post

Интересни неделни информации 20.09-26.09.2010

Неделни вести на претприемач

Неделни информации на претприемач

Избор на вести од претходната недела на претприемач

Либерализација на .мк доменот

Се најавува либерализација на .мк доменот. Ќе се овозможи регистрирање на правни и физички лица. За полесна регистрација МИО најавува мрежа на компании кои ќе го претставуваат МАРНет  и ќе обезбедат полесна регистрација на домените. МАРНет ќе се регистрира како јавна установа и се очекува да отпочне со работа од 1 јануари 2011 год.
Компаниите кои ќе ги продаваат домените, заедно со МАРНет ќе ја утврдуваат провизијата по домените. Се најавува и домен со кириличен фонт, но тоа ќе се утврдува откако МАРнет ќе се реализира, т.е. да се заврши регистрацијата како јавна установа и откако ќе се дефинира и вработи потребниот кадар со телекомуникациско искуство.
Со овој чекор ќе се овозможи регистрација на домен во секој град од Македонија без потреба да се оди во просториите на МАРНет или документите да се праќаат по пошта. Физичко лице што ќе регистирира домен ќе биде внесено во регистарот на домени со име и презиме, а не преку фирма која ја направена регистрацијата за него. Останува и да се дефинира дали регистрацијата ќе може да се реализира on-line.

Обука Обука за фирми во Општина Аеродром

Општина Аеродром најавува презентација на програмите “Пристап до финансии” и “Моја кариера”, наменети за мали и средни претпријатија. Презентацијата е планирана за петок.
Првата програма ја објаснува методологијата со која може полесно да се финансира одреден бизнис, додека втората служи за подетално запознавање на пазарот на трудот и можностите за ангажирање волонтери. Презентацијата ќе се одржи во соработка со општините Кисела Вода и Сопиште.

no internet Дваесет проценти од фирмите немаат интернет

Годинава 84,1 проценти од претпријатијата од финансискиот и од нефинансискиот сектор со 10 или повеќе вработени имале пристап на интернет, соопшти Државниот завод за статистика.
Пристапот на интернет 73,6 проценти од компаниите најчесто го употребувале за банкарски и за финансиски услуги, а само 5,3 проценти реализирале продажба преку интернет во 2009 година. Во јануари 2010 година, 13,8 проценти од деловните субјекти имале дефинирана безбедносна политика во информатичко-комуникациските технологии .

Соларната енергија ги привлекува инвеститорите

Од Агенцијата за енергетика изјавуваат дека постои голем интерес за изградба на соларни електроцентрали. Поднесени се околу 57 барања, а од 8-те започнати, 6 се со македонски капитал, а 2 се странски инвестиции. Единствен проблем е загарантираната цена за мегават час електрична енергија добиена од овие централи. Од советот за евроинтеграции велат дека иако декларативно се заложуваат за привлекување на странски инвестиции, на вложувачите не им се дозволува да градат таму кај што се заинтересирани. Првично загарантираната цена беше 460 евра за мегават час за следните 20 години со што инвестицијата би се вратила за 5-7 години. Сега гарантираната цена е намалена на 260 евра за мегават час за следните 15 години, со што периодот за враќање на инвестицијата дупло се зголемува и би можела да ја направи инвестицијата неатрактивна.

Сименс договори доживотно вработување на своите работници

Во Германија каде што вообичаено има добри односи помеѓу вработените и управувачките структури, за прв пат се случува договор со кој на 128.000 работници им е ветено дека нема да има принудни отпуштања. Договорот го склучил Сименс со работничкото собрание и синдикатот на работниците. Ова ја ограничува компанијата да им се закани на вработените со отпуштање во случај на штрајк, па дури и кога бараат поголеми плати. Воедно, компанијата е обврзана да ги извести вработените доколу планира да продаде дел од компанијата и работниците имаат право да одлучат за најдобриот купувач.
Единствена дупка е што било која од договорните страни може да одлучи да го раскине договорот кога сака.

пари Финансиски друштва дополнително ќе го кредитираат стопанството и населението

Владата најави можност за регистрација на финансиски друштва кои со основачки капитал од мин. 100.000 евра ќе можат да кредитираат фирми и физички лица. Со оглед на висината на основачкиот капитал, нема да претставуваат сериозна конкуренција на деловните банки, но малиот број на вработени и не постоење на потреба за доставување на извештаи до Народната Банка значително ќе го намали времето потребно за пласирање на парите. Успехот на бизнисот многу често зависи од брзината и пристапот кон ликвидни средства. Се очекува овие друштва да финансираат од 10 до 15.000 евра по клиент, а воедно ќе може да издаваат кредитни картички, гаранции, а ќе ги контролира единствено Министерсвото за финансии.
Од Народна банка и деловните банки нема коментари, единствено велат дека не биле консултирани при носење на оваа одлука.

post

Фаза опаѓање од животниот циклус на производите

Животни циклуси на производи

Животни циклуси на производи

Фазата опаѓање е предпоследна фаза од животниот циклус на производите. Досега го поминавме развојот на новиот производ и секако го воведовме на пазарот со отпочнување на официјалната продажба. Тој производ влезе во фазата на раст и зрелост, за потоа да дојде во фазата стагнација која едноставно претставува продолжување на зрелоста. Оваа фаза (опаѓање) од животниот циклус на производи всушност претставува првиот знак дека треба да се подготвуваме за прекин на производство и продажба на тој производ.

Зошто сега опаѓање?

Како што поминува времето, така ќе се менува и расположението на купувачите во однос на соодветен производ и/или услуга предизвикано со промени на потреби, промени во размислувања, промени во околината… Сето ова влијае да се формираат голем број на ниши на пазарот кои ќе бидат водени од претприемачи на малите бизниси, со што полека но сигурно пазарот ќе почне да се цепка на поситни делови.

Претприемачите спротивставувајќи се на таа status quo ситуација на пазарот, и долго време без некои покрупни иновации кои доведуваат до мала дремка на големите компании, големите играчи на пазарот и сите мали бизниси кои едноставно се задоволуваат со трошките останати од големите, ќе доведат сосема нови идеи кои полека, но сигурно ќе бидат прифаќани од одредена група на купувачи.

Поради тие нови идеи преку алтернативни начини за задоволување на потрошувачите ќе започне опаѓање на продажбата и влез на еден производ во фазата опаѓање од животниот циклус на производите.

Карактеристики на фазата опаѓање од животниот циклус на производите

Накратко ќе се обидам да ги систематизирам карактеристиките на оваа фаза:

  • Намалување на продажбата. Прва карактеристика која би ја издвоил е намалување на продажбата на тој производ и/или услуга како резултат на заситеноста на потрошувачите и идеите за алтернативни начини за задоволување на потрошувачите.
  • Големите компании се последни кои ќе го почувствуваат ефектот од намалување на продажбата. Нормално, бидејќи имаат големо учество на пазарот намалувањето на продажбата ќе има помало влијание за големите компании.
  • Не е дозволиво успивање. Иако досега во претходните две фази беше еден период на условно кажано „опуштање“, оваа фаза е период кога мора повторно да се разбудиме од сонот на „нашата голема високост“ и нормално да донесуваме одлуки.
  • Потребен е поглед кон иднината. Каде ќе се движи компанијата понатаму во поглед на развојот на нов производ и/или услуга? Одлуката мора да се донесе во оваа фаза.

Иднината на производот…

Иднината на производот исклучиво ќе зависи од одлуката на компанијата. Пазарот веќе си го кажува своето – не го сака веќе! Постојат две алтернативи:

  • Спротивставување на промени ризикувајќи компанијата веќе да не постои
  • размислување за опцијата за елиминирање и започнување со подготовка на нов циклус преку развој на нов производ.

Интересен случај поврзан со оваа фаза од животен циклус на производите кој една многу успешна компанија од 80-тите години на минатиот век ја доведоа до банкрот и губење од глобалната карта на бизниси е опишан во Производ кој не може да се убие.

post

Интересни неделни информации 13.09-19.09.2010

Неделни вести на претприемач

Неделни вести на претприемач

Избор на интересни вести за минатата недела 13-19.09.2010

ВИП оператор, подршка за млади програмери и иноватори

ВИП

ВИП  се покажува како компанија со општествена одговорност која дава подршка за иновативноста и креативноста кај младите програмери. ВИП веќе имаше конкурс на кој конкурираа околу 300 апликанти со свои проекти. Победниците на конкурсот добија чек од 500.000 ден. и телефон htc desire. Проектот кој што беше награден е софтверска апликација  ”Поправи МК“  која работи на андроид платформата.

Апликацијата овозможува брзо откривање на проблеми и истите бргу да се пренесат до надлежната институција со точна локација и опис на проблемот.

При неодамнешна посета на салонот на ВИП, ни беше презентирана апликацијата за плаќање на паркинг во Скопје. Помага при лоцирање во која паркинг зона се наоѓате и колку би требало да се плати за 1 час паркинг, без дополнително да ја барате таблата на која се истакнати тие податоци.

Дополнително ВИП најавува намалување на цените за мобилната телефонија и вели дека не планираат да се вклучат во фиксната телефонија и телевизијата додека не се исцрпат сите можни услуги во мобилната телефонија. Нивната промотивна понуда за потпишување на договор за користење на нивните услуги за 2 годишен период во кој се плаќа само 50% од претплатата беше одлична можност за сите нас што сакаме да си ги намалиме месечните сметки за телефонски разговори. Најдобра понуда беше за 1500 ден. месечна претплата за која нудат 1000 мин разговор во мрежата на ВИП и 1000 мин разговор кон сите останати мрежи. Со нетрпение ја чекаме следната промотивна понуда на ВИП операторот.

Рокот за регистрација на возилата со бугарски регистарски таблички до 30-ти септември

bg tabla

Минатата недела сопствениците на коли со бугарски регистарски таблички протестираа бидејќи не сакат да ги платат увозните давачки туку само регистрација и осигурување. Владата соопшти дека останува на својот став дека нема да има законски измени и рокот за регистрација останува до 30-ти септември. Доколку некое возило не е пререгистрирано и по потврда од царина дека престојувало во државата повеќе од 6 месеци, следува казна од 100 евра до одземање на возилото. Истите проблеми ги имаат и сопствениците на коли со странски таблички во Хрватска. Но таму за ослободување од царина се бара лицето сопственик да нема никакви приходи во државата, да нема здравствено осигурување или право на пензија. За разлика од Хрватска кај нас единствено се бара возилата да се пререгистрираат при што треба да се плати царина, акциза, ДДВ и хомологација.

Македонија конечно во “Карго 10“

По неколку најави и дилеми дали да се приклучи или не, Македонија конечно влезе во проектот “Карго 10“ за формирање на заедничко претпријатие за железнички сообраќај по иницијатива на Словенија, Хрватска и Србија. Проектот ќе овозможи скратување на времетраењето на патувањето преку кратење на царинските и граничните формалности, но и преку кратење на пругите. Со приклучување на Македонија се очекува патувањето од Солуна до Љубљана да се скрати за 7 часа. Заинтересираност за приклучување кон овој проект постои и кај Грција, Босна и Херцеговина и Црна Гора. Крајна цел е стоката што се превезува кон Блискот исток да минува низ овој коридор со што патувањето на возовите од Истанбул до Љубљана би се скусило од 57 на 35 часа а и ефектите за “ Македонски железници“  и железниците на земјите вклучени во овој проект би биле големи.

За 20 години 3 пати повеќе пилоти

Моментално во подршка на глобалниот авионски превоз се вклучени околу 223 илјади пилоти и 100 илјади механичари и инженери. Американскиот произведувач на авиони “Боинг“, тврди дека за 20 години на авионскиот сектор ќе му бидат потребни дополнителни половина милион нови пилоти. Како втор најголем произведувач по “Ербас“,  “ Боинг“ предвидува дека ќе треба и половина милион  работници кои ќе работат на одржување. Проценките се темелат на пораст на обемот на патничкиот сообраќај, посебно во азиско-пацифичкиот регион, каде што и ќе се појави потреба за  40% од горе споменатиот потребен кадар.

Извоз на 30.000 тони бостан од Македонија

Ако не може да се пофалиме со друго, тогаш треба да се истакне фактот дека земјоделските култури и производи чинат голем дел од македонскиот извоз. Имено до сега се извезени околу 30.000 тони бостан и диња, главно во Србија, Босна и Херцеговина, Косово, Чешка, Полска, Украина но и други земји од Европската Унија. Вкупната берба беше планирана во обем од 50.000 тони, но лошите временски услови ги спречија македонските извнозници целосно да ги исполнат договорите за извоз. Земјоделците изјавуваат дека цените за откуп ретко били добри како што беа годинава 7-10 ден за кг лубеница. Лошите временски услови во другите земји наметнаа цените да се движат нагоре и трговците да бараат поголеми количини, но слабите реколти не дозволија да се задоволат нивните барања. Во секој случај ова е позитивно за Македонија, за платниот биланс на земјата, но и за транспортните компании чии капацитети беа  до максимум искористени за извоз на земјоделските производи.

Историски максимална цена на златото.

злато

Минатата недела златото го постигна историскиот максимум во однос на цената. Унца злато се продаваше за 1280,5 долари за фина унца (31,5 грама). Се очекува во текот на оваа недела цената да се покачи дополнително. При нестабилност на финансиските пазари и флуктуација на валутите, инвеститорите се свртуваат кон она што е најстабилно, а тоа е златото и уметничките творби. Паѓањето на каматните стапки на федералните резерви, дополнително ги насочува инвеститорите кон вложување на средствата кон овој скапоцен метал.

Тужби за Стопанска и Тутунска банка

Со тужби од вкупен износ од 275 милиони евра се здобија двете најголеми банки во Македонија “Стопанска“ и “ Тутунска“  банка, пишува неделниот весник „ Форум“. Тужбите се од компании кои ги користеле услугите на двете банки. Компанијата која ја тужи „Стопанска банка“ е  „Капитал консерватор сејвинг енд лоун лимитед“ од Нов Зеланд која пред три месеца почна судска постапка во која од „Стопанска банка“ побарува отштета од 250 милиони евра, што е еднакво на целокупната вредност на капиталот на друштвото.

Во другиот случај тетовската фирма „Плаза“ бара отштета од „Тутунска банка“ од речиси 27 милиони евра, што е 38% од капиталот на банката.

Двете банки не се произнесуваат  за природата на тужбата, но имаа барање до Агенцијата за приватизација да не ги објавуваат информациите што не е можно поради фактот што тужениот износ е поголем од 5% од вредноста на банките.

post

Претприемач: Претходна недела од 13 септември и идна недела од 10 септември 2010

Претприемач - Претходна и идна недела

Претприемач - Претходна и идна недела

Да направиме едно потестување за тоа што беше на претприемач минатата недела и кој е распоредот за идната недела. Подготвувам некоку измени на веб сајтот кои ќе бидат активирани во иднина кога ќе ги завршам. Најголемите измени се во делот на билтените кои ќе бидат поорганизирани по теми и кои на некој начин една работна верзија ја претставив во постот за аутореспондер како маркетинг средство.

Работна верзија на новиот дизајн на билтени на претриемач

Но, се во свое време (да го имавме повеќе). Да започнам со она што ќе биде:

Идна недела на претприемач

  • Ценовна стратегија – Случај на Apple
  • CPC – Маркетинг средство 72
  • Ризичен капитал
  • Бизнис прилагодување со технологијата
  • Фаза опаѓање од животни циклуси на производи

А, сега следува сублимирање од претходнта недела:

Понеделник, 13.09.2010 – Нов серијал на видео материјали на претприемач

Во овој пост се прикажани презентациите од новиот серијал на видео материјали на претприемач.

Понеделник, 13.09.2010 – Интересни неделни информации 06.09-12.09.2010

Како интересни неделни информации ги издвоивме следниве: намалување на резерви на нафта, поголеми дневници за работа на празник, Facebook како алатка за крадците, банки и мафијата и инвестирање во новорастечки економии.

Вторник, 14.09.2010 – Размена на сообраќај – Маркетинг средство 70

Ова е 70-тото маркетинг средство на претприемач. Се размислував дали да биде оваа маркетинг средство дел од овој серијал од 100 маркетинг средства, особено поради тоа што го тестирав едно 6 месеци пред извесен период. Во секој случај добро е да се има во предвид.

Среда, 15.09.2010 – Зошто некој успева а некој не успева?

За започнување на бизнис доволна е бизнис идеја и пасија за тој бизнис. Но, за да се одржи и да се израсне потребни се многу дополнителни елементи кои треба еден претприемач да ги поседува. Во овој пост се претставени неколку мои размислувања зошто некој успева, а некој едноставно не успева.

Четврток, 16.09.2010 – Како да бидете еден чекор пред конкуренцијата?

Да се биде пред конкуренцијата бара комбинација на знаење за најважните бизнис елементи како конкуренцијата, потрошувачи, и производи и/или услуги кое ќе обезбеди вашиот бизнис секогаш да биде пред конкуренцијата. По собирање на доволно знаење на овие три елементи, вашата задача како претприемач е да ги подобрите сите овие бизнис процеси согласно тоа знаење.

Петок, 17.09.2010 – Фаза стагнација од животниот циклус на производите

Фазата стагнација од животниот циклус на производи всушност претставува продолжување на претходната фаза – фаза зрелост. Тоа значи дека раст веќе нема да има, продажбата ќе биде на едно константно, но сеуште највисоко ниво бидејќи сеуште не е започнато опаѓање…

post

Зошто некој успева а некој не успева?

Некој успева а некој не!

Некој успева а некој не!

Постојат различни анализи и истражувања кои покажуваат дека повеќето кои сакале да се испробаат во претприемничките води не успеваат, додека доста помал дел успеваат. Не е лесно да се биде претприемач, а особено кај нас во Македонија каде во многу елементи еден претприемач е оставен самиот на себе.

За започнување на бизнис доволна е бизнис идеја и пасија за тој бизнис. Но, за да се одржи и да се израсне потребни се многу дополнителни елементи кои треба еден претприемач да ги поседува. Да, не звучи престрашно, сето тоа се учи низ искуство. Не значи дека ако некој нема познавање од маркетинг не треба да започне бизнис, но треба да биде свесен дека ќе треба да ги зголемува тие свои способности веќе во првиот ден откако ќе ја отвори вратата на бизнисот.

Во овој пост ќе претставам неколку мои размислувања зошто некој успева, а некој едноставно не успева.

1. Не е до идејата, до претприемачот е!

Често пати како причина за неуспех се става бизнис идејата. Сега, може и да е, но не верувам дека некој ќе започне бизнис за кој нема потрошувачи за да се нападне бизнис идејата. Правило број еден за секоја бизнис идеја е да се има минимум еден купувач, а тоа да не е претприемачот и неговото блиско семејство. Така да не барајте ја причината за неуспех во Вашата бизнис идеја, причината сте Вие.

2. Не сме сите исти!

Сите сме различни. Сите имаме различни размислувања, навики, идеи, способности, знаење… Не можеме да очекуваме дека секој ќе биде добар пекар. Некој ќе биде добар пекар, додека некој ќе биде добар дизајнер. Па, и ако земеме двајца пекари не можеме да очекуваме дека ќе имаат ист успех. Еден ќе има подобар квалитет, подобри стартни финансии, подобар продажен тим…

3. Започнување на бизнис не е исто со одржување и растење на бизнисот!

Точно така! Едно е да се започне бизнис, што е навистина најлесен елемент од фазата на животни циклуси на бизниси. Но, да се одржи и да се расте еден бизнис е нешто сосема друго и бара сосема поинакви активности, знаења и способности од страна на еден претприемач. Многу луѓе сметаат дека ќе започнат бизнис и тоа е најголемиот успех. Тоа не е ништо, само едноставен почеток на едно долго патување во светот на равенствата со повеќе непознати.

4. Не е само пасијата она што е потребна

Започнување на бизнис без пасија за тој бизнис претставува знак дека во старт нешто се осудува на неуспех, но од друга страна само пасијата не е доволна за да се стигне до успех. Затоа не значи дека ако имате пасија ќе бидете и добар и успешен претприемач, а Вашиот бизнис ќе цвета само заради таа ваша пасија. Сепак потребно е прво да ја проширите пасијата и на останатите бизнис функции како маркетинг, финансии и продажба, а потоа и на постојано зголемување на Вашето знаење за индустријата и бизнисот воопшто.

5. Не е до конкуренцијата, до Вашата креативност е!

Често пати полесно е да ја нападнеме конкуренцијата како причина за нашиот неуспех. Но, дали навистина сме очекувале дека нашиот бизнис нема да има конкуренција. Како што ние се бориме, така и нашата конкуренција се бори за секој купувач. Не се тие виновни, виновни сме ние и нашата послаба креативност во привлекување на потрошувачи за нашиот бизнис. Денеска покреативните успеваат.

post

Интересни неделни информации 06.09-12.09.2010

Неделни вести на претприемач

Неделни вести на претприемач

Наш избор на вести за минатата недела:

Резерви на нафта уште 10 години?

Изворите на нафта не се непресушни и се резултат на процес на фосилизација која траела со илјадници години. Научниците од службите за геологија и природни богатства проценуваат дека за 10 години ќе се исцрпат резервите на конвенционалната нафта. Решение е во нови извори на енергија кои полека би го замениле традиционалото гориво на 20-тиот век – нафтата. Новите биолошки горива ќе покриваат 12% од потребите до 2020 год. Проблемот е во цената на растителните продукти од кои се добиваат биолошките горива и нафтата. Засега цената на нафтата е доста поефтина, за илустрација 1 тон жито достигна цена и од 100 долари, што прави земјоделците да садат жито, а не шеќерна репка за производство на био горива. Ако би се правела пресметка од енергијата добиена од 1 тон жито, заклучок е дека е многу повеќе од енергијата добиена од нафта, што ја прави ситуацијата нелогична, но тука се инвестициите во нови погони за производство на нов тип на гориво, како и опасност од недостиг на храна на светсиот пазар, кога земјоделците целосно би се насочиле кон производство на суровина за био горива. Со оглед на фактот дека се предвидува цената на барел нафта да порасне на 100 долари а до 2030 год. и на 190 долари за барел, сигурно е дека полека ќе почнеме да се префрлуваме на поновите горива. Дополнително во корист на биогоривата е и фактот што им се зголемува ефективноста поради можноста за повеќекратна употреба, т.е. повторна термичка обработка за добивање на дополнителна енергија. Единствено ќе мора плански да се распоредуваат обработливите површини, за да не се ограничи прахранбената и добиточната продукција.

Работа на празник – поголема дневница

Минатата недела Македонија славеше 2 празника, денот на Уставноста и Бајрам Рамазан. Верувам дека многу сопственици, претприемачи не беа многу задоволни од 2 неработни дена во среднината на неделата, бидејќи ја прави неефикасна и непродуктивна целата работна недела. Од аспект на бизнис тоа значеше една седмица неработење – резултат на нашиот менталитет. Користа е на страната на работниците кои добиваат дополнителен одмор од напорните работни места. Државните институции, јавните претпријатија и големите комапнии се придржуваа на законот, но помалите фирми често ги кратеа празниците или воопшто немаа прекин на работата. Од Министерството за труд и социјала велат дека се свесни за оваа појава и затоа во текот на двата празнични дена беа излезени на терен и контролираа дали сопствениците се придржуваат на законските директиви. Законот јасно укажува дека работодавачот треба да направи реорганизација и дека на работникот му следува дневница и пол и две и пол дневници за работа на државен празник. Секако дека пак треба да се запази да не се надмине неделно предвидениот број на работни часови на работникот. Не постои можност работникот да добие дополнителен слободен ден или некаков друг надомест. Трудовата инспекција направила записници за фирмите кои ги има прочешлано во двата празнични денови. До 15-ти Октомври ќе се направи уште контрола за да се види дали работодавачите нависитна имаат исплатено две и пол дневници. Во спротивно казните се 15 илјади евра за правно лице и 7500 евра за директорот.

Банките спасени од Мафијата

Банките како најпогодени од светската економска криза, за спас посегнале по парите на Мафијата – изјавува британскиот весник „Гардијан“. Водечките светски банки во очај посегнале по овие средства кои по некоја проценки изнесуваат 352 милијарди – профит од трговија со дрога, оружје и луѓе. Ова го признал и шефот на агенцијата на Обединетите нации за борба со дрога и организиран криминал. Околу една петтина од глобалната економија отпаѓа на организираниот криминал.

Крадци пикирале куќа – плен на база на Фејсбук статус.

Кога објавувате статус на Фејсбук дека се спремате или заминувате на одмор, можеби е паметно да највите и дека имате добар алармен систем, чувар, ротвајлер или сл. Или подобро воопшто не објавувајте таква информација. Од Њу Хемпшир, САД, доаѓаат информации за крадци кои влегувале во куќи за кои претходно знаеле дека се празни благодарејќи на Фејсбук статусот на сопствениците. Успеале да ограбат 18 куќи и да се стекнат со вредност до 200.000 долари. Фатени се, но Фејсбук има огромен број корисници, никогаш не знаете кој ве следи и која му е намерата.

Инвестирање во ново растечки економии

Минатата недела претседателот на САД – Обама, се обрати пред нацијата и меѓу другото најави трошење на 50 билиони долари за подобрување на патиштата, железницата, аеродромите и другите инфраструктурни потреби. Но инвеститорите би требало своето внимание да го насочат кон пазарите и економиите во пораст.
Се очекува земјите во развој во наредните 3 години да потрошат повеќе од 100 пати од она што САД планираат да го потрошат во наредните 6 години. Околу 4 трилиони од вкупно проценетите  6,3 трилиони долари се поврзуваат со проекти во Кина, додека останатите обврски и проекти се планирани од приватниот и државниот сектор во Бразил, Русија, Мексико, Јужна Африка и блискиот Исток.
Компаниите кои градат или одржуваат инфраструктура, патишта, мостови и др. во Кина, Бразил и другите пазари во подем, во своите проекции имаат зацртано добивка.

За тоа постои и логично објаснение. Во земјите во развој, во урбаните средини, секоја недела се раѓаат или доселуваат повеќе од милион луѓе. До 2025 година 21 од 25-те најголеми градови ќе бидат во земјите во развој – според извештај на Обединетите нации.За да се ораганизира толкава маса на луѓе и за да се спречи хаос, овие земји немаат друг избор освен да трошат и да да градат се од пристаништа до електрични централи. Мора да изградат инфраструктура со што би обезбедиле стабилен економски развој. Градовите со најдобра инфраструктура ќе привлечат највеќе домашни и странски инвестиции, како и човечки капитал.
Проектите нема да се спроведуваат само со цел изградба на инфраструктура. Постојат и политички мотиви. Луѓето ширум светот сакаат чиста вода, санитарни услови и постојан транспортен и енергетски систем. Владите што ќе успеат да ги обезбедат овие услови имаат поголеми шанси за придобивање на гласачкото тело.

Бразил е домаќин на Светското првенство во фудбал во 2014 и Олимпијадата во 2016. Кина е насочена кон историскиот стремеж за поврзување на западниот дел на земјата со развиениот источен приморски дел. За разлика од порано инвеститорите и банките се многу поотворени кон овие земји отколку кон САД, Европа и Јапан кои имаат огромни долгови.

Овие инвестиции се поврзани со политички ризик, т.е. нивното спроведување зависи од одлука на владите на овие земји. Во Индија владее законот но бирократијата е спора, во Кина владее поредок. Кога еднопаертискиот систем ќе рече тргаме, тоа и се случува.

Големите компании од развиените земји ја гледаат својата шанса бидејќи располагаат со технологија и know-how. Следната деценија ќе биде деценија на градење, доградување и реконструктуирање на постојното. За инфраструктурата сфаќате дека е недакватна кога е многу доцна!

Единствено инвеститорите во овие капитал-интензивни проекти, ќе мора да почекаат подолг период за наплата на вложените средства.

post

Нов серијал на видео материјали на претприемач

Новите 10 видео материјали за тоа како до веб презентација се подготвени и пуштени на сите регистрирани за билтени на претприемач. Можеби тој трансфер од стари до нови видео материјали доведе до тоа некој да ги добие не од почетното прво видео, но на секое наредно видео ги има линковите до претходните.

Сите видео материјали од претходната верзија се отворени и се наоѓаат во категоријата видео на претприемач.

Следниве презентации се дел од оној презентациски дел на овој видео серијал.

1. Регистрација на домен име и хостинг акаунт

2. cPanel – Контрол панел

3. Инсталација на WordPress

4. Инсталација на WordPress тема

5. Објавување на постови на WordPress

6. Инсталирање на WordPress додатоци

7. Изработка на статичен веб сајт – Темплејти

8. Персонализација на темплејтот

9. Поставување на видео

10. Креирање на поддомени

post

Претприемач: Претходна недела од 6-ти септември и идна недела од 13-ти септември 2010

Претприемач - Претходна и идна недела

Претприемач - Претходна и идна недела

Заврши аутопостинг модот на претприемач кој беше изминатите 2 недели. Овие постови за рекапитулар од минатата недела и план на постови за идната недела го правам првенствено за да останам организиран за насловите (кога јавно ги ветам, морам да ги исполнам) и секако еден збирен преглед за сето она што беше актуелно на претприемач во изминатата недела.

Да започнеме…

Идна недела на претприемач

  • Презентации од 10 видео материјали за тоа како до веб презентација за Вашиот бизнис
  • Размена на сообраќај – маркетинг средство 70
  • Зошто некој претприемач успева, а некој не?
  • Како да бидете еден чекор пред конкуренцијата?
  • Фаза стагнација од животниот циклус на производите

Следува сублимирање на претходната недела и распоредот за идната недела.

Понеделник, 06.09.2010 – 10 Извори на информации за успешна анализа на пазарот

Овој пост претставува освежување на еден постар пост на артикли на претприемач. Во него се претставени 10 идеи за користење на извори на информации за да спроведете успешна анализа на пазарот.

Понеделник, 06.09.2010 – Интересни вести 30.08 – 05.09.2010

Минатонеделниот избор на интересни вести падна на новата услуга за даночните обврзници – Електронски увид во даночна картица, проблеми со полнење на буџетската каса и издавање на домашни обврзници, железничка алијанса, барање на поевтин зелен картон, повеќе боледувања во 2009 година во однос на 2008 и претставување на Google Chrome.

Вторник, 08.09.2010 – Преглед на книгата Making Ideas Happen

Ова книга претставуваше моето прво искуство со една сосема поинаква технологија за читање на електронски формат на книга. Книгата е одлична и ја препорачувам на секој сегашен или пак иден претприемач, секој менаџер и секој кој едноставно се чувствува дека е полн со различни идеи кои едноставно не доживуваат да станат реалност.

Среда, 09.09.2010 – Постави ниски но остварливи, наместо високи неостварливи цели

Остварувањето на нашите цели во голем дел зависи од тоа дали тие цели се реални или не се. Но, на целите влијаат повеќе фактори и елементи. Во овој пост накратко се презентирани неколку.

Четврток, 10.09.2010 – Оптимизација за потрошувачи

Ова е еден термин кој едноставно ми се наметна гледајќи различни потрошувачи во еден бизнис со различни потреби кои бараат различни понуди. Во постот се дадени некои идеи како да се борите со овој феномен и како да успеете да задоволите повеќе различни потрошувачи со различни потреби. Ова го нареков како оптимизација за потрошувачи.

Петок, 11.09.2010 – Аутореспондер – Маркетинг средство 69

Овој пост е 69-тото маркетинг средство на претприемач во кое е дадено размислување за користење на аутореспондерите. Оваа маркетинг средство е пожелно за секој бизнис кој има сопствена онлајн презентација преку веб сајт или пак блог. Аутореспондерот е тој кој ќе се грижи за e-mail маркетингот и за комуникација и испраќање на навремена информација на потенцијалните купувачи.

post

Преглед на книгата Making Ideas Happen

Making Ideas Happen

Уште од самиот почеток на овој блог бизнис идеите се тема која доста ја разработуваме. Тие се основата и почетокот на секој бизнис, тие се денот Д во раѓањето на еден нов бизнис. Пред извесен период ја купив Kindle верзијата на Making Ideas Happen од Scott Belsky и моето првично искуство од овој нов начин на читање е на многу високо ниво за што повеќе пишував Технологија – промена на навики.

Она што во прв план можам да го кажам во однос на оваа книга е дека доста се разликува од досегашните кои сум ги прочитал за бизнис идеи. Додека повеќето книги се концентрираат на тоа како да се дојде до добра бизнис идеја Making Ideas Happen се концентрира како да добрите бизнис идеи постанат реалност (да се случат, да се трансформираат во еден успешен бизнис).

Бизнис идејата е еден од факторите кои во себе содржат бизнис потенцијална енергија (концепт кој јас го дефинирав и користам воподобрувањето на бизнисите). Но, постои опасност таа бизнис потенцијална енергија да не се претвори (трансформира) во кинетичка енергија (вистински бизнис, акција). Токму тој процес на трансформација на идејата во акција е опфатен во оваа книга.

Што опфаќа Making Ideas Happen?

Книгата започнува со следнава реченица:

Идеите не се случуваат затоа што тие се одлични идеи или заради случајност.

Значи не постои случајност или пак гаранција бидејќи идејата е одлична дека ќе успее. За да успее или да се случи идеата согласно Scott Belsky потребни е следниов збир:

Случување на идејата = Идеја + Организација + Заедница + Лидерски способности

Оваа книга опфаќа се совен доаѓање до идеите, односно самата идеја.

  1. Организација. Без соодветна организација која ќе даде соодветни акциски чекори и идни насоки за завршување на проектот (идејата) идејата може да биде заборавена и оставена некаде на страна без потенцијал да стане реалност.
  2. Заедница. Секоја идеја не смее да биде во изолација. Вашиот бизнис нема да биде само за Вас. Затоа овој концепт содржи и заедница до која треба да се распространи идејата. Освен распространувањето на идејата во оваа фаза потребно е и слушање како идејата би се подобрила.
  3. Лидерски способности. Се што е ново или креативно предизвикува отпор. Затоа ефективно лидерство во процесот на имплементација на бизнис идеи е неминовно за соодветен успех.

За кого е оваа книга?

Првенствено оваа книга е за сите претприемачи, сегашни или пак идни. Не верувам дека не постои човек кој нема барем една идеја за започнување на бизнис. Сите сме креативни, тоа е вродено кај човекот. Целиот живот се сведува на решавање на проблеми, а проблемите бараат креативност.

Но, некој има неколку а некој повеќе бизнис идеи. Не мора да значи само бизнис идеи, може да постојат и идеи за проекти, за активности, за прилагодување на животниот стил… Особена помош од оваа книга може да добјат сите оние кои имаат многу идеи, а слаба реализација. Со помош на книгата ќе научат еден процес како да ги трансферираат идеите од нешто абстрактно, непостоечко во нешто реално, опипливо.

Неколку извадоци кои ми беа интересни

Со помош на Kindle имав можност да потцртувам и да следам што другите подвлекле како интересно или важно во книгата. Од едно 50-тина highlights во книгата ќе извлечам неколку тука:

  1. За секоја идеја мора да пронајдете и да ги потенцирате акциите кои треба да ги превземете во вид на чекори.
  2. Колку се појасни и поконкретни Вашите чекори помал напор ќе имате во обид да ги комплетирате. Доколку чекорите се нејасни или комплицирани, веројатно ќе ги скокнете  и ќе се насочите на другите од Вашата листа кои се поедноставни.
  3. Кога станува збор за организирање на чекорите на дневна основа и како да ја алоцирате вашата енергија во реализација креирајте две листи: една за ургентни чекори и една за важни чекори.
  4. Направете дневни подрачја за фокусирање.
  5. Без разлика дали работите сами или со тим, посветеноста на раните чекори (акции) ќе помогне идејата да се материјализира.
  6. Голем дел од извршувањето зависи од упорноста.
post

Интересни вести 30.08 – 05.09.2010

Неделни вести

Неделни вести

Избор на интересни вести за минатата недела:

УЈП – Нова услуга – ЕЛЕКТРОНСКИ УВИД ВО ДАНОЧНА КАРТИЦА

Oд 1 септември 2010 година, Управата за јавни приходи воведе нова услуга за даночните обврзници – Електронски увид во даночна картица.

Услугата e достапна за сите правни субјекти и вршители на дејност кои се корисници на електронските услуги на УЈП, односно за секој даночен обврзник кој ќе се регистрира за користење на системот е-Даноци (http://etax.ujp.gov.mk/)

Електронскиот увид во даночна картица  би требало да овозможи, во секој момент преку вашиот компјутер, да вршите проверка и да бидете во тек со состојбата на вашите даночни побарувања и обврски кои ги води УЈП, без притоа да морате да одите лично во даночните канцеларии.

За сите дополнителни прашања во врска со новата услуга, постапката за регистрација за е-Даноци, како и пријавување за претстојните обуки кои ќе ги организира УЈП на оваа тема, УЈП ги посочува следниве контакти :

Инфо центар 0800 33 000
е-пошта: info@ujp.gov.mk

Дали ќе се издава домашна обврзница ?

Во претходните недели пишувавме дека државата има проблеми со полнење на буџетската каса, а Владата дефицитот го финансира со задолжување кај банките. Ваквата состојба придонесува за намалување на ликивидноста на стопанството од едноставна причина што банките наместо слободните средства да ги пласираат по поволни услови во стопанството, посигурно им е да откупуваат благајнички записи зад кои стои државата како гарант. Често се размислува за пуштање во оптек на еврообврзница, со што државата би се задолжила во странство. Експертската јавност е со спротиставени мислења и сугерира да се издаде домашна обврзница.
Универзитетскиот професор Томе Неновски, вели дека овој потег би имал позитивни ефекти, а каматата би била пониска од евентуално издавање на еврообврзница. Би ги извлекло домашните девизни резерви на граѓаните, би се добил нов прилив на средства во девизи и би се зголемиле девизните резерви на државата. Со тоа би се заштитил девизниот курс на денарот и платно-билансната состојба и би се надополнил буџетот .

Од друга страна поранешниот министер за финансии Никола Поповски, сугерира дека не е добор државата повторно да се задолжува и дека треба да се применат мерки за намалување на задолжувањата.
Без разлика на мислењата на експертите, за Вторник веќе е најавено ново задолжување на државата преку издавање државни записи.

Македонија дел од Железничката Алијанса?

На 1-ви октомври треба да почне да функционира новото претпријатие за железнички сообраќај кое е резултат на проект започнат од 3 земји: Србија, Хрватска и Словенија. Седиштето на компанијата ќе биде во Словенија, како земја членка на ЕУ, а проектот има за цел да го направи поефикасен и побрз железничкиот сообраќај долж коридорот 10.

Претставници на Македонски Железници беа на разговори во Словенија и укажуваат дека подготовките за приклучување на Македонија кон овој проетк наскоро ќе почнат. Ова е проект од кој Македонија не би требало да остане исклучена и што би ни овозможило да ја модернизираме нашата железница, но и да се приклучиме кон трговските и патнички рути кои овој проект ќе ги овозможи.

Нашата Влада цени дека ова е интересна иницијатива, но за својот став ќе ја известат јавноста откако ќе ги разгледаат сите факти.

Се проценува дека трите земји, инволвирани во проектот, на годишно ниво од новиот концепт ќе имаат по околу 50 милиони евра добивка.

Камионџии бараат поевтин зелен картон !

На 02.09.2010 камионџиите упатија ултиматум до премиерот за намалување на цената на зелениот картон. Ако во рок од 5 дена не им се исполни барањето, најавуваат блокада на главниот град.
Освен за транспортерите, цената е висока и за другите учесници во сообраќајот. Осугурувањето се наплаќа 2 пати, еднаш при регистрација на возилата и вторпат при излез на возилата од државата. Надлежните служби најавуваат одоговор во втората полвина на месецот.

За компарација, годишен зелен картон во Македонија чини 160 евра, плус осигурување од оклоу 100 евра, додека во Бугарија истото чини 104 евра, во Србија 117 евра.

20% повеќе боледувања во 2009 во однос на 2008

Од Фондот за здравствено осигурување дека постои позитивен тренд во однос исплати за боледување на македонските граѓани. Тоа делумно се должи на владината политика за зголемување на наталитетот и исплати за породилно отсуство. Но, од друга страна постои и негативна појава на драстичен пораст на боледување кај работниците. Во 2005 год биле доделени 6.325 боледувања, а минатата година оваа бројка пораснала 16.527 што е пораст од 265 отсто. Се најавуваат засилени контроли во постапката за доделување на боледувања.
Се ствара слика дека македонските граѓани повеќе сакаат да боледуваат отколку да работат, но во суштина голема улога игра огромниот пораст на нововработените административци, на кои им е полесно да земат боледување кое го добиваат без проблем, отколку да да одат на работа, каде што немаат доделено работни задачи, ниту место за седење. На ова се надоврзува непрофесионализмот во македонските компании и се поактуелниот мобинг, кој прави на работниците да им е непходно да земат ден плус надвор од предвидените одмори, како би го издржале секојдневниот стрес.

Хром во подем!

Интернет гигантот „Гугл“ ја претстави шестата верзија на „Хром“, точно на вториот роденден на овој се попопуларен Интернет пребарувач

Главниот акцент е ставен на брзината и едноставноста, но „Хром 6“ има и голем број на други подобрувања. Овој модерен Интернет пребарувач има вградено нова верзија на познатиот „Адобе флеш“, а најзначајно е тоа што користи ХТМЛ-5.
Според истражувањара „Хром“ веќе има удел од 7,5 проценти од пазарот на Интернет пребарувачи. Првите две места и натаму ги држат „Мајкрософт Интернет Експлорер“ со 60,4 проценти и „Мозила фајарфокс“ со 22,9 проценти од пазарот. Успехот на „Хром“ е многу позначаен доколку се земе предвид дека „Опера“ по десет години постоење има само 2,4 проценти од корисниците.