Бидете секогаш најиновативни! Алатки, екниги и видео презентации само за најхрабрите!

post

Што ти треба за да преживее твојот бизнис?

Бизнис 101: Планирање Денешното време во кое оперира еден мал бизнис не е некое време кое ќе обезбеди мирна иднина каде растот на бизнисот ќе биде гарантиран.

Потрошувачите имаат можности да бираат повеќе од било кога досега. Промените на пазарот се се почести што не можат да се следат со голо око. Се околу твојата компанија врши притисок врз тебе за брзи промени доколку сакаш компанијата да преживее.

Мора да го слушаш пазарот, заедницата, потенцијалните потрошувачи и потрошувачи. Мора да го прилагодиш твојот бизнис во согласност со нивните потреби, желби и вистински проблеми за кои сакаат уникатно решение. Мора да го оптимизираш за да излезеш во пресрет на се повеќе различни потреби на потрошувачите.

Ти си “босот”. Ти си претприемач. Одговорноста е твоја.

#1 Елиминирај го зборот “Не” од твојот речник

Во денешниот свет на бизнисите, не постојат изговори за “не”. Доколку пазарот сака нешто, мора да го испорачаш тоа што го сака. Доколку потрошувачите имаат нови потреби, мора да излезеш во пресрет на нивните нови потреби.

Не смееш да кажеш не, одговорот е секогаш да за се околу тебе и твојот бизнис.

#2 Ти треба флексибилен тим

Ти треба многу флексибилен тим кој ќе сака да ја направи разликата во твојот бизнис. Не ти требаат стотици прашања како зошто нешто треба да биде преземено.

Премногу прашања значат преголема нефлексибилност. Тие мора да комуницираат со тековните и потенцијалните потрошувачи. Мора да користат нова технологија. Мора да бидат флексибилни. Одговорноста е сечија.

#3 Промените се дел од секојдневниот живот во твојот бизнис

 

Имаш ли еден, само еден ден без промени во твојата компанија? Доколку одговориш со да, тогаш си во голема неволја.

Секое утро кога ќе дојдеш во твојата канцеларија запрашај се со следниве прашања:

  • Што можам да подобрам денес?
  • Што мора да променам денес?
  • Како ќе променам нешто денес?

#4 Имплементирај и користи сугестивни програми

Можните подобрувања се најдобри кога доаѓаат од секого во твојот бизнис. Ти не си најумниот во твојата компанија, иако си претприемач.

Најдобриот начин да го искористиш потенцијалот на сите твои вработени за да сугерираат можности за подобрувања е да имплементираш сугестивни системи.

#5 Решавај ги проблемите без одложување

Не добиваш ништо доколку одложуваш со решавање на проблемите во твојата компанија. Добиваш само одложено проблеми. Тие се тука, во твојот бизнис и мора да преземеш акција за да ги решиш.

Денешната работна околина не може да чека на твоите одложувања. Тоа се твои проблеми, не проблеми на твоите потрошувачи или конкуренти. Се мора да се заврши вчера, не утре, дури не и денес.

#6 Отстранувај ги причините за проблемите перманентно

Може да го решиш проблемот, но твојот процес на решавање на проблеми не завршува се додека не ги отстраниш сите причини за определен проблем.

Доколку не ги откриеш вистинските причини и да ги отстраниш од идно повторно појавување, ти не си го решил определениот проблем. Проблемот ќе се појави повторно во иднина.

#7 Подобри ги вештините на твоите вработени

Ти и твојот бизнис сакате вешти вработени, бидејќи твоите потрошувачи бараат производи и услуги базирани на вештини на твојата компанија.

Не заборавај да ги подобруваш вештините на твоите вработени доколку сакаш да преживееш.

post

Како да напишеш бизнис план?

Бизнис план

Бизнис план

Како да напишеш бизнис план? Каков наслов? Може ли да одолам на еден ваков наслов кога популарноста е огрооомна на бизнис плановите. Ти бараат институциите, ти бараат на натпревари, излегуваат по весници, еден куп реклами… Па, ајде и ние тука малку да се позанимаваме на оваа подрачје, иако сакам да напоменам да не се изненадите кога во идните постови ќе ја докажувам обратната хипотеза – не ти треба бизнис план.

Некаде сум прочитал, но можеби во некои постари или списанија или книги каде што се вели дека бизнис планот не гарантира успех. Тоа е сосема точно. Ништо не гарантира успех. Нели, кажавме во насловот што е карактеристично за еден мал бизнис и еден претприемач дека тоа е неизвесноста. А, тоа значи нема гаранции, најмалку пак гаранции за успех.

Од друга страна пак доколку немаш бизнис план или пак нешто што се нарекува некаков документ во кој на било каков начин ќе го исцрта барем приближно твојот претприемнички пат ќе гарантира неуспех. И тоа може да биде точно, но сепак се коси со неизвесноста и дека не постои гаранција за успех, но математички гледано и за неуспех.

Кога работиш на твојот бизнис план, пред да одам со супер кратко и лесно упатство во 30 чекори за пишување (човече, велам пишување на бизнис план, а досега користев термин процес на бизнис планирање, но, што е тука е, сакам и јас да бидам модерен и во тренд), сакам да напоменам едно нешто. Оде.. ги сите оние за кои го пишуваш бизнис планот. Заборави ги, не постојат. Постои само една фигура за тебе, а тоа е потрошувачот. Твојот бизнис не е за оној кој ќе го чита и од чие да или не зависи некоја “сиќа” која ќе ја добиеш. Твојот бизнис ќе треба да постои за твоите потрошувачи, ако ги има, нормално.

Па, да не должам, одиме со супер, хипер, топ, нај, кратко и лесно упатство во 30 чекори за пишување на бизнис план (ако звучев неозбилен во овој вовед, сега ќе бидам крајно озбилен):

  1. Први, пред било што друго, започни да размислуваш на се околку твојот сегашен или иден бизнис.
  2. Напиши ги твоите цели на хартија. Не мисли на лични и бизнис, пиши што се сакаш да оствариш, нека ти олесни на душичката.
  3. Размисли повторно, но сега со фокус на целите кои ги напиша во претходниот чекор.
  4. Оддели ги личните од бизнис цели.
  5. Размисли повторно и за личните и за бизнис цели.
  6. Опиши го твојот бизнис во една едноставна реченица. Што, кого, како, каде и дали.
  7. Опиши ја вредноста на твојата бизнис понуда или понуда која ќе се понуди во иднина. И не мисли за оној што ќе го чита планот (дури и тоа да си ти), описот базирај го од перспектива на еден твој потрошувач (сегашен или иден, како сакаш).
  8. Опиши го твојот целен пазар.
  9. Опиши го твојот идеален купувач.
  10. Размисли повторно. Сега размислувај за предвидувањата за иднина.
  11. Напиши ги предвидувањата на хартија.
  12. Е сега малку треба да се помачиш. Излези надвор и истражувај.
  13. Провери ги откритијата од истражувањето со предвидувањата.
  14. Прилагоди ги прилагодувањата доколку сметаш дека не се совпаѓаат со резултати од истражувањето од точка 12.
  15. Одговори на прашањето: Дали предвидувањата се нешто што ја отсликува реалноста, или пак ја отсликуваат колку што може подобро реалноста во иднина, или пак тие едноставно се само твои желби? Доколку се нешто што ја отсликуваат реалноста може да продолжиш со следните чекори, доколку не, врати се на точка 10.
  16. Сега може повторно да ги напишеш предвидувањата на лист хартија или на што сакаш.
  17. Предвидувањата за продажба постави ги во една табела, но на месечно ниво. Може да направиш графичка презентација на табелата доколку сакаш да го подобриш фокусот на твоите предупредувања.
  18. Размисли повторно. Сега дали продажните бројки од предвидување се нешто што овозможуваат остварување на целите од точка 5.
  19. Доколку одговорот е да, може да продолжиш. Доколку одговорот е не, тогаш врати се на точката 10 за предвидувања, а може и на точката 5 кај што се целите.
  20. Размисли повторно, сега за тоа пто ќе треба да направиш за целите да се остварат.
  21. Напиши на лист хартија се она што ќе треба да го направиш.
  22. Размисли повторно, сега за тоа кој ќе треба што да прави.
  23. Во близина на секоја задача, напиши ги имињата на одговорните за нивно спроведување.
  24. размисли повторно, но сега за пари, за буџетот.
  25. Во близина на секоај задача, напиши колку пари ќе треба за секоја од задачите.
  26. Сега пресметај ги трошоците.
  27. Провери дали вкупните трошоци се покриваат со проекциите на продажба.
  28. Доколку приходот од продажба е поголем од трошоците, пресметај ги даноците. Доколку не се, врати се на точката 10.
  29. Провери колку пари ќе ти останат.
  30. Доколку не ти се доволни, врати се на точката 1.

Како што гледаш ова е процес. И теоретски гледано, со неизвесност и бла, бла сепак е процес кој не запира, не е пишување и документирање. Тоа е за административците, а претприемачите се далеку од административци.

post

Како да ги зголемиш цените без да ги изгубиш потрошувачите?

Грешки при определување на цени Минатата недела зборувавме за 4 начини за зголемување на цените. Во тој пост опишавме 4 различни техники за зголемување на цените кои се базираат на различни ситуации како причина за тој чекор.

Но, вистинскиот проблем кога станува збор за зголемување на цените претставува перцепција на потрошувачите. Не постои претприемач кој не се прашал себеси следново прашање: Каква ќе биде реакција на купувачите кога ќе ги зголемам цените?

Дали потрошувачите ќе продолжат да купуваат во иста количина како и пред зголемувањето на цените?

Да разгледаме некои можности кои ти како еден претприемач можеш да ги користиш за да го амортизираш влијанието на зголемувањето на цените врз тековните купувачи.

#1 Може да додадеш дополнителна вредност во понудата

Една од првите рабори кои можеш да ги направиш е да додадеш вредност на самата понуда. Може да додадеш дополнителни карактеристики, нови корисности, дополнителни сервисни елементи, бонуси, гаранција, испорака…

Логиката зад ова е доколку додадеш дополнителна вредност на твојата основна понуда за која сакаш да ја зголемиш цената, може да се види како фер компензација за повисоката цена која ќе ја побараш за твоите производи или услуги. На таков начин, потрошувачите ќе го ценат тоа, бидејќи ќе добијат поголема вредност која на друг начин ќе им заштеди.

Кога и да помислиш за зголемување на цената обиди се да најдеш дополнителни елементи кои како вредност ќе ги закачиш на понудата.

#2 Подобри ја понудата

Втората работа која може да ја направиш во намалување на влијанието на зголемувањето на цената врз твоите купувачи е да ја подобриш понудата за која ќе бараш дополнителен износ на пари.

Еден дел е подобрување на содржината на понудата, твоите производи или услуги и се она што е изградено околу твоите производи или услуги. Ова е нешто што го правиш при додавање на дополнителна вредност во твојата понуда.

Втората работа е да ја подобриш понудата за да ја направиш навистина неодолива за твоите купувачи. Неодолива понуда не поставува прашања за цена од перспектива на еден потрошувач. Таа едноставно е неодолива. Може да прочиташ повеќе во 26 начини до неодолива понуда.

Кога размислуваш за подобрување на твојата понуда размислувај за подобрување на корисностите. Размислувај за подобрување на проблемите кои твојот бизнис ги решава и начинот на кој ги презентираш тие решенија и ги комуницираш со нив. Размислувај за вистинските желби на твоите потрошувачи. Размисли за тоа како да ги активираш емоционалните поттикнувачи во твојата понуда. Размислувај за подобрувања на твојот повик за акција и социјалниот доказ како дел од твојата севкупна понуда.

Тоа се елементи кои имаат голем потенцијал за амортизација на влијанието на зголемувањето на цените во очите на потрошувачите.

#3 Биди искрен

Последната работа е да бидеш искрен со потрошувачите. Ова значи искрено објаснување за тоа зошто си принуден на зголемување на цените.

Запомни дека искреноста е важен елемент кој доведува до зголемување на кредибилитетот, репутацијата и довербата (за што како посебни чекори во таа насока изработивме упатство како дел од првиот вебинар на премиум претприемач). Ова претставува голем дел од твојата бизнис потенцијална енергија.

Доколку потрошувачите можат да ги разберат твоите намери, ќе разберат и зошто мора да ги зголемиш и цените, и доколку тие се задоволни со твојот бизнис досега, ќе продолжат и да купуваат од тебе и понатаму.

post

Користење на Gmail и Evernote како CRM систем

Evernote Минатиот месец напишав еден пост за тоа како може да се користи Gmail како CRM систем (систем за менаџирање на односите со потрошувачите ) од страна на еден претприемач или за целите за еден мал бизнис. Gmail дава доста добри можности за внесување на податоци за потрошувачите и потенцијалните потрошувачи.

Но, понекогаш природата на бизнисот е таква да самите податоци за секој клиент може да дојдат во една навистина несредена форма. На пример, слики, текст, честа email комуникација, материјали за проекти, понуди, одговори… Иако може да се најде начин како сето ова да се спакува преку Gmail, но тука би сакал да споделам една креативна можност да се комбинираат Gmail и Evernote за ти како еден претприемач биднеш многу поорганизиран во однос на тие односи како со потрошувачите така и со потенцијалните потрошувачи.

Во претходниот пост за Evernote кој беше објавен на претприемач насловен како може ли поголема продуктивност со Evernote наведов повеќе идеи за користење на оваа апликација во кои не беше опфатена темата во овој пост. Но, како што наведов се повеќе се играм во однос на користење на оваа апликација и постојано наоѓам нови креативни начини на користење на истата.

Како едно надополнување во однос на користење само на Gmail каде може да собираш информации за твоите потрошувачи, за твоите потенцијални потрошувачи, да вршиш сегментација, можеш да ги следиш твоите маркетинг активности поврзани со email со секој од твоите потрошувачи, можеш да научиш повеќе за нив, можеш да изградиш подобри односи со нив, со помош на Evernote ќе можеш да ги следиш и сите други маркетинг активности поедноставно, да додадеш едноставно било што друго поврзано со нив и секако да имаш едноставен и брз пристап до информациите.

Ајде да видиме како може да се комбинираат овие две алатки.

#1 Креирање на нотеси во Evernote

Контејнер и нотеси во Evernote

Контејнер и нотеси во Evernote

Првин мора да започнеш со добра организација во Evernote преку креирање на соодветни нотеси. На пример, организацијата на нотеси во Evernote се изведува преку Stacks (именуван контејнер за нотеси) и Notebooks (нотеси). Значи, логиката е да има по еден уникатен контејнер со повеќе нотеси во истиот. Ваквиот начин ни овозможува организирање и расчленување на две нивоа, што можеби претставува и една ограниченост и недостаток кој го забележав во апликацијата бидејќи полесно е да имам еден контејнер со клиенти и во истиот нотеси за различни клиенти и во тие нотеси уште поднотеси кои би можеле да бидат, контактирано, одговорено, генерални информации, состаноци…

Но, во секој случај и ваквиот начин ни одговара, доколку добро се организираме. Во овој случај би имале по еден контејнер (stack) за секој клиент во кој ќе бидат содржани различни нотеси. На пример би имале:

  • Клиент 1 контејнер (нотес 1, нотес 2, нотес 3, …)
  • Клиент 2 контејнер (нотес 1, нотес 2, нотес 3, …)
  • Клиент 3 контејнер (нотес 1, нотес 2, нотес 3, …)
  • …
  • Клиент n контејнер (нотес 1, нотес 2, нотес 3, …)

Кога станува збор за нотеси тие ќе зависат од твоите потреби, но како еден пример како би можел да ги организираш може да ги користиш следниве идеи:

  • Контакт од твоја страна
  • Одговор
  • Информации за потрошувачот
  • Состаноци…

Следното нешто на што добро треба да размислиш се ознаките (tags) на секоја белешка која ќе оди во одреден нотес заради поедноставен пристап во иднина и помош во пребарувањето.

Кога веќе ќе ги имаш определено структурата на организацијата и клиентите може да преминеш во следната фаза, интеграција со Gmail.

#2 Интеграција на Evernote со Gmail

Пред да започнеш со самата интеграција, сакам да напоменам дека не треба да очекуваш целосна автоматизација. Но, целта на CRM систем не е да работи без човек, туку да биде организиран од страна на човекот и да се користи од страна на човекот.

Интеграцијата на Gmail со Evernote ќе ти помогне малку во автоматизирање на самиот процес преку користење на опцијата филтри во Gmail. Така, првин треба да изработиш филтер за секој од твоите клиенти.

Филтер во Gmail за интеграција со Evernote

Филтер во Gmail за интеграција со Evernote

Филтер во Gmail кој ќе ги праќа email-овите во Evernote

Филтер во Gmail кој ќе ги праќа email-овите во Evernote

На втората слика е покажана акцијата која филтерот ќе треба да ја направи, а тоа е email-от од клиентот да го прати како белешка во твојот Evernote акаунт (Evernote ти дава посебен email акаунт кој се користи за праќање на белешки преку email). Запомни дека постапката треба да ја повториш, но со филтер кој ќе користи To како на првата слика за email-ови кои ги праќаш на тој клиент.  На ваков начин секој email кој ќе го добиеш од твојот клиент или потенцијален клиент или пратиш автоматски ќе се покаже и како забелешка во Evernote со што нема да мора рачно да ги внесуваш тие контактирања.

Секоја ваква забелешка нема да биде веднаш во вистинскиот контејнер и клиент како нотес во Evernote туку ќе оди во посебен фолдер кој ти е изберен за внесување на белешки. Така да ќе треба секоја нова забелешка добиена преку Gmail да ја ставиш во нотесот за кој клиент се однесува. Оваа од друга страна е добро, бидејќи ќе бара да влезеш во апликацијата и да ја најдеш забелешката која треба да ја пренесеш во соодветен нотес, а во исто време и да ја едитираш со твои забелешки или идеи за идни активности во однос на таа белешка.

#3 И што потоа?

Сега кога веќе имаш организиран систем, твојата работа ќе биде да го полниш и со останати информации или белешки поврзани со потрошувачот. Еве некои примери како можете да го користите она што го креиравте до сега:

  • Можете да ставите забелешка со твои идни активности и да користите check box во таа забелешка за што Evernote има одлично решение, со тоа да креирате посебна To-Do листа за вашите идни активности.
  • Можете да направите контакт листа со слика, адреси, контакт детали за вработените, родендени на тие вработени кај тој ваш потрошувач доколку ги има. Секако еден дел од работата на CRM е да градите односи со потрошувачите. Дали, праќање на роденденска честитка нема да ви помогне да тие односи бидат на едно повисоко ниво.
  • Можете се она што ќе дознаете за потрошувачот да го внесете во вид на белешки. Каде јаде, каде пие кафе, со кого се дружи, каде излегува, што сака, што не сака, какво пиво пие и дали пие… Можеби сите овие прашања ви изгледаат смешно, но верувајте може да ви се најдат. Колку повеќе знаеш толку подобри односи ќе изградиш, а колку подобри односи ќе изградиш, толку подобар бизнис ќе имаш со тој потрошувач.

Ова се само како идеи, сепак вашата креативност е таа која ќе ве води низ процесот.

#4 Подобрувај

Колку повеќе ќе го користите системот, толку подобро ќе бидете испраксирани со што ќе дојдете до многу идеи за подобрување.

***

Мора да напоменам дека Evernote може да биде секаде со тебе. Го има како мобилна апликација. Го има за таблети, за десктоп компјутери, но и веб верзија.

post

Иновативни можности – уште неколку

SEO елементи Ова е последниот пост од серијалот за иновативните можности и нивни извори. Во првиот пост зборувавме за иновативни можности каде што прикажавме одредени извори на иновативни можности. Потоа продолживме за видови на иновативни можности согласно Peter Drucker кои се однесуваат на неочекувани случувања и несовпаѓања, за да во претходниот опфатиме некои ограничувања и предупредувања во однос на иновативните можности.

Да одиме со уште уновативни можности.

#1 Промена на структурата во стопанството и пазарот

Сето тоа што досега го истакнавме, односно дали несовпаѓањата на економската реалност ќе се конфронтираат со нашето очекување или ќе индуцираат процеси на неочекувани и неповолни резултати, ќе зависи, во секој случај, од состојбите и тенденциите на стопанската и пазарна структура!

Стопанска и пазарна структура понекогаш останува непроменета со години и изгледа потполно стабилна. Така во светската алуминиумска индустрија, по цело столетие, лидер е сеуште иста компанија – Алуминиумска компанија America од Pitsburg.

Во стварноста стопанската и пазарната структура е крта. Една мала гребаница е доволна, брзо да дојде до нивно дезинтегрирање. Кога тоа навистина ќе се случи, секој припадник на таа индустрија мора да дејствува.

Продолжување на работите,  како ништо да не се случило, значи гарантирано пропаѓање. Во најмала рака, компанијата ќе ја загуби својата водечка позиција во соодветна гранка. Кога таа позиција ќе се загуби, речиси никогаш повторно не се стекнува.

Меѓутоа промената во структурата на стопанството или пазарот исто така претставува важна можност за иновација. Таа бара секој одново да се запраша: Што е нашата работа?

Промените во структурата на стопанството, посебно во индустријата, нудат извонредни можности видливи за надворешниот свет. Луѓето внатре гледаат главно опасност за себе. Од таа причина аутсајдерите кои праваат иновација можат да одиграат значителна улога.

Најсигурен и најлесно видлив индикатор каде што се гледа менување на стопанска структура е брз пораст на одредена гранка на стопанството. Доколку некоја стопанска гранка расте значително побргу од стопанството, во целина може да се предвиди дека нејзината структура драстично ќе се менува. Во времето кога една гранка ќе го удвои обемот на своето работење, станува несоодветен начинот на кој таа го забележува и го служи пазарот.

Еден друг развој кој предвидливо ќе доведе до ненадејни промени во стопанската структура е конвергенцијата на технологиите, кои се до тогаш биле сметани како потполно одвоени. Една стопанска дејност е зрела за битни структурни промени, доколку бргу се менува начинот на кој работи.

Иновациите кои ги користат промените во стопанската структура, посебно се ефикасни доколку со таа дејност и со пазарот доминира еден голем произведувач. Дури и кога нема прав монопол, тие големи произведувачи и снабдувачи покажуваат тенденција да бидат узурпатори, затоа што со години биле успешни и незагрозени. Тие, прво го третираат новодојдениот како неважен партнер и како аматер во работата. Кога новодојдениот презема се поголем дел од работа, тие тешко се мобилизираат за противудар. Кога се менува структурата на пазарот или стопанството, често се случува произведувачите и снабдувачите, кои се моментални лидери, да го занемарат најпрогресивниот сегмент од пазарот. Битно е иновацијата во таа област да биде едноставна. Компликуваните иновации не можат да остварат успех.

#2 Демографски движења

Демографските движења, како промени во населението, неговиот обем, старосната структура, составот, вработеноста, образовниот статус и приходи, нудат големи можности за промени. Секој менаџер треба да ги набљудува демографските промени и да им се прилагодува, бидејќи секоја импровизација и нереално согледување, скапо ќе ја чини компанијата. Тие се познати фактори и секогаш одат пред времето и имаат големо влијание на тоа што ќе биде купувано во иднина, од кога и во колкави количини.

Американските тинајџери, во однос на постарите американци, купуваат ефтини обувки. Тие купуват поради мода, а не поради трајност. Но нивните средства се ограничени. Истите тие луѓе, десет години подоцна, ќе купуваат само неколку пара чевли годишно, приближно шест пати помалку отколку кога имале 17 години. Но, тогаш ќе купуваат прво поради удобност и трајност, а дури потоа поради мода.

Луѓето во првите пензиски години го чинат главно пазарот за патување и одмор. Десет години подоцна, тие исти луѓе ќе бидат клиенти на старечки домови и медицинска нега.

Луѓето кои во помлади години се стекнале со широко образование, по 10-20 год. ќе станат кандидати за разни специјализации и стручни усовршување. Тие луѓе се заинтересирани за вработување како работници со знаење.

Дури и без конкуренцијата од земјите со ниски надници и големиот пораст на бројот на млади луѓе, неквалификувани или полуквалификувани, индустриските развиени земји од Запад и Јапонија, би морале да пристапат кон автоматизација на производството, бидејќи имат високо школуван кадар.

Демографските промени покажуваат дека комбинираните ефекти на наглиот пад на наталитетот и експанзија на образованието (во западните земји), создава скоро сигурна состојба во која традиционалното вработување на рачни производни работници, околу 2010 год. би можело да биде на максимално ниво од 1/3 во однос на 1970 год.

Демографските промени се покажале брзи, сложени, дури брутални и многу влијателни. Статичните популации кои долго време остануваат на едно место, се повеќе исклучок отколку правило.

Непромислено би било да се занемарат демографските промени и во дваесет и првиот век. Основна претпоставка и за денешното време е дека населението во светот е нестабилно и подложно на промени. Еден од поголемите проблеми во светот во овој век ќе биде, од една страна стареењето на населението во развиениот свет, а од друга страна зголемувањето на бројот на населението во неразвиените земји.

За оние кои сакат “да излезат на терен за да гледаат и да слушаат”, промената на демографската структура е високопродуктивна иновативна можност.

#2 Промени во забележувањето

Во математиката нема разлика помеѓу чашата е до “половина полна” и чашата е до “половина празна”. Меѓутоа, ако ставот дека нешто е до пола полно се смени со ставот дека тоа е сега до половина празно, тогаш тука се јавува иновативна можност.

Фирмата Небесен зачин од Колорадо почнала една промотивна програма под име “децата на цвеќето” така што во 1960 год. почнала со собирање на планински треви и билки, како и нивно пакување и изнесување на улица заради продажба. Петнаесет години подоцна, истата фирма забележала годишен промет од повеќе стотини милиони долари и била продадена на голема компанија за преработка на храна, за повеќе од 20 милиони долари. Денес постојат повеќе високопрофитабилни компании за продажба на здрава храна. Тука се работи за визионерски способности на Peter Drucker, кој долги години нанапред ги согледува состојбите што ќе се случат, бидејќи и сами сме свесни за се понагласената борба за здравје, преку користење на билни препарати, како и профитите кои се создават од таа работа.

#3 Нови знаења

Иновацијата, заснована на нови знаења, е суперѕвезда на претприемништво. Таа носи пари и тоа е она на што луѓето обично мислат кога зборуваат за иновација.

Знаењето не е задолжително техничко и/или технолошко. Социјалните иновации засновани на знаење имаат еднакво или дури поголемо влијание.

Иновациите кои се засновани на знаење, имаат најдолго време за реализација во однос на другите иновации. Постои долг временски период помеѓу појавата на ново знаење и почетокот на неговата примена во технологијата. Потоа следува уште еден долг период, пред таа технологија да се искористи во производство. Долгото време за реализација на иновациите кои се засновани на знаење не е ограничено само на науката или технологијата. Ова важи и за иновации кои се засновани и на нетехнолошки знаења.

Rudolf Dizel во 1897 год. проектирал мотор кој го носи неговото име. Сите разбрале дека се работи за голема иновација. Меѓутоа со години овој мотор намал некоја позначителна примена. Дури во 1935 год. Американецот Charles Ketering, одново го проектирал Дизеловиот мотор, со што го оспособил за употреба.

Друга карактеристика на иновациите кои се засновани на знаење е тоа што тие речиси никогаш не се засноваат на еден фактор, туку на повеќе разни знаења, меѓу кои има и такви кои не се научни или технолошки. Додека не се спојат сите потребни знаења, не може да отпочне реализацијата на иновацијата која е заснована на знаење.

Иновацијата која е заснована на знаење бара внимателна анализа на сите фактори, било да е тоа знаење, било да се социјални, економски или перцептивни фактори. Анализата мора да утврди кои фактори уште недостасуваат. Претприемачот може да одлучи дали тие фактори кои недостасуваат, можат да се произведат или треба да се одложи иновацијата, доколку се уште е неизводлива.

Понатаму треба да се бара јасна концентрација на стратешката позиција. Таа може да се воведе како пробен обид. Тоа што се воведува иновација привлекува многу луѓе, па иноваторот мора да биде во право веќе од почеток, зашто втора шанса тешко дека ќе добие.

Иноваторот траба да учи и да го применува претприемничкиот менаџмент. Претприемничкиот менаџмент е поважен за иновацијата, која е заснована на знаење од која било друга иновација. Нејзините ризици се големи, поради што се добива и многу поголема заработувачка. Иновациите кои се засновани на знаење, а посебно оние во секторот на висока технологија, се стремат да имаат помалку претприемнички менаџмент. Од тие причини се јавува висока стапка на неуспехот. Иноваторите се вљубеници во сопствената технологија, па веруваат дека квалитетот значи она што е технички совршено, а не она што претставува вредност за купувачот.

Успешните претприемачи се по правило конзервативни. Тие не се концентрирани на ризик, туку на можност.

Останатите постови од серијалот за иновативни можности можете да ги прочитате:

post

Како да го привлечеш твојот идеален купувач?

Твојата работа како еден претприемач е секогаш да работиш на привлекување на нови потрошувачи за твојот бизнис. На ова се базира растот на твојот бизнис. Тоа е дополнителна бизнис потенцијална енергија за твојата компанија.

Но, привлекување на купувачи за твојот бизнис те чини пари. Сакаш да бидеш присутен секаде каде што се наоѓаат твоите потенцијални купувачи. Оваа присутност бара напор, време и пари.

Зошто би сакал да ги фасцинираш потенцијалните купувачи доколку тие немаат интерес за твоите производи или услуги?

Зошто би сакал да ги фасцинираш потенцијалните купувачи доколку тие ги немаат проблемите кои твојата компанија ги решава?

Сигурно не сакаш да ги фасционираш таквите потенцијални потрошувачи, туку сакаш да ги привлечеш идеалните потрошувачи за твојата компанија.

За таквите потрошувачи вреди напорот, времето и парите вложени за нивно привлекување. Тие имаат поголем потенцијал да конвертираат во купувачи, бидејќи тие веќе имаат потреба од твоите производи или услуги, и секако сакаат да ги решат проблемите кои твојата компанија може да ги реши за нив.

Во продолжение се дадени 4 чекори кои ќе треба да ги преземеш доколку сакаш да ги привлечеш идеалните купувачи за твојата компанија.

#1 Целен пазар

Кој е твојот целен пазар?

Треба да го знаеш одговорот, бидејќи твоите идеални потрошувачи се токму на тој пазар. Треба да ги пронајдеш таму.

Без прецизно знаење на целниот пазар, нема да можеш ниту да ги најдеш твоите идеални потрошувачи.

Затоа треба да го опишеш твојот целен пазар. Користи демографија, социологија, географија или било што друго што ќе ти каже каде се наоѓаат твоите идеални купувачи.

#2 Твоите идеални потрошувачи

Знаеш ли кои се твоите идеални потрошувачи?

Дали тоа е Перо, сопственик на мал бизнис кој продава мобилни телефони и има потреба од рекламирање на неговиот бизнис? Или тоа е Елена, која сака да има сопствена пекара и има потреба од консултации за започнување на бизнис?

Повторно, кои се твоите идеални потрошувачи?

Размисли за ова:

  • Тие се дел од твојот целен пазар.
  • Тие имаат потреби за твоите производи и услуги.
  • Тие треба да имаат проблеми кои твојот бизнис ги решава.
  • Тие треба да имаат страсна желба за да ги решат тие проблеми.
  • Тие мора да бараат можни решенија за нивните проблеми.

Опиши го твојот идеален купувач користејќи ги погоре опишаните потреби за некој да може да влезе во категорија на твојот идеален купувач.

#3 Лоцирај ги

Сега знаеш кој е твојот целен пазар и ги знаеш твоите идеални потрошувачи. Следното нешто што треба да го преземеш е да ги лоцираш.

Каде се твоите идеални потрошувачи?

Каде одат, каде јадат, каде работат, каде ги бараат решенијата за нивните проблеми…?

Сите овие прашања се важни за тебе и за твојот бизнис доколку сакаш да изградиш присуство на твојот бизнис на тие места и нормално, да ги привлечеш.

#4 Начини за привлекување

Можеш да бидеш присутен на сите тие места каде што се наоѓаат идеалните купувачи, но доколку не успееш да го привлечеш нивното внимание нема да можеш да ја исполниш целта, а тоа е да привлечеш колку што може повеќе од нив.

Размисли за овие прашања:

  • Како можеш да им пристапиш?
  • Како можеш да комуницираш со нив?
  • Која ќе биде првата работа за која ќе комуницираш со нив?
  • Како ќе кажеш приказна за слични проблеми?

Доколку ги одговориш прашањата, ќе знаеш како да ги привлечеш. Денешниот бизнис свет не е место каде едноставно ќе ги закачиш твоите маркетинг материјали и ќе се здобиеш со потребното внимание.

Таму, на твојот целен пазар, постојат многу ентитети кои се обидуваат да го привлечат истото внимание за истите лица кои ти се обидуваш да ги привлечеш. Мора да бидеш попаметен, и да го искористиш твојот потенцијал.

Затоа комуницирај, не продавај. Едуцирај, не продавај. Гради односи, зголеми го кредибилитетот и довербата, биди нивен пријател… (Повеќе за тоа како до позитивно влијание врз идеалните купувачи можете да видите во вебинарот насловен како: Како потрошувачите да те изберат тебе место конкуренцијата.) Доколку успееш во ова, ќе зграбиш многу поголемо внимание и привлекување на твоите идеални купувачи.

post

Иновативни можности – Ограничувања и предупредувања

Вредност Да продолжиме со серијалот за иновативните можности и нивни извори. Во првиот пост зборувавме за иновативни можности каде што прикажавме одредени извори на иновативни можности. Потоа во следните два поста зборувавме за видови на иновативни можности согласно Peter Drucker кои се однесуваат на неочекувани случувања и несовпаѓања.

Во овој пост од серијалов ќе зборуваме малку за некои некои ограничувања и предупредувања.

#1 Потребата мора да се разбере

Да, потребата мора да се разбере. Не е доволно таа да се почувствува. Во спротивно, не можат да се дефинираат спецификациите на бараното решение.

На пример, се знае дека математиката е проблематична за учење. Само мал дел од учениците намаат проблеми со нејзиното учење. Но, сепак можно е поголем број ученици да се оспособат за полагање испит. Јапонците тоа го прават со голема концентрација при изучување на предметот. Меѓутоа, по десетина години и тие покажуваат исти слабости во знаењето на математиката како и нивните западни колеги. Во секоја генерација постои некој генијален учител по математика, кој може да ги научи математика дури и помалку талентираните ученици. Но, ретко се случува друг да може тоа да го повтори. Значи, потребата на процесот е воочена, но уште не може да се разбере во што е проблемот и како да се реши.

#2 Мора да постојат потребни знаења

Понекогаш може дури и да се сфати процесот, односно неговата потреба, па сепак да се немаат потребните знаења за извршување на задачата.

Во производство на хартија постои потреба да се пронајде поекономичен начин. Многу луѓе работеле на тој проблем. Точно се знае што е потребно: неопходно е да се изврши полимеризација на целулозниот молекул. Тоа би требало да биде лесно, бидејќи тоа веќе е направено со слични молекули. Меѓутоа, уште нема доволно знаење за реализација на овој проект.

#3 Усогласеноста на решението со луѓето кои ќе го користат

Решението мора да одговара на начинот на кој луѓето ја работат и сакаат да ја работат својата работа. Доколку решението за задоволување на потребата во целост ги менува досегашните начини на работа, истото ќе биде тешко прифатливо.

На пример, доколку измислите некој специјален и сосема иновативен компјутер, кој ќе користи тастатура која не е QWERTY тастатура на која корисниците се навикнале и знаат да работат без да гледаат во неа. Целото решение ќе биде тешко прифатливо бидејќи ќе бара сосема ново искуство и нов начин на користење за кое ќе треба време за да се усвои. Во таков случај корисниците ќе одат по линија на помал отпор, користење на она што веќе го имаат, знаат и имаат искуство да го користат.

Така се ризикува едно иновативно решение да не биде прифатено.

Останатите постови од серијалот за иновативни можности можете да ги прочитате:

post

Извори на иновативни можности – Несовпаѓања

Кратенки во бизнис Ќе продолжиме со иновативните можности и нивни извори. Во претходниот пост зборувавме за видови на иновативни можности согласно Peter Drucker кои се однесуваат на неочекувани случувања.

Тука ќе продолжиме со други видови на иновативни можности согласно Peter Drucker, но за несовпаѓањата.

Несовпаѓањето е несогласување помеѓу она што е и она што би требало да биде. Несовпаѓањето е симптом на можност за иновација. Тоа навестува постоење на некоја грешка, а таква грешка е повик за иновација. Тоа предизвикува нестабилност, во која и мали напори можат да предизвикат големи промени и да донесат преструктуирање на економската и социјалната структура.

Несовпаѓањето обично не се манифестира во облик на извештаи или податоци на кои раководителите на компаниите ќе обрнат внимание. Тие се повеќе од квалитативен отколку од квантитативен карактер.

Како и неочекуваното случување, без разлика дали се работи за успех или промашување, несовпаѓањето се исто така симптом на промени кои веќе се случиле или на оние кои ќе направат нешто да се случи.

Како и промените на кои укажуваат неочекуваните случувања, така и промените на кои укажува несовпаѓањето, по правило се промени во рамките на самата индустрија, пазарите, производниот процес. На тој начин несовпаѓањето е јасно видливо за луѓето близу одредена гранка на индустрија, пазари или процеси. Тоа се наоѓа пред нивните очи. Сепак, тоа често се губи од вид кај оние “внатре”, бидејќи се тие оптеретени со секојдневието и од “дрвјата едноставно не ја гледаат шумата”.

#1 Несовпаѓање на економската реалност

Доколку побарувачката за некој производ или услуга брзо расте, тогаш би требало да се подобрат и нивните економски перформанси. Полесно е да се биде профитабилен во стопанска гранка која бележи голем пораст на побарувачка. Меѓутоа, изоставувањето на профитабилност и резултати во таква стопанска гранка, укажува на постоење на несовпаѓање помеѓу економските реалности. Тие несовпаѓања се макрофеномени кои се случуваат во рамките на една цела индустриска гранка или во целиот сектор на услуги.

Тука обично постојат големи можности за иновации, пред се за мали и нови претпријатија, за еден претприемач. Иноваторот, кој го искористува тоа несовпаѓање, може да смета на тоа дека подолго време ќе биде “оставен на мир”, пред постојните снабдувачи и другите фирми да се “разбудат”, до таа мерка што ќе станат нови и опасни конкуренти. Ова е од причина што тие, толку долго се окупирани од настојувањето да го надминат јазот помеѓу растечката побарувачка и изоставувањето на резултати, што едвај и забележуваат дека некој друг работи нешто друго и различно, нешто што носи резултати, што ја користи растечката побарувачка.

Претприемачот не треба да се труди да разбере зошто работитете се случуваат, туку наместо тоа треба да си ги постави прашањата:

  • Како може тоа несовпаѓање да се искористи?
  • Како би можело да се претвори тоа во можност и што може тука да се направи?

Несовпаѓањето помеѓу економската реалност претставува повик за акција за претприемачите. Понекогаш акцијата која треба да се преземе е сосема јасна, иако проблемот сам по себе останува и понатаму нејасен. Понекогаш проблемот се разбира сосема добро, но уште не може да се замисли што треба да се направи. Случајот со мини челичарниците (од претходниот пост – неочекуваност), е добар пример за иновација која успешно го искористила несовпаѓањето. Повеќе од 50 год. големите челичарници работеле профитабилно само во воени услови. Доколку сака да работи исплатливо, челичарницата мора да работи со полн капацитет, а тоа се случува само во воени услови. Мини челичарниците можат да обезбедат економичност во работењето и во други услови. Владата, синдикатите и големите челичарници од самиот почеток биле против малите челичарници, но без оглед на тоа тие подоцна биле прифатени бидејќи биле успешни.

#2 Несовпаѓање помеѓу реалноста и претпоставките за неа

Секогаш кога луѓето од една производна или услужна дејност погрешно ќе ја забележат реалноста и ќе направат погрешни претпоставки за неа, нивните напори ќе бидат насочени во погрешна насока. Тие ќе се концентрираат во област каде резултатите не можат да постојат. Тогаш постои несовпаѓање помеѓу реалноста и однесувањето, кое одново дава можност за успешна иновација, на секој што ќе го забележи и искористи.

Во педесеттите години на минатиот век се сметало дека прекуокеанскиот транспорт нема повеќе да биде ефикасен. Сите информации укажувале дека ќе биде заменет со воздушен транспорт. Трошоците на ваков превоз растеле, кражбата на стоката била голема, било потребно долго време за товарење, па бродовите долго чекале на ред за товарање. Главната причина била таа што бродарството погрешно ги насочувало своите напори, во правец на непостоечки резултати. Тие се обиделе да постигнат успех со брзи бродови, како и со бродовите кои користат помалку гориво и имаат помал екипаж, односно се концентрирале на економичниост на бродовите додека тие пловеле по море. Меѓутоа, бродот како капитално добро прави најголеми трошоци кога не е во активна употреба.

Решението било едноставно! Товарањето треба да се изврши на копно, каде има доволен простор и каде што тоа може да се изврши пред да дојде бродот во пристаништето, при што единствено останува да се подготви товарот кој ќе биде натоварен на бродот, за бродот веднаш да исплови. Резултатите од тие прости иновации биле големи. Товарниот поморски сообраќај, во период од 30 години, бил зголемен за пет пати. Трошоците се во просек намалени за 60 %. Времето на задржување на бродовите во пристаништата е намалено за 3/4, а задушувањето на пристаништето, како и штетите од кражбата се намалени.

Несовпаѓањето помеѓу забележаната и вистинската реалност многу ретко бара  “херојски” иновации.

#3 Несовпаѓање помеѓу забележаните и вистинските вредности и очекувањата на купувачите

Една од најекспанзивните американски финансиски установи, во осумдесеттите години на минатиот век, била фирмата за трговија со хартии од вредност, лоцирана не во Њујорк, туку во предградие на Средниот Запад.

Својот пораст и успех му го должи на искористувањето на едно несовпаѓање. Големите финансиски институции преtпоставуваат дека нивните клиенти имаат исти мерила како и тие. За нив е очигледно дека луѓето треба да вложуваат за да се збогатат. Меѓутоа, таа констатација важи само за дел од тие инвеститори, а не за сите. Тие знаат дека доколку некој сака да се збогати по пат на инвестиции, мора да работи полно работно време на работи за управување со пари и при тоа да е многу финансиски образован. Локалните занаетчии, малите бизнисмени, фармерите… немаат толку време, ни знаење. Тие се зафатени со заработка на пари и немаат време да управуваат со нив. Тое е всушност несовпаѓањето кое го искористила фирмата за трговија со хартии од вредност.

Надворешно набљудувано, таа изгледа исто како и секоја друга фирма за трговија со хартии од вредност. Таа е членка на Њујоршката берза. Меѓутоа на берзанските работи отпаѓа 1/8 од нејзините вкупни работи. Таа останува подалеку од работите со кои најмногу се занимаваат големите трговски куќи на Wall street: со опции, со стоковни термински трансакции. Наместо тоа, ја привлекуваат работи кои таа ги нарекува интелегентен инвеститор. Таа не ветува дека нејзините клиенти ќе станат богати. Тие сакаат клиенти кои заработуваат повеќе пари отколку што трошат, што е типично за успешните приватни професии. Тогаш оваа фирма одговара на нивната психичка потреба да ги заштитат своите пари. Она што таа фирма го продава е можноста, заштедените пари да ја задржат својата вредност. Производот кој фирмата го “испорачува” е душевниот мир за своите клиенти. Помеѓу несовпаѓањето на вистинската и забележаната реалност секогаш се наоѓа елемент на интелектуална ароганција, ригидност и догматизам.

#4 Несовпаѓање во рамките на ритамот и логиката на процесот

За да се оствари иновацијата, најчесто недостасува некој кој ќе слуша и кој би бил подготвен сериозно да го разгледа проблемот што секој го истакнува. Целта на постоење на некој производ или услуга е да ги задоволи купувачите. Доколку тоа се прифати и по него се постапи, користењето на несовпаѓањето како можност за иновација станува лесно и ефикасно. Но, постои и едно ограничување. Несовпаѓањето,  обично е “на располагање” на луѓето кои се наоѓаат во рамките на дадениот сектор на производство или услуга. Некој однадвор, тешко би можел да го забележи и да го разбере и поради тоа да биде во состојба да го искористи.

Во педесетите години на минатиот век, еден продавач во фармацевската компанија одлучил да отпочне самостојно да работи. Затоа побарал несовпаѓање во рамките на процесите во медицинската практика. Едно нешто пронашол веднаш. Една од највообичаените хируршки операции е операцијата на катаракт на око. Во текот на годините, практиката и постапката на операцијата биле усовршени, па таа се одвивала под целосна контрола.

Меѓутоа постоел еден момент во таа операција кој бил надвор од тој ритам. Во таа фаза на операција, очниот хирург морал да го исече лигаментот, да ги поврзе крвните садови, а со тоа создавал ризик од крварење, кое тогаш го загрозува и самото око.

Таа постапка била успешна во повеќе од 99 % од операциите; всушност, таа и не била многу тешка, но сепак им пречела на хирурзите. Тоа ги терало да го променат ритамот на процесот на работа и кај нив предизвикувало вознемиреност. Без оглед колку често ја правеле операцијата, очните хирурзи се плашеле од таа една кратка и брза фаза во целиот процес. Wiliam Conor заклучил дека во текот на 1890 год. бил изолиран еден ензим кој скоро моментално го раствора лигаментот. Единствено што тогаш никој, ни со помош на ладење, не можел да го сочува тој ензим подолго од неколку часа. Conor во текот на неколку месеци, вршејки експерименти, успеал да го сочува ензимот. Во рок од неколку години, сите очни хирурзи го користеле оваа патентирано соединение. Дваесет години подоцна, тој ја продал својата компанија на “Alkon Laboratory” за голема сума пари.

#5 Потребата на процесот

Потребата на процесот за разлика од останатите извори на иновација, не почнува во околината, било интерна или екстерна. Таа почнува со работата која треба да се направи и повеќе е насочена кон работната задача, отколку кон ситуацијата. Таа го усовршува процесот кој веќе постои, ја заменува врската која е слаба, одново го проектира стариот процес врз основа на нови сознанија. Понекогаш дури овозможува одвивање на самиот процес, со тоа што му ја испорачува алката која недостасува. Во иновациите засновани на потребите на процесите, секој во организацијата знае дека таа потреба постои. Сепак за неа никој не знае. Меѓутоа, иновацијата ќе се појави, таа веднаш ќе биде прифатена како очигледна и забрзано станува стандард.

Во 1909 год. еден статистичар, вработен во телефонскиот систем Бел (Bell Telephone System) определил две криви за демографски статистики за наредните 15 години: крива на пораст на американско население и крива на бројот на луѓето, потребни да работат како оператори на телефонски централи. Тие проекции покажале дека секоја американска жена, во старосна граница помеѓу седумнаесет и шеесет год., треба да биде вработена како оператор на телефонска централа, некаде околу 1925 или 1930 год., доколку биде задржан во употреба дотогашниот систем на вклучување на врската. Две години подоцна Беловите инженери проектирале и ја пуштиле во погон првата автоматска централа.

Сите овие примери покажуваат дека успешните иновации, засновани на потребите на процесот бараат задоволување на следниве критериуми: тоа да биде самодоволен процес, да постои една слаба или недостасувачка врска, да постои јасно дефинирана цел, да постои јасно утврдена можност и спецификација на бараното решение, да постои раширено и општо прифатено разбирање, да може да постои подобар начин, односно висок степен на заинтересираност за барање на задоволително решение.

Останатите постови од серијалот за иновативни можности можете да ги прочитате:

post

Извори на иновативни можности – Неочекувани случувања

Маркетинг пред започнување

Маркетинг пред започнување

Во претходниот пост зборувавме воопшто за иновативни можности кога станува збор за еден претприемач.

Тука би продолжил со уште една презентација на видови на иновативни можности која доаѓа од страна на Peter Drucker, таткото на модерниот менаџмент.

Peter Drucker ги разликува следниве извори на иновативни можности кога станува збор за неочекуваност:

#1 Неочекуван успех

Неочекуваниот успех нуди најголеми можности за реализирање на успешни иновации. Иновативните можности се најмалку ризични и нивното остварување е најлесно.

Неочекуваниот успех е честопати занемарен, а менаџерите покажуваат тенденција за негово негирање. 

Во 70-тите години од минатиот век големите челичарници не ја прифатиле идејата за мини челичарница. Опремата им била застарена, а за модернизација им биле потребни милијарди долари, но тие немале толку пари. Решението се гледало во отворање на мини челичарници. Во тоа време мини челичарниците доживеале голем успех.

Врвното раководство на една голема челичарница ја отфрлило идејата за мини челичарница, а луѓето што биле за оваа идеја биле отпуштени од работа. Успехот на мини челичарниците не бил прифатен. Врвното раководство било сентиментално врзано со“големиот челик”, а се друго за нив било мода. Тие не сакале да го видат овој неочекуван успех. 

Неочекуваниот успех може да иритира. Компанијата многу тешко се определува за каква било промена. Промените ги спроведува доколку е изложена на притисок од големите купувачи или од некоја влијателна личност. Меѓутоа, ретко кој очекува од таа постапка да дојде до подобрување на продажбата.

Кога “кучето” почнува да трча и почнува да ги загрозува “ѕвездите” доаѓа до изненадување, а со тоа и до несоодветно третирање на тој производ на пазарот.

Неочекуваниот успех најчесто не може да се види и никој на него не обрнува внимание. Поради тоа, никој и не ја користи можноста за негова понатамошна експлоатација, со неизбежен резултат конкурентите тоа да го воочат и од тоа да извлечат корист за себе. 

Можноста за искористување на иновацијата, која се појавува со неочекуваниот успех, бара посебна анализа. Неочекуваниот успех не е само една можност за иновација, тој бара иновација. Треба да се постават следниве прашања:

  • Кои основни промени сега се соодветни за таа организација?
  • Промена во нејзината технологија?
  • Нови пазари?

Кога ќе се соочат со тие прашања, тогаш неочекуваниот успех отвора најветувачки и најмалку ризични можности. 

За секој успех мора да се организира соодветно истражување. Првата работа која треба да се направи е да се обезбедат услови со кои неочекуваниот успех треба да се забележи. Раководството на компанијата мора да внимава на секој неочекуван успех, така што себеси ќе си ги поставува прашањата од типот: 

  • Што би значел успехот за нас доколку го искористиме?
  • Каде би можел да не однесе?
  • Што би требало да направиме за да го претвориме во можност?
  • Како ќе постапиме во врска со тоа? 

Раководството треба да одвои посебно време да расправа за секој неочекуван успех. Неочекуваниот успех бара да биде одржуван со помош на најспособни расположливи луѓе, а никако со било кои луѓе. Тој бара сериозност и поддршка од страна на раководството, сразмерно на можноста која се јавила.

#2 Неочекуваното промашување

Неочекувано промашување исто така е голем носител на иновативни можности.

За разлика од успехот, промашувањето не може да помине незабележано, но и тоа често не се гледа како симптом на можност.

Големиот број промашувања се резултат на алчност, глупост, на непромислено подржување на мнозинството или неспособност за проектирање или извршување на проекти.

Доколку нешто не се оствари, иако внимателно е планирано, таквото промашување често навестува промена.

Претпоставките на кои се засноваат производите или услугите, нивното проектирање или маркетиншка стратегија, можеби не одговара на реалноста.

Купувачите ја промениле својата вредност и забележување: иако се уште ја купуваат истата стока, тие сега всушност купуваат различна вредност.

Подеднакво се битни и неочекуваниот успех и неочекуваното промашување на директните конкуренти. Во двата случаја треба сериозно да се земе таквото случување како можен симптом за иновативни можности. Често се заклучува што се случува, не водејќи многу сметка зошто тоа се случува.

Фордов модел “Edsel” од 1957 год. бил детално планиран и стручно маркентишки воден. Ford бил на водечка позиција во три од четири пазарни класи (висока, средно-ниска и ниска). Останала само средно-високата класа и “Edsel” бил наменет за неа. Овој производ доживеал неуспех на пазарот и Ford почнал да истражува зошто овој модел не успеал. Заклучиле дека поделбата на класите од дваесетите години веќе не важи и дека настанале големи промени. Се појавила поделба на пазарот според стилот на живеење. Ова неочекувано промашување резултирало со нов модел (Thunderbird) и е постигнат најголем успех, по моделот “T” од 1908 год. Не било познато што ја предизвикало промената.

Неочекуваното промашување е преобразено во можност за остварување на ефикасна иновација. Тоа покажува дека и неочекуван успех и неочекуван неуспех, може да се претвори во можност за остварување на ефикасни и корисни иновации.

Пример кој покажува типични неочекувани надворешни случувања и нивно користење како главни можности за успешни иновации се однесува на IBM и персоналните компјутери.

Колку и да се разликувале мислењата на раководителите и инженерите во IBM, постоело единствено мислење дека иднината им припаѓа на централизираните системи на компјутери со големи можности, со најголема меморија и капацитет. IBM ги концентрирал напорите и ресурсите на одржување на лидерството на пазарот на големи централизирани компјутери. 

Во 1975 год., на општо изненадување, десетгодишните деца почнале да играт компјутерски игри, а нивните татковци посакале да имаат личен компјутер. Посебните машини чинат многу повеќе од еден терминал, а истовремено имаат далеку помал капацитет. Без оглед на таквите прогнози, дошло до ширење на компјутерите како и на нивните програми, а целата област на компјутерите станала хаотична, посебно во секторот на сервисирање и поправки. Меѓутоа, сето тоа ни најмалку не им пречело на купувачите.

Спротивно на очекувањата, американскиот пазар на персонални компјутери, во периодот 1979-1984 год. достигнал годишен обем на продажба од околу 15 милијарди долари. За таков “скок” на “големите” компјутери им требале 30 години. Во 1977 год. годишната продажба на персоналните компјутери била помала од 200 милиони долари (додека продажбата на “големите” била 7 милијарди долари) и IBM формирал свои тимови на стручни лица со задача да развијат нов модел на персонален компјутер.

IBM во 1980 година произвел сопствен персонален компјутер во моментот кога пазарот едноставно “експлодирал”.

Постов е дел од серијалот за иновативни можности. Можете да ги прочитате останатите:

 

post

Иновативни можности на еден претприемач

Kaizen подобрување, мало но големо Иновација и иновативност е нешто што е блиску поврзано со секој претприемач. Не зборуваме секогаш за високотехнолошки иновации кога зборуваме за иновативноста на претприемачот, но секој претприемач на ваков или онаков начин е поврзан со некаква иновација или препознаена иновативна можност, што всушност е и основата на неговиот бизнис.

Иновативноста претставува една организирана, систематска и рационална активност. Една од главните црти кои се провлекуваат во работење на претприемачите се иновации. Бидејќи претприемачите најчесто се со ограничени ресурси (финансиски, технолошки) тие мора да покажат големо ниво на итрост и со помош на иновациите да постигнуваат зголемени резултати во работењето.

Иновациите претставуваат специфично оружје на претприемачите, со чија помош ја користат промената како можност за извршување на разни производни и/или услужни активности. Претприемачите по правило носат некој вид иновации. Иновацијата претставува активност која ги дарува ресурсите со нови капацитети за создавање.

Иновациите можат да се толкуваат во смисла на промени на употребните вредности на ресурсот, за задоволување на некоја потреба на потрошувачот.

Успешните претприемачи не бараат по секоја цена големи инвестиции кои ќе развијат револуционерна индустрија, туку се задоволуваат и со помали иновации.

Огромен број успешни иновации користат промени. Иновативноста може да се претстави како научна дисциплина, подобна да биде научена и да биде практикувана. Претприемачите треба да истражуваат за можни извори на иновации, промени и нивните симптоми кои означуваат можност за остварување на успешни иновации. Тие треба да знаат и да го применуваат принципот на успешни иновации.

Разликуваме неколку видови иновации:

#1 Продорни иновации

Продорни иновации ги има најмалку, меѓутоа кога ќе дојде до правилно реализирање на овој тип на иновации, добиените резултати се најголеми. Овие иновации се случуват поретко и до нив се доаѓа потешко. Но, кога ќе се реализираат, може да настане и цела нова индустриска гранка, една цела нова потреба на пазарот за која ни самиот пазар не е свесен дека постои или ја има.

#2 Технолошки иновации

При секојдневна работа, како и со специјални истражувања, се доаѓа до овие иновации. Револуционерните технолошки иновации се поретки и секогаш бурно се проследени од јавноста. Секојдневните технолошки иновации всушност, претставуваат подобрување во процесот и се значајни за глобалните подобрувања на севкупниот процес.

#3 Обични иновации

Обичните иновации се најзастапени и се најмногу користени во практиката. Од нив не се очекува некоја спектакуларна добивка, меѓутоа тие се многу значајни за секој процес и носат големи подобрувања. ”Со ситни удари се постигнуваат значителни резултати”.

#4 Системските иновации

Систематските иновации се состојат од организирано барање на промени. Тоа се планирани промени во определени временски интервали кои едноставно на еден систематски начин овозможуваат еден организациски систем да провери дали се е онака како што треба и што би требало да се промени.

Во наредниот период ќе се занимаваме малку со иновативни можности, така да ќе опфатиме: