post

Одлуки на патот кон успехот

Поседување на сопствен бизнис и играње на претприемачката игра не е лесна задача за вас. Доколку претприемништвото било толку лесно нема да има вработени. Секој ќе биде претприемач.

Но, различни луѓе имаат различни движечки сили кои ги носат до успехот. Некои луѓе сакаат да го прават она што навистина сакаат да го прават, без разлика на приходите што ќе ги добијат, некој ќе сака да го задржи зголемувањето на бизнисот до најмногу десет луѓе.

Да погледнеме некои прашања кои ќе бидат корисни доколку сакате да ја најдете вашата движечка сила што ќе ве однесе до успехот.

#1 Што навистина сакате да правите?

Дали навистина сакате да го правите она што вашиот бизнис ќе го побара од вас? Тука не станува збор само за сакање, веројатно најважниот дел е да се знае што е она што навистина треба да се прави.

Многу пати, претприемачите не се ни свесни што се е потребно да прават за нивниот бизнис. Тоа е првиот и можеби најголемиот конфликт помеѓу нив и нивните компании.

Но, ако знаете што треба да се правите, а тоа е многу повеќе од иновирање во областа на вашиот бизнис ќе треба и да сакате да го правите. На пример, ќе треба да управувате, да размислувавате за финансии, набавка, маркетинг…

#2 Што е со вашата сегашна состојба?

Важно да знаете што е она што го имате денес во вашите раце. Ќе треба да знаете што имате, и што потенцијално може да изгубите со започнување на бизнисот.

Понекогаш, вашата сегашна состојба може да ве врати назад, што значи дека нема да ги преземете чекорите што треба да се преземат.

#3 Колку голем сакате да биде вашиот бизнис?

Некои претприемачи не сакаат да имаат голем бизнис со многу вработени и без семејна атмосфера.

Други сакаат да го развиваат и раснат својот бизнис колку што е можно повеќе.

Различните пристапи поинаку ќе го дефинираат вашиот успех и патот до тој успех.

#4 Што е со финансиите?

Вашите финансии многу пати ќе бидат важен креатор на патот кон успехот.

Дали ви се потребни дополнителни средства? Како ќе ги добиете? Дали ќе треба да се откажете од некој дел од вашата компанија? Кој ќе одлучува?

Ова се важни прашања за вашиот бизнис и секако вашето работење во иднина.

#5 Што е со вашите лични морални вредности?

Вашите лични морални вредности многу пати ќе ја дефинираат иднина на бизнисот. Тие ќе бидат патоказ кој ќе ви каже кога ќе треба да ја менувате насоката на движење, за да останете на вистинскиот пат, единствениот кој води до успехот.

Овие вредности ќе ви помогнат да ги разликувате добрите од лошите работи и многу пати вашите одлуки ќе се базираат токму на нив.

#6 Што е со луѓето со која сакате да работите?

Не можете да бидете, или не можете да останете сам, кога сте претприемач. Ќе морате да работите со различни луѓе на дневно, неделно или месечно ниво.

Каков тип на луѓе ви се допаѓаат, и со кои луѓе ке сакате да работите, ќе влијае на вашите бизнис одлуки.

#7  Подготвени сте да преземате ризик! Но, колку?

И како последно, но исто така важно е ризикот кој сте спремни да го поднесете. Секој потфат значи ризик за вас, вашето семејство и вашиот бизнис. Колкав ризик можете да преземете?

post

Идеи кои може да ги искористиш од Април 2012

Со завршување на четвртиот месец од оваа 2012 година и започнување на петиот месец време е за серијалот од месечни идеи. Овој пост претставува збир на оние најчитаните, односно најдобрите постови кои како идеи може да ги искористиш за развој на твојот бизнис, а се објавени претходниот месец, во овој случај април.

Овие наслови, на крајот на годината по уште една анализа на популарноста ќе влезат на страната Започни тука.

Во април 2012 на претприемач беа објавени 29 наслови што е помалку од вообичаениот квантитет, но не заради мрзеливост, туку повеќе заради недостаток на време заради некои проекти на кои морав да работам. Од друга страна имавме и празници.

Па, да видиме што е она најактуелното што можеш да го искористиш за твојот бизнис од Мај 2012 година.

Започнување на бизнис

Менаџмент

Маркетинг

Претприемач

post

[Видео] Мотивирачко видео за креативност и смелост

Пред два дена пишував за креативноста и смелоста која се уништува уште од мали нозе кај децата. Тоа беше едно мое искуство низ образовниот систем. Опасноста е во тоа што нема многу промени од пред повеќе од 20 години. Простотиите се исти. Амбиентот е ист. Технологијата и методите се исти.

Промени се потребни. А, оваа видео е само како мотивација за креативни и смели луѓе, како и оние кај кои општеството успеало да влијае на креативноста и смелоста.

post

Креативност и смелост преку промени во образованието

Враќање во училиште за да станеш одличен Навистина кога сме деца се е едноставно. Живееме во тој детски свет каде лесно можеме да бидеме кој сакаме, да фантазираме, да креираме, но и да не бидеме разберени.

Потоа доаѓаат зборовите од нашите родители, не тоа, ќе се повредиш, не смееш…

Потоа доаѓа училиштето. Ах, тоа училиште кое уште повеќе не “дотепува”, а тоа е цената која ја плаќаме за да научиме да пишуваме и читаме. Во мое лично искуство, учев во ОУ Крсте Мисирков во Куманово, и освен што научив да не бидам креативен, да јадам ќотек и кога не требав од страна на професорите, да пишувам, читам, собирам, одзимам, множам и делам ништо друго не научив. Всушност научив и за моќта. Кога татко ми не го издаде нашиот дуќан под кирија на мојата професорка по географија од четворка добив единица. Секој час бев пред таа “проклета” географска карта и секој ден бев пред тие книги насловени како географија кои и ден денес ми се гадат. Дали научив географија? Не.

Од мојот професор по историја повторно научив дека има некој со моќ, а некој кој треба да молчи. Првиот час, од тој професор добив шлаканица со изговор дека тој е добар пријател на татко ми, а јас не сум бил на своето место кога влегувал. Вториот час ме влечеше за уво низ целата училница за да ме доведе до моето место, притоа намерно грешејќи го патот. Дали научив историја? Не. Научив нешто по повеќе години кога ги читав томовите од Историја на Македонскиот народ. Но, научив дека треба да молчам, да седам на место, да го слушам моќниот…

Музичко на крајот во осмо одделение имав тројка, иако сите имаа петки затоа што не сакав да пеам, отворено му кажав на професорот не сакам, ќе бидам инженер. Мојата казна затоа што му го нарушив угледот беше единица која со оние просеци дојде до тројка. Казна, затоа што знаев што сакам. И преживеав со тројка музичко. Но, она што е важно е дека не молчев и се побунив. Сепак, не ја уништиле смелоста целосно во мене. Иако целта им беше токму тоа.

Потоа дојде средно. Техничко училиште со најлош глас во градот, но тоа ме смени. Имав професор по математика со кој седевме во кафуле и одговарав следниот час на табла затоа што пиев пиво. Но, математиката ја научив. Целта ми беше тројка и имав тројка. Но, тој ми постави поголема цел да добијам четворка и добив четворка. Потоа ми постави цел која никогаш не мислев дека би можел да ја реализирам, да имам петка математика. Но, и тоа го реализирав. Професорот беше строг, никој не го сакаше, но ме научи математика. Потоа следуваше матурирање кога и ме прогласија за најдобар математичар во последните две децении во тоа училиште.

Дојде и факултетот. Првите години со слабо развивање на креативноста и смелоста, но и доста големи поттикнувачи на креативноста кога се запишав на насоката каде луѓето од Институтот за производно машинство го формираа Индустриско инженерство и менаџмент. ја имав таа среќа да бидам на Машински Факултет во Скопје каде се беше поразлично од останатите факултети во земјата.

Ова е само еден дел од моето искуство кога станува збор за образовниот систем и едно мислење дека тој игра и може да игра важна улога во развојот на претприемништвото (Очигледно дека во последно време се прават се поголеми напори, особено во средното и високото образование). Но што е со основното? Кај мене постојат изгубени 4 години (од пето до осмо).

И сега нема многу промени, освен “ќотекот”. И сега се користат истите методи како пред повеќе од 20 години, а децата се далеку поинтелигентни, баратаат со многу посилна технологија.

Промените се потребни во кои ќе учествуваат сите инволвирани страни, затоа што развојот на претприемништвото бара смелост и креативност кои пак се градат од мала возраст.

Професори, учители, палката е кај вас и родителите. Мора да работите заедно за развој на поквалитетно општество во оваа земја. Тоа мора да ви биде првата работа без разлика на верска, етничка или политичка припадност. Оставете ги проблемите (кои сите ги имаме) пред влезот во училиштето и вклучете се иако несвесно во развојот на претприемништвото.

post

Можеш ли да го направиш она за што мислиш дека не можеш?

Фокус на претприемачот Можеш да го направиш она што сите други го прават! Тоа е факт.

Можеш да го направиш она за што сите други немаат храброст да го направат! Тоа е исто така факт.

Но, исто така можеш да ги правиш нештата, за кои што мислиш дека не можеш да ги направиш!

Како човечки суштества многу пати ние самите немаме доволно верба во нашите сопствени способности за да направиме нешто што се чини неверојатно за нас.

Сè може да се направи. Сè  може да се подобри. Сè може да се научи.

Ако веруваш во себе, и си подготвени да преземеш активности, можеш да направиш работи за кои мислиш дека не можат да се направат.

Стравот е една од најопасните сили која ќе те повлече назад. Твојот страв ти прави да не веруваш во себе. Твојот страв ти кажува да не се преземаш акција секогаш кога ќе треба да се презема акција. Стравот ти кажува да запреш кога знаеш дека треба да продолжиш. Зошто ти е потребно да го слушаш твојот страв? Што ќе изгубиш ако ќе продолжиш? Што ќе добиеш ако запреш? Дали ги знаеш одговорите на овие прашања?

Мора да се направи нешто. Мора да се промени нешто ако сакаш да успееш. Започни со зголемување на својата верба во себе, а потоа победи го стравот и започни да ги работиш работите за кои мислиш дека не можеш да ги направиш.

Ако си просечен претприемач, просечен сопственик на фирма или просечен човек кој продава просечни производи и услуги како можеш да очекуваш дека твоите купувачи ќе те разликуваат од твоите конкуренти?

Поради тоа треба да бидеш исклучителен. Треба да бидеш број еден. Ти треба да го направиш она што мислиш дека не можеш да го направиш! Треба да ги направиш работите за кои твоите купувачи сметаат дека не можеш да ги направиш. Твојот бизнис треба да биде уникатен, затоа што е твој, но со доволно самодоверба и без страв.

Добиваш сила, храброст и доверба со секое искуство во кое што престануваш да гледаш страв… Мора да започнеш да ги правиш работите за кои мислиш дека не можеш да ги направиш. ~ Eleanor Roosevelt

post

Идеи кои може да ги искористиш од Март 2012

Претприемач

Претприемач

Веќе сме во четвртиот месец од оваа 2012 година кога помина првата недела. Овој пост претставува месечен серијал за оние најчитаните, односно најдобрите постови кои како идеи може да ги искористиш за развој на твојот бизнис, а се објавени претходниот месец. Претходниот месец во овој случај е март 2012 година.

Овие наслови, на крајот на годината по уште една анализа на популарноста ќе влезат на страната Започни тука.

Во февруари на претприемач беа објавени 44 наслови во кои преовладуваше темата за започнување на бизнис што е логично како главна тема за оваа 2012 година на претприемач.

Па, да видиме што е она најактуелното што можеш да го искористиш за твојот бизнис од Март 2012 година.

Започнување на бизнис

Маркетинг

Продажба

Претприемач

post

Видео: Патот кон успехот никогаш не е без препреки

Точно така, никој од досегашната практика не успеал а да не поминал низ повеќе препреки на патот кон тој успех.

Оние кои поминале повеќе препреки, падови, неуспеси или било што што се попречува на патот кон нивниот успех се чини дека постигнуваат најголем успех, токму поради тоа акумулирано искуство на тој пат.

Да се биде претприемач значи и да се паѓа, но разликата е што успешниот претприемач секогаш наоѓа начин да стане и да го продолжи патот, избегнувајќи исти падови во иднина. Се е ризик, бизнисот е ризик, претприемачкиот пат е ризик, па и животот кој го живееме е ризик.

Видеото е навистина мотивирачко, кратко и вредно за гледање.

post

Започнување на бизнис без системи

Еден претприемач и фази во започнување Ќе се обидеме преку два поста и два целосно спротивставени примери да презентираме различни ситуации на ист бизнис започнат од ист претприемач, но со различни пристапи. Сликата десно се однесува на еден човек, претприемачот и неговите фаци во овој процес кој се нарекува започнување на бизнис.

Ќе започнеме со бизнис без никакви системи, без организациска структура бидејќи при започнување тој, претприемачот е се во бизнисот.

Нашиот замислен претприемач ќе се вика Перо, тој има идеја да започне бизнис. Идејата на Перо се однесува на сендвичара со органска храна.

Перо смета дека идејата ќе помине во услови кога се повеќе се зборува за органска храна, а од друга страна неговите родители имаат земја каде одгледуваат органска храна која може да му служи како дел од репроматеријал за производство на сендвичите. Остатокот ќе го набавува од неговите пријатели кои произведуваат таков репроматеријал.

По некои подготовки во однос на најмување на простор, средување и набавка на основните намирници за започнување како и завршување на формалностите, Перо го започнува бизнисот со отворање на вратите на неговата сендвичара. Неговата умешност во комбинација на состојките во производство на сендвичи е на одлично ниво. Самото отворање и покана на гости кои ги пробале сендвичите поттикнале висок степен на ефект на вирозен маркетинг од уста на уста.

Веќе по неколку месеци, работата на сендвичарата го тера да вработи еден соработник. Тој забележал дека не може да биде и чистач и производител, и продавач и маркетар, и администратор и “физикалец”, и снабдувач и договарач. Затоа го вработил Ставре братот на неговата жена. Така да, кога Перо правел сендвичи, Ставре набавувал, чистел, контактирал со купувачите… Кога Ставре чистел, Перо бил во набавка и продавал. И така се функционирало супер. Но, умешноста на Перо во правење на сендвичите доведува до уште поголемо зголемување на работата. Му треба уште еден човек. Вака не се постигнува, а математиките покажуваат дека може да си дозволи да вработи уште еден.

И така пријателот на наговиот братучед, Горан станува уште еден член на неговиот тим. Повторно се е во нормала. Перо може целосно да се посвети на неговата техничка функција како претприемач во правење на сендвичи, Ставре го менувал и во производството кога Перо имал работа во набавка. Ставре како постар вработен добил и нови задолженија да менаџира, односно да планира за работата, да го контролира и обучува Горан.

Така се функционирало како што треба за Перо, бизнисот растел преку зголемена побарувачка, добар глас за квалитетот и умешноста на правење на сендвичи на Перо. Но, умешноста морала да се имплементира секојдневно при што Перо бил врзан минимум 7-8 часа дневно. Сака да се шири со уште една продавница бидејќи парите доаѓаат од овааа првата. Затоа и го задолжува Ставре да разгледа неколку локации каде би можеле да го прошират бизнисот. Ставре пак како верен прв вработен во фирмата веднаш трча да ја заврши задачата.

По неколку состаноци со потенцијалните обезбедувачи на простор и неколку интерни состаноци на Перо со Ставре одлучуваат да најмат простор во источниот дел од градот и секако да вработат уште тројца во бизнисот. Едниот ќе започне веднаш и ќе се обучува од страна на Перо во производството (правење сендвичи) додека се подготвува втората локација. Вториот и третиот ќе се вработат откако продавницата ќе се отвори и ќе бидат одговорни за сите останати работи поврзани со втората продавница и комуникацијата помеѓу двете.

По неколку месеци, она што го планирале и го оствариле. Втората продавница веќе работи. Почетните резултати се ветувачки. Ставре е менаџерот кој едноставни обезбедува се да функционира како што треба. Тој најмува работници, тој се грижи за набавките, тој се грижи за исплаќањето на платите и подготовка на документите како администрирање. Перо целосно може да си се посвети на она што сака да го прави, да произведува сендвичи заради кои и бизнисот дошол до оваа фаза.

Но, ова е премногу добро, за да биде вистинито.

По проширувањето и по зголемувањето на работата започнуваат да се јавуваат некои навидум едноставни проблеми, но сепак влијателни кои целосно ќе го сменат текот на бизнисот. Ставре како крал на функционирањето на бизнисот овластува некои од неговите блиски соработници (кои тој ги регрутирал за Перо) да почне да нарачува суровини од компанија со која Перо воопшто не работел претходно. Квалитетот на суровините не бил на нивото од оној почетниот кога Перо набавувал само од неговите родители и пријатели. Тоа влијаело на намалување и на квалитетот на сендвичите.

Започнуваат првите жалби на купувачите. Се крева вистинска врева од страна на Перо како можело тоа да се случи. Ставре немал одговор? И добро, Перо ја презема одговорноста врз себе и не дозволува веќе Ставре да одллучува за набавките. Но, загубите веќе се видливи, а бидејќи Перо сега работи и на набавки и на производство на сендвичите неговиот замор допринесува да продолжи да опаѓа квалитетот.

Во меѓувреме, Перо започнува да реагира нервозно, се јавува во втората продавница и разговара со луѓе кои воопшто не ги ни познава. Нив ги најмил Ставре и едноставно и тие се збунети и не знаат како да постапат.

Грешките се повторуваат не само на квалитетот, туку и во однос на комуникација со купувачите, во однос на одржување на хигиена во продавниците, во однос на комуникација помеѓу целиот тим во бизнисот…

Ставре веќе не може да го трпи притисокот од Перо, а бидејќи е брат на жената на Перо одлучува да си замине. Перо од друга страна е притиснат и од сопствената сопруга, сепак Ставре е нејзиниот брат. Едноставно му се руши целиот свет. Останатите вработени не го ни забележуваат бидејќи Ставре бил авторитетот а не Перо, кој е претприемач и сопственик на бизнисот.

Перо одлучува да ја затвори втората продавница и да се обиде да ја спаси првата која со голем ентузијазам и желба за успех ја започнал. Штетата е голема, кредити, сметки… Продажбата се помала. Еден по еден вработените си заминуваат. Кој отпуштен бидејќи не завршил работа како што треба, кој самиот си заминува заради се поголемо намалување на платите.

Перо пак останува сам како во првите неколку месеци, со таа разлика што тогаш имал желба и имал визија дека сака да успее. Сега веќе е скршен, без идеи, без желба за поголем труд, притиснат во аголот без некои големи можности за свртување. Дури и од семејството е сметан како губитник.

Купувачите ги нема! Сметките се собираат! Потребна е брзза одлука што да се прави.

Постојат две можности: целосен пропаст и затварање на бизнисот, или обид да се направи од почеток онака како што треба.

Следува вториот дел за обид да се направи од почеток онака како што треба.

post

Идеи кои може да ги искористиш од Февруари 2012

Претприемач

Претприемач

Веќе сме во третиот месец од оваа 2012 година, односно поминува првиот квартал од годината. Овој пост претставува месечен серијал за оние најчитаните, односно најдобрите постови кои како идеи може да ги искористиш за развој на твојот бизнис, а се објавени претходниот месец. Претходниот месец во овој случај е февруари 2012 година.

Овие наслови, на крајот на годината по уште една анализа на популарноста ќе влезат на страната Започни тука.

Во февруари на претприемач беа објавени 48 наслови во кои преовладуваше темата за маркетинг. Маркетинг темата беше актуелна бидејќи сакавме да направиме малку пауза со темата за започнување на бизнис која всушност е главна тема за оваа година и особено поради еден серијал за меѓународен маркетинг и секако маркетинг планот и негова подготовка преку одговор на 8 прашања.

Па, да видиме што е она најактуелното што можеш да го искористиш за твојот бизнис од Февруари 2012 година.

Започнување на бизнис

Оваа 2012 година главната тема на претприемач ќе биде започнување на бизнис. Фактот дека она што најмногу ни треба е креација на нови бизниси, за ново време прилагодени кон најновите светски трендови. Темата е избрана поради фактот што развојот на науката и технологијата во последниве години доведе до многу промени кои имаат големо влијание на процесот на развој на нови бизниси. Но, ние су тераме, онака по старо, онака како сме научиле, или поточно како не научиле.

Маркетинг

Што е маркетинг? Дали маркетингот е наука? Дали маркетингот е уметност?

Маркетинг претставува еден креативен процес во бизнисот кој овозможува соодветна комуникација помеѓу бизнисот и производот или услухата со купувачите. Но, не било кои купувачи, туку идеални купувачи. Бидејќи претставува процес кој што пак од друга страна е креативен процес во маркетингот се измешани повеќе научни дисциплини. Оној кој повеќе е насочен кон финансиските работи ќе го гледа како трошок, иако не е. Оној кој е насочен кон техничко технолошките работи ќе го гледа како нешто што создава непотребен притисок врз развојот и производството. Но, целта е тој маркетинг процес да ги интегрира сите функции на бизнисот кога станува збор за најважниот надворешен фактор – купувачот.

Ќе се занимаваме доста во оваа подрачје оваа година, бидејќи како секундарна тема на претприемач за оваа година ја определивме темата за маркетингот.

Менаџмент

Некој веднаш ќе каже зошто менаџмент, кога јас сум и претприемач и менаџер и вработен. Но, менаџмент концептот сепак е нешто што треба да претставува еден вид на “патобран” кој нема да дозволи твојот бизнис да излезе од патот. Не е важно што можеби во моментов си сам, ти треба но и допрва ќе ти треба. Подобро уште во раните фази да ги изградиш и имплементираш менаџмент системите за да твојот бизнис биде подготвен за иднината.

Претприемач

Сепак бизнисот е креација од два ентитета: претприемачот и купувачот. Еден без друг неможе да функционираат, ниту да постои бизнис.

Во минатото оваа тема беше доста форсирана, но и ќе продолжиме со неа, само не со некој голем интензитет.

Продажба

И секако, продажбата е конечната цел на секој бизнис процес. Без продажба нема ни бизнис. Но, продажбата не значи и крај на процесот, таа е нов почеток, на еден нов циклус на развој на бизнисот.

post

Уште една цел – 1000 наслов на претприемач веќе е објавен

1000-тиот пост на претприемач веќе е објавен

1000-тиот пост на претприемач веќе е објавен

На 30.09.2010 година прославивме мал јубилеј од 500 постови на претприемач. Денес, по една година и три месеци од тој јубилеј можеме да се пофалиме дека ја поминавме границата од 1000 наслови.

Денешниот наслов Глобални маркетинг цели – пазар во однос на производот напишан од страна на Илија Чубровиќ ја имаше таа чест да биде јубилејниот илјадитиот пост на претприемач.

Имајќи во предвид дека 99% од содржината е сопствена креација на авторите и истовремено креаторите (двајца) на претприемач, сепак претставува еден солиден напредок за оваа кратко време од три години колку што и постои овој сајт. Знаењето кое е опфатено тука би можел да го претставам како:

  • Над илјада книги од оваа проблематика прочитани од страна на авторите во последните 15 години.
  • Искуство собрано од работа службено и неслужбено со стотици компании како клиенти, како пријатели, како поддржувачи…
  • Десетици научно-истражувачки проекти од проблематиката на претприемаштво.
  • Континуирано следење на развојот на науката кога станува збор за претприемаштво и менаџмент во последните 15 години од страна на авторите.
  • Континуирана желба за обезбедување на издржани и докажани алатки и техники за претприемачите во Македонија од страна на авторите.
  • Континуирана желба на авторите Македонија да ја видат во едно поубаво светло како општество кое креира, развива и го менува животот не само на жителите на оваа земја туку и на целиот свет.
  • Реализација на мисијата поставена уште во 2009 година да креираме знаење лесно достапно за претприемачите.

Тоа е она што секој може да го препознае во 1000-те наслови на претприемач. Со сопствени средства, со скромни буџети, без никаква поддршка го постигнавме она што денес претставува овој сајт. Кога почнавме Илија ми кажа дека набргу ќе нема за што да пишуваме, дека ова се исцрпни теми. Но, праксата покажа дека темата која ја обработуваме претставува една научна тема, која постојано треба да се истражува и проучува. Постојано се доаѓа до нови сознанија, дури и со некои од почетните текстови и самите ние нема да се сложиме во целост. Но, тоа е основата, тоа е процесот, тоа е знаењето… Секогаш има нешто подобро. А, тоа значи дека и во овој сајт постојат уште премногу места за подобрување за што ќе се насочиме во периодот кој следува.

Благодарност до сите читатели на претприемач.

Благодарност до сите меилови за поддршка, бидејќи тоа е основниот двигател кој не тераше и не тера да продолжиме со работа на оваа содржина.

Благодарност до сите оние кои пратија свој текст за да се објави и се вклучија во придонесот за развојот на претприемаштвото во Република Македонија.

Благодарност до сите оние кои преку свој коментар ја дополнија содржината и се вклучија во придонесот за развојот на претприемаштвото во Република Македонија.

Благодарност и до сите оние кои преземаа и реобјавија наслови од овој сајт, онака како што треба “машки” со сите нишани на фер плеј.

Благодарност и до оние на кои не им се допаднавме, кои не опсипаа со “пцовки”, иако се помалку од 0,1%, сепак ги почитуваме и цениме.

И секако ќе го искористам ова за едно известување. Артиклите на претприемач од сабота веќе не постојат, ги избришав и доколку се обидете да пристапите на http://www.pretpriemac.com/articles ќе ве пренасочи на почетната страна. Таму се наоѓаа над 150 наслови, од кои еден дел се префрлени и преобработени тука, а одреден дел не се. Оние кои не се префрлени тука во следниве неколку денови ќе бидат преработени и реобјавени, додека некои едноставно се уништени. Но, забележав дека еден дел од уништените се по грешка (на пример не можам да го најдам текстот за BCG матрица) која ќе се обидеме да ја исправиме со наоѓање на тие текстови во нашата лична архива или едноставно повторно составување и објавување.

Затоа во следниот период има едно 10-тина наслови кои ќе бидат доста долги бидејќи претставуваат групирани и преработени серијали токму од тој избришан дел. На пример, серијалот за реинженеринг кој имаше три наслови сега ќе биде преработен објавен во еден, бидејќи сметаме дека ќе биде од корист некому. Истото е и со TQM, Lean менаџмент и фрактална филозофија.