post

Како да се продолжи кога имаме премногу следни активности?

Продуктивните и добро организирани луѓе користат “да направам” листа.

Продуктивните и добро организираните луѓе користат систем за продуктивност кој ќе им овозможи да ги завршат работите кои треба да ги завршат.

Продуктивните и добро организираните луѓе ги завршуваат работите кои треба да ги завршат.

Но, сепак тоа не е лесно. На пример, се одлучувате да бидете поорганизирани и да започнете со “акција“. Започнувате со исфрлање на сите идеи, активности, проекти, мислења, потреби или било што друго од вашата глава и ги ставате на лист хартија или некоја алатка за менаџирање на активности. И наместо, поттик да започнете со имплементација, вие едноставно гледате во 500 – 1000 активности кои треба да се спроведат за да ги реализирате вашите цели. Наместо започнување, чувствувате стрес, страв, несигурност…

Што да се прави?

Да се заборави се и да се продолжи како досега, или едноставно да се завратат ракавите и да се започне со реализација едно по едно.

Но, и доколку започнете со реализација на една по една активност,  и да кажеме успеете да реализирате по 10-20 дневно, сепак вашиот мозок не мирува. Тој мисли, има нови идеи, нови активности, нови цели… Едноставно листата се надополнува понекогаш и со повеќе од она што сте го завршиле денес. Сепак, има една предност, работите почнуваат да се движат нанапред. Единствената опасност е деморализирање поради очигледно не намалување на листата и зголемување на чувство на фрустрација.

Како да излеземе од една ваква ситуација која самите си ја наметнавме?

Сега засега имате завршено одлична работа, го исфрливте се она што ве мачеше од вашиот мозок. Сега треба да се организираме и да започнеме со реализација на активностите без притоа да се деморализираме или чувствуваме крајно исфрустрирано.

Еве нешто што ќе ви помогне.

  1. Приоритизација.  Првин не се сите активности со ист приоритет. Добро е да направите приоритизација на истите и да ги поделите на прв, втор и трет приоритет. Вака ќе имате големо ослободување од притисок за завршување на работите.
  2. За завршување/некој ден. Кога веќе ги знаете приоритетите добро е да ги поделите активностите во две категории, едната за завршување додека втората за некој ден. Оние за завршување активности ќе бидат нешто на што ќе треба да започнете да го работите веднаш и што ќе биде распоредено на вашата “да направам” листа. Активностите кои ќе бидат во категорија некој ден се оние кои не се приоритетни и за кои сеуште не мора да размислувате да ги започнете.
  3. Каде и што. Понекогаш приоритетите не можат да имаат влијание на процесот на завршување на работите. Затоа што некои активности едноставно се поврзани со она каде се наоѓате во моментот и што имате при ака за завршување на работите. На пример, активноста која треба да ја завршите надвор од канцеларија нема да можете да ја завршите кога сте во канцеларија дури и да е најприоритетната активност. Затоа класифицирајте ги активностите и врз основа на оместотот каде се наоѓате и потребните алатки за завршување. Така, да кога ќе се најдете на пример во банка за некоја приоритетна активност и забележите дека имате активност од категорија некој ден која исто така треба да се заврши во банка, ќе можете да ја завршите и таа активност со што полека но сигурно ќе ги намалувате задачите од листата.
post

Имате ли дисциплина за слушање?

Слушање, како што веќе повеќе пати кажавме тука, се повеќе претставува една од клучните функции во еден бизнис.

Како еден претприемач, мора да ги слушате вашите купувачи, но мора да ги слушате и вашите вработени. Колку подобро ги развиете вашите способности за слушање, како во формални, така и во неформални услови, толку ќе бидете помоќни во донесување на квалитетни одлуки за вашиот бизнис.

За да бидете добар слушател, ќе ви треба дисциплина која ќе овозможи слушнатото добро да се разбере, добро да се интерпретира и да резултира во соодветни планови и акции кои ќе треба да ги преземете.

1. Имате ли специфична техника која ја користите за да бидете добар слушател?

Повеќепати се наоѓате во ситуација кога треба да слушате. Тоа може да биде случајно кога ќе сретнете некој потенцијален купувач  или пак формално кога ќе повикате некој од вашите вработени да ви презентира некој извештај.

На пример, некој едноставно користи нотес во кој кога слуша ги забележува сите клучни елементи од излагањето на соговорникот. Некој пак користи mind map, некој пак едноставно се обидува да запамети…

Продолжи…

post

10 работи кои вашите купувачи сакаат да ги знаете

Иако формално-правно вие како еден претприемач го водите вашиот бизнис, сепак купувачите се оние од каде ќе бидат повлечени повеќето од конците за управување на бизнисот.

Она што го правите, она што го продавате и она што го промовирате има само една јасна цел – купувачот и неговото задоволување.

Најкомплексната и најзначајната личност за еден бизнис претставуваат купувачите. Тие се и почеток и средина и крај на секој бизнис. Комплексни се затоа што нивните потреби се една од најпроменливите категории, а токму тие потреби претставуваат фокусот на секој претприемач и секој бизнис.

За да успеете мора постојано да си ги поставувате вистинските прашања кога станува збор за вашите купувачи, а едно од поважните е: Што е она што вашите купувачи сакаат вие да го знаете?

Иако одговорот може да има повеќе стотици потреби кои што треба да ги знаете, сепак, тука се групирани најважните 10.

Продолжи…

post

[Видео] Инспиративно – вистинска приказна за еден столар

Се што работиме, се што правиме, се што преземаме има своја цел. Во најголем број на случаи целта е подобрување на светот во кој што живееме самите ние, но и на другите луѓе.

Често пати споменував за една цврста врска помеѓу претприемачот, бизнисот и купувачот и нивните цели. Доколку на еден од овие ентитети целите не бидат исполнети, нема да се исполнат ниту целите на останатите два ентитети.

Во овој пост би сакал да споделам едно навистина инспиративно и мотивациски настроено видео преку кое може да се забележи таа врска.

post

Основните грешки во обид за зголемување на продуктивноста

Понекогаш премногу се трудиме да ја зголемиме сопствената продуктивност. И тоа е добро за секој претприемач, бидејќи попродуктивен претприемач значи и попродуктивен бизнис и поголема успешност на бизнисот воопшто.

Но, во самиот тој процес за постојано зголемување на продуктивноста можеме да направиме некои грешки кои скапо може да не чинат.

Кои се тие грешки кои ќе треба да ги избегнете кога се обидувате да ја зголемите продуктивноста?

1. Мултитаскинг

За мултитаскингот веќе пишував во насловот мултитаскинг – паралелно на повеќе работни задачи. Во тој пост дојдовме до заклучок дека:

Зголемен мултитаскинг = намален фокус и концентрација кон поединечна задача на која работиме

Ова е логично, бидејќи за да работиме на повеќе активности одеднаш, мора да го споделиме и нашиот фокус и концентрација.  Затоа

Зголемен мултитаскинг = намален квалитет на завршената задача

Намален квалитет на завршените задачи значи дека ќе има потреба од повторна преработка или едноставно неисполнување на целите кои сме си ги зацртале. Затоа и зголемениот мултитаскинг доведува до намалена продуктивност. Можеби краткорочно ќе ја зголемите продуктивноста, но гледано на долги стази тоа нема да биде случај.

Продолжи…

post

Тестирајте го вашиот бизнис-модел во однос на овие 8 елементи

Започнување на бизнис како процес едноставно претставува тестирање на бизнис-моделот со реалноста и постојано прилагодување на истиот согласно добиените резултати од тоа тестирање.

Но, прашањето е што е она што треба да се тестира во еден бизнис-модел?

Постојат осум значајни елементи кои што ќе мора да ги тестирате во вашиот бизнис модел докулку сакате да успеете.

1. Вредноста

Вредноста едноставно претставува она што вашиот бизнис ќе го нуди на купувачите. Во неа се складирани, потреби, проблеми, желби, фрустрации и емоции на потенцијалниот купувач. Од соодветната комбинација на овие елементи ќе зациси и успешноста на бизнисот воопшто.

Затоа постојано мора да ја тестирате вредноста која ја нудите.

2. Пазарот

Вредноста е наменета за пазарот, а пазарот е неизоставен дел од секој бизнис и бизнис-модел.

Комбинација на вистинска вредност со вистински пазар претставува единствената формула за успех.

Што е она што ќе треба да го следите и тестирате кога станува збор за пазарот?

  • Целен пазар. Дали вашата вредност се испорачува на вистинскиот целен пазар?
  • Идеален купувач. Дали вашата вредност е наменета за дефинираниот идеален купувач или ќе мора да го редефинирате?
  • Големината на пазарот. Колкава е големината на пазарот? Можете ли да настапите со истата или пак прилагодена вредност на поголем пазар?
  • Сегментите. Дали сегментите остануваат исти или ќе треба да се променат?

3. Производство

Производство на производот или услугата ќе има влијание на самата вредност, но и на трошочната структура во вашиот бизнис-модел. Сепак, мора да го тестирате и овој елемент особено во однос на следниве прашања:

  • Како е организирано производството?
  • Дали мора се самите да произведувате?
  • Можете ли да префрлите нешто преку аутсурсинг?

4. Односи со купувачите

Какви односи со купувачи имате?

Секој бизнис се базира на одреден вид на односи со своите купувачи. Понекогаш тие може да бидат долгорочни што значи постојано враќање и повторување на купопродажбата, но понекогаш тие може да бидат трансакциони што значи една трансакција и веќе никогаш немате ништо со тој купувач.

5. Дистрибуција

Каква дистрибуција користите во моментов? Може ли нешто да се промени? Може ли нешто да се дистрибуира онлајн? Може ли да користите други канали на дистрибуција? Како дистрибуцијата ќе влијае на севкупниот бизнис.

Тоа се прашањата на кои постојано мора да барате одговор.

6. Конкуренција

Конкуренцијата има силно влијание врз вашиот бизнис. Мора да го тестирате вашиот бизнис-модел во однос на конкурентите.

Колку е силна конкуренцијата? Колкав е бројот на оние силните? Може ли нешто да се промени за да се намали и силината, влијанието и бројот на конкурентите?

7. Трошочна структура

Секако, трошоците се нешто што постојано се следи. Мислам дека нема потреба од дополнителни коментари.

8. Приходи и профитабилност

И како последно нешто што треба да го тестирате во вашиот бизнис-модел е генерирање на приходи и профитабилноста што тој бизнис-модел ја носи.

Доколку во овој елемент не сте задоволни ќе треба да имплементирате промени во претходните.

post

8 Можни начини да ги мотивирате вработените без пари

Мотивација претставува еден од клучните елементи за обезбедување успешно функционирање на бизнисот овозможувајќи вработените да бидат на нивото на потребите на работните задачи и извлекувајќи го најдоброто во нив.

Честопати, кога зборуваме за мотивација некако во главата ни се појавува сликата на парите. така сметаме дека парите се најважниот мотивациски фактор за вработените. Парите иако се важни, и врвен мотивациски фактор, сепак понекогаш постојат и други можности кои може да се искомбинираат за да се добијат посакуваните резултати.

Мора да бидете свесни дека парите не се единствената мотивација за вашите вработени.

Да разгледаме некои дополнителни можности на оваа поле.

Продолжи…

post

Патот од одличната идеја преку одличен производ до одличен бизнис

Секој бизнис започнува со идеја која ја има претприемачот.

Но, да се има бизнис идеја не е доволно за да се обезбеди одличен бизнис. За да се обезбеди нешто што ќе го подобри вашиот и животот на вашите купувачи.

Од друга страна потребна е акција во однос на најдобрите идеи кои ги имате доколку сакате да се осигурате дека тоа е нешто што навистина вреди, инако идејата е безвредна.

Подолу се дадени основните (поедноставени) чекори за претворање на една бизнис идеја во одличен производ и одличен бизнис.

 #1 Идејата е ваше лично мислење

Секоја идеја е резултат на некој проблем или потреба на претприемачот, или фаза на креативен момент кога едноставно се појавува во неговиот мозок.

Еден просечен човек може да има илјадници идеи за бизнис. Може да биде отворање на маалска “бакалница”, може да биде и производство на некој производ, но може да биде и продажба на некоја услуга.

Во секој случај, сите идеи ниту се добри, ниту можат да се реализираат, а ниту се нешто што во моментов може да се имплементира. Затоа и се прават анализи и селекција на истите.

#2 Барање на бизнис можности

Бизнис можност не претставува исто што и бизнис идеја.

За да се трансформира една бизнис идеја во бизнис можност потребно е на основната идеја да се додаде и купувачот или купувачи.

Ова значи дека прозиводот (односно она што ќе се продава) кој ќе биде резултат на таа бизнис идеја мора да има силна врска со проблем, потреба, фрустрација и желба на потенцијалниот купувач.

Доколку го обезбедите тоа, веќе имате можност која може да се трансферира во производ.

#3 Од каде да се започне: производ или купувач

Третиот чекор е одлуката за тоа од каде да започнете. Традиционално се развива прототип на производот, кој се тестира пред да се започне со сериско производство.

Сепак ви стојат следниве три опции на располагање:

  • Да за почнете веднаш со развој на “фул” верзијата на производот.
  • Првин да најдете неколку купувачи
  • Да комбинирате со претходните две опции (производ и купувачи)

#4 Прибирање на знаење и подобрување на производот

Без разлика која опција ќе ја изберете од претходниот чекор, овој чекор е клучен за понатамошниот успех на бизнисот кој го градите.

Мора постојано да прибирате знаење за вашиот производ или услуга, но и за вашите купувачи како постојано би го прилагодувале и подобрувале не согласно вашите лични мислења, туку согласно она што го бараат купувачите.

#5 Започнување со вистинската комбинација

Досега ги тестиравте сите можности за производот кој планирате да го претворите во бизнис.

Сега е време да одлучите како ќе изгледа тој производ конечно:

  • Кои проблеми ќе решава?
  • Кои ќелби на купувачите ќе бидат вклучени во него?
  • Какви фрустрации на купувачи ќе елиминира?
  • Какви бенефити за купувачите ќе понуди?
  • Која комбинација на карактеристики ќе содржи?
Кога ќе одлучите за овие прашања, не врз основа на ваше лично мислење, туку врз основа на тековните анализи, обиди за продажба, интервјуа и разговори со купувачите ќе можете да преминете во следната фаза.

#6 Градење на системи

Веќе имате и официјално бизнис, бидејќи имате производ и имате мала група на купувачи кои досега низ процесот ги развивавте.

Сега засега вие и вашиот мал тим успевате да ги менаџирате сите активности за оваа фаза од бизнисот, сепак овој успех нема да трае долго доколку не изградите системи на кои ќе се потпре вашиот бизнис со што ќе се обезбеди успешен развој на истиот во иднина.

Како што наведов во насловот што претставува еден претприемач, ќе ви бидат потребни следниве три системи:

  • Производ/услуга (Се она што придонесува да се изработи еден производ или услуга како дизајн, инженеринг и производство на истиот),
  • Маркетинг/продажба (Овој систем има за цел да го доближи производот или услугата до купувачите и секако да го продаде. Бидејќи зборуваме за мал бизнис наместо два системи дизајнирајте еден) и
  • Администрација (колку и да изгледа непотребно сепак некој мора да се занимава и со администрација како процесирање на разна документација, водење на книги, контролирање…)

#7 Постојано подобрување на сите аспекти на бизнисот

Ништо не е перфектно, и се може да се подобри. Затоа како последен чекор е да имплементирате филозофија на постојано подобрување на сите аспекти на вашиот бизнис.

Доколку успешно ги изградите потребните системи од претходниот чекор, ќе ви биде многу поедноставно во овој чекор.

post

Поттикнете ја креативноста за 30 минути

Неизоставен дел од секој претприемачки процес претставува креативноста.

Креативност ни треба кога решаваме проблеми. Креативност ни треба кога сакаме да подобриме нешто. Креативност ни треба кога сакаме да го раснеме бизнисот.

А, дали овие активности претставуваат нешто што барем еден момент не се дел од некој претприемач и неговиот бизнис? Не, тие се постојано присутни.

И добро, сега кога знаеме дека постојано решаваме проблеми, постојано подобруваме нешто, постојано размислуваме за раст на бизнисот, или едноставно преживување, знаеме и дека креативноста мора секогаш да биде присутна.

Но, проблемот е што иако тие активности се постојано присутни во бизнисот, сепак тоа не е гаранција дека и креативноста ќе биде заедно со нив. Некогаш едноставно не оди. Некогаш сме креативни кога воопшто не сме на работа или пак воопшто не размислуваме за работни активности. Некогаш едноставно, нашиот мозок се наоѓа во еден вид на “блокада” и безидејност.

А, мораме да бидеме креативни! Како тогаш да го решиме овој проблем?

Подолу е презентиран еден можен процес кој би можеле да го примените.

#1 Повикајте го вашиот тим да дојде кај вас (2 минути)

Некогаш едноставно индивидуализмот кој се наоѓа кај вас не може да ви помогне. Мора да бидете свесни дека имате тим од луѓе кој секогаш ќе може да помогне, бидејќи едноставно понекогаш не ви оди во однос на идеи за можни решенија на различни проблеми.

Кога станува збор за креативноста, мора да го искористите севкупниот потенцијал во вашиот бизнис. Затоа повикајте ги најважните луѓе во вашиот тим за што ќе ви бидат потребни две минути.

#2 На еден лист поставете ги прашањата и побарајте одговори (2 минути)

На секој од повиканите дајте им еден лист хартија и поставете еден проблеми за кои тие ќе треба да предложат решенија.

И овој дел ќе ви одземе само две минути.

#3 Дозволете секој член на тимот да го одговори прашањето (5 минути)

Дајте им 5 минути за да напишат можно решение за поставениот проблем.

Овде не станува збор за детализирања на решението туку едноставно нафрлување на можни идеи за решавање на проблемот, или пак дефинирање на причините за појава на проблемот и можностите за нивно елиминирање.

#4 Секој член од тимот да го размени своето ливче со останатите (15 минути)

Сега едноставно секој член на тимот нека го размени со останатите ливчето при што секој ќе треба да се надоврзе со придонес на предлогот на останатите колеги.

#5 Приберете ги ливчињата (1 минута)

Откако ќе заврши кружењето на листовите со предлози, едноставно ќе треба да ги соберете.

#6 Разгледајте и одлучете (5 минути)

Сега имате доволен број на креативни решенија за проблемот, па можеби и предлози кои се надвор од основниот поставен проблем.

Едноставно во следните 5 минути анализирајте ги сите ливчиња и донесете одлука за решението кое ќе се имплементира.

post

Koj e најважниот ден за претприемачот?

Според вас, како претприемач кој е вашиот најважен ден?

Дали е тоа денот на започнувањена бизнисот?

Дали е тоа денот кога сте ја направиле најголемата грешка?

Или пак тоа е денот кога сте ја договориле најголемата зделка? Или едноставно првата најслатка зделка?

Дали е тоа некој ден во иднина? Нешто што планирате да го постигнете во таа иднина?

Но, минатото не се менува и значајноста за денес и за иднината е се помала на некој ден од минатото, освен за паметење, раскажување, славење… Иднината пак сеуште не можеме да ја контролираме, освен да ја планираме.

Затоа и одговорот на сите претходни прашања е не, не се тие денови најважни за еден претприемач.

Договорените зделки се минато, и треба да се размислува за нивно продолжување. Бизнисот е веќе започнат и треба да се мисли за неговиот развој и раст. Грешките се веќе направени, сега кога веќе ги знаеме треба да ги исправиме или едноставно да ги елиминираме од картата на нивно појавување во иднина. Сеуште не знаете што се случува во иднината, само можете да планирате како би изгледала таа иднина.

Одговорот на прашањето од насловот на овој пост е едноставен, тоа е денес. И тоа секогаш, најважниот ден за еден претприемач е денес.

Зошто?

Затоа што денес е единствениот ден во кој можете да направите нешто. Во кој што можете да ги поправите грешките од минатото, да се подготвите за иднината и да ја промените иднината.

Минатото не можете да го промените, но она што го правите денес ќе го смени обликот на иднината.

Иднината не е акциски ориентирана, таа е само планирана, но повторно планирате денес, за утрешни активности.

Во денес се се врти околу “акција”. Eдноставно направете го она што треба да го направите, затоа што утре нема да можете да го испорачате онаа што треба да го испорачате без да го направите она што треба да го направите денес.

Нека биде денес најважниот ден во вашиот живот и ден во кој секогаш е почеток на остатокот од вашиот живот.