post

Форум – Маркетинг Средство 57

Caixa Forum Stairs
Image by felipe_gabaldon via Flickr

Ќе продолжам оваа недела со 57-то маркетинг средство на претприемач – форум. Не сум некој преголем љубител на форуми, но морам да бидам реален дека кога станува збор за онлајн маркетинг средства има потенцијал за одлично искористување во бизнис цели. Кога станува збор за форум интерeсно е што ова маркетинг средство може да има повеќенаменско користење. Тоа не значи дека за да го користите ќе мора да имате свој форум.

Што е форум?

Интернет форум едноставно претставува платформа преку која се разменуваат различни пораки или дискусии помеѓу членовите на форумот. Тој е место каде се поставуваат прашања за одредена проблематика и се очекува дека некој од заедницата (членови) ќе знае некои одговори, има искуство со предметното прашање и ќе ги сподели своите знаења.

Луѓето партиципираат во различни форуми со цел да споделуваат различни теми од интерес. На пример, јас лично членувам во неколку форуми, поточно три. Едниот ми е платежен и плаќам месечна членарина додека останатите два ми се бесплатни, но ограничени само на купувачи на нивни производи и/или услуги.

Како да го користите

Како што наведов на почетокот за разлика од она што досега го зборувавме за онлајн маркетинг средства како блогот и веб страната кои беа лични за Вашиот бизнис, форумите се доста поопширни во поглед на темата и содржината и во поглед на можностите за користење. Така да би извлекол два начини на користење на форум како едно маркетинг средство:

  1. Имање на сопствен форум и
  2. Активност на други форуми.

1. Имање на сопствен форум

Можеби како дел од тактиките на Вашата онлајн стратегија ќе ја имате и тактиката за сопствен форум. Тоа значи вие, или Вашиот бизнис да администрира форум за одреден бизнис или маркетиншка цел. Како некои можности за користење на форум би било техничка подршка, или пак споделување на искуства за користење на Вашиот производ и/или услуга.

Процесот на креирање на форум е едноставен како и блогот преку користење на специфичен софтвер кој потоа го персонализирате и администрирате. Треба да се напомене дека за форум е потребно да имате едно лице администратор кој би ги администрирал различните пораки од членови како би се избегнало објавување на несакани пораки реклами во стилот на вијагра, односно спамирање.

2. Активност на други форуми

Умешноста и креативноста на еден претприемач е да дојде до квалитетни информации, да ги трансформира тие информации во квлитетни акции за твојот бизнис и секако секоја комуникација да ја претвори во потенцијална бизнис зделка. Форумите имаат одлична можност за ова, потребно е само да се најдете на вистинското место (форум) и да започнете со конверзација.

Би издвоил неколку покарактеристични можности за користење на форумот:

  1. Проучување на пазарот. Преку форуми можете да дојдете до она што претставува болка (проблем) на еден потенцијален купувач. Можете и да ги откриете различните однесувања на различните потенцијални купувачи…
  2. Промоција на производи и/или услуги. Во специфични ситуации можете да го искористите и за да го испромовирате Вашиот производ или пак услуга. Но, не спамирајте, користете го ова само доколку некој побара одговор во кој може да биде содржан и Вашиот производ и/или услуга.
  3. Градење на експертиза. Помагајќи им на луѓето кои имаат некаков проблем или пак бараат одговори едноставно ќе ја зголемува Вашата експертиза како претприемач, а со тоа и видливоста и препознатливоста на Вашиот бизнис.
  4. Сообраќај кон Вашата веб страна. Доколку креирате вредност и споделувате навистина квалитетни совети и ресурси секој ќе сака да види нешто повеќе за Вас преку Вашата профил страна каде ќе го има и линкот до Вашата веб страна или пак блог. Понекогаш ќе можете да споделите и линк до Вашиот блог доколку одговорот на темата е даден таму. Сето ова ќе го зголеми сообраќајот кон Вашата онлајн присутност.

Процес на имплементација

Форумот е доста социјализирана технологија преку која повеќе индивидуалци комуницираат и споделуваат разни теми од интерес. Затоа како најадекватен пристап би го искористил пристапот опишан во написот Бизнисот е една обична игра. Ова знчи дека првин ќе треба да ги научите правилата на играта на играта. Така да како специфични чекори би ги издвоил следниве:

  1. Анализирај ги форумите во твојата индустрија.
  2. Избери неколку влијателни.
  3. Следи ја играта која ја играат другите членови и учи.
  4. Приклучи се во заедницата преку конверзација и споделување и размена на искуства.
  5. Помагај им на другите членови.
post

Услови за Стопанисување на Малите Бизниси

Извесно време на претприемач спроведуваме истражување на услови за стопанисување на малите бизниси во Република Македонија. Прашалникот е затворен и време е за анализа. Ова тука не е мој глас туку гласот на сегашните и идните претприемачи. Ова не е политика туку нашата реалност. Се надевам дека барем мал придонес ќе дадат овие резултати и ќе бидат разгледани од оние кои имаат моќ да ги подобрат овие услови како на национално така и на локално ниво.

Благодарност на сите кои учествуваа преку одговарање и споделување на прашалникот и кои овозможија да имаме над 500 одговорени прашалници, поточно 524.

Услови за стопанисување

Состојба со услови за стопанисување на малите бизниси

Кои услови за стопанисување треба да се подобрат

56% сметаат дека условите за стопанисување за малите бизниси во Република Македонија се слаби. Иако како втор највлијателен одговор е дека состојбта е задоволителна со 28% сепак далеку е да кажеме дека е одлична. Ова го потврдува и фактот што 70% од одговорите се слаба и за никаде.

Иако верувам дека се прават обиди од страна на централните и локалните власти во Република Македонија за да се подобрат условите, но не сум сигурен дека во креирањето на генералната политика претприемачите на малите бизниси се вклучени на некаков начин.

Бидејќи прашалникот беше дизајниран да може да се одговара и за оние кои имаат бизнис и за оние кои немаат ќе мора да погледнеме какво е мислењето на претприемачите, а какво на оние кои сеуште немаат бизнис.

Мислење на претприемачи

Мислење на претприемачи

Од графикот за мислењето на оние кои имаат бизнис може да се забележи дека состојбата не е многу променета бидејќи сеуште високи 63% сметаат дека условите се слаби и за никаде.

Мислење на непретприемачи

Мислење на оние кои сеуште немаат бизнис

Интересно е што оние кои сеуште немаат бизнис сметаат дека условите за стопанисување не се баш најдобри. Можеби и затоа постои оној страв од започнување на сопствен бизнис како алтернатива на чекање на вработување и барање на сигурна работа.

Каде е потребно подобрување

Во прашалникот преку кој ја изведовме анализава имавме понудено подрачја кои можеби можат да послужат за да ги подобрат условите за стопанисување на малите бизниси во Република Македонија. Еве ги резултатите од овој дел:

Подрачја кои треба да се подобрат

Забележливо е дека финансиските услови доминираат како најпотребни и тоа скоро 40% или поточно 39% сметаат дека намалување на даноци, директна финансиска помош и достапноста на финансии треба да бидат подобрени.

Од графикот може да се забележи дека не постојат големи разлики во резултатите и според тоа може да се каже дека во сите подрачја опфатени со прашалникот би требало да има драстични подобрувања.

Други можни подобрувања

Во прашалникот имаше можност да се наведат и некои други подрачја на подобрувања, каде претприемачите и оние кои немаат бизнис можеа да си ги искажат маките во однос на она што треба да се подобри. Еве ги разновидните дополнувања на условите кои беа наведени погоре:

  1. Олеснување на процедури за затворање на бизнисот. (Ова навистина претставува проблем. Во неколку мои разговори со претприемачи кои поминале низ овој пекол ми рекоа дека процедурате може да трае и со месеци. За сето тоа време треба да имаш стечаен управник за кој ќе треба да плаќаш плата и придонеси.)
  2. Зголемување на можностите за електронски плаќања.
  3. Подобрување на наплата – изнаоѓање на адекватен модул за наплата од крајните купувачи.
  4. Прекинување со драконскиот систем на казнување кој ги уништува малите бизниси.
  5. Уништување на нелојална конкуренција.
  6. Објавување на тендери со објективен рок за подготовка на потребна документација.
  7. Повеќе програми кои обезбедуваат капитално вложување во малите но потенцијално растечки бизниси.
  8. Обезбедување на повеќе обуки за претприемништвото.
  9. Продолжување на проектот „регулаторна гилотина“ и целосно спроведување во пракса.
  10. Намалување на цените на услуги на јавните служби.
  11. Започнување со функционирање на гарантниот фонд.
  12. Доколку на еден се опростува долгот кон државата да се ослободат и сите други па и малите бизниси. (Ова навистина е дискриминаторна пракса од страна на властите. Не е здраво некој редовно да плаќа, а некој со години да наталожува долг и да му се опрости заради економска криза. Ако веќе се прави таков преседан, нека се направи за сите, а да се наградат оние кои редовно си плаќаат.)
  13. Обука за менџери од сите подрачја.
  14. Субвенционирање на набавка на нова технологија.
  15. Субвенционирање на проекти на извозно ориентирани компании.
  16. Субвенционирање (наградување или подршка) на иновации кои доаѓаат од македонски компании.
  17. Подобрување на патна мрежа и инфраструктура.
  18. Подобрување на мерките за вработување на нови лица.
  19. Повисоко ниво на инфлација.
  20. Директни контакти со стопанственици од други земји.
  21. Субвенционирање и обуки во однос на имплементација на некои стандарди (ISO, HACCP, GAP)
  22. Акредитирање на повеќе државни и приватни лаборатории за контрола на квалитетот и безбедноста на храната.
  23. Брендирање и патентирање на традиционалните македонски производи, како и донесување на препорачан техничко-технолошки процес.
  24. Организирање на јавни емисии на национални телевизии кои ќе имаат за цел да го поттикнат претприемништвото преку споделување на знаење и практика.
  25. Првите три години од започнување на бизнисот (мали бизниси) да бидат ослободени од даноци.
  26. Ослободување на дел од даноци за компании кои ќе земат практиканти како редовни студенти.
  27. Законска регулатива за задолжителни интерни обуки за вработени.
  28. Целосно елиминирање на партиската припадност кога станува збор за бизниси.
  29. Поефикасна администрација.
  30. Откоренување на корупција во државната администрација и судството.
  31. Пофлексибилна, попродуктивна и пописмена државна администрација.
  32. Зголемување на квалитетот во образованието и воведување на повеќе практична настава.
  33. Поголема ажурност на Министерството за финансии при исполнување на своите обврски кон малите бизниси и соодветно санкционирање и од таа страна доколку не се испочитува ненавременоста (да се плаќа камата за ненавремено плаќање).
  34. Зголемена контрола кај комисиите за доделување на кредити за самовработување (владин проект).
  35. Намалување на рокот за реализација на судски постапки во врска со наплата од постојните просечно над 365 дена на пристојни 30-60 дена.
  36. Дебирократизација на јавната администрација.
  37. Поттикнување на жените претприемачи овозможувајќи им поголема достапност на финансии.
  38. Обезбедување на стабилна и правна држава во вистински смисол на зборот.
  39. Поголема достапност на статистички податоци за бизнисите.

Овде се претставени одговорите при што оние кои се повторуваат не се претставени во листата. Она што можам да го издвојам како нешто што најмногу се повторува е следново:

  • Ублажување на казнена политика.
  • Дебирократизација на државната администрација.
  • Лесна достапност на финансиски средства за малите бизниси под поволни услови.
  • Државен завод за статистика да биде вистински сервис за малите бизниси и претприемачите.
  • Обезбедување на квалитетен систем за наплата.
  • Навремено плаќање на обврските на државата кон малите бизниси.

Корелација

На крај и за корелационата анализа која што ја спроведов врз резултатите. Целта беше да проверам какво влијание кој фактор има врз мислењето.

Интересно е што не постои корелација помеѓу мислењето за услови за стопанисување во Република Македонија и дали анкетираните имаат или немаат бизнис или колку време го имаат бизнисот. Истото се однесува и на тоа дали се мажи или жени или пак староста. Ова е логично бидејќи најверојатно сите ги чувствуваат тие услови сметаат дека не се баш најповолни. Од слабата корелација која ја добив како највисока може да се извлече возраста на претприемачот во однос на неговото мислење за стопанисување иако нема некое силно статистичко значење би сакал да го напоменам:

Колку е поголема возраста на претприемачот, толку повеќе смета дека условите за стопанисување на малите бизниси се полоши.

post

Маркетинг во Ерата на Google – Книга

Маркетинг во ерата на Google

Маркетинг во ерата на Google

Пред некој ден ми стигна книгата која ја нарачав во вид на пред нарачка и која ја споменав во написот Дали онлајн стратегија претставува бизнис стратегија. Сеуште не стигнав да ја прочитам, но ја разлистав на брзина за да видам дали вреди за дадените пари. Досега вообичаено купував книги за кои имаше можност да ја погледнам содржината и секако имаше различни прегледи од страна на оние кои ја имаат купено и прочитано, онака како што го опишав процесот во Што може да се научи од Amazon за бизнис. Но, овој пат беше поинаку, добив e-mail од amazon дека набргу ќе излезе во продажба оваа книга и доколку сум заинтересиран по специјална цена да ја купам да ја нарачам веднаш. Затоа и немаше можност да ја видам содржината ниту да има некој претходен читател кој ќе напише нешто за книгата.

Во секој случај, не се разочарав од онаа колку што можев да го забележам во прелистувањето на книгата: Marketing in the Age of Google: Your Online Strategy IS Your Business Strategy (Маркетинг во ерата на Google: Вашата онлајн стратегија e Ваша бизнис стратегија). Многу работи опфатени во книгата ги знам без да ми каже некој и ги користам во остварување на бизнис цели уште пред 3 години. Но, досега немав потврден систематски приод од некој експерт, поранешен вработен во Google како Vanessa Fox во однос на споделените идеи и практики на користење на Google во бизнис цели.

Како што кажав веќе 3 години не го користам Google само како средство за пребарување на интернет, туку го користам и за анализа на пазарот, проценка на однесување на потрошувачите и секако за зголемување и поттикнување на креативноста. Токму, за тоа се однесува и оваа книга колку што можев да забележам од прелистувањето.

За да не должам многу, засега би ги претставил само главните наслови од книгата, а подетален преглед ќе напишам откога ќе ја прочитам целата детално. Следниве теми се обработени во книгaта:

  1. Како пребарувањето го промени Вашиот бизнис?
  2. Како да ги користите податоците од пребарувањето за да ја подобрите бизнис стратегијата и стратегијата за производи?
  3. Како пребаруваме?
  4. Градење на личноста на оној кој пребарува: Отворање на вратата на маса на потрошувачи кои досега ги спречувавте да влезат.
  5. Како функционираат пребарувачите?
  6. Имплементација на ефективна стратегија за пребарување?
  7. Работа со развивачите: Како да ја трансформирате бизнис стратегијата во еден технички говор?
  8. Како преку податоците да добиете мерки на акција за кои имате потреба?
  9. Социјални медиуми и пребарување
  10. Што понатаму: по Google и 10 сини линкови.

Интересни теми и практични работи.

post

Зошто е Важно 80/20 Правило?

80/20 Правило

80/20 Правило - Пат кон вистински успех

Повеќепати досега го потенцирав 80/20 правило како едно правило кое е присутно насекаде не само во бизнис светот. Еден претприемач и неговиот бизнис се наоѓа во едно динаично опкружување кое е се повеќе и повеќе подинамично. Границите помеѓу еден бизнис кои до вчера можеа прецизно да се определат денеска се скоро невидливи. Така да денес компании од Кина конкурираат на различни тендери во нашата околина што до пред 20 години беше незамисливо.

Но, она што е се позабележливо е дека модерната глобализација го потврдува 80/20 правилото преку постоење на следниве групи:

  • Витално Малцинство (Vital Few) и
  • Тривијално Мнозинство (Trivial Many)

Сите сакаме да бидеме во таа група на витално малцинство кое според 80/20 правилото претставува 20% од глоблната популација. Насекаде околу нас ќе забележиме ентитети кои спаѓаат во тривијалното мнозинство, но тоа не е тоа. Прашањето е како?

Принцип на итерација при 80/20 правило

Доста долго го анализирам оваа правило и нешто што забележав дека за неговата вистинска примена важи законот за итерација што всушност претставува постојано повторување на процесот до насјитните детали (или потсистеми) за да се постигнат поставените цели. На овој принцип се базира и фракталната филозофија како една менаџерска филозофија за подобрување. На пример, сакаме да бидеме во делот витално мнозинство тогаш нашиот бизнис ќе треба да го користи следниов приод:

  • Бизнис – 80/20
    • Систем 1 – 80/20
      • Подсистем 1 – 80/20
        • Човек 1 – 80/20
          • Активност 1 – 80/20
          • Активност 2 – 80/20
          • Активност 3 – 80/20
        • Човек 2 – 80/20
        • Човек 3 – 80/20
      • Подсистем 2
      • Подсистем 3
    • Систем 2
    • Систем 3

Значи во сите сегменти од функционирањето на нашиот бизнис ќе треба да го примениме оваа правило. Системскиот приод е најдобриот приод за оваа примена. Тоа значи дека за да ви биде полесно ќе морате квалитетно да го системтизирате Вашиот бизнис.

Но сепак не е се во математика, статистика и анализа на податоци. Повеќе е до самите нас. Не сме сите добри во математиката, но добри сме во размислувањето, сепак ние претставуваме најинтелигентни суштества на планетата.

80/20 Размислување

Бидејќи при 80/20 правило важи принципот на итерација сепак мора да се тргне од нас самите, односно нашето размислување. Затоа и како основа за еден квалитетен живот како на личен така и на бизнис план претставува примена на 80/20 размислување.

Секогаш не можеме да бараме податоци, да анализираме и да избираме што е важно а што не е важно. Почесто ќе се базираме на наши проценки и избор на неколку важни работи игнорирајќи еден куп на неважни работи. Но, не можеме од еднаш да бидеме перфектни во примена на оваа правило, бидејќи е потребно вежбање на нашиот мозок да се насочува на тие Важни работи.

На пример во RFM формула се насочивме преку анализа на однесувањето на потрошувачите да дојдеме до тоа витално малцинство кое можеби ни носи над 80% приход. Од друга страна за насочување на одреден сегмент на пазарот со потенцијални купувачи ќе немаме податоци за нивно однесување. Но, затоа можебе да ги претпоставиме и да го најдеме тој наш сегмент кој ќе претставува витално малцинство.

Примена на 80/20 размислување

Иако не постојат шаблони и темплејти ќе се обидам да извлечам неколку прашања кои ќе ве водат низ процесот на 80/20 размислување. Едно нешто е важно што треба да го напоменам. Никогаш не заклучувајте веднаш како да го знаете одговорот, обидете се да одите низ сите прашања и не само овие туку и ваши и воведете колку што можете поголем степен на креативност во Вас.

  1. Што претставува 20% од нешто што води до 80% од друго нешто?
  2. Зошто се тие 20% од нешто што водат со 80% од нешто друго?
  3. Кои се 20% од причини што води до 80% на ефекти?
  4. Зошто се тие 20% причини што водат со 80% од ефекти?
  5. Кои се 20% влезови кои водат до 80% на резултати?
  6. Зошто се тие 20% од влезови што водат со 80% од нешто резултатите?

Ова се само прашања кои ќе треба да го поттикнат вашето 80/20 размислување, но слободно можете да додавате уште Ваши прашања со цел да дојдете до квалитетен заклучок за тоа што претставува витално мнозинство за Вас и за Вашиот бизнис.

Затоа и е важно 80/20 правило, за да го примените 80/20 размислување во секојдневниот живот.

post

Што еден претприемач има заедничко со агентот 007?

Претприемач и агентот 007

Претприемач и агентот 007

Да си во кожа на еден претприемач не е едноставно. Но, и во кожата на еден агент како агентот 007 исто така не е едноставно. И двете занимања бараат специфични однесувања, активности и секако крактеристики.

Филмовите со агентот 007 отсекогаш ми биле едни од најомилените. Тоа се филмовите кои си ги оставив во својата колекција на видео касети кои денес воопшто веќе не се користат.

Отсекогаш ме интересирало што е тоа што овој агент го прави успешен во неговата работа, а тука ќе се обидам да ги издвојам и зедничките елемент со еден претприемач.

Секогаш имаат решение и во најризичните ситуации

Оваа е една од највaжните карактеристики на секој агент, па и на секој претприемач. Решението го претвораат во акција, за да има некакво влијание тоа решение врз нивната околина во која што функционираат.

Секогаш ја користат технологијата како помагало во работата

Агентот 007 е познат по тоа што секогаш има некои врвни технолошки изуми крај себе кои му се наоѓаат во одредени ситуации како корисни помагала, особено во оние ризичните. Така да и успешните претприемачи се оние кои никогаш не ја занемаруваат технологијата и кои се обидуваат секогаш да ги искористат најновите технолошки достигнувања во развојот на нивниот бизнис. Агентот 007 го има Q, но претприемачот има воспоставено систем за следење на најновите технолошки достигнувања.

Користи информации за донесување на одлуки

Информациите се основа за квалитетни одлуки. Работа на еден агент како 007 е да собира, и не само да ги собира туку и да ги искористи информациите во одбрана на својата земја. Од друга страна еден успешен претприемач собира, обработува и користи информации за да го развие и подобри сопствениот бизнис.

Комуницира и со непријателите и со пријателите

Дали можеме да дојдеме до добра информација без да комуницираме? Природата ни ја дала таа дарба да уште од бебиња започнеме со комуникација и постојано да ја надоградуваме на повисоко ниво. Но, тука е прашањето дали треба да комуницираме со непријателите? Мислам дека треба. Во непријателите лежат најквалитетните информации, доколку комуницираме со нив можеме да дознаеме зошто не не сакаат, дали ни се конкуренти, што можеме да подобриме…

Брзо носи одлуки

Брзи или брзоплети одлуки? Брзината е добра доколку не се наруши квалитетот на самата одлука. Но, понекогаш, ако не и често немаме доволно време секоја одлука да ја разглобуваме, анализираме, проучуваме… Едноставно, ќе не прегази времето. Во написот за Важноста на брзите одлуки навлегов во една математичка вaријанта на она што влијае на тоа одлуките да бидат брзи, но во исто време и квалитетни.

Квалитетна одлука = f(f(оптимална количина на информации, форма), аналитичност на претприемачот)

Разменува информации со други претприемачи (агенти)

Ова поточно значи соработка со други претприемачи. Можеби во минатото гледано од една перспектива на еден претприемач ова беше невозможно, но да не забораваме дека ние живееме во ХХI век. Да не заборавиме дека она што беше правило вчерa не важи денес. Така да денес постојат многу примери на успешни бизниси изградени врз сорaботка и размена на информации помеѓу различни претприемачи.

post

Зошто сегментација на пазарот?

Сегментација на пазарот Не верував дека ќе налетам на некој кој погрешно ја толкува сегментацијата на пазарот, а на некој начин е вовлечен во процес на бизнис планирање, но од другата страна, не од страна на претприемачите. Но, добро и тоа се случува.

Еве ја приказната од еден претприемач кој ми е роднина.

Мал бизнис таргетира извозни компании. И нормално во процесот на бизнис планирање го интересира колкав е бројот на тие компании кои извезуваат. Тоа го прави во делот на сегментација на пазарот како што го опишав во насловот Анализа на пазарот и индустријата. Тука следуваат пити во вид на графици, се со цел да се види конкретниот број на извозници при што пазарот го сегментира на извозници и неизвозници и делот извозници претставува целен пазар.

Претприемачот не го интересира износот во долари на извозот на една компанија, во тој сегмент од пазарот. За него и оној кој имал извоз од 2000$ а сака да има 10000$ и оној кој има милионски суми е една бројка – број 1. Значи тој едноставно, го прави она што треба да го прави да ги собере во вид на бројка сите извозници за да види дали ќе има доволно критична маса на потенцијални купувачи за неговите производи и/или услуги. Програмерите користат наредба Count за една ваква „сложена операција“.

Податоци кои ги користи претприемачот се податоци за компании кои имале EXA1 декларација. За оние кои не се запознаени тоа е декларација која означува редовен извоз, со пополнета рубрика 24 од ЕЦД-то 11. Тоа пак 11 значи Конечно купување/продажба.

Е сега некој му вели на тој претприемач не е добра сегментацијата бидејќи не се гледа кој процент претставува извоз во вид на лон систем. Не ми е јасно како некој може да меша лон систем со редовен извоз кои што се сосема различни постапки и кои имаат сосема различни декларации. Едната ЕXA1 а лон или поточно кажано повторен извоз на привремено увезена стока заради облагородување со EXA3. И начинот на плаќање е различен (рубрика 24) каде се впишува 51 што значи трансакција после преработка.

Можеби причината е да се види структурата на извозниците. Но, зошто некој да го оптеретува бизнис планот доколку една таква информација не му е важна бидејќи се оди според принципот сите се еднакви.

Едно е важно: Сегментацијата на пазарот се прави за да се измери критичната маса на потенцијални потрошувачи, за да се спореди предвидување на продажба со таа критична маса, за да се мери учеството на бизнисот на пазарот и со тоа да се види колкав процент држат конкурентите…

А не се користи заради поубав график во вид на пита со проценти на различни имиња на потенцијални купувачи. Тоа подоцна самите ќе си го правите во вид на маркетинг или продажна стратегија.

post

Се се базира на ваш избор, не на талентот!

Често се обидувам тука да наметнам едно сосема ново размислување за самите нас, со цел да го отстраниме митот дека немаме талент за нешто. За се имаме талент доколку сакаме да го работиме тоа нешто.

Ние и нашиот избор сме во центарот, а не нашиот талент

Во 6-ти слој за успех на еден претприемач и талентот како само еден дел од тој последен слој го напишав следново:

Зошто сметам дека талентот не е на прво место за еден претприемач да биде успешен? Наједноставно кажано затоа што не постои специфичен претприемнички талент кој е потребен за да може да кажеме дека тој е претприемач со вроден талент. Различни бизниси имаат различни претприемнички потреби за одреден вид на талент. Некој бизнис бара повеќе финансиски талент, други од менаџерски талент, трети пак талент за квалитетна аналитика, а повеќето бизниси од сите типови на можни таленти. Значи бизнисот е микс на таленти, кои претприемачот или пак менаџерот треба да ги управува за да го извлече максимумот.

Во Бизнисот е една обична игра дадов едно мислење за талентот во однос на бизнисот:

Сметам дека талентот не може да се стави само во категорија на „вродени“ карактеристики на еден индивидуалец. Талентот може да има вродени карактеристики или одредени предиспозиции но во исто време талентот е нешто што постојано се гради преку учење, пробување, искуство… Така да не можеме да кажеме дека сите кои се талентирани се талентирани бидејќи се родени со тој талент. На пример, еден фудбалер може да има талент преку некои предиспозиции во вид на пасија за фудбалот. Но, за да го постигне она што го постигнува секој успешен фудбалер во текот на неговата кариера секојдневно тренира, има различни тренери (учители, консултанти…), колку повеќе натпревари игра се е подобар и подобар (искуство).

Можете да забележите дека не сум некој кој верува дека луѓето се раѓаат со одреден талент за да бидат нешто во животот. Сите се раѓаме исти. Но, како ќе не учат, воспитуваат, како ќе не школуваат, каде ќе не школуваат, што ќе бидеме, што ќе работиме, дали ќе бидеме успешни и уште многу други како, што, дали ќе зависи од наш избор, можеби во првите години и на нашите родители и учители/ки.

Ќе искористам една структура на CV кое некако стана многу популарно средство за барање на работа или пак за избор на работник.

1. Лични податоци

Во овој дел немаме многу избор, едноставно родени сме тогаш и тогаш, таму и таму. Но за нашето име и презиме одлучиле нашите родители или пак Кумот. Единствено нешто кој е наш избор е брачниот статус. Но, за една компанија овие лични информации како дел од CV воопшто не се битни. Тие се само тука за да може оној кој го чита да разликува за кого се однесуваат информациите во тој документ.

2. Образование

За основното училиште не сме можеле да одлучуваме. Но, одлучуваме и избираме за во кое средно училиште ќе одиме и кој факултет ќе завршиме. Од овој наш избор ќе зависи дали ќе бидеме инженери, правници, лекари, музичари, уметници… Зависи, но и немора да значи дека ќе бидеме токму тоа. Каде е тука талентот? Тука е ние го градиме, учиме, се дружиме, разговараме, споделуваме…

3. Дополнителни обуки и сертификати

Дали ова се наши вродени таленти. Секако не, сме избрале да посетиме курс за нешто и да добиеме сертификат дека имаме некакво дополнително знаење за предметот на тој курс.

4. Познавање на јазици

И овој дел од едно CV e наш директен избор. На приемр, мојот избор кога имав 9 години и бев трет степен детски курс за англиски беше наместо во училницата во тогашниот „Пионерски дом“ да играм фудбал во школскиот двор. Но, подоцна кога почнав да барам литература за моето образование ми беше потребен англискиот, но пак избрав да не одам на курс туку да си го земам речникот и да читам од книгата. Значи се е наш личен избор.

5. Други вештини

Овој дел со вештините од CV-то е оној најинтересниот дел. Дел каде се билдаме со комуникациски вештини, работа со компјутери, различни софтвери… Но, еве на пример кога се раѓаме со која комуникациска вештина сме родени освен да вреснеме кога сме гладни или кога не боли нешто? Значи оние вистинските комуникациски вештини ги добиваме низ текот на нашиот живот и тоа врз основа на нашиот избор со кого ќе се дружиме, кои комуникациски средства ќе ги користиме, каков јазик ќе користиме… За познавање на работа со комјутери е повторно наш личен избор дали сакаме или не сакаме да работиме со нив и што ќе работиме со истите. Она што е интересно е дека денес веќе сите пишуваат работа со компјутери, иако освен некоја игра на компјутерот на своите деца ништо друго не може да сработи.

6. Искуство и квалификации

Сите се раѓаме без никакво искуство. Сите одиме во ист образовен систем. Но, искуството го стекнуваме по наш избор. Дали ќе работиме некаде за да го набилдаме нашето искуство зависи од нас самите, а не од вродениот талент.

Мислам дека е доволно. Едноставно сите гледаме во едно CV како нешто што може да ни помогне. Но, штета не е предвидено подрачје за талент. Така да доколку имате страв дека Вие не можете да бидете претприемач, бидејќи немате талент за тоа, ослободете се од тој страв. Се се учи, и за се има информација некаде.

post

Претприемачи барајте знаци наместо одговори!

Претприемачот ги следи знаците

Претприемачот ги следи знаците

Можеби со овој пост ќе внесам малку невообичаеност во секојдневието на еден претприемач. Ќе се прашате зошто? Затоа што сакам да ја скршам коцката мраз во која сме ставени заради нашето општество во коешто живееме (и не само наше, тоа е секаде, нашето само препишува) и економијата која секојдневно врши притисок врз нашиот живот и нашето однесување.

Насловот – барајте знаци наместо одговори го знаев и применував многупати досега во мојот личен живот и секако професионален живот. Ние сме родени да размислуваме и да проценуваме и просудуваме согласно знаци. Но, тоа наше лично богатство или тој личен талент преку едукацискиот систем и корпорацискиот систем (мислам на вработување во поголеми компании или државни институции) полека но сигурно со текот на времето ни се одзема и едноставно ние стануваме тоа што не сме, бараме одговори наместо знаци. А одговорите не можеме да ги најдеме, бидејќи некогаш едноставно не постојат.

Ако не верувате во ова што го велам погледнете само колку луѓе има невработени кои не знаат што да прават со себе, а меѓу нив има и високо-образован кадар. Погледнете еден друг систем што направи од луѓето не само во Македонија туку и во нашата околина. Погледнете овој систем сега што прави. Вчера гледав една емисија на една босанска телевизија каде зборуваше поранешен директор на една поголема развојна компанија во Босна и Херцеговина која најголемите успеси во продажба на сопствени патенти (дури и во САД) ги има пред војната. Сегашниот проблем го гледа во неквалитетно образование на високообразовните институции, не заради вина на тие институции туку заради тоа што државата малку пари издвојува во просек за еден студент. Нема лаборатории, нема практична работа, едноставно креативноста во размислувањето е ставена на најниско ниво. Важно е да се следат правилата, процедурите…

Служби за борба против криминал

Би сакал да дадам една аналогија помеѓу претприемачот и инспекторите во службите за борба против криминал во однос на тоа барање на одговори или знаци.

На пример, при еден криминал инспекторите не тргнуваат и не можат да тргнат со барање на одговор бидејќи тоа би значело дека се очекува тие да треба да знаат кој го направил криминалот. Ова е невозможно. Затоа тие кога истражуваат за некој криминал собираат знаци, дури и најситни знаци кои можеби ништо не знаат. Целта е со помош на тие знаци да дизајнираат можни сцени на тој криминал. На ваков начин по секој откриен знак се поставува прашањето ЗОШТО, КОЈ, КАКО, МОТИВ…

Тоа значи дека тие првин собираат знаци преку различни информации, истражуваат и потоа размислуваат за можните осомничени.

Но, како е со претприемачите? Вообичаено, можеби над 90% од претприемачите размислуваат обратно од истражителите. На пример, тие бараат одговор во вид на:

Сосема погрешен пристап! Никој освен самите Вие не може да ви даде одговор за тоа кое маркетинг средство да користите. Па, ни вие одеднаш нема да можете да го дадете одговорот. Првин ќе треба да собирате знаци за верувањата, чувствата и желбите на Вашите потенцијални потрошувачи. Тие знаци ќе треба да ги вклопите во Вашиот бизнис модел, да ги усогласите со Вашите производи и/или услуги и да одлучите за маркетинг средства кои најмногу ќе одговараат на сите тие откритија. Повеќе за квалитетни одлуки можете да прочитате во Важноста на квалитетни одлуки.

Насекаде околу нас се знаци а не одговори

Сите ние сме постојано облеани со различни знаци во нашиот живот. Додека одиме по улица забележуваме различни однесувања на различни луѓе. Додека продаваме забележуваме различни гестикулации на нашите купувачи. Додека сурфаме на интернет забележуваме различни однесувања на различни други сурфери. Сето тоа се знаци кои може да имаат корисност за нашиот бизнис, но и не мора. Ваше е да ги собирате, класифицирате, обработувате и искористите тогаш кога ќе започнете со барање на различни одговори.

Понекогаш заради тоа како сме научени да размислуваме, знаците може и да ги гледаме а да не ги регистрираме. Тоа е голема опасност за еден претприемач, кој мора да ги базира своите одлуки на знаците кои ќе имаат некакво значење во расветлување на патот кој треба да се помине.

Затоа доколку се насочиме да ги бараме одговорите можеме да ја потрошиме нашата вечност во тоа барање како оној претприемач опортунист.

За вакво наше однесување не се криви политичарите, тие само препишуваат и извршуваат наредби без да размислуваат и без да знаат што прават и кои се последиците. Едноставно можеме само да кажеме, Господи прости им, тие не знаат што прават! Но, сепак и ние сме тие кои треба да го промениме нашето однесување и едноставно да не бараме одговори кога знаеме дека нема да ги најдеме, туку да ги следиме знаците, да бидеме креативни и самите да носиме одлуки за нашата судбина.

post

Бизнис План – SWOT Анализа

Ќе продолжиме со следниот елемент, односно наслов на бизнис план – SWOT анализа. Досега ја завршивме насловната страна, и го поставивме скелетот на бизнис планот преку краткото резиме и содржина. Потоа, напишавме нешто за нашата компанија, ги дефиниравме производите и услугите како како за поблиска така и за подалечна иднина и направивме анализа на пазарот и индустријата. Сега е време во овој дел од процесот на планирање да ги видиме нашите реални позиции.

Бизнос план - SWOT анализа

Бизнис план - SWOT анализа

Во претходната верзија на овој туторијал овој наслов за SWOT анализа беше како последен додека во оваа верзија одлучив да го сместам веднаш по завршување на анализа на пазарот и индустријата. Зошто? Првин, SWOT анализата претставува анализа на бизнисот од внатрешен и надворешен аспект. Отсекогаш сметам дека внатрешен аспект е многу поедноставен додека вистински проблеми со оваа алатка доаѓаат при анализа на надворешниот аспект. Па затоа додека сеуште ни е свежа анализата на пазарот и индустријата која на некој начин ги анализира сите надворешни чинители на една бизнис околина, подобро е веднаш да се премине со SWOT анализата.

Треба да напоменам дека ни оваа анализа не мора да биде конечна туку едноставно може да се ажурира и по завршување на останатите наслови. Ова е процес на планирање, а не пишување на план. Така да се додека сме во работна верзија, ние планираме.

Општо за SWOT анализа

SWOT анализа е елемент кој треба да воведе реалност во вашиот бизнис план. Зошто реалност? Она што досега го анализиравте и планиравте преку SWOT анализа треба да видите колку сте реални, односно кои се вашите јаки и слаби страни, како и тоа кои се вашите можности и закани. Кратенката SWOT претставува акроним добиен од првите букви на зборовите.

  • Strengths – силини, јачини, предности…
  • Weaknesses – слабости, недостатоци, мани…
  • Opportunities – шанси, можности, прилики…
  • Threats – закани, опасности…

Повеќе детали за основите на SWOT анализа можете да прочитате во Основи на SWOT анализа.

Чекори за спроведување

Овој наслов на бизнис планот не опфаќа голем процентуален дел од планот како документ, на пример доволна е една страна за се да се претстави. Но, посложен и повеќе време ќе одземе процесот на спроведување на анализата. Како најдобар начин за спроведување на оваа анализа е да се поставуваат прашања и да се одговараат истите. Како еден пример на поставен прашања за спроведување на SWOT анализа за бизнисите во Македонија можете да ги прочитате во Прашалник за SWOT анализа.

Како најдобро решение сеуште сметам дека ќе биде спроведување на SWOT анализа преку 4 чекори:

  1. Скенирање на надворешна и внатрешна бизнис околина.
  2. Анализа на внатрешната и надворешната околина.
  3. Конструирање на SWOT матрица.
  4. Дефинирање на стратегии.

SWOT анализа - 4 чекори

SWOT анализа - 4 чекори

Прашањата за внатрешните и надворешните елементи за бизнисот би требало да ги опфатат сите значајни работи кои имаат или пак ќе имаат влијание врз бизнис перформансите. Како основни прашања на кои ќе треба да дадете одговор и добар водич во овој процес ќе ви послужи написот за SWOT анализа во 4 чекори.

За секој одговор поставете си го прашањето ЗОШТО. Зошто нешто е јака, а зошто слаба страна? Зошто нешто е можност, а зошто закана?

Вклучување на анализата во бизнис планот

Она што анализирате, преку одговор на прашања и дефинирање на слаби и јаки страни, како и можности и закани не треба се да го сместите на некој начин во бизнис планот. Доволно е бизнис планот да биде содржан со два поднаслови од овој наслов:

  • SWOT матрица
  • Стратегии кои произлегуваат од SWOT анализа

SWOT матрица

Поставете ги сите елементи во SWOT матрица како што е прикажано на сликата подолу согласно тоа дали тој елемент претставува јака или слаба страна или пак можност или закана.

SWOT матрица

SWOT матрица

Стратегии

Откако ќе ја имате SWOT матрицата потребно е да изберете соодветни стратегии согласно дијаграм на текот за SWOT анализа. Од SWOT матрицата можете да извлечете 4 стратегии:

  • S-O стратегии (Силини-Можности стратегии). Овие стратегии треба да ги искористат можностите кои се вклопуваат во силните страни на бизнисот.
  • W-O стратегии (Слабости-Можности стратегии). Овие стратегии треба да овозможат да се надминат слабостите на бизнисот додека се искористуваат можностите.
  • S-T стратегии (Силини-Закани стратегии). Овие стратегии треба да овозможат искористување на слните страни, додека се елиминираат или намалуваат заканите од околината.
  • W-T стратегии (Слабости-Закани стратегии). Овие стратегии треба да овозможат елиминирање на слабостите и оневозможување на надворешните закани да ги допрат токму тие слабости на бизнисот.

Наведете ги овие стратегии описно. Можете да ги сместите и во една табела при што за секоја стратегија во посебна колона наведете ги тактикте, а за секоја тактика наведете ги активностите кои ќе треба да ги превземете. Понатаму ќе стане збор и за други стратегии во бизнис планот како продажна и маркетинг стратегија. Стратегиите кои ќе се дефинираат тука ќе претставуваат темел за развој на бизнисот во иднина.

SWOT стратегии

Стратегии од SWOT анализа

Во секој случај овој наслов е многу важен елемент од целиот процес на планирање. Доколку уште сега го спроведете искрено и реално, ги дефинирате стратегиите секако подоцна ги спроведете тие стратегии можете да очекувате да имате недостижна конкурентска предност.

post

Како да ја користите FAQ страната на претприемач?

Пред еден подолг период ја поставив страната FAQ на претприемач за да може слободно да се поставуваат прашања на кои ќе се обидеме по ред да ги одговараме и во исто време одговорите на тие прашања да бидат во можност за другите читатели да ги видат. Едноставно, што е и целта на претприемач – Извор на знаење за амлите бизниси. Досега беше искористен само од еден читател кој кратенката FAQ ја имаше сфатено како Меѓународна организација за земјоделство и исхрана. Моја грешка е што досега не дадов објаснување за начинот и можноста за користење на оваа FAQ страна која значи Најчесто поставувани прашања (Frequently Asked Questions).

Која е целта на FAQ-Прашања страната на претприемач?

Во последниве 7-8 месеци постојано добивам mail-ови од Вас, ценети читатели на претприемач со прашања од различна проблематика на претприемништвото. На секое прашање се обидувам да одговорам, можеби со задоцнување, но сепак давам одговори.

Затоа и ми дојде идеја сите прашања да се групираат на една страна на претприемач која ќе биде корисна и за другите читатели. За таа цел и ја додадов истата, бидејќи сметам колку повеќе соработуваме и споделуваме информации помеѓу себе толку подобро за сите нас преку развојот на претприемништвото во Република Македонија.

Како да се користи FAQ страната?

  • Едноставно од менито кликнете на FAQ-Прашања

Мени со FAQ страната на претприемач

  • Ќе се отвори страна на која се наоѓа формата за поставување на прашање и веќе поставените прашања.

Форма за поставување на прашања на претприемач

  • На истата страна се веќе поставените и одговорени прашања. Пред да поствите пршање погледајте ја првин листата дали Вашето прашање е веќе одговорено за да не се дуплираат прашањата.

Одговорени прашања на претприемач

  • Доколку оставите e-mail ќе добиете повратен е-mail дека Вашето прашање ќе биде одговорено во наредните 24 часа и кога одговорот ќе биде достапен ќе го добиете истиот на е-mail.
  • На оваа страна секој може да поставува прашање но, не значи дека секое прашање ќе биде одговорено. Сите глупости и веќе поставени и одговорени прашања нема да се процесираат. Секое квалитетно и вистинито прашање од областа на претприемништвото ќе се обидеме да го процесираме и обработиме во одговор за 24 часа.