post

Не Може Секој да Биде Ваш Идеален Потрошувач

Насловот навистина е контрадикторен со се она што постојано еден претприемач го прави за да го одржи во живот или за да го издигне едно скалило погоре. Овој напис на некој начин е продолжување на она што го започнавме за она што се нарекува сегментација на листата на потрошувачи преку RFM Формула за Сегментација на Потрошувачи и Демографија VS Активности на потрошувачите.

Идеален потрошувач

За потврда на тврдењето на насловот на овој напис најдобро може да послужи цитатот на Bill Cosby:

Не го знам клучот за успехот, но клуч за неуспех е да се обидете да ги задоволите сите.

Ова навистина е одлично кажано. Не можете да ги задоволите сите и тоа поради следниве причини:

  • Сите немаат потреба од ваш производ или услуга.
  • Немате капацитет да задоволите премногу потрошувачи.
  • Сите потрошувачи немаат капацитет за вашите производи или услуги
  • Подобро еден ама вреден наместо 1000 кои не додаваат вредност на бизнисот.
  • Вашата фокусираност кон важните потрошувачи ќе се намали.

Во наредниот дел ќе се обидам да навлезам во еден ваков начин на размислување кога станува збор за потрошувачите.

1. Секој претприемач има потреба од потрошувачи

Оваа е основата на секој бизнис, без потрошувачи која ќе биде целта на постоењето на бизнисот. Единствената постојана потреба за секој бизнис претставува потрошувачот. Дури и при започнување на бизнисот пред да започнете отпрвин треба да се прашате дали ќе имате барем еден потрошувач а да не сте тоа вие, вашата мајка, татко, брат или пак сестра.

Иако не може секој да биде ваш потрошувач не треба да заборавите дека постојано ќе имате потреба од потрошувачите и тоа нека ви биде првата мисла кога ќе влезете во вашата канцеларија на работа.

2. Кој е вашиот идеален потрошувач?

Одговорот на ова прашање ќе претставува основа за понатамошниот дизајн на вашиот бизнис модел. Целта е на ваквиот начин да навлезете подлабоко во суштината на вашиот бизнис, а не само површински да ги гледате работите.

Кога станува збор за бизнис модел и површинско гледање на работите честопати забележувам дека повеќе претприемачи се насочуваат на површината а не на суштината на моделот. На пример, таквите претприемачи ја гледаат технологијата наместо процесот, технологијата наместо системот, продажба наместо процес на продажба… За да не ја правите таквата грешка одговорете на оваа прашање колку што можете подетално.

Еве неколку прашања како пример кои можат да ве водат низ процесот, но запомнете дека не сте ограничени само на нив.

  • Какви проблеми има мојот идеален потрошувач?
  • Колкав приход има мојот идеален потрошувач?
  • Каде се движи и кои се навиките на мојот идеален потрошувач?
  • Дали е маж или жена?
  • Која е возраста на мојот идеален потрошувач?
  • Од каде е мојот идеален потрошувач?
  • Какви коли возат моите идеални потрошувачи?
  • Со кого живеат моите идеални потрошувачи?
  • Што сакаат да читаат, да гледаат, да јадат…?

3. Кој не е ваш идеален потрошувач?

Кога веќе ќе знаете кој е вашиот идеален потрошувач, лесно ќе можете да кажете кој не е ваш идеален потрошувач. Целта на одговор на ова прашање е за да го намалите вашиот фокус на тој сегмент на пазарот за да едноставно не губите ниту време ниту пари. Се што е спротивно на вашиот идеален потрошувач кој го дефиниравте претходно спаѓа во оваа група.

Бидејќи светот не е само во црна и бела комбинација ќе има уште една група која ќе се наоѓа помеѓу двете. Ова се потрошувачи кои во секој случај ќе треба да се обидете да ги имате, но сепак главниот фокус треба да биде ставен на оние идеалните, нормално ако постојат такви. Ако не постојат слободно редефинирајте го Вашиот идеален потрошувач.

post

Жени Претприемачи – Нека Ви е Честит Празникот

Овој напис го посветувам на сите претприемачи од понежниот пол како и на сите потенцијални жени претприемачи во Република Македонија. А, потенцијалот сметам дека навистина е огромен и треба да се искористи.

На претприемач предходно опфативме неколку наслови за жени претприемачи па сметам дека не е лошо да повторно ги разгледаме особено поради денешниот ден (8-ми Март):

Малку Статистика

Благодарение на податоците од Македонија во Бројки 2008 од Државен завод за статистика можеме да видиме дека не е голема разлика во бројот на населението во Република Македонија во однос на полот:

Да видиме каков е односот на активното машко и женско население во Република Македонија.

Од овие податоци забележуваме дека јазот помеѓу активното машко население и активното женско население во Република Македонија е многу поголем. Скоро 1/3 повеќе се активни мажите во однос на жените.

Овој податок ни кажува дека сеуште во Македонија жената се гледа како некој кој треба да биде дома да одгледува деца, да се грижи за куќата…

Да го споредиме вкупниот број на население по полот во однос на вработени од истиот извор на податоци како и горните статистики.

Ова е доста интересен податок. Во 1997 година јазот помеѓу вработени мажи и жени бил 144.508,00 повеќе вработени мажи додека во 2007 година тој јаз е намален и изнесува 127.436,00. Ова значи дека нешто се прави на оваа поле и резултатот таков каков што е. Но, сепак сеуште разликата е огрoмна доколку споредуваме со бројот на населението поделено помеѓу мажи и жени при што изнесува околу 50% (фифти-фифти).

Што понатаму!

Едноставно забележуваме дека улогата на жените во бизнисот станува се поизразена, но мораме да признаеме дека сеуште не е на она ниво на кое треба да биде. Треба да се продолжи со позасилено темпо за да се постигнат позначителни резултати како овој јаз наведен во претходниот наслов би се елиминирал или барем драстично намалил.

И за крај повторно:

Нека Ви е честит Денот на Жената – 8-ми Март и секако имајте голем успех во се што ќе се нафатите да работите!

post

5-ти Слој за Успех на Еден Претприемач

Ќе продолжам со серијалот слоеви кои го формираат успехот на еден претприемач, а тоа е тимска работа, вкалкулиран ризик, самодоверба и искуство. Оваа е петиот слој од шесте можни слоеви кои ги дефиниравме.

Претходно ги поминавме следниве слоеви:

  1. Спремност да се преземе акција како најважен,
  2. Знаење и креативност како втор по важност
  3. Вештини и интелигенција како трет по важност и
  4. Истрајност и упорност како четврти по важност.

Овој слој е малку поинаков од претходните и е составен од повеќе елементи како што можете да забележите. Ќе започнам со секој елемент.

1. Тимска работа

Денеска скоро и да не може да се замилси завршување на било што, особено некоја бизнис активност без да се потпреме на тимската работа. Времето на поединците помина, сега е времето на тимови.

Тимската работа е нешто што во секој случај ќе помогне да се дополнат сите претходни слоеви за успех на еден претприемач. На пример доколку тимски се одлучи дека некоја акција треба да се превземе тогаш претприемачот секако дека ќе ја превземе таа акција. Проблемот со тимот е додека да се одлучи, но кога веќе ќе се одлучи претприемачот веќе го има првиот слој – да преземе акција за таа одлука.

Креативноста при работа во тимови е доста на повисоко ниво, додека знаењето кое недостасува кај еден член може да се надополни со знаењето на другиот член. Вештина интелигенција доколку недостасува кај некој член ќе се надополни со останатите. Никој не е супермен и сите имаме свои мани и предности, но тимот претставува еден збир на се што е предност кај поединците, притоа заради притисокот од тимот се елиминараат маните.

2. Вкалкулиран ризик

Спремен сум да превземам ризик но до тука. Тоа е всушност вкалкулиран ризик. Тоа е ризик кој може да се поднесе и доколку тој ризик се претвори во непријатност за претприемачот и бизнисот.

Постојат различни методи за квантификација на ризикот кои се користат за да на некој начин ризикот се изрази во некоја мерлива единица врз основа на која еден претприемач ќе знае до каде може да оди. Следниве активности се користат кога станува збор за ризик:

  • Дефинирање на ризични подрчја. На пример, финансии, производство, маркетинг…
  • Дефинирање на ризични профили. На пример, губење на пари во ризичното подрачје финансии.
  • Дефинирање на ризични индикатори. На пример, што се ќе доведе за да се случи ризичниот профил губење на пари во ризичното подрачје финансии.
  • Која е веројатноста да се случат тие ризични индикатори. Веројатноста претставува број на појавување на ризичниот индикатор во вкупен број на настани.

Ова би биле едни од основните активности кои може да се применат за проценка на ризикот и определување на што е тоа вкалкулиран ризик. Подетално за анализа и проценка на ризикот ќе опфатам во некој од наредните написи.

3. Самодоверба

Сметам дека секој претприемач има самодоверба како една особина, бидејќи луѓе без самодоверба не ни започнуваат бизнис. Од друга страна самодовербата иако е во петиот слој сепак претставува едно надополнување на првиот (најважниот) слој превземање на акција.

Самодоверба едноставно претставува верување во себе и она што една личност го прави. Честопати немање на самодоверба претставува и многу критичен елемент не само во бизнисот туку и во личниот живот. Ако некој нема самодоверба лесно може да се примети од непријателот (конкуренцијата во наш случај) и едноставно може да се случи да биде згазен.

Од друга страна самодовербата се стекнува со знаење, вештини, креативност, интелигенција и секако четвртиот елемент од овој слој искуството. На пример колку поголемо знаење имаме од една проблематика току ќе имаме и поголема самодоверба во активностите кои ги спроведуваме од таа проблематика. Истото е и со останатите карактеристики кои ги набројав.

4. Искуство

Иако последно во овој петти слој сепак не можам да кажам и дека претставува најмалку важен елемент или карактеристика. Искуството не може да се избрза и не се стекнува со притискање. За искуство сепак е потребно време кое треба да помине. На пример, знаењето ќе го зголемиме преку читање, учење, посетување курсеви… Додека искуството можеме само да чекаме самото да си дојде. На пример, денеска сум поискусен за уште еден ден.

Но, и за искуството да биде една практика потребно е согледување на работите за да тоа искуство на некој начин се влее во нашиот мозок и не излезе подолг период. Така да некои претприемачи едноставно водат дневник за поважните случки во денот или пак неделата, со што создаваат една база на податоци за акумулирано искуство во тој временски период. Оваа база на податоци постојано се надополнува. Навистина интересен начин да не се допушти искуството да избега.

post

10 Начини да ги Задржите Најдобрите Вработени

Дали сте загубиле некој солидно вешт вработен во Вашиот бизнис? Зошто си одат, кога Вие инвестиравте толку многу пари и знаење во него? Дали е тоа заради повисока плата или заради тоа што Вашиот бизнис не ги третира на вистински начин највредните ресурси – вработени?

Вработените претставуваат срце на бизнисот. Можете да имате добри, но исто така и лоши вработени. Но, опасноста е што добрите вработени може да ве напуштат. Ова е губиток за бизнисот како целина и секако претприемачот мора да најде нови вработени што секако не е лесно тие нови да бидат квалитетни.

Employees1 Слика: FreeDigitalPhotos.net

Додека за оние лошите воопшто не ве интересира, за оние добрите и тоа како ќе бидете заинтересирани бидејќи ќе го ослабнат Вашиот бизнис во многу аспекти.

Една реалност кај малите бизниси е дека вработените порано или пак подоцна си заминуваат. Но, интересно е што вработените со слаби вештини ќе сакаат да се сокријат и останат засекогаш во бизнисот. А, од друга страна оние добрите и вештите ќе ве напуштаат. Доколку оваа реалност продолжи без да се сопре ќе продолжите да ги губите квалитетните вработени, а во исто време ќе го зголемувате бројот на не вешти вработени. Оваа состојба ќе ја намалува бизнис потенцијалната енергија складирана во вештите вработени со што ќе се намали и целокупната бизнис потенцијална енергија на Вашиот бизнис.

Зошто квалитетните вработени си одат?

Постојат повеќе причини зошто вработените го напуштаат бизнисот.

Една од најголемите причини е што тие не воспоставуваат добра бизнис и приватна релација со бизнисот, претприемачот или пак менаџерот.

Друга причина е што тие не се задоволни со платата која што ја добиваат за работата која ја сработуваат.

Како причина може да биде и самата работна околина во која што работат и која што не ја поднесуваат.

Ако продолжиме понатаму ќе видиме дека постојат премногу причини.

Вие како еден претприемач мора навремено да реагирате и да го спречите заминувањето на вештите и квалитетните вработени во Вашиот бизнис.Ова е една од најважните работи на претприемачите и на менаџерите.

10 Начини да ги задржите наjдобрите!

  1. Кога избирате вработени за Вашиот бизнис, размислете два пати пред да одлучите.
  2. На квалитетните понудете им повеќе пари, а на неквалитетните намалете им ја платата. Да бидеме реални, парите се најголемиот мотивациски фактор за секој вработен. Зошто лошите и добрите момци да бидат на исто ниво. Не е фер!
  3. Бидете лојални кон нив во добрите денови и тие ќе бидат лојални кон вас и Вашиот бизнис во лошите денови.
  4. Помогнете им да ја завршат работата на правиот начин од прв пат.
  5. Обидете се со ветување дека ќе ги платите повеќе кога Вашиот бизнис ќе излезе од „лошите“ денови.
  6. Бидете искрен со нив.
  7. Наградувајте за квалитетно завршената работа иако наградата може да биде само некој добар и пофален збор. Развијте план за бонуси бидејќи секој сака бонуси. Користете ги бонусите како вид на награда за најдобрите вработени.
  8. Дајте им слободни денови кога бараат и прашајте за дополнителна работа кога на Вас ви се потребни.
  9. Размислувајте за работни места со работникот во умот. Работните места за кои вработените немаат познавање или пак здодевни работни места можат да предизвикаат отпор кај вработениот. Распределувајте вработени на работни места за кои тие имаат знаење, а од друга страна обидете се да ги дизајнирате работните места така што воопшто да не бидат здодевни.
  10. Нагласувјте ја тимската работа. Понекогаш односите помеѓу членовите на тимот се помоќни отколку другите односи во бизнисот. Тимско размислување може да има големо влијание на членовите на тимот.

Зошто е важно спречување на заминување на најдобрите?

Прво, Вашите вработени се најважниот дел од Вашиот бизнис. Тие се пред Вашиот производ или услуга, пред технологијата, пред се друго во бизнисот. Без нив ништо нема да биде реалност. Без вработени, ќе немате производи или услуги, нема да можете да ја користите технологијата и нема да можете да ги изведете бизнис активностите.

Од друга страна во секој вешт вработен вие имате инвестирано време и ресурси и кога тие си заминуваaт порано отколку што сте успеале да си ја повратите инвестицијата ќе мора да го започнете повтoрно целиот процес. На ваков начин губите време и секако пари кои ги инвестирате во вработените. Вашето време и пари претставуваат бизнис елементи кои имаат складирано голема бизнис потенцијална енергија.

post

Методи за истражување на пазарот

Истражување на пазарот претставува една од поважните активности на претприемачот во водење на бизнисот. Но, секое истражување на пазарот користи одредени методи на истражување, што всушност претставува начин на прибирање на информации или податоци.

Методи за истражување на пазарот

Се чини дека 80% од едно истражување на пазарот претставува прибирање на валидни информации за пазарот. Додека 20% се однесуваат на самата анализа и интерпретација на тие соберени информации. Ова е 80/20 правило. Бидејќи пазарот е сочинет од потрошувачите и конкуренцијата затоа и потребните информации ќе се однесуваат за нив.

Едно нешто сакам да напоменам пред да започнам со 6-те најкористени методи кои можете да ги користите за истражување на пазарот. Најважен извор на информации претставуваат потрошувачите. Зошто? Затоа што методите наведени подолу нема да ги користите со конкурентите, туку едноставно преку потрошувачите ќе се обидете да ги најдете информациите за конкурентите кои ќе ви помогнат за спроведување на истражување на пазарот.

Потребно е и да внимавате да не се преоптеретите со информации па да го усложните истражувањето.

6 Методи за истражување на пазарот

1. Анкети

Една од најкористените методи за истражување на пазарот и едно најсилните оружја што ги има еден претприемач претставуваат анкетите. Анкетите се најкористени бидејќи најлесно се спроведуваат и наједноставно се прибираат информациите кои сепак пристигаат во една форма која е лесна за анализа. Секако доколку се дизајнираат на вистинскиот начин. Анкетите можат да бидат во следен вид:

  • Анкети во хартиена форма
  • Телефонски анкети
  • Анкети по пошта
  • Онлајн анкети

Процесот на спроведување на анкетата може да се одвива на следниот начин:

  • Подготовка на прашањата во анкетата
  • Избор на начин на распространување на анкетата
  • Распространување на анкетата
  • Прибирање и анализа на податоците.

2. Интревју

Вториот метод кој на еден претприемач му стои на располагање претставува интервју. Ова едноставно значи состанување со избраните луѓе кои ќе ги интервјуирате и поставување н прашања кои ќе бидат од Ваш интерес за истражување на пазарот. Интервјуте е потешко во однос на анкетите и секако ќе бара повеќе време за спроведување. Како недостаток исто така може да се смета и ограничен број на луѓе кои може да интервјуираат. Интервјуата врз основа на тоа како ќе ги спроведувате може да бидат:

  • Лице во лице интервју
  • Телефонско интервју
  • Онлајн интервју (Skype)

Процесот на спроведување на интервјуирање може да се одвива на следниот начин:

  • Избор на група на луѓе кои ќе ги интервјуирате
  • Контактирање на тие луѓе и закажување на интервјуто
  • Подготовка на прашања
  • Спроведување на интервјуто
  • Анализа на собраните информации.

3. Набљудување

Добрата стара и сеуште применлива и ефикасна техника за спроведување на истражување на пазарот претставува набљудување. Ова значи дека претприемачот ќе набљудува одредена состојба и ќе ги бележи тековите на активности и однесувањата на актерите во таа состојба. На пример, еден начин на оваа истражување на пазарот за еден малопродажен бизнис е да го набљудува малопродажниот бизнис на конкуренцијата. Па во таков случај ќе бележи колку луѓе влегуваат, колку од нив купуваат, кој е профилот на тие луѓе итн.

Процесот на спроведување на набљудување може да се одвива на следниот начин:

  • Избор на предмет на набљудување
  • Избор на активности и однесувања кои ќе се набљудуваат
  • Спроведување на набљудувањето
  • Обработка и анализа на прибраните информации.

4. Проба и грешки

Оваа е една метода која не се применува многу, а сепак може да ни даде корисна информација. Оваа метода може да се спроведе и на случајна основа на пример ќе спроведеме нешто ново и едноставно гледаме какви резултати постигнуваме со тоа ново. Ако е ОК, тогаш го оставаме да функционира, а ако не е ОК го подобруваме тоа ново. На ваков начин можеме во голема мерка да извлечеме информации за пазарот. Ќе знаеме што сака пазарот, што не сака, како се однесува, како да влијаеме на него итн.

Сепак некои грешки кои може да бидат кобни за бизнисот треба да се избегнат особено овие 12 грешки при започнување на бизнисот.

5. Фокусни групи

Фокусна група како една од методи за истражување на пазарот претставува доста специфична метода и можеби една под поскапи методи бидејќи е потребна и техника за снимање и посебна просторија за спроведување на сесијата на фокусна група. Всушност ова метода за истражување на пазарот се базира на тоа да модерторот на групата користи специјално подготвени прашања кои имаат за цел да поттикнат дискусија во самата група. Вообичаено една сесија на фокусна група трае до два до три часа и потребно е да се спроведат неколку сесии по можност со различни членови за да се добијат поквалитетни резултати.

Процесот на спроведување на оваа метода може да се одвива на следниот начин:

  • Избор на членови на фокусна група
  • Подготовка на прашања
  • Спроведување на сесии и снимање на дискусии
  • Анализа на прибраните информации

6. Вработени

И секако иако последни во оваа листа, но не и помалку важни од останатите претставуваат вработените, особено продажниот тим на Вашиот бизнис. Тие се оние кои се во секојдневен контакт со потрошувачите и тие се оние кои секојдневно комуницираат со нив. Неколку прашања на кои тие можат да добијат одговор навистина ќе ви донесат квалитетни информации од пазарот.

Една општа анализа на пазарот минатата година спроведовме и ја објавивме на претприемач. Може да ја прочитате во серијалот од 5 дела за општа анализа на пазарот.

post

Важноста на брзи одлуки

Во претходниот напис навлегов во еден различен пристап на претприемач визнионер и претприемач опортунист (кој постојано бара можности, но никогаш не ги наоѓа).

Зошто опортунистот не ги наоѓа, или подобро кажано претвора најдените можности во квалитетен бизнис?

Затоа што постојано е зафатен со барање на нови можности и кога ќе најде некоја можност не носи одлука за искористување на истата.

Донесување на брзи одлуки

Зошто се потребни брзи одлуки?

Не можеме да донесуваме одлука и тој процес да трае вечно. Претприемничкиот живот и водење на успешен бизнис бара брзи одлуки бидејќи наместо Вас во секој момент слична таква одлука може да донесе конкуренцијата.

Како најважни причини зошто треба брзо да одлучувате би ги издвоил следниве:

1. Брзо искористување на пронајдени можности

Вие ќе откриете некоја можност, но таа можност нема да има вредност за Вас и за вашиот бизнис доколку не ја искористите. Затоа ќе треба брзо да одлучите како да ја искористите таа можност и кои активности кој ќе треба да ги спроведе за искористување на таа можност.

2. Брз одговор на барања и потреби на потрошувачите

Вие како претприемач и Вашиот бизнис постоите за да ги задоволите барањата и потребите на Вашите потрошувачи. Доколку откриете кои се промените на нивните барања и потреби не можете вечно да одлучувате за тоа како да ги задоволите бидејќи место Вас конкуренцијата ќе го направи тоа. Затоа е потребна брза одлука.

3. Брз одговор на активностите на конкуренцијата

Како што Вие постојано спроведувате бизнис активности, така и Вашата конкуренција не мирува туку спроведува одредени бизнис активности врз основа на кои се борите на пазарот за привлекување на потрошувачите. Секој нивен чекор ќе бара Ваш контра чекор. Затоа треба брзо да одлучите за тоа кои ќе бидат Вашите контра активности и како ќе ги примените.

Брзина наспроти квалитет

Многу често се поставува оваа прашање. Како влијае брзината на одлучување врз квалитетот на одлуката?

Квалитетот на одлуката секако дека зависи од брзината на донесување на таа одлука. Така да слободно можеме да кажеме дек квалитетот на одлуката е функција од брзината на одлучување.

Квалитетна одлука = f(брзина на одлучување) каде поголема брзина значи помал квалитет и обратно

Ова е логично, но не и единствено. Едно нешто е сигурно, зад секоја добра и квалитетна одлука стојат информациите кои ги имаме и врз кои ја донесуваме одлуката. А одлуката ја донесуваме ние претприемачи и самата брзина зависи од нас. Колку повеќе информации имаме толку потешко ќе имаме брза одлука. Затоа брзината на одлучување претставува функција од информациите и претприемачот. Така да горното равенство ќе биде:

Квалитетна одлука = f(информации, претприемач)

Ќе се обидам накратко да влезам во оваа тајна на информации и претприемач како основа за брзината на одлучување.

Колку повеќе информации имаме ќе биде потешко донесувањето на одлуката од страна на претприемачот, односно ќе биде потребно повеќе време. Понекогаш никогаш нема да имаме доволно информации за донесување на одлука, па брзината на одлучување може да оди временски до бесконечност, односно воопшто да не донесеме одлука, што во овој случај не е добро. Ова е поради фактот што постојано времето ќе го трошиме на собирање на информации. Од друга страна информациите треба да се обработат за да бидат во форма преку која лесно и брзо ќе воочиме некои трендови и некои скриени трендови кои ќе бидат корисни за одлуката на претприемачот. Значи за квалитетни одлуки треба да имаме оптимална количина на информации во форма која дава можност за одредени проценки од страна на претприемачот. Така да нашата формула од погоре сега би изгледала вака:

Квалитетна одлука = f(f(оптимална количина на информации, форма), претприемач)

За да претприемачот успее да извлече квалитетни заклучоци од информациите претставени во соодветна форма ќе треба да има одредени способности за препознавање на трендови и од некомплетни информации. Велам некомплетни информации бидејќи нашата цел е да донесеме квалитетна одлука и тоа брзо. Затоа е потребна способноста за аналитичност. Така да квалитетна одлука за краток временски интервал ќе биде претставена со следнава формула:

Квалитетна одлука = f(f(оптимална количина на информации, форма), аналитичност на претприемачот)

Аналитичност како основа за брзи одлуки

Како што можете да забележите аналитичноста претставува способност на претприемачот врз основа на некомплетни информации да извлече заклучок за да донесе квалитетна одлука. Се смета дека оние успешните претприемачи донесуваат брза одлука а нивната сопствена сигурност за исправноста на одлуката која ја носат е 70%.

Карактеристиката на аналитичните луѓе е да имаат мозок кој брзо размислува и да гледаат во група на информации и податоци во која ќе забележат нешто што просечниот човек не може да го забележи. Знаењето е еден предуслов со кој еден претприемач може да биде аналитичен.

post

Претприемач визионер наспроти опортунист

Постојат претприемачи кои се визионери, но постојат и претприемачи кои се опортунисти. Кои би биле поуспешни?

Многу различни мислења постојат за тоа дали еден претприемач треба да биде опортунист или не. Секако како една од особините му е и барае на различни можности, но не заборавајте дека тие можности треба да се искористат. Зошто ќе бараме можност ако не ја искористиме.

Затоа во овој напис би сакал накратко да направам една разлика помеѓу претприемач кој е опортунист и визионер.

Претприемач визионер или опортунист

Биди претприемач визионер со што ќе ја избереш и искористш вистинската можност!

Претприемач опортунист

Што претставува да еден претприемач опортунист? Би сакал на почетокот од овој напис да започнам со дефинирање или профилирање на еден претприемач кој е опортунист.

Да видиме првин што претставува опортунизам. Во Wikipedia за опортунизам пишува:

Опортунизам е свесна политика и практика на добивање на себична предност во одредени околности без никаква почит за приниципи.

Уште подобра дефиниција е дадена во Oxford Dictionary каде е наведено дека:

Опортунизам претставува практика на барање и користење на можности за постигнување на предност само за себеси, без да се размислува дали тоа е фер или пак исправно.

Согласно овие две дефиниции можеме да заклучиме дека:

Претприемач опортунист е човек кој бара можности и ги искористува себично без фер или пак исправно однесување.

На прв поглед и се чини дека за еден претприемач ова е добро бидејќи тој е човек кој има бизнис, кој пак егзистира на пазар на кој пак постои борба каде многу етика и морал во таа борба не се користи.

Претприемач опортунист бара можности каде никој не се наоѓа и воопшто не размислуваат дали тоа што ќе го прават е правилно или пак исправно. Воопшто не размислуваат дали ќе биде навистина успешно.

Единствена причина зошто претприемачите опортунисти ја бараат таа можност претставува подобрување само на нивните сопствени животи.

Претприемач визионер

Да видиме што претставува визионер? Како прво визионер е лице кое има визија, односно моќ за поглед во нешто што ќе се случува во иднината. Како второ визионер ги гледа можностите, но не со правење на нешто поразлично од сите останати туку правејќи го баш тоа истото. Но, разликата е што тоа го прават на различен начин од сите останати.

Претприемачи визионери се луѓе кои следат се што се случува околу нив и едноставно ги забележуваат жешките можности и влетуваат во тие можности во кои сите влетуваат само се што прават го прават на подобар начин од останатите.

Визионерите не започнуваат бизнис во можноста што ја препознаваат само за да го направат сопствениот живот подобар, иако сигурно е дека ќе го направат бидејќи ќе го подобрат и олеснат животот на нивните потенцијални потрошувачи.

Разлика помеѓу претприемач опортунист и визионер

  • Опортунист е гол барач на можности, визионер е вистински препознавач на можноста. Затоа и опортунистот често завршува со вечно барање на можноста која никогаш нема да ја најде, додека претприемачот визионер многу бргу ја наоѓа и искористува таа можност.
  • Опортунист претприемач е себичен и во таа можност бара само сопствен успех, додека претприемачот визионер можноста ја разгледува низ призмата на потенцијалниот потрошувач, односно како подобрување на животот на тој потенцијален потрошувач. И секако, со подобрување на животот на тој потенцијален потрошувач ќе го подобри и сопствениот живот.

Затоа едноставно следете што се случва во Вашата околина. Најдете можност во која сите се вклучуваат, но погледнете низ призмата на потенцијалниот потрошувач и неговиот проблем. Решете го тој проблем, поквалитетно, побрзо и подобро од останатите. И успехот ќе биде загарантиран.

post

Застареност или актуелност?

Денес еден бизнис и еден претприемач не може да се замисли без информации. Основа за донесување на квалитетни одлуки претставуваат информации. Но, сепак не било какви информации, туку квалитетни информации. А, ако информациите се важни за еден претприемач, тогаш и изворот на информации ќе биде исто така важен.

Застареност или актуелност на информации

Кога станува збор за информации пред една година вршев едно истражување во 30-тина македонски мали и средни бизниси во однос на деловно разузнавање. Резултатите од тоа истражување се објавени во неколку домашни и странски научни списанија. Основа на деловно разузнавање претставуваат информации.

Од друга страна работев едно 3 години во Царинска Управа, во одделението за разузнавање, каде информациите беа посензитивни во секој случај. Но, таму научив многу работи преку тоа што се обидував да го олеснам и автоматизирам процесот на прибирање и обработка на информациите.

Едно нешто е важно и треба да го запомни секој претприемач дека информациите претставуваат еден од највредните ресурси на секој бизнис.

Извори на бизнис информации

Прво и основно за некоја информација да се класифицира како квалитетна или пак важна е да се процени изворот на информацијата. Постојат повеќе методи на проценка на изворот на информациите кои се користат од страна на разузнавачките кои јас тука не би ги изложувал. Тоа се систематизирани процеси кои по завршување даваат една оценка, која кога ќе ја погледнеш ти кажува дали информацијата да ја земеш за озбилно или не.

Два вида на извори на бизнис информации

Информации за бизнисот може да дојдат од два извори:

  • Внатрешен извор. Сопствени бази на податоци или пак записи, билтени или пак извештаи во самиот бизнис.
  • Надворешен извор. Едноставно од секаде.

Посебно ми е интересен надворешниот извор на информации за бизнисот. Во она истражување што го напоменав на почетокот добив резултати дека информациите од внатрешните извори се обработуваат некако во вид на Excel извештаи или табели и графици. Но, она што е загрижувачко за мене е дека концептот на еден систем за прибирање на информации од надворешноста на бизнисот воопшто не е воспоставен или пак не се знае како да се воспостави или зошто би користеле тие информации.

Ќе земам еден пример. Вие сте претприемач и се наоѓате пред одлука за проширување на Вашиот бизнис во друг регион во Вашата земја. За да донесете квалитетна и вистинска одлука ќе ви треба информации за:

  • Потрошувачи. Какви се нивните навики, однесувања, приходи, желби, проблеми итн.?
  • Конкуренти. Што нудат конкурентите? Како продаваат? Кои им се идните планови?
  • Потребна инвестиција. Колку ќе треба да инвестирате?
  • Повраток на инвестиција. Како ќе ја повратите и кога ќе ја повратите инвестицијата?

За да одговорите на овие прашања ќе ви требаат информации.

Да земам друг пример. Вие како претприемач треба постојано да го проширувате Вашето знаење. Знаењето се проширува со примање на информации преку:

  • Читање на книги,
  • Читање на весници и списанија,
  • Читање на веб страни на интернетот итн.

Што има предност: староста или актуелноста на информацијата?

Конечно стигнав до она што ми е целта со овој напис. Често пати од прва отфрламе прием на одредени информации во нашиот мозок и тоа најчесто заради староста на информацијата.

На пример, одбиваме да прочитаме некоја книга само заради тоа што е постара. Иако сме свесни дека не сме го собрале целото знаење (и да сакаме не можеме) и дека можеби ќе има квалитетни информации за нас. Дали треба да ја отфрлам книгата од Peter Drucker која е стара пред 15 години само заради староста? Секако дека не. Од таа книга можам да научам многу работи за бизнисот од единствениот гуру над сите гуруа за бизнис светот. Ако, погледнам и во новите книги, скоро во сите ќе прочитам повикување на некои негови дела. Дали треба да јa отфрлам книгата на Abraham Maslow само заради тоа што е стара иако во не тој зборува за хиерархија на човечки потреби кои се актуелни и ден денес.

Староста на информација е едноставно времето кога е произведена таа информација. Актуелноста на информацијата е едноставно примената на истата во денешни услови.И двата критериума за информацијата се важни во различни прилики на донесување на одлука.

Кога сум кај книгите би тргнал со уште еден пример. Имам едно 50-тина книги во мојата приватна библиотека од скоро 400 книги за математика. Најстарата книга ми е од 1903 година – Учебник по математика за второ или трето одделение. Она во што се изненадив е актуелноста на истата и во денешни услови. И во таа книга и во некоја понова книга пишува дека 2 + 2 = 4. Само што во таа книга се користат грошови за објаснување а во поновите јаболка и круши.

Доколку ги користите и двата критериума за селекција на информации кои ќе ги примите и го примените прво критериумот старост, нека следи веднаш прашањето: Дали е актуелно?

Актуелноста треба секогаш да има предност пред староста.

Еве уште примери:

  • Како претприемач Вие треба да донесете одлука за нов производ. Имате база на податоци со одговори на прашалници за таков производ од претходните 10 години. Вие не треба да ги отфрлите постарите информации, бидејќи со нив ќе можете да видите еден тренд или образец на однесување на потенцијалните купувачи на еден таков производ.
  • Како претприемач Вие треба да донесете одлука дали да го ширите сопствениот бизнис во Москва. Читате информација дека Хитлер во 1940-тите години ја нападнал Русија и стигнал скоро до Москва. Дали оваа информација е стара? Да. Дали е актуелна? Не. Во ваков случај ја игнорирајте ја  информацијата бидејќи не е важна за она што се случува денес.

Уште еднаш: Секогаш првин проверете дали информацијата е актуелна, односно дали е вредна во денешни услови пред да ја отфрлите заради застареноста.

post

Истрајност и Упорност – Четврти Слој за Успех на Еден Претприемач

Истрајност и упорност претставуваат четврти слој за успех на еден претприемач како што дојдовме по спроведената анализа во написот Успешен претприемач – Одлучувачки фактори – реалност.

Истрајност и упорност - Успешен претприемач

Пред да започнам со овој четврти слој кој се однесува на истрајноста и упорноста би ги сублимирал накратко претходните слоеви за успех на еден претприемач.

Еден претприемач презема акција која претставува прв слој на успех. Има знаење и креативен е во процесот на спроведување на тие акции што претставува втор слој за успех на еден претприемач. Тоа знаење и креативност лесно го трансформира во зголемување на сопствени вештини и интелигенција кои му помагаат да ја избере вистинската акција која ќе ја спроведе. Кога веќе ги има овие елементи мора да биде истраен и упорен во спроведување на акциите кои всушност претставуваат одлуки кои ги носи во врска со бизнисот.

Што е истрајност?

Истрајноста едноставно претставува Ваша активност која продолжува да се спроведува и покрај потешкотиите и неколкуте неуспеси со таа активност. Може да се каже дека истрајноста е едноставно одбивање да се откажете од нешто.

Можете да забележите дека истрајноста е поврзана со тешки услови, притисоци и претходни неуспеси.

Еве еден пример за истрајност како особина на еден претприемач. Претприемачот започнува бизнис – преземал акција. Има знаење за бизнисот што го започнува, има и креативност. Вешт е и интелигентен. Но, веќе по првите неколку месеци се соочува со премногу проблеми:

  • Слаба продажба како резултат на малку купувачи.
  • Недостаток на финансии бидејќи сите ги вложил во започнување а приходите сеуште се мали.
  • Голем притисок од конкурентите бидејќи сеуште е нов на пазарот.
  • Нема препознатлив бренд бидејќи сеуште бизнисот е нов.

Доколку еден претприемач кој започнал бизнис, се откаже во оваа фаза тој ќе ја нема особината на истрајност и не може да се каже дека е претприемач. Но, доколку со помош на неговото знаење, креативност, вештини и интелигенција успее да донесе правилни одлуки со кои ќе ги решава новонастанатите проблеми тој претприемач ќе истрае во сопствените намери да изгради успешен бизнис.

Што е упорност?

Упорноста едноставно претставува Ваша активност која продолжува да се спроведува за исполнување на одредени воспоставени цели.

Некои претприемачи нема да издржат да стигнат до целта единствено заради тоа што не се упорни. Честопати знаеме да кажеме кога ќе завршиме некоја работа (спроведеме некоја акција) со која стигнуваме до нашата цел дека упорноста се исплати. Секако дека се исплати, бидејќи доколку се откажеме пред целта нема воопшто да стигнеме до таа цел.

Да земеме за пример еден маратонец. Тој трча и сеуште не е заморен, нема надворешни притисоци, но во неговиот мозок поминува мисла дека треба да истрча уште неколку километри за да стигне до целта. И едноставно, таа мисла го тера да се откаже со тоа што си вели дека растојанието е многу големо.

Која е разликата?

Двата термини се многу слични. Единствената разлика е што кај истрајноста се наоѓаат и надворешни фактори како потешкотии или пак притисоци врз претприемачот. Кај упорноста такви фактори не постојат, туку само претприемачот и неговиот мозок, односно неговото размислување за она што е исплатливо, а што не е.

За илустрација ќе го земам примерот со маратонецот.

Еден маратонец на половина пат веќе е исцрпен, повреден од падот и не се чувствува најдобро. Но, сепак го продолжува маратонот. Иако не прв, стигнува на целта. Тој маратонец е истраен.

Вториот маратонец се наоѓа на половина пат и му поминува мислата дека има уште толку да истрча, но сепак продолжува и стигнува на целта. Тој маратонец е упорен.

Претприемач кој е истраен и упорен во исто време

На претприемачот му се потребни и двете особини за да биде успешен претприемач. Секогаш ќе има потреба од истрајност, бидејќи во бизнисот ништо не е лесно. Секогаш ќе има различни притисоци во форма на финансиски притисоци, вработени, потрошувачи, отпорност кон промени итн. Доколку не е истраен никогаш нема да стигне до целта.

Од друга страна некогаш и без притисоци спроведување на одредени активности бара време за спроведување и бара време за чуврствување на пволностите од резултатите од тоа спроведување. На пример, во написот за систематизација на бизнисот пишував дека тоа е еден процес кој е потребен на бизнисот и на претприемачот. Од друга страна за спроведување на еден таков процес ќе бидат потребни неколку недели, резутатите ќе се покажат дури по неколку месеци. Затоа мора да има трпение и секако упорност за да се стигне до посакуваните резултати.

post

Дали во Македонија се Краде Веб Содржина?

За ова размислувам веќе два дена откако ми јавија дека содржините на претприемач се објавуваат и на друго место. Добив едно такво известување бидејќи човекот кој ме извести сакаше да ме праша дали може да објавува написи од претприемач. Мојот одговор беше како и секогаш кога некој ме контактира во таа цел следниот:

Можете дури и без да ме прашате следејќи ги правилата на лиценцата под под Creative Commons 2.5 Macedonia License под која се лиценцирани написите на претприемач.

Во таа лиценца стои дека:

Можете:
  • да споделите – да умножувате, дистрибуирате, јавно да го прикажувате или јавно дигитално да го прикажувате делото
Под следните услови:
  • Наведи извор — Морате да го наведете изворот на ист начин како што тоа го направил авторот или давателот на лиценцата (но не на начин кој би сугерирал дека тие ве поддржуваат вас или вашето дело).
  • Некомерцијално — Не смеете да го користите ова дело за комерцијални цели.
  • Без адаптирани дела. — Не смеете да го промените, трансформирате или да го адаптирате ова дело.

Значи постојат 3 услови: да се наведе изворот од каде е преземен написот, да не се користи во комерцијални цели (да не се продава за пари или пак да не се објави на комерцијални веб страни) и да не се менува туку да се објави во ист облик.

Нормално, потоа ја проверив содржината на таа веб страна и навистина увидов дека се објавуваат скоро секојдневно по еден напис од претприемач и други написи кои сум ги прочитал некаде а знам дека не на таа веб страна. Веб страната која краде содржина е:

http://biznisidea.wordpress.com (линк не заслужува).

Потоа следуваше контакт до администраторот бидејќи на информации има оставено меил: biznisidea@yahoo.com. Еве го мојот mail до администраторот:

Почитувани …

Ми јавија дека користите написи од претприемач на Вашиот блог. Не е забрането реобјавување на написите на претприемач но е ограничено со одредени услуви што можете да го прочитате најдолу во футерот на веб страната – Написите на Претприемач се лиценцирани под Creative Commons 2.5 Macedonia License. Доколку отидете до таа лиценца ќе видите дека тоа е Attribution лиценца и дека за реобјавување е потребно да се наведе извор од каде ви е текстот. Сите текстови на претприемач се лиценцирани како моја интелектуална сопственост. Така да би ви предложил на сите текстови кои ги користите да ставите напомена дека се преземени од претприемач со линк до веб страната (http://www.pretpriemac.com)

Ова би ве советувал и за сите останати содржини кои не се ваша лична креација туку се превземени од постоечки веб страни за да немате проблем во однос на правни последици.

Ова е мој добронамерен совет.

Со почит,

М-р Драган Шутевски

Но, одговор сеуште немам. Кога во понеделник ја посетив страната увидов дека не само што немам одговор туку и дека „лоповот“ си продолжува со „лоповлукот“. Повторно еден од трите новобјавени блог написи е и еден мој со тоа што го сменил само насловот наместо 5 Бизнис елементи кои еден претприемач може да ги подобри уште денес ставил Совети за успешен бизнис.

Она што е трагично администраторот дури не се ни потрудил да ги исправи моите правописни грешки (продобрување) за што сведочат двете слики подолу:

Оригинал:

Плагијат:

Денес контактирав и со WordPress.com од кои добив упатства за користење на DMCA (Digital Millenium Copyright Act Notice) со тоа што ќе треба да им пишам официјален mail со одредени податоци за крадачот и за оригиналните написи и дека тогаш тие се должни по закон да ги превземат сите мерки за да се отстрани содржината од нивниот домен. Но, им реков дека ќе оставам уште два до три дена за да ја започнам постапката, бидејќи сметам дека администраторот на таа страна ќе се освести и ќе ја исправи грешката. А грешката се исправа само со додавање на извор од каде го превзеле материјалот. А, од друга страна не сакам веднаш да го рушам имиџот на Македонија дека крадеме содржина, бидејќи и без тоа имаме уште проблеми за докажување дека сме совесни.