Бидете секогаш најиновативни! Алатки, екниги и видео презентации само за најхрабрите!

post

Важноста на брзи одлуки

Во претходниот напис навлегов во еден различен пристап на претприемач визнионер и претприемач опортунист (кој постојано бара можности, но никогаш не ги наоѓа).

Зошто опортунистот не ги наоѓа, или подобро кажано претвора најдените можности во квалитетен бизнис?

Затоа што постојано е зафатен со барање на нови можности и кога ќе најде некоја можност не носи одлука за искористување на истата.

Донесување на брзи одлуки

Зошто се потребни брзи одлуки?

Не можеме да донесуваме одлука и тој процес да трае вечно. Претприемничкиот живот и водење на успешен бизнис бара брзи одлуки бидејќи наместо Вас во секој момент слична таква одлука може да донесе конкуренцијата.

Како најважни причини зошто треба брзо да одлучувате би ги издвоил следниве:

1. Брзо искористување на пронајдени можности

Вие ќе откриете некоја можност, но таа можност нема да има вредност за Вас и за вашиот бизнис доколку не ја искористите. Затоа ќе треба брзо да одлучите како да ја искористите таа можност и кои активности кој ќе треба да ги спроведе за искористување на таа можност.

2. Брз одговор на барања и потреби на потрошувачите

Вие како претприемач и Вашиот бизнис постоите за да ги задоволите барањата и потребите на Вашите потрошувачи. Доколку откриете кои се промените на нивните барања и потреби не можете вечно да одлучувате за тоа како да ги задоволите бидејќи место Вас конкуренцијата ќе го направи тоа. Затоа е потребна брза одлука.

3. Брз одговор на активностите на конкуренцијата

Како што Вие постојано спроведувате бизнис активности, така и Вашата конкуренција не мирува туку спроведува одредени бизнис активности врз основа на кои се борите на пазарот за привлекување на потрошувачите. Секој нивен чекор ќе бара Ваш контра чекор. Затоа треба брзо да одлучите за тоа кои ќе бидат Вашите контра активности и како ќе ги примените.

Брзина наспроти квалитет

Многу често се поставува оваа прашање. Како влијае брзината на одлучување врз квалитетот на одлуката?

Квалитетот на одлуката секако дека зависи од брзината на донесување на таа одлука. Така да слободно можеме да кажеме дек квалитетот на одлуката е функција од брзината на одлучување.

Квалитетна одлука = f(брзина на одлучување) каде поголема брзина значи помал квалитет и обратно

Ова е логично, но не и единствено. Едно нешто е сигурно, зад секоја добра и квалитетна одлука стојат информациите кои ги имаме и врз кои ја донесуваме одлуката. А одлуката ја донесуваме ние претприемачи и самата брзина зависи од нас. Колку повеќе информации имаме толку потешко ќе имаме брза одлука. Затоа брзината на одлучување претставува функција од информациите и претприемачот. Така да горното равенство ќе биде:

Квалитетна одлука = f(информации, претприемач)

Ќе се обидам накратко да влезам во оваа тајна на информации и претприемач како основа за брзината на одлучување.

Колку повеќе информации имаме ќе биде потешко донесувањето на одлуката од страна на претприемачот, односно ќе биде потребно повеќе време. Понекогаш никогаш нема да имаме доволно информации за донесување на одлука, па брзината на одлучување може да оди временски до бесконечност, односно воопшто да не донесеме одлука, што во овој случај не е добро. Ова е поради фактот што постојано времето ќе го трошиме на собирање на информации. Од друга страна информациите треба да се обработат за да бидат во форма преку која лесно и брзо ќе воочиме некои трендови и некои скриени трендови кои ќе бидат корисни за одлуката на претприемачот. Значи за квалитетни одлуки треба да имаме оптимална количина на информации во форма која дава можност за одредени проценки од страна на претприемачот. Така да нашата формула од погоре сега би изгледала вака:

Квалитетна одлука = f(f(оптимална количина на информации, форма), претприемач)

За да претприемачот успее да извлече квалитетни заклучоци од информациите претставени во соодветна форма ќе треба да има одредени способности за препознавање на трендови и од некомплетни информации. Велам некомплетни информации бидејќи нашата цел е да донесеме квалитетна одлука и тоа брзо. Затоа е потребна способноста за аналитичност. Така да квалитетна одлука за краток временски интервал ќе биде претставена со следнава формула:

Квалитетна одлука = f(f(оптимална количина на информации, форма), аналитичност на претприемачот)

Аналитичност како основа за брзи одлуки

Како што можете да забележите аналитичноста претставува способност на претприемачот врз основа на некомплетни информации да извлече заклучок за да донесе квалитетна одлука. Се смета дека оние успешните претприемачи донесуваат брза одлука а нивната сопствена сигурност за исправноста на одлуката која ја носат е 70%.

Карактеристиката на аналитичните луѓе е да имаат мозок кој брзо размислува и да гледаат во група на информации и податоци во која ќе забележат нешто што просечниот човек не може да го забележи. Знаењето е еден предуслов со кој еден претприемач може да биде аналитичен.

post

Претприемач визионер наспроти опортунист

Постојат претприемачи кои се визионери, но постојат и претприемачи кои се опортунисти. Кои би биле поуспешни?

Многу различни мислења постојат за тоа дали еден претприемач треба да биде опортунист или не. Секако како една од особините му е и барае на различни можности, но не заборавајте дека тие можности треба да се искористат. Зошто ќе бараме можност ако не ја искористиме.

Затоа во овој напис би сакал накратко да направам една разлика помеѓу претприемач кој е опортунист и визионер.

Претприемач визионер или опортунист

Биди претприемач визионер со што ќе ја избереш и искористш вистинската можност!

Претприемач опортунист

Што претставува да еден претприемач опортунист? Би сакал на почетокот од овој напис да започнам со дефинирање или профилирање на еден претприемач кој е опортунист.

Да видиме првин што претставува опортунизам. Во Wikipedia за опортунизам пишува:

Опортунизам е свесна политика и практика на добивање на себична предност во одредени околности без никаква почит за приниципи.

Уште подобра дефиниција е дадена во Oxford Dictionary каде е наведено дека:

Опортунизам претставува практика на барање и користење на можности за постигнување на предност само за себеси, без да се размислува дали тоа е фер или пак исправно.

Согласно овие две дефиниции можеме да заклучиме дека:

Претприемач опортунист е човек кој бара можности и ги искористува себично без фер или пак исправно однесување.

На прв поглед и се чини дека за еден претприемач ова е добро бидејќи тој е човек кој има бизнис, кој пак егзистира на пазар на кој пак постои борба каде многу етика и морал во таа борба не се користи.

Претприемач опортунист бара можности каде никој не се наоѓа и воопшто не размислуваат дали тоа што ќе го прават е правилно или пак исправно. Воопшто не размислуваат дали ќе биде навистина успешно.

Единствена причина зошто претприемачите опортунисти ја бараат таа можност претставува подобрување само на нивните сопствени животи.

Претприемач визионер

Да видиме што претставува визионер? Како прво визионер е лице кое има визија, односно моќ за поглед во нешто што ќе се случува во иднината. Како второ визионер ги гледа можностите, но не со правење на нешто поразлично од сите останати туку правејќи го баш тоа истото. Но, разликата е што тоа го прават на различен начин од сите останати.

Претприемачи визионери се луѓе кои следат се што се случува околу нив и едноставно ги забележуваат жешките можности и влетуваат во тие можности во кои сите влетуваат само се што прават го прават на подобар начин од останатите.

Визионерите не започнуваат бизнис во можноста што ја препознаваат само за да го направат сопствениот живот подобар, иако сигурно е дека ќе го направат бидејќи ќе го подобрат и олеснат животот на нивните потенцијални потрошувачи.

Разлика помеѓу претприемач опортунист и визионер

  • Опортунист е гол барач на можности, визионер е вистински препознавач на можноста. Затоа и опортунистот често завршува со вечно барање на можноста која никогаш нема да ја најде, додека претприемачот визионер многу бргу ја наоѓа и искористува таа можност.
  • Опортунист претприемач е себичен и во таа можност бара само сопствен успех, додека претприемачот визионер можноста ја разгледува низ призмата на потенцијалниот потрошувач, односно како подобрување на животот на тој потенцијален потрошувач. И секако, со подобрување на животот на тој потенцијален потрошувач ќе го подобри и сопствениот живот.

Затоа едноставно следете што се случва во Вашата околина. Најдете можност во која сите се вклучуваат, но погледнете низ призмата на потенцијалниот потрошувач и неговиот проблем. Решете го тој проблем, поквалитетно, побрзо и подобро од останатите. И успехот ќе биде загарантиран.

post

Итност – Ургентност – Маркетинг средство 41

Стигнавме до 41-ото маркетинг средство на претприемач. Оваа недела ќе стане збор за едно од најмоќните маркетинг средства кое се комбинира со сите останати маркетинг средства, а тоа е креирање на чувство на итност или ургентност кај потенцијалните потрошувачи. Ова значи дека ургентноста како маркетинг средство треба да биде инкорпорирано во сите маркетинг средства кои досега ги обработивме или пак кои од сега натаму ќе ги обработуваме.

Ургентност како маркетинг средство

Концептот на итност – ургентност во бизнис светот се употребува во повеќе подрачја. Меѓу првите подрачја на употреба на овој концепт е во маркетингот. Но, широка примена има и во организациските промени. Како концепт во организациските промени го изнесува John P. Kotter за првпат во The Heart of Change – real Life Stories of How People Change Their Organizations, да подоцна го преработи во посебна книга A Sense of Urgency. И двете книги ги имам и навистина се одлични, и ги препорачувам секому кој на некој начин ќе се занимава со организациски промени – а тоа е секој менаџер или пак претприемач.

Што претставува ургентност?

Ги користиме во секојдневниот говор овие зборови. Но, тука би сакал да го опишам значењето со еден маркетиншки јазик.

Ургентноста наједноставно кажано претставува состојба на нешто ургентно, или пак нешто итно, односно состојба на некоја моментална потреба за која не може да се чека.

Но, што ќе претставува ургентноста во една маркетинг терминологија? Целта на ургентноста како маркетинг средство е:

  • Да предизвика чувство на ургентност кај потенцијалниот потрошувач?
  • Тоа чувство да предизвика да потенцијалниот потрошувач не може да чека за добивање на Вашиот производ или пак услуга.

Ургентноста како маркетинг средство претставува концепт со кој еден претприемач или еден бизнис ќе предизвика состојба на некоја моментална потреба за производот или услугата кои ги нуди и за која не може да се чека.

Како да се предизвика ургентноста?

Ќе се обидам накратко да презентирам неколку идеи.

Најуспешната ургентност која дава најдобри резултати за било кој бизнис претставува потреба. Ова едноставно значи креирање на потреба која предизвикува чуврство на ургентност. Потребата се креира со решавање на голем проблем кој досега бил нерешен за потенцијалниот потрошувач. Од оваа потреба за предизвикување на ургентност не постои подобро маркетинг средство.

Постојат и други начини во кои се крира чувството на ургентност. Во интернет маркетингот се нарекува како One Time Offer, понуда која важи само сега. На постоечкиот купувач му даваш специјална цена доколку купи уште нешто. На ваков начин го известуваш дека мора да одлучи веднаш за да добие специјален бонус.

Временско ограничување претставува уште една можност за креирање на чувство на ургентност. На ваков начин потенцијалниот потрошувач доколку до тогаш и тогаш превземе некој чекор ќе добие нешто.

Оваа маркетинг средство зависи од Вашата креативност како претприемач. Потребно е само да ги откриете сите понуди или активности кои ќе предизвикаат чувство за ургентност кај потенцијалниот купувач.

post

10 причини кои предизвикуваат губење на купувачи

Една од најголемите катастрофи за екој бизнис и секој претприемач е да започнат да ги губат сегашните купувачи. Сегашните купувачи секогаш мора да бидат во центарот на вниманието на претприемачот.

Причини за губење на купувачи

Дали овие грешки ќе ме чинат губење на моите купувачи?

Честопати сегашните купувачи се забораваат од страна на претприемачот бидејќи тој се насочува премногу кон привлекување на нови купувачи. Но, вистинскиот претприемач и и вистински моќен бизнис знае дека основата на успехот лежи во задржување на сегашните купувачи и во исто време привлекување на нови купувачи.

Затоа денес ќе се обидам да ги сублимирам најчестите 10 причини кои предизвикуваат губење на сегашни купувачи. Редоследот по кој се изложени овие причини нема влијание на важноста на причината.

1. Несоодветна комуникација

Начинот на комуникацијата како и средството кое се користи за комуникација играат голема улога во однесувањето на купувачите. Не можете да комуницирате со некој купувач преку факс доколку истиот нема факс туку користи mail. Не можете да користите друго ниво на јазикот за разбирање бидејќи купувачот нема да ве разбере. Барем денес постојат илјадници начини и илјадници средства за да изградите систем на квалитетна комуникација со сегашните купувачи, а исто така и потенцијалните купувачи.

2. Несоодветни услуги

Без разлика дали се продава производ или самата услуга постојат и дополнителни услуги кои купувачите очекуваат да ги добијат со купување на тој производ или пак услуга. Очекувањата за тие услуги можат да бидат различни, а сепак влијателни во повторното донесување на одлука за купување од еден бизнис. Некогаш и сосема мала работа која ќе биде претставена во вид на услуга или пак некое однесување може да биде пресудно. Затоа не го испуштајте.

3. Лоша ценовна политика

Цената претставува клучен фактор за одредени одлуки кои ги носи купувачот за во иднина. Доколку смета дека не го добил она што го платил секако дека нема да го повтори купувањето. Доколку пак смета дека цената е прениска за неговиот имиџ, нема да продолжи со купување од тој бизнис.

4. Непознавање на конкуренцијата

Често пати Вашите сегашни купувачи можат да бидат „украдени“ од Вашата конкуренција. Затоа доколку не ја познавате конкуренцијата, мислам на онаа „вистинската“ конкуренција ќе постои опасност таа едноставно тивко да ги презема Вашите сегашни купувачи. Постојано следете ја Вашата конкуренција, знајте ја нивната понуда, знајте кои маркетинг средства применуваат и како ги применуваат. Само така ќе успеете да ги задржите Вашите сегашни купувачи да не одат кај Вашата конкуренција и ќе имате потенцијал Вие тивко но сигурно да „крадете“ нивни купувачи.

5. Недоволно познавање на производот или услугата

Не може некој да продава нешто што не го познава добро. Не можете да продавате, а ниту да дизајнирате маркетинг кампања за производ кој не го познавате. Оваа ќе претставува најслабата карика во Вашиот бизнис доколку тоа е така. Затоа пред да го понудите производот или пак услугата за продажба обидете се да имате доволно познавање за да одговорите на сите прашања од страна на купувачите.

6. Слаб квалитет на производот или услугата

Мислам дека и не треба да се коментира оваа причина. Сум купил многу производи кои само ги платив а не ги користам бидејќи не се квалитетни. Затоа кога истиот бизнис ми нуди други производи едноставно ги игнорирам.

7. Лош продажен тим

Вашиот продажен тим го гради имиџот на Вашиот бизнис. Кога продажниот тим ќе остави лош впечаток на купувачот, не можете да очекувате дека тој купувач ќе се врати за повторно купување.

8. Немање на соодветна бизнис стратегија

Бизнис стратегија ја обработив во Стратегија – Најбрз начин да ги трансформирате Вашите бизнис резултати. Едноставно без да имате еден стратешки приод кој не е од денес за утре, нема да бидете во можност на подолг рок да ги задржите Вашите купувачи и што е поважно да се враќаат почесто да купуваат.

9. Лоша атмосфера во продажна просторија

Каква е атмосферата во продажната просторија или пак местото каде што се склучува договорот има соодветно влијание на идното однесување на купувачот, односно дали ќе се врати или не. Обидете се да обезбедите атмосфера која ќе предизвика смиреност и удобност во ваквите ситуации.

10. Недостаток од реинвестирање во досегашни купувачи

Секогаш инвестицијата во сегашните купувачи е поисплатлива од инвестиција во доведување на нови купувачи. Обидете се секогаш дел од парите од продажбата на некој начин да ги реинвестирате во нивното враќање. Освен тоа доколку Вашиот купувач се почувствува почестен со тоа што вие инвестирате во него тој ќе започне да привлекува и нови купувачи за Вашиот бизнис.

Разгледајте ги овие 10 причини и проверете дали некоја постои во Вашиот бизнис и едноставно отстранете ја.

post

Надворешно рекламирање – Маркетинг средство 40

Надворешно рекламирање, кампањи, билборди, постери …, реклама, моќ, успех.

Денес билбордот е општо прифатен, но пред 15 години на овие простори поимот билборд беше тотална непознаница, странски израз, чуденка …..

Билборди - Маркетинг средства

Не беше лесно да се создаде навика за користење на овој медиум, односно да се развие надворешното рекламирање на овие простори.

Во тоа време функционираше поставување на таблички во било која димензија со единствена логотипна содржина за името на компанијата со неизбежно  истакнување на телефонскиот број. Владееше тотален хаос по улиците, немаше ред во тој сегмент.

Прва задача беше да се убедат надлежните институции дека е непходно да се унифицираат таблите, да се постават на соодветни места и во исто време да му дадат на градот еден нов современ, урбан лик, но и да ја постигнат својата главна цел, организирано надворешно рекламирање, подигање на свеста за користење на рекламното пано во стандардни димензии од 12м2 како моќна алатка во маркетингот. Понатаму требаше да се инсталира добро организирана мрежа од билборди низ целата држава, а тоа е макотрпен пат.

Најважното во целиот процес на поставување на бизнисот беше создавање потреба и навика огласувачите да го користат билбордот во нивната комуникација со крајните корисници на нивните производи и услуги, а тоа  беше тешка задача во тоа време.

Имаше отпор, неверица во ефектот од овој вид рекламирање, па и недоволна едуцираност од областа на маркетингот. Како анегдота е една ситуација кога при една понуда во една компанија, добивме одговор дека за тие пари може да се изнајми стан под кирија?

Со голема страст, посветеност кон целта, успеавме на надворешната реклама да и овозможиме успешно да делува, да се  наметнеме како значаен медиум. Денес неможе да се замисли добро организирана рекламна кампања без  застапеност на надворешната реклама.

Билбордот како класична форма е основен сегмент во надворешното рекламирање или OOH – Out Of Home. Но, се позастапени се и други форми на надворешното рекламирање. Значајно место завзема мегалајтот, ситилајтот, ролборд ,фасадни и кровни површини, панели  прицврстени на  канделабри, а  во поново време се позастапен е транзит адвертајзингот со истакнување на реклами на автобуси, такси возила и други превозни средства.

Надворешната реклама е сеуште во подем за разлика од видовите на внатрешна реклама со исклучок на интернетот, каде што порастот е рапиден  и  во моментот е медиум  за разработување, можеби како што беше ООХ  пред 15 години кај нас.

Во вкупниот поделба на колачот за потрошени средстава во адвертајзингот во Македонија, надворешната реклама е застапена со 9%.

Надворешната реклама е докажано моќна, а воедно е најскромна од сите други видови на рекламирање. На  ненаметлив начин ја манифестира потребната позитивна агресија за постигнување на основната цел, анимирање на широките потрошувачки маси.

OOH е таму каде што е народот, не можеш да ја избегнеш, неможеш да ја исклучиш, нема опција да промениш канал, а воедно не ти го троши најскапоценото нешто, времето. Не треба да одвоиш ни пари ни време за да ја перцепираш, таа е тука пред тебе додека ги обавуваш секојдневнте работи надвор од дома.

Со диктатот на новото  динамично време, во движење,  се повеќе сме изложени на надворешната реклама. Како ниеден друг медиум, OOH не ве вознемирува, напротив ненаметливо, а сепак провокативно  ве анимира со својот жив впечаток од колоритни бои и интересни леснопамтливи слогани.

OOH е верен другар како на огласувачите така и на публиката и им помага да се пронајдат. OOH е медиум кој брзо и ефектно ги освојува срцата, во исто време е  заводлив, гламурозен, луксузен, но  срамежлив и скромен.

OOH, историски гледано е најстар  начин на рекламирање. Уште пештерските луѓе го користеле цртајќи по ѕидовите на своите живеалишта  во потребата за масовна комуникација. И до ден денешен успешно се користи, се менуваат само појавните облици, сега пештерските ѕидови се заменети со модерни рекламни простори, билборди, мегалајти, ситилајти, автобуси итн.

OOH е погоден како  за  лансирање на нови компании, производи и услуги во кампањи така и за корпоративно  перманентно присуство помеѓу корисниците  со  единствена можност рекламата да биде изложена 24 часа во сите сезони од годината, буквално 365 дена.

Е сега е јасно зошто OOH се употребува од секој бизнис кој што води сметка за својот имиџ. Секој бизнис, кој има сериозен пристап кон планирање на маркентиншките активности, без друго го користи  во сите негови појавни облици, надворешното рекламирање.

*****************************************************************

Овој напис е напишан од Весна Стаменковска –Стамит, CEO, Медиа Сити Адвертајзинг, телефон: 00389(0)2 3 10 00 10.

*****************************************************************

post

Имате бизнис идеја – Што понатаму?

Една бизнис идеја е стартна точка за секој сегашен или пак иден претприемач. Бизнис идејата е важна бидејќи претставува почеток на еден нов живот – живот на бизнисот и живот на претприемачот. Но, таа е важна само во таа прва иницијална стартап фаза од животниот циклус на бизнисот. Последиците од таа бизнис идеја ќе се чувствуваат и во сите останати фази, но сепак во голем дел ќе зависат и од други бизнис активности на еден претприемач.

Бизнис идеја - Што понатаму?

Бизнис идеја - Што понатаму?

Еден просечен човек постојано има бизнис идеи. Тоа е во самата природа на човекот, да сонува за еден подобар живот. Но, идеите како што доаѓаат така и си одат од мозокот на потенцијалниот или сегашен претприемач. Тоа можеме да го решиме со книгата со бизнис идеи како еден од 10 бизнис темплејти на претприемач.

Добро имаме бизнис идеи и сега прашањето е што понатаму? Нема во овој еден напис да можам да опфатам се што ќе треба да направите во Вашиот бизнис, туку едноставно откако ќе дојдете до бизнис идејата што ќе треба како основно да дефинирате.

1. Дефинирајте ги производите и/или услугите

Имате бизнис идеја која опфаќа некој вид на производ и/или услуга за Вашиот иден или пак сегашен бизнис. Следното е прецизно и јасно да ги дефинирате тие производи и/или услуги. Еве некои прашања на кои Вие како претприемач ќе треба да дадете одговор:

  • Каков производ или услуга ќе понудам?
  • Кои ќе бидат карактеристиките на тој производ или пак услуга?
  • Кои ќе бидат поволностите за потенцијалните корисници на тој производ или пак услуга?
  • Кои ќе бидат дополнителни услуги понудени со тој производ или услуга?

2. Дефинирајте го пазарот

Веќе имате бизнис идеја, го имате прецизно дефинирано производот или услугата кои ќе ги понудите на пазарот. Следното е јасно, прецизно и недвосмислено да го дефинирате пазарот на кој ќе ги понудите тие производи или услуги. Еве некои прашања на кои Вие како претприемач ќе треба да дадете одговор:

  • На кој пазар ќе ги понудите производите или услугите (град, регион, држава, континент…)?
  • Кои ќе бидат корисниците на тие производи или услуги?
  • Кои се карактеристиките на тие корисници на производи или услуги (пол, старост, приходи, националност…)?

3.  Дефинирајте ги конкурентите

Следен важен елемент за секој бизнис по производот или услугата и пазарот се конкурентите. Не ја правите грешката со потценување на истите, бидејќи успешноста на Вашиот бизнис во голем дел ќе зависи од нивната успешност. Потребно е прецизно да ги дефинирате сите конкуренти кои се наоѓаат на пазарот кој го дефиниравте претходно. Еве некои прашања на кои Вие како претприемач ќе треба да дадете одговор:

  • Кои се 5-те најголеми играчи на пазарот во индустријата во која се наоѓа Вашата бизнис идеја?
  • Што, кога и како нудат тие 5 најголеми играчи?
  • Кои се карактеристиките на нивните производи или услуги?
  • Кои поволности кои тие ги нудат на пазарот со нивните производи или услуги?
  • Колкава е отпорноста на пазарот од влез на нови конкуренти и колку е тешко тоа да се оствари?

4. Дефинирајте ги ресурсите

Имате бизнис идеја, имате дефинирано производи и услуги, имате дефинирано пазар на кој ќе ги понудите тие производи и услуги и имате дефинирано кои се главните конкуренти и што прават истите. Сега е потребно да ги дефинирате потребните ресурси за Вашиот бизнис за да таа бизнис идеја стане реалност. Ќе треба да ги дефинирате најмалку следниве потребни ресурси:

  1. Колкав број на човечки ресурси ќе бидат потребни?
  2. Каков интелектуален капитал ќе треба да имаат тие човечки ресурси?
  3. Колкави финансиски ресурси ќе бидат потребни?
  4. Од каде ќе ги најдете тие финансиски ресурси?
  5. Какви материјални ресурси ќе ви бидат потребни?
  6. Од каде ќе ги набавите тие материјални ресурси?
  7. Какви информациски ресурси ќе ви бидат потребни?
  8. Кои ќе бидат изворите на тие информациски ресурси?

По ова што понатаму?

Секогаш ќе има понатаму бидејќи вие сте претприемач и започнувате или го проширувате бизнисот. Откога ќе ги дефинирате овие бизнис елементи едноставно повторно почнете од почеток и прилагодете ги производот или услугата и пазарот. Ова е поради фактот што по дефинирање и осознавање на конкурентите и потребните ресурси ќе имате дополнителни факти кои ќе треба да ги вклучите во Вашите производи или услуги и пазарот.

На пример, со дефинирање на конкурентите ќе увидите што тие прават за да продаваат на тој пазар. Ова е проверена работа. Вие едноставно ќе можете да го копирате нивното искуство и да го подобрите за да стекнете конкурентска предност. Затоа ќе треба да ги редефинирате првите два елементи.

Запомнете дека простор за подобрување постои и секогаш ќе постои.

post

Стратегија – Најбрз начин да ги трансформирате Вашите бизнис резултати

Колку мали бизниси имаат стратегија? Дали претприемачите на малите бизниси имаат стратегија? Дали малите бизниси се стратешки, или само тактички мали бизниси кои размислуваат како да го преживеат месецот?

Од моето лично искуство и контакти со претприемачи на мали бизниси сметам дека тие воопшто не се стратешки ориентирани туку тактички ориентирани. Ова значи дека тие најмногу се загрижени за генерирање на приход за да ги платат сметките и да го преживеат месецот. Тоа значи дека малите бизниси немаат стратегија. Тоа значи дека растот и развојот не е важен, туку само голо преживување.

А, како да мислат на стратегија кога немаат здрава околина. Нема еднакви услови за сите на пазарот.

Но, сепак стратегијата на еден мал бизнис може само да му помогне, а не може да му одмогне. Па, затоа и препорачливо е да се има стратегија која ќе се следи.

Што е стратегија?

За стратегија на претприемач досега немам пишувано многу. Во делот за изработка на бизнис планот, односно во насловот Стратегија како дел од бизнис планот напишав дека:

Стратегија претставува план на акции за остварување на поставените цели. За имплементација на една стратегија потребно е да имаме повеќе тактики. На пример, доколку нашата стратегија е да изградиме бизнис со долгорочни односи со своите потрошувачи, тактиките со кои можеме да ја имплементираме таа стратегија може да бидат давање на дополнителни услуги за редовните потрошувачи, тренинг, долгорочни договори со поинкави цени итн. Секоја тактика се исполнува со активности кои имаат одредени датуми на остварување, одговорни лица за остварување на тие активности и потребни финансиски средства за остварување.

Зборот стратегија доаѓа и се користи во бизнисот од употребата во воени мисии. Во Merriam-Webster Dictionary освен дефинирање на стратегија како воено средство пишува и дека стратегија претставува:

    • Темелен план или метод
    • Умно лукавство (воено го исфрлив)
    • Уметност на смислување или пак користење на планови или пак лукавства кон исполнување на целите.

Забележливо е дека:

  • Стратегија е средство за исполнување на бизнис цели. Доколку немате бизнис цели не ви треба ни стратегија.
  • Стратегија претставува еден вид на план во кој се специфицирани акции кои Вие како претприемач ќе ги превземете.
  • Стратегијата е составена од тактики кои пак се составени од активности со што ќе ги исполниме посакуваните цели.

Имам видено различни „таканаречени“ стратегии. Тие повеќе изгледаа на еден текст на 20-30 страници и се однесуваа на период од 3-5 години без специфичности. Како што забележувате погоре за да се исполнуваат воспоставените стратегии потребно е да се определат тактики и да се дефинираат сите активности за секоја тактика.

Моја препорака пред да започнете со промена на стратегија е првин да ги погледнете дефинициите за тоа што е стратегија кои ги обработив во овој поднаслов. Потоа убаво да погледнете во вашите бизнис дејствувања и да видите дали се тоа тактики кои од време на време ги спроведувате или пак тоа претставува една стратегија на еден подолг рок.

Како да ја промените стратегијата?

Менување на стратегија не е пожелно да го правите секојдневно. Подобро потрошете повеќе време да подготвите вистинска стратегија и да се обврзете кон нејзино извршување. Имам лошо искуство со често менување на една стратегија со друга пред да измине рокот за кој е предвидена претходната. Во една таква состојба ни вработените ни консултантите не знаеја која стратегија е на сила.

Стратегијата се изготвува од менаџментот (врвот) на бизнисот, а се спроведува и извршува од сите.

Ќе се обидам да дефинирам еден приод во чекори кој ќе може да ви помогне да успеете да спроведете стратешко планирање во Вашиот бизнис и да ја промените тековната стратегија доколку ја имате или пак мислите дека ја имате.

  1. Прва работа е да бидете сигурни дека имате стратегија и дека ја следите иако не сте задоволни со неа. Не ви треба стратегија која ќе седи во фиока и ќе фаќа прашина. Тогаш подобро и не губете време на стратегија.
  2. Откако ќе се уверите дека имате стратегија која се следи потребно е да ја прилагодите за да таа иста стратегија претставува една проактивна стратегија, а не реактивна стратегија. Не размислувајте кој друг што направил. Размислувајте што Вие сакате да постигнете и направите.
  3. Размислете што треба да направите за да ви даде најдобри резултати најбргу што може на една подолгорочна основа.
  4. Откако ќе откриете што е тоа што ќе ви даде најдобри резултати најбргу на подолгорочна основа можете да размислувате за можните тактики.
  5. За секоја тактика подгответе активности со рокови и одговорни лица за извршување на тие активности.
  6. И секако на крај системско размислување. Воспоставете повратна врска за преку мерење и контрола на исполнување на стратегијата.

Микро бизниси и стратегија

Не значи дека доколку сте мал бизнис со неколку вработени дека не ви треба стратешко размислување и водење на Вашиот бизнис. Ова е голема грешка. Дали малиот бизнис има цели? Секако, ако ништо друго во првата година целта е преживување. Па како ќе преживее? Ќе понуди некоја поволност. Ќе обезбеди квалитетен сервис. Ќе обезбеди квалитетна услуга. Ќе примени нови маркетинг методи и техники. Сето ова се тактики за стратегијата преживување на бизнисот. Потоа ќе следуваат активности за секоја од тие тактики.

Разликата е само во тоа што подготвувачот на стратегијата ќе биде и извршител на истата.

post

Застареност или актуелност?

Денес еден бизнис и еден претприемач не може да се замисли без информации. Основа за донесување на квалитетни одлуки претставуваат информации. Но, сепак не било какви информации, туку квалитетни информации. А, ако информациите се важни за еден претприемач, тогаш и изворот на информации ќе биде исто така важен.

Застареност или актуелност на информации

Кога станува збор за информации пред една година вршев едно истражување во 30-тина македонски мали и средни бизниси во однос на деловно разузнавање. Резултатите од тоа истражување се објавени во неколку домашни и странски научни списанија. Основа на деловно разузнавање претставуваат информации.

Од друга страна работев едно 3 години во Царинска Управа, во одделението за разузнавање, каде информациите беа посензитивни во секој случај. Но, таму научив многу работи преку тоа што се обидував да го олеснам и автоматизирам процесот на прибирање и обработка на информациите.

Едно нешто е важно и треба да го запомни секој претприемач дека информациите претставуваат еден од највредните ресурси на секој бизнис.

Извори на бизнис информации

Прво и основно за некоја информација да се класифицира како квалитетна или пак важна е да се процени изворот на информацијата. Постојат повеќе методи на проценка на изворот на информациите кои се користат од страна на разузнавачките кои јас тука не би ги изложувал. Тоа се систематизирани процеси кои по завршување даваат една оценка, која кога ќе ја погледнеш ти кажува дали информацијата да ја земеш за озбилно или не.

Два вида на извори на бизнис информации

Информации за бизнисот може да дојдат од два извори:

  • Внатрешен извор. Сопствени бази на податоци или пак записи, билтени или пак извештаи во самиот бизнис.
  • Надворешен извор. Едноставно од секаде.

Посебно ми е интересен надворешниот извор на информации за бизнисот. Во она истражување што го напоменав на почетокот добив резултати дека информациите од внатрешните извори се обработуваат некако во вид на Excel извештаи или табели и графици. Но, она што е загрижувачко за мене е дека концептот на еден систем за прибирање на информации од надворешноста на бизнисот воопшто не е воспоставен или пак не се знае како да се воспостави или зошто би користеле тие информации.

Ќе земам еден пример. Вие сте претприемач и се наоѓате пред одлука за проширување на Вашиот бизнис во друг регион во Вашата земја. За да донесете квалитетна и вистинска одлука ќе ви треба информации за:

  • Потрошувачи. Какви се нивните навики, однесувања, приходи, желби, проблеми итн.?
  • Конкуренти. Што нудат конкурентите? Како продаваат? Кои им се идните планови?
  • Потребна инвестиција. Колку ќе треба да инвестирате?
  • Повраток на инвестиција. Како ќе ја повратите и кога ќе ја повратите инвестицијата?

За да одговорите на овие прашања ќе ви требаат информации.

Да земам друг пример. Вие како претприемач треба постојано да го проширувате Вашето знаење. Знаењето се проширува со примање на информации преку:

  • Читање на книги,
  • Читање на весници и списанија,
  • Читање на веб страни на интернетот итн.

Што има предност: староста или актуелноста на информацијата?

Конечно стигнав до она што ми е целта со овој напис. Често пати од прва отфрламе прием на одредени информации во нашиот мозок и тоа најчесто заради староста на информацијата.

На пример, одбиваме да прочитаме некоја книга само заради тоа што е постара. Иако сме свесни дека не сме го собрале целото знаење (и да сакаме не можеме) и дека можеби ќе има квалитетни информации за нас. Дали треба да ја отфрлам книгата од Peter Drucker која е стара пред 15 години само заради староста? Секако дека не. Од таа книга можам да научам многу работи за бизнисот од единствениот гуру над сите гуруа за бизнис светот. Ако, погледнам и во новите книги, скоро во сите ќе прочитам повикување на некои негови дела. Дали треба да јa отфрлам книгата на Abraham Maslow само заради тоа што е стара иако во не тој зборува за хиерархија на човечки потреби кои се актуелни и ден денес.

Староста на информација е едноставно времето кога е произведена таа информација. Актуелноста на информацијата е едноставно примената на истата во денешни услови.И двата критериума за информацијата се важни во различни прилики на донесување на одлука.

Кога сум кај книгите би тргнал со уште еден пример. Имам едно 50-тина книги во мојата приватна библиотека од скоро 400 книги за математика. Најстарата книга ми е од 1903 година – Учебник по математика за второ или трето одделение. Она во што се изненадив е актуелноста на истата и во денешни услови. И во таа книга и во некоја понова книга пишува дека 2 + 2 = 4. Само што во таа книга се користат грошови за објаснување а во поновите јаболка и круши.

Доколку ги користите и двата критериума за селекција на информации кои ќе ги примите и го примените прво критериумот старост, нека следи веднаш прашањето: Дали е актуелно?

Актуелноста треба секогаш да има предност пред староста.

Еве уште примери:

  • Како претприемач Вие треба да донесете одлука за нов производ. Имате база на податоци со одговори на прашалници за таков производ од претходните 10 години. Вие не треба да ги отфрлите постарите информации, бидејќи со нив ќе можете да видите еден тренд или образец на однесување на потенцијалните купувачи на еден таков производ.
  • Како претприемач Вие треба да донесете одлука дали да го ширите сопствениот бизнис во Москва. Читате информација дека Хитлер во 1940-тите години ја нападнал Русија и стигнал скоро до Москва. Дали оваа информација е стара? Да. Дали е актуелна? Не. Во ваков случај ја игнорирајте ја  информацијата бидејќи не е важна за она што се случува денес.

Уште еднаш: Секогаш првин проверете дали информацијата е актуелна, односно дали е вредна во денешни услови пред да ја отфрлите заради застареноста.

post

Интернет Маркетинг Грешки

Како и во секоја друга област така и во интернет маркетингот, се појавуваат грешки на кои се склони токму оние кои го работат тоа. Најчести грешки со кои се соочуваат компаниите се следните:

Интернет маркетинг грешки

  1. Немате назначено почетна страна на сајтот! Страната достигнува глобална публика, а не само на луѓето од нашиот град и со тоа би требало да има назначена почетна страна.
  2. Бавен Loading! Кога народот сурфа од дома на интернет, ако е слаба конекцијата, го напушта трпението.  Не е важно колку е интересна и импресивна веб страната, со сите тие модерни графики, ако на страницата и се потребни повеќе од 10 секунди за да се вчита тогаш се губи трпението на посетителот и се напушта сајтот, и тогаш посетителот оди во посета на друг побрз сајт.
  3. Gee Whiz Технологија!  Само затоа што тоа може да се направи, не значи дека така треба и да биде. Многу од популацијата која сурфа на интернет се нови или пак сурфери на кои им е потребна информација, а не ги засега многу до каде е стигната технологијата.  Еден пример за тоа е линкот кој не е обележан дека  е линк, и тогаш до него одма стои порака која вели: “овој сајт е дизајниран да биде отворен со Browser xxxxxx, Преземете го тука!„ Ако на некој му е потребна некоја информација, а не сака да ја инсталира таа нова програма за отворање на апликации, тогаш веднаш би се откажал од таа веб страна и нормално би посетил нова, помалку комплицирана од оваа.
  4. Тешка навигација!  Ако некој троши време за пребарување на нешто важно и случајно пребарувачот го одведе до вашата страна, тогаш тој не е на почетната страна на сајтот, туку негде во внатрешноста. Треба да се потрудите да постојат линкови кои ќе му овозможат на посетителот полесно да се движи на вашата веб страна со тоа што ќе има врска која секогаш ќе може да го врати “назад„ или да го одведе на почетната страна.
  5. Многу застарени информации!  Не смеете да дозволите вашиот веб сајт да биде преполн со застарени информации. Тој сепак служи за информирање и привлекување на купувачи и како поинаку би ја одиграл својата улога, ако не со секогаш свежи информации.
  6. Немате насоки за движење по сајтот! Посетителите “бараат мапи„ за движење по сајтот, тогаш тие се позадоволни и секогаш би се вратиле пак на истото место.
  7. Не собирате е-маил адреси! Е-пошта, билтени, веб надградби или известувања за претстојните настани на вашиот сајт, посетители кои се регистрирани/претплатени и сл, со нив се добива најквалитетниот маркетинг. Искористете ја секоја прилика да соберете имејл адреси од вашите посетители и притоа со нивна согласност да им праќате рекламни пораки во иднина.  Со тоа ќе ги насочите луѓето кон вашите производи и услуги.
  8. Барање на премногу информации! Не им поставувајте претерано многу прашања на вашите потрошувачи ако сакате да ги заинтересирате да се регистрираат на вашиот сајт за да добиваат редовни информации или да извршуваат купување од вашиот сајт.  Тоа може да произведе само контра ефект. Доволно е да им побарате само имејл адреса и име.

Дополнувања ДШ:

Gee Whiz технологија претставува технологија која ќе овозможи изненадување, воздишување или пак ентузијазам од страна на посетителот на веб страната. Погледенет ја страната на најголемиот продавач на интернетот – Amazon. Дали има премногу графики, флеш анимација или било што друго што има за цел да извлече воздишка од страна на посетителот. Проверете и ќе видите дека воопшто нема да најдете такво нешто. На Amazon има се и сешто, но само не она што тука се нарекува Gee Whiz технологија. Често пати она што предизвикува воздивнување од страна на Вашиот посетител може да доведе и доведува до голем број на негативни ефекти. Ќе наведам два примери:

  • Лоша SEO (Оптимизација за пребарувачи). Иако можете да најдете информација од страна на Google дека тие започнуваат да ги пронаоѓаат овие флеш анимации на веб сраната сепак се далеку од она што треба да биде. Може да биде прочитано само името на таа анимација и она што е ставено како замена (alt). Текст во самиот флеш не! Имам видено многу докази за оваа, а и препораки од страна на едни од најголемите интернет маркетари на чии курсеви сум бил да се избегнуваат при користење.
  • Премногу воздишки на нешто такво го одвлекуваат вниманието на потенцијалниот купувач од она најважното Вашиот производ или Вашата продажна инка.

Како надополнување на некои грешки е и немање на обид да се извлече нешто и од оние посетители кои ја напуштаат Вашата веб страна. Од поновите Browser-и оние скокачки прозорци се оневозможени. Но има технологија која не е во вид на скокачки прозорци и која едноставно при обидот на посетителот со глувчето да одат кон излез од страната се појавува некој вид на One-Time Offer (понуда која важи само доколку нешто превземете во тој момент). Имам прочитано за статистички информации дека просечно околу 40% од продажбата е врз основа на One-Time Offer. Тоа е изгубена продажба претворена во продажба.

Понатаму немање на Upsale е уште една интернет маркетинг грешка. Да му се понуди на купувачот веднаш по купување на еден производ дополнителен производ по поевтина цена доколку го изврши купувањето на дополнителниот производ веднаш. Повторно пример може да ви биде Amazon со другите кои ја купиле таа книга ја купиле и таа, вие можете да ги добиете и двете за специјална цена од толку и толку. Таа цена е поевтина во однос на посебн купување на двете книги. Но, едноставно електронскиот продавач (автомат во вашата веб страна) нуди и повеќето од продажбите на книги на Amazon се извршени на еден таков начин.

Има уште многу можни грешки но навистина овој напис би отишол до бесконечност во должината. Па затоа би прекинал тука, а во некој иден напис малку би продолжил на оваа тема.

*****************************************************************

Овој напис е напишан од Кристина Алексоска – Постдипломец на Економски Институт- Скопје, отсек претприемнишво, при Универзитетот “Св. Кирил и Методиј„-Скопје; Користена литература:

Katherine Khalife, Internet Marketing – Nine Common Marketing Mistakes Museum Websites Make, 2001

*****************************************************************

post

Придобивки од систематизација на Вашиот бизнис

Системите се корисни за секој бизнис доколку правилно се дизајнираат и доколку претерано не ја нагласат административната функција во бизнисот со што истиот бизнис ќе се претвори во една бирократска организација.

Поволности од систематизирање на малите бизниси

Ова е втор дел од написот за Системски приод во бизнисот – Бизнис систематизирање во кој сакам да изложам неколку придобивки за еден претприемач и неговиот мал бизнис од еден ваков начин на поставување на работите.

Со вистинските бизнис системи Вашиот бизнис ќе:

1. Ги исполни очекувањата на потрошувачите

Вашиот маркетинг систем ќе има подсистем за следење на очекувањата и задоволството на потрошувачите. Тој подсистем ќе анализира, мери, споредува и дава заклучоци во однос на тоа што го сакаат потрошувачите. На ваков начин постојано ќе имате информации за она што треба да се подобри и како треба да се подобри.

Но, без системски приод маркетингот оваа нема да може да го изведе. На пример, доколку еден од начините на собирање на информации од потрошувачите е едноставна анкета на купувачот од страна на продажниот тим во моментот на купување, овој подсистем ќе мора да има соодветна интеграција со подсистемот продажба – вработени од продажба. Така една од задачите на подсистемот продажба ќе биде и собирање на информации за подсистемот маркетинг.

2. Произведува исти резултати секој пат

Ова е нешто што само системите го обезбедуваат во бизнисот. Замислете да немате систем во кој ќе биде структурирана секоја бизнис активност и секоја задача за секој вработен. Сите би работеле различно и при секое повторување на задачите би имале различни резултати од истите. Затоа системите треба да обезбедат квалитетно извршување на работата секој пат со ист или подобар квалитет од претходниот пат.

3. Ги подобри перформансите на вработените

Се сеќавате од написот за продуктивноста каде велевме дека продуктивност е извршена работа во единица време. Доколку завршиме иста работа за побрзо време нашата продуктивност ќе биде поголема. Доколку секоја работа или активност во бизнисот се завршува побрзо од минатиот пат Вашите вработени ќе стануваат се попродуктивни и попродуктивни. Со тоа и ќе се зголемат нивните перформанси. Целта е системот да им овозможи соодветна едукација и можности за завршување на работата ефикасно и ефективно.

4. Ги намали трошоците

Доколку активностите и работите во Вашиот бизнис не се повторуваат повеќе пати за да бидат завршени и бидат завршени квалитетно од првиот пат, тогаш драстично ќе се намалат трошоците како резултат на грешки во бизнисот.

5. Биде многу поорганизиран

Единствено нешто што овозможува квалитетна организација на бизнисот се бизнис системите. Без соодветни системи, тешко дека некој ќе биде квалитетно организиран во бизнисот, а со тоа и тешко дека ќе ги извршува задачите онака како што треба.

6. Ги решава проблемите на конзистентна основа

Системскиот приод овозможува повратна врска. Повратна врска (feedback) претставува како онаа сигнална сијаличка или звук кој дава сигнал да се стопира производството на производствената линија. Со една ваква „сигнална сијаличка“ едноставно секој проблем во бизнисот брзо ќе биде забележан и нормално решен. Решавање на проблеми претставува промена. Промена претставува подобрување. Така постојано ќе ги подобрувате системите во Вашиот бизнис а со тоа и севкупниот бизнис систем.

7. Ја зголеми профитабилноста

И секако на крај како резултат на сите претходни придобивки ќе се зголеми и профитабилноста на бизнисот. Со зголемување на продуктивноста и перформансите, со намалување на трошоците, со задоволување на очекувањата на потрошувачите, со испорака на исти резултати или подобрени резултати секојпат, со поголема организираност, со конзистентно решавање на проблемите ќе ја зголемите и профитабилноста на бизнисот. Зарем тоа не е Вашата цел.

Па затоа, потребно е само да потрошите неколку часа во наредните неколку недели за да воспоставите системски приод во Вашиот бизнис. Потоа, едноставено следете и подобрувајте. Овие придобивки се многу поголеми во однос на она што ќе реба да го вложите.