Бидете секогаш најиновативни! Алатки, екниги и видео презентации само за најхрабрите!

post

Инкрементални промени во бизнисот

Инкрементални промени

Инкрементални промени

Промените се секојдневни кога станува збор за еден бизнис. Една од класификациите на промените може да биде инкрементални и радикални промени. Зборот инкрементални доаѓа од латинскиот збор incrementum што значи пораст, прираст, растење, напредување. Значи инкременталните организациски промени претставуваат такви промени кои доведуваат до еден константен прираст на ефективноста и ефикасноста на бизнисите, односно доведуваат до константни подобрувања во кратки временски периоди. Ове промени се појавуваат полека во еден релативно подолг временски период, со релативно константна стапка или мали флуктуации во интензитетот. Ваквите мали подобрувања гледани во подолг период може да доведат до доста големи подобрувања во перформансите на организацијата (види слика).

Инкрементални промени - нереално

Инкрементални промени - нереално

Инкрементални промени - реално

Инкрементални промени - реално

Од сликите може да забележиме дека инкременталните промени во пократок временски период не доведуваат до големи подбрувања и тие промени се мали дури и неприменливи. На сликата а) промените се претставени праволиниски што во реалноста не може да биде точно бидејќи постигнатите подобрувања се различни во различни временски интервали како што е прикажано на сликата б).

  • Карактеристично за инкременталните промени е насеоченоста кон постоечките процеси, структури и технологии. Оваа карактеристика е основа за другите карактеристики на овој тип на организациски промени.
  • Втората карактеристика на инкременталните промени е тоа што имаат многу мал ризик од неуспех. Ова е поради фактот што овие промени се иницирани од луѓето на дното на хиерархиската структура и се насочени кон подобрување на тековните процеси како и постоечката структура и технологија.
  • Третата карактеристика на инкременталните промени е мала неизвесност. Затоа кај овој тип на промени отпорот е помал. Бидејќи се работи на подобрување на постоечките елементи на организацијата кои се познати, а познат е и проблемот кој се решава и јасна е визијата за состојбата по изведување на промената, како и фактот што иницијативата е од индивидуалците кои што се среќаваат со тој проблем, веројатноста за отпор кон тие промени е многу мала.

Инкременталните промени може да бидат:

  • Реактивни инкрементални промени кога се реагира на некој проблем кога ќе се појави
  • Проактивни организациски промени кога се решаваат некои идни проблеми кои сеуште не се појавиле но можат да се појават во иднината.

Спрема насоченоста инкременталните промени може да бидат:

  • Технолошки инкрементални промени – промени во технологијата
  • Структурно-процедурални промени – промени во структурата на бизнисот
  • Инкрементални промени насочени кон луѓето
  • Техноструктурни инкрементални промени – промени насочени кон технологијата и луѓето
  • Социо-структурни инкрементални промени – промени насочени кон луѓето и структурата
  • Социо-технолошки инкрементални промени – промени насочени кон луѓето и технологијата
  • Социо-техно-структурни инкрементални промени – промени насочени кон луѓето, технологијата и структурата одеднаш.

Последниов тип на промени во реалноста е најпотребен. Не можеме да правиме промени во едно подрачје без притоа да се променат и другите. На пример со промени во технологијата ќе мора да ги обучиме луѓето (а тоа се промени) и да ја смениме структурата која нема да одговара на новата технологија.

 

post

Работни задачи на менаџерите – Дел 3

Ќе продолжиме со третиот дел од работни задачи на менаџерите. Во изминатите два дена имавте можност да ги прочитате првите два дела:

Со конкуренцијата треба да се настојува да се задржи фер и коректен однос бидејќи секоја акција предизвикува реакција, а конкурентите еден на друг можат да нанесат големи, дури и фатални штети.

Знаење и вештини во менаџерска хиерархија

Работни задачи на менаџерите

Доколку конкурентите се со урамнотежени сили, тогаш односот помеѓу конкурентите повеќе се базира на промоција на фер релации. Бидејќи постои двостран страв дека спротивната страна ќе превземе контра мерки. Но, доколку еден од конкурентите е послаб, тогаш кон него не се пристапува во „ракавици“ туку се напаѓа без респект. Можеби само со една кочница врзана со одбегнување на создавање на негативниот публицитет.

Постојат сегашни и идни конкуренти, како и директни и индиректни конкуренти. Доколку пазарот е ограничен, а конкурентите се со приближно иста сила тогаш ривалитетот е поголем.  За секоја компанија најголема опасност демне од директните конкуренти.

Конкурентите можат да воведат нова технологија, да воведат нов или да го подобрат постојниот производ, да ја намалат цената или да донесат некоја одлука што директно се конфронтира со интересите на матичната компанија.

Но, и индиректната конкуренција е опасна за интересите на компанијата. Компаниите кои произведуваат монтажни или фиксни базени, се индиректни конкуренти на компаниите кои организираат туристички патувања.

Доколку компанијата поседува производ кој е од исклучителна важност за купувачот (стан, кола, камион, компјутер), тие автоматски стануваат конкуренти на голем број други компании. Тоа се случува бидејќи купувачот за овие производи може да ги даде сите расположливи финансиски средства, дури и да земе кредит, што претставува своевидна конкуренција, бидејќи купувачот не располага со дополнителни средства за купување на други производи или купува во значително помала мерка.

Доколку компанијата работи во перспективна индустриска гранка, тогаш треба да се обиде да ги затвори сите приодни патишта за влез на нови конкуренти, бидејќи потенцијалните конкуренти секогаш внимаваат некоја компанија да направи грешка, за да влезат на пазар и по можност да земат што поголем дел од пазарниот „колач“. Дури и од конкурентите, кои не успеале во работата и пропаднале, може доста да се научи доколку се согледаат нивните пропусти и грешки, бидејќи многу подобро е да се учи од туѓи отколку да се учи од свои грешки. Заради овие причини, секој потег на конкуренцијата треба внимателно да се набљудува и да се биде спремен во секој момент да се парира со соодветна реципрочна мерка, без оглед дали се работи за ценовна политика, за подобрување на квалитетот на постојните производи и услуги или за воведување на нови производи и услуги.

Од купувачите се очекува големо добро, бидејќи со купување или со користење на услугите што ги нуди компанијата, тие директно го финансираат развој на компанијата.

Доколку е купувачот задоволен, тој ќе ги шири своите сознанија, па ќе привлече дополнителен број на купувачи, што ќе го зголеми дополнително профитот и успехот на компанијата. Но доколку не се задоволни од цената, услугата, квалитетот или од некој друг фактор (заштитата на животната средина, односот на компанијата кон вработените), купувачите можат да ја одбегнуваат компанијата, да шират негативни гласини и компанијата да ја доведат во лоша состојба.

Купувачите треба да се убедат дека производот или услугата што ги нуди компанијата се со одлични квалитети и добра цена, дека компанијата има фер и коректни односи со сите заинтересирани партнери и дека е добро и за купувачот и за компанијата да дојде до реализација на зделката.

Со добавувачите треба да се настојува да се постигнат поволни цени за компанијата, како и квалитетот на стоката да биде на предвидено ниво, да се договори начин на транспорт, начин на плаќање (готовина, компензација), време за плаќање, како и време за кое е потребно да стигне нарачаната стока.

Доколку добавувачите одобрат одложено плаќање, за компанијата тоа е еден вид на бескаматно финансирање.

На компанијата може да и прети и закана од добавувачите, доколку и тие одлучат да станат производители или доколку конкуренцијата ги побара нивни услуги. Тогаш добавувачот може да покачува цена, да намали обем на испорака или да бара некои дополнителни услуги. Тука, неминовно, за компанијата ќе се јави опасен противник.

Менаџерот мора да има и дух на претприемач, да дава идеи и да презема активности за реализација на идеите за развој, за унапредување, за нови работи, ново поле на дејствување и сл. Претприемничкиот дух претставува една движечка сила и секогаш треба да се негува.

Доколку се работи за поголема компанија, тогаш и претставниците на власта покажуваат зголемен интерес за контактирање со менаџерите од компанијата, при што најчесто од компанијата се бара да даде совет за создавање подобри односи помеѓу владата и компанијата. Тоа може да биде можност, менаџерот да создаде поволни можности за матичната компанија, да добие одредени бенефиции или информации од владата.

Во поново време се очекува од секоја компанија и од менаџерите активно да комуницираат со пошироката јавност.

Да ги објаснат своите цели, технологии со кои располагат (доколку постои сомнеж по прашање на загадување на околината или се јави сомнеж врзан за квалитетот на производите или услугите), да објаснат кои придобивки ќе ги има нивната непосредна и пошироката околина од производите и услугите што ги застапува компанијата. Доколку постојат, потребно е да се објаснат и други придобивки кои компанијата ги направила за околината (правење на патишта, садење на зеленило, вработување на локални жители, давање на донации, стипендии, кредити, придонес кон екологија), бидејќи некогаш компанијата може да се соочи со проблеми во работењето, па подршката од јавноста може да биде клуч за успех на компанијата. Социјалните медиуми денес само го олеснуваат овој процес.

За да може да се справи со толкав спектар на обврски, менаџерот треба брзо да чита и да ги анализира податоците и врз база на тоа да донесува заклучоци и да превзема акции.

Поради големите обврски менаџерите често се наоѓат во стресна состојба па можат да бидат „тешки“ како за себе така и за своите вработени и партнери. Еден човек сам не би можел сите овие обврски да ги исполни, без оглед на неговите способности, бидејќи не може физички да се постигне. Единствено кај специјални типови на менаџери, а тоа се претприемачите, постои обид во почетната фаза на работењето да се реализира големиот дел од наведените обврски, но како доаѓа до развој на компанијата, претприемачот мора постепено да воведува во работа менаџери, кои ќе покријат одреден сегмент на работење. Со воведување на поголем број на менаџери, полека ќе се формира менаџерска пирамида, која ќе го превземе работењето со компанијата. Заради тоа во стартот се формира менаџерски тим, кој ги дисперзира сите овие работни задачи на разни нивоа на менаџментот. Единствено така е можно да се реализираат сите овие работни задачи.

Овој наслов го напишавме мошне внимателно за да успееме да ги елаборираме сите менаџерски обврски. Доколку сметате дека нешто испуштивме во оваа трилогија слободно оставете коментар.

 

post

Email маркетинг – Пример зошто професионален сервис

Email маркетинг како едно маркетинг средство е моќно за малите бизнис особено поради тоа што претставува доста ефикасно и ефективно, а од друга страна и доста ефтино, па дури за некои и бесплатно.

Кога веќе го споменав зборот бесплатно, треба да напоменам дека иако не сум некој кој препорачува ваков пристап (поради фактот што поминав низ сите тие фази од бесплатен сервис до професионален сервис), сепак може да се користи од страна на бизнисите доколку станува збор за помала меилинг листа и со користење на бесплатни сервиси кои постојат до одреден број на email адреси кои ги содржи листата.

Целта на овој краток пост е да покажам еден пример зошто сервисите кои професионално ги нудат овие услуги се наплаќаат. Сакам да напоменм дека иако повеќе од една година го користам Aweber како сервис сепак сеуште ги учам можностите и опциите кои ми стојат на располагање, па така не ја исклучувм можноста да споделувам дополнителни елементи кои ги учам низ целокупниот процес.

Првин би започнал со едно потсетување на два термини од подрачје на email маркетингот кои ги опишавме во Ажурирање на бизнис поимник за email маркетинг:

  1. Bounce Rate – Претставува стапка на вратени email-ови до испраќачот кои се карактеризираат со порака од mail системот дека е вратена заради причини како што се непостоечко домен име, преполни инбокс на примателот, непостоечка еmail адреса.
  2. BlackList – Овој збор означува листа која содржи група на IP адреси, кои се осомничени за испраќање на несакани email пораки (спам). Доколку IP адресата од која ги испраќате вашите email пораки како дел од една email маркетинг кампања имаат висока стапка на жалби до интернет сервис провајдери, висока bounce стапка, или голем број на испраќања на стари и непостоечки адреси ќе постои поголема шанса да влезе во оваа несакана листа.

Ова значи дека доколку постојано испраќате email на адреси кои се веќе непостоечки, или не се отвораат поголем временски период па затоа сандачето е преполно или пак испраќате на адреса со непостоечки домен вашата адреса од која испраќате ќе влезе во таа црна листа.

Во Aweber ова е решено така што доколку неколку пати се врати пораката во вид на Bounce автоматски системот го брише тој email од листата.

Во примеров подолу забележувате дека двe email адреси се категоризирани како bounce и тоа два пати по ред за две последователни пораки.

Aweber Bounce

Aweber Bounce

Затоа системот автоматски ги брише со што се запира понатамошното праќање на тие email адреси.

Aweber - Неможност да се испрати

Aweber - Неможност да се испрати

 

post

Работни задачи на менаџерите – Дел 2

Ова е втор дел од еден подолг наслов насловен како работни задачи на менаџерите. Вчера имавте можност да го прочитате првиот дел.

Менаџерот мора да одлучува по низа прашања и при тоа треба да донесува правилни одлуки.

Синергија и анергија во бизнисот

Работни задачи на менаџерите

Практично не е можно да се опишат ниту предвидат сите прашања кои треба да се решат. Потребно е да се носат различни одлуки кога се во прашање различни партнери, купувачи, добавувачи, вработени, да се изврши распределба на ресурсите. Затоа одлучувањето претставува секојдневна работа и е едно од клучните обврски за успешно работење. За да се донесат правилни одлуки потребно е да се имаат точни информации.

Менаџерот треба сестрано да ги набљудува случувањата околу себе и од нив на директен или индиректен начин да прима информации. Информациите можат да се добијат од разни извори, а најчесто би ги поделиле на

  • официјални извори и
  • неофицијални извори.

Информации можат да се добијат од книги, соопштенија, извештаи, списанија, службени весници, стручни весници, огласи, дневни весници, преку интернет или преку телевизија. Неофицијални информации можат да се слушнат од партнерите, пријателите, вработените и други луѓе со кои се соработува. Ова се „трач“ извори, преку кои менаџерот може да добие квалитетни информации за сите учесници во бизнис процесот, а при тоа да може тешко да се открие кој ги шири тие информации. Тоа се информации од типот: што се случува во компанијата, кај конкуренцијата, кај добавувачите, кај различните соработници, дури е можно да се дознаат и емоционални проблеми доколку ги имаат вработените или партнерите (што менаџерите некогаш знаат да ги искористат).

Информаторите главно сами одлучуваат што ќе пренесат и што е интересно за менаџерот, при што некој нешто заборавил да пренесе, некој мисли дека некоја информација не е важна, па менаџерот мора да води сметка за собраните информации. Информаците треба да се проверат и да се согледа точноста на изворите кои шират одредени информации, за да не се случи некој злонамерно да шири погрешни информации, а менаџерот да донесува одлуки врз база на неточни информации.

Менаџерот треба да поседува аналитичка способност, за да може правилно да ја процени валидноста на секоја информација и при тоа да биде способен да донесе одлуки, кои не се секогаш пријатни, ниту лесни, ниту без консеквенци.

Секоја одлука има своја „тежина“, а предизвикува и последици, како за самиот менаџер, така и за сите учесници во бизнис процесот. Затоа менаџерите мора да се обидат да негуваат искрени и пријателски односи со голем број на луѓе, бидејќи добиените информации, совети или упаства секогаш се добродојдени, а погрешните или нецелосните информации на компанијата и на менаџерот би им нанеле штета. Собирањето на информации е важен сегмент во работењето, за кое треба да се одвои големо време. Со текот на времето, менаџерите стануваат се поискусни па се наоѓаат во можност да пронајдат потребни информации за пократко време, бидејќи ги имаат лоцирано изворите од кои можат да ги црпат потребните информации и нема потреба да скитаат.

Менаџерот мора да преговара и да се договара со сите учесници во бизнис процесот.

Воопшто не е лесно да се преговара, бидејќи по правило, во прашање се спротивни интереси. При преговарањето треба да се внимава на сите детали, да не се договори некоја неповолна работа и да се остави простор, доколку договорот во еден момент престане да биде атрактивен, да може да се повлече од неповолниот договор. Пример, кога менаџер за продажба преговара со купувачите, јасно е дека во врска со цената, интересите се спротивставени. Но, секогаш треба да се настојува договорот да се склучи на взаемно задоволство, со што се создаваат услови за понатамошна соработка, но и можните несогласувања се сведуваат на минимум. При преговарањето менаџерот мора да биде цврст и секогаш да има во предвид дека договорените обврски мора да ги почитува, па заради тоа мора дополнително да биде внимателен.

Компанијата секојдневно се соочува со различни промени. За да опстане на пазарот мора да се соочи со промени кои се иницирани од различни извори. Доколку такви импулси не постојат или се слаби,  менаџерот мора да иницира промени, без оглед на сите противења, бидејќи секогаш кога се иницираат промени нечии интереси стануваат загрозени, а се јавува и страв од новото и непознатото. Некогаш тој страв е оправдан, а некогаш не, но отпорот кон промените секогаш е голем и треба да се совлада.

За жал во секое работење се јавуваат и конфликти кои мора да бидат разрешени од страна на менаџерите.

Конфликтите можат да се јават на ниво на компанијата, но можат да бидат и пошироки конфликти, како конфликт помеѓу две компании, помеѓу различни партнери и слично.

Доколку конфликтот e мал, истиот може да се стави во мирување и со тек на време причините за конфликтот можат да избледат или да се изгубат, па со минимален напор се решава еден потенцијален конфликт. Некогаш конфликтот може да добие драматични размери, па потребно е истиот да се решава, бидејќи не може квалитетно да се работи доколку работната атмосфера е конфликтна и стресна. Но, за успешно решавање на конфликтот мора да бидат заинтересирани двете страни, бидејќи последиците од конфликтот за некоја страна можат да бидат минимални, па со тоа и интересот за решавање на проблемите да бидат исто минимални. Но, доколку постои заинтересираност на двете страни за решавање на конфликтната ситуација, тогаш се пристапува кон преговори со спротивставената страна и се настојува на задоволителен начин да се реши конфликтот. Некогаш заинтересираните страни можат сами да го решат конфликтот, а некогаш се бара помош на медијаторот.

Продолжува – Работни задачи на менаџерите – Дел 3

post

Работни задачи на менаџерите – Дел 1

Генерација X и генерација Y

Работни задачи на менаџерите

Главна задача на менаџерите е, користејќи ги сите расположливи ресурси да остварат профит. Ресурсите со кои менаџерите работат се: луѓе, пари, суровини, машини, опрема, технологија, згради, имиџ, патенти, заштитен знак на компанијата или на производот.

Конкуренцијата помеѓу компаниите e огромна, па од менаџерите се бара висок степен на искористување на сите ресурси, за да се постигнат максимални резултати во работењето. Секоја акција на конкуренцијата и на владата може да има пресудно влијание за работењето на компанијата. Поради ова менаџерите, но и другите вработени секогаш внимаваат на секоја акција на конкуренцијата и спремат соодветен одговор.

Има области каде работењето на менаџерите не е директно врзано за остварување на профит (сметководство, управување со државни училишта). Во тие случаи менаџерите имаат задача да раководат со извршување на задачата на најдобар начин, обезбедувајќи ефективност и ефикасност во работењето. Голем број на истражувања, направени со цел да се согледат причините за пропаѓање на одредени бизниси, покажале дека најчесто бизнисите пропаѓат поради неизбалансирано дејствување на менаџерите врз целиот систем, недоволно знаење, недоволно искуство.

На пример, се форсира производството, а се запоставува продажбата, наплатата или некој друг сегмент од работењето. За да функционира целиот систем потребно е да функционираат сите негови делови и менаџмент и производство и маркетинг и финансии и сметководство и продажба и наплата.

Менаџерите покрај управување со луѓе и создавање на профит мора да задоволат разни, дури и спротивставени интереси.

Мора да ги задоволат барањата на газдите или акционерите, на деловните партнери, на вработените, на потрошувачите, на добавувачите, на владините претставници. Балансирањето помеѓу спротивните интереси, ги дели менаџерите на успешни и помалку успешни. Синдикатот претставува голема преговарачка сила и создава зголемен притисок врз менаџерите за поголеми дневници, подобри работни услови и поголемата партиципација во одлучување, па со нив мора континуирано да се преговара. Владината регулатива за работењето се зголемува, па менаџерот мора да вработи експерт за да ги спроведува правилата и прописите поставени од владата. Групите за заштита на околина се организирани во обид да го контролират можното загадување од индустријата. Групите за заштита на потрошувачите се организираат да го набљудуваат квалитетот на производите или услугите. Гласот на жените, малцинските права и расните права се повеќе доаѓат во прв план и менаџерот мора да внимава да не се замери со некоја активност или изјава на овие влијателни групи.

Менаџерите мора да примаат гости, да одат во посети, да присуствуваат на прослави, на заеднички ручеци, да даваат интервјуа, издаваат наредби, водат состаноци, пишуваат извештаи. Примањето гости, одењето на ручеци и сличните активности, само на изглед можат да бидат интересни. Но се поставува прашањето: Што да се прави ако наместо после работното време да одете дома, Вие мора да одите по ресторани? Колку време ќе трае ручекот? Што ако гостинот се напие? и ред други прашања кои фрлаат сенка на наизглед убавиот настан.

За да ги остварат овие задачи менаџерите мора да работат со и преку луѓе, насочувајќи ги и кординирајќи ги за да се остварат зададените задачи. Многу е важно менаџерите да ги разберат однесувањата на вработените во одредени ситуации, за да ги искористат тие однесувања. Доколку менаџерот правилно го разбере однесувањето, тогаш може полесно да управува со подредените. Постигнатите ефекти се поголеми доколку се користи и насочува силата на вработените, како што се насочува силата на „реката“ во смерот на течение на реката, додека одењето спротивно од смерот на „реката“ е тешко и исцрпувачки. За жал некогаш мора и да се оди спротивно, доколку се јават проблеми во работењето на компанијата.

За да ги реализираат овие барања менаџерите мора да поседуваат комуникациски способности, внимателно да го сослушаат соговорникот и јасно да ги излагаат своите и ставовите на компанијата. Како човек што шири информации, менаџерот треба да ги дисперзира своите сознанија и ставови врз различни соговорници. Треба да зборува, да објаснува и да толкува. Менаџерите остваруваат контакти со надредени, со подредени, со себе рамни, со купувачи, со добавувачи, со конкуренти, со владини представници, со деловни партнери, со пошироката јавност, па мора да знаат јасно да ги пренесат ставовите, наредбите, задолженијата. Менаџерите во основа мораат да комуницираат во рамките на својата компанија.

Во својот работен век, одејќи кон врвот, менаџерот мора да пројде различни нивоа. Во зависност на кое ниво се наоѓа, треба да создава меѓуконекцииски врски помеѓу различни менаџерски нивоа. Врска треба да се создава и помеѓу менаџерите и вработените внатре во компанијата. Во контактите со надредени треба да поднесат извештај, треба внимателно да слушаат наредби и задолженија, за да бидат во состојба да ги реализираат.

Во комуникација со менаџерите од исто менаџерско ниво, треба да разменуваат заеднички искуства, да ја зголемуваат социјализацијата и да ги зацврстуваат пријателските релации. Тоа се едни од предусловите за создавање успешен менаџерски тим. Во комуникацијата со подредените треба јасно да се презентираат работните задачи, ако е потребно и дополнително да се објаснат, за подредените да бидат во состојба да ги реализираат.

За да ги реализираат сите комуникацииски обврски, менаџерите се користат со вербалното и невербалното комуницирање.

Двата начини на комуникација подеднакво се користат, но вербалното комуницирање претставува директно пренесување на ставовите и наредбите, додека невербалното комуницирање повеќе индиректно ги пренесува ставовите на менаџерите.

Вербалното комуницирање може да се одвива во пишана и во усмена форма.

Пишаната комуникација остава трага во облик на документ, кој може да послужи во случај на спор или недоразбирање. Писмените упаства се во принцип, јасно искажана форма па подредените не можаат да бараат оправдување дека одредената задача не ја разбрале. Секогаш кога се донесуваат важни одлуки се настојува тоа да биде во пишана форма.

Усното комуницирање може да се одвива директно, преку телефон, преку разглас или преку интернет. Предноста е што се одвива побргу, што и другата страна може да учествува во дискусија, па можат директно да се појаснат недоразбирањата. Недостатоците на ваков начин на комуникација е што најчесто не остануват траги од комуникацијата (освен ако не се врши снимање, што е препорачливо), па подредениот некогаш може свесно да ги избегнува обврските, правдајќи се со недоволно разбирливи наредби. Некогаш може да дојде и до произволно и погрешно толкување на наредбите и со тоа да се јават грешки во спроведување на наредбите.

Невербалното комуницирање се одвива во вид на насмевка, муртење, прозевање, чешање, вртење на поглед, дигање на раменици, црвенило во лице, држење на тело во одредена позиција. Невербалното комуницирање егзистира и во секојдневното однесувања, но менаџерот може да го усоврши ова однесување за да постигне посакуван ефект врз други личности. Преку невербалното комуницирање може да се откријат намерите на соговорникот, дали е нервозен, дали се служи со лаги, дали е искрен, дали се брза. Менаџерот овие сигнали може да научи да ги толкува преку искуството стекнато од пракса, но добро е да се консултира и литература во која се објаснети типовите на невербалното комуницирање и нивното значење. Но и тука треба да се биде внимателен, бидејќи и соговорникот може да биде запознаен со пораките кои ги праќа невербалното комуницирање, па намерно може да праќа спротивни сигнали од она што чувствува.

Продолжува – Работни задачи на менаџерите – Дел 2.

post

Маркетинг пред започнување

Маркетинг пред започнување

Маркетинг пред започнување

Маркетинг постои и треба да постои уште пред започнување на бизнисот и уште пред завршување со развој на производот и/или услугата.

Многу често слушам прашања од страна на потенцијални претприемачи дали треба и како треба да имплементираат маркетинг активности уште пред започнување на бизнисот. Кога би се рагледувал животниот циклус на бизнисите ќе стане јасно дека стартапот не претставува првата фаза. Нешто за овој дел опфативме и во претходниот наслов: 10 Задачи за пред започнување на бизнисот. Многу задачи и активности како и маркетинг активности треба да бидат опфатени уште пред да се отвори вратата на бизнисот.

За успешно лансирање на производот и/или услугата и за успешно започнување на бизнисот многу е важно да спроведете соодветен пристап во поглед на маркетинг функцијата иако бизнисот уште не постои или пак производот и/или услугата сеуште не се развиени. Вие имате идеја на која што работите. Но, таа идеја сеуште не е бизнис можност која ќе биде прифатена од пазарот. Затоа вашата цел е бизнис идејата да ја преточите во вистинска бизнис можност.

Подолу се дадени 5 најважни елементи од маркетинг функцијата кои ќе треба да ги имплементирате уште пред започнување на бизнисот.

1. Развој на потрошувачи

Што значи развој на потрошувачи, или подобро како да ги развиете вашите идни потрошувачи?

Многу е полесно на веќе постоечки пазар да се зборува за развој на потрошувачи, но ние тука се обидуваме да превземеме нешто за иднината – да развиеме потрошувачи за сеуште непостоечки бизнис или непостоечки производ и/или услуга.

Кога станува збор за развој на потрошувачи ќе треба да одговорите на следниве прашања:

  • Кои се тие?
  • Кои се нивните потреби?
  • Каква е нивната желба за задоволување на тие потреби?
  • Можеме ли да ги задоволиме нивните потреби во целост?
  • Каде се наоѓаат тие?
  • Како се однесуваат тие?
  • Како да им пристапиме?

Со помош на одговорна овие прашања ќе имате една слика за оние потрошувачи кои би требало да го купуваат вашиот нов производ и/или услуга.

2. Вмрежување

Како да го оствариме тој првичен контакт со тие идни потрошувачи? Ние сеуште немаме производ и/или услуга, за што ќе зборуваме?

Бидејќи веќе знаете кои се тие, какви потреби имаат, како се однесуваат, каде се наоѓаат и како да им пристапите, сега вашата цел е да им пристапите и да ги трансформирате во една движечка сила за вашиот бизнис.

Вмрежувањето може да биде онлајн (преку социјални медиуми – Twitter, Facebook, Linkedin…) како и офлајн преку состаноци, дружби, конференции, семинари, саеми…

Во оваа фаза вие едноставно се запознавате со вашите потенцијални потрошувачи, подлабоко навлегувате во нивните потреби, желби, проблеми, идеи, размислувања…

3. Собирање на информации од потрошувачи

Какви информации ми се потребни? Што да правам со истите?

Безполезно е вмрежувањето доколку од тоа не извлечете информации и уште во оваа фаза од бизнисот не ги примените за подобрување на вашата идеја, вашиот иден бизнис, вашиот производ и/или услуга.

Во текот на тие контакти вие можете да ги разберете вистинските проблеми и потреби на потенцијалните купувачи и да ги искористите тие информации во процесот на дизајнирање на производот и/или услугата.

4. Постави датум на лансирање на производот

Кога ќе започнам? Што треба да првам од објавување на датумот на започнување до вистинско започнување?

Со поставување на датум на лансирање, со објаснување на сите придобивки кои ќе ги добијат тие потрошувачи и сите карактеристики како и се она што е имплементирано преку информации од претходната фаза целта е да започнете о процесот на кревање на врева за таа случка.

Целта е да бидете дознаени и да поттикнете чувство на желба и ургентност за вашите производи и/или услуги кај сите тие потенцијални потрошувачи.

5. Тестирај ги прототиповите

Сигурно веќе ги имате првите прототипови на производи и/или услуги и можете да започнете со тестирање со некои потенцијални потрошувачи.

Иако го имате прототипот ништо не гарантира успех на истиот. Иако поминавте низ претходните 4 фази сепак не постои гаранција дека тоа е тоа. Зошто да не ги искористите вашите нови пријатели од вмрежувањето и да го тестирате завршно вашиот прототип.

На ваков начин можете да дојдете до исклучителни информации за последно подобрување на производот и/или услугата со цел обезбедување на успешно лансирање на истиот.

Секако не заборавајте да побарате препораки од сите задоволни тестери кои ќе ги користите во почетните маркетинг средства.

post

10 Задачи за пред започнување на бизнисот

Задачи пред започнување на бизнис
Задачи пред започнување на бизнис

Започнување на бизнис претставува резултат на повеќе активности уште пред самиот старт на истиот. Во зависност на бизнисот некогаш ќе има потреба од повеќе активности.

Во овој пост ќе се обидеме да ги наведеме 1о задачи кои ќе треба да ги спроведете уште пред започнување на вашиот бизнис.

1. Одговорете на прашањето зошто започнувате бизнис

Што сакате да постигнете?

Зошто започнувате бизнис? Дали заради тоа што пронајдовте одлична бизнис можност која што сеуште не е задоволена на пазарот? Дали заради тоа што сакате да обезбедите подобар живот за вас и вашето семејство?

Многу е важно пред да донесете одлука за започнување да бидете начисто со самиот себеси околу вашите желби, можности и капацитети.

2. Проучете ја индустријата и пазарот

Што се случува во индустијата и пазарот?

Иако сите сме свесни дека светот не е перфектен и постојат многу можности за еден претприемач сепак не можете да очекувате дека ќе бидете сами на пазарот или во таа индустрија или пак дека за долго време ќе останете сами да го собирате колачот од вашиот бизнис.

Затоа направете анализа на индустријата и пазарот на кој ќе настапите со вашиот нов бизнис. Како помош за спроведување на овие активности прочитајте ги следниве постови на претприемач:

3. Тестирајте ја вашата идеја

Дали производот и/или услуга ќе биде прифатен од пазарот?

Иако иидејата или бизнис можноста може да биде уникатна, перфектна и да изгледа дека нема да има промашување, сепак тоа вие не го одлучувате. Затоа е препорачливо секогаш да ја тестирате идејата на пазарот во однос на оа дали ќе биде прифатена.

4. Диференцирајте се уште сега

Што е она што ќе ве разликува од остатокот од светот?

Мора да изградите доволно силна супериорна вредност преку соодветна диференцијација на вашиот бизнис во однос на останатите учесници на пазарот.

5. Изработете маркетинг стратегија

Како ќе стигнете до потенцијалните потрошувачи?

Во почетните фази од вашиот нов бизнис маркетинг стратегијата ќе биде суштествена за привлекување на потенцијални потрошувачи и генерирање на доволно продажба за финансирање на нормалното функционирање на бизнисот.

6. Предвидете ја продажбата барем за една година

Како ќе се движи продажбата и приходите од продажбата?

Мора да направите иницијално предвидување на продажбата за да можете останатите проекции да ги базирате на истата. Оваа предвидување е основа која има за цел да ви покаже како ќе изгледа влезот на финансии во вашиот бизнис кој е многу значаен за секо стартап бизнис.

7. Анализирајте ја рентабилноста

Ќе бидете ли профитабилни или ќе работите со загуба?

Освен продажбата која ја предвидовте во претходната задача ќе мора да ја внесете и трошочната структура која ќе ви покаже колку треба да продавате за да ги покриете трошоците. Како алатка која можете да ја искористите за овој чекор е графиконот на рентабилноста.

8. Финансирање

Колку пари ми требаат, имам ли толку и како ќе дојдам до тие пари?

Оваа задача треба да ви обезбеди една структура која ќе ви покаже како стоите во поглед на потребни финансии како за започнување така и за финансирање на функционирањето на бизнисот барем за првта година.

9. Слушајте

Што се зборува околу мене и на пазарот воопшто?

Многу елементи на вашата понуда можат да се подобрат во оваа фаза на пред започнување на вашиот бизнис. Бидете добар слушател истовремено кога ги продавате вашите идеи.

10. Побарајте помош

Можам ли се сам?

Клучното прашање е дали имате капацитетот сето ова сам да го спроведете. Доколку се чувствувате слаби во било кое подрачје не двоумете се да побарате помош, како од пријател така и од некој професионалец.

post

Развој на вашата стратегија во 4 чекори

Како ќе ги остварите целите доколку не знаете што треба да направите за истите да постанат реалност?

Во стратегија за трансформација на бизнис цели по анализирање на дефиниција за стратегија заклучивме дека:

  • Стратегија е средство за исполнување на бизнис цели. Доколку немате бизнис цели не ви треба ни стратегија.
  • Стратегија претставува еден вид на план во кој се специфицирани акции кои Вие како претприемач ќе ги превземете.
  • Стратегијата е составена од тактики кои пак се составени од активности со што ќе ги исполниме посакуваните цели.

Во овој пост ќе се обидеме да навлеземе во еден систематски приод во развој на вашата стратегија. На сликата е даден еден поедноставен процес за креирање на стратегија како и некои од можни алатки кои се користат во секоја од фазите.

Процес на изработка на бизнис стратегија

Процес на изработка на бизнис стратегија

1. Цели

Секое стратешко планирање започнува од целите кои треба да се остварат. Нели, поребно е да знаете каде треба да стигнете за да започнете да го дефинирате патот, средствата за транспорт, времето, попатни станици…

2. Анализа

Следниот чекор во развој на вашата стратегија треба да биде анализа на:

  • Бизнисот
  • Околината (опкружувањето во коешто опстојува бизнисот)
  • Потрошувачите
  • Стејкхолдерите (сите кои имаат влијание врз бизнисот, како и сите врз кои одлуките во бизнисот имаат влијание).

Постојат различни алатки, методи или техники кои можете да ги користите во спроведување на една ваква анализа, но оние најприменливи се:

3. Идентификација на стратешки опции

Третиот чекор е колку што може повеќе да се идентификуваат стратешките опции кои му стојат на располагање на бизнисот. Затоа во овој дел се користат техники на бреинстормирање, преиспитување на сите можности и закани како можностите би се опфатиле и искористиле во стратегијата додека заканите би се елиминирале или во краен случај би се намалило нивното влијание.

Како една дополнителна алатка во овој чекор можете да ја користите и алатката насловена како 5 Зошто каде 5 пати се поставува прашањето зошто по секој одговор. Друга алатка во оваа идентификација на стратешки опции која ви стои на располагање е Root Cause – односно анализа на причините за се што ќе се наведе како проблем при што ќе се добијат идеи за подобрувања.

4. Евалуација и избор на стратешки опции

Додека целта на претходниот чекор беше да се идентификуваат сите стратешки опции за бизнисот, целта на овој чекор е сите претходно идентификувани стратешки опции да се анализираат и оценат и согласно таа анализа и оценка да се изберат оние кои ќе бидат дел од стратегијата.

За оваа цел можете да користите методи за анализа на ризик на секоја од идентификуваните стратешки опции. Во некои случаи може да ви биде потребен и графиконот на рентабилноста за да се преиспита односно да се визуелизира секоја стратешка опција преку еден монетарен износ и импликации врз бизнисот.

Се надеваме дека еден ваков поедноставен процес полесно ќе ве воведо во процесот на стратешко планирање кој ви е потребен иако сте мал бизнис.

post

100 маркетинг активности за малите бизниси

Листа на маркетинг активности

Листа на маркетинг активности

Малите бизниси ги немаат капацитетите на големите во поглед на финансии и ресурси за промоција на сопствените производи и/или услуги. Но, затоа креативноста и флексибилноста им овозможува да привлечат голем број на потенцијални купувачи.

Постојат илјадници маркетинг активности кои им стојат на располагање на малите бизниси. Кои ќе се превземат зависи од бизнисот како и од креаитивноста и умешноста на претприемачот.

Во овој пост ќе направиме обиде на едно место да ставиме 100 активности кои како сопственик на мал бизнис можете да ги превземете уште од утре. Секако дека оваа листа не е конечна и доколку сметате дека нешто вредно е испуштено (а е испуштено сигурно) слободно можете да дадете сугестија преку коментар на овој пост.

  1. Изработи маркетинг план
  2. Доколку имаш маркетинг план ажурирај го истиот
  3. Преразгледај го твојот целен пазар
  4. Одговори на прашањето што целниот пазар сака од тебе
  5. Одговори на прашањето како да ги задоволиш потребите на целниот пазар
  6. Спроведи истражување на пазарот
  7. Побарај можности за подобрување
  8. Разгледај ја твојата понуда и подобри ја
  9. Прошири ја понудата со нови вредносни елементи
  10. Следи ги промените и подобрувај секаде каде има можност и потреба за подобрување
  11. Изработи или пак доколку ги имаш подобри го дизајнот (уникатноста) на твоите бизнис картички
  12. Направи бизнис картички за сите вработени во бизнисот и поттикни ги да ги делат
  13. Направи или ажурирај ги твоите брошури
  14. Направи ги тие брошури достапни и преку веб сајт (доколку имаш)
  15. Редизајнирај ја целосната комуникација (писма, email, фактури, испратници…) за да комуницираат и информации за вредноста која ја нудиш
  16. Лансирај кампања со персонализирани писма и тестирај ги различните содржини и нивната ефикасност.
  17. Обиди се со различни повици за акција содржани во тие писма.
  18. Искористи ги бесплатните мали огласи за градење на присутноста на твојот бизнис
  19. Обезбеди дека твојот бизнис е присутен во електронското издание на Златна книга
  20. Направи листа на сегашни и потенцијални купувачи
  21. Контактирај ги досегашните купувачи преку телефон
  22. Контактирај некои „најсигурни“ потенцијални купувачи преку телефон
  23. Користи маркетинг календар за сите маркетинг активности кои ги спроведуваш или планираш да ги спроведуваш
  24. Дизајнирај иницијативи на споделување на искуството на твоите задоволни потрошувчи
  25. Преразгледај ги повиците за акција кои ги користиш во сите маркетинг средства
  26. Тестирај различни повици за акција
  27. Преразгледај го и подобри го кредибилитетот како на сите бизнис членови така и на бизнисот воопшто
  28. Рекламирај се на ТВ
  29. Рекламирај се на радио
  30. Рекламирај се во весници
  31. Ако постојат огласни табли онаму каде се движат твои потенцијални потрошувчи направи еден материјал и закачи го
  32. Учествувај на саем за да ги изложиш твоите производи и/или услуги
  33. Посетувај саеми заради градење на нови мрежи
  34. Побарај потенцијални бизниси со кои би можеле да настапите здружено за некое маркетинг средство
  35. Обиди се со бесплатни примероци или бесплатно пробување
  36. Направи месечни, тромесечни или пак годишни билтени
  37. Провери дали сите маркетинг средства се едноставни и разбирливи за потенцијалните купувачи
  38. Организирај забава заради некаков повод (годишнина, голема зделка, преселба…)
  39. Рекламирај се на билборди
  40. Направи ја пораката во сите маркетинг средства да содржи ургентност
  41. Добро запознавај ги твоите потрошувачи
  42. Провери ја и подобри ја твојата супериорна вредност
  43. Изгради моќен систем за препораки
  44. Постави го твојот бизнис на најпопуларните онлајн огласници
  45. Поврзи се на некој од попопуларните форуми и започни со конверзација
  46. Доколку немаш направи, доколку имаш редизајнирај го твојот веб сајт доколку не си го редизајнирал повеќе од една година.
  47. Анализирај го сајтот во однос на страните кои се најпопуларни
  48. Имплементирај блог во самиот сајт и почни да блогираш.
  49. Блогирај на регуларна основа
  50. Постави форма за регистрација како на веб сајтот така и на блогот заради користење на email маркетинг
  51. На регуларна основа испраќај email-ови на твојата листа
  52. Подобри го твојот потпис на email-овите
  53. Додај функционалности за споделување на твоите email-ови
  54. Имплементирај RSS како на веб сајтот така и на блогот
  55. Внимателно избери клучни зборови и секундарни зборови поврзани со твојот бизнис и околу кои ќе ја градиш присутнсота на веб просторот
  56. Оптимизирај го веб сајтот и сите блог постови
  57. Купи рекламен простор на некои веб сајтови од нишата на твојот бизнис
  58. Направи вебинар за користење на твоите производи и/или услуги
  59. Направи подкастинг серијали за користење на твоите производи и/или услуги
  60. Избери и користи професионален аутореспондер како софтвер за твоите email маркетинг кампањи
  61. Коментирај на други блогови каде што се наоѓаат потенцијални купувачи
  62. Секојдневно бреинстормирај потенцијална содржина за социјални медиуми (блог, facebook, twitter, linkedin…)
  63. Започни со Google Adwords PPC кампања
  64. Рекламирај се на Facebook
  65. Рекламирај се на LinkedIn
  66. Направи Facebook страна за твојот бизнис (страна не профил)
  67. Покани ги твоите лични пријатели и сите досегашни потрошувачи да станат фанови на Facebook страната
  68. Секојдневно ажурирај ја Facebook страната со нова интересна содржина за фановите
  69. Смени го URL-то на твојата страна на Facebook да биде едноставно
  70. Креирај Twitter профил
  71. Одговарај или ретвитај некој друг на Twitter
  72. Твитај мислење, блог постови, линкови, слики, видео….
  73. Направи профили или пак доколку го имаш ажурирај го твојот профил на LinkedIn
  74. Барај и поврзувај се преку LinkedIn
  75. Подеси Foursquare сметка за твојот бизнис
  76. Постави го твојот бизнис на Google Places
  77. Изгради присутност на социјални обележувачи
  78. Обележувај твоја една содржина и минимум 10-20 туѓа содржина
  79. Учествувај на сајтовите за групно купување
  80. Направи видео презентација и постави го на YouTube
  81. Ембедирај го видеото во еден блог пост
  82. Разгледај ги најпопуларните онлајн директориуми и постави го твојот бизнис таму
  83. Следи ја твојата и на твојот бизнис онлајн репутација
  84. Креирај наградни игри
  85. Креирај попустни купони
  86. Имплементирај програма за наградување на најголемите потрошувачи
  87. Имплементирај програма за наградување на честите купувања
  88. Подели празнични подароци на најголемите купувачи
  89. Планирај ги промоциите за следните празници
  90. Испрати роденденски честитки за твоите купувачи
  91. Донирај некоја локална случка
  92. Спонзорирај некоја локална спортска манифестација
  93. Пријави се за конференција во твојата или друга сродна индустрија
  94. Комуницирај со другите посетители на таа конференција
  95. Разменете бизнис картички со оние посетители кои имаат потенцијал да ви станат потенцијални потрошувачи.
  96. Подготви и испрати прашалник за анализа на задоволството на потрошувачите
  97. Анализирај ги одговорите и подобри секаде каде што се бараат подобрувања
  98. Извести ги сите кои учествувале во прашалникот и кои ви дале идеи за подобрување дека истите се спроведени
  99. Организирај забава во популарен ноќен клуб каде ќе се поделат бесплатни примероци на твоите производи
  100. Најми маркетинг консултант доколку сметаш дека ти треба помош.

 

post

Добар бизнис план – 10 Елементи

Предвидување на продажба

 

Планирање

Бизнис планот или процес на бизнис планирање е тема која е позастапена на претприемач. Ова е поради фактот што бизнис планот е еден од елементите кои содржат бизнис потенцијална енергија, но и еден од елементите кои таа бизнис потенцијална енергија ја трансформираат во кинетичка енергија, односно во профитаблен и успешен бизнис.

Колку бизнис планот е подобар толку и ќе има поголема потенцијална енергија во него. Но, едно од почестите прашања кои се поставуваат е што значи добар бизнис план?

Наједноставен одговор би бил оној бизнис план кој ќе се оствари и кој по остварување ќе доведе до зголемување на профитабилноста и успешноста на бизнисот. Но, поширок одговор би бил:

  • Оној бизнис план кој е реализиран во целост. Добар е оној бизнис план од кој се што е планирано е реализирано. Доколку нешто не е реализирано значи дека сме планирале нешто што не е реално.
  • Оној бизнис план кој ќе овозможи реализација на финансиските предвидувања. Добар е оној бизнис план кој доведува до успешна реализација на нашите финансиски предвидувања како што се приходи од продажба, маржа, профит, трошоци, готовински тек…

Значи успешната реализација на бизнис планот е мерка за тоа дали тој бизнис план е добар или не.

Елементи кои бизнис планот го прават да биде „добар“ бизнис план:

  1. Да се свати значењето на бизнис планот. Првиот фактор за добар бизнис план е да се сфати значењето на истиот. Доколку не се свати значењето на бизнис планот од страна на претприемачите ќе нема ни бизнис план и наредните фактори не се важни.
  2. Да се започне со планирање. Без да се започне со планирањето ќе немаме бизнис план па така нема да можеме да го делиме на добар или лош бизнис план.
  3. Реални предвидувања за иднината. Многу е лошо кога ќе се потфрлат или пак преценат можностите на бизнисот во предвидувањата. Во вакви ситуации не ви е потребен бизнис планот бидејќи не лежи на реални основи. На пример, можете да наведете предвидувања дека продажбата ќе биде повисока за 100%. Но, оваа навистина е тешко остварливо. Многу пореално би ило 10% или 20% па во некои исклучителни ситуации и до 50% на годишно ниво.
  4. Реална анализа и истражувања. За да бизнис планот биде реалистичен во однос на предвидувањата мора да се базира на вистинска анализа и истражување на пазарот. Една таква анализа ќе ги даде вистинските основи за предвидувања за иднината.
  5. Бизнис планот ги опфаќа бизнис потребите. Прво и основно за да еден бизнис план биде добар е да ги опфаќа бизнис потребите за периодот за кој се однесува. Секој бизнис план треба да тргне од тоа кои се потреби треба да се остварат во периодот за кој се однесува бизнис планот. На пример, зголемување на продажба и приходи, зголемување на профитот, организациски промени, потребни нови маркетинг стратегии …
  6. Одговорности за имплементација. Бизнис планот ги опфаќа сите аспекти и подрачја од работењето на бизнисот. Тој дефинира работни задачи за периодот кој следува. Доколку нема точно дефинирани личности за секој елемент од имплементација на бизнис планот тешко дека тие активности ќе се реализираат. На таков начи Вие како претприемач само ќе ја потрошите Вашата потенцијална бизнис енергија за изработка на бизнис план кој нема да се спроведува. Тогаш и не вие потребен бизнис планот.
  7. Дефинирање на контролна функција за имплементација. Секогаш ќе има еден или повеќе имплементатори и еден контролор. Колку и да звучи лошо оваа но сепак реалноста покажува дека мора да постои. Доколку никој не го контролира имплементирањето и ги споредува резултатите со планираното постои голема веројатност дека нема да се добијат резултати кои што се планирани.
  8. Прецизно дефинирана комуникација помеѓу менаџментот и вработените. Секоја имплементација на нешто што се планира бара и соодветна комуникација. Оваа комуникација може да биде вертикална од горе (менаџментот) надолу и од доле (вработени) нагоре, како и хоризонтална помеѓу вработени од исти нивоа. Ниедна активност од бизнис планот не може да се реализира од еден индивидуалец доколку бизнисот има повеќе вработени. Добро дефинираната комуникација ќе овозможи да не се појават одредени недоразбирања при имплементацијата.
  9. Специфичност и јасност. Доколку бизнис планот не е специфичен и јасен ќе доведе до забуни и проблеми за имплементацијата. Но, што треба да се подразбира под специфичност и јасност. Секоја активност која произлегува од планот треба да биде специфична во поглед на задачи, рокови, датуми, претпоставки, потребни финансии… Се она што има можност да се мери мора да биде наведено во мерлива единица како бројка, датум, денари итн. Едноставно запрашајте се како ќе знаете дека нешто е остварено. Добриот план дава одговор на следниве прашања:ШТО, КОЈ, КОГА и КАКО.
  10. Можност за ревидирање. Нема секогаш планот да се спроведува онака како што е замислено. Заради тоа потребни се постојани ревидирања на истиот. Условите на пазарот можат непредвидливо да се променат. Доколку бизнис планот не се ревидира согласно новонастанатите услови на пазарот нема да може да биде остварлив, а со тоа и дбар. Затоа е подобро да се изврши ревидирање на истиот.