post

SEO Основни столбови On-Page оптимизација

On-Page фактори за SEO оптимизација

On-Page фактори за SEO оптимизација

Да продолжиме со вториот и третиот столб на еден процес на оптимизација за пребарувачи (SEO). Досега поминавме нешто општо за SEO, потоа разграничивме за тоа што претставува SEO и го претставивме првиот основен столб на еден ваков процес – истражување и анализа на клучни зборови.

Треба да напоменам дека овие таканаречени столбови на еден SEO процес претставуваат континуирана работа и активност. Оваа материја или проблематика е променлива. Трендовите се менуваат многу често, така да за некои подрачја или ниши на пазарот еден тренд може да биде сега додека по еден час да се појави нешто ново како тренд. Затоа барем на месечно ниво морате да следите што се случува со клучните зборови и секако да го ажурирате и применувате сето она до што ќе дојдете. Значи SEO e стратешки и континуиран процес за еден бизнис.

Првин, што претставуваат On-Page фактори за оптимизација? Тоа се сите фактори и елементи на кои што вие имате влијание и се наоѓаат на Вашиот сајт и слободно можете да ги менувате, едитирате или организирате, а во исто време имаат влијание на појава на вашата веб страна на резултатите на пребарувачите.

Во овој дел ќе се обидам да ги наведам главните елементи што спаѓаат во оваа столб на еден процес на SEO.

1. Title Tag – Наслов на страната

Насловот е она што се појавува на врвот на интернет пребарувачот кога посетуваме една веб страна. На сликата подолу е даден пример на насловот на страната:

Наслов на страна - Title Tag

Наслов на страна - Title Tag

Забележувате дека оваа веб страна во насловот го има клучниот збор кој го пребарував на Google (Welded Steel Pipe). Не можам да кажам дека овој наслов е нешто најдобро оптимизиран, но сепак за индустријата во која се наоѓа овој бизнис и секако слабото познавање на SEO од страна на други конкуренти го прават најдобар. Еве друг пример да видите една страна која воопшто ја нема до 10-та страна од пребарувачите, а е од иста индустрија:

Веб страна без наслов

Документ без наслов, тоа е значењето на насловот на оваа веб страна.

Ова е еден од најважните On-Page фактори кои еден пребарувач го гледа и препознава како прво нешто на една веб страна. Затоа со помош на зборовите кои ги анализиравте претходно определете квлитетни наслови за секоја страна или за секој текст артикал или некој опис што ќе го користите на таа веб страна.

2. Клучни зборови и Опис

Клучните зборови и опис се елементите кои Вие ги наведувате на секоја веб страна, а кои за разлика од насловот не се директно видливи за посетителот на веб страната, но се користат од страна на пребарувачите за да ја најдат и да препознаат за што се однесува Вашата веб страна. Овие елементи немаат огромно влијание и важност како во минатото, но сепак играат важна улога во SEO. Ова особено се однесува на описот бидејќи истиот се појавува на страната со резултатите на Google (види слика подолу).

Резултати - Наслов и опис

Резултати - Наслов и опис

А еве што е она што пребарувачите го читаат во кодот на Вашата страна:

Позадински код - Наслов, опис и клучни зборови

Позадински код - Наслов, опис и клучни зборови

Уште еднаш да напоменам, дека овој пример не е пример за добро оптимизирана веб страна. Туку само како пример каде што се наоѓа што Вие можете да го оптимизирате. Забележувате одредено претерување во примерот во однос на опис и клучни зборови, ми се чини дека имаат повеќе клучни зборови отколку број на зборови во текстот на страната. Дали тоа Google нема да го забележи? Секако дека ќе го забележи само што во овој случај конкурентите се уште послаби од овој бизнис па затоа и котира високо на резултатите од пребарување.

3. H1, H2, H3 Tags – Поднаслови

Третиот елемент по важност кои што пребарувачот ги гледа во проценка на релевантноста на една веб страна се поднасловите или зборувано на технички јазик H1, H2, H3..

Ова е исто како кога во MS Word пишувате некој текст и ги означувате поднаслови во вид на стил: Heading 1, Heading 2…

MS Word споредба со SEO

MS Word споредба со SEO

Да напоменам дека важноста во определување на релевантноста на Вашата веб страна во однос на некој збор кој се пребарува за да се појави на резултатите на пребарувачот се движи од 1 нагоре. Ова значи дека поднасловот означен како h1 е поважен од поднасловот означен како h2 и h2 e поважен од h3 итн.

Бидејќи страната која што ја анализирав нема вакви поднаслови (h1,h2,…) па затоа ќе го претставам позадинскиот код на една страна од претприемач:

Поднаслови h2

Поднаслови h2

4. Содржина – Густина на зборови

Забележувате дека одиме од горе према надолу на една страна. Досега ниту ние ниту пребарувачите не погледнавме во текстот што е содржан на една страна. Пребарувачите не се живи суштества и не можат да разберат што е значење и каков е квалитетот на содржаниот текст на една веб страна. Но, затоа можат да препознаат каква е густината на зборовите за кои Вие ја оптимизирате Вашата страна.

Густина на зборови претставува зачестеност на појава на еден збор во содржината на веб страната. На пример ако имаме текст кој содржи 100 збора и нашиот клучен збор се повторува 2 пати тоа значи дека густината ќе биде 2% (2/100).

Внимавајте да не претерате со повторувања на зборови бидејќи веднаш ќе бидете отфрлени, или казнети од страна на пребарувачот и вашата страна нема да биде земена во предвид при прикажување на резултатите.

Втората работа која сакам да ја напоменам тука е да се обидете сите зборови кои ќе ги имате во клучни зборови да ги искомбинирате и во текстот или пак доколку ги немате воопшто не ставајте ги како клучни зборови.

5. Слики

Мислам дека не постои веб страна која не користи некакви слики. Се вели дека сликата менува 1000 зборови. Но, пребарувачите не можат толку едноставно да ја прочитаат сликата односно текстот на сликата. На пример, доколку имам една ваква слика:

Мој клучен збор - Слика

Мој клучен збор - Слика

Пребарувачот гледа дека има некоја слика но, не знае што е на таа слика. Во овој случај – Мој клучен збор. Но затоа, во има начин на кој што пребарувачот ќе може да знае и да ја прочита текстуалната замена на сликата. Тоа се т.н. alt tags. Така да доколку во позадинскиот код каде што е сликата направам вака:

Alt tag на слика за SEO

Alt tag на слика за SEO

сликата ќе биде препознатлива за пребарувачите или барем дел од она што треба да означува таа слика ќе биде прочитано од страна на пребарувачите. Забележувате дека ние не правиме тука никаква измама, туку едноставно им олеснуваме на пребарувачите подобро да ја разберат нашата страна.

Како дополнителен елемент претставува и името на сликата. На пример име на една слика е попрепознатливо за пребарувачите доколку е moj_klucen_zbor.jpg отколку 2010-06-10_142707.jpg.

Ова би биле основните On-Page фактори за оптимизација за пребарувачи. Постојат и различни дополнителни елементи кои може да се разгледуваат како на пример болдиран текст, внатрешни хиперлинкови, вкупен број на зборови… Некои до тие ги опфатив во Како на прво место за неколку минути? Но, во секој случај ова се најважните елементи кои би требало да ги разгледате и имплементирате за секоја страна од Вашиот веб сајт.

Продолжете со следниве написи:

post

SEO – Основни столбови – Столб 1 – Клучни зборови

SEO - Прв столб - Клучни зборови

SEO - Прв столб - Клучни зборови

Третиот пост од овој серијал на постови за SEO како маркетинг средство се однесува на трите основни столба на кои се базира еден ваков процес на оптимизација за пребарувачи. Доколку не сте го прочитале првиот пост каде е разграничено што точно претставува SEO би препорачал да го прочитате првин него пред да навлезете во проблематиката која ќе ја опфатиме со овој пост.

Три основни столбови на SEO

Од претходниот пост заклучивме дека пребарувачите препознаваат зборови и скенираат содржина на интернет со што прават сопствена база на податоци преко која се добиваат страните кои се најрелевантни кога еден индивидуалец ќе побара нешто на интернет.

Функционирањето на овој процес со поедноставени зборови би изгледал на следниов начин:

  • Индивидуалецот која бара информација на интернет оди на Google, внесува збор, фраза или прашање што го интересира и кликнува на Барај копчето.
  • Пребарувачот проверува во сопствената база на податоци за клучните зборови кои ги има внесено оној кој бара информација колку се совпаѓаат со она што пребарувачот го има во сопствената база на податоци. Тука веќе напоменав дека по сложен алгоритам се врши пресметка. Веб страните кои најмногу се совпаѓаат со она што е барано ги рангира согласно релевантноста за која што стана збор во претходниот пост.
  • Така рангирани ги враќа на страната со резултати од пребарувањето.

Од тука би можеле да ги извлечеме основните три столба на еден SEO процес:

  • Истражување и анализа на клучни зборови,
  • Фактори на самата веб страна (On-Page) и
  • Фактори кои не се на самата веб страна (Off-Page).

Пред да започнам со приказ на трите столба би сакал да напоменам дека процесот е уште посложен бидејќи истите не се взаемно исклучиви, односно без истражување на клучни зборови нема да можете да ги имплементирате факторите на самата веб страна ниту факторите кои не се на самата веб страна или пак ако ги имплементирате резултатите нема да бидат онакви како што треба да бидат.

Истражување и анализа на клучни зборови

Овој столб е еден од најважните столбови за еден SEO процес. Велам најважен бидејќи и останатите два столба ќе ги користат информациите од овој столб.

Започнуваме со овој столб бидејќи уште на почетокот ќе сакаме да знаеме кои се зборови за кои сакаме да постигнеме повисоко рангирање на резултatите на пребарувачите. Овој процес е многу посложен отколку што може да замислиме. Пред извесен период мислев дека ова е навистина едноставно, но како навлегував се повеќе во проблематиката сфаќав дека не претставува само користење на некоја бесплатна алатка и влечење на најбараните зборови. Многу повеќе овој столб претставува стратешки концепт на вашата онлајн бизнис присутност. На пример, постои суштинска и концепциска разлика помеѓу следниве зборови:

  1. играчка за деца
  2. играчка за деца – топче
  3. бакуган топче
  4. цена на бакуган топче
  5. купи бакуган топче
  6. бакуган турнир

Сите зборови се наменети за еден бизнис – бизнис со играчки за деца. Но, сите зборови се различни и прикажуваат различна интенција на оној кој пребарува. Во првиот случај некој можеби само сака да види какви играчки за деца постојат. Во вториот случај индивидуалецот бара топче како играчка за деца. Третиот е специфицирана играчка во вид на бакуган топче. Четвртата и петата фраза претставува потенцијален купувач бидејќи се бара информација за цена на производот и секако места каде може да се купи, додека со шестата фраза бара информација за турнир за деца со игра со бакуган топче.

Можеме да погледнеме на овие фрази и на еден ваков начин:

  • Цел: Зајакнување на бренд. Прва, втора, трета и шеста фраза.
  • Цел: Зголемување на продажба. Четврта и пета фраза.

Па потоа овие фрази ќе имаат и подфрази, подпрашања, доспецификации…

Значи целта со оваа истражување и анализа е да дојдеме до клучни зборови во согласност со нашата онлајн стратегија.

Ќе се обидам да направам поедноставено расчленување на овој процес на анализа и истражување на клучни зборови.

1. Определи 5-6 збора поврзани со твојот бизнис!

Едноставно започни со 5-6 збора кои асоцираат на твојот бизнис. Размисли што Вие би внеле во полето за пребарување на еден пребарувач кога би барале информација за Вашиот бизнис.

2. Погледнете ги најдобро рангираните веб страни за тие зборови.

На пример, доколку нашиот бизнис произведува заварени челични цевки ќе побарам на Google за зборот Welded Steel Pipes како еден од тие основни 5-6 збора кои асоцираат на нашиот бизнис. Еве ги резултатите:

Пребарување на Google за Welded Steel Pipes

Пребарување на Google за Welded Steel Pipes

Во овој случај ќе ги гледам веб страните кои се појавуваат како резултати во органскиот дел (неплатен). Ќе ги отворам сите први 10 страни и ќе ги разгледам во однос на тоа што пишуваат, која е густината на зборот welded steel pipe, кои други зборови користат во keywords, каков дизајн користат… На пример за да видам кои клучни зборови ги имаат поставено ќе го погледам позадиснкиот код на страната при што ќе видам нешто вакво:

Позадински код за зборови за SEO

Позадински код за зборови за SEO

Од ова можам да видам каков наслов користат, каков опис користат (за што ќе стане збор во вториот столб) и секако она што не интересира кои зборови ги користат. Од ова анализа на првите 10 веб страни ќе извлечам уште десетици или стотици зборови кои се користат од потенцијалните конкуренти.

3. Искористи го Google Keyword Tool

Ќе ја користиме оваа алатка за да дојдеме до идеи на фрази кои ќе ги користиме во нашите процеси на оптимизација за пребарувачи. На пример преку Google Keyword Tool ќе можеме да дојдеме до уште клучни зборови за примерот од погоре:

Google Keyword Tool зборови за SEO

Google Keyword Tool зборови за SEO

Оваа алатка е дизајнирана повеќе за Google Adwords кампањи кои на претприемач ќе ги опфатиме во посебно маркетинг средство. Но, интересно е што преку оваа алатка освен идеи за зборови ќе дојдеме и до анализи за тоа колку пребарувања има месечно за одреден збор или фраза како и конкуренцијата за соодветниот збор или фраза.

4. Користи ги фразите од пребарување од Google Analytics

Доколку веќе имате веб страна можете да ги видите најкористените зборови кои ви носат сообраќај кон Вашата веб страна преку бесплатната алатка Google Analytics. Ова е корисно бидејќи можете да забележите некои зборови кои носат одреден број на посетители иако вие не сте направиле оптимизација за тој збор, па така едноставно да го вклучите во Вашиот процес на оптимизација. Еве пример како изгледа овој процес во Google Analytics:

Google Analytics зборови за SEO

Google Analytics зборови за SEO

5. Класифицирај, селектирај, планирај

Со овој процес можеби ќе дојдете до илјадници потенцијални зборови кои на некаков начин се поврзани со Вашиот бизнис. Затоа како последна фаза од овој процес е да се направи соодветен план за тоа како ќе се користат овие зборови. Мора да ги класифицирате во групи, како на пример погоре што споменав класификација со зајакнување на бренд, зголемување на продажба… Ќе мора да направите и план на активности за соодветна употреба и инкорпорирање на овие зборови на вашата веб страна.

Ова е се за овој напис како дел од серијалот за SEO на претприемач. Планирав сите три столба да бидат во еден пост, но навистина ќе излезе предолго. Затоа утре следуваат останатите два столба: Off-Page и On-Page оптимизација.

Продолжете со следниве написи:

post

Што претставува SEO?

Што претставува SEO?

Што претставува SEO?

Ќе продолжам со 60-тото маркетинг средство на претприемач кое оди во серијал на написи. Како што најавив во претходниот напис SEO – Оптимизација за пребарувачи – Маркетинг средство 60 потребно е јасно разграничување на тоа што претставува оптимизација за пребарувачи. Сметам дека тука лежи и најголемата грешка која може да се направи да сите други активности да бидат бесцелни.

Првин би сакал да напоменам дека SEO не значи измама за да пребарувачот смета дека токму твојата веб страна треба да се појави меѓу првите кога некој пребарува за нешто на интернет. SEO едноставно значи да се прилагоди веб страната за да се обезбеди полесна достапност од страна на пребарувачите кои врз база на нивниот алгоритам ќе одлучат на кое место да ја покажат вашата веб страна (на пример, 1-во или 50-то место).

Дефинирање на SEO

Да започнам со нешто формално. Во Wikipedia оптимизација за пребарувачи (SEO) се дефинира како:

процес на подобрување на количина и квалитет на сообраќај кон една веб страна од страна на пребарувачите преку „природен“ или неплатен („органски“ или преку алгоритамот) резултат од пребарување како спротивно на маркетинг на пребарувачи (SEM – Search Engine Marketing) кој се однесува на платено прикажување.

Ги болдирав оние важните елементи во дефиницијата:

  • SEO претставува процес на подобрување. Значи наместо користење на процес на измама користиме процес на подобрување на веб страната како полесно би била пронајдена од страна на пребарувачите.
  • Освен со број на посети SEO се занимава и со квалитетот на тие посетители. Ова е многу значаен елемент особено за еден претприемач и неговиот бизнис. Може да имаш огромен број на посети, но едноставно тие доаѓаат и си одат. Нема конверзија, нема враќање, процесот завршува тука.
  • SEO се однесува на органскиот сообраќај од пребарувачите. Тоа значи на оној дел за кој не се плаќа. Кога станува збор за Google постојат две подрачја од екранот со резултати кои се неоргански (платени реклами) додека останатиот најголем дел се однесува на оние бесплатни резултати кои се добиваат со помош на SEO. Како што е прикажано на сликата десниот дел (до 8 места има дозволен простор) се однесува на приказ на резултати на оние кои му плаќаат на Google (Google Adwords) за да се појават тука. Постои уште едно подрачје кое се наоѓа веднаш над органскиот дел каде исто така се прикажуваат резултати од платен маркетинг, а не SEO.

Резултати од пребарување на Google

Што не е SEO – Еден пример

Преку различните обуки низ кои што поминав ми беа покажани различни веб срани за тоа што не претставува SEO, но пред некое време налетав и на една веб страна од Македонија која сосема погрешно го сватиле SEO процесот. Затоа и напоменав на почетокот од овој пост дека SEO не претставува измама од страна на администраторот на веб страната за да биде забележана таа веб страна како вредна. Можеби пред 10-тина години ова функционирало, но денес не функционира. Погледнете една веб страна (го прикажувам само долниот дел):

Лош SEO пример

Ме зачуди зошто толкав простор оставен на дно?

А кога направив селекција на се што има на страната еве што произлегува:

Лош SEO пример

Но чудењето беше кратко - Причина е погрешно SEO

Втор пример на истата страна што го забележав е URL-то на страните. Погледнете само како изгледа:

http://www.kupi.com.mk/store/Macedonia_Computers_Rainbow_Makedonija_Kompjuteri_Prodavnica_Shop_Store_Acer_ Apacer_ASUS_Epson_HP_Dell_IBM_LG_Logitech_Samsung_SONY_Toshiba_WD_Intel_AMD.asp

Во написот за домен име како маркетинг средство пишував дека ова има влијание на SEO но тоа не значи дека треба да направите километарско URL со што само ќе ги нафрлате зборовите. Што мислите дали ова поминува кај Google? Од лично мое искуство преку тестирања и истражувања не ви дава предност, туку само ќе обезбеди банирање на вашата веб страна или контраефект на она што сакате да го постигнете.

Принцип на работа на пребарувачите

За да навлеземе полека во процесот на SEO мора накратко да навлезам и во историјатот на принципот на работа на пребарувачите.

Раниот начин на работење на пребарувачите се базирал на неколку решенија. На пример Yahoo имале креирано систем кој предвидувал да сопственикот на веб страната специфицира категорија на страна и клучни зборови кои се однесувале на таа страна. Откако на таков начин веб страната ќе се испратела до Yahoo, луѓе специјалисти вработени во Yahoo нарчени како онтологисти ја проверувале релевантноста на она што е доставено. Но, овој метод едноставно давал многу непрецизни резултати иако барал Yahoo да вработи многу луѓе кои збор по збор, јазик по јазик ќе ги проверуваат доставените веб страни и ќе вршат рангирање на истите.

Некои други пребарувачи во тоа време ги класифицирале веб страните врз основа на временски период што еден посетител се задржувал на таа страна. Но, набргу со појава на интернет прелистувачи со повеќе јазичиња за преглед на страни овој метод бил нефункционален. Тоа значи дека доколку некој отвори повеќе јазичиња може да заборави да исклучи некои од претходно, а истите добивале поени врз основа на тоа време.

За разлика од останатите пребарувачи основачите на Google, Larry Page и Sergey Brin сметале дека репутацијата на една стран е најдобра мерка за рангирање на истите, но наместо да користат време кое еден посетител се задржувал на една веб страна, го искористиле методот кој се користел од научниците за да се рангира еден научен труд како повреден од другиот. Тоа е вкупен број на цитати или во овој случај вкупен број на линкови кон една веб страна.

Но овој процес тие во голем дел го подобриле и затоа не е толку едноставен како што изгледа. На пример, секој линк (цитат) нема еднаква важност.  Да земеме еден пример, секако дека цитат во една книга објавена од Harvard Business School нема да има иста вредност со цитат во еден учебник кај нас. Не дека се потценува знаењето на авторот тука, но едноставно името, репутацијата, вложените средства во научно истражувачка работа, награди и признанија го прават HBS да биде повлијателен кога се мерат цитатите кон еден научно истражувачки труд. Оваа паралела ја извеле на тој начин што линкови од веб страни кои се цитирани повеќе имаат поголема вредност за Google.

На оваа основа се додадени дополнителни елементи во вид на клучни зборови, растојание помеѓу зборови кога има повеќе од еден збор… Можете да забележите дека овој метод претставува сложена математичка операција. Можеби за повеќето од вас во оваа фаза сеуште е неразбирливо, но во останатите постови од овој серијал ќе се обидам да ги опфатам сите важни елементи во овој процес. Но, она што може да се забележи е следново:

  • Пребарувачите препознаваат зборови,
  • Пребарувачите ја скенираат содржината,
  • Пребарувачите класифицираат согласно релевантност која се мери во Page Rank (од 0-слаба релевантност до 10-највисока релевантност)
  • Пребарувачите сакаат да им овозможите едноставен пристап до веб страната за да ги изведат претходно наведените функции.

Продолжете со следниве написи:

post

SEO – Оптимизација за пребарувачи – Маркетинг средство 60

Стигнавме можеби до најважното маркетинг средство за малите бизниси особено кога станува збор за онлајн маркетинг средства. Тоа е оптимизација за пребарувачи или попопуларно кратенката SEO. Ова маркетинг средство ќе се обидам да го разработам на претприемач малку поинаку од другите поради фактот што ќе биде премногу долго за да го сместам во еден пост. Затоа и излегувам од распоредот секој вторник да биде резервиран за маркетинг средство и во овој случај ова ќе биде серијал од неколку написи за SEO.

Досега неколку пати пишував за оваа маркетинг средство и тоа особено за некои мои анализи и резултати од тестирања на еден реален веб сајт. Тие тестирања и натаму продолжуваат и базата на податоци се полни со навистина квалитетни информации кои едноставно ми овозможуваат одредена математичка релација помеѓу она што произлегува како резултат. Некои од сознанијата ги напишав во Како на прво место на Google за неколку минути. Она што можам сега да го претставам е дека навистина тој наслов кој го претставив во тој пост е најчитан во последниве месеци гледано на месечно ниво.

Кога сум веќе тука би сакал и да ги презентирам резултатите од примена на тие принципи наведени во тој напис за број на посетители добиени од органско пребарување на Google.

Ова е споредбен график за два периоди: првиот од 01.02.2010 до 31.03.2010 и вториот од 01.04.2010 до 31.05.2010. Овој период го избрав затоа што ги користев тие препораки кои ги наведов во гореспоменатиот пост. Она што може да се забележи е дека благо започнува да се зголемува број на посетите кои што доаѓаат од пребарување на Google. Заради подобра претстава подолу се и графиците кои се однесуваат на поединечен период за точно да се види бројот на посети и секако број на клучни зборови кои донеле посета.

Ова е график кој се однесува на периодот Февруари-Март, период кога започнувам да обрнувам внимание на клучни зборови, структура на текстот, линкови итн. Можете да забележите дека веќе при крајот на март започнува веќе да се зголемува бројот на посетители кои доаѓаат преку пребарување и секако во тој период оваа веб страна имала 1821 посетители преку 867 клучни зборови. Да видиме сега како е во следниот период:

Во следниот период веќе има над 1000 посетители повеќе и тоа преку 1505 клучни зборови. Ова значи дека и фондот на зборови за кои оваа веб страна е забележана од пребарувачот е зголемен за скоро двојно. Ова не се некои огромни резултати за кратко време, сепак на оваа веб страна се работи скоро една година. Но, сепак може да се заклучи дека претставуваат стратешка инвестиција кога станува збор за онлајн маркетинг средства.

Зошто серијал од постови за SEO?

Се одлучив на еден ваков чекор поради фактот што сметам дека проблематикава сеуште е слабо разработена кај нас, дури и претставув непознаница. Така да може да забележите понуди од веб дизајнери кои нудат ваква услуга, а она што го навеле не е ни С од SEO. Од друга страна последниве две години инвестирав многу време и пари во истражување на оваа проблематика и она што е најважно тестирав различни стратегии, тактики, алатки… Од сите тие тестирања произлегоа различни заклучоци и сознанија. Тестирањето не го вршев на претприемач туку на една друга веб страна (Entrepreneurship in a box) која е на англиски со цел да дојдам до сознанија кои ќе им помогнат на македонските компании – извозници да бидат видливи кај пребарувачите. Како еден пример кој го обработив на претприемач можете да прочитате во следниве написи:

Што ќе биде опфатено во овој серијал за SEO?

  • Што претставува SEO? Потребно е јасно разграничување на тоа што претставува оптимизација за пребарувачи. Тука лежи и најголемата грешка која може да се направи сите други активности да бидат бесцелни. Ова ќе биде еден посебен напис во кој ќе разграничиме што претставува SEO, а што не претставува SEO.
  • Основни столбови на SEO. Во овој дел од овој серијал ќе навлезам во трите најосновни столба на оваа оптимизација: Клучни зборови, Фактори на самата веб страна (On-Page) и фактори кои не се на самата веб страна (Off-Page).
  • Блогирање како дел од SEO стратегија. Моќта на содржината и блогот како едно средство за производство на содржината има големо влијание на оптимизација на пребарувачи. Затоа како надополнување на блогот како маркетинг средство ќе ја разгледаме и оваа дополнителна улога.
  • Дали размена на линкови вреди? Оваа прашање го анализирам повеќе време и веќе во последниот месец дојдов до квалитетен одговор. Се вклучив активно во примена на овие стратегии за да видам како влијаат, но се случи нешто за што подетално ќе опишам во постот кога ќе дојде ред.
  • Користење на алатки. Како последен наслов ќе биде користење на одредени алатки во еден ваков процес.

Продолжете со следниве написи:

post

Електронски саем – Маркетинг средство 59

еСаем - маркетинг средство

еСаем - Светот на дланка

Ќе продолжиме со 59-тото маркетинг средство на ретприемач или 9-то од групата на онлајн маркетинг средства. Веќе како 32-ро маркетинг средство од офлајн групата го поминавме саемот. Во тој напис, Саем – Маркетинг средство 32 го дефиниравме саемот како:

Саемите едноставно претставуваат изложбени простори на кои еден претприемач може да ги изложи и претстави своите производи и услуги пред потенцијалните потрошувачи.

Давателот на саемската услуга (изнајмувачот на просторот) се грижи за сите маркетинг активности за тој саем на кој ќе се изложува. Вообичаено на еден саем се изложуваат група на производи или услуги од една индустрија.

Значи доколку офлајн саемот претставува изложбен простор за изложување на производи и/или услуги пред потенцијални потрошувачи со единствена цел да се доближат производите и/или услугите до тие потенцијални потрошувачи и да се поттикне адекватна комуникација, електронски саем е истото тоа само наместо во физичка просторија тие производи и/или услуги се изложени во виртуелна просторија на интернетот.

За еден ваков виртуелен или онлајн или електронски саем пишував во еСаем за бизниси – МакЕкспо – Виртелен бизнис саем. Во овој напис го напишав следново:

MakExpo е интернет портал кој претставува виртуелен бизнис саем за бизниси од сите големини. Порталот е изграден врз една основна намена – можност за виртуелно учество на саем на сите компании во Македонија! Од оваа појдовна точка, развиена е платформа во која било која компанија од Македонија (или од странство!) ќе може да „закупи“ виртуелен простор на еСаемот и да се рекламираат себеси или своите производи!

Предности на електронски саеми

Сметам дека ова маркетинг средство има огромен потенцијал за секој бизнис, но тука би ги изложил неколкуте најголеми предности во однос на офлајн саемите:

  • Многу пониски трошоци за изложување на електронски саем. Во старт нема трошоци за транспорт, сместување, високи закупнини…
  • Достапноста на производите и или/услугите на една глобална интернет мрежа. Во Блог како маркетинг средство веќе споменав за една статистика која вели дека во 2009 година има 26,6% интернет корисници од глобалната популација на светот.
  • Лесно пронаоѓање на еден бизнис од страна на потенцијални клиенти преку една структурирана база на податоци во вид на индустрии, дејности…
  • Едноставност во изложување на сопствени производи и/или услуги.

Недостатоци на електронски саеми

Иако има големи предности сепак не можеме да не бидеме свесни и за одредени недостатоци на еден ваков вид на маркетинг средство:

  • Немање на можност потенцијалниот купувач да го види со сопствени очи и да го опипа со раце производот.
  • Сметам и дека недостасува онаа лице во лице комуникација која понекогаш може да влее доверба и сигурност за вистинската одлука на потенцијалниот купувач.
  • Немање на можност да се демонстрира во живо производот и/или услугата.

Моја препорака е да се обидете со едно вакво маркетинг средство. Сепак нема да изгубите многу и доколку не успеете. Но, во секој случај ќе бидете збогатени со едно ново маркетинг искуство и секако ќе се обидете да опфатите еден многу поширок и поголем пазар од локалниот.

post

Подобар Маркетинг План – 5 Прашања и една табела

Маркетинг план - Мој патоказ

Маркетинг план - Мој патоказ

Се најдов себеси повеќепати заглавен во формализација на еден маркетинг план што ми се чинеше како една вечност. Пишување на еден маркетинг плaн според мое искуство не претставува прекрасен документ кој изобилува со графици и дијаграми, туку едноставно еден патоказ кој ќе ве води во исполнување на поставените маркетинг цели. Повеќе за ова во еден процес на бизнис планирање пишував во Опасности во стилот планирај го твојот бизнис план. Добар маркетинг план е базиран на севкупните бизнис цели кои се трансформирани во една маркетинг стратегија а не на наслови и приказни во тие наслови.

Заради поедноставување и нормално подобрување на квалитетот на еден маркетинг план би извлекол процес кој е составен во одговарање на 5 прашања и изработка на една табела.

1. Кој е Вашиот целен пазар?

Започнете со барање на специфичностите во подрачјата каде што сакате да биде присутен Вашиот бизнис. Секој пазар е составен од повеќе подрачја, односно може да биде разделен во сегменти. Кога зборувам за подрачја не мислам за подрачја како геометриски површини, туку подрачја во вид на индикатори кои го разликувaат еден дел од пазарот од другиот. И да, прашањето е: Кој е Вашиот целен пазар?

  • Мојот целен пазар е подрачје каде што постои проблем кој што мојот бизнис може да го реши.
  • Мојот целен пазар е подрачје со потенцијални купувачи кои ќе сакаат да ги купуваат моите производи и/или услуги.
  • Мојот целен пазар е подрачје со луѓе кои се спремни да платат за моите производи и/или услуги.
  • Мојот целен пазар е подрачје доволно големо до го поддржи постоењето и развојот на мојот бизнис.

Ова се 4 одговори кои мора дa бидат дадени пред да го изберете Вашиот целен пазар. Забележувате дека тука станува збор за 5 елементи:

  • Проблем
  • Желба
  • Спремност
  • Капацитет и секако можеби најважното нешто
  • Да јас и мојот бизнис можеме.

Ова значи дека целниот пазар мора да има проблем доволно голем да постои желба за решение кое нашиот бизнис може да го понуди за цена која пазарот е спремен да ја плати и со доволно голем капацитет да ги поддржи нашите планови за раст на бизнисот.

2. Кои се твоите маркетинг цели?

Сега кога знаеме кој е нашиот целен пазар, ќе мораме да ги формулираме целите на нашиот маркетинг. Што сакаме да постигнеме со нашите маркетинг активности? Овој дел претставува специфични 3 до 4 реченици со кои ќе опишеме што сакаме да постигнеме. Забележувам дека често имаме потреба да дефинираме повеќе цели. Тоа е голема грешка. Ако поставите премногу цели, ќе го загубите фокусот и ќе биде многу потешко постигнувањето на тие цели.

Поставете мерливи цели бидејќи имплементацијата ќе зависи од Вашата способност да го следите прогресот и да ги мерите резултатите. Доколку Вашите цели се генерални без опипливи елементи, обидете се да најдете начин да ги направите поспецифични. На пример:

  • 30% учество на целниот пазар во првата година на плaнот и 45% во втората година.
  • Зголемување на стaпката на конверзија од 5% на 10% во првата година и на 15% во втората година.
  • Зголемен влез во продажната инка за 10% во првата година и 20% во втората година.

Со вакви цели вие ќе имате конкретни бројки кои ќе треба да ги исполните и лесно можете да тргнете од тие бројки наназад за да дојдете до определени активности. На крајот, имате мерливи индикатори за тоа да утврдите дали тоа нешто е остварено или не и доколку не е остварено да барате одговори зошто не е остварено кои ќе ги имплементирате во наредниот процес на планирање на маркетинг активности.

3. Кои ќе бидат Вашите маркетинг стратегии?

Сега кога го знаеме целниот пазар, ги знаеме целите, време е да ги развиеме стратегиите кои ќе го поддржат исполнувањето на тие цели како дел од нашиот маркетинг план.

Стратегија претставува план на акции за остварување на група цели кои нашиот бизнис ги има поставено, а во овој случај тоа се маркетинг цели. Ќе мора да одговорите на следниве прашања:

  • Како ќе ги оствариме поставените маркетинг цели?
  • Што ќе треба да превземеме во генерални термини за да тие цели постанат реалност?

На пример, доколку ја земеме првата маркетинг цел ќе имаме нешто слично како следново:

  • 30% учество на пазарот
    • Стратегија 1: Подобрување на перцепцијата
    • Стратегија 2: Зајакнување на маркетинг кампањи
    • Стратегија 3: Додавање на поголема вредност во понудата.

4. Кои маркетинг тактики ќе ги користиме?

Стратегиите имаат потреба од тактики заради процесот на имплементацијата. Тактиките ќе претставуват група на акции кои ќе треба да се спроведат заради ефективна имплементација на стратегиите. На пример, доколку продолжиме со стратегијата 1 ќе имаме:

  • Стратегија 1: Подобрување на перцепција
    • Тактика 1: Зголемување на онлајн присутноста на бизнисот.
    • Тактика 2: Развој и имплементација на нова политика за услужување на потрошувачи.
    • Тактика 3: Тренирање на вработените за системот за водење на грижа за корисниците.

5. Кои ќе бидат маркетинг активностите?

Секоја тактика се имплементира преку вистинска акција, или активности од страна на персоналот на бизнисот. Сега кога Вашиот маркетинг план веќе го има дефинирано целниот пазар, целите, стратегиите и тактиките време е да се конвертираат тие тактики во опипливи активности. На пример доколку продолжиме со првата тактика ќе имаме:

  • Тактика 1: Зголемување на онлајн присутноста на бизнисот
    • Редизајн на веб страната
    • Изработка на бизнис блог
    • Отворање на бизнис профили на социјални медиуми
    • Комуникација со потенцијални клиенти
    • …

Последната работа – Табела

Табела за маркетинг план

Доколку сакате да останете фокусирани на имплементацијата на овој маркетинг план, табелата како оваа е нешто што ќе ви помогне.

post

Електронски Огласник – Маркетинг Средство 58

Електронски огласник

Електронски огласник

Како 9-то маркетинг средство на претприемач ги претставувме бесплатните мали огласи. Денес во делот на онлајн маркетинг средства како 58-мо средство на претприемач би сакал да ги опфатам електронските огласи.

Неколку видови на електронски огласници

Постојат многу веб страни кои функционират во вид на огласници каде можете да го поставите Вашиот оглас за Вашиот бизнис. Тие електорнски огласници може да бидат:

  • бесплатни или платежни
  • општи или специјализирани

Бесплатните електронски огласници ви даваат можност да отворите акаунт и да го поставите Вашиот оглас на таа веб страна. Платежните функционираат на ист начин со таа разлика што плаќате одреден надоместок за истата или пак надополнета услугата. За иста доколку е попопуларен огласникот или пак можеби заради поголем временски период на достапноста на огласот или пак сместување на некое поатрактивно и повидливо место на веб страната.

Општите огласници се оние кои се однесуваат на сите видови на огласи, односно сите видови на производи и/или услуги при што истите се поделени согласно различни категории. Специјализирани огласници се оние кои се однесуваат за специјализирана категорија на производи и/или услуги. На пример, електронски огласници индустрија за храна, електронски огласници за автомобилска индустрија…

Што треба да содржи еден таков оглас?

Во бесплатни мали огласи наведов дека треба да биде содржно следново:

  • Наслов на огласот. Ова треба да биде бомбастично, нешто што ќе ги натера луѓето да читаат понатаму.
  • Текст на огласот кој исто така треба да биде примамлив.
  • Контакт (телефон, факс, е-mail, веб страна).
  • Неодолива понуда која треба да предизвика моментална акција за контактирање на Вашиот бизнис.

Кога станува збор за електронските огласници овие елементи остануваат исти, само треба да се размисли за дополнителни работи поради тоа што постои разлика од пристапноста на електронскиот огласник во однос на печатените огласници. Така да тука би ги надополнил следниве елементи:

  • Клучни зборови. Ние зборуваме за електронски огласници кои некој ќе ги пребарува на една таква веб страна или пак преку некој интернет пребарувач. Секој давател на вакви услуги би требало да ја има оваа опција.
  • Ознаки. Освен категории потребни се и ознаки кои означуваат одредени подкатегории или даваат допрецизирање на категоријата на огласот.
  • Категорија. Веќе напоменав дека општите огласници имаат воспоставен систем на категоризација на огласите согласно она што се нуди. Така да доколку постои една ваква опција изберете ја вистинската категорија за Вашиот оглас.

Процес на спроведување

Нема да должам многу туку само ќе се обидам да го систематизирам овој процес во неколку чекори кои Вие како претприемач ќе треба да ги спроведете при користење на ова маркетинг средство:

  • Анализа на постоечките електронски огласници.
  • Избор на најсоодветниот за Вашиот бизнис.
  • Изработка на огласот.
  • Поставување на огласот.
  • Тестирај, мери и подобрувај.

Последниот чекор е можеби нјважниот во целиот процес и едноставно значи постојано да следите каква ефективноста и ефикасноста на огласот.

post

Форум – Маркетинг Средство 57

Caixa Forum Stairs
Image by felipe_gabaldon via Flickr

Ќе продолжам оваа недела со 57-то маркетинг средство на претприемач – форум. Не сум некој преголем љубител на форуми, но морам да бидам реален дека кога станува збор за онлајн маркетинг средства има потенцијал за одлично искористување во бизнис цели. Кога станува збор за форум интерeсно е што ова маркетинг средство може да има повеќенаменско користење. Тоа не значи дека за да го користите ќе мора да имате свој форум.

Што е форум?

Интернет форум едноставно претставува платформа преку која се разменуваат различни пораки или дискусии помеѓу членовите на форумот. Тој е место каде се поставуваат прашања за одредена проблематика и се очекува дека некој од заедницата (членови) ќе знае некои одговори, има искуство со предметното прашање и ќе ги сподели своите знаења.

Луѓето партиципираат во различни форуми со цел да споделуваат различни теми од интерес. На пример, јас лично членувам во неколку форуми, поточно три. Едниот ми е платежен и плаќам месечна членарина додека останатите два ми се бесплатни, но ограничени само на купувачи на нивни производи и/или услуги.

Како да го користите

Како што наведов на почетокот за разлика од она што досега го зборувавме за онлајн маркетинг средства како блогот и веб страната кои беа лични за Вашиот бизнис, форумите се доста поопширни во поглед на темата и содржината и во поглед на можностите за користење. Така да би извлекол два начини на користење на форум како едно маркетинг средство:

  1. Имање на сопствен форум и
  2. Активност на други форуми.

1. Имање на сопствен форум

Можеби како дел од тактиките на Вашата онлајн стратегија ќе ја имате и тактиката за сопствен форум. Тоа значи вие, или Вашиот бизнис да администрира форум за одреден бизнис или маркетиншка цел. Како некои можности за користење на форум би било техничка подршка, или пак споделување на искуства за користење на Вашиот производ и/или услуга.

Процесот на креирање на форум е едноставен како и блогот преку користење на специфичен софтвер кој потоа го персонализирате и администрирате. Треба да се напомене дека за форум е потребно да имате едно лице администратор кој би ги администрирал различните пораки од членови како би се избегнало објавување на несакани пораки реклами во стилот на вијагра, односно спамирање.

2. Активност на други форуми

Умешноста и креативноста на еден претприемач е да дојде до квалитетни информации, да ги трансформира тие информации во квлитетни акции за твојот бизнис и секако секоја комуникација да ја претвори во потенцијална бизнис зделка. Форумите имаат одлична можност за ова, потребно е само да се најдете на вистинското место (форум) и да започнете со конверзација.

Би издвоил неколку покарактеристични можности за користење на форумот:

  1. Проучување на пазарот. Преку форуми можете да дојдете до она што претставува болка (проблем) на еден потенцијален купувач. Можете и да ги откриете различните однесувања на различните потенцијални купувачи…
  2. Промоција на производи и/или услуги. Во специфични ситуации можете да го искористите и за да го испромовирате Вашиот производ или пак услуга. Но, не спамирајте, користете го ова само доколку некој побара одговор во кој може да биде содржан и Вашиот производ и/или услуга.
  3. Градење на експертиза. Помагајќи им на луѓето кои имаат некаков проблем или пак бараат одговори едноставно ќе ја зголемува Вашата експертиза како претприемач, а со тоа и видливоста и препознатливоста на Вашиот бизнис.
  4. Сообраќај кон Вашата веб страна. Доколку креирате вредност и споделувате навистина квалитетни совети и ресурси секој ќе сака да види нешто повеќе за Вас преку Вашата профил страна каде ќе го има и линкот до Вашата веб страна или пак блог. Понекогаш ќе можете да споделите и линк до Вашиот блог доколку одговорот на темата е даден таму. Сето ова ќе го зголеми сообраќајот кон Вашата онлајн присутност.

Процес на имплементација

Форумот е доста социјализирана технологија преку која повеќе индивидуалци комуницираат и споделуваат разни теми од интерес. Затоа како најадекватен пристап би го искористил пристапот опишан во написот Бизнисот е една обична игра. Ова знчи дека првин ќе треба да ги научите правилата на играта на играта. Така да како специфични чекори би ги издвоил следниве:

  1. Анализирај ги форумите во твојата индустрија.
  2. Избери неколку влијателни.
  3. Следи ја играта која ја играат другите членови и учи.
  4. Приклучи се во заедницата преку конверзација и споделување и размена на искуства.
  5. Помагај им на другите членови.
post

Маркетинг во Ерата на Google – Книга

Маркетинг во ерата на Google

Маркетинг во ерата на Google

Пред некој ден ми стигна книгата која ја нарачав во вид на пред нарачка и која ја споменав во написот Дали онлајн стратегија претставува бизнис стратегија. Сеуште не стигнав да ја прочитам, но ја разлистав на брзина за да видам дали вреди за дадените пари. Досега вообичаено купував книги за кои имаше можност да ја погледнам содржината и секако имаше различни прегледи од страна на оние кои ја имаат купено и прочитано, онака како што го опишав процесот во Што може да се научи од Amazon за бизнис. Но, овој пат беше поинаку, добив e-mail од amazon дека набргу ќе излезе во продажба оваа книга и доколку сум заинтересиран по специјална цена да ја купам да ја нарачам веднаш. Затоа и немаше можност да ја видам содржината ниту да има некој претходен читател кој ќе напише нешто за книгата.

Во секој случај, не се разочарав од онаа колку што можев да го забележам во прелистувањето на книгата: Marketing in the Age of Google: Your Online Strategy IS Your Business Strategy (Маркетинг во ерата на Google: Вашата онлајн стратегија e Ваша бизнис стратегија). Многу работи опфатени во книгата ги знам без да ми каже некој и ги користам во остварување на бизнис цели уште пред 3 години. Но, досега немав потврден систематски приод од некој експерт, поранешен вработен во Google како Vanessa Fox во однос на споделените идеи и практики на користење на Google во бизнис цели.

Како што кажав веќе 3 години не го користам Google само како средство за пребарување на интернет, туку го користам и за анализа на пазарот, проценка на однесување на потрошувачите и секако за зголемување и поттикнување на креативноста. Токму, за тоа се однесува и оваа книга колку што можев да забележам од прелистувањето.

За да не должам многу, засега би ги претставил само главните наслови од книгата, а подетален преглед ќе напишам откога ќе ја прочитам целата детално. Следниве теми се обработени во книгaта:

  1. Како пребарувањето го промени Вашиот бизнис?
  2. Како да ги користите податоците од пребарувањето за да ја подобрите бизнис стратегијата и стратегијата за производи?
  3. Како пребаруваме?
  4. Градење на личноста на оној кој пребарува: Отворање на вратата на маса на потрошувачи кои досега ги спречувавте да влезат.
  5. Како функционираат пребарувачите?
  6. Имплементација на ефективна стратегија за пребарување?
  7. Работа со развивачите: Како да ја трансформирате бизнис стратегијата во еден технички говор?
  8. Како преку податоците да добиете мерки на акција за кои имате потреба?
  9. Социјални медиуми и пребарување
  10. Што понатаму: по Google и 10 сини линкови.

Интересни теми и практични работи.

post

Зошто сегментација на пазарот?

Сегментација на пазарот Не верував дека ќе налетам на некој кој погрешно ја толкува сегментацијата на пазарот, а на некој начин е вовлечен во процес на бизнис планирање, но од другата страна, не од страна на претприемачите. Но, добро и тоа се случува.

Еве ја приказната од еден претприемач кој ми е роднина.

Мал бизнис таргетира извозни компании. И нормално во процесот на бизнис планирање го интересира колкав е бројот на тие компании кои извезуваат. Тоа го прави во делот на сегментација на пазарот како што го опишав во насловот Анализа на пазарот и индустријата. Тука следуваат пити во вид на графици, се со цел да се види конкретниот број на извозници при што пазарот го сегментира на извозници и неизвозници и делот извозници претставува целен пазар.

Претприемачот не го интересира износот во долари на извозот на една компанија, во тој сегмент од пазарот. За него и оној кој имал извоз од 2000$ а сака да има 10000$ и оној кој има милионски суми е една бројка – број 1. Значи тој едноставно, го прави она што треба да го прави да ги собере во вид на бројка сите извозници за да види дали ќе има доволно критична маса на потенцијални купувачи за неговите производи и/или услуги. Програмерите користат наредба Count за една ваква „сложена операција“.

Податоци кои ги користи претприемачот се податоци за компании кои имале EXA1 декларација. За оние кои не се запознаени тоа е декларација која означува редовен извоз, со пополнета рубрика 24 од ЕЦД-то 11. Тоа пак 11 значи Конечно купување/продажба.

Е сега некој му вели на тој претприемач не е добра сегментацијата бидејќи не се гледа кој процент претставува извоз во вид на лон систем. Не ми е јасно како некој може да меша лон систем со редовен извоз кои што се сосема различни постапки и кои имаат сосема различни декларации. Едната ЕXA1 а лон или поточно кажано повторен извоз на привремено увезена стока заради облагородување со EXA3. И начинот на плаќање е различен (рубрика 24) каде се впишува 51 што значи трансакција после преработка.

Можеби причината е да се види структурата на извозниците. Но, зошто некој да го оптеретува бизнис планот доколку една таква информација не му е важна бидејќи се оди според принципот сите се еднакви.

Едно е важно: Сегментацијата на пазарот се прави за да се измери критичната маса на потенцијални потрошувачи, за да се спореди предвидување на продажба со таа критична маса, за да се мери учеството на бизнисот на пазарот и со тоа да се види колкав процент држат конкурентите…

А не се користи заради поубав график во вид на пита со проценти на различни имиња на потенцијални купувачи. Тоа подоцна самите ќе си го правите во вид на маркетинг или продажна стратегија.