post

10 Начини да ги Задржите Најдобрите Вработени

Дали сте загубиле некој солидно вешт вработен во Вашиот бизнис? Зошто си одат, кога Вие инвестиравте толку многу пари и знаење во него? Дали е тоа заради повисока плата или заради тоа што Вашиот бизнис не ги третира на вистински начин највредните ресурси – вработени?

Вработените претставуваат срце на бизнисот. Можете да имате добри, но исто така и лоши вработени. Но, опасноста е што добрите вработени може да ве напуштат. Ова е губиток за бизнисот како целина и секако претприемачот мора да најде нови вработени што секако не е лесно тие нови да бидат квалитетни.

Employees1 Слика: FreeDigitalPhotos.net

Додека за оние лошите воопшто не ве интересира, за оние добрите и тоа како ќе бидете заинтересирани бидејќи ќе го ослабнат Вашиот бизнис во многу аспекти.

Една реалност кај малите бизниси е дека вработените порано или пак подоцна си заминуваат. Но, интересно е што вработените со слаби вештини ќе сакаат да се сокријат и останат засекогаш во бизнисот. А, од друга страна оние добрите и вештите ќе ве напуштаат. Доколку оваа реалност продолжи без да се сопре ќе продолжите да ги губите квалитетните вработени, а во исто време ќе го зголемувате бројот на не вешти вработени. Оваа состојба ќе ја намалува бизнис потенцијалната енергија складирана во вештите вработени со што ќе се намали и целокупната бизнис потенцијална енергија на Вашиот бизнис.

Зошто квалитетните вработени си одат?

Постојат повеќе причини зошто вработените го напуштаат бизнисот.

Една од најголемите причини е што тие не воспоставуваат добра бизнис и приватна релација со бизнисот, претприемачот или пак менаџерот.

Друга причина е што тие не се задоволни со платата која што ја добиваат за работата која ја сработуваат.

Како причина може да биде и самата работна околина во која што работат и која што не ја поднесуваат.

Ако продолжиме понатаму ќе видиме дека постојат премногу причини.

Вие како еден претприемач мора навремено да реагирате и да го спречите заминувањето на вештите и квалитетните вработени во Вашиот бизнис.Ова е една од најважните работи на претприемачите и на менаџерите.

10 Начини да ги задржите наjдобрите!

  1. Кога избирате вработени за Вашиот бизнис, размислете два пати пред да одлучите.
  2. На квалитетните понудете им повеќе пари, а на неквалитетните намалете им ја платата. Да бидеме реални, парите се најголемиот мотивациски фактор за секој вработен. Зошто лошите и добрите момци да бидат на исто ниво. Не е фер!
  3. Бидете лојални кон нив во добрите денови и тие ќе бидат лојални кон вас и Вашиот бизнис во лошите денови.
  4. Помогнете им да ја завршат работата на правиот начин од прв пат.
  5. Обидете се со ветување дека ќе ги платите повеќе кога Вашиот бизнис ќе излезе од „лошите“ денови.
  6. Бидете искрен со нив.
  7. Наградувајте за квалитетно завршената работа иако наградата може да биде само некој добар и пофален збор. Развијте план за бонуси бидејќи секој сака бонуси. Користете ги бонусите како вид на награда за најдобрите вработени.
  8. Дајте им слободни денови кога бараат и прашајте за дополнителна работа кога на Вас ви се потребни.
  9. Размислувајте за работни места со работникот во умот. Работните места за кои вработените немаат познавање или пак здодевни работни места можат да предизвикаат отпор кај вработениот. Распределувајте вработени на работни места за кои тие имаат знаење, а од друга страна обидете се да ги дизајнирате работните места така што воопшто да не бидат здодевни.
  10. Нагласувјте ја тимската работа. Понекогаш односите помеѓу членовите на тимот се помоќни отколку другите односи во бизнисот. Тимско размислување може да има големо влијание на членовите на тимот.

Зошто е важно спречување на заминување на најдобрите?

Прво, Вашите вработени се најважниот дел од Вашиот бизнис. Тие се пред Вашиот производ или услуга, пред технологијата, пред се друго во бизнисот. Без нив ништо нема да биде реалност. Без вработени, ќе немате производи или услуги, нема да можете да ја користите технологијата и нема да можете да ги изведете бизнис активностите.

Од друга страна во секој вешт вработен вие имате инвестирано време и ресурси и кога тие си заминуваaт порано отколку што сте успеале да си ја повратите инвестицијата ќе мора да го започнете повтoрно целиот процес. На ваков начин губите време и секако пари кои ги инвестирате во вработените. Вашето време и пари претставуваат бизнис елементи кои имаат складирано голема бизнис потенцијална енергија.

post

Станав Менаџер и Сега Што?

Оваа е еден од почестите проблеми кој се јавува кај луѓето при напредување во кариерата. Секој сака да напредува за да стане некој менаџер. Нормално, во некои нормални услови напредувањето се одвива постепено: прволиниски, среден и на крај врвен менаџер. Но, понекогаш може и да се случи и да се рипне по некое скалило, што сметам дека не е пожелно.

Она што сакам да го истакнам со овој напис е дека напредувањето треба да се разграничи уште кај оној кој станува менаџер. Основното разграничување кое треба да се направи е:

  • Потребни вештини за понатаму
  • Потребни активности за понатаму.

Разграничувањето се однесува за тоа да се “заборави” досегашната работа и да се започне со една сосема друга работа која се нарекува менаџмент.

Кога велам да се заборави не мислам на комплетно бришење од меморија, туку едноставно досегашното знаење за новата работа нем да биде толку потребно.

Вештини

Вештините претставуваат дел од трет слој за успех на еден претприемач. Тука веќе опфативме повеќе детали за вештините.

Менаџерите треба да располагаат со три типа на вештини:

  • технички
  • концепциски и
  • хуманитарни.

Техничките вештини се оние вештини кои ни овозможуваат да ја извршуваме досегашната работа. На пример, еден програмер во IT компанија има програмерски вештини.

Концепциските вештини се веќе нешто друго. Еден човек со технички вештини е вешт да работи нешто со своите раце и нормално од неговите раце да зависи само неговата работа. Концепциските вештини пак значат вештини при кои одредени акции на работно место каде што се надмоќни овие вештини предизвикуваат последици и на други работни места. Ова значи дека концепциските вештини претставуваат вештини за да се гледа бизнис целината.

Хуманитарни вештини се вештини за работа со луѓе. Секое рботно место е поврзано со работење со други луѓе. Интеракција, комуникација, групи, одделенија, колеги… Сето тоа се секојдневни зборови во еден бизнис свет за еден вработен.

Хуманитарните вештини мора секој да ги има. Концепциските вештини се најпотребни за менаџерските нивоа. Колку е повисоко менаџерското ниво во хиерархијата на бизнисот, толку поголеми концепциски вештини се потребни за претприемачот. Додека техничките вештини се најпотребни за прволиниското ниво и секако најниското ниво во бизнисот.

Значи, кога напредувате во кариерата (добивате менаџерска позиција) не можете да останете само со истите вештини во Вашата секојдневна работа. Ова значи дека ќе треба:

  • Дел од техничките вештини да ги оставите настрана,
  • Тој дел од техничките вештини да го надополните со концепциски вештини.

Активности

Мислам дека веќе е јасно дека освен вештините треба да се остават на страна и досегашните активности и однесување во работата.

Вештината не постои сама за себе туку таа вештина се користи во секојдневните активности. На пример, програмерот со програмерски вештини, нормално е да програмира и само програмира доколку е на почетното скалило од хиерархијата на бизнисот.

Кога тој програмер ќе стане раководител (менаџер), дури и прволиниски менаџер, веќе основната активност нема да му биде програмирање туку менаџирање (управување).

Ова значи дека веќе кога ќе станете менаџери ќе ви бидат потребни повеќе концепциски вештини и вашите задачи ќе бидат да:

  • Планирате
  • Организирате
  • Раководите
  • Мотивирате
  • Екипирате и
  • Контролирате.

Ова се основните функции на менаџментот. Значи сега веќе ќе ги планирате активностите на службата која ја водите, при тоа ќе ги организирате, раководите и мотивирате вработените во таа служба. Од друга страна ќе размислувате и за екипирање на службата со квалитетни вработени. И секако на крајот ќе ја контролирате работата на сите вработени во таа служба.

post

Демографија VS Активности на потрошувачите

Малку за анализа на потрошувачите.

Суштината на успех на еден бизнис е познавање на сопствените потрошувачи како и познавање на потрошувчи кои сеуште не се станати потрошувачи за бизнисот. Затоа и се развиваaт CRM (Customers Relationship Management) системи. Доволно познавање на потрошувачите му овозможува на еден претприемач да ги избере соодветните маркетинг и продажни стратегии за тој потрошувач.

Демографија наспроти активности на потрошувачи

Како што се прави сегментација на пазарот врз основа на одредени пазарни карактеристики треба да се направи и сегментација на потрошувачи, при што ќе идентификуваме неколку сегменти (групи) на потрошувачи.

Секој од потрошувачите во истата група има исти или слични карактеристики, додека еден потрошувач од една група и друг потрошувач од друга група имаат различни карактеристики.

Потрошувачи кои треба да се познаваат

Кога станува збор за потрошувачи, еден претприемач и еден бизнис треба да препознае 3 вида на потрошувачи:

  • Оние кои купуваат често. Ова се потрошувачи кои минимум еднаш во еден до шест месеци купуваат од Вашиот бизнис.
  • Оние кои купувале, но не се знае дали повторно ќе купат. Ова се нови потрошувачи кои купиле еднаш, но ги нема повеќе од 6 месеци да го повторат купувањето.
  • Оние кои воопшто не почнале да купуваат – потенцијални. Ова се потрошувачи кои сеуште не дошле да купат нешто од Вашиот бизнис.

Оваа класификација како што можете да забележите претставува класификација врз основа на одредена активност (однесување) на потрошувачот во одреден временски период. Тоа однесување е врз основа на тоа колку пати купувале нешто во одреден временски период.

Понатаму класификацијата може да се направи и врз основа на тоа за кој износ на пари е купувањето од оние кои што веќе купувале. Дали купуваат скапи или ефтини производи?

Демографски карактеристики на потрошувачи

Кога станува збор за демографија на потрошувачите можеме да ги класифицираме на различни начини.

Согласно полот потрошувачите може да бидат:

  • Жени и
  • Мажи.

Доколку се работи за B2B ќе имаме:

  • Мали бизниси
  • Средни бизниси и
  • Големи бизниси.

Согласно возраста можете да ги класифицирате на пример:

  • До 15 години
  • Од 15 до 20 години
  • Од 20 до 30 години
  • Од 30 до 40 години
  • Од 40 до 50 години
  • Над 50 години

Понатаму може да се класифицираат и согласно регионот во кој живеат или пак градовите во кои што живеат.

Како што можете да забележите било што што на некој начин ги опишува демографските карактеристики на потрошувачот може да се искористи во сегментација или класификација на истите.

Демографски карактеристики VS Активности

Демографските карактеристики се важни за добро познавање на Вашите потрошувачи, но на еден претприемач ништо не му кажуваат.

На пример, што ќе ви значи следниов исказ:

70% потрошувачи се мажи, со старост од 30 до 40 години, со приход од 40.000,00 до 50.000,00 денари месечно. 30% се мажи од 20 до 30 години, со приход од 20.000,00 до 30.000,00 денари месечно.

За мене нема никакво значење освен дека најголемиот сегмент на кој бизнисот успева е оној првиот.

Доколку во горниот пример додадам и однесување на таа група на потрошувачи ќе биде нешто сосема друго. да го видиме новиот исказ:

70% потрошувачи се мажи, со старост од 30 до 40 години, со приход од 40.000,00 до 50.000,00 денари месечно кои купуваат минимум еднаш месечно во просек од 5.000,00 денари. Додека 30% се мажи од 20 до 30 години, со приход од 20.000,00 до 30.000,00 денари месечно кои купуваат еднаш во 6 месеци или пак воопшто не се враќаат во просек од 2.000,00 денари.

Ова веќе ќе значи нешто за секој претприемач. На пример,

  • Поголемо внимание во однос на маркетингот ќе посветам на првиот сегмент бидејќи знам дека полесно ќе го придобијам тој сегмент.
  • Ќе се обидам да воведам производи за помладата популација согласно нивните приходи.
  • Ќе определам посебни продажни тактики во однос на двата сегменти.

Забележувате дека од вториот исказ излегуваат конкретни чекори за еден претприемач и еден бизнис.

Значи, демографијата е важна, но без комбинација на таа демографија со однесување или специфични активности на таа група на потрошувачи, таа демографија нема никакво значење за претприемачот.

Имам видено претприемачи кои целосно се посветуваат на демографијата во сегментцијата, па едноставно се вртат во круг и не знаат понатаму што со тие податоци. Затоа немојте да ја правите таа грешка, бидете ефикасен и ефективен.

post

Внимание, Репутација, Доверба

Овој напис претставува едно мое видување на три многу важни елементи за секој бизнис и претприемач. Тие елементи се внимание, репутација и доверба.

Сите три елементи се важни но во исто време еден од нив е поважен а еден од нив е и најважен, а сепак би требало да функционираат како целина. Мислам, еден без друг елемент не можат да опстојат или ако опстојат успешноста на бизнисот нема да биде толку голема како доколку сите три елементи се присутни и интегрирани во самиот бизнис.

Внимание, Репутација, Доверба

Циклус на Внимание, Репутација и Доверба за еден бизнис

Соодветно внимание, репутација и доверба претставуваат основа за успешност на секаков тип на бизнис. Основната задача на еден претприемач е да ги изградат и имплементираат сите три елементи.

Внимание

Прво од трите елементи го избрав вниманието не дека е најважно, туку бидејќи е најлесно да се постигне и бидејќи претставува првиот чекор во овој циклус.

Вниманието има за цел да ги привлече потенцијалните потрошувачи кон бизнисот. Може да се постигне бесплатно во стил на вирозни маркетинг кампањи или препорака од уста до уста или пак да се плати за истото преку користење на различни маркетинг средства.

Многу е потешко да се постигне бесплатното внимание бидејќи за истото се потребни останатите два елементи од насловот: репутација и доверба. Ова е поради фактот што без да имаме соодветна репутација и без да луѓето имаат доверба во нашиот бизнис не можеме да очекуваме дека истите ќе го шират вниманието кон нас.

Еден вид на привлекување на внимание преку маркетинг средство кое го опфативме на претприемач е Piggy-Backing Маркетинг.

Репутација

Вториот елемент кој може слободно да кажам дека по хиерархија е поважен и секако елемент кој многу потешко се стекнува претставува репутација.

репутацијата ја нагласивме и како посебно маркетинг средство во Репутација – Маркетинг средство 34. Во тој напис од дефиницијата за репутација извлеков дека репутацијата претставува:

  • Јавно мислење. Какво мислење има јавноста за Вас како претприемач и за Вашиот бизнис?
  • Социјална евалуација. Како заедницата ве евалуира Вас како претприемач и Вашиот бизнис?
  • Идентитет дефиниран од страна на други луѓе. Каков идентитет ви даваат другите луѓе?

Бидејќи согласно ова репутацијата претставува едно мислење на некој друг затоа е и потешко да се влијае директно од страна на претприемачот. Иако, не е и неможно.

Не е неможно, бидејќи сепак постојат различни медиуми кои влијаат на јавното мислење. Па така доколку дизајнирате кампања за брзо градење на репутација ќе платите на влијателни медиуми врз јавното мислење и вашиот бизнис ќе се појави на истите со што многу бргу Вашата репутација ќе се зголеми. Иако, е неморално и неетички, бидејќи сепак се работи за измама на јавноста преку креирање на јавното мислење, но целта ги оправдува средствата. Поморално и поетички е доколку биде нагласено дека таа објава е спонзорирана. Доста бизниси во Македонија ја имаат искористено оваа метода на градење на репутација.

Доверба

Последниот елемент, иако последен сепак најважен во овој циклус претставува довербата. Довербата е единствениот елемент кој не се купува со пари, туку едноставно се стекнува. На доверба не може да се влијае преку посредници довербата се гради кај самиот субјект во однос на нешто.

Довербата е таа која обезбедува повторувањ ена бизнисот што обезбедува долгорочна стабилност на еден бизнис. Затоа и целта на еден претприемач е да изгради доверба кај потенцијалните и сегашните купувачи за неговиот бизнис.

Довербата е таа која ќе ја зголеми репутацијата на секој бизнис. Довербата е таа која ќе го привлече вниманието на нови потенцијални потрошувачи. Значи градењето на довербата е нешто што треба да претставува стратешка цел за еден претприемач.

Да земеме еден пример.

Со помош на некое маркетинг средство ќе привлечеме внимание за нашиот бизнис, што претставува краткорочна цел. Потенцијалниот купувач ќе стане купувач во најдобар случај. Доколку успееме уште од првиот контакт да ја градиме довербата во неговите очи тој ќе се врати и ќе купи. Доколку не успееме да ја вградиме довербата или ќе треба постојано да му го привлекуваме вниманието или тој ќе се сврти кон друг бизнис кој ќе му го привлече вниманието.

Ист пример сценарио 2:

Потенцијалниот купувач на кој ќе му го привлечеме вниманието ќе се обиде да го провери нашиот бизнис и тоа преку репутација. Доколку се увери дека бизнисот нема репутација приказната завршува и средствата потрошени за привлекување на внимание се фрлени во вода.

post

Како да се справите со негативен фидбек?

Негативен фидбек е нешто вообичаено за секој бизнис или пак претприемач. Еден бизнис не може за сите да биде добар и едноставно да биде перфектен. И големи и успешни компании грешат и имаат негативен фидбек. Затоа и нормално е да се има негативен фидбек од страна на клиентите, корисниците, купувачите…

Негативен фидбек

Негативен фидбек и одговор на претприемачот

Но, она што е многу поважно е како еден претприемач или пак еден бизнис како организациски систем ќе се справи со тој негативен фидбек.

Овој напис беше испровоциран од Google и проблемите кои настапија во однос на приватноста со нивниот нов социјален медиум наречен Google Buzz.

Имено, Google го лансираше Google Buzz на 9-ти Февруари оваа година и веќе од 10-ти февруари целиот интернет свет кој на некаков начин објавува содржина пишуваше за дупката во однос на приватноста која ја има Google Buzz. Овие проблеми се појавуваат затоа што Google Buzz функционира како додаток на Gmail каде веќе постои одредена комуникација меѓу корисниците и автоматски тие конекции стануваат дел од Buzz. Од друга страна целта на Google е јасна 176-те милиони корисници на Gmail да бидат корисници и на Buzz, наспроти 75 милиони на Twitter. Она што е целта на овој напис е фидбекот од корисниците. Она што ја правии оваа компанија голема е тоа што компанијата и тимот кој работи на Buzz веднаш спроведуваат измени на системот и мислам дека сеуште менуваат, така да повеќето првооткриени дупки се веќе затворени.

Забележувате дека фидбекот што го добива компанијата е негативен, но негативен во позитивна смисла на зборот. Во позитивна смисла на зборот бидејќи кога навистина е пронајден проблем, тој мора да биде решен. Од друга страна негативен фидбек не мора да биде и позитивен за компанијата во ваков случај туку може да биде и штетен.

Три вида на негативен фидбек

Се обидов да го сублимирам негативниот фидбек, барем од она што јас сум го искусил во три основни вида на негативен фидбек:

  • Постои некаков проблем кој бара решение.
  • Едноставно став или мислење.
  • Едноставно сакаат да направат штета.

Вистински проблем

Кога постои вистински проблем негативниот фидбек во голем број на случаи претставува еден конструктивен или добронамерен фидбек. Овој фидбек ги открива проблемите и бара решение на тие проблеми. Потребно е да се поттикнува еден ваков негативен фидбек.

Сопствен став или мислење

Сите ние си имаме наш сопствен став или пак мислење за нешто. Тоа наше мислење или став за нешто може да претставува негативен фидбек за тоа нешто. Додека за првиот негативен фидбек – проблем имавме доказ дека навистина постои проблем, со овој тип на негативен фидбек немаме воопшто доказ туку едноставно еден субјективен став или пак мислење.

Штеточини

Како третиот негативен фидбек ги групирав таканаречените „штеточини“. Овие нити откриле некаков проблем, а ниту пак имаат некаков став или пак мислење на она на што сакаат да му нанесат штета со негативен фидбек. Едноставно овие луѓе или се полнат со енергија кога ќе направат штета некому или пак се платени (можеби од конкуренција) да шират негативен фидбек или пак било што друго што ги тера да бидат „штеточини“.

Како еден претприемач да се справи со негативниот фидбек?

Сега знаеме дека секогаш ќе постои негативен фидбек и прв совет за еден претприемч е ништо да не сфаќа лично. Ги знаеме и трите вида на негативниот фидбек. Па затоа следното што ќе треба да го направи еден претприемач е:

  • Да воспостави систем за следење на фидбек од потенцијални и тековни потрошувачи.
  • Да одговори на секој фидбек без разлика на тоа дали е позитивен или негативен.

Справување со негативниот фидбек значи одговарање на истиот. Кога ќе знаеме кој фидбек во која група на негативен фидбек спаѓа ќе можеме лесно да одговориме. Еве како би изгледал одговорот на еден претприемач:

  • Проблем – Решавање на проблем во најбрз можен рок и известување на оној кој го дал фидбекот.
  • Став или мислење – Обид да се смени тој цврст став или мислење со приложување на докази
  • Штеточини – Културен одговор и обид да се смени однесувањето
post

Бизнис Потенцијална Енергија VS Бизнис Перформанси

Ќе продолжам со образложување на методологијата за користење на бизнис потенцијална енергија во подобрување на перформансите на бизнисот.

Целта на овој напис е да даде одговор на врската помеѓу бизнис потенцијалната енергија (терминот кој јас го сковав пред повеќе од една година) и перформансите на бизнисот.

Бизнис потенцијална енергија наспроти перформансите на бизнисот

Што претставуваат перформансите на бизнисот?

Првин би тргнал со перформансите на бизнисот. Перформансите означуваат можност на еден индивидуалец или пак група да ги исполни саканите таргети, поставени од самиот себеси или од некој друг (на пример менаџерот). Додека:

Бизнис перформансите ќе бидат можности на еден бизнис да ги оствари поставените цели.

Од друга страна, перформансите претставуваат мерка на остварени резултати. Доколку оствариме поголеми резултати ќе имаме и поголеми перформанси и обратно со помали или никакви резултати, слаби или никакви перформанси.

Влијание на бизнис потенцијалната енергија врз перформансите

Влијанието на оваа енергија врз перформансите има линеарна функција, а тоа значи:

  • Поголема бизнис потенцијална енергија, поголеми бизнис перформанси и
  • Обратно, помала бизнис потенцијална енергија, помали перформанси на бизнисот.

Но, тука недостасува нешто, а тоа нешто е трансформацијата на потенцијалната енергија во кинетичка енергија. Без кинетичка енергија со која бизнисот ќе извршува работа, перформансите нема да се зголемат. Поради тоа, оваа линеарност не може да ја земам како исправна или точна.

Затоа мора да се вклучат следниве фактори кои влијат на перформансите на бизнисот:

  • Бизнис потенцијална енергија (BPE).
  • Број на круцијални бизнис елементи (N). Ова се бизнис елементите кои содржат бизнис потенцијална енергија за кои пишував во 10 Основни елементи со потенцијална енергија.
  • Веројатноста за трансформација на бизнис потенцијалната енергија во кинетичка енергија (P).

Сега кога ги имам факторите кои влијаат на перформансите, ќе можеме да ја утврдиме зависноста помеѓу бизнис потенцијална енергија и перформансите.

Прво, оваа зависност има експоненцијална функција. Во експоненцијалната функција како што расте еден елемент ќе расте и целата функција. Оваа функција ќе биде:

Каде:

  • BP = Бизнис перформанси
  • P = Веројатноста за трансформација на бизнис потенцијалната енергија во кинетичка енергија и
  • N = Број на круциални бизнис елементи кои ќе ги избереме за да ја зголемиме таа потенцијална енергија.

Со оваа формула ги покриваме сите круциални фактори кои влијаат на перформансите. Од друга страна ќе бидеме во можност експоненцијално да ги зголемиме перформансите на бизнисот доколку ги зголемиме потенцијалната енергија, круцијалните елементи на бизнисот и веројатноста за трансформација на таа потенцијална енергија во кинетичка енергија.

Илустративен пример

Можете да го забележите следново од она што досега го изложив:

  • Вредноста на бизнис потенцијалната енергија (BPE) ќе се движи од 0 до 1 (0 < BPE < 1)
  • Бројот на круцијалните елементи (N) ќе биде позитивен број поголем од 0 (N > 0) и
  • Веројатноста за трансформација на BPE во кинетичка енергија (P) ќе биде веројатност што исто така согласно математичките принципи ќе биде од 0 до 1 (0 < BPE < 1).

Да видиме еден пример:

Пример 1 Пример 2 Пример 3 Пример 4 Пример 5
BPE 0 1 0 1 0,8
N 5 5 10 10 10
P 0,5 0,5 1 1 0,7
BP 0 2,5 0 10 3,53



Можете да забележите во првиот и третиот екстремен случај каде бизнис потенцијалната енергија е 0, наспроти другите елементи кои се добри, перформансите исто така ќе бидат 0. Кога бизнис потенцијалната енергија е максимална 1 тогаш во целост ќе ги искористиме останатите елементи во формулата за да имаме максимални бизнис перформанси.

post

10 Основни Елементи со Бизнис Потенцијална Енергија

Доколку сакате да ја зголемите бизнис потенцијалната енергија на Вашиот бизнис ќе треба да започнете со определување на бизнис елементите кои имаат бизнис потенцијална енергија како прв чекор во подобрување преку бизнис потенцијална енергија.

Во бизнисот може да постојат неограничен број на бизнис елементи кои може да бидат и различни системи за кои пишував во Системски приод во бизнисот – Бизнис систематизирање. Но само 20% од истите елементи се важни за функционирањето на бизнисот, односно се важни за добрите резултати за бизнисот. Останатите 80% се елемнтите кои едноставно служат за одржување на тековните состојби како што е администрирање. Тоа е 80/20 правило.

Кои се круцијалните бизнис елементи кои имаат бизнис потенцијална енергија?

Ќе мора да започнете со круцијалните бизнис елемнти бидејќи сигурно не сакате да гогубите Вашето време на елементите кои не се критични или каде подобрувањата би биле сосема мали. Круциалните елементи се бизнис елементи кои може да имаат складирано голема бизнис потенцијална енергија во себе која пак може да биде трансформирана во кинетичка енергија која ќе го турка бизнисот низ патот на успехот.

По мое мислење, ова се 10-те најкруцијални бизнис елементи кои имаат бизнис потенцијална енергија за кои можете уште веднаш да започнете да размислувате за подобрување.

1. Бизнис идеја

Се започнува со претприемачот и неговата идеја. Тоа е првата потенцијална енергија на новиот бизнис. Една работа која треба да се запомни е дека следниот елемент – бизнис планот може да ја конвертира таа потенцијална енергија во успешен бизнис.

2. Бизнис план

Бизнис планот во исто време е конвертер на потенцијалната енергија во идејата во успешен бизнис и има своја потенцијална енергија која може да дведе до развој на бизнисот. Со добар план и исполнување на се она што е испланирано ќе ја зголемите севкупната потенцијална енергија на бизнисот.

3. Знаење на претприемачот

Знаењето е нешто што постојано може да внесува свежа потенцијална енергија во бизнисот. Како и да знаењето како извор на потенцијална енергија може да биде потрошено. Ќе мора постојано да внесувате ново знаење за постојано да ја обновувате таа енергија и за да одговорите на новите барања во околината. За знаењето повеќе опфатив во Знаење и креативност – Втор слој за успех на претприемачот.

4. Производи и услуги

Секој бизнис продва некаков вид на производи или услуги. Доколку продвате нешто што ги задоволува потребите на потрошувачите, тогаш тие производи и/или услуги ќе имаат поголема бизнис потенцијална енергија. Доколку пак производите и/или услугите не ги задоволуваат моменталните потреби на потрошувачите овој елемент ќе има слаба или пак воопшто ќе нема потенцијална енергија. Доколку квалитетот е одличен и бизнис потенцијалната енергија ќе биде на високо ниво.

5. Залихи

Залихите претставуваат елемент кој може да ја исцица потенцијалната енергија во готовината што ја има Вашиот бизнис. Но, од друга страна, залихите содржат потенцијална енергија во вид на производите при што носи сигурност за константна продажба. Доколку сакате да ја зголемите бизнис потенцијалната енергија складирана во залихи и во исто време да го намалите трошењето на таа енергија преку готовината ќе мора да го најдете оптималното ниво на залихи. За ова повеќе во 80/20 правило.

6. Готовина

Готовината е најважен елемент во кој има складирано потенцијална енергија. Со готовината ќе можете да ја зголемите бизнис потенцијалната енергија на други елементи како знаењето, производите или услугите, маркетинг, продажен тим итн. Доколку немате готовина севкупната потенцијална енергија на Вашиот бизнис ќе биде на едно доста ниско ниво.

7. Маркетинг

Маркетингот е еден од елементите кои ќе донесе свежа потенцијална енергија во бизнисот преку зголемување на бројот на потрошувачите. Со висока потенцијална енергија во маркетингот ќе успеете да генерирате поголема продажба при што ќе се зголеми енергијата во продажниот тим и во готовината.

8. Продажен тим

Членовите на Вашиот продажен тим се во директен контакт со Вашите потрошувачи. Колку е поголема потенцијалната енергија складирана во Вашиот продажен тим, толку ќе биде поголема продажбата при што ќе се подобри готовинскиот тек во бизнисот.

9. Цени

Доколку не ги поставите Вашите цени да ги покријат сите трошоци на бизнисот и донесат профит, Вашата бизнис потенцијална енергија ќе биде на ниско ниво. Можете да прочитате повеќе во Намалување на цени – Бизнис дилема и Поставување на цена – Чек листа.

10. Локација

Големината на сообраќајот и продажбата ќе зависат од локацијата на многу бизниси кои се занимаваат со директна продажба на купувачите. Од друга страна за производствените бизниси локацијата ќе ги определува и трошоците за транспортот. Така да добро би било и локацијата да ја вклучите во анализата на потенцијалната енергија заради подобрување.

Што понатаму?

Едноставно можете да започнете со:

  • Размислете за бизнис потенцијалната енергија во овие елементи на бизнисот.
  • Најди најмалку едно можно подобрување на секој од елементите.
  • Имплементирај ги подобрувањата.
  • Повторувајте го целиот процес постојано.

Успешноста ќе ви биде загарантирана.

post

Дизајн на Профитен Модел за Вашиот Бизнис

Дали имате прецизно дефиниран профитен модел за Вашиот бизнис? Доколку одговорот е не, би требало веднаш да започнете со дизајнирање на еден таков профитен модел.

Бизнис профитен модел

Вашиот бизнис има за цел да прави профит, односно од целата продажба во денари остварена преку купување на потрошувачите кога ќе се одземат трошоците на работење на бизнисот да остане позитивен број во денари.

Забележувате дека во центарот на вниманието е потрошувачот, бидејќи тој е оној кој остава пари во Вашиот бизнис. Основниот закон за профитабилност на еден бизнис е:

Повеќе потрошувачи + Повеќе пари од секој потрошувач = Поголем бизнис профит

Па од тука може да се каже дека Вашиот бизнис профитен модел треба да одговори на две прашања:

  • Што Вашиот бизнис ќе прави за да стекне нови потрошувачи?
  • Што Вашиот бизнис ќе прави за да ја зголеми вредноста која ќе ја добива од секој потрошувач?

За да успее бизнисот Вие како претприемач ќе мора да дизајнирате и да следите Ваш уникатен профитен модел. Профитниот модел за секој бизнис е уникатен и може да биде едноставно и Ваша конкурентска предност доколку дизајнот е навистина уникатен. Во основа профитниот модел не претставува ништо друго туку една стратегија која треба Вашиот бизнис да го направи профитабилен.

Стекнување на нови потрошувачи

Што е она што ќе го правите за стекнување на нови потрошувачи?

Секој бизнис започнува барем со еден потрошувач на производите и/или услугите кои ги нуди Вашиот бизнис. Вашата цел како претприемач е постојано да го зголемувате тој број на потрошувачи. Во овој дел од Вашиот профитен модел ќе треба да ги наведете сите тактики кои Вашиот бизнис ќе ги користи за оваа цел, а потоа тактиките да ги специфицирате во вид на активности со одговорно лице и рок на извршување на истите. На пример, некои тактики за стекнување на нови потрошувачи може да бидат:

  • Производот и/или услугата
  • Маркетинг средствата кои ќе ги применувате
  • Продажниот процес

Многу бизниси ги делат своите производи на предни и позадински производи. Предни се оние кои имаат за цел да внесат потрошувачи во Вашата продажна инка, додека позадински се оние поскапите и повредните и имаат за цел да ја зголемат профитабилноста на Вашиот бизнис. Од друга страна квалитетот, сервисот, услугата, гаранцијата и други елементи на производот и/или услугата само може да привлекуваат повеќе потрошувачи.

Маркетинг средствата се основата која го распространува гласот за Вашиот бизнис и Вашите производи и/или услуги. Кои маркетинг средства, кога и како ќе се спроведат?

Од продажниот процес зависи дали еден потенцијален порошувач ќе стане потрошувач. Па вистинските активности и одговорности ќе бидат од голема помош за успешно завршување на тој процес.

Зголемување на вредноста на потрошувачите

Второто прашање кое профитниот модел треба да го одговори е како да ја зголеми вредноста од секој потрошувач. Во повеќе наврати на претприемач пишувавме за некои тактики кои може да се искористат во овој дел како Cross-selling, Upselling, Firesale за кои можете да прочитате во бизнис поимникот на претприемач. Ова се само дел од тактиките кои ќе можете да ги примените тука.

Она што го напоменавме како тактика во привлекување на потрошувачи во однос на производи и/или услуги може да продолжи тука со позадински производи кои ќе имаат за цел да го ја зголемат вредноста на еден потрошувач за ваш бизнис. Имено, со предните производи кои се поевтини привлекувате внимание и ги користите заради постојан готовински тек во Вашиот бизнис, а потоа нудите висококвалтетни и уникатни производи и услуги со кои ја зголемувате глобалната профитабилност на Вашиот бизнис.

Кои тактики ќе ги искористите во Вашиот профитен модел ќе зависи од Вас како претприемач и Вашата креативност и чувство за бизнисот. Секако ќе треба и доволно добро да ги познавате Вашите идеални потрошувачи.

Целта е откако ќе го прочитате овој напис да имате пишана стратегија за ваш профитен модел која ќе ја имплементирате, следите и постојано подобрувате. Се за успешноста на Вашиот бизнис.

post

Важноста на брзи одлуки

Во претходниот напис навлегов во еден различен пристап на претприемач визнионер и претприемач опортунист (кој постојано бара можности, но никогаш не ги наоѓа).

Зошто опортунистот не ги наоѓа, или подобро кажано претвора најдените можности во квалитетен бизнис?

Затоа што постојано е зафатен со барање на нови можности и кога ќе најде некоја можност не носи одлука за искористување на истата.

Донесување на брзи одлуки

Зошто се потребни брзи одлуки?

Не можеме да донесуваме одлука и тој процес да трае вечно. Претприемничкиот живот и водење на успешен бизнис бара брзи одлуки бидејќи наместо Вас во секој момент слична таква одлука може да донесе конкуренцијата.

Како најважни причини зошто треба брзо да одлучувате би ги издвоил следниве:

1. Брзо искористување на пронајдени можности

Вие ќе откриете некоја можност, но таа можност нема да има вредност за Вас и за вашиот бизнис доколку не ја искористите. Затоа ќе треба брзо да одлучите како да ја искористите таа можност и кои активности кој ќе треба да ги спроведе за искористување на таа можност.

2. Брз одговор на барања и потреби на потрошувачите

Вие како претприемач и Вашиот бизнис постоите за да ги задоволите барањата и потребите на Вашите потрошувачи. Доколку откриете кои се промените на нивните барања и потреби не можете вечно да одлучувате за тоа како да ги задоволите бидејќи место Вас конкуренцијата ќе го направи тоа. Затоа е потребна брза одлука.

3. Брз одговор на активностите на конкуренцијата

Како што Вие постојано спроведувате бизнис активности, така и Вашата конкуренција не мирува туку спроведува одредени бизнис активности врз основа на кои се борите на пазарот за привлекување на потрошувачите. Секој нивен чекор ќе бара Ваш контра чекор. Затоа треба брзо да одлучите за тоа кои ќе бидат Вашите контра активности и како ќе ги примените.

Брзина наспроти квалитет

Многу често се поставува оваа прашање. Како влијае брзината на одлучување врз квалитетот на одлуката?

Квалитетот на одлуката секако дека зависи од брзината на донесување на таа одлука. Така да слободно можеме да кажеме дек квалитетот на одлуката е функција од брзината на одлучување.

Квалитетна одлука = f(брзина на одлучување) каде поголема брзина значи помал квалитет и обратно

Ова е логично, но не и единствено. Едно нешто е сигурно, зад секоја добра и квалитетна одлука стојат информациите кои ги имаме и врз кои ја донесуваме одлуката. А одлуката ја донесуваме ние претприемачи и самата брзина зависи од нас. Колку повеќе информации имаме толку потешко ќе имаме брза одлука. Затоа брзината на одлучување претставува функција од информациите и претприемачот. Така да горното равенство ќе биде:

Квалитетна одлука = f(информации, претприемач)

Ќе се обидам накратко да влезам во оваа тајна на информации и претприемач како основа за брзината на одлучување.

Колку повеќе информации имаме ќе биде потешко донесувањето на одлуката од страна на претприемачот, односно ќе биде потребно повеќе време. Понекогаш никогаш нема да имаме доволно информации за донесување на одлука, па брзината на одлучување може да оди временски до бесконечност, односно воопшто да не донесеме одлука, што во овој случај не е добро. Ова е поради фактот што постојано времето ќе го трошиме на собирање на информации. Од друга страна информациите треба да се обработат за да бидат во форма преку која лесно и брзо ќе воочиме некои трендови и некои скриени трендови кои ќе бидат корисни за одлуката на претприемачот. Значи за квалитетни одлуки треба да имаме оптимална количина на информации во форма која дава можност за одредени проценки од страна на претприемачот. Така да нашата формула од погоре сега би изгледала вака:

Квалитетна одлука = f(f(оптимална количина на информации, форма), претприемач)

За да претприемачот успее да извлече квалитетни заклучоци од информациите претставени во соодветна форма ќе треба да има одредени способности за препознавање на трендови и од некомплетни информации. Велам некомплетни информации бидејќи нашата цел е да донесеме квалитетна одлука и тоа брзо. Затоа е потребна способноста за аналитичност. Така да квалитетна одлука за краток временски интервал ќе биде претставена со следнава формула:

Квалитетна одлука = f(f(оптимална количина на информации, форма), аналитичност на претприемачот)

Аналитичност како основа за брзи одлуки

Како што можете да забележите аналитичноста претставува способност на претприемачот врз основа на некомплетни информации да извлече заклучок за да донесе квалитетна одлука. Се смета дека оние успешните претприемачи донесуваат брза одлука а нивната сопствена сигурност за исправноста на одлуката која ја носат е 70%.

Карактеристиката на аналитичните луѓе е да имаат мозок кој брзо размислува и да гледаат во група на информации и податоци во која ќе забележат нешто што просечниот човек не може да го забележи. Знаењето е еден предуслов со кој еден претприемач може да биде аналитичен.

post

10 причини кои предизвикуваат губење на купувачи

Една од најголемите катастрофи за екој бизнис и секој претприемач е да започнат да ги губат сегашните купувачи. Сегашните купувачи секогаш мора да бидат во центарот на вниманието на претприемачот.

Причини за губење на купувачи

Дали овие грешки ќе ме чинат губење на моите купувачи?

Честопати сегашните купувачи се забораваат од страна на претприемачот бидејќи тој се насочува премногу кон привлекување на нови купувачи. Но, вистинскиот претприемач и и вистински моќен бизнис знае дека основата на успехот лежи во задржување на сегашните купувачи и во исто време привлекување на нови купувачи.

Затоа денес ќе се обидам да ги сублимирам најчестите 10 причини кои предизвикуваат губење на сегашни купувачи. Редоследот по кој се изложени овие причини нема влијание на важноста на причината.

1. Несоодветна комуникација

Начинот на комуникацијата како и средството кое се користи за комуникација играат голема улога во однесувањето на купувачите. Не можете да комуницирате со некој купувач преку факс доколку истиот нема факс туку користи mail. Не можете да користите друго ниво на јазикот за разбирање бидејќи купувачот нема да ве разбере. Барем денес постојат илјадници начини и илјадници средства за да изградите систем на квалитетна комуникација со сегашните купувачи, а исто така и потенцијалните купувачи.

2. Несоодветни услуги

Без разлика дали се продава производ или самата услуга постојат и дополнителни услуги кои купувачите очекуваат да ги добијат со купување на тој производ или пак услуга. Очекувањата за тие услуги можат да бидат различни, а сепак влијателни во повторното донесување на одлука за купување од еден бизнис. Некогаш и сосема мала работа која ќе биде претставена во вид на услуга или пак некое однесување може да биде пресудно. Затоа не го испуштајте.

3. Лоша ценовна политика

Цената претставува клучен фактор за одредени одлуки кои ги носи купувачот за во иднина. Доколку смета дека не го добил она што го платил секако дека нема да го повтори купувањето. Доколку пак смета дека цената е прениска за неговиот имиџ, нема да продолжи со купување од тој бизнис.

4. Непознавање на конкуренцијата

Често пати Вашите сегашни купувачи можат да бидат „украдени“ од Вашата конкуренција. Затоа доколку не ја познавате конкуренцијата, мислам на онаа „вистинската“ конкуренција ќе постои опасност таа едноставно тивко да ги презема Вашите сегашни купувачи. Постојано следете ја Вашата конкуренција, знајте ја нивната понуда, знајте кои маркетинг средства применуваат и како ги применуваат. Само така ќе успеете да ги задржите Вашите сегашни купувачи да не одат кај Вашата конкуренција и ќе имате потенцијал Вие тивко но сигурно да „крадете“ нивни купувачи.

5. Недоволно познавање на производот или услугата

Не може некој да продава нешто што не го познава добро. Не можете да продавате, а ниту да дизајнирате маркетинг кампања за производ кој не го познавате. Оваа ќе претставува најслабата карика во Вашиот бизнис доколку тоа е така. Затоа пред да го понудите производот или пак услугата за продажба обидете се да имате доволно познавање за да одговорите на сите прашања од страна на купувачите.

6. Слаб квалитет на производот или услугата

Мислам дека и не треба да се коментира оваа причина. Сум купил многу производи кои само ги платив а не ги користам бидејќи не се квалитетни. Затоа кога истиот бизнис ми нуди други производи едноставно ги игнорирам.

7. Лош продажен тим

Вашиот продажен тим го гради имиџот на Вашиот бизнис. Кога продажниот тим ќе остави лош впечаток на купувачот, не можете да очекувате дека тој купувач ќе се врати за повторно купување.

8. Немање на соодветна бизнис стратегија

Бизнис стратегија ја обработив во Стратегија – Најбрз начин да ги трансформирате Вашите бизнис резултати. Едноставно без да имате еден стратешки приод кој не е од денес за утре, нема да бидете во можност на подолг рок да ги задржите Вашите купувачи и што е поважно да се враќаат почесто да купуваат.

9. Лоша атмосфера во продажна просторија

Каква е атмосферата во продажната просторија или пак местото каде што се склучува договорот има соодветно влијание на идното однесување на купувачот, односно дали ќе се врати или не. Обидете се да обезбедите атмосфера која ќе предизвика смиреност и удобност во ваквите ситуации.

10. Недостаток од реинвестирање во досегашни купувачи

Секогаш инвестицијата во сегашните купувачи е поисплатлива од инвестиција во доведување на нови купувачи. Обидете се секогаш дел од парите од продажбата на некој начин да ги реинвестирате во нивното враќање. Освен тоа доколку Вашиот купувач се почувствува почестен со тоа што вие инвестирате во него тој ќе започне да привлекува и нови купувачи за Вашиот бизнис.

Разгледајте ги овие 10 причини и проверете дали некоја постои во Вашиот бизнис и едноставно отстранете ја.