post

Маркетинг – Најдоброто од 2011 година

Претприемач новогодишно 2012

Претприемач новогодишно 2012

Категоријата маркетинг има околу 250 постови од кои 60-тина според нашата евиденција се од годинава. Може да се има бизнис идеја врз основа на која ќе се направи бизнис план и ќе се започне бизнисот. Но, без да дознаат за бизнисот и за производот или услугата, односно проблемот кој тој бизнис го решава оној кој треба да купува, не може да се очекува успешноста на бизнисот. Тоа е целта на маркетингот.

Овој пост е дел од серијалот најдоброто на претприемач за 2011 година.

Да ги извлечеме најдобрите во оваа категорија за 2011 година.

  1. 5 прашања за ефикасни реклами. Ефикасна реклама е нешто што ќе поттикне купување кај постоечки купувачи и ќе донесе нови купувачи за Вашиот бизнис. Во постот се опфатени 5 прашања на кои ќе треба да дадете одговор за да дизајнирате поефикасни реклами за Вашиот бизнис.
  2. Како до повеќе купувачи? Прашањето кое секој претприемач си го поставува. Ајде да се обидеме да го одговориме или да помогнеме во одговарањето.
  3. 4 знаци дека потрошувачите мислат вие сте број еден. Постојат повеќе знаци кои ти како еден претприемач ги следиш, но кои се оние кои ќе ти ја покажат лојалноста на потрошувачите кон твојот бизнис.
  4. 40 маркетинг совети кои мора да ги имплементирате? Разгледајте ги овие совети во однос на вашиот маркетинг и започнете со имплементација.
  5. План за промоција преку одговор на 40 прашања. Одговори ги прашањата и веќе ќе имаш рамка за твојот план за промоција.
  6. 100 маркетинг активности кои треба да ги спроведувате. На едно место групирани се 100 маркетинг активности кои треба да бидат спроведувани од страна на вашиот бизнис.
  7. Маркетинг пред започнување. Понекогаш е доцна да се започне со маркетинг откако ќе се започне бизнисот. Од друга страна овие активности може да ви помогнат да го подобрите бизнисот уште пред истиот да биде започнат.
  8. Бизнисот и видео камери. Видео камери, камери на мобилни телефони и она што е околу нас а може да сними нешто од бизнисот треба да се искористи како некое маркетинг средство за бизнисот.
  9. 22 Прашања за конкуренција. Анализа на конкуренцијата и чекорите кои таа ги спроведува е значајно за вашиот бизнис. Во постот се дадени 22 прашања за конкуренција на кои постојано ќе мора да барате одговор.
  10. Анкета за лојалност на купувачите. Постот претставува еден водич со мапа за спроведување на анализа на лојалноста на купувачите преку анкети.
  11. Конверзија на купувачи – чек листа. Овој пост претставува едноставна чек листа која ќе ве води низ процесот на конвертирање во купувачи.
  12. Видео: 3 Состојки на вирозност. Во оваа видео се презентирани трите најважни состојки кои ќе мора да ги инсталираш во твојата кампања за да обезбедиш поголема веројатност на вирозност на истата.
  13. 26 Начини твојата понуда да биде неодолива. Твојот, па и сите бизнис функционираат врз основа на понуда. Имаш понуда која се разгледува од потенцијалниот купувач пред да донесе одлука за купување. За да го зголемиш успехот на твојата понуда потребно е истата да биде колку што може повеќе неодолива.
  14. Слушање како нова бизнис функција. Дали ги слушате вашите потрошувачи? Дали ги слушате вашите потенцијални потрошувачи? Полека но сигурно слушањето прераснува во една од најзначајните бизнис функции.
  15. Твоите маркетинг пораки треба да ги дадат овие одговори. Ако успееш во овие напори, ќе успееш како претприемач и твојот бизнис ќе биде на вистинскиот пат.
  16. Повик за акција – 7 работи кои можеш да ги подобриш.  Една од клучните компоненти на неодолива понуда е твојот повик за акција, бидејќи воопшто не постои потреба од некоја понуда што не поттикнува некоја акција.
  17. Не што тие велат дека сакаат или што ти мислиш дека сакаат. Честопати она што мислиме дека го сакаме и она што навистина сакаме е сосема различно. Но, и она што бизнисите мислат дека сакаме е различно од она што ние навистина сакаме. Во постот се дадено препораки кои можете да ги искористите за бреинстормирање на различни потреби на твоите сегашни или потенцијални потрошувачи колку што може повеќе.
  18. Како да изградиш силни односи со твојата заедница. Освен градење и одржување на твојата заедница мора да градиш и подобри односи со таа твоја заедница. Мора да комуницираш со неа. Мора да направиш да ти бидат партнери. Ти треба нивната помош доколку сакаш да го раснеш твојот бизнис.
  19. Како да се диференцираш себеси. Во постот е презентиран еден можен процес кој ти како еден претприемач можеш да го користиш за да се диференцираш себеси и твојот бизнис.
  20. Како да ја комуницираш вредноста? Секој бизнис нуди одреден вид на вредност за потрошувачите. Но, за да успее мора да ја комуницира таа вредност со потрошувачите или потенцијалните потрошувачи.
  21. Како да ја анализираш конкуренцијата? Кои се тие? Што прават? Кои се импликациите врз твојот бизнис од она што тие го прават? Што треба да направиш?
  22. Како да го користиш Gmail како CRM алатка? Ова е едно упатство во кој се прикажани некои идеи како Gmail да се користи како една CRM алатка за мал бизнис.
  23. Користење на Gmail и Evernote како CRM алатка. Како едно надополнување во однос на користење само на Gmail со помош на Evernote ќе можеш да ги следиш и сите други маркетинг активности поедноставно, да додадеш едноставно било што друго поврзано со нив и секако да имаш едноставен и брз пристап до информациите.
post

Започнување на бизнис: Предности и недостатоци

Претприемач новогодишно 2012

Претприемач новогодишно 2012

Започнување на бизнис носи одредени предности, но има и свои недостатоци.

Треба точно да се определи што во дадениот момент претставува предност, а што недостаток, за да можат предностите да се искористат, а влијанието на недостатоците да се амортизира и неутрализира.

За оваа цел најмногу се користи SWOT-анализата, со чија помош се определуваат јаките и слабите страни кои настануваат во самото претпријатие, како и шансите и заканите кои се јавуваат како надворешни чинители.

Ајде да разгледаме некои предности и некои недостатоци во однос на започнување на бизнис.

Предности на започнување на бизнис

Предностите на започнување на бизнисот од нула се:

  • Можност да се позиционира бизнисот на посакувана локација. Самиот си анализира, избира и одлучува за локацијата претприемачот. Кога станува збор за купување на постоечки бизнис, ова не е можност, или пак бара вложување на многу повеќе финансиски средства.
  • Физичките капацитети се инсталираат според однапред дефинирани цели, предвидени со бизнис план.
  • Можностите за иновацијата се поголеми доколку се отпочне нов бизнис, при што сите фази во проектирањето се запазени.
  • Со отпочнувањето на нов бизнис, претприемачот креира сопствен имиџ, што не е случај при купување на веќе постоечка фирма.
  • Со купување на одредена фирма се купува и нејзината профитабилност, а со новата фирма може до ист или поголем профит да се стигне со помалку пари.

Недостатоци на започнувањењ на бизнис

Недостатоци на започнување на бизнисот од нула се:

  • Многу поголем ризик во однос на купување на веќе постоечки бизнис;
  • Потреба од време за да се стекне довербата на потрошувачите;
  • При започнувањето секогаш, ама баш секогаш ќе постои проблемот околу обезбедување финансиски средства;
  • Процесот на воведување во работата бара големо време за воспоставување на канали за набавка, продажба, кредитни аранжмани;
  • Неискуството со работата може да биде причина за неуспех;
  • Започнување со бизнис често пати носи и неискуство на претприемачот во однос на менаџментот;
  • Започнување со бизнис е напорна работа, да не се лажеме дека е лесно.
post

Како да ги зголемиш цените без да ги изгубиш потрошувачите?

Грешки при определување на цени Минатата недела зборувавме за 4 начини за зголемување на цените. Во тој пост опишавме 4 различни техники за зголемување на цените кои се базираат на различни ситуации како причина за тој чекор.

Но, вистинскиот проблем кога станува збор за зголемување на цените претставува перцепција на потрошувачите. Не постои претприемач кој не се прашал себеси следново прашање: Каква ќе биде реакција на купувачите кога ќе ги зголемам цените?

Дали потрошувачите ќе продолжат да купуваат во иста количина како и пред зголемувањето на цените?

Да разгледаме некои можности кои ти како еден претприемач можеш да ги користиш за да го амортизираш влијанието на зголемувањето на цените врз тековните купувачи.

#1 Може да додадеш дополнителна вредност во понудата

Една од првите рабори кои можеш да ги направиш е да додадеш вредност на самата понуда. Може да додадеш дополнителни карактеристики, нови корисности, дополнителни сервисни елементи, бонуси, гаранција, испорака…

Логиката зад ова е доколку додадеш дополнителна вредност на твојата основна понуда за која сакаш да ја зголемиш цената, може да се види како фер компензација за повисоката цена која ќе ја побараш за твоите производи или услуги. На таков начин, потрошувачите ќе го ценат тоа, бидејќи ќе добијат поголема вредност која на друг начин ќе им заштеди.

Кога и да помислиш за зголемување на цената обиди се да најдеш дополнителни елементи кои како вредност ќе ги закачиш на понудата.

#2 Подобри ја понудата

Втората работа која може да ја направиш во намалување на влијанието на зголемувањето на цената врз твоите купувачи е да ја подобриш понудата за која ќе бараш дополнителен износ на пари.

Еден дел е подобрување на содржината на понудата, твоите производи или услуги и се она што е изградено околу твоите производи или услуги. Ова е нешто што го правиш при додавање на дополнителна вредност во твојата понуда.

Втората работа е да ја подобриш понудата за да ја направиш навистина неодолива за твоите купувачи. Неодолива понуда не поставува прашања за цена од перспектива на еден потрошувач. Таа едноставно е неодолива. Може да прочиташ повеќе во 26 начини до неодолива понуда.

Кога размислуваш за подобрување на твојата понуда размислувај за подобрување на корисностите. Размислувај за подобрување на проблемите кои твојот бизнис ги решава и начинот на кој ги презентираш тие решенија и ги комуницираш со нив. Размислувај за вистинските желби на твоите потрошувачи. Размисли за тоа како да ги активираш емоционалните поттикнувачи во твојата понуда. Размислувај за подобрувања на твојот повик за акција и социјалниот доказ како дел од твојата севкупна понуда.

Тоа се елементи кои имаат голем потенцијал за амортизација на влијанието на зголемувањето на цените во очите на потрошувачите.

#3 Биди искрен

Последната работа е да бидеш искрен со потрошувачите. Ова значи искрено објаснување за тоа зошто си принуден на зголемување на цените.

Запомни дека искреноста е важен елемент кој доведува до зголемување на кредибилитетот, репутацијата и довербата (за што како посебни чекори во таа насока изработивме упатство како дел од првиот вебинар на премиум претприемач). Ова претставува голем дел од твојата бизнис потенцијална енергија.

Доколку потрошувачите можат да ги разберат твоите намери, ќе разберат и зошто мора да ги зголемиш и цените, и доколку тие се задоволни со твојот бизнис досега, ќе продолжат и да купуваат од тебе и понатаму.

post

Користење на Gmail и Evernote како CRM систем

Evernote Минатиот месец напишав еден пост за тоа како може да се користи Gmail како CRM систем (систем за менаџирање на односите со потрошувачите ) од страна на еден претприемач или за целите за еден мал бизнис. Gmail дава доста добри можности за внесување на податоци за потрошувачите и потенцијалните потрошувачи.

Но, понекогаш природата на бизнисот е таква да самите податоци за секој клиент може да дојдат во една навистина несредена форма. На пример, слики, текст, честа email комуникација, материјали за проекти, понуди, одговори… Иако може да се најде начин како сето ова да се спакува преку Gmail, но тука би сакал да споделам една креативна можност да се комбинираат Gmail и Evernote за ти како еден претприемач биднеш многу поорганизиран во однос на тие односи како со потрошувачите така и со потенцијалните потрошувачи.

Во претходниот пост за Evernote кој беше објавен на претприемач насловен како може ли поголема продуктивност со Evernote наведов повеќе идеи за користење на оваа апликација во кои не беше опфатена темата во овој пост. Но, како што наведов се повеќе се играм во однос на користење на оваа апликација и постојано наоѓам нови креативни начини на користење на истата.

Како едно надополнување во однос на користење само на Gmail каде може да собираш информации за твоите потрошувачи, за твоите потенцијални потрошувачи, да вршиш сегментација, можеш да ги следиш твоите маркетинг активности поврзани со email со секој од твоите потрошувачи, можеш да научиш повеќе за нив, можеш да изградиш подобри односи со нив, со помош на Evernote ќе можеш да ги следиш и сите други маркетинг активности поедноставно, да додадеш едноставно било што друго поврзано со нив и секако да имаш едноставен и брз пристап до информациите.

Ајде да видиме како може да се комбинираат овие две алатки.

#1 Креирање на нотеси во Evernote

Контејнер и нотеси во Evernote

Контејнер и нотеси во Evernote

Првин мора да започнеш со добра организација во Evernote преку креирање на соодветни нотеси. На пример, организацијата на нотеси во Evernote се изведува преку Stacks (именуван контејнер за нотеси) и Notebooks (нотеси). Значи, логиката е да има по еден уникатен контејнер со повеќе нотеси во истиот. Ваквиот начин ни овозможува организирање и расчленување на две нивоа, што можеби претставува и една ограниченост и недостаток кој го забележав во апликацијата бидејќи полесно е да имам еден контејнер со клиенти и во истиот нотеси за различни клиенти и во тие нотеси уште поднотеси кои би можеле да бидат, контактирано, одговорено, генерални информации, состаноци…

Но, во секој случај и ваквиот начин ни одговара, доколку добро се организираме. Во овој случај би имале по еден контејнер (stack) за секој клиент во кој ќе бидат содржани различни нотеси. На пример би имале:

  • Клиент 1 контејнер (нотес 1, нотес 2, нотес 3, …)
  • Клиент 2 контејнер (нотес 1, нотес 2, нотес 3, …)
  • Клиент 3 контејнер (нотес 1, нотес 2, нотес 3, …)
  • …
  • Клиент n контејнер (нотес 1, нотес 2, нотес 3, …)

Кога станува збор за нотеси тие ќе зависат од твоите потреби, но како еден пример како би можел да ги организираш може да ги користиш следниве идеи:

  • Контакт од твоја страна
  • Одговор
  • Информации за потрошувачот
  • Состаноци…

Следното нешто на што добро треба да размислиш се ознаките (tags) на секоја белешка која ќе оди во одреден нотес заради поедноставен пристап во иднина и помош во пребарувањето.

Кога веќе ќе ги имаш определено структурата на организацијата и клиентите може да преминеш во следната фаза, интеграција со Gmail.

#2 Интеграција на Evernote со Gmail

Пред да започнеш со самата интеграција, сакам да напоменам дека не треба да очекуваш целосна автоматизација. Но, целта на CRM систем не е да работи без човек, туку да биде организиран од страна на човекот и да се користи од страна на човекот.

Интеграцијата на Gmail со Evernote ќе ти помогне малку во автоматизирање на самиот процес преку користење на опцијата филтри во Gmail. Така, првин треба да изработиш филтер за секој од твоите клиенти.

Филтер во Gmail за интеграција со Evernote

Филтер во Gmail за интеграција со Evernote

Филтер во Gmail кој ќе ги праќа email-овите во Evernote

Филтер во Gmail кој ќе ги праќа email-овите во Evernote

На втората слика е покажана акцијата која филтерот ќе треба да ја направи, а тоа е email-от од клиентот да го прати како белешка во твојот Evernote акаунт (Evernote ти дава посебен email акаунт кој се користи за праќање на белешки преку email). Запомни дека постапката треба да ја повториш, но со филтер кој ќе користи To како на првата слика за email-ови кои ги праќаш на тој клиент.  На ваков начин секој email кој ќе го добиеш од твојот клиент или потенцијален клиент или пратиш автоматски ќе се покаже и како забелешка во Evernote со што нема да мора рачно да ги внесуваш тие контактирања.

Секоја ваква забелешка нема да биде веднаш во вистинскиот контејнер и клиент како нотес во Evernote туку ќе оди во посебен фолдер кој ти е изберен за внесување на белешки. Така да ќе треба секоја нова забелешка добиена преку Gmail да ја ставиш во нотесот за кој клиент се однесува. Оваа од друга страна е добро, бидејќи ќе бара да влезеш во апликацијата и да ја најдеш забелешката која треба да ја пренесеш во соодветен нотес, а во исто време и да ја едитираш со твои забелешки или идеи за идни активности во однос на таа белешка.

#3 И што потоа?

Сега кога веќе имаш организиран систем, твојата работа ќе биде да го полниш и со останати информации или белешки поврзани со потрошувачот. Еве некои примери како можете да го користите она што го креиравте до сега:

  • Можете да ставите забелешка со твои идни активности и да користите check box во таа забелешка за што Evernote има одлично решение, со тоа да креирате посебна To-Do листа за вашите идни активности.
  • Можете да направите контакт листа со слика, адреси, контакт детали за вработените, родендени на тие вработени кај тој ваш потрошувач доколку ги има. Секако еден дел од работата на CRM е да градите односи со потрошувачите. Дали, праќање на роденденска честитка нема да ви помогне да тие односи бидат на едно повисоко ниво.
  • Можете се она што ќе дознаете за потрошувачот да го внесете во вид на белешки. Каде јаде, каде пие кафе, со кого се дружи, каде излегува, што сака, што не сака, какво пиво пие и дали пие… Можеби сите овие прашања ви изгледаат смешно, но верувајте може да ви се најдат. Колку повеќе знаеш толку подобри односи ќе изградиш, а колку подобри односи ќе изградиш, толку подобар бизнис ќе имаш со тој потрошувач.

Ова се само како идеи, сепак вашата креативност е таа која ќе ве води низ процесот.

#4 Подобрувај

Колку повеќе ќе го користите системот, толку подобро ќе бидете испраксирани со што ќе дојдете до многу идеи за подобрување.

***

Мора да напоменам дека Evernote може да биде секаде со тебе. Го има како мобилна апликација. Го има за таблети, за десктоп компјутери, но и веб верзија.

post

Како да го привлечеш твојот идеален купувач?

Твојата работа како еден претприемач е секогаш да работиш на привлекување на нови потрошувачи за твојот бизнис. На ова се базира растот на твојот бизнис. Тоа е дополнителна бизнис потенцијална енергија за твојата компанија.

Но, привлекување на купувачи за твојот бизнис те чини пари. Сакаш да бидеш присутен секаде каде што се наоѓаат твоите потенцијални купувачи. Оваа присутност бара напор, време и пари.

Зошто би сакал да ги фасцинираш потенцијалните купувачи доколку тие немаат интерес за твоите производи или услуги?

Зошто би сакал да ги фасцинираш потенцијалните купувачи доколку тие ги немаат проблемите кои твојата компанија ги решава?

Сигурно не сакаш да ги фасционираш таквите потенцијални потрошувачи, туку сакаш да ги привлечеш идеалните потрошувачи за твојата компанија.

За таквите потрошувачи вреди напорот, времето и парите вложени за нивно привлекување. Тие имаат поголем потенцијал да конвертираат во купувачи, бидејќи тие веќе имаат потреба од твоите производи или услуги, и секако сакаат да ги решат проблемите кои твојата компанија може да ги реши за нив.

Во продолжение се дадени 4 чекори кои ќе треба да ги преземеш доколку сакаш да ги привлечеш идеалните купувачи за твојата компанија.

#1 Целен пазар

Кој е твојот целен пазар?

Треба да го знаеш одговорот, бидејќи твоите идеални потрошувачи се токму на тој пазар. Треба да ги пронајдеш таму.

Без прецизно знаење на целниот пазар, нема да можеш ниту да ги најдеш твоите идеални потрошувачи.

Затоа треба да го опишеш твојот целен пазар. Користи демографија, социологија, географија или било што друго што ќе ти каже каде се наоѓаат твоите идеални купувачи.

#2 Твоите идеални потрошувачи

Знаеш ли кои се твоите идеални потрошувачи?

Дали тоа е Перо, сопственик на мал бизнис кој продава мобилни телефони и има потреба од рекламирање на неговиот бизнис? Или тоа е Елена, која сака да има сопствена пекара и има потреба од консултации за започнување на бизнис?

Повторно, кои се твоите идеални потрошувачи?

Размисли за ова:

  • Тие се дел од твојот целен пазар.
  • Тие имаат потреби за твоите производи и услуги.
  • Тие треба да имаат проблеми кои твојот бизнис ги решава.
  • Тие треба да имаат страсна желба за да ги решат тие проблеми.
  • Тие мора да бараат можни решенија за нивните проблеми.

Опиши го твојот идеален купувач користејќи ги погоре опишаните потреби за некој да може да влезе во категорија на твојот идеален купувач.

#3 Лоцирај ги

Сега знаеш кој е твојот целен пазар и ги знаеш твоите идеални потрошувачи. Следното нешто што треба да го преземеш е да ги лоцираш.

Каде се твоите идеални потрошувачи?

Каде одат, каде јадат, каде работат, каде ги бараат решенијата за нивните проблеми…?

Сите овие прашања се важни за тебе и за твојот бизнис доколку сакаш да изградиш присуство на твојот бизнис на тие места и нормално, да ги привлечеш.

#4 Начини за привлекување

Можеш да бидеш присутен на сите тие места каде што се наоѓаат идеалните купувачи, но доколку не успееш да го привлечеш нивното внимание нема да можеш да ја исполниш целта, а тоа е да привлечеш колку што може повеќе од нив.

Размисли за овие прашања:

  • Како можеш да им пристапиш?
  • Како можеш да комуницираш со нив?
  • Која ќе биде првата работа за која ќе комуницираш со нив?
  • Како ќе кажеш приказна за слични проблеми?

Доколку ги одговориш прашањата, ќе знаеш како да ги привлечеш. Денешниот бизнис свет не е место каде едноставно ќе ги закачиш твоите маркетинг материјали и ќе се здобиеш со потребното внимание.

Таму, на твојот целен пазар, постојат многу ентитети кои се обидуваат да го привлечат истото внимание за истите лица кои ти се обидуваш да ги привлечеш. Мора да бидеш попаметен, и да го искористиш твојот потенцијал.

Затоа комуницирај, не продавај. Едуцирај, не продавај. Гради односи, зголеми го кредибилитетот и довербата, биди нивен пријател… (Повеќе за тоа како до позитивно влијание врз идеалните купувачи можете да видите во вебинарот насловен како: Како потрошувачите да те изберат тебе место конкуренцијата.) Доколку успееш во ова, ќе зграбиш многу поголемо внимание и привлекување на твоите идеални купувачи.

post

4 начини за зголемување на твоите цени

пари Кога зборуваме за цени, тоа се многу чувствителни прашања за секој претприемач. Повисоки цени значат и поголем профит, но од друга страна постои опасност да се загубат некои купувачи.

Понекогаш како претприемач ти ќе бидеш принуден да ги зголемиш твоите цени. Тие сили кои те принудуваат на овој чекор се диктирани од страна на пазарот и се доста влијателни на твојата трошочна структура.

Како и да е, прашањето е како да ги зголемиш цените со најмало можно ниво на болка за твоите купувачи.

Секоја од овие техники е специфична за различни ситуации или различни причини за зголемување. Понекогаш може да постои притисок од снабдувачите поради зголемување на цените од нивна страна, а тоа има директно влијание на трошочната структура. Во таквите ситуации, не постојат некои големи можности за обидување со други тактики. Едноставно се бара зголемување на цените согласно со новонастанатата ситуација.

Понекогаш пак може да се има повеќе време за анализи и тестирања за зголемување на цените, додека понекогаш едноставно треба да се додаде дополнителна вредност во понудата за да се зголемат цените.

Важно е да знаеш дека различните причини за зголемување на цените ќе бара различни начини на зголемување на цените.

Кои се најчестите начини за зголемување на цените?

#1 Постепено зголемување

Нешто што често пати се користи од страна на претприемачите е постојано зголемување на цената, така што зголемувањето нема да претставува шок за потрошувачите. Едноставно продолжуваш со зголемување на цената се додека не стигнеш до нормалната или онаа која ја посакуваш. Најголемиот предизвик при користење на оваа техника е да знаеш кога цената го поттикнува отпорот на потрошувачот. Треба да го следиш нивното однесување.

На пример, ја зголемуваш цената за 5% и ништо не се случува. Твоите потрошувачи продолжуваат да купуваат во иста количина како и пред зголемувањето. По одредено време, кога ќе се осигураш дека зголемената цена не предизвикува промена во однесување на потрошувачите, едноставно повторно ја зголемуваш цената за 5%. И повторно ништо не се случува. продажбата останува иста. Нема жалби на цената. Па затоа повторно ја зголемуваш цената за 5%, но потоа откриваш дека твојата продажба започнува да паѓа. Тоа е знак кој ти кажува да престанеш и да ги вратиш цените на претходното ниво на покачување.

#2 Тестирај, потоа зголеми

Ова е втор начин кој можеш да го користиш за зголемување на твоите цени. Доколку сакаш да бидеш сигурен дека новите цени ќе бидат добри за твоите потрошувачи ќе треба да ја тестираш таа хипотеза. Прво, мора да откриеш колку тие се спремни да платат за твојата понуда. Ќе го најдеш одговорот доколку ги прашаш, или пак со помош на сплит тестови што значи да понудиш исти понуди со различни цени за различен примерок од потрошувачите.

Ова техника едноставно значи дека ти не ги зголемуваш твоите цени пред да дојдеш до заклучоци од твоите тестирања кои би ти кажале која би била најдобрата цена за твоите производи и услуги.

Може да ја користиш оваа техника доколку не си сигурен во однос на твоите цени, или пак доколку сметаш дека тие се потценети.

#3 Додади  вредност

Понекогаш доколку едноставно сакаш да ги зголемиш цените за да го подобриш сопствениот бизнис, или зголемиш профитабилноста, ќе можеш да ја користиш оваа техника.  Доколку додадеш дополнителна вредност во твојата понуда која ќе претставува фер компензација за разликата која ќе ја бараш во цената, твоите потрошувачи може да го ценат тоа и продолжат да купуваат од твојот бизнис.

Може да додадеш одполнителни карактеристики, сервисни компоненти, бонуди, гаранција, испорака…

#4 Едноставно направи го тоа

Последната техника е наречена едонставно спроведи го зголемувањето и значи дека преминуваш на зголемување на цената на нивото на која и треба да биде. Колку треба да биде е она што ти мислиш дека вредат твоите производи или услуги.

Понекогаш ќе бидеш принуден да ги зголемиш твоите цени доколку сакаш да останеш во бизнисот. Во таква ситуација, не постојат можности за размислување или тестирање. Мора да ги зголемиш цените и точка.

Како и да е, една работа која би требало секогаш да ја користиш со секоја од техникиве е да ја докажеш вредноста на твојата понуда за да го балансираш влијанието на зголемувањето.

Како што може да забележиш, постојат различни начини или техники кои може да ги користиш кога планираш зголемување на цените. Но, многу поважно е што во различни ситуации, или различни прилики, ќе биде потребна различна техника. Најди што е најсоодветно за секоја ситуација и искористи го.

Какво е твоето искуство кога ги зголемуваш цените? Постои ли некоја друга техника која ја користиш?

post

Како од ништо, станав манијакален корисник на една компанија?

Оваа слика не ја планирав за пост на претприемач, но сметам дека можеме да извлечеме некои заклучоци за она што им е потребно на бизнисите врз основа на тоа како јас станав “горд” корисник за помалку од две години на една компанија.

Станува збор за Apple од која до пред две години немав ништо, ниту пак размислував да имам некој нивен производ бидејќи сметав дека она што дотогаш го имав е доволно и нормално за мојот свет. Еве ја хронологијата на случките.

  • Незадоволство од тековната опрема. Од самите почетоци на мое користење на мобилен телефон (некаде 2000 година) бев голем фан на Nokia. Од оние познатите големи цигли до најновите кои излегуваа за кои плаќав огромни пари. Но, времињата се сменија. Дигиталниот свет се повеќе навлегуваше во мојот нормален живот. За мојата последна Nokia да ја прилагодам (која веќе беше стара две години) инсталирав Fring за да имам Skype, социјални медиуми, повици… Но, телефонот почна да се празни бргу, да биде многу поспор, па затоа ја избришав апликацијата која ми пречеше. Избор на апликации немаше (барем тогаш).
  • Новата потреба и незадоволство ме поттикна да одлучам да купам нов телефон. И, одлуката падна на iPhone, мојот прв производ на Apple. Дали погрешив? Не, никогаш нема ни да помислам дека направив грешка не само заради задоволувањето на моите потреби, туку и заради отворање на многу пошироки видици. Разни апликации го проширија начинот на кој го користев мобилен телефон дотогаш. Почнав да читам книги, да купувам книги, апликации, да пишувам постови…
  • Бидејќи веќе бев запознаен со компанијата, следев и што излегува ново од неа. Веќе им верував. Така, еден ден ја следев најавата на ново светско чудо наречено како iPad. Во индустријата со таблетите се обиделе многу компании уште многу одамна, но не успеале. Се мислеше дека и Apple ќе го снајде истата судбина. Напротив, се случи обратното. За брзо време се појавија многу видео материјали на YouTube за користење на уредот, нови апликации кои го олеснуваат животот, односно мобилниот живот на еден просечен човек, што пак е една нова потреба во денешно време. Забележете, дека воопшто не ни знаевме дека имаме или пак ќе имаме една таква потреба. И одлуката падна, го купив и тоа чудо. Повторно презадоволен од она што го добив за парите кои ги дадов. Но, не бев само јас задоволен, туку и син ми кој лесно сфати како да ракува со него барем за цртање и некоја игра.
  • Задоволен од досегашното искуство со Apple и се понезадоволен од стандардното користење на Windows и повторно нови потреби за купување на нов компјутер. Кој да биде изборот? Не се мислев многу, знаев што сакам, iMac. Како да ми имаат влезено во мозокот за донесување на одлука кога тие нешто го произведуваат. И, така заврши една моја ера на користење на Nokia и PC. Сега целосно сум “јаболкоизиран”, но и син ми веќе знае што сака, истото што и јас.

Забележете ги само следниве зборови:

  • Потреба.
  • Незадоволство со тековна ситуација.
  • Квалитет.
  • Задоволство.
  • Досегашно искуство.
  • Променети потреби.

И како еден заклучок за крај: потребно е да постојат повеќе производи кои ќе го водат купувачот низ една продажна инка на еден бизнис. Можеби понекогаш за првите, оние најефтините ќе нема профит, но важно е да се започне влезот во инката. Сигурен сум дека Apple знаел што прави кога навлегол во индустријата на мобилни телефони, а крајната цел не била само продажба на мобилни телефони, туку и доближување на повеќе луѓе до нивниот бренд, а со тоа и до поголема продажба на останатите производи.

А, сликата ја нареков мојата Apple маниа.

Apple Mania

post

10 Начини за привлекување на внимание

Започнуваш нов бизнис и потребно ти е внимание за да имаш успешно започнување.

Се подготвуваш да лансираш нов производ или услуга на пазарот и повторно ти е потребно внимание за да имаш успешно лансирање.

Па, и за нормално секојдневно функционирање на твојот бизнис, повторно вниманието е клучен елемент за успешноста на бизнисот.

Се чини дека живееме во ерата на внимание. Поголемо внимание поголема бизнис потенцијална енергија за секој проект кој ти како претприемач ќе го преземеш и обратно, помало внимание помала веројатност за успех на тој проект.

Иако постојат многу начини за привлекување на внимание, сепак тоа е процес кој бара макотрпна работа од страна на сите бизнис членови. И она што во овој пост го опфаќаме не е нешто конечно и не гарантира успех, но барем ќе те доближи до саканата цел.

Ти се бориш за вниманието на твоите потенцијални купувачи. Твоите конкуренти исто така се обидуваат да им го привлечат вниманието. Трети бизниси се обидуваат да им го привлечат вниманието за нивните производи или услуги кои немаат врска со твоите. Околината се обидува на секаков можен начин да им го привлече вниманието.

Се наоѓаш во еден океан каде сите се обидуваат да привлечат внимание на секого.

Привлекување на внимание

Привлекување на внимание

#1 Мора да имаш нешто вредно за внимание

Доколку сакаш навистина да го привлечеш вниманието на твојот пазар кон твојот бизнис, ќе мора да имаш нешто навистина вредно за нивното внимание.

Тоа нешто мора да решава некаков проблем на оној на кого сакаш да му го привлечеш вниманието, мора да е нешто навистина посакувано и потребно и мора да биде нешто што навистина се бара од страна на потенцијалниот купувач.

#2 Започни и пред да биде финалниот производ

Мора да креваш врева и пред да бидеш готов со финалниот производ или услуга околу која сакаш да привлечеш внимание. Не ти требаат сите карактеристики за да започнеш да зборуваш за твојот нов проект. Не треба да стравуваш од конкуренцијата.

Целта е да поттикнеш желба за имање на твојот производ или услуга. Целта е да поттикнеш нетрпение во очекување на конечната верзија. Целта е да имаш привремени корисници (оние први кои ќе го пробаат) и ќе ти помогнат во подобрување на конечната верзија, а во исто време ќе ја распространуваат информацијата за нивното искуство. Целта е да предизвикаш љубопитност за она што се “крчка” во твојот бизнис.

#3 Влијателни лица

Ти требаат влијателни лица кои едноставно можат да влијаат на другите во распространување на информацијата и искуството околу твојот нов производ. Дали тоа ќе бидат оние први корисници од претходниот начин, или некои кои навистина се активни во заедницата а кои ќе ја распространуваат пораката за твојот нов производ или пак некои трети лица кои едноставно имаат висок потенцијал да привлечат внимание околу нив, тебе ти требаат за привлекување на внимание.

Пронајди ги, дај им да пробаат и искористи го нивното влијание за да привлечеш внимание околу твојот проект.

#4 Социјални медиуми

Одлично место за кревање на врева и привлекување на внимание. Сето она што досега го опфативме во начините и сите останати можат добро да бидат интегрирани со социјални медиуми. Може да се прочита, да се слушне, да се види, да се презентира…

Немаш ограничувања, само твојата креативност е важна.

#5 Настани од индустријата

Семинари, конференции, собири, саеми… Сето тоа се настани дизајнирани за да ти помогнат да го привлечеш вниманието кон твојот нов проект. Мора да ги користиш, мора да бидеш присутен, мора да зборуваш, убедуваш, презентираш и комуницираш.

#6 Блог

Бизнис блог може да биде моќна алатка во твоите раце за привлекување на внимание кон твојот бизнис. Направи план за блог постови за новиот проект. Напиши, сними, покажи, едуцирај…

#7 Реклами

Старите добри привлекувачи на вниманието не треба сеуште да бидат отфрлени од користење. Но, можат да бидат додадени новите медиуми и новите технологии кои денес ги прават многу помоќни во привлекувањето на вниманието.

#8 Голема заедница околу твојот бизнис

Потребата и корисноста од имање на голема заедница околу твојот бизнис заради привлекување на внимание е нешто што не бара голем коментар. Колку поголема заедница поголемо ќе биде и вниманието кон твојот бизнис.

#9 Квалитетна заедница

Освен големината ти треба и квалитет на твојата заедница. Треба да имаат потенцијал за поттикнување на вниманието кон тебе и твојот бизнис. Мора да работиш постојано на подобрување на квалитетот на заедницата.

#10 Кредибилитет, репутација и доверба

Доколку ги поседуваш, вниманието само ќе си дојде. Но, потребно е време и работа во градење на твојот кредибилитет, репутација и доверба.

 

post

Биди најден и конвертирај повеќе со целни страни

Едно од почесто поставуваните прашања е како бизнисот да биде најден во една прашума од страни на интернетот од колку што може повеќе потенцијални потрошувачи и во исто време кога веќе ќе стигнат до страната да се конвертираат (да ја преземат акцијата која претприемачот ја сака) повеќе.

Затоа и вториот вебинар на премиум претприемач е од темата на интернет маркетингот: Како да бидеш најден и да конвертираш повеќе преку твоите целни (landing) страни? Кое сигурно си го поставуваш доста често доколку градиш присутност на интернет (а кој бизнис не гради).

Во овој вебинар станува збор за следниве прашања:

  • Што се тоа целни страни? Основата е да се знае точно што претставуваат целни страни. Постојат различни видувања кои се ограничувачки, но постојат и видувања кои се со многу пошироки видици. Целта е еден претприемач да го прошири сопствениот видик кога станува збор за целни страни.
  • Кои се трите фактори од кои зависи конверзијата? Многу е важно да постои двојна конверзија. Зошто? Потребна ти е конверзија на самата кампања (PPC реклама, банер, пребарување…) за да се стигне до таа целна страна. Поголема конверзија тука, повеќе посетители до страната, каде самата страна треба да ја преземе конверзијата во однос на преземање на акција од страна на посетителот (купувањље, нарачка, контакт, email листа…). Затоа во вебинарот навлегуваме во основните три фактори или како што уште се нарекуваат “троножец” на конверзија.
  • Примери од локално и глобално ниво во однос на целните страни и трите фактори на конверзија? Во минатите неколку месеци собиравме различни примери на кампањи (повеќето од локално ниво) и целни страни до кои водат тие кампањи кои во самиот вебинар ги анализираме и забележуваме што е добро, а што лошо.
  • Процес на креирање на целни страни. На крајот секако прикажан е еден процес на креирање на целни страни кој е најоптимален за најмалку можни грешки.
  • Акции кои треба да ги превземете. И секако и овој вебинар како и секој останат е проследен со акции кои ќе треба да ги преземете.

Пристап до еден вебинар на премиум претприемач е 500 денари, а со пристап до вебинарот имате и пристап до транскрипт на истиот, самата презентација и акциона листа.

Вебинарот трае еден час и 22 минути, а можеш и да го погледнеш воведниот дел на истиот во видеото подолу:

Уште еднаш линкот до вебинарот насловен како: Како да бидеш најден и да конвертираш повеќе преку твоите целни страни?

post

Претприемнички циклус на ветувања

Во светот на бизнисот, еден претприемач го базира сопствениот бизнис на ветување.

Ветуваш дека твојот бизнис ќе ги реши проблемите и задоволи потребите на потенцијалните потрошувачи, и доколку тие ти веруваат, ќе купат од тебе. Но, доколку го испорачаш ветеното, автоматски ти стануваш личност од доверба и со поголем кредибилитет кое заслужува да ја ужива нивната доверба.

Како и да е, доколку пак не успееш во испорака на ветеното, твојот кредибилитет и доверба ќе бидат нула, и тоа е крајот на твоите односи со тој потрошувач.

Многу е важно за тебе да го испорачаш сето она што си го ветил. Испорачување или испорачување на повеќе од ветеното, по автоматизам гради кредибилитет на тебе како еден претприемач, но и на твојот бизнис како целина.

Размисли за ситуација кога си купил нешто поради ветувањето од рекламен материјал за тоа нешто и по пробување на твојата нова играчка доаѓаш до заклучок дека ветувањето за решавање на твоите проблеми не е исполнето. Како се чувствуваш во една таква ситуација? Ќе купиш ли нешто во иднина од истата компанија? Дури и ако направат уште едно, подобро ветување, едноставно нема да им веруваш. Те губат засекогаш.

Размисли малку на спротивен начин. Што мислиш за претприемачи и нивните бизниси кои ти го испорачале она што го ветиле? Дали би купил нешто повторно во иднина од нив?

Циклус на ветувања

Бидејќи ветувањата се нешто што постојано се користи од страна на претприемачите од една страна, а има голем потенцијал да ја издигне или пак уништи компанијата ид друга страна, ова го нарекувам циклус на ветувања.

Ветуваш нешто и го испорачуваш ветеното. Твојот кредибилитет е на повисоко ниво отколку претходно.

Повторно ветуваш уште нешто и го испорачуваш ветеното. И повторно се појавува раст на твојот кредибилитет.

И повторно, ветуваш и го испорачуваш ветеното и повторно кредибилитетот ти расте.

Сето ова продолжува, повторно, и повторно, и повторно…

Ова е циклус кој никогаш не завршува се додека е жив и твојот бизнис. Но, од друга страна, секоја испорака на ветеното и зголемување на кредибилитет и доверба значи и зголемување на твојата бизнис потенцијална енергија. Поголема бизнис потенцијална енергија значи и поздрав бизнис.