Бидете секогаш најиновативни! Алатки, екниги и видео презентации само за најхрабрите!

post

Дел 1: Lean Startup – Што всушност претставува?

Благодарение на Eric Ries добивме едно сосема ново движење, нова филозофија или нови основи на нови научни принципи за претприемачите, односно бизниси во стартап фаза, наречена како Lean Startup. Од негово лично искуство проследено со проучување и на други принципи особено принципите кои се применуваат во производството а кои дале резултати се поставени тие основи или темели. Но, сепак не започнува се тука.

Уште пред да излезат идеите за Lean Startup, Steve Blank, професор на Stanford University, ја напиша една од најдобрите книги за претприемачи насловена како The Four Steps to the Epiphany која едноставно ги воспоставува темелите на моделот за развој на купувачи. Терминот развој на купувачи е искован од страна на Steve Blank и го опишува процесот на паралелно добивање на повратни информации од страна на купувачите иако сеуште се развива производот. Ова значи, освен развојот на производот, паралелно се оди и со развој на бизнис и маркетинг функции. Четирите чекори за развој на купувачи тој ги дефинира како:

  • Откривање на купувачи
  • Валидација на купувачи
  • Креирање на компанија
  • Градење на компанија

Прашањето е што има тука за еден претприемач, односно што добива? Еден ваков пристап обезбедува:

  • Кратење на време за развој на производ, користејќи информации за она што навистина на купувачите им е потребно. Временската разлика од идеја до реализација може да биде многу помала.
  • Расфрлања преку инвестирање на време на активности кои не се важни се елиминираат, или доведуваат до минимум.
  • Трошоците се сведуваат на минимум за развој на бизнисот.
  • Цена на производот и/или услугата ќе биде онаа очекувана, односно оние кои потрошувачите се спремни да платат.

Но, и тука не е почетокот на Lean Startup. Основите се развиени во Toyota. Започнува некаде во 1937 година на минатиот век од човекот кој е основач на Toyota, Kiichiro Toyoda. Тој си поставил за цел да понуди автомобил за иста или пак пониска цена од конкурентите, но со подобар квалитет. Затоа тргнал од тоа колку е спремен купувачот да плати и спрема тоа вршел пресметки за развојните и производствените процеси. Уште тогаш, поради тоа што Toyota немала доволно ресурси кои би можела да ги вложува во поголем обем на производство, Kiichiro Toyoda барал да се штедат реурсите и во нивниот производствен систем да се произведат само толку автомобили колку што може да се продадат.  Тој често го користел поимот just-in-time (точно навреме).

Дали еден бизнис треба да тргне од купувачот во својот развој? Нормално дека одговорот е да. Дали еден стартап бизнис има доволно ресурси за расфрлања? Сигурно дека одговорот е не, доколку станува збор за претприемач кој за првпат се обидува да започне бизнис, бидејќи Eric Ries го дефинира стартап не само како започнување на нов бизнис туку и како дел од една поголема веќе востановена организација, она што го пишувавме во интрапретприемаштво.

По Втората светска војна новиот претседател на Toyota, Eiji Toyoda му дал задача на Taiichi Ohno кој бил шеф на одделението за машинска обработка,  повторно да ги разработи принципите на Kiichiro Toyoda. Во период од 15 години Ohno, со помош од производствено-техничкиот консултант Shigeo Shingo воведува програма за рационализација на производството која производствениот систем на Toyota го направил да биде еден од најефикасните системи во светот. Од таа практика може да се види целта на Lean производство:

  • Поврзување на нивото на производство со вистинските барања на потрошувачите
  • Континуирано подобрување на сите процеси во компанијата
  • Елиминирање на сите непотребни расфрлања (време кое не додава вредност на готовиот производ)

Врз основа на повеќето истражувања кои ги имам спроведено во изминатите 12 години за Lean Manufacturing, Lean Management и Lean Thinking јас го дефинирав како:

Lean менаџментот претставува коктел на концепти, техники, алатки и идеи кои содржат континуирано подобрување на сите процеси во организацијата со цел да се намали времето од нарачката на купувачите до испорака на готовите производи преку елиминирање на сите расфрлања кои не додаваат вредност во производствените и организациските процеси и произведување на онолку колку што може да се продаде со цена која купувачот е спремен да ја плати.

Доколку ја сменам оваа моја дефиниција за стартапи би го добил следново:

Lean Startup претставува коктел на концепти, техники, алатки и идеи кои содржат континуирано подобрување на сите процеси при започнување на бизнис и дизајнирање на производ/услуга со цел да се намали времето од идеја до успешен бизнис преку елиминирање на сите расфрлања кои не додаваат вредност во градење на бизнисот и производот или услугата и вклучување на оние карактеристики во производот/услугата кои што се прифатливи од купувачите со цена која купувачот е спремен да ја плати.

Очигледно нема да можам овој трансфер од принципите на Toyota да го трансферирам во Lean Startup во еден пост мора да произлезе еден серијал. Затоа и ќе продолжиме со:

post

Процес на подобрување со Evernote

Evernote Вчера во постот како да го користиш Evernote во подобрување на твојот бизнис опфативме некои идеи за организирање со помош на Evernote во имплементација на подобрувања во твојот бизнис. Но, она што е важно да се напомене дека ова претставува континуиран секојдневен процес за тебе како еден претприемач.

Поради фактот дека подобрувањата претставуваат континуирана потреба за твојот бизнис, затоа и процесот со користење на Evernote ќе биде секојдневен. Но, важно е да напоменам дека овој процес нема да ти одземе повеќе од еден час дневно, но со него секојдневно твојот бизнис ќе биде подобар.

Доколку го сумаризираме процесот кој го опишавме вчера би изгледал вака:

  • Собирање на идеи за подобрување секојдневно и од секаде и нивно забележување во нотесот идеи за подобрување. Барем за ова еден претприемач нема да има проблем секогаш да го полни овој нотес. Барем по дефиниција за претприемач.
  • Секојдневно проверка на се што се наоѓа во нотесот идеи за подобрување, приоритизација на идеи и сместување во соодветниот нотес врз основа на идеите. Секојдневно мора да го испразнуваш овој нотес. Можеби на крајот на работниот ден или пак вечерта пред спиење, добро е да ги поминеш сите белешки во нотесот идеи за подобрување да ги приоритизираш и соодветно сместиш во нотесите со висок, умерен или низок приоритет.
  • Започни со нотесот со идеи со висок приоритет, избери една идеја и испрати ја белешката во нотесот со акциони чекори. Кога веќе ја имаш приоритизација следната задача е да го исчистиш нотесот со висок приоритет на идеи, така што ќе ги сместиш во нотесот со акциони чекори и каде ќе им додадеш чекори кои треба да ги преземеш.
  • За истата идеја за која создаде акциони чекори определи задачи за делегирање и во нотесот делегирани задачи создади белешка со задачи за соодветниот вработен. Се што треба да се делегира, делегирај го. Твојата задача е да доаѓаш до идеи за подобрување и да го менаџираш процесот на имплементацијата. Кога ќе бидат определени задачите, сподели ја белешката со вработениот на кој му ги доделуваш тие задачи.
  • Следи го процесот на имплементација и создади акциони чекори за следните идеи во нотесот со висок приоритет за што ќе го повториш процесот.
  • Кога ќе го испразниш нотесот со висок приоритет, продолжи со истите чекори за нотесот со умерен приоритет. А, кога пак и тој ќе биде испразнет продолжи со нотесот со низок приоритет.

Овој процес претставува само основа за идеи како може да го користиш Evernote во процесот на подобрување на твојот бизнис. Може да го подобриш процесов, затоа што целта тука е само да ти дадеме основни идеи за зголемување на твојата продуктивност и имплементираш процес на континуирано подобрување во твојот бизнис.

 

post

Како да го користиш Evernote во подобрување на твојот бизнис?

Evernote Evernote е моќна алатка која може да биде многу од помош за твојот претприемачки живот и бизнисот.

Најголемиот проблем до кој наидов при користење на Evernote e организирање на нотесите за различна корист за претприемачите.  Постојат премногу работи кои еден претприемач може да ги прави со оваа алатка, а јас сакам да опфатам колку што можам повеќе идеи како претприемачите да се организираат себеси за подобро користење на Evernote.

Во овој пост ќе презентирам еден можен начин на користење на Evernote за идеи за подобрување. Зошто идеи за подобрување? Прво претприемачите се луѓе полни со идеи за се околу нивниот бизнис. Многу од идеите може да се заборават доколку не се трансформираат ведн во акциони чекори за имплементација на таа идеја. Но, некои од идеите се вредни веднаш, но некои се за во иднина. Од друга страна, не можеш да постигнеш се што ќе ти падне на ум. Тоа не е можно.

#1 Креирање на нотес со идеи за подобрување

Evernote improvement ideas

Прво нешто што ќе треба да направиш е да креираш нотес насловен како идеи за подобрување. Овој нотес ќе биде збир на повеќе забелешки. Во овој случај, кога сакаш да го користиш Evernote за подобрување на бизнисот, ова е место каде ќе ја сместиш секоја идеја од било каде без анализирање, или размислување за идејата. Само нафрлување.

Што може да ставаш во овој нотес?

На пример, веројатно читаш различни онлајн медиуми како вебсајтови, блогови, весници, твитови… Секогаш кога мислиш дека нешто што си прочитал ќе вреди за подобрување на твојот бизнис го праќаш во овој нотес. Може да го користиш Google Reader за испраќање на идеи во нотесот, или пак да користиш разни алатки кои имаат интегративни можности за испраќање во Evernote. На пример, ќе споменам неколку корисни алатки кои може да ги користиш со Evernote:

  • Мобилна или таблет верзија на Evernote апликација ќе ти помогне да ги имаш сите твои белешки секогаш со тебе.
  • Evernote Web Clipper ќе ти овозможи да снимиш интересни работи од интернетот преку твојот интернет прелистувач.
  • Може да ги пратиш белешките преку email директно во Evernote и што е уште поважно во соодветниот нотес.
  • Доколку користиш некоја апликација за читање, повеќето од нив имаат можност за интеграција со Evernote. Јас користам Reeder for Mac и од самата апликација можам да ја испратам страната во Evernote.

Ова се само кратки примери, но постојат огромен број на можности за интеграција во секојдневниот претприемачки живот. Уште нешто што треба да споменам е дека може да снимиш аудио белешки или белешки во вид на слика. На пример, доколку возиш автомобил, а знаеме дека кога возиме креативноста ни е на високо ниво, едноставно можеш да зборуваш во телефонот и да ја снимиш таа аудио забелешка за идеи за подобрување. Така нема да можеш да го заборавиш она што креативноста ти го носи во твојот ум.

#2 Креирај контејнер за подобрувања

Evernote-Improvements-Stack

Сега имаш еден нотес полн со идеи за подобрување. Но, ти требаат и други нотеси кои ќе ги користиш за процесот на имплементација на идеите. Затоа треба да имаш подобро организирани нотеси во твојот Evernote.

Една корисна карактеристика е да креираш контејнер (stack) кој ќе ги содржи сите нотеси поврзани со подобрување. Може да го именуваш како што сакаш, во овој случај јас го именував како Improvements.

#3 Креирање на други нотеси во контејнерот подобрување

За сега имаш еден контејнер и еден нотес во тој контејнер. Нотесот идеи за подобрување претставува базен со информации за можни подобрувања кои може да ги направиш во твојот бизнис.

За овој процес, ќе ти требаат дополнителни нотеси кои едноставно ќе го прочистуваат процесот. Сакаш да ги приоритизираш идеите. Ќе имаш нешто што ќе сакаш да го имплементираш утре, но ќе имаш и нешто што не е толку важно и може да биде на листа на чекање.

По приоритизацијата треба да ги испланираш следните чекори за можни подобрувања кои доаѓаат од секоја идеја. Твојата работа ќе биде да ја трансферираш секоја идеја во чекори бидејќи идеите како идеи не се вредни без да станат реалност. Првиот чекор во претворање на идеите во реалност е бреинстормирање на идните чекори за подобрувања.

За оваа цел, ќе ги користам следниве нотеси:

  • Идеи за подобрување. Нешто што веќе го направивме во првиот чекор и претставува базен со информации.
  • Подобрувања со висок приоритет. Кога ги проверуваш твоите идеи за подобрување, првото нешто што треба да направиш е да ги приоритизираш идеите, односно белешките за можни подобрувања. Ова е твојата секојдневна работа, да исчистиш се од нотесот идеи за подобрување.  Кога ќе наидеш на белешка за која сметаш дека има висок приоритет за имплементацијаможе со помош на десен клик на белешката и избор на Move to Notebook да го избереш нотесот со висок приоритет идеи. Висок приоритет значи дека треба да започнеш со планирање на процесот на имплементацијата колку што може побргу, можеби утре или пак оваа недела.
  • Подобрувања со умерен приоритет. Ова е вториот нотес за приоритизација кој ќе ги содржи белешките кои имаат умерен приоритет. Умерен приоритет значи дека нешто треба да се имплементира, но не денес или утре или пак оваа недела. Може да чека се додека нотесот висок приоритет не биде испразнет.
  • Подобрувања со низок приоритет. Третиот нотес е нотесот кој ќе ги содржи идеите за подобрување со низок приоритет. Овие белешки не се нешто што мора да се имплементира во блиска иднина, но вредно е да се имплементираат кога нотесите со висок и умерен приоритет ќе бидат празни.
  • Акциони чекори. Следен нотес е за акциони чекори кои ти и твојот тим треба да ги преземете и имплементирате за секоја идеја за подобрување. Може да користиш посебна белешка за секоја идеја од претходно споменатите нотеси. Започни со белешките од нотесот со висок приоритет.
  • Делегирани задачи. Уште нешто вредно за тебе како претприемач со Evernote е користење на функсијата за споделување заради делегирање на задачите на вработените кои ќе бидат одговорни за спроведување на идеите за подобрување.  Кога ќе завршиш со дефинирање на акционите чекори, ќе треба да ги делегираш некои од нив на вработените. Во овој нотес, може да направиш различни белешки за различни вработени и нивните задачи поврзани со процесот на подобрување. Таквите белешки ги споделуваш со Evernote акаунт на соодветниот вработен. На ваков начин, ќе го користиш Evernote како алатка за соработка и to-do листа за тебе и твоите вработени. Ова ќе ти овозможи да го следиш процесот на имплементацијата.

Сега, контејнерот за подобрување ќе изгледа како на сликата.

Evernote Notebooks Improvement

post

Меѓународен маркетинг

Компаниите при своето формирање најчесто се насочени кон работењето на домашниот пазар. За таа цел, таа го испитува пазарот, подготвува ресурси и отпочнува со работење.

При понатамошната експанзија, компанијата има за цел:

  • прво да влезе на одредениот пазар,
  • потоа да опстане на тој пазар и
  • на крајот настојува да заземе што поголем дел од пазарот.

Но, глобализацијата си го направи своето. На домашен пазар постојат и меѓународни конкуренти. Затоа поради се поизразените глобални тенденции во работењето, конкуренцијата и на домашниот пазарот добива се поголем меѓународен предзнак.

Неизвесната средина, јаката конкуренција, притисокот да се намалат трошоците и да се зголеми продуктивноста, подобрувањето на квалитетот на производите, како и недостатокот на клучните суровини и енергенси, го определуваат работењето на компаниите како во домашните така и во меѓународните услови.

Поради тоа домашните компании не смеат да чекаат да бидат нападнати од други меѓународни компании, туку тие сами треба да градат и развиваат конкуретски предности, за да успеат прво на домашниот, а потоа и на меѓународниот пазар. Но, без никаква помош од страна на владата, бидејќи помошта едноставно се претвора во еден од најголемите непријатели на една компанија, која доколку не може да се снајде во домашни услови, многу потешко ќе биде да се снајде во меѓународни услови.

Определбата за влез на компанијата во меѓународното работење, претставува клучна стратегиска одлука за понатамошната деловна судбина на една компанија.

Меѓународниот маркетинг го препознаваме низ следниве четири елементи:

  • специфичност на меѓународниот пазар;
  • специфичност во управување со маркетинг активностите;
  • постоење специфичности во меѓународното работење;
  • значење на глобализацијата.

Атрактивноста на новите пазари го определува број на купувачите, нивната платежна моќ и нивната спремност да го користат понудениот производ или услуга. Доколку компанијата започнува со работењето, тогаш се оди најчесто со пласирање на помала количина на производи, без оглед дали истражувањата покажуваат потреба за поголема количина, бидејќи луѓето во компанијата немаат изградена самодоверба, а ризикот е секогаш голем. Од друга страна, нема подобро опипување на пулсот на пазарот без разлика на големите истражувања, бидејќи информациите доаѓаат од теренот, со реални производи, пазар, купувачи, дистрибутери…

Голем број на купувачи се осетливи на вербално и невербално комуницирање, поради што мораат да се бираат зборови кога се рекламира одреден производ со цел да се погоди суптилноста на пораката. За остварување на меѓународните маркетинг стратегии потребно е да се вработат експерти за јазици, бидејќи не може секоја маркетинг порака да се преведе буквално на поголемиот број на јазици. Доколку пропагандната порака се преведе буквално на некој јазик, таа може погрешно да се свати или да биде дури и смешна, со што ќе изостане нејзиниот пропаганден смисол.

Секоја компанија која планира да нападне некој странски пазар претходно се подготвува, зголемувајќи ги своите капацитети, како по прашањето на финансиите, така и во развојот на технологиите, маркетингот, менаџментот. Па кога ќе го нападне одредениот пазар, домашните компании тешко можат да пружат адекватен одговор на интензивниот напад, доколку претходно не се подготвени за тоа.

Доколку во моментот на нападот се врши преструктуирање и консолидирање, за да се одговори на нападот, ефектите ќе бидат минимални. Чекањето и не реагирањето на предизвиците кои доаѓат од странство, може за домашната компанија да биде катастрофа.

Одредени етнички, верски, расни, национални и патриотски чувства, некогаш определуваат дали нешто ќе се купува или не. Преку пропагандата “купувајте наше” или “не купувајте нивно” може значително да се влијае на побарувањето на одредени производи. Етноцентризам или форсирање на сопствената култура или производи, е чест случај. Но, тогаш се јавува закана од други држави, и тие ќе применат реципрочни мерки, па најчесто се одбегнуваат директни повикувања за користење на сопствените производи, а бојкотирање на туѓите производи. Во пракса сепак може да се забележи бојкот на одредени производи, што може да овозможи создавање на дополнителна шанса на домашната компанија да се преструктуира и да продолжи со работењето.

Поради состојбите на светскиот пазар, меѓународниот маркетинг добива се поголемо значење. Компаниите кои сакаат активно да се вклучат во меѓународниот маркетинг потребно е да бидат:

  • пазарно насочени;
  • да постојат координирани деловни активности;
  • да постојат меѓународни мрежи;
  • компанијата адекватно да се вклопи во меѓународната средина.

Маркетинг принципите важат во сите држави со пазарни стопанства, но сепак мора да се оспособи маркетинг сектор за специфичности кои произлегуваат од работењето на меѓународниот пазар. За таа цел се користат повеќе функции на меѓународниот маркетинг: планирање на маркетинг; дизајнирање на организациска структура за меѓународен маркетинг; прогнозирање на продажбата; подготовка на продажна квота и буџет; водење на меѓународните маркетинг функции; развивање на производот, пласирање, промоција и деловни полиси.

Разликите кои постојат помеѓу оделни земји на кои треба да се обрне внимание се: техничкиот развој, различните транспортни можности, различните економски можности, јазикот, религијата, културата, навиките, обичаите, климата (ладно, топло)…

За успешно да се совладаат сите овие различности, потребно е компанијата да ангажира дополнителен број на експерти. Трошоците за дополнителни вработувања ќе се надокнадат со остварените деловни резултати, односно профит. Некогаш постои голема разлика помеѓу маркетинг активностите на домашниот и странскиот пазар, а некогаш тие активности се потполно исти. Доколку се работи за слични национални, етнички, верски, културолошки региони, тогаш и маркетинг активностите ќе бидат слични и спротивно.

Меѓународните компании настојуват да освојат што поголем пазар, користејќи развиена технологија, развиен маркетинг, јак финансиски потенцијал како и истакнати меѓународни марки на производи. Успешното работење на компаниите не зависи само од работењето на една компанија, туку од работење на комплексни мрежи кои сочинуваат производители, инвеститори и други финансиски институции, осигурителни компании, добавувачи, дистрибутери и слично. Доколку членовите на оваа мрежа се појаки, тие можат да понудат поконкурентски услови на пазарот и подобро да работат. Сите членови на овие мрежи мораат паралелно да вршат развој на техниките и технологиите за сопствената гранка, но мораат да вложуваат и во развојот на вработените.

Пример: Производителите развиват производни капацитети, банкарите развиват банкарски услуги, осигурителни компании развиват услуги во свој домен и сл. На тој начин јаките мрежи стануваат уште појаки и многу тешко е да им се конкурира на меѓународно ниво.

Кај земјата домаќин, главна причина за користење на меѓународните производи се: пониски цени; подобар квалитет; сoвремена технологија; континуирана испорака… Некои компании работат самостојно, некои се во партнерски однос со други компании, а одредени компании работат во меѓународни услови преку посредници, доколку немаат добро развиен сопствен маркетинг.

Меѓународниот маркетинг треба да ги испита специфичностите на еден пазар и тие специфичности да ги искористи во работењето. Со текот на времето, поради интеракција помеѓу компанијата и околината, компанијата е во состојба во одреден обем да ги промени специфичностите на тој пазар. Но, компанијата во почетокот на работењето не треба да настојува по секоја цена да ги анулира специфичностите кои постојат на еден пазар, туку треба да почека одредени разлики и специфичности на пазарот со текот на времето постепено да исчезнат.

Меѓународните маркетинг активности се скапи, па мора да се издвојат финансиски средства за реализирање на маркетинг активностите. Маркетинг активностите во странство, можат да бидат финансирани: од страна на државата, од страна на неколку компании од истиот или различниот сектор или од одделни богати компании. Богатите компании ги концентрират своите напори на перспективен пазар, пласирајќи производи или услуги во облик кој е најприфатлив за тој пазар, па стануват уште побогати.

На меѓународниот пазар може да се оди со потполно истиот производ како и на домашниот пазар, со делумно изменет производ во сагласност со потребите на одредениот пазар, а може и со производи кои се посебно креирани за определениот пазар. Некогаш самиот тип на производите бара вакво однесување, додека некогаш тоа однесување се должи на имање или немање на доволно ресурси, за одреден производ да се пласира во различни форми на различни пазари.

Мора да се согледа и која цена се спремни купувачите од оделни земји да ја платат за производот или услугата. При работење со странство треба: да се плати царина; транспорт; осигурање на транспорт и други давачки; па најчесто се одобруваат пониски цени отколку на домашниот пазар. Понекогаш се потребни и државни гаранции за финансиска подршка на одредени проекти.

Работењето на меѓународно ниво е препорачливо кај гранките кои драстично се менуваат како електрониката, телекомуникациите, како и кај информатичката технологија, која изврши преобликување на економските односи во целиот свет, користејќи го интернетот како и другите софтверски решенија. Сателитските комуникации овозможија револуција во комуникациите. Се јавуват автоматизирани и роботизирани фабрики во голем број на индустриски гранки. Со ваквите технологии, компаниите создаваат производи на кои тешко се конкурира. Компаниите од нерaзвиените земји, додека се одлучат што да преземат, додека купат технологија, додека обучат вработени, губат време и по правило нема што да бараат со висококонкурентни компании како и со нивните големи истражувачки центри.

За потребите на пазарите во сиромашните земји, некои производи се продаваат со помош на репарација на веќе користени делови или машини. Еден пример е одлуката на Германската влада, парично да ја стимулира продажбата на автомобили, вршејќи замена старо за ново. Но, тие стари автомобили треба да се рециклираат на нивните отпади. Поединци, тука најдоа добар извор за заработка, демонтирајќи ги сочуваните делови и склопови и продавајќи ги како репарирани делови.

post

Идеи кои можеш да ги искористиш од Јануари 2012

Претприемач

Претприемач

Помина првиот месец и од оваа 2012 година. Овој пост претставува месечен серијал во кој се групираат најчитаните наслови од претходниот месец од страна на читателите на претприемач, но и наслови кои ќе влезат во започни тука страната.

Во јанураи, месец полн со празници и неработни денови имаше објавено 40 наслови, од кои само 10 ќе влезат во овој серијал врз основа на аналитиката за посетеноста на овие наслови.

Започнување на бизнис

Оваа 2012 година посебно внимание ќе биде посветено на започнување на бизнис. Затоа и како посебна категорија можеби секогаш ќе има повеќе наслови во овој избор. Ова не значи дека ќе бидат запоставени и другите категории, туку едноставно ќе има приоритет. Целта е преку научно-истражувачки методи и техники како и практично искуство да развиеме и презентираме една теорија, која ја нареков теорија на бизнис идеи, односно како да се развие бизнис идеја која ќе опстои.

Како најчитани наслови од оваа категорија во Јануари 2012 беа следниве:

Маркетинг

Едно нешто е јасно: секој бизнис без разлика од индустријата во која функционира се наоѓа во маркетинг бизнис. Тоа е факт, и доколку се избегнува може да биде кобно за бизнисот.

Менаџмент

Овој месец во категорија на менаџмент беше цел еден серијал за интрапретприемачи и интрапретприемаштво. Иако, ова е цел серија од десетина наслови како најчитан меѓу првите 10 влезе следниов:

Видео

И категоријата видео влезе во овој избор согласно аналитиката за посетеност со постот насловен како:

post

Во бизнисот е обратно! Се гради од крајот кон почетокот!

Кратенки во бизнис Кога читате книга започнувате од првата страна и ја читате до последната. Или пак едноставно ако е здодевна се откажувате.

Но, кога станува збор за градење на бизнис од страна на еден претприемач, се започнува од сликата на крајот, односно од она како треба да изгледа веќе изграден бизнис.

Започнување на бизнис не е лесна работа, да се разбереме. Секој кој ќе ви каже дека тоа е едноставно во два до три чекори или нема врска со тоа што го зборува или нешто разбрал, но не доразбрал па “глупа тропости”.

Да, точно нема волшебно стапче кое во три чекори ќе го изгради вашиот бизнис, бидејќи започнување на бизнис претставува сложен процес кој комбинира повеќе научни дисциплини од една страна и повеќе персони од страна на претприемачот од друга страна. Вистинската комбинација на тие научни дисциплини заедно со вистинската комбинација на тие персони во еден претприемач е она што покажува дали еден бизнис ќе биде успешен или не.

Често пати започнувањето се базира на интуиција, која не дека е лоша, проблемот е што не е доволна за градење на бизнис.

Често пати се започнува без стратегија, односно одговор на прашањето што понатаму откако ќе започнам, па затоа повеќето претприемачи се наоѓаат во состојба од која не знаат како да излезат, или едноставно не знаат како дозволиле да се најдат во една таква состојба која се карактеризира со голем напор, фрустрација, незадоволство и едноставно ситуација во која сите се криви само не тој.

Често пати се започнува без вистински дизајн на бизнисот, кој всушност треба да ги даде основните системи кои треба да се изградат и имплементираат во текот на започнувањето, а на кои бизнисот ќе се базира и по завршување на стартап фазата. Едно нешто треба да биде јасно, бизнисот не се базира на претприемачот, или подобро кажано не се базира и не може да се базира во целост на претприемачот, туку на системите.

Зошто? Затоа што и самиот бизнис претставува систем.

Бизнисите претставуваат организациски системи. Овие системи се комплексни системи поради тоа што во исто време тие претставуваат:

  • Вештачки систем бидејќи го создава претприемачот (човек)
  • Сложен систем бидејќи во својот состав има повеќе компоненти
  • Динамички систем бидејќи за функционирањето на овој систем е потребно управување што доведува до менување на истиот со текот на времето
  • Стохастичен систем бидејќи не е прецизно позната наредната состојба која настанува како резултат на одредена акција на претприемачот или менаџментот
  • Отворен систем бидејќи врши размена на материја, енергија и информации со околината и
  • Нелинеарен систем бидејќи врската помеѓу влезот и излезот во и од бизнисот (системот) претставува нелинеарна равенка.

Гледаме дека бизнисот не спаѓа во категорија на само еден систем и токму затоа тој е комплексен. Токму затоа имаме и успешни и неуспешни бизниси. Токму затоа смртноста на новите бизниси е многу голема.

Дали еден ваков систем се гради во два до три па и пет или 10 чекори? Не верувам, иако може да се изгради, но статистичката потврда за смртност на бизнисот ќе продолжи да се докажува.

Затоа, кога се гради бизнисот мора да го имате крајот во главата, односно обликот, изгледот и составот на тој бизнис. Финта е да не пропуштите нешто во фазата на градење. Таа е многу важна, бидејќи подоцна каењето нема да помогне.

И да, оваа година ќе изградиме една теорија која ќе се однесува на започнувањето.

post

Mаркетинг цели

Маркетинг пред започнување

Маркетинг

Целта на маркетингот е купувачот, односно суштината на маркетинг концептот е задоволување на купувачите подобро отколку што тоа го прави конкуренцијата. При тоа се анализираат и задоволуват потребите и желбите на купувачите, се врши насочување на купувачите за создавање на нови потреби и се стимулираат купувачите за зголемено купување, со цел компанијата да оствари профит.

Како што знаеме зборот “маркетинг” потекнува од францускиот збор “market” – пазар, на кој се додава суфиксот ing. Суфиксот “ing” означува: акција или процес. Во маркетингот вообичаено, целите се дефинираат со помош на следните показатели:

  • обем на продажба,
  • пазарно учество,
  • остварениот профит,
  • создавање на корист и
  • врски со купувачите.

Маркетинг активностите од секогаш постоеле. Во периодот пред индустрискиот бум немало голема потреба од маркетинг, бидејќи постоел недостиг на производи, конкуренцијата била слаба, па производите лесно се продавале. Со зголемување на индустриското производство, се задоволуваат голем број на пазарни потреби, конкуренцијата на домашниот и на светскиот пазар станува се посилна, се јавуваат вишоци на производи, па потребата од маркетингот со чија помош би се продале тие производи станува се позначајна. Слаб интерес за маркетинг активностите покажуваат и земјите кои ги затвараат своите економии или се наоѓат под економски санкции воведени од одделни моќни држави или од страна на Обединетите Нации.

Во тие земји се јавува недостиг на определени производи, па во такви случаи скоро и да нема потреба за примена на поозбилен маркетинг, бидејќи најчесто владее недостиг на производи и се што ќе се произведе лесно се продава. Тоа се екстремни случаи кои се познати во праксата, а во сите други случаи потребата за маркетинг, во денешните услови на работење, е неоспорна. Овој пример го согледавме кога на соседна Србија и беа воведени санкции, па поради недостиг на голем број на производи, владеше големо побарување, дури и не постоеше потреба за примена на некои поозбилни маркетинг стратегии.

Во маркетингот се развиваат нови концепти

Да, во маркетингот се развиваат нови концепти на работење како: TCS – Total Consumer Satisfaction, со која се настојува да се оствари севкупното задоволување на барањата и желбите на купувачите. Концептот е дефиниран за задоволување на барањата на купувачите надвор од компанијата. Сличен концепт е и TQM – Total Quality Managеment, на кој компанијата се потпира поради остварување на внатрешните потреби и за реализирање на квалитетно производство. Цел на двата концепти е, на најдобар можен начин да ги исполни барањата и желбите на купувачите.

Во секое работење постои одредена доза на ризик

Ризиците можат да се поделат на оние кои можат да се контролираат и оние кои не можат да се контролираат. Оние ризици кои не можат да се контролираат, пожелно е да се одбегнуваат. Некои компании токму во таквите зделки гледаат можност за успех во работењето, реализирајки ги тешко остварливите цели. Менџментот на компанијата треба да направи анализа дали компанијата може да се справи со толкав предизвик. Доколку правилно не се процени ситуацијата можни се и неуспеси. Неуспехот може да се јави дури и ако се е грижливо испланирано, бидејќи постојат разни закани кои доаѓаат од околината како посредна, така и непосредна.

Пример: владата може да донесе нов закон, одлука, пропис, и слично. Секоја влада треба сериозно да внимава на своите одлуки за да не го исплаши и избрка капиталот.  Државата може да западне во тешкотии; може да се зголемат каматите на кредитите; може да се запре со кредитирањето; купувачите може да престанат да го купуваат одредениот производ или да ја користат одредената услуга; може да се појави силна конкуренција; може да се појави нова технологија или нов производ.

Во денешно време осмислувањето и производството на одреден производ/услуга претставува полесна работа, отколку продажбата и наплатата на побарувањата за тој производ/услугата. Така да маркетингот станува еден од клучните делови во работењето на компанијата, а менаџерите што се занимаваат со маркетинг активностите, стануваат признати и ценети без оглед што одредени маркетинг менаџери имаат лоша репутација дека се бескрупулозни, агресивни, непријатни.

Маркетингот на една компанија треба да утврди што сака купувачот

Целта на маркетингот е и да утврди што сака купувачот, односно што за купувачот претставува вредност, желба или потреба и секогаш мора да се излезе во пресрет на нивните барања, насочувајќи се кон одредена целна група каде може да се оствари најголем профит. Менаџерот со своите ограничени ресурси не може да ги задоволи барањата на сите купувачи. Доколку се определи да ги задоволи сите купувачи, тоа во голем број на случаи не може да го оствари квалитетно и компанијата може да стане цел на напад од другите конкуренти, бидејќи секогаш ќе се најде компанија која ќе ги задоволи подобро барањата на купувачите.

Маркетинг активностите се доведени до совршенство. Во создавање на маркетинг стратегиите вклучени се различни експерти, дури и психолози и социолози, кои толкуваат одредени однесувања и потреби на купувачите и врз база на тоа се определуваат маркетинг активностите.

Маркетинг активностите во голема мерка, мора да се базираат на етиката. Етиката или моралот објаснуваат што е добро, а што не е. Со придржување до етиката компанијата стекнува и задржува позитивен став кај купувачите, но избегнува и контрола од страна на државните инспекции.

Доколку има голем број жалби од страна на купувачите или од други луѓе кои се загрижени по одредени прашања, државата испраќа соодветни инспекции да извршат контрола на работењето на компанијата. Тоа најчесто се случува доколку компанијата има лош производ, по прашање на квалитетот, безбедноста или доколку компанијата нанесува штети загадувајќи го воздухот, реките, при прекумерното сечење дрва или при уништувањето на други ретки природни богаства. Голем број на купувачи ќе купат одреден производ и покрај тоа што е поскап, доколку знаат дека компанијата која што ги произведува овие производи, се придржува до етичките кодекси.

Доколку маркетингот на една компанија им понуди на купувачите нешто што им е потребно, а тоа не можат да го најдат на друго место, тогаш маркетингот е во потполност успешен.

Најчесто се работи за револуционерен производ, како лек против птичји грип или некое револуционерно техничко решение, за чиј пласман не постои никаков проблем.  При тоа треба да се разликува маркетингот од продажбата, бидејќи продажбата е само краен резултат на внимателно планирање и ефектно изведена маркетинг стратегија и тактика.

post

Која е твојата мисија?

Мисија Се чини толку едноставно, но толку многу работи зависат од една обична реченица која се нарекува мисија.

Не верувам дека постои компанија која нема мисија. Барем поголемиот дел од компании имаат посебна веб страна на нивниот сајт во кој ја наведуваат мисијата.

Не е проблем што ја имаат мисијата на веб сајтот, проблемот е суштински:

  • мисијата не ја отсликува реалноста на бизнисот и
  • значењето на мисијата е потценето.

Тогаш, зошто ни е мисијата.

Во бизнис план – содржина и резиме пред неколку години пишував за мисија како дел од бизнис планот. Но, изгледа требаше да обрнам особено внимание како посебни наслови.

Мисијата треба да го дефинира она што бизнисот сака да го работи за најмалку четири категории:

  • Потрошувачите
  • Вработените
  • Сопствениците
  • Општеството

Кажано со едноставни зборови мисијата претставува причина за постоење на бизнисот.

И сега го гледаме следново:

Мисија на XYZ  е да ги обезбеди најдобрите, најквалитетнтите, најсовршените производи и услуги од ABC индустрија за нашите купувачи.

Ова е една кратка верзија. Мисијата може да биде составена и од повеќе реченици, но повеќето се бла, бла, бла…

Често пати им го поставувам прашањето на претприемачите за кого? За купувачи велат. За кои купувачи? За наши купувачи велат. А, кои се ваши купувачи? И тогаш настапува вистински проблем. Било кој велат.

Тука не одам во останатите 3 категории, доволна е првата – купувачи.

Кои се твоите купувачи?

Дали доволно добро ги знаеш?

Се чини дека клучните прашања немаат одговор.

Пред извесен период дојдов до една структура на CRM база на податоци во која видов дури и смешни работи. таму имаше полиња кои се занимаваа со тоа дали има домашно милениче? Дали е тоа куче или маче? А бизнисот немаше врска со домашни миленичиња. Но, бизнисот сака да знае колку што може повеќе за своите купувачи.

Сакаш да излезеш во пресрет на нивните потреби? Мора да ги знаеш многу подобро. Кога ги знаеш подобро, специфицирај точно во твојата мисија за кого станува збор. Мисијата не е само за табе. Таа е и за сите останати во твојот бизнис, но и за сите од надворешноста на твојот бизнис.

Како дел од теорија на бизнис ќе одиме посебно во развој на купувачи и ќе видите зошто тоа е суштината на еден бизнис.

post

Како да го имплементираш твојот маркетинг план за 2012?

Маркетинг план Веројатно веќе имаш маркетинг план за оваа година и веројатно веќе започна со неговата имплементација.

Facebook реклами, бизнис картички, летоци, радио, Google Adwords, блогирање за бизнис, социјални медиуми…. Уф, уф, уф… И уште стотици, ако не илјадници можности за испраќање на твојата порака.

Маркетинг план претставува блупринт за комуникација на пораките за твоите производи и услуги со купувачите,  односно детален патоказ кој ги опфаќа твоите маркетинг стратегии, тактики, активности, трошоци и проектирани резултати во однос на временскиот период за кој се однесуваат сите твои маркетинг активности.

Доколку не читате од поодамна можеби веќе имате маркетинг план согласно 5 прашања и една табела:

  • Кој е целниот пазар?
  • Кои цели треба да ги исполни маркетингот воопшто?
  • Какви се маркетинг стратегии?
  • Кои маркетинг тактики ќе користиме?
  • Што треба да преземеме за да се исполнат целите?

И секако ја имате убаво дизајнираната табела како следнава:

Маркетинг план - табела

Сето тоа на хартија е одлично, но треба да се имплементира и крајот на годината, доколку планот се однесува за оваа 2012 година ќе каже што сме постигнале или не. Од друга страна оваа табела е премногу едноставна и фокусот и е да се имплементира се што е планирано без да навлегува во ефикасноста и ефективноста на самата имплементација и резултатите. Иако табелава е добиена преку основните – целниот пазар и целите на маркетингот кои се вклопуваат во бизнис целите, сепак еден поглед не покажува која е целта и особено што треба да се постигне со имплементација на соодветна тактика или активност. Затоа и би требало да се дополни со:

  • Треба да се оствари…
  • Се остварило…

Ова значи дека ако тактиката е зголемување на оналјн присутноста на бизнисот треба да се изберат и мерни индикатори кои ќе овозможат да знаеме како одиме со постигнувањата од имплементацијата. Не е се во имплементација. Имплементација без реализација на поставените цели не е добра имплементација, тоа е губење на време.

Што ти како еден претприемач треба да направиш за да го имплементираш твојот маркетинг план во 2012, но со резултати?

#1 Дефинирај ги остварувањата во бројки

Секоја цел преточи ја во бројки. Од таквата цел за секоја тактика дефинирај остварувања во бројки. На пример, целта е зголемување на онлајн присутноста на бизнисот за 30% од претходната година. Имаме повеќе тактики, но за примерот ќе ја земеме блогирање за бизнис при што би изгледало нешто вака:

  • Подобрување на квалитет и квантитет на содржината на бизнис блогот за 30%.

Активностите ќе бидат:

  • Имплементација на календар за содржина (издавачки календар),
  • Неделно наместо 3 по 4 наслови ќе бидат објавувани,
  • Секој квартал по една e-книга,
  • Секој месец по едно видео за користење на нашите производи,
  • …

Сега бидејќи тактиката ние таква која има и квантитет и квалитет потребно е да дадеме и квантитаивни и квалитативни мерки. Квантитаивни е лесно бидејќи едноставно, ако минатата година на пример сме имале 100 наслови, оваа година ќе имаме 130 во планот. Можеби проблемот е квалитет и дефинирање на бројките бидејќи не сме ние тие кои одлучуваме. Но, едно е јасно. Не постои нешто што не може да се измери. Така да можеме да ги дефинираме индикаторите кои едноставно ќе ни дадат слика за квалитетот на нашите маркетинг активности. (Подетално ќе одиме во мерење и методологии и техники за мерење во наредните постови оваа година како дел од теорија на бизнис идеја). На пример, квалитетот ќе биде презентиран како функција од некој од следниве индикатори (сепак за вас ќе зависат од продажната инка и системот за генерирање на потенцијални купувачи):

  • X посети во 2012
  • Y коментари во 2012
  • Z регистрации
  • W нарачки
  • A реализирани продажби

#2 Знаеш што треба да се оствари и знаеш каде си?

Бидејќи знаеш што треба да се оствари и знаеш каде си со реализацијата во моментов може едноставно да провериш дали бројките кои се реализираат ветуваат реализација на поставените цели.

Едноставни математички операции ќе ти кажат каде имплементацијата е ОК, а каде не е добра и бара интервенција за да се подобри. Ова второто може да бара и промена на планот. Но, ништо страшно, планот не е статички елемент кој не се менува.

#3 Не заборавај да мериш?

Знам дека понекогаш е тешко да се мери, но бидејќи твојот план содржи бројки, а резултатите од досегашните постигнувања повторно се во истите бројки едноставно е да мериш и да споредуваш. Но, целта на ова мерење и споредување е да ги пополниш дупките кои секогаш ќе постојат.

post

Не прави ги овие 6 работи кога планираш промени во твојот бизнис

промени Еден од најважни и без завршување или стопирање процеси во секој организациски систем како и бизнисот се организациски промени.

Како еден претприемач, твојата задача е да решаваш проблеми, како внатрешни така и надворешни. Внатрешни проблеми кои се поврзани со твојот бизнис и се она што е во внатрешноста на компанијата, и надворешни проблеми поврзани со целниот пазар, потрошувачите и се она што е надвор од твојата компанија.

Да, ти си решавач на проблеми. Секој проблем бара решение.

Од друга страна, имплементацијата на решение претставува процес на промени кој го подобрува твојот бизнис.

Но, статистички многу процеси на промени пропаѓаат заради различни причини. Тука, би сакал да предложам 6 работи кои би требало да ги избегнеш доколку сакаш да ја зголемиш веројатноста на успех на процесот на проемни.

#1 Не започнувај без јасна визија за иднината

Секој процес на промени започнува со план. Кога го планираш следниот процес на промени, треба да погледнеш во иднината. Доколку не ја знаеш иднината, нема да можеше квалитетно да ги испланираш промените.

Без јасна визија за иднината, нема да го знаеш патот кој треба да го поминеш во текот на проесот на промени.

Мора да ги одговориш следниве прашања:

  • Што ќе се случува во иднината?
  • Како ќе изгледа иднината и какво ќе биде нејзиното влијание врз мојата компанија?
  • Можеме ли да ја креираме, подобруваме, игнорираме или прифаќаме таа иднина? Што тоа би значело за нас?
  • Каква ќе биде улогата на мојот бизнис во иднина?

Кога одговараш на овие прашања, тогаш може да продолжиш со процесот на планирање.

#2 Не започнувај без јасна формулација на проблемот или вистинскиот извор на промени

Секоја промена е последица на некоја причина наречена како извор или сила на промена. Доколку сакаш да успееш со процесот на промени, мора да имаш јасна формулација на вистинскиот проблем или вистинскиот извор на промени.

Доколку ги знаеш изворите на промените, ќе знаеш и што треба да направиш.

#3 Не ја потценувај моќта на отпорот кон промени

Секој процес на промени ќе биде соочен со отпор кон тие промени. Мора да го знаеш тоа и да се подготвиш за работа на справување со тој отпор уште пред започнување со имплементација. Некои од организациските членови ќе ги прифатат промените. Некои ќе ги иницираат, но некои ќе ги игнорираат или едноставно ќе им се противат.

Процесот на промени ќе биде под закана на лицата кои ги игнорираат или се противат на предложените промени. Мора да ги знаеш тие лица. Некои од причините на отпорот може да биде прво подобрување на процесот кој треба да се имплементира, но со некои ќе треба да се справиш пред самиот процес доколку сакаш процесот да успее.

#4 Не ги отфрлај изворите на организациските промени од било каде

Извори на организациски промени може да бидат било каде внатре или надвор од организацијата. Ќе мора да ги отвориш очите, да го подобриш слушањето и да следиш се што се случува околу тебе. Се може да биде трансформирано во корисни сигнали кои ќе ти кажат што треба да се промени во твојот бизнис доколку сакаш да останеш на вистинскиот пат.

#5 Не заборавај дека твојот бизнис има моќна околина

Една од темелните основи е претпоставката дека секој бизнис функционира во многу моќна надворешна околина. Таа околина влијае на секој аспект на твојот бизнис. Таа околина не ти дава можност да останеш тивок, туку постојано ти врши притисок да промениш нешто доколку сакаш да останеш во динамична рамнотежа со неа.

Мора да ги следиш промените во околината, и веднаш да се прилагодиш согласно тие промени. Тие промени ќе станат реалност, без разлика дали ти сакаш или не.

#6 Не избегнувај да го прославиш успехот со твојот тим

Успехот на процесот на промени не зависи само од тебе како еден претприемач или менаџер. Целиот тим кој работи за тебе е одговорен за успехот. Понекогаш процесот може да биде доста болен за твојот тим. Веројатно тие повеќепати се нашле себеси во позиција да одлучуваат дали да продолжат или да запрат. Но, доколку процесот успее, тоа значи дека секој го дал максимумот за тој успех.

Од друга страна знаеш дека завршување на еден процес на промени не значи и запирање со промени воопшто. Постојат и други процеси кои ќе треба да се имплементираат. Доколку сакаш да продолжиш со успехот базиран на поддршката од вработените, ќе треба секој успех да го прославиш со нив.