Бидете секогаш најиновативни! Алатки, екниги и видео презентации само за најхрабрите!

post

Договор одсега да се спроведува она што претходно било договорено…

Морам да го започнам и самиот овој пост со насловот

“Договор одсега да се спроведува она што претходно било договорено… :)”

Што мислите за реченицата?

Дали ви се случило на некој од состаноците на кои поминувате, да се навратите на она што сте го договориле на претходниот состанок, а на овој повторно да дискутирате и полемизирате и одлучите дека треба да се спроведува?

Договарање за договорен договор… 🙂

Одлучување за веќе донесена одлука… 🙂

Иако нема логика сепак се случува кај повеќето претпријатија.

Од иновирање и култура на иновирање, компанијата преминува во една бирократска култура во која се состаночи, дискутира, полемизира и реодлучува.

Ова е моментот кога за првпат основачот, претприемачот се соочува со потребата од менаџмент.  Тој момент значи дека компанијата досега доста успешно се справувла со сите досегашни фази од својот животен циклус, но сега се наоѓа во доста “деликатна” позиција која бара сосема поинакви одлуки отколку што било праксата досега.

Досега работите се завршувале, без здодевни состаноци, дискусии, полемики и реодлучувања. Еден носи одлука, без разлика дали е добра или лоша и таа се имплементира. Доколку е погрешна, се извлекува поука со што и претприемачот и бизнисот стануваат подобри, посилни, збогатени со дополнително знаење и искуство. Но, сега не е едноставно. Постои хиерархија, структура, правила, процедури…

Но, сепак насоката во која ќе се движи бизнисот сеуште зависи и се наоѓа во рацете на претприемачот. Тој го има клучот на вратата која води до раскрсница за тоа по кој пат ќе се продолжи. Колку побргу ја отвори вратата и го избере патот, толку побргу ќе се знае што ќе се случува понатаму.

Едниот од двата пата е да се забави со растот на компанијата и обид да се врати во претходната фаза кога едноставно семејната атмосфера која што постоела довела до растот кој е постигнат.

Вториот пат е да се продолжи со растот преку имплементација на менаџмент системи кои ќе бидат доволно силни за да го понесат теретот на трансформациите кои што следуваат. Но, прашањето е кој ќе ја преземе таа улога?

Во секој случај и двата пата се оправдани за претприемачот. Сепак, тој од ништо веќе создал нешто. Дали ќе се оддржи на патот на растот или пак едноставно претприемачот ќе си ги ужива благодетите од досега оствареното ќе зависи од него. Неговата одлука ќе биде една од најтешките во неговата претприемачка кариера.

 

post

За да иновирате не ви треба…

Што е иновација? На секој бизнис му е потребна. Секој претприемач е директно поврзан со иновација. Но, постои проблем кога станува збор за претприемачи. Проблемот е што просечните претприемачи сметаат дека иновацијата мора да тргне од нешто големо, нешто спектакуларно, нешто невидено и сеуште незамисливо. Од друга страна, тоа мислење наметнува уште “пострашно” размислување кое едноставно влијае на појава на блокада кај претприемачот и лесно откажување од намерата да се иновира. Тоа размислување е дека за да бидете добар иноватор треба да имате докторат. Иновација значи иновирање во однос на:

  • Нов производ,
  • Подобрен производ и
  • Подобрен процес (производствен, организациски, маркетинг, продажен процес…)

Можеби ќе мислите дека сопственик на бутик не може да иновира бидејќи се е веќе познато. Се набавуваат произвдите, се ставаат во продажниот објект и се продаваат по повисока цена. Но, нели е иновација следново:

  • Соодветна комбинација за презентација на разни производи заради поттикнување на продажба.
  • Додавање на една алка, ремен или било што друго што ќе додаде вредност на основниот набавен производ за бутикот.
  • Комбинација на неколку маркетинг алатки за привлекување на повеќе купувачи.
  • Продажен процес во кој се поттикнува вирозен маркетинг…

Ова се само дел од можните иновации во еден традиционален бизнис како што е овој од примеров кој го потенцирам. Се што ќе додаде вредност за купувачот, се што ќе го разубави и подобри животот на купувачот, се што ќе ги намали фрустрациите на купувачот од десегашниот начин на функционирање на истиот ќе претставува иновација и можност еден бизнис да профитира од тоа. Разгледајте ги основачите на најголемите компании (освен Google) на глобално ниво и видете колку од нив се доктори на науки. Ова не значи дека образованието е непотребно, туку значи дека не мора да се гледа како пречка за да започнете да го промените светот во кој што живеете. Мора да иновирате без разлика во која фаза на животниот циклус на вашиот бизнис се наоѓате. Тоа е факт. Бидете креативни и започнете да го менувате светот.

post

Нови екниги на претприемач

Пред повеќе од две недели направив една анкета за сите регистрирани за неделни билтени на претприемач за тоа од која тематика да бидат следните екниги како надополнување на нова верзија на прирачник за бизнис планирање (кој е подготвен се чека само да се донесе конечна одлука за печатена верзија) и предизвикот за блогирање за бизнис.

Како предлог беа следниве наслови:

  • Прирачник за изработка на маркетинг план
  • Прирачник за евалуација и избор на бизнис идеи
  • Збирка со дијаграм на тек на повеќе бизнис процеси
  • Прирачник за користење на Evernote

Анкетата е веќе затворена, а резултатите се познати.

  • Прирачник за изработка на маркетинг план – 38%
  • Прирачник за евалуација и избор на бизнис идеи 30%
  • Збирка со дијаграм на тек на повеќе бизнис процеси – 21%
  • Прирачник за користење на Evernote 11%

Ќе започнеме со дистрибуција на првата од овие четири за помалку од десетина денови. Значи прирачник за подготовка на маркетинг план во следниот билтен на претприемач. Ова не значи дека нема сите да бидат објавени, само го покажува приоритетот по кој ќе одиме.

Голема благодарност на сите учесници.

 

post

Анатомија на еден претприемач: Факти кои ќе (нема да) ве изненадат

Постојат многу стереотипи кога станува збор за претприемачите и пронаоѓање на оној “супермен” претприемач. Постојат многу анализи и истражувања како и обиди да се најдат некои заеднички карактеристики за успешните претприемачи.

Едно време (барем кога бев средношколец) за претприемачи ги сметав оние кои седат во кафеани, пијат, јадат и разговараат. Но тоа беше почетокот на 1990-тите, распад на системот, директори на компании кои станаа претприемачи… Но, тоа не е она што може да се земе како репер.

Во 2009 година и јас сакав да дадам допринос во оваа насока, па затоа спроведов теоретско и практично истражување во земјава за анализа на фактори кои го прават еден претприемач да биде успешен претприемач. Во таа анализа не навлегував во детали за бекграунд, туку повеќе на лични особини.

Затоа како надополнување на некои карактеристики или како основа за едно следно истражување може да се додадат и дополнителни елементи како образование, семејство, возраст, класа…

Средувајќи ги моите постари Evernote белешки за да утврдам што треба да остане а што да си оди (избрише) налетав на едно истражување од Kauffman фондација за претприемачи насловена како “Анатомија на претприемачи” во која е направен обид да се анализираат претприемачите и нивниот бекграунд. Сметам дека иако истражувањето е постаро (2009) и се однесува на 519 испитаници основачи на компании од различни индустрии, сепак вреди да се видат некои факти.

Основачи на компании се во средна возраст и со подобро образование.

  • Просечна и средна возраст на основачите во анализираниот примерок кои одлучуваат да започнат сопствен бизнис е 40 години.
  • 95,1% се дипломирани, а 47% имаат повисоки степени на образование.
Претприемачите доаѓаат од средна класа или повисока ниска класа и се подобро образовани и попретприемачки расположени од нивните родители.
  • 71,5% доаѓаат од семејства од средна класа, додека 21,8 се изјасниле дека доаѓаат од повисока ниска класа.
  • Помалку од 1% доаѓаат од екстремно богати или екстремно сиромашни средини
Повеќето претприемачи се во брак и имаат деца
  • 69,9% од испитаниците навеле дека биле во брачен однос, кога го започнале својот бизнис, додека 5,2% биле разведени, разделени или вдовци.
  • 59,7% навеле дека имале најмалку едно дете кога го започнале првиот бизнис, додека 43,5% имале две или повеќе деца.
Имаат интерес и склоност да започнат бизнис.
  • 52% имале интерес да станат претприемачи уште во факултетските денови, но 34,7% воопшто не ни размислувале за претприемачкиот живот, а 13,3% имале слаб интерес.
  • Од 24,5% кои биле екстремно заинтересирани да станат претприемачи во факултетските денови, 47,1% започнале повеќе од две компании.
Фактори кои ги мотивираат да станат претприемачи: заработка, имање на сопствена компанија, стартап култура и капитализирање на бизнис идејата.
  • 74,8% од испитаниците навеле дека мотивацијата за започнување на бизнис им била да заработат пари, 68,1% капитализирање на бизнис идејата, 64,2% навеле дека сакале да имаат сопствена компанија, 66,2 навеле дека биле мотивирани од стартап културата додека 60,3% навеле дека да работат за друг не било за нив.
Неважни фактори: не можат да најдат работа или поттикнување од други
  • 80,3% од испитаниците навеле дека неможноста да најдат традиционална работа воопшто не бил одлучувачки фактор за започнување на сопствен бизнис. Само 4,5%, се одлучиле да започнат свој бизнис поради неможноста да најдат работа.
  • 37,8% од испитаниците навеле дека улогата на пријателите и семејството имало влијание на нивната одлука.
Повеќето имале значајно искуство од индустријата кога запонале бизнис
  • 75,4% работеле како вработени во други компании повеќе од 6 години пред да започнат со сопствените компании. Сокоро половина (47,9%) ја започнале нивната прва компанија со повеќе од 10 годишно искуство.

Ова е само еден дел, целосната анализа можете да ја видите на “Анатомија на претприемачи“.

post

Каде да ја побарате вашата следна бизнис идеја?

Не е важно дали сте претприемач и имате постоечки бизнис или пак сте потенцијален претприемач кој сака да започне бизнис, идеите се нешто што постојано ќе ви биде потребно.

Но, проблемот е што тие не доаѓаат лесно. Или пак ќе се појават кога воопшто не сме спремни и во една таква состојба си одат онака како што биле дојдени во мозокот.

Дали сте се обиделе да го насочите вашиот мозок да бреинстормира нешто тогаш кога вие сакате и се јавува блокада? Ништо не доаѓа. Гледате во различни страни, се обидувате да се фокусирате, да се напрегнете… Но, повторно ништо.

Во прилог се само дел од можните потенцијални места каде што можете да побарате квалитетна бизнис идеја. И запомнете, доаѓање до идеи бара слободен ум, без ограничувања или некакви правила.

Вашите лични потреби

Започнете од нешто за што знаете дека имате потреба, која сеуште никој не ја задоволил.

Вашите потреби кои никој не ги задоволува се одлична појдовна основа за нови бизнис идеи.

Трендови кои се актуелни во моментов

Секогаш може да се откријат одредени трендови во вашата околина. доволно е да ги забележите и да дојдете до повеќе идеи.

На пример зголемување на побарувачка на определен производ или услуга и недостаток на сегашните понудувачи да одговорат на таа побарувачка може да претставува одлична можност за вас како претприемач.

Ниша на пазар на кој настапуваат големи играчи

Сигурно дека лесно ќе дојдете до пазар на кој се наоѓаат големи играчи, а знаете дека вие нема да имате шанса.

Но, едноставно доколку се запрашање што може да се подобри, да се понуди подобрен производ или услуга или да се задоволи специфична потреба на тој пазар за која немаат интерес тие големи играчи, сигурно ќе дојдете до повеќе можности во форма на бизнис идеи.

Промени кои се случуваат во индустриите

Секоја индустрија е подложна на промени, а секоја промена претставува одлична можност за претприемачите кои ќе ја забележат приви и реагираат на вистинскиот начин.

Можеби ново законско решение, можеби заситување на пазарот, можеби нова структура на работна сила… Секоја промена може да биде извор на бизнис идеја.

Нови потреби на пазарот

Мислам дека нема потреба да се коментира дополнително. Бизнис идеите задоволуваат потреба на пазарот, па затоа и секоја потреба која ќе биде забележана претставува добра можност за бизнис.

Нови технологии

Новите технологии бараат ново знаење, ново однесување, нови структури… Сето тоа ново за еден претприемач претставува квалитетна можност за заработка.

Нови научни достигнувања

Развојот на науката, како и технологијата претставуваа извори на многу нови можности. Нов алгоритам, нов систем за автоматизација, ново хемиско соединение или пак нов биолошки пронајдок претставуваат добри можности за голем број на нови бизниси.

post

10 Чекори за успешна продажба

Дали сте се обиделе да продадете нешто, а да не сте успеале да го убедите купувачот да ја донесе одлуката за купување?

Обид за продажба и завршена продажба не е исто.

Завршена продажба и многу повторени продажби не е исто?

Што вие би сакале?

Логичниот редослед кој најчесто се применува од претприемачите е следниов:

  • Обид за продажба,
  • Неуспех или успех
  • Повторена продажба.

И во еден таков процес, доколку имате успех од 10% на обидите за продажба од 10 обиди ќе имате реализирано една продажба. Затоа и логично претприемачите постојано се обидуваат да направат повеќе обиди. Така доколку дневно наместо 10 обиди изведе 20 обиди ќе генерирате две продажби.

Но, времето и ресурсите нема да дозволат да ги зголемувате обидите до бескрај, а од друга страна оние неуспешните обиди се загубени за подолг временски период.

Што би било доколку секој обид го претворите во успешна продажба? Јас барем досега немам неуспешен обид. Имам помалку обиди, но секој завршува со успех. Тоа е целта која би требало да се обидете да ја остварите, а во овој пост ќе презентирам 10 чекори кои ќе може да ви помогнат.

#1 Собери доволно податоци за потенцијалниот купувач кој планираш да го контактираш

Никогаш не започнувајте со обид за продажба без претходно да соберете доволно информации за потенцијалниот купувач кој планирате да го контактирате.

Кој приод ќе примените? Како ќе започнете? Како ќе настапите? Каде ќе го изведете обидот? Што ќе разговарате?

Сето тоа се прашања кои на некаков начин ќе ве мачат. Денес е барем лесно да се дојде до комплетно знаење за еден потенцијален купувач. На пример, имав случај во кој како најважна информација беше политичката определеност на потенцијалниот купувач. Со тоа знаење секој оној кој ќе се обиде да продаде нешто ќе може лесно или да ги избегне политичките прашања или пак да му се приближи преку заедничките политички ставови.

#2 Навлезете длабоко во неговите проблеми, потреби и фрустрации

Сите информации кои ќе ги соберете мора да ги трансферирате во соодветна група на главни проблеми, потреби и фрустрации на потенцијалните купувачи.

Сепак вие сакате да решите проблем, сакате да задоволите потреба и нормално сакате да му помогнете да ги надмине фрустрациите вашиот потенцијален купувач.

#3 Најдете ги елементите кои емоционално го поттикнуваат

Секој има емоции и сите тие емоции имаат одредено влијание на донесување на одредени одлуки во соодветен момент.

Добро е да се обидете да откриете колку што е можно повеќе емоционални трајгери кои едноставно ќе ги користите во понатамошниот процес и кои ќе ви дадат дополнителна предност за да успеете во обидот за продажба на тој потенцијален купувач.

#4 Анализирајте ги местата каде што тој сака да биде

Не можете да продавате без да знаете каде е потенцијалниот купувач и не сте присутни на тие места.

Понекогаш се потребни повеќе контакти од еден, повеќе состаноци, повеќе неформални средби… Затоа мора да ги знаете местата. Вие сте рибар кој знае на кои места рибата најмногу гризе. Искористете го тоа знаење во ваша полза.

#5 Направете план за потенцијални контакти

Сето досега направено, значи дека имате доволно информации за да подготвите план за потенцијални контакти со тој потенцијален купувач. Но, вие не сакате било каков план, сакате план кој 100% ќе гарантира резултат.

Можеби успехот нема да биде од првиот контакт, сепак вашата работа тука е да обезбедите доживотен купувач за вашиот бизнис.

#6 Подгответе стратегија со која ќе го започнете процесот

Како ќе започнете?

Веднаш ли ќе почнете со презентација на производот или услугата или ќе се обидете да се спријателите и стекнете дополнителни информации?

Мора да направите добра стратегија во однос на овие прашања, затоа што од неа ќе зависи успехот на вашите обиди за продажба.

#7 Осигурајте се дека можете да помогнете

Не е се во вашите производи или услуги бидејќи приодот кој го опишувам тука подразбира многу подлабоки односи отколку обични купувач-продавач односи.

Затоа за секој потенцијален купувач, прво најдете како можете да му помогнете и подгответе се да ја пружите таа помош кога ќе треба.

#8 Трансферирајте ја вашата понуда во решение за неговите потреби

Сега како осми чекор, мора да ја трансферирате понудата во едно или повеќе решенија, со јасно дефинирани бенефити за потенцијалниот купувач.

Запомнете дека решение на проблем е многу поуспешна тактика отколку само обид за продажба.

#9 Презентирајте ја вашата понуда

Кога веќе знаете се што треба да знаете и имате изградено определени односи со потенцијалниот купувач ќе можете да преминете на презентација, односно презентации на понудата/решението.

#10 Веднаш по презентацијата договорете ги следните чекори

Самата презентација не значи и завршување на вашата продажба. Сакате уште посилни односи и уште повеќе продажби во иднина.

Не оставајте на случајност, веднаш дефинирајте ги следните чекори.

post

Како да создадете производ кој ваште купувачи ќе го сакаат?

Сè она што вашиот бизнис го прави има одредена цел. Целта е купувачите да сакаат да ги купуваат производите и услугите кои вашиот бизнис ги нуди. Тие ќе ги купат, доколку ги сакаат. Тие ќе ги купат вашите производи и услуги, доколку им се потребни.

Вашите купувачи се срцето на вашиот бизнис. Тие се оние кои диктираат што треба да направите, што треба да промените или она што треба да подобрите.

Без нив (купувачите), нема да преживеете на пазарот.

По вашите купувачи, вториот важен елемент тесно поврзан со вашите купувачи се производите и услугите кои ги нудите. Ова е тврда врска помеѓу вашиот бизнис и вашите купувачи, бидејќи на крајот може да се каже дека ќе успее само кога производите од вашиот бизнис ќе доајдат во рацете на вашите купувачи.

Но, и тоа не е доволно денес. Нема да успеете со таа една трансакција, затоа што ќе ви требаат повеќе трансакции, повеќе купувања и повеќе купувачи. Затоа, вашите купувачи треба да ги сакаат вашите производи и услуги.

Еве неколку идеи што може да ги вклучите во процесот на развој на производи и услуги, доколку сакате да бидете сигурни дека вашите купувачи ќе ги сакаат.

1. Најди вистински проблем со вистинска желба за решение.

Вашиот бизнис мора да решава вистинските проблемза вашите купувачи. Размислете за нешто што користите и вежбајте да откриете зошто вие го користите тоа, зошто ви се допаѓа и каков вид на проблем тоа нешто решава за вас. Потоа, размислете за проблемите со кои се соочуваш и за кои до денес не можеш да најдеш решение. Продолжи со вежбата, но во однос на проблемите кои се делумно решени за вас. Веројатно, веќе користите нешто што не доведува до целосно решение за вашите проблеми. Сега, имаш една листа на можни проблеми кои се веќе искусени од ваша страна. Време е да почнете да размислувате преку еден поглед на потенцијалните купувачи. Дали тие имаат таков проблем? Каков е начинот на кој тие ги решаваат таквите проблеми сега? Дали тие ги решаваат целосно? Ваквите прашања ќе обезбедат дека:

  • Постои пазар за можното решение,
  • На пазарот има желба да се реши или подобри решавање на таков проблем и
  • Пазарот е доволно голем за поддршка на вашиот бизнис.

2. Понудете решение за тој проблем.

Кога ќе го најдете вистинскиот проблем за вистинскиот пазар со доволен број на потенцијални купувачи кои сакаат да решат таков проблем може да го понудите вашиот решение. Лансирање на вашиот производ како решение не значи дека сте завршиле со вашата работа како претприемач. Ќе треба да ја следите состојбата за да видите дали може да се направи нешто повеќе или да се понуди нешто повеќе на вашите купувачи. Бидете сигурни дека тие ги сакаат вашите производи и услуги.

3. Секогаш прилагодувајте ги производите во однос на потребите на купувачите.

Вашите купувачи со текот на времето не остануваат исти. Ќе се подобруваат и развиваат како и се останато. Нивните потреби и нивните проблеми се променлива категорија. Ако вашите производи и услуги не се вклопуваат нивните нови потреби, веројатно ќе станат нешто заборавено. Затоа треба да ја прилагодите вашата понудаза да се осигурате дека таа секогаш ќе се вклопи со потребите на купувачите.

4. Бидете блиску до вашите купувачи.

Ако сакате да го испорачате вистинското решение за вашите купувачи, решение кое што тие ќе го сакаат, ќе треба да бидете секогаш блиску до нив. Тоа значи дека ќе треба да биде многу повеќе од едноставен решавач на проблеми за нив. Поставувајте прашања, разговарајте со нив и иницирајте различни разговори кои ќе ви помогнат да ги разберете нивните потреби или нивните вистински проблеми. Запомнете дека без нив, нема да можете да бидете голем решавач на проблеми за нив.

5. Слушајте ги.

Како еден претприемач, една од најважните задачи за вас е да ги слушате, да научите од тоа слушање и да преземете соодветни акции од она што сте научиле од тоа слушање. Господ ни дал две уши и една уста, а ние треба да ги користите во директен сооднос. Треба да запамните дека единствениот валиден извор на информации за можните подобрувања на вашиот бизнис се вашите купувачи.

post

[Видео] Видови на купувачи

Купувачите како “срцето” на секој бизнис се единствените кои овозможуваат нормално функционирање на бизнисот.

Но, сепак потребно е да се знае дека тие се многу покомплицирани отколку еден индивидуалец за кој сметате дека е ваш купувач.

Во видео презентацијата се дадени неколку видови најзначајни купувачи кои имаат или ќе имаат влијание врз вашата продажба и бизнисот воопшто.

post

Колку чекори има твојот продажен процес?

Често пати знаеме да ги комплицираме работите, дури и кога е непотребно.

Без разлика дали е тоа навика, досегашно искуство или пак нешто што по автоматизам го преземаме од другите процеси, усложнувањето во бизнис процесите не е добро и треба да се избегнува.

Едноставност, леснотија и брзина е она што се бара. Затоа, не комплицирајте кога нема потреба. Ќе го подобрите и вашиот и животот на вашите купувачи.

Дали ви се случило да нарачате нешто и да ви побараат дополнителни чекори кои би требало да ги преземете во самиот процес, а ги бара продавачот?

Продажниот процес претставува успех на претходните процеси во бизнисот. Доколку веќе некој стигне до овој процес, значи дека маркетинг процесот си ја завршил добро работата. Но, самото започнување на процесот без завршување не значи успех за претприемачот или бизнисот.

Во продажбата постои едно непишано правило:

Повеќе чекори во продажниот процес, помалку генерирани продажби и спротивно, помалку чекори, повеќе продажби.

Графикот подолу не се базира на анализа на конкретни податоци, туку служи само за презентирање на поентата на оваа непишано правило.

Чекори во продажен процес

 

Затоа анализирајте го вашиот продажен процес, проверете колку чекори се потребни и едноставно елиминирајте се што е непотребно за “нормално” затворање на продажбата.

post

Иднината на македонскиот пазар

Како ќе изгледа иднината? Најтешко прашање кога станува збор за претприемништвото. Овој наслов беше во драфт верзија скоро една година, префрлајќи го во каленадрот од ден во ден при подготовка на распоредот на насловите кои ќе се објават за тековната недела. Но, му дојде редот и на оваа прашање кое е доста значајно во моментов. Сите се подготвуваме за иднината. Она што денес го правиме нема да даде резултати денес, туку утре, задутре, за една недела, месец, или пак година. Кои се некои од трендовите кои ќе се применуваат и во македонски услови?

  • Купопродажен процес ќе бара поедноставување. Светските трендови веќе подолг период се јасни во однос на поедноставувањето. Купување преку еден клик, без дополнителни административни оптеретувања ќе биде тренд и на македонскиот пазар. Кога станува збор за купопродажен процес се мисли и на самото купување и на откажување на купувањето. Како што ќе биде лесно да се купи нешто мора да биде исто така лесно и да се откаже нешто. На пример, нема да постои лесно купување, а тешко откажување на услугата (пример, во MaxTV лесно можеш да купиш некој од дополнителните канали – преку веб или ТВ, но за да го откажеш или мора да се јавиш телефонски или да одиш во салонот).
  • Купопродажниот процес ќе мора да се одвива на повеќе од еден начин. Модерниот начин на живот и достапноста како на информации, така и на можности за брза одлука за купување ќе бара поголема флексибилност на техниките на продажба кои ќе се користат. Нема компромис за оние кои нема да се прилагодат.
  • Комуникацијата во целост ќе се промени. Иако веќе се менува, сепак ова е само почетокот. Секојдневно излегуваат нови технологии кои влијаат на начинот на кој комуницираме. А бизнисите во голема мерка се базираат на комуникација со купувачи, снабдувачи, партнери…
  • Досегашните маркетинг техники ќе имаат сосема мало влијание. Веќе е јасно дека голем број на маркетинг техники изумреа или се во процес на изумирање. Се случија многу промени, кои повторно претставуваат само еден почеток за креирање на иднината на еден просечен човек. Што ќе чита, гледа или пак слуша, како ќе чита гледа или слуша, какви можности ќе има во тие процеси веќе овозможуваат огромна контрола, но не на компаниите и медиумските куќи туку на оној крајниот корисник.
  • Мобилните телефони ќе си ја завршат својата работа. Мобилните телефони се побрзо се претвораат во нешто многу повеќе од мобилен телефон. Тие стануваат составен дел на една сосема нова култура и начин на однесување на луѓето. Купување, маркетинг, комуникација, плаќање, едукација… Ова се само дел од можностите за еден просечен купувач.
  • Нема да биде замисливо еден бизнис без ИТ структура. Големиот број на информации, можности за комуникација и потреби од постојано проширување на знаењето врз база на реални податоци ќе бара буквално секој бизнис без разлика на големина или вид да има сопствена ИТ структура. И една маалска бакалница ќе има потреба од донесување на одлуки базирани на информации.
  • Малите добро ќе им конкурираат на големите и ќе извршат притисок за промени кај истите. Развојот на технологијата ќе бара се помалку пари и ресурси, а се поголема креативност и блискост до купувачите. Со тие клучни предности малите бизниси (што веќе и се случува) ќе вршат константен притисок на големите за да се променат колку што може побрзо доколку не сакаат да изгубат поголем дел од учеството на пзараот. Ова во глобала ќе придонесе за подобрување на севкупниот живот на населението.
  • Се повеќе пaзарот ќе се базира на соработки и на екосистеми. Индивидуализмот е минато. Денес започнува да се бара, но во иднина и се повеќе ќе биде актуелно обезбедување на понуди од страна на екосистеми. Тоа значи, досегашните бизниси кои немале воопшто врска еден со друг ќе започнат да нудат на заедничка платформа производи или услуги со цел поквалитетно задоволување на потенцијалниот купувач.