post

Како да ги зголемиш цените без да ги изгубиш потрошувачите?

Грешки при определување на цени Минатата недела зборувавме за 4 начини за зголемување на цените. Во тој пост опишавме 4 различни техники за зголемување на цените кои се базираат на различни ситуации како причина за тој чекор.

Но, вистинскиот проблем кога станува збор за зголемување на цените претставува перцепција на потрошувачите. Не постои претприемач кој не се прашал себеси следново прашање: Каква ќе биде реакција на купувачите кога ќе ги зголемам цените?

Дали потрошувачите ќе продолжат да купуваат во иста количина како и пред зголемувањето на цените?

Да разгледаме некои можности кои ти како еден претприемач можеш да ги користиш за да го амортизираш влијанието на зголемувањето на цените врз тековните купувачи.

#1 Може да додадеш дополнителна вредност во понудата

Една од првите рабори кои можеш да ги направиш е да додадеш вредност на самата понуда. Може да додадеш дополнителни карактеристики, нови корисности, дополнителни сервисни елементи, бонуси, гаранција, испорака…

Логиката зад ова е доколку додадеш дополнителна вредност на твојата основна понуда за која сакаш да ја зголемиш цената, може да се види како фер компензација за повисоката цена која ќе ја побараш за твоите производи или услуги. На таков начин, потрошувачите ќе го ценат тоа, бидејќи ќе добијат поголема вредност која на друг начин ќе им заштеди.

Кога и да помислиш за зголемување на цената обиди се да најдеш дополнителни елементи кои како вредност ќе ги закачиш на понудата.

#2 Подобри ја понудата

Втората работа која може да ја направиш во намалување на влијанието на зголемувањето на цената врз твоите купувачи е да ја подобриш понудата за која ќе бараш дополнителен износ на пари.

Еден дел е подобрување на содржината на понудата, твоите производи или услуги и се она што е изградено околу твоите производи или услуги. Ова е нешто што го правиш при додавање на дополнителна вредност во твојата понуда.

Втората работа е да ја подобриш понудата за да ја направиш навистина неодолива за твоите купувачи. Неодолива понуда не поставува прашања за цена од перспектива на еден потрошувач. Таа едноставно е неодолива. Може да прочиташ повеќе во 26 начини до неодолива понуда.

Кога размислуваш за подобрување на твојата понуда размислувај за подобрување на корисностите. Размислувај за подобрување на проблемите кои твојот бизнис ги решава и начинот на кој ги презентираш тие решенија и ги комуницираш со нив. Размислувај за вистинските желби на твоите потрошувачи. Размисли за тоа како да ги активираш емоционалните поттикнувачи во твојата понуда. Размислувај за подобрувања на твојот повик за акција и социјалниот доказ како дел од твојата севкупна понуда.

Тоа се елементи кои имаат голем потенцијал за амортизација на влијанието на зголемувањето на цените во очите на потрошувачите.

#3 Биди искрен

Последната работа е да бидеш искрен со потрошувачите. Ова значи искрено објаснување за тоа зошто си принуден на зголемување на цените.

Запомни дека искреноста е важен елемент кој доведува до зголемување на кредибилитетот, репутацијата и довербата (за што како посебни чекори во таа насока изработивме упатство како дел од првиот вебинар на премиум претприемач). Ова претставува голем дел од твојата бизнис потенцијална енергија.

Доколку потрошувачите можат да ги разберат твоите намери, ќе разберат и зошто мора да ги зголемиш и цените, и доколку тие се задоволни со твојот бизнис досега, ќе продолжат и да купуваат од тебе и понатаму.

post

Користење на Gmail и Evernote како CRM систем

Evernote Минатиот месец напишав еден пост за тоа како може да се користи Gmail како CRM систем (систем за менаџирање на односите со потрошувачите ) од страна на еден претприемач или за целите за еден мал бизнис. Gmail дава доста добри можности за внесување на податоци за потрошувачите и потенцијалните потрошувачи.

Но, понекогаш природата на бизнисот е таква да самите податоци за секој клиент може да дојдат во една навистина несредена форма. На пример, слики, текст, честа email комуникација, материјали за проекти, понуди, одговори… Иако може да се најде начин како сето ова да се спакува преку Gmail, но тука би сакал да споделам една креативна можност да се комбинираат Gmail и Evernote за ти како еден претприемач биднеш многу поорганизиран во однос на тие односи како со потрошувачите така и со потенцијалните потрошувачи.

Во претходниот пост за Evernote кој беше објавен на претприемач насловен како може ли поголема продуктивност со Evernote наведов повеќе идеи за користење на оваа апликација во кои не беше опфатена темата во овој пост. Но, како што наведов се повеќе се играм во однос на користење на оваа апликација и постојано наоѓам нови креативни начини на користење на истата.

Како едно надополнување во однос на користење само на Gmail каде може да собираш информации за твоите потрошувачи, за твоите потенцијални потрошувачи, да вршиш сегментација, можеш да ги следиш твоите маркетинг активности поврзани со email со секој од твоите потрошувачи, можеш да научиш повеќе за нив, можеш да изградиш подобри односи со нив, со помош на Evernote ќе можеш да ги следиш и сите други маркетинг активности поедноставно, да додадеш едноставно било што друго поврзано со нив и секако да имаш едноставен и брз пристап до информациите.

Ајде да видиме како може да се комбинираат овие две алатки.

#1 Креирање на нотеси во Evernote

Контејнер и нотеси во Evernote

Контејнер и нотеси во Evernote

Првин мора да започнеш со добра организација во Evernote преку креирање на соодветни нотеси. На пример, организацијата на нотеси во Evernote се изведува преку Stacks (именуван контејнер за нотеси) и Notebooks (нотеси). Значи, логиката е да има по еден уникатен контејнер со повеќе нотеси во истиот. Ваквиот начин ни овозможува организирање и расчленување на две нивоа, што можеби претставува и една ограниченост и недостаток кој го забележав во апликацијата бидејќи полесно е да имам еден контејнер со клиенти и во истиот нотеси за различни клиенти и во тие нотеси уште поднотеси кои би можеле да бидат, контактирано, одговорено, генерални информации, состаноци…

Но, во секој случај и ваквиот начин ни одговара, доколку добро се организираме. Во овој случај би имале по еден контејнер (stack) за секој клиент во кој ќе бидат содржани различни нотеси. На пример би имале:

  • Клиент 1 контејнер (нотес 1, нотес 2, нотес 3, …)
  • Клиент 2 контејнер (нотес 1, нотес 2, нотес 3, …)
  • Клиент 3 контејнер (нотес 1, нотес 2, нотес 3, …)
  • …
  • Клиент n контејнер (нотес 1, нотес 2, нотес 3, …)

Кога станува збор за нотеси тие ќе зависат од твоите потреби, но како еден пример како би можел да ги организираш може да ги користиш следниве идеи:

  • Контакт од твоја страна
  • Одговор
  • Информации за потрошувачот
  • Состаноци…

Следното нешто на што добро треба да размислиш се ознаките (tags) на секоја белешка која ќе оди во одреден нотес заради поедноставен пристап во иднина и помош во пребарувањето.

Кога веќе ќе ги имаш определено структурата на организацијата и клиентите може да преминеш во следната фаза, интеграција со Gmail.

#2 Интеграција на Evernote со Gmail

Пред да започнеш со самата интеграција, сакам да напоменам дека не треба да очекуваш целосна автоматизација. Но, целта на CRM систем не е да работи без човек, туку да биде организиран од страна на човекот и да се користи од страна на човекот.

Интеграцијата на Gmail со Evernote ќе ти помогне малку во автоматизирање на самиот процес преку користење на опцијата филтри во Gmail. Така, првин треба да изработиш филтер за секој од твоите клиенти.

Филтер во Gmail за интеграција со Evernote

Филтер во Gmail за интеграција со Evernote

Филтер во Gmail кој ќе ги праќа email-овите во Evernote

Филтер во Gmail кој ќе ги праќа email-овите во Evernote

На втората слика е покажана акцијата која филтерот ќе треба да ја направи, а тоа е email-от од клиентот да го прати како белешка во твојот Evernote акаунт (Evernote ти дава посебен email акаунт кој се користи за праќање на белешки преку email). Запомни дека постапката треба да ја повториш, но со филтер кој ќе користи To како на првата слика за email-ови кои ги праќаш на тој клиент.  На ваков начин секој email кој ќе го добиеш од твојот клиент или потенцијален клиент или пратиш автоматски ќе се покаже и како забелешка во Evernote со што нема да мора рачно да ги внесуваш тие контактирања.

Секоја ваква забелешка нема да биде веднаш во вистинскиот контејнер и клиент како нотес во Evernote туку ќе оди во посебен фолдер кој ти е изберен за внесување на белешки. Така да ќе треба секоја нова забелешка добиена преку Gmail да ја ставиш во нотесот за кој клиент се однесува. Оваа од друга страна е добро, бидејќи ќе бара да влезеш во апликацијата и да ја најдеш забелешката која треба да ја пренесеш во соодветен нотес, а во исто време и да ја едитираш со твои забелешки или идеи за идни активности во однос на таа белешка.

#3 И што потоа?

Сега кога веќе имаш организиран систем, твојата работа ќе биде да го полниш и со останати информации или белешки поврзани со потрошувачот. Еве некои примери како можете да го користите она што го креиравте до сега:

  • Можете да ставите забелешка со твои идни активности и да користите check box во таа забелешка за што Evernote има одлично решение, со тоа да креирате посебна To-Do листа за вашите идни активности.
  • Можете да направите контакт листа со слика, адреси, контакт детали за вработените, родендени на тие вработени кај тој ваш потрошувач доколку ги има. Секако еден дел од работата на CRM е да градите односи со потрошувачите. Дали, праќање на роденденска честитка нема да ви помогне да тие односи бидат на едно повисоко ниво.
  • Можете се она што ќе дознаете за потрошувачот да го внесете во вид на белешки. Каде јаде, каде пие кафе, со кого се дружи, каде излегува, што сака, што не сака, какво пиво пие и дали пие… Можеби сите овие прашања ви изгледаат смешно, но верувајте може да ви се најдат. Колку повеќе знаеш толку подобри односи ќе изградиш, а колку подобри односи ќе изградиш, толку подобар бизнис ќе имаш со тој потрошувач.

Ова се само како идеи, сепак вашата креативност е таа која ќе ве води низ процесот.

#4 Подобрувај

Колку повеќе ќе го користите системот, толку подобро ќе бидете испраксирани со што ќе дојдете до многу идеи за подобрување.

***

Мора да напоменам дека Evernote може да биде секаде со тебе. Го има како мобилна апликација. Го има за таблети, за десктоп компјутери, но и веб верзија.

post

Како да го привлечеш твојот идеален купувач?

Твојата работа како еден претприемач е секогаш да работиш на привлекување на нови потрошувачи за твојот бизнис. На ова се базира растот на твојот бизнис. Тоа е дополнителна бизнис потенцијална енергија за твојата компанија.

Но, привлекување на купувачи за твојот бизнис те чини пари. Сакаш да бидеш присутен секаде каде што се наоѓаат твоите потенцијални купувачи. Оваа присутност бара напор, време и пари.

Зошто би сакал да ги фасцинираш потенцијалните купувачи доколку тие немаат интерес за твоите производи или услуги?

Зошто би сакал да ги фасцинираш потенцијалните купувачи доколку тие ги немаат проблемите кои твојата компанија ги решава?

Сигурно не сакаш да ги фасционираш таквите потенцијални потрошувачи, туку сакаш да ги привлечеш идеалните потрошувачи за твојата компанија.

За таквите потрошувачи вреди напорот, времето и парите вложени за нивно привлекување. Тие имаат поголем потенцијал да конвертираат во купувачи, бидејќи тие веќе имаат потреба од твоите производи или услуги, и секако сакаат да ги решат проблемите кои твојата компанија може да ги реши за нив.

Во продолжение се дадени 4 чекори кои ќе треба да ги преземеш доколку сакаш да ги привлечеш идеалните купувачи за твојата компанија.

#1 Целен пазар

Кој е твојот целен пазар?

Треба да го знаеш одговорот, бидејќи твоите идеални потрошувачи се токму на тој пазар. Треба да ги пронајдеш таму.

Без прецизно знаење на целниот пазар, нема да можеш ниту да ги најдеш твоите идеални потрошувачи.

Затоа треба да го опишеш твојот целен пазар. Користи демографија, социологија, географија или било што друго што ќе ти каже каде се наоѓаат твоите идеални купувачи.

#2 Твоите идеални потрошувачи

Знаеш ли кои се твоите идеални потрошувачи?

Дали тоа е Перо, сопственик на мал бизнис кој продава мобилни телефони и има потреба од рекламирање на неговиот бизнис? Или тоа е Елена, која сака да има сопствена пекара и има потреба од консултации за започнување на бизнис?

Повторно, кои се твоите идеални потрошувачи?

Размисли за ова:

  • Тие се дел од твојот целен пазар.
  • Тие имаат потреби за твоите производи и услуги.
  • Тие треба да имаат проблеми кои твојот бизнис ги решава.
  • Тие треба да имаат страсна желба за да ги решат тие проблеми.
  • Тие мора да бараат можни решенија за нивните проблеми.

Опиши го твојот идеален купувач користејќи ги погоре опишаните потреби за некој да може да влезе во категорија на твојот идеален купувач.

#3 Лоцирај ги

Сега знаеш кој е твојот целен пазар и ги знаеш твоите идеални потрошувачи. Следното нешто што треба да го преземеш е да ги лоцираш.

Каде се твоите идеални потрошувачи?

Каде одат, каде јадат, каде работат, каде ги бараат решенијата за нивните проблеми…?

Сите овие прашања се важни за тебе и за твојот бизнис доколку сакаш да изградиш присуство на твојот бизнис на тие места и нормално, да ги привлечеш.

#4 Начини за привлекување

Можеш да бидеш присутен на сите тие места каде што се наоѓаат идеалните купувачи, но доколку не успееш да го привлечеш нивното внимание нема да можеш да ја исполниш целта, а тоа е да привлечеш колку што може повеќе од нив.

Размисли за овие прашања:

  • Како можеш да им пристапиш?
  • Како можеш да комуницираш со нив?
  • Која ќе биде првата работа за која ќе комуницираш со нив?
  • Како ќе кажеш приказна за слични проблеми?

Доколку ги одговориш прашањата, ќе знаеш како да ги привлечеш. Денешниот бизнис свет не е место каде едноставно ќе ги закачиш твоите маркетинг материјали и ќе се здобиеш со потребното внимание.

Таму, на твојот целен пазар, постојат многу ентитети кои се обидуваат да го привлечат истото внимание за истите лица кои ти се обидуваш да ги привлечеш. Мора да бидеш попаметен, и да го искористиш твојот потенцијал.

Затоа комуницирај, не продавај. Едуцирај, не продавај. Гради односи, зголеми го кредибилитетот и довербата, биди нивен пријател… (Повеќе за тоа како до позитивно влијание врз идеалните купувачи можете да видите во вебинарот насловен како: Како потрошувачите да те изберат тебе место конкуренцијата.) Доколку успееш во ова, ќе зграбиш многу поголемо внимание и привлекување на твоите идеални купувачи.

post

4 начини за зголемување на твоите цени

пари Кога зборуваме за цени, тоа се многу чувствителни прашања за секој претприемач. Повисоки цени значат и поголем профит, но од друга страна постои опасност да се загубат некои купувачи.

Понекогаш како претприемач ти ќе бидеш принуден да ги зголемиш твоите цени. Тие сили кои те принудуваат на овој чекор се диктирани од страна на пазарот и се доста влијателни на твојата трошочна структура.

Како и да е, прашањето е како да ги зголемиш цените со најмало можно ниво на болка за твоите купувачи.

Секоја од овие техники е специфична за различни ситуации или различни причини за зголемување. Понекогаш може да постои притисок од снабдувачите поради зголемување на цените од нивна страна, а тоа има директно влијание на трошочната структура. Во таквите ситуации, не постојат некои големи можности за обидување со други тактики. Едноставно се бара зголемување на цените согласно со новонастанатата ситуација.

Понекогаш пак може да се има повеќе време за анализи и тестирања за зголемување на цените, додека понекогаш едноставно треба да се додаде дополнителна вредност во понудата за да се зголемат цените.

Важно е да знаеш дека различните причини за зголемување на цените ќе бара различни начини на зголемување на цените.

Кои се најчестите начини за зголемување на цените?

#1 Постепено зголемување

Нешто што често пати се користи од страна на претприемачите е постојано зголемување на цената, така што зголемувањето нема да претставува шок за потрошувачите. Едноставно продолжуваш со зголемување на цената се додека не стигнеш до нормалната или онаа која ја посакуваш. Најголемиот предизвик при користење на оваа техника е да знаеш кога цената го поттикнува отпорот на потрошувачот. Треба да го следиш нивното однесување.

На пример, ја зголемуваш цената за 5% и ништо не се случува. Твоите потрошувачи продолжуваат да купуваат во иста количина како и пред зголемувањето. По одредено време, кога ќе се осигураш дека зголемената цена не предизвикува промена во однесување на потрошувачите, едноставно повторно ја зголемуваш цената за 5%. И повторно ништо не се случува. продажбата останува иста. Нема жалби на цената. Па затоа повторно ја зголемуваш цената за 5%, но потоа откриваш дека твојата продажба започнува да паѓа. Тоа е знак кој ти кажува да престанеш и да ги вратиш цените на претходното ниво на покачување.

#2 Тестирај, потоа зголеми

Ова е втор начин кој можеш да го користиш за зголемување на твоите цени. Доколку сакаш да бидеш сигурен дека новите цени ќе бидат добри за твоите потрошувачи ќе треба да ја тестираш таа хипотеза. Прво, мора да откриеш колку тие се спремни да платат за твојата понуда. Ќе го најдеш одговорот доколку ги прашаш, или пак со помош на сплит тестови што значи да понудиш исти понуди со различни цени за различен примерок од потрошувачите.

Ова техника едноставно значи дека ти не ги зголемуваш твоите цени пред да дојдеш до заклучоци од твоите тестирања кои би ти кажале која би била најдобрата цена за твоите производи и услуги.

Може да ја користиш оваа техника доколку не си сигурен во однос на твоите цени, или пак доколку сметаш дека тие се потценети.

#3 Додади  вредност

Понекогаш доколку едноставно сакаш да ги зголемиш цените за да го подобриш сопствениот бизнис, или зголемиш профитабилноста, ќе можеш да ја користиш оваа техника.  Доколку додадеш дополнителна вредност во твојата понуда која ќе претставува фер компензација за разликата која ќе ја бараш во цената, твоите потрошувачи може да го ценат тоа и продолжат да купуваат од твојот бизнис.

Може да додадеш одполнителни карактеристики, сервисни компоненти, бонуди, гаранција, испорака…

#4 Едноставно направи го тоа

Последната техника е наречена едонставно спроведи го зголемувањето и значи дека преминуваш на зголемување на цената на нивото на која и треба да биде. Колку треба да биде е она што ти мислиш дека вредат твоите производи или услуги.

Понекогаш ќе бидеш принуден да ги зголемиш твоите цени доколку сакаш да останеш во бизнисот. Во таква ситуација, не постојат можности за размислување или тестирање. Мора да ги зголемиш цените и точка.

Како и да е, една работа која би требало секогаш да ја користиш со секоја од техникиве е да ја докажеш вредноста на твојата понуда за да го балансираш влијанието на зголемувањето.

Како што може да забележиш, постојат различни начини или техники кои може да ги користиш кога планираш зголемување на цените. Но, многу поважно е што во различни ситуации, или различни прилики, ќе биде потребна различна техника. Најди што е најсоодветно за секоја ситуација и искористи го.

Какво е твоето искуство кога ги зголемуваш цените? Постои ли некоја друга техника која ја користиш?

post

Како од ништо, станав манијакален корисник на една компанија?

Оваа слика не ја планирав за пост на претприемач, но сметам дека можеме да извлечеме некои заклучоци за она што им е потребно на бизнисите врз основа на тоа како јас станав “горд” корисник за помалку од две години на една компанија.

Станува збор за Apple од која до пред две години немав ништо, ниту пак размислував да имам некој нивен производ бидејќи сметав дека она што дотогаш го имав е доволно и нормално за мојот свет. Еве ја хронологијата на случките.

  • Незадоволство од тековната опрема. Од самите почетоци на мое користење на мобилен телефон (некаде 2000 година) бев голем фан на Nokia. Од оние познатите големи цигли до најновите кои излегуваа за кои плаќав огромни пари. Но, времињата се сменија. Дигиталниот свет се повеќе навлегуваше во мојот нормален живот. За мојата последна Nokia да ја прилагодам (која веќе беше стара две години) инсталирав Fring за да имам Skype, социјални медиуми, повици… Но, телефонот почна да се празни бргу, да биде многу поспор, па затоа ја избришав апликацијата која ми пречеше. Избор на апликации немаше (барем тогаш).
  • Новата потреба и незадоволство ме поттикна да одлучам да купам нов телефон. И, одлуката падна на iPhone, мојот прв производ на Apple. Дали погрешив? Не, никогаш нема ни да помислам дека направив грешка не само заради задоволувањето на моите потреби, туку и заради отворање на многу пошироки видици. Разни апликации го проширија начинот на кој го користев мобилен телефон дотогаш. Почнав да читам книги, да купувам книги, апликации, да пишувам постови…
  • Бидејќи веќе бев запознаен со компанијата, следев и што излегува ново од неа. Веќе им верував. Така, еден ден ја следев најавата на ново светско чудо наречено како iPad. Во индустријата со таблетите се обиделе многу компании уште многу одамна, но не успеале. Се мислеше дека и Apple ќе го снајде истата судбина. Напротив, се случи обратното. За брзо време се појавија многу видео материјали на YouTube за користење на уредот, нови апликации кои го олеснуваат животот, односно мобилниот живот на еден просечен човек, што пак е една нова потреба во денешно време. Забележете, дека воопшто не ни знаевме дека имаме или пак ќе имаме една таква потреба. И одлуката падна, го купив и тоа чудо. Повторно презадоволен од она што го добив за парите кои ги дадов. Но, не бев само јас задоволен, туку и син ми кој лесно сфати како да ракува со него барем за цртање и некоја игра.
  • Задоволен од досегашното искуство со Apple и се понезадоволен од стандардното користење на Windows и повторно нови потреби за купување на нов компјутер. Кој да биде изборот? Не се мислев многу, знаев што сакам, iMac. Како да ми имаат влезено во мозокот за донесување на одлука кога тие нешто го произведуваат. И, така заврши една моја ера на користење на Nokia и PC. Сега целосно сум “јаболкоизиран”, но и син ми веќе знае што сака, истото што и јас.

Забележете ги само следниве зборови:

  • Потреба.
  • Незадоволство со тековна ситуација.
  • Квалитет.
  • Задоволство.
  • Досегашно искуство.
  • Променети потреби.

И како еден заклучок за крај: потребно е да постојат повеќе производи кои ќе го водат купувачот низ една продажна инка на еден бизнис. Можеби понекогаш за првите, оние најефтините ќе нема профит, но важно е да се започне влезот во инката. Сигурен сум дека Apple знаел што прави кога навлегол во индустријата на мобилни телефони, а крајната цел не била само продажба на мобилни телефони, туку и доближување на повеќе луѓе до нивниот бренд, а со тоа и до поголема продажба на останатите производи.

А, сликата ја нареков мојата Apple маниа.

Apple Mania

post

10 Начини за привлекување на внимание

Започнуваш нов бизнис и потребно ти е внимание за да имаш успешно започнување.

Се подготвуваш да лансираш нов производ или услуга на пазарот и повторно ти е потребно внимание за да имаш успешно лансирање.

Па, и за нормално секојдневно функционирање на твојот бизнис, повторно вниманието е клучен елемент за успешноста на бизнисот.

Се чини дека живееме во ерата на внимание. Поголемо внимание поголема бизнис потенцијална енергија за секој проект кој ти како претприемач ќе го преземеш и обратно, помало внимание помала веројатност за успех на тој проект.

Иако постојат многу начини за привлекување на внимание, сепак тоа е процес кој бара макотрпна работа од страна на сите бизнис членови. И она што во овој пост го опфаќаме не е нешто конечно и не гарантира успех, но барем ќе те доближи до саканата цел.

Ти се бориш за вниманието на твоите потенцијални купувачи. Твоите конкуренти исто така се обидуваат да им го привлечат вниманието. Трети бизниси се обидуваат да им го привлечат вниманието за нивните производи или услуги кои немаат врска со твоите. Околината се обидува на секаков можен начин да им го привлече вниманието.

Се наоѓаш во еден океан каде сите се обидуваат да привлечат внимание на секого.

Привлекување на внимание

Привлекување на внимание

#1 Мора да имаш нешто вредно за внимание

Доколку сакаш навистина да го привлечеш вниманието на твојот пазар кон твојот бизнис, ќе мора да имаш нешто навистина вредно за нивното внимание.

Тоа нешто мора да решава некаков проблем на оној на кого сакаш да му го привлечеш вниманието, мора да е нешто навистина посакувано и потребно и мора да биде нешто што навистина се бара од страна на потенцијалниот купувач.

#2 Започни и пред да биде финалниот производ

Мора да креваш врева и пред да бидеш готов со финалниот производ или услуга околу која сакаш да привлечеш внимание. Не ти требаат сите карактеристики за да започнеш да зборуваш за твојот нов проект. Не треба да стравуваш од конкуренцијата.

Целта е да поттикнеш желба за имање на твојот производ или услуга. Целта е да поттикнеш нетрпение во очекување на конечната верзија. Целта е да имаш привремени корисници (оние први кои ќе го пробаат) и ќе ти помогнат во подобрување на конечната верзија, а во исто време ќе ја распространуваат информацијата за нивното искуство. Целта е да предизвикаш љубопитност за она што се “крчка” во твојот бизнис.

#3 Влијателни лица

Ти требаат влијателни лица кои едноставно можат да влијаат на другите во распространување на информацијата и искуството околу твојот нов производ. Дали тоа ќе бидат оние први корисници од претходниот начин, или некои кои навистина се активни во заедницата а кои ќе ја распространуваат пораката за твојот нов производ или пак некои трети лица кои едноставно имаат висок потенцијал да привлечат внимание околу нив, тебе ти требаат за привлекување на внимание.

Пронајди ги, дај им да пробаат и искористи го нивното влијание за да привлечеш внимание околу твојот проект.

#4 Социјални медиуми

Одлично место за кревање на врева и привлекување на внимание. Сето она што досега го опфативме во начините и сите останати можат добро да бидат интегрирани со социјални медиуми. Може да се прочита, да се слушне, да се види, да се презентира…

Немаш ограничувања, само твојата креативност е важна.

#5 Настани од индустријата

Семинари, конференции, собири, саеми… Сето тоа се настани дизајнирани за да ти помогнат да го привлечеш вниманието кон твојот нов проект. Мора да ги користиш, мора да бидеш присутен, мора да зборуваш, убедуваш, презентираш и комуницираш.

#6 Блог

Бизнис блог може да биде моќна алатка во твоите раце за привлекување на внимание кон твојот бизнис. Направи план за блог постови за новиот проект. Напиши, сними, покажи, едуцирај…

#7 Реклами

Старите добри привлекувачи на вниманието не треба сеуште да бидат отфрлени од користење. Но, можат да бидат додадени новите медиуми и новите технологии кои денес ги прават многу помоќни во привлекувањето на вниманието.

#8 Голема заедница околу твојот бизнис

Потребата и корисноста од имање на голема заедница околу твојот бизнис заради привлекување на внимание е нешто што не бара голем коментар. Колку поголема заедница поголемо ќе биде и вниманието кон твојот бизнис.

#9 Квалитетна заедница

Освен големината ти треба и квалитет на твојата заедница. Треба да имаат потенцијал за поттикнување на вниманието кон тебе и твојот бизнис. Мора да работиш постојано на подобрување на квалитетот на заедницата.

#10 Кредибилитет, репутација и доверба

Доколку ги поседуваш, вниманието само ќе си дојде. Но, потребно е време и работа во градење на твојот кредибилитет, репутација и доверба.

 

post

Претприемнички циклус на ветувања

Во светот на бизнисот, еден претприемач го базира сопствениот бизнис на ветување.

Ветуваш дека твојот бизнис ќе ги реши проблемите и задоволи потребите на потенцијалните потрошувачи, и доколку тие ти веруваат, ќе купат од тебе. Но, доколку го испорачаш ветеното, автоматски ти стануваш личност од доверба и со поголем кредибилитет кое заслужува да ја ужива нивната доверба.

Како и да е, доколку пак не успееш во испорака на ветеното, твојот кредибилитет и доверба ќе бидат нула, и тоа е крајот на твоите односи со тој потрошувач.

Многу е важно за тебе да го испорачаш сето она што си го ветил. Испорачување или испорачување на повеќе од ветеното, по автоматизам гради кредибилитет на тебе како еден претприемач, но и на твојот бизнис како целина.

Размисли за ситуација кога си купил нешто поради ветувањето од рекламен материјал за тоа нешто и по пробување на твојата нова играчка доаѓаш до заклучок дека ветувањето за решавање на твоите проблеми не е исполнето. Како се чувствуваш во една таква ситуација? Ќе купиш ли нешто во иднина од истата компанија? Дури и ако направат уште едно, подобро ветување, едноставно нема да им веруваш. Те губат засекогаш.

Размисли малку на спротивен начин. Што мислиш за претприемачи и нивните бизниси кои ти го испорачале она што го ветиле? Дали би купил нешто повторно во иднина од нив?

Циклус на ветувања

Бидејќи ветувањата се нешто што постојано се користи од страна на претприемачите од една страна, а има голем потенцијал да ја издигне или пак уништи компанијата ид друга страна, ова го нарекувам циклус на ветувања.

Ветуваш нешто и го испорачуваш ветеното. Твојот кредибилитет е на повисоко ниво отколку претходно.

Повторно ветуваш уште нешто и го испорачуваш ветеното. И повторно се појавува раст на твојот кредибилитет.

И повторно, ветуваш и го испорачуваш ветеното и повторно кредибилитетот ти расте.

Сето ова продолжува, повторно, и повторно, и повторно…

Ова е циклус кој никогаш не завршува се додека е жив и твојот бизнис. Но, од друга страна, секоја испорака на ветеното и зголемување на кредибилитет и доверба значи и зголемување на твојата бизнис потенцијална енергија. Поголема бизнис потенцијална енергија значи и поздрав бизнис.

post

Како да го користиш Gmail како CRM алатка?

Како сопственик на мал бизнис, ти или поточно твојот бизнис ќе има потреба да биде во контакт со тековни и потенцијални купувачи.

Ќе сакаш да ги менаџираш тековните купувачи за да бидеш сигурен дека се е онака како што треба да биде и дека ти се задоволни со работата со твојот бизнис.

Ќе сакаш секогаш да го прошириш твојот бизнис со додавање на нови потрошувачи контактирајќи ги тие потенцијални купувачи за твојот бизнис.

Како да ја реализираш оваа едноставна но важна задача за тебе и твојот бизнис? Одговорот е дека ти треба еден систем за менаџирање на односите со потрошувачите – CRM систем.

Можеби немаш доволно ресурси и не ти треба комплексен систем од комерцијални снабдувачи (кој секако нема да биде некорисен доколку го имаш), па затоа и едно решение е да го користиш акаунтот на Gmail за менаџирање на твоите активности во однос на потрошувачите.

Зошто ти треба CRM?

Целта на еден CRM систем е да овозможи твојот бизнис, односно ти едноставно:

  • да ги идентификуваш и таргетираш најдобрите купувачи,
  • да направиш сегментација на потрошувачите,
  • да ги менаџираш различните маркетинг кампањи за различни сегменти,
  • да ги следиш мерките на конверзија,
  • да градиш персонализирани односи со потрошувачите за да го зголеми нивното задоволство и да го максимизираш профитот,
  • да го зголемиш знаењето за потрошувачите,
  • да научиш повеќе за потрошувачите,
  • да знаеш што потрошувачите сакаат, а што не сакаат,
  • да знаеш точно кои се твоите потрошувачи, а кои се потенцијални потрошувачи,
  • да знаеш кои треба да бидат идните чекори со потрошувачите, а кои со потенцијалните потрошувачи.

Gmail како CRM алатка

Добра алатка за почеток за да ги изведуваш овие активности може да послужи еден Gmail акаунт, особено доколку твоите најголеми потреби се да следиш кого контактираш, кога си го контактирал, што бил предметот на контактот, каков бил одговорот и кои треба да бидат идните чекори на твојата компанија.

Што е она што едноставно можеш да го направиш со Gmail како една CRM алатка за твојот бизнис?

  • Можеш да собираш информации за твоите потрошувачи.
  • Можеш да собираш информации за твоите потенцијални потрошувачи.
  • Можеш едноставно да ги сегментираш.
  • Можеш да ги следиш твоите маркетинг активности со секој од твоите потрошувачи.
  • Можеш да научиш повеќе за нив.
  • Можеш да изградиш подобри односи со нив.

Да погледнеме како може да ги изведеш овие активности со помош на Gmail.

Собирање на информации

Контакти во Gmail

Контакти во Gmail

Ти треба постојано да собираш информации за контакт со твоите потрошувачи и секако потенцијални потрошувачи. Бидејќи денес една од најкористените форми за контактирање претставува email, оваа работа со Gmail станува многу полесна.

Секој Gmail акаунт доаѓа со контакт база на податоци која може автоматски да ги складира контакт деталите од било кој со кој имаш некаков вид на коресподенција.

Исто така можеш да импортираш надворешни контакти или да ги додадеш рачно.

Постои можност за додавање на многу повеќе информации освен email адресата и името. Може да додадеш роденден, брачна состојба, URL кон нивниот веб сајт, но она што е најдоброто е што можеш да додадеш прилагодливо поле, односно како сакаш да го наречеш согласно твоите потреби.

Додавање на контакти

Додавање на контакти

Сегментирање на потрошувачи и следење на активности

Најдобрата работа кога станува збор за Gmail и користење како CRM за твојот мал бизнис се групите. Групите се нешто што ќе ви овозможи да направите различни сегменти од твоите контакти. На пример, може да имате една група за купувачи, една за потенцијални купувачи, една за партнери итн.

Креирање на групи или сегменти

Креирање на групи или сегменти

Додавање на контакти во групи или сегменти

Додавање на контакти во групи или сегменти

Друг начин за додавање на сегменти во самите групи е да користиш различни фолдери за различни сегменти.

Доколку сакаш да ги следиш нивните активности имаш неколку опции. Едната е интегрирана во самиот Gmail, а втората е да ги користиш задачите (Tasks) или закажувања во Google Calendar. Јас сакам да го користам полето насловено како додади забелешка (Add Note) за секој контакт каде едноставно можам да напишам кога лицето е контактирано, што е пратено, каков е одговорот и кои ќе бидат моите следни чекори.

Научи повеќе за нив и изгради подобри односи

Едно од најдобрите решенија за да научиш нешто повеќе за твоите потрошувачи и потенцијални потрошувачи и така да изградиш подобри односи со нив е да искористиш решение како додаток на твојот Gmail акаунт наречен како Rapportive. Тоа е алатка која ќе додаде податоци од социјални медиуми за твоите контакти. Кога ги знаеш тие податоци ќе можеш да одиш и еден чекор понапред во градење на едни долгорочни односи со нив. За оваа алатка веќе имавме објавено едно видео кое можеш да го погледнеш подолу.

post

[Видео] Seth Godin за идеите и успехот

Уште едно видео за кое сметам дека треба и МОРА да се погледа (бара само 8 минути од твоето време) а сепак објаснува кои идеи успеваат и зошто? Дали се во однос на идејата или се бара и нешто друго – привлекување на внимание?

post

Како да ја анализираш конкуренцијата?

Конкуренција

Конкуренција

Дали знаеш што твоите главни конкуренти прават на пазарот?

Како одговараш на нивните акции?

Дали имаш стратешки имплементиран процес кој ќе те води низ соодветно истражување и одговор на конкурентските чекори?

Конкуренцијата за еден претприемач секогаш ќе биде реалност која не може да се избегне. Тие се тука, околу тебе и твојот бизнис. И може да имаат влијание на твоите севкупни бизнис активности.

Доколку сакаш да успееш, ти како еден претприемач секогаш мора со едното око да гледаш во твојата конкуренција. Секогаш мора да ги користиш информациите од твоите истражувања за да ги донесеш вистинските одлуки за идните чекори на твојот бизнис.

Кои се тие? Што прават? Кои се импликациите врз твојот бизнис од она што тие го прават? Што треба да направиш?

Овие прашања секогаш ќе те следат и тебе и твојот бизнис. Затоа мора постојано да ја анализираш конкуренцијата како сегашна така и идната, потенцијална конкуренција.

Да видиме 9 начини кои можеш да ги искористиш за оваа цел, кои секако не се конечни.

#1 Започни со Google

Добра стартна позиција на твоето истражување е Google, најголемата онлајн база на податоци. Побарај со различни зборови кои го опишуваат твојот бизнис, твојот пазар и твојата индустрија. Особено внимание посвети на зборовите кои најверојатно потенцијалниот купувач би ги користел кога бара решение за проблем кој твојот бизнис го нуди.

#2 Не заборавај ги социјалните медиуми

Следното место каде што може да продолжиш со твоето истражување претставуваат социјалните медиуми. Погледни преку Twitter Search и Facebook и пронајди ги профилите на компаниите твоите конкуренти (доколку имаат). Можеш да пронајдеш многу информации, трендови, идеи… Сега, тука е и Google+ (патем, можете да го следите Претприемач на Google+) кој има или ќе има огромен потенцијал за да дојдеш до различни информации кои ќе те интересираат.

#3 Прашај го твојот продажен тим

Твојот продажен тим е во секојдневен контакт со твоите потрошувачи. Тие може да знаат што твоите купувачи мислат за твоите најголеми конкуренти. Зошто да не ги искористиш тие информации?

#4 Прашај ги твоите купувачи

Твоите купувачи се најдобриот извор на информации кога станува збор за твојата конкуренција. Зошто да не ги прашаш што мислат за твојата конкуренција. И зошто те избрале тебе намсето нив?

#5 Спроведи анкета

Анкетите се постојано добар извор на информации кога станува збор за истражување на пазарот и конкуренцијата.

#6 Снабдувачите може да бидат одличен извор на информации

Твоите снабдувачи може да бидат и снабдувачи на твоите конкуренти. Зошто да не се обидеш да извлечеш некои информации за твоите конкуренти (кои ги имаат во изобилство) од нив?

#7 Разгледај ги нивните понуди

Нивните понуди се место каде тие ги опишуваат вредностите кои тие ги нудат на пазарот. Тие се неверојатен извор на информации за тебе.

#8 Поставувај прашања за нив и за нивните акции

Поставувај прашања за нив и нивните акции и чекори кои ги преземаат. Поставувај многу прашања, и обиди се да ги најдеш одговорите.

#9 5 Зошто

На секоја информација или на секое прашање кое ти како еден претприемач даваш одговор за твојата конкуренција користи го 5 Зошто принципот.O 5 Зошто значи дека ќе мора да се прашаш себеси 5 пати зошто за се кога станува збор за конкуренцијата. Ова е нешто што ќе те води во едно подлабоко истражување на твојата конкуренција.