post

Бизнис Потенцијална Енергија VS Бизнис Перформанси

Ќе продолжам со образложување на методологијата за користење на бизнис потенцијална енергија во подобрување на перформансите на бизнисот.

Целта на овој напис е да даде одговор на врската помеѓу бизнис потенцијалната енергија (терминот кој јас го сковав пред повеќе од една година) и перформансите на бизнисот.

Бизнис потенцијална енергија наспроти перформансите на бизнисот

Што претставуваат перформансите на бизнисот?

Првин би тргнал со перформансите на бизнисот. Перформансите означуваат можност на еден индивидуалец или пак група да ги исполни саканите таргети, поставени од самиот себеси или од некој друг (на пример менаџерот). Додека:

Бизнис перформансите ќе бидат можности на еден бизнис да ги оствари поставените цели.

Од друга страна, перформансите претставуваат мерка на остварени резултати. Доколку оствариме поголеми резултати ќе имаме и поголеми перформанси и обратно со помали или никакви резултати, слаби или никакви перформанси.

Влијание на бизнис потенцијалната енергија врз перформансите

Влијанието на оваа енергија врз перформансите има линеарна функција, а тоа значи:

  • Поголема бизнис потенцијална енергија, поголеми бизнис перформанси и
  • Обратно, помала бизнис потенцијална енергија, помали перформанси на бизнисот.

Но, тука недостасува нешто, а тоа нешто е трансформацијата на потенцијалната енергија во кинетичка енергија. Без кинетичка енергија со која бизнисот ќе извршува работа, перформансите нема да се зголемат. Поради тоа, оваа линеарност не може да ја земам како исправна или точна.

Затоа мора да се вклучат следниве фактори кои влијат на перформансите на бизнисот:

  • Бизнис потенцијална енергија (BPE).
  • Број на круцијални бизнис елементи (N). Ова се бизнис елементите кои содржат бизнис потенцијална енергија за кои пишував во 10 Основни елементи со потенцијална енергија.
  • Веројатноста за трансформација на бизнис потенцијалната енергија во кинетичка енергија (P).

Сега кога ги имам факторите кои влијаат на перформансите, ќе можеме да ја утврдиме зависноста помеѓу бизнис потенцијална енергија и перформансите.

Прво, оваа зависност има експоненцијална функција. Во експоненцијалната функција како што расте еден елемент ќе расте и целата функција. Оваа функција ќе биде:

Каде:

  • BP = Бизнис перформанси
  • P = Веројатноста за трансформација на бизнис потенцијалната енергија во кинетичка енергија и
  • N = Број на круциални бизнис елементи кои ќе ги избереме за да ја зголемиме таа потенцијална енергија.

Со оваа формула ги покриваме сите круциални фактори кои влијаат на перформансите. Од друга страна ќе бидеме во можност експоненцијално да ги зголемиме перформансите на бизнисот доколку ги зголемиме потенцијалната енергија, круцијалните елементи на бизнисот и веројатноста за трансформација на таа потенцијална енергија во кинетичка енергија.

Илустративен пример

Можете да го забележите следново од она што досега го изложив:

  • Вредноста на бизнис потенцијалната енергија (BPE) ќе се движи од 0 до 1 (0 < BPE < 1)
  • Бројот на круцијалните елементи (N) ќе биде позитивен број поголем од 0 (N > 0) и
  • Веројатноста за трансформација на BPE во кинетичка енергија (P) ќе биде веројатност што исто така согласно математичките принципи ќе биде од 0 до 1 (0 < BPE < 1).

Да видиме еден пример:

Пример 1 Пример 2 Пример 3 Пример 4 Пример 5
BPE 0 1 0 1 0,8
N 5 5 10 10 10
P 0,5 0,5 1 1 0,7
BP 0 2,5 0 10 3,53



Можете да забележите во првиот и третиот екстремен случај каде бизнис потенцијалната енергија е 0, наспроти другите елементи кои се добри, перформансите исто така ќе бидат 0. Кога бизнис потенцијалната енергија е максимална 1 тогаш во целост ќе ги искористиме останатите елементи во формулата за да имаме максимални бизнис перформанси.

post

Дополнителна Услуга – Маркетинг средство 44

Стигнавме до 44-тото маркетинг средство во овој серијал кој набргу ќе заврши со традиционалните маркетинг средства. Отсекогаш услугата била и ќе биде добро маркетиншко надополнување на секаков вид на производи и/или услуги кои ги продава еден бизнис.

Дополнителна услуга како маркетинг средство

На секој производ дополнителна услуга или пак на секоја услуга дополнителна услуга претставува додавање на вредност на Вашата понуда. Вообичаено бизнис светот функционира на следниов начин:

Вашиот бизнис има понуда која ја нуди на пазарот на кој има слични понуди од страна на конкуренцијата. Потрошувачите се тие кои бираат, проценуваат и одлучуваат која понуда ќе ја изберат.

На некој начин досега оваа маркетинг средство го претставивме како дел од маркетинг средството понуда од аспект на потрошувачите и супериорната вредност.

Можете да забележите дека понудата од аспект на потрошувачите во својот состав ја има суериорната вредност која може да се користи и како посебно маркетинг средство. Од друга страна како еден составен елемент на упериорната вредност може да биде и дополнителна услуга која е уникатна во однос на конкурентските производи и/или услуги, но која додава вредност во очите на потрошувачите и која едноставно ја зголемува супериорната вредност на Вашиот бизнис.

Од друга страна како едно добро објаснување за оваа дополнителна услуга можете да прочитате и во маркетинг стратегија пржено јајце.

Значи како заклучок можеме да изведеме дека дополнителната услуга само ќе ја зголеми нашата супериорна вредност и секако ќе ја збогати нашата понуда.

Како функционира оваа маркетинг средство?

Процесот е едноставен. На производот кој го продавате со секоја продажба ја нудите и таа дополнителна услуга. Доколку продавате услуга на секоја продадена услуга додајте дополнителна услуга.

Но, функционирањето е едноставно, но поголемо внимание треба да се посвети на вистинската услуга која ќе оди дополнително. Она што треба да се запрашате и да одговорите е:

  • Дали таа дополнителна услуга ќе додаде вредност на мојата севкупна понуда?
  • Дали таа дополнителна услуга ќе вреди за потршувачите и колку ќе вреди?
  • Дали со таа дополнителна услуга нема да ги зголемам трошоците со што цената на производот или услугата кои ги продавам нема да ги покрие?
  • Дали дополнителната услуга е во согласност со производот или основната услуга кои ги продавам?

Ова се основните прашања на кои ќе треба да дадете одговор пре да изберете некоја дополнителна услуга која ќе ја вклучите во Вашата понуда за продажба.

Како да дојдам до вистинската услуга?

Значи процесот на користење на оваа маркетинг средство е да успеете да brainstorm-ирате колку што може повеќе идеи за дополнителни услуги кои можете да ги атачирате кон Вашиот основен производ или пак услуга. Еве една листа на пршања која можете да ја искористите во овој процес на генерирање на идеи за дополнителни услуги како Ваше маркетинг средство:

  • Кои производи и услуги ги продавам?
  • Во која индустрија е мојот бизнис?
  • Кои се карактеристиките на производите и услугите кои ги продавам?
  • Кои прашања ги поставуваат купувачите и корисниците на моите производи и/или услуги?
  • Што нудат конкурентите?
  • Можам ли да го понудам и јас истото што и конкурентите?
  • Можам ли да го подобрам и како да го подобрам она што го нудат конкурентите?

Откако ќе дојдете до повеќе идеи како дополнителна услуга едноставно подредете ги во една листа и започнете со нивна анализа. Анализата всушност ќе биде во стилот на прашањата кои ги опфативме погоре. едноставно бодирајте ја секоја идеја за дополнителни услуги и изберете ја онаа со најмногу бодови на крајот на анализата која ќе ја вклучите во понудата.

Останатите можете да ги комбинирате како што сакате. На пример, да ги понудите како опција за продажба над толку и толку денари или пак било што како резултат на Вашата претприемничка креативност.

post

10 Основни Елементи со Бизнис Потенцијална Енергија

Доколку сакате да ја зголемите бизнис потенцијалната енергија на Вашиот бизнис ќе треба да започнете со определување на бизнис елементите кои имаат бизнис потенцијална енергија како прв чекор во подобрување преку бизнис потенцијална енергија.

Во бизнисот може да постојат неограничен број на бизнис елементи кои може да бидат и различни системи за кои пишував во Системски приод во бизнисот – Бизнис систематизирање. Но само 20% од истите елементи се важни за функционирањето на бизнисот, односно се важни за добрите резултати за бизнисот. Останатите 80% се елемнтите кои едноставно служат за одржување на тековните состојби како што е администрирање. Тоа е 80/20 правило.

Кои се круцијалните бизнис елементи кои имаат бизнис потенцијална енергија?

Ќе мора да започнете со круцијалните бизнис елемнти бидејќи сигурно не сакате да гогубите Вашето време на елементите кои не се критични или каде подобрувањата би биле сосема мали. Круциалните елементи се бизнис елементи кои може да имаат складирано голема бизнис потенцијална енергија во себе која пак може да биде трансформирана во кинетичка енергија која ќе го турка бизнисот низ патот на успехот.

По мое мислење, ова се 10-те најкруцијални бизнис елементи кои имаат бизнис потенцијална енергија за кои можете уште веднаш да започнете да размислувате за подобрување.

1. Бизнис идеја

Се започнува со претприемачот и неговата идеја. Тоа е првата потенцијална енергија на новиот бизнис. Една работа која треба да се запомни е дека следниот елемент – бизнис планот може да ја конвертира таа потенцијална енергија во успешен бизнис.

2. Бизнис план

Бизнис планот во исто време е конвертер на потенцијалната енергија во идејата во успешен бизнис и има своја потенцијална енергија која може да дведе до развој на бизнисот. Со добар план и исполнување на се она што е испланирано ќе ја зголемите севкупната потенцијална енергија на бизнисот.

3. Знаење на претприемачот

Знаењето е нешто што постојано може да внесува свежа потенцијална енергија во бизнисот. Како и да знаењето како извор на потенцијална енергија може да биде потрошено. Ќе мора постојано да внесувате ново знаење за постојано да ја обновувате таа енергија и за да одговорите на новите барања во околината. За знаењето повеќе опфатив во Знаење и креативност – Втор слој за успех на претприемачот.

4. Производи и услуги

Секој бизнис продва некаков вид на производи или услуги. Доколку продвате нешто што ги задоволува потребите на потрошувачите, тогаш тие производи и/или услуги ќе имаат поголема бизнис потенцијална енергија. Доколку пак производите и/или услугите не ги задоволуваат моменталните потреби на потрошувачите овој елемент ќе има слаба или пак воопшто ќе нема потенцијална енергија. Доколку квалитетот е одличен и бизнис потенцијалната енергија ќе биде на високо ниво.

5. Залихи

Залихите претставуваат елемент кој може да ја исцица потенцијалната енергија во готовината што ја има Вашиот бизнис. Но, од друга страна, залихите содржат потенцијална енергија во вид на производите при што носи сигурност за константна продажба. Доколку сакате да ја зголемите бизнис потенцијалната енергија складирана во залихи и во исто време да го намалите трошењето на таа енергија преку готовината ќе мора да го најдете оптималното ниво на залихи. За ова повеќе во 80/20 правило.

6. Готовина

Готовината е најважен елемент во кој има складирано потенцијална енергија. Со готовината ќе можете да ја зголемите бизнис потенцијалната енергија на други елементи како знаењето, производите или услугите, маркетинг, продажен тим итн. Доколку немате готовина севкупната потенцијална енергија на Вашиот бизнис ќе биде на едно доста ниско ниво.

7. Маркетинг

Маркетингот е еден од елементите кои ќе донесе свежа потенцијална енергија во бизнисот преку зголемување на бројот на потрошувачите. Со висока потенцијална енергија во маркетингот ќе успеете да генерирате поголема продажба при што ќе се зголеми енергијата во продажниот тим и во готовината.

8. Продажен тим

Членовите на Вашиот продажен тим се во директен контакт со Вашите потрошувачи. Колку е поголема потенцијалната енергија складирана во Вашиот продажен тим, толку ќе биде поголема продажбата при што ќе се подобри готовинскиот тек во бизнисот.

9. Цени

Доколку не ги поставите Вашите цени да ги покријат сите трошоци на бизнисот и донесат профит, Вашата бизнис потенцијална енергија ќе биде на ниско ниво. Можете да прочитате повеќе во Намалување на цени – Бизнис дилема и Поставување на цена – Чек листа.

10. Локација

Големината на сообраќајот и продажбата ќе зависат од локацијата на многу бизниси кои се занимаваат со директна продажба на купувачите. Од друга страна за производствените бизниси локацијата ќе ги определува и трошоците за транспортот. Така да добро би било и локацијата да ја вклучите во анализата на потенцијалната енергија заради подобрување.

Што понатаму?

Едноставно можете да започнете со:

  • Размислете за бизнис потенцијалната енергија во овие елементи на бизнисот.
  • Најди најмалку едно можно подобрување на секој од елементите.
  • Имплементирај ги подобрувањата.
  • Повторувајте го целиот процес постојано.

Успешноста ќе ви биде загарантирана.

post

Истражување за навики и употреба на интернет пребарувачи

Повеќе пати на претприемач имам наведено дека во денешни услови еден бизнис не треба да се наоѓа во една онлајн изолација, затоа што се повеќе и повеќе луѓе секојдневно поминуваат се повеќе и повеќе време пред својот компјутер сурфајќи на интернет.

Истражување - Навики и употреба на интернет пребарувачи

Секој претприемач доколку го избере интернетот да биде дел од неговата маркетинг стратегија (а мора) ќе треба да знае повеќе фактори кои ќе го дефинираат однесувањето на потенцијалните потрошувачи кои се наоѓаат од другата страна на жицата пред мониторот.

Пред неколку денови налетав на едно истражување кое се спроведува од страна на New Media Center сеуште е во тек. Оваа истражување се однесува на анализа на навики и употреба на интернет пребарувачи во Македонија. Прашалникот го пополнив и испратив. Но, сметам дека едни вакви иницијативи за истражувања треба да се помогнат на повеќе начини, особено преку споделување на колку што може поголем број на луѓе како репрезентативниот примерок би бил поголем и секако резултатите повалидни. Не е доволно само пополнување на одговорите, туку и препраќање на сите пријатели и познаници во личната mail-инг листа.

Како што е наведено во написот на Комуникации:

Целта на ова истражување е откривање на основните навики и употреба на интернет пребарувачите од страна на македонските интернет корисници.

До анкетата можете да пристапите преку следниов линк: http://newmedia.org.mk/anketa/

Така да како еден претпримач кој ги следи трендовите дајте свој придонес преку одговарање и секако споделување за да информациите што ќе ги добиете по завршување на истражувањето ќе можете да ги искористите за подобрување на сопствениот бизнис.

post

Супериорна Вредност – Маркетинг Средство 43

Стигнавме до 43-тото маркетинг средство на претприемач. Како 43-то маркетинг средство ја избрав супериорна вредност и нејзиното пренесување кон потрошувачите.

Reno Balloon Race (Sunday) 002
photo credit: Kari_Marie

Еден важен дел кој сакам да го напоменам тука е дека оваа пренесување на супериорна вредност претставува алатка која можеме да ја користиме за зголемување на нашата бизнис потенцијална енергија. Кога ќе навлезам подлабоко во оваа алатка можам да кажам дека веројатно оваа е една од најважните алатки кои можат да помогнат во градење на бизнисот. Кога стартап бизнисот ќе успее да изгради сопствена супериорна вредност и исказ на таа супериорна вредност со кој ќе се пренесува до потенцијалните потрошувачи, тоа е бизнис кој ќе преживее на пазарот и најверојатно ќе биде пазарен лидер во индустријата во која се наоѓа.

Зошто градење на супериорна вредност е толку важно?

Ќе се обидам преку моделот на бизнис потенцијална енергија да го дадам оваа објаснување. Бизнис потенцијална енергија е енергија која е складирана во бизнисот и која може да биде конвертирана во кинетичка енергија која ќе ја зголеми профитабилноста на бизнисот. Она што е поврзано со елементите кои имаат бизнис потенцијалната енергија и супериорната вредност се цените и готовината. Кога ги продавате Вашите производи или услуги за поголема цена која ги покрива сите трошоци и носи поголем профит за Вас, тогаш ќе имате и подобар готовински тек. Со готовината ќе ја зголемите бизнис потенцијалната енергија на другите бизнис елементи како знаење, производи и услуги, маркетинг, продажен тим итн. Доколку немате готовина Вашата бизнис потенцијална енергија ќе биде на ниско ниво.

Но, Вие нема да можете да ги покачите Вашите цени пред да изградите  супериорна вредност за Вас како претприемач, Вашиот бизнис и Вашата понуда. Супериорната вредност е нешто што ќе овозможи да ги продадете Вашите производи и услуги за повеќе пари без да ги загубите тековните потрошувачи.

Процесот на зголемување на бизнис потенцијалната енергија е да започнете да гради се посилна супериорна вредност за да наплаќате повеќе и повеќе и да можете да инвестирате повеќе и повеќе во подобрување на бизнис потенцијалната енергија на другите бизнис елементи.

Што е супериорна вредност?

Да започнеме со зборот супериорно. Во Wikipedia за овој збор се вели дека е:

Нешто што е повисоко во хиерархиската структура од било кој вид.

Ова значи декакога зборуваме за супериорна вредност мислиме на нешто што е позиционирано повисоко во однос на нешто друго. Супериорен бизнис значи дека има повисока позиција од другите конкуренти на пазарот. Супериорен производ или услуга значи дека има повисока позиција на пазарот од конкурентските производи или услуги. Супериорен претприемач значи дека има повисока позиција на пазарот од конкурентските претприемачи. Ова може да се изрази како подобар квалитет, подобар имиџ, подобар продажен тим итн.

Во Oxford Dictionary:

Вредноста е едноставно вредност на нешто изразена во пари или други производи кои може да бидат заменети за нешто.

Сега е веќе јасно. Оваа вредност ќе ни даде можност да ги продаваме производите или услугите за повеќе пари. Како и да е, доколку го додадеме зборот супериона пред вредноста ќе знаеме дека предмет на супериорност претставува вредноста. Понатаму, постои вредност на претприемачот, вредност на бизнисот и вредност на производите или услугите. Интересно е да се забележи дека претприемничката и бизнис вредноста може да ја зголемат вредноста на производите или услугите.

Сега што претставува супериорна вредност?

Супериорна вредност е вредност ан претприемачот, бизнисот и производите или услугите која е повисока отколку вредноста на конкурентските претприемачи, бизниси и производи или услуги.

Вториот елемент кој во однос на супериорната вредност има значење е распространување на таа порака за супериорна вредност.

Да претпоставиме дека Вашиот бизнис навистина има изградено супериорна вредност во однос на конкуренцијата. Но, што ќе значи таа супериорна вредност доколку за неа не знаат Вашите потенцијални потрошувачи.

Тука постојат две работи:

  • Супериорна вредност која е предложена, односно сугерирана и
  • Просудување или мислење за таа супериорна вредност на потенцијалните потрошувачи.

На пример, ние сугерираме дека имаме супериорна вредност, но и потенцијалниот потрошувач ќе си има свое мислење за тоа дали ние имаме супериорна вредност. Значи, потребно е да имаме елемент со кој ќе ги убедиме дека навистина имаме супериорна вредност. На таков начин оваа маркетинг средство треба да даде:

  • Исказ за супериорна вредност
  • Доказ за супериорна вредност
  • Средство за пренос на тој наш исказ и доказ до потенцијалните купувачи.

Процес на градење на супериорна вредност како маркетинг средство

  • Започнете со дефинирање на сите бизнис елементи кои се значајни за потенцијалните потрошувачи
  • Анализирајте ги и утврдете ја позицијата на секој елемент во однос на конкуренцијата
  • Онаму каде што сте посупериорни побарајте можност за зголемување супериорноста, а онаму кајшто сте послаби обидете се да ја подобрите и да бидете посупериорни.
  • Означете ги сите тие Ваши супериорности во однос на конкуренцијата.
  • Подгответе го исказот кој ќе ја отсликува супериорноста во сите тие елементи.
  • Побарајте докази на таа Ваша супериорност, како препораки и изјави од Ваши сегашни купувачи.
  • Комбинирајте ги тие две работи во секое Ваше маркетинг средство.
post

Библија за Социјални Медиуми – преглед на книга

Пред извесно време започнав со посебна категорија на претприемач во која обработувам преглед на книги кои сметам дека можат да бидат од помош за претприемачите во Македонија. Првиот пеглед на книга која што ја обработив е Влезен Маркетинг – Да Бидете Најдени на Google, Социјални Медиуми и Блогови. Со истата нарачка нарачав уште една книга наречена Библија за Социјални Медиуми (Social Media Bible) за која дури сега стигнав да напишам преглед (поминаа повеќе од 2 месеци) бидејќи досега ја читав (има скоро 1000 страни).

Оваа е поради фактот што во овој дел како прегледи на книги ќе објавувам прегледи само за книги кои сум ги прочитал и за кои сметам дека се вредни за Вашето внимание.

Што претставува Билблија за Социјални Медиуми?

Библија за социјални медиуми

Библија за социјални медиуми - книга

Ова книга всушност во оригинал е насловена како The Social Media Bible: Tactics, Tools, and Strategies for Business Success што од самиот наслов може да се забележи дека се однесува на прикажување на различни тактики, алатки и стратегии за да еден бизнис успее преку социјални медиуми да привлече внимание врз себе и секако да ја зголеми продажбата.

Не треба да ја нагласувам потребата за тоа еден бизнис активно да биде вклучен на социјалните медиуми при што потрошувачите, потенцијалните потрошувачи и вработени ќе се поврзат, комуницираат, разменуваат мислења и секако ќе ги промовираат производите и/или услугите што ги нуди Вашиот бизнис.

Авторот на книгата е Lon Safko кој е докажан иноватор со искуство од повеќе од 25 години во претприемништво, маркетинг, продажба, стратешко партнерство и тренинг. Вториот автор е David K. Brake кој е CEO и основач на Content Connections која дава професионални услуги во вид на стратегии кои со помош на социјални медиуми ќе изградат солидни релации околу нивната содржина.

Во секој случај оваа книга навистина претставува еден сеопфатен извор на информации за тоа:

  • Кои социјални медиуми да ги користи Вашиот бизнис?
  • Како да ги користи тие социјални медиуми?
  • Кога да ги користи тие социјални медиуми?

Освен одговор на овие прашања при секое поглавје кое обработува еден социјален медиум има и опфатен пример на реален случај со користење на тој медиум со резултатите добиени од таа примена.

Зошто вреди Библија за Социјални Медиуми?

Важноста на социјалните медиуми за претприемачите и бизнисите се овеќе расте. Се забележува и зголемување на свеста на претприемачите во Македонија на ова поле. Можеби не на едно ниво на кое треба да биде, но предноста е и тоа што можам да забележам секојсневно дека на Facebook се појавува нов бизнис од Македонија, дека Twitter се користи се повеќе и е во еден константен подем. Вчера прочитав дека Facebook достигнал 400 милиони корисници. Ова значи дека единствената земја на светот која е поголема од оваа виртуелна земја наречена Facebook е само Кина. Така, да не смее да се испушти оваа можност од страна на македонските бизниси.

Како што повеќе пати пишував на претприемач улогата на традиционални маркетинг медиуми се повеќе се намалува. Вчера прочитав една статистика дека се повеќе се намалува продажбата на светските познати брендови на магазини во пишана форма под влијание на новите медиуми кои се повеќе земаат еден замав.

А што станува со можноста за брза глобализација на Вашиот бизнис преку овие нови медиуми? Мислам дека не треба да се образложува повеќе. Едноставно треба да ја искористиме можноста и да започнеме повеќе да гледаме глобално наместо локално и регионално.

Карактеристики на Библија за Социјални Медиуми?

Првпат кога ја зедов книгата од пошта и кога видов колкава е помислив дека ќе има еден куп на непотребни информации. Но, самата структура на книгата и содржините на која се чини дека авторите работеле доста време е концепирана така да мора да започнете од почеток. Можете слоборно да започнете од поглавјето за социјален медиум кој сметате дека треба како прв да почнете да го користите. Така да како една особена предност и глас за оваа книга го издвојувам тоа што таа може да служи како еден водич – консултант за користење на социјалните медиуми без да се седне и да се исчита одеднаш 9скоро 1000 страни).

Цената за која може да ја добиете навистина е ништо во однос на содржаните информации во едно такво дело.

Разбирливоста на книгата и содржината во истата во текот на читањето е навистина на едно завидно ниво. Авторите користат едноставен и разбирлив јазик кој секојдневно го употребуваме.

Како една „слабост“ (ова се однесува за мене како еден читател) која можам да ја забележам е премногу навлегување во историјата на секој социјален медиум обработен во книгата. Но, ако не сакам да читам историја за некој социјален медиум слободно го прерипувам тој наслов, а сепак не губам ништо од квалитетот на добиените информации.

Секое поглавје кое претставува еден социјален медиум (а се обработени над 100 социјални медиуми и алатки) е структурирано согласно следниве поднаслови:

  • Што има тука за мене
  • Историјат
  • Техники и тактики за користење
  • Препораки
  • Примери.

Како последен дел од книгата е наменет за стратегија која опфаќа и еден уникатен приод како SWOT анализа на социјални медиуми.

Освен книгата ќе добиете и пристап до веб страна каде ќе можете да пронајдете дополнителни алатки, интервјуа и материјали кои се однесуваат за секое поглавје од книгата.

За кого е идеална оваа книга?

Кога станува збор за кого намената на оваа книга е идеална слободно можам да кажам дека тоа е претприемачот. Но и сите оние кои на некој начин се занимаваат или сакаат да се занимаваат со маркетинг ќе имаат потреба од еден ваков водич.

Тука се и сите оние кои едноставно сакаат да ги истражуваат можностите на сите социјални медиуми.

post

Дизајн на Профитен Модел за Вашиот Бизнис

Дали имате прецизно дефиниран профитен модел за Вашиот бизнис? Доколку одговорот е не, би требало веднаш да започнете со дизајнирање на еден таков профитен модел.

Бизнис профитен модел

Вашиот бизнис има за цел да прави профит, односно од целата продажба во денари остварена преку купување на потрошувачите кога ќе се одземат трошоците на работење на бизнисот да остане позитивен број во денари.

Забележувате дека во центарот на вниманието е потрошувачот, бидејќи тој е оној кој остава пари во Вашиот бизнис. Основниот закон за профитабилност на еден бизнис е:

Повеќе потрошувачи + Повеќе пари од секој потрошувач = Поголем бизнис профит

Па од тука може да се каже дека Вашиот бизнис профитен модел треба да одговори на две прашања:

  • Што Вашиот бизнис ќе прави за да стекне нови потрошувачи?
  • Што Вашиот бизнис ќе прави за да ја зголеми вредноста која ќе ја добива од секој потрошувач?

За да успее бизнисот Вие како претприемач ќе мора да дизајнирате и да следите Ваш уникатен профитен модел. Профитниот модел за секој бизнис е уникатен и може да биде едноставно и Ваша конкурентска предност доколку дизајнот е навистина уникатен. Во основа профитниот модел не претставува ништо друго туку една стратегија која треба Вашиот бизнис да го направи профитабилен.

Стекнување на нови потрошувачи

Што е она што ќе го правите за стекнување на нови потрошувачи?

Секој бизнис започнува барем со еден потрошувач на производите и/или услугите кои ги нуди Вашиот бизнис. Вашата цел како претприемач е постојано да го зголемувате тој број на потрошувачи. Во овој дел од Вашиот профитен модел ќе треба да ги наведете сите тактики кои Вашиот бизнис ќе ги користи за оваа цел, а потоа тактиките да ги специфицирате во вид на активности со одговорно лице и рок на извршување на истите. На пример, некои тактики за стекнување на нови потрошувачи може да бидат:

  • Производот и/или услугата
  • Маркетинг средствата кои ќе ги применувате
  • Продажниот процес

Многу бизниси ги делат своите производи на предни и позадински производи. Предни се оние кои имаат за цел да внесат потрошувачи во Вашата продажна инка, додека позадински се оние поскапите и повредните и имаат за цел да ја зголемат профитабилноста на Вашиот бизнис. Од друга страна квалитетот, сервисот, услугата, гаранцијата и други елементи на производот и/или услугата само може да привлекуваат повеќе потрошувачи.

Маркетинг средствата се основата која го распространува гласот за Вашиот бизнис и Вашите производи и/или услуги. Кои маркетинг средства, кога и како ќе се спроведат?

Од продажниот процес зависи дали еден потенцијален порошувач ќе стане потрошувач. Па вистинските активности и одговорности ќе бидат од голема помош за успешно завршување на тој процес.

Зголемување на вредноста на потрошувачите

Второто прашање кое профитниот модел треба да го одговори е како да ја зголеми вредноста од секој потрошувач. Во повеќе наврати на претприемач пишувавме за некои тактики кои може да се искористат во овој дел како Cross-selling, Upselling, Firesale за кои можете да прочитате во бизнис поимникот на претприемач. Ова се само дел од тактиките кои ќе можете да ги примените тука.

Она што го напоменавме како тактика во привлекување на потрошувачи во однос на производи и/или услуги може да продолжи тука со позадински производи кои ќе имаат за цел да го ја зголемат вредноста на еден потрошувач за ваш бизнис. Имено, со предните производи кои се поевтини привлекувате внимание и ги користите заради постојан готовински тек во Вашиот бизнис, а потоа нудите висококвалтетни и уникатни производи и услуги со кои ја зголемувате глобалната профитабилност на Вашиот бизнис.

Кои тактики ќе ги искористите во Вашиот профитен модел ќе зависи од Вас како претприемач и Вашата креативност и чувство за бизнисот. Секако ќе треба и доволно добро да ги познавате Вашите идеални потрошувачи.

Целта е откако ќе го прочитате овој напис да имате пишана стратегија за ваш профитен модел која ќе ја имплементирате, следите и постојано подобрувате. Се за успешноста на Вашиот бизнис.

post

Познавање на потрошувачите – Маркетинг средство 42

Потрошувачот претставува најважната личност во Вашиот бизнис свет. За ова не треба да се залажуваме дека не е точно. Тој идеален потрошувач за вашиот бизнис го прави Вашиот бизнис реален, односно да функционира или опстојува на пазарот.

Познавање на потрошувачите

Доколку ги следите маркетинг средствата кои ги презентираме на претприемач ќе забележите дека досега на некој начин опфативме неколку елементи за потрошувачите. Следниве написи од маркетинг средствата на претприемач се директно или индиректно поврзани со оваа маркетинг средство:

  • Маркетинг Средства 23 – Понуда од Аспект на Потрошувачите. Во овој напис пишував за Вашиот производ и услуга во вид на примарен и секундарен производ надополнети со супериорната вредност која ја нуди Вашиот бизнис се или треба да бидат опфатени од една перспектива на еден потрошувач.
  • Маркетинг средство 20 – Истражување на пазарот. Во овој напис наведов дека истражувањето на пазарот треба да даде одговор минимум на неколку прашања поврзани со потрошувачите. Кои се целните потрошувачи? Колку често тие ќе купуваат одреден производ или услуга? Колку се спремни да платат за него?
  • Маркетинг средство 15 – Задоволни потрошувачи. Целта на оваа средство беше да го задоволите Вашиот сегашен потрошувач до тој степен да тој стане Ваш најголем промотер.

Во оваа 42-ро маркетинг средство ќе стане збор за нешто сосема друго, а тоа е познавање или осознавање на Вашите сегашни и потенцијални потрошувачи. Вашата задача како претприемач е оваа активност да ја ставите како составен дел на Вашиот годишен маркетинг календар и тоа понатаму секогаш да биде дел од сите Ваши активности поврзани со маркетингот.

Истражување како основа за осознавање на потрошувачите

За да дознаете за нешто, односно за да осознаете нешто секогаш ќе ви биде потребно истражување. Така и за подобро запознавање на Вашиот идеален потрошувач ќе мора да направите соодветно истражување.

Вашиот бизнис ќе успее само доколку го понудите онаа што Вашите потрошувачи навистина ќе сакаат да го купат, а ќе знаете што тие сакаат само доколку доволно добро ги познавате. А ќе ги познавате доволно добро доколку ги знаете нивните:

  • Чувства,
  • Фрустрации,
  • Верувања и
  • Желби.

Какви се нивните чувства за одредени прашања во однос на проблемите кои Вашиот бизнис ги решава? Што е она што најмногу ги прави фрустрирани, а е поврзано со проблемите кои ги решева Вашиот бизнис? Кои се нивните верувања во однос на тие проблеми кои Вашиот бизнис ги решава? Кои се нивните желби за проблемот кој го имаат и кој Вашиот бизнис ќе треба да им го реши? Ова се некои од прашањата на кои ќе треба да дадете одговор.

Во премиум материјалот на претприемач во неколку неделно излагање и практично прикажување ќе бидат опфатени над 10 методи и начини за осознавање на Вашите идеални потрошувачи. Ќе напоменам два глобални начини кои можете да ги искористите:

  1. Да ги прашате сегашните потрошувачи.
  2. Да ги следите прашањата на потенцијалните потрошувачи онаму каде што тие ги поставуваат тие прашања.

Тука само би додал еден совет. Никогаш немојте да очекувате дека ќе најдете целосни одговори на овие прашања. Запомнете дека вие сте претприемач и донесувате одлуки на непотполни информации и податоци за што пишував во Важноста на брзи одлуки. Доволно е да дојдете до знаци врз основа на кои ќе имате квалитетна слика за Вашите сегашни и идни потрошувачи. Ваша задача е постојано да бидете во потрага за знаците кои ги дефинираат Вашите идеални потрошувачи бидејќи тие знаци од време на време се менуваат и не се исти постојано, а вие сакате постојано да ги знаете бидејќи сакате Вашиот бизнис постојано да е на врвот.

Вистинска понуда и Вистинско маркетинг средство

Знаејќи ги добро Вашите сегашни и идни потрошувачи вие како претприемач ќе можете да подготвите вистинска понуда и да ги користите вистинските маркетинг средства токму за тие идеални потрошувачи. Вие ќе знаете што сакате, а ќе знете и тие што сакаат па ќе можете максимално да ја искористите предноста од тоа ваше знаење.

Доколку Вашиот идеален потрошувач не сака јавување по телефон, нема да му се јавувате, туку ќе користите друга маркетинг алатка. Оваа е и најголемата грешка која се прави од страна на бизнисите кај нас. Едноставно се напаѓа, а јас и многу други како мене потенцијални потрошувачи за тој бизнис не сакаме да бидеме нападнати, а уште помалку да се браниме од тој напад. Треба да знаете дека не е лесно да се биде претприемач кој ќе ги усогласува овие работи.

Зошто да трошите пари на нешто што не дава резултати?

post

Важноста на брзи одлуки

Во претходниот напис навлегов во еден различен пристап на претприемач визнионер и претприемач опортунист (кој постојано бара можности, но никогаш не ги наоѓа).

Зошто опортунистот не ги наоѓа, или подобро кажано претвора најдените можности во квалитетен бизнис?

Затоа што постојано е зафатен со барање на нови можности и кога ќе најде некоја можност не носи одлука за искористување на истата.

Донесување на брзи одлуки

Зошто се потребни брзи одлуки?

Не можеме да донесуваме одлука и тој процес да трае вечно. Претприемничкиот живот и водење на успешен бизнис бара брзи одлуки бидејќи наместо Вас во секој момент слична таква одлука може да донесе конкуренцијата.

Како најважни причини зошто треба брзо да одлучувате би ги издвоил следниве:

1. Брзо искористување на пронајдени можности

Вие ќе откриете некоја можност, но таа можност нема да има вредност за Вас и за вашиот бизнис доколку не ја искористите. Затоа ќе треба брзо да одлучите како да ја искористите таа можност и кои активности кој ќе треба да ги спроведе за искористување на таа можност.

2. Брз одговор на барања и потреби на потрошувачите

Вие како претприемач и Вашиот бизнис постоите за да ги задоволите барањата и потребите на Вашите потрошувачи. Доколку откриете кои се промените на нивните барања и потреби не можете вечно да одлучувате за тоа како да ги задоволите бидејќи место Вас конкуренцијата ќе го направи тоа. Затоа е потребна брза одлука.

3. Брз одговор на активностите на конкуренцијата

Како што Вие постојано спроведувате бизнис активности, така и Вашата конкуренција не мирува туку спроведува одредени бизнис активности врз основа на кои се борите на пазарот за привлекување на потрошувачите. Секој нивен чекор ќе бара Ваш контра чекор. Затоа треба брзо да одлучите за тоа кои ќе бидат Вашите контра активности и како ќе ги примените.

Брзина наспроти квалитет

Многу често се поставува оваа прашање. Како влијае брзината на одлучување врз квалитетот на одлуката?

Квалитетот на одлуката секако дека зависи од брзината на донесување на таа одлука. Така да слободно можеме да кажеме дек квалитетот на одлуката е функција од брзината на одлучување.

Квалитетна одлука = f(брзина на одлучување) каде поголема брзина значи помал квалитет и обратно

Ова е логично, но не и единствено. Едно нешто е сигурно, зад секоја добра и квалитетна одлука стојат информациите кои ги имаме и врз кои ја донесуваме одлуката. А одлуката ја донесуваме ние претприемачи и самата брзина зависи од нас. Колку повеќе информации имаме толку потешко ќе имаме брза одлука. Затоа брзината на одлучување претставува функција од информациите и претприемачот. Така да горното равенство ќе биде:

Квалитетна одлука = f(информации, претприемач)

Ќе се обидам накратко да влезам во оваа тајна на информации и претприемач како основа за брзината на одлучување.

Колку повеќе информации имаме ќе биде потешко донесувањето на одлуката од страна на претприемачот, односно ќе биде потребно повеќе време. Понекогаш никогаш нема да имаме доволно информации за донесување на одлука, па брзината на одлучување може да оди временски до бесконечност, односно воопшто да не донесеме одлука, што во овој случај не е добро. Ова е поради фактот што постојано времето ќе го трошиме на собирање на информации. Од друга страна информациите треба да се обработат за да бидат во форма преку која лесно и брзо ќе воочиме некои трендови и некои скриени трендови кои ќе бидат корисни за одлуката на претприемачот. Значи за квалитетни одлуки треба да имаме оптимална количина на информации во форма која дава можност за одредени проценки од страна на претприемачот. Така да нашата формула од погоре сега би изгледала вака:

Квалитетна одлука = f(f(оптимална количина на информации, форма), претприемач)

За да претприемачот успее да извлече квалитетни заклучоци од информациите претставени во соодветна форма ќе треба да има одредени способности за препознавање на трендови и од некомплетни информации. Велам некомплетни информации бидејќи нашата цел е да донесеме квалитетна одлука и тоа брзо. Затоа е потребна способноста за аналитичност. Така да квалитетна одлука за краток временски интервал ќе биде претставена со следнава формула:

Квалитетна одлука = f(f(оптимална количина на информации, форма), аналитичност на претприемачот)

Аналитичност како основа за брзи одлуки

Како што можете да забележите аналитичноста претставува способност на претприемачот врз основа на некомплетни информации да извлече заклучок за да донесе квалитетна одлука. Се смета дека оние успешните претприемачи донесуваат брза одлука а нивната сопствена сигурност за исправноста на одлуката која ја носат е 70%.

Карактеристиката на аналитичните луѓе е да имаат мозок кој брзо размислува и да гледаат во група на информации и податоци во која ќе забележат нешто што просечниот човек не може да го забележи. Знаењето е еден предуслов со кој еден претприемач може да биде аналитичен.

post

Претприемач визионер наспроти опортунист

Постојат претприемачи кои се визионери, но постојат и претприемачи кои се опортунисти. Кои би биле поуспешни?

Многу различни мислења постојат за тоа дали еден претприемач треба да биде опортунист или не. Секако како една од особините му е и барае на различни можности, но не заборавајте дека тие можности треба да се искористат. Зошто ќе бараме можност ако не ја искористиме.

Затоа во овој напис би сакал накратко да направам една разлика помеѓу претприемач кој е опортунист и визионер.

Претприемач визионер или опортунист

Биди претприемач визионер со што ќе ја избереш и искористш вистинската можност!

Претприемач опортунист

Што претставува да еден претприемач опортунист? Би сакал на почетокот од овој напис да започнам со дефинирање или профилирање на еден претприемач кој е опортунист.

Да видиме првин што претставува опортунизам. Во Wikipedia за опортунизам пишува:

Опортунизам е свесна политика и практика на добивање на себична предност во одредени околности без никаква почит за приниципи.

Уште подобра дефиниција е дадена во Oxford Dictionary каде е наведено дека:

Опортунизам претставува практика на барање и користење на можности за постигнување на предност само за себеси, без да се размислува дали тоа е фер или пак исправно.

Согласно овие две дефиниции можеме да заклучиме дека:

Претприемач опортунист е човек кој бара можности и ги искористува себично без фер или пак исправно однесување.

На прв поглед и се чини дека за еден претприемач ова е добро бидејќи тој е човек кој има бизнис, кој пак егзистира на пазар на кој пак постои борба каде многу етика и морал во таа борба не се користи.

Претприемач опортунист бара можности каде никој не се наоѓа и воопшто не размислуваат дали тоа што ќе го прават е правилно или пак исправно. Воопшто не размислуваат дали ќе биде навистина успешно.

Единствена причина зошто претприемачите опортунисти ја бараат таа можност претставува подобрување само на нивните сопствени животи.

Претприемач визионер

Да видиме што претставува визионер? Како прво визионер е лице кое има визија, односно моќ за поглед во нешто што ќе се случува во иднината. Како второ визионер ги гледа можностите, но не со правење на нешто поразлично од сите останати туку правејќи го баш тоа истото. Но, разликата е што тоа го прават на различен начин од сите останати.

Претприемачи визионери се луѓе кои следат се што се случува околу нив и едноставно ги забележуваат жешките можности и влетуваат во тие можности во кои сите влетуваат само се што прават го прават на подобар начин од останатите.

Визионерите не започнуваат бизнис во можноста што ја препознаваат само за да го направат сопствениот живот подобар, иако сигурно е дека ќе го направат бидејќи ќе го подобрат и олеснат животот на нивните потенцијални потрошувачи.

Разлика помеѓу претприемач опортунист и визионер

  • Опортунист е гол барач на можности, визионер е вистински препознавач на можноста. Затоа и опортунистот често завршува со вечно барање на можноста која никогаш нема да ја најде, додека претприемачот визионер многу бргу ја наоѓа и искористува таа можност.
  • Опортунист претприемач е себичен и во таа можност бара само сопствен успех, додека претприемачот визионер можноста ја разгледува низ призмата на потенцијалниот потрошувач, односно како подобрување на животот на тој потенцијален потрошувач. И секако, со подобрување на животот на тој потенцијален потрошувач ќе го подобри и сопствениот живот.

Затоа едноставно следете што се случва во Вашата околина. Најдете можност во која сите се вклучуваат, но погледнете низ призмата на потенцијалниот потрошувач и неговиот проблем. Решете го тој проблем, поквалитетно, побрзо и подобро од останатите. И успехот ќе биде загарантиран.