post

Домен Име – Маркетинг Средство 56

Можеби ова маркетинг средство требаше да биде пред веб страна или блог затоа што има директно влијание и на двете. Како што името на Вашиот бизнис е уникатно, така и името на доменот на Вашата веб страна или блог ќе биде уникатно и нешто по што може да го препознаваат Вашиот бизнис.

Ова е уште еден елемент од бизнисот кој полека, но сигурно станува градител на Вашиот бренд.

Што претставува домен име?

Не сакам да навлегувам во формални или технички дефиниции на домен името бидејќи само ќе доведе до забуна на нетехнички лица. Она што еден претприемач треба да го знае е следново:

  • Тоа е она што се прикажува во Вашиот интернет прелистувач најгоре.
  • Тоа е она што во очите на посетителите ја разликува една веб страна од друга.
  • Тоа е она за што плаќате на годишно ниво за да го користите.
  • Тоа е она преку кое што еден потенцијален купувач ќе ве најде доколку го знае и без пребарувачи едноставно со впишување на URL-то.

Препораки за домен името

Многу размислував и анализирав за тоа што да се избере да биде дел од домен името. Наједоноставно е да се избере името на компанијата и да завршите работа, но тоа не е едно подолгорочно решение кое ќе ви донесе други предности, особено во однос на SEO. Домен името има силно влијание на оптимизација за пребарувачите и едноставно не треба да се остави како еден едноставен елемент при севкупната онлајн презентација на Вашиот бизнис. Како за илустрација еве еден пример кога пребарувам на Google за зборот Business:

Забележувате во резултатите дека зборот кој го пребарувам е болдиран и тоа во:

  • Насловот,
  • Описот и
  • Домен името.

Тоа значи дека и домен името има влијание кај пребарувачите, односно влијание врз основа на тоа кој збор е содржан во него. Така да доколку името на Вашиот бизнис го содржи и клучниот збор за кој сакате да бидете најдени, тогаш е ок да го изберете тоа име. Но, доколку, на пример името на Вашиот бизнис е НМД (Најдобри Македонски Домати) не би било препорачливо домен името да биде nmd.com бидејќи ќе изгубите една дополнителна придобивка која се зема во предвид од страна на пребарувачите.

Затоа како едни препораки какво треба да биде домен името ги издвоив следниве:

  1. Описно
  2. Лесно запомливо
  3. Да го содржи клучниот збор
  4. Да не е предолго
  5. Да го отсликува брендот

Во секој случај задачата не е баш толку едноставна за да се искомбинираат овие препораки.

Процес на избор на името на доменот

Врз основа на сето она што погоре го напоменав би го издвоил следниов процес во поедноставени чекори кои ќе треба да ги спроведете:

  • Анализа на клучни зборови
  • Избор на клучен збор
  • Комбинација со името на Вашиот бизнис
  • Комбинација со Вашиот бренд
  • Проверка на тоа дали е едноставно, дали може лесно да се запомни и дали лесно се изговара.
  • Проверка на достапност на најдобрите.
  • Регистрација на најдоброто достапно домен име.

Доколку не можете да се снајдете во овој процес, препорачливо е да најмите професионалец кој ќе ја спроведе целосната анализа за Вас.

post

Блог – Маркетинг Средство 55

Блог како маркетинг средство

Блог како маркетинг средство

Како 55-то маркетинг средство во овој серијал за маркетинг средства на претприемач ќе го презентирам едно од најмоќните онлајн маркетинг средства – блогот. Она што е карактеристично за блогот како маркетинг средство е дека може да има огромно влијание и врз другите онлајн маркетингс средства, но од друга страна не е лесно, бара многу повеќе работа и ангажман. Се надевам дека веќе имате онлјн стратегија за Вашиот бизнис во кој е или ќе биде опфатен блогот како еден вид на маркетингс средство.

Што претставува блог?

Постојат различни дефиниции за блоговите. Ќе наведам некои од нив:

  • Онлајн дневник на кој може да се пишува, чита и едитира.
  • Дневник кој е објавен или се објавува на интернет.
  • Веб страна која има јавен пристап и на која се објавуваат различни написи.
  • Специјализирана веб страна која им овозможува на индивиуалци или група на индивидуалци да делат различни лични информации од секојдневниот живот.
  • Веб страна на која написите се објавени во вид на весник и прикажани во хронолошки редослед.
  • Еден вид на веб страна која постојано се ажурира со написи, коментари, опис на случки, или пак други материјали во вид на аудио или пак видео, каде што овие написи се прикажани во хронолошки редослед.

Сметам дека ова се доволно дефиниции за да се види што е тоа блог.

Блогот (Blog) е кратенка од weblog што може да се преведе како веб дневник. Инаку од погоре наведените дефиниции ќе можеме да го кажеме следново:

  • Блог претставува веб страна
  • Блогот има различни написи
  • Блогот има динамична содржина што значи дека на него постојано се објавуваат нови содржини
  • Содржината може да биде во вид на напис, коментар, случки, слики, аудио и видео
  • Написите на блоговите може да бидат читани од страна на читателите на интернет
  • Читателите може да праќаат коментари на написите

Често пати поставувано прашање е во што се разликува блогот од класичните „нормални“ веб страни. Иако знаеме дека и блогот претставува веб страна. Еве во што се најголемите разлики:

  • Постојано ажурирање на содржината. Класичните „нормални“ веб страници не се менуваат често, па затоа кога ќе се навратите неколку пати и не забележите промена, веќе нема да ја посетувате таа веб страна. Ова значи и губење на посетители и намалување на моќта на веб страната како маркетинг средство. Со блог како посебен тип на веб страница содржината се менува постојано, дневно, неделно, месечни итн. Што почесто, толку подобро.
  • Можност читателите да остават коментар. Оваа е навистина огромна разлика во однос на статичните веб страни. Секој напис има функција за коментирање. На ваков начин се овозможува блогот да биде двонасочна комуникациска алатка и непресушен извор на информации за Вашиот бизнис.
  • Едноставност во објавување на написи. За да се објават написи на блогот не е потребно техничко лице. Оваа може да се изведе и од луѓе кои воопшто немаат познавање од техниката користена за веб страници. Објавувањето е едноставно и слично како да работите на Word документ или како што испраќате e-mail.
  • Хронолошки распоред на написите. Во блоговите написите се прикажани во хронолошки редослед со тоа што најновите написи се први. А, од друга страна до сите останати написи може да се дојде преку функција пребарување или пак листање на категориите на написите на блогот.

Како може да Ви помогне блогот како маркетинг средство?

Постојат многу придобивки кои ќе можете да ги искористите со Вашата веб презентација со блогот како посебен вид на веб страница.

Едноставно треба да се тргне дека интернетот претставува светско чудо на нашето време. Нема кој не е закачен на интернет. Според веб странатa www.internetworldstats.com која се занимава со статистика за користење на интернетот последните податоци за декември 2009 година покажуваат 1.802.330.457,00 интернет корисници на светско ниво што претставува 26,6% од глобалната популација на светот. Дали постои друго маркетинг средство кое има толкав број на корисници? И од друга страна кога ќе земеме дека оваа презентација може да се изведе со најмала инвестиција во споредба со другите маркетинг средства, во секој случај ќе влезе во категорија на едно од најефикасни и најефективни маркетинг средства.

Но, да тргнеме по ред. Што е она што може Вашиот бизнис да го добие со избор на блог како дел од Вашата веб презентација?

  • Со блогот Вашиот бизнис ќе добие веб присуство на глобалниот светски пазар. Веќе напоменавме дека 26,6% од глобалната популација користи интернет. Дури и да Вашиот бизнис е локален сепак еден ден ќе ги почувствувате придобивките од оваа презентација.
  • Повеќе индексирани страни од страна на Google претставува можност за повеќе потенцијални купувачи.
  • Презентација на Вашите производи. Можете да направите презентација на сите Ваши производи и/или услуги кои што ги нуди Вашиот бизнис. Овде можете да користите:
    • Текстуален материјал за опис на производите и/или услугите и коментари од Вашите постоечки потрошувачи
    • Слики на производи и/или услуги кои што ги нудите
    • Аудио записи за опис на Вашите производи и/или услуги како и коментари за истите од страна на постоечките потрошувачи
    • Видео материјали за Вашите производи и/или услуги како и коментари од Вашите постоечки потрошувачи.
    • Написи во форма на како да се направи нешто. Ова треба да биде поврзано со производите и/или услугите кои ги нудите.
  • Спроведување на анкети, анализи и истражувања. Блогот можете да го користите и за спроведување на различни анкети како би собрале информации за донесување на поквалитетни одлуки во иднина.
  • Објавување на прес конференции и маркетинг материјали. Секоја прес конференција или информација која се однесува за Вашиот бизнис или пак производите и/или услугите ќе можете да ги објавите преку Вашиот блог.
  • Блогот ќе ве поврзе со многу луѓе кои може да бидат Ваши потенцијални потрошувачи.
  • Ќе знаете што сакаат Вашите потрошувачи или пак потенцијални потрошувачи. Секој блог напис има интегрирано скрипта за коментирање. Секој коментар оставен на некој од Вашите написи ќе ви каже што е она што го сакаат потрошувачите, така да ќе можете да ги насочите сопствените активности во насока на задоволување на тие потреби.
  • Блог написите се вирозни. Вирозен маркетинг е нешто што го сонува секој претприемач. По секој напис може да има прати на пријател по е-mail. Така да можете да очекувате доколку Вашите написи навистина даваат некоја вредност за читателите брзо да се распространат до повеќе луѓе.
  • Блогот може да ви помогне да изградите бренд. Брендот ќе биде името на Вашиот бизнис, логото, слоганот и домеин името на Вашиот блог. На сите материјали што излегуваат од Вашиот бизнис ставајте ги тие работи.
  • Блогот може да ви помогне да изградите солидна репутација. Со објавување на различни написи за Вашата индустрија Вие ќе се градите како еден експерт од тоа подрачје. Оваа постојано ќе ви ја зголемува репутацијата како на Вас како претприемач така и на Вашиот бизнис.
  • Блогот ќе претставува извор на постојано зголемување на границите на вашиот пазар. Доколку имате повеќејазична верзија на блогот Вашиот потенцијален пазар ќе биде неограничен. Доколку сакате да извршите интернационализација на Вашиот бизнис препорака е да имате задолжително и англиска верзија на блогот.
  • Блогот ќе ве спои со потенцијални снабдувачи. Освен од потенцијални купувачи блогот може да биде читан и од потенцијални снабдувачи и тие самите да ве контактираат и бараат да работите заедно.

Ова се само некои од позначајните придобивки кои може да ги добие Вашиот бизнис со блогот. Инаку може да се набројат уште многу други.

Како да се имплементира?

Се надевам дека веќе имате бизнис веб страна, а со тоа и хостинг и бизнис домеин име. Доколку немате завршете ги тие активности пред да започнете со бизнис блогирање. Следете ги следниве чекори:

  • Направете план на темите кои ќе ги обработува Вашиот бизнис блог.
  • Врз основа на темите определете ги категориите.
  • Подгответе барем 10 написи уште пред започнување.
  • Одлучете за домеин името на блогот, односно URL-то. Дали ќе биде www.vasbiznis.com/blog или ќе биде во вид на поддомеин www.blog.vasbiznis.com или пак ќе биде на посебен домеин.
  • Инсталирајте WordPress.
  • Објавете го првиот напис од подготвените 10.
  • Одлучете на кој период ќе го ажурирате. Најдобро е секојдневно, но доколку немате време размислете да одите барем со неколку написи неделно.
  • Подесете ги останатите 9 подготвени написи.
  • Одлучете кој ќе биде одговорен за пишување и ажурирање.
  • Бреинстормирајте постојано нови идеи за написи.
  • Споделувајте се што може да биде интересно и корисно за Вашите потрошувачи.
  • Промовирајте го и со другите традиционални маркетинг средства.

Излезе предолг написов, а мислам дека не успеав се да опфатам. Но, сепак се обидов да претставам некои значења за блогот како едно маркетинг средство.

post

Веб Страна – Маркетинг Средство 54

Веб страна како маркетингс средство

Веб страна како маркетинг средство

Маркетинг едноставно претставува средство кое ќе овозможи бизнисот на еден претприемач да биде присутен онаму каде што се потенцијалните потрошувачи за тој бизнис. Веќе повеќе пати тука на претприемач ја нагласувам потребата за онлајн стратегија и присуство на глобалниот интернет простор на еден бизнис. Еден од начините за оваа присутност е преку бизнис веб страна.

Еден пример!

Пред неколку месеци за еден нов бизнис започнав веб страна (на англиски), односно откупив домеин име, хостинг веќе имав и склопив за еден ден страна со неколку подстрани во вид на производи кои ги нудиме. По тој еден ден застанав, немав време да ја довршам страната, но она што беше важно што успеав да овозможам брзо индексирање на страна од Google и да ставам контакт форма на истата. Иако слабо котира, во изминатиов период од неколку месеци бевме контактирани неколку пати од потенцијални потрошувачи. Последен пат беше вчера, од една компанија во Чешка со која се надеваме да оствариме деловна соработка.

Значи еден ден работа овозможи неколку контакти со потенцијални купувачи и тоа со една толку пасивна веб страна која дури не е ни довршена, има малку текст, но има слики и табели од производната програма. Тоа значи дека инвестирање во едно вакво маркетинг средство вреди.

Зошто веб страна е мора во маркетингот?

Без разлика дали се работи за B2B или B2C потенцијалните купувачи вообичаено го користат интернетот пред да донесат одлука за купување на нешто. Тие едноставно го користат интернетот за:

  • Да најдат информација за производи и/или услуги кои им се потребни.
  • Да споредат цени на тие производи и/или услуги.
  • Да најдат информации за искуството на други корисници на тие производи и/или услуги.
  • Да најдат информации за кредибилитетот на потенцијалните снабдувачи.
  • Да контактираат со потенцијалните снабдувачи.
  • Да комуницираат со потенцијални снабдувачи.
  • Да нарачуваат производи и/или услуги.
  • …

Забележувате колку покомплексен станува бизнис светот со еден интернет и достапноста на информации. Доколку Вие како претприемач не бидете таму ќе се најдете но од страна на некој друг кој можеби ќе го пофали или пак нападне Вашиот бизнис. На интернетот сите сме голи.

Како до сопствена веб страна?

Имате повеќе можности за ова, но сепак можеби првото нешто е да го определите Вашиот буџет. Јас ако се прашувам не би штедел за оваа маркетинг средство, но сепак треба да бидеме реални дека стартап компаниите не се во можност да одделат дури и толку мала сума на пари која може да се движи од 0 до 1000 евра. Нула доколку самите ја превземетe обврската да го сработите ова преку некои од бесплатните домеини и хостинг сервиси. Но, сепак треба да бидам искрен дека потенцијалот на еден ваков начин ќе биде многу помал, а од друга страна Вие сте претприемач и би требало да се насочите во вистинските претприемнички задачи.

1000 евра е нешто што ќе ви обезбеди навистина професионално изработена веб страна и нормално поголемо импресионирање на потенцијалните купувачи.

Како еден претприемнички процес во овој дел би го издвоил следново:

  • Изработете онлајн стратегија за Вашиот бизнис. Прочитајте за тоа дали онлајн сратегија се поистоветува со бизнис стратегија.
  • Видете каква е целта и улогата на бизнис веб страната во таа стратегија.
  • Извлечете ги тактиките кои планирате да ги имплементирате и секако активностите кои произлегуваат од истите.
  • Најмете некој или едноставно самите започнете да ги спроведувате.
  • И секако не заборавајте ја целината, веб страната е само еден дел од Вашата севкупна онлајн стратегија.
post

Бизнис План – Онлајн Стратегија

Ќе продолжам со туторијалот за бизнис планирање. Досега ја направивме насловната страна, кажавме и за резимето и содржината, напишавме нешто за компанијата, ги дефиниравме производите и услугите кои ќе ги понудиме на пазарот, направивме анализа на пазарот и индустријата и спроведовме SWOT анализа. Сега е на ред нешто сосема ново, и нешто што во практика ретко или пак воопшто го гледам.

Бизнис план - Онлајн стратегија

Онлајн стратегија како дел од бизнис план

Овој наслов како дел од еден бизнис план е нешто сосема ново, нешто што не беше опфатено со претходната верзија на туторијалот за изработка на бизнис план. Сметам дека е од суштинско значаење за бизнисот ушто во оваа фаза на планирање претприемачот да испланира за онлајн присутноста и онлајн активностите кои ќе ги спроведува во иднина.

Во претходниот пост дадов некои видувања за тоа околу поистоветување на онлајн стратегијата со бизнис стратегијата. Мислам дека за да не се направи грешка со испуштање на онлајн присутноста на еден бизнис мора уште во оваа фаза да се вклучи и онлајн стратегијата во процесот на бизнис планирање.

Овој наслов како дел од еден бизнис план можеби претставува наједноставниот наслов за кој е потребна добра волја на претприемачот и секако разбирање на значењето и потребата на една онлајн стратегија во неговиот бизнис.

Неколку важни одлуки

Пред да започнете со изработка на онлајн стратегија како дел од процес на бизнис планирање би требало да одговорите на следниве прашања:

  1. Што прават потенцијалните конкуренти на оваа поле?
  2. Кои се онлајн активностите на потенцијалните конкуренти?
  3. Каде на интернетот се присутни моите потенцијални клиенти?
  4. Што бараат потенцијалните клиенти на интернетот?
  5. Како мојот бизнис да биде присутен на начин подобар од конкурентите и попрепознатлив за потенцијалните купувачи?
  6. Дали ќе имам само статична веб презентација на производите и/или услугите или динамична и интерактивна со потенцијалните купувачи содржина?
  7. Која ќе биде целта на онлајн присутноста?
  8. Што ќе биде постигнувањето кое може да се каже дека е задоволителна нашата присутност?

Со одговор на овие прашања, но одговор кој ќе биде реален и неутрален веќе ќе можете да ја видите Вашата онлајн стратегија која ќе биде дел од Вашиот бизнис план.

Дизајнирање на онлајн стратегија

Во седмото прашање веќе дадовте одговор за целта на онлајн присутноста на Вашиот бизнис. Па затоа и дизајнот треба да започне со тие цели кои ќе се преточат во стратегија. На пример, имате цел јакнење на Вашиот бренд со онлајн присутност. Стратегиите за исполнување на оваа цел би можеле да бидат: зголемување на посетеност на Вашата веб страна, зголемување на интеракцијата со посетителите, зајакнување на присутноста на социјалните медиуми…

За секоја стратегија треба да произлезат посебни тактики. На пример, за стратегијата зголемување на посетеноста на веб страната некои тактики би биле:

  • Постојано ажурирање на содржина,
  • SEO – Оптимизација за пребарувачи,
  • Користење на PPC кампањи,
  • Промоција преку социјални медиуми,
  • …

Ставам три точки за да не бидам сфатен дека ова е единствено, ова е само пример кој може да ви даде еден патоказ како да ја подготвите Вашата онлајн стратегија како дел од бизнис планот. Понатаму за секоја тактика (како што ја дефиниравме стратегијата во Стратегија за бизнис трансформација) ќе треба да ги специфицирате конкретните активности и одговорностите на одделите или пак лицата кои ќе треба да ги спроведат тие активности. На пример, за постојано ажурирање на содржина како активности би можеле да ги дефинирате следниве:

  • Следење на вестите од индустријата,
  • Пишување на информативни содржини,
  • Објавување на сите тие содржини
  • …

Онлајн стратегија како дел од бизнис планот

Сега веќе ги имате дефинирано сите овие елементи во вид на:

  • Стратегија
    • Тактики
      • Активности

Сега едноствно ви останува сето тоа да го ставите во една табела и на една страна да биде сместена во бизнис планот. Тоа е доволно за да имате почетна онлајн стратегија за Вашиот бизнис. Вклучете ја како дел од бизнис планот и верувајте ми, дека нема ништо да изгубите, а придобивките доколку ја реализирате се немерливи.

post

Дали онлајн стратегија претставува бизнис стратегија?

Живееме во време на интернетот, каде информациите не се заштитени само за одредена група на луѓе. Од друга страна се е поприсутна двонасочната комуникација во секојдневниот живот на просечен граѓанин кој е поврзан на некаков начин на глобалната мрежа. Сето ова остава голема трага и на бизнисите и на претприемачите. Дури и да има некои кои не го почувствувале оваа влијание набргу ќе го почувствуваат. Се почесто слушам зборови порано беше вака, во старите добри времиња…

Бизнис стратегија и онлајн стратегија

Онлајн стратегија и бизнис стратегија

Но, тоа порано или тие стари добри времиња денес се минато и доколку се навраќаме на нив само може да ни наштетат. Потребно е брзо погледите да се насочат колку што може подлабоко во иднината.

Пред некое време добив e-mail од Аmazon за да направам пред нарачка за книга која сеуште ни тие не ја добиле. Насловот ми се допадна затоа што го содржеше токму она што го ставив во насловот на овој пост во вид на прашање: Marketing in the Age of Google: Your Online Strategy IS Your Business Strategy (Маркетинг во ера на Google: Вашата онлајн стратегија e Ваша бизнис стратегија). И секако додека ја очекувам книгата да ми пристигне ми налетаа неколку прашања во главата.

  • Дали бизнис стратегија може да се поистоветува со онлајн стратегија?
  • Дали навистина онлајн стратегија во иднина ќе биде и единствена бизнис стратегија?
  • Дали бизнисот мора да продава преку интернет за да има онлајн стратегија?
  • Дали онлајн стратегија ќе опфаќа само продажна и маркетинг онлајн стратегија за бизнисот?

Ќе се обидам накратко да го дадам моето размислување за одговори на овие прашања.

Дали бизнис стратегија може да се поистоветува со онлајн стратегија?

Бидејќи стратегијата е средство за исполнување на бизнис цели која е составена од тактики и активности кои треба да се спроведат може да се каже слободно дека онлајн стратегијата може да се поистоветува со бизнис стратегија. Се повеќе луѓето, па и бизнисите бараат информации на интернет, купуваат преку интернет, комуницираат преку интернет, се спријателуваат преку интернет, споделуваат преку интернет… Затоа и се повеќе бизнис релациите ќе се селат од кафеани на интернетот, па од тука и потребата онлајн стратегијата да биде дел од бизнис стратегијата.

Дали навистина онлајн стратегија во иднина ќе биде и единствена бизнис стратегија?

Во поразвиените земји ова е веќе реалност, а неможам да кажам дека нема да биде реалност и кај нас. Многу бизниси целосно своите операции ќе ги префрлат на интернетот, дел од бизнисите ќе префрлат само дел во вид на продажба и маркетинг, некои само ќе бидат присутни минорно, но оние кои воопшто нема да бидат присутни мислам дека ќе го започнат процесот на умирање од животните циклуси на бизнисите. Можностите се огромни, не само во продажба и маркетинг туку и во се останато, штета е да не се искористат.

Дали бизнисот мора да продава преку интернет за да има онлајн стратегија?

Не. Едноставен, но сигурен одговор. Во никој случај продажбата не е и не треба да биде поврзана со присутноста на глобалната мрежа. За да бидете најдени едноставно треба да бидете присутен таму каде што некој бара нешто што вие можете да му го понудите. На кој начин ќе ве исконтактира, на кој начин ќе комуницирате и на кој начин ќе се договорите останува на Вас како еден претприемач, а можностите и слободата за креативноста се огромни.

Дали онлајн стратегија ќе опфаќа само продажна и маркетинг онлајн стратегија за бизнисот?

И тука одговорот кој мислам дека е точен е НЕ. Маркетинг и продажба претставуваат срце на бизнисот, но за да функционираат онака како што треба потребни се многу други елементи како истражување и развој, анализи, идеи, подобрувања… За сето ова постои можност да се користи интернетот. На пример, однесувањето на купувачите можете да го предвидите преку интернетот, потребите на потенцијалните купувачи и нивните проблеми исто така можете да ги откриете преку интернетот. Можете да развивате нешто со колегакој е во некоја трета земја без никаков проблем.

post

Електронски Билтен – Маркетинг Средство 53

За оваа недела како 53-то маркетинг средство ќе ги опфатиме електронските билтени. Во претходната недела стана збор за E-mail маркетинг што значи дека доколку го користите веќе градите сопствена листа. Како дел од E-mail маркетинг можете да ги користите и електронските билтени кои може да се испраќаат на одреден временски период.

Што претставува електронски билтен?

Како 37-мо маркетинг средство на претприемач пишував за билтени и сето она што таму е опфатено може да важи и за електронските билтени. Таму го дефиниравме билтенот како:

  • Нешто што редовно се дистрибуира
  • Содржи тема која е од интерес за примателите
  • Нешто што претставува еден вид на публикација.

Кога станува збор за електронски билтен само ќе биде додадено дека е во електронска форма кој се испраќа преку e-mail или пак може да се симне преку бизнис веб страна или блог.

Форма на електронски билтен

Може да се користи било која форма која овозможува електронска дистрибуција на самиот билтен. Како најкористени форми може да бидат:

  • PDF формат на билтен. Овој билтен е добар во случаи кога истиот ќе се поставува на Вашата бизнис веб страна или пак блог и оној кој ќе сака ќе може да си го симне. Предноста е во тоа што овозможува одлична визуелизација преку поставување на слики, форматиран текст, различни бои…
  • HTML формат на билтен. Овој формат се користи во случаи кога билтенот се испраќа преку е-mail или пак кога едноставно ќе може да се прегледува преку Вашата веб страна. Предноста е во тоа што овозможува одлична визуелизација преку поставување на слики, форматиран текст, различни бои…
  • Text формат на билтен. Ова е обичен текстуален билтен во вид на текстуален е-mail. Визуелен ефект е многу слаб, но стапката на примање преку e-mail е многу поголема.

Без разлика која форма ќе ја изберете би било пожелно билтенот да биде достапен и на Вашата веб страна. На пример да имате страна со билтени и линкови до истите.

Процес на подготовка

Пред да започнете со објaвување и дистрибуција на електронски билтени би требало да:

  • Ја определите содржината на истиот. Што ќе содржи билтенот? Кои теми ќе ги обработува?
  • Ја опредeлите структурата на истиот. Каква ќе биде структурата, односно кои ќе бидат поднасловите? Ова ќе зависи од самата содржина?
  • Го определите периодот на објавување и дистрибуирање. На колку време ќе се објавува нов билтен. Кога станува збор за бизниси, најоптимално е да го подесите на еден месец, со оа што ќе имате 12 билтени годишно.
  • Доколку се испраќа преку е-mail да го изберете сервисот за дистрибуција (види E-mail Маркетинг за повеќе детали за сервис за дистрибуирање).
  • Да го осмислите начинот на промовирање на истиот. На пример, во кој дел од Вашата бизнис веб страна или пак на кои се други маркетинг средства ќе го промовирате овој билтен.
  • Да одлучите за тоа кој ќе биде одговорен за содржината.
  • Да одлучите за форматот на билтенот. Кој формат и какви бои ќе се користат.
post

E-mail Маркетинг – Маркетинг Средство 52

Ќе продолжиме со 52-рото маркетинг средство на претприемач. Во овој пост ќе стане збор за E-mail маркетинг како маркетинг средство за малите бизниси. Ова маркетинг средство слободно може да се каже дека не е веќе ново, туку едно од првите кои се појавуваат со развојот на интернетот и користењето на електронската пошта како средство за комуникација како во деловниот така и во приватниот свет.

E-mail маркетинг за малите бизниси

E-mail маркетинг

Што Претставува Е-mail Маркетинг?

Меѓу првите маркетинг средства во овој серијал ги обработивме писмата кои спаѓаат во категорија на директен маркетинг во кој еден бизнис праќа писмо до потенцијален купувач со цел да изврши некакво маркетиншко влијание врз истиот.

E-mail маркетинг исто така претставува еден вид на директен маркетинг во кој наместо хард копи писма се испраќаат таканаречени електронски писма до потенцијалните или тековните потрошувачи. Значи е-mail маркетинг претставува испраќање на електронско писмо до потенцијален или теков потрошувач на бизнисот. Но, ова е во најопшта смисла на зборот. Не би сакал да го користам овој термин како средство кое се употребува во секојдневната комуникација на еден бизнис со друг бизнис или индивидуалец, иако понекогаш може да се смета дека е така. Ова е заради фактот што кога зборувам за ова маркетинг средство мислам на испланирана и координирана кампања за исполнување на маркетиншки цели на бизнисот. Така да ако би барале дефиниција би го дефинирал на следниов начин:

E-mail маркетинг претставува планирана и координирана кампања преку испраќање на група на електронски писма до потенцијални или тековни купувачи за исполнување на маркетиншките цели на бизнисот.

Предуслови за E-mail Маркетинг

Секое маркетинг средство па и ова бара некои предуслови за да има можност да биде класифицирано во категорија успешно. Тука би опфатил неколку за кои сметам дека се најважни.

1. Веб Страна

Прво сметам дека е потребно да се има и бизнис веб страна за да се искористи онака како што треба оваа маркетинг средство. Целта на веб страната е да биде место каде потенцијалните и тековните купувачи ќе ги видат деталите за кои ќе станува збор во самиот e-mail. Ова е поради фактот што понекогаш не можете се да напишете и се да покажете во тој еден e-mail.

2. Алатка за менаџирање

Како втор предуслов е да се има соодветна алатка за менаџирање на кампањите. Можеби сметате дека е доволен MS Outlook, но веднаш ќе Ви одговорам дека не е доколку се работи за една поголем листа. Постои можност и да се користат таканаречените групи (на пример Google Groups), но и тоа е несигурна варијанта особено за гаранција дека пораката ќе стигне онаму каде што е наменета. Во секој случај најдобро е да се искористат некои од сервисите кои нудат ваква услуга.

3. Содржина

Добро е уште во оваа фаза во вид на предуслови да се размисли за содржината на e-mail пораките кои ќе ги праќате. Тие треба да бидат информативни, едукативни, интересни а од друга страна да имаат одредена цел – да поттикнат продажба. Затоа пред да се започне со една ваква кампања е потребно да се избере вистинската содржина.

3. Double Opt-In

Ова претставува секој кој ќе влезе во листата да ја потврди сопствената регистрација. Со попрофесионални алатки за менаџирање ова е нешто што ќе помогне Вашиот домеин да не биде окарактеризиран како spam. Зошто? Затоа што кај поединците постои незнаење и може да пратат жалба до нивниот провајдер со што постои опасност сите меилови кои во иднина ќе доаѓаат од меилот од кој Вие праќате да бидат окарактеризирани како несакани. Со тоа драстично се намалува бројот на примени e-mail-ови кои ќе ги испраќате. На пример, Aweber во случај на една таква жалба автоматски го исклучува лицето од листата и праќа е-mail до провајдерот во кој докажува дека тоа лице самото побарало да биде дел од таа листа.

4. Можност за сегментација

Која и да ја изберете опција треба да размислите за можноста за сегментација на листата. Листата може да биде составена од тековни купувачи и потенцијални купувачи што веднаш прави разлика во самата содржината која ќе ја примаат и едните и другите.

Што може да се користи како содржина?

Секој бизнис може да користи различна содржина за пораките кои ќе ги праќа. Креативноста на претприемачот и тука има најголема улога. Границите се бесконечни и буквално нема пречка дали ќе се избере текст, видео или аудио содржина. Единствена граница е што треба да се следи целта на кампањата. На пример, како содржина може да биде користено следново:

  • Кратки новости од индустријата
  • Едукација за користење на Вашите производи и/или услуги
  • Искуство со Вашите производи и/или услуги на Вашите тековни потрошувачи
  • Покана за учество во наградна игра која ја организира Вашиот бизнис
  • Известување за попусти
  • Анкети
  • Едукативни содржини
  • Нови блог написи на Вашиот бизнис блог
  • Линкови до корисни веб страни поврзани со Вашата индустрија
  • …

Одлуки кои ќе треба да ги донесете

Постојат многу одлуки кои ќе треба да ги донесете пред започнување на една ваква кампања. Како најважни одлуки би ги издвоил следниве:

  • Која ќе биде целта на кампањата? Најважната одлука која што ќе треба да ја донесете. Добро дефинирана цел ќе значи и половина дизајнирана e-mail маркетинг кампања.
  • Која алатка ќе ја користите? Многу важно прашање на кое ќе треба да дадете одговор уште во оваа фаза на планирање. Од мое искуство само би препорачал да не се залетувате да користите нешто затоа што е бесплатно или поевтино затоа што подоцна оваа одлука може да ве чини многу повеќе пари доколку погрешите во изборот.
  • Дизајн на кампањата? Направете графички приказ на кампањата, односно видот на меиловите, сегменти на приматели и главни содржини.
  • Каде ќе ги испратите? Логично е во меиловите да имате линкови до каде што ќе сакате да ги испратите примателите. Размислете за алтернативите дали тоа ќе биде продажната страна, контакт страната, блог, промотивна страна… Пожелно е во графичкиот дизајн да ги вклучите и овие елементи кои во голем дел ќе зависат од целта на кампањата и сегментот како примател.
  • Фреквенција на испраќање. Многу важна одлука за која што никогаш нема да бидете сигурни дали сте ја донеле правилно. Мое мислење е дека не треба да се оди со повеќе од 1 до 2 неделно.
  • HTML или Text Plain пораки. Дали пораките ќе бидат во вид на HTML порака која е многу попрофесионална во однос на обичниот текст, но од друга страна одредени приматели не можат да ја примат. Ова со помош на попрофесионалните сервиси како Aweber и Getresponse e решено така да секоја HTML порака автоматски се трансформира и во Text Plain порака при што доколку примателот не може да ја прочита првата ќе ја добие втората верзија.
  • Од која адреса ќе испраќате? Најдобро е адресата да биде домеинот на Вашата бизнис веб страна. Многу попрофесионално е да користите ime@vasbiznis.com наместо ime@yahoo.com.
  • Наслови на поединечните е-mail-ови (Subject). Насловот ќе има влијание на процент на отворање на секоја порака. Направете барем листа на можни наслови на секоја e-mail порака барем на оние кои ќе бидат подесени за секвенцијално испраќање.
  • Како ќе ја промовирате? Иако последно, сепак не и неважно. Промоцијата на листата е Важен аспект за успешноста на e-mail маркетинг кампања. Логично би било да ја промовирате на Вашата веб страна, но не е забрането да користите и некои од традиционалните маркетинг средства како бизнис картички, брошури, летоци…

Што да избегнете?

  1. Да испраќате на луѓе кои не се на листа. Основно и прво правило на секоја e-mail маркетинг кампања е да не испраќате несакани meil-ови на лица кои не се на Вашата листа, односно од кои немате дозвола да им испраќате нешто.
  2. Да не користите двојно Opt-In. Обидете се да изберете сервис кој ја има оваа опција, иако ова е еден чекор плус за потенцијалните купувачи сепак на подолг рок носи стабилност за Ваквите кампањи.
  3. Да немате линк за исклучување. Дозволете секој кој како што самиот влегол во листата и самиот да си излезе.

Написов излезе предолг, а ми се чини дека успеав да се искажам само 5% од она што го сакав и планирав. Затоа ќе треба во иднина да ја продолжам темава. Ова беа само кратки насоки за една e-mail маркетинг кампања како маркетинг средство за малите бизниси.

post

Ажурирање на блог од секаде – BlogPress

По подолго време чекање успеав да стигнам до оваа интересна апликација за iPhone и едноставно овој пост претставува тестирање на истата. Имено од кога го купив телефонот се обидував да најдам попрофесионални апликации. Вчера конечно по неколку недели добив е-mal од support тимот на Apple дека го отстраниле проблемот зошто не можев да купувам од iTunes Store. Па веднаш си се почестив неколку апликации од кои едната е и ова BlogPress за iPhone.

Првата интересна карактеристика која ми се допадна е можноста за користење скоро преку сите платформи за блогирање. На сликата подолу се прикажани можностите:

Видови на платформи за блогирање

Како што можете да забележите од сликата можете да ја користите за блог кој е на Blogger, MSN Live Spaces, WordPress, Movable Type, TypePad, Live Journal, Drupal и многу популрната кај нас Joomla. Едноставно избирате платформа го подесувате корисничкото име и лозинката и веќе можете да започнете со мобилно блогирање. Треба да потенцирам дека нема ограничување колку блог профили ќе подесите во апликацијата.

Втората карактеристика е интеграција со YouTube, Twitter и Facebook. Ова значи дека едноставно секое видео на вашиот iPhone пред да се закачи на блог написот ќе се аплоадира на вашиот YouTube акаунт, во исто време може да биде ажуриран и Вашиот профил на Twitter и Facebook.

Лесно се пишува иако не е како на десктоп компјутерите. Колку помалку се комбинира текст со слика или видео подобро. Сепак ова апликацијата служи повеќе за објавување на слики и видео проследено со краток текст. На пример, снимите изјава на задоволен потрошувач едноставно веднаш можете да ја преточите во блог напис. Moжете да го снимите Вашиот производ во акција и веднаш да го претставите тоа на Вашиот блог.

iPhone BlogPress

Апликацијата е 2,99$ и за цената мислам дека е корисна за секој претприемач кој го користи блогот како маркетинг средство во комбинација со iPhone.

Недостаток е немање на можност за вметнување на  SEO елементите кои мора да се внесат дополнително преку WordPress платформата.

— Post From My iPhone

post

10 Чекори за Подобро Разбирање на Потребите на Потрошувачите

Претходниот напис на претприемач беше за Разбирање на потрошувачите ја зголемува бизнис потенцијалната енергија каде идентификувавме два негативни ефекти од незадоволни потрошувачи врз Вашиот бизнис: Губење на бизнис потенцијалната енергија складирана во потрошувачите и маркетингот, како и губење на таа енергија складирана во готовинскиот тек.

Овие негативни ефекти се фатални за секој бизнис и особено за стартап бизнисите кои имаат недостаток на готовина и недоволно искуство. Една од причините зошто бизнисите пропаѓаaт е и несоодветно разбирање на потребите на потрошувачите.

Како подобро да ги разберете потребите на потрошувачите?

Во натамошниот дел од овој напис ќе споделам 10 чекори кои може да ви помогнат да ги разберете потребите на Вашите потрошувачи. Редоследот на спроведување не е важен.

  1. Разбирање на пазарната ниша на која се наоѓа Вашиот бизнис. Бидејќи вие имате бизнис и сте се одлучиле да продавате нешто на тој пазар мора да се запрашате себеси на кого ќе продавате, што ќе продавате, зошто ќе продавате и кога и каде некој на таа пазарна ниша купува. Ова значи дека ќе мора да знаете кои се Вашите потрошувачи. Доколку знаете кои се Вашите потрошувачи ќе знаете нешто и за нивните потреби. Доколку Вашите потрошувачи се постари луѓе тие ќе имаат поразлични потреби од помладите.
  2. Прашајте го Вашиот продажен тим да ви каже нешто за Вашите потрошувачи. Бидејќи продажниот тим е во директен контакт со вашите потрошувачи тие ќе имаат доволно информации за нив и што е тоа што тие го сакаат. Во една база на податоци за малопродажба пред неколку години направив опција за секој вработен како продавач да прави дневни извештаи за најважни делови од тој работен ден. На ваков начин тие бележат доколку некој нешто барал, прашувал или ги изразил своите потреби.
  3. Направете кратко интервју со најважните потрошувачи. Секој бизнис има неколку категории на потрошувачи (Прочитајте за RFM формула). Изберете група на најважни клиенти или потрошувачи и едноставно прашајте ги неколку прашања за нивните потреби и претходно искуство со слични производи и/или услуги. Овие информации можете да ги користите за постојано подобрување на Вашиот бизнис како и градење на долгорочни односи со потрошувачи.
  4. Коментари на блог. Без разлика за каков бизнис станува збор моја препорака е блогот да се користи како маркетинг средство. Блогот овозможува двонасочна комуникација со тековни и потенцијални потрошувачи и претставува одличен извор на информации за следење на нивните потреби. Следете ги негативните коментари, одговорете дека ќе се подобрите и секако кога ќе ја отстраните негативноста пратете им e-mail дека тоа и тоа сте го поправиле и сега се е перфектно. Не заборавајте да им кажете доколку откријат уште нешто слободно може да ве контактираат. На ваков начин не само што го подобрувате Вашиот бизнис, не само што ги разбирате потребите на Вашите потрошувачи туку и едноставно си давате дополнителна шанса за тој потрошувач повторно биде во бизнис со вас.
  5. Анкети. Од време навреме направете и распространете анкети за искуството на потрошувачите со Вашиот бизнис. Овие анкети може да бидат онлајн или пак офлајн во Вашите продажни простории. Анкетите ќе ви дадат свежи информации во однос на нивното искуството со Вас. Тие можат да се измиксаат и да се користат на тековни потрошувачи но и на потенцијални потрошувачи со што ќе имате еден добар микс на информации за тековното искуство со очекувања од потенцијални потрошувачи.
  6. Социјални мрежи. Социјалните мрежи полека но сигурно стануваат стандард во бизнис светот. Обидете се Вашите потенцијални и сегашни купувачи да бидат дел од тие Ваши мрежи и следете го нивното однесување како би се доближиле на нивните потреби.
  7. Читај други блогови од индустријата на твојот бизнис. Не е важно каде се тие блогови важна е информацијата на истите и секако коментарите на сличните потрошувачи дома или пак во странство. Ова се многу важни информации кои може да се искористат за да секогаш бидете пред Вашата конкуренција.
  8. Разговарајте со луѓето. Секаде каде што ќе одите разговарајте со луѓето за нивните потреби поврзани со Вашиот бизнис. На ваков начин ќе можете да дојдете до вредни информации за нивните проблеми и потреби со што ќе ви дојдат идеи за подобрување на Вашиот бизнис. Доколку не разговарате и не прашувате никој ништо нема да ви каже и со тоа ќе ја пропуштите шансата за квалитетни информации.
  9. Читајте весници поврзани со индустријата. Читајте весници и списанија кои ја опфаќаат темата од Вашата индустрија. Ќе можете да најдете информации за се она што се случува надвор од Вашиот бизнис. Користете ги тие информации за да ги подобрите Вашите бизнис одлуки.
  10. Следете ги трендовите. Како претприемач Вие мора постојано да ги следите трендовите во полето на Вашиот бизнис. На пример, денес се повеќе луѓе пред да донесат одлука за купување пребаруваат на интернет за опциите кои им се нудат на пазарот. Можете да ја користите алатката Google Trends за да ги анализирате овие трендови.
post

Е-mail Како Маркетинг Средство 51

What's my login?
Сликата од midnightglory via Flickr

По пауза од една недела со серијалот на маркетинг средства на претприемач и завршување на првта половина (50 маркетинг средства) ќе продолжам со останатата половина кои ќе се однесуваат на онлајн средствата. Како прво од оваа втора половина го избрав e-mail-от бидејќи сметам дека денес претставува основно средство за комуникација како во бизнис светот така и во личниот живот.

Сакам да напоменам дека ова маркетинг средство не претставува она што е наречено e-mail маркетинг (за што ќе стане збор во некое од наредните средства) туку едноставно Ваша и на Вашиот бизнис идентификација во една ваква комуникација.

Како E-mail-от да се користи како маркетинг средство?

Сметам дека сите веќе сте имале едно вакво искуство и дека сите сте користеле и користите сопствен е-mail акаунт отворен на бесплатните сервиси. Тоа едноставно претставува електронска пошта во која можете да напишете нешто или да закачите некој документ кој го испраќате до примателот кој исто така има сопствена адреса и e-mail акаунт.

Она што е најважно за E-mail-от како маркетинг средство е да се постави Вашиот и на Вашите вработени електронски потпис на секој mail кој го испраќате, препраќате или враќате одговор. Ова со помош на MS Outlook или други слични апликации е едноставно да се изведе. (Во MS Outlook преку Tools – Options –Mail Format – Signatures).

Она што би требало Вие како претприемач и сите вработени во Вашиот бизнис минимум да го имате како електронски потпис на секој mail е:

  • Име и презиме
  • Компанија
  • Бизнис веб страна
  • Врски до социјални медиуми.

Може да ставите доколку сакате и адреса, телефонски број за контакт итн.

Втора, важна работа кога станува збор за e-mail како маркетинг средство е на кој домеин е самиот е-mail. Сакам да напоменам дека многу попрофесионално е кога Вашaта адреса користи сопствен домен и тоа домен на бизнис веб страната. На пример, доколку акаунтите за електорнски пораки кои ги користите за Вашиот бизнис се во вид на ime.prezime@vasbiznis.com се попрофесионални во однос на ime.prezime@gmail.com. Барем ова денес е едноставно и повеќето хостинг компании нудат или барем би требало да нудат неограничен број на e-mail адреси (Имам одлично искуство со MKХост кои се доста професионални и ја имаат оваа опција со пакетите кои ги нудат).

На ваков начин секој кој ќе прочита e-mail добиен од некој од Вашиот бизнис ќе може да ја види Вашата веб страна, Вашите активности на социјални медиуми, контакт детали, вашите производи и/или услуги… Понекогаш и кога нема потпис на mail-от доколку е од сопствен домеин секогаш одам да видам што се нуди на веб страната. Затоа и сметам дека ова претставува една дополнителна предност.