post

Имате бизнис идеја – Што понатаму?

Една бизнис идеја е стартна точка за секој сегашен или пак иден претприемач. Бизнис идејата е важна бидејќи претставува почеток на еден нов живот – живот на бизнисот и живот на претприемачот. Но, таа е важна само во таа прва иницијална стартап фаза од животниот циклус на бизнисот. Последиците од таа бизнис идеја ќе се чувствуваат и во сите останати фази, но сепак во голем дел ќе зависат и од други бизнис активности на еден претприемач.

Бизнис идеја - Што понатаму?

Бизнис идеја - Што понатаму?

Еден просечен човек постојано има бизнис идеи. Тоа е во самата природа на човекот, да сонува за еден подобар живот. Но, идеите како што доаѓаат така и си одат од мозокот на потенцијалниот или сегашен претприемач. Тоа можеме да го решиме со книгата со бизнис идеи како еден од 10 бизнис темплејти на претприемач.

Добро имаме бизнис идеи и сега прашањето е што понатаму? Нема во овој еден напис да можам да опфатам се што ќе треба да направите во Вашиот бизнис, туку едноставно откако ќе дојдете до бизнис идејата што ќе треба како основно да дефинирате.

1. Дефинирајте ги производите и/или услугите

Имате бизнис идеја која опфаќа некој вид на производ и/или услуга за Вашиот иден или пак сегашен бизнис. Следното е прецизно и јасно да ги дефинирате тие производи и/или услуги. Еве некои прашања на кои Вие како претприемач ќе треба да дадете одговор:

  • Каков производ или услуга ќе понудам?
  • Кои ќе бидат карактеристиките на тој производ или пак услуга?
  • Кои ќе бидат поволностите за потенцијалните корисници на тој производ или пак услуга?
  • Кои ќе бидат дополнителни услуги понудени со тој производ или услуга?

2. Дефинирајте го пазарот

Веќе имате бизнис идеја, го имате прецизно дефинирано производот или услугата кои ќе ги понудите на пазарот. Следното е јасно, прецизно и недвосмислено да го дефинирате пазарот на кој ќе ги понудите тие производи или услуги. Еве некои прашања на кои Вие како претприемач ќе треба да дадете одговор:

  • На кој пазар ќе ги понудите производите или услугите (град, регион, држава, континент…)?
  • Кои ќе бидат корисниците на тие производи или услуги?
  • Кои се карактеристиките на тие корисници на производи или услуги (пол, старост, приходи, националност…)?

3.  Дефинирајте ги конкурентите

Следен важен елемент за секој бизнис по производот или услугата и пазарот се конкурентите. Не ја правите грешката со потценување на истите, бидејќи успешноста на Вашиот бизнис во голем дел ќе зависи од нивната успешност. Потребно е прецизно да ги дефинирате сите конкуренти кои се наоѓаат на пазарот кој го дефиниравте претходно. Еве некои прашања на кои Вие како претприемач ќе треба да дадете одговор:

  • Кои се 5-те најголеми играчи на пазарот во индустријата во која се наоѓа Вашата бизнис идеја?
  • Што, кога и како нудат тие 5 најголеми играчи?
  • Кои се карактеристиките на нивните производи или услуги?
  • Кои поволности кои тие ги нудат на пазарот со нивните производи или услуги?
  • Колкава е отпорноста на пазарот од влез на нови конкуренти и колку е тешко тоа да се оствари?

4. Дефинирајте ги ресурсите

Имате бизнис идеја, имате дефинирано производи и услуги, имате дефинирано пазар на кој ќе ги понудите тие производи и услуги и имате дефинирано кои се главните конкуренти и што прават истите. Сега е потребно да ги дефинирате потребните ресурси за Вашиот бизнис за да таа бизнис идеја стане реалност. Ќе треба да ги дефинирате најмалку следниве потребни ресурси:

  1. Колкав број на човечки ресурси ќе бидат потребни?
  2. Каков интелектуален капитал ќе треба да имаат тие човечки ресурси?
  3. Колкави финансиски ресурси ќе бидат потребни?
  4. Од каде ќе ги најдете тие финансиски ресурси?
  5. Какви материјални ресурси ќе ви бидат потребни?
  6. Од каде ќе ги набавите тие материјални ресурси?
  7. Какви информациски ресурси ќе ви бидат потребни?
  8. Кои ќе бидат изворите на тие информациски ресурси?

По ова што понатаму?

Секогаш ќе има понатаму бидејќи вие сте претприемач и започнувате или го проширувате бизнисот. Откога ќе ги дефинирате овие бизнис елементи едноставно повторно почнете од почеток и прилагодете ги производот или услугата и пазарот. Ова е поради фактот што по дефинирање и осознавање на конкурентите и потребните ресурси ќе имате дополнителни факти кои ќе треба да ги вклучите во Вашите производи или услуги и пазарот.

На пример, со дефинирање на конкурентите ќе увидите што тие прават за да продаваат на тој пазар. Ова е проверена работа. Вие едноставно ќе можете да го копирате нивното искуство и да го подобрите за да стекнете конкурентска предност. Затоа ќе треба да ги редефинирате првите два елементи.

Запомнете дека простор за подобрување постои и секогаш ќе постои.

post

Стратегија – Најбрз начин да ги трансформирате Вашите бизнис резултати

Колку мали бизниси имаат стратегија? Дали претприемачите на малите бизниси имаат стратегија? Дали малите бизниси се стратешки, или само тактички мали бизниси кои размислуваат како да го преживеат месецот?

Од моето лично искуство и контакти со претприемачи на мали бизниси сметам дека тие воопшто не се стратешки ориентирани туку тактички ориентирани. Ова значи дека тие најмногу се загрижени за генерирање на приход за да ги платат сметките и да го преживеат месецот. Тоа значи дека малите бизниси немаат стратегија. Тоа значи дека растот и развојот не е важен, туку само голо преживување.

А, како да мислат на стратегија кога немаат здрава околина. Нема еднакви услови за сите на пазарот.

Но, сепак стратегијата на еден мал бизнис може само да му помогне, а не може да му одмогне. Па, затоа и препорачливо е да се има стратегија која ќе се следи.

Што е стратегија?

За стратегија на претприемач досега немам пишувано многу. Во делот за изработка на бизнис планот, односно во насловот Стратегија како дел од бизнис планот напишав дека:

Стратегија претставува план на акции за остварување на поставените цели. За имплементација на една стратегија потребно е да имаме повеќе тактики. На пример, доколку нашата стратегија е да изградиме бизнис со долгорочни односи со своите потрошувачи, тактиките со кои можеме да ја имплементираме таа стратегија може да бидат давање на дополнителни услуги за редовните потрошувачи, тренинг, долгорочни договори со поинкави цени итн. Секоја тактика се исполнува со активности кои имаат одредени датуми на остварување, одговорни лица за остварување на тие активности и потребни финансиски средства за остварување.

Зборот стратегија доаѓа и се користи во бизнисот од употребата во воени мисии. Во Merriam-Webster Dictionary освен дефинирање на стратегија како воено средство пишува и дека стратегија претставува:

    • Темелен план или метод
    • Умно лукавство (воено го исфрлив)
    • Уметност на смислување или пак користење на планови или пак лукавства кон исполнување на целите.

Забележливо е дека:

  • Стратегија е средство за исполнување на бизнис цели. Доколку немате бизнис цели не ви треба ни стратегија.
  • Стратегија претставува еден вид на план во кој се специфицирани акции кои Вие како претприемач ќе ги превземете.
  • Стратегијата е составена од тактики кои пак се составени од активности со што ќе ги исполниме посакуваните цели.

Имам видено различни „таканаречени“ стратегии. Тие повеќе изгледаа на еден текст на 20-30 страници и се однесуваа на период од 3-5 години без специфичности. Како што забележувате погоре за да се исполнуваат воспоставените стратегии потребно е да се определат тактики и да се дефинираат сите активности за секоја тактика.

Моја препорака пред да започнете со промена на стратегија е првин да ги погледнете дефинициите за тоа што е стратегија кои ги обработив во овој поднаслов. Потоа убаво да погледнете во вашите бизнис дејствувања и да видите дали се тоа тактики кои од време на време ги спроведувате или пак тоа претставува една стратегија на еден подолг рок.

Како да ја промените стратегијата?

Менување на стратегија не е пожелно да го правите секојдневно. Подобро потрошете повеќе време да подготвите вистинска стратегија и да се обврзете кон нејзино извршување. Имам лошо искуство со често менување на една стратегија со друга пред да измине рокот за кој е предвидена претходната. Во една таква состојба ни вработените ни консултантите не знаеја која стратегија е на сила.

Стратегијата се изготвува од менаџментот (врвот) на бизнисот, а се спроведува и извршува од сите.

Ќе се обидам да дефинирам еден приод во чекори кој ќе може да ви помогне да успеете да спроведете стратешко планирање во Вашиот бизнис и да ја промените тековната стратегија доколку ја имате или пак мислите дека ја имате.

  1. Прва работа е да бидете сигурни дека имате стратегија и дека ја следите иако не сте задоволни со неа. Не ви треба стратегија која ќе седи во фиока и ќе фаќа прашина. Тогаш подобро и не губете време на стратегија.
  2. Откако ќе се уверите дека имате стратегија која се следи потребно е да ја прилагодите за да таа иста стратегија претставува една проактивна стратегија, а не реактивна стратегија. Не размислувајте кој друг што направил. Размислувајте што Вие сакате да постигнете и направите.
  3. Размислете што треба да направите за да ви даде најдобри резултати најбргу што може на една подолгорочна основа.
  4. Откако ќе откриете што е тоа што ќе ви даде најдобри резултати најбргу на подолгорочна основа можете да размислувате за можните тактики.
  5. За секоја тактика подгответе активности со рокови и одговорни лица за извршување на тие активности.
  6. И секако на крај системско размислување. Воспоставете повратна врска за преку мерење и контрола на исполнување на стратегијата.

Микро бизниси и стратегија

Не значи дека доколку сте мал бизнис со неколку вработени дека не ви треба стратешко размислување и водење на Вашиот бизнис. Ова е голема грешка. Дали малиот бизнис има цели? Секако, ако ништо друго во првата година целта е преживување. Па како ќе преживее? Ќе понуди некоја поволност. Ќе обезбеди квалитетен сервис. Ќе обезбеди квалитетна услуга. Ќе примени нови маркетинг методи и техники. Сето ова се тактики за стратегијата преживување на бизнисот. Потоа ќе следуваат активности за секоја од тие тактики.

Разликата е само во тоа што подготвувачот на стратегијата ќе биде и извршител на истата.

post

Придобивки од систематизација на Вашиот бизнис

Системите се корисни за секој бизнис доколку правилно се дизајнираат и доколку претерано не ја нагласат административната функција во бизнисот со што истиот бизнис ќе се претвори во една бирократска организација.

Поволности од систематизирање на малите бизниси

Ова е втор дел од написот за Системски приод во бизнисот – Бизнис систематизирање во кој сакам да изложам неколку придобивки за еден претприемач и неговиот мал бизнис од еден ваков начин на поставување на работите.

Со вистинските бизнис системи Вашиот бизнис ќе:

1. Ги исполни очекувањата на потрошувачите

Вашиот маркетинг систем ќе има подсистем за следење на очекувањата и задоволството на потрошувачите. Тој подсистем ќе анализира, мери, споредува и дава заклучоци во однос на тоа што го сакаат потрошувачите. На ваков начин постојано ќе имате информации за она што треба да се подобри и како треба да се подобри.

Но, без системски приод маркетингот оваа нема да може да го изведе. На пример, доколку еден од начините на собирање на информации од потрошувачите е едноставна анкета на купувачот од страна на продажниот тим во моментот на купување, овој подсистем ќе мора да има соодветна интеграција со подсистемот продажба – вработени од продажба. Така една од задачите на подсистемот продажба ќе биде и собирање на информации за подсистемот маркетинг.

2. Произведува исти резултати секој пат

Ова е нешто што само системите го обезбедуваат во бизнисот. Замислете да немате систем во кој ќе биде структурирана секоја бизнис активност и секоја задача за секој вработен. Сите би работеле различно и при секое повторување на задачите би имале различни резултати од истите. Затоа системите треба да обезбедат квалитетно извршување на работата секој пат со ист или подобар квалитет од претходниот пат.

3. Ги подобри перформансите на вработените

Се сеќавате од написот за продуктивноста каде велевме дека продуктивност е извршена работа во единица време. Доколку завршиме иста работа за побрзо време нашата продуктивност ќе биде поголема. Доколку секоја работа или активност во бизнисот се завршува побрзо од минатиот пат Вашите вработени ќе стануваат се попродуктивни и попродуктивни. Со тоа и ќе се зголемат нивните перформанси. Целта е системот да им овозможи соодветна едукација и можности за завршување на работата ефикасно и ефективно.

4. Ги намали трошоците

Доколку активностите и работите во Вашиот бизнис не се повторуваат повеќе пати за да бидат завршени и бидат завршени квалитетно од првиот пат, тогаш драстично ќе се намалат трошоците како резултат на грешки во бизнисот.

5. Биде многу поорганизиран

Единствено нешто што овозможува квалитетна организација на бизнисот се бизнис системите. Без соодветни системи, тешко дека некој ќе биде квалитетно организиран во бизнисот, а со тоа и тешко дека ќе ги извршува задачите онака како што треба.

6. Ги решава проблемите на конзистентна основа

Системскиот приод овозможува повратна врска. Повратна врска (feedback) претставува како онаа сигнална сијаличка или звук кој дава сигнал да се стопира производството на производствената линија. Со една ваква „сигнална сијаличка“ едноставно секој проблем во бизнисот брзо ќе биде забележан и нормално решен. Решавање на проблеми претставува промена. Промена претставува подобрување. Така постојано ќе ги подобрувате системите во Вашиот бизнис а со тоа и севкупниот бизнис систем.

7. Ја зголеми профитабилноста

И секако на крај како резултат на сите претходни придобивки ќе се зголеми и профитабилноста на бизнисот. Со зголемување на продуктивноста и перформансите, со намалување на трошоците, со задоволување на очекувањата на потрошувачите, со испорака на исти резултати или подобрени резултати секојпат, со поголема организираност, со конзистентно решавање на проблемите ќе ја зголемите и профитабилноста на бизнисот. Зарем тоа не е Вашата цел.

Па затоа, потребно е само да потрошите неколку часа во наредните неколку недели за да воспоставите системски приод во Вашиот бизнис. Потоа, едноставено следете и подобрувајте. Овие придобивки се многу поголеми во однос на она што ќе реба да го вложите.

post

Системски приод во бизнисот – Бизнис систематизирање

Повеќепати тука на претприемач пишував дека треба да се изгради систем за ова или пак систем за она. Но, што претставува еден систем?

Бизнис систематизирање

Систем е збир на меѓусебно поврзани и меѓусебно зависни елементи кои функционираат и постојат за да го претворат влезот во системот во излез.

Можеме да забележиме неколку карактеристики:

  • Системот е збир на повеќе елементи. Нема систем без минимално два елементи во неговиот состав.
  • Елементите се меѓусебно поврзани. Елементите во системот се поврзани меѓу себе така да влезот во едниот претставува излез од другиот елемент, за да од последниот елемент излезот претставува излез од системот – целта на системот.
  • Елементите се меѓусебно зависни. Елементите во системот се зависни помеѓу себе. Доколку се појави застој во едниот елемент се појавува пореметување и на другите елементи.
  • Елементите постојат за да ја остварат целта на системот. Секој систем мора да има цел (претворање на влез во излез) која се остварува со помош на функционалноста на елементите од кои е составен системот.

Подсистеми на системот бизнис

Во последниот напис за 10 клучни работи кои треба да ги започнете во 2010 препорачав да:

  1. Интегрирате систем на постојано учење
  2. Воведете систем за квалитетно следење на конкуренција
  3. Воведете систем за квалитетна комуникација со Вашите купувачи
  4. Воведете систем за квалитетна комуникација со Вашите потенцијални купувачи.

Ова се само подсистеми на подсистеми на Вашиот бизнис. Доколку го примениме системскиот приод би кажале дека систем на постојано учење е подсистем на подсистемот развој додека останатите 3 се подсистеми на подсистемот маркетинг на системот бизнис. Па она погоре би изгледало вака:

  • Систем Бизнис
    • Систем Развој
      • Систем за постојано учење
    • Систем Маркетинг
      • Систем за следење на конкуренција
      • Систем за комуникација со купувачи
      • Систем за комуникација со потенцијални купувачи.

Дали сега имаме поквалитетна слика за овие подсистеми во однос на тоа каде припаѓаат и чија е одговорноста за нивната примена? Дали сега можеме да видиме една поголема слика одколку претходно? Секако дека одговорот е да.

Дали бизнисот мора да има подсистеми?

Ништо не мора туку само треба. Ако Вашата цел како претприемач е да изградите успешен бизнис, кој ќе се развива и расте ќе треба да имате подсистеми во бизниот.

Вашиот бизнис мора да има различни системи кои што ќе претставуваат подсистеми на системот бизнис. Нефункционалноста на еден од потсистемите може да предизвика пад на целиот систем. Постои посебна наука која се занимава со управување со системите, а тоа е теорија на системите.

Земете го на пример автомобилот. Доколку се појави проблем во системот за подмачкување ќе дојде до проблем во системот мотор, при што вашиот автомобил (главен систем) нема да ја има функционалноста за која постои – да ве превезува од едно до друго место.

Како да воспоставиме подсистеми во бизнисот?

Одговорот е едноставен. Систематизирај! Да, твоја задача како претприемач е да го систематизираш сопствениот бизнис. Лесно е да се одговори, но многу потешко да се спроведе. Затоа ќе се обидам да го упростам ова.

1. Кои се целите на твојот бизнис?

Ако твојот бизнис има за цел да продава производи и услуги на крајните потрошувачи запрашај се што треба да направиш. Да го произведеш или пак набавиш производот. Веќе излегуваат четри можни подсистеми маркетинг, производство, истражување и развој и набавка. Нека следи веднаш прашањето како. Како се произведува? Како се истражува и развива? како се набавува? Така ќе дојдете до подсистемите на овие системи.

Следното што треба да направиш откако ќе го произведеш или пак набавиш производот е да го продадаеш. За оваа цел потребни ни се следните подсистеми: маркетинг, продажба и наплата. И повторно нека следи прашањето како. Како да се маркетира производот? Како да се продава? Како да се наплаќа?

2. Пронајди ги зависностите и врските.

Смести ги сите системи и сите подсистеми на хартија во еден хиерархиски редослед како што го претставив погоре. И едноставно означи ги врските и зависностите на еден подсистем со друг подсистем.

3. Определи ги активностите.

Конечниот елемент на последните расчленети подсистеми ќе бидат составен од активности. Определи ги сите активности со краток опис на истите.

4. Документирај.

Многу е важно сите подсистеми со сите активности да бидат документирани со што ќе се знае точно на кој подсистем кои се одговорностите и за кои активности е задолжен кој подсистем да ги спроведе.

5. Тестирај.

Откако се е веќе документирано тестирај ги сите подсистеми за да утврдиш да ли функционираат онака како што се замислени. Доколку се јават некои проблеми реши ги.

6. Имплементирај.

Имплементирај ги новоформираните системи во твојот бизнис. Доколку не ги имплементираш системите истите ќе останат само на хартија и ништо нема да добиеш од вложениот труд.

7. Следи и подобрувај.

Она што навистина е најзначајно за системите во Вашиот бизнис е тоа што ќе ви овозможат едноставно следење на нивното функционирање така да лесно можете да ги воочите сите подрачја на можни подобрувања. А, подобрувањето е нешто што е постојано, односно составен дел на секој систем.

Кои се придобивките за еден претприемач Следува…

post

20 Цитати за Бизнис Иновација

Бизнис иновација претставува нешто ново, нешто неоткриено, нешто сеуште не пробано во бизнис светот и на пазарот на кој функционира самиот бизнис. За секоја иновација најголемата одговорност ја сноси самиот претприемач. Дури и бизнисот кој го креира претприемачот претставува одреден вид на иновација.

Бизнис иновација - цитати

Ќе продолжам со овој серијал на цитати на претприемач. Веќе имавте можност да прочитате за цитати за бизнис идеи. Сега ќе продолжиме со бизнис иновација.

Цитати за Бизнис Иновација

Иновација претставува креација на нешто ново или реаранжирање на нешто старо на нов начин – Michael Vance.

Иновацијата прави разлика помеѓу еден лидер и еден следач – Steve Jobs.

Иновацијата е ценрален елемент во економскиот просперитет – Michael Porter.

Иновацијата е специфичен инструмент на претприемништвото. Акт кој им овозможува на ресурсите нов капацитет да креираат богатство – Peter Drucker.

Учење и иновација одат рака под рака. Ароганцијата на успехот е да се мисли дека тоа што го направивте вчера, ќе биде доволно за утре – William Pollard.

Иновацијата не е производ на логично размислување, иако резултатот е врзан за логично структура – Albert Einstein.

Вообичаеното однесување претставува непријател на иновацијата – Rosabeth Moss Kanter.

Иновацијата по дефиниција нема да биде прифатена од прва. Тоа се едни повторувачки обиди, бескрајни демонстрациите, еднолични проби пред иновацијата да може да се прифати и интернализира од една организација. Ова бара “храбро трпение” – Warren Bennis.

Иновацијата претставува процес на трансформација на идеите во нешто што може да се произведе и во една пазарна форма – Watts Humprey.

Не можеме да веруваме дека ќе знаеме каде ќе оди светот. Но, се додека не сме поблиски со нашите потрошувачи, нашиот модел на светот ќе се разликува од реалниот. Не постои субститут на иновацијата, но иновацијата не е замена за да бидеме во контакт со околината – Steve Ballmer.

Како што енергијата е основа на самиот живот, идеите извор на иновација, така иновацијата е витален извор на сите човечки промени, подобрувања и прогрес – Ted Levitt.

Без промена не постои иновација, креативност или иницијативи за подобрување. Оние кои ги иницираат промените ќе имаат подобри можности да ги управуваат промените кои се неизбежни – William Pollard.

Бидејќи живееме во една ера на иновации, една практична иновација мора да го подготви човекот за работа која сеуште не постои и сеуште не може јасно да биде дефинирана – Peter Drucker.

Иновацијата нема ништо со тоа колку пари имате за истражување и развој. Кога Apple излезе со Mac, IBM трошеше најмалку 100 пати повеќе на истражување и развој. Не се работи за пари. Се работи за луѓето кои ги имате, како ги водите и колку добивате од нив – Steve Jobs.

Вистинскиот извор на богатството и капиталот во оваа нова ера не се материјалните работи… туку човечкиот ум, човечкиот дух, човечката имагинација и нашата верба во иднината – Steve Forbes.

Секој акт на креација првин е акт на деструкција – Picasso.

Иновацијата е поттикната со добивање на информации од новитеконекции; со увидот во патувања во нови дисциплини или пак места; од активни, колегијални мрежи и отворени граници. Иновацијата произлегува од тековната размена на информации, каде информацијата не е само акумулирана или складирана, туку креирана. Знаењето се генерира од конекциите кои не биле присутни претходно – Margaret J. Wheatley

Иновацијата е специфична алатка на претприемачите, средство со кое ги искористуваат промените како можности за различен бизнис или пак за различна услуга. Таа е во состојба да се претстави како дисциплина, може да се научи, да се практикува. Претприемачите треба да намерно  да бараат извори на иновациите, промените и нивните симптоми кои укажуваат на можности за успешни иновации. И тие треба да знаат и да ги применат принципите на успешна иновација – Peter Drucker.

Доколку ја прашав јавноста што тие сакаат, тие би одговориле дека сакаат брз коњ – Henry Ford.

Ние немаме традиционален процес на креирање на стратегии или пак процес на планирање кој ќе го видите во традиционалните технолошки компании. Тоа му овозможува на Google да иновира многу, многу бргу, што мислам дека претставува вистинска сила на компанијата – Eric Schmidt.

Неколку заклучоци и препораки

  • Иновација не значи дека треба да креирате само нешто ново, иновација претставува и подобрување на нешто старо или нешто веќе постоечко. Размислете за иновација во продажен процес, во тековен производствен процес или пак во тековниот маркетинг процес. Сето тоа подобрување претставува иновација.
  • Иновацијата е нешто што Вашиот бизнис ќе го направи уникатен, по што ќе се разликувате од конкуренцијата и што ќе ви донесе вистински просперитет на Вашиот бизнис.
  • Иновацијата како процес во еден здрав бизнис нема крај. Тоа е постојан процес на кој се мисли и дејствува секојдневно. Она што е иновирано денес нема да биде доволно утре. Ќе мора да се подобри.
  • Иновација бара креативност, односно излез од она што сметате дека е логично и нормално. Пореметувањето на тој секојдневен баланс на нормалното предизвикува креативност, а креативноста ја предизвикува иновацијата. Она нормалното, вообичаеното однесување или самите воспоставени стандарди претставуваат најголем непријател на иновацијата.
  • За иновацијата да биде прифатена во организацијата потребни се долготрајни експерименти, обиди и трпение. Бидејќи луѓето може да не го очекуваат она што самата иновација го нуди. Од друга срана секоја иновација организациските членови ги изместува од удобната status quo ситуација. Отпорноста кон иновацијата е неминовна.
  • За успешна иновација потребно е да имаме слух за она што се случува во околината. Да бидеме во еден близок контакт со нашите потрошувачи. Тие во голем дел можат да ни помогнат во избор на вистинската иновација во нашиот бизнис. Претприемачите треба да ги бараат изворите на иновации и веднаш да започнат со акт на иновација.
  • Промените се во тесна врска со иновацијата. Без промени нема ни иновација.
  • Дали секој може подобро да ја изведува сопствената работа утре. Секако. Но, дали тој човек, ваш вработен е поттикнат да размислува за подобрување на неговата сопствена работа? Кога нешто ќе се стандардизира веројатноста е дека секој вработен ќе си остане во полето на тие стандарди без да размислува за подобрување на тие стандарди. Секоја иновација започнува со рушење на сегашноста, како што вели Picasso.
post

Гравитација како основа за бизнис успешност

Често пати сакам да ги применувам законите на физиката во претприемништвото како една посебна дисциплина или пак слободно можам да кажам наука.

Што е гравитација?

Не би одел со некои навистина сложени дефиниции и фактори и бројки во опишување на гравитација туку едноставно би ја изразил како:

Сила на привлекување помеѓу два објекти.

На пример кога ќе пуштите камен од рака тој паѓа на земја заради гравитација (земјата го привлекува каменот). Дали тука нема некоја аналогија која можеме да ја примениме и кај бизнисите.

Што му е потребно на секој бизнис? На секој бизнис и на секој претприемач му е потребна еден вид на гравитациона сила која ќе ги привлекува купувачите и потенцијалните потрошувачи.

Гравитација и бизнис

Концептот на гравитација, бизнис и претприемач е прикажан на сликата. Го имаме бизнисот кој претставува систем кој црпи живот преку продажба на сопствените производи и услуги. Во центарот на тој бизнис сте Вие како претприемач. Надвор од Вашиот бизнис се оние кои одлучуваат дали ќе ви дадат живот или не, а тоа се:

  • Потрошувачи, оние кои ги користат Вашите производи или услуги. Потрошувач и купувач не мора да биде иста личност или пак ист бизнис кога станува збор за B2B. Доколку тие сакаат да ги користат Вашите производи, односно Вашите производи ги привлекле да ги користат гравитационата сила ќе постои.
  • Купувачи, оние кои го плаќаат производот или услугата кои ги продавате. Тие биле привлечени со некоја гравитациона сила да го купат тој производ или пак услуга откај вас.
  • Потенцијални потрошувачи, оние кои може да бидат корисници на Вашите производи или услуги. Тука гравитационата сила е сеуште слаба, но треба да се воспостави и да се зајакне како би се трансформирала оваа група во потрошувачи.
  • Потенцијални купувачи, оние кои може да почнат да ги купуваат Вашите производи или услуги. И тука гравитационата сила е сеуште слаба или пак воопшто не постои.

Меѓу нив и Вашиот бизнис мора да постои гравитациона сила која ќе ги привлече кон Вашиот бизнис, односно ќе ги привлече потенцијалните потрошувачи и купувачи да влезат во Вашата продажна инка, додека тековните потрошувачи и купувачи да се вратат повторно во Вашиот бизнис и да купат од Вашите производи или услуги.

Гравитационата сила ќе биде поголема доколку желбата кај таа група на луѓе или пак бизниси за влез во Вашиот бизнис биде поголема.

Задача на еден претприемач

Која ќе биде Вашата задача како претприемач во однос на гравитационата сила? Првин ќе биде потребно да ја изградите, воспоставите и постојано да ја зајакнувате таа гравитациона сила. Потоа постојано да ја проширувате кон нови групи на луѓе кои се надвор од Вашиот бизнис а од кои зависите и Вие како претприемач и Вашиот бизнис.

Што влијае на бизнис гравитационата сила?

  • Вашиот производ или услуга. Тука спаѓаат карактеристиките и полезностите од истите. Колку ќе бидат покорисни производите и услугите за претходно наведените ентитети толку ќе биде и поголема гравитационата сила.
  • Цена. Некои ги привлекува ниска цена, додека другите ги привлекува висока цена. Во зависност од целниот пазар, и цената ќе влијае различно на Вашата бизнис гравитациона сила.
  • Промоција. Многу ентитети ќе бидат привлечени од Вашиот промотивен материјал како реклами, брошури, флаери, веб страна итн.
  • Дистрибуција. Во одредени случаи пресудно за донесување на одлуката е дистрибуцијата на производите или услугите.
  • Вие како претприемач. Вашиот углед, однесување, начин на работа постојано е следен од погоре наведените ентитети, па понекогаш и Вие можете да бидете пресуден за таа бизнис гравитациона сила.
  • Вработени. Вашите вработени се огледало на Вашиот бизнис. Не е доволно Вие да бидете ОК, доколку Вие не се занимавате со продажба, туку Вашиот продажен тим. Затоа и Вашиот продажен тим треба да биде ОК и да привлекува.
  • Комбинација на сите горенаведени елементи. Понекогаш не е доволен само еден од овие елементи за силна бизнис гравитациона сила. Затоа сите елементи мора да бидат доволно силни за да биде силна и гравитационата сила.

Можете да забележите дека ова погоре наведено претставува маркетинг микс на еден бизнис. Значи маркетингот,Вие како претприемач и Вашите вработени се елементите кои ја зголемуваат бизнис гравитациона сила.

Затоа, подобрете ги сите овие елементи и зголемете ја бизнис гравитационата сила, за да нема зима за Вашиот бизнис.

post

Комуникација и Продуктивност – Google Wave

Google Wave беше бомбастично најавен од страна на Google како нешто што во целост ќе ја замени комуникацијата која што денес ја познаваме. Од пред 5-6 месеци ги следев случувањата и си замислував какво ќе биде тоа ново чудо. кога станува збор за Google и нивната иновативност немам зборови, а не можам и да не верувам дека навистина ќе се изроди едно ново чудовиште кое ќе ги смени нашите животи. Од друга страна американците полудеа со ова ново чудо.

Прв вистински интерес за Google Wave пројавив кога една колешка од Канада (блогер за жени претприемачи со која контактирав бидејќи го препорачав нејзиниот блог), страствено бараше покана за Google Wave вториот ден откако Google го пушти онлајн.

Пред едно месец дена конечно и јас добив покана за оваа чудовиште од комуникациска алатка кое не е само за комуникација туку и за соработка преку веб на повеќе лица одеднаш. Со многумина со кои контактирав велат дека не можат сеуште да ги воочат придобивките од користење на Google Wave. Но, сметам дека реалноста е сосема друга.

Затоа во овој напис би споделил неколку работи за кои сметам дека Google Wave навистина може да ја зголеми Вашата лична продуктивност како претприемач, како и продуктивноста на Вашиот тим.

1. Real Time комуникација и соработка

комуникација во вистинско време преку Google Wave

Ова е една од главните придобивки на Google Wave. Во real time ќе можете да комуницирате со Вашиот партнер од другата страна без разлика каде се наоѓа. Можеби ќе кажете дека и e-mail ќе ви го овозможи тоа. Да, и e-mail-от овозможува комуникација но не ваква во real time. Всушност на секој нов wave како што пишува вашиот соговорник така и излегува на Вашиот екран. Оваа е во стилот на Wiki пишување, што значи дека ќе можете да го едитирате, да додадете или пак да го измените секој сегмент од еден wave. Од друга страна имате можност и да ја видите целата комуникација како се одвива од почеток до крај во вид на еден филм преку Playback копчето.

Оваа можност може да се користи за размена на идеи, преговори, договарање, планирање на активности, истовремено работење на еден проект или за било што што ќе има примена за Вас лично или пак Вашиот бизнис.

2. Да/Не/Можеби Анкета

Прашалници и анкети преку Google Wave

Со едноставно поставување на прашање и избирање на луѓе од контакт листата можам да спроведам анкета чии одговори се Да, Не или пак можеби. Овој додаток е достапен со самиот пристап на Google Wave и едноставно по вашето прашање можете да го додадете овој Gadget. Автоматски ќе се собираат одговорите и ќе можете да видите што мислат вашите соговорници или Вашиот тим за некои од активностите што ги планирате.

3. Brainstorming преку Mind Mapping

Brainstorming сесија преку Google Wave

Ставање на идеите на хартија е доста продуктивен начин на соработка. Но, доколку во исто време на иста хартија одеднаш ставаат организирани идеи повеќе луѓе продуктивноста расте со светлосна брзина. А, пак доколку тоа го додадеме да биде графички прикажано во вид на Mind Map веќе неможете ни да замислите колку Вие како претприемач и Вашиот тим ќе бидете попродуктивни и ќе генерирате квалитетни идеи.

4. Организираност

Организација преку фолдери во Google Wave Кога станува збор за организираност го користам Google Wave како место каде што ги сместувам моите идеи (на пример идеи за написи на претприемач). Втората работа за организираноста е тоа што направив посебни Wave-ови како активности кои треба да ги спроведам. Ова не е целосно автоматизирано како на пример во Google Calendar но, она што го сакам е се да имам на едно место, односно да не корстам 5-10 различни алатки, а со тоа да си ја зголемам сопствената продуктивност.

За ова користам различни фолдери кои се наоѓаат од левата страна на кои им додадов различна боја. Секој Wave е означен во некој од фолдерите и се појавува во различна боја согласно бојата на фолдерот. На ваков начин можам да ги приоритизирам работите (Wave-овите) и кога го користам како алатка за комуникација и соработка.

Можностите се навистина големи. Ова е еден начин на користење кој го стекнав за помалку од еден месец и секако на една preview верзија бидејќи Google Wave не е сеуште во својата фул официјална верзија. Од вашата креативност ќе зависи и користењето на истиот за да се организирате подобро. Се надевам дека набргу ќе има и некоја можност за интеграција на останатите алатки на Google како што е Google Calendar за да оваа организираност биде на повисоко ниво.

5. Видео и теле конференциска врска

Ова се навистина кул можности кои можат да се користат со посебни додатоци, но за жал не можат да се користат за телефонски броеви од Македонија.

6. Пробивање на јазични граници во комуникација и соработка

Автоматски превод при комуницирање со Google Wave

Ова е едно чудо кое е најавено од Google и кое се нарекува Rosy а всушност претставува робот кој автоматски ги преведува на посакуваниот јазик вашите пораки или пишувања. Замислете ваш соговорник од другата страна да е Кинез. Вие не знаете кинески а сакате да комуницирате со него за да го прашате нешто за нивната понуда до Вашиот бизнис. Со овој робот едноставно Вие ќе си пишувате на македонски, а Вашиот соговорник Кинез ќе го гледа поставеното прашање на кинески. Дали ова не е вредна и неприменлива алатка?

Овој робот наречен Rosy сеуште е во тест фаза и не е пуштен официјално од Google, но пронајдов привремена алатка која ја заменува официјалната и која е изработена од друга компанија (види слика погоре).

7. Рекреација

Рекреација со Google Wave

За крај она што еден претприемач често го заборава е рекреација. Најдов една игра Sudoku која може да се игра со повеќе соговорници од другата страна. едноставно малку да го оладиме мозокот од бизнисот.

Ова е се за што најдов одредена примена во мојот секојдневен живот на ова ново чудо наречено Wave. Мислам дека ова е само почетокот. Но, едно нешто е важно: Wave е корисно доколку имате некого од друга страна да го користите, доколку не тогаш навистина е непотребен. Би сакал да напоменам дека Wave не е замена за е-mail туку замена на досегашниот начин на комуникација со е-mail.

Google Wave сеуште работи на база на покана. Значи секој нов корисник има можност да прати 10 покани на други корисници. Јас имам уште 3 отворени покани.

Доколку сте заинтересирани би бил задоволен да ви пратам покана. Затоа оставете коментар за овој напис во врска со некои Ваши идеи за кои би можеле да го користите Wave и на тројца од Вас ќе ви пратам покана за Google Wave.

post

Како да постигнете се што ќе посакате во 2010?

Вчера во раните утрински часови бев учесник на еден вебинар за постигнувања во 2010. Вебинарот беше извонреден и траеше околу два и пол часа.

Како да ги постигнете целите за 2010?

Би сакал накратко да ги презентирам главните заклучоци или препораки од вебинарот за постигнувања во 2010 за да можете да постигнете се што ќе поставите како цел за Вас и за Вашиот бизнис во 2010.

1. Започни со претходната година

Затворете ја претходната година со една анализа на се она што сте го постигнале и се онашто не сте го постигнале. Што е тоа што сте го направиле добро, а што е она што не сте го направиле добро. И секогаш поставете прашање зошто.

2. Погледнете во иднината

Предвидете што ќе се случува во иднината? Какви ќе бидат трендовите? Кои ќе бидат Вашите цели оваа година? Одговорете на овие прашања како би направиле подобра слика за она што ќе се случува во оваа нова година.

3. Поставете ги целите за оваа година

Кога ги поставувате целите не мислете само на бизнис цели туку и Ваши лични цели кои сакате да ги постигнете во новата година. Внимавајте да не се прецените во однос на Вашите можности за постигнување на тие цели. Анализирајте ги целите во однос на важноста и итноста на истите.

4. Воспоставете систем за постигнување на целите

Ова едноставно претставува трансформација на годишните цели во месечни потребни постигнувања, кои пак се трансформираат во неделни цели, за на крај да се трансформираат во дневни активности. Овие дневни задачи треба да имаат приоритет во Вашиот календар на дневни активности.

5. Менаџирајте го сопственото време

Ова се едноставно активности кои ќе воведат квалитетен систем за менаџирање на вашето секојдневно време кое ќе го трошите на исполнување на целите поставени за оваа година. Користете календар во кој ќе бидат внесени сите дневни активности согласно приоритетот на истите. Завршете ги првин оние најприоритетните. Поделете го денот на рутински задачи и вистински проекти. Рутинските задачи нека бидат последни.

6. Проектен менаџмент

Едноставна препорака кога станува збор за проектен менаџмент е да се насочите на завршување на еден проект пред да почнете со друг. Ова се однесува на внатрешни проекти во Вашиот бизнис. Доколку започнете неколку проекти одеднаш ќе го одложите завршувањето на сите започнати проекти што нема да биде корисно за Вас како претприемач и Вашиот бизнис.

7. Самодисциплина

Имајте самодисциплина за спроведување на сите дневни активности како што се наведени во Вашиот календар со дневни активности. Поставете време кога една активност треба да биде завршена а кога треба да започне друга. Вклучете ги и Вашите лувства во процесот, како и сите ментални поттикнувачи што ќе ве поттикнуваат постојано на завршување на задачите. Зошто го работите тоа што го работите? Дали да обезбедите подобар живот за Вашите деца и Вашето семејство? Што е она што ве турка напред во целиот процес.

Објавете конкретен датум за завршување на некој проект. Нека биде јавен датумот и нека бидат известени потенцијалните клиенти за тој датум и што мое да очекуваат тогаш. Ова е еден начин кој ќе ве натера да се насочите кон целосно завршување на тој проект.

8. Помалку инпут за повеќе резултати

Балансирајте како со најмалку напор да постигнете поголеми резултати. Искористете го 80/20 правило за оваа цел. 20% од Вашите активности ќе донесат 80% на резултати се останато е рутина која не е продуктивна и не дава резултати. Ова може да се чини како нешто неостварливо, но со вистинско фокусирање кон прво вистинските работи сметам дека е реално.

Следете ги препораките и до крајот на месецот имајте сопствен календар за секојдневни активности кои ќе доведат до исполнување на поставените цели. Доколку некој ден остварите помалку од онаа предвиденото нека следи веднаш прашањето ЗОШТО како би вклучиле и елемент на сомоподобрување на целиот процес.

Се надевам дека на еден ваков пооргнизиран начин ќе успеете да исполните се што сте зацртале за оваа година.

post

Менаџмент – Најдоброто на претприемач во 2009

Како пета тема од серијалот Најдоброто на претпримач за 2009 година е менаџментот. Оваа тема беше опфатена и форсирана особено во првите 6 месеци на претприемач. Особено важни елементи се менаџмент филозофиите кои ги обработивме на артиклите на претприемач.

Секој претприемач ќе бидне еден ден менаџер или пак би требало да биде менаџер. Првата потреба од менаџментот ќе се јаво со првиот вработен во Вашиот бизнис. Така, и оваа знаење ќе биде од голема корист за секој претприемач.

Како најдобри наслови од темата менаџмент на претприемач би ги извлекол следниве:

  1. 11 Најважни Задачи за Менаџерите. Видете кои се најважните задачи кои Вие како менаџер би требало да ги спроведувате во бизнисот.
  2. 4Е Рамка За Градење На Тим Кој Победува. Ова е една рмка користена од еден од најголемите докажани менаџери во светот Џек Велч долгогодишниот водач на Џенерал Електрик.
  3. Бизнис Органограм – Теорија наспроти Реалноста. Како да го дизајнирате и имплементирате органограмот во Вашиот бизнис кој ќе ја зголеми ефикасноста и ефективноста на бизнисот.
  4. Преглед на менаџмент вештини. Кои вештини ќе треба да ги поседувате за да бидете добар менаџер.
  5. Бирократија – Уништувач на организациски системи. Самото име на написот кажува многу, обидете се да не воведете бирократија во Вашиот бизнис.
  6. Администрација како 20 од 80/20 правило. Обидете се овие административните задачи да ги делегирате на некој друг. Вие бидете сконцентрирани на оние задачи кои носат 80% од резултатите.
  7. Менаџмент филозофии. Тука ќе ги најдете најважните менаџмент филозофии. Ги опфативме TQM, Lean management, KAIZEN, Реинженеринг и фрактална филозофија.
post

Заење и Креативност – Втор Слој за Успех на Еден Претприемач

Знаењето е моќ, знаењето е сила! Многу популарна маркетинг кампања кај нас во последно време.

Знаење и креативност за успех на еден претприемач

Ова е веќе четврти напис од овој серијал за карактеристики на успешни претприемачи. Првин спроведовме една анализа за фактори кои еден претприемач го прават успешен, а подоцна резултатите од анализата ги поставивме во една хиерархиско пирамидална структура за најважни фактори.

Минатата недела го обработивме првиот слој од таа хиеарирхиско пирамидална структура – Спремност да се превземе акција. Ако сме спремни да превземаме акција потребно е таа спремност да ја надоградиме со вториот слој на патот кон успешноста, а тоа е знаење и креативноста.

Што претставува знаење за еден претприемач?

Јас имам знаење за ова. Јас имам знаење за она. Тие имаат знаење за нешто друго. Секаде околу нас се врти некакво знаење. Секоја личност има некое специфично знаење кое си го носи со себе. Мислам и дека не пости човек кој нема одредено знаење. Знаење почнува уште од нашето раѓање. Секој нов ден од нашиот живот претставува стекнување на одредено знаење. Знаењето го стекнуваме, дома од родителите, во градинка, подоцна во училиште, факултет и од животот.

Значи знаењето е составено од два значајни елементи:

  • Искуство. Сето она што го доживуваме на некој начин се преточува во наше знаење. Тоа е наш личен капитал или личен капитал на еден претприемач.
  • Едукација. Сетоа она што го стекнуваме низ задолжителниот и незадолжителниот едукациски систем се преточува во наше сопствено знаење. Освен оној едукациски систем, како училиште, факултет, курсеви, тука влегува и читање на некоја книга, стекнување на информации од интернет и било што што ќе Ве едуцира Вас како претприемач и што ќе ви го зголеми тековното знаење за нешто.

Што претставува креативност за еден претприемач?

Во Wikipedia за креативноста се вели:

Креативност е ментален и социјален процес на откривање на нови идеи или концепти, или ново поврзување на креативниот ум помеѓу постоечките идеи или концепти.

Значи кретивноста е директно поврзана со откривање на нови идеи или концепти или пак модификација на постоечки идеи и концепти.

Да се биде креативен не е лесно. Да се стекне знаење е многу полесно отколку да се биде креативен. Креативноста не се учи, туку едноставно се спроведува и излегува од самиот претприемач.

Комбинација на знаење и креативност

Затоа и вториот слој од претприемничкиот пат кон успешноста претставува едноставен микс меѓу знаењето и креативноста. Зошто еден ваков микс?

Првин, можете да имате знаење во преголеми количини, но без креативна примена на тоа знаење во секојдневната практика нема да Ви гарантира дека ќе бидете успешен претприемач.

Од друга страна сметам дека знаењето пак е единствениот фактор кој може да ја зголеми креативноста на еден претприемач. Како еден претприемач може да биде креативен доколку нема знаење? Најверојатно, никако. Освен ако очекува некаква божја дарба за да биде креативен.

Токму тука лежи овој концепт на миксање на знаењето и креативноста со што само ќе се зголеми веројатноста за успехот на претприемачот. Како што го зголемувате знаењето за одреден предмет така ќе се зголемува и потенцијалот на Вашата сопствена креативност.

Втор фактор кој влијае на зголемена креативност е самиот претприемач. Ова се однесува на тоа што го викаме вродено нешто кај некој. Се смета дека уметниците се најкреативни затоа што едноставно имаат талент од некоја гранка на уметноста и затоа што едноставно креираат уметност со сопствениот отворен ум. Веќе пишувавме на претприемач за 6 совети за зголемување на креативноста.

Со сето ова што го изложив погоре слободно можеме креативноста да ја изразиме математички како функција од знаење и претприемачот:

Креативност = f(знаење + претприемач)

Како да бидете подобар претприемач преку знаење и креативност?

И на крај она најважното прашање: Како да бидете подобар претприемач преку знаење и креативност?

Ќе набројам неколку совети за Ваше лично подобрување како претприемач, што секако ќе има директно влијание на подобро работење на Вашиот бизнис:

Зголемување на знаење

Бидејќи претходно објаснив зошто знаење без креативноста не оди и обратно, треба да тргнеме со зголемување на претприемничко знаење. Ова може да се постигне на два начина:

  • Постојано учење на нови вештини. Барем денеска имате огромна можност за учење. Потребно е само да воспоставите систем кој постојано ќе го зголемува Вашето знаење како претприемач. Тргнете од подрачјата каде сте најслаби, а Вашиот бизнис ги бара тие подрачја. Читајте стручна литература, списанија и весници од тие подрачја и применувајте го наученото во секојдневната работа.
  • Учење од грешки – искуствено учење. Со учење на нови вештини и нивно применување во секојдневнта работа постојано ќе ги усовршувате тие вештини преку сопствено искуство. Дури и грешките кои ќе ги направите ќе го зголемат Вашето сопствено знаење и ќе ве направат да бидете подобар претприемач.

Однесувајте се како претприемач

Да, претприемач значи да бидете креативни, па затоа користете ги најкреативните методи и техники кои ќе ви дојдат во умот за да ја зголемите сопствената креативност и знаењето. Како 6 совети за претприемничка креативност би ги издвоил повторно:

  1. Имајте бележник секогаш крај себе.
  2. Сменете ги рутините во вашиот живот.
  3. Разгледувајте.
  4. Вмрежувајте се.
  5. Реиновација.
  6. Користете ги местата кои ја зголемуваат креативноста.