post

Се се базира на ваш избор, не на талентот!

Често се обидувам тука да наметнам едно сосема ново размислување за самите нас, со цел да го отстраниме митот дека немаме талент за нешто. За се имаме талент доколку сакаме да го работиме тоа нешто.

Ние и нашиот избор сме во центарот, а не нашиот талент

Во 6-ти слој за успех на еден претприемач и талентот како само еден дел од тој последен слој го напишав следново:

Зошто сметам дека талентот не е на прво место за еден претприемач да биде успешен? Наједноставно кажано затоа што не постои специфичен претприемнички талент кој е потребен за да може да кажеме дека тој е претприемач со вроден талент. Различни бизниси имаат различни претприемнички потреби за одреден вид на талент. Некој бизнис бара повеќе финансиски талент, други од менаџерски талент, трети пак талент за квалитетна аналитика, а повеќето бизниси од сите типови на можни таленти. Значи бизнисот е микс на таленти, кои претприемачот или пак менаџерот треба да ги управува за да го извлече максимумот.

Во Бизнисот е една обична игра дадов едно мислење за талентот во однос на бизнисот:

Сметам дека талентот не може да се стави само во категорија на „вродени“ карактеристики на еден индивидуалец. Талентот може да има вродени карактеристики или одредени предиспозиции но во исто време талентот е нешто што постојано се гради преку учење, пробување, искуство… Така да не можеме да кажеме дека сите кои се талентирани се талентирани бидејќи се родени со тој талент. На пример, еден фудбалер може да има талент преку некои предиспозиции во вид на пасија за фудбалот. Но, за да го постигне она што го постигнува секој успешен фудбалер во текот на неговата кариера секојдневно тренира, има различни тренери (учители, консултанти…), колку повеќе натпревари игра се е подобар и подобар (искуство).

Можете да забележите дека не сум некој кој верува дека луѓето се раѓаат со одреден талент за да бидат нешто во животот. Сите се раѓаме исти. Но, како ќе не учат, воспитуваат, како ќе не школуваат, каде ќе не школуваат, што ќе бидеме, што ќе работиме, дали ќе бидеме успешни и уште многу други како, што, дали ќе зависи од наш избор, можеби во првите години и на нашите родители и учители/ки.

Ќе искористам една структура на CV кое некако стана многу популарно средство за барање на работа или пак за избор на работник.

1. Лични податоци

Во овој дел немаме многу избор, едноставно родени сме тогаш и тогаш, таму и таму. Но за нашето име и презиме одлучиле нашите родители или пак Кумот. Единствено нешто кој е наш избор е брачниот статус. Но, за една компанија овие лични информации како дел од CV воопшто не се битни. Тие се само тука за да може оној кој го чита да разликува за кого се однесуваат информациите во тој документ.

2. Образование

За основното училиште не сме можеле да одлучуваме. Но, одлучуваме и избираме за во кое средно училиште ќе одиме и кој факултет ќе завршиме. Од овој наш избор ќе зависи дали ќе бидеме инженери, правници, лекари, музичари, уметници… Зависи, но и немора да значи дека ќе бидеме токму тоа. Каде е тука талентот? Тука е ние го градиме, учиме, се дружиме, разговараме, споделуваме…

3. Дополнителни обуки и сертификати

Дали ова се наши вродени таленти. Секако не, сме избрале да посетиме курс за нешто и да добиеме сертификат дека имаме некакво дополнително знаење за предметот на тој курс.

4. Познавање на јазици

И овој дел од едно CV e наш директен избор. На приемр, мојот избор кога имав 9 години и бев трет степен детски курс за англиски беше наместо во училницата во тогашниот „Пионерски дом“ да играм фудбал во школскиот двор. Но, подоцна кога почнав да барам литература за моето образование ми беше потребен англискиот, но пак избрав да не одам на курс туку да си го земам речникот и да читам од книгата. Значи се е наш личен избор.

5. Други вештини

Овој дел со вештините од CV-то е оној најинтересниот дел. Дел каде се билдаме со комуникациски вештини, работа со компјутери, различни софтвери… Но, еве на пример кога се раѓаме со која комуникациска вештина сме родени освен да вреснеме кога сме гладни или кога не боли нешто? Значи оние вистинските комуникациски вештини ги добиваме низ текот на нашиот живот и тоа врз основа на нашиот избор со кого ќе се дружиме, кои комуникациски средства ќе ги користиме, каков јазик ќе користиме… За познавање на работа со комјутери е повторно наш личен избор дали сакаме или не сакаме да работиме со нив и што ќе работиме со истите. Она што е интересно е дека денес веќе сите пишуваат работа со компјутери, иако освен некоја игра на компјутерот на своите деца ништо друго не може да сработи.

6. Искуство и квалификации

Сите се раѓаме без никакво искуство. Сите одиме во ист образовен систем. Но, искуството го стекнуваме по наш избор. Дали ќе работиме некаде за да го набилдаме нашето искуство зависи од нас самите, а не од вродениот талент.

Мислам дека е доволно. Едноставно сите гледаме во едно CV како нешто што може да ни помогне. Но, штета не е предвидено подрачје за талент. Така да доколку имате страв дека Вие не можете да бидете претприемач, бидејќи немате талент за тоа, ослободете се од тој страв. Се се учи, и за се има информација некаде.

post

Блог – Маркетинг Средство 55

Блог како маркетинг средство

Блог како маркетинг средство

Како 55-то маркетинг средство во овој серијал за маркетинг средства на претприемач ќе го презентирам едно од најмоќните онлајн маркетинг средства – блогот. Она што е карактеристично за блогот како маркетинг средство е дека може да има огромно влијание и врз другите онлајн маркетингс средства, но од друга страна не е лесно, бара многу повеќе работа и ангажман. Се надевам дека веќе имате онлјн стратегија за Вашиот бизнис во кој е или ќе биде опфатен блогот како еден вид на маркетингс средство.

Што претставува блог?

Постојат различни дефиниции за блоговите. Ќе наведам некои од нив:

  • Онлајн дневник на кој може да се пишува, чита и едитира.
  • Дневник кој е објавен или се објавува на интернет.
  • Веб страна која има јавен пристап и на која се објавуваат различни написи.
  • Специјализирана веб страна која им овозможува на индивиуалци или група на индивидуалци да делат различни лични информации од секојдневниот живот.
  • Веб страна на која написите се објавени во вид на весник и прикажани во хронолошки редослед.
  • Еден вид на веб страна која постојано се ажурира со написи, коментари, опис на случки, или пак други материјали во вид на аудио или пак видео, каде што овие написи се прикажани во хронолошки редослед.

Сметам дека ова се доволно дефиниции за да се види што е тоа блог.

Блогот (Blog) е кратенка од weblog што може да се преведе како веб дневник. Инаку од погоре наведените дефиниции ќе можеме да го кажеме следново:

  • Блог претставува веб страна
  • Блогот има различни написи
  • Блогот има динамична содржина што значи дека на него постојано се објавуваат нови содржини
  • Содржината може да биде во вид на напис, коментар, случки, слики, аудио и видео
  • Написите на блоговите може да бидат читани од страна на читателите на интернет
  • Читателите може да праќаат коментари на написите

Често пати поставувано прашање е во што се разликува блогот од класичните „нормални“ веб страни. Иако знаеме дека и блогот претставува веб страна. Еве во што се најголемите разлики:

  • Постојано ажурирање на содржината. Класичните „нормални“ веб страници не се менуваат често, па затоа кога ќе се навратите неколку пати и не забележите промена, веќе нема да ја посетувате таа веб страна. Ова значи и губење на посетители и намалување на моќта на веб страната како маркетинг средство. Со блог како посебен тип на веб страница содржината се менува постојано, дневно, неделно, месечни итн. Што почесто, толку подобро.
  • Можност читателите да остават коментар. Оваа е навистина огромна разлика во однос на статичните веб страни. Секој напис има функција за коментирање. На ваков начин се овозможува блогот да биде двонасочна комуникациска алатка и непресушен извор на информации за Вашиот бизнис.
  • Едноставност во објавување на написи. За да се објават написи на блогот не е потребно техничко лице. Оваа може да се изведе и од луѓе кои воопшто немаат познавање од техниката користена за веб страници. Објавувањето е едноставно и слично како да работите на Word документ или како што испраќате e-mail.
  • Хронолошки распоред на написите. Во блоговите написите се прикажани во хронолошки редослед со тоа што најновите написи се први. А, од друга страна до сите останати написи може да се дојде преку функција пребарување или пак листање на категориите на написите на блогот.

Како може да Ви помогне блогот како маркетинг средство?

Постојат многу придобивки кои ќе можете да ги искористите со Вашата веб презентација со блогот како посебен вид на веб страница.

Едноставно треба да се тргне дека интернетот претставува светско чудо на нашето време. Нема кој не е закачен на интернет. Според веб странатa www.internetworldstats.com која се занимава со статистика за користење на интернетот последните податоци за декември 2009 година покажуваат 1.802.330.457,00 интернет корисници на светско ниво што претставува 26,6% од глобалната популација на светот. Дали постои друго маркетинг средство кое има толкав број на корисници? И од друга страна кога ќе земеме дека оваа презентација може да се изведе со најмала инвестиција во споредба со другите маркетинг средства, во секој случај ќе влезе во категорија на едно од најефикасни и најефективни маркетинг средства.

Но, да тргнеме по ред. Што е она што може Вашиот бизнис да го добие со избор на блог како дел од Вашата веб презентација?

  • Со блогот Вашиот бизнис ќе добие веб присуство на глобалниот светски пазар. Веќе напоменавме дека 26,6% од глобалната популација користи интернет. Дури и да Вашиот бизнис е локален сепак еден ден ќе ги почувствувате придобивките од оваа презентација.
  • Повеќе индексирани страни од страна на Google претставува можност за повеќе потенцијални купувачи.
  • Презентација на Вашите производи. Можете да направите презентација на сите Ваши производи и/или услуги кои што ги нуди Вашиот бизнис. Овде можете да користите:
    • Текстуален материјал за опис на производите и/или услугите и коментари од Вашите постоечки потрошувачи
    • Слики на производи и/или услуги кои што ги нудите
    • Аудио записи за опис на Вашите производи и/или услуги како и коментари за истите од страна на постоечките потрошувачи
    • Видео материјали за Вашите производи и/или услуги како и коментари од Вашите постоечки потрошувачи.
    • Написи во форма на како да се направи нешто. Ова треба да биде поврзано со производите и/или услугите кои ги нудите.
  • Спроведување на анкети, анализи и истражувања. Блогот можете да го користите и за спроведување на различни анкети како би собрале информации за донесување на поквалитетни одлуки во иднина.
  • Објавување на прес конференции и маркетинг материјали. Секоја прес конференција или информација која се однесува за Вашиот бизнис или пак производите и/или услугите ќе можете да ги објавите преку Вашиот блог.
  • Блогот ќе ве поврзе со многу луѓе кои може да бидат Ваши потенцијални потрошувачи.
  • Ќе знаете што сакаат Вашите потрошувачи или пак потенцијални потрошувачи. Секој блог напис има интегрирано скрипта за коментирање. Секој коментар оставен на некој од Вашите написи ќе ви каже што е она што го сакаат потрошувачите, така да ќе можете да ги насочите сопствените активности во насока на задоволување на тие потреби.
  • Блог написите се вирозни. Вирозен маркетинг е нешто што го сонува секој претприемач. По секој напис може да има прати на пријател по е-mail. Така да можете да очекувате доколку Вашите написи навистина даваат некоја вредност за читателите брзо да се распространат до повеќе луѓе.
  • Блогот може да ви помогне да изградите бренд. Брендот ќе биде името на Вашиот бизнис, логото, слоганот и домеин името на Вашиот блог. На сите материјали што излегуваат од Вашиот бизнис ставајте ги тие работи.
  • Блогот може да ви помогне да изградите солидна репутација. Со објавување на различни написи за Вашата индустрија Вие ќе се градите како еден експерт од тоа подрачје. Оваа постојано ќе ви ја зголемува репутацијата како на Вас како претприемач така и на Вашиот бизнис.
  • Блогот ќе претставува извор на постојано зголемување на границите на вашиот пазар. Доколку имате повеќејазична верзија на блогот Вашиот потенцијален пазар ќе биде неограничен. Доколку сакате да извршите интернационализација на Вашиот бизнис препорака е да имате задолжително и англиска верзија на блогот.
  • Блогот ќе ве спои со потенцијални снабдувачи. Освен од потенцијални купувачи блогот може да биде читан и од потенцијални снабдувачи и тие самите да ве контактираат и бараат да работите заедно.

Ова се само некои од позначајните придобивки кои може да ги добие Вашиот бизнис со блогот. Инаку може да се набројат уште многу други.

Како да се имплементира?

Се надевам дека веќе имате бизнис веб страна, а со тоа и хостинг и бизнис домеин име. Доколку немате завршете ги тие активности пред да започнете со бизнис блогирање. Следете ги следниве чекори:

  • Направете план на темите кои ќе ги обработува Вашиот бизнис блог.
  • Врз основа на темите определете ги категориите.
  • Подгответе барем 10 написи уште пред започнување.
  • Одлучете за домеин името на блогот, односно URL-то. Дали ќе биде www.vasbiznis.com/blog или ќе биде во вид на поддомеин www.blog.vasbiznis.com или пак ќе биде на посебен домеин.
  • Инсталирајте WordPress.
  • Објавете го првиот напис од подготвените 10.
  • Одлучете на кој период ќе го ажурирате. Најдобро е секојдневно, но доколку немате време размислете да одите барем со неколку написи неделно.
  • Подесете ги останатите 9 подготвени написи.
  • Одлучете кој ќе биде одговорен за пишување и ажурирање.
  • Бреинстормирајте постојано нови идеи за написи.
  • Споделувајте се што може да биде интересно и корисно за Вашите потрошувачи.
  • Промовирајте го и со другите традиционални маркетинг средства.

Излезе предолг написов, а мислам дека не успеав се да опфатам. Но, сепак се обидов да претставам некои значења за блогот како едно маркетинг средство.

post

Дали повеќе време работа значи и повеќе завршена работа?

Повеќе работни часови, не значи и повеќе завршена работа

Како 13-то правило во 50 Правила за бизнис продуктивност го ставив правилото дека повеќе работни часови не значи повеќе завршена работа. Дали е ова правило точно и зошто доколку е точно.

Имам видено различни лица, кои работат на исто работно место (за иста плата) со различни резултати и различно потребно време да се комплетира истата работа. Но, зошто е тоа така.

Пред едно два месеци стоејќи пред една наша институција на место каде се пуши, случајно слушнав разговор помеѓу двајца вработени таму. Првиот, разочаран што мора да пие кафе надвор за да запали цигара малку „политички“ наведе дека на менаџментот се ќе му се врати ова „малтретирање“. Тоа беше постар вработен кој можеби повеќе од 20 години работи во таа институција. Помладиот, не сакаше да биде нападнат сегашниот менаџмент возврати со прашање дали тој едноставно прети нешто. Додека постариот вработен си влезе помладиот продолжи да зборува дека тие секој ден си одат во 16:30, додека тој останува до 20:00 на работа. Тука веќе морав да се вклучам во тој монолог едноставно со прашањето: Дали доколку седиш до 20:00 значи дека си ефективен и ефикасен? Всушност сакав да прашам дали ги прави правите работи и доколку ги прави дали ги прави на прав начин. Тој ми одговори, да ние решаваме проблеми, секојдневни работни активности, бла, бла, бла… А, дали си продуктивен следуваше мое прашање. Повторно одговорот му беше да. Иако не знае дека продуктивноста е завршена работа во единица време. Би бил продуктивен доколку успее сите денешни работни задачи да ги заврши до 16:30 како што му е регулирано во систематизацијата на работно место.

Не сакам да навлегувам во политичката омраза помеѓу вработени во ваквите организациски системи, тоа е голем проблем, но тука постојат неколку елементи кои ме наведуваат да заклучам дека нешто во овој организациски систем не е како што треба, од аспект на еден индустриски инженер:

  • Доколку му плаќаат прекувремена работа тој на секои два дена би земал уште една дневница зголемена за законските 35%. Доколку работното место е дизајнирано онака како што треба тој организациски систем ќе има зголемен трошок од скоро 100 часа месечно (со пресметано зголемување од 35%).
  • Доколку работното место не е дизајнирано како што треба, менаџментот има огромни проблеми во обезбедување на ефикасноста и ефективноста на вработените. Освен тоа продуктивноста ќе се намалува поради факторот на замор, а квалитетот на завршена работа ќе биде на ниско ниво.
  • Постои можност доколку некој останува повеќе на работа да едноставно нема капацитет за тие работни задачи. Или пак има капацитет, но бидејќи менаџментот нема други квалитетни вработени го затрупува оној кој може да заврши работа. Па зошто тогаш се плаќаат другите? Повторно, тоа е проблем на менџментот, не на вработените.

Ова е само еден мал процент од лошата реалност во нашите организациски системи – бирократски.

Анализирајќи го еден ваков проблем, дојдов до следниве одговори кои се поврзани со продуктивноста. Тоа се 4 најважни фактори кои влијаат на бизнис продуктивноста:

1. Различен капацитет

Различни лица, различни тимови и различни организации имаат различен капацитет на извршување. Овој капацитет ќе доведе до тоа некои вработени да завршуваат побрзо и поквалитетно иста работа во однос на други. Не можеме да очекуваме секое лице да има ист капацитет за вршење на правите работи на прав начин.

2. Различна пасија

Луѓето ќе имаат пасија за нешто доколку се возбудени, имаат ентузијастички емоции и позитивен афинитет за нешто. Доколку една личност има голема пасија за работата која што ја работи, таа работа ќе биде завршувана побргу и со подобар квалитет. Пасијата е почеток на се околу една личност и неговата работна околина. Затоа, еден претприемач пред да одлучи за избор на лица за вработување, ќе мора да се обиде да препознае за што има пасија тоа лице.

3. Уживање

Доколку уживам во спроведување на работните активности, ќе ги извршувам тие активности најдобро што можам. Некои лица ќе уживаат во работата, но некои ќе работат без уживање, а само заради платата. Продуктивноста ќе се базира на нивото на уживање, и затоа лицата кои не уживаат во работата ќе им требаат повеќе работни часови за завршување на таа работа.

4. Инспирација

Различна инспирација има различно влијание врз извршувањето. Доколку не сум инспириран да го дадам најдоброто од себе, не можам да очекувам дека квалитетот на резултатите ќе биде на посакувано ниво. Некои луѓе ќе бидат инспирирани од парите, некои за идеалите, но она што е важно за претприемачите е дека тие ќе треба да ги препознаат различните извори на инспирација на своите вработени.

post

Бизнис План – Менаџмент

Бизнис план - менаџмент

Бизнис план - менаџмент

Ќе продолжам со бизнис планирање. Досега ја направивме насловната страна, го поставивме скелетот преку резимето и содржината, ја опишавме нашата компанија, ги дефиниравме производите и услугите кои ќе ги нудиме на пазарот, спроведовме анализа на пазарот и индустријата, спроведовме SWOT анализа, изработивме онлајн стратегија за бизнисот, маркетинг стратегија и продажна стратегија. Сега ќе навлеземе во еден сосема подруг дел од планирањето, а тоа е менаџментот и организациската поставеност и структура на бизнисот.

Овој елемент или поднаслов се однесува на менаџментот. Менаџментот е навистина важен елемент од секој бизнис. Како што бизнисот поминува низ различна фаза од животниот циклус, така ќе расте и потребата за менаџментот, а тој е директно поврзан со ефикасноста и ефективноста на бизнисот. За ова можете да прочитате во менаџмент и знаење. Менаџмент наједноставно кажано претставува управување со бизнисот. Можеби ќе ви се чини доколку Вашиот бизнис е во фазата на започнување и планирате само Вие како претприемач да бидете единствени во тој бизнис дека нема да има потреба од оваа поглавје. Но сепак препорачувам да го сработите и овој наслов во вид на натамошно планирање на персоналот во Вашиот бизнис бидејќи нема уште долго да издржите сами.

Од друга страна ова поглавје како дел од процесот на планирање веќе ќе ги претстави и другите трошоци кои понатаму ќе ги користиме во планирање на финансиите.

Што треба да содржи овој наслов?

  • Краткиот преглед на насловот
  • Организациска структура
  • Менаџерски тим
  • Можни слабости на менаџерскиот тим
  • План на персоналот на бизнисот

1. Краток преглед на насловот

И повторно поглавјето за менаџмент во бизнис планот започнува како и секое поглавје со краток преглед на поглавјето. Овој дел ќе биде на почеток но ќе го подготвите го на крајот откако ќе го завршите поглавјето.

2. Организациска структура

Организациска структура претставува хиерархиска поставеност на вработените во бизнисот. Таа ќе покаже кој на кого одговара за извршените задачи, кој кого контролира и каква е легалната комуникацијата помеѓу вработените во бизнисот. Многу е важно да го сватите озбилно овој наслов бидејќи она што тука ќе го испланирате ќе треба да биде базирано на она што е реално денес и ќе биде реално утре. Повеќе за ова пишував во Органограм – Теорија наспроти реалност.

Организациската структура треба да биде претставена во вид на организациски дијаграм или график (нарекуван како органограм). Имате опција за бесплатни онлајн апликации за изработка на органограмот како што е gliffy. Ќе треба само да се регистрирате и ќе можете да ја користите апликацијата. Можете и да го користите Microsoft Office Word кој има опција за внесување на график во вид на организациски дијаграм кој можете да го персонализирате согласно Вашите потреби. На сликата е прикажан органограм од MS Word 2007.

Бизнис план - Организациски дијаграм

Органограм

Пожелно е бизнис планот да го содржи органограмот како составен дел, но доколку неможете да го направите опишете ја организациската структура текстуално со зборови.

На сликата се дадени имиња на одговорните луѓе на секоја позиција. Овие позиции може да бидат функциите како продажба, маркетинг, финансии производство… Објаснете како се поделени главните функции на бизнисот и опис на работните места (кои ќе бидат задолженија за секое од работните места од органграмот).

3. Менаџерски тим

Менаџерски тим како дел од насловот за менаџментот од процесот на бизнис планирање претставува листа на менаџерите во бизнисот кои ќе го управуваат. Ова можете да бидете само вие како претприемач или пак да бидат вклучени и Вашите први соработници за управување на бизнисот доколку имате повеќе вработени. На, тоа колку менаџери ќе треба да имате ќе ви одговори опфатот на менаџментот врз основа на бројот на вработени. Вообичаено тоа ќе бидат функционалните менаџери. Во овој дел за секоја од главните менаџерски позиции напишете:

  • Име и презиме на менаџерот
  • Претходно искуство на истите
  • Нивната улога во компанијата.

4. Анализа на слабости на менаџерскиот тим

Ништо не е перфектно па и Вашиот менаџерски тим. Можните слабости на менаџерскиот тим претставува добра анализа на тоа што може да биде како слабост. Новите бизниси најчесто ќе имаат повеќе да пишуваат во оваа подрачје. На пример, би требало да напишете дека Вие како претприемач ќе го водите и продажниот дел бидејќи заради недостаток на финансии не можете да најмите менаџер за таа позиција. Со тоа сте идентификувале едно Важно прашање во вид на проблем кој во иднина нема да го заборавите. Но, наведете и како планирате овие слабости да ги надминете во иднина. Можеби овие планови ќе предизвикаат превземање на одредени активности за надминување.

5. План на персоналот

План на персоналот претставува делот од бизнис планот кај што ќе ги вклучите сите работни места во компанијата. Планот на персоналот може да го претставите во вид на табела со следниве колони:

  • Работно место (на пример, менаџер за финансии, продавач…)
  • Број на вработени за тоа работно место (на пример, 1 менаџер за финансии, 10 продавачи)
  • Износ на плата или колку ќе го чини бизнисот за еден вработен на таа позиција за еден месец
  • Годишен трошок за едно такво работно место (12 х број на вработени за тоа место х месечна плата)

На сликата подолу е претставена оваа табела за три години како пример, инаку Вие ќе треба за првата година да ги направите и збирно и посебно по месечно ниво бидејќи овие трошоци на месечно ниво ќе ни бидат потребни за спроведување на анализа на готовинскиот тек.

План на трошоци за персонал

План на персонал

На ваков начин ќе ги имате плановите за персоналните трошоци за бизнисот кои во наредното поглавје ќе можеме да ги искористиме.

post

Претприемачи барајте знаци наместо одговори!

Претприемачот ги следи знаците

Претприемачот ги следи знаците

Можеби со овој пост ќе внесам малку невообичаеност во секојдневието на еден претприемач. Ќе се прашате зошто? Затоа што сакам да ја скршам коцката мраз во која сме ставени заради нашето општество во коешто живееме (и не само наше, тоа е секаде, нашето само препишува) и економијата која секојдневно врши притисок врз нашиот живот и нашето однесување.

Насловот – барајте знаци наместо одговори го знаев и применував многупати досега во мојот личен живот и секако професионален живот. Ние сме родени да размислуваме и да проценуваме и просудуваме согласно знаци. Но, тоа наше лично богатство или тој личен талент преку едукацискиот систем и корпорацискиот систем (мислам на вработување во поголеми компании или државни институции) полека но сигурно со текот на времето ни се одзема и едноставно ние стануваме тоа што не сме, бараме одговори наместо знаци. А одговорите не можеме да ги најдеме, бидејќи некогаш едноставно не постојат.

Ако не верувате во ова што го велам погледнете само колку луѓе има невработени кои не знаат што да прават со себе, а меѓу нив има и високо-образован кадар. Погледнете еден друг систем што направи од луѓето не само во Македонија туку и во нашата околина. Погледнете овој систем сега што прави. Вчера гледав една емисија на една босанска телевизија каде зборуваше поранешен директор на една поголема развојна компанија во Босна и Херцеговина која најголемите успеси во продажба на сопствени патенти (дури и во САД) ги има пред војната. Сегашниот проблем го гледа во неквалитетно образование на високообразовните институции, не заради вина на тие институции туку заради тоа што државата малку пари издвојува во просек за еден студент. Нема лаборатории, нема практична работа, едноставно креативноста во размислувањето е ставена на најниско ниво. Важно е да се следат правилата, процедурите…

Служби за борба против криминал

Би сакал да дадам една аналогија помеѓу претприемачот и инспекторите во службите за борба против криминал во однос на тоа барање на одговори или знаци.

На пример, при еден криминал инспекторите не тргнуваат и не можат да тргнат со барање на одговор бидејќи тоа би значело дека се очекува тие да треба да знаат кој го направил криминалот. Ова е невозможно. Затоа тие кога истражуваат за некој криминал собираат знаци, дури и најситни знаци кои можеби ништо не знаат. Целта е со помош на тие знаци да дизајнираат можни сцени на тој криминал. На ваков начин по секој откриен знак се поставува прашањето ЗОШТО, КОЈ, КАКО, МОТИВ…

Тоа значи дека тие првин собираат знаци преку различни информации, истражуваат и потоа размислуваат за можните осомничени.

Но, како е со претприемачите? Вообичаено, можеби над 90% од претприемачите размислуваат обратно од истражителите. На пример, тие бараат одговор во вид на:

Сосема погрешен пристап! Никој освен самите Вие не може да ви даде одговор за тоа кое маркетинг средство да користите. Па, ни вие одеднаш нема да можете да го дадете одговорот. Првин ќе треба да собирате знаци за верувањата, чувствата и желбите на Вашите потенцијални потрошувачи. Тие знаци ќе треба да ги вклопите во Вашиот бизнис модел, да ги усогласите со Вашите производи и/или услуги и да одлучите за маркетинг средства кои најмногу ќе одговараат на сите тие откритија. Повеќе за квалитетни одлуки можете да прочитате во Важноста на квалитетни одлуки.

Насекаде околу нас се знаци а не одговори

Сите ние сме постојано облеани со различни знаци во нашиот живот. Додека одиме по улица забележуваме различни однесувања на различни луѓе. Додека продаваме забележуваме различни гестикулации на нашите купувачи. Додека сурфаме на интернет забележуваме различни однесувања на различни други сурфери. Сето тоа се знаци кои може да имаат корисност за нашиот бизнис, но и не мора. Ваше е да ги собирате, класифицирате, обработувате и искористите тогаш кога ќе започнете со барање на различни одговори.

Понекогаш заради тоа како сме научени да размислуваме, знаците може и да ги гледаме а да не ги регистрираме. Тоа е голема опасност за еден претприемач, кој мора да ги базира своите одлуки на знаците кои ќе имаат некакво значење во расветлување на патот кој треба да се помине.

Затоа доколку се насочиме да ги бараме одговорите можеме да ја потрошиме нашата вечност во тоа барање како оној претприемач опортунист.

За вакво наше однесување не се криви политичарите, тие само препишуваат и извршуваат наредби без да размислуваат и без да знаат што прават и кои се последиците. Едноставно можеме само да кажеме, Господи прости им, тие не знаат што прават! Но, сепак и ние сме тие кои треба да го промениме нашето однесување и едноставно да не бараме одговори кога знаеме дека нема да ги најдеме, туку да ги следиме знаците, да бидеме креативни и самите да носиме одлуки за нашата судбина.

post

Бизнис План – Продажна Стратегија и Имплементација

Бизнис план - Продажна стратегија и имплементација

Бизнис план - Продажна стратегија и имплементација

Продолжуваме со туторијалот за бизнис планирање. Да се потсетиме што се досега беше завршено. Ја направивме насловната страна, кажавме и за резимето и содржината, ја опишавме нашата компанија, ги дефиниравме производите и услугите кои ќе ги нудиме, спроведовме анализа на пазарот и индустријата, спроведовме SWOT анализа, изработивме онлајн стратегија за бизнисот и насловот за маркетинг стратегија и имплементација. Сега ќе продолжам со третата Важна стратегија која мора да биде опфатена во еден бизнис план, а тоа е продажната стратегија.

Продажна стратегија се разликува од маркетинг сратегијата. Разликата помеѓу двете стратегии е што кога завршува маркетинг стратегијата започнува продажната стратегија. Маркетинг стратегија завршува со доведување на потенцијални потрошувачи во Вашата продажна инка, додека од таа точка (започнување на продажна инка) започнува Вашата продажна стратегија.

Што треба да содржи овој наслов?

Како и кај сите наслови од еден бизнис план и тука не мора да бидете ограничени во она што ќе го внесете. Но, едноставно овој наслов ќе треба да искомбинира повеќе елементи кои досега ги изработивте во процесот на бизнис планирање. Ќе мора да искористите информации од:

  • Самата бизнис идеја – Колкава е потребата, односно проблемот на пазарот што бара решение преку Ваш бизнис?
  • Поставените бизнис цели – Која е целта поврзана со продажбата? На пример ако имате цел профит од 200.000 денари ќе мора да обезбедите продажба која обезбедува толкав профит кога ќе се одземат трошоците.
  • Сегментација на пазарот – Колку потенцијални потрошувачи постојат?
  • Трендови во индустријата и пазарот – Колкав е растот во индустријата? Не можете да ставите Ваш раст на продажба да биде 200% доколку трендот е 5%.
  • Маркетинг стратегија – Колку ќе биде ефективна и ефикасна маркетинг програмата н Вашиот бизнис? Колкав број на потенцијални потрошувачи Вашиот маркетинг план ќе донесе во продажната инка?

Откако ќе ги извлечете најважните елементи од горенаведените наслови и поднаслови ќе можете да започнете со предвидување на продажбата, а потоа да ги определите тактиките кои ќе ги поддржат тие предвидувања.

1. Кратко резиме за продажна стратегија и имплементација

Пред да започнете со наредните поднаслови напишете кратко резиме за овој наслов од бизнис планот во вид на водилка за понатамошниот процес на планирање. Кога ќе завршите со останатите поднаслови од овој наслов навратете се и наведете ги главните елементи кои ќе ги содржи овој наслов.

2. Предвидување на продажба

Предвидувањето на продажба е доста сложена процес во бизнис планирање. Сите претходни истражувања и анализи треба да се искористат во овие проекции (проекциите треба да се во согласност со трендовите во индустријата и пазарот). Откако ќе се заврши со сите истражувања и анализи проценката е доста едноставна. Еве како би изгледала подготовката на овој дел:

  • Определете ги линиите на производи и/или услуги што ќе се понудат на целниот пазарот.
  • Определете ја продажбата во денари на месечна основа за временската рамка на која се однесува планот за секоја линија на производи.
  • Определете ги директните трошоци на продажбата. Директните трошоци на продажба претставуваат трошоци на материјали и производство на производи и/или услуги кои што бизнисот ги продава. Тие трошоци се зголемуваат со зголемување на продажбата.

На долната слика се прикажани илустрации како би требало да изгледаат овие проценки и предвидувања.

За првата година подгответе детална месечна проценка, додека за наредните години подгответе ги проценките на годишно ниво. И секогаш користете графички приказ на проценките кои ќе бидат во боја како што е прикажана на табелата и графиците подолу како пример за овој дел кои се изработени со MS Excel.

На крајот сето тоа наведено на месечно ниво за прва година и годишно ниво за наредните направете го во график за годишно ниво на движење на продажбата.

На крајот опишете ги бројките во табелата и графиците, односно што тие ќе значат за Вашиот бизнис.

3. Продажни тактики

Продажните тактики ќе треба едноставно да ја отсликуваат продажната инка на бизнисот.

  • Тактики за пројавување на интерес. Наведете што се ќе направите за да овозможите пројавување на интерес за Вашите производи и/или услуги кај Вашите потенцијални потрошувачи кај кои преку маркетинг стратегијата им е пробудена свеста за Вас. Тие се веќе влезени во Вашата продажна инка. Овие тактики во најголем дел ќе бидат изведувани од Вашиот продажен тим. На пример, човек кој ја прочитал вашата реклама (маркетинг стратегија) се јавува на телефон да праша нешто во однос на негови потреби. Вашиот продажен тим треба да го наведе да дојде во Вашиот продажен салон за да може да пројави интерес за Вашите производи. Тука ќе ги наведете тактиките кои продажниот тим ќе ги користи за да ги доведе тие потенцијални купувачи во Вашиот продажен објект.
  • Тактики за будење на желба. Ова се тактики кои ќе ги користите како од претходната фаза да ги префрлите Вашите потенцијални потрошувачи во наредната фаза – да добијат желба за купување. Значи кај овие луѓе веќе е пробудена свеста, пројавиле интерес за Вашиотн бизнис (се јавиле на телефон и дошле до Вашиот продажен салон) па во овој дел следува што ќе прави продажен тим за да пројават желба за купување. На пример, ќе ги објаснат карактеристиките на производите, цените, можностите, демонстрирање на употреба итн. Наведете ги сите овие тактики.
  • Тактики за донесување на одлука за купување. Откако сте ја пробудиле желбата за купување кај потенцијалните потрошувачи мора да примените тактики со кои ќе ги наведете да донесат конечна одлука за купување, односно ќе го купат Вашиот производ и/или услуга.Потенцијалниот потрошувач веќе пројавил желба за купување, потребно е да донесе одлука. Вашиот продажен тим треба да не дозволи да ја одложи одлуката. Ќе се понуди поволен начин на плаќање, дополнителни услуги итн. Наведете ги сите овие тактики за донесување на одлука за купување.

4. План на активности

Откако ќе ги дефинирате сите тактики поврзани со продажбата веднаш преминете на активности кои ќе бидат потребни за спроведување на тие тактики. На ваков начин ќе можете да ги поставите во една форма како следнава:

  • Тактики
    • Активности
      • Буџет

Ова има за цел кога ќе завршиме со формалниот бизнис план овозможиме лесно креирање на план со активности, одговорности и рокови на спроведување на истите како би се овозможило соодветно обврзување за исполнување на планот.

post

Веб Страна – Маркетинг Средство 54

Веб страна како маркетингс средство

Веб страна како маркетинг средство

Маркетинг едноставно претставува средство кое ќе овозможи бизнисот на еден претприемач да биде присутен онаму каде што се потенцијалните потрошувачи за тој бизнис. Веќе повеќе пати тука на претприемач ја нагласувам потребата за онлајн стратегија и присуство на глобалниот интернет простор на еден бизнис. Еден од начините за оваа присутност е преку бизнис веб страна.

Еден пример!

Пред неколку месеци за еден нов бизнис започнав веб страна (на англиски), односно откупив домеин име, хостинг веќе имав и склопив за еден ден страна со неколку подстрани во вид на производи кои ги нудиме. По тој еден ден застанав, немав време да ја довршам страната, но она што беше важно што успеав да овозможам брзо индексирање на страна од Google и да ставам контакт форма на истата. Иако слабо котира, во изминатиов период од неколку месеци бевме контактирани неколку пати од потенцијални потрошувачи. Последен пат беше вчера, од една компанија во Чешка со која се надеваме да оствариме деловна соработка.

Значи еден ден работа овозможи неколку контакти со потенцијални купувачи и тоа со една толку пасивна веб страна која дури не е ни довршена, има малку текст, но има слики и табели од производната програма. Тоа значи дека инвестирање во едно вакво маркетинг средство вреди.

Зошто веб страна е мора во маркетингот?

Без разлика дали се работи за B2B или B2C потенцијалните купувачи вообичаено го користат интернетот пред да донесат одлука за купување на нешто. Тие едноставно го користат интернетот за:

  • Да најдат информација за производи и/или услуги кои им се потребни.
  • Да споредат цени на тие производи и/или услуги.
  • Да најдат информации за искуството на други корисници на тие производи и/или услуги.
  • Да најдат информации за кредибилитетот на потенцијалните снабдувачи.
  • Да контактираат со потенцијалните снабдувачи.
  • Да комуницираат со потенцијални снабдувачи.
  • Да нарачуваат производи и/или услуги.
  • …

Забележувате колку покомплексен станува бизнис светот со еден интернет и достапноста на информации. Доколку Вие како претприемач не бидете таму ќе се најдете но од страна на некој друг кој можеби ќе го пофали или пак нападне Вашиот бизнис. На интернетот сите сме голи.

Како до сопствена веб страна?

Имате повеќе можности за ова, но сепак можеби првото нешто е да го определите Вашиот буџет. Јас ако се прашувам не би штедел за оваа маркетинг средство, но сепак треба да бидеме реални дека стартап компаниите не се во можност да одделат дури и толку мала сума на пари која може да се движи од 0 до 1000 евра. Нула доколку самите ја превземетe обврската да го сработите ова преку некои од бесплатните домеини и хостинг сервиси. Но, сепак треба да бидам искрен дека потенцијалот на еден ваков начин ќе биде многу помал, а од друга страна Вие сте претприемач и би требало да се насочите во вистинските претприемнички задачи.

1000 евра е нешто што ќе ви обезбеди навистина професионално изработена веб страна и нормално поголемо импресионирање на потенцијалните купувачи.

Како еден претприемнички процес во овој дел би го издвоил следново:

  • Изработете онлајн стратегија за Вашиот бизнис. Прочитајте за тоа дали онлајн сратегија се поистоветува со бизнис стратегија.
  • Видете каква е целта и улогата на бизнис веб страната во таа стратегија.
  • Извлечете ги тактиките кои планирате да ги имплементирате и секако активностите кои произлегуваат од истите.
  • Најмете некој или едноставно самите започнете да ги спроведувате.
  • И секако не заборавајте ја целината, веб страната е само еден дел од Вашата севкупна онлајн стратегија.
post

50 Правила за Бизнис Продуктивност

50 Правила за бизнис продуктивност

50 Правила за бизнис продуктивност

Бизнис продуктивност претставува еден елемент на секојдневна работа на секој претприемач. Таа продуктивност доаѓа директно од членовите на бизнисот и нивните работни активности. Доколку тие се продуктивни и се е дизајнирано перфектно, тогаш севкупната ефикасност на бизнисот ќе биде ОК.

Подолу е една листа на 50 правила поврзани со бизнис продуктивноста, која може да се користи од страна на претприемачите да ги имплементираат и да го подобрат сопствениот бизнис.

  1. Доколку станете порано, Вашата дневна продуктивност ќе биде поголема.
  2. Вашата дневна продуктивност ќе влијае на неделна, што пак ќе влијае на месечна…
  3. Кафето нема да ви помогне во бизнисот.
  4. Продуктивноста претставува завршена работа во единица време.
  5. Повеќе завршена работа во ист временски период со исти ресурси претставува зголемување на продуктивноста.
  6. Организирање претставува мајка на зголемена продуктивност.
  7. Бизнис планот ја зголемува личната и бизнис продуктивност.
  8. Бизнис системите овозможуваат побрзо изведување на иста работа во ист временски период.
  9. Личниот живот влијае на бизнис животот и продуктивноста.
  10. 80/20 правило значи дека 20% од активностите прават 80% бизнис успех.
  11. Продуктивноста варира од ден во ден, од месец во месец и од година во година.
  12. Умно работење значи завршување на повеќе работа.
  13. Повеќе работни часови не значи повеќе завршена работа.
  14. Напорно работење не значи дека повеќе работа ќе биде завршена.
  15. Работа со пасија значи дека ќе биде завршена повеќе работа.
  16. Уживање во она што се работи ќе помогне да се заврши повеќе работа.
  17. Инспирацијата е креатор на продуктивноста.
  18. Негативни индивидуални емоции имаат негативен ефект на бизнис продуктивноста.
  19. Бизнис продуктивноста може да ја зголеми среќата во приватниот живот.
  20. Подготовка ќе ја зголеми веројатноста на квалитетно завршување на работата.
  21. Фокусирање на посакувани резултати ќе ја зголеми веројатноста на квалитетното извршување.
  22. Секогаш ќе постојат можности за подобрување.
  23. Следење на прогресот ја зголемува продуктивноста.
  24. To-Do Листи претставуваат корисни алатки.
  25. Пронаоѓање на препреки и нивно перманентно елиминирање ќе ја зголеми личната и бизнис продуктивност.
  26. Секогаш ќе постојат неважни задачи.
  27. Аутсурсинг на неважни задачи ќе ни помогне.
  28. Првин треба да се завршуваат најважните задачи.
  29. Помошта од други луѓе е секогаш добредојдена и прифатлива.
  30. Проверка на E-mail треба да е последна активност на листата.
  31. Понекогаш завршување на повеќе полесни задачи може да ја зголеми продуктивноста.
  32. Преценувањето на потребно време има негативен ефект.
  33. Одолговлекувањето ја намалува продуктивноста.
  34. Нешто што може да се заврши денес не треба да се остава за утре.
  35. Бизнис продуктивноста се засновува на продуктивноста на вработените.
  36. Бизнис продуктивноста зависи од способноста на претприемачот и менаџерите, а не од способноста на вработените.
  37. Кратка пауза ќе ја подобри личната продуктивност.
  38. Освежување на мозокот ни дава дополнителна енергија.
  39. Прифаќање на критицизмот овозможува подобро завршување на работата во пократок временски период.
  40. Одвлекување на вниманието има негативен ефект на продуктивноста.
  41. Вистинска информација, во вистинско време, кај вистинската личност ќе помогне да се заврши повеќе работа.
  42. Времето може да се раздели на семејно и бизнис време.
  43. Учење од други бизниси ќе ни помогне да ги избегнеме нивните грешки.
  44. Стресот има негативен ефект на продуктивноста.
  45. Прославување на успехот со вработените ќе ни даде дополнителна потенцијална енергија.
  46. Самодовербата е важна.
  47. Проактивност, а не реактивност е основа за успехот.
  48. Дневните рутини ја зголемуваат продуктивноста, но ја намалуваат креативноста.
  49. Бележниците се важни кога нешто важно ни доаѓа во умот.
  50. Нормално е понекогаш да работите да не се движат онака како што треба.
post

Бизнис План – Маркетинг Стратегија и Имплементација

Ќе продолжам со туторијалот за изработка на бизнис план, односно за бизнис планирање. Досега ја направивме насловната страна, кажавме и за резимето и содржината, дадовме опис на нашата компанија, ги дефиниравме производите и услугите кои ќе ги нудиме, спроведовме анализа на пазарот и индустријата, спроведовме SWOT анализа и секако направивме онлајн стратегија за бизнисот.

Бизнис план - Маркетинг стратегија и имплементација

Бизнис план - Маркетинг стратегија и имплементација

Сега е потребно нашето внимание да го насочиме на маркетинг стратегија како една од најважна стратегија заедно со продажната стратегија (што ќе биде следниот наслов) за исполнување на бизнис цели. Без разлика дали се работи за производствен бизнис, или пак за малопродажба, или пак за големопродажба, или пак за услужен бизнис или пак за интернет бизнис овие две стратегии мора да бидат опфатени во квалитетен бизнис план.

За она што претставува стратегија повеќе ќе можете да прочитате во Стратегија за бизнис трансформација.

Како и во секој наслов од бизнис планот пред да започнете и тука дајте кратко резиме за она што ќе биде содржано во поднасловите како и за сето она што е најважно, односно што треба да биде потенцирано од овој наслов.

Што треба да содржи маркетинг стратегијата

Нашата цел е преку поставените бизнис цели во насловот Резиме и содржина на бизнис планот да ги преточиме во маркетинг стратегија која ќе треба да помогне во остварување на тие цели. Ако целите ни се зголемување на продажба од 10% во однос на минатата година, маркетинг стратегијата треба да не доведе до маркетинг активности кои ќе овозможат зголемување на продажба од 10%.

На крај од овој наслов треба да произлезе план на активности за остварување на целите на бизнисот. Еве како би изгледала една маркетинг стратегија со своите поднаслови:

1. Цели на маркетингот

Едноставно тука ќе треба да одговорите за тоа зошто ви е потребен маркетингот во вашиот бизнис, односно што ќе треба да постигнете со маркетингот. Ваша задача е да ги преточите тие бизнис цели во маркетинг цели. На пример, доколку една бизнис цел ви е зголемување на профитот за 25%, маркетинг целите ќе бидат:

  • Зголемување на влезот во продажната инка,
  • Одржување на продажната инка секогаш да биде полна,
  • Зголемување на стапката на конверзија на потенцијални потрошувачи во купувачи,
  • Зајакнување на брендот
  • …

2. Целен пазар

Дајте краток опис на целниот пазар на Вашиот бизнис бидејќи во голем дел севкупната маркетинг стратегијата ќе се базира на овој целен пазар. Во анализата н пазарот и индустријата Вие веќе ги имате определено сегментите на пазарот во бројки. Тука едноставно опишете кој сегмент ќе биде дел од Вашиот целен пазар и доколку има потреба доспецифицирајте го тој сегмент. На пример, нашиот бизнис ќе се насочи кон пазарот на женската популација која изнесува 30.000 потенцијални корисници на нашите производи со примања над 30.000 денари месечно (дополнително допрецизирање на сегментот жени), а кои со нашите производи ќе ги решат тие и тие проблеми.

3. Конкурентска предност

Многу е тешко да се најде бизнис кој е сам на пазарот и кој нема конкуренти. Една од целите на Вашата маркетинг стратегија е со нејзина имплементација потенцијалните потрошувачи да направат разлика помеѓу Вашиот бизнис и конкурентите. Дајте одговор на следниве прашања:

  1. Зошто некој би го избрал Вашиот наместо конкурентите?
  2. Кои се најголемите разлики помеѓу Вас и конкурентите во термин на корисности за потрошувачите?
  3. Кои се разликите во карактеристиките на производите и услугите кои Вие ги нудите со оние на Вашите конкуренти?
  4. Што има Во Вашиот бизнис за Вашите потенцијални потрошувачи, а Вашите конкуренти го немаат?
  5. Што претставувате Вие за Вашата пазарна ниша?

Забележувате дека одговорите на овие прашања треба да се распространат како би им се укажала разликата на потенцијалните потрошувачи. Голем дела од овие одговори ќе бидат опфатени во пораки во промотивните тактики кои подоцна ќе ги дефинираме.

4. Ценовна стратегија

Во овој дел опишете кои ќе бидат Вашите тактики во однос на цените за маркетинг стратегијата. Целниот пазар во голем дел ќе ги дефинира и вашите тактики за цените. Доколку целниот пазар може да си дозволи повисоки цени и вие ќе одите со повисоки цени. Доколку конкуренцијата нуди пониски цени и вие ќе се прилагодите со тие цени. Наведете се што ќе биде поврзано со Вашите цени, како и начинот на кој ќе влијаат тие цени врз привлекување на потрошувачи.

Повеќе детали како и линкови до други написи поврзани со цените можете да прочитате во Цени како маркетинг средство.

5. Промотивни тактики

Во овој дел треба да ги опишете сите промотивни материјали или маркетиншки средства кои ќе ги користите во Вашата маркетинг стратегија. Овие материјали треба да бидат на нивото на Вашиот целен пазар. Прилагодете ги со целниот пазар. На пример, како промотивни тактики ќе користиме:

  • Бизнис картички
  • Брошури
  • Реклама на радио
  • Попустни картички за постојани потрошувачи
  • …

6. План на активности

Сето она што во претходните поднаслови го испланиравте и изанализиравте сега едноставно сместете ги во една форма како следнава:

  • Тактики
    • Активности
      • Буџет

Ова има за цел да кога ќе завршиме со формалниот бизнис план овозможиме лесно креирање на план со активности,одговорности и рокови на спроведување на истите како би се овозможило соодветно обврзување за исполнување на планот.

post

Бизнис План – Онлајн Стратегија

Ќе продолжам со туторијалот за бизнис планирање. Досега ја направивме насловната страна, кажавме и за резимето и содржината, напишавме нешто за компанијата, ги дефиниравме производите и услугите кои ќе ги понудиме на пазарот, направивме анализа на пазарот и индустријата и спроведовме SWOT анализа. Сега е на ред нешто сосема ново, и нешто што во практика ретко или пак воопшто го гледам.

Бизнис план - Онлајн стратегија

Онлајн стратегија како дел од бизнис план

Овој наслов како дел од еден бизнис план е нешто сосема ново, нешто што не беше опфатено со претходната верзија на туторијалот за изработка на бизнис план. Сметам дека е од суштинско значаење за бизнисот ушто во оваа фаза на планирање претприемачот да испланира за онлајн присутноста и онлајн активностите кои ќе ги спроведува во иднина.

Во претходниот пост дадов некои видувања за тоа околу поистоветување на онлајн стратегијата со бизнис стратегијата. Мислам дека за да не се направи грешка со испуштање на онлајн присутноста на еден бизнис мора уште во оваа фаза да се вклучи и онлајн стратегијата во процесот на бизнис планирање.

Овој наслов како дел од еден бизнис план можеби претставува наједноставниот наслов за кој е потребна добра волја на претприемачот и секако разбирање на значењето и потребата на една онлајн стратегија во неговиот бизнис.

Неколку важни одлуки

Пред да започнете со изработка на онлајн стратегија како дел од процес на бизнис планирање би требало да одговорите на следниве прашања:

  1. Што прават потенцијалните конкуренти на оваа поле?
  2. Кои се онлајн активностите на потенцијалните конкуренти?
  3. Каде на интернетот се присутни моите потенцијални клиенти?
  4. Што бараат потенцијалните клиенти на интернетот?
  5. Како мојот бизнис да биде присутен на начин подобар од конкурентите и попрепознатлив за потенцијалните купувачи?
  6. Дали ќе имам само статична веб презентација на производите и/или услугите или динамична и интерактивна со потенцијалните купувачи содржина?
  7. Која ќе биде целта на онлајн присутноста?
  8. Што ќе биде постигнувањето кое може да се каже дека е задоволителна нашата присутност?

Со одговор на овие прашања, но одговор кој ќе биде реален и неутрален веќе ќе можете да ја видите Вашата онлајн стратегија која ќе биде дел од Вашиот бизнис план.

Дизајнирање на онлајн стратегија

Во седмото прашање веќе дадовте одговор за целта на онлајн присутноста на Вашиот бизнис. Па затоа и дизајнот треба да започне со тие цели кои ќе се преточат во стратегија. На пример, имате цел јакнење на Вашиот бренд со онлајн присутност. Стратегиите за исполнување на оваа цел би можеле да бидат: зголемување на посетеност на Вашата веб страна, зголемување на интеракцијата со посетителите, зајакнување на присутноста на социјалните медиуми…

За секоја стратегија треба да произлезат посебни тактики. На пример, за стратегијата зголемување на посетеноста на веб страната некои тактики би биле:

  • Постојано ажурирање на содржина,
  • SEO – Оптимизација за пребарувачи,
  • Користење на PPC кампањи,
  • Промоција преку социјални медиуми,
  • …

Ставам три точки за да не бидам сфатен дека ова е единствено, ова е само пример кој може да ви даде еден патоказ како да ја подготвите Вашата онлајн стратегија како дел од бизнис планот. Понатаму за секоја тактика (како што ја дефиниравме стратегијата во Стратегија за бизнис трансформација) ќе треба да ги специфицирате конкретните активности и одговорностите на одделите или пак лицата кои ќе треба да ги спроведат тие активности. На пример, за постојано ажурирање на содржина како активности би можеле да ги дефинирате следниве:

  • Следење на вестите од индустријата,
  • Пишување на информативни содржини,
  • Објавување на сите тие содржини
  • …

Онлајн стратегија како дел од бизнис планот

Сега веќе ги имате дефинирано сите овие елементи во вид на:

  • Стратегија
    • Тактики
      • Активности

Сега едноствно ви останува сето тоа да го ставите во една табела и на една страна да биде сместена во бизнис планот. Тоа е доволно за да имате почетна онлајн стратегија за Вашиот бизнис. Вклучете ја како дел од бизнис планот и верувајте ми, дека нема ништо да изгубите, а придобивките доколку ја реализирате се немерливи.