Бидете секогаш најиновативни! Алатки, екниги и видео презентации само за најхрабрите!

post

Интернет бизниси – Информациски производи 2

Ќе продолжиме вториот напис од серијалот за интернет бизниси на претприемач за информациски производи. Претходниот дел можете го прочитате на Интернет бизниси – информациски производи 1.

Информациски производ креирање

Во претходниот дел опфативме некои елементи за тоа што претставува информациски производ и вредноста на истиот во очите на различни луѓе која зависи од проблемот кој го решава то производ.

Затоа и секој информациски производ тргнува од проблем кој постои на пазарот. Но, пред да го претставиме секвенцијалниот процес на креирање на интернет бизнис со информациски производ би сакал да претставам еден поглед кон содржината тие информациски производи.

Содржина на информациски производ

Секој информациски производ содржи информација. Должината на информацијата зависи од проблемот кој се решава со таа информација.

Не треба да бидете премногу засегнати со должината на информацијата, едноставно таа треба да биде доволно долга за да го реши проблемот. Сум видел информациски производ во pdf формат на 6 страни кој имал одлична продажба на интернетот, а продажната цена на тој производ била доста висока (мислам над 50$). Тоа за 6 странички навистина претставува огромна сума на пари. Но, сигурно информацијата која била содржана во таа е-книга била вредна за тие пари. Оваа книга давала информација како да дојдеш до кредитна картичка иако си на црна листа од банките. Многу луѓе доаѓале до таков проблем и не поради нивна вина. Претприемачот кој го доживеал истиот проблем и кој нашол решение на тој проблем направил информациски производ во вид на е-Книга која ја продавал за солидна сума на пари.

Целта со овој пример ми беше дека не мора да значи дека треба да напишете е-Книга од 200 страни за да можете да ја продавате. Едноставно доколку сакате да започнете со еден ваков бизнис треба да знаете дека не треба да пишувате книга – учебник, ѕуку едноставно пренесете ја информацијата која ја знаете и која решава проблем на потенцијалните купувачи.

Еве една структура која би можеле да ја следите при изработка на информациски производ (е-Книга, аудио или пак видео):

  1. Вовед во проблемот. Едноставно опишете гопроблемот кој овој производ го решава.
  2. Ваше лично искуство во врска со проблемот. Опишете го Вашето искуство со тој проблем и накратко како сте го решиле.
  3. Решение на проблемот. Чекор по чекор како сте го решиле проблемот и како Вашите купувачи би можеле да го решат тој проблем.

Процес на креирање на информациски производ

Како и секој бизнис и овој бизнис има сопствен процес на креирање на информациски производ. Не можам да навлезам во детали на сите овие процеси и подпроцеси бидејќи навистина има многу за пишување како и различни погледи. Затоа ќе презентирам еден концептуален приод од два чекори за креација на информациски производи како интернет бизнис.

1. Избор на проблем кој постои на пазарот

Овој чекор е најважниот чекор во креација на информациски производ. Доколку промашите во овој дел, целиот производ ќе биде промашен. Значи, потребно е да имате проблем за кој потенцијалните купувачи се гладни да најдат решение. На пример, доколку знаете како да ослабите 10 килограми за 15 дена и знаете дека се повеќе и повеќе луѓе се среќаваат со еден таков проблем тоа би било добра шанса за вас. Но, сепак првин анализирајте го пазарот, и тоа веб пазарот. Бидејќи Вие ќе продавате информациски производ преку интернет.

2. Концепирајте го производот

Постојат различни можности за концептот на информацискиот производ кој сакате да го продавате. Можете да направите е-Книга со структурата која ја наведовме претходно. Можете како дополнение да интервјурате некој експерт во подрачјето на проблемот кој ќе го решава таа информација. Можете да направите транскрип во вид на pdf е-Книга на аудио материјалот од интервјуто. Можете интервјуто да го направите во видео материјал или пак да го презентирате решението на проблемот преку Вашиот компјутер.

Слободно пријдете му на овој чекор со отворен ум бидејќи можностите и варијациите и комбинациите на концептот на производот се безбројни. Само внимавајте информацијата во која и да е форма да биде вредна, применлива и разбирлива за купувачот – оној кој сака да го реши проблемот.

3. Креирајте го производот

Во овој чекор едноставно она што го знаете го ставате на хартија. Можете директно да пишувате во MS Word и потоа напишаното да го екпортирате во pdf формат кој претставува стандард кога станува збор за е-Книга како информациски производ. За технологија и алатки за креирање ќе стане збор во следниот дел од овој серијал за интернет бизниси за информациски производи.

Доколку сакате Вашиот производ да биде аудио снимка едноставно направете го првин концептот на хартија, подоцна ставете го на компјутер во MS Word и за сите точки од концептот напишете што ќе зборувате. Откако ќе завршите со тоа едноставно вклучете го микрофонот на Вашиот компјутер и читајте го сето она што сте го напишале.

Доколку сакате Вашиот информациски производ да биде видео направете презентација во MS Power Point и искористете ги алатките кои ги наведовме во премиум видео материјали за изработка на веб презентација и за креирање на видео.

4. Одлучете за она што ќе го продавате

Не мора да се врзете само за е-Книга или пак само за аудио. Можете да направите 3 производи: е-Книга, аудио и видео и да ги продавате во состав на истата веб страна. На пример, е-Книгата да биде најевтина и да одите со upsale плус аудио за поскапа цена и како уште еден upsale за плус аудио + видео за најскапата опција.

На ваков начин веќе ќе имате креирано одреден производ следува разработка на маркетинг стратегијата и техничкото поставување на веб серверот на сето она што сте го направиле.

Tретиот дел од овој серијал за информациски производи како дел од серијалот за интернет бизнис на претприемач е насочен на техничката страна од овој тип на бизнис.

post

Кредитни фази

Во денешни услови на стопанисување кредит претставува еден од поважните инструменти за подобрување на работењето. На денешниот пазар во Македонија функционира 18 банки и 10 штедилници кои нудат разни видови на кредити. (податок на Народна банка на Македонија)

Кога ќе влеземе во банка да се информираме за кредит добиваме многу информации за истиот, а и сами не знаеме што точно тие информации значат. Така често се спомнуваат термини како што се: грејс период, отплата, рата, ануитет, интеркаларна камата, динамика на плаќање…. итн.

Во наредниот текст ќе се обидеме да ги објасниме основните поими врзани за кредитот како извор на финансирање. Пред се, кога земаме кредит имаме две страни. Од една страна се наоѓа Банка/Штедилница која го дава кредитот. Тие ги викаме КРЕДИТОРИ. Од  друга страна имаме претпријатие или бизнис кој зема кредит или ЗАЕМОПРИМАЧ.

Обично КРЕДИТОТ поминува низ неколку фази:

  • Мораториум
  • Грејс период
  • Период на отплата

МОРАТОРИУМ претставува временски период во кој не е активирана обврската на плаќањето. Поточно тоа е период во кои каматата се пресметува и се придодава на основниот долг. Мораториум обично се одобрува на долгорочни кредити, за финансирање на набавување на опрема, градежни работи итн.

Пример:

  • Кредит: 100.000,00 ден.
  • Камата: 10%
  • Мораториум: 12 месеци
  • Основниот долг во овој случај е 100.000,00 ден. (износот на кредитот)
  • Каматата за 12 месеци изнесува: 100.000,00 х 10% = 10.000,00
  • Кога ќе истече мораториумот основниот долг ќе изнесува: 100.000,00 + 10.000,00=110.000,00 ден.

Грејс период е временски период во кој не се плаќа главницата на кредитот туку се плаќа само износот на каматата. ГРЕЈС ПЕРИОД во пракса се меша со МОРАТОРИУМ. Така на пример имаме кредитни линии кои даваат грејс период а всушност даваат МОРАТОРИУМ. И грејс период како и мораториум се одобрува исклучиво на долгорочни кредитни линии.

Период на отплата претставува временски период во кој се активира обврска на плаќањето на главницата, и постои кај секој вид на кредит, без разлика дали се работи за краткорочен или долгорочен кредит.

Сега кога сме запознаени со основните кредитни фази да видиме уште некои работи кои се поврзани со кредит.

Кога ќе земеме кредит од деловна банка или штедилница, ни се јавува обврска истиот да го вратиме. Таа обврска се јавува во вид на ануитет што пак претставува збир на каматата и главницата.

Еве како тоа изгледа графички:

Кредитни фази

Ануитетот можеме да го враќаме месечно, квартално – на секоi 3 месецi и полугодишно. Обично ќе добиете кредит со месечен или квартален ануитет.
Да напомнeме дека банката за секој вид на кредит бара обезбедување во случај да не можеме да го вратиме. Обично како инструмент на обезбедување се бара:

  • Хипотека (неподвижен имот во вид на станови, куќи, локали…) во однос 2:1 што значи двојно поголема вредност на хипотеката од вредноста на кредитот. Хипотеката не мора секогаш да биде во ваша сопственост. Ако имате пријатели или роднини кои Ви веруваат и имаат потполна доверба во Вас и тие можат да ја обезбедат хипотеката.
  • Жирант (обично друго правно лице – претпријатие, или за помали износи физички лица).
  • Меница или
  • Самата опрема или објект што ќе го градите со помош на кредитот.

И за крај порака за сите што ќе земаат кредит. ПРОЧИТАЈТЕ ГО ДОГОВОРОТ И ПО 2 ПАТИ ПРЕД ДА ГО ПОТПИШИТЕ!

*****************************************************************

Овој напис е напишан од Предраг Стојковски, директор на компанијата Intro Group ДООЕЛ Битола која се занимава со финансиски консалтинг. http://www.introgroup.co.cc

*****************************************************************

post

Интернет бизниси – Информациски производи 1

Сите редовни читатели на претприемач веројатно веќе имаат прочитано дека повеќепати информациите ги ставам како еден посебен ресурс за бизнисите. Како надополнување на човечките, материјалните и финансиските ресурси информациите стануваат значаен ресурс не само за бизнисот туку и за сите претприемачи, па и за оние кои не се претприемачи, кои се вклучени во некаков процес на бизнисите.

Со право се вели дека најпрофитабилен бизнис во светот е продажбата на информации.

Што се подразбира под информациски производ?

Наједноставно кажано информациски производ е одреден медиум на кој се наоѓа некаква информација.

Да видиме малку поопширна дефиниција на информациски производ:

Информациски производ претставува медиум во било кој облик кој содржи некаква информација која е вредна за оној кој ја прима и кој навистина има потреба од користење на таа информација.

Оваа е едноставно моја дефиниција која сметам дека е најприкладна за онаа што го зборуваме во моментов – интернет бизнис со информациски производ.

Но, постои потреба да се разграничи и медиумот за да се добие вистинскиот смисол на интернет бизнис со информациски производ. Медиумот на информациски производ може да биде:

  • Онлајн – е-книга, аудио курсеви и видео материјали кои се прикачени на интернетот и корисникот може да ги симне за да ги чита, слуша или пак слуша и гледа.
  • Офлајн – CD, DVD, печатена книга, печатен весник итн. кои корисникот мора да ги купи во продавница или преку нарачка на интернет за да ги добие по пошта.

Овој напис за интернет бизниси не се однесува на информациски производ кој ќе го купите во продавница туку само на информациски производи кои можете:

  • Да ги симнете преку интернетот и
  • Да ги нарачате и да ги добиете дома преку пошта.

Информациски производи кои може да се симнат од интернет наспроти оние кои се праќаат по пошта

Поголема предност им давам на информациските производи кои се симнуваат на интернетот бидејќи истите имаат повеќе предности во однос на оние производи кои се продаваат. Еве некои од тие предности:

  • Немате потреба да држите на залиха било каква информација. Оваа е една од најголемата предност бидејќи навистина единствениот магацин што ќе го имате е виртуелен магацин на Вашиот веб сервер каде што е сместена и целата Ваша веб страна.
  • Не мора да правите ништо по продажбата на производот. За разлика од продажба на физички информациски производ каде физичкиот носител на информацијата треба да се однесе до пошта и испрати кај инфо производите кои се симнуваат од интернетот нема никаква потреба од дополнителна работа.
  • Секоја продажба претставува целосен профит. Бидејќи немате никакви трошоци за испраќање или пак за изработка на медиумот едноставно цената по која ќе го продавате тој информациски производ претставува целосен профит.

Иако и инфо производите на физички медиум претставуваат информациски производ тука повеќе ќе се насочиме на оние производи кои можат едноставно да се симнат од интернетот по плаќањето – дигиталните производи.

Што претставува дигитален информациски производ?

Сите сме сретнале е-книга во pdf формат која ја читаме на нашиот компјутер или пак ја печатиме и потоа ја читаме. Сите имаме некоја музика во mp3 формат која ја слушаме или на компјутерот или пак на CD Player или пак на iPod. Сите сме дошле до некое видео на YouTube или пак имаме некои видео материјали на нашите компјутери кои слободно можеме да ги гледаме. Сето тоа се дигитални производи кои едноставно можеме да ги најдеме на интернетот и да ги симнеме да бидат достапни на нашиот компјутер.

Што претставува вредност на информацијата?

Сакам да разграничиме нешто околу вредноста на информацијата. Вредноста на информацијата е различна за различни луѓе. Информација за тоа како да се спречи опаѓање на косата нема вредност за некој кој нема косопадица, но има проблем со вишок килограми. За тој човек многу повредна ќе биде информацијата за како да намали 10 килограми за 15 дена.

За мене никаква вредност нема некој јунак од цртани филмови како Бен Тен, но за мојот син и тоа како е вредно што го гледа.

Значи вредноста на информацијата се мери во големината на проблемот што луѓето го решаваат со таа информација. За да имаме добар информациски производ треба да имаме од друга страна луѓе кои имаат проблем кој можат да го решат со тој наш информациски производ.

Во овој прв дел од интернет бизниси – информациски производи на претприемач дадов едно кратко објаснување за тоа што претставуваат информациски производи.

Можете да ги прочитате следните написи на претприемач: Интернет бизниси – информациски производи 2 каде ќе биде опфатен процесот на креација на информациски производ и Интернет бизниси – информациски производи 3 каде ќе биде опфатена потребната технологија.

post

Интернет бизниси – Серијал на претприемач

Во последниве месец дена навистина бев бомбардиран со прашања од читателите на претприемач дали ќе продолжам со серија на написи за интернет бизниси која ја започнав на артиклите на претприемач што веќе не ги ажурирам туку сите нови написи ги објавувам тука на претприемач.

Па затоа овој напис ќе биде најава на еден серијал на написи за интернет бизниси кој ќе продолжи и низ целата 2010 година.

Тука би искористил накратко да сублимирам за се она што досега го опфативме за интернет бизниси на претприемач и она како почетен парвец за она што следува

Како оваа слика подолу можете да видите милион слики на интернетот и на различните веб страни кои продаваат еден вид на информациски производ. Но, уште во стартот би напоменал дека не е толку едноставно за да можете од утре да заработувате пари на интернетот. Оваа ќе биде попрактично разработено во овој серијал.

Што беше опфатено за интернет бизниси на пертприемач?

Во изминатиот период започнав еден серијал за интернет бизниси кој е на артиклите на претприемач (веќе не ги ажурирам). Овие артикли можете да ги најдете на интернет бизниси на претприемач.

Како поважни би ги издвоил следниве:

1. Интернет бизниси основа

Во овој напис е даден одговор на некои прашања како што се:

  • Што е тоа интернет бизнис?
  • Зошто интернет бизнис како опција?
  • Потребно знаење за интернет бизниси?

2. Интернет бизниси – можност за заработка

Во овој напис се издвоени 10 можности за зарабтка или 10 вида на интернет бизниси:

  1. Информациски производи
  2. Физички производи
  3. Affiliate маркетинг
  4. Работа од дома
  5. AdSense
  6. Консалтинг
  7. Услуги
  8. Веб страници за кои се плаќа членарина
  9. Препродажба на хостинг услуги
  10. E-bay

3. Интернет бизниси – потребна технологија

Во овој напис е опфатена технологијата која е потребна за нормално функционирање на еден интернет бизнис:

  • Основна опрема
  • Технологија за поставување на веб страна
  • Технологија за функционирање на бизнисот.

4. Интернет бизниси – автоматизација

Во овој напис се дадени некои од можностите кои се достапни за автоматизација на интернет бизнисот:

  • Што е она што може да се автоматизира?
  • Што е она што ќе го добиете со автоматизацијата?

Овие би ги издвоил како најважните кои доколку не сте ги прочитале би било пожелно да ги прочитате пред да започнеме со овој нов серијал за интернет бизниси на претприемач.

Што е она на што ќе се концентрираме во овој серијал?

Првин овој серијал би го поделил на два дела:

  • Концепциски дел кој ќе се занимава со еден поширок и посеопфатен поглед кон еден интернет бизнис. Зошто еден ваков концепт? Првин, треба да се сфати дека не е толку едноставно да се води успешен интернет бизнис. Многу е лесно да се започне, но не е лесно да се биде успешен. Затоа и еден поглобален и поширок пристап кон интернет бизнисите ќе биде опфатен во овој серијал на претприемач.
  • Технички дел кој ќе се занимава со специфичните видови на интерент бизниси како што ги набројавме погоре во интернет бизниси – можност за заработка како и со некои посебни технологии кои се користат во интернет бизнисите.

Овој серијал на интернет бизниси на претприемач нема да биде како серијалот за маркетинг средства вокој секоја недела објавуваме по едно маркетинг средтсво, туку ќе одат нераспределено во однос на временски рок. На пример, една недела може да одат 5 написи, па некоја недела ниеден. Но, во секој случај ќе се обидам барем еднаш неделно да имаме нешто во однос на интернет бизниси.

Па да започнеме!

Информациски производи

Кога станува збор за информациски производи како еден вид на интернет бизнис можете да прочитате на:

Физички производи

Следува…

post

15 Маркетинг Совети за 2010 година

Полека но сигурно поминува и оваа 2009 година. Претприемач постои веќе една година, а како вчера да започнав да пишувам блог написи за трендови кои ќе не очекуваат во 2009 година. Претходниот напис опфаќаше совети во однос на некои активности кои би требало да ги започнете во 2010 година.

маркетинг средства за 2010 година на претприемач

Овој напис едноставно ќе претставува едно сублимирање на се она што на некој начин го опфативме во делот на маркетинг на претприемач во 2009 година.

1. Гради листа

Листа со тековни купувачи и потенцијални потрошувачи претставува една моќна алатка на секој претприемач во поглед на маркетинг активностите за сопствениот бизнис. Како едно од маркетинг средства градење на листата ја опфативме во Маркетинг средства 12 – Гради листа. Еден од 10-те бизнис темплејти од претприемач претставува токму една форма која можете да ја искористите за градење на сопствена листа.

2. Сегментирај ја листата

За подобро спроведување на маркетинг активностите пожелно е да ја сегментирате листата. Сегментацијата можете да ја извршите врз основа на некои карактеристики на членовите во листата како на пример, пол, значајност, потенцијални потрошувачи и купувачи…

3. Биди еден чекор поблиску до твоите потрошувачи и еден чекор пред конкуренцијата

Едно правило за секој претприемач е основната цел да му биде да биде еден чекор поблиску до потенцијалните и тековните купувачи, а секогаш да биде еден чекор пред конкуренцијата. Се она што го правите погледнете го низ призмата колку тоа нешто ќе ве доближи до потенцијалните и сегашните купувачи.

Од друга страна постојано анализирајте ја конкуренцијата и најдете ги нивните слабости, однос што е тоа што тие го прават на полето на маркетингот, а што е тоа што не го прават. Сето она што го прават тие, направете го и вие само подобро, а сето тоа што тие не го прават едноставно Вие направете го.

4. Направи едноставен маркетинг план

Една од најголемите грешки што еден претприемач ги прави во поглед на маркетингот согласно Jay Conrad Levinson (таткото на герила маркетингот) е шт немаат маркетинг план, а се обидуваат да спроведуваат маркетинг активности за нивниот бизнис. За изработка на едноставен маркетинг план можете да прочитате во Маркетинг план во 7 едноставни реченици.

Доколку пак сакате да изготвите маркетинг план согласно „правила и прописи“ или како уште го нарекувам маркетинг план од учебници, прочитајте во Маркетинг план како дел од бизнис планот.

5. Обврзи се на тој маркетинг план

Необврзувањето кон тој маркетинг план кој ќе го изработите е уште една грешка која ја потенцира Jay Conrad Levinson. Кога нешто ќе испланирате едноставно мора и да го спроведете. Можете да прочитате некои идеи како Вие како претприемач и Вашите вработени да се обврзете на тој маркетинг план во Дополнувања за маркетинг планот.

6. Ажурирај ја твојата веб страна

Доколку имате веб страна на која го презентирате Вашиот бизниси отворете ја и погледнете од кога не сте ја ажурирале. Дококу одговорот е една, две или три години и повеќе, веднаш ажурирајте ја. Додадете кои се новите производи или пак услуги што ги нудите. Сменете го делот Copyright 2005, на пример. Ажурирајте ги контакт деталите, ставете Skype контакт детали, e-mail, GoogleWave детали за сорабтка со Вас, Facebook корисничко име, Twitter и се што имате, користите а не е наведено на Вашата веб страна за да Ве најдат.

7. Направи блог за твојот бизнис

Оваа е една стратегија која ја започнаа малите бизниси, а големите веднаш ја прифатија откако сфатија дека е добра и дава резултати. Но, најчест проблем што се јавува кај претприемачите е за што да пишуваат. Можете да прочитате за 10 теми за кои можете да пишувате на Вашиот бизнис блог. Запомнете дека со блогот не е целта да направите моментална продажба туку едноставно градите содржина која има за цел да ја поддржи денешната и утрешната продажба.

8. Направи стратегија за присуство на социјални медиуми

Ова едноставно значи да одговорите на следниве прашања:

  • Кои социјални медиуми?
  • Како да бидам присутен?
  • Со што да бидам присутен?
  • Кој јазик да користам во комуникација?

9. Започни со имплементација на стратегија за присуство на социјални медиуми

Имате премногу отворени можности за користење на социјалните медиуми, само треба да направите добра стратегија и да започнете со имплементацијата на се она што е опфатено во стратегијата. Ништо нема да изгубите, само можете да добиете поен плус во очите на потенцијалните потрошувачи.

10. Биди присутен секаде каде што се присутни твоите потенцијални потрошувачи

Секој би се занимавал со маркетинг доколку знае точно каде се наоѓаат неговите потенцијални потрошувачи. Но, проблемот не е толку едноставен. Потребна е анализа и познавање на потенцијалните потрошувачи како би знаеле каде тие се присутни. На таков начин и Вие како претприемач и Вашиот бизнис ќе можете да бидете присутни таму, било лично или пак преку некое маркетинг средство.

11. Мери ги резултатите од секоја маркетинг активност

Кога станува збор за маркетинг, ова е неминовна активност за еден претприемач. Прашањето е како да се мери успешноста на една маркетинг активност. Постојат неколку работи кои и досега ги потенциравме на претприемач. Првин, потребно е уште при дизајнот на маркетинг активноста да размислите за тоа како ќе ја мерите успешноста на таа маркетинг активност. На пример, доколку користите весник да ставите попустен купон за секој кој ќе дојде да купи или пак нарача од Вас. Потоа секоја таква продажба да ја претворите во приход во пари. За на крај тој приход да го поделите со по трошокот за таа маркетинг активност. Искористи го маркетинг календарот како еден од 10-те бизнис темплејти на претприемач.

12. Користи ги резултатите од мерењето и подобри ја секоја маркетинг активност

Кога веќе ќе имаш одреден фактор на успешност за секоја маркетинг активност лесно ќе можеш да ги подредиш врз основа на успешноста. За сите оние маркетинг активности кои даваат добри резултати обиди се да ги подобриш и да дадат уште подобри резултати. Размисли за менување на боја на огласот која ќе привлече поголемо внимание, доколку користиш огласи во весници.

13. Елиминирај се од маркетинг календарот што во 2009 година има слаби резултати

Сите оние кои се најслаби исфрли ги од маркетинг календарот, а сите оние кои даваат добри резултати продолжи ги. За секоја маркетинг активност која ќе ја исфрлиш избери нова согласно маркетинг буџетот. Па, повторно продолжи со мерењето. Така постојано ќе го подобруваш маркетингот на твојот бизнис.

За користење на маркетинг календарот од 10-те бизнис темплејти можете да го погледнете видеото за маркетинг календар.

14. Комуницирај со потенцијалните потрошувачи и купувачи

Доколку комуникацијата се употреби како посебно маркетинг средство моќта на маркетингот за Вашиот бизнис навистина ќе биде на едно завидно ниво. Можете да користите различни „далечински“ маркетинг средства, но доколку не воспоставите ситем на вистинска комуникација во вистинско време, ефиксноста и ефективноста на Вашите напори ќе биде мала.

Комуникацијата може да бидне вербална и невербална комуникација, директна и индиректна, официјална и неофицијална, озбилна и смешна, онлајн и офлајн…

Се е тоа еден вид на комуникација која ја остварувате со надворешниот свет – Вашите потенцијални купувачи.

15. Анализирај преку интервјуа и прашалници

Анализирај преку интервјуа у прашалници – Но што да анализираме? Едноставно што е она што го сакаат Вашите тековни купувачи и потенцијални порошувачи, но и што е она што не го сакаат. На ваков начин ќе успеете да искористите неколку работи:

  • Ќе стекнете знаење што е тоа што го правите добро и заради што купувачите ве избираат Вас. Сето тоа може да биде елемент на идно подобрување како би ја задржале конкурентската предност во тие елементи.
  • Ќе стекнете знаење за она што не им се допаѓа на Вашите купувачи. Ова е простор на големи промени и подобрувања.
  • И едноставно интервјуто или пак прашалникот претставува еден вид на маркетинг средство кој во очите на купувачот ве претставува како некој кој се грижи за нивното мислење.
post

10 Клучни Работи Кои Треба да Ги Започнете во 2010

Како навршува оваа 2009-та година и се побликсу е 2010-тата се прават различни анализи и проценки за тоа каква ќе биде 2010 година. На претприемач подготвуваме посебен напис за некои наши предвидувања во однос на бизнисите за 2010.

Препораки за претприемач за 2010

Во овој напис би сакал да издвојам 10 клучни работи за кои би требало да размислите и да ги спроведете во новата 2010 година, доколку не сте ги спровеле досега. Па да тргнеме:

1. Доколку сеуште не сте започнале сопствен бизнис размислете за оваа опција

Секогаш постои една ваква опција доколку сакате да постигнете нешто повеќе, односно доколку сакате да излезете од динамичката рамнотежа на удобноста што status quo ситуацијата Ви ја пружа. Можете новогодишните празници да ги искористите и да размислите дали можете да постигнете нешто повеќе во животот и дали опцијата да бидете претприемач е соодветна за Вас.

2. Внесете го вашиот бизнис во светот на интернетот

Една активност што според мене влегува во категорија МОРА. Маркетингот и начинот на комуникација помеѓу бизниси и бизниси како и бизниси и крајни потрошувачи во светот е целосно променет. Започнува да се менува и кај нас. Бидете подготвени и на оваа поле. Но, моја препорака е воопшто да не се нфаќате со оваа активност доколку сметате дека Вашата веб страна треба да биде една обична брошура. Само ќе потрошите пари, а ништо нема да добиете.

3. Започнете со SEO доколку сеуште не сте започнале

Една од основните активности кога станува збор за Вашата достапност на интернетот е SEO (Search Engine Optimization – Оптимизација на пребарувачи). Ова е една од најважните активности за да бидете достапни и најдени од потенцијалните потрошувачи во интернет светот. Дали Ви е потребна веб страна ако никој не може да Ве најде кога ќе има потреба од Вашите производи и/или услуги.

4. Искористете ги социјалните мрежи во полза на Вашиот бизнис

Секојдневно никнуваат нови социјални медиуми кои на некој начин ги поврзуваат луѓето меѓу себе. Социјалните медиуми се еден од елементите кои го изменија начинот на практицирање на маркетингот. Помеѓу 300 до 400 илјади македонци се на Facebook. Пред едно 3 до 4 месеци на Twitter имаше неколку илјади македонци, а верувам дека денес се уште повеќе и тој број ќе се зголемува уште.

Така да не смее да се испушти оваа можност кога еден просечен Facebook корисник е минимално еден час на неговата омилена мрежа. Затоа бидете и Вие како претприемач и Вашиот бизнис таму.

5. Интегрирајте систем на постојано учење

Во Знаење и креативност – втор слој за успех на еден претприемач веќе ги поставив основите за знаењето и неговата претходица наречена учење. Постојано учете за сите Ваши бизнис активности, учете за маркетинг, финансии, планирање, менаџмент, преговарање и договарање, продажба… Листата навистина е предолга. Кога станува збор за интегрирање на систем ова е навистина процес кој можеда се каже дека е и сложен и едноставен. Сложен бидејќи ќе бара еден вид на познавање од информатичка технологија за да се подеси пристигнување на информации и едноставно бидејќи по подесување учењето е навистина лесно.

6. Воведете систем за квалитетно следење на конкуренција

Втор систем кој би требало да го воведете е систем за следење на конкуренцијата. Конкуренцијата претставува важен фактор за Вашиот бизнис. Следејќи ја соодветно конкуренцијата и предвидувајќи ги нивните чекори ќе бидете секогаш еден чекор пред нив.

Кога зборувам за систем мислам на еден поавтоматизиран систем кој нема да бара премногу време од Ваша страна, а ќе Ве снабдува со квалитетни информации за Вашиот бизнис.

7. Воведете систем за квалитетна комуникација со Вашите купувачи

Она како се вели: Бидете еден чекор пред конкуренцијата и еден чекор поблизу до купувачите. Квалитетна комуникација со купувачите ќе Ви обезбеди да бидете еден чекор поблизу до нив. Кога сте поблиски со Вашите купувачи ќе добиете информации кои можат Вашиот бизнис да го подобрат во сите поглед на бизнис работење.

Освен традиционалата комуникација очи во очи, воведете можност за комуникација преку е-mail, социјални медиуми, телефон… Но, запомнете дека доколку ја овозможите оваа комуникација комуницирајте, одговарајте на меилови, одговарајте на прашањата преку социјалните медиуми и одговарајте на телефонските повици.

8. Воведете систем за квалитетна комуникација со Вашите потенцијални купувачи

Четвртиот важен систем е систем за квалитетна комуникација со Вашите потенцијални купувачи. Освен купувачите кои веќе Ви имаат дадено доверба потребно е да комуницирате и со потенцијалните купувачи кои сакате да Ви ја дадат нивната доверба и да постанат купувачи. Системот може да биде ист или пак сличен со системот за комуникација со купувачите.

9. Направете реинженеринг на комплетната маркетинг стратегија

Реинженеринг едноставно претставува повторно градење од почеток. Размислете ја целокупната Вашата маркетинг стратегија во поглед на се она што дава резултати и она што не дава резултати. Доколку не сте ги мереле сопствените маркетинг активности, сега е вистинско време да започнете. Исфрлете го сето она што не дава резултат и подобрете го она што дава резултат. Вообичаено компаниите кои ги спроведуваат Вашите маркетинг активности ќе се обидат да го продолжат договорто со Вас и за 2010. Пред да одлучите да го продолжите договорот запрашајте се за следново:

  • Дали имам резултати од таа маркетинг активност?
  • Какви се резултатите (денари/купувач од таа маркетинг активност или пак денари/продажба од таа активност)

10. Бидете фокусирани на она што го работите

И како последна препорака го избрав фокусот. Доколку не сте фокусирани на Вашиот бизнис и на Вашите претприемнички активности животот како претприемач навистина ќе Ви биде потежок.

2010 година не очекувам дека ќе биде розева во поглед на бизнисите и особено на малите бизниси. Ќе имате премногу активности кои ќе треба да ги спроведете. Затоа бидете фокусирани во она што го работите. Следете го она наједноставното правило: Првин најважните и најприоритетните работи.

Ова се едни од препораки кои сметам дека навистина имаат потенцијал да го подобрат Вашиот бизнис. Ако започнете и со други активности само ќе се подобрите уште повеќе. Па, се надевам дека ќе ја истуркаме и 2010-тата и ќе започнеме да бележиме вистински резултати.

post

Заење и Креативност – Втор Слој за Успех на Еден Претприемач

Знаењето е моќ, знаењето е сила! Многу популарна маркетинг кампања кај нас во последно време.

Знаење и креативност за успех на еден претприемач

Ова е веќе четврти напис од овој серијал за карактеристики на успешни претприемачи. Првин спроведовме една анализа за фактори кои еден претприемач го прават успешен, а подоцна резултатите од анализата ги поставивме во една хиерархиско пирамидална структура за најважни фактори.

Минатата недела го обработивме првиот слој од таа хиеарирхиско пирамидална структура – Спремност да се превземе акција. Ако сме спремни да превземаме акција потребно е таа спремност да ја надоградиме со вториот слој на патот кон успешноста, а тоа е знаење и креативноста.

Што претставува знаење за еден претприемач?

Јас имам знаење за ова. Јас имам знаење за она. Тие имаат знаење за нешто друго. Секаде околу нас се врти некакво знаење. Секоја личност има некое специфично знаење кое си го носи со себе. Мислам и дека не пости човек кој нема одредено знаење. Знаење почнува уште од нашето раѓање. Секој нов ден од нашиот живот претставува стекнување на одредено знаење. Знаењето го стекнуваме, дома од родителите, во градинка, подоцна во училиште, факултет и од животот.

Значи знаењето е составено од два значајни елементи:

  • Искуство. Сето она што го доживуваме на некој начин се преточува во наше знаење. Тоа е наш личен капитал или личен капитал на еден претприемач.
  • Едукација. Сетоа она што го стекнуваме низ задолжителниот и незадолжителниот едукациски систем се преточува во наше сопствено знаење. Освен оној едукациски систем, како училиште, факултет, курсеви, тука влегува и читање на некоја книга, стекнување на информации од интернет и било што што ќе Ве едуцира Вас како претприемач и што ќе ви го зголеми тековното знаење за нешто.

Што претставува креативност за еден претприемач?

Во Wikipedia за креативноста се вели:

Креативност е ментален и социјален процес на откривање на нови идеи или концепти, или ново поврзување на креативниот ум помеѓу постоечките идеи или концепти.

Значи кретивноста е директно поврзана со откривање на нови идеи или концепти или пак модификација на постоечки идеи и концепти.

Да се биде креативен не е лесно. Да се стекне знаење е многу полесно отколку да се биде креативен. Креативноста не се учи, туку едноставно се спроведува и излегува од самиот претприемач.

Комбинација на знаење и креативност

Затоа и вториот слој од претприемничкиот пат кон успешноста претставува едноставен микс меѓу знаењето и креативноста. Зошто еден ваков микс?

Првин, можете да имате знаење во преголеми количини, но без креативна примена на тоа знаење во секојдневната практика нема да Ви гарантира дека ќе бидете успешен претприемач.

Од друга страна сметам дека знаењето пак е единствениот фактор кој може да ја зголеми креативноста на еден претприемач. Како еден претприемач може да биде креативен доколку нема знаење? Најверојатно, никако. Освен ако очекува некаква божја дарба за да биде креативен.

Токму тука лежи овој концепт на миксање на знаењето и креативноста со што само ќе се зголеми веројатноста за успехот на претприемачот. Како што го зголемувате знаењето за одреден предмет така ќе се зголемува и потенцијалот на Вашата сопствена креативност.

Втор фактор кој влијае на зголемена креативност е самиот претприемач. Ова се однесува на тоа што го викаме вродено нешто кај некој. Се смета дека уметниците се најкреативни затоа што едноставно имаат талент од некоја гранка на уметноста и затоа што едноставно креираат уметност со сопствениот отворен ум. Веќе пишувавме на претприемач за 6 совети за зголемување на креативноста.

Со сето ова што го изложив погоре слободно можеме креативноста да ја изразиме математички како функција од знаење и претприемачот:

Креативност = f(знаење + претприемач)

Како да бидете подобар претприемач преку знаење и креативност?

И на крај она најважното прашање: Како да бидете подобар претприемач преку знаење и креативност?

Ќе набројам неколку совети за Ваше лично подобрување како претприемач, што секако ќе има директно влијание на подобро работење на Вашиот бизнис:

Зголемување на знаење

Бидејќи претходно објаснив зошто знаење без креативноста не оди и обратно, треба да тргнеме со зголемување на претприемничко знаење. Ова може да се постигне на два начина:

  • Постојано учење на нови вештини. Барем денеска имате огромна можност за учење. Потребно е само да воспоставите систем кој постојано ќе го зголемува Вашето знаење како претприемач. Тргнете од подрачјата каде сте најслаби, а Вашиот бизнис ги бара тие подрачја. Читајте стручна литература, списанија и весници од тие подрачја и применувајте го наученото во секојдневната работа.
  • Учење од грешки – искуствено учење. Со учење на нови вештини и нивно применување во секојдневнта работа постојано ќе ги усовршувате тие вештини преку сопствено искуство. Дури и грешките кои ќе ги направите ќе го зголемат Вашето сопствено знаење и ќе ве направат да бидете подобар претприемач.

Однесувајте се како претприемач

Да, претприемач значи да бидете креативни, па затоа користете ги најкреативните методи и техники кои ќе ви дојдат во умот за да ја зголемите сопствената креативност и знаењето. Како 6 совети за претприемничка креативност би ги издвоил повторно:

  1. Имајте бележник секогаш крај себе.
  2. Сменете ги рутините во вашиот живот.
  3. Разгледувајте.
  4. Вмрежувајте се.
  5. Реиновација.
  6. Користете ги местата кои ја зголемуваат креативноста.

post

Достапна е нова верзија на Word Press 2.9 – Кармен

Пред неколку дена ја ажурирав платформата на која работи претприемач – WordPress на најновата верзија 2.9 наречена Кармен (Carmen). Бидејќи во 10-те видео материјали за изработка на веб презентација за Вашиот бизнис WordPress е главната опција, а и во написите и артиклите за интернет бизниси и интернет маркетинг, особено во написот за WordPress VS Joomla како победник го промовирав WordPress, би сакал накратко да ги искоментирам најновите опции кои што ги забележав во оваа најнова верзија.

Пред да преминам на тие карактеристики би напоменал дека пред некое време оваа моќна платформа е изберена за најдобра Open Source CMS платформа (платформа за менаџирање на содржина на интернетот). Повеќе детали за ова можете да прочитате на Open Source CMS Award. Инаку се до оваа година WordPress беше жртва на сопствениот успех како платформа за блогирање иако претставува комплетно CMS решение за комплексни веб страни. Но, оваа година грешката е исправена и конечно WordPress дојде на врвот каде што му е местото. Им честитам на сите дизајнери кои работат на усовршување на WordPress.

Па да преминам на главните карактеристики.

Едитирање на слики

Она што најмногу ми се допадна е што во оваа најнова верзија е додадена можност преку самата WordPress апликација да ги едитирате сликите кои што сакате да ги објавите на веб. Оваа нова функција овозможува 3 основни манипулации со сликите (Crop, Rotate и Flip).

WordPress Едитирање на слика

Корпа со отпадоци (Recycle Bin – Trash)

Она што ни е познато во Windows како корпа со отпадоци која служи да ги складира Вашите избришани податоци за уште една проверка за да не избришете нешто по грешка сега е додадено во WordPress како функција Trash. Оваа функција служи за бришење на одредени написи, но всушност не ги брише целосно туку се наоѓаат во Trash – Отпад од каде можете едноставно да ги избришете целосно или да ги вратите доколку сте избришале нешто по грешка.

Ажурирање на група на додатоци одеднаш

Досега доколку излезеше некоја нова верзија на некој додаток (Plugin) ќе моравте да одите еден по еден да го ажурирате. Во најновата верзија можете да ги ажурирате сите додатоци одеднаш при што WordPress ќе провери дали има нова верзија и дали е компатибилна со Вашата WordPress платформа. Нема веќе страв од тоа дека ќе инсталирате некомпатибилен додаток.

Едноставно внесување на видео од YouTube

Оваа опција не е само за YouTube туку и за Blip.tv, Flickr, Viddler и други познати видео сервиси на интернет. Наместо како досега да се копира и лепи кодот на видеото од сервисот каде е аплоадирано сега едноставно само со лепење на URL-то на видеото ќе можете да прикажете видео на Вашата веб страна.

Други подобрувања

Овие досегашни подобрувања се оние кои успеав да ги видам визуелно како нови опции. Но, прочитав дека во најновата верзија се опфатени уште еден куп на други подобрувања кои се однесуваат на безбедноста, на бубачки во кодот и функционалности во однос на коментарите и оптимизација на базата на податоци.

Во секој случај мислам дека оваа верзија 2.9 претставува претставува револуционерна верзија на овој систем за менаџирање на содржина на интернетот. Верувам дека согласно досегашната практика на дечките од WordPress набргу ќе излезе подверзија на оваа верзија, бидејќи за само една година започнав со верзијата 2.7 па следуваа подверзии, за потоа да се појави верзијата 2.8 која многу повеќе се однесуваше на безбедносните елементи и сега пристигна оваа верзија со повеќе функционални елементи.

post

Цена – Маркетинг Средство 35

Често пати се прашувам дали цената треба да влезе како еден вид на маркетинг средство или треба да се гледа само како карактеристика или полезност што еден бизнис нуди преку своите производи или услуги. Сепак во наши услови каде зборовите технолошки вишок, стечај, отпуштање и затворање се најпопуларни последниве 15 до 20 години, не можам а да не ја издвојам цената како посебно маркетинг средство.

Цена како маркетинг средство

Ова е еден сосема друг поглед на цената – цената како маркетинг средство. Досега на претприемач цената повеќе ја гледавме како еден финанси аспект на бизнисот. Па тие артикли и написи кои ги опфативме досега за цената можете да ги прочитате во:

Како дел од маркетинг миксот цените ги опфативме во Маркетинг микс – Цена. Во тој дел наведовме дека следниве цени може да ги примениме:

– Цени за продирање на пазар – пенетрација

– Конкурентни цени.

– Стратегија на снижување на цени.

– Цени на групни производи.

– Цени на линија на производи.

– Психолошки цени.

– Опционални цени.

– Премиум цени или цени на престиж.

Значи имаме различни видови на опции во однос на цените. Која опција ќе избереме ќе зависи од неколку фактори како што се:

  • Понуда и побарувачка за производите и/или услугите
  • Трошоците
  • Конкуренцијата и
  • Државата со различни регулации во однос на цената.

Тука би додал уште еден елемент, а тоа е што Вие како претприемач и Вашиот бизнис продавате: само производ, само услуга или пак и производ и услуга. Еве еден пример од малопродажба:

Големите маркети продаваат само производ и затоа имаат пониски цени во однос на малите продавници кои нудат и еден вид на услуга како помош при избор на производот.

Што е цена како маркетинг средство?

Првин, цената едноставно претставува износ на пари кои се даваат од страна на купувачот на продавачот за да се добие производот или услугата кои се продаваат од страна на продавачот.

Како може цената да се разгледува како маркетинг средство?

Едноставно така што цената претставува слика, односно визуелизација која ја давате Вие како претприемач за вредноста на Вас, Вашиот бизнис и Вашиот производ и/или услуга. Едно основно правило е доколку платите повеќе ќе добиете поголема вредност. Но, од друга страна нема секој можност да плати повеќе, па на таков начин ќе се обиде да компензира на вредноста.

Висината на цената може да се гледа како маркетинг средство на следниов начин:

  • Висока цена – Висока вредност и квалитет. Висока експертиза, висок авторитет.
  • Ниска цена – Ниска вредност. немање на експертиза и авторитет.

Дали цената има клучно влијае?

Во зависност од видот на потрошувачи кои ги таргетирате ќе зависи и влијанието на цената како маркетинг средство. Доколку таргетирате потенцијални потрошувачи за кои големата цена не претставува проблем слободно ќе можете да одите по повисоки цени. Но, доколку таргетирате потенцијални потрошувачи кои се социјално загрозени, секако дека нема да можете да одите со високи цени.

Затоа е важно, првин да ги проучите потенцијалните потрошувачи од Вашиот целен пазар. Потоа да изберете со која ценовна стратегија ќе одите.

Како цената да се користи како маркетинг средство?

Како и повеќето од маркетинг средства кои ги разработуваме на претприемач, така и цената се користи во комбинација со други маркетинг средства и особено со потрошувачи и квалитет како маркетинг средства.

Првин добро познавајте ги Вашите потрошувачи, потенцијални потрошувачи и купувачите, а потоа презентирајте и докажете им го Вашиот квалитет (решавање на нивниот проблем), за на крај да можете да наплатите поголема цена за тој квалитет.

Еве еден пример каде јас лично како потрошувач се најдов во една таква ситуација:

Дојдов до најава за еден софтвер кој треба да се пушти во официјална продажба по неколку месеци. Ме заинтересира софтверот бидејќи решаваше неколку мои проблеми во тој момент. До денот на официјалното пуштање во продажба ми ги презентираа можностите на тој софтвер (вредност, квалитет, заштеди итн.). Барав да видам која е цената и не можев никаде да ја најдам. Мислев дека ќе биде прескап илјадници долари врз основа на тоа што го има како можност. Но, на денот на официјалното пуштање во продажба видов дека тој софтвер чини 200$ што за мојата претходна перцепција од илјадници долари беше премногу ефтино. А, знам дека не е ефтино, сепак 200$ не се малку пари за еден софтвер. Но, маркетингот што го примени компанијата која го продава софтверот беше одлична, а имаат и одличен производ од кој сум навистина задоволен.

post

Што Еден Претприемач Може да Научи за Маркетинг од Владата?

Навистина сум изненаден од маркетинг советниците на нашата Влада. Одлични маркетинг стратегии и тактики.

Маркетинг лекции од Владата

Бизнисите, и особено малите бизниси навистина можат да научат многу работи. Како еден меѓу првите написи на претприемач пишував за маркетинг стратегијата на Барак Обама која му овозможи успех на последните претседателските избори во САД. Сега сакам да ги извлечам поспецифичните маркетинг активности кои нашата Влада ги применува, а кои се применливи и за Вас како претприемачи и за Вашите мали бизниси.

Онака како што се наведени подолу каде што спомнувам бизниси или пак претприемачи може да се употреби и политчки партии и Влада.

1. Маркетинг, маркетинг и само маркетинг.

Успехот се состои во квалитетен маркетинг на бизнисот. Не е важно да правите нешто добро што само Вие и Вашите најблиски ќе го знаете. Или пак не ви е потребен бизнис кој никој нема да го знае. Видливоста на Вашиот бизнис, препознатливоста на Вашиот бизнис и ставовите на луѓето за Вашиот бизнис ги градите со помош на маркетингот.

2. Бидете добри кон медиумите, за тие со добро да ви вратат.

Медиумите имаат голема моќ за влијание врз целата заедница, која всушност претставува Ваш потенцијален пазар. Доколку сте добри кон нив, односно најдете заеднички интерес ќе имате одличен потенцијал за бесплатна промоција на Вашиот бизнис и бесплатно распространување на информација за Вашиот бренд, бизнис или пак производ и услуга.

3. Бидете присутни секаде каде што се Вашите потенцијални потрошувачи.

Отсекогаш оваа правило било важно како за бизнисите така и за политичките партии. Каде се потенцијалните потрошувачи (гласачи)? Вложете напори Вашиот бизнис да биде присутен секаде каде што се потенцијалните потрошувачи.

4. Секогаш возвраќајте го ударот на негативните напади од конкуренцијата.

Очекувајте дека е нормално да бидете нападнати од Вашата конкуренција, без разлика дали станува збор за Вашиот бренд, производ или пак услуга. Не останувајте неми на овие напади, бранете се и возвратете го ударот. Но, умно и интелигентно, не простачки.

5. Ако почувствувате опасност, напаѓајте.

Нападот е најдобра одбрана. Оваа стратегија не е нова, туку постоела отсекогаш. Доколку навистина почувствувате некаква опасност за Вас како претприемач или пак за Вашиот бизнис, не се мислете, напаѓајте веднаш.

Една квалитетна тема за овие стратегии ќе ја опфатиме набргу на претприемач во темата за теорија на игри.

6. Секогаш имајте дополнителен АС во ракавот за било што.

Не е лошо да бидете однапред спремни за секоја можна ситуација за Вас како претприемач и за Вашиот бизнис. Едноставно за да го спроведете ова ќе Ви биде потребно наједноставното правило од информатиката – IF – THEN правило (Ако – Тогаш правило). Ако некој направи тогаш јас ќе го направам ова.

7. Користење на социјални медиуми.

Моќта на социјалните медиуми не треба да се испушти од страна на претприемачите како една маркетинг стратегија. На Facebook е присутна секоја политичка партија па и функционерите на истата. Да, не зборуваме за најгледаните видео материјали на YouTube (нормално повторно политички).

Вие како претприемач морате да се вклучите во социјалните медиуми, нормално со вистинската стратегија за Вас и за Вашиот бизнис.

8. Распространување на порака која што што потенцијалните потрошувачи сакаат да ја слушнат.

Секогаш вашата маркетинг порака треба да биде она што потенцијалниот потрошувач сака да го слушне. Веќе пишував за прикажување на корисноста наместо карактеристиките, корисноста е нешто што потенцијалниот потрошувач сака да го слушне.

Но, има уште нешто, размислете да користите емоционални реченици како на пример, нашиот производ ќе ви помогне да не изгубите 1000 денари наместо ќе заштедите 1000 денари.

Сето ова е дел од еден сосема нов пристап во маркетингот кој сеуште се крчка низ научните лаборатории низ светот и кој се повеќе се обидува да го разбере мозокот на потенцијалниот потрошувач. Кој дел од мозокот како функционира?

***

Ова се осум лекции кои што сметам дека се најважни, иако можеби постојат уште многу и доколку сметате дека нешто изоставив слободно споделете го преку коментар подолу.