post

ОСТВАРЛИВА ЦЕЛ – ОСНОВА ЗА ОСТВАРУВАЊЕ

Сите бизниси функционираат врз основа на поставување на цели и реализација на одредени активности за да се остварат тие цели. Поставената цел е таа која го води бизнисот на патот кон успехот. Без цел нема ни успешен бизнис, целта е таа која го померува бизнисот од status quo состојбата. Целта може да биде зголемување на продажба за толку и толку проценти, зголемување на приход за толку и толку проценти, зголемување на профитот за толку и толку проценти, зголемување на учеството на пазарот за толку и толку проценти…

Cel Многу често се случува бизнисите да пропаѓаат и како главна причина да биде нереално поставената цел. Оваа нереално поставена цел е целта за која знаеме дека не можеме да ја оствариме. Ние можеме лесно да поставиме цел за зголемување на приходи за 100%, но не е лесно да се остварат тие 100% зголемување. Затоа кога поставуваме цел треба да тргнеме од размислување дали ќе можеме да ја оствариме таа цел инаку подобро е воопшто да не поставиме таква цел.

Некои професионални програми за изработка на бизнис планови воопшто не ви даваат да пишувате проценти кои се неколку пати поголеми од просекот на индустријата за која се однесува Вашиот бизнис план. Многу пореално зголемување на приходи е 10-30% одколку зголемување на приходи од над 100%. Не, дека 100% зголемување не е остварливо, за некои бизниси и претприемачи можеда биде остварливо, но за некои и повеќето нема шанси. Затоа е потребно да се примени систематски приод во поставување на целите.

Како да се изведе тој систематски приод? Еве некои чекори кои во најмала мерка би требало да ги примените:

  • Постојано следете ги бројките на Вашиот бизнис:
    • Продажба
    • Приходи
    • Профит
    • Готовински тек
  • Најдета ја меѓузависноста на тие бројки
  • Видете како во минатото се зголемувале тие бројки на годишно ниво и колкав е процентот на тоа зголемување
  • Размислете колку нови потрошувачи ќе ви треба за остварување на некоја цел која ќе претставува зголемување на тие бројки
  • Размислете дали и како би можело тоа да се оствари
  • Доколку може и знаете како да се остваи тогаш вашата цел е реална и остварлива.

Поставете ја како цел за нареден период таа која е реална и остварлива. Ова ќе овозможи:

  • Постигнување на целта
  • Зголемување на потенцијалната енергија на претприемачот и на вработените во бизнисот заради остварување на целите
  • Остварување на плановите и зголемување на ефикасноста и ефективноста на бизнисот
  • Среденост на целиот бизнис систем бидејќи нема да се брка она што не може да се оствари.
post

ДВИЖЕЧКА СИЛА НА ПРЕТПРИЕМАЧОТ КАКО ОСНОВА ЗА УСПЕХ

Многу добри бизниси се започнати но сепак доаѓаат до рана смрт заради непостоење или пак немање на движечка сила која ќе го води на патот кон успехот. Оваа движечка сила на секој мал бизнис се наоѓа во претприемачот. Во почетокот можеби тој ќе е сам и газда, и продавач, и набавувач, и ќе води сметка за маркетинг, финансии, право… Доколку во сите овие подрачја нема движечка сила која ќе го натера да ги изврши сите тие активности, веројатноста за поминување во наредната фаза од животниот циклус на бизнисите –  проблематичен период е премала. Подоцна, кога ќе се премине во фазата на проблематичен период, финансиите ќе бидат стабилизирани, односно ќе има постојан прилив ќе може да се вработат луѓе кои би ги изведувале сите овие активности. Во, оваа фаза одреден дел од движечката сила ќе треба да се префрли на вработените. Но, сепак главната улога во поттикнување и префрлување на таа движечка сила ќе биде претприемачот. Е, тука влегуваме во едно ново подрачје кое се нарекува менаџмент.

Dvizecka_Sila Во раната фаза на бизнисот – започнување, движечката сила ќе зависи од:

  • Едукацијата или знаењето на претприемачот
  • Бизнис како хоби
  • Пасија кон тоа што го работи претприемачот
  • Желба за успех.

Првите три беа и првите чекори при креирање на бизнис идеја. Четвртото е желбата за успех која во секоја работа што ја работиме има свое влијание. Доколку немаме желба за успех логично е и да не постигнеме успех. На таков начин на првите проблеми (сопки) ќе се откажеме. А проблеми ќе има секогаш.

Но, движечка сила може да бидат и првите знаци на успех. На пример, првата продажба, првите повисоки приходи, првите задоволни купувачи кои се враќаат. Сето ова може да ја зголеми движечката сила на претприемачот. Сепак, првите успеси може да дојдат и подоцна. Но, доколку се очекуват и се знае дека она што денес го правиме ќе даде резултати утре, секако дека ќе имаме движечка сила.

Она што е најважно е секогаш да постои движечка сила за претприемачите. Ова ќе го постигнеме со:

  • Постојано зголемување на нашата потенцијалната енергија
  • Постојано имање на желба за успех
  • Да имаме пасија за она што го работиме
  • Работата во бизнисот да претставува забава и задоволство
  • Да знаеме да ги префрлиме обврските кон вработените
  • Да знаеме да ги мотивираме вработените за појава на движечка сила и кај нив
  • Планирање кое ќе бара систематско спроведување на активности на патот кон успехот.

Без движечка сила, ќе нема ни потенцијална енергија на бизнисот. Колку имаме поголема движечка сила, толку и потенцијалната енергија ќе биде поголема, толку ќе бидат поголеми и бизнис перформансите, толку ќе биде поголема и веројатноста за успех на бизнисот. А секој успех предизвикува уште поголема движечка сила. Така да влетуваме во еден кружен циклус кој е постојан и никогаш не прекинува. Но, сепак од претприемачот зависи да ги помине првите две фази од животниот циклус на бизнисите.

post

МАРКЕТИНГ СРЕДСТВА – ФЛАЕРИ

Продолжуваме со 4-тото маркетинг средство за малите бизниси заради промоција и зголемување на влезот во продажната инка. Флаерите спаѓаат во истата група на маркетиншки средства како и брошурите. И флаерите се едно од средствата кои МОРА да се користат од страна на претприемачите. Тие можат да генерираат голема продажба со вистинско користење. Разликата помеѓу флаерите и брошурата е во големината и деталноста. Значи брошурите содржат повеќе детали од флаерите.

Флаерите можат да бидат еднострани или двострани. Можете еден А4 формат хартија да го искористите на следниов начин:

  • Од еден лист да направите 2 флаери
  • Од еден лист да направите 4 флаери
  • Од еден лист да направите 8 флаери

Flyer Првиот не би го користел бидејќи флаерот ќе биде и поскап и преголем (сепак не правиме брошура). Но, за некои специјални настани може да биде доста корисен еден таков поголем флаер. Вториот тип 4 парчиња од еден А4 лист е најдобрата големина за еден флаер и во секој случај двојно е поевтин од првиот. Третиот тип е многу мал но сепак најевтин и не е лошо да се имаат и такви флаерчиња кои би се делеле масовно на луѓето. Со повеќе од 8 од еден лист не би препорачувал бидејќи ќе биде премал и тежок за читање. А, се што е заморно за читање не се чита, а тоа не ни е целта.

Флаерите може да се печатат еднострано или пак двострано. Двостраните флаери може да соберат повеќе информации за Вашиот бизнис и може да бидат пефикасни и поефективни маркетиншки оружја, но секако и поскапи.

За изработка можете да го искористите Microsoft Office Publisher како алатка исто како што наведовме и за брошурите. Многу е едноставно и забавно. Можете да ги печатите и во црно-бела боја или во боја. Сепак флаерите во боја ќе остават посилен впечаток кај лицето до кое ќе дојде.

Освен Publisher-от можете да го искористите и Microsoft Word или Power Point за кои што можете да најдете голем избор на темплејти на интернетот. Доволно е само да пребарате на google за „flyer templates“ и ќе добиете голем избор на резултати за бесплатни темплејти. Истите ожете да ги искористите и за добивање на идеа што сакате да изработите.

Инаку, доколку сакате попрофесионално да ги изработите можете да најдете софтвери за изработка на флаери. Овие софтвери може да бидат од бесплатни до многу скапи. Разликата е во квалитетот и опциите кои што ги нудат.

Додека брошурата како поскапа во однос на флаерот се дели на посебно избрана целна група на луѓе флаерите може да се користат и за масовно распространување на информации за бизнисот.

Што треба да содржи еден добар флаер?

  • Лого на бизнисот
  • Графика во корелација со бизнисот
  • Адреса и контакти
  • Мапа како да ве најдат
  • Елемент на ургентност
  • Основни информации или пак слика со Вашите производи или тип на услуги.

Флаерите исто како и брошурите можете да ги делите. Но разликата е што немора да ги делите на местата на целниот пазар туку секаде каде ќе ви текне и каде ќе поминете. Со флаерите можете:

  • Да ангажирате некој да ги дели на улица или крстосница.
  • Да ги делите на саеми
  • Да разговарате со неколку трафики да ги вметнат во најпродаваните весници
  • Да дадете на сите роднини, пријатели и познаници да ги делат на нивните роднини, пријатели и познаници
  • Да ги поставите во Вашиот продажен објект за луѓето самите да си ги земаат
  • Можете да посетите неколку паркизни на целниот пазар и да ги подметнете на бришачите
  • Можете да посетите неколку згради со повеќе станови во Вашиот целен пазар и да ги ставите во поштенските сандучиња
  • …

Искористете ги флаерите, не се скапи а може да одиграат солидна улога во привлекување на потенцијални потрошувачи во Вашата продажна инка.

post

БИЗНИС СТАТИСТИКА, АХ ТАА СТАТИСТИКА

Како одмор од оние над сто маркетиншки средства сакам да разгледувам и чудно однесување на некои наши институции. По централниот регистар кој игра клучна улога за бизнисите сега ќе го опфатам и нашиот сакан Државен Завод за Статистика. Но, прво малку вовед.

dzs Заводите за статистика претствуваат или пак треба да претставуваат еден непресушен извор за бизнисите, а особено за малите. За анализа на пазар, многу податоци можете да обезбедите преку еден таков завод. На пример, сакате да започнете бизнис и ве интересира во бројки во некој град колку такви бизниси  има, колку приходи остваруваат, колкава е побарувачката и како ќе се одвива во иднина. Тоа се информации кои се потребни за секој претприемач, а не бла бла статистика и малку високи зборови кои две третини нема да ги разберат. Достапноста на таквите информации е од непроценливо значење за претприемачите, па можеби исто како и потреба од финансии.

КОНТАКТ БРОЈ 1. На сајтот на нашиот ДЗС (Државен Завод за Статистика) одам често барам информации за да можам на истите да ги базирам некои мои одлуки. Но, секогаш доаѓам до информации кои се или збирни или многу сиромашни и за ништо не вредат.

КОНТАКТ БРОЈ 2. Друг контакт ми беше кога ми се јавија за анкета за користење на интернет. Нормално, прифатив. По одговарање на прашалникот го прашувам човекот кај можам да најдам за да купам статистички годишник (над 6000 денари беше) ми кажа дека тие имаат само еден, а не знае каде се продава. Интересно е што тогаш и на сајтот можеше да прочиташ само цена, а не и како се доаѓа до него. Па, добро можеби нашите „експерти“ квази статистичари  мислат дека таквите продукти се потребни само на големи компании и владини институции. А, малите бизниси и претприемачи кој ги е… не им е потребно ништо. Па господа наши „експерти“ квази статистичари можеби е време да излезете од некои начини на размислување кој живее во погрешно време (пред 50-тина години кога и немаше многу мали бизниси и претприемништво.

КОНТАКТ БРОЈ 3. Трет некаков си контакт или да имам некоја работа со ДЗС е  добивање на една анкета како сум задоволен од нивниот богат асортиман на производи и услуги. УФ каде ме погодија. Прво, писмото го добив еден ден по поминување на рокот на доставување на одговори. Второ го добив во хартиена форма, што бара мој ангажман (заокружување и пакување во плико и носење во пошта). Можеби нашите „експерти“ квази статистичари не чуле дека постојат и електронски прашалници за кои ќе добијат и повеќе одговори, а со тоа и поголем статистички примерок, а со тоа и поголема веродостојност на анализата. ОВА Е САМО ЗА НАШИТЕ „ЕКСПЕРТИ“ КВАЗИ СТАТИСТИЧАРИ:

За ова и не мора многу знаење за да се направи само треба да се сака (но можеби просечната старост на нашите „експерти“ квази статистичари е доста голема па затоа она што си го знаеме лист и хартија е најсигурно).

Го одговорив прашалникот но не го пратив. Се извинувам господа „експерти“ квази статистичари но немам време да одам во пошта а ниту пак да ви ги скенирам и праќам одговорите. Вие за вашите анализи и анкети ќе наплатувате.

Но сепак сакав да дадам допринос во анкетата бидејќи се однесуваше на анализа на квалитетот на ДЗС. Ова заради можност да ги освестам за да поработат малку повеќе со што ќе дадат придонес во развој на претприемништвото, а со тоа и на економијата на Република Македонија. Па побарав на интернет и најдов не ист ама сличен прашалник и го одговорив но за жал немаше нула како опција бидејќи ни единицата не ја заслужуваат.

И закрај нешто! Господа „експерти“ статистичари и господа од нашата сакана влада не е се во пари. Треба да знаете дека за јак и здрав бизнис понекогаш квалитетна информација е многу повредна од милиони кредитчиња кои се делат за малите бизнис. Сватете си ја работата во вистински смисол и бидете сервис на граѓаните на оваа наша напатена држава, и тоа ќе биде сосема доволно, резултатите сами по себе ќе си дојдат.

post

МАРКЕТИНГ СРЕДСТВА – БРОШУРИ

Време е за третото маркетинг средство од ветените над 100. Во овој напис ќе ги презентираме брошурите како средство кое МОРА да се користи во маркетингот на Вашиот бизнис. Зошто МОРА! Затое што не се скапи. Затоа што може да опфати многу луѓе. Затоа што се информативни. Затоа што се ефективни и ефикасни. Затоа што содржат информации и од други средства. Затоа што има простор и за дополнителни информации за производ и/или услуга.

Брошурите може да бидат во повеќе облици:

  • Еднострана брошура печатена само од една страна налист хартија
  • Двострана брошура печатена на двете страни на лист хартија
  • Двострана брошура печатена од двете страни на лист хартиија и свиткана за да се отвара како книга.

Брошурите може да бидат печатени или црно бели или во боја. Ова зависи од тоа каков ефект сакате да постигнете со брошурата. Најважно е брошурата да содржи колку што може повеќе информации за Вашиот бизнис.

BrosuraКако една алатка за изработка на брошурите можете да го искористите Microsoft Office Publisher со кој можете да изберете дизајн, да се играте со боите,  да внесете Ваше лого и информации за она што сакате да го содржи брошурата. Освен тоа Publisher-от може да ве води низ целиот процес на дизајнирање на брошурите. Имате можност и преку интернет да симнете темплејти кои ви се допаѓаат и да ги искористите за изработка на Вашите брошури. Целиот процес на изработка е едноставен и забавен. Пробајте.

Втора работа околу брошурите се информациите кои треба да ги содржат. Не ви треба брошура која нема да привлече внимание на читателот и која не предизвикува желба кај читателот да дојдат во Вашиот продажен објект или да ве исконтактират. Една солидна брошура треба да содржи:

  • Насловна страна. Насловната страна треба да го наведе читателот да ги читаат останатите страни од брошурата каде ќе биде претставена Вашата понуда. На насловната страна треба да биде Вашето лого и некои детали за Вашиот бизнис. Освен тоа и некоја реченица со која ќе предизвикате преземање на акција или минимум читање на останатите информации.
  • Вашата понуда. Ова е еден од најголемите елементи од брошурата. Тука давате краток опис на Вашите производи и/или услуги. Ги наведувате проблемите кои ги решаваат и како читателот може да се најде себеси со тие производи и/или услуги.
  • Ургентност. Брошурата има за цел да предизвика ургентност за акција. На ваков начин читателот да добие желба веднаш да превземе некоја акција за купување. Доколку давате попусти тука треба да ги наведете со прецизен датум до кога важат.
  • Задна страна со информации за контакт и логото на бизнисот како и карта каде сте лоцирани или каде можат да ве најдат. Доколку имате попустен купон можете да го поставите на задната страна но на некоја од претходните да наведете кај се наоѓа и што треба да направат (ургентност).

Третата работа околу брошурите како маркетиншко оружје е дистрибуција на истите. Брошурите не служат за да фаќаат прашина. Тие треба да се дистрибуираат до потенцијалните потрошувачи и то на целниот пазар. Проверете во Вашиот бизнис план кој е Вашиот целен пазар. Направете план како да стигнете до нив. Инаку дистрибуцијата ќе зависи од Вашата креативност за дистрибуирање. Еве некои идеи:

  • Да ангажирате некој да ги дели на улица или крстосница.
  • Да ги делите на саеми
  • Да разговарате со неколку трафики да ги вметнат во најпродаваните весници
  • Да дадете на сите роднини, пријатели и познаници да ги делат на нивните роднини, пријатели и познаници
  • Да ги поставите во Вашиот продажен објект за луѓето самите да си ги земаат
  • Можете да посетите неколку паркизни на целниот пазар и да ги подметнете на бришачите
  • Можете да посетите неколку згради со повеќе станови во Вашиот целен пазар и да ги ставите во поштенските сандучиња
  • …

Брошурите може да бидат навистина ефективно и ефикасно маркетиншко средство или оружје за Вашиот бизнис. Не ја испуштајте можноста што ја нудат брошурите. Сега можете и сами да си направите со помош на компјутер и печатач и на таков начин тие ќе бидат во помали количини, различни и уникатни.

Во секој случај оваа маркетиншко оружје за малите бизниси спаѓа во категорија на МОРА.

post

ПАРАДОКС ВО МАРКЕТИНГ

Која е основната цел на маркетингот? Да донесе колку што може повеќе потенцијални потрошувачи во Вашиот продажен тунел. А, зошто се користи маркетинг за привлекување на потенцијални потрошувачи во продажен тунел? Затоа што постојат и други бизниси како Вашиот и Вие сакате повеќе да привлечете од другите конкурентски бизниси. Но, постои едно непишано правило дека маркетинг единствено не е потребен на монополски бизниси. Маркетинг не е потребен на државни служби кои служат да нудат услуги на граѓаните а се финансираат од буџетот на државата кој пак е финансиран од сите нас, даночни обврзници.

Значи доколку потрошувачите немаат избор за некоја услуга мора да ја остварат на тоа место. Денес скоро и да нема кај нас некои монополски бизниси кои ги паметевме во минатото како Телеком. Но, онаа интересно што сакам да го наведам со овој напис е една реклама која ја гледам во последно време при започнување на вести на нашата сакана национална телевизија која мака мачи во последните 10-тина години како да обезбеди финансии.

Започнуваат вести со оној добро познат часовник за кој паметам уште кога бев многу мал, а во позадина реклама. И не е чудно што има реклама, но чудно ми е тоа што на рекламата е Центрлен регистар на Република Македонија. И не би било ништо чудно доколку услугите што ги дава тој Централен регистар можеме да ги добиеме и на друго место па се борат за повеќе клиенти. И не би било чудно доколку тоа е некоја приватна компанија.

Она што го знаеме е дека: 2009-05-30_185326

  • Секој бизнис мора да се регистрира преку централен регистар и да плати за услугата
  • За било каква друга работа со банка или некоја друга институција ќе ви бараат еден документ од централен регистар за кој мора да платите
  • За секоја промена на рaботно време за Вашиот бизнис ќе мора да пријавите во централен регистар и да платите
  • И што уште не за што единствено таму може да се заврши работа и мора да се плати.

Еднаш еден странец консултант ме праша зошто не ги користиме услугите на централен регистар на работа кај што работам – државна служба (уште пола месец) му одговорив дека тоа е еден голем профитен центари се се плаќа. Тоа му беше несватливо на човекот.

Од ова можеме само да претпоставиме дека во оваа време на рецесија кога сите бизниси се жалат од падот на продажбата и недостаток на финансии, овој „профитен центар“ има ВИШОК на пари собрани од грбот на претприемачите и бизнисите и од БЕС со кој не знае каде да ги потроши се рекламира на национална телевизија. Или пак националната телевизија има потреба од финансии заради недостаток на програмска креативност па некој мора да излезе во пресрет со тоа што ќе се потрошат парите од претприемачите и бизнисите. А верувајте многу ги има. За кредит од банка мора да приложите документ кој се зима од централен регистар. За да отворите сметка ќе мора да земете документ од централен регистар. Да дадете полномошно на декларант за царински постапки мора да дадете и документ од централен регистар. А за секое документче плаќате. И што е најинтересно тие имаат обезбедено сигурна работа преку:

  • Потреба. Секогаш постои и ќе постои потреба за тие документи се додека не се смент некои прописи.
  • Ограниченост на важност. Секој од тие документи важи ограничен временски период, па така ќе мора да го вадите повтроно и повтроно со што е обезбеден континуитет на потребата.
post

МАРКЕТИНГ СРЕДСТВА – ПИСМА

Писмата спаѓаат во категорија на стари и добри маркетиншки средства. Можеби изгледа старомодно, но сепак оваа маркетиншко средство за промоција сеуште може да одигра голема улога во привлекување на потенцијални потрошувачи во продажната инка на бизнисот. Ова алатка не се однесува на испраќање на брошура или материјал добиен со масовно печатење туку на лични писма напишани врз основа на познавање на она што го работите пеку лично искажување во однос на читателот.

Letter Еден од недостатоците на личните писма е тоа што тие не се испраќат на голем број на луѓе одеднаш, туку на специјализирана група на луѓе со ист или приближно ист проблем за кој Вие и Вашиот бизнис се нудите да им го решите. Така да, може да испратите на еден или пак група од 2,3,5… потенцијални потрошувачи.

Но, од друга страна предноста на овие писма е токму во тоа што се насочени кон мала таргетирана група на читатели, а тоа големите компании не го прават. Запомнете дека секогаш се обидувате да украдете потрошувачи од големите компании и се што може да помогне во доближување кон тие луѓе мора да го искористите.

Целта на секое маркетиншко средство е да внесете што поголем број на потенцијални потрошувачи во Вашата продажна инка. Предноста на писмата е тоа што тие се лични или барем изгледаат лични бидејќи со помош на Microsoft Word можете да направите чуда.

Но, што треба да содржи едно такво писмо. Прво што треба да се внимава е да се користат лични имиња за да може да му се доближите колку што може повеќе на потенцијалниот потрошувач. Еве некои идеи како би требало да изгледа тоа писмо:

  • Започнете со Драг(а) или Почитуван(а) господине (госпоѓо) и името на лицето
  • Внесете малку пофалби за нив
  • Опишето го проблемот со кој тие се среќаваат
  • Опишете како Вие можете да им го решите проблемот
  • Бидете културни
  • Оставете Ваши податоци за контакт.

Ова се доволно работи за кои можете со сигурност да ги вклучите во писмото, но внимавајте да не бидете предолги. Доволно е од една до две реченици по горенаведените елементи. Никој не сака да чита долги писма.

Второто прашање е како да дојдете до таквите лични податоци како име, адреса, проблеми… На пример, доколку имате агенција за продажба на недвижнини Вашата задача е секојдневно да ги читате огласите и да наоѓате луѓе кои нешто купуваат или продаваат од недвижнини. Со тоа ќе им го дознаете проблемот, а и името и адресата. Постојат неколку начини да доаѓате до такви информации и податоци и можете да ги користите сите одеднаш и континуирано за да постигнете успех со оваа кампања. Еве некои совети (начини) за добивање на тие информации:

  • Забележувајте се што се случува околу Вас, а може да биде поврзано со Вашиот бизнис. На пример, на разни прослави кога се запознавате и разговарате со луѓето собирајте визит картички, разговарајте за можни проблеми итн. Ова е личен контакт за првични информации.
  • Анкети претставуваат добра основа за прибирање на информации (како посебно маркетинг средство ќе ги опфатиме анкетите). Со нив ќе добиете многу информации меѓу кои и името и презиме, како и проблемот кој го има анкетираниот. Анкетите може да бидат онлајн (преку интернет) или пак офлајн на хартија.
  • Преку продажниот тим со прашување на секој со кого стапат во контакт како во продажен објект така и надвор од него.
  • Со читање на списанија, весници и огласи за делот од браншата на Вашиот бизнис.

Но, една работа, немојте да претерувате со писмата на една иста личност. Можете да станете здодевни. Доволно е едно или максимум две писма во рок од 10-15 дена. И за крај уште една можна негативност е што некои луѓе ги нервираат писмата, затоа е важно да излезете во пресрет на нивните проблеми. Ова значи дека не треба да испраќате писма на луѓе кои немаат проблем или пак нивниот проблем Вие и Вашиот бизнис не можете да го решите.

post

МАРКЕТИНГ СРЕДСТВА – БИЗНИС КАРТИЧКИ

Ќе започнеме со серијата на маркетинг средства кои ги најавивме во написот за маркетинг средства општо. Како прво маркетинг средтсво или оружје ќе бидне бизнис картичка. Секој бизнис без разлика во која фаза од животен циклус се наоѓа или без разлика дали е стартап и постоечки бизнис МОРА да има бизнис картичка. Бизнис картичката ги има сите информации кои се потребни за некој кога ќе има потреба од Вашиот бизнис да дојде до вас или да ве исконтактира на било кој начин. Во однос на трошоците бизнис картичките се најоптимално маркетинг средство. Од друга страна не треба да се сфати дека бизнис картичката ќе има можност да каже се за Вашиот бизнис. Ќе фалат производи и/или услуги, ќе фалат одередни начини на изведување на бизнис процеси итн. Она еж што е најважно бизнис картичката треба да претстави еден професионален имиџ на Вашиот бизнис. Имиџ кој ќе биде запомнет од имателот на картичката и кој ќе предизвика превземање на акција од страна на тој потенцијален потрошувач.

BusinessCards Од типот на бизнисот ќе зависи и типот и квалитетот на една бизнис картичка. Компанија која нуди консултантски услуги сигурно ќе оди со поквалитетна и во боја бизнис картичка, што ќе претставва сосема поразлична од бизнис картичка на еден авто механичар која може да биде и црно бела со слика која ќе асоцира на поправка на автомобил.

Бизнис картичките денеска може да бидат на различен начин изработени со различен стил и на различен медиум. Еве некои примери и типови на бизнис картички кои може да ги вклучите во Вашата маркетинг стратегија:

  • Хартиени бизнис картички се оние кои се изработени на обична хартија. Овие картички се најевтини, но и не создаваат доволна импресија. Имаат недостаток што може бргу да се искинат и фрлат. Така да овие бизнис картички не се препорачливи. Можете да ги користите единствено на масивни собири како саеми за да се поделат на колку што може повеќе луѓе.
  • Картонска бизнис картичка со димензии за да може да се носи во паричник. Оваа картичка може да биде во црно-бела боја или во колор. Доколку не е потребно со Вашата бизнис картичка да создадете импресионирање ќе биде доволна за почеток. Колор бизнис картички создаваат позитивна импресија и професионален имиџ и препорачливо е да се корисат такви бизнис картички. Колор бизнис картички се оскапи од црно-белите или пак еднобојни картички, но може да имаат многу поголем повраток на инвестиција. На колор картичките може да ставите и Ваша слика со што ќе се овозможи појава на чувство на познавање.
  • Бизнис картички од нестандрден материјал се бизнис картички кои се изработени од други материјали како дрво, метал, камен итн. Ова се бизнис картички кои влегуваат во категорија на претставителни картички и служат како украс на кој ги има основните бизнис информации. Ова се најскапи бизнис картички бидејќи за нивното производство се користат нестандардни процеси како што е обработка со симнување на струганици. Но, во одредени ситуации како што се годишници или склучување на големи договори се навистина доста ефектни.
  • Повеќе-наменски бизнис картички се картички имаат повеќе од една намена. Тие можат да сжат како информативна картичка за Вашиот бизнис, а од друга страна да бидат и во вид на опустен купон или некоја друга вредна информација која може да му користи на имателот (на пример календар на задната страна, мапа на одреден дел од градот…). Било која од претходните картички може да биде повеќенаменска бизнис картичка доколку се додаде ваквата карактеристика. Со ваквите карички се обезбедува дека корисникот ќе ја чува бидејќи освен информацијата за Вашиот бизнис добива и друга вредна информација како календар или мапа.
  • Пластифицирани бизнис картички се оние картички кои се изработени од хартија или картон, но о печатење се пластифицираат со пластификатор. Овие картички даваат добра импресија, квалитени се и не се уништуваат бргу. Може да бидат малку поскапи од обичните аронски или хартиени бидејќи иаат уште еден процес на обработка – пластифицирање.
  • Електронска бизнис каричка претставува мини CD на кое се внесени основните информции за бизнисот. Овие картички мора да се уштат преку компјутер или друг читач на овие медиуми. Сега може да се каже дека овие картички и не се толку скапи. Но, сепак сеуште неможат да се прочитаат во секој момент бидејќи секој имател ќе нема читач на таков медиум секогаш кај себе. Овие картичкивообичаено се и повеќенаменски картички и содржат информции како туристички водич на земјата или градот во кој се наоѓа бизнисот, како и било кои други погодности.
  • Неконвенционални бизнис картички се бизнис картички кои навистина користат неконвенционален медиум како чоколадца, шеќерца за кафе, бонбони итн. Оваа се навистина интересни бизнис картички но рајноста им е многу мала, трае се додека не се изеде медиумот.

Често поставувани прашања околу бизнис картичките може да биде нивнта содржина, односно кои информации ќе ги претстави. Еве неколку совети:

  • На предна страна го имаат:
    • логото на Вашиот бизнис како и слоганот.
    • вашето име и презиме и работното место
    • адреса, телефон, мобилен, факс, e-mail, и веб страна на вашиот бизнис
  • На задната страна реба да има:
    • предности кои што ги нуди вашиот бизнис
    • услуги кои што ги нудите

На ваков начин предната срана е страна која дава информации за Вашиот бизнис, додека задната страна е онаа која дава информации кои се од видот на брошурата како маркетиншко средство.

Кога станува збор за израбтка можете да имате некоку опции:

  • Да ви ги изработат во печатница во поголема количина.
  • Самите да ги израбоите и испечатите на Вашиот принтер. Во ваков случај ќе ви треба колор печатач.
  • Самите да ги изработите преку веб апликации достапни на инернеот и да ги дбиете по пошта.

Секоја од овие опции има свои редности и недостатоци. На пример, најефтина опција можеби е печатење во печатница доколку нарачате поголема количина, но оваа опција нема да ви овозможи да ги менувате дизајнот и обликот на одреден временски период се додека не ги потрошите нарачаните.

Цената на бизнис картичките зависи од:

  • Бојата на картичката. На пример доколку користите една боја ќе биде оефтина, доколку ористите 2 и повеќе бои ќе биде поскапа.
  • Тежината на хартијата. Ова претставува дебелината на хартијата или картонот на картичката.
  • Пластифицирање. Доколку се пластифицираат картичките ќе бидат поскапи.
  • Количината. Колку поголема количина направте доколку ги печатите во печатница толку поевтино ќе ве чини една картичка. Вообичаено најголемите трошоци се дизајнот и подесувањето за печатење.

Запомнете дека бизнис картичката често претставува прво котакт на потенцијален потрошувач со Вашиот бизнис, па со тоа и го дава и првиот впечаток за Вашиот бизнис. И уште нешто, бизнис артичките служат да се делат на луѓе, а не да се чуваат и штедат. Колку повеќе поделите толку ќе биде поголема веројатноста да ги внесете тие луѓе во Вашата продажна инка. Затоа не ги чувајте за крас, делете ги. Тие не се изработени за Вас, туку за потенцијални потрошувачи.

post

ПОДОБРУВАЊЕ – ПРЕКУ BUTTERFLY EFFECT

На артиклите на претприемач започнавме една нова тема за организациски промени – TQM. Во првиот дел – историска појава и дефинирање наведовме дека оваа филозофија не успеала во САД бидејќи секогаш кога вработените ќе имаат некоја идеја морале прво да добијат одобрение од менаџментот при што повеќето идеи биле отфрлани или одбивани, така да вработените во иднина немале мотивација да генерираат идеи за подобрување. За да се добие квалитетно и постојано подобрување на квалитетот на производите, услугите и бизнис процесите мора да се овозможи зголемување на креативноста на сите, како на претприемачот така и на вработените.

Во почетокот секој бизнис е мал и е составен само од претприемачот и уште некој вработен. Доколку претприемачот е сам во бизнисот тој генерира бизнис идеи за подобрување. Доколку има и вработени тој ќе генерира идеи за подобрување но и ќе одобрува идеи за подобрување од страна на вработени. Колку повеќе идеи се генерираат толку повеќе ќе се подобруваат сите бизнис процеси.

Но, зошто треба да се искористат идеите за подобрување на вработените?

  • Вработените најдобро знаат што може да се промени кон подобро.
  • Секое работно место има специфичности кои му се познати во поголем степен на вработениот одошто на менаџерот или претприемачот.
  • Ќе се заштеди време менаџерот или претприемачот да се насочат кон посложени бизнис активности.
  • Ќе се овозможи ефект на пеперутка во подобрувања.
  • …

Што значи последното?  Секој вработен во бзинсот или учесник во бизнис процесот доколку биде насочен постојано да генерира идеи за подобрување на работниот процес кој што го изведува ќе се овозможи постојаност на малите промени што во иднина ќе имаат огромен ефект на бизнисот воопшто. За овој ефект можете да го погледнете и видеото што го направивме.

Значи со мали секојдневни подобрувања во сите бизнис процеси може да доведе до одлични резултати на севкупниот бизнис. Подобрувањата може да бидат во однос на сите бизнис процеси, но особено е важно бизнисот да има одлични перформанси во следниве:

  • Продажба
  • Маркетинг
  • Производство
  • Процес на менаџмент на трошоци
  • Менаџмент
  • Процес на набавка
  • Менаџирање со залихи итн.

Затоа е пожелно да се овозможи еден вид на партиципативен пристап на сите вработени како би се генерирале колку што може повеќе бизнис идеи за подобрување и бизнисот постојано ќе биде во топ форма.

post

МАРКЕТИНГ СРЕДСТВА

Ќе започнеме со една бескрајна серија на маркетиншките средства за бизнисите. Особено ќе се насочиме кон средствата кои треба секој мал бизнис да ги има и користи како дел од маркетинг сратегијата. Овие маркетиншки средства имаат за цел да го зголемат бројот на потенцијалните потрошувачи во Вашата продажна инка со цел да на крајот од инката имате колку што можете повеќе купувачи. Во периодот кој следува планираме да опфатиме и обработиме накратко над 100 маркетиншки средства.

Маркетинг средство може да биде било што што ќе ве претстави Вас или Вашиот бизнис и со тоа ќе доведе повеќе потенцијални потрошувачи во Вашата продажна инка. Функционирањето на продажната инка е да се пробуди свеста кај потенцијалните потрошувачи преку маркетинг кампања со што кај дел од нив ќе се јави интерес да го видат производот или услугата, за потоа кај дел од заинтересираните да се јави желба за купување и на крај дел од оние што имаат желба да донесат одлука за купување, односно да преземат акција. Преку Вашите промотивни материјали како дел од маркетинг миксот Вие ќе можете да ја остварите таа цел. Колку повеќе потенцијални потрошувачи влезат во Вашата продажна инка толку повеќе ќе се трансформираат во вистински купувачи.

MarketingSredstva1

На пример, доколку имаме стапка на трансформација на потенцијални потрошувачи во вистински купувачи од 5% тогаш доколку имаме 1000 потенцијални потрошувачи влезено во продажната инка ќе имаме и 50 купувачи кои ќе ја дефинираат нашата продажба. Но, доколку успееме да дојдеме до 5000 потенцијални купувачи во продажната инка со истата стапка на трансформација на потенцијални во вистински купувачи ќе имаме 250 вистински купувачи. Доколку во просек еден вистински купувач троши 2000 денари во првиот случај ќе имаме приход од 100.000 денари додека во вториот случај ќе имаме приход од 500.000 денари. Сега доколку вистинската добивка (сите трошоци и даноци се платени) ни е 5% во првиот случај ќе имаме профит од 5000 денари додека во вториот случај ќе имаме профит од 25.000 денари.

Сега да видиме нешто околу трошоците за маркетингот. Некои маркетинг средства се навистина скапи, а некои се евтини. Но, не мора да значи дека скапите средства ќе ви донесат повеќе потенцијални потрошувачи. Важно е средствата кои ќе се изберат да бидат навистина применливи и насочени кон вистинските потенцијални потрошувачи. Сега, ако продолжме со претходниот пример и ако тоа ни се податоци на месечна основа за првиот случај на годишно ниво ќе имаме профит од 60.000 денари, додека за вториот случај ќе имаме профит од 300.000 денари. Разликата е огромна. Но, вториот случај ќе го постигнеме со вложување во маркетинг средства кои ќе ни донесат 5000 потенцијални потрошувачи. Така да во реалноста профитот ќе биде намален. Но наредната година со истите средства вложени во маркетинг ќе имате двојно зголемување, така да инвестицијата ќе се исплати.

Но, во оваа серија од напси за маркетинг средства ќе се обидеме да ги опишеме средствата за малите бизниси кои немаат големи финансиски средства за вложување во маркетингот, а со ове средства ќе можат да влезат во борба и со поголемите компании. Некои од маркетинг средствата кои ќе гиопфатиме се:

  • Визит картички
  • Писма
  • Телефонски маркетинг
  • Честитки
  • Златна книга
  • Календари
  • Брошури
  • Флаери
  • Светлечки реклами
  • Анкети
  • Интернет огласи
  • Потпис на е-mail
  • E-mail
  • Веб страна на интернет
  • Блог
  • Autoresponder
  • RSS
  • Podcasting
  • Електронски книги
  • Pay per Click – Плаќање по кликнување
  • Подароци
  • Купони
  • …

И уште многу, многу други… Рековме над 100. Затоа следете не секојдневно ќе можете да ги поминете сите. Сите овие средства не спаѓаат во категорија на скапи средства, а можат да одиграат голема улога во градење на Вашиот кредибилитет, репутација, популарност и онаа клучното ДА при одлука за купување од страна на Вашите потенцијални потрошувачи.