post

Претприемничко предвидување – Пет принципи

Предвидувањето на еден претприемач како и било што друго има свои сопствени принципи кои мора да се знаат доколку претприемачот сака да имплементира успешно предвидување за сопствениот бизнис.

5 принципи на претприемничко предвидување

Претходно веќе опфативме неколку поважни аспекти за предвидување во серијата на написи на претприемач за претприемничко предвидување. Претходните наслови од овој серијал моете да ги прочитате во Предвидување како помош за претприемачот и Претприемничко предвидување – побарувачка.

Сега би сакал да претставам пет основни и најважни принципи на предвидувањето. Тие принципи се нешто што ќе се наоѓа пред очите на секој претприемач пред да го започне процесот на предвидување.

1. Предвидувањето е вообичаено погрешно

Да, ова е вистинито, но важно е да Вие како претприемач го знаете кога ја превидувате иднината. Не можете да очекувате 100% точност на предвидување. Ќе биде добро доколку имате 50% погодување во предвидувањата. Иднината е непозната и неизвесна.

Важно е претприемачите да го започнат предвидивањето со овој принцип во умот.

2. Предвидувањето е поточно за поблиската иднина

Нормално е доколку предвидувате за иднина која е поблиску до сегашноста да предвидувањето биде поточно. Зошто е ова нормално? Нормално е бидејќи полесно е да ја предвидиме нашата иднина за утре отколку за следната година. Нашата утрепнина е попредвидлива и помалку неизвесна отколку некој период по еден месец или пак една година.

3. Предвидувањето мора да содржи проценка на грешка

Бидејќи е очекувано предвидувањето да биде погрешно, вистинското прашање е за колку е погрешно. Како што веќе опфативме во претходниот дел Предвидување како помош за претприемачот најдобро е оваа грешка да се изрази како процент на разлика помеѓу реалноста и предвиденото. Оваа грешка може да биде позитивна или пак негативна и се изразува како позитивен или негативен процент. Доколку предвидувањето се однесува на продажба позитивна грешка ќе биде процент од поголема продажба генерирана во денари низ периодот на предвидувањето. Доколку имаме негативен процент како грешка за истото предвидување тогаш нашиот бизнис генерира помала продажба од она што сме го предвиделе.

4. Предвидувањето мора да се базира на историски податоци и фактори од надворешната околина

Не можете даочекувате дека ќе имате исти резултати од предвидување доколку на пазарот се појава нов конкурент. Ова значи дека не можете едноставно да ги земете во целост историските податоци за продажба или побарувачка и да ги зголемите за одреден процент за наредната година, бидејќи ќе се појават нови играчи на пазарот кои ќе земат парче од колачот (пазарот).

Историските податоци се важна почетна точка за секое предвидување во бизнис цели, но не е доволно за подобри резултати од предвидувањето. Вашиот бизнис постои во една околина каде сите делови од таа околина се во меѓусебна интеракција. Одлуките на едниот елемент влијаат на одлуките на другиот елемент.

5. Предвидувањето бара собирање и подготовка на податоците

Предвидувањето е многу поедноставно доколку подготвите квалитетни податоци кои се потребни за одредено предвидување. Предвидувањето е добро онолку колку што се квалитетни податоците на кои се базира. Поради тоа сите податоци мора да бидат запишани во иста форма која е потребна за целта на предвидувањето.

post

Интернет маркетинг микс

Во овој дел, би ја опишала рамката на маркетинг миксот, која се применува во маркетингот, во својата стратегија за Интернет маркетинг. Маркетинг миксот често се применува во дискусијата за маркетинг стратегија, затоа што обезбедува едноставна стратегиска рамка, за различни елементи на организацијата.  На пример, ако целта е да се зголеми продажбата на производите, тогаш во опција влегува намалувањето на цената и промена на типот на промоција, или пак комбинација од тие елементи.

Интернет маркетинг микс

Е-трговијата дава многу нови можности за интернет маркетингот, како би се разликувал од маркетинг миксот. Е-трговијата има далекусежни импликации за релативна важност на различните елементи на миксот за многу пазари, без обзир на тоа дали е организацијата вклучена директно или индиректно во е-трговијата. Со оглед на тоа, маркетинг миксот е корисна рамка за формирање на стратегијата и развојот на организацијата. Прво, дава информации за постоечките услуги на организацијата со конкурентите, а може да се користи и како алатка за вреднување на идеи, како механизам за генерирање на алтернативи на стратегискиот пристап.

Клучни прашања поврзани за различните елементи на маркетинг миксот:

  • Производ – дали постои можност за менување на сржта или само на дел од производот (услугата) која се нуди.
  • Цена – импликации на интернетот за цени или усвојување на нови цени, модели и стратегии.
  • Место-импликации за дистрибуција.
  • Промоција – нови промотивни алтки кои можат полесно да се применуваат.

Вовед во маркетинг миксот

Како поим најпрво се појавува во 1960 година, како симптоматска потреба на купувачите.  Како последица на тоа, маркетиншкиот микс тежнее кон тоа да го доведе производот до очите на купувачот.  Лаутенборн (1990) ги предложил 4P во една малку поинаква варијанта и тоа:

  • потреба на потошувачот и желба за купување (на производот)
  • трошоци на потрошувачот (цената)
  • погодност (во однос на местото – дистрибуција)
  • комуникација (промоција)

Производ

Производот како елемент на маркетинг миксот се однесува на карактеристиките на услугата или на неговиот бренд. Одлуките за производот се донесени врз основа на истражување на пазарот, каде што потребите на купувачите се проценуваат и се добиваат повратни информации кои служат за менување на постоечките производи со нови и подобри.

Постојат многу алтернативи за различни производи во контекст на мрежата, кога претпријатието развива своја стратегија. Интернетот во врска со одлуките за производот може да биде корисно поделен на одлуките кои се однесуваат на основните производи и производниот асортиман. Сржта на производот се однесува на главниот производ купен од страна на потрошувачот, да ги исполни своите потреби додека производниот асортиман се однесува на дополнителните услуги и погодности кои се изградени од сржта на главниот производ.

Цена

Цената се однесува на политиката на цени која ја води едно претпријатие, кои се користат за дефинирање на моделот на цени, и нормално да се постават цени за производи и услуги кои се нудат на интернет. Постојат различни гледишта за тоа како треба да се води таа политика на дефинирање на цената.  Start-up компаниите имаат тенденција да користат ниски цени за да добијат база на клиенти. Други компании пак имаат корист ако стават диференцијални цени за одредени производи на нивниот сајт.

Дистрибуција

Овој елемент се однесува на тоа како производот е дистрибуиран на корисниците. Типично, за онлајн каналите, местото е целта за да се максимизира најголем домет на дистрибуција за да постигне поширока достапност на производите, со што се намалуваат трошоците за залихи, складишта и транспорт.  Успешни продавачи на своите производи или услуги се оние кои ја максимизират нивната застапеност и видливост на сајтовите од третата страна кои ги користи нивната целна публика. Третата страна се всушност сајтови кои се вклучуват при пребарување на онлајн порталите.

Главни импликации на Интернет маркетингот се:

  • Место на купување
  • Нови структурни канали
  • Виртуелна организација

Промоција

Промоцијата како еден од основните инструменти на маркетингот се дефинира во теоријата на маркетингот. Тоа произлегува веројатно од широката лепеза на облиците на промоција кои опфаќаат, од една страна, информирање и убедување на потрошувачите, а од друга, и вкупниот систем и процес на комуницирање меѓу производителите и потрошувачите чија цел е, пред се, да се создаде поволно мислење за производите (услугите) за да истите се прифатат од потрошувачите.

Промоцијата е, исто така, незаменлив инструмент со кој најнапред се запознаваат потрошувачите со карактерстиките на производот и другите инструменти на маркетингот, за да потоа се создадат нужните предуслови за зголемување на обемот на продажбата.

Луѓе, процес и физички доказ

Елементот на марктинг миксот – луѓето, се однесува на организација на вработените во интеракција со клиентите и другите заинтересирани страни во текот на продажбата и пред и после-продажната комуникација.

Главно треба да се интересираме на тоа како луѓето влијаат во однос на купувањето, било преку новите улоги, како што се одговарање на е-маил или преку чет информации кои се заменуваат во автоматизирани сервиси.

Процесот како елемент на маркетинг миксот се однесува на методите и постапките кои ги користи бизнисот, како би можело сите функции на маркетингот, како што е воведувањето на нов производ, промоција, продажбата и корисничкиот сервис максимално да бидат инволвирани во самиот маркетинг.

Физичкиот доказ како елемент на маркетинг миксот се однесува на видливиот израз на производот и како го купил и користи потрошувачот. Во мрежата, на интернет мерктингот во овој контекст „физички докази“ се однесува всушност на искуството на клиентите на комапнијата по пат на веб сајтот. Тоа вклучува прашања како што се полесна употреба или ориентација, достапност и перформанси.

Заблешка ДШ:

Забележувате дека маркетинг микс за кој во овој напис станува збор е 7P маркетинг микс. Додадени се луѓе – People, процеси – Process и физички доказ -Physical Prove. Особено последното е интересно кога станува збор за интернет маркетинг миксот. Зошто? Кога продавате нешто преку интернет вашиот потенцијален купувач не може да го опипа физички производот кој го продавате. Затоа главна улога при донесување на одлуката може да има физичкиот доказ во вид на препораки или пак лично искуство. Погледнете го само функционирањето на најголемиот продавач на интернетот Amazon. Скоро за секој производ имате можност да прочитате што велат купуавчите. Сигурно дека оваа опција Amazon не ја има ставено за џабе.

*****************************************************************

Овој напис е напишан од Кристина Алексоска – Постдипломец на Економски Институт- Скопје, отсек претприемнишво, при Универзитетот “Св. Кирил и Методиј„-Скопје; Користена литература:

Dave Chaffey, Fiona Ellis-Chadwick, Kevin Johnston, Richard Mayer, Internet Marketing – Strategy, Implementation and Practice, Prentice Hall, Third Edition

*****************************************************************

post

Системски приод во бизнисот – Бизнис систематизирање

Повеќепати тука на претприемач пишував дека треба да се изгради систем за ова или пак систем за она. Но, што претставува еден систем?

Бизнис систематизирање

Систем е збир на меѓусебно поврзани и меѓусебно зависни елементи кои функционираат и постојат за да го претворат влезот во системот во излез.

Можеме да забележиме неколку карактеристики:

  • Системот е збир на повеќе елементи. Нема систем без минимално два елементи во неговиот состав.
  • Елементите се меѓусебно поврзани. Елементите во системот се поврзани меѓу себе така да влезот во едниот претставува излез од другиот елемент, за да од последниот елемент излезот претставува излез од системот – целта на системот.
  • Елементите се меѓусебно зависни. Елементите во системот се зависни помеѓу себе. Доколку се појави застој во едниот елемент се појавува пореметување и на другите елементи.
  • Елементите постојат за да ја остварат целта на системот. Секој систем мора да има цел (претворање на влез во излез) која се остварува со помош на функционалноста на елементите од кои е составен системот.

Подсистеми на системот бизнис

Во последниот напис за 10 клучни работи кои треба да ги започнете во 2010 препорачав да:

  1. Интегрирате систем на постојано учење
  2. Воведете систем за квалитетно следење на конкуренција
  3. Воведете систем за квалитетна комуникација со Вашите купувачи
  4. Воведете систем за квалитетна комуникација со Вашите потенцијални купувачи.

Ова се само подсистеми на подсистеми на Вашиот бизнис. Доколку го примениме системскиот приод би кажале дека систем на постојано учење е подсистем на подсистемот развој додека останатите 3 се подсистеми на подсистемот маркетинг на системот бизнис. Па она погоре би изгледало вака:

  • Систем Бизнис
    • Систем Развој
      • Систем за постојано учење
    • Систем Маркетинг
      • Систем за следење на конкуренција
      • Систем за комуникација со купувачи
      • Систем за комуникација со потенцијални купувачи.

Дали сега имаме поквалитетна слика за овие подсистеми во однос на тоа каде припаѓаат и чија е одговорноста за нивната примена? Дали сега можеме да видиме една поголема слика одколку претходно? Секако дека одговорот е да.

Дали бизнисот мора да има подсистеми?

Ништо не мора туку само треба. Ако Вашата цел како претприемач е да изградите успешен бизнис, кој ќе се развива и расте ќе треба да имате подсистеми во бизниот.

Вашиот бизнис мора да има различни системи кои што ќе претставуваат подсистеми на системот бизнис. Нефункционалноста на еден од потсистемите може да предизвика пад на целиот систем. Постои посебна наука која се занимава со управување со системите, а тоа е теорија на системите.

Земете го на пример автомобилот. Доколку се појави проблем во системот за подмачкување ќе дојде до проблем во системот мотор, при што вашиот автомобил (главен систем) нема да ја има функционалноста за која постои – да ве превезува од едно до друго место.

Како да воспоставиме подсистеми во бизнисот?

Одговорот е едноставен. Систематизирај! Да, твоја задача како претприемач е да го систематизираш сопствениот бизнис. Лесно е да се одговори, но многу потешко да се спроведе. Затоа ќе се обидам да го упростам ова.

1. Кои се целите на твојот бизнис?

Ако твојот бизнис има за цел да продава производи и услуги на крајните потрошувачи запрашај се што треба да направиш. Да го произведеш или пак набавиш производот. Веќе излегуваат четри можни подсистеми маркетинг, производство, истражување и развој и набавка. Нека следи веднаш прашањето како. Како се произведува? Како се истражува и развива? како се набавува? Така ќе дојдете до подсистемите на овие системи.

Следното што треба да направиш откако ќе го произведеш или пак набавиш производот е да го продадаеш. За оваа цел потребни ни се следните подсистеми: маркетинг, продажба и наплата. И повторно нека следи прашањето како. Како да се маркетира производот? Како да се продава? Како да се наплаќа?

2. Пронајди ги зависностите и врските.

Смести ги сите системи и сите подсистеми на хартија во еден хиерархиски редослед како што го претставив погоре. И едноставно означи ги врските и зависностите на еден подсистем со друг подсистем.

3. Определи ги активностите.

Конечниот елемент на последните расчленети подсистеми ќе бидат составен од активности. Определи ги сите активности со краток опис на истите.

4. Документирај.

Многу е важно сите подсистеми со сите активности да бидат документирани со што ќе се знае точно на кој подсистем кои се одговорностите и за кои активности е задолжен кој подсистем да ги спроведе.

5. Тестирај.

Откако се е веќе документирано тестирај ги сите подсистеми за да утврдиш да ли функционираат онака како што се замислени. Доколку се јават некои проблеми реши ги.

6. Имплементирај.

Имплементирај ги новоформираните системи во твојот бизнис. Доколку не ги имплементираш системите истите ќе останат само на хартија и ништо нема да добиеш од вложениот труд.

7. Следи и подобрувај.

Она што навистина е најзначајно за системите во Вашиот бизнис е тоа што ќе ви овозможат едноставно следење на нивното функционирање така да лесно можете да ги воочите сите подрачја на можни подобрувања. А, подобрувањето е нешто што е постојано, односно составен дел на секој систем.

Кои се придобивките за еден претприемач Следува…

post

Дефинирање на Е-трговија и Е-бизнис

е-бизнис и интернет маркетинг Поимот е-трговија и е-бизнис често се користи во сличен контекст со терминот интернет маркетинг, но нивниот опсег е сосема различен. Важно е за секоја организиција и нејзиното внатрешно управување со дигиталната технологија да постигне јасно дефинирање во смисла на е-маркетингот, е-трговијата и е-бизнисот, како би ја дефинирала и целта која сака да ја постигне.

Електронската трговија често се мисли дека се однесува само на купување и продавање на производи, со користење на интернет, меѓутоа електронската продажба се однесува на финансиските и информативните електронски патишта со посредство на трансакција помеѓу организацијата и било која трета страна. Од тоа следи дека не-финансиските трансакции како што се влезните е-маил клиенти и прашањата од странство преку е-маил порака, изгледа дека и купувачите се аспекти на е-трговијата кои и помагаат на организацијата во процесот на истражување на маркетингот.

Кога се разгледува влијанието на е-трговијата на маркетиншките организации, тоа е идентификувано во улогата во која од една страна се продава а од друга се купува производ преку е-трансакција. Продажбата се однесува на трансакција која ја обавуваат клиентите со интернет плаќањето.

Е-трговијата се однесува на трансакцијата со која се бави организацијата за продажбата на производите. Интернет маркетигнот користи директна поддршка за продажба на производите. Таа одговорност ја имаат оперативните функции за набавки во организацијата.

Забелешка ДШ

Кога имаме е-трговија или пак е-бизнис? На претприемач веќе пишував за интернет бизниси и имам започнато еден серијал на написи за интернет бизниси. За да еден бизнис влезе во категорија на интернет бизнис во написот основа на интернет бизниси го напишав следново:

За да може да влезе во категорија на интернет бизниси бизнисот треба примарно да функционира на интернетот. Важно е пазарот на кој функционира тој бизнис да биде на интернет.

Ова е едноставна категоризација која ја искористив од моите ментори за интернет бизнис и нивните вебинари кои ги посетувам. Од друга страна, понекогаш наместо интернет бизнис или пак е-бизнис или е-трговија се користи терминот интернет маркетинг како некој поширок термин. Иако состојбата реално е обратна (поширок е терминот интернет бизнис). Најпознатите претприемачи од полето на интернет бизнисите велат дека се интернет маркетари, а не интернет бизнисмени. Зошто е тоа така?

Прво и основно, тоа е така бидејќи скоро 90% од работата на еден интернет бизнис е интернет маркетингот. Интернет маркетинг е ваш продажен тим, ваш промотивен тим, ваш тим за набавка и се што е поврзано за функционирање на еден интернет бизнис. Ако успеете во интернет маркетинг ќе успее и Вашиот интернет бизнис. Тоа е основното правило. И затоа честопати еден интернет бизнис се поистоветува со терминот интернет маркетинг.

*****************************************************************

Овој напис е напишан од Кристина Алексоска – Постдипломец на Економски Институт- Скопје, отсек претприемништво, при Универзитетот “Св. Кирил и Методиј„-Скопје; Користена литература:

Dave Chaffey, Fiona Ellis-Chadwick, Kevin Johnston, Richard Mayer, Internet Marketing – Strategy, Implementation and Practice, Prentice Hall, Third Edition

*****************************************************************

post

Поедноставување – Маркетинг Средство 38

Ова маркетинг средство не ми беше во листата до пред некој ден, кога го ставив и му дадов приоритет. Приоритет зошто на еден состанок увидов дека луѓето од маркетинг воопшто не знаат како прво што е маркетинг и дека всушност маркетинг едноставно претставува поедноставување на достапноста на производот и/или услугата до потенцијалниот потрошувач. Па затоа како 38-мо маркетинг средство на претприемач ќе биде поедноставување.

Оваа маркетинг средство се применува за сите типови на производи и/или услуги. Од друга страна може и треба да се применува како еден принцип и за сите останати маркетинг средства без разлика дали се онлајн или пак офлајн маркетинг средства.

Што претставува поедноставување?

Поедноставување во однос на маркетингот едноставно претставува изведување на активности кои ќе му го поедностават патот на потенцијалниот купувач да стане вистински купувач.

Значи поедноставувањето како маркетинг средство значи скратување на чекорите кои еден потенцијален купувач ќе треба да ги изоди за да стаса до вашите производи и/или услуги. Колку помалку чекори толку подобро за вас и за вашиот бизнис. Колку помалку чекори толку ќе биде поголема веројатноста дека еден потенцијален купувач ќе се нафати да го изоди патот.

На пример, доколку сакам да контактирам со некој бизнис би сакал да имам контакт информации, а не да одам претходно низ именик да барам и да ги пронајдам тие контакт информации.

Доколку сакам да контактирам сакам да контактирам на начин кој јас самиот ќе го дефинирам, а не луѓето од бизнисот да ми предвидат кои прашања да ги поставам.

Сето ова се одредени можности на подобрување кои преку ова маркетинг средство може да се применат.

Како до поедноставување?

Првин на секој човек од маркетинг треба да му биде јасно дека купувачот е во центарот на вниманието. Неговиот живот првин ќе треба да го олесниме, а потоа нашиот.

Еве некои совети во однос на примена на оваа маркетинг средство:

1. Отстрани секаква бирократија

Бирократија е резултат на преголема администрација, при што во секој процес се зголемуваат чекорите. Не се оди по најкраткиот и најоптималниот пат туку се оди по оној документираниот. Кога станува збор за маркетинг нема потреба од никаква бирократија.

2. Разгледај, анализирај и оптимизирај ги сите процеси

Процесот е тој кој ја претставува сложеноста или едноставноста на нешто. Разгледај ги сите процеси кои се во функција на привлекување на потенцијални купувачи. Направете дијаграм на тек за секој од најважните процеси и анализирај каде може да се оптимизира истиот преку исфрлување на непотребни чекори или активности во самиот процес.

3. Скрати ги процедурите

Наместо да имаш MS Word документ во вид на форма која потенцијалниот купувач ќе треба:

  • да ја симне од Вашата страна
  • да ја пополни
  • да ја сними пополнета
  • да ја закачи и испрати преку меил.

имајте едноставна веб форма со основни податоци и место за прашање кои кога ќе се пополнат едноставно ќе се притисне копчето Испрати и потенцијалниот купувач завршил работа. Во ваков случај истиот тој потенцијален купувач ќе треба:

  • да ја пополни веб формата
  • да кликне на испрати.

Ја воочувате ли разликата? Од 4 стигнавме до 2 едноставни чекори.

4. Прашај ги купувачите

Едноставно прашајте го секој купувач кој за првпат доаѓа кај вас како ве нашол. Имал ли маки или едноставно преку вашите маркетинг кампањи стигнал до вас. Прашајте се зошто е тоа така. Ако е добро што сте направиле за да биде добро и како да го примените истото во сите останати процеси и маркетинг кампањи. Доколку е лошо како дали може да се елиминира или пак подобри и како да се поправи тоа лошо во сите останати процеси и маркетинг кампањи.

Купувачите ќе ти ги дадат најдобрите одговори за она каде сте силни а каде сте слаби.

5. Подобрувај постојано

Секогаш ќе има можност за подобрување. Едноставно следи ги резултатите и подобрувај веднаш кога ќе увидиш можнст за подобрување.

post

Дали во Македонија се Краде Веб Содржина?

За ова размислувам веќе два дена откако ми јавија дека содржините на претприемач се објавуваат и на друго место. Добив едно такво известување бидејќи човекот кој ме извести сакаше да ме праша дали може да објавува написи од претприемач. Мојот одговор беше како и секогаш кога некој ме контактира во таа цел следниот:

Можете дури и без да ме прашате следејќи ги правилата на лиценцата под под Creative Commons 2.5 Macedonia License под која се лиценцирани написите на претприемач.

Во таа лиценца стои дека:

Можете:
  • да споделите – да умножувате, дистрибуирате, јавно да го прикажувате или јавно дигитално да го прикажувате делото
Под следните услови:
  • Наведи извор — Морате да го наведете изворот на ист начин како што тоа го направил авторот или давателот на лиценцата (но не на начин кој би сугерирал дека тие ве поддржуваат вас или вашето дело).
  • Некомерцијално — Не смеете да го користите ова дело за комерцијални цели.
  • Без адаптирани дела. — Не смеете да го промените, трансформирате или да го адаптирате ова дело.

Значи постојат 3 услови: да се наведе изворот од каде е преземен написот, да не се користи во комерцијални цели (да не се продава за пари или пак да не се објави на комерцијални веб страни) и да не се менува туку да се објави во ист облик.

Нормално, потоа ја проверив содржината на таа веб страна и навистина увидов дека се објавуваат скоро секојдневно по еден напис од претприемач и други написи кои сум ги прочитал некаде а знам дека не на таа веб страна. Веб страната која краде содржина е:

http://biznisidea.wordpress.com (линк не заслужува).

Потоа следуваше контакт до администраторот бидејќи на информации има оставено меил: biznisidea@yahoo.com. Еве го мојот mail до администраторот:

Почитувани …

Ми јавија дека користите написи од претприемач на Вашиот блог. Не е забрането реобјавување на написите на претприемач но е ограничено со одредени услуви што можете да го прочитате најдолу во футерот на веб страната – Написите на Претприемач се лиценцирани под Creative Commons 2.5 Macedonia License. Доколку отидете до таа лиценца ќе видите дека тоа е Attribution лиценца и дека за реобјавување е потребно да се наведе извор од каде ви е текстот. Сите текстови на претприемач се лиценцирани како моја интелектуална сопственост. Така да би ви предложил на сите текстови кои ги користите да ставите напомена дека се преземени од претприемач со линк до веб страната (http://www.pretpriemac.com)

Ова би ве советувал и за сите останати содржини кои не се ваша лична креација туку се превземени од постоечки веб страни за да немате проблем во однос на правни последици.

Ова е мој добронамерен совет.

Со почит,

М-р Драган Шутевски

Но, одговор сеуште немам. Кога во понеделник ја посетив страната увидов дека не само што немам одговор туку и дека „лоповот“ си продолжува со „лоповлукот“. Повторно еден од трите новобјавени блог написи е и еден мој со тоа што го сменил само насловот наместо 5 Бизнис елементи кои еден претприемач може да ги подобри уште денес ставил Совети за успешен бизнис.

Она што е трагично администраторот дури не се ни потрудил да ги исправи моите правописни грешки (продобрување) за што сведочат двете слики подолу:

Оригинал:

Плагијат:

Денес контактирав и со WordPress.com од кои добив упатства за користење на DMCA (Digital Millenium Copyright Act Notice) со тоа што ќе треба да им пишам официјален mail со одредени податоци за крадачот и за оригиналните написи и дека тогаш тие се должни по закон да ги превземат сите мерки за да се отстрани содржината од нивниот домен. Но, им реков дека ќе оставам уште два до три дена за да ја започнам постапката, бидејќи сметам дека администраторот на таа страна ќе се освести и ќе ја исправи грешката. А грешката се исправа само со додавање на извор од каде го превзеле материјалот. А, од друга страна не сакам веднаш да го рушам имиџот на Македонија дека крадеме содржина, бидејќи и без тоа имаме уште проблеми за докажување дека сме совесни.

post

20 Цитати за Бизнис Иновација

Бизнис иновација претставува нешто ново, нешто неоткриено, нешто сеуште не пробано во бизнис светот и на пазарот на кој функционира самиот бизнис. За секоја иновација најголемата одговорност ја сноси самиот претприемач. Дури и бизнисот кој го креира претприемачот претставува одреден вид на иновација.

Бизнис иновација - цитати

Ќе продолжам со овој серијал на цитати на претприемач. Веќе имавте можност да прочитате за цитати за бизнис идеи. Сега ќе продолжиме со бизнис иновација.

Цитати за Бизнис Иновација

Иновација претставува креација на нешто ново или реаранжирање на нешто старо на нов начин – Michael Vance.

Иновацијата прави разлика помеѓу еден лидер и еден следач – Steve Jobs.

Иновацијата е ценрален елемент во економскиот просперитет – Michael Porter.

Иновацијата е специфичен инструмент на претприемништвото. Акт кој им овозможува на ресурсите нов капацитет да креираат богатство – Peter Drucker.

Учење и иновација одат рака под рака. Ароганцијата на успехот е да се мисли дека тоа што го направивте вчера, ќе биде доволно за утре – William Pollard.

Иновацијата не е производ на логично размислување, иако резултатот е врзан за логично структура – Albert Einstein.

Вообичаеното однесување претставува непријател на иновацијата – Rosabeth Moss Kanter.

Иновацијата по дефиниција нема да биде прифатена од прва. Тоа се едни повторувачки обиди, бескрајни демонстрациите, еднолични проби пред иновацијата да може да се прифати и интернализира од една организација. Ова бара “храбро трпение” – Warren Bennis.

Иновацијата претставува процес на трансформација на идеите во нешто што може да се произведе и во една пазарна форма – Watts Humprey.

Не можеме да веруваме дека ќе знаеме каде ќе оди светот. Но, се додека не сме поблиски со нашите потрошувачи, нашиот модел на светот ќе се разликува од реалниот. Не постои субститут на иновацијата, но иновацијата не е замена за да бидеме во контакт со околината – Steve Ballmer.

Како што енергијата е основа на самиот живот, идеите извор на иновација, така иновацијата е витален извор на сите човечки промени, подобрувања и прогрес – Ted Levitt.

Без промена не постои иновација, креативност или иницијативи за подобрување. Оние кои ги иницираат промените ќе имаат подобри можности да ги управуваат промените кои се неизбежни – William Pollard.

Бидејќи живееме во една ера на иновации, една практична иновација мора да го подготви човекот за работа која сеуште не постои и сеуште не може јасно да биде дефинирана – Peter Drucker.

Иновацијата нема ништо со тоа колку пари имате за истражување и развој. Кога Apple излезе со Mac, IBM трошеше најмалку 100 пати повеќе на истражување и развој. Не се работи за пари. Се работи за луѓето кои ги имате, како ги водите и колку добивате од нив – Steve Jobs.

Вистинскиот извор на богатството и капиталот во оваа нова ера не се материјалните работи… туку човечкиот ум, човечкиот дух, човечката имагинација и нашата верба во иднината – Steve Forbes.

Секој акт на креација првин е акт на деструкција – Picasso.

Иновацијата е поттикната со добивање на информации од новитеконекции; со увидот во патувања во нови дисциплини или пак места; од активни, колегијални мрежи и отворени граници. Иновацијата произлегува од тековната размена на информации, каде информацијата не е само акумулирана или складирана, туку креирана. Знаењето се генерира од конекциите кои не биле присутни претходно – Margaret J. Wheatley

Иновацијата е специфична алатка на претприемачите, средство со кое ги искористуваат промените како можности за различен бизнис или пак за различна услуга. Таа е во состојба да се претстави како дисциплина, може да се научи, да се практикува. Претприемачите треба да намерно  да бараат извори на иновациите, промените и нивните симптоми кои укажуваат на можности за успешни иновации. И тие треба да знаат и да ги применат принципите на успешна иновација – Peter Drucker.

Доколку ја прашав јавноста што тие сакаат, тие би одговориле дека сакаат брз коњ – Henry Ford.

Ние немаме традиционален процес на креирање на стратегии или пак процес на планирање кој ќе го видите во традиционалните технолошки компании. Тоа му овозможува на Google да иновира многу, многу бргу, што мислам дека претставува вистинска сила на компанијата – Eric Schmidt.

Неколку заклучоци и препораки

  • Иновација не значи дека треба да креирате само нешто ново, иновација претставува и подобрување на нешто старо или нешто веќе постоечко. Размислете за иновација во продажен процес, во тековен производствен процес или пак во тековниот маркетинг процес. Сето тоа подобрување претставува иновација.
  • Иновацијата е нешто што Вашиот бизнис ќе го направи уникатен, по што ќе се разликувате од конкуренцијата и што ќе ви донесе вистински просперитет на Вашиот бизнис.
  • Иновацијата како процес во еден здрав бизнис нема крај. Тоа е постојан процес на кој се мисли и дејствува секојдневно. Она што е иновирано денес нема да биде доволно утре. Ќе мора да се подобри.
  • Иновација бара креативност, односно излез од она што сметате дека е логично и нормално. Пореметувањето на тој секојдневен баланс на нормалното предизвикува креативност, а креативноста ја предизвикува иновацијата. Она нормалното, вообичаеното однесување или самите воспоставени стандарди претставуваат најголем непријател на иновацијата.
  • За иновацијата да биде прифатена во организацијата потребни се долготрајни експерименти, обиди и трпение. Бидејќи луѓето може да не го очекуваат она што самата иновација го нуди. Од друга срана секоја иновација организациските членови ги изместува од удобната status quo ситуација. Отпорноста кон иновацијата е неминовна.
  • За успешна иновација потребно е да имаме слух за она што се случува во околината. Да бидеме во еден близок контакт со нашите потрошувачи. Тие во голем дел можат да ни помогнат во избор на вистинската иновација во нашиот бизнис. Претприемачите треба да ги бараат изворите на иновации и веднаш да започнат со акт на иновација.
  • Промените се во тесна врска со иновацијата. Без промени нема ни иновација.
  • Дали секој може подобро да ја изведува сопствената работа утре. Секако. Но, дали тој човек, ваш вработен е поттикнат да размислува за подобрување на неговата сопствена работа? Кога нешто ќе се стандардизира веројатноста е дека секој вработен ќе си остане во полето на тие стандарди без да размислува за подобрување на тие стандарди. Секоја иновација започнува со рушење на сегашноста, како што вели Picasso.
post

Дигитален Маркетинг – Дефинирање

Дигитален маркетинг - дефинирање Дигиталниот маркетинг е уште еден сличен термин во интернет маркетингот.

Институтот за Директен Маркетинг (ИДМ) е институт кој се занимава со проучување на неговата специјалност на професионалната квалификација. За да ни го објасни пристапот за тоа како се користи дигиталниот маркетинг, ИДМ разви детално објаснување за истиот.

Дигиталниот маркетинг опфаќа: примена на технологија во облик на онлајн канали од типот на: интернет, е-маил, база на податоци и мобилна/безжична и дигитална ТВ. За постигнување на овие цели потребна е поддршка на активностите на маркетингот со цел да се постигне поголем профит за задржување на клиентите, во повеќеканален процес на купување.  Покрај користењето на овие тактики на маркетингот, уважувајќи го стратешкото значење во развојот на дигиталната технологија и планирањето на пристапот до корисниците и преносот на онлајн сервисите, по пат на е-комуникација се применува и традиционалната комуникација. Задржувањето на оние кои користат интернет маркетинг се постигнува на тој начин што им се подобрува начинот на информирање на купувачите за одреден производ или стока со што се испраќаат разни видови на пораки на нивните профили, со што ја погаѓаат целта кон која се стремат потрошувачите и кои одговараат на нивните индивидуални потреби.

Ајде сега да го разгледаме секој дел поединечно од овој опис кој го дадовме.

Во првиот дел илустриравме дијапазон на пристапи и средства на комуникација кои формираат онлајн канали со кои е-маркетингот ги користи за изградба и развој на односите со клиентите.  Пристапите или хардверските платформи опфаќаат PC, PDA, мобилни телефони и интерактивна дигитална ТВ и со овие содржини им се овозможи испорака покрај различните онлајн комуникациски алатки, како што се веб-сајтовите, порталите и пребарувачките блогови, е-поштата, инстант пораките и текст пораките. Некои исто така ги вклучуват и традиционалните говорни телефонии како дел од дигиталниот маркетинг.  На пример онлајн банка користи многу од овие технологии со цел полесно да комуницира со своите клиенти, нормално по желба на потрошувачите, некои сакаат да користат интернет, други безжична или интерактивна телевизија, трети пак традиционалните канали.

Svennving во 2007 година сумира раст од користењето на оваа технологија.

Вториот дел од описот покажува дека би требало да биде технологија со која ќе се добијат нови клиенти и би ги одржала старите како постоечки клиенти.  Исто така нагласува како дигиталниот маркетинг не ги изолира другите технологии, но најефикасен е кога е самостоен а не кога е интегриран со останатите комуникациски канали, како што се телефоните, директната пошта или лице-в лице интеграцијата.

Завршниот дел од описот сумира пристап кој е ориентиран на е-маркетингот. Тоа покажува колку има испланирано да постигне успех на пристапот преку интернет на веќе постоечките канали и мрежи кои се остварени од корисниците на овој маркетинг, избирајќи го миксот на е-маркетинг и традиционалната комуникација. Задржувањето на корисниците на мрежата треба да биде заснована преку истражување на карактеристиките на клиентите, однесувањето, вредностите кои ги прават верни на тој веб сајт, а потоа испраќањето на прилагодливи пораки, релевантни на веб и е-маил комуникацијата.

*****************************************************************

Овој напис е напишан од Кристина Алексоска – Постдипломец на Економски Институт- Скопје, отсек претприемнишво, при Универзитетот “Св. Кирил и Методиј„-Скопје

*****************************************************************

post

Вештини и Интелигенција – Трет Слој за Успех на Еден Претприемач

Ќе продолжиме со третиот слој кој има потенцијал да го доведе до успех еден претприемач, а тоа се вештини и интелигенција. Ова е дел од серијалот кој започна со едно истражување на претприемач за одлучувачки фактори за успех за кое ги презентиравме резулатите и ја подготвивме хиерархијата на најважните фактори кои еден претприемач го прават успешен претприемач.

Првиот слој за потенцијал беше преземање на акција додека вториот слој беше знаење и креативност.

Вештини и интелигенција како трет слој за успех на еден претприемач

Што претставуваат вештини за еден претприемач?

Често пати велиме дека имаме вештини за нешто. Особено кога го пополнуваме нашето CV посебен дел од внимание посветуваме на нашите вештини. На пример, работа со компјутер, познавање на јазици, добри комуникациски вештини итн.

Да видиме првин како во Wikipedia се дефинирани Вештините:

Вештина претставува научен (сознаен) капацитет за исполнување на предходно утврдени резултати, најчесто со минималните трошок на времето, енергијата, или и пак и двете.

Значи за да имаме вештини треба да имаме знаење за тие вештини, односно на некаков начин да сме ги научиле, дали преку класично учење или пак искуствено не е важно. Всушност вештините се комбинација од учење и искуство.

Можеме да кажеме дека имаме вештини за нешто доколку со минимално вложено време и енергија успееме да завршиме некоја работа со максимални резултати од тоа извршување. На пример, доколку кажеме дека имаме вештини за работа со MS Excel тоа ќе значи дека за кратко време (со неколку кликнувања) можеме да направиме табеларна и графичка анализа на одредени податоци.

Можеме да сублимираме две работи за да еден претприемач има вештини од нешто:

  • Треба да имаме знаење за да имаме вештини. А може знаењето да го стекнеме и со искуство.
  • Треба да имаме систем за постојано зголемување на знаењето. Ова е особено важно доколку еден претприемач во поглед на вештините сака да остане на врвот. Во премиум претприемач во првиот месец каде ги разработуваме бизнис идеите во исто време градиме и еден систем за постојано прибирање на информации заради учење и зголемување на претприемничките вештини во поглед на бизнис идејата.
  • Ќе имаме вештини за некоја работа доколку со минимално потрошена енергија и време оствариме максимални резултати.

Кои вештини треба да ги има еден претприемач?

Ако тргнеме да ги набројуваме сите потребни вештини сметам дека нема да бидат доволни уште десетина страни од овој напис. Затоа би издвоил она што е најважно како вештини да ги има еден претприемач. Треба да напоменам дека различни вештини ќе бидат потребни за различни нивоа во кои се наоѓа бизнисот. Тука би издвоил 10 поважни вештини што еден претприемач би требало да ги има.

  1. Вештини за продажба
  2. Маркетинг вештини
  3. Финансиски вештини
  4. Вештини за менаџирање на времето
  5. Вештини за планирање
  6. Самомотивациски вештини
  7. Менаџерски вештини
  8. Технички вештини
  9. Вештини за фокусираност
  10. Вештини за промени

Што претставува интелигенција за еден претприемач?

Дали сте се нашле во ситуација за некого да кажете дека е навистина интелигентен? Најверојатно, да. Но, по што ги делите луѓето на интелигентни и неинтелигентни. Што мислите за снаодливоста, изгледот, јазикот на кој зборува, одлучност…?

Да видиме што Wikipedia вели за интелигенцијата:

Интелигенција е еден поопширен термин кој се користи за да се опише на состојбата на умот кој опфаќа повеќе поврзани способности, како на пример на капацитет на резонирање, планирање, решавање на проблеми, абстрактно размислување, сфаќање на идеи, користење на јазикот и учење. Постојат неколку начини да се дефинира интелигенција. Во некои случаи, интелигенцијата може да содржи својства како креативност, самата личност, карактер, знаење или пак мудрост. Сепак не постои договор за кој се дефинираат карактеристики на феноменот на разузнавачките договорени со мнозинство низ различните засегнати дисциплини.

Ова е навистина опширна дефиниција за интелигенцијата. Но, за еден претприемач би било доволно да има способност во најкраток временски период од огромен број на информации кои ги прима да ги извлече највредните информации и врз основа на нив да донесе квалитетен заклучок врз основа на кој ќе донесе одлука.

За да еден претприемач постојано ја гради својата интелигенција ќе мора постојано да го шири сопственото знаење. Потребни се следниве предуслови:

  • Да има систем на прием на голем број на информации поврзани со бизнисот кој го води.
  • Да има систем за обработка на тие информации.
  • Да има систем за примање на тие обработени информации.
  • Да донесе квалитетен заклучок врз основа на тие обработени информации.
  • Да ги примени тие заклучоци преку донесување на квалитетни одлуки.
  • Да ги спроведе донесените одлуки.

Забележувате дека сите досегашни фактори на успех кои обработивме се зависни еден од друг. Не може да имаме претприемач со висока интелигенција без знаење. Не можеме да имаме претприемач со квалитетни вештини без знаење. Џабе ни е интелигенцијата, вештините, креативноста и знаењето доколку како претприемачи не ги примениме во пракса (не превземеме акција).

Следува на претприемач: Истрајност и упорност – Четврт слој на успех на еден претприемач.

post

Интересна дефиниција за Маркетинг Успех

Можете да забележите дека на претприемач преовладуваат темите за маркетинг. Ова е заради фактот што навистина маркетингот е она што додава вредност во секој бизнис.

Би сакал овој напис да дадам еден коментар на една навистина интересна дефиниција до која што дојдов преку третата панел дискусија на The League of Extraordinary Minds. Дефиницијата е од страна на Sergio Zyman, основач на Zyman Group и поранешен шеф на маркетинг одделот на Coca Cola. Кога станува збор за маркетинг Coca Cola ни е навистина познат случај. Тој како единствена дефиниција за маркетинг успех ја издвојува следнава:

Маркетинг успех претставува да продавате повеќе на повеќе луѓе, почесто, за повеќе пари и поефикасно.

Во една кратка реченица кажано се за тоа кога Вашите маркетинг активности можете да класифицирате како успешни. Да ги разгледаме одвоено.

1. Зголемување на продажба

Нормално, дека првата цел на спроведување на маркетинг активности е да ја зголемите продажбата на Вашиот бизнис. Инаку зошто би спроведувале едни такви активности.

На пример, имате продажба од 1000 парчиња месечно кои ги продавате по 500,00 денари и тоа е приход од 500.000,00 денари месечно. Доколку започнете некоја маркетинг активност би требало да дојдете до 10% зголемување за да продавате 1100 парчиња кои по 500,00 денари ќе ви донесат приход од 550.000,00 денари. Тоа се 50.000 денари поголем приход.

2. Зголемување на бројот на купувачи

Всушност Вие со маркетингот привлекувате внимание на потенцијални купувачи од кои дел ќе станат вистински купувачи. Маркетингот како што е прикажано во горниот пример довел нови купувачи кои купуваат дополнителни 100 парчиња производи од Вашиот бизнис.

3. Зголемување на фреквенција на купување

Освен на претходните зголемувања целта на маркетингот е да ја зголемите зачестеноста на купување од страна на купувачите. Ова значи купувачите да се враќаат, и не само тоа, туку да се враќаат почесто да купуваат. Со исполнување на оваа цел ќе успеете само да ја зголемите продажбата. Да кажеме од горниот пример дека продажбата се зголемува за уште 10% (1210 парчиња), при што ќе имаме приход од 605.000,00 денари. Тоа се 105.000 денари повеќе од пред маркетинг активноста.

4. Зголемување на цена

Една многу важна цел на маркетингот е да успеете да изградите бренд кој продава висококвалитетни производи и услуги па Вашите производи и услуги да бидат поскапи од нормалните.

Да го земеме претходниот пример и да успееме да продаваме исто со повисока цена од да речеме 550 денари за парче. Така ќе имаме приход од 665.000,00 денари што е за 165.000,00 денари повеќе од пред маркетинг активноста.

5. Зголемување на ефикасност

Овде се мисли на зголемување на ефикасноста и ефективноста на маркетинг активностите. Во превод тоа е да се спроведат вистински маркетинг активности, на вистински начин со што ќе се постигнат најдобри резултати. Вообичаено еден просечен мал бизнис спроведува неколку маркетинг активности одеднаш. На пример, има радио реклама, дели брошури и има сопствена веб страна. Тука прашањето е дали овие маркетинг активности се оние вистинските и дали, доколку се вистинските се спроведуваат на вистински начин.

  • Дали радио рекламата е соодветна за нашиот бизнис?
  • Дали брошурата е соодветна на нашиот бизнис?
  • Дали веб страната е соодветна за нашиот бизнис?
  • Доколку радиото е соодветно за нашиот бизнис дали сме ја избрале вистинската радио станица?
  • Доколку брошурата е соодветна за нашиот бизнис дали ја делиме на вистинските луѓе – таргетирани потенцијални клиенти?
  • Доколку веб страната е соодветна за нашиот бизнис дали правиме доволно за да имаме повеќе таргетирани посетители?

Одговорите на овие прашања ќе дадат одредени насоки за да увидиме дали нашите маркетинг активности се ефективни и ефикасни. Се она што ќе содржи одговор во вид на НЕ или пак МОЖЕБИ ќе треба да се поправи или замени со друга маркетинг активност.

Зошто ова последното. Секоја маркетинг активност има своја цена на чинење. Така да ако продолжиме со нашиот пример каде остваривме повеќе приход од 165.000,00 денари и доколку имаме профитна маржа од 20% тоа значи дека имаме добивка од 33.000,00 денари.

Дали маркетинга ктивностите од овој пример доколку чинат 35.000,00 денари ќе бидат ефикасни? Секако дека одговорот ќе биде не во целост. Целосна филозофија во маркетингот е да со најмалку вложени пари ги максимизирате резултатите на претходните 4 цели на една маркетинг активност.

Затоа разгледајте ја секоја ваша маркетинг активност преку еден ваков аспект со поставување на следниве прашања:

  • Дали таа и таа маркетинг активност ми ја зголеми продажбата во одреден временски период?
  • Дали таа и таа маркетинг активност го зголеми бројот на купувачите во одреден временски период?
  • Дали таа и таа маркетинг активност ми ја зголеми фреквенцијата на купување во одреден временски период?
  • Дали таа и таа маркетинг активност ќе ми дозволи да ја зголемам цената?
  • Дали таа и таа маркетинга ктивност е ефикасна?