post

Кога започнува бизнисот?

започнување на бизнисот

Кога започнува бизнисот?

Бизнис идеја е стартната точка како на секој бизнис така и на секој претприемач. Претприемач станува тоа што е откако ќе дојде до бизнис идеја, ја трансформира во бизнис можност откако ќе утврди некаков проблем, промена или потреба на пазарот и ја стартува таа бизнис идеја како сопствен бизнис. Бизнисот е последица на бизнис идеја до која што доаѓа претприемачот.

Процесот на реализација на една бизнис идеја при што таа ќе стане вистински бизнис (мислам вистински бизнис кој ќе биде профитабилен и успешен) претставува една временска единица, едни чекори кои ќе треба да се изодат или поминат од страна на претприемачот. Но, доколку тоа време се оддолжи, може да претставува и проблем. Проблем, бидејќи вие не сте сами на пазарот. И најуникатната бизнис идеја може да биде спроведена во реалност од страна на конкурентите. Па затоа и трката започнува уште во овие најрани фази од започнување на бизнисот.

Пред да се започне бизнисот потребно е:

  • Бизнис идејата да се провери со самиот претприемач. Дали имате доволно вештини и знаење за спроведување на таа бизнис идеја? Дали можете да искористите некој друг со потребни вештини и знаење да заедно со вас ја спроведе таа бизнис идеја? Дали имате доволно пари за стартување на тој бизнис? Доколку немате од каде ќе ги набавите? Ова се прашања низ кои треба секоја бизнис идеја да помине пред да се трансформира во вистински бизнис.
  • Бизнис идејата да се провери со пазарот. Освен претприемачот кој ќе биде одговорен за спроведување на една бизнис идеја во реалност, тука е и пазарот кој ќе биде одговорен за прифаќање или отфрлање на истата. Замислете вашата бизнис идеја креира бизнис во кој произведете производ и/или услуга кој нема да се продава на пазарот на кој настапувате. Самоубиствено, нели? Затоа, пред да се започне бизнисот ќе треба да ја проверите бизнис идејата со пазарот, а тоа значи да спроведете истражување на пазарот, што секако бара време и го одложува процесот на започнување на бизнисот. Прочитајте повеќе во бизнис идеја не е бизнис можност.
  • Да се спроведат сите неопходни подготовки за стартување. Локација, залихи, магацини, канцелрии, регистрација, вработување, подготовка на неопходните ресурси… Сето ова се елементи кои треба да бидат спремни пред официјално започнување на бизнисот и кои секако одземаат време.
  • Да се направи план за една до три години однапред. Без соодветен план за Вашиот нов бизнис истиот однапред ќе биде осуден на пропаст. Мора да направите план кој нема да дозволи да избегнете од зацртаниот пат. Но, и планот бара време.
  • Да се произведат неопходните производи и/или услуги за стартување на бизнисот. Доколку Вашиот бизнис претставува производно претпријатие ќе мора да дизајнирате производ, да произведете бета верзија на истиот, да го тестирате и доколку се е ОК да започнете со официјално производство за продажба. Сето ова бара време.

Е сега, кога е вистинското започнување на бизнисот? Дали кога ќе ги добиете потребните документи од Централен регистар и останати институции? Дали кога ќе отворите банкарска сметка? Дали кога ќе легнат парите од првиот кредит заедно со Вашите на Вашата бизнис сметка?

Не, бизнисот во вистинска смисла започнува кога ќе ја имате првта продажба. Бизнисот започнува кога ќе ја имате првата нарачка. Бизнисот започнува кога ќе ги имате парите на рака од првата нарачка.

post

SWOT анализа за социјални медиуми – Маркетинг средство 91

SWOT анализа за социјални медиуми

SWOT анализа за социјални медиуми

Концептот за примена на SWOT анализа за социјални медиуми претставува навистина корисен концепт кој може да ви помогне во успешно градење на присутноста на Вашиот бизнис на социјални медиуми. Како 91-во маркетинг средство го избрав токму овој концепт – спроведување на SWOT анализа за социјални медиуми.

Што престатвува SWOT анализа за социјални медиуми?

SWOT анализа е тема која повеќе пати беше обработувана на претприемач, како од научен така и од практичен аспект. Да се потсетиме првин за тоа што претставува SWOT анализа.

Во SWOT анализа во 4 чекори наведовме дека:

SWOT анализа е алатка за планирање, особено за стратешко планирање. Се користи за проценка на Јачините (Strengths) и Слабостите (Weakness) како внатрешни елементи на бизнисот, Можностите (Opportunities) и Заканите (Threats) како надворешни елементи на бизнисот.

Кога станува збор за социјалните медиуми оваа анализа ќе се однесува на проценка на јаките и слабите страни на вашиот бизнис на социјалните медиуми како внатрешни елементи и можностите и заканите како надворешни елементи.

Оваа анализа може да ви помогне при изготвување на стратегија за социјални медиуми која беше опфатена како 90-то маркетинг средство.

М-р Илија Чубровиќ (се надевам дека од утре ќе го именувам како Д-р) како дел од неговата магистерска работа дизајнираше прашалник за спроведување на SWOT анализа. Тој прашалник содржи прашања актуелни за тоа време, но како пример како да се спроведе една ваква анализа може да користи и денес, нормално со редизајн на некои прашања прилагодени кон вашиот бизнис.

И во овој дел ќе се обидам да дадам еден таков приод за спроведување на SWOT анализа за социјални медиуми преку одговор на минимум прашања.

Прашања кои ќе треба да ги одговорите?

И во овој дел ќе се обидам да дадам еден таков приод за спроведување на SWOT анализа за социјални медиуми преку одговор на минимум прашања. Прашањата треба да бидат групирани во два дела – внатрешни и надворешни елементи.

Прашања за внатрешни елементи

Внатрешните елементи треба да ви ги покажат јаките и слабите страни на вашиот бизнис на социјалните медиуми. Одговорете колку што можете повеќе прашања. Бидете реални и не ги одбегнувајте слабите страни. Со одбегнување нема да го подобрите вашиот бизнис.

  1. Колкаво е досегашното искуство на вашата команија на социјални медиуми?
  2. Што е она што го правите добро на социјални медиуми, а што е она што го правите лошо?
  3. Каква е опременоста со кадри за градење на присутноста на социјалните медиуми?
  4. Каква е мотивираноста на тие кадри за градење на присутност на социјалните медиуми?
  5. Дали мате соодветна технологија за градење на присутноста на социјални медиуми?
  6. Како ја користите таа технологија?
  7. Какво е знаењето и оспособеноста на вработените за користење на таа технологија?
  8. Дали вработените во вашиот бизнис користат различни социјални медиуми во нивниот приватен живот?
  9. Доколку користат како можете да го искористите тоа за целите на Вашиот бизнис?
  10. На какво ниво е соработката помеѓу вработените во вашиот бизнис?
  11. Дали менаџментот е подготвен за користење на социјални медиуми?
  12. Дали менаџментот знае како да ги обучи вработените за користење на социјални медиуми?
  13. Дали вашиот бизнис има барем малку забавна карактеристика во дневното функционирање?
  14. Дали можете тоа да го искористите за градење на присутност на социјалните медиуми?
  15. Колкаво е нивото на креативноста во вашиот бизнис?
  16. Дали веќе имате веб сајт или блог на кои креирате вредна содржина?
  17. Дали вие или вашиот бизнис користите социјални медиуми за лични или бизнис цели?
  18. Кои социјални медиуми ги користите и колкав е нивниот број?
  19. Каква е вашата експертиза за индустријата во која оперирате?
  20. Каква е глобалната експертиза на вашиот бизнис за индустријата во која оперира?

Ова се 20 прашања кои ве водат низ процесот. Не значи дека се комплетни или целосни. Слободно додавајте уште прашања за кои сметате дека се валидни како внатрешни елементи кои ќе ви покажат кои се вашите слаби или јаки страни за присутноста на социјалните медиуми.

Прашања за надворешни елементи

Надворешните елементи треба да ви ги покажат можностите и заканите кои вашиот бизнис треба да ги искористи или избегне на социјалните медиуми. Одговорете колку што можете повеќе прашања. Бидете реални и не ги одбегнувајте заканите. Тие имаат цел да ви покажат каде треба да внимавате.

  1. Развојот на технологијата во подрачјето на социјалните медиуми претставува можност или закана за вашиот бизнис?
  2. Како ве ценат вашите потрошувачи?
  3. Дали вашите потрошвачи користат технологија за присутноста на социјалните медиуми?
  4. Дали присутноста на социјалните медиуми на Вашите потрошувачи е компатибилна со вашата присутност?
  5. Дали присутноста на социјалните медиуми на Вашите потрошувачи е компатибилна со присутност на вашите вработени?
  6. Како сакаат вашите потрошувачи да комуницираат со вашиот бизнис?
  7. Како сакаат вашите потрошувачи да соработуваат со вашиот бизнис?
  8. Дали вашите потрошувачи имаат потреба од едукација за да ги користат вашите производи и/или услуги?
  9. Каква стратегија за социјални медиуми користат вашите конкуренти?
  10. Како вашите конкуренти комуницираат со нивните потрошувачи?
  11. Како вашите конкуренти ги едуцираат нивните потрошувачи?
  12. Каде се наоѓаат потрошувачите на вашите конкуренти?
  13. Каква е експертизата на вашите конкуренти?
  14. Каква технологија користат вашите конкуренти?
  15. Дали вашите снабдувачи се присутни на социјалните медиуми?
  16. Какво влијание може да имаат вашите снбдувачи врз вас и вашиот бизнис на социјалните медиуми?
  17. Постои или закана дека вашите снабдувачи можат да навлезат и на вашиот пазар?
  18. Многу нелегални бизниси се обидуваат да продаваат преку социјални медиуми. Какво влијание има ова врз вас?
  19. Дали во вашата околина има доволен број на луѓе обучени за да бидат дел од вашиот бизнис тим?
  20. Дали едукативниот систем во вашата околина опфаќа и обука за користење на технологија?

Ова се 20 прашања кои ве водат низ процесот на анализа на можностите и заканите за користење на социјални медиуми. Не значи дека се комплетни или целосни. Слободно додавајте уште прашања за кои сметате дека се валидни како надворешни елементи и кои ќе ви покажат кои се вашите можности и закани за присутноста на социјалните медиуми.

Што понатаму?

Понатаму продолжете со станардната оперативна процедура за спроведување на SWOT анализа која опфаќа:

  • Конструирање на SWOT матрица и
  • Дефинирање на стратегии.

Чија е одговорноста?

Доколку навистина сакате да успеете мора да постои одговорност. Но, прашањето кој ќе биде одговорен за спроведување на една ваква SWOT анализа за социјални медиуми?

Првин, најдоговорен сте вие како еден претприемач. Потоа тимот кој ќе го изберете да работи на анализата и подготовка на стратегијата и на крајот сите вработени во Вашиот бизнис ќе бидат одговорни за градење на присутноста на социјалните медиуми.

post

Желби на малите бизниси за 2011 – Google

Google желби на малите бизниси

Google желби на малите бизниси

Во декември Small Business Marketing тимот на Google спроведе иницијатива во која ги праша малите бизниси кои им се желбите за 2011 година. Тоа беше еден вид на „желботека“ на Google.

Различните желби тимот на Google ги групира во 3 категории и подкатегории. Еве некои желби што малите бизниси ги имаат и бараат во 2011 од Google:

  • Повеќе можности и дополнителни карактеристики на онлајн алатките.
  • Повеќе онлајн ресурси кои ќе им помогнат во растот на малите бизниси.
  • Помош за тоа како да се користат социјалните медиуми.
  • Да извлечат максимум од веб сајтот.
  • Повеќе онлајн алатки за водење на бизнисот поефикасно за да можат да имаат повеќе време за концентрација на потрошувачите.
  • Повеќе маркетинг алатки за големување на видливоста на бизнисот.
  • Повеќе едукација.
  • Помош за започнување на бизнисот.

Повеќе за желбите на малите бизниси можете да прочитате на официјалниот блог за малите бизнис на Google.

post

Жени претприемачи – Воведни забелешки

Овој пост е напишан од страна на м-р Илија Чубровиќ и Проф.Д-р Тодор Кралев за книгата Менаџмент на претприемничкиот бизнис, а е доработен со нови статистички податоци од страна на м-р Драган Шутевски.

Жени претприемачи

Жени претприемачи

Жените претставуват еден голем и значаен дел од светската популација, со несомнено големо влијание во сеопфатното општество. Ако мажите претставуват кров на една куќа, тогаш несомнено жените претставуваат темел на таа куќа. Нивното влијание на сите нас ни е потполно јасно, но ние тука ќе се позанимаваме со однесувањете на жените во професионална смисла – претприемништвото.

Доколку жените се набљудуваат во професионална смисла, може да се забележат големи постигнувања во секоје подрачје. Па, мора да се констатира дека во светските рамки влианието на жените континуирано расте. Одредени сектори кои до вчера како да беа резервирани само за машките се повеќе ги заземат жените. Да ги анализираме неколку позначајни сегменти во општеството:

  • Науката. Има се повеќе жени кои се јавуваат како добитниците на нобеловата награда од сите области на науката како: физика, литература…, што представува големо признание во светот на науката.
  • Спортот. Жените постигнуваат се позначајни резултати во различните спортски дисциплини. Освојуваат и спортови кои до вчера беа резервирани за машките (фудбал, кошарка…). Нивните натпревари стануваат се поинтересни. Се јавуваат повеќе гледачи, како на натпреварите така и пред екраните, што привлекува повеќе спонзори. Со поголеми спонзорства се очекуваа поголеми финансиски резултати, а со тоа се отвара перспектива за уште поголем развој на женскиот спорт.
  • Политика. Во овој сегмент жените влегувале внимателно. Како прво им било потребно да добијат право на гласање. Потоа истакнувале по некоја кандидатка за политичка функција, што во некои случаи се работело повеќе за маркентиншки трик отколку за реална желба да се вклучат жените во политика. Понатаму жените се повеќе ја согледуваат своја моќ која ја имаат како гласачко тело (бидејки популацијата на жените во голем број на земјите е поголем од мажите, што може да се должи на загуби на машката популација во одредени војни или од некоја друга причина, а исто така жените се подисциплинирани и имаат поголема излезност на изборите) па се кандидираат се поголем број на жени дури и за најодговорни позиции во државата. Па, сега веќе има жени кои станале претседатели на држави, премиери, министри… Почнувајки од канцеларката на Германија, секретарките во Стејт Департментот, потпреседателката на Кинеската влада . Ова претставуваат едни од поугледни позиции кои жените ги завземат во најмоќни држави на светот. Секако дека има и други влијателни жени на функциите но ние како пример наведовме неколку.
  • Бизнис. Се поголем е бројот на жените претприемачи, кои успешно работат и остваруваат приход во до вчера машкиот сектор бизнис.

Со ово заклучуваме дека жените не се само предодредене да бидат мајки, сопруги… туку континуирано влегуват во сите пори на општеството. Секако дека овие светли примери не се однесуват на секоја земја во светот. Има држави кои ги стават жените во много неповолна положба, дури од наш агол гледано во положбата на робови, каде им се скратени сите права од едукација, политика, спорт, музика…

Што доведува до волкав подем на жените?

Како прво жените по својата интелегентност, способност, снаодливост… во никој случај не заостануваат зад мажите. Значи тие реално ги заслужуваат тие позиции (а практично веќе се докажани). Веројатно разните претходни стереотипи се виновни зошто порано не дошло до поголем пробив на жените во сите пори од општеството.

Жените и нивната улога во претприемништвото добиваат се поголема актуелност како во развиените земји, така и во земјите во транзиција. Во развиените економии се следат сите фактори кои можат да придонесат за развојот и тие фактори се користат максимално. А во овој случај го анализираме значењето на жените во бизнисот, а и воопшто. Во светот континуирано се појавуваат поволни услови за развој на женското претприемништво, политика, наука… За тоа многу придонесуваат разните лоби групи. Сметаме дека и падот на наталитетот игра големо влијание на се поголемото значење на жените во светот. Доколку некој банкар има една ќерка секако дека ќе инвестира големи средства во нејзината едукација па со текот на времето тие ќе станат моќни фигури за бизнисите. Тие ќе увидат дека нема ништо лошо во тоа жените да се занимаваат со бизнис па понатаму ќе ги форсират свои ќерки, и други жени а ќе дадат и пример како треба да се однесува и на други луѓе што се на се резултира со женскиот прогрес во секоја смисла (наука, политика, спорт, бизнис…).

Многу банкари беа скептични кога се работеше за жените претприемачи и потешко им одобруваа кредити, не ги сваќаа сериозно, но поради докажаните резултати и вроденото внимание на жените тој однос секојдневно се менува. Тука се и фондовите на владите за развој на женското претприемништво, како и финансирање од разни профитни или непрофитни организации. Како главен проблем во работењето се јавува финансирањето и фактот дека не биле сериозно прифаќани како сопственици на претпријатија. Во САД постојат специјализирани оддели во банките кои се задолжени за финансирање на жените претприемачи. Повеќе финансиери се мажи и тие имаат стереотипни размислувања за тоа што жените можат да направат.

Во САД за да се елиминираат пречките на жените во пристап до капитал, се развиени повеќе програми за заеми и кредити. Има и непрофитни организации кои ги финансираат потребите на жените за отпочнување и развој на бизнисот, при што се нудат краткорочни заеми.

Што ги мотивира жените се повеќе да влегуваат во бизнис? Еве неколку фактори:

  • Обезбедување на егзистенцијата,
  • Желбата за независност,
  • Желба за самодокажување,
  • Желба за самостојност во однос на мажот,
  • Желба децата да го наследат бизнисот,
  • Обезбедување на сигурност за староста,
  • Желба за успех и независност,
  • Потреба од сатисфакција во работата,
  • Економски потреби…

На жените претприемачи потребна им е посебна помош во однос на едукацијата, стекнување на специфични способности и знаења, финансирање, техничка помош, влевање на самодоверба преку различни обуки, практична настава и слично.

Едно истражување од Goldman Sachs Group објавено во еден текст покажува дека приходот по глава на жител во Бразил, Кина, Индија, Русија и другите новопојавени пазари може да се зголеми за 14% доколку жените имаат подобри менаџерски и претприемнички вештини. Па затоа компанијата одвои 100 милиони долари за наредните 5 години за едукација на жени претприемачи од земјите во развој кои се сопственици на бизниси кои ќе се квалификуваат за програмот. Уште еден показател за тоа како се гледаат жените претприемачи е и тоа што Светската Банка обезбеди 100 милиони долари до 2012 година како комерцијални кредити за жените претприемачи.

Бизнисите што ги поседуваат жените би растеле многу побргу доколку се овозможи еднаков пристап до капиталот каков што имаат мажите. Жените почнуваат бизнис со многу помалку пари. Тоа е затоа што најчесто започнуваат бизниси во услужните дејности.

Жените најчесто сакаат да работат во малопродажба, домашните ракотворби, шиењето и други услуги, како и работи кои можаат да се извршуваат од дома при што ќе обезбедат соодветна независност и сигурност, но и нема да ги заборават своите обврски дома како жени и мајки. Поседување на сопствена фирма овозможува постоење на флексибилно работно време бидејќи е важно “колку ќе се сработи“, а не“колку се работи“. На овој начин жените го добиваат она што го посакуваат, а тоа е од една страна обезбедување на приходи, а од друга страна добиват флексибилно работно време за да можат да се посветат на себеси и на семејството. Корпоративниот живот претставува проблем за жените, бидејки не обезбедува флексибилност на работно време, што на жените им е неопходно, бидејки имаат изразени семејни потреби.

Но, каква е статистиката во однос на жените претприемачи. Во Македонија не се води некоја посебна статистика во однос на бизнисите поседувани од жени. Дури и во западните земји доцна се отпочнало со водење статистички податоци околу работењето на жените претприемачи. Статистичките податоци од САД зборуваат дека пред 1970 година жените биле сопственици на помалку од 5% претпријатијата. Во 1985 поседувале 28%, додека 2006 година имало 40,2% што ни кажува дека 2 од 5 бизниси се поседувани и водени од жените.

Има случаи кога жените земаат помала плата од мажот за иста работа, додека во ниедна литература и истражување не се наведуваат обратни примери кога жената е газда да плаќа помалку за вработените мажи. Што може да биде комплимент за женското однесување.

post

Нов дизајн на претприемач за 2011

Оваа година ја започнавме со еден сосема нов дизајн на претприемач. Кога велам дизајн не мислам само на визуелниот дел од истиот туку и на некои дополнителни карактеристики кои ги воведовме, а кои на некој начин во претходните постови беше најавено.

Првин, ја сменив целосно работната околина во која функционира новата тема на претприемач. Досега ја користев Thesis темата од која сеуште не се откажувам и сеуште некои тековни и некои идни проекти ќе бидат градени на истата. Сега во позадина на овој веб сајт е Genesis Framework со Church Child Theme. Многу се пишуваше за оваа теме во последните неколку месеци и едноставно одлучив да скокнам и да ја пробам (никогаш не пишувам за нешто што не сум искусил лично). Техничкта функционалност во основа е слична со Thesis, но единствена предност е што има повеќе готови теми кои функционират на Genesis и кои се лесно прилагодливи. Тоа е околу техничките детали, но да наведам нешто за функционалноста.

Достапност на содржината на претприемач

До содржината на претприемач можете да пристапите на неколку начини:

  1. Категории на постови
  2. Ознаки
  3. Последни постови
  4. Пребарување

Како до содржините на претприемач

Нови функционалности на претприемач

Со овој дизајн има воведено две новини. Првата е што за првпт официјално ќе прифаќаме гостински постови. За таа цел направив посебна страна – Сподели знаење. Доколку имате нешто вредно да споделите со нас и читателите на претприемач слободно напишете и испратете ни го преку формата на таа страна каде што се дадени и условите и деталите за користење на истата. Секој гостински пост ќе содржи кртка биографија за авторот како и линк до веб сајтот доколку има.

Втората функционалност е за сите нови посетители на претприемач. Извлечени се најдобрите постови во форма на еден прирачник за претприемачите од:

  • Општо за претприемач и претприемништво
  • Бизнис идеи
  • Бизнис план
  • Маркетинг
  • Интернет маркетинг и
  • Менаџмент.

Страната е наречена како Започни тука.

Билтени на претприемач

Целосно е редизајниран системот за билтени на претприемач кој сега изгледа вака:

  • Добредојде e-mail. Ова е првиот e-mail откако некој ќе се регистрира за билтени. Во него ќе има кратко објаснување за тоа што ги очекува луѓето како и линкови за симнување на бизнис темплејти, калкулатор за анализа на готовинскиот тек и 10 видео материјали за изработка на веб презентација за Вашиот бизнис.
  • 2-неделни ажурирања. Секои две недели ќе оди еден е-мail за последните 12 написи на претприемач. Целта е секој оној кој нема можност секојдневно да не следи да има можност да ги види насловите и ако нешто смета дека треба да прочита да прочита.
  • Едукативни теми. Ова е сосема нов концепт на претприемач. Ќе има 8 едукативни теми од областа на претприемништвото и за секој месец по една. Што значи дека од овој елемент на аутореспондер во наредните 8 месеци ќе се испраќа по еден е-mail со едукативни теми преку линкови до најдобрите постови до претприемач и совети за водење на Вашиот бизнис. Овие теми претставуваат еден вид на прирачник за претприемачите и активности за спроведување во 30 дена.
  • Разно. Овој елемент нема подесена секвенца туку ќе се користи за испраќање на информации или линк до одредени анкети кои ќе ги спроведуваме. Секако и попусти на сите наши идни услуги.

Тоа би било накратко се за овој, последниов редизајн. Сега е време да се сконцентрираме на содржината, не чека навистина интересна година.

post

15 Алатки за виртуелизација на Вашиот бизнис

Алатки за бизнис виртуелизација

Алатки за бизнис виртуелизација

Виртуелизација значи Вашата компанија да стане виртуелна или делумно виртуелна. Тоа значи одредени операции да се изведуваат и без лично присуство на Вас самите или некој од Вашите вработени. На пример, да присуствувате на виртуелен состанок наместо на реален физички состанок. Пред повеќе од 10 години во една книга за менаџмент од САД читав едно поглавје кое зборуваше токму за виртуелна компанија. Тогаш си мислев колку сме далеку од сето тоа. Но, сепак денес сето тоа е возможно. Секојдневно на пазарот излегуваат нови технологии кои може да најдат место во Вашиот бизнис. Бизнис процесите секојдневно стануваат се посложени и посложени. Како што поминувате во наредните фази од животниот циклус на вашиот бизнис, сложеноста на работата е се поголема. Се бара различна соработка, outsourcing, виртуелни вработени и канцеларии. Ова се трендови кои не можеме да ги запреме доколку сакаме да останеме на патеката на успешноста. Ова се трендови кои ја олеснуваат работата на бизнисот, а од друга страна ја зголемуваат ефикасноста и ефективноста на Вашите бизнис процеси. Тука би претставиле 11 алатки кои можат да му помогнат на Вашиот бизнис и што е најважно тие се бесплатни.

Комуникација/Соработка

GMail – Ова е e-mail сервис кој е навистина еден од најдобрите. Има интегрирано повеќе алатки за организација на вашите e-mail-ови како и алатка за четување и видео четување. Можете да останете поврзани со вашите пораки било каде и да сте.

Dimdim – Претставува апликација за веб конференции. Основната услуга е бесплатна. Dimdim претставува бесплатна (основна верзија) апликација за веб конференции преку која можете да покажете слајдови, да зборувате преку кратки текстови, аудио зборување преку веб камера без потреба да симнувате апликација и да ја снимате на вашиот компјутер. Бесплатната верзија овозможува видео конференциска врска до 10 луѓе, за повеќе ќе треба да изберете верзија која е од 25$ нагоре.

Oovoo – Претставува бесплатна апликација за видео разговори преку интернет со колеги, семејство, пријатели… Оваа апликација е лесна за користење, лесно се инсталира и што е најважно таа е бесплатна. Една од карактеристиките е што овозможува видео со висока резолуција и ги снима вашите видео повици. Доколку не ви се пишуваат e-mail пораки можете да пратите e-mail видео порака. Она што е добро е што можете да разговарате и со оние кои ја немаат инсталирано оваа апликација така што ќе им пратите повик за видео конференција, тие ќе добијат линк кој кога ќе го следат видео повикот ќе се отвори во вашиот web browser. И уште една важна работа е што оваа апликација може да се користи за видео конференција до 6 луѓе.

Skype е алатка која навистина го измени телекомуникацискиот свет. Со гласовни и видео повици, како и чет системот, трансфер на фајлови и конференциски повици Skype стана алатка која мора да се поседува и користи од страна на претприемачите. Големиот број на бесплатни сервиси може да ги намалат бизнис трошоците.

Google Groups може доста креативно да се користи во бизнис цели. Може да се користи за работа на различни проекти од повеќе луѓе каде ќе се споделуваат идеи, коментари и предлози. Може да се користи за информирање на вработени или група на потрошувачи за разни бизнис новости.

Google Docs во нова верзија особено внимание дава на соработка помеѓу група на луѓе. Сега истовремено може повеќе соработници да работат на еден документ без разлика дали е табела, текст или некоја презентација. Доколку имате интернет, немате средства за лиценцирање на MS Office ќе претставува доследна бесплатна замена за Вашите бизнис решенија и во некои случаи дури и подобра.

Видео/аудио

Blip.tv – Претставува веб апликација за видео блогирање, и делење на видеата помеѓу гледачите преку интернет. Основната услуга е бесплатна. Можете да поставите ваши видеа кои ќе бидат достапни на заедницата на blip.tv како и на вашиот блог. Потребно е да се регистрирате и да го имате вашиот простор за аплоадирање на вашите видеа.

YouTube –  Претставува веб апликација која исто така служи за аплоадирање на вашите видеа кои потоа можете да ги прикажувате преку вашиот веб сајт или блог. Вашата задача е да направите видео за вашиот производ или услуга, или пак да ја покажете вашата експертиза и со поставување на YouTube да привлечете гледачи.  И двете апликации (blip.tv i YouTube.com) претставуваат одлична маркетиншка можност за вашиот бизнис како на домашно така и на глобално ниво.

BlogTalkRadio – Претставува социјална радио мрежа што им овозможува на корисниците да хостираат сопствени радио програми и да ги поврзат брзо и директно со нивната аудиенција. Преку телефон и компјутер може да се креираат бесплатно во живо радио програм на кој може да се јават неограничен број на партиципанти и што е важно целата програма се снима и може да се користи на вашиот блог или веб сајт.

Складирање на податоци

Adrive – Ова е веб апликација која што ви овозможува да складирате податоци од вашиот компјутер на нивните сервери. Доколку ви се намалува просторот на вашиот хард диск ќе можете да ослободите до 50 GB простор доколку тие факлови ги пренесете на серверите на Adrive и тоа бесплатно. Од друга страна добивате достапност до вашите податоци од било каде доколку имате компјутер и интернет конекција.

Mozy – Оваа апликација овозможува 2 GB онлајн простор без да платите ништо. Ви овозможува до 2 GB онлајн простор и далечински бекап на вашите податоци. Потребно е да се регистрирате, да го симнете и инсталирате софтверот и да ги изберете фајловите за бекап кои се наоѓаат на вашиот компјутер.

Dropbox како место за сигурно чување на различни документи претставува солидно средство за еден бизнис. Бесплатната верзија е ограничена до 2 GB простор. Синхронизираноста е возможна од повеќе локации.

Продуктивност

Google Calendar – Претставува алатка на google која овозможува да се постават вашите состаноци, активности. Дава можност да бидете потсетени на вашиот е-mail, но и да добиете SMS потсетник на вашиот мобилен телефон. Можете да го делите со вашите соработници. Корисноста е уште поголема што овозможува RSS feed.

SurveyMonkey – Претставува веб апликација која ќе ви овозможи да дизајнирате онлајн анкети, да ја распространите и да ги анализирате податоците од истата. Бесплатната опција ве ограничува до 100 одговори по анкетен прашалник и 10 прашања по прашалникот. Одлична можност за истражување на локален пазар од страна на претприемачите.

Evernote e алатка која навистина може да помогне во зголемување на нашата сопствена продуктивност во однос на нашите идеи или пак случувања кои ни се важни и сакаме да ги запаметиме за да ги користиме во иднината. За зголемување на продуктивноста преку Evernote веќе пишував во насловот Evernote – Ја зголемува продуктивноста.

Иако основните верзии на овие алатки се бесплатни, првин направете стратегија за тоа што ви треба и како ќе ги користите. Квалитетна стратегија и користење на овие алатки може да ви го олесни бизнис животот.

post

Стратегија за социјални медиуми – Маркетинг средство 90

Стратегија за социјални медиуми

Стратегија за социјални медиуми

Ќе продолжиме со серијалот маркетинг средства на претприемач. Во изминатиов период во овој
серијал опфативме повеќе различни видови на социјални медиуми кои може да се користат за градење и зголемување на присутноста на вашиот бизнис на интернет. Но, често пати се поставуват прашања во
вид на што, како, кога или каде. Ние опфативме само еден мал дел од различните платформи кои постојат, реалноста е инаку една џунгла без некои добро воспоставени правила на игра. Затоа за да се постигне одредена успешност за секој бизнис потребно е да се примени стратешки приод. Мора да имаме стратегија за користење на социјални медиуми бидејќи сите напори без една таква стратегија ќе бидат залудни.

Што е стратегија за социјални медиуми?

Стратегија претставува план на акции за остварување на поставените цели. За имплементација на една стратегија потребно е да имаме повеќе тактики. Секоја тактика се исполнува со активности кои имаат одредени датуми на остварување, одговорни лица за остварување на тие активности и потребни финансиски средства за остварување. Значи стратегија за социјални медиуми ќе ни биде средство со кое ќе ги оствариме поставените цели.

А кои цели ги има поставено нашиот бизнис кои треба да ги оствари преку социјални медиуми? Овие цели не се толку опипливи како другите, но може да бидат во вид на:

  • градење на присутност,
  • зајакнување на препознатливоста на брендот,
  • зголемување на листа на потенцијални купувачи,
  • помош и подршка на купувачите,
  • едукација на купувачите и потенцијалните купувачи,
  • …

Ова е само еден мал дел од можни цели на еден бизнис за настап на социјални медиуми. Стратегијата треба да даде листа на активности за остварување на тие цели кои што ќе си ги поставите. Морате да бидете свесни и за ресурсите, особено временски.

Градење на стратегија за социјални медиуми

Стратегијата за социјални медиуми треба да ни даде одговор минимум на следниве прашања:

  • Кои социјални медиуми ќе ги користиме?
  • Како ќе ги користиме тие социјални медиуми?
  • Кои се нашите следни активности?

Да навлеземе накратко во сите 3 пршања.

1. Кои социјални медиуми ќе ги користиме?

Одговор на ова прашање зависи од:

  • целите кои ги имате поствено и кои треба да се остварат преку социјални медиуми,
  • видот на бизнисот како и пазарот и индустријата во која стопанисува истиот и
  • одговор на прашањето каде се моите потенцијални потрошувачи.

Откако ќе дојдете до листа на најважните социјални медиуми веќе ќе знаете кде треба да го насочите Вашето внимание.

2. Како ќе ги користиме тие социјални медиуми?

Второто прашање на кое ќе треба да дадете одговор е како ќе ги користите тие социјални медиуми до
кои дојдовте преку одговор на првото прашање. Во овој дел кога одговарате на како размислувајте веднаш на 4 елементи:

  • Комуникација – Со кого, што и како ќе комуницирате?
  • Едукација – Кого, што и како ќе едуцирате?
  • Забава – Со кого, што и како ќе се забавувате? Во овој дел е потребна и внимателност, не за секој бизнис функционира забава.
  • Соработка – Со кого, за што и како ќе соработувате?

3. Кои се нашите следни активности?

Претходните две прашања ни дадоа одговор за тоа кои социјални медиуми ќе ги користиме и како ќе ги користиме. При одговор на оваа прашање преточете ги тие одговори во листа на активности за периодот кој следува во кој треба да ги остварите поставените цели.

Во Премиум материјалот на претприемач во модулот за социјални медиуми овој процес го поминуваме подетално и е следен со темплејти во вид на алатки кои ве водат низ процесот.

post

Среќна Нова 2011 Година!

Среќна Нова Година

Среќна Нова Година

Го поминуваме и последниот ден од оваа 2010 година. Најверојатно сите сме во некои последни подготовки за вечерашнава прослава за пристигнување на новата година. Па затоа само накратко ќе ја искористам оваа прилика на сите читатели на претприемач да им ја честитамe Новата 2011 година и да им посакамe успех на сите полиња од тимот на претприемач (Александар – @alandonovski, Ненад и Драган – @sutevskid)!

Се гледаме следната година!

post

Интернет маркетинг – Најдоброто на претприемач во 2010

Интернет маркетинг - најдобро за 2010

Интернет маркетинг - најдобро за 2010

Интернет маркетинг претставува 6-тата тема од серијалот најдоброто на претприемач во 2010. Со неколку серијали во однос на блогирање, оптимизација за пребарувачи, онлајн маркетинг средства и PPC кампањи беше една од позастапените теми оваа 2010 година.

Едно прашање често преовладува кај претприемачите, а тоа е дали треба да бидат застапени на интернетот. Што ако се локални бизниси? Што ако функционираат само офлајн нивните бизниси? Претприемачот треба да започне да го гради своето онлајн присуство и ако е локален бизнис и ако функционира само офлајн. Едноставно нека се запраша каде се неговите потенцијални потрошувачи? Најверојатно над 80% би биле присутни на некаков начин онлајн без разлика дали се на Facebook или пак Twitter или пак бараат некое решение на Google за кое можеби токму Вашиот бизнис може да им помогне.

Ова се 6 постови кои се избрани како најдобри во 2010. Но, 2 од нив се серијали во кои има линкови до целата серија која ќе ве води низ соодветниот процес.

  1. E-mail маркетинг кампања во 8 чекори. Во постот се дадени 8 чекори во кои можете да спроведете E-mail маркетинг кампања која станува се покорисно и продуктивно маркетинг средство за бизнисите без разлика на нивната големина.
  2. 5 Слоеви за успешен бизнис блог. Овој пост претставува една моја презентација за слоеви на кои ја темелам успешноста на еден блог кога станува збор за бизнис цели.
  3. Промени во Маркетинг. Во овој пост се начнати некои промени во последните 10-тина години кои имаат огромно влијание врз денешните бизниси. Прифати или спреми се за самоуништување!
  4. Google Adwords – Маркетинг средство 74. Во овој пост ќе ги најдете линковите до серијалот на постови за Google Adwords кој претставува една PPC кампања.
  5. SEO – Оптимизација за пребарувачи. Во овој пост ќе ги најдете линковите до серијалот на постови за SEO – оптимизација за пребарувачи што всушност претставуваат еден мини прирачник за спроведување.
  6. Дали онлајн стратегија претставува бизнис стратегија? Во постот се дадени одговори на неколку прашања кои се однесуваат на бизнис стратегија и онлајн стратегија.
post

Менаџмент – Најдоброто на претприемач во 2010

Менаџмент - Најдоброто за 2010

Менаџмент - Најдоброто за 2010

Пета тема од серијалот најдоброто на претприемач за 2010 година претставува менаџмент – нешто без што не може нормално да функционира ниеден бизнис. Ова значи дека мора да имате минимум еден вработен кој ќе го менаџирате заради остварување на воспоставени бизнис цели.

И доколку не сте во моментов менаџер туку претприемач – solopreneur не значи дека нема да станете менаџер. Сепак ќе дојде време да вработите соработници за Вашиот бизнис.

Како најдобри наслови за 2010 година ги избравме следниве:

  1. Зголемена нагласеност на казни – ниско ниво на доверба! Во постот е дадна теоретска дискусија за довербата како и едно искуство во кое недостатокот на доверба преку казни доведува до лоши резултати.
  2. Една Менаџерска Задача – Инсталирање на Доверба. Инсталирање на доверба во еден организациски систем како што претставува бизнисот претставува императив за секој менаџер, кој од друга страна ќе го воведе во категорија на успешни менаџери.
  3. Станав Менаџер и Сега Што? Добар работник не значи и автоматски добар менаџер. Различни се потребните вештини и секако активности за менаџерска и неменаџерска функција.
  4. 28 Фактори кои предизвикуват отпор кон организациски промени. Ова всушност е напишано порано, но оваа година го реобјавив со некои ситни дополнувања. Но, сепак во постот се наоѓаат 28 фактори кои предизвикуваат отпор кон промените и кои ги добив на научна основа преку спроведено истражување во Република Македонија.
  5. Тимска работа и тимска ефективност. Во постот е даден преглед на академска литература и се дискутира улогата на модерниот менаџер во денешната комплексна и конкурентна бизнис средина во областите на мотивирање, организирање и како крајна цел, водење на тим.
  6. Дилема на еден претприемач: Обука за вработени. Логично и нормално е да се инвестира во вработени кои би требало да го развиваат бизнисот преку нивните секојдневни активности. Но, дилемата се појавува поради фактот што постои „опасност“ тие вработени утре да си заминат.
  7. Задржување на најдобрите без промоција во менаџери. Често поставувано прашање е како да се задржат најдобрите вработени притоа да не мора да се промовираат во менаџери.
  8. 10 Начини да ги Задржите Најдобрите Вработени. Вработените претставуваат срце на бизнисот. Можете да имате добри, но исто така и лоши вработени. Но, опасноста е што добрите вработени може да ве напуштат. Во постот се дадени 10 начини како да ги задржите најдобрите вработени.