post

Маркетинг За Бизнис На Нискофреквентна Локација

Многу бизниси се наоѓаат на локација која претставува нискофреквентна локација, односно локација на која нема доволен сообраќај. Ова особено ги погаѓа малите бизниси и тоа малите бизниси од малопродажниот сектор.

Оваа видео е презентација на еден реален случај за еден ваков проблем и можните решенија за истиот кои во вид на коментари на написот за Маркетинг Средства – Вашиот Продажен Тим.

Презентацијата можете да ја погледнете на следново видео:

Што е она што може да се сублимира од оваа виде:

  • Дефинирајте ги Вашите купувачи. Во овој случај мајки на деца.
  • Размислете каде се наоѓаат Вашите потенцијални купувачи. Во овој случај игротеки, згради, градинки, паркови, фризерници…
  • Направете Вашиот бизнис да биде присутен таму. Во овој случај флаери – летоци, брошури, визит карти, попустни картички…
  • Мерете ги резултатите од сите тие маркетинг средства кои ќе ги спроведете и со кои ќе бидете присутен на тие локации. Користете маркетинг календар. Можете да прочитате за маркетинг календар во Маркетинг средство 13 – Маркетинг календар.
  • Специфицирајте како да ве најдат. Направета мапа доколку користите традиционален визуелен маркетинг.
  • Подобрувај. Се она што не чини менувај и се она што чини подобри го.

Доколку имате било која друга идеја слободно можете да ја споделите во вид на коментар, преку формата за коментирање под написот.

post

Репутација – Маркетинг Средство 34

Маркетинг и маркетинг средствата се ништо без да градат една стабилна околина околу Вашиот бизнис. Се што работите мора да има една цел, а тоа е да изградите солидна репутација за Вас како претприемач и за Вашиот бизнис.

Репутација како маркетинг средство

Доколку успеете во оваа намера или оваа цел, Вие како претприемач ќе немате проблем со недостаток на купувачи, односно Вашата продажна инка ќе има потенцијал секогаш да биде полна.

Како 29 маркетинг средство на претприемач го претставивме кредибилитетот. Кредибилитетот и репутацијата се слични, но сепак две различни работи кога станува збор за еден бизнис.

Разлики помеѓу кредибилитет и репутација

Следниве разлики се однесуваат на кредибилитет и репутацијата:

  • Кредибилитет претставува верување, додека репутацијата претставува изграден став или мислење.
  • Кредибилитет може да е точно верувањето, но може и да не е точно бидејќи претставува објективно или пак субјективно верување. Репутацијата пак се однесува на нешто што веќе е докажано како точно, бидејќи луѓето веќе имаат изградено став или пак мислење.
  • Кредибилитетот за Ваш бизнис е познат за едно лице кое верува во тоа, додека репутацијата претставува став на заедницата, односно на група на лица кои мислат дека сте вредни.
  • Кредибилитетот се гради со уверување на лицата, додека репутацијата се гради со нашите претходни акции или пак активности кои на некој начин се евалуирани од заедницата.

Во секој случај, добро е да се тргне со градење на кредибилитетот, кој со помош на нашите активности ќе стане добра репутација за нашиот бизнис.

Што е репутација?

Во претходниот поднаслов за разликите можеби веќе приметивте што всушност претставува репутацијата. Но, како една дефиниција би ја искористил дефиницијата во Wikipedia за репутацијата:

Репутацијата претставува јавно мислење (или технички кажано социјална евалуација) на јавноста кон одредена личност, група на луѓе или пак организации…

Репутацијата може да се гледа како компонента на идентитетот дефиниран од страна на други луѓе.

Она што го нагласив во оваа дефиниција е:

  • Јавно мислење. Какво мислење има јавноста за Вас како претприемач и за Вашиот бизнис?
  • Социјална евалуација. Како заедницата ве евалуира Вас како претприемач и Вашиот бизнис?
  • Идентитет дефиниран од страна на други луѓе. Каков идентитет ви даваат другите луѓе?

Дали репутацијата е важна?

Во нашиот секојдневен живот ние сме судии за многу работи како бизниси, влади, политички партии, соседи… Тие пресуди ги носиме врз основа на репутацијата која ја имаат тие субјекти. Ние врз основа на таа пресуда донесуваме одлука каде ќе купуваме, што ќе купуваме… Во еден конкурентски пазар одлуката се носи врз основа на репутацијата која нам ни се допаѓа.

Па дали сакате во заедницата во која функционира Вашиот бизнис да имате добра репутација? Мислам дека одговорот секако ќе ви биде дека сакате.

Дали политичките партии се борат за подобра репутација која на наредни избори ќе им овозможи да ја добијат довербата од заедницата? Сигурно, Да.

Како до подобра репутација?

Врз основа на што политичките партии ја градат сопствената репутација? Врз основа на нивната работа во претходните 4 години како дел од власт или пак опозиција. Врз основа на маркетинг средствата кои ги користат. Врз основа на однесувањето на сопственото членство.

Но, она што е интересно за политичките партии може да сепримени и во бизнис светот. Тоа е дека за добра репутација на еден ентитет, огромна улога има и другиот – спротивниот ентитет (конкурентот). Колку конкурентот има послаба репутација, толку поголема ќе имате Вие како претприемач и Вашиот бизнис.

Но, репутацијата се добива и се губи. На едни избори заради висока репутација ќе победи една политичка партија, додека на други избори ќе победи друга политичка партија која ја подобрила сопствената репутација.

Можеме да заклучиме дека подобра репутација ќе имамо доколку:

  • Нашите активности постојано ја зголемуваат нашата репутација.
  • Постојано ја подобруваме нашата репутација.
  • Постојано ги искористуваме слабостите на нашата конкуренција во однос на нивната репутација.
  • Комуницираме постојано со нашата заедница како би им овозможиле да не евалуираат за да ни ја зголемуваат нашата репутација.

Како најважно нешто би ја издвоил комуникацијата, бидејќи без неа воопшто ќе немаме репутација. Комуникацијата се однесува во однос на комуникација со:

  • Наши тековни купувачи,.
  • Наши потенцијални купувачи.
  • Купувачи на нашите конкуренти,
  • Потенцијалните купувачи на нашите конкуренти,
  • Наши снабдувачи и
  • Снабдувачи на нашите конкуренти.

Што претставува менаџмент на репутација?

И за крај на оваа маркетинг средство би напоменал неколку збора за менаџмент на репутација кој во последните години се изградува како една посебна дисциплина на менаџментот како наука.

Постојат 2 функции на менаџмент на репутација:

1. Градење на репутација

Како што кажува самото име целта на оваа функција е постојано да се гради бизнис и претприемничката репутација. Ова функција не е потребна само на стартап бизнисите кои немаат никаква репутација туку и на оние кои имаат изградена но можат да ја доградуваат или пакподобруваат.

2. Одржување на изградената репутација

Кога веќе ќе изградиме одредена репутација оваа функција служи да ја одржуваме односно да не дозволиме да ја изгубиме таа веќе изградена репутација.

Така да менаџмент на репутацијата претставува еден циклус кој никогаш не завршува и се надополнува со сопствените функции – градење и одржување.

post

Неколку Совети за Брошури или Флаери

Брошурата или пак флаерот како маркетинг средство може да биде доста ефективно за бизнисот на еден претприемач. Но, од друга страна може едноставно да заврши во канта за ѓубре.

Брошури и флаери

Ова се однесува и на други традиционални маркетинг средства кои на некаков начин пристигаат во рацете на потенцијалните потрошувачи.

Како функционира еден потенцијален потрошувач со некоја брошура или флаер во рака? Еве еден вообичаен тек на активности:

  1. Го гледа маркетинг средството кое му се наоѓа во раката.
  2. Го скенира. Запомнете не чита, туку само скенира со поглед од горе до долу.
  3. Доколку во првите 10-тина секунди го класифицира како вредно ќе го остави во „пултот“ кој служи за понатамошно разгледување.
  4. Доколку во првите 10-тина секунди го класифицира како невредно оди во „Recycle Bin“ – Канта со отпадоци. Тука и завршува животниот век.
  5. Онаа кое е класифицирано како вредно уште денес или утре ќе биде прочитано. Но, повторно не се чита цело. Се читаат интересни наслови. Се гледаат интересни слики. Се читаат кратки потенцирани содржини кои даваат одговор на прашањето „Што има тука за мене“.
  6. Одлука за контакт или ставање на тоа маркетинг средство на место кое ќе послужи за наоѓање доколку ќе има некој проблем.

Значи она што е најважно за еден претприемач е неговото маркетинг средство да не биде класифицирано како невредно.

Зошто овој напис?

Овој напис е едноставно дополнување на оние што веќе имавте можност да ги прочитате како маркетинг средства:

Во секој случај овие две маркетинг средства се многу користени од страна на претприемачите и малите бизниси.

Пред некое време ја видов мојата прва брошура. Која не даде никакви резултати. Беше толку многу класична и пренатрупана со текст. Сакав се да кажам во неа. И секогаш ми беше мал простор. Тоа е најголемата грешка. Не размислував на елементите во вид на корисност и повик за акција.

Од тука и овој напис за совети за брошури.

Совети кои ја подобруваат брошурата или флаерот

Еве некои совети од претприемач кои можете да ги искористите при дизајнирање и содржина на една брошура или пак флаер:

1. Корисности наместо карактеристики

Да, едноставно прикажи ги корисностите наместо карактеристиките на твојот производ, услуга или пак бизнис. За ова веќе пишувавме во Прикажи ја корисноста наместо карактеристики.

2. Вие, Вас, Ваш… наместо Ние, Нашиот бизнис, Нашата компанија…

Избегнувајте да зборувате за Вас, Ваш бизни, Ваши производи и услуги. Зборувајте за Нив – Вашите потенцијални клиенти кои сакате да бидат Ваши купувачи со тоа маркетинг средство.

3. Слики наместо текст

Наместо гол текст обидете се да ставите и неколку сликички, но не Вашето лого.

4. Смешно наместо озбилно

Сликите или пак текстот нека бидат смешни наместо преозбилни. Смешни кои навистина ќе го привлечат вниманието на потенцијалниот купувач и кое може да прерасне во навистина вирозно маркетинг средство.

5. Интересно наместо здодевно

Доколку е здодевно ќе биде класифицирано како невредно иако во таа здодевност се кријат вредни информации за потенцијалниот клиент.

6. Привлекување на внимание наместо притисок

Повикот за акција треба да го привлече вниманието на потенцијалниот клиент, а не да звучи како Ваш притисок врз него.

7. Градење на доверба наместо обична продажба

Понекогаш еден претприемач е толку преоптеретен со продажба, па заборава на првото и основното правило да изгради доверба во очите на потенцијалниот клиент.

post

Прикажување на Корисноста Наместо Карактеристики

Една од грешките што еден претприемач ги прави во сопствените маркетинг средства е прикажување само на карактеристиките на неговиот производ или услуга или пак на неговиот бизнис. Како и да е потенцијалните потрошувачи не сакаат да знаат за карактеристиките, тие сакаат да знаат за корисностите што ќе ги добијат од твојот бизнис.

Корисности наместо Карактеристики

Да бидеме реални, вообичаено луѓето не ги интересира што Вие или пак Вашиот бизнис правите. Единствената работа што ги интересира е што Вие можете да направите за нив.

Најпросто кажано корисноста е едноставно одговарање на прашањето: Што има тука за мене?

Подолу е една листа на основните чекори кои ќе мора да ги спроведете за да ги извлечете корисностите од карактеристиките кои веќе ги имате.

1. Запознај ги сопствените потрошувачи

Познавање на нешто што е примарен фокус на секој претприемач е најважната работа за успешноста на бизнисот. Анализирај ги твоите сегашни и потенцијални потрошувачи. Најди колку што можеш повеќе информации за нивните однесувања, желби и проблеми. Разговарај со нив за она што тие го сакаат, и она што го посакуваат. Можноста на анкета како средство на прибирање на оваа знаење е огромна и искористи ја.

2. Бидни твој потенцијален потрошувач барем за еден момент

Кога ги познаваш твоите сегашни и потенцијални потрошувачи ќе можеш да ја заземеш нивната позиција и нивното гледиште. Запрашај се себеси и одговори на следниве прашања:

  • Што е тоа што јас навистина го сакам?
  • За што „гладувам“?
  • Кои се моите проблеми?
  • Како можам да ги решам тие проблеми со мојот производ или пак услуга?
  • Што има тука за мене?

3. Извлечи ги сите корисности од карактеристиките

Секоја карактеристика има одреден тип на корисност за потенцијалниот потрошувач. Главната разлика помеѓу карактеристиката и корисноста е начинот на изразување на истите. Една карактеристика може да има повеќе корисности за еден или повеќе потрошувачи. Понекогаш една карактеристика ќе има корисност за еден тип на луѓе додека за другите ќе нема корисност. Поради тоа важно е Вие како претприемач да знаете која карактеристика за кој тип на луѓе има корисност и да ги искористиш овие откритија за да ја подобриш сопствената маркетинг кампања. Еве некоја помош за тоа како да ги извлечете корисностите од карактеристиките:

  • Направи листа на сите карактеристики кои ги има твојот производ, услуга и бизнисот.
  • Направи табела со три колони. Во првата колона ќе бидат наведени карактеристиките, во втората колона ќе бидат наведени корисностите и во третата колона ќе бидат наведени соодветниот тип на луѓе за кои постојат тие корисности.
  • Направете Brainstorm сесија за да дојдеш до колку што можеш повеќе корисности.

Бизнисот е повеќе за нив (потрошувачи), а не за Вас. Повеќето од маркетинг кампањите започнуваат со:

  • Нашиот бизнис ќе…
  • Ние ќе…
  • Нашите производи…
  • Ние нудиме…

Премногу „егоистички“. Размислете на оваа наместо на претходните:

  • Вие ќе…

4. Рангирај ги корисностите согласно важноста за потенцијалните потрошувачи

Вашиот бизнис, Вашите производи и Вашите услуги имаат еден куп на карактеристики и корисности. Но, некои корисности се поважни од останатите. Некои корисности се важни за еден тип на потрошувачи додека сосема неважни за друг тип на потрошувачи. Поради тоа мора да ги рангирате корисностите во согласност на нивната важност за различен тип на потрошувачи или различен сегмент на пазарот. На ваков начин ќе имате листа на најважи корисности кои ќе бидат нагласени различно во различни маркетинг кампањи за различен сегмент на пазарот кој е таргетиран од Вашиот бизнис.

5. Објасни ги наративно најважните корисности

Една важна работа која често се заборава е начинот на комуницирање на Вашите корисности со потенцијалните потрошувачи. Поради тоа препорачливо е да направите неколку наративни објаснувања за најважните корисности дефинирани во претходниот чекор. Некои од овие објаснувања ќе бидат одлични, но некои нема да даваат резултати. Вашата задача како претприемач ќе биде да ги мерите и менувате изгледот и звукот на тие наративни објаснувања кои ќе бидат содржани во Вашите маркетинг кампањи.

6. Користи ги корисностите наместо карактеристиките со едно око насочено кон резултатите

Ова е последниот чекор во процесот. Сега веќе ги имате развиено сите корисности со различни варијации на нивно комуницирање, па можете да започнете со нивното користење во сите Ваши маркетинг кампањи. Како и да е, ова е процес кој никогаш не завршува, бидејќи секогаш морате да ги следите резултатите и да направите соодветни прилагодувања во некој од претходните чекори.

post

Здружен Маркетинг – Маркетинг Средство 33

Стигнавме до 33-тото маркетинг средство на претприемач. Го избрав здружен маркетинг од мојата листа (во MS Excel) за овој напис.

Сите знаеме за една од првите лекции во математиката дека:

1 + 1 = 2

Математички е точно. Но, што мислите за следново равенство:

1 + 1 > 2

Дали е точно? За овој наш напис како маркетинг средство ќе кажеме дека е точно. Ова е дејство на синергија – здружено дејствување.

Оваа дејство на синергија се користи во проучување на тимската работа и ни кажува дека вкупниот ефект на тим од двајца е поголем од простиот збир на ефекти на две личности надвор од тимот. Ова е една од најголемите карактеристики на тимската работа.

Што претставува здружен маркетинг?

Здружен маркетинг едноставно претставува здружување на два или повеќе бизниси, здружување на двајца или повеќе претприемачи во сопствените маркетинг активности.

Ова би изгледало како еден бизнис се здружува со друг бизнис како заеднички би ги промовирале сопствените производи или услуги на пазарот каде настапуваат.

На пример:

Еден претприемач прави брошури на кои на еден дел од брошурата го промовира сопствениот бизнис додека на вториот дел од брошурата го промовира партнерскиот бизнис на задружениот маркетинг.

Вториот претприемач прави флаери на кои од едната страна е промоција на сопствениот бизнис додека од втората страна е промоција на партнерскиот бизнис на задружениот маркетинг.

Дали ова претставува дејство на синергија? Во секој случај одговорот е позитивен. Бидејќи ефектот ќе биде поголем.

Кои се поволностите на еден претприемач од здружен маркетинг?

Можат да се извлечат повеќе поволности за двете страни во кампањите на здружен маркетинг, но јас би ги потенцирал следниве две:

  • Помал трошок за маркетинг активности. Кога се користи здружениот маркетинг логично е секоја маркетинг кампања да чини двојно помалку во однос на маркетинг кампања кога настапува еден бизнис.
  • Поголем ефект од секоја маркетинг активност. Ефектот од секоја маркетинг кампања во здружен маркетинг во секој случај ќе биде поголем бидејќи и двата бизниси имаат веќе одреден број на редовни купувачи кои можат да станат купувачи и на бизнисот кај кој досега не биле.

Предуслови за здружен маркетинг

За да може да се започне со еден ваков стил на маркетинг потребно е првин да се исполнат одредени редуслови.

  • Ист пазар. Првиот предуслов е бизнисите да бидат насочени на истиот пазар. Не може да се започне здружен маркетинг со бизнис кој настапува на меѓународен пазар, а нашиот бизнис настапува само на локалниот пазар. Оваа стратегија е добра доколку Вашиот национален бизнис сака да се прошири на меѓународниот пазар.
  • Слични целни потрошувачи. Вториот предуслов е и двата бизниси да имаат слични потрошувачи, односно потрошувачи со слични потреби. Не, би било ОК за заеднички маркетинг доколку еден бизнис продава на бизниси додека вториот продава на индивидуалци како потрошувачи.
  • Договор. Како трет предуслов е да постои договор помеѓу бизнисите кои сакаат да настапат со заеднички маркетинг. Договорот може да биде усмен, но нема да штети и пдобра регулација на активностите на сите страни со писмен договор.

Процес на здружен маркетинг

Ова е едноставен процес во кој треба само да ги следите чекорите наведени подолу:

1. Направете листа со потенцијални партнери за здружен маркетинг

Размислете за сите бизниси или пак претприемачи кои ги знаете или пак кои не ги знаете, а можат да бидат потенцијални партнери за здружен маркетинг. Направете една листа по приоритет.

2. Контактирајте ги и прашајте ги за некое заедничко настапување

Откако ќе ја имате Вашата листа започнете со контактирање на тие претприемачи и понудете им соработка во однос на здружен маркетинг.

3. Направете договор за здружен маркетинг со оние кои ќе дадат позитивен одговор

Направете договор со сите кои дале позитивен одговор во кој ќе опфатите Што, Кој, Како и Кога.

4. Постапувајте согласно договорот

Следете ги сите дефинирани активности одговорности согласно договорот.

5. Мерете ги резултатите

Мерете ги резултатите како би виделе што функционира а што не функционира. Она што функционира подобрете го, додека она што не дава резултати заменете го.

post

Како Вашата Продажна Инка Да Ја Одржувате Секогаш Полна?

Да се навратиме малку на најважната работа во еден бизнис и за еден претприемач – продажба.

Не постои претприемач кој не сака продажната инка на неговиот бизнис секогаш да биде полна. Продажна инка претставува процес на продажба и движење на потенцијалните потрошувачи низ патеката која завршува со купувачи.

Доколку Вие како претприемач успеете Вашата продажна инка да ја одржите во состојба секогаш да биде полна, тогаш за Вашиот бизнис не постои опасност од слаба продажба или недостаток на свежи финансии за бизнис цели.

Досега на претприемач неколку пати се занимававме со продажната инка, која ја опфативме во следниве наслови:

Дали продажната инка смее да мирува?

Продажната инка не се наоѓа во состојба на мирување или барем не треба да се најде во една таква состојба. Кога продажната инка ќе започне да мирува, тогаш доаѓа вистинската опасност за бизнисот.

Бизнис продажна инка е слична со вистинската инка која служи за пренос на течноста од еден поголем сад во шише кое има тенок отвор. Течноста се сипува во поширокиот крај на инката додека излегува од потесниот крај на инката. Она што е најважно не допушта течноста да се расипе од страна. Доколку прекинеме да сипуваме течност во поширокиот крај, инката „пресушува“, односно течноста прекинува да излегува од потенкиот крај.

Во бизнис продажната инка во поширокиот крај влегуваат потенцијални потрошувачи кои на некој начин се заинтересирани за Вашиот производ или пак услуга. Продажната инка треба да не дозволува да излезат од оквирот на продажна инка. Но, доколку на поширокиот крај прекине влезот на потенцијалните потрошувачи, продажната инка ќе пресуши, односно од потенкиот крај нема да излегуваат купувачи.

Затоа, продажната инка мора секогаш да биде полна, а тоа е работа на Вас како претприемач и на сите Ваши вработени.

Што е тоа што влијае на продажната инка?

1. Број на потенцијални потрошувачи на влез

Проста математика кажува колку повеќе потенцијални потрошувачи ќе имаме на влез, толку повеќе купувачи ќе имаме на излез. За ова најодговорен е маркетингот.

2. Губење на потенцијални потрошувачи од продажната инка

Од друга страна во секој момент од процесот секој потенцијален потрошувач може да одлучи да излезе од продажната инка. Ова значи намалување на полноста на Вашата продажна инка и губење на потенцијални потрошувачи. Овие довчерашни Ваши потенцијални потрошувачи кои биле блиску до одлуката да станат Ваши купувачи ќе одат кај Ваши конкуренти. Она што е најлошо, голема е веројатноста дека никогаш повеќе нема да имате можност да ги внесете во Вашата продажна инка.

3. Број на купувачи на излез

Колку повеќе купувачи излегуваат на потенкиот крај од инката, толку повеќе се ослободува простор за останатите кои се во самата продажна инка. Доколку нашиот продажен тим не може да процесира повеќе од одреден број на купувачи одеднаш, тогаш процесот на движење од еден потенцијален потрошувач кон купувач ќе биде успорен.

За излезот најодговорни се продажбата и маркетингот. Продажбата е одговорна во однос на тоа колку продажби може да процесира и како ќе ги задоволи купувачите за да одлучат да се вратат повторно да купуваат. Кога станува збор за маркетингот во овој дел најважен е маркетинг миксот (производ, дистрибуција, цена и промоција).

Како секогаш продажната инка да биде полна?

Следниве активности ќе можат да обезбедат Вашата продажна инка постојано да биде полна:

1. Зајакнување на маркетинг активности на влезот

Зајакнувањето не значи да се трошат повеќе пари на различни маркетинг средства. Едноставно ова значи умно користење и комбинација на вистински маркетинг средства кои носат добри резултати.

2. Постојано подобрување на маркетинг активности

Постојано подобрување е процес кој еден претприемач никогаш не треба да го заборави. Се може да се подобри, па и секоја маркетинг активност и кампања на Вашиот бизнис.

3. Постојано подобрување на процесот на продажбата

И повторно подобрување. Онаму каде што маркетингот завршува презема продажбата. Преку маркетинг вие како претприемач сте успеале да привлечете внимане врз Вашиот бизнис и Вашите производи и услуги, но пред вистинската одлука за купување главниот збор го има продажниот тим.

4) Задоволување на купувачите за да се вратат повторно на влезот

Ова е многу важен фактор за секој бизнис. Доколку имате нов производ или пак имате нова услуга полесно ќе ја продадете на некој кој веќе има добро искуство со Вашиот бизнис. Затоа, задоволен купувач постојано ќе биде дел од Вашата продажна инка.

Ова е еден циклус кој никогаш не треба да запре. Доколку запре циклсуот, запира и движењето низ продажната инка, а ќе запре и самиот бизнисот. Што секако не e Ваша цел.

post

Дали Вашата Бизнис Веб Страна е „Обична“ Брошура – Заборавено Поглавје

Вчера на претприемач го објавивме написот со наслов Дали Вашата Бизнис Веб Страна е Обична Брошура во кој ја претставивме сличноста помеѓу повеќе од 95% бизнис веб страни во Македонија со една „обична“ брошура.

Овој наслов го нареков „Заборавено поглавје“, не зошто нешто испуштив туку зошто некако ми помина лимитот од 1000 зборови по еден напис, а јас се заборавив со пишување. Но, една ваква тема и една таква реална анализа на една веб страна не може да се ограничи на 1000 зборови.

Во Дали Вашата Бизнис Веб Страна е Обична Брошура ги наведов некои од слабостите кои ги забележав во 5-минутната анализа, но не сублимирав што треба да направи еден претприемач за да една бизнис веб страна не изгледа како обична брошура.

Која е целта на Вашата бизнис веб страна?

Прво и основно што треба да се запрашате Вие како претприемач е за целта на Вашата бизнис веб страна или веб презентација на Вашиот бизнис.

Доколку немате одговор на оваа прашање или пак едноставно не сакате да имате соодветна бизнис веб страна или пак не сакате да ја искористите за зголемување на продажбата на Вашиот бизнис, тогаш едноставно оставете ја Вашата бизнис веб страна во вид на брошура.

Доколку целта на Вашата бизнис веб страна е една од овие:

  • Зголемена посетеност на веб страната.
  • Зголемена конверзија од обичен посетител во редовен посетител.
  • Зголемена конверзија од редовен посетител во потенцијален купувач.
  • Зголемена конверзија од потенцијален купувач во вистински купувач.
  • Зголемена конверзија од вистински купувач во редовен купувач.
  • Зголемена интеракција со потенцијалните потрошувачи.
  • Зајакнување на бизнис брендот.
  • Генерирање на поголема продажба.
  • Зголемување на можноста да Вие како претприемач и вашиот бизнис бидете поедноставно најдени (повеќе за оваа опфативме во влезен маркетинг).

тогаш морате да преминете во фазата кога Вашата веб страна не треба да биде како „обична“ брошура.

Тука се измешани примарни и секундарни цели на една бизнис веб страна. Но, за целта на овој напис мислам дека се ОК.

Како да ја замените брошурата?

Замената на Вашата веб брошура во високо ефективна и ефикасна веб страна се врши едноставно со замена на статичноста на Вашата веб страна во динамичност. Ова значи целосна промена на стратегијата на Вашата веб презентација. Ова значи постојана работа на Вашата веб страна бидејќи нормално, нема веќе да биде статична (сте ја поставиле на веб сервер и сте завршиле работа).

Презентацијата на производите останува, како и контакт деталите, но додавате еден нов елемент кој се нарекува блог кој ќе се ажурира на одреден временски еприод. За значајноста на блогот за бизнисите пишував тука на претприемач во презентација на резултати од истражување во однос на успешноста на бизнис веб страните кои имаат блог и оние кои немаат. Резултатите беа:

…бизнисите кои користат блог како едно од маркетинг средства наместо статична веб страна за презентација и промоција на бизнисот имаат 55% повеќе посетители, 97% повеќе влезни линкови (други веб страни имаат линк кон нив) и 434% повеќе индексирани страни на Google…

Мислам дека овие бројки се доволен показател да Вие како претприемач го промените Вашето досегашно размислување за Вашата бизнис веб страна.

Постојано подобрување на Вашата бизнис веб страна

Откако ќе ја замените брошурата можете да започнете со постојано подобрување на Вашата веб страна како би можеле потенцијалните клиенти полесно да ве најдат кога бараат решение за нивните проблеми кои Вие како претприемач можете да им ги решите.

За почеток не се замарајте со линкови кон Вашата веб страна, бидејќи гледам дека тоа станува една од основните преокупации. Тие се важни, во секој случај само доколку Вашата бизнис веб страна е соодветно оптимизирана. Што секако е во Ваши раце.

Следниве елементи треба постојано да ги подобрувате:

  • Квалитетна содржина – постојано објавувајте квалитетна содржина која ќе ги интересира Вашите потенцијални купувачи и ќе има вредност за истите.
  • Клучни зборови кои ќе бидат содржани во таа содржина. Се однесува и на примарни и на секундарни клучни зборови.
  • Внатрешни линкови. Интернет светот се гради на линкови, затоа е потребно соодветно да ги оптимизирате внатрешните линкови на Вашата бизнис веб страна.
  • Мета елементите на секоја страна. Ова се елементите кои не се видливи за посетителите, но видливи се за пребарувачите. Во страната која ја анализиравме во претходниот напис воопшто не се вклучени овие елементи.

За почеток ова се доволни елементи кои на Вас како претприемач ќе ви донесат зголемување на посетители, а со тоа и зголемување на потенцијални потрошувачи, и со тоа зголемување на вистински купувачи за Вашиот бизнис.

Ова беше еден мој мал прилог на она како да се искористи потенцијалот на интернетот за бизнис цели. За веб презентација имаме изготвено 10 видео материјали како до бесплатна веб презентација на вашиот бизнис.

post

Дали Вашата Бизнис Веб Страна е Обична Брошура?

Што е веб страна, а што брошура? Дали е исто?

Дали веб страната треба да биде еден вид на онлајн брошура? Во почетокот на интернетот како место каде можете да бидете најдени и Вие како претприемач и Вашиот бизнис сите бизнис веб страни биле брошури. Ова значело дека брошурата која бизнисот ја имал на хартија се преточува во еден електронски документ кој е достапен на интернет.

Но, денес сметам дека Вашата бизнис веб страна најмалку треба да биде во форма на една брошура. Бидејќи ако е во форма на брошура нема да ги искористите полезностите кои една веб страна може да ги донесе за Вашиот бизнис. Но да тргнам по ред.

Што е веб брошура?

За брошура на претприемач веќе пишувавме како едно од маркетинг средства. Во тој напис напишав дека една солидна брошура би требало да содржи:

  • Насловна страна. Насловната страна треба да го наведе читателот да ги читаат останатите страни од брошурата каде ќе биде претставена Вашата понуда…
  • Вашата понуда. Тука давате краток опис на Вашите производи и/или услуги…
  • Ургентност. Брошурата има за цел да предизвика ургентност за акција…
  • Задна страна со информации за контакт…

Да, тоа е една брошура во неколку странички.

Погледнете го сега ова:

  • Насловна страна на брошура – Почетна страна на Вашата бизнис веб страна
  • Ваша понуда на брошура – Производи на Вашата бизнис веб страна
  • Ургентност на брошурата – Промоција како посебна страна на Вашата бизнис веб страна или пак банерче кое ќе трепка за да се преземе некоја акција од страна на посетителот
  • Информации за контакти на брошура – За нас страната на на Вашата бизнис веб страна или пак контакт форма од страна.

Дали сега Ви е јасно зошто над 95% од бизнис веб страните во Македонија претставуваат обични веб брошури. Велам „обични“ затоа што воопшто не е искористен потенцијалот на онлајн присутноста на еден бизнис.

Една Вежба од Претприемач на реален пример

Случајно кога го пишувам овој напис ми дојде на ум да пребарам на Google за зборот „кабли“ како некој потенцијален потрошувач. Резултатите беа точни на прво место се најде Фабрика за Кабли Неготино. Направив една кратка анализа од 5 минути на веб страната при што ќе ви презентирам што најдов и какво е моето мислење.

Дали оваа веб страна е „обична“ веб брошура?

Во секој случај одговорот е ДА. Ги има следниве елементи (страни):

  • Профил
  • Производи
  • Контакт инфо

Се што содржи една брошура.

Фабрика за кабли - Неготино

Дали овој бизнис сака да биде поголем извозник?

Повторно одговорот е ДА бидејќи веб страната е на неколку јазици: англиски, германски и руски како надополнување на македонскиот.

Ова ме натера да ја погледнам англиската верзија, да изберам еден производ и да побарам на Google да видам дали ќе се најде меѓу првите резултати.

Го избрав производот “Connecting Cables” кој ќе го користам во оваа вежба. Инаку сакам да напоменам дека на претходниот збор „кабли“ извршив анализа и со одредена формула ја пресметав конкурентноста (дали е тешко да се биде прв на Google) и добив дека конкуренцијата е слаба и секој може за кратко време да ја престигне оваа фабрика.

Дали за зборот “Connecting Cables” излегува на Google оваа веб страна?

Одговорот е НЕ. Пробав до 5-тата страна за овој збор и нашата Фабрика за кабли од Неготино ја нема. Нормално се откажав од понатамошен преглед бидејќи ми е здодевно.

Значи доколку овој бизнис сака да го зголеми својот извоз мора да го искористи вистинскиот потенцијал на својата веб страна која во моментов е „обична“ брошура која служи само претприемачот да се пофали дека има веб страна.

Дали е тешко да се избие прв на Google за зборот “Connecting Cables”?

Повторно одговорот е НЕ. Зборот “Connecting Cables” е поконкурентен од зборот „кабли“ но, сепак не спаѓа во група на зборови за кои конкуренцијата не може лесно да се победи. Дури на првите две места се веб страни кои се казнети од страна на Google што значи дека со малку вложен труд оваа веб страна ќе може лесно да биде прва на Google за овој збор и секој кој ќе биде заинтересиран за овие кабли во светот веднаш да ја пронајде.

Ова е само еден збор кој го проверив, но од овој еден и останатите може да произлезат и други зборови кои би можеле да се искористат за полесно да биде најдена оваа веб страна.

Дали оваа веб страна изгледа добро?

Супер изгледа во секој случај. Но, сепак е „обична“ брошура, а вообичаено на „обичните“ брошури посетителите ја разгледуваат веб страната, прават неколку клика, си заминуваат и никогаш повеќе не се враќаат.

Кои се основните недостатоци?

  • Почетна страна има една слика и една флеш анимација. Ова изгледа супер, но сепак не е препознатливо во очите на Google и останатите пребарувачи. На истата почетна страна како единствен збор стои Copyright 2004. Се добива впечаток дека на оваа веб страна ништо не е ажурирано веќе 5 години (ова истото се однесува за сите страни на дното од страните).

Дали Вашата бизнис веб страна е обична брошура?

  • Малку текст. Нема доволно текст кој би бил препознаен од пребарувачите. На една од страните со повеќе текст има само 99 збора.
  • Нема елементи кои би го натерале посетителот (потенцијалниот купувач) да се врати на веб страната.
  • Слаба оптимизација на клучни зборови. Клучните зборови по кои треба да бидат најдени навистина се слабо оптимизирани.

За 5 минути толку можев да забележам, а сигурно постојат и други, како на пример немање на нова содржина на веб страната за да биде побргу препознаена од страна на Google итн.

Добро, овој напис не се однесува на SEO (Оптимизација за пребарувачи), туку за тоа дали Вашата веб страна изгледа како „обична“ брошура.

Она што сакам да го потенцирам е дека овој бизнис може многу подобро да биде рангиран на Google (и тоа како прв без да плаќа за реклама на Google Adwords). Тоа треба да се искористи бидејќи доколку успеете да имате повеќе посетители од надвор поголема е веројатноста за нови зделки за извоз. На пример, ако имате месечно 1000 посетители од надвор и успеете со Вашата веб страна да конвертирате само 0,5% во купувачи, тоа се 5 нови зделки или договори за извоз месечно. Ако имате 10.000 посетители со истатата стапка на конверзија ќе имате 50 нови зделки месечно. Што не е неостварливо.

НАПОМЕНА: Воопшто не е злонамерно искористена Фабрика за Кабли од Неготино, ниту пак е спонзориран овој напис на претприемач, едноставно една вежба за тоа како да се подобрат бизнисите во Македонија, а со тоа и целокупната економија. Од друга страна над 95% на веб страни на македонските бизниси се вакви, а оваа е една од подобрите.

post

Преглед на книга – Влезен Маркетинг – Да Бидете Најдени на Google, Социјални Медиуми и Блогови

Вчера на претприемач пишував за значењето на на влезен маркетинг како маркетинг на утрешницата. Пред неколку дена ми стигна една книга која ја купив од Amazon, Inbound Marketing – Get Found Using Google, Social Media and Blogs од Brian Halligan и Dharmesh Shah и ја прочитав па би сакал да презентирам краток преглед на она што значи оваа книга.

Авторите на оваа книга се луѓето кои стојат зад HubSpot – софтвер за влезен маркетинг. Нивното искуство со сопствената компанија како и искуството работејќи за други компании како консултанти го преточуваат во оваа книга.

Што е Влезен Маркетинг – Да бидете најдени на Google, Социјални медиуми и Блогови

Како што веќе пишував на претприемач, овој тип на маркетинг претставува маркетинг на денешницата и маркетинг на утрешницата. Денес веќе за да бидете добар во маркетингот не е важно колку пари Вашиот бизнис има за да вложи туку колку сте паметни и креативни за да ја искористите технологијата околу Вас во маркетинг цели.

Токму тоа е опфатено во оваа книга. Како што кажува и самиот наслов оваа книга ќе ви ги даде некои од основните стратегии и тактики кои би требало да го променат Вашето размислување во однос на маркетингот за Вашиот бизнис. Тоа е како да бидете најдени на Google, Социјални медиуми и блогови.

Зошто да бидете најдени на Google, Социјални медиуми и Блогови?

Влезен маркетинг - Како да бидете најдени на Google, Социјални медиуми и блоговиВо секоја маркетинг кампања претприемачите се обидуваат да бидат присутни на местата каде што се потенцијалните потрошувачи. А кои се тие места? Каде еден потенцијален потрошувач или интересент за некој производ или услуга започнува со сопственото информирање за производите или услугите кои се нудат?

Можеби порано седеле пред ТВ или пак слушале радио за да видат или пак слушнат некоја реклама. Можеби порано купувале весници и магазини за да видат некој интересен производ. Но, денес оваа однесување на луѓето е намалено и тоа се заради моќта на интернетот. Денес луѓето се онлајн.

Денес кога јас сакам да се информирам дали постои некој производ или пак услуга со што би решил некој проблем одам на Google и пребарувам. Преку Google стигнувам до различни веб страни и блогови кои ги читам за да бидам доволно информиран пред да донесам одлука за купување. Многу корисни информации добивам и преку социјалните медиуми на кои на некој начин сум присутен. Ова значи дека традиционалните маркетинг медиуми веќе воопшто не ги консумирам. А, зошто би ги консумирал кога постојано сум врзан на интернет и постојано информациите ми се достапни.

Затоа Вашиот бизнис треба да биде најден на Google, Социјалните медиуми и Блогови, за што и оваа книга се однесува. Затоа и би требало да ја имате, прочитате, препрочитувате и имплементирате стратегиите и тактиките кои се наведени во истата.

Карактеристики на книгата

Би сакал да издвојам некои карактеристики на Inbound Marketing – Get Found Using Google, Social Media and Blogs кои навистина ми оставија вистинска импресија:

  • Јазик. Првата импресија од читањето на книгата е јазикот кој го користат авторите. Јазикот не е технички јазик, ниту пак научен јазик кој е тешко разбилрлив за обичните луѓе. Користениот жаргон и стилот на пишување на авторите е разбирлив за секого па дури и за оние кои за првпат се среќаваат со овие поими.
  • Сеопфатност. Книгата иако не е голема – 220 страни, сепак е сеопфатна во однос на она што треба претприемачите да започнат уште денес за да имаат успех во влезниот маркетинг.
  • Влезен маркетинг во акција. Секое поглавје во книгата има дел наречен влезен маркетинг во акција, што всушност претставува случај или пример на успех на овој вид на маркетинг.
  • Што треба да направите. По секое поглавје имате листа на активности кои треба да ги спроведете за да навлезете во влезниот маркетинг.

Навистина вредна книга за цената која што чини помалку од $25.

За кого е идеална оваа книга?

Навистина важно прашање. Оваа книга има потенцијал да помогне секому. Потенцијал да помогне на целосен новајлија во оваа проблематика и потенцијал да помогне на секој маркетинг експерт да си го подобри сопственото знаење. Во секој случај мислам дека основната група на оние кои треба да ја имаат оваа книга се:

  • Претприемачи. Секој потенцијален и секој сегашен претприемач кој сака да го максимизира искористувањето на маркетинг активностите на соспствениот бизнис.
  • Луѓе кои се занимаваат со маркетингот. Секој кој има било каков контакт со маркетинг би требало да ја има и користи оваа книга.

Во секој случај ова е книга од која навистина може нешто да се научи и што е најважно да се примени во пракса.

post

Влезен Маркетинг – Inbound Marketing

Маркетингот е целосно променет во последниве години. Нешто што беше нормално за привлекување на купувачи пред 3 до 5 години сега веќе не е.

Влезен маркетинг - Inbound Marketing

Претприемачите мора да најде различни начини како да ги привлече потенцијалните потрошувачи за нивниот бизнис. Бизнисите кои нема да го променат начинот на кој го изведуваат маркетингот ќе продолжат да трошат пари на непродуктивни маркетинг кампањи и нормално ќе ја трошат сопствената бизнис потенцијална енергија.

Стилот на маркетингот кој на денешниот мал бизнис и денешниот претприемач му е потребен е влезниот маркетинг, нешто сосема спротивно на оној традиционалниот наречен уште како и излезен маркетинг.

Што претставува влезен маркетинг?

Првин би започнал со нешто за излезен маркетинг и потоа би го споредил со насловот на овој напис – излезен маркетинг.

Излезен маркетинг

Во излезниот маркетинг бизнисот и претприемачот се фокусирани во изнаоѓање на потрошувачи. Се користат техники кои слабо ги таргетираат потенцијалните потрошувачи и кои имаат еден приод кој изгледа како вознемирување на луѓето. Тие користат директна пошта, телемаркетинг, печатени реклами, радио реклами, весници, ТВ реклами, саеми, спамираат, испраќаат несакани mail-ови… Сите овие спаѓаат во еден приод кој Seth Godin го нарекува со кованица вознемирувачки маркетинг бидејќи овие тактики функционираат само во случај кога ќе го вознемират потенцијалниот потрошувач за да му го привлечат вниманието.

Овие приоди се базирани на претпоставка дека доколку ги бомбардираме нашите потенцијални потрошувачи со нашите пораки, тие ќе одвојат неколку секунди да ја примат нашата порака и така ќе го привлечеме нивното внимание врз нашиот бизнис. Но, денес ова вознемирување може да доведе до контраефект на нашата маркетинг кампања.

Не сакам да бидам вознемирен кога гледам интересен филм на ТВ. Не сакам да бидам вознемирен кога во поштенското сандаче ќе најдам еден куп на писма кои не сакам да ги читам. Не сакам да примам е-mail-ови од бизниси кои не ги познавам а не сум побарал да ми праќаат е-mail. Не сакам омилената песна која е хит на неделата да ми ја прекинат со некое ЕПП кога слушам радио.

Дали и вие се чувствувате вознемирено кога ќе ви се случат овие работи?

Од друга страна веќе постои технологија која може да ме спаси од сите овие несакани маркетинг кампањи и која ќе ги направи овие тактики помалку ефективни и поскапи за еден претприемач и неговиот бизнис. Филмот ќе го гледам на DVD, a не на ТВ. на телефон со идентификација на повик можам да ги блокирам сите непознати повици. Spam филтерот си ја врши работата за непосакуваните е-mail пораки. Новата алатка RSS ги прави весниците и магазините помалку ефективни (Иако кај нас некои воопшто не овозможуваат RSS опција, но сепак поголемиот дел овозможуваат).

Дали со ова еден претприемач ќе се запраша што е денес ефективно и ефикасно?

Влезен маркетинг

Влезен маркетинг е целосно спротивен на сето она што го кажавме за излезниот маркетинг:

  • Во излезен маркетинг бизнисите и претприемачите се фокусирани во наоѓање на потрошувачи. Во влезен маркетинг се фокусирани на работите што ќе им помогнат на потенцијалните потрошувачи полесно да го најдат нивниот бизнис.
  • Во излезен маркетинг претприемачот користи маркетинг техники кои слабо ги таргетираат потенцијалните потрошувачи. Влезен маркетинг користи техники кои имаат високо таргетирани потенцијални потрошувачи.
  • Во излезниот маркетинг приоди еден претприемач ги вознемирува луѓето за да го привлече нивното внимание, додека со влезен маркетинг потенцијалните потрошувачи Ве бараат Вас бидејќи сакаат да ве најдат.

Влезниот маркетинг едноставно значи користење на методи кои ќе овозможат Вашите потенцијални потрошувачи лесно да Ве пронајдат кога бараат решение кое Вашиот производ или услуга им го овозможува. Значи со влезен маркетинг ќе имате високо таргетирани потенцијални потрошувачи да дојдат до вашиот бизнис.

Денес потенцијалните потрошувачи имаат целосна контрола на маркетинг медиуми кои ќе ги консумираат. Тие го избираат времето кога и местото каде ќе го консумираат одреден медиум. Вие како претприемач се помалку имате влијание врз оваа.

Поради сето она горенаведено влезниот маркетинг е нешто што е се повеќе и повеќе потребно за еден претприемач и мал бизнис. Но, како да се имплементира?

Одговорете ги следниве прашања поврзани со имплементација на влезен маркетинг:

  • Каде се потенцијалните потрошувачи кои бараат производи и услуги кои што ги нуди и мојот бизнис?
  • Можам ли да бидам таму доколку го бараат она што јас како претприемач го нудам?
  • Како да бидам прв во нивните очи кога тие го бараат она што јас го нудам?

Да го разгледаме влезниот маркетинг со традиционален медиум како флаери. Можете да ги поставите Вашите флаери во поштенски сандучиња во една зграда. Оваа техника е техника на излезен маркетинг. Луѓето од таа зграда секојдневно примаат различни флаери и повеќето од нив завршуваат едноставно непрочитани во ѓубре. Но доколку, на приме Вашиот бизнис нуди услуги од типот на финансиски консалтинг и Вие како претприемач знаете дека локалните банки се одлично место каде се движат Вашите потенцијални клиенти, можете да направите договор со локалните банки за да оставите флаери и доколку некој клиент на банката сака да го прочита ќе го земе флаерот. На ваков начин помала е веројатноста дека флаерот за кој сте дале пари да заврши во ѓубре. Ова е влезен маркетинг.

Интернетот го прави влезниот маркетинг многу едноставен. Денес се повеќе и повеќе луѓе кога имаат некаков проблем одат на Google или различни социјални медиуми да најдат одговори за сопствените проблеми. И ова е одлично место за еден претприемач за да ги искористи техниките на влезен маркетинг. На ваков начин влезниот маркетинг се фокусира на креирање на одлична содржина на веб страната на бизнисот или социјалните медиуми која ќе овозможи потенцијални потрошувачи да разберат за Вашиот бизнис, бренд, производи и услуги.

Доколку Вашите потенцијални потрошувачи се на Facebook мора и вие како претприемач и Вашиот бизнис да бидете присутни таму. Доколку тие се на Twitter бидете таму, доколку се на LinkedIn бидете и Вие. Доколку бараат нешто на Google мора да бидете на првите неколку места на првата страна со резултати.

Зошто влезен маркетинг?

Затоа што работите околу маркетингот во последните години драстично се променети. Пред неколку години повеќето потенцијални потрошувачи единствената информација за некој производ или пак услуга ја добивале гледајќи ТВ, слушајќи радио, читајќи весници и магазини, примајќи директна пошта или пак од луѓето кои се занимаваат со продажба од врата на врата.

Како и да е, денес истите потенцијални потрошувачи имаат многу повеќе опции да бараат и да најдат решенија за сопствените проблеми. Одат на Google и бараат и она што е најважно не сакаат да бидат вознемирувани. Кога се вознемируваат маркетинг напорите предизвикуваат контра ефект кој може да му наштети на Вашиот бизнис.

Резултатите од влезниот маркетинг можат да бидат огромни, но за да се постигнат потребно е да се вожи труд и време. Можеби заради тоа повеќето претприемачи не сакаат да трошат време за градење на целиот процес. А, оваа е уште еден фактор кој треба да Ве мотивира да започнете уште денес.