоставиме дека стоката претставува некоја машина за Вашиот погон. За да се пушти во функција таа машина потребно е да се изврши обука на Вашите вработени која ја обезбедува испорачателот. Но, таа обука не е наведена во фактурата. Доколку во договорот за купопродажба експлицитно е наведено дека испорачателот обезбедува обука која ќе чини 5.000 евра и ќе трае 3 дена, тогаш царинската вредност на стоката ќе биде зголемана за износот на сумата за обуката (25.000 евра).

Многумина велат дека тоа не е фер. Во моментот на узвозот не е платена обуката. Но, сепак е поткрепено со членот 28 од царински закон став 3:

а) Вистински платена цена или цена која треба да се плати е вкупното плаќање кое е извршено или кое треба да се изврши од страна на купувачот кон или во корист на продавачот за увезената стока и ги содржи сите плаќања кои се извршени или треба да се извршат како услов за продажба на увезената стока од купувачот кон продавачот или од купувачот кон друго лице за задоволување на обврската на продавачот. Плаќањето не е потребно секогаш да се извршува со пренос на пари. Плаќањето може да се изврши преку акредитив или преносливи инструменти, на директен или индиректен начин и

Забележувате дека болдираниот дел од цитатот од законот вели дека царинската вредност ги содржи сите плаќања кои се извршени или треба да се извршат како услов за продажба на увезената стока. Што значи дека плаќањето може да се изврши подоцна како и обуката, но обуката е наведена во договорот и претставува услов за спроведување на продажбата.

И секако ова ние не сме го измислиле. Еве го извадокот од Царинскиот Закон на ЕУ член 29 став 3 под а):

The price actually paid or payable is the total payment made or to be made by the buyer to or for the benefit of the seller for the imported goods and includes all payments made or to be made as a condition of sale of the imported goods by the buyer to the seller or by the buyer to a third party to satisfy an obligation of the seller. The payment need not necessarily take the form of a transfer of money. Payment may be made by way of letters of credit or negotiable instrument and may be made directly or indirectly.

Ова е тема за која има многу за разглобување. Доколку имате некои прашања слободно поставете ги во вид на коментар. Идната недела ќе продолжиме за 6-те методи за утврдување на царинска вредност.

post

Flickr – Маркетинг средство 80

Flickr го избрав како 80-то маркетинг средство на претприемач, не заради тоа што е единствена ваква платформа туку заради тоа што е една од најкористените од социјалните мрежи за споделување на слики.

Доколку сликата е вредна илјада зборови, која е вредноста на тоа да можете да споделувате слики со пријатели, роднини и потрошувачи во Вашата мрежа?

Иако постојат многу претприемачи кои веруваат дека социјалните мрежи за споделување на слики претставуваат единствена поволност за споделување на слики од одмори и прослави со роднини сепак се повеќе се зголемува бројот и на оние кои сметаат дека сликите и социјалните мрежи претставуваат одлична бизнис можност.

Што претставува Flickr?

Flickr претставува сервис за споделување на слики со кој индивидуалците и бизнисите успеваат сопствената визуелна содржина да ја направат достапна за сите оние кои се заинтересирани преку различни средства во вид на веб, мобилни уреди, е-mail, RSS…

Веб сајтот на Flickr е достапен во 8 јазици што претставува солидна оснава за глобалните бизниси.

Како може да се користи во бизнис цели?

Сите ние сме во себе сликари. Денешата технологија ни овозможува постојано во нашиот џеб да имаме солиден фотоапарат, без разлика дали е тоа вистински фотоапарат или пак мобилен телефон. Секојдневно гледам луѓе кои едноставно си ги забележуваат моментите на слика преку мобилен телефон.

Дури стекнувам впечаток дека доколку порано се сликавме за оние „старомодни“ фото албуми кои во одредени прилики ќе ги гледавме заради обновување на спомените од тие моменти, денес едноставно сликите во голем дел се резултат на желба за споделување на Facebook.

Бесплатниот акаунт на Flickr е ограничен на 100 мегабајти месечен аплоад додека про акаунтот е неограничен и без реклами. Можете да имате јавни и приватни слики. Јавните може секој да ги види додека приватните само вие или одредена група на луѓе. Но, скоро 80% од сликите на Flickr се јавни.

Значи користењето се сведува на сликање и аплоадирање на сликите на Flickr. Со помош на бобилните уреди овој процес е премногу едноставен. Така да за бизнис цели можете да сликате одредени карактеристики на Ваши производи, одредени настани на кои присуствувате вие или Вашите вработени, одредени прослави во Вашата компанија, задоволни потрошувачи, моменти од состаноци, моменти од тестирање на производ и/или услуга… Листата е навистина неограничена и се базира најмногу на претприемничката креативност.

Тие слики можете да ги поставите како фото стрим на Вашиот веб сајт или блог.

Уште позначајно е што сите јавни фотографии за кои избирате лиценца за можност за користење од страна на други веб сајтови или блогови имаат потенцијал да бидат објавени на некој друг веб сајт но врз основа на таа лицена корисникот е должен да постави линк до Вашиот фото стрим на flickr. Кога тој посетител ќе кликне на тој линк ќе има можност да види и линк до Вашиот веб сајт или блог. Тој станува Ваш потенцијален купувач.

Flickr линк

Еве еден доказ на оваа предност на flickr:

Од 17000 посети од страна на reffering sites 160 доаѓаат од Flickr. Тоа нешто помалку од 1%. Но, сепак е на 6-то место за сајтот од кој е извлечена оваа аналитика што сепак може да се стави во категорија на корисно за нешто што е бесплатно.

Го потцртав и Google Images (пребарувачот на слики на Google) само заради илустрација дека сликите имаат влијание за обезбедување на посетители кон Вашиот бизнис веб сајт.

Дали да го користите Flickr?

Користење на Flickr за споделување на слики поврзани со Вашиот бизнис претставува одлична можност да стигнете до голема аудиенција.

Дали вашиот бизнис би имал корист доколку некој заинтересиран за Вашите производи и/или услуги врши истражување и сака да ги види тие Ваши производи и пребарува на flickr  по името на Вашиот бизнис и наоѓа одлични слики? Мислам дека ќе се сложите дека ќе имате корист.

Дали ќе имате корист доколку некој употреби некоја од Вашите слики во негова презентација пред менаџментот со тоа што ќе биде наведено од каде е сликата? Сметам дека и за ова ќе се сложите дека е корисно за Вашиот бизнис.

Со едноставна безплатна партиципација на пазарот за споделување на слики Вашиот бизнис едноставно е вклучен во процесот на интернет маркетингот и овозможува дополнителен стрим за лесно наоѓање на Вашиот бизнис на интернетот.

Техники на користење

Иако веќе напоменав неколку можности за користење на овој сервис би сакал да наведам и еден процес кој би ве водел низ сето ова:

  • Прво нешто е секогаш да имате можност да фатите некој момент на слика.
  • Обидете се да стекнете навика за сликање, односно користење на Вашиот мобилен телефон за таа намена.
  • Сликајте: ваши производи, техничка подршка, вработени, потрошувачи, производен процес, монтажа, залихи…
  • Споделувајте на flickr.
  • Изберете колку што можете повеќе ознаки за сликите. Користете име на производ, сериски број, година на производство, примена, намена, проблем кој го решава…
  • Инсталирјте и користете бесплатни додатоци со кои ќе се прикажуваат тие слики на Вашиот веб сајт, блог или други социјални мрежи кои ги користите.
post

Оптимални залихи: предности

Оптимални залихи

Оптимални залихи

Во претходните текстови за залихите наведовме дека тие се многу значајни за малите бизниси. Во првиот текст: Залихи зло без кое не се може или се може го опишавме значењето на поимот залихи, заклучивме дека тие мора да се управуваат, а управувањето може да се изврши на повеќе начини (еден од тие е ABC анализа или 80/20 правило). Во истиот текст заклучивме дека залихите претставуваат некое зло без кое се може, но во исто време и нешто без кое не се може. Токму затоа управувањето со залихите е една важна компонента во водењето на бизнисите, а особено за малите каде постојат ограничени финансиски ресусри.

Во вториот текст од серијалот за залихи: Залихи – како да ги управуваме претставивме еден едноставен модел на системот за контрола и управување на залихите кој овозможува постојано подобрување на нивото на залихите во претпријатијата.

Но, зошто сето ова?

Дали вреди трудот вложен во систем за управување со залихите?

Што ќе добие претприемачот со примена на ваков систем за управување со залихите?

Ова се прашања кои се поставуваат од страна на претприемачите пред започнување на примена на системот за контрола на залихите.

Што претставува оптимално ниво на залихи?

Во едно претпријатие залихите можат да бидат преголеми, премали или оптимални. Целта на системот за управување со залихи е тие да се одржуваат на оптимално ниво.

Оптимално ниво на залихи е таа количина на залихи која ќе ја имаме и која ќе биде најекономична (со најмалку трошоци), а од друга страна ќе обезбеди непречено функционирање на работата на бизнисот.

Пристапот за согледување на предностите ќе го претставиме преку недостатоци на преголемите и премалите залихи, за да можеме на крајот да ги согледаме предностите на оптималното ниво на залихите.

Недостатоци на преголеми залихи

Доколку не водиме сметка за залихите ќе гледаме секогаш во магацинот да имаме стока на залиха, а се со цел да не се случи да снемаме во моментот кога ќе примиме нарачка или кога ќе влезе потрошувачот да побара да купи некој од производите што ги продаваме. Во такви ситуации претприемачите од око ги следат залихите во магацинот и доколку магацинот е полн, тогаш е ОК. Кога се намалува веднаш се тргнува со набавка за дополнување. Но, што значат преголеми залихи?

Преголеми залихи значат:

  • Зголемени трошоци во форма на данок. За секоја набавена стока вие плаќате ДДВ. ДДВ-то ќе го повратите кога ќе ја продадете стоката. Значи Вашиот бизнис непотребно го финансира државниот буџет. Можеби ќе ги продадете веднаш, но можеби по 2,3, 6 месеци. Значи 6 месеци вие ќе имате заробено пари (18%) од вредноста на стоката во форма на платен ДДВ. Доколку вредноста на стоката е 100.000 денари тоа ќе бидат 18.000 денари заробени пари.
  • Непотребно блокирање на капитал. За секоја набавена стока вие му плаќате на вашиот снабдувач (добавувач). Значи вашиот бизнис непотребно го финансира вашиот снабдувач со плаќање на стока која ќе стои во Вашиот магацин се додека не се продаде. Доколку вашите залихи опфаќат период од 6 месеци продажба вие 6 месеци однапред имате врзано пари кај вашиот снабдувач.
  • Магацин. За поголемо ниво на залихи ќе морате да имате поголем магацински простор. Поголемиот магацинси простор бара повеќе пари за одржување. Доколку изнајмувате ќе треба да платите повеќе. Сето ова ќе ги зголеми трошоците на вашиот бизнис.
  • Осигурување. За поголеми залихи и ризикот од некоја штета е поголем. За да го намалите ризикот ќе го осигурате вашиот магацин. Осигурувањето е поскапо за поголема вредност на стоката која се наоѓа во вашиот магацин.
  • Застарување. За голем број на стоки постои опасност од застарување. Ова посебно се однесува за сезонски стоки. Доколку не се продадат во период на сезона остануваат за наредна година. На ваков начин ќе имате заробено пари во стока која цела година нема да ја продадете и ќе постои можност наредната сезона таа стока да е веќе застарена и да ја продавате по пониска цена. Дали ќе ги извадите трошоците за таквите производи?

Недостатоци на премали залихи

Втор екстремен случај е кога се работи со премногу мали залихи.

Што значат премали залихи за претприемачите?

Премалку залихи значат:

  • Премногу нарачки. На ваков начин Вие како претприемач ќе мора да имате повеќе нарачки во кратки временски интервали. Ова значи зголемени трошоци за комуникација со вашите снабдувачи.
  • Губење на потрошувачи. Доколку некој нарача или пак дојде во вашиот продажен објект, а вие не можете да му ги обезбедите навремено производите што тој ги бара, можете да го изгубите како Ваѓ потрошувач бидејќи ќе отиде кај вашата конкуренција за да си ја задоволи сопствената потреба.
  • Губење на количински попусти. Голем број на ваши снабдувачи овозможуваат одредени попусти кои се поврзани со количината која ја нарачувате. Кога нарачувате почесто во помали количини нема да ги имате попустите што ги дава вашиот снабдувач.
  • Поголеми трошоци за транспорт. Имате мала количина на стока, а транспортот изразен во пари е ист и за мала количина и за поголема количина. На пример транспортот од А до Б чини 1000 денари. Кога ќе нарачате 1000 парчиња транспортот во цената на производот влегува со 1 денар. Но, кога ќе нарачате 100 парчиња, транспортот во цената на производот влегува со 10 денари. Што секако е многу.

Предности на оптимални залихи

Кои ќе бидат предностите од оптимално ниво на залихи што ќе се добијат со соодветен систем за управување со залихи?

Оптималните залихи ги имаат следниве предности:

  • Помалку врзани пари во данок
  • Помалку врзани пари кај снабдувачи
  • Помали трошоци за магацин
  • Помали трошоци за осигурување
  • Помала веројатност за застарување на производите што ги имате на залиха
  • Оптимално ниво на нарачки и постојано подобрување на времетраењето на нарачките
  • Нема да се изгубат потрошувачите бидејќи во секој момент ќе биде задоволена нивната потреба
  • Добивање на количински попусти
  • Помали транспортни трошоци

Последно но и најважно, преголеми залихи ги прекриваат проблемите во другита аспекти на бизнисот. На пример, преголеми залихи го покриваат проблемот во системот на набавка (синџирот на набавка), го покриваат проблемот со шкарт кај производствените претпријатија. Со оптимално ниво на залихи ќе се овозможи овие проблеми да излезат на вделина и да се решаваат, а од друга страна овозможува постојано подобрување на севкупните бизнис процеси. Ова во научната литература најчесто се опишува во вид на езеро со вода, при што кога езерото е полно (вода претставува залихи) ги прекрива гребените кои претставуваат проблеми.

Залихи - Сокриени проблеми

Залихи - Сокриени проблеми

post

E-mail маркетинг кампања во 8 чекори

E-mail маркетинг станува се покорисно и продуктивно маркетинг средство за бизнисите без разлика на нивната големина. Можете да го користите за поттикнување на комуникација со Вашите купувачи. Можете да го користите за зголемување на продажба. Можете да го користите за зголемување на препознатливоста на Вашиот бренд…

E-mail маркетинг во 8 чекори

E-mail маркетинг во 8 чекори

Чекор 1: Што сакате да постигнете?

Која ќе биде целта на Вашите e-mail маркетинг кампањи? Што сакате да постигнете? Дали е тоа зголемување на продажба, градење на репутација, препознатливост на бренд…

Чекор 2: Изберете соодветен софтвер

Кога веќе знаете што сакате да постигнете со e-mail маркетинг кампањи, веќе ќе имате слика за тоа што секој е-mail треба да содржи. На таков начин ќе можете најдете различни софтвери за соодветната цел што сакате да ја постигнете. Пробајте со Aweber или Getresponse.

Чекор 3: Започни со градење на листа

Доколку веќе имате некоја листа започни да ја користиш додавајќи ја во базата на податоци. На Вашиот веб сајт или блог ставете форма за прибирање на информации за Вашата листа и на таков начин ќе започнете со градење на истата.

Чекор 4: Дизајнирајте го првиот е-mail (Добредојде)

E-mail-от за добредојде е првиот е-mail што ќе го добие секое лице откако ќе стане дел од Вашата листа. Овој е-mail е одлично место каде можете да објасните што може да очекуваат од Вас. Доколку давате некој тип на награди како попустни купони или нешто друго дајте ги преку оваа порака.

Чекор 5: Дизајнирајте ги E-mail-овите за аутореспондерот

Аутореспондер е е-mail кој ќе биде пратен автоматски на претходно определен датум на лицата кои се дел од Вашата листа. Мора да одлучите што ќе биде содржано во таа порака и кога ќе биде испратена определена порака. Обидете се пораките да не бидат премногу „продажни“. Подобро е да едуцирате и градите односи.

Чекор 6: Дизајнирајте други пораки

Започнете со бреинстормирање на идеи за други пораки. Освен аутореспондерите можете да праќате од време на време други пораки. Може да бидат нови промоции, покани за настани, нови производи, прашалници…

Чекор 7: Подесете ги првиот e-mail и аутореспондерите во софтверот

Се што дизајниравте во претходните неколку чекори подесете го во софтверот кој го избравте во чекорот 2.

Чекор 8: Следете ги резултатите

Последен, но најважен чекор е да ги следите постигнувањата од Вашата e-mail маркетинг кампања. Мора да погледате во:

  • Стапка на отварање на e-mail-овите. Колку луѓе од листата го отвораат е-mail-от што го испраќате? Што се случува доколку го промените предметот (Subject) на пораката.
  • Нови регистранти. Што се случува доколку ја смените страната за регистрација.
  • Кликнувања. Што се случува со кликнувањата на различните пораки?
  • Кликнати линкови. Кој тип на линкови носи најмногу кликнувања?
  • Стапка на дерегистрација. Колку луѓе се дерегистрираат? Кога се дерегистрираат?

Овој пост е оригинално напишан за Entrepreneurship in a Box. Тука е само преведен.

post

Залихи – Како да ги управуваме?

Во претходниот пост пишувавме за залихи како зло без кое се може или не се може во кое претставив еден поедноставен дијаграм на тек за управување со истите.

Управување со залихите е повеќе од едноставно набавка на производи. Мора да знаете што да набавите, кога да набавите и колку да набавите. Мора да воведете систем на следење на залихите (рачно или автоматизирано) и од тој систем да извлечете знаење кое ќе го користите во процесот на набавки.

Од што зависи нивото на залихи?

Две работи од кои зависи нивото на залихите што треба да го имате се нормална (просечна) побарувачка на вашите производи во определен временски период и времетраење на процесот на набавка на Вашите производи (време од нарачка до примање на нарачаните производи).

Недоволно залихи може да значи губење на продажба, пореметување на производствениот процес и зголемување на оперативни трошоци. Од друга страна големи залихи ги зголемуваат трошоците. Затоа претприемачите мора посебно внимание да посветат на залихите.

Процес на управување со залихи

На графикот е прикажан еден поедноставен систем за контрола и управување со залихите и континуирано подобрување на истиот.

Дијаграм на тек за управување со залихи

Дијаграм на тек за управување со залихи

Значи доколку тековните залихи се поголеми од просечната потрошувачка во одреден временски период помножена со времетраење на процесот на нова набавка постои можност за подобрување на нивото на залихите.

На пример, просечната дневна потрошувачка е 10 парчиња, а процесот на набавка трае 3 денови. Во една ваква состојба теоретски ќе мора да имаме 30 прачиња на залиха. Доколку имаме 50 значи дека имаме 20 парчиња повеќе што претставува можност за подобрување.

Ова подобрување се изведува преку воведување на систем за контрола на залихите и намалување на истите на нивото на просечната потрошувачка во одреден временски период помножена со времетраење на процесот на нова набавка.

Како што забележувате на нивото на залихи влијае и времетраењето на процесот на нарачката. Овој временски период од нарачката до пристигнување на стоката може да зависи од Вашиот бизнис и од снабдувачите. Откога ќе го намалите нивото на залихите поминете на процесот на намалување на времетраењето на нарачките. За потоа повторно да го започнете истиот циклус.

Методи и техники

Може да користите повеќе методи и техники за управување на залихите. Но основата е во квалитетен систем на следење на залихите. Овој систем на следење може да биде:

  • со паметење
  • со картички (на хартија)
  • компјутерски

Првиот начин може да се користи доколку претприемачот е искусен во работењето, а асортиманот не е голем, па во секој момент знае во која состојба се наоѓаат залихите. Овој начин на работењето најмалку е препорачлив, бидејки напорот кој треба да се вложи за другите начини на евиденција е далеку помал, а добиените резултати се значително поголеми. Со ваков начин на евидентирање можни се чести и големи грешки, а воедно се оневозможува правење на дополнителна анализа со која ќе се утврди временскиот период во кој одредена стока имала зголемено или намалено побарување. Во пракса постојат примери на претприемачи кои на овој начин беспрекорно функционираат, но ние сепак не би го препорачале овој начин на работењето освен во екстремни ситуацији кога треба брзо да се реагира на некоја евтина понуда или во некој друг момент. Но замислете само доколку се работи за 100 артикли. Дали може да се запомнат сите. Секако дека не, затоа претприемачите мора да преминат на некој од пософистицираните начини на следење на залихите.

Евидентирање со картички е постар метод во однос на компјутерската евиденција. Овој метод се користи во случаи кога претприемачот нема компјутер на располагање или доколку претприемачот не е обучен за работење со компјутери. Тоа во денешно време е карактеристика на старите претприемачи кои немат доволно знаење за компјутерите. И во овој случај во практиката се наидува на претприемачи кои беспрекорно функционираат, но ние нема ни овој метод да го препорачиме (може како испомош во случај на некој квар на компјутер, нестанок на струја или некои други екстремни случај). Овој систем функционира на таков начин што за секој тип на производ постои картон со кој се води евиденција како што е прикажана на табелата. Овој систем е многу подобар од претходниот, но може и да биде компликуван со поголем број на артикли. Ако имаме 100 артикли ќе мора да водиме посебна евиденција за сите артикли.

Датум набавкаПЛ бр.КоличинаЕд.меркаДатум продажбаФактура бр.КоличинаОстаток во магацин
01.01.20091100PCE07.01.200918020
08.01.20093150PCE15.01.2009510070

Сега е веќе вообичаено да се набави персонален компјутер, соодветен софтер и да се изврши шифрирање на артиклите и евиденцијата на продаденото количество и количеството на залихите. Можно е автоматско печатење на листи на сите артикли, на сигнално ниво и започнување на нивна набавка. На овој начин се отвара можност за комплетна евиденција од потребната залиха, од побарувачката што била во претходниот период и уште голем број на другите анализи. Со шифрирањето во секој момент може да се види каква е состојбата на залихите како и лесно да се пронајдат потребните залихи во магацинот.