post

Како да комплетираш се на твојата To-Do листа?

To-Do листа

To-Do листа

Како еден претприемач сигурно имаш многу работи како задачи поврзани со твојот бизнис, а кои треба да ги завршиш. Еден од подобрите начини да останеш организиран со што и попродуктивен е да одржуваш една to-do листа.

Користиш ли to-do листи за менаџирање на твоите дневни активности?

Еден од најголемите проблеми кои ги забележав со ваквите листи е веројатноста претприемачите да станат забележувачи наместо преземачи на акција. Како човечки суштества имаме тенденција да ставаме се и сешто како нешто што треба да го направиме, без да го земеме во предвид нашиот природен капацитет за завршување на работите.

Но, што е со квалитетот на нашата работа?

Да кажеме дека можеме да ставиме 20 задачи во листата. Во нормални услови (што не се многу чести за еден претприемач), за еден работен ден можеме да завршиме 10 од нив. Но, доколку се обврземе за завршување на сите (се запнеме) ќе можеме да ги завршиме сите.

Што значи ова?

Како прв чекор е да се обидеме да ги зголемиме работните часови. Но, како што стануваме позаморени, квалитетот на резултатите од нашата работа ќе биде многу понизок.

Следната можност е да ја зголемиме брзината на завршување на работите. Но, како што знаеме, пократко време за работите кои бараат навистина подолго време ќе го намали квалитетот на нашето извршување.

Тогаш, како да завршиш се што стои на твојата to-do листа?

Не сакаш да го зголемиш работното време, и не сакаш да ја зголемиш брзината на завршување на работите жртвувајќи го квалитетот на резултатите. Едноставно ти треба еден систематски приод доколку сакаш да бидеш поорганизиран и завршиш се она што го планираш да биде завршено секој ден.

Да позборуваме за некои идеи зад еден поголем систематски приод.

#1 Одржувај ја листата помала

Ти иако си претприемач сепак си човечко суштетсво со лимитирани работни часови за секој ден. Не можеш секогаш да завршиш се што сакаш да завршиш.

Пред неколку години, направив голема грешка со мојата to-do листа бидејќи се обидував да ставам колку што може повеќе задачи кои што ќе ми се појават во мозокот. Но, кога не успеам да завршам се за денес од она што е предвидено, за утре имам уште поголема листа. И по неколку денови веќе имам листа која едноставно не сакам ни да ја погледнам. Поголемиот дел од задачите едноставно станаа заборавени и незавршени.

Сега, користам мала листа со 5-8 задачи на неа. Тоа е мојот капацитет, кој нормално ми овозможува да завршам се што имам предвидено.

#2 Одржувај ја листа ачиста и концизна

Понекогаш сакаме да ја користиме to-do листата како алатка за се и сешто. Како и да е, таа не е алатка за се. таа едноставно е алатка која ќе ти помогне да бидеш поорганизиран во твојот работен ден. Ти треба to-do  листа за да бидеш сигурен дека се она што е важно ќе биде завршено.

Доколку сакаш твојата листа да биде чиста и концизна, ќе ти треба само името на задачата, времето кога треба да биде завршена и нормално приоритетот на задачата за да знаеш што е со највисок приоритет за твојот бизнис.

#3 Не користи автоматизација

Знам дека автоматизацијата се препорачува секаде каде што може да се примени, но во овој случај она што може да се автоматизира и не е нешто многу од помош.

Постојат многу алатки за менаџирање на to-do листи кои имаат можности за одредена автоматизација. Но, моето лично искуство со автоматизација не е многу добро во овој случај. Зошто? Затоа што открив дека сум личност која не води грижа за автоматизирани задачи.

Како и секогаш, ќе имаш различни задачи кои ќе се повторуваат секојдневно, неделно, месечно… Логичниот чекор за тебе би бил да го автоматизираш ставањето на тие задачи во листата, што значи дека тие автоматски во предвиденото време ќе бидат додадени во листата.

Но, ти си претприемач. Доколку тие задачи се нешто толку очигледно, или толку очекувано, зошто мора да работиш на нив. Размисли за нивното можно делегирање. Доколку можеш да предвидиш кога може да работиш на нив, и работата е едноставно повторување како и во претходниот циклус, може и да ги делегираш на некој од членовите на твојот тим.

#4 Мора да ја приоритизираш листата

Секоја задача не може да биде со иста тежина како и другите задачи од листата. Некои од нив се поважни од другите. Некои од нив ќе додадат повеќе вредност во твојот бизнис од другите.

Твојата задача како еден претприемач е да го фокусираш твоето внимание на најваните задачи за твојот бизнис.

Доколку користиш приоритизација, и на листата ги ставиш задачите со највисок приоритет а ги делегираш останатите, ќе имаш многу помала, почиста и поконцизна листа која секогаш ќе можеш да ја завршиш.

#5 Користи технологија за следење на прогресот

Денес ние сме поврзани со различни видови на технологија која едноставно ни помага да бидеме попдродуктивни во еден наш просечен работен ден.

Може да користш различни апликации за менаџирање на твојата to-do листа која ќе ти го поедностави процесот на додавање на задачи, поставување на приоритети, следење на промени, постигнувања…

Ова е нешто што може да ти помогне. На пример, јас го користам Things на iPad, a во одреден дел користам Evernote на мојот десктоп.

#6 Отстрани ги сите можни одвлекувачи на внимание

Кога твојата листа ќе биде мала, чиста и концизна со задачи од висок приоритет, ќе треба да го фокусираш твоето внимание на завршување на задачите. Запомни, сега имаш само задачи со висок приоритет. Твојот бизнис ќе се потпира на нивното завршување.

Но, од друга страна примаш премногу email-ови, различни аларми на твојот PC од различни социјални медиуми. Добиваш различни телефонски повици. Сетоа ова има потенцијал да те одвлече од успешното завршување на твоите задачи од висок приоритет.

Затоа реорганизирај ја твојата работна околина за да ги отстраниш сите можни одвлекувачи на внимание тогаш кога работиш на задачите од твојата листа. Има време и за се останато.

post

Може ли поголема продуктивност со Evernote

Во изминатите неколку недели одлучив малку повеќе да се занимавам со користење на Evernote како една апликација која има потенцијал да ја зголеми мојата продуктивност.

Морам да напоменам дека сеуште сум во фаза на бреинстормирање и пробување на различни идеи како да се организирам самиот себеси и се она околу мене за да ја зголемам сопствената продуктивност. Затоа и планирам во нареден период да обработам повеќе постови за различно користење на Evernote како алатка за продуктивност.

Evernote

Досега повеќе пати во изминатите две години пишував за корисноста на оваа алатка, па можете да ги погледнете тие постови како за почеток.

Но, она што можев да го забележам во изминатите неколку недели е дека иако ја знам корисноста, иако го користам, јас не ги искористувам ни 10% од можностите што ми ги нуди алатката.

Зошто една ваква констатација. Можеби, но и најверојатно затоа што никогаш не сум имал време да седнам и подетално да потрошам неколку часови за да ги испитам сите можни опции истовремено размислувајќи за тоа како да ги користам тие опции за мене. Сепак останав едно утро до 3 часот по полноќ и успеав да се пограм доволно за да ја ставам алатката во категорија на најкористена на сите мои уреди: iMac, iPad и iPhone.

Тука би сакал да напоменам за некои начини на користење што ме натераа секојдневно да биде вклучена алатката:

#1 To-Do дневни листи

За една организација на моите дневни активности го користам Things за iPad. Алатката е одлична и можете да го видите и видеото кое го направив за Things. Но, сепак има и некои недостатоци, сеуште не работи во cloud како автоматски би се синхронизирале активностите на сите уреди (напомена: во моментов оваа опција е во фаза на тестирање). А, сепак понекогаш некои активности едноставно произлегуваат од некои забелешки, од нешто што прочитам на интернет или некоја книга која ја читам на iPad.

Затоа и започнав да го користам Evernote како надополнување на Things за поставување на некои активности кои треба да ги спроведам во иднина. Фолдерот за овие активности го именував како My Big To-Do List. Од друга страна денес (недела кога го пишувам овој пост) забележав 10-тици ливчиња на мојата работна маса кои содржеа белешки за некои активности и страници од некои книги на кои треба да се навратам а кои се однесуваат на еден проект кој го работам за еден мал бизнис. Сите тие ливчиња завршија во канта едноставно по внесување во Evernote.

#2 Блог постови

На претприемач сеуште не ги обработувам постовите во Evernote, но во изминатата недела сите постови за Entrepreneurship in a Box ги обработив тука. Забележав дека процесот е доста поедноставен, бидејќи постои еден фолдер каде што се наоѓаат идеи за идни постови кои ги ажурирав секојдневно за да на крајот ја завршам драфт верзијата. Не сум врзан за потреба да имам компјутер или интернет. Едноставно некоја идеја може да се заведе и преку мобилен телефон на место на кое немате Wi-Fi конекција, а кога ќе дојдете во позиција да имате интернет, апликацијата синхронизира и идејата е достапна од секој уред.

Морам да напоменам дека за оваа цел направив еден посебен темплејт во кој се обработува еден блог пост, а содржи различни елементи за олеснување на работата. На пример, темплејтот содржи и листа на активности кои треба да се преземат за еден пост, како на пример, обработка на драфт  верзија, проверка, избор на слика, избор на линкови… Но, повторно да напоменам дека овие идеи за користење подетално ќе ги обработам во посебен блог пост.

#3 Работа со клиенти

Оваа работа консултантска бара навистина големо ниво на фокусираност и секако креативност и инвентивност. Затоа и поставив еден фолдер во кој за секој клиент направив подфолдери каде идеите за нивно подобрување или она што би требало да се направи ги бележам. Ова е поради фактот што забележав дека идеите ми доаѓаат на различни места независни од клиентот, а тогаш и најбргу се забораваат.

Она што ми се допаѓа е што можам да додадам и аудио забелешка така да додека возам, кога и сум најкреативен лесно можам да додадам забелешка без да гледам во телефонот.

#4 Најинтересни сегменти од книги

Бидејќи оваа година започнав да читам само во електронска верзија книги најчесто на Kindle купени од Amazon, забележав еден недостаток покрај многуте предности. Иако апликацијата Kindle ми дава можност да подвлечам нешто и да се навратам на тоа нешто сепак некако не е баш најдобро решение. Ми се случува да она што сум го прочитам биде актуелно во мојот мозок се додека не поминам на друга книга.

Затоа одлучив да го користам Evernote каде ќе ги складирам сите тие забелешки или подвлекувања од книгите. Она што најмногу ми се допаѓа е што забелешки стануваат лесно достапни и преку фунцкијата пребарување и тоа без ограничување на една книга или пак извор на информацијата.

#5 Што уште планирам

Секако, тука не е и крај на можностите на користење на оваа алатка. Планирам се повеќе да ги зголемувам така да стане најголемиот извор на мое лично организирање . Тука ќе наведам некои планови за иднина кои ги вадам од белешката од Evernote:

  • Одделување на лични од бизнис белешки
  • Изработка на темплејт на белешка за бизнис идеи во стилот на книга со бизнис идеи
  • Изработка на темплејт за анализи и фолдер за идеи и белешки за анализи
  • Да го користам како основен извор на информации
  • Изработка на библиотека на хардкопи книги кои ги имам (околу 400), а кои досега се евидентирани во тефтер со број име на книга, автор, издавач и година на издавање.
  • Целата Email комуникација со клиенти да оди во соодветниот фолдер за клеинтот.
Но, подетално искуството од сите овие користење ќе бидат споделени во посебни постови.
post

24 Совети за менаџирање на времето

Email Маркетинг - Ажурирање на бизнис поимник

Менаџирање на време

Една од најважните задачи за претприемачите е потребата за ефективно менаџирање на сопственото време. Знам дека ова понекогаш може да биде доста разочарувачки, доколку не се забележи прогрес во напорите за соодветно менаџирање на сопственото време.

Знаеме дека секогаш можеме да го менаџираме нашето време поефективно и во таков случај да завршиме повеќе работи за помалку време. Од друга страна доколку се постигне успех во менаџирање на сопственото време ќе се постигне успех и во балансот помеѓу работата и приватниот живот.

Менаџирање на времето е значаен дел од процесот на постигнување на целите кој ќе воведе еден менаџмент систем на вашето дневно време кое го трошите на постигнување на целите.

Со соодветен менџмент систем, ќе можете да го менаџирате вашето време поефективно, и ќе завршите повеќе работи за помалку време.

Тука се 24 совети кои ќе ви помогнат во однос на менаџирање на вашето претприемничко време.

  1. Секогаш имај и одржувај свежа to-do листа.
  2. Постави лични и бизнис цели.
  3. Направи приоритизацијата на сите твои активности.
  4. Категоризирај ги активностите согласно важноста и ургентноста.
  5. Не одложувај.
  6. Имплементирај систем за менаџирање на одвлекување на вниманието.
  7. Биди реалистичен во однос на твоите способности и можности.
  8. Прави паузи.
  9. Користи тајмер или аларм кој ќе те потсети да запреш со работата за денес.
  10. Избегнувај мултитаскинг.
  11. Избегни ги сите неважни задачи.
  12. Ветувај го само она што можеш да го испорачаш за семејството и за клиентите / потрошувачите.
  13. Подели го денот врз база на рутински задачи и оние вистински проекти кои заработуваат пари за твојот бизнис.
  14. Осигурај се дека рутинските задачи се последни на листата за завршување.
  15. Делегирај се што може да биде делегирано.
  16. Користи аутсурсинг за дел од активностите.
  17. Често евлуирај го трошењето на твоето време.
  18. Елиминирај се што ти го троши залудно времето.
  19. Побарај помош кога ти е потребна.
  20. Имплементирај рутини секаде каде што е возможно.
  21. Прави ги правите работи на прав начин од првпат.
  22. Не обидувај се да бидеш перфекционист.
  23. Запчни да го слушаш твоето тело.
  24. Награди се себеси.
post

Делегирање за зголемување на продуктивноста

Иницијално планирање на пазарот

Делегирање

Дали сте имале прилика да видите или пак да работите во организација каде секој делегира на секого и секој работи се и сешто, а на крај ништо.

Дали сте имале прилика да видите една задача како се делегира од страна на врвниот менаџмент на сите менаџери од средниот менаџмент? И во една таква ситуација никој не започнува да работи бидејќи мисли дека другиот оддел или сектор ќе ја заврши работата.

Дали сте имале прилика да видите една задача да биде делегирана од страна на врвниот менаџмент кон некој од среден менаџмент иако работата на средниот менаџмент на кој е делегирана таа задача нема врска со задачата?

Ова се само мал (можеби само 1%) дел од активности кои лично сум ги видел во пракса. Но, тие се многу опасни начини на делегирање кои можат една компанија многу да ја чинат.

Што е делегирање?

Како што една организација расте, задачите и обврските стануваат се покомплексни, а во исто време одговорностите помеѓу организациските членови стануваат се послабо дефинирани. Доколку не се превземат соодветни мерки овој раст наместо радост ќе доведе до хаос и брзо плаќање на данокот на брзиот раст за еден претприемач.

Еден лек (витамин) за разрешување на ваквите несакани состојби е делегирањето кое претставува клуч за зголемување на ефикасноста и ефективноста во организацискиот систем како и зголемување на продуктивноста. Од делегирање, односно соодветно делегирање сите ќе имаат полза – и менаџерскиот и неменаџерскиот кадар.

Делегирање претставува доверување на задачи на друга личност при што одговорноста се пренесува само за извршување, додека оној кој делегира останува одговорен воопшто за извршување на задачата пред себе доколку се работи за претприемач или пред врвниот менаџмент доколку станува збор за некој од прволиниско или средно ниво на менаџментот.

Процес на делегирање

Нема да навлегувам во факторите кои влијаат на процесот на успешно делегирање, што ќе биде тема на некој иден пост, туку едноставно би сакал да презентирам еден поедноставен процес на спроведување на делегирањето. Доколку сте претприемач кој веќе има вработени, треба да започнете со практицирање на делегирањето.

Да започнеме со можните чекори.

Чекор 1: Сортирање на задачи кои ќе бидат делегирани

Овој чекор е чекор во кој се спроведува анализа заради класификација на задачите кои може и треба да бидат делегирани. Секако одреден дел на задачи ќе останат под целосна ваша контрола, без разлика дали станува збор за тоа дали сте менаџер или претприемач.

Важно е во овој чекор да дефинирате се што може и треба да биде делегирано.

Чекор 2: Определување кој и што

Во овој чекор едноставно ги определувате луѓето на кои ќе се потпрете за соодветните задачи кои се определени од претходниот чекор за делегирање.

Чекор 3: Дефинирање на задачата

Секоја задача пред да се делегира некому, мора прецизно да биде дефинирана. Не можете да очекувате дека истата ќе биде успешно спроведена доколку задачата е нејасна или слабо дефинирана.

Чекор 4: Пренесување на задачата – делегирање

Во овој чекор вие едноставно го известувате одговорниот за задачата дека тој треба да ја заврши. Овој дел вообичаено се изведува усмено, писмено или пак електронски.

Чекор 5: Следење и поттикнување

Како менаџер, вие ја имате контролната функција, затоа мора да следите како се спроведува задачата и доколку има потреба да поттикнувате или да обезбедите соодветна помош.

Чекор 6: Оценување

Како последен чекор е вашата одговорност да го оцените спроведувањето на задачата која е делегирана. Како таа е извршена? Треба ли да се направат некои промени заради зголемување на ефективноста и ефикасноста во иднина?

Ова се основните 6 чекори за спроведување на делегирање. Доколку имате некое искуство слободно споделете го.

post

8 стапици за продуктивност

Продуктивност е да се биде во состојба да се направат работите за кои што не си бил способен претходно. ~ Jim Manzi

 

Стапици за продуктивност

Стапици за продуктивност

Продуктивност е движечка сила за еден претприемач која не смее да се стави на страна. Навистина премногу се трудиме да ги постигнеме зацртаните цели, и најголемиот проблем не е тоа што не се трудиме, туку стапиците во кои навлегуваме а кои и штетат на продуктивноста. Но, од друга страна продуктивноста е нешто што често е напаѓано од самите нас или надворешните влијанија кон неа.

Како надополнување на 50 правила за бизнис продуктивност, во овој пост ќе опфатиме 8 стапици кои може да се јават како непријатели на вашата продуктивност доколку не се менаџираат на вистинскиот начин.

1. Прекини и одвлекување на внимание

Колку и да сакаме да немаме прекини или сили кои го одвлекуваат нашето внимание сепак ние сме живи луѓе, кои не се сами на овој свет, кои комуницираат, кои размислуваат, кои едноставно се наоѓаат во околина која не мирува (не дај нбоже да мирува).

Едноставно понекогаш не може да се избегне чувството дека токму кога ќе навлеземе во сопствената продуктивност за некоја важна работа и започнуваме да сме задоволни од самите себе (бидејќи една задача од листата ќе биде завршена) заѕвонува телефонот, се појавува нотификација на компјутерот за примен email или од некој социјален медиум, во канцеларијата влегува колега…

Во една таква ситуација, мозокот мора да ја „смени брзината“, да се пренасочи на други проблеми и можни решенија, се губи фокусот кон она што во моментот се работи и се губи динамиката која е фатена во процесот на работата. Исто како да запреш една автоматска машина која во најголемо произведува (ќе бара повторно штелување, промена на алат, подмачкување, рестартирање…).

Кога еднаш таквите прекини и одвлекувања ќе се појават тешко дека може да се направи нешто за да се спречи намалување на продуктивноста.

Затоа, најдобро е превентивно дејствување преку елиминирање на можните прекини и одвлекувања кога се наоѓате во еден таков момент на највисока продуктивност за задачите кои во големо влијаат за исполнување на поставените цели. Едноставно ја затворате вратата со клуч до кој никој освен вас не може да дјде.

2. Префорсирање на листата со задачи

Листа на задачи или уште како се нарекува To-Do листа е нешто што го обликува нашиот работен дел од делот (доколку сме доследни на истите). Мислам дека не постои човек кој ја нема таа особина за преголема посветеност или преголемо форсирање за повеќе и побргу завршување на нешто. Обично мислиме дека доколку повеќе активности спакуваме за еден ден ќе бидеме повредни и попродуктивни. Но, сепак ова е контрапродуктивно, а од друга страна креира стресна работна околина и едно брзање од наша стрна без доволно внимание да посветиме за важните елементи од работниот ден.

Едноставно мора да си ги спознаете сопствените капацитети и потенцијали. Доколку успеете во овој дел кога ја правите листата научете да кажете тоа е доволно за тој ден. И секако фокусот нека биде на најважните активности – оние кои во најголем дел учествуваат во исполнување на поставените цели.

3. Email и обсесија да не се пропушти нешто

Email е навистна корисна технологија користена од бизнисот и еден претприемач. Како технологија или како една алатка е многу корисен за зголемување на продуктивноста. Но, нашата обсесија да не пропуштиме нешто или пак немање на соодветен систем за менаџирање на email пораки кои се за веднаш, а кои се за подоцна може да влијае на намалување на продуктивноста. Работата е јасна, 80% од пораките и не мора да бидат видени или одговорени веднаш.

Затоа, за целите на зголемување на продуктивноста исклучете ги нотификациите или целосно исфрлете ја можноста да отворите email порака, барем во времето кога вашиот фокус е на важни задачи заради исполнување на зацртаните цели.

4. Безвредни задачи

Сите задачи немат еднакво значење и вредност за исполнување на зацртаните цели. Некои пак можат да бидат завршени од некој ваш вработен. Постои опасност вашата To-Do листа да биде наполнета со некои вакви задачи кои едноставно ќе ви го одвлечат вниманието од важното и ќе создадат амбиент на притисок и стрес како последица од притисок. Ова е контрапродуктивно.

Обидете се секоја задача да ја оцените согласно важноста. Елиминирајте некои неважни задачи или делегирајте некои кои се важни но не приоритетни. Максимизирајте го времето кое ќе го поминете на она што е важно и во што сте најдобри.

5. Социјални медиуми

Иако социјалните медиуми во многу аспекти се корисни за бизнисот (градење на односи, промоција, брендирање, прибирање на информации…), но, без соодветно менаџирање на нивното користење може да бидат контрапродуктивни одземајќи многу време.

Затоа, првин проценете за некој социјален медиум дали има вредност за вас како личност или вашиот бизнис. Оние во кои ќе утврдите вредност продолжете да ги користите но во сесии од 5 до 15 минути во точно определено време кое е вон времето на извршување на најважните активности од вашата To-Do листа.

6. Слаба енергија и желба за постигнувања

Личната енергија и желба за постигнувања се еден вид на невидливи фактори кои учествуваат во зголемување на продуктивноста. Без доволно енергија во вас самите и желба да постигнете нешто не можете да очекувате дека ќе бидете продуктивен.

Затоа обидете се кога работите да ги исполните сите предуслови за повисока ваша лична енергија преку доволно спиење и здрава храна заради обезбедување на здраво чувство како и соодветна социјализација која има потенцијал за зголемување на лична енергија. Од друга страна секогаш кога ќе почувствувате дека енергијата ви се намалува подобро е да направите пауза заради враќање на посакуваното ниво.Читање на книги е нешто што исто така може да ја зголеми енергијата кај вас.

7. Недостаток на јаснотија

Иако често пати во делот на продуктивноста се заборава јаснотијата сепак таа има големо влијание на самата продуктивност. Многу е потешко да управуваме нешто што не е јасно, а тоа пак од друга страна е контрапродуктивно.

Затоа мора да бидете прецизни во однос на тоа што сакате да направите, што сакате да постигнете, кои се одговорностите, какви стандарди и правила постојат, кои се роковите на завршување (постигнување) на нешто.

8. Мултитаскинг

Погрешни се претпоставките дека можеме да се насочиме на повеќе нешта одеднаш и со тоа да бидеме попродуктивни. Некои работи може, но мултитаскинг на важни бизнис активности може да биде контрапродуктивен.

Затоа обиди се да работиш на една важна активност во соодветно време, по успешно завршување и соодветен одмор заради енергизирање помини на втората важност во листата која следува.

post

Ефективно и ефикасно користење на времето

Ефективно и ефикасно користење на времето

Ефективно и ефикасно користење на времето

Едно типично утро е будење од спиење и освестување. Но, и тргнување за извршување на работните задачи за тој ден. И секако откако ќе го вклучите компјутерот го подготвувате мозокот за уште еден ден во кој ќе бидете преоптеретени со информации. Но, тоа значи и разочарување заради неможноста за остварување на целите како и листата на дневните активности, бидејќи и вчерашниот ден бил таков, и пред вчерашниот ден бил таков итн. Едноставно знаете дека утрешната листа ќе биде зголемена за дел од денешните активности.

Како изгледа или би можел да изгледа еден „фрустрирачки“ работен ден?

Првиот час на работа…

Секако кога ќе се стигне не се започнува со работата веднаш. Тука е утринското кафе и „ќаскање“ со колегите, соработниците за тоа како кога некој го шетал кучето пред зградата истото направило „беља“.

И кога ќе се вклучи компјутерот се знае веднаш проверка на email. Секако дека ќе има пораки кои се важни за тој ден, но факт е дека ќе има и пораки во видот на погледни го видеото за мечето ушко, и барање од некој чичко за да му помогнете при избор на фото апарат или камера или пак лап топ. Ова значи дека првиот час од работниот ден може да биде „нападнат“ од некои активности кои воопшто не се важни за самата работа.

Вториот час од работа…

Но, живееме во време на социјални медиуми и наместо утрински весник (кој беше синоним на повозрасните генерации) ние го имаме Facebook, LinkedIn и Twitter, но и новиот Google Plus (кој по се изгледа ќе успее да ги привлече луѓето).

Што има ново, кој што објавил, на што да коментирам, на што да лајкувам (плуснам), а на што да ретвитнам…? Што да објавам? Сетоа тоа се прашања кои стануваат дел од секојдневниот живот.

Но, и еден пријател ме фаќа на чет и морам да се вклучам во конверзацијата.

Уф, ова мора да го прочитам. Одличен линк, но уште една интересна сторија, морам да ја прочитам и неа.

Третиот час од работа…

Сега веќе весниците или се на маса или пак истите се објавени на интернетот. Ајде да видиме што се случило? Што е со политиката? Кој е во право, опозицијата или позицијата? Овој весник ми вели опозиција, а оној ми вели позиција? Морам да размислам што ќе земам „здраво за готово“.

Може да се вклучиме и во коментирање со колегите на некоја вест од тој весник, па да размениме различно мислење за Велија Рамковски, Љубе Бошковски, Никола Груевски, Бранко Црвенковски… А, во тој муабет не е лошо и да поприкажеме за вчерашната турка серија.

Четвртиот час од работа…

Време е да се почне со работа само откако ќе кликнеме на рефреш за да провериме има ли нов меил. Ја отвораме денешната листа на работни задачи и гледаме листа од 36 задачи кои треба да ги спроведеме денес. Избираме една и се запнуваме да ја завршиме. Но, часот поминал и време е за второто кафе.

Петтиот час од работа…

Половина од овој час го користиме за уште едно кафе, сепак завршивме една задача од листата, остануваат само уште 35. Се враќаме на работната маса и повторно рефреш за email. Време за уште една виртуелна социјализација преку лајкови, плусови, ретвитови… Телефонот заѕвонува и тоа е нашиот пријател со кого гледавме фудбал вчера и одлично си поминавме.

Шестиот час од работа…

На празен стомак не се работи, имаме половина час законско следување за пауза за ручек. Но, и веднаш по јадењето не се работи, стануваме мрзеливи. Затоа ќе го потрошиме повторно на некое пребарување на големиот Google за некое прашање кое што не интересира.

Седмиот час од работа…

И повторно телефонот, сопруга, сопруг, девојка, дечко… Каде вечер? Кога ќе се видиме? Што ќе правиме? Сите прашања одземаа повеќе од 20-тина минути.

Уфффф… Што требаше да направам? До каде стигнав со листата на задачите? Треба да се потсетиме што мислевме да направиме пред да бидеме прекинати со телефонот, или email-от или четот. И добро ја наоѓаме втората задача што требаше да биде завршена пред една недела, но сега ќе ја завршиме, и ја завршуваме.

Осмиот час од работа…

Уште еден час и готово за денес. Да се обидеме да завршиме барем уште една задача. Но, влегува колега и разговараме за како ќе го поминеме остатокот од денот. Може да испиеме уште едно кафе. Овој последен час не прави премногу успивни.

Денот скоро завршува, а ништо не сме сработиле за постигнување на нашите цели.

Како да го промениме ова? Едноставно преку имплементација на 3 чекори.

Чекор 1: Поставување на јасни цели

Првин постави си 3 цели (но SMART цели) кои сакаш да ги постигнеш во определен временски период. Испечати ги на со големи букви на лист хартија и стави ги на место на твојата работна маса на кое постојано ќе ги гледаш.

Пред да започнеш со некоја активност, прашај се дали таа активност ќе обезбеди остварување на некоја од поставените цели. Доколку е да, продолжи, но доколку е не, откажи се.

Чекор 2: Оптимизација на листата со работни задачи

Листата со работни задачи треба да биде во функција на остварување на целите. Оптимизацијата значи ставање на листа на задачи кои во голема мерка ќе придонесат за остварување на целите од претходниот чекор.

Оптимизација значи и непретерување со поставување на премногу работни задачи. Доколку навистина даваат голем придонес во остварување на целите, најдобро е листата да не е подолга од 5 такви задачи.

Чекор 3: Справување со прекини

Најголем противник на продуктивноста се непредвидливите прекини. Тие може да бидат надворешни како прекини од страна на околината и други луѓе, но и внатрешни кои уште се нарекуват и како одвлекување на вниманието. Како и да постои можноста со справување, на пример преку целосно елиминирање на небизнис активности или пак ограничување на тоа време бидејќи сепак социјализацијата е еден дел од работата.

 

post

To-Do листa – Како секогаш да ја завршите?

To-Do листа

To-Do листа

Пред извесен период во разговор со еден претприемач забележав еден лист хартија со активности за тој ден. Оние кои беа завршени се прецртани со пенкало додека во моментов кога јас пристигнав последната сеуште не беше завршена но во тек. Тоа е To-Do листа, нешто што секој од нас го прави поорганизиран и најважно од се овозможува завршување на активности предвидени за денот кој го живееме. Јас користам апликација за iPhone и iPad именувана како Things за која пишував во iPad и неколку корисни апликации за продуктивност но и направив една видео презентација за истата.

Не е важно дали таа листа е еден вид на апликација или пак лист хартија, тетратка или тефтер важно е дека постои и се користи од страна на сите кои работат нешто.

Но, исто така очигледно е дека понекогаш не оди се онака како што мислиме дека ќе оди. Ова значи дека не успеваме да завршиме се што испланираме денес, па некои активности ќе се префрлат за нареден ден со што доаѓа до оптеретување и повторно страда постигнувањето и се влегува во една „пружина од разочарувања и притисоци“.

Затоа и дојдов до 6 начини кои можат да влијаат на тоа секогаш To-Do листата да биде завршена навреме.

1. Лично обврзување за завршување

Иако не мора да значи дека може да биде од голема помош, сепак доколку се обврземе пред самите себеси дека нешто треба да завршиме поверојатно е дека ќе го завршиме. Инаку без обврзување многу лесно нашиот мозок ќе го остави тоа нешто за утре и така во недоглед се додека не сфатиме дека и не можеме да го завршиме.

2. Приоритизација

Секогаш има нешто што е поважно од останатите активности во To-Do листата. Приоритизацијата обезбедува оние најважните задачи и активности да бидат први на листата како би започнале со нив. Завршувајќи ги најприоритетните задачи процентуалниот успех на дневно ниво ќе биде многу поголем.

3. Анализа на вашето време

Времето кое ви стои на располагање е тоа 24 часа едно деноноќие во кои треба да бидат вклопени и спиење, и разонода и време со семејството, гледање ТВ… Сепак кога знаете колку време имате за спроведување на дневните активности ќе можете да ги поделите задачите согласно тоа време со што ќе овозможите завршување на истите.

4. Зголемување на вашето време

Како една опција за обезбедување на завршување на To-Do листата е да го зголемите времето кое ќе го трошите на тие активности. Ова значи намалување на вашето време од спиење, разонода, семејството гледање ТВ…

Но можете да го зголемите вашето време и преку соодветна делегација (една од менаџерски активности) на активности кои не се толку приоритетни.

5. Оптимизација

Како уште една можност да завршите се што имате во To-Do листата е да ја оптимизирате истата.

Што значи оптимизација на To-Do листата?

Оптимизација претставува оптимизирање на активностите содржани во листата со вашите капацитети и можности. Може вие да сакате да завршите 100 активности, но вашиот и временскиот капацитет ви овозможува само 15.

6. Преразгледување на приоритизација

Како што се повеќе ја користите To-Do листата така и процесот на „самоучење“ е активиран. Од друга страна приоритетите не се секогаш исти, тие се променлива категорија. Затоа од време навреме преразгледајте ја приоритизацијата која ја користите.

post

4 Нотеси кои секој претприемач мора да ги има кај себе

„Нотеси“ за претприемачи

„Нотеси“ за претприемачи

Иако насловот на овој пост е „нотеси“, не мора да значи дека мора да бидат хартиени нотеси бидејќи едноставно може да се користи мобилен телефон, iPad, или лаптоп. Важно е да се има кај себе структуриран преглед на идеи за 4 основни претприемнички активности.

Постојат периоди во годината кога не се остваруваат резултати, но не значи дека бизнисот не функционира и не го троши тоа време за нови потенцијални потрошувачи, размислување за развој, нови идеи…

Сигурно сте се нашле во ситуација во која чувствувате дека едноставно вашиот мозок ќе експлодира од нови идеи. Некои можеби во моментов сосема безвредни, но со одреден потенцијал кој ветува за иднина.

Можеби сте сретнале некого, но во тој момент не сте го гледале како потенцијален потрошувач бидејќи во тој момент немал проблем кој можете да му го решите или пак не сте нуделе решение за неговиот проблем. Но, тоа не значи дека во иднина нема да понудите некое решение за негов проблем или пак тој нема да има потреба за вашето решение.

Сигурно сте се нашле во ситуација на саем каде поминувате повеќе десетици штандови на компании кои во тој момент не претставуваат ваши потенцијални купувачи, но сепак не значи дека не постои можност за било каква двострана соработка помеѓу вас.

Затоа, како еден претприемач кој мисли за иднината на сопствениот бизнис секогаш мора да имате при рака минимум 4 различни „нотеси“:

1. Книга со бизнис идеи

Идејата за книга со бизнис идеи е промовирана повеќепати на претприемач. Дури и како еден од темплејтите кои ги добивте (барем оние кои се регистрирани за добивање на билтени на претприемач) еден од тие е книга со бизнис идеи. Во премум претприемач тој темплејт е малку поопширен со дополнителни елементи заради подобрување на процесот на генерирање на бизнис идеи.

Во секој случај доколку сакате да не го изгубите потенцијалот и моќта на вашата креативност во однос на бизнис идеи мора да користите еден таков вид на книга.

2. Книга со потенцијални потрошувачи

Кога и да налеташ на некој потенцијален потрошувач, или пак сретнеш некого кој има проблем кој твојата идна бизнис идеја или пак иден производ ќе може да го реши искористи ја оваа книга за да имаш спремна листа на идни бизнис можности.

3. Саемска книга

Без разлика дали сте изложувач или само посетител многу идеи и контакти може да се стекнат на саемите. Секогаш кога ќе сретнете некого кој сакате во иднина да го контактирате воведете ја неговата бизнис картичка или контакт детали во таа книга со забелешка зошто е важно лицето. На ваков начин сите ваши, контакти и идеи од саемот ќе бидат на едно место и спремни да се искористат за идните бизнис можности.

4. Книга за фидбек од потрошувачи

Многу идеи за развој на нови производи, за развој на нови бизнис потфати, за подобрување на производите и/или услугите доаѓаат од потрошувачите и нивниот фидбек. Многу од нив можеби ќе ги сретнете надвор од канцеларија или официјален состанок доколку сте претприемач кој гради блиски долгорочни односи со своите потрошувачи. Затоа и ќе ви биде потребна една ваква книга со што кога ќе дојдете во процесот на развој или подобрување едноставно ќе ги имате на едно место сите тие забелешки и идеи од фидбек на потрошувачите.

post

Бизнис ефикасност и ефективност

Многу често во бизнис речникот се користат зборовите ефикасност и ефективност. Понекогаш кога се вели ефикасност се мисли и на ефективност, но заради скратено изразување се употребува само ефикасноста. Ефикасност и ефективност се взаемно поврзани. Не е доволно да сте ефективен, а неефикасен или пак обратно, ефикасен, а неефективен. Ефикасноста и ефективноста претставуваат елементи кои во голем дел можат да ја зголемат потенцијалната енергија на Вашиот бизнис. Ефикасноста и ефективноста треба да биде основа како на личен план (претприемачот), така и на бизнисот како целина (системска ефикасност и ефективност).

Но, што претставува ефективност, а што ефикасност? Ова е главно прашање и доколку биде сватено лесно ќе започнете да се насочувате да бидете поефикасен и поефективен.

  • Ефективноста наједноставно кажано претставува да се прават правите работи. Значи ефективноста се однесува на изборот на активностите на бизнисот, активностите на претприемачот.
  • Ефикасноста наједноставно кажано претставува правите работи да се прават на прав начин. Ефикасноста се однесува на начинот на изведување на тие бизнис активности.

На сликата подолу е дадена матрица за ефективност и ефикасност која може да се користи како за вашиот бизнис така и за вашиот личен живот.

Матрица за бизнис ефективност и ефикасност

Матрица за бизнис ефективност и ефикасност

Матрицата е составена од 4 квадранти и тоа:

  • Ниска ефективност и ниска ефикасност. Ова значи дека погрешните работи ги правите на погрешен начин. Каква катастрофа. Губите време за погрешни активности и покрај тоа ги правите на погрешен начин. За стие овие активности на бизнисот мора да ги стопирате (СТОП знакот). На пример, сте избрале погрешни производи за продажба и не знаете како да ги продавате.
  • Висока ефектвност и ниска ефикасност. Ова значи дека сте се насочиле кон вистинските работи за Вашиот бизнис, на работи кои ја зголемуваат потенцијалната енергија на бизнисот, но не ги изведувате на вистинскиот начин, што значи дека сте неефикасен. Ова значи дека сте го избрале вистинскиот пат, но наместо со авион да го поминете вие сте тргнале пешки и бара огромно време за да стигнете таму. Сите овие акивности мора да ги анализирате и да го најдете вистинскиот начин за нивна реализација бидејќи тие ќе го зголемат потенцијалот на Вашиот бизнис. На пример, сте ги избрале вистинските производи кои ќе ги продавате, но не знаете како да ги продавате или ги продавате на погрешен начин.
  • Ниска ефективност и висока ефикасност. Ова значи дека сте се насочиле кон погрешни работи за Вашиот бизнис, а ги изведувате на вистинскиот начин. Дали е ова добро? Дали е возможно ова? Ова и не е добро и не е возможно. Џабе што ги изведувате овие активности на вистинскиот начин кога тие не ја зголемуваат потенцијалната енергија на Вашиот бизнис. Ваквиот начин на работа само ви го губи времето. Анализирајте ги Вашите активности и сите што спаѓаат во овој квадрант стопирајте ги без размислување. Тие воопшто не ви се потребни. На пример, сте избрале лоши производи, кои ги продавате на вистински начин. Вие ќе направите некоја продажба но купувачот веќе нема да се врати.
  • Висока ефективност со висока ефикасност. Ова е вистинската пореба за секој бизнис. Работите она што најмногу ја зголемува потенцијалната енергија на бизнисот и тоа што го работите го работите на вистинскиот начин. Сите овие активности даваат резултати кои на крај ќе се одразат на профитабилноста на Вашиот бизнис. Насочете се секогаш да го работите она што спаѓа во овој квадрант. На пример, сте избрале вистински производи за Вашиот бизнис и ги продавате на вистински начин. На ваков начин обезбедувате долгорочна успешност за Вашиот бизнис и за Вас како претприемач.

Бидете ефективен и ефикасен во исто време бидејќи ефективноста без ефикасноста и обратно не одат. Така постојано размислувајте за вашите и бизнис активностите во поглед на ефективноста и ефикасноста. И работете го онаа што е и ефективно и ефикасно, успехот ќе ви биде загарантиран.

post

Залихи – неколку методи за управување

Методи за управување со залихи

Методи за управување со залихи

На претприемач за залихите наведовме дека се многу значајни за малите бизниси. Во Залихи зло без кое не се може или се може го опишавме значењето на поимот залихи, заклучивме дека тие мора да се управуваат, а управувањето може да се изврши на повеќе начини (еден од тие е ABC анализа или 80/20 правило). Заклучивме и дека тие претставуваат некое зло без кое се може, но во исто време и нешто без кое не се може. Потоа во Залихи – како да ги управуваме претставивме еден едноставен модел на системот за контрола и управување на залихите кој овозможува постојано подобрување на нивото на залихите во претпријатијата. Во предности од оптимални залихи можевте да прочитате за различни предности и недостатоци кога станува збор за залихите.

Постојат повеќе методи и техники за управување со залихи. Основата кај сите е соодветно групирање на истите заради полесно управување.

Тие методи и техники се основа за да стигнете до онаа посакувано оптимално ниво и најчесто се подразбира: следење, листање, анализа и групирање на производите и материјалите во одредени групи на производи и материјали. Оваа групирање ќе ви овозможи да се насочите на најпотребните производи (секогаш да имате доволно на залиха од нив) додека оние најнепоребните да ги одржувате на минимално ниво. Овие методи најчесто се употребуваат во производствените претпријатија, но соодветна примена може да најдат и во малпродажба, големопродажба и услужниот сектор бидејќи сите индустрии и типови на бизниси работат со одреден вид на залихи.

Системот за управување со залихите треба да ги избалансира следниве конфликтни потреби:

  • Економично производство или економична работа на бизнисот
  • Брза испорака
  • Ниска вредност на залихите

Постојат различни системи за контрола на залихите, тука ќе презентираме некои од нив.

ABC анализа

ABC анализа веќе е доста обработувана на претприемач. Пишувавме за 80/20 правило кое во управувањето со залихи или материјали е познато како ABC анализа (Always Better Control – Секогаш подобра контрола). Класификација на артикли со ABC методата се врши така што асортиманот (вкупни артикли) се дели на три сегмента. Во првиот сегмент А се артикли кои се процентуално најмалку застапени да речеме околу 20 % во вкупниот промет, а носат голем приход на бизнисот, на пример 70%. Во група B, е поголема количински на пример 30 % или вкупно 50%, но во прометот учествува со видливо помал процент на пример 20 % или вкупно 90 %. Група C, може да биде и 50 % или вкупно 100 %, а вредносно само 10 %, да учествува во прометот, односно профитот. Значи ABC анализата се базира на просечна вредност на потрошувачка.

HML анализа

Втор систем кој се користи за контрола на залихите претставува HML анализата (High – Висока, Medium – Средна, Low – Ниска вредност). Овој метод е сличен на ABC анализата со таа разлика што класификацијата на материјалите или производите се врши во однос на вредноста на единица производ наместо на просечна потрошувачка. Така да имаме единици со висока, средна и ниска вредност. Ова се користи за да се контролира куповната вредност на производите. Комбинацијата на ABC анализа и HML анализа ќе ни даде добри резултати зошто ќе ги земеме во предвид потрошувачката и вредноста на залихите.

HML Анализта може да има примена и во класификација на Вашите купувачи. На овој начин ги делите купувачите како:

  • Heavy – Тешки купувачи, кои се најинтензивни купувачи во Вашиот бизнис. Обидете се да ги задржите преку наградување, посебен третман, разни повластици итн.
  • Medium – Просечни купувачи, кои се средно интензивни купувачи на Вашите производи и или услуги. Обидете се да ги префрлите во категорија на тешки купувачи преку маркетинг давајќи им можност за посебен ретман доколку преминат во првата категорија.
  • Light – Слаби купувачи, кои се најслабо интензивни во купување. Вашата цел е да ги префрлите во втора па потоа во третата категорија на купувачи.

Доколку ги поделите Вашите потрошувачи или пак залихите на овие категории ќе ја видите сегашната состојба на Вашиот бизнис и насоките кои ќе треба да ги превземете во функција на подобрување на Вашиот бизнис во однос на продажба и во однос на непотребните залихи.

VED класификација

Претходните две методи класификацијата на важноста на производите и материјалите ја изведуваат врз база на просечна потрошувачка (ABC анализа) и вредноста (HML Анализа). Но, и двете методи не ја покажуваат критичноста. Затоа VED класификацијата се изведува врз основа на критичноста која е на функционална основа. Степенот на критичноста се поставува врз основа на тоа дали производите или материјалите се витални за производствениот процес или пак бизнис процесите (доколку се работи за непроизводствен бизнис), дали тие се значајни или пак посакувани. Акронимот VED e добиен согласно Vital – Витални, Essential – Значајни и Desirable – Посакувани. Значи со оваа класификација ќе ги поделите залихите на витални, значајни и пожелни. За производите и материјалите кои спаѓаат во групата V се одржува повисоко ниво на залихи, додека најмало ниво се одржува за оние кои спаѓаат во групата D. Исто така и оваа метода е пожелно да се комбинира со АBC анализа за да се добијат подобри резултати во систем за управување со залихите.

FSN анализа

Последниот систем или алатка за управување на залихи што ќе го претставиме тука е FSN анализата. Досега разгледавме класификации во однос на потрошувачка вредност, во однос на единечна вредност и во однос на критичноста, додека FSN класификацијата се врши во однос на движењето на производите и материјалите низ производствениот или бизнис процесот. Оваа анлиза го разгледува движењето на производите од залихите во магацинот во определен временски период. Производите и материјалите се класифицираат врз основа на потрошувачката и просечно останување на залиха. Така да тука се врши класификација на Fast – Брзо движечки, Slow – Споро движечки и Non – недвижечки производи и материјали. Откако ќе ги класифицираме производите и материјалите на ваков начин потребно е најповеќе залихи да имаме за брзо движечките означени со F додека најмалку да имаме на оние означени со N.