Бидете секогаш најиновативни! Алатки, екниги и видео презентации само за најхрабрите!

post

Аутореспондер – Маркетинг средство 69

Аутореспондер

Аутореспондер

Аутореспондер претставува 69-то маркетинг средство на претприемач. Оваа маркетинг средство е пожелно за секој бизнис кој има сопствена онлајн презентација преку веб сајт или пак блог. Аутореспондерот е тој кој ќе се грижи за e-mail маркетингот и за комуникација и испраќање на навремена информација на потенцијалните купувачи. Досега на неколку места (низ неколку постови) беше споменат аутореспондерот и секако неговото значење.

Би сакал да напоменам дека е од особена значајност да се пристапи доста внимателно при ибор на провајдерот и користењето на оваа маркетинг средство.

Што претставува аутореспондер?

Аутореспондер или во буквален превод автоматски одговарач претставува компјутерски програм кој се користи автоматски да одговара на e-mail-ови пратени на него. Големо користење наоѓа во интернет маркетингот или поточно е-маил маркетингот за праќање на меилови до потенцијални потрошувачи. Всушност функционирањето е на тој начин што еден посетител пополнува форма на Вашиот веб сајт или пак блог и влегува во системот на автоматски генерирани е-мелови по претходно определена секвенца од Ваша страна.

Во суштина аутореспондер е првата порака во таа низа на пораки, но и некои и останатите пораки ги нарекуваат исто иако повеќе се нарекуваат како follow ups – оние кои следуваат и кои се подесени во определена временска рамка.

Повеќе дефиниции за атуреспондер можете да прочитате тука.

Која е целта на аутореспондер како маркетинг срество?

Од креативноста на претприемачот и видот на бизнисот со кој оперира ќе зависи и целта на еден аутореспондер. Постојат различни начини на користење на истиот. На пример еден салон за убавина може да праќа секвенцијално информации за попусти до своите тековни потрошувачи. Може да испраќа едукативен материјал за одржување на убавината. Може да испраќа информации за нови производи и/или услуги кои ги нуди. Нема ограничувања, се е до креативноста.

Но, кога би требало да ги издвојам главните цели на еден аутореспондер како маркетинг средство би ги издвоил следниве 5:

  1. Креирање на лојалност
  2. Градење на доверба
  3. Комуникација
  4. Информирање
  5. Промовирање

Како може да се дизајнира аутореспондер?

Како што веќе потенцирав самиот дизајн на аутореспондерот ќе зависи од Вашата креативност, она што го сакаат Вашите потенцијални купувачи и секако бизнисот во кој што се наоѓате. Со одредени провајдери на вакви услуги како Aweber и Getresponse (овие два ги спомнувам бидејќи сум ги користел или уште ги користам нивните професионални услуги) имате визард кој ве води низ процесот на креирање на еден аутореспондер за Вашиот бизнис. Но сепак вие самите треба да го дизајнирате во поглед на минимум следниве елементи:

  • Што да содржи првата (аутореспондер) порака?
  • На колкав временски период да одат следните пораки?
  • Која да биде содржината на следните пораки?
  • Каква понуда ќе биде во истите?
  • …

Во моментов подготвувам редизајн на билтените на претприемач па затоа можам да го презентирам делот од првиот mind map на овој редизајн.

Дизајн на атутореспондер v.2.0 на претприемач

На оваа слика недостатсува уште еден елемент кој е наречен како разно. Ајде да ги дообјаснам овие елементи:

  • Добредојде e-mail. Ова е првиот e-mail откако некој ќе се регистрира за билтени. Во него ќе има кратко објаснување за тоа што ги очекува луѓето како и линкови за симнување на бизнис темплејти.
  • 10 видео материјали. Ова е посебна тема која ќе содржи 10 видео материјали за тоа како до веб презентација за Вашиот бизнис. Овој е-mail ќе следува еден ден по првиот е-mail.
  • 2-неделни ажурирања. Секои две недели ќе оди еден е-мail за последните 12 написи на претприемач. Целта е секој оној кој нема можност секојдневно да не следи да има можност да ги види насловите и ако нешто смета дека треба да прочита да прочита.
  • Едукативни теми. Ова е сосема нов концепт на претприемач. Наместо досегашните pdf материјали ќе има 8 едукативни теми од областа на претприемништвото и за секој месец по една. Што значи дека од овој елемент на аутореспондер во наредните 8 месеци ќе се испраќа по еден е-mail со едукативни теми преку линкови до најдобрите постови до претприемач и совети за водење на Вашиот бизнис.
  • Разно. Овој елемент нема подесена секвенца туку ќе се користи за испраќање на информации или линк до одредени анкети кои ќе ги спроведуваме. Секако и попусти на сите наши идни услуги (до крајот на годината ќе стартуваме со минимум две).

Значи ова ќе биде еден аутореспондер подесен за претприемач, Вие ќе треба да направите mind map за Вашиот.

Зошто професионален аутореспондер?

Користете професионален аутореспондер со кој ќе го подесите Вашиот е-mail маркетинг да функционира беспрекорно. Не користете бесплатни или пак скрипти кои се генерираат преку Ваш сервер за бизнис цели. Како водечки компании кои ја нудат оваа услуга а кои сум ги користел или сеуште ги користам се Aweber и Getresponse. Getresponse веќе не го користам, но не заради нивната услуга туку едноставно не успеавме да се договориме со нивниот супорт тим за да го сменат името на нашата земја.

Аутореспондерот може да биде суштинскиот елемент на Вашиот бизнис. Затоа не е потребно играње со суштинските бизнис елементи.

Еве само неколку причини зошто за бизнис цели да користите професионален аутореспондер:

  • Сигурност. Професионалните аутореспондери гарантираат сигурност дека Вашата порака ќе биде испратена онаму каде што треба да биде испратена. Тие имаат долгогодишно искуство со сите најголеми ISP за да обезбедат дека Вашата е-мail порака не е нешто што другата страна не го побарала.
  • Аналитика. Професионалните аутореспондери овозможуваат квалитетна аналитика на Вашите mail-ови во поглед на отварање, кликови, симнување… Со помош на квалитетна аналитика ќе можете да ја прилагодувате Вашата кампања.
  • Подршка. Кога станува збор за професионално не може да се заборави иподршката која се добива. Со гореспоменатите компании комуницирав неколку пати и истиот ден добивав одговор и решение на било кој мој проблем.
  • Алатки. Голем број на алатки кои овозможуват едноставна креација и на техничкиот дел од користење на аутореспондер како маркетинг средство.
  • Автоматизација. Во многу делови еден аутореспондер е автоматизиран. На пример, многу луѓе од незнаење (заборавиле дека два пати потврдиле дека сакаат да бидат дел од Вашиот аутореспондер) ја окарактеризираат Вашата е-mail порака како spam аутореспондерот автоматски ќе ги исклучи од Вашата листа така да нема да морате Вие самите да го правите тоа. Иако секој може во секој момент да направи unsubscribe сепак незнаењето е најголемата болест, затоа Вашиот провајдер ќе го реши тоа место Вас.

И за крај само уште една препорака:

Секогаш користете Double Opt-in (двојна потврда) за регистрација. Можеби е потешко, но сепак посигурно.

post

Оптимизација за потрошувачи

Оптимизација за потрошувачи

Оптимизација за потрошувачи

Секој бизнис има различни потрошувачи, односно купувачи. Не постои бизнис кај кој сите ќе бидат исти, сите ќе се однесуваат исто, сите ќе имаат исти потреби и желби…

Секој претприемач нормално е да сака да ги задоволи сите потрошувачи! Дали е тоа можно? Големите бизниси имаат ресурси ова да биде возможно? Но, што е со малите бизниси? Дали и тие имаат ресурси за такви потфати? Ресурси можеби немаат, но затоа имаат флексибилност и секако снаодливи претприемачи кои се далеку од бирократската спирала на големите компании!

Во продолжение на постот се дадени некои идеи како да се борите со овој феномен и како да успеете да задоволите повеќе различни потрошувачи со различни потреби. Ова го нареков како оптимизација за потрошувачи.

1. Сегментирај постојано

Добра сегментација на потрошувачи која постојано се следи и ажурира ќе ви даде одлична слика за разликите кај вашите потрошувачи. Тие разлики ќе бараат и различни и специфично персонализирани понуди. Прилагодете се кон нивните потреби.

2. RFM формула

RFM формула претставува акроним од почетните букви на:

  • Recency – Временска рамка на нарачки од страна на потрошувачите?
  • Frequency – Колку нарачки направиле потрошувачите?
  • Monetary Value – Колкава е паричната вредност на нивните нарачки?

Со помош на оваа алатка едноставно ќе дојдете до сознанија за тоа на кои потрошувачи да обрнете најголемо внимание и како од една група да ги префрлите во друга група, што претставува оптимизирање за потрошувачите.

3. Портфолио приод за менаџирање на потрошувачи

Портфолио приод за менаџирање на потрошувачи едноставно ги дели истите во 4 квадранти врз основа на потенцијална (идна) и сегашна вредност на еден потрошувач. Со помош на оваа алатка многу добро ќе знаете на кој квадрант најмногу да се посветите и како да реагирате и да се оптимизирате за сите квадранти.

4. Разбирање на вистинските потреби на потрошувачите

Никој не е Ваш потрошувач само заради тоа што така сака да биде. Секој има некаков проблем кој преку Вашиот бизнис се обидува да го реши. Тој проблем предизвикува одредени потреби. Една од причините зошто бизнисите пропаѓаaт е и несоодветно разбирање на потребите на потрошувачите.

Доколку доволно добро ги разберете потребите на потрошувачите Вие многу едноставно ќе можете да го оптимизирате Вашиот бизнис за тие потрошувачи.

Повеќе детали за тоа како да ги разберете потрошувачите можете да прочитате во 10 чекори за подобро разбирање на потрошувачите.

5. Едноставно прашајте што сакаат

Понекогаш наједноставно е да ги прашате Вашите потрошувачи за тоа:

  • Дали се задоволни?
  • Од што се задоволни?
  • Како да го подобрите Вашиот бизнис согласно нивните потреби?

Прашањата можат да бидат во вид на анкета, или едноставно по секоја продажба поставување на тие неколку прашања. Можете да го искористите и Вашиот бизнис блог или пак веб сајт.

6. Социјални мрежи

Многу, ако не и сите Ваши потенцијални и сегашни потрошувачи се наоѓаат на една, две или пак повеќе социјални мрежи каде споделуваат различни искуства, проблеми и секако потреби. Бидете и Вие таму присутен, следете што се случува и секако помагајте секаде каде може да помогнете.

Ова се некои алатки кои можете да ги искористите за да го оптимизирате Вашиот бизнис кон потрошувачите.

post

Постави ниски но остварливи, наместо високи неостварливи цели

Бизнис цели

Бизнис цели

Дали е сигурно дека ако поставиме високи цели и се обврземе кон нив сигурно ќе ги оствариме?

Не верувам. Обврзување кон остварување на целите е важен фактор во успешноста на еден претприемач што повеќе пати беше нагласено тука. Но, не верувам дека ако поставиме цел продажба од една милијарда евра како еден мал бизнис и се обврземе на остварување дека ќе ја оствариме. Сепак, ние се наоѓаме во една мала земја, каде многу работи многу потешко се изведуваат во споредба со некоја „понормална“ држава.

Еден планинар почетник нема да може веднаш да се искачи на Монт Еверест. Еден претприемач, сопственик на мал стартап бизнис неможе да постави цели веднаш да биде Google, барем не во Македонија. Дури и најиновативните идеи кај нас тешко поминуваат заради недостаток на една глобална рамка која ќе му помогне на еден таков претприемач да ја оствари својата висока цел.

На пример, целта да заработиме 100.000 евра е многу поостварлива отколку една милијарда во тековната година.

Од што зависат целите?

Постојат повеќе фактори и елементи во бизнис светот кои имаат влијание и ги регулираат претприемничките цели. Но, во овој дел ќе се обидам накратко да презентирам неколку.

1. Претприемач

Бидејќи целите ги поставува еден претприемач, нормално е дека ќе има влијание на истите. Од друга страна, еден претприемач како сопственик на мал бизнис е централната точка околу која се друго се одвива и нормално е да се тргне од желбите на еден претприемач кои понатаму ќе се прилагодуваат на останатите фактори за да се добијат вистински остварливи цели кои ќе обезбедат раст на бизнисот.

2. Индустријата

Освен претприемачот тука е и индустријата во која функционира еден бизнис. Не можат целите да бидат значително поголеми од просекот на индустријата во која се наоѓа еден бизнис.

3. Пазар

Секој бизнис оперира на одреден пазар. Тој пазар има одредени граници во поглед на квантитетот на истиот. Растот на пазарот е дефиниран со растот на неговите чинители. Не можеме да очекуваме да исполниме цели кои се над можностите на пазарот во кој се наоѓа нашиот бизнис.

4. Квалитет

Квалитетот на производот и/или услугата кои ги нудиме ќе влијаат на одреден начин на целите на нашиот бизнис. Можеме ние да сакаме да оствариме нешто, но доколку квалитетот кој го нудиме нема потенцијал за да обезбеди остварување на тоа нешто приказната со нашите соништа завршува.

5. Ресурси

Ресурсите се уште еден фактор кој влијае на остварувањето на нашите цели. Без разлика дали станува збор за финансиски, материјални, човечки или пак информациски ресурси тие ќе влијаат на висината на нашите и цели и нивното остварување.

Објективност

Затоа, првиот чекор во обезбедување на соодветен развој на нашиот бизнис е да бидеме објективни и таа објективност да биде вклучена во поставување на нашите бизнис цели. Сите погоре наведен фактори треба да бидат земени во предвид (а и не само тие, туку и се што во дадена ситуација може да влијае на нашиот бизнис).

Имам видено поставени цели за имплементација на нов софтвер кои се нереално остварливи, а веќе се надминати и доцнат скоро една година. Тука главен фактор е недостаток на интелектуален капацитет на еден организациски систем, влијание на бирократија, несоодветен менаџмент на проекти и несоодветно планирање и предвидување на иднината. Значи не треба да се ограничите само на горенаведените 5 фактори затоа што различна состојба бара разгледување на различни фактори.

post

Преглед на книгата Making Ideas Happen

Making Ideas Happen

Уште од самиот почеток на овој блог бизнис идеите се тема која доста ја разработуваме. Тие се основата и почетокот на секој бизнис, тие се денот Д во раѓањето на еден нов бизнис. Пред извесен период ја купив Kindle верзијата на Making Ideas Happen од Scott Belsky и моето првично искуство од овој нов начин на читање е на многу високо ниво за што повеќе пишував Технологија – промена на навики.

Она што во прв план можам да го кажам во однос на оваа книга е дека доста се разликува од досегашните кои сум ги прочитал за бизнис идеи. Додека повеќето книги се концентрираат на тоа како да се дојде до добра бизнис идеја Making Ideas Happen се концентрира како да добрите бизнис идеи постанат реалност (да се случат, да се трансформираат во еден успешен бизнис).

Бизнис идејата е еден од факторите кои во себе содржат бизнис потенцијална енергија (концепт кој јас го дефинирав и користам воподобрувањето на бизнисите). Но, постои опасност таа бизнис потенцијална енергија да не се претвори (трансформира) во кинетичка енергија (вистински бизнис, акција). Токму тој процес на трансформација на идејата во акција е опфатен во оваа книга.

Што опфаќа Making Ideas Happen?

Книгата започнува со следнава реченица:

Идеите не се случуваат затоа што тие се одлични идеи или заради случајност.

Значи не постои случајност или пак гаранција бидејќи идејата е одлична дека ќе успее. За да успее или да се случи идеата согласно Scott Belsky потребни е следниов збир:

Случување на идејата = Идеја + Организација + Заедница + Лидерски способности

Оваа книга опфаќа се совен доаѓање до идеите, односно самата идеја.

  1. Организација. Без соодветна организација која ќе даде соодветни акциски чекори и идни насоки за завршување на проектот (идејата) идејата може да биде заборавена и оставена некаде на страна без потенцијал да стане реалност.
  2. Заедница. Секоја идеја не смее да биде во изолација. Вашиот бизнис нема да биде само за Вас. Затоа овој концепт содржи и заедница до која треба да се распространи идејата. Освен распространувањето на идејата во оваа фаза потребно е и слушање како идејата би се подобрила.
  3. Лидерски способности. Се што е ново или креативно предизвикува отпор. Затоа ефективно лидерство во процесот на имплементација на бизнис идеи е неминовно за соодветен успех.

За кого е оваа книга?

Првенствено оваа книга е за сите претприемачи, сегашни или пак идни. Не верувам дека не постои човек кој нема барем една идеја за започнување на бизнис. Сите сме креативни, тоа е вродено кај човекот. Целиот живот се сведува на решавање на проблеми, а проблемите бараат креативност.

Но, некој има неколку а некој повеќе бизнис идеи. Не мора да значи само бизнис идеи, може да постојат и идеи за проекти, за активности, за прилагодување на животниот стил… Особена помош од оваа книга може да добјат сите оние кои имаат многу идеи, а слаба реализација. Со помош на книгата ќе научат еден процес како да ги трансферираат идеите од нешто абстрактно, непостоечко во нешто реално, опипливо.

Неколку извадоци кои ми беа интересни

Со помош на Kindle имав можност да потцртувам и да следам што другите подвлекле како интересно или важно во книгата. Од едно 50-тина highlights во книгата ќе извлечам неколку тука:

  1. За секоја идеја мора да пронајдете и да ги потенцирате акциите кои треба да ги превземете во вид на чекори.
  2. Колку се појасни и поконкретни Вашите чекори помал напор ќе имате во обид да ги комплетирате. Доколку чекорите се нејасни или комплицирани, веројатно ќе ги скокнете  и ќе се насочите на другите од Вашата листа кои се поедноставни.
  3. Кога станува збор за организирање на чекорите на дневна основа и како да ја алоцирате вашата енергија во реализација креирајте две листи: една за ургентни чекори и една за важни чекори.
  4. Направете дневни подрачја за фокусирање.
  5. Без разлика дали работите сами или со тим, посветеноста на раните чекори (акции) ќе помогне идејата да се материјализира.
  6. Голем дел од извршувањето зависи од упорноста.
post

Интересни вести 30.08 – 05.09.2010

Неделни вести

Неделни вести

Избор на интересни вести за минатата недела:

УЈП – Нова услуга – ЕЛЕКТРОНСКИ УВИД ВО ДАНОЧНА КАРТИЦА

Oд 1 септември 2010 година, Управата за јавни приходи воведе нова услуга за даночните обврзници – Електронски увид во даночна картица.

Услугата e достапна за сите правни субјекти и вршители на дејност кои се корисници на електронските услуги на УЈП, односно за секој даночен обврзник кој ќе се регистрира за користење на системот е-Даноци (http://etax.ujp.gov.mk/)

Електронскиот увид во даночна картица  би требало да овозможи, во секој момент преку вашиот компјутер, да вршите проверка и да бидете во тек со состојбата на вашите даночни побарувања и обврски кои ги води УЈП, без притоа да морате да одите лично во даночните канцеларии.

За сите дополнителни прашања во врска со новата услуга, постапката за регистрација за е-Даноци, како и пријавување за претстојните обуки кои ќе ги организира УЈП на оваа тема, УЈП ги посочува следниве контакти :

Инфо центар 0800 33 000
е-пошта: info@ujp.gov.mk

Дали ќе се издава домашна обврзница ?

Во претходните недели пишувавме дека државата има проблеми со полнење на буџетската каса, а Владата дефицитот го финансира со задолжување кај банките. Ваквата состојба придонесува за намалување на ликивидноста на стопанството од едноставна причина што банките наместо слободните средства да ги пласираат по поволни услови во стопанството, посигурно им е да откупуваат благајнички записи зад кои стои државата како гарант. Често се размислува за пуштање во оптек на еврообврзница, со што државата би се задолжила во странство. Експертската јавност е со спротиставени мислења и сугерира да се издаде домашна обврзница.
Универзитетскиот професор Томе Неновски, вели дека овој потег би имал позитивни ефекти, а каматата би била пониска од евентуално издавање на еврообврзница. Би ги извлекло домашните девизни резерви на граѓаните, би се добил нов прилив на средства во девизи и би се зголемиле девизните резерви на државата. Со тоа би се заштитил девизниот курс на денарот и платно-билансната состојба и би се надополнил буџетот .

Од друга страна поранешниот министер за финансии Никола Поповски, сугерира дека не е добор државата повторно да се задолжува и дека треба да се применат мерки за намалување на задолжувањата.
Без разлика на мислењата на експертите, за Вторник веќе е најавено ново задолжување на државата преку издавање државни записи.

Македонија дел од Железничката Алијанса?

На 1-ви октомври треба да почне да функционира новото претпријатие за железнички сообраќај кое е резултат на проект започнат од 3 земји: Србија, Хрватска и Словенија. Седиштето на компанијата ќе биде во Словенија, како земја членка на ЕУ, а проектот има за цел да го направи поефикасен и побрз железничкиот сообраќај долж коридорот 10.

Претставници на Македонски Железници беа на разговори во Словенија и укажуваат дека подготовките за приклучување на Македонија кон овој проетк наскоро ќе почнат. Ова е проект од кој Македонија не би требало да остане исклучена и што би ни овозможило да ја модернизираме нашата железница, но и да се приклучиме кон трговските и патнички рути кои овој проект ќе ги овозможи.

Нашата Влада цени дека ова е интересна иницијатива, но за својот став ќе ја известат јавноста откако ќе ги разгледаат сите факти.

Се проценува дека трите земји, инволвирани во проектот, на годишно ниво од новиот концепт ќе имаат по околу 50 милиони евра добивка.

Камионџии бараат поевтин зелен картон !

На 02.09.2010 камионџиите упатија ултиматум до премиерот за намалување на цената на зелениот картон. Ако во рок од 5 дена не им се исполни барањето, најавуваат блокада на главниот град.
Освен за транспортерите, цената е висока и за другите учесници во сообраќајот. Осугурувањето се наплаќа 2 пати, еднаш при регистрација на возилата и вторпат при излез на возилата од државата. Надлежните служби најавуваат одоговор во втората полвина на месецот.

За компарација, годишен зелен картон во Македонија чини 160 евра, плус осигурување од оклоу 100 евра, додека во Бугарија истото чини 104 евра, во Србија 117 евра.

20% повеќе боледувања во 2009 во однос на 2008

Од Фондот за здравствено осигурување дека постои позитивен тренд во однос исплати за боледување на македонските граѓани. Тоа делумно се должи на владината политика за зголемување на наталитетот и исплати за породилно отсуство. Но, од друга страна постои и негативна појава на драстичен пораст на боледување кај работниците. Во 2005 год биле доделени 6.325 боледувања, а минатата година оваа бројка пораснала 16.527 што е пораст од 265 отсто. Се најавуваат засилени контроли во постапката за доделување на боледувања.
Се ствара слика дека македонските граѓани повеќе сакаат да боледуваат отколку да работат, но во суштина голема улога игра огромниот пораст на нововработените административци, на кои им е полесно да земат боледување кое го добиваат без проблем, отколку да да одат на работа, каде што немаат доделено работни задачи, ниту место за седење. На ова се надоврзува непрофесионализмот во македонските компании и се поактуелниот мобинг, кој прави на работниците да им е непходно да земат ден плус надвор од предвидените одмори, како би го издржале секојдневниот стрес.

Хром во подем!

Интернет гигантот „Гугл“ ја претстави шестата верзија на „Хром“, точно на вториот роденден на овој се попопуларен Интернет пребарувач

Главниот акцент е ставен на брзината и едноставноста, но „Хром 6“ има и голем број на други подобрувања. Овој модерен Интернет пребарувач има вградено нова верзија на познатиот „Адобе флеш“, а најзначајно е тоа што користи ХТМЛ-5.
Според истражувањара „Хром“ веќе има удел од 7,5 проценти од пазарот на Интернет пребарувачи. Првите две места и натаму ги држат „Мајкрософт Интернет Експлорер“ со 60,4 проценти и „Мозила фајарфокс“ со 22,9 проценти од пазарот. Успехот на „Хром“ е многу позначаен доколку се земе предвид дека „Опера“ по десет години постоење има само 2,4 проценти од корисниците.

post

10 Извори на информации за успешна анализа на пазарот

Информации за анализа на пазарот Успешен претприемач мора да има способност да го избере вистинскиот производ и/или услуга што ќе им го понуди на купувачите на пазар на кој постои конкуренција. Сигурно и некој пред вас започнал сличен бизнис и нуди некои производи на пазарот. Можеби сеуште нема конкуренција, но не очекувајте дека така и ќе остане за долго време. Вистинскиот производ и/или услуга кој ќе треба да го изберете ќе ви го каже почетната анализа на пазарот.

Сигурно ќе се запрашате зошто би постоел простор за влез на пазарот со производ кој што идната конкуренција го нуди. Треба секогаш да имате на ум дека пазарот се менува многу бргу. Производите кои што биле најпродавани и најкористени пред 5 години веќе не постојат. Начинот на кој се продавале тие производи пред 5 години не е ист, со тоа што денешните можности се многу поголеми. Денес постојат илјадници производи кои се консумираат од страна на потрошувачите, а постојат и илјадници начини со кои вашиот производ и начинот на продажба можат да се разликуваат од вашата идна конкуренција. Вашата работа при избор на бизнис идеја е да изберете производ и начин на продажба кој ќе биде подобар на одреден начин од она што во моментот е понудено на пазарот. Ова правило продолжува постојано и во понатамошниот животен циклус на Вашиот производ или бизнис. Токму затоа критичен елемент во оваа предстартап фаза е почетна анализа на пазарот.

Во понатамошниот дел се дадени некои извори на информации кои ќе ви помогнат за успешна анализа за избор на производот кој ќе го понудите на пазарот:

1. Локации на слични бизнис

Прошетајте ја улицита и околните улици каде планирате да биде лоциран вашиот бизнис. Направете квантитативна и квалитативна анализа на посточките бизниси на таа локација и потесната и пошироката околина на таа локација. Со помош на овие анализи ќе стекнете осет за понудата на тие бизниси меѓу кои се и потенцијални Ваши конкуренти.

2. Производ и/или услуга

Вие веќе имате или идеја или сте во бизнис со некој производ и/или услуга. Започнете со Вас самите, па потоа продолжете со Вашите најблиски, роднини и пријатели. Размислете дали вам ви се потребни тие производи, дали би ги купиле доколку се најдете во позиција на купувач. Дали тие производи би им ги подариле на вашите најблиски. Разговарајте со вашите најблиски дали имаат потреба од тие производи и колку често ги користат. На ваков начин ќе ги класифицирате производите во однос на побарувачката.

3. Анализа на побарувачка преку анкетен прашалник

Можете да спроведете и анкетен прашалник за побарувачката на тие производи. Ова претставува поскапо решение, но од друга страна дава поквалитетни резултати. Постои можност и да ангажирате виртуелен консултант за оваа прашање. Но, доколку имате веб сајт или пак блог едноставно можете да спроведете анкетен прашалник за посетителите.

4. Интернет Форуми

Втор начин за проверката на побарувачката е да се поврзете на некој форум на интернет и да отворите тема за вашиот иден или сегашен бизнис во однос на мислења за производот кој што планирате да го понудите. Ова е бесплатен начин, но бара познавање од работа со интернет. Еден недостаток може да биде што не знаете за кој регион или подрачје се однесуваат тие мислења. Од друга страна може да добиете и еден куп на безполезни одговори во вид на потсмевање или погрешно насочување. Затоа, иако овој начин вреди пробување сепак бидете внимателни.

Пребарајте други теми на форуми на интернетот кои имаат некоја врска со вашата бизнис идеа и внимателно прочитајте ги и забележете ги различните мислења на различните луѓе. На ваков начин ќе створите одредена слика за идната понуда и побарувачка на вашиот потенцијален производ.

5. Блог пост

Доколку имате Ваш бизнис блог или пак личен блог можете да ја искористите предноста на пост за вашите идеи. Едноставно образложете ја идејата и поставете прашања на кои посетиелите ќе можат да одговорат преку коментари.

6. Државен завод за статистика

На сајтот на Државен завод за статистика на Република Македонија постојат месечни и годишни статистички извештаи за различните индустрии и дејности согласно националната класификација на дејности при што ќе можете да видите како различните продажби поминуваат на пазарот во Република Македонија.

7. Весници, радио телевизии

Разгледувајте ги весниците, телевизиските станици за да ги видите рекламите на производите што се нудат. Честопати увозниците или дистрибутерите на производите даваат реклами за истите. Со особено внимание забележете што се случува во индустријата на оваа поле.

8. Потенцијални добавувачи

Пронајдете ги добавувачите на тие производи во Златна книга или Жолтите страници. Јавете се за да ви испратат понуда преку факс или меил. На овој начин ќе дојдете до набавната цена на производите. Контактирајте неколку конкуренти за да видите колкава е малопродажната цена. Со ова ќе ја утврдите моменталната маржа за тие производи.

9. Google

Google е најголемата база на податоци во светот со информации од сите можни подрачја или индустрии. Пребарајте го Google за производите што ги анализирате, ќе добиете еден куп на вредни информации кои може да ги користите и во подоцнежните фази на вашиот бизнис.

10. Најмување на професионалци

На крај можете сето оваа да оставите да го изведе некој друг за вас, односно вашиот консултант. Со што ќе заштедите доста време, но од друга страна ќе ве чини одреден дел од вашите лични финансии.

post

Претприемач: Претходна недела од 30-ти август и идна недела од 3-ти септември 2010

Претприемач - Претходна и идна недела

Претприемач - Претходна и идна недела

Да направиме рекапитулар на неделата што измина и секако планот на постови за следната недела. Следува сублимирање на претходната недела и распоредот за идната недела.

Понеделник, 30.08.2010 – Како да се преживее во слаба економија и конкурентен пазар?

Преживување, главаната грижа на секој претприемач. Во постот се дадени 30 совети за тоа како да се преживее во слаба економија како нашата и конкурентен пазар.

Вторник, 31.08.2010 – Размена на банери – Маркетинг средство 68

Размена на линкови претставува 67-мо маркетинг средство на претприемач. Во серијалот за оптимизација за пребарувачи веќе пишувавме на оваа тема, но сепак со овој пост како дел од серијалот маркетинг средства ќе дообјаснам некои елементи.

Среда, 01.09.2010 – Зголемување на креативност преку 6 совети

Овој пост е резултат на оживување на еден постар пост на претприемач со тоа што е освежен и дополнет. Во него можете да прочитате за 6 совети кои можат да ви помогнат да ја зголемите креативноста за доаѓање до добри бизнис идеи.

Четврток, 02.09.2010 – Купувачот е поумен од продавачот

Во овој пост се дадени некои размислувања во однос на тоа дали купувачите се поумни и поспремни од продавачите и какви се нивните очекувања. Постот претставува приказ на неколку мои лични искуства со продавачи и какво било моето однесување во однос на нив и бизнисот за кој работат.

Петок, 03.09.2010 – Фаза зрелост од животниот циклус на производите

Стигнавме до фазата зрелост од животниот циклус на производите. Досега го поминавме развојот на новиот производ и секако го воведовме на пазарот со отпочнување на официјалната продажба. Тој производ влезе во фазата на раст и сега веќе доаѓа во една фаза наречена зрелост. Оваа фаза од животниот циклус на производи е најдолгата по времетраење фаза во која растот се намалува а продажбата се стабилизира на одредено ниво.

Идна недела на претприемач

  • Постави ниски остварливи цели, наместо високи неостварливи
  • Аутореспондер – Маркетинг средство 69
  • 10 извори на информации за анализа на пазарот
  • Оптимизација за потрошувачи
  • Преглед на книгата Making Ideas Happen
post

Фаза зрелост од животниот циклус на производите

Животни циклуси на производи

Животни циклуси на производи

Стигнавме до фазата зрелост од животниот циклус на производите. Досега го поминавме развојот на новиот производ и секако го воведовме на пазарот со отпочнување на официјалната продажба. Тој производ влезе во фазата на раст и сега веќе доаѓа во една фаза наречена зрелост. Оваа фаза од животниот циклус на производи е најдолгата по времетраење фаза во која растот се намалува а продажбата се стабилизира на одредено ниво.

Производ во една ваква фаза претставува крава за молзење од BCG матрицата. Тоа значи дека веќе растот на пазарот е на ниско ниво, но учеството на тој производ е огромно па затоа и најголемиот прилив на готовина за бизнисот доаѓа токму од тој производ. Од друга страна профитната маржа полека но сигурно опаѓа.

Причина за опаѓање на профитната маржа

Постојат повеќе причини за опаѓање на профитната маржа, но најлогичните и најочигледните се следниве:

  • Зголемување на конкуренција
  • Зголемување на трошоци за истражување и развој како одговор на зголемена конкуренција
  • Намалување на маржата за да се остане конкурентен
  • Производот веќе не е нов и последен збор на техниката

Стратегии за задржување на позициите

Секој бизнис се обидува да ја пролонгира оваа фаза колку што може повеќе особено поради фактот што во една ваква фаза тој производ претставува најголем извор на финансии за бизнисот и затоа што по првичниот налет на конкуренцијата и намалување на профитната маржа тој пазар веќе не е интересн за нови конкуренти.

Како стратегии може да секористат:

  • Стратегија за проширување на пазарот. Со оваа стратегија се прави обид да се навлезе со тој производ на друг пазар, да се зголеми маркетингот за да се зголеми продажбата, промоција на почесто користење на производот од страна на тековните купувачи (особено за производи кои треба да се менуваат по одреден временски период на користење), развој на дополнителни можности за користење на тој производ кај тековните купувачи…
  • Одбрамбени стратегии. Ова се веќе стратегии кои треба да спречат влез на нови конкуренти или пак да го спречат растот на постоечките конкуренти.
  • Стратегија на подобрување на производот. Ова е стратегија која има за цел да внесе нов живот во производ кој старее.

Колку подолго време производот остане во оваа фаза толку подобро за бизнисот бидејќи едноставно ќе обезбеди време и пари за финансирање на нови производи.

post

Купувачот е поумен од продавачот

Купувачи поумни од продавачи

Купувачи поумни од продавачи

Честопати се појавуваат големи проблеми помеѓу продажен тим и купувачот. Кој е поумен? Дали продавачот или пак купувачот? Купувачот сака да купи нешто и очекува дека продавачот знае да му објасни и да ги разбере неговите потреби преку што ќе му го понуди вистинскиот производ и/или услуга. Продавачот е тој кој треба да му ги каже алтернативите, можностите, трошоците, придобивките и полезностите.

Но, она што мене лично најмногу ми недостасува кога сакам нешто да купам е тоа знаење од страна на тој продавач.

Интересен пост на Get Entrepreneurial прочитав за тоа како се гледаат потрошувачите од страна на продажниот тим на еден бизнис.

Она што ми остави впечаток е првата реченица која вели дека повеќето продавачи ги гледаат купувачите како било што освен како умни.

Too many salespeople view their buyers as anything but smart, especially those salespeople who deal with purchasing departments.

Дали е ова вистина? Сметам дека е.

Неколку мои лични примери

Ова се само неколку од можеби стотици примери кои ги имам почувствувано на сопствена кожа.

Пред нова година имав едно такво искуство во продавница за техничка стока кога продавачот го потцени моето знаење за она што го купувам а од друга страна не ми даде јасен одговор иако бев спремен да платам 100 евра за она што го барав. Нормално пред да појдам во продавницата малку гуглав за да прочитам и да бидам подготвен со прашања на кои очекувам одговор од страна на продавачот. Прво што беше забележително, кога го разгледував производот толку мрзеливо се приближи продавачот кон мене што веќе ми стана јасно дека тешко ќе дојдам до она што го сакам. Второ, на секое мое прашање одговорот беше или не знам или некоја реченица тешко разбирлива за мене. По 5 пеколни минути едноставно продавачот искористи и си ја здувна, а јас останав сам да размислувам дали тој производ е решение за мојот проблем.

Дури и еден мој пријател кога купуваше компјутер не успеа да направи зделка со продавачот во една поголема продавница за компјутери во Скопје (иако имаше во себе неколку илјади евра) само затоа што продавачот првин ја перцепираше облеката и изгледот на тој мој пријател! Затоа некој друг бизнис ги зеде тие пари. Продавачот не смее да ги цени луѓето по изгледот затоа што никогаш не може да знае колку пари носи во себе тој купувач. А сепак тоа е купувач.

Во една друга поголема продавница за компјутери во Скопје пред околу 5 години бев со еден мој пријател да купи компјутер. Конфигурацијата беше готова. И требаше да паркирам автомобил пред продавницата за да може да ја натовариме купената стока. Во моментот на пакување дојде сообраќајна полиција која ми ги симнуваше регистерските таблички. Излегов надвор и велам дека тргнувам веднаш само да го ставиме компјутерот. Пријателот едноставно го замоли продавачот да излезе и да каже барем еден збор дека купуваме и веднаш си одиме. Не мораше да не пуштат, но само еден збор од страна на продавачот во мене ќе создадеше слика на бизнис кој мисли за свои купувачи. Од страна на продавачот бевме одбиени, плативме казна од неколку илјади денари, но бизнисот не оствари продажба од 100.000 денари. Сепак јас не сум виновен што една голема продавница нема паркинг простор.

Во постот понатаму се вели дека еден купувач може да сретне многу повеќе такви продавачи во текот на неделата отколку што може да си замисли продавачот.

One simple thing salespeople need to keep in mind is the fact the professional buyer sees far more salespeople in the course of a week or month than most salespeople realize.

Многу е мал процентот на купувачи кои влегуваат во еден бизнис и купуваат веднаш. Луѓето шетаат. Гледаат различни продавачи. Снимаат и споредуваат. Затоа е потребно особено внимание од страна на продавачите.

Од друга страна достапноста на информации веќе ми овозможува многу добро да го проучам производот, карактеристиките или пак цената пред да донесам одлука. Затоа продавачот мора да биде поспремен од мене бидејќи јас ќе се спремам пред да тргнам во продажниот салон. А дали тој ќе биде спремен ќе видиме.

Во секој случај купувачите се многу умни, спремни и потковани со знаење уште пред да ја поминат вратата на Вашата продавница. Затоа бидете внимателни.

post

Зголемување на креативност преку 6 совети

Креативност 6 совети

Креативност 6 совети

Бизнис идеите доаѓаат од мозокот на еден претприемач. Добра бизнис идеја доаѓа кога вашата креативност е на високо ниво. Но, не сме секогаш креативни. Или пак, кога сме креативни може да се случи (што и почесто се случува) подоцна да ги заборавиме идеите затоа што не сме ги запишале. Во вакви случаи идејата се губи и веќе не е актуелна. Секој добар бизнис се базира на добра бизнис идеја која е резултат на креативноста на претприемачот.

Проблемот често пати е во временска разлика помеѓу доаѓање на една бизнис идеја и започнување со реализација на истата.

Како да ја поттикнеме креативноста во секој од нас за да дојдеме до добра бизнис идеја која ќе се трансформира во успешен бизнис? Креативноста е дел од вториот слој за успех на еден претприемач.

Постојат различни конкретни начини за максимизирање на креативноста заради изнаоѓање на одлични бизнис идеи. Следниве совети може да ви помогнат во самиот процес:

1. Имајте бележник секогаш кај себе.

Никогаш не знаете каде може да добиете добра бизнис идеја. Дали кога ручате, гледате телевизор, одмарате, слушате радио, возите автомобил или велосипед. Доколку не ги запишете нема да ги запомните. Бележникот или нотесот не мора да биде некој голем, доволно е да имате мал нотес кој можете да го носите во џеб, парче хартија и пенкало. Идеите можете да ги заведувате и на лап топ доколку го имате кај себе, можете да го користите вашиот мобилен телефон како бележник бидејќи скоро секогаш ви е при рака. Скоро и да нема мобилен телефон без некоја софтверска апликација за бележење (Notes). Можете да користите и Evernote.

2. Сменете ги рутините во вашиот живот.

Секогаш кога правиме нешто во секојдневието го правиме врз основа на некои рутини или по автоматизам. Она што го знаеме го правиме без размислување. Но, дали ќе биде исто ако не го правиме тоа на истиот начин? Доколку ги смениме рутинските работи во нашето секојдневие ќе ја поттикнеме нашата креативност. Веднаш ќе се соочиме со некој проблем кој ќе треба да го решиме што ќе бара креативност од наша страна. Се што ќе не оттргне од нашето нормално опкружување ќе на наведе да ги гледаме работите на нов многу поинаков начин.

3. Разгледувајте.

Кај и да одите или патувате, разгледувајте околу себе, следете ги работите како се одвиваат кога купувате нешто, кога читате нешто, кога јадете во ресторан, кога сте во кафеана или пак пиете пиво со пријателите. Започнете да се прашувате за тоа што го гледате и зошто го гледате тоа. Сето оваа ќе ја разбуди креативноста кај вас. Одговорот на прашањето Зошто секогаш доведува до зголемување на знаењето и секако до поттикнување на креативноста.

4. Вмрежувајте се.

Без сопствено вмрежување уште во оваа фаза од вашиот бизнис шансите за успех се мали. Сретнувајте различни луѓе, запознавајте се со нив, разменете искуства и сето тоа ќе доведе до нови идеи. Не заборавајте го интернетот преку кој можете да се допишувате и да разговарате со луѓе од различни краишта на светот. Отворете акаунт на Facebook и Twitter и полека но сигурно ширете ја сопствената мрежа на пријатели и разговарајте за темите кои ги размислувате. Искористете ги сите тие различни размислувања. Ова е уште подобро бидејќи ќе креира и потенцијални потрошувачи за вашиот иден или постоечки бизнис.

5. Реиновација.

Земете различни производи додавајте им некои својства, како на пример, додадете на фармерки некој каиш од стари алишта кој вие ќе го изработите. Дали ќе ви се допадне креацијата? Комбинирајте 2 или 3 производи во еден. Сигурно во вашата блиска околина постојат илјадници производи кои ги користите или не ги користите. Размислувајте за друго некое поинакво користење на тие производи. Сето тоа помага во креирање на конечната бизнис идеја.

6. Користете ги местата кои ја зголемуваат креативноста.

Различни места на кои се наоѓаме имаат различни влијанија на креативноста и начинот на функционирање на мозокот. Кога возите сами секогаш размислувате за нешто и во тој момент креативноста ви е на високо ниво. Обидете се да запомните нешто (бидејќи додека возите не можете и да запишувате) и потоа запишете ја идеата (Јас во случај на возење го користам мојот iPhone и една апликација која служи за снимање на гласовни белешки). Според повеќе истражувања најкреативното место за човекот претставува купатилото под туш или во бања или пак на WC школка.

Околу 90% од мажите потврдуваат дека на WC школката им е најголема креативноста, за разлика од жените кои имаат различно мислење за оваа место. Како места за извор на добри идеи се и здодевните состаноци. Секој состанок кој е долг, на кој се забегува од темите допринесува да вашиот мозок заскита на покреативни работи (Оваа е точно, сумприсуствувал на многу бесцелни и долги состаноци и во моментов кога таа здодевност ќе преовладее со мојот мозок тој веќе размислува за нешто друго).

Ова се само дел од местата за кои се смета дека ја зголемуваат креативноста, но секоја личност има различни места. Затоа пронајдете го вашето место и искористете го за креирање на бизнис идеи.

Запомнете дека добивањето на добра бизнис идеја доаѓа од различни извори. Обично бизнис идејата е резултат на мината или сегашна кариера, хобито, личниот интерес и активностите во слободно време. Понекогаш идеите се резултат од идентификација на идни трендови или пак од наоѓање на некој проблем и негово решение.

За да се добие добра бизнис идеја потребно е креативноста да е на високо ниво, односно да му допуштите на вашиот мозок да биде креативен. За да креативноста биде на високо ниво потребно е да се ставите надвор од позиција на нормалните рутини на вашиот живот.