post

4 Знаци дека потрошувачите мислат вие сте број еден

JV Партнерство како маркетинг средство

4 знаци дека потрошувачите мислат вие сте број еден

Постојат многу знаци кои мора да бидат следени од страна на претприемачите. Едни од нив се знаци кои ќе ти кажат дека твоите тековни потрошувачи се лојални на твојот бизнис, вашата компанија или вашиот бренд.

Понекогаш претприемачите се премногу концентрирани во донесување на нови потрошувачи воо бизниснот (во продажната инка). Нови потрошувачи се нешто што секој сопствени на бизнис го сака. Како и да е, без задржување на постоечки потрошувачи не може да се очекува раст на бизнисот иако ќе се внесуваат нови. Вашиот бизнис на ваков начин ќе остане на исто ниво и веројатно по извесен период ќе почне да страда поради недостаток на потрошувачи.

Да зборуваме малку за 4 можни знаци кои ќе ви кажат нешто за постоечките потрошувачи.

1. Доаѓаат и го повторуваат купувањето

Запрашајте се себеси со следниве прашања:

  • Колку од тековните потрошувачи не се враќаат и не го повторуваат купувањето?
  • Зошто не се враќаат и него повторуваат купувањето?

Одговорот на овие прашања ќе тиги даде можните места каде ќе можете да направите значајни подобрувања во вашиот бизнис.

На пример, доколку не се враќаат бидејќи квалитетот на производот не е во ред, подобрете го квалитетот. Доколку не се враќаат поради продавачот, сменете го или едуцирајте го продавачот.

Од друга страна доколку се враќаат и го повторуваат купувањето ќе знаете дека вашиот бизнис е на вистинскиот пат.

2. Го споделуваат нивното неверојатно искуство со вашиот бизнис

Втор знак кој ќе ви каже дека вашите потрошувачи се приврзани за вашиот бизнис е доколку тие го споделуваат нивното искуство со нивните блиски.

Мора да го следите нивното однесување по завршување на купопродажбата. Доколку се на социјалните медиуми, следете ги, и откријте што тие зборуваат за вас, вашиот бизнис или пак вашиот бренд.

Доколку не кажат ништо, веројатно нешто не е во ред, или пак не се импресионирани. Велам веројатно бидејќи не значи дека мора да биде нешто лошо. Како и да е, можете да се осигурате едноставно доколку ги прашате за нивното искуство со вашиот бизнис. Прашајте ги што сакаат, а што не сакаат. Помогнете им и тие ќе ви помогнат да го подобрите вашиот бизнис.

3. Ги донесуваат нивните блиски во вашата продажна локација

Овој знак не функционира за бизниси кои не се базирани на локација. Како и да е, доколку вашиот бизнис е ресторан, продавница на мало, сендвичара или пак нешто слично базирано на локација каде се остварува купувањето, овој знак ќе ти каже значајни работи за твоите потрошувачи.

4. Се чувствуваат како дома

Не сакам да купувам од продавници каде продавачот ме прави нервозен. Веројатно, никој не сака да купува некаде каде што не се чувствува пријатно.

Прашајте ги вашите купувачи за тоа како се чувствуваат кога се наоѓаат во вашиот бизнис. Прашајте ги што сакаат да биде имплементирано што ќе го подобри нивното искуство и чувства кога се наоѓаат во процесот на купување.

Одговорите ќе ви ги дадат можните елементи кои бараат подобрување.

 

post

Определување на цена – Уметност и наука

Определување на цени

Определување на цени

Ова е продолжување на вчерашниот пост кој се однесуваше на определување на цени. Определување на цената на производи и/или услуги со кои вашиот бизнис ќе ги продава на пазарот е многу важен процес за секој претприемач. Премногу ниски цени влијаат на профитабилноста, додека премногу високи цени може да доведат до зголемување на неможноста од продавање на тие производи.

Затоа определување на цени претставува истовремено уметност и наука. Бара креативност, бара аналитичност и бара снаодливост. Овој процес би бил најлесен доколку се одвива класично како во книгите (пресметување на сите трошоци и додавање на профитна маржа што беше опишано во претходниот пост). Тоа би била проста математика која освен собирање и додавање на проценти не би барала ништо друго. Но, сепак не е така.

За да навлеземе во сложеноста и важноста на процесот ќе започнам од елементите кои влијаат на цената на вашиот производ и/или услуга.

Што влијае на цената?

Цената е под многу влијателни фактори, но генерално истите би можеле да се групираат во следниве категории:

  • Трошочна структура. Колку ве чини производството на тие производи и/или услуги? Кои други трошоци ги прави вашиот бизнис, а не се директно поврзани со производство на производот и/или услугата?
  • Профитабилност. Колку сакате да заработите, односно да ви остане кога ќе ги покриете сите трошоци за производство и нормално функционирање на бизнисот?
  • Вредносна перцепција на потрошувачот. Каква е вредноста што потрошувачот смета дека ја добива со вашите производи и/или услуги? Дали тој може и сака да плати одредена сума и колкава е таа сума?
  • Конкуренција и нивните тактики. Каква е цената на конкуренцијата? Какви ценовни тактики тие користат? Каква е вредносната перцепција за нивните производи и/или услуги од страна на потрошувачите?

Шта би било кад би било? 😆

Пристапот на определување на цени би требало да започне со една ваква анализа која ќе даде одговор на прашањето: Што би се случило кога би се случило?

Да ги разгледаме опциите во една причинско последователна врска:

  • Tрошоци. Намалување на трошоци овозможува намалување на цената или зголемување на профитабилноста, а со тоа и поголем потенцијал за поголема продажба. Но, понекогаш слепото намалување на трошоци може да доведе до намалување на квалитетот на производот и/или услугата, а со тоа и до намалување на вредносната перцепција на потрошувачот. Од друга страна зголемување на трошоци влијаат на зголемување на цената или намалување на профитабилноста. Но тоа зголемување може да е резултат на подобрен квалитет на производот и/или услугата со што може да се зголеми вредносната перцепција на потрошувачите. Забележувате како различните комбинаторики постојат при едно вакво разгледување на трошочната структура на вашиот бизнис. Направете математика за сите комбинаторики и споредете ги една со друга.
  • Профитабилност. Тука станува збор за износот на профитот кој вие како претприемач го посакувате. Ако посакувате поголем профит во услови на иста трошочна структура ќе треба да ги зголемите цените со што ќе влијаете на и перцепцијата на потрошувачите. Доколку пак го намалите процентот на профитот со кој би се задоволиле ќе можете да ја намалите цената, што пак повторно ќе има влијание на перцепцијата можеби позитивно, но можеби и негативно.
  • Вредносна перцепција на потрошувачот. Зголемување на вредносна перцепција на потрошувачите во однос на вашите производи и/или услуги овозможува зголемување на цената на тие производи и/или услуги со што би се зголемила и профитабилноста, а тоа е и еден вид на конкурентска предност за вашиот бизнис. Од друга страна пак доколку се намали таа вредносна перцепција ќе мора да се намали и цената која ја наплаќате, што пак ја намалува и профитабилноста во услови на иста трошочна структура. Доколку сакате да остане истата профитабилност ќе мора да ги намалите трошоците.
  • Конкуренција. Конкуренцијата со своите тактики постојано ќе прави притисок врз сите претходни категории во вашиот бизнис. Доколку конкуренцијата воведе нов производ со висока вредносна перцепција кај потрошувачите ќе мора да одговорите или со подобар производ или со пониска цена што пак ќе бара намалување на трошоци или пак намалување на профитабилноста.

Забележувате дека сите категории се во една взаемна врска, и токму затоа определувањето на цената освен наука претставува и умешност на претприемачот и секако една уметност за која многу луѓе не можат да ја копираат. Некаде прочитав (не се сеќавам каде) дека Apple iPad има поставено висока профитна маржа (проценките се дека оди дури до 200$ од еден уред). Но високата вредносна перцепција која таа компанија успеа да ја наметне на пазарот им го овозможува тоа.

Затоа треба да запомните дека:

  • Цената не се определува само врз основа на трошоците и посакуваниот профит,
  • вредносната перцепција и конкуренцијата се подеднакво важни како и трошочната структура и посакуваниот профит.
  • Добра цена е комбинација на уметност, умешност и наука.
post

Определување на цена

Определување на цени

Определување на цени

Цената на производот и услугата е основа на секој бизнис. Секој бизнис нуди некој производ или услуга. Целта е тој производ или услуга да се продаде. Тој производ или услуга се продава за некоја цена. Од цената директно зависи приходот, а од приходот и профитаблиноста. Секој бизнис е основан од претприемач со цел да биде профитабилен. Така да, цената може да обезбеди соодветен профит и равој на бизнисот, но со погрешна цена може да дојде  до работење со загуба. А, загубата претприемачот не ја сака и не е пожелна за успешните претприемачи.

Што претставува определување на цени?

Наједноставно кажано, определување на цени претставува определување на продажна цена за производот и/или услугата. Со процес на определување на цени Вие како претприемач ги опредеувате малопродажните цени кои ќе ги понудите на пазарот, односно на Вашите потрошувачи. Тоа се цени кои Вашите потрошувачи ќе платат за производите и/или услугите што ќе ги земат од Вас. Тоа е монетарниот износ што некој треба да го даде за вашиот бизнис за да ја користи поволноста од вредноста која вие ја испорачувате.

Основни правила при определување на цените

Без разлика дали продавате производи или пак услуги, или пак некој тип на комбинација на производи и/или услуги, тие ќе влијаат на успешноста на Вашиот бизнис. Основни правила кои треба да ги спроведувате при определување на цените на производите или услугите се следниве:

  • Сите цени мора да ги опфатат сите трошоци и профитот кој го сакате.
  • Цените мора да бидат такви за да обезбедат сигурна продажба.
  • При намалување на цените мора да ги намалите и трошоците.
  • Постојано разгледувајте ги цените во поглед на трошоците, побарувачката на пазарот, конкуренцијата и профитот.

Што е она што влијае на цената?

Она што има влијание на цената и што најмалку треба да се земе во предвид при формирање на истата е следново:

  • Чинење на производот. Ова е колку чини производот кој сте го набавиле или набавна цена на производот. Или пак колку чини тој производ за да се произведе доколку се работи за производствен бизнис.
  • Трошоци на бизнисот. Доколку цената на Вашиот производ и/или услуга не ги опфаќаат трошоците, Вашиот готовински тек ќе биде негативен, ќе работите со загуба, нема да имате финансии за финансирање на развојот на бизнисот и најверојатно дека бизнисот ќе пропадне.
  • Профит. Профитот е она што ќе остане на крај за Вас. Дали има смисла да имате бизнис и да работите, а на крај ништо да не остане за Вас во вид на профит? Мора уште во оваа фаза да размислите и да го определите посакуваниот профит кој ќе се вклучи во цената.

На сликата се прикажани основните елементи кои влегуваат во цената.

Цена - од што е составена?

Цена - од што е составена?

Првиот елемент, чинење на производот и/или услугата е цената која Вас како претприемач ве чини тој производ или услуга. За малопродажба тоа е набавната цена на производот, за производство трошоци за израбока на производот, за услужен сектор тоа е цената за изработка на услугата.

Трошоците на бизнисот се најакрактеристични при определување на цената. Грешките во фазата на определување на цената може да бидат кобни како за Вас како претприемач така и за бизнисот во целина. Со испуштање на некој трошок ќе немате профит или пак во најлош случај ќе работите со загуба. Она што треба да го рагледате како трошок на бизнисот и да го вклучте во цената е:

  • Кирија за простории доколку плаќате,
  • Трошоци за одржување на простории на Вашиот бизнис
  • Враќање на кредити
  • Залихи
  • Плати
  • Режиски трошоци како струја, вода, телефон, комунални такси…
  • Оштетени производи
  • Производи со поминати рокови

Профитот се разгледува како фиксен трошок и се додава на збирот на чинење на производот и трошоците на бизнисот. Профитот зависи од Вас и од пазарот. Вие може да сакате профит од 1000 денари на едно парче, но пазарот не прифаќа толку голема цена. Што значи мора да го избалансирате профитот со пазарот.

Многу често некои бизниси не ја разграничуваат маржата во однос на профитот. Маржата претставува збир од трошоците на бизнисот и посакуваниот профит. Што значи дека маржата освен профитот мора да обезбеди и покривање на трошоци на бизнисот. Маржата најчесто се изразува како процент од цена на чинење или како бројка во единица валута. На пример, доколку цената на чинење е 1000 денари, продажната цена е 1500 денари маржата е 500 денари (бројка во единица валута) или 500/1000 = 50% (како процентуален израз).

Исто така една замка во која можат да навлезат претприемачите е од чиста математичка природа. Маржата се определува како процент од цена на чинење што не е ист процент од продажната цена (цена која вие ја давате). Ова е многу важно доколку давате попусти да знаете кој е максимумот. Од претходниот пример маржата е 50% и изнесува 500 денари, но 500 денари од продажната цена не се 50% туку 500/1500 = 33,33%. Доколку сакате да дадете 50% попуст вие навлегувате во загуба и од цената на чинење (750 денари попуст, 1500-750=750 денари ќе земете пари, а производот сте го набавиле за 1000 денари). Во примеров не навлеговме во трошоците на бизнисот што се дел од маржата, па така Вие ќе можете да дадете попуст многу помалку од 33,33% што во некои случаи може да биде 10% – 20% преку сила, во зависност од висината на трошоците на бизнисот. Затоа, намалувањето на цените ќе бара одредено проучување на трошоците, па и нивно намалување за да се овозможи намалувањето на цената. Еве како влијаат трошоците на цената и профитабилноста:

Компанија АКомпанија Б
Цена на чинење500 денари500 денари
Трошоци на бизнисот300 денари200 денари
Посакуван профит100 денари100 денари
Продажна цена900 денари800 денари

Забележуваме дека компанијата Б има разлика само во трошоците на бизнисот од 100 денари по парче на производ. Тоа е за 30% помали трошоци од компанија А. Со тоа може да го продава поевтино за 100 денари од компанијата А. Но, ако одлучи да го продава производот исто како компанијата А за 900 денари ќе има профит од 200 денари што е за 100% поголем од профитот на компанијата А. Значи со намалување на трошоци за 30% го зголемува профитот за 100%. Оваа е вистинската стратегија за компанија Б и со поголем профит ќе го финансира развојот и растот на бизнисот и секогаш ќе има конкурентска предност.

post

Бизнисот и демографските движења

Демографски движења

Демографски движења

Демографските движења се важни за секаков тип на бизнис. Постојат многу бизниси кои биле успешни, но со текот на времето не ги следеле демографските промени и пропаднале. Постојат многу бизниси кои не успеваат затоа што во маркетинг планот не опфатиле истражување на демографските карактеристики на пазарот, па затоа нивниот производ и/или услуга остварил неуспех на тој целен пазар. Демографските карактеристики на пазарот на кој претприемачот сака да ги продава своите производи и/или услуги се многу значајни за успешноста на бизнисот. Сигурно дека на пазар на кој преовладува население со поголема старост нема да можете да продавате компјутери и софтвери или пак видео игри (иако денес се е можно). Овие производи можете да ги продавате на пазар на кој преовладува помладо население.

Демографски промени

Демографски промени претставуваат лесно видливи надворешни обележја, кои имаат големо влијание на економијата, политиката, културата, односно на сите сегменти на општеството.

Тоа се промени во населението, неговиот обем, старосната структура, составот, вработеноста, образовниот статус, способноста, мобилноста (во однос на движење и патување) и приходи. Демографските трендови ги опишуваат промените на овие елементи во текот на одреден временски период.

Демографските промени се покажале како брзи, сложени, дури брутални (поради нарушената демографска структура на населението се случиле неколку воени судири) и многу влијателни фактори.

Зошто демографските промени се важни?

Непромислено би било да се занемарат демографските промени во дваесет и првиот век. Основна претпоставка и за денешното време е дека населението во светот е нестабилно и подложно на промени. И секогаш ќе биде подложно на тие промени. Промените се постојани и луѓето постојано се менуваат од секунда во секунда.

Еден од поголемите проблеми во светот во овој век ќе биде, од една страна стареењето на населението во развиениот свет, а од друга страна зголемувањето на бројот на населението во неразвиените земји. Статичните популации кои долго време остануваат на едно место, се попрво исклучок отколку правило.

Промена на демографската структура овозможува високопродуктивна иновативна можност. Успешните претприемачи својата идеја ја базирале на предвидување на демографските промени во иднината. Многу големи компании денес се резултат на успешното предвидување на демографските трендови на претприемачот.

Демографските промени имаат големо влијание на тоа што ќе биде купувано во иднина, од кого и во колкави количини.

Тинајџерите купуват поради мода а не поради трајност. Но, нивните средства се ограничени. Истите тие луѓе, десет години подоцна, ќе купуваат прво поради удобност и трајност, а дури потоа поради мода. Луѓето во првите пензиски години го чинат главно пазарот за патување и одмор. Десет години подоцна, тие исти луѓе ќе бидат клиенти на старечки домови и ќе бидат корисници на медицинската нега.

Луѓето кои во помлади години се стекнале со широко образование, по 10-20 години ќе станат кандидати за разни специјализации и стручни усовршувања. Тие луѓе се заинтересирани за вработување како работници со знаење. Дури и без конкуренцијата од земјите со ниски плати и големиот пораст на бројот на млади луѓе, индустриските развиени земји од Запад и Јапонија, би морале да пристапат кон автоматизација на производството, бидејќи имаат високо школуван кадар. Демографските промени покажуваат дека комбинираните ефекти на наглиот пад на наталитетот и експанзија на образованието, создава состојбата во која традиционалното вработување на рачни производни работници во развиените земји, би можело да биде на пониско ниво во однос на претходениот број.

Затоа потребно е во Вашиот маркетинг и бизнис план да ги вклучите анализите за демографските трендови. Направете сегменти на пазарот во однос на староста, наведете ги карактеристиките на сите тие сегменти, пронајдете го сегментот каде можете да бидете најуспешни и нападнете. Тоа ќе ви овозможи сигурен успех.

post

Конкурентска предност – Дали е доволно силна?

Конкурентска предност

Конкурентска предност

Конкурентската предност мора да биде нешто одржливо, нешто кое ќе ви овозможи опстојување подолг временски период. Конкурентската предност мора да биде препознатлива на дело, а не на хартија во вашиот маркетинг план.

Можеби мислите дека вашата конкурентска предност е што продавате по намалени цени. Но, ова не е конкурентска предност доколку претставува привремено решение за привлекување на нови купувачи бидејќи вашиот бизнис нема потенцијал долгорочно да издржи со таквите цени. Но, доколку имате некоја иновација во производствениот процес и соодветно управување со трошоците и на таков начин обезбедите пониски трошоци од конкуренцијата, а со тоа и пониска продажна цена на вашите производи и/или услуги, тоа ќе претставува конкурентска предност за вашиот бизнис.

Стратегија, тактики и акции

Вие како претприемач мора да имате стратегија која ќе обезбеди надминување на конкуренцијата и во исто време да имате тактики кои ќе обезбедат извршување на таа стратегија.

Во Стратегија – Најбрз начин да ги трансформирате вашите бизнис резултати наведов дека:

Стратегија претставува план на акции за остварување на поставените цели. За имплементација на една стратегија потребно е да имаме повеќе тактики. На пример, доколку нашата стратегија е да изградиме бизнис со долгорочни односи со своите потрошувачи, тактиките со кои можеме да ја имплементираме таа стратегија може да бидат давање на дополнителни услуги за редовните потрошувачи, тренинг, долгорочни договори со поинкави цени итн. Секоја тактика се исполнува со активности кои имаат одредени датуми на остварување, одговорни лица за остварување на тие активности и потребни финансиски средства за остварување.

Значи мора да подготвите стратегија за остварување на конкурентска предност како и тактики кои ќе ги користите заради тоа и сите потребни акции кои ќе треба да ги превземет.

На пример, секој бизнис продава некаков вид на вредност за своите потрошувачи.  Вие ќе мора да откриете како таа вредност ќе биде подобра од конкурентската и како ќе ја дистрибуирате таа вредност на подобар начин од вашата конкуренција. Тоа ќе биде вашата конкурентска предност. Можеби вашите тактики ќе бидат:

  • обезбедување пониска цена на вредноста
  • обезбедување побрза испорака
  • обезбедување подобар квалитет
  • обезбедување подобра услуга…

За секоја тактика мора да дефинирате и да делегирате активности преку кои ќе се спроведат тие тактики во пракса, а преку нив ќе се дојде до извршување на таа стратегија. На пример, ако ја земеме тактиката за обезбедување на побрза испорака би можеле да бидат:

  • анализа на процесот на производство,
  • анализа на синџирот на набавки,
  • анализа на дистрибуциските канали,
  • откривање на сите времиња кои не додаваат вредност,
  • елиминирање на сите времиња кои не додаваат вредност…

Ова е само еден пример, секако практично листата ќе биде многу подолга и посеопфатна.

Следење на конкуренцијата

Кога станува збор за градење на конкурентска предност не можеме а да не ја земеме во предвид и конкуренцијата која всушност ќе ни претставува репер во градење на една таква предност. Забележавте погоре кога зборувавме за тактики користевме изрази како обезбедување пониска, побрза, подобра…

Претприемачите секогаш со едно око гледаат кон конкуренцијата. Најпрво мора да се направи истражување на конкуренцијата. Следниве прашања треба да се одговорат:

  • Кои се клучните конкуренти?
  • Каква е вредноста која ја нудат?
  • Како се однесуваат?
  • Што прават?
  • Како го прават тоа што го прават?
  • Како е прифатена нивната понуда на вредност од страна на купувачите?
  • Има ли некои недостатоци во нивната понуда на вредност?
  • Можете ли вие да ги надополните тие недостатоци?
  • Каква е споредбата меѓу нас и нив?

Ова ќе ти помогне да откриеш дали твоите конкурентски предности се доволно силни за да ја надминат конкуренцијата и да обезбедат профит за твојот бизнис.

Кога станува збор за конкуренцијата, мора да се има во предвид дека на твојата стратегија тие ќе одговорат со нивна нова стратегија, тактики и активности за да започнат со намалување на твојата конкурентска предност. Затоа едното око на претприемачот му е секогаш свртено кон конкуренцијата што ќе бара и постојано прилагодување на стратегиите, тактиките и активностите кои ги користите за обезбедување на конкурентска предност.

Па, дали вашата конкурентска предност е доволно силна? Ќе знаете кога ќе извршите анализа. Дали имате стратегија за остварување на конкурентска предност? Сега малку го разјаснивме процесот, останува на вас да примените.

post

Google Places – Маркетинг средство 95

Google Places - Маркетинг средство

Google Places - Маркетинг средство

Стигнавме до 95-то маркетинг средство на претприемач – Google Places. Ова е многу важно маркетинг средство, особено за бизнисите кои функционираат врз основа на локација.

Што е Google Places

Google Places претставува бесплатен сервис на Google кој порано се нарекуваше Local Business Center. Преку овој сервис ви се овозможува да креирате страна за ваш бизнис која во основа ја има географската локација на бизнисот.

Замислете некој кој бара некаква локација преку Google Maps или пак се наоѓа некаде и проверува преку мобилниот телефон да види во кој ресторан да јаде или што се наоѓа во негова близина, а би му помогнало да задоволи некоја сопствена потреба и во тој момент се појави локацијата на Вашиот бизнис со слики, со адреса, контакт телефон, веб сајт, моменталните промоции, како и рангирање и препорака од претходни купувачи (посетители) на Вашиот бизнис.

Особено е важна и денешната можност преку апликацијата Google Places за мобилни телефони да еден потенцијален купувач може да најде било што, што го интересира во околината на локацијата на која се наоѓа во моментот и во исто време да го искаже сопственото искуство со бизнисот кој го нашол и пробал. (Забелешка: Сликите подолу се од апликација за iPhone која во iTunes за Македонија сеуште не е достапна.)

Google Places iPhone апликација

Google Places iPhone апликација

Поволности за вашиот бизнис

Ова е од непроценливо значење за Вашиот бизнис. Но, освен овозможување полесно да биде пронајдена локацијата на Вашиот бизнис Google Places ги овозможува и следниве поволности:

  • Подобро рангирање кога Google ги прикажува локалните резултати од пребарување.
  • Пристап до статистички податоци во однос на локацијата на Вашиот бизнис како што се колку пати е видено местото како и интеракцијата со местото.
  • Можност за прилагодување на страната со дополнителни слики и видео од YouTube.
  • Можност за поставување на промотивни и попустни купони директно преку страната на Places.

Поставување на Вашиот бизнис на Google Places

Овој процес е едноставен и може да се изведе во неколку чекори:

Чекор 1: Влезете во сервисот со помош на вашиот Google Account

Одете на страната на Google Places каде ќе ви биде побарано да се поврзете со вашиот Google Account или пак доколку немате да креирате нов.

Google Places - Чекор 1

Google Places - Чекор 1

Чекор 2: Додавање на вашиот бизнис

Откако успешно ќе се поврзете ќе треба да го додадете Вашиот бизнис. Кога го пишувам овој пост системот прво прашува да внесете телефонски број на бизнисот за да провери дали бизнисот е веќе додаден на сервисот.

Google Places - Чекор 2: Проверка дали бизнисот веќе е внесен

Google Places - Чекор 2: Проверка дали бизнисот веќе е внесен

Откако системот ќе провери што има за тој телефонски број ќе покаже листа на бизниси поврзани со него. Доколку го нема ќе треба да кликнете на копчето Додај по што ќе се отвори страната каде ќе треба да ги внесете податоците за бизнисот.

Google Places - Чекор 2: Пополнување на податоци за бизнисот

Google Places - Чекор 2: Пополнување на податоци за бизнисот

Кога пополнувате внимавајте на следниве елементи:

  • Сите податоци да бидат точни онакви како што се.
  • Доколку на мапата се појавува грешка поправете ја. Забележувате под мапата дека имате линк за Fix incorrect market location.
  • Доколку имате веб сајт внесете го.
  • Ставете слики колку што можете подескриптивни и кои ја прикажуваат вашата локација на еден примамлив начин.
  • Внимавајте на категории. Не брзајте и размислете добро во кои категории ќе биде вашиот бизнис.

Откако ќе ги пополните сите податоци кликнете Submit.

Чекор 3: Валидација на локацијата и бизнисот

Сервисот бара секој бизнис да ја валидира вистинитоста на информациите преку валидација. За таа цел ќе добиете телефонски повик на бројот кој што сте го внеле на кој ќе ви биде прочитан кодот за валидација.

Откако ќе го завршите сето тоа, вашиот бизнис веќе се наоѓа на Google Places.

Но, тука вашата задача како претприемач не завршува. Ќе треба да ги ажурирате податоците доколку има некои промени. Поставете различни промотивни и попустни купони. Одговарајте на различните рангирања како позитивни така и негативни. Следете ја статистиката…

post

Книга: Поумно, побрзо, поефтино – Не здодевни, бесплатни стратегии за маркетинг и промоција на твојот бизнис

Книга: Smarter, Faster, Cheaper

Книга: Smarter, Faster, Cheaper

Маркетингот е променет и сеуште се менува во однос на начинот на пристап до потенцијалните потрошувачи.

Поумни, побрзи, поефтини наспроти поглупави, поспори и поскапи стратегии за маркетинг и промоција на бизнисот навистина претставува предизвикувачки за читање.

Како дојдов до оваа книга?

На Twitter објавив дека започнувам да ја читам книгата Нови правила во маркетингот од David Meerman Scott. Набргу потоа добив директна порака на истата платформа (Twitter) од David Siteman Garland (@TheRiseToTheTop) во која ми вели дека книгата која ја читам е одлична, а можам и да го погледнам интервјуто на неговиот сајт со авторот на книгата која ја читав. Веднаш кликнав на линкот, го погледнав видеото во кое имаше доста корисни совети и му се заблагодарив на David. Додека бев на неговиот сајт забележав дека набргу ќе излезе неговата книга насловена како насловот на овој пост.

По неколку недели додека преку мобилен телефон разгледував кои нови книги се излезени на Amazon налетав и на овој наслов. Не можев да одолеам бидејќи веќе на некој начин бев запознат со содржината и со авторот, па затоа со неколку кликови Kindle верзијата веќе беше во мојот телефон спремна за читање.

Како некој од Македонија (Јас) станав купувач и посетител на сајтот The Rise to The Top на David Siteman Garland. Едноставно преку една Twitter директна порака која не продаваше ништо, туку само понудуваше една дополнителна вредност за мене.

Што доколку пораката гласеше: Драган купи ја мојата книга и линк до Amazon.

Сигурно дека не би ја купил ниту би ја погледнал, затоа што добивам стотици такви пораки дневно, што преку социјални медиуми, што преку email пораки…

Ова е само една од стратегиите за кои се зборува во книгата. Стратегија, која очигледно преку мојот пример дава резултати.

Што претставува книгата?

Книгата веќе ја ствив во категорија во една од повредните книги во мојата лична колекција од 400 книги. Не затоа што е нешто спектакуларно прикажано, туку затоа што дава вредност, преку примери, лично искуство и искуство на огромен број на експерти и претприемачи кои David ги интервјуирал.

Книгата обработува тема која е многу актуелна последниве години – градење на препознатлив бренд преку интернет. Од градење на основа на бизнисот на интернет, преку билдање на содржина, споделување на содржина, „промоција на производ“ (во наводници бидејќи не се однесува на онаа традиционалната промоција туку промоција на новото време), комбинација на онлајн со офлајн маркетинг активности… авторот преку практични примери и совети не води низ процесот на градење на присутноста на бизнисот на интернет.

Неколку извадоци од книгата

Имам подвлечено (мислам електронски Highlight) многу елементи тука ќе споделам неколку:

  • Денес се потребни многу помалку пари, но повеќе пасија, повеќе личност, повеќе креативност и можност да се постане доверлив извор и лице во од, спротивно од шематскиот буткач на производот.
  • Поглупаво, поспоро, поскапо  претставува начин кој секогаш не учеле: Вие го маркетирате производот.
  • Спротивно на буткање на производот, овој метод се базира на тоа да станете доверлив извор, авторитет, некој кој другите го сакаат и веруваат.
  • Интернетот ви овозможува да зборувате со повеќе луѓе одеднаш и сеуште да постои чувство на интимност.
  • Потребни се три карактеристики за поумен, побрз и поефтин маркетинг: пасија, личност и знаење.

За кого е оваа книга?

Секоја книга е за секого кој сака да научи нешто ново, кој сака да навлезе во светот кој го обмислува авторот, кој сака да напредува духовно…

Но, не е секој за се. Сепак, првенствено оваа книга би ја препорачал на сите претприемачи на мали бизнис. Тоа се луѓето кои треба да започнат да ги применуваат новите стратегии и секако да престанат да ги трошат парите на активности кои се послабо даваат резултати.

Бидејќи се однесува на маркетинг, оваа книга е одлична и за сите оние кои се занимаваат со маркетинг.

И секако, книгата е добредојдена за сите менаџери кои на некаков начин се вклучени во донесување на одлуки за маркетингот.

post

Бизнис поимник – Ажурирање за Email Маркетинг

Email Маркетинг - Ажурирање на бизнис поимник

Email Маркетинг - Ажурирање на бизнис поимник

По еден подолг период извршив ажурирање на бизнис поимник на претприемач. Додадени се 6 нови термини, кои најмногу се однесуваат на email маркетинг.

Би сакал тука во еден пост да ги претставам бидејќи се поврзани еден со друг и од нивно читање може да се извлечат некои грешки кои Вие како претприемач не би требало да ги правите.

Нови термини

Овие термини не се толку нови колку што во пракса кај нас не се употребуваат многу често.

Следниве термини се додадени во најновото ажурирање на бизнис поимникот на претприемач:

  1. Bounce Rate – Ова е термин кој спаѓа во терминологијата на email маркетинг. Претставува стапка на вратени email-ови до испраќачот кои се карактеризираат со порака од mail системот дека е вратена заради причини како што се непостоечко домен име, преполни инбокс на примателот, непостоечка еmail адреса.
  2. BlackList – BlackList (црна листа) е термин кој спаѓа во терминологијата на email маркетинг. Овој збор означува листа која содржи група на IP адреси, кои се осомничени за испраќање на несакани email пораки (спам). Доколку IP адресата од која ги испраќате вашите email пораки како дел од една email маркетинг кампања имаат висока стапка на жалби до интернет сервис провајдери, висока bounce стапка, или голем број на испраќања на стари и непостоечки адреси ќе постои поголема шанса да влезе во оваа несакана листа.
  3. Deliverability – Термин од еmail маркетинг терминологија кој го означува бројот на испратени email-ови намалени за бројот на email-ови класифицирани како bounce.
  4. Permission Based Email Marketing – Email маркетинг базиран на дозвола од страна на примачот претставува процес во кој се бара дополнителен чекор (во вид на чекирање на поле, или кликнување на на линк за потврда) од страна на примателот за да имате дозвола да испраќате email-ови на тоа лице.
  5. Whitelist – Бела листа е термин кој спаѓа во терминологијата на email маркетинг. Овој збор означува листа која содржи група на одобрени IP адреси како испраќачи. Доколку IP адресата од која ги испраќате вашите email пораки како дел од една email маркетинг кампања е означена како whitelist постои поголема веројатност да тој email сервис провајдер ќе ги прифаќа дојдовните email-ови (иако не постои 100% гаранција – постојат и други фактори).
  6. Conversion Rate Optimization (CRO) – Оптимизација стапка на конверзија е термин кој станува се попопуларен кај интернет маркетарите и претставува процес на оптимизација на конверзија на одредена кампања. Доколку тоа е email маркетинг кампања CRO има за цел зголемување на продажби од еден испратен еmail. Доколку тоа е страна преку која се продава нешто, претставува процес кој треба да доведе до подобрување (зголемување) на бројот на купувачи во однос на бројот на посетители.

Неколку заклучоци и препораки

  • Не треба да дозволите Вашата IP адреса од која ги праќате email-овите да влезе во црната листа.
  • Потребно е да имате чиста email листа што значи редовно ажурирана со постоечки email адреси за да имате колку што може поголем bounce rate.
  • Би требало, ќе повторам уште еднаш, би требало секоја email маркетинг кампања да ја базирате на дозвола (одобрение од страна на примачот).
  • Постојано работете на оптимизација на конверзијата која секој испратен email ја остварува. Мери, подобрувај, проверувај, оптимизирај…
  • Користи провајдери на email маркетинг услуга кои имаат висока репутација и кои ќе обезбедат максимална стапка на испраќање на секој email. На пример професионални сервиси како Aweber секогаш кога ќе испрати email на email адреса која заради било која причина е класифицирана како bounce автоматски ja брише таа email адреса од листата.
post

JV (Joint Venture) – Маркетинг средство 94

JV Партнерство како маркетинг средство

JV Партнерство како маркетинг средство

Ова е 94-тото маркетинг средство од серијалот на маркетинг средства на претприемач. Ќе стане збор за JV (Joint Venture) партнерство во цели на интернет маркетинг. Доколку имате веб сајт преку кој вашиот бизнис врши одредена продажба овој вид на маркетинг средство може да биде од исклучителна корист на вашиот бизнис.

Што претставува Интернет JV?

Моќта, онаа вистинската моќ на интернетот лежи во едноставноста на остварување на партнерство меѓу претприемачите. Партнерство кое обезбедува висока профитабилност поради синергетски настап кој се овозможува (заедно се посилни отколку поединечно).

Во суштина, фразата JV опишува едно партнерство кое обезбедува взаемен интерес на две или повеќе страни во остварување на одредени економски активности на пазарот. Но, интернет JV партнесртво не е:

  • Спојување на две или повеќе компании
  • Општо партнерство
  • Купување на други компании
  • Не е нешто што значи делење на капитал.

Интернет JV партнерство претставува партнесртво заради остварување на поединечна цел и заради тоа влегува во групата на краткорочни активности. Целта се постигнува и партенрството завршува на взаемно задоволство. Ова не значи дека за некој друг производ, или некоја друга кампања партнерството нема повторно да се оствари.

Она што е карактеристично за интернет JV партнерство е што вообичаено функционира на принципот на делење на приходот меѓу партнерите. Вие имате производ и/или услуга, јас ќе го промовирам преку моите ресурси и од секоја продажба ќе заработам одреден процент.

За да функционира едно вакво JV партнерство една страна мора да има производ и/или услуга и интерес, додека другата страна мора да има ресурси и секако интерес.

На пример, компанија А има производ и/или услуга и има листа од 5000 потенцијални потрошувачи. Компанија Б во моментов нема производ и/или услуга, но има листа од 100.000 потенцијални потрошувачи за компанија А и производот што таа компанија го нуди. Затоа, компанија А ќе се обиде освен сопствените ресурси да ги користи и ресурсите на компанија Б при што ќе дојде до 100.000 нови потенцијални купувачи. За таа цел компанија А прави JV партнерство со компанија Б и за секој продаден производ од страна на компанија Б, компанија А ќе исплати одреден процент на компанија Б.

Интересно е да се напомене дека во пракса оваа делење на приходот може да биде различно во зависност од производот кој се продава. Во некои случаи кога се продава информациски производ, процентот кој компанијата со ресурси може да го добие изнесува и до 100%. Би се прашале зошто да се даде целосниот приход. Затоа што со помош на тоа партнерство компанијата ќе добие многу драгоцен ресурс, а тоа е листа на потенцијални потрошувачи.

Ова е слично како affiliate маркетинг и може да се каже дека affiliate маркетинг може да се разгледува како еден вид на JV стратегија кога станува збор за интернетот.

Неколку факти за JV партнерство

Би сакал да напоменам неколку факти кои се цврсто поврзани со оваа маркетинг средство, врз основа на искуството на експертите од оваа подрачје.

  • Нормално е првите неколку партнерства да не завршат онака како што се планирало.
  • Не постои брз начин за остварување на успех.
  • Можноста за учење од претходни неуспеси е голема.
  • Како и секое друго маркетинг средство бара вештини и соодветна координација и комуникација меѓу страните.
  • Потребен е вистински партнер, кој има огромно влијание врз сопствената аудиенција.

Процес на користење на оваа маркетинг средство

Накратко ќе се обидам да претставам еден процес кој што јас би го дизајнирал кога би го користел оваа маркетинг средство.

  • Трансформација на бизнис моделот. Прво што би направил би го проверил мојот бизнис модел дали би бил соодветен за едно вакво маркетинг средство и доколку има потреба би извршил соодветни прилагодувања. Не може секој бизнис да го користи оваа маркетинг средство. Мора јасно да се дефинира дали, каде и како може да се користи.
  • Дефинирање на цели на партнерството. Која е целта на остварување на едно такво партнерство? Дали е тоа откажување од приход на еден поевтин производ со цел да се понуди upsale со поскап производ? Дали е градење на листа со квалитетни потенцијални потрошувачи? Дали е тоа брзо остварување на приход? Дали е тоа зголемивање на препознатливост на брендост? Сите овие и уште многу други прашања треба да бидат одговорени пред започнување.
  • Избор на идеални партнери. Овој чекор од процесот е многу важен за успешност на едно вакво партнерство. Мала е веројатноста компанија која продава храна да биде идеален JV партнер за компанија која продава мебел. Потребно е добро да се дефинираат идеалните партнери. Користете специфична индустрија, специфична компанија, специфично лице… Внимавајте партенрите треба да бидат влијателни во подрачјето на вашиот бизнис.
  • Контактирање на потенцијални партнери. Откако ќе ги изберете потенцијалните партнери можете да ги контактирате и да понудите една таква соработка. Можете да им го испратите Вашиот производ или да ја опишете услугата која ја нудите. Прецизирајте точно што ќе добијат.
  • Подготовка и потпишување на договор. Чекор кој ќе обезбеди соодветно спроведување на договореното и заштита на сите страни.
  • Подготвка на план. Без соодветен план успехот на кампањата однапред ќе биде осудено на пропаст. Потребно е добро да се дефинираат сите активности од двете страни. Доколку тоа е испраќање на email до потенцијални потрошувачи, ќе треба да се дефинира содржината, фреквенцијата на email-овите… Кординацијата и комуникацијата помеѓу партнерите треба прецизно да биде дефинирана за да не се случуваат грешки во процесот на самата кампања.
  • Започнување. И секако последен чекор е започнување на кампањата.
post

План за социјални медиуми – Маркетинг средство 93

План за социјални медиуми

Досега направивте SWOT анализа за градење на присутноста на вашиот бизнис на социјални медиуми од која ги откривте сите ваши слаби и јаки страни како и можности и закани кои доаѓаат од надворешноста на вашиот бизнис. Изготвивте стратегија за градење на присутност на Вашиот бизнис на социјални медиуми која резултираше во активности кои го трасираат патот за посигнување на поставените бизнис цел.

Сега е време да изготвите соодветен план за сето тоа што го опфаќа сратегијата за да може истата да се преточи во реалност. Инако стратегија како документ останува обичен безвреден документ доколку не се примени во пракса. План за социјални медиуми е 93-тото маркетинг средство на претприемач.

Што значи план за социјални медиуми?

Наједноставно кажано планот ќе треба да даде одговор за тоа кои активности ќе треба да се превземат, кога треба да се превземат, од кого треба да се превземат и што значи успех за завршена активност.

Планот треба да служи како патоказ за тоа каде треба да се движиме согласно зацртаната стратегија за градење на присутност на социјалните медиуми. Од друга страна планот ќе ни биде единственото средство со кое ќе можеме да го мериме учинокот од сработеното.

Што треба да содржи планот за социјални медиуми?

Веќе знаете дека не сакам некои сложени планови кои изгледаат повеќе како приказни отколку како план. Во стратегија можеме да користиме приказни преку реченици кои започнуваат на ќе…

Но, во планот мора да имате специфични активности кои ќе го водат вашиот бизнис кон исполнување на се она што е предвидено со планот. Така да минималните елементи кои ќетреба да ги содржи тој план се:

  • Листа на активности
  • Точен датум на реализација на секоја активност
  • Одговорни лица за спроведување на тие активности
  • Мерни индикатори за секоја активност со кои ќе може да ја мерите успешноста на спроведената активност.

Не е лошо оваа листа на активности да ги содржи и специфичните содржини кои ќе бидат споделени на социјалните медиуми. Сепак содржината е нешто што најчесто ќе се спроведува по еден однапред утврден план.