post

6-ти Слој за Успех на Еден Претприемач

Стигнавме до последниот слој за успех на еден претприемач. Овој слој согласно анализата која ја спроведовме претставува микс од повеќе елементи кои имаат влијание на успехот, но сепак тоа влијание не е круцијално како оние првите слоеви.

Талент

Зошто сметам дека талентот не е на прво место за еден претприемач да биде успешен? Наједноставно кажано затоа што не постои специфичен претприемнички талент кој е потребен за да може да кажеме дека тој е претприемач со вроден талент. Различни бизниси имаат различни претприемнички потреби за одреден вид на талент. Некој бизнис бара повеќе финансиски талент, други од менаџерски талент, трети пак талент за квалитетна аналитика, а повеќето бизниси од сите типови на можни таленти. Значи бизнисот е микс на таленти, кои претприемачот или пак менаџерот треба да ги управува за да го извлече максимумот.

За талентот и бизнисот можете да прочитате и во Бизнисот е една обична игра.

Чесност

Да се биде чесен е втора потребна карактеристика, при што не може да се каже дека само чесните претприемачи се успешни претприемачи. Постојат многу примери на изградени бизнис империи каде чесноста не постоела како карактеристика кај претприемачот. Затоа и не ја сметам како нешто без што не се може. Но, сепак треба да се нагласи дека во многу ситуации кога си чесен, можеш да добиеш и повеќе корисности како од твоите потрошувачи, така и од твоите снабдувачи.

Врски

Неизбежен елемент во нашето општество. Да завршиш најмала работа треба да имаш некоја врска особено во администрацијата. За најбаналните работи како вадење на матична книга од родени или пак лична карта бараме некој познат кој ќе ни ја забрза постапката. Тоа е нашето општество. Во едни вакви услови на стопанисување врските можеби можат да имаат големо влијание на успешноста на еден претприемач.

Кога сум кај условите за стопанисување и малите бизниси можете да дадете свој придонес со пополнување на анкетата за истражување на услови за стопанисување на малите бизниси во Македонија која ќе биде достапна уште кратко време.

Среќа

Некој навистина верува во среќа, иако јас лично не сум некој кој верува и сака да се базира на среќа во бизнисот. Но, понекогаш навистина е потребно да се поклопат коцките за да се постигне некој успех.

Ова би бил последниот напис од овој серијал на фактори кои еден претприемач го прават да биде успешен кој го започнавме уште во Успешен претприемач – одлучувачки фактори. Ова не значи дека нема да се занимаваме уште со оваа тематика.

post

5-ти Слој за Успех на Еден Претприемач

Ќе продолжам со серијалот слоеви кои го формираат успехот на еден претприемач, а тоа е тимска работа, вкалкулиран ризик, самодоверба и искуство. Оваа е петиот слој од шесте можни слоеви кои ги дефиниравме.

Претходно ги поминавме следниве слоеви:

  1. Спремност да се преземе акција како најважен,
  2. Знаење и креативност како втор по важност
  3. Вештини и интелигенција како трет по важност и
  4. Истрајност и упорност како четврти по важност.

Овој слој е малку поинаков од претходните и е составен од повеќе елементи како што можете да забележите. Ќе започнам со секој елемент.

1. Тимска работа

Денеска скоро и да не може да се замилси завршување на било што, особено некоја бизнис активност без да се потпреме на тимската работа. Времето на поединците помина, сега е времето на тимови.

Тимската работа е нешто што во секој случај ќе помогне да се дополнат сите претходни слоеви за успех на еден претприемач. На пример доколку тимски се одлучи дека некоја акција треба да се превземе тогаш претприемачот секако дека ќе ја превземе таа акција. Проблемот со тимот е додека да се одлучи, но кога веќе ќе се одлучи претприемачот веќе го има првиот слој – да преземе акција за таа одлука.

Креативноста при работа во тимови е доста на повисоко ниво, додека знаењето кое недостасува кај еден член може да се надополни со знаењето на другиот член. Вештина интелигенција доколку недостасува кај некој член ќе се надополни со останатите. Никој не е супермен и сите имаме свои мани и предности, но тимот претставува еден збир на се што е предност кај поединците, притоа заради притисокот од тимот се елиминараат маните.

2. Вкалкулиран ризик

Спремен сум да превземам ризик но до тука. Тоа е всушност вкалкулиран ризик. Тоа е ризик кој може да се поднесе и доколку тој ризик се претвори во непријатност за претприемачот и бизнисот.

Постојат различни методи за квантификација на ризикот кои се користат за да на некој начин ризикот се изрази во некоја мерлива единица врз основа на која еден претприемач ќе знае до каде може да оди. Следниве активности се користат кога станува збор за ризик:

  • Дефинирање на ризични подрчја. На пример, финансии, производство, маркетинг…
  • Дефинирање на ризични профили. На пример, губење на пари во ризичното подрачје финансии.
  • Дефинирање на ризични индикатори. На пример, што се ќе доведе за да се случи ризичниот профил губење на пари во ризичното подрачје финансии.
  • Која е веројатноста да се случат тие ризични индикатори. Веројатноста претставува број на појавување на ризичниот индикатор во вкупен број на настани.

Ова би биле едни од основните активности кои може да се применат за проценка на ризикот и определување на што е тоа вкалкулиран ризик. Подетално за анализа и проценка на ризикот ќе опфатам во некој од наредните написи.

3. Самодоверба

Сметам дека секој претприемач има самодоверба како една особина, бидејќи луѓе без самодоверба не ни започнуваат бизнис. Од друга страна самодовербата иако е во петиот слој сепак претставува едно надополнување на првиот (најважниот) слој превземање на акција.

Самодоверба едноставно претставува верување во себе и она што една личност го прави. Честопати немање на самодоверба претставува и многу критичен елемент не само во бизнисот туку и во личниот живот. Ако некој нема самодоверба лесно може да се примети од непријателот (конкуренцијата во наш случај) и едноставно може да се случи да биде згазен.

Од друга страна самодовербата се стекнува со знаење, вештини, креативност, интелигенција и секако четвртиот елемент од овој слој искуството. На пример колку поголемо знаење имаме од една проблематика току ќе имаме и поголема самодоверба во активностите кои ги спроведуваме од таа проблематика. Истото е и со останатите карактеристики кои ги набројав.

4. Искуство

Иако последно во овој петти слој сепак не можам да кажам и дека претставува најмалку важен елемент или карактеристика. Искуството не може да се избрза и не се стекнува со притискање. За искуство сепак е потребно време кое треба да помине. На пример, знаењето ќе го зголемиме преку читање, учење, посетување курсеви… Додека искуството можеме само да чекаме самото да си дојде. На пример, денеска сум поискусен за уште еден ден.

Но, и за искуството да биде една практика потребно е согледување на работите за да тоа искуство на некој начин се влее во нашиот мозок и не излезе подолг период. Така да некои претприемачи едноставно водат дневник за поважните случки во денот или пак неделата, со што создаваат една база на податоци за акумулирано искуство во тој временски период. Оваа база на податоци постојано се надополнува. Навистина интересен начин да не се допушти искуството да избега.

post

Важноста на брзи одлуки

Во претходниот напис навлегов во еден различен пристап на претприемач визнионер и претприемач опортунист (кој постојано бара можности, но никогаш не ги наоѓа).

Зошто опортунистот не ги наоѓа, или подобро кажано претвора најдените можности во квалитетен бизнис?

Затоа што постојано е зафатен со барање на нови можности и кога ќе најде некоја можност не носи одлука за искористување на истата.

Донесување на брзи одлуки

Зошто се потребни брзи одлуки?

Не можеме да донесуваме одлука и тој процес да трае вечно. Претприемничкиот живот и водење на успешен бизнис бара брзи одлуки бидејќи наместо Вас во секој момент слична таква одлука може да донесе конкуренцијата.

Како најважни причини зошто треба брзо да одлучувате би ги издвоил следниве:

1. Брзо искористување на пронајдени можности

Вие ќе откриете некоја можност, но таа можност нема да има вредност за Вас и за вашиот бизнис доколку не ја искористите. Затоа ќе треба брзо да одлучите како да ја искористите таа можност и кои активности кој ќе треба да ги спроведе за искористување на таа можност.

2. Брз одговор на барања и потреби на потрошувачите

Вие како претприемач и Вашиот бизнис постоите за да ги задоволите барањата и потребите на Вашите потрошувачи. Доколку откриете кои се промените на нивните барања и потреби не можете вечно да одлучувате за тоа како да ги задоволите бидејќи место Вас конкуренцијата ќе го направи тоа. Затоа е потребна брза одлука.

3. Брз одговор на активностите на конкуренцијата

Како што Вие постојано спроведувате бизнис активности, така и Вашата конкуренција не мирува туку спроведува одредени бизнис активности врз основа на кои се борите на пазарот за привлекување на потрошувачите. Секој нивен чекор ќе бара Ваш контра чекор. Затоа треба брзо да одлучите за тоа кои ќе бидат Вашите контра активности и како ќе ги примените.

Брзина наспроти квалитет

Многу често се поставува оваа прашање. Како влијае брзината на одлучување врз квалитетот на одлуката?

Квалитетот на одлуката секако дека зависи од брзината на донесување на таа одлука. Така да слободно можеме да кажеме дек квалитетот на одлуката е функција од брзината на одлучување.

Квалитетна одлука = f(брзина на одлучување) каде поголема брзина значи помал квалитет и обратно

Ова е логично, но не и единствено. Едно нешто е сигурно, зад секоја добра и квалитетна одлука стојат информациите кои ги имаме и врз кои ја донесуваме одлуката. А одлуката ја донесуваме ние претприемачи и самата брзина зависи од нас. Колку повеќе информации имаме толку потешко ќе имаме брза одлука. Затоа брзината на одлучување претставува функција од информациите и претприемачот. Така да горното равенство ќе биде:

Квалитетна одлука = f(информации, претприемач)

Ќе се обидам накратко да влезам во оваа тајна на информации и претприемач како основа за брзината на одлучување.

Колку повеќе информации имаме ќе биде потешко донесувањето на одлуката од страна на претприемачот, односно ќе биде потребно повеќе време. Понекогаш никогаш нема да имаме доволно информации за донесување на одлука, па брзината на одлучување може да оди временски до бесконечност, односно воопшто да не донесеме одлука, што во овој случај не е добро. Ова е поради фактот што постојано времето ќе го трошиме на собирање на информации. Од друга страна информациите треба да се обработат за да бидат во форма преку која лесно и брзо ќе воочиме некои трендови и некои скриени трендови кои ќе бидат корисни за одлуката на претприемачот. Значи за квалитетни одлуки треба да имаме оптимална количина на информации во форма која дава можност за одредени проценки од страна на претприемачот. Така да нашата формула од погоре сега би изгледала вака:

Квалитетна одлука = f(f(оптимална количина на информации, форма), претприемач)

За да претприемачот успее да извлече квалитетни заклучоци од информациите претставени во соодветна форма ќе треба да има одредени способности за препознавање на трендови и од некомплетни информации. Велам некомплетни информации бидејќи нашата цел е да донесеме квалитетна одлука и тоа брзо. Затоа е потребна способноста за аналитичност. Така да квалитетна одлука за краток временски интервал ќе биде претставена со следнава формула:

Квалитетна одлука = f(f(оптимална количина на информации, форма), аналитичност на претприемачот)

Аналитичност како основа за брзи одлуки

Како што можете да забележите аналитичноста претставува способност на претприемачот врз основа на некомплетни информации да извлече заклучок за да донесе квалитетна одлука. Се смета дека оние успешните претприемачи донесуваат брза одлука а нивната сопствена сигурност за исправноста на одлуката која ја носат е 70%.

Карактеристиката на аналитичните луѓе е да имаат мозок кој брзо размислува и да гледаат во група на информации и податоци во која ќе забележат нешто што просечниот човек не може да го забележи. Знаењето е еден предуслов со кој еден претприемач може да биде аналитичен.

post

Истрајност и Упорност – Четврти Слој за Успех на Еден Претприемач

Истрајност и упорност претставуваат четврти слој за успех на еден претприемач како што дојдовме по спроведената анализа во написот Успешен претприемач – Одлучувачки фактори – реалност.

Истрајност и упорност - Успешен претприемач

Пред да започнам со овој четврти слој кој се однесува на истрајноста и упорноста би ги сублимирал накратко претходните слоеви за успех на еден претприемач.

Еден претприемач презема акција која претставува прв слој на успех. Има знаење и креативен е во процесот на спроведување на тие акции што претставува втор слој за успех на еден претприемач. Тоа знаење и креативност лесно го трансформира во зголемување на сопствени вештини и интелигенција кои му помагаат да ја избере вистинската акција која ќе ја спроведе. Кога веќе ги има овие елементи мора да биде истраен и упорен во спроведување на акциите кои всушност претставуваат одлуки кои ги носи во врска со бизнисот.

Што е истрајност?

Истрајноста едноставно претставува Ваша активност која продолжува да се спроведува и покрај потешкотиите и неколкуте неуспеси со таа активност. Може да се каже дека истрајноста е едноставно одбивање да се откажете од нешто.

Можете да забележите дека истрајноста е поврзана со тешки услови, притисоци и претходни неуспеси.

Еве еден пример за истрајност како особина на еден претприемач. Претприемачот започнува бизнис – преземал акција. Има знаење за бизнисот што го започнува, има и креативност. Вешт е и интелигентен. Но, веќе по првите неколку месеци се соочува со премногу проблеми:

  • Слаба продажба како резултат на малку купувачи.
  • Недостаток на финансии бидејќи сите ги вложил во започнување а приходите сеуште се мали.
  • Голем притисок од конкурентите бидејќи сеуште е нов на пазарот.
  • Нема препознатлив бренд бидејќи сеуште бизнисот е нов.

Доколку еден претприемач кој започнал бизнис, се откаже во оваа фаза тој ќе ја нема особината на истрајност и не може да се каже дека е претприемач. Но, доколку со помош на неговото знаење, креативност, вештини и интелигенција успее да донесе правилни одлуки со кои ќе ги решава новонастанатите проблеми тој претприемач ќе истрае во сопствените намери да изгради успешен бизнис.

Што е упорност?

Упорноста едноставно претставува Ваша активност која продолжува да се спроведува за исполнување на одредени воспоставени цели.

Некои претприемачи нема да издржат да стигнат до целта единствено заради тоа што не се упорни. Честопати знаеме да кажеме кога ќе завршиме некоја работа (спроведеме некоја акција) со која стигнуваме до нашата цел дека упорноста се исплати. Секако дека се исплати, бидејќи доколку се откажеме пред целта нема воопшто да стигнеме до таа цел.

Да земеме за пример еден маратонец. Тој трча и сеуште не е заморен, нема надворешни притисоци, но во неговиот мозок поминува мисла дека треба да истрча уште неколку километри за да стигне до целта. И едноставно, таа мисла го тера да се откаже со тоа што си вели дека растојанието е многу големо.

Која е разликата?

Двата термини се многу слични. Единствената разлика е што кај истрајноста се наоѓаат и надворешни фактори како потешкотии или пак притисоци врз претприемачот. Кај упорноста такви фактори не постојат, туку само претприемачот и неговиот мозок, односно неговото размислување за она што е исплатливо, а што не е.

За илустрација ќе го земам примерот со маратонецот.

Еден маратонец на половина пат веќе е исцрпен, повреден од падот и не се чувствува најдобро. Но, сепак го продолжува маратонот. Иако не прв, стигнува на целта. Тој маратонец е истраен.

Вториот маратонец се наоѓа на половина пат и му поминува мислата дека има уште толку да истрча, но сепак продолжува и стигнува на целта. Тој маратонец е упорен.

Претприемач кој е истраен и упорен во исто време

На претприемачот му се потребни и двете особини за да биде успешен претприемач. Секогаш ќе има потреба од истрајност, бидејќи во бизнисот ништо не е лесно. Секогаш ќе има различни притисоци во форма на финансиски притисоци, вработени, потрошувачи, отпорност кон промени итн. Доколку не е истраен никогаш нема да стигне до целта.

Од друга страна некогаш и без притисоци спроведување на одредени активности бара време за спроведување и бара време за чуврствување на пволностите од резултатите од тоа спроведување. На пример, во написот за систематизација на бизнисот пишував дека тоа е еден процес кој е потребен на бизнисот и на претприемачот. Од друга страна за спроведување на еден таков процес ќе бидат потребни неколку недели, резутатите ќе се покажат дури по неколку месеци. Затоа мора да има трпение и секако упорност за да се стигне до посакуваните резултати.

post

Вештини и Интелигенција – Трет Слој за Успех на Еден Претприемач

Ќе продолжиме со третиот слој кој има потенцијал да го доведе до успех еден претприемач, а тоа се вештини и интелигенција. Ова е дел од серијалот кој започна со едно истражување на претприемач за одлучувачки фактори за успех за кое ги презентиравме резулатите и ја подготвивме хиерархијата на најважните фактори кои еден претприемач го прават успешен претприемач.

Првиот слој за потенцијал беше преземање на акција додека вториот слој беше знаење и креативност.

Вештини и интелигенција како трет слој за успех на еден претприемач

Што претставуваат вештини за еден претприемач?

Често пати велиме дека имаме вештини за нешто. Особено кога го пополнуваме нашето CV посебен дел од внимание посветуваме на нашите вештини. На пример, работа со компјутер, познавање на јазици, добри комуникациски вештини итн.

Да видиме првин како во Wikipedia се дефинирани Вештините:

Вештина претставува научен (сознаен) капацитет за исполнување на предходно утврдени резултати, најчесто со минималните трошок на времето, енергијата, или и пак и двете.

Значи за да имаме вештини треба да имаме знаење за тие вештини, односно на некаков начин да сме ги научиле, дали преку класично учење или пак искуствено не е важно. Всушност вештините се комбинација од учење и искуство.

Можеме да кажеме дека имаме вештини за нешто доколку со минимално вложено време и енергија успееме да завршиме некоја работа со максимални резултати од тоа извршување. На пример, доколку кажеме дека имаме вештини за работа со MS Excel тоа ќе значи дека за кратко време (со неколку кликнувања) можеме да направиме табеларна и графичка анализа на одредени податоци.

Можеме да сублимираме две работи за да еден претприемач има вештини од нешто:

  • Треба да имаме знаење за да имаме вештини. А може знаењето да го стекнеме и со искуство.
  • Треба да имаме систем за постојано зголемување на знаењето. Ова е особено важно доколку еден претприемач во поглед на вештините сака да остане на врвот. Во премиум претприемач во првиот месец каде ги разработуваме бизнис идеите во исто време градиме и еден систем за постојано прибирање на информации заради учење и зголемување на претприемничките вештини во поглед на бизнис идејата.
  • Ќе имаме вештини за некоја работа доколку со минимално потрошена енергија и време оствариме максимални резултати.

Кои вештини треба да ги има еден претприемач?

Ако тргнеме да ги набројуваме сите потребни вештини сметам дека нема да бидат доволни уште десетина страни од овој напис. Затоа би издвоил она што е најважно како вештини да ги има еден претприемач. Треба да напоменам дека различни вештини ќе бидат потребни за различни нивоа во кои се наоѓа бизнисот. Тука би издвоил 10 поважни вештини што еден претприемач би требало да ги има.

  1. Вештини за продажба
  2. Маркетинг вештини
  3. Финансиски вештини
  4. Вештини за менаџирање на времето
  5. Вештини за планирање
  6. Самомотивациски вештини
  7. Менаџерски вештини
  8. Технички вештини
  9. Вештини за фокусираност
  10. Вештини за промени

Што претставува интелигенција за еден претприемач?

Дали сте се нашле во ситуација за некого да кажете дека е навистина интелигентен? Најверојатно, да. Но, по што ги делите луѓето на интелигентни и неинтелигентни. Што мислите за снаодливоста, изгледот, јазикот на кој зборува, одлучност…?

Да видиме што Wikipedia вели за интелигенцијата:

Интелигенција е еден поопширен термин кој се користи за да се опише на состојбата на умот кој опфаќа повеќе поврзани способности, како на пример на капацитет на резонирање, планирање, решавање на проблеми, абстрактно размислување, сфаќање на идеи, користење на јазикот и учење. Постојат неколку начини да се дефинира интелигенција. Во некои случаи, интелигенцијата може да содржи својства како креативност, самата личност, карактер, знаење или пак мудрост. Сепак не постои договор за кој се дефинираат карактеристики на феноменот на разузнавачките договорени со мнозинство низ различните засегнати дисциплини.

Ова е навистина опширна дефиниција за интелигенцијата. Но, за еден претприемач би било доволно да има способност во најкраток временски период од огромен број на информации кои ги прима да ги извлече највредните информации и врз основа на нив да донесе квалитетен заклучок врз основа на кој ќе донесе одлука.

За да еден претприемач постојано ја гради својата интелигенција ќе мора постојано да го шири сопственото знаење. Потребни се следниве предуслови:

  • Да има систем на прием на голем број на информации поврзани со бизнисот кој го води.
  • Да има систем за обработка на тие информации.
  • Да има систем за примање на тие обработени информации.
  • Да донесе квалитетен заклучок врз основа на тие обработени информации.
  • Да ги примени тие заклучоци преку донесување на квалитетни одлуки.
  • Да ги спроведе донесените одлуки.

Забележувате дека сите досегашни фактори на успех кои обработивме се зависни еден од друг. Не може да имаме претприемач со висока интелигенција без знаење. Не можеме да имаме претприемач со квалитетни вештини без знаење. Џабе ни е интелигенцијата, вештините, креативноста и знаењето доколку како претприемачи не ги примениме во пракса (не превземеме акција).

Следува на претприемач: Истрајност и упорност – Четврт слој на успех на еден претприемач.

post

Најдоброто на претприемач во 2009 година

За некој ден ќе завршиме целосно со 2009 година која навистина за мене беше многу интересна. Точно една година од кога се играв на веб и закупив веб хостинг и домеин, поставив неколку странички кои ги крстив претприемач и се чудев што потоа.

Најдоброто на претприемач

Првин што ми текна беше содржина, ама не знаев каде и како да пишувам. Се прашував дали за секој текст за претприемништво да правам посебна страна, дали ова, дали она… Еден куп прашања. Налетав на Joomla и успеав да ја закачам на веб серверот и така започнаа артиклите на претприемач. И секој ден по еден нов текст и мачење со Joomla.

По некое време платив еден курс за блогирање каде увидов дека WordPress е она што ми треба. Па така излезе и блогот на претприемач што всушност сега е претприемач, бидејќи артиклите веќе не ги ажурирам (се откачив од Joomla) и онаа /blog го поставив директно на домеинот.

И така помина цела една година со 245 написи на претприемач и 123 написи на артиклите на претприемач или вкупно (да го земам дигитронот) 368 написи за претприемништво, претприемачите и малите бизниси – повеќе од еден дневно (а не сме весник). Некои и не беа нешто посебно, особено во првите денови кога повеќе ги пишував написите со еден научен поглед. Но, за некои сум навистина горд на самиот себеси, бидејќи сметам дека се навистина уникатни и од помош за претприемачите.

Би се заблагодарил на м-р Илија Чубровиќ кој скоро половина година учествуваше во овој проект и финансиски и едукациски во креација на некои од написите. Би се заблагодарил и на гостинските написи кои во неколку наврати беа објавени а се напишани од Предраг Стојковски – директор на компанијата Интрогруп која се занимава со финансиски консалтинг. Би се заблагодарил на Гого Рафајловски кој во повеќе наврати даваше навистина квалитетни коментари кои го подобруваа квалитетот на написите на претприемач. И на крај би се заблагодарил на сите кои било со коментари преку блогот, преку Twitter, Facebook или пак со директен mail ми даваа подршка преку нивната благодарност или пак прашањата кои ги поставија.

Тоа беше 2009 година, која би сакал да ја затворам со еден серијал за најдоброто на претприемач. А, 2010 ќе ја започнеме турбо преку продолжеток на серијалот за интернет бизнис и уште еден куп на написи и видео материјали кои ги имам во главата и еден по еден ќе ги изложувам тука. Освен тоа при крај е новата верзија на Збирка со бизнис идеи која ќе бидне надополнета со уште 20 бизнис идеи. Подготвувам една е-книга која ја нареков во работна верзија како Претприемнички буквар и која сите регистрирани за неделни билтени ќе ја добијат. И секако, најголемиот проект на претприемач досега кој ќе стартува во јануари е Премиум Претприемач кој ќе биде 54 неделен (годишен) курс, односно виртуелен консултант за претприемачите.

Во следните 2 дена ќе можете да видите серија на написи и артикли кои ќе дадат еден поглед кон најпопуларни написи на претприемач во 2009 година. Секој од тие написи ќе го групирам во теми како листата на написи во овој серијал би била покорисна.

Сепак она што ќе биде вклучено во овој серијал ќе биде сам еден мал дел од севкупниот материјал на претприемач, бидејќи има 368 написи тука, но се надевам дека ќе претставува корисен начин за да посетителите бргу поминат низ нешто што би претставувало како нешто што би требало да се прочита.

Темите кои ќе ги опфатам во овој серијал се:

Како што ќе ги објавувам написите така и ќе ги ажурирам линковите во оваа листа од овој серијал.

post

15 Маркетинг Совети за 2010 година

Полека но сигурно поминува и оваа 2009 година. Претприемач постои веќе една година, а како вчера да започнав да пишувам блог написи за трендови кои ќе не очекуваат во 2009 година. Претходниот напис опфаќаше совети во однос на некои активности кои би требало да ги започнете во 2010 година.

маркетинг средства за 2010 година на претприемач

Овој напис едноставно ќе претставува едно сублимирање на се она што на некој начин го опфативме во делот на маркетинг на претприемач во 2009 година.

1. Гради листа

Листа со тековни купувачи и потенцијални потрошувачи претставува една моќна алатка на секој претприемач во поглед на маркетинг активностите за сопствениот бизнис. Како едно од маркетинг средства градење на листата ја опфативме во Маркетинг средства 12 – Гради листа. Еден од 10-те бизнис темплејти од претприемач претставува токму една форма која можете да ја искористите за градење на сопствена листа.

2. Сегментирај ја листата

За подобро спроведување на маркетинг активностите пожелно е да ја сегментирате листата. Сегментацијата можете да ја извршите врз основа на некои карактеристики на членовите во листата како на пример, пол, значајност, потенцијални потрошувачи и купувачи…

3. Биди еден чекор поблиску до твоите потрошувачи и еден чекор пред конкуренцијата

Едно правило за секој претприемач е основната цел да му биде да биде еден чекор поблиску до потенцијалните и тековните купувачи, а секогаш да биде еден чекор пред конкуренцијата. Се она што го правите погледнете го низ призмата колку тоа нешто ќе ве доближи до потенцијалните и сегашните купувачи.

Од друга страна постојано анализирајте ја конкуренцијата и најдете ги нивните слабости, однос што е тоа што тие го прават на полето на маркетингот, а што е тоа што не го прават. Сето она што го прават тие, направете го и вие само подобро, а сето тоа што тие не го прават едноставно Вие направете го.

4. Направи едноставен маркетинг план

Една од најголемите грешки што еден претприемач ги прави во поглед на маркетингот согласно Jay Conrad Levinson (таткото на герила маркетингот) е шт немаат маркетинг план, а се обидуваат да спроведуваат маркетинг активности за нивниот бизнис. За изработка на едноставен маркетинг план можете да прочитате во Маркетинг план во 7 едноставни реченици.

Доколку пак сакате да изготвите маркетинг план согласно „правила и прописи“ или како уште го нарекувам маркетинг план од учебници, прочитајте во Маркетинг план како дел од бизнис планот.

5. Обврзи се на тој маркетинг план

Необврзувањето кон тој маркетинг план кој ќе го изработите е уште една грешка која ја потенцира Jay Conrad Levinson. Кога нешто ќе испланирате едноставно мора и да го спроведете. Можете да прочитате некои идеи како Вие како претприемач и Вашите вработени да се обврзете на тој маркетинг план во Дополнувања за маркетинг планот.

6. Ажурирај ја твојата веб страна

Доколку имате веб страна на која го презентирате Вашиот бизниси отворете ја и погледнете од кога не сте ја ажурирале. Дококу одговорот е една, две или три години и повеќе, веднаш ажурирајте ја. Додадете кои се новите производи или пак услуги што ги нудите. Сменете го делот Copyright 2005, на пример. Ажурирајте ги контакт деталите, ставете Skype контакт детали, e-mail, GoogleWave детали за сорабтка со Вас, Facebook корисничко име, Twitter и се што имате, користите а не е наведено на Вашата веб страна за да Ве најдат.

7. Направи блог за твојот бизнис

Оваа е една стратегија која ја започнаа малите бизниси, а големите веднаш ја прифатија откако сфатија дека е добра и дава резултати. Но, најчест проблем што се јавува кај претприемачите е за што да пишуваат. Можете да прочитате за 10 теми за кои можете да пишувате на Вашиот бизнис блог. Запомнете дека со блогот не е целта да направите моментална продажба туку едноставно градите содржина која има за цел да ја поддржи денешната и утрешната продажба.

8. Направи стратегија за присуство на социјални медиуми

Ова едноставно значи да одговорите на следниве прашања:

  • Кои социјални медиуми?
  • Како да бидам присутен?
  • Со што да бидам присутен?
  • Кој јазик да користам во комуникација?

9. Започни со имплементација на стратегија за присуство на социјални медиуми

Имате премногу отворени можности за користење на социјалните медиуми, само треба да направите добра стратегија и да започнете со имплементацијата на се она што е опфатено во стратегијата. Ништо нема да изгубите, само можете да добиете поен плус во очите на потенцијалните потрошувачи.

10. Биди присутен секаде каде што се присутни твоите потенцијални потрошувачи

Секој би се занимавал со маркетинг доколку знае точно каде се наоѓаат неговите потенцијални потрошувачи. Но, проблемот не е толку едноставен. Потребна е анализа и познавање на потенцијалните потрошувачи како би знаеле каде тие се присутни. На таков начин и Вие како претприемач и Вашиот бизнис ќе можете да бидете присутни таму, било лично или пак преку некое маркетинг средство.

11. Мери ги резултатите од секоја маркетинг активност

Кога станува збор за маркетинг, ова е неминовна активност за еден претприемач. Прашањето е како да се мери успешноста на една маркетинг активност. Постојат неколку работи кои и досега ги потенциравме на претприемач. Првин, потребно е уште при дизајнот на маркетинг активноста да размислите за тоа како ќе ја мерите успешноста на таа маркетинг активност. На пример, доколку користите весник да ставите попустен купон за секој кој ќе дојде да купи или пак нарача од Вас. Потоа секоја таква продажба да ја претворите во приход во пари. За на крај тој приход да го поделите со по трошокот за таа маркетинг активност. Искористи го маркетинг календарот како еден од 10-те бизнис темплејти на претприемач.

12. Користи ги резултатите од мерењето и подобри ја секоја маркетинг активност

Кога веќе ќе имаш одреден фактор на успешност за секоја маркетинг активност лесно ќе можеш да ги подредиш врз основа на успешноста. За сите оние маркетинг активности кои даваат добри резултати обиди се да ги подобриш и да дадат уште подобри резултати. Размисли за менување на боја на огласот која ќе привлече поголемо внимание, доколку користиш огласи во весници.

13. Елиминирај се од маркетинг календарот што во 2009 година има слаби резултати

Сите оние кои се најслаби исфрли ги од маркетинг календарот, а сите оние кои даваат добри резултати продолжи ги. За секоја маркетинг активност која ќе ја исфрлиш избери нова согласно маркетинг буџетот. Па, повторно продолжи со мерењето. Така постојано ќе го подобруваш маркетингот на твојот бизнис.

За користење на маркетинг календарот од 10-те бизнис темплејти можете да го погледнете видеото за маркетинг календар.

14. Комуницирај со потенцијалните потрошувачи и купувачи

Доколку комуникацијата се употреби како посебно маркетинг средство моќта на маркетингот за Вашиот бизнис навистина ќе биде на едно завидно ниво. Можете да користите различни „далечински“ маркетинг средства, но доколку не воспоставите ситем на вистинска комуникација во вистинско време, ефиксноста и ефективноста на Вашите напори ќе биде мала.

Комуникацијата може да бидне вербална и невербална комуникација, директна и индиректна, официјална и неофицијална, озбилна и смешна, онлајн и офлајн…

Се е тоа еден вид на комуникација која ја остварувате со надворешниот свет – Вашите потенцијални купувачи.

15. Анализирај преку интервјуа и прашалници

Анализирај преку интервјуа у прашалници – Но што да анализираме? Едноставно што е она што го сакаат Вашите тековни купувачи и потенцијални порошувачи, но и што е она што не го сакаат. На ваков начин ќе успеете да искористите неколку работи:

  • Ќе стекнете знаење што е тоа што го правите добро и заради што купувачите ве избираат Вас. Сето тоа може да биде елемент на идно подобрување како би ја задржале конкурентската предност во тие елементи.
  • Ќе стекнете знаење за она што не им се допаѓа на Вашите купувачи. Ова е простор на големи промени и подобрувања.
  • И едноставно интервјуто или пак прашалникот претставува еден вид на маркетинг средство кој во очите на купувачот ве претставува како некој кој се грижи за нивното мислење.
post

10 Клучни Работи Кои Треба да Ги Започнете во 2010

Како навршува оваа 2009-та година и се побликсу е 2010-тата се прават различни анализи и проценки за тоа каква ќе биде 2010 година. На претприемач подготвуваме посебен напис за некои наши предвидувања во однос на бизнисите за 2010.

Препораки за претприемач за 2010

Во овој напис би сакал да издвојам 10 клучни работи за кои би требало да размислите и да ги спроведете во новата 2010 година, доколку не сте ги спровеле досега. Па да тргнеме:

1. Доколку сеуште не сте започнале сопствен бизнис размислете за оваа опција

Секогаш постои една ваква опција доколку сакате да постигнете нешто повеќе, односно доколку сакате да излезете од динамичката рамнотежа на удобноста што status quo ситуацијата Ви ја пружа. Можете новогодишните празници да ги искористите и да размислите дали можете да постигнете нешто повеќе во животот и дали опцијата да бидете претприемач е соодветна за Вас.

2. Внесете го вашиот бизнис во светот на интернетот

Една активност што според мене влегува во категорија МОРА. Маркетингот и начинот на комуникација помеѓу бизниси и бизниси како и бизниси и крајни потрошувачи во светот е целосно променет. Започнува да се менува и кај нас. Бидете подготвени и на оваа поле. Но, моја препорака е воопшто да не се нфаќате со оваа активност доколку сметате дека Вашата веб страна треба да биде една обична брошура. Само ќе потрошите пари, а ништо нема да добиете.

3. Започнете со SEO доколку сеуште не сте започнале

Една од основните активности кога станува збор за Вашата достапност на интернетот е SEO (Search Engine Optimization – Оптимизација на пребарувачи). Ова е една од најважните активности за да бидете достапни и најдени од потенцијалните потрошувачи во интернет светот. Дали Ви е потребна веб страна ако никој не може да Ве најде кога ќе има потреба од Вашите производи и/или услуги.

4. Искористете ги социјалните мрежи во полза на Вашиот бизнис

Секојдневно никнуваат нови социјални медиуми кои на некој начин ги поврзуваат луѓето меѓу себе. Социјалните медиуми се еден од елементите кои го изменија начинот на практицирање на маркетингот. Помеѓу 300 до 400 илјади македонци се на Facebook. Пред едно 3 до 4 месеци на Twitter имаше неколку илјади македонци, а верувам дека денес се уште повеќе и тој број ќе се зголемува уште.

Така да не смее да се испушти оваа можност кога еден просечен Facebook корисник е минимално еден час на неговата омилена мрежа. Затоа бидете и Вие како претприемач и Вашиот бизнис таму.

5. Интегрирајте систем на постојано учење

Во Знаење и креативност – втор слој за успех на еден претприемач веќе ги поставив основите за знаењето и неговата претходица наречена учење. Постојано учете за сите Ваши бизнис активности, учете за маркетинг, финансии, планирање, менаџмент, преговарање и договарање, продажба… Листата навистина е предолга. Кога станува збор за интегрирање на систем ова е навистина процес кој можеда се каже дека е и сложен и едноставен. Сложен бидејќи ќе бара еден вид на познавање од информатичка технологија за да се подеси пристигнување на информации и едноставно бидејќи по подесување учењето е навистина лесно.

6. Воведете систем за квалитетно следење на конкуренција

Втор систем кој би требало да го воведете е систем за следење на конкуренцијата. Конкуренцијата претставува важен фактор за Вашиот бизнис. Следејќи ја соодветно конкуренцијата и предвидувајќи ги нивните чекори ќе бидете секогаш еден чекор пред нив.

Кога зборувам за систем мислам на еден поавтоматизиран систем кој нема да бара премногу време од Ваша страна, а ќе Ве снабдува со квалитетни информации за Вашиот бизнис.

7. Воведете систем за квалитетна комуникација со Вашите купувачи

Она како се вели: Бидете еден чекор пред конкуренцијата и еден чекор поблизу до купувачите. Квалитетна комуникација со купувачите ќе Ви обезбеди да бидете еден чекор поблизу до нив. Кога сте поблиски со Вашите купувачи ќе добиете информации кои можат Вашиот бизнис да го подобрат во сите поглед на бизнис работење.

Освен традиционалата комуникација очи во очи, воведете можност за комуникација преку е-mail, социјални медиуми, телефон… Но, запомнете дека доколку ја овозможите оваа комуникација комуницирајте, одговарајте на меилови, одговарајте на прашањата преку социјалните медиуми и одговарајте на телефонските повици.

8. Воведете систем за квалитетна комуникација со Вашите потенцијални купувачи

Четвртиот важен систем е систем за квалитетна комуникација со Вашите потенцијални купувачи. Освен купувачите кои веќе Ви имаат дадено доверба потребно е да комуницирате и со потенцијалните купувачи кои сакате да Ви ја дадат нивната доверба и да постанат купувачи. Системот може да биде ист или пак сличен со системот за комуникација со купувачите.

9. Направете реинженеринг на комплетната маркетинг стратегија

Реинженеринг едноставно претставува повторно градење од почеток. Размислете ја целокупната Вашата маркетинг стратегија во поглед на се она што дава резултати и она што не дава резултати. Доколку не сте ги мереле сопствените маркетинг активности, сега е вистинско време да започнете. Исфрлете го сето она што не дава резултат и подобрете го она што дава резултат. Вообичаено компаниите кои ги спроведуваат Вашите маркетинг активности ќе се обидат да го продолжат договорто со Вас и за 2010. Пред да одлучите да го продолжите договорот запрашајте се за следново:

  • Дали имам резултати од таа маркетинг активност?
  • Какви се резултатите (денари/купувач од таа маркетинг активност или пак денари/продажба од таа активност)

10. Бидете фокусирани на она што го работите

И како последна препорака го избрав фокусот. Доколку не сте фокусирани на Вашиот бизнис и на Вашите претприемнички активности животот како претприемач навистина ќе Ви биде потежок.

2010 година не очекувам дека ќе биде розева во поглед на бизнисите и особено на малите бизниси. Ќе имате премногу активности кои ќе треба да ги спроведете. Затоа бидете фокусирани во она што го работите. Следете го она наједноставното правило: Првин најважните и најприоритетните работи.

Ова се едни од препораки кои сметам дека навистина имаат потенцијал да го подобрат Вашиот бизнис. Ако започнете и со други активности само ќе се подобрите уште повеќе. Па, се надевам дека ќе ја истуркаме и 2010-тата и ќе започнеме да бележиме вистински резултати.

post

Заење и Креативност – Втор Слој за Успех на Еден Претприемач

Знаењето е моќ, знаењето е сила! Многу популарна маркетинг кампања кај нас во последно време.

Знаење и креативност за успех на еден претприемач

Ова е веќе четврти напис од овој серијал за карактеристики на успешни претприемачи. Првин спроведовме една анализа за фактори кои еден претприемач го прават успешен, а подоцна резултатите од анализата ги поставивме во една хиерархиско пирамидална структура за најважни фактори.

Минатата недела го обработивме првиот слој од таа хиеарирхиско пирамидална структура – Спремност да се превземе акција. Ако сме спремни да превземаме акција потребно е таа спремност да ја надоградиме со вториот слој на патот кон успешноста, а тоа е знаење и креативноста.

Што претставува знаење за еден претприемач?

Јас имам знаење за ова. Јас имам знаење за она. Тие имаат знаење за нешто друго. Секаде околу нас се врти некакво знаење. Секоја личност има некое специфично знаење кое си го носи со себе. Мислам и дека не пости човек кој нема одредено знаење. Знаење почнува уште од нашето раѓање. Секој нов ден од нашиот живот претставува стекнување на одредено знаење. Знаењето го стекнуваме, дома од родителите, во градинка, подоцна во училиште, факултет и од животот.

Значи знаењето е составено од два значајни елементи:

  • Искуство. Сето она што го доживуваме на некој начин се преточува во наше знаење. Тоа е наш личен капитал или личен капитал на еден претприемач.
  • Едукација. Сетоа она што го стекнуваме низ задолжителниот и незадолжителниот едукациски систем се преточува во наше сопствено знаење. Освен оној едукациски систем, како училиште, факултет, курсеви, тука влегува и читање на некоја книга, стекнување на информации од интернет и било што што ќе Ве едуцира Вас како претприемач и што ќе ви го зголеми тековното знаење за нешто.

Што претставува креативност за еден претприемач?

Во Wikipedia за креативноста се вели:

Креативност е ментален и социјален процес на откривање на нови идеи или концепти, или ново поврзување на креативниот ум помеѓу постоечките идеи или концепти.

Значи кретивноста е директно поврзана со откривање на нови идеи или концепти или пак модификација на постоечки идеи и концепти.

Да се биде креативен не е лесно. Да се стекне знаење е многу полесно отколку да се биде креативен. Креативноста не се учи, туку едноставно се спроведува и излегува од самиот претприемач.

Комбинација на знаење и креативност

Затоа и вториот слој од претприемничкиот пат кон успешноста претставува едноставен микс меѓу знаењето и креативноста. Зошто еден ваков микс?

Првин, можете да имате знаење во преголеми количини, но без креативна примена на тоа знаење во секојдневната практика нема да Ви гарантира дека ќе бидете успешен претприемач.

Од друга страна сметам дека знаењето пак е единствениот фактор кој може да ја зголеми креативноста на еден претприемач. Како еден претприемач може да биде креативен доколку нема знаење? Најверојатно, никако. Освен ако очекува некаква божја дарба за да биде креативен.

Токму тука лежи овој концепт на миксање на знаењето и креативноста со што само ќе се зголеми веројатноста за успехот на претприемачот. Како што го зголемувате знаењето за одреден предмет така ќе се зголемува и потенцијалот на Вашата сопствена креативност.

Втор фактор кој влијае на зголемена креативност е самиот претприемач. Ова се однесува на тоа што го викаме вродено нешто кај некој. Се смета дека уметниците се најкреативни затоа што едноставно имаат талент од некоја гранка на уметноста и затоа што едноставно креираат уметност со сопствениот отворен ум. Веќе пишувавме на претприемач за 6 совети за зголемување на креативноста.

Со сето ова што го изложив погоре слободно можеме креативноста да ја изразиме математички како функција од знаење и претприемачот:

Креативност = f(знаење + претприемач)

Како да бидете подобар претприемач преку знаење и креативност?

И на крај она најважното прашање: Како да бидете подобар претприемач преку знаење и креативност?

Ќе набројам неколку совети за Ваше лично подобрување како претприемач, што секако ќе има директно влијание на подобро работење на Вашиот бизнис:

Зголемување на знаење

Бидејќи претходно објаснив зошто знаење без креативноста не оди и обратно, треба да тргнеме со зголемување на претприемничко знаење. Ова може да се постигне на два начина:

  • Постојано учење на нови вештини. Барем денеска имате огромна можност за учење. Потребно е само да воспоставите систем кој постојано ќе го зголемува Вашето знаење како претприемач. Тргнете од подрачјата каде сте најслаби, а Вашиот бизнис ги бара тие подрачја. Читајте стручна литература, списанија и весници од тие подрачја и применувајте го наученото во секојдневната работа.
  • Учење од грешки – искуствено учење. Со учење на нови вештини и нивно применување во секојдневнта работа постојано ќе ги усовршувате тие вештини преку сопствено искуство. Дури и грешките кои ќе ги направите ќе го зголемат Вашето сопствено знаење и ќе ве направат да бидете подобар претприемач.

Однесувајте се како претприемач

Да, претприемач значи да бидете креативни, па затоа користете ги најкреативните методи и техники кои ќе ви дојдат во умот за да ја зголемите сопствената креативност и знаењето. Како 6 совети за претприемничка креативност би ги издвоил повторно:

  1. Имајте бележник секогаш крај себе.
  2. Сменете ги рутините во вашиот живот.
  3. Разгледувајте.
  4. Вмрежувајте се.
  5. Реиновација.
  6. Користете ги местата кои ја зголемуваат креативноста.

post

Што е Претприемничка Продуктивност?

Можете да забележите дека често пати тука на претприемач го користам зборот продуктивност. Но, што е тоа продуктивност?

Претприемничка продуктивност

Зборот продуктивност на претприемач го користиме во следниве форми:

  • Бизнис продуктивност – еден бизнис да биде продуктивен
  • Претприемничка продуктивност – Еден претприемач да биде продуктивен
  • Продуктивност на вработените – Еден вработен да биде продуктивен
  • Продуктивност на ресурсите – Еден ресурс да биде продуктивен
  • Производствена продуктивност – Продуктивност на производствениот систем во бизнисот
  • Продажна продуктивност – Продуктивност на продажниот тим.

Ова се најважните ентитети во еден бизнис каде се користи зборот продуктивност, иако во однос на се можеме да ја бараме продуктивноста.

Многу користен збор, но дали доволно го разбираме?

Се сеќавам на едно предавање додека уште студирав, мојот тогашен професор и подоцна ментор проф. Д-р Тодор Кралев го постави ова прашање. Но, никој од нас не знаевме да го одговориме.

Сите знаевме дека е добро да се биде продуктивен, но како да ја мериме продуктивноста?

Дефинирање на продуктивноста

Првин би ја искористил дефиницијата од Wikipedia која некако ни го олесни животот на многу полиња:

Продуктивноста е мерка на излезот од производствениот процес по единица на влезот.

Значи на се што влегува на одреден начин во бизнисот и излегува на друг начин можеме да ја мериме продуктивноста. Во еден ваков случај како некој математички израз за продуктивноста би имале:

Продуктивност = Излез/Влез

 

Колку е поголем овој резултат толку ќе имаме поголема продуктивност.

Но, ова дефинирање не ми се допаѓа. Мислам дека е ОК, но сепак може да биде и подобро.

Една од најдобрите дефиниции за продуктивноста ја прочитав на блогот на Steve Pavlina насловен како Што е продуктивност? Како лична дефиниција Steve Pavlina ја дава следнава:

Продуктивноста претставува Вредност поделена со време:

Продуктивност = Вредност/Време

 

Оваа дефиниција ми се допаѓа бидејќи навистина се може да се подреди во вид на време. На пример времето можеме лесно да го пресметаме во вид на пари или пак некој друг облик.

Оваа дефиниција всушност ни кажува колкава вредност сме постигнале да создадаме за одредено потрошено време. На пример, за еден претприемач колку е продуктивен може да биде колку вреди неговиот бизнис во однос на време кои постои тој бизнис.

Како да ја зголемиме продуктивноста?

Втората формула толку ни го поедноставува животот во однос на продуктивноста така да едноставно можеме да забележиме што влијае на тоа да продуктивноста биде поголема.

Следниве активности ќе ја зголемат продуктивноста:

  • Да ја зголемиме вредноста, додека потрошеното време да остане исто.
  • Да го намалиме времето, додека вредноста останува иста.
  • Да ја зголемиме вредноста и да го намалиме времето за добивање на таа вредност.

На пример да го земеме продажниот тим. Колку е продуктивен? Доколку износот на продажба за 30 дена изнесува 500.000 денари продуктивноста ќе биде:

500.000 денари/30 дена = 16.666,66 денари/ден

Доколку се зголеми продажбата на 600.000 денари за 30 дена (времето останува исто) ќе ја имаме следнава продуктивност:

600.000 денари/30 дена = 20.000 денари/ден

На ваков начин произлегува дека нашиот продажен тим е попродуктивен за 20%.

Попродуктивен ќе биде и доколку успее за 20 дена да има продажба од 500.000 денари – 25.000 денари на ден. Исто така попродуктивен ќе биде и доколку успее да оствари 600.000 за 20 дена – 30.000 денари на ден. Ова е за скоро 100% попродуктивен нашиот продажен тим.

Сметам дека со овој напис на претприемач успеавме да ја расчистиме дилемата во однос на продуктивноста.

За крај еден совет: Мерете ја продуктивноста на сите критични елементи наведени на почетокот и обидете се постојано да ја подобрувате.